੧੦. ਦਣ੍ਡਵਗ੍ਗੋ

੧. ਛਬ੍ਬਗ੍ਗਿਯਭਿਕ੍ਖੁਵਤ੍ਥੁ

ਸਬ੍ਬੇ ਤਸਨ੍ਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਸਤ੍ਤਰਸਵਗ੍ਗਿਯੇਹਿ ਸੇਨਾਸਨੇ ਪਟਿਜਗ੍ਗਿਤੇ ਛਬ੍ਬਗ੍ਗਿਯਾ ਭਿਕ੍ਖੂ ‘‘ਨਿਕ੍ਖਮਥ, ਮਯਂ ਮਹਲ੍ਲਕਤਰਾ, ਅਮ੍ਹਾਕਂ ਏਤਂ ਪਾਪੁਣਾਤੀ’’ਤਿ ਵਤ੍ਵਾ ਤੇਹਿ ‘‘ਨ ਮਯਂ ਦਸ੍ਸਾਮ, ਅਮ੍ਹੇਹਿ ਪਠਮਂ ਪਟਿਜਗ੍ਗਿਤ’’ਨ੍ਤਿ ਵੁਤ੍ਤੇ ਤੇ ਭਿਕ੍ਖੂ ਪਹਰਿਂਸੁ. ਸਤ੍ਤਰਸਵਗ੍ਗਿਯਾ ਮਰਣਭਯਤਜ੍ਜਿਤਾ ਮਹਾਵਿਰਵਂ ਵਿਰਵਿਂਸੁ. ਸਤ੍ਥਾ ਤੇਸਂ ਸਦ੍ਦਂ ਸੁਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਚ੍ਛਿਤ੍ਵਾ ‘‘ਇਦਂ ਨਾਮਾ’’ਤਿ ਆਰੋਚਿਤੇ ‘‘ਨ, ਭਿਕ੍ਖਵੇ, ਇਤੋ ਪਟ੍ਠਾਯ ਭਿਕ੍ਖੁਨਾ ਨਾਮ ਏਵਂ ਕਤ੍ਤਬ੍ਬਂ, ਯੋ ਕਰੋਤਿ, ਸੋ ਇਮਂ ਨਾਮ ਆਪਤ੍ਤਿਂ ਆਪਜ੍ਜਤੀ’’ਤਿ ਪਹਾਰਦਾਨਸਿਕ੍ਖਾਪਦਂ (ਪਾਚਿ. ੪੪੯ ਆਦਯੋ) ਪਞ੍ਞਾਪੇਤ੍ਵਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ‘ਯਥਾ ਅਹਂ, ਤਥੇਵ ਅਞ੍ਞੇਪਿ ਦਣ੍ਡਸ੍ਸ ਤਸਨ੍ਤਿ, ਮਚ੍ਚੁਨੋ ਭਾਯਨ੍ਤੀ’ਤਿ ਞਤ੍ਵਾ ਪਰੋ ਨ ਪਹਰਿਤਬ੍ਬੋ, ਨ ਘਾਤੇਤਬ੍ਬੋ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੨੯. ‘‘ਸਬ੍ਬੇ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇ ਭਾਯਨ੍ਤਿ ਮਚ੍ਚੁਨੋ;

ਅਤ੍ਤਾਨਂ ਉਪਮਂ ਕਤ੍ਵਾ, ਨ ਹਨੇਯ੍ਯ ਨ ਘਾਤਯੇ’’ਤਿ.

ਤਤ੍ਥ ਸਬ੍ਬੇ ਤਸਨ੍ਤੀਤਿ ਸਬ੍ਬੇਪਿ ਸਤ੍ਤਾ ਅਤ੍ਤਨਿ ਦਣ੍ਡੇ ਪਤਨ੍ਤੇ ਤਸ੍ਸ ਦਣ੍ਡਸ੍ਸ ਤਸਨ੍ਤਿ. ਮਚ੍ਚੁਨੋਤਿ ਮਰਣਸ੍ਸਾਪਿ ਭਾਯਨ੍ਤਿਯੇਵ. ਇਮਿਸ੍ਸਾ ਚ ਦੇਸਨਾਯ ਬ੍ਯਞ੍ਜਨਂ ਨਿਰਵਸੇਸਂ, ਅਤ੍ਥੋ ਪਨ ਸਾਵਸੇਸੋ. ਯਥਾ ਹਿ ਰਞ੍ਞਾ ‘‘ਸਬ੍ਬੇ ਸਨ੍ਨਿਪਤਨ੍ਤੂ’’ਤਿ ਭੇਰਿਯਾ ਚਰਾਪਿਤਾਯਪਿ ਰਾਜਮਹਾਮਤ੍ਤੇ ਠਪੇਤ੍ਵਾ ਸੇਸਾ ਸਨ੍ਨਿਪਤਨ੍ਤਿ, ਏਵਮਿਧ ‘‘ਸਬ੍ਬੇ ਤਸਨ੍ਤੀ’’ਤਿ ਵੁਤ੍ਤੇਪਿ ਹਤ੍ਥਾਜਾਨੇਯ੍ਯੋ ਅਸ੍ਸਾਜਾਨੇਯ੍ਯੋ ਉਸਭਾਜਾਨੇਯ੍ਯੋ ਖੀਣਾਸਵੋਤਿ ਇਮੇ ਚਤ੍ਤਾਰੋ ਠਪੇਤ੍ਵਾ ਅਵਸੇਸਾਵ ਤਸਨ੍ਤੀਤਿ ਵੇਦਿਤਬ੍ਬਾ. ਇਮੇਸੁ ਹਿ ਖੀਣਾਸਵੋ ਸਕ੍ਕਾਯਦਿਟ੍ਠਿਯਾ ਪਹੀਨਤ੍ਤਾ ਮਰਣਕਸਤ੍ਤਂ ਅਪਸ੍ਸਨ੍ਤੋ ਨ ਭਾਯਤਿ, ਇਤਰੇ ਤਯੋ ਸਕ੍ਕਾਯਦਿਟ੍ਠਿਯਾ ਬਲਵਤ੍ਤਾ ਅਤ੍ਤਨੋ ਪਟਿਪਕ੍ਖਭੂਤਂ ਸਤ੍ਤਂ ਅਪਸ੍ਸਨ੍ਤਾ ਨ ਭਾਯਨ੍ਤੀਤਿ. ਨ ਹਨੇਯ੍ਯ ਨ ਘਾਤਯੇਤਿ ਯਥਾ ਅਹਂ, ਏਵਂ ਅਞ੍ਞੇਪਿ ਸਤ੍ਤਾਤਿ ਨੇਵ ਪਰਂ ਪਹਰੇਯ੍ਯ ਨ ਪਹਰਾਪੇਯ੍ਯਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਛਬ੍ਬਗ੍ਗਿਯਭਿਕ੍ਖੁਵਤ੍ਥੁ ਪਠਮਂ.

