੩. ਏਰਕਪਤ੍ਤਨਾਗਰਾਜਵਤ੍ਥੁ

ਕਿਚ੍ਛੋ ਮਨੁਸ੍ਸਪਟਿਲਾਭੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਬਾਰਾਣਸਿਯਂ ਉਪਨਿਸ੍ਸਾਯ ਸਤ੍ਤਸਿਰੀਸਕਰੁਕ੍ਖਮੂਲੇ ਵਿਹਰਨ੍ਤੋ ਏਰਕਪਤ੍ਤਂ ਨਾਮ ਨਾਗਰਾਜਂ ਆਰਬ੍ਭ ਕਥੇਸਿ.

ਸੋ ਕਿਰ ਪੁਬ੍ਬੇ ਕਸ੍ਸਪਬੁਦ੍ਧਸਾਸਨੇ ਦਹਰਭਿਕ੍ਖੁ ਹੁਤ੍ਵਾ ਗਙ੍ਗਾਯ ਨਾਵਂ ਅਭਿਰੁਯ੍ਹ ਗਚ੍ਛਨ੍ਤੋ ਏਕਸ੍ਮਿਂ ਏਰਕਗੁਮ੍ਬੇ ਏਰਕਪਤ੍ਤਂ ਗਹੇਤ੍ਵਾ ਨਾਵਾਯ ਵੇਗਸਾ ਗਚ੍ਛਮਾਨਾਯਪਿ ਨ ਮੁਞ੍ਚਿ, ਏਰਕਪਤ੍ਤਂ ਛਿਜ੍ਜਿਤ੍ਵਾ ਗਤਂ. ਸੋ ‘‘ਅਪ੍ਪਮਤ੍ਤਕਂ ਏਤ’’ਨ੍ਤਿ ਆਪਤ੍ਤਿਂ ਅਦੇਸੇਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਅਰਞ੍ਞੇ ਸਮਣਧਮ੍ਮਂ ਕਤ੍ਵਾਪਿ ਮਰਣਕਾਲੇ ਏਰਕਪਤ੍ਤੇਨ ਗੀਵਾਯ ਗਹਿਤੋ ਵਿਯ ਆਪਤ੍ਤਿਂ ਦੇਸੇਤੁਕਾਮੋਪਿ ਅਞ੍ਞਂ ਭਿਕ੍ਖੁਂ ਅਪਸ੍ਸਮਾਨੋ ‘‘ਅਪਰਿਸੁਦ੍ਧਂ ਮੇ ਸੀਲ’’ਨ੍ਤਿ ਉਪ੍ਪਨ੍ਨਵਿਪ੍ਪਟਿਸਾਰੋ ਤਤੋ ਚਵਿਤ੍ਵਾ ਏਕਰੁਕ੍ਖਦੋਣਿਕਨਾਵਪ੍ਪਮਾਣੋ ਨਾਗਰਾਜਾ ਹੁਤ੍ਵਾ ਨਿਬ੍ਬਤ੍ਤਿ, ਏਰਕਪਤ੍ਤੋਤ੍ਵੇਵਸ੍ਸ ਨਾਮਂ ਅਹੋਸਿ. ਸੋ ਨਿਬ੍ਬਤ੍ਤਕ੍ਖਣੇਯੇਵ ਅਤ੍ਤਭਾਵਂ ਓਲੋਕੇਤ੍ਵਾ ‘‘ਏਤ੍ਤਕਂ ਨਾਮ ਕਾਲਂ ਸਮਣਧਮ੍ਮਂ ਕਤ੍ਵਾ ਅਹੇਤੁਕਯੋਨਿਯਂ ਮਣ੍ਡੂਕਭਕ੍ਖਟ੍ਠਾਨੇ ਨਿਬ੍ਬਤ੍ਤੋਮ੍ਹੀ’’ਤਿ ਵਿਪ੍ਪਟਿਸਾਰੀ ਅਹੋਸਿ. ਸੋ ਅਪਰਭਾਗੇ ਏਕਂ ਧੀਤਰਂ ਲਭਿਤ੍ਵਾ ਮਜ੍ਝੇ ਗਙ੍ਗਾਯ ਉਦਕਪਿਟ੍ਠੇ ਮਹਨ੍ਤਂ ਫਲਂ ਉਕ੍ਖਿਪਿਤ੍ਵਾ ਧੀਤਰਂ ਤਸ੍ਮਿਂ ਠਪੇਤ੍ਵਾ ਨਚ੍ਚਾਪੇਤ੍ਵਾ ਗਾਯਾਪੇਸਿ. ਏਵਂ ਕਿਰਸ੍ਸ ਅਹੋਸਿ – ‘‘ਅਦ੍ਧਾ ਅਹਂ ਇਧ ਇਮਿਨਾ ਉਪਾਯੇਨ ਬੁਦ੍ਧੇ ਉਪ੍ਪਨ੍ਨੇ ਤਸ੍ਸ ਉਪ੍ਪਨ੍ਨਭਾਵਂ ਸੁਣਿਸ੍ਸਾਮੀ’’ਤਿ. ਯੋ ਮੇ ਗੀਤਸ੍ਸ ਪਟਿਗੀਤਂ ਆਹਰਤਿ, ਤਸ੍ਸ ਮਹਨ੍ਤੇਨ ਨਾਗਭਵਨੇਨ ਸਦ੍ਧਿਂ ਧੀਤਰਂ ਦਸ੍ਸਾਮੀਤਿ ਅਨ੍ਵਡ੍ਢਮਾਸਂ ਉਪੋਸਥਦਿਵਸੇ ਤਂ ਧੀਤਰਂ ਫਣੇ ਠਪੇਸਿ. ਸਾ ਤਤ੍ਥ ਠਿਤਾ ਨਚ੍ਚਨ੍ਤੀ –