੨. ਛਬ੍ਬਗ੍ਗਿਯਭਿਕ੍ਖੁਵਤ੍ਥੁ

ਸਬ੍ਬੇ ਤਸਨ੍ਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਕਥੇਸਿ.

ਤੇਯੇਵ ਏਕਸ੍ਮਿਞ੍ਹਿ ਸਮਯੇ ਤੇਨੇਵ ਕਾਰਣੇਨ ਪੁਰਿਮਸਿਕ੍ਖਾਪਦੇ ਸਤ੍ਤਰਸਵਗ੍ਗਿਯੇ ਪਹਰਿਂਸੁ. ਤੇਨੇਵ ਕਾਰਣੇਨ ਤੇਸਂ ਤਲਸਤ੍ਤਿਕਂ ਉਗ੍ਗਿਰਿਂਸੁ. ਇਧਾਪਿ ਸਤ੍ਥਾ ਤੇਸਂ ਸਦ੍ਦਂ ਸੁਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਚ੍ਛਿਤ੍ਵਾ ‘‘ਇਦਂ ਨਾਮਾ’’ਤਿ ਆਰੋਚਿਤੇ ‘‘ਨ, ਭਿਕ੍ਖਵੇ, ਇਤੋ ਪਟ੍ਠਾਯ ਭਿਕ੍ਖੁਨਾ ਨਾਮ ਏਵਂ ਕਤ੍ਤਬ੍ਬਂ, ਯੋ ਕਰੋਤਿ, ਸੋ ਇਮਂ ਨਾਮ ਆਪਤ੍ਤਿਂ ਆਪਜ੍ਜਤੀ’’ਤਿ ਤਲਸਤ੍ਤਿਕਸਿਕ੍ਖਾਪਦਂ (ਪਾਚਿ. ੪੫੪ ਆਦਯੋ) ਪਞ੍ਞਾਪੇਤ੍ਵਾ, ‘‘ਭਿਕ੍ਖਵੇ, ਭਿਕ੍ਖੁਨਾ ਨਾਮ ‘ਯਥਾ ਅਹਂ, ਤਥੇਵ ਅਞ੍ਞੇਪਿ ਦਣ੍ਡਸ੍ਸ ਤਸਨ੍ਤਿ, ਯਥਾ ਚ ਮਯ੍ਹਂ, ਤਥੇਵ ਨੇਸਂ ਜੀਵਿਤਂ ਪਿਯ’ਨ੍ਤਿ ਞਤ੍ਵਾ ਪਰੋ ਨ ਪਹਰਿਤਬ੍ਬੋ ਨ ਘਾਟੇਤਬ੍ਬੋ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੩੦. ‘‘ਸਬ੍ਬੇ ਤਸਨ੍ਤਿ ਦਣ੍ਡਸ੍ਸ, ਸਬ੍ਬੇਸਂ ਜੀਵਿਤਂ ਪਿਯਂ;

ਅਤ੍ਤਾਨਂ ਉਪਮਂ ਕਤ੍ਵਾ, ਨ ਹਨੇਯ੍ਯ ਨ ਘਾਤਯੇ’’ਤਿ.

ਤਤ੍ਥ ਸਬ੍ਬੇਸਂ ਜੀਵਿਤਂ ਪਿਯਨ੍ਤਿ ਖੀਣਾਸਵਂ ਠਪੇਤ੍ਵਾ ਸੇਸਸਤ੍ਤਾਨਂ ਜੀਵਿਤਂ ਪਿਯਂ ਮਧੁਰਂ, ਖੀਣਾਸਵੋ ਪਨ ਜੀਵਿਤੇ ਵਾ ਮਰਣੇ ਵਾ ਉਪੇਕ੍ਖਕੋਵ ਹੋਤਿ. ਸੇਸਂ ਪੁਰਿਮਸਦਿਸਮੇਵਾਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਛਬ੍ਬਗ੍ਗਿਯਭਿਕ੍ਖੁਵਤ੍ਥੁ ਦੁਤਿਯਂ.

੩. ਸਬ੍ਬਹੁਲਕੁਮਾਰਕਵਤ੍ਥੁ

ਸੁਖਕਾਮਾਨਿ ਭੂਤਾਨੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਮ੍ਬਹੁਲੇ ਕੁਮਾਰਕੇ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਸਤ੍ਥਾ ਸਾਵਤ੍ਥਿਯਂ ਪਿਣ੍ਡਾਯ ਪਵਿਸਨ੍ਤੋ ਅਨ੍ਤਰਾਮਗ੍ਗੇ ਸਮ੍ਬਹੁਲੇ ਕੁਮਾਰਕੇ ਏਕਂ ਘਰਸਪ੍ਪਜਾਤਿਕਂ ਅਹਿਂ ਦਣ੍ਡਕੇਨ ਪਹਰਨ੍ਤੇ ਦਿਸ੍ਵਾ ‘‘ਕੁਮਾਰਕਾ ਕਿਂ ਕਰੋਥਾ’’ਤਿ ਪੁਚ੍ਛਿਤ੍ਵਾ ‘‘ਅਹਿਂ, ਭਨ੍ਤੇ, ਦਣ੍ਡਕੇਨ ਪਹਰਾਮਾ’’ਤਿ ਵੁਤ੍ਤੇ ‘‘ਕਿਂ ਕਾਰਣਾ’’ਤਿ ਪੁਨ ਪੁਚ੍ਛਿਤ੍ਵਾ ‘‘ਡਂਸਨਭਯੇਨ, ਭਨ੍ਤੇ’’ਤਿ ਵੁਤ੍ਤੇ ‘‘ਤੁਮ੍ਹੇ ‘ਅਤ੍ਤਨੋ ਸੁਖਂ ਕਰਿਸ੍ਸਾਮਾ’ਤਿ ਇਮਂ ਪਹਰਨ੍ਤਾ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੁਖਲਾਭਿਨੋ ਨ ਭਵਿਸ੍ਸਥ. ਅਤ੍ਤਨੋ ਸੁਖਂ ਪਤ੍ਥੇਨ੍ਤੇਨ ਹਿ ਪਰਂ ਪਹਰਿਤੁਂ ਨ ਵਟ੍ਟਤੀ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੧੩੧. ‘‘ਸੁਖਕਾਮਾਨਿ ਭੂਤਾਨਿ, ਯੋ ਦਣ੍ਡੇਨ ਵਿਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਨ ਲਭਤੇ ਸੁਖਂ.

੧੩੨. ‘‘ਸੁਖਕਾਮਾਨਿ ਭੂਤਾਨਿ, ਯੋ ਦਣ੍ਡੇਨ ਨ ਹਿਂਸਤਿ;

ਅਤ੍ਤਨੋ ਸੁਖਮੇਸਾਨੋ, ਪੇਚ੍ਚ ਸੋ ਲਭਤੇ ਸੁਖ’’ਨ੍ਤਿ.

ਤਤ੍ਥ ਯੋ ਦਣ੍ਡੇਨਾਤਿ ਯੋ ਪੁਗ੍ਗਲੋ ਦਣ੍ਡੇਨ ਵਾ ਲੇਡ੍ਡੁਆਦੀਹਿ ਵਾ ਵਿਹੇਠੇਤਿ. ਪੇਚ੍ਚ ਸੋ ਨ ਲਭਤੇ ਸੁਖਨ੍ਤਿ ਸੋ ਪੁਗ੍ਗਲੋ ਪਰਲੋਕੇ ਮਨੁਸ੍ਸਸੁਖਂ ਵਾ ਦਿਬ੍ਬਸੁਖਂ ਵਾ ਪਰਮਤ੍ਥਭੂਤਂ ਵਾ ਨਿਬ੍ਬਾਨਸੁਖਂ ਨ ਲਭਤਿ. ਦੁਤਿਯਗਾਥਾਯ ਪੇਚ੍ਚ ਸੋ ਲਭਤੇਤਿ ਸੋ ਪੁਗ੍ਗਲੋ ਪਰਲੋਕੇ ਵੁਤ੍ਤਪ੍ਪਕਾਰਂ ਤਿਵਿਧਮ੍ਪਿ ਸੁਖਂ ਲਭਤੀਤਿ ਅਤ੍ਥੋ.

ਦੇਸਨਾਵਸਾਨੇ ਪਞ੍ਚਸਤਾਪਿ ਤੇ ਕੁਮਾਰਕਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿਂਸੂਤਿ.

ਸਮ੍ਬਹੁਲਕੁਮਾਰਕਵਤ੍ਥੁ ਤਤਿਯਂ.

੪. ਕੋਣ੍ਡਧਾਨਤ੍ਥੇਰਵਤ੍ਥੁ

ਮਾਵੋਚ ਫਰੁਸਂ ਕਞ੍ਚੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਕੋਣ੍ਡਧਾਨਤ੍ਥੇਰਂ ਆਰਬ੍ਭ ਕਥੇਸਿ.

ਤਸ੍ਸ ਕਿਰ ਪਬ੍ਬਜਿਤਦਿਵਸਤੋ ਪਟ੍ਠਾਯ ਏਕਂ ਇਤ੍ਥਿਰੂਪਂ ਥੇਰੇਨ ਸਦ੍ਧਿਂਯੇਵ ਵਿਚਰਤਿ. ਤਂ ਥੇਰੋ ਨ ਪਸ੍ਸਤਿ, ਮਹਾਜਨੋ ਪਨ ਪਸ੍ਸਤਿ. ਅਨ੍ਤੋਗਾਮਂ ਪਿਣ੍ਡਾਯ ਚਰਤੋਪਿਸ੍ਸ ਮਨੁਸ੍ਸਾ ਏਕਂ ਭਿਕ੍ਖਂ ਦਤ੍ਵਾ, ‘‘ਭਨ੍ਤੇ, ਅਯਂ ਤੁਮ੍ਹਾਕਂ ਹੋਤੁ, ਅਯਂ ਪਨ ਤੁਮ੍ਹਾਕਂ ਸਹਾਯਿਕਾਯਾ’’ਤਿ ਵਤ੍ਵਾ ਦੁਤਿਯਮ੍ਪਿ ਦਦਨ੍ਤਿ.