‘‘ਕਿਂਸੁ ਅਧਿਪ੍ਪਤੀ ਰਾਜਾ, ਕਿਂਸੁ ਰਾਜਾ ਰਜ੍ਜਿਸ੍ਸਰੋ;

ਕਥਂਸੁ ਵਿਰਜੋ ਹੋਤਿ, ਕਥਂ ਬਾਲੋਤਿ ਵੁਚ੍ਚਤੀ’’ਤਿ. –

ਇਮਂ ਗੀਤਂ ਗਾਯਤਿ.

ਸਕਲਜਮ੍ਬੁਦੀਪਵਾਸਿਨੋ ‘‘ਨਾਗਮਾਣਵਿਕਂ ਗਣ੍ਹਿਸ੍ਸਾਮਾ’’ਤਿ ਗਨ੍ਤ੍ਵਾ ਅਤ੍ਤਨੋ ਅਤ੍ਤਨੋ ਪਞ੍ਞਾਬਲੇਨ ਪਟਿਗੀਤਂ ਕਤ੍ਵਾ ਗਾਯਨ੍ਤਿ. ਸਾ ਤਂ ਪਟਿਕ੍ਖਿਪਤਿ. ਤਸ੍ਸਾ ਅਨ੍ਵਡ੍ਢਮਾਸਂ ਫਣੇ ਠਤ੍ਵਾ ਏਵਂ ਗਾਯਨ੍ਤਿਯਾਵ ਏਕਂ ਬੁਦ੍ਧਨ੍ਤਰਂ ਵੀਤਿਵਤ੍ਤਂ. ਅਥ ਅਮ੍ਹਾਕਂ ਸਤ੍ਥਾ ਲੋਕੇ ਉਪ੍ਪਜ੍ਜਿਤ੍ਵਾ ਏਕਦਿਵਸਂ ਪਚ੍ਚੂਸਕਾਲੇ ਲੋਕਂ ਵੋਲੋਕੇਨ੍ਤੋ ਏਰਕਪਤ੍ਤਂ ਆਦਿਂ ਕਤ੍ਵਾ ਉਤ੍ਤਰਮਾਣਵਂ ਨਾਮ ਅਤ੍ਤਨੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠਂ ਦਿਸ੍ਵਾ ‘‘ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਆਵਜ੍ਜੇਨ੍ਤੋ ‘‘ਅਜ੍ਜ ਏਰਕਪਤ੍ਤਸ੍ਸ ਧੀਤਰਂ ਫਣੇ ਠਪੇਤ੍ਵਾ ਨਚ੍ਚਾਪਨਦਿਵਸੋ, ਅਯਂ ਉਤ੍ਤਰਮਾਣਵੋ ਮਯਾ ਦਿਨ੍ਨਂ ਪਟਿਗੀਤਂ ਗਣ੍ਹਨ੍ਤੋਵ ਸੋਤਾਪਨ੍ਨੋ ਹੁਤ੍ਵਾ ਤਂ ਆਦਾਯ ਨਾਗਰਾਜਸ੍ਸ ਸਨ੍ਤਿਕਂ ਗਮਿਸ੍ਸਤਿ. ਸੋ ਤਂ ਸੁਤ੍ਵਾ ‘ਬੁਦ੍ਧੋ ਉਪ੍ਪਨ੍ਨੋ’ਤਿ ਞਤ੍ਵਾ ਮਮ ਸਨ੍ਤਿਕਂ ਆਗਮਿਸ੍ਸਤਿ, ਅਹਂ ਤਸ੍ਮਿਂ ਆਗਤੇ ਮਹਾਸਮਾਗਮੇ ਗਾਥਂ ਕਥੇਸ੍ਸਾਮਿ, ਗਾਥਾਪਰਿਯੋਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਭਵਿਸ੍ਸਤੀ’’ਤਿ ਅਦ੍ਦਸ. ਸੋ ਤਤ੍ਥ ਗਨ੍ਤ੍ਵਾ ਬਾਰਾਣਸਿਤੋ ਅਵਿਦੂਰੇ ਸਤ੍ਤ ਸਿਰੀਸਕਰੁਕ੍ਖਾ ਅਤ੍ਥਿ, ਤੇਸੁ ਏਕਸ੍ਸ ਮੂਲੇ ਨਿਸੀਦਿ. ਜਮ੍ਬੁਦੀਪਵਾਸਿਨੋ ਗੀਤਪਟਿਗੀਤਂ ਆਦਾਯ ਸਨ੍ਨਿਪਤਿਂਸੁ. ਸਤ੍ਥਾ ਅਵਿਦੂਰੇ ਠਾਨੇ ਗਚ੍ਛਨ੍ਤਂ ਉਤ੍ਤਰਮਾਣਵਂ ਦਿਸ੍ਵਾ ‘‘ਏਹਿ, ਉਤ੍ਤਰਾ’’ਤਿ ਆਹ. ‘‘ਕਿਂ, ਭਨ੍ਤੇ’’ਤਿ? ‘‘ਇਤੋ ਤਾਵ ਏਹੀ’’ਤਿ. ਅਥ ਨਂ ਆਗਨ੍ਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਂ ਆਹ ‘‘ਕਹਂ ਗਚ੍ਛਸੀ’’ਤਿ? ‘‘ਏਰਕਪਤ੍ਤਸ੍ਸ ਧੀਤੁ ਗਾਯਨਟ੍ਠਾਨ’’ਨ੍ਤਿ. ‘‘ਜਾਨਾਸਿ ਪਨ ਗੀਤਪਟਿਗੀਤ’’ਨ੍ਤਿ? ‘‘ਜਾਨਾਮਿ, ਭਨ੍ਤੇ’’ਤਿ. ‘‘ਵਦੇਹਿ ਤਾਵ ਨ’’ਨ੍ਤਿ? ਅਥ ਨਂ ਅਤ੍ਤਨੋ ਜਾਨਨਨਿਯਾਮੇਨੇਵ ਵਦਨ੍ਤਂ ‘‘ਨ ਉਤ੍ਤਰਂ ਏਤਂ ਪਟਿਗੀਤਂ, ਅਹਂ ਤੇ ਪਟਿਗੀਤਂ ਦਸ੍ਸਾਮਿ, ਆਦਾਯ ਨਂ ਗਮਿਸ੍ਸਸੀ’’ਤਿ. ‘‘ਸਾਧੁ, ਭਨ੍ਤੇ’’ਤਿ. ਅਥ ਨਂ ਸਤ੍ਥਾ, ਉਤ੍ਤਰ, ਤ੍ਵਂ ਨਾਗਮਾਣਵਿਕਾਯ ਗੀਤਕਾਲੇ –

‘‘ਛਦ੍ਵਾਰਾਧਿਪ੍ਪਤੀ ਰਾਜਾ, ਰਜ੍ਜਮਾਨੋ ਰਜ੍ਜਿਸ੍ਸਰੋ;

ਅਰਜ੍ਜਂ ਵਿਰਜੋ ਹੋਤਿ, ਰਜ੍ਜਂ ਬਾਲੋਤਿ ਵੁਚ੍ਚਤੀ’’ਤਿ. –

ਇਮਂ ਪਟਿਗੀਤਂ ਗਾਯੇਯ੍ਯਾਸੀਤਿ ਆਹ.