ਕਿਂ ਤਸ੍ਸ ਪੁਬ੍ਬਕਮ੍ਮਨ੍ਤਿ? ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਕਿਰ ਦ੍ਵੇ ਸਹਾਯਕਾ ਭਿਕ੍ਖੂ ਏਕਮਾਤੁਕੁਚ੍ਛਿਤੋ ਨਿਕ੍ਖਨ੍ਤਸਦਿਸਾ ਅਤਿਵਿਯ ਸਮਗ੍ਗਾ ਅਹੇਸੁਂ. ਦੀਘਾਯੁਕਬੁਦ੍ਧਕਾਲੇ ਚ ਅਨੁਸਂਵਚ੍ਛਰਂ ਵਾ ਅਨੁਛਮਾਸਂ ਵਾ ਭਿਕ੍ਖੂ ਉਪੋਸਥਤ੍ਥਾਯ ਸਨ੍ਨਿਪਤਨ੍ਤਿ. ਤਸ੍ਮਾ ਤੇਪਿ ‘‘ਉਪੋਸਥਗ੍ਗਂ ਗਮਿਸ੍ਸਾਮਾ’’ਤਿ ਵਸਨਟ੍ਠਾਨਾ ਨਿਕ੍ਖਮਿਂਸੁ. ਤੇ ਏਕਾ ਤਾਵਤਿਂਸਭਵਨੇ ਨਿਬ੍ਬਤ੍ਤਦੇਵਤਾ ਦਿਸ੍ਵਾ ‘‘ਇਮੇ ਭਿਕ੍ਖੂ ਅਤਿਵਿਯ ਸਮਗ੍ਗਾ, ਸਕ੍ਕਾ ਨੁ ਖੋ ਇਮੇ ਭਿਨ੍ਦਿਤੁ’’ਨ੍ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਬਾਲਤਾਯ ਚਿਨ੍ਤਿਤਸਮਨਨ੍ਤਰਮੇਵ ਆਗਨ੍ਤ੍ਵਾ ਤੇਸੁ ਏਕੇਨ, ‘‘ਆਵੁਸੋ, ਮੁਹੁਤ੍ਤਂ ਆਗਮੇਹਿ, ਸਰੀਰਕਿਚ੍ਚੇਨਮ੍ਹਿ ਅਤ੍ਥਿਕੋ’’ਤਿ ਵੁਤ੍ਤੇ ਸਾ ਦੇਵਤਾ ਏਕਂ ਮਨੁਸ੍ਸਿਤ੍ਥਿਵਣ੍ਣਂ ਮਾਪੇਤ੍ਵਾ ਥੇਰਸ੍ਸ ਗਚ੍ਛਨ੍ਤਰਂ ਪਵਿਸਿਤ੍ਵਾ ਨਿਕ੍ਖਮਨਕਾਲੇ ਏਕੇਨ ਹਤ੍ਥੇਨ ਕੇਸਕਲਾਪਂ, ਏਕੇਨ ਨਿਵਾਸਨਂ ਸਣ੍ਠਾਪਯਮਾਨਾ ਤਸ੍ਸ ਪਿਟ੍ਠਿਤੋ ਨਿਕ੍ਖਮਿ. ਸੋ ਤਂ ਨ ਪਸ੍ਸਤਿ, ਤਮਾਗਮਯਮਾਨੋ ਪਨ ਪੁਰਤੋ ਠਿਤਭਿਕ੍ਖੁ ਨਿਵਤ੍ਤਿਤ੍ਵਾ ਓਲੋਕਯਮਾਨੋ ਤਂ ਤਥਾ ਕਤ੍ਵਾ ਨਿਕ੍ਖਮਨ੍ਤਂ ਪਸ੍ਸਿ. ਸਾ ਤੇਨ ਦਿਟ੍ਠਭਾਵਂ ਞਤ੍ਵਾ ਅਨ੍ਤਰਧਾਯਿ. ਇਤਰੋ ਤਂ ਭਿਕ੍ਖੁਂ ਅਤ੍ਤਨੋ ਸਨ੍ਤਿਕਂ ਆਗਤਕਾਲੇ ਆਹ – ‘‘ਆਵੁਸੋ, ਸੀਲਂ ਤੇ ਭਿਨ੍ਨ’’ਨ੍ਤਿ. ‘‘ਨਤ੍ਥਾਵੁਸੋ, ਮਯ੍ਹਂ ਏਵਰੂਪ’’ਨ੍ਤਿ. ਇਦਾਨੇਵ ਤੇ ਮਯਾ ਪਚ੍ਛਤੋ ਨਿਕ੍ਖਮਮਾਨਾ ਤਰੁਣਇਤ੍ਥੀ ਇਦਂ ਨਾਮ ਕਰੋਨ੍ਤੀ ਦਿਟ੍ਠਾ, ਤ੍ਵਂ ‘‘ਨਤ੍ਥਿ ਮਯ੍ਹਂ ਏਵਰੂਪ’’ਨ੍ਤਿ ਕਿਂ ਵਦੇਸੀਤਿ. ਸੋ ਅਸਨਿਯਾ ਮਤ੍ਥਕੇ ਅਵਤ੍ਥਟੋ ਵਿਯ ਮਾ ਮਂ, ਆਵੁਸੋ, ਨਾਸੇਹਿ, ਨਤ੍ਥਿ ਮਯ੍ਹਂ ਏਵਰੂਪਨ੍ਤਿ. ਇਤਰੋ ‘‘ਮਯਾ ਸਾਮਂ ਅਕ੍ਖੀਹਿ ਦਿਟ੍ਠਂ, ਕਿਂ ਤਵ ਸਦ੍ਦਹਿਸ੍ਸਾਮੀ’’ਤਿ ਦਣ੍ਡਕੋ ਵਿਯ ਭਿਜ੍ਜਿਤ੍ਵਾ ਪਕ੍ਕਾਮਿ, ਉਪੋਸਥਗ੍ਗੇਪਿ ‘‘ਨਾਹਂ ਇਮਿਨਾ ਸਦ੍ਧਿਂ ਉਪੋਸਥਂ ਕਰਿਸ੍ਸਾਮੀ’’ਤਿ ਨਿਸੀਦਿ. ਇਤਰੋ ‘‘ਮਯ੍ਹਂ, ਭਨ੍ਤੇ, ਸੀਲੇ ਅਣੁਮਤ੍ਤਮ੍ਪਿ ਕਾਲ਼ਂ ਨਤ੍ਥੀ’’ਤਿ ਭਿਕ੍ਖੂਨਂ ਕਥੇਸਿ. ਸੋਪਿ ‘‘ਮਯਾ ਸਾਮਂ ਦਿਟ੍ਠ’’ਨ੍ਤਿ ਆਹ. ਦੇਵਤਾ ਤਂ ਤੇਨ ਸਦ੍ਧਿਂ ਉਪੋਸਥਂ ਕਾਤੁਂ ਅਨਿਚ੍ਛਨ੍ਤਂ ਦਿਸ੍ਵਾ ‘‘ਭਾਰਿਯਂ ਮਯਾ ਕਮ੍ਮਂ ਕਤ’’ਨ੍ਤਿ ਚਿਨ੍ਤੇਤ੍ਵਾ – ‘‘ਭਨ੍ਤੇ, ਮਯ੍ਹਂ ਅਯ੍ਯਸ੍ਸ ਸੀਲਭੇਦੋ ਨਤ੍ਥਿ, ਮਯਾ ਪਨ ਵੀਮਂਸਨਵਸੇਨੇਤਂ ਕਤਂ, ਕਰੋਥ ਤੇਨ ਸਦ੍ਧਿਂ ਉਪੋਸਥ’’ਨ੍ਤਿ ਆਹ. ਸੋ ਤਸ੍ਸਾ ਆਕਾਸੇ ਠਤ੍ਵਾ ਕਥੇਨ੍ਤਿਯਾ ਸਦ੍ਦਹਿਤ੍ਵਾ ਉਪੋਸਥਂ ਅਕਾਸਿ, ਨ ਪਨ ਥੇਰੇ ਪੁਬ੍ਬੇ ਵਿਯ ਮੁਦੁਚਿਤ੍ਤੋ ਅਹੋਸਿ. ਏਤ੍ਤਕਂ ਦੇਵਤਾਯ ਪੁਬ੍ਬਕਮ੍ਮਂ.