ਮਾਣਵਿਕਾਯ ਗੀਤਸ੍ਸ ਅਤ੍ਥੋ – ਕਿਂਸੁ ਅਧਿਪ੍ਪਤੀ ਰਾਜਾਤਿ ਕਿਂ ਅਧਿਪ੍ਪਤਿ ਰਾਜਾ ਨਾਮ ਹੋਤਿ? ਕਿਂਸੁ ਰਾਜਾ ਰਜ੍ਜਿਸ੍ਸਰੋਤਿ ਕਥਂ ਪਨ ਰਾਜਾ ਰਜ੍ਜਿਸ੍ਸਰੋ ਨਾਮ ਹੋਤਿ? ਕਥਂਸੁ ਵਿਰਜੋ ਹੋਤੀਤਿ ਕਥਂ ਨੁ ਖੋ ਸੋ ਰਾਜਾ ਵਿਰਜੋ ਨਾਮ ਹੋਤੀਤਿ?

ਪਟਿਗੀਤਸ੍ਸ ਪਨ ਅਤ੍ਥੋ – ਛਦ੍ਵਾਰਾਧਿਪ੍ਪਤੀ ਰਾਜਾਤਿ ਯੋ ਛਨ੍ਨਂ ਦ੍ਵਾਰਾਨਂ ਅਧਿਪ੍ਪਤਿ, ਏਕਦ੍ਵਾਰੇਪਿ ਰੂਪਾਦੀਹਿ ਅਨਭਿਭੂਤੋ, ਅਯਂ ਰਾਜਾ ਨਾਮ. ਰਜ੍ਜਮਾਨੋ ਰਜ੍ਜਿਸ੍ਸਰੋਤਿ ਯੋ ਪਨ ਤੇਸੁ ਆਰਮ੍ਮਣੇਸੁ ਰਜ੍ਜਤਿ, ਸੋ ਰਜ੍ਜਮਾਨੋ ਰਜ੍ਜਿਸ੍ਸਰੋ ਨਾਮ. ਅਰਜ੍ਜਨ੍ਤਿ ਅਰਜ੍ਜਮਾਨੋ ਪਨ ਵਿਰਜੋ ਨਾਮ ਹੋਤਿ. ਰਜ੍ਜਨ੍ਤਿ ਰਜ੍ਜਮਾਨੋ ਬਾਲੋਤਿ ਵੁਚ੍ਚਤੀਤਿ.

ਏਵਮਸ੍ਸ ਸਤ੍ਥਾ ਪਟਿਗੀਤਂ ਦਤ੍ਵਾ, ਉਤ੍ਤਰ, ਤਯਾ ਇਮਸ੍ਮਿਂ ਗੀਤੇ ਗਾਯਿਤੇ ਇਮਸ੍ਸ ਗੀਤਸ੍ਸ ਇਮਂ ਪਟਿਗੀਤਂ ਗਾਯਿਸ੍ਸਤਿ –

‘‘ਕੇਨਸ੍ਸੁ ਵੁਯ੍ਹਤਿ ਬਾਲੋ, ਕਥਂ ਨੁਦਤਿ ਪਣ੍ਡਿਤੋ;

ਯੋਗਕ੍ਖੇਮੀ ਕਥਂ ਹੋਤਿ, ਤਂ ਮੇ ਅਕ੍ਖਾਹਿ ਪੁਚ੍ਛਿਤੋ’’ਤਿ.