ਆਯੁਪਰਿਯੋਸਾਨੇ ਪਨ ਤੇ ਥੇਰਾ ਯਥਾਸੁਖਂ ਦੇਵਲੋਕੇ ਨਿਬ੍ਬਤ੍ਤਿਂਸੁ. ਦੇਵਤਾ ਅਪੀਚਿਮ੍ਹਿ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਤਤ੍ਥ ਪਚ੍ਚਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਮਨ੍ਵਾਯ ਸਾਸਨੇ ਪਬ੍ਬਜਿਤ੍ਵਾ ਉਪਸਮ੍ਪਦਂ ਲਭਿ. ਤਸ੍ਸ ਪਬ੍ਬਜਿਤਦਿਵਸਤੋ ਪਟ੍ਠਾਯ ਤਂ ਇਤ੍ਥਿਰੂਪਂ ਤਥੇਵ ਪਞ੍ਞਾਯਿ. ਤੇਨੇਵਸ੍ਸ ਕੋਣ੍ਡਧਾਨਤ੍ਥੇਰੋਤਿ ਨਾਮਂ ਕਰਿਂਸੁ. ਤਂ ਤਥਾਵਿਚਰਨ੍ਤਂ ਦਿਸ੍ਵਾ ਭਿਕ੍ਖੂ ਅਨਾਥਪਿਣ੍ਡਿਕਂ ਆਹਂਸੁ – ‘‘ਮਹਾਸੇਟ੍ਠਿ, ਇਮਂ ਦੁਸ੍ਸੀਲਂ ਤਵ ਵਿਹਾਰਾ ਨੀਹਰ. ਇਮਞ੍ਹਿ ਨਿਸ੍ਸਾਯ ਸੇਸਭਿਕ੍ਖੂਨਂ ਅਯਸੋ ਉਪ੍ਪਜ੍ਜਿਸ੍ਸਤੀ’’ਤਿ. ਕਿਂ ਪਨ, ਭਨ੍ਤੇ, ਸਤ੍ਥਾ ਵਿਹਾਰੇ ਨਤ੍ਥੀਤਿ? ਅਤ੍ਥਿ ਉਪਾਸਕਾਤਿ. ਤੇਨ ਹਿ, ਭਨ੍ਤੇ, ਸਤ੍ਥਾਵ ਜਾਨਿਸ੍ਸਤੀਤਿ. ਭਿਕ੍ਖੂ ਗਨ੍ਤ੍ਵਾ ਵਿਸਾਖਾਯਪਿ ਤਥੇਵ ਕਥੇਸੁਂ. ਸਾਪਿ ਨੇਸਂ ਤਥੇਵ ਪਟਿਵਚਨਂ ਅਦਾਸਿ.

ਭਿਕ੍ਖੂਪਿ ਤੇਹਿ ਅਸਮ੍ਪਟਿਚ੍ਛਿਤਵਚਨਾ ਰਞ੍ਞੋ ਆਰੋਚੇਸੁਂ – ‘‘ਮਹਾਰਾਜ, ਕੋਣ੍ਡਧਾਨਤ੍ਥੇਰੋ ਏਕਂ ਇਤ੍ਥਿਂ ਗਹੇਤ੍ਵਾ ਵਿਚਰਨ੍ਤੋ ਸਬ੍ਬੇਸਂ ਅਯਸਂ ਉਪ੍ਪਾਦੇਸਿ, ਤਂ ਤੁਮ੍ਹਾਕਂ ਵਿਜਿਤਾ ਨੀਹਰਥਾ’’ਤਿ. ‘‘ਕਹਂ ਪਨ ਸੋ, ਭਨ੍ਤੇ’’ਤਿ? ‘‘ਵਿਹਾਰੇ, ਮਹਾਰਾਜਾ’’ਤਿ. ‘‘ਕਤਰਸ੍ਮਿਂ ਸੇਨਾਸਨੇ ਵਿਹਰਤੀ’’ਤਿ? ‘‘ਅਸੁਕਸ੍ਮਿਂ ਨਾਮਾ’’ਤਿ. ‘‘ਤੇਨ ਹਿ ਗਚ੍ਛਥ, ਅਹਂ ਤਂ ਗਣ੍ਹਿਸ੍ਸਾਮੀ’’ਤਿ ਸੋ ਸਾਯਨ੍ਹਸਮਯੇ ਵਿਹਾਰਂ ਗਨ੍ਤ੍ਵਾ ਤਂ ਸੇਨਾਸਨਂ ਪੁਰਿਸੇਹਿ ਪਰਿਕ੍ਖਿਪਾਪੇਤ੍ਵਾ ਥੇਰਸ੍ਸ ਵਸਨਟ੍ਠਾਨਾਭਿਮੁਖੋ ਅਗਮਾਸਿ. ਥੇਰੋ ਮਹਾਸਦ੍ਦਂ ਸੁਤ੍ਵਾ ਵਿਹਾਰਾ ਨਿਕ੍ਖਮਿਤ੍ਵਾ ਪਮੁਖੇ ਅਟ੍ਠਾਸਿ. ਤਮ੍ਪਿਸ੍ਸ ਇਤ੍ਥਿਰੂਪਂ ਪਿਟ੍ਠਿਪਸ੍ਸੇ ਠਿਤਂ ਰਾਜਾ ਅਦ੍ਦਸ. ਥੇਰੋ ਰਞ੍ਞੋ ਆਗਮਨਂ ਞਤ੍ਵਾ ਵਿਹਾਰਂ ਅਭਿਰੁਹਿਤ੍ਵਾ ਨਿਸੀਦਿ. ਰਾਜਾ ਥੇਰਂ ਨ ਵਨ੍ਦਿ, ਤਮ੍ਪਿ ਇਤ੍ਥਿਂ ਨਾਦ੍ਦਸ. ਸੋ ਦ੍ਵਾਰਨ੍ਤਰੇਪਿ ਹੇਟ੍ਠਾਮਞ੍ਚੇਪਿ ਓਲੋਕੇਨ੍ਤੋ ਅਦਿਸ੍ਵਾਵ ਥੇਰਂ ਆਹ – ‘‘ਭਨ੍ਤੇ, ਇਮਸ੍ਮਿਂ ਠਾਨੇ ਏਕਂ ਇਤ੍ਥਿਂ ਅਦ੍ਦਸਂ, ਕਹਂ ਸਾ’’ਤਿ? ‘‘ਨ ਪਸ੍ਸਾਮਿ, ਮਹਾਰਾਜਾ’’ਤਿ. ‘‘ਇਦਾਨਿ ਮਯਾ ਤੁਮ੍ਹਾਕਂ ਪਿਟ੍ਠਿਪਸ੍ਸੇ ਠਿਤਾ ਦਿਟ੍ਠਾ’’ਤਿ ਵੁਤ੍ਤੇਪਿ ‘‘ਅਹਂ ਨ ਪਸ੍ਸਾਮਿ’’ਚ੍ਚੇਵਾਹ. ਰਾਜਾ ‘‘ਕਿਂ ਨੁ ਖੋ ਏਤ’’ਨ੍ਤਿ ਚਿਨ੍ਤੇਤ੍ਵਾ, ‘‘ਭਨ੍ਤੇ, ਇਤੋ ਤਾਵ ਨਿਕ੍ਖਮਥਾ’’ਤਿ ਆਹ. ਥੇਰੇ ਨਿਕ੍ਖਮਿਤ੍ਵਾ ਪਮੁਖੇ ਠਿਤੇ ਪੁਨ ਸਾ ਥੇਰਸ੍ਸ ਪਿਟ੍ਠਿਪਸ੍ਸੇ ਅਟ੍ਠਾਸਿ. ਰਾਜਾ ਤਂ ਦਿਸ੍ਵਾ ਪੁਨ ਉਪਰਿਤਲਂ ਅਭਿਰੁਹਿ, ਤਸ੍ਸ ਆਗਤਭਾਵਂ ਞਤ੍ਵਾ ਥੇਰੋ ਨਿਸੀਦਿ. ਪੁਨ ਰਾਜਾ ਤਂ ਸਬ੍ਬਟ੍ਠਾਨੇਸੁ ਓਲੋਕੇਨ੍ਤੋਪਿ ਅਦਿਸ੍ਵਾ, ‘‘ਭਨ੍ਤੇ, ਕਹਂ ਸਾ ਇਤ੍ਥੀ’’ਤਿ ਪੁਨ ਥੇਰਂ ਪੁਚ੍ਛਿ. ਨਾਹਂ ਪਸ੍ਸਾਮਿ ਮਹਾਰਾਜਾਤਿ. ‘‘ਕਿਂ ਕਥੇਥ, ਭਨ੍ਤੇ, ਮਯਾ ਇਦਾਨੇਵ ਤੁਮ੍ਹਾਕਂ ਪਿਟ੍ਠਿਪਸ੍ਸੇ ਠਿਤਾ ਦਿਟ੍ਠਾ’’ਤਿ ਆਹ. ਆਮ, ਮਹਾਰਾਜ, ਮਹਾਜਨੋਪਿ ‘‘ਮੇ ਪਚ੍ਛਤੋ ਪਚ੍ਛਤੋ ਇਤ੍ਥੀ ਵਿਚਰਤੀ’’ਤਿ ਵਦਤਿ, ਅਹਂ ਪਨ ਨ ਪਸ੍ਸਾਮੀਤਿ. ਰਾਜਾ ‘‘ਪਟਿਰੂਪਕੇਨ ਭਵਿਤਬ੍ਬ’’ਨ੍ਤਿ ਸਲ੍ਲਕ੍ਖੇਤ੍ਵਾ ਪੁਨ ਥੇਰਂ, ‘‘ਭਨ੍ਤੇ, ਇਤੋ ਤਾਵ ਓਤਰਥਾ’’ਤਿ ਵਤ੍ਵਾ ਥੇਰੇ ਓਤਰਿਤ੍ਵਾ ਪਮੁਖੇ ਠਿਤੇ ਪੁਨ ਤਂ ਤਸ੍ਸ ਪਿਟ੍ਠਿਪਸ੍ਸੇ ਠਿਤਂ ਦਿਸ੍ਵਾ ਉਪਰਿਤਲਂ ਅਭਿਰੁਹਿ. ਪੁਨ ਨਾਦ੍ਦਸ. ਸੋ ਪੁਨ ਥੇਰਂ ਪੁਚ੍ਛਿਤ੍ਵਾ ਤੇਨ ‘‘ਨ ਪਸ੍ਸਾਮਿ’’ਚ੍ਚੇਵ ਵੁਤ੍ਤੇ ‘‘ਪਟਿਰੂਪਕਮੇਵੇਤ’’ਨ੍ਤਿ ਨਿਟ੍ਠਂ ਗਨ੍ਤ੍ਵਾ ਥੇਰਂ ਆਹ – ‘‘ਭਨ੍ਤੇ, ਏਵਰੂਪੇ ਸਂਕਿਲੇਸੇ ਤੁਮ੍ਹਾਕਂ ਪਿਟ੍ਠਿਤੋ ਵਿਚਰਨ੍ਤੇ ਅਞ੍ਞੋ ਕੋਚਿ ਤੁਮ੍ਹਾਕਂ ਭਿਕ੍ਖਂ ਨ ਦਸ੍ਸਤਿ, ਨਿਬਦ੍ਧਂ ਮਮ ਗੇਹਂ ਪਵਿਸਥ, ਅਹਮੇਵ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਸ੍ਸਾਮੀ’’ਤਿ ਥੇਰਂ ਨਿਮਨ੍ਤੇਤ੍ਵਾ ਪਕ੍ਕਾਮਿ.