ਅਥਸ੍ਸ ਤ੍ਵਂ ਇਦਂ ਪਟਿਗੀਤਂ ਗਾਯੇਯ੍ਯਾਸਿ –

‘‘ਓਘੇਨ ਵੁਯ੍ਹਤਿ ਬਾਲੋ, ਯੋਗਾ ਨੁਦਤਿ ਪਣ੍ਡਿਤੋ;

ਸਬ੍ਬਯੋਗਵਿਸਂਯੁਤ੍ਤੋ, ਯੋਗਕ੍ਖੇਮੀਤਿ ਵੁਚ੍ਚਤੀ’’ਤਿ.

ਤਸ੍ਸਤ੍ਥੋ – ‘‘ਕਾਮੋਘਾਦਿਨਾ ਚਤੁਬ੍ਬਿਧੇਨ ਓਘੇਨ ਬਾਲੋ ਵੁਯ੍ਹਤਿ, ਤਂ ਓਘਂ ਪਣ੍ਡਿਤੋ ਸਮ੍ਮਪ੍ਪਧਾਨਸਙ੍ਖਾਤੇਨ ਯੋਗੇਨ ਨੁਦਤਿ. ਸੋ ਸਬ੍ਬੇਹਿ ਕਾਮਯੋਗਾਦੀਹਿ ਵਿਸਂਯੁਤ੍ਤੋ ਯੋਗਕ੍ਖੇਮੀ ਨਾਮ ਵੁਚ੍ਚਤੀ’’ਤਿ.