ਭਿਕ੍ਖੂ ‘‘ਪਸ੍ਸਥਾਵੁਸੋ, ਰਞ੍ਞੋ ਪਾਪਕਿਰਿਯਂ, ‘ਏਤਂ ਵਿਹਾਰਤੋ ਨੀਹਰਾ’ਤਿ ਵੁਤ੍ਤੇ ਆਗਨ੍ਤ੍ਵਾ ਚਤੂਹਿ ਪਚ੍ਚਯੇਹਿ ਨਿਮਨ੍ਤੇਤ੍ਵਾ ਗਤੋ’’ਤਿ ਉਜ੍ਝਾਯਿਂਸੁ. ਤਮ੍ਪਿ ਥੇਰਂ ਆਹਂਸੁ – ‘‘ਅਮ੍ਭੋ, ਦੁਸ੍ਸੀਲ, ਇਦਾਨਿਸਿ ਰਾਜਕੋਣ੍ਡੋ ਜਾਤੋ’’ਤਿ. ਸੋਪਿ ਪੁਬ੍ਬੇ ਭਿਕ੍ਖੂ ਕਿਞ੍ਚਿ ਵਤ੍ਤੁਂ ਅਸਕ੍ਕੋਨ੍ਤੋ ‘‘ਤੁਮ੍ਹੇ ਦੁਸ੍ਸੀਲਾ, ਤੁਮ੍ਹੇ ਕੋਣ੍ਡਾ, ਤੁਮ੍ਹੇ ਇਤ੍ਥਿਂ ਗਹੇਤ੍ਵਾ ਵਿਚਰਥਾ’’ਤਿ ਆਹ. ਤੇ ਗਨ੍ਤ੍ਵਾ ਸਤ੍ਥੁ ਆਰੋਚੇਸੁਂ – ‘‘ਭਨ੍ਤੇ, ਕੋਣ੍ਡਧਾਨਤ੍ਥੇਰੋ ਅਮ੍ਹੇਹਿ ਵੁਤ੍ਤੋ ਅਮ੍ਹੇ ‘ਦੁਸ੍ਸੀਲਾ’ਤਿਆਦੀਨਿ ਵਤ੍ਵਾ ਅਕ੍ਕੋਸਤੀ’’ਤਿ. ਸਤ੍ਥਾ ਤਂ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਸਚ੍ਚਂ ਕਿਰ ਤ੍ਵਂ, ਭਿਕ੍ਖੁ, ਏਵਂ ਵਦੇਸੀ’’ਤਿ? ‘‘ਸਚ੍ਚਂ, ਭਨ੍ਤੇ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਮਯਾ ਸਦ੍ਧਿਂ ਕਥਿਤਕਾਰਣਾ’’ਤਿ. ‘‘ਤੁਮ੍ਹੇ, ਭਿਕ੍ਖਵੇ, ਇਮਿਨਾ ਸਦ੍ਧਿਂ ਕਸ੍ਮਾ ਕਥੇਥਾ’’ਤਿ. ‘‘ਇਮਸ੍ਸ ਪਚ੍ਛਤੋ ਇਤ੍ਥਿਂ ਵਿਚਰਨ੍ਤਿਂ ਦਿਸ੍ਵਾ, ਭਨ੍ਤੇ’’ਤਿ. ‘‘ਇਮੇ ਕਿਰ ਤਯਾ ਸਦ੍ਧਿਂ ਇਤ੍ਥਿਂ ਵਿਚਰਨ੍ਤਿਂ ਦਿਸ੍ਵਾ ਵਦਨ੍ਤਿ, ਤ੍ਵਂ ਕਸ੍ਮਾ ਕਥੇਸਿ, ਏਤੇ ਤਾਵ ਦਿਸ੍ਵਾ ਕਥੇਨ੍ਤਿ. ਤ੍ਵਂ ਅਦਿਸ੍ਵਾਵ ਇਮੇਹਿ ਸਦ੍ਧਿਂ ਕਸ੍ਮਾ ਕਥੇਸਿ, ਨਨੁ ਪੁਬ੍ਬੇ ਤਵੇਵ ਪਾਪਿਕਂ ਦਿਟ੍ਠਿਂ ਨਿਸ੍ਸਾਯ ਇਦਂ ਜਾਤਂ, ਇਦਾਨਿ ਕਸ੍ਮਾ ਪੁਨ ਪਾਪਿਕਂ ਦਿਟ੍ਠਿਂ ਗਣ੍ਹਾਸੀ’’ਤਿ. ਭਿਕ੍ਖੂ ‘‘ਕਿਂ ਪਨ, ਭਨ੍ਤੇ, ਇਮਿਨਾ ਪੁਬ੍ਬੇ ਕਤ’’ਨ੍ਤਿ ਪੁਚ੍ਛਿਂਸੁ. ਅਥ ਨੇਸਂ ਸਤ੍ਥਾ ਤਸ੍ਸ ਪੁਬ੍ਬਕਮ੍ਮਂ ਕਥੇਤ੍ਵਾ ‘‘ਭਿਕ੍ਖੁ ਇਦਂ ਪਾਪਕਮ੍ਮਂ ਨਿਸ੍ਸਾਯ ਤ੍ਵਂ ਇਮਂ ਵਿਪ੍ਪਕਾਰਂ ਪਤ੍ਤੋ, ਇਦਾਨਿ ਤੇ ਪੁਨ ਤਥਾਰੂਪਂ ਪਾਪਿਕਂ ਦਿਟ੍ਠਿਂ ਗਹੇਤੁਂ ਨ ਯੁਤ੍ਤਂ, ਮਾ ਪੁਨ ਭਿਕ੍ਖੂਹਿ ਸਦ੍ਧਿਂ ਕਿਞ੍ਚਿ ਕਥੇਹਿ, ਨਿਸ੍ਸਦ੍ਦੋ ਮੁਖਵਟ੍ਟਿਯਂ ਛਿਨ੍ਨਕਂਸਥਾਲਸਦਿਸੋ ਹੋਹਿ, ਏਵਂ ਕਰੋਨ੍ਤੋ ਨਿਬ੍ਬਾਨਪ੍ਪਤ੍ਤੋ ਨਾਮ ਭਵਿਸ੍ਸਤੀ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੧੩੩. ‘‘ਮਾਵੋਚ ਫਰੁਸਂ ਕਞ੍ਚਿ, ਵੁਤ੍ਤਾ ਪਟਿਵਦੇਯ੍ਯੁ ਤਂ;

ਦੁਕ੍ਖਾ ਹਿ ਸਾਰਮ੍ਭਕਥਾ, ਪਟਿਦਣ੍ਡਾ ਫੁਸੇਯ੍ਯੁ ਤਂ.

੧੩੪. ‘‘ਸਚੇ ਨੇਰੇਸਿ ਅਤ੍ਤਾਨਂ, ਕਂਸੋ ਉਪਹਤੋ ਯਥਾ;

ਏਸ ਪਤ੍ਤੋਸਿ ਨਿਬ੍ਬਾਨਂ, ਸਾਰਮ੍ਭੋ ਤੇ ਨ ਵਿਜ੍ਜਤੀ’’ਤਿ.

ਤਤ੍ਥ ਮਾਵੋਚ ਫਰੁਸਂ ਕਞ੍ਚੀਤਿ ਕਞ੍ਚਿ ਏਕਪੁਗ੍ਗਲਮ੍ਪਿ ਫਰੁਸਂ ਮਾ ਅਵਚ. ਵੁਤ੍ਤਾਤਿ ਤਯਾ ਪਰੇ ‘‘ਦੁਸ੍ਸੀਲਾ’’ਤਿ ਵੁਤ੍ਤਾ, ਤਮ੍ਪਿ ਤਥੇਵ ਪਟਿਵਦੇਯ੍ਯੁਂ. ਸਾਰਮ੍ਭਕਥਾਤਿ ਏਸਾ ਕਰਣੁਤ੍ਤਰਾ ਯੁਗਗ੍ਗਾਹਕਥਾ ਨਾਮ ਦੁਕ੍ਖਾ. ਪਟਿਦਣ੍ਡਾਤਿ ਕਾਯਦਣ੍ਡਾਦੀਹਿ ਪਰਂ ਪਹਰਨ੍ਤਸ੍ਸ ਤਾਦਿਸਾ ਪਟਿਦਣ੍ਡਾ ਚ ਤਵ ਮਤ੍ਥਕੇ ਪਤੇਯ੍ਯੁਂ. ਸਚੇ ਨੇਰੇਸੀਤਿ ਸਚੇ ਅਤ੍ਤਾਨਂ ਨਿਚ੍ਚਲਂ ਕਾਤੁਂ ਸਕ੍ਖਿਸ੍ਸਸਿ. ਕਂਸੋ ਉਪਹਤੋ ਯਥਾਤਿ ਮੁਖਵਟ੍ਟਿਯਂ ਛਿਨ੍ਦਿਤ੍ਵਾ ਤਲਮਤ੍ਤਂ ਕਤ੍ਵਾ ਠਪਿਤਕਂਸਥਾਲਂ ਵਿਯ. ਤਞ੍ਹਿ ਹਤ੍ਥਪਾਦੇਹਿ ਵਾ ਦਣ੍ਡਕੇਨ ਵਾ ਪਹਟਮ੍ਪਿ ਸਦ੍ਦਂ ਨ ਕਰੋਤਿ, ਏਸ ਪਤ੍ਤੋਸੀਤਿ ਸਚੇ ਏਵਰੂਪੋ ਭਵਿਤੁਂ ਸਕ੍ਖਿਸ੍ਸਸਿ, ਇਮਂ ਪਟਿਪਦਂ ਪੂਰਯਮਾਨੋ ਇਦਾਨਿ ਅਪ੍ਪਤ੍ਤੋਪਿ ਏਸੋ ਨਿਬ੍ਬਾਨਪ੍ਪਤ੍ਤੋ ਨਾਮ. ਸਾਰਮ੍ਭੋ ਤੇ ਨ ਵਿਜ੍ਜਤੀਤਿ ਏਵਂ ਸਨ੍ਤੇ ਚ ਪਨ ‘‘ਤ੍ਵਂ ਦੁਸ੍ਸੀਲੋ, ਤੁਮ੍ਹੇ ਦੁਸ੍ਸੀਲਾ’’ਤਿਏਵਮਾਦਿਕੋ ਉਤ੍ਤਰਕਰਣਵਾਚਾਲਕ੍ਖਣੋ ਸਾਰਮ੍ਭੋਪਿ ਤੇ ਨ ਵਿਜ੍ਜਤਿ, ਨ ਭਵਿਸ੍ਸਤਿਯੇਵਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ, ਕੋਣ੍ਡਧਾਨਤ੍ਥੇਰੋਪਿ ਸਤ੍ਥਾਰਾ ਦਿਨ੍ਨਓਵਾਦੇ ਠਤ੍ਵਾ ਅਰਹਤ੍ਤਂ ਪਾਪੁਣਿ, ਨ ਚਿਰਸ੍ਸੇਵ ਆਕਾਸੇ ਉਪ੍ਪਤਿਤ੍ਵਾ ਪਠਮਂ ਸਲਾਕਂ ਗਣ੍ਹੀਤਿ.