ਉਤ੍ਤਰੋ ਇਮਂ ਪਟਿਗੀਤਂ ਗਣ੍ਹਨ੍ਤੋਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸੋ ਸੋਤਾਪਨ੍ਨੋ ਹੁਤ੍ਵਾ ਤਂ ਗਾਥਂ ਆਦਾਯ ਗਨ੍ਤ੍ਵਾ, ‘‘ਅਮ੍ਭੋ, ਮਯਾ ਗੀਤਪਟਿਗੀਤਂ ਆਹਟਂ, ਓਕਾਸਂ ਮੇ ਦੇਥਾ’’ਤਿ ਵਤ੍ਵਾ ਨਿਰਨ੍ਤਰਂ ਠਿਤਸ੍ਸ ਮਹਾਜਨਸ੍ਸ ਜਣ੍ਣੁਨਾ ਅਕ੍ਕਮਨ੍ਤੋ ਅਗਮਾਸਿ. ਨਾਗਮਾਣਵਿਕਾ ਪਿਤੁ ਫਣੇ ਠਤ੍ਵਾ ਨਚ੍ਚਮਾਨਾ ‘‘ਕਿਂਸੁ ਅਧਿਪ੍ਪਤੀ ਰਾਜਾ’’ਤਿ ਗੀਤਂ ਗਾਯਤਿ? ਉਤ੍ਤਰੋ ‘‘ਛਦ੍ਵਾਰਾਧਿਪ੍ਪਤੀ ਰਾਜਾ’’ਤਿ ਪਟਿਗੀਤਂ ਗਾਯਿ. ਪੁਨ ਨਾਗਮਾਣਵਿਕਾ ‘‘ਕੇਨਸ੍ਸੁ ਵੁਯ੍ਹਤੀ’’ਤਿ ਤਸ੍ਸ ਗੀਤਂ ਗਾਯਤਿ? ਅਥਸ੍ਸਾ ਪਟਿਗੀਤਂ ਗਾਯਨ੍ਤੋ ਉਤ੍ਤਰੋ ‘‘ਓਘੇਨ ਵੁਯ੍ਹਤੀ’’ਤਿ ਇਮਂ ਗਾਥਮਾਹ. ਨਾਗਰਾਜਾ ਤਂ ਸੁਤ੍ਵਾਵ ਬੁਦ੍ਧਸ੍ਸ ਉਪ੍ਪਨ੍ਨਭਾਵਂ ਞਤ੍ਵਾ ‘‘ਮਯਾ ਏਕਂ ਬੁਦ੍ਧਨ੍ਤਰਂ ਏਵਰੂਪਂ ਪਦਂ ਨਾਮ ਨ ਸੁਤਪੁਬ੍ਬਂ, ਉਪ੍ਪਨ੍ਨੋ ਵਤ, ਭੋ, ਲੋਕੇ ਬੁਦ੍ਧੋ’’ਤਿ ਤੁਟ੍ਠਮਾਨਸੋ ਨਙ੍ਗੁਟ੍ਠੇਨ ਉਦਕਂ ਪਹਰਿ, ਮਹਾਵੀਚਿਯੋ ਉਟ੍ਠਹਿਂਸੁ, ਉਭੋ ਤੀਰਾਨਿ ਭਿਜ੍ਜਿਂਸੁ. ਇਤੋ ਚਿਤੋ ਚ ਉਸਭਮਤ੍ਤੇ ਠਾਨੇ ਮਨੁਸ੍ਸਾ ਉਦਕੇ ਨਿਮੁਜ੍ਜਿਂਸੁ. ਸੋ ਏਤ੍ਤਕਂ ਮਹਾਜਨਂ ਫਣੇ ਠਪੇਤ੍ਵਾ ਉਕ੍ਖਿਪਿਤ੍ਵਾ ਥਲੇ ਪਤਿਟ੍ਠਪੇਸਿ. ਸੋ ਉਤ੍ਤਰਂ ਉਪਸਙ੍ਕਮਿਤ੍ਵਾ ‘‘ਕਹਂ, ਸਾਮਿ, ਸਤ੍ਥਾ’’ਤਿ ਪੁਚ੍ਛਿ. ‘‘ਏਕਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨੋ, ਮਹਾਰਾਜਾ’’ਤਿ. ਸੋ ‘‘ਏਹਿ, ਸਾਮਿ, ਗਚ੍ਛਾਮਾ’’ਤਿ ਉਤ੍ਤਰੇਨ ਸਦ੍ਧਿਂ ਅਗਮਾਸਿ. ਮਹਾਜਨੋਪਿ ਤੇਨ ਸਦ੍ਧਿਂਯੇਵ ਗਤੋ. ਨਾਗਰਾਜਾ ਗਨ੍ਤ੍ਵਾ ਛਬ੍ਬਣ੍ਣਰਂਸੀਨਂ ਅਨ੍ਤਰਂ ਪਵਿਸਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਰੋਦਮਾਨੋ ਅਟ੍ਠਾਸਿ. ਅਥ ਨਂ ਸਤ੍ਥਾ ਆਹ – ‘‘ਕਿਂ ਇਦਂ, ਮਹਾਰਾਜਾ’’ਤਿ? ‘‘ਅਹਂ, ਭਨ੍ਤੇ, ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਸਾਵਕੋ ਹੁਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਸਮਣਧਮ੍ਮਂ ਅਕਾਸਿਂ, ਸੋਪਿ ਮਂ ਸਮਣਧਮ੍ਮੋ ਨਿਦ੍ਧਾਰੇਤੁਂ ਨਾਸਕ੍ਖਿ. ਅਪ੍ਪਮਤ੍ਤਕਂ ਏਰਕਪਤ੍ਤਛਿਨ੍ਦਨਮਤ੍ਤਂ ਨਿਸ੍ਸਾਯ ਅਹੇਤੁਕਪਟਿਸਨ੍ਧਿਂ ਗਹੇਤ੍ਵਾ ਉਰੇਨ ਪਰਿਸਕ੍ਕਨਟ੍ਠਾਨੇ ਨਿਬ੍ਬਤ੍ਤੋਸ੍ਮਿ, ਏਕਂ ਬੁਦ੍ਧਨ੍ਤਰਂ ਨੇਵ ਮਨੁਸ੍ਸਤ੍ਤਂ ਲਭਾਮਿ, ਨ ਸਦ੍ਧਮ੍ਮਸ੍ਸਵਨਂ, ਨ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਦਸ੍ਸਨ’’ਨ੍ਤਿ ਸਤ੍ਥਾ ਤਸ੍ਸ ਕਥਂ ਸੁਤ੍ਵਾ, ‘‘ਮਹਾਰਾਜ, ਮਨੁਸ੍ਸਤ੍ਤਂ ਨਾਮ ਦੁਲ੍ਲਭਮੇਵ, ਤਥਾ ਸਦ੍ਧਮ੍ਮਸ੍ਸਵਨਂ, ਤਥਾ ਬੁਦ੍ਧੁਪ੍ਪਾਦੋ, ਇਦਂ ਕਿਚ੍ਛੇਨ ਕਸਿਰੇਨ ਲਬ੍ਭਤੀ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੮੨. ‘‘ਕਿਚ੍ਛੋ ਮਨੁਸ੍ਸਪਟਿਲਾਭੋ, ਕਿਚ੍ਛਂ ਮਚ੍ਚਾਨ ਜੀਵਿਤਂ;

ਕਿਚ੍ਛਂ ਸਦ੍ਧਮ੍ਮਸ੍ਸਵਨਂ, ਕਿਚ੍ਛੋ ਬੁਦ੍ਧਾਨਮੁਪ੍ਪਾਦੋ’’ਤਿ.

ਤਸ੍ਸਤ੍ਥੋ – ਮਹਨ੍ਤੇਨ ਹਿ ਵਾਯਾਮੇਨ ਮਹਨ੍ਤੇਨ ਕੁਸਲੇਨ ਲਦ੍ਧਤ੍ਤਾ ਮਨੁਸ੍ਸਤ੍ਤਪਟਿਲਾਭੋ ਨਾਮ ਕਿਚ੍ਛੋ ਦੁਲ੍ਲਭੋ. ਨਿਰਨ੍ਤਰਂ ਕਸਿਕਮ੍ਮਾਦੀਨਿ ਕਤ੍ਵਾ ਜੀਵਿਤਵੁਤ੍ਤਿਂ ਘਟਨਤੋਪਿ ਪਰਿਤ੍ਤਟ੍ਠਾਯਿਤਾਯਪਿ ਮਚ੍ਚਾਨਂ ਜੀਵਿਤਂ ਕਿਚ੍ਛਂ. ਅਨੇਕੇਸੁਪਿ ਕਪ੍ਪੇਸੁ ਧਮ੍ਮਦੇਸਕਸ੍ਸ ਪੁਗ੍ਗਲਸ੍ਸ ਦੁਲ੍ਲਭਤਾਯ ਸਦ੍ਧਮ੍ਮਸ੍ਸਵਨਮ੍ਪਿ ਕਿਚ੍ਛਂ. ਮਹਨ੍ਤੇਨ ਵਾਯਾਮੇਨ ਅਭਿਨੀਹਾਰਸ੍ਸ ਸਮਿਜ੍ਝਨਤੋ ਸਮਿਦ੍ਧਾਭਿਨੀਹਾਰਸ੍ਸ ਚ ਅਨੇਕੇਹਿਪਿ ਕਪ੍ਪਕੋਟਿਸਹਸ੍ਸੇਹਿ ਦੁਲ੍ਲਭੁਪ੍ਪਾਦਤੋ ਬੁਦ੍ਧਾਨਂ ਉਪ੍ਪਾਦੋਪਿ ਕਿਚ੍ਛੋਯੇਵ, ਅਤਿਵਿਯ ਦੁਲ੍ਲਭੋਤਿ.

ਦੇਸਨਾਵਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ. ਨਾਗਰਾਜਾਪਿ ਤਂਦਿਵਸਂ ਸੋਤਾਪਤ੍ਤਿਫਲਂ ਲਭੇਯ੍ਯ, ਤਿਰਚ੍ਛਾਨਗਤਤ੍ਤਾ ਪਨ ਨਾਲਤ੍ਥ. ਸੋ ਯੇਸੁ ਪਟਿਸਨ੍ਧਿਗਹਣਤਚਜਹਨਵਿਸ੍ਸਟ੍ਠਨਿਦ੍ਦੋਕ੍ਕਮਨਸਜਾਤਿਯਾਮੇਥੁਨਸੇਵਨਚੁਤਿਸਙ੍ਖਾਤੇਸੁ ਪਞ੍ਚਸੁ ਠਾਨੇਸੁ ਨਾਗਸਰੀਰਮੇਵ ਗਹੇਤ੍ਵਾ ਕਿਲਮਨ੍ਤਿ, ਤੇਸੁ ਅਕਿਲਮਨਭਾਵਂ ਪਤ੍ਵਾ ਮਾਣਵਰੂਪੇਨੇਵ ਵਿਚਰਿਤੁਂ ਲਭਤੀਤਿ.

ਏਰਕਪਤ੍ਤਨਾਗਰਾਜਵਤ੍ਥੁ ਤਤਿਯਂ.