ਕੋਣ੍ਡਧਾਨਤ੍ਥੇਰਵਤ੍ਥੁ ਚਤੁਤ੍ਥਂ.

੫. ਉਪੋਸਥਿਕਇਤ੍ਥੀਨਂ ਵਤ੍ਥੁ

ਯਥਾ ਦਣ੍ਡੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਪੁਬ੍ਬਾਰਾਮੇ ਵਿਹਰਨ੍ਤੋ ਵਿਸਾਖਾਦੀਨਂ ਉਪਾਸਿਕਾਨਂ ਉਪੋਸਥਕਮ੍ਮਂ ਆਰਬ੍ਭ ਕਥੇਸਿ.

ਸਾਵਤ੍ਥਿਯਂ ਕਿਰ ਏਕਸ੍ਮਿਂ ਮਹਾਉਪੋਸਥਦਿਵਸੇ ਪਞ੍ਚਸਤਮਤ੍ਤਾ ਇਤ੍ਥਿਯੋ ਉਪੋਸਥਿਕਾ ਹੁਤ੍ਵਾ ਵਿਹਾਰਂ ਅਗਮਿਂਸੁ. ਵਿਸਾਖਾ ਤਾਸੁ ਮਹਲ੍ਲਕਿਤ੍ਥਿਯੋ ਉਪਸਙ੍ਕਮਿਤ੍ਵਾ ਪੁਚ੍ਛਿ, ‘‘ਅਮ੍ਮਾ, ਕਿਮਤ੍ਥਂ ਉਪੋਸਥਿਕਾ ਜਾਤਤ੍ਥਾ’’ਤਿ. ਤਾਹਿ ‘‘ਦਿਬ੍ਬਸਮ੍ਪਤ੍ਤਿਂ ਪਤ੍ਥੇਤ੍ਵਾ’’ਤਿ ਵੁਤ੍ਤੇ ਮਜ੍ਝਿਮਿਤ੍ਥਿਯੋ ਪੁਚ੍ਛਿ, ਤਾਹਿ ‘‘ਸਪਤ੍ਤਿਵਾਸਾ ਮੁਚ੍ਚਨਤ੍ਥਾਯਾ’’ਤਿ ਵੁਤ੍ਤੇ ਤਰੁਣਿਤ੍ਥਿਯੋ ਪੁਚ੍ਛਿ, ਤਾਹਿ ‘‘ਪਠਮਗਬ੍ਭੇ ਪੁਤ੍ਤਪਟਿਲਾਭਤ੍ਥਾਯਾ’’ਤਿ ਵੁਤ੍ਤੇ ਕੁਮਾਰਿਕਾਯੋ ਪੁਚ੍ਛਿ, ਤਾਹਿ ‘‘ਤਰੁਣਭਾਵੇਯੇਵ ਪਤਿਕੁਲਗਮਨਤ੍ਥਾਯਾ’’ਤਿ ਵੁਤ੍ਤੇ ਤਂ ਸਬ੍ਬਮ੍ਪਿ ਤਾਸਂ ਕਥਂ ਸੁਤ੍ਵਾ ਤਾ ਆਦਾਯ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਟਿਪਾਟਿਯਾ ਆਰੋਚੇਸਿ. ਤਂ ਸੁਤ੍ਵਾ ਸਤ੍ਥਾ ‘‘ਵਿਸਾਖੇ ਇਮੇਸਂ ਸਤ੍ਤਾਨਂ ਜਾਤਿਆਦਯੋ ਨਾਮ ਦਣ੍ਡਹਤ੍ਥਕਗੋਪਾਲਕਸਦਿਸਾ, ਜਾਤਿ ਜਰਾਯ ਸਨ੍ਤਿਕਂ, ਜਰਾ ਬ੍ਯਾਧਿਨੋ ਸਨ੍ਤਿਕਂ, ਬ੍ਯਾਧਿ ਮਰਣਸ੍ਸ ਸਨ੍ਤਿਕਂ ਪੇਸੇਤ੍ਵਾ ਮਰਣਂ ਕੁਠਾਰਿਯਾ ਛਿਨ੍ਦਨ੍ਤਾ ਵਿਯ ਜੀਵਿਤਂ ਛਿਨ੍ਦਤਿ, ਏਵਂ ਸਨ੍ਤੇਪਿ ਵਿਵਟ੍ਟਂ ਪਤ੍ਥੇਨ੍ਤਾ ਨਾਮ ਨਤ੍ਥਿ, ਵਟ੍ਟਮੇਵ ਪਨ ਪਤ੍ਥੇਨ੍ਤੀ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੩੫. ‘‘ਯਥਾ ਦਣ੍ਡੇਨ ਗੋਪਾਲੋ, ਗਾਵੋ ਪਾਜੇਤਿ ਗੋਚਰਂ;

ਏਵਂ ਜਰਾ ਚ ਮਚ੍ਚੁ ਚ, ਆਯੁਂ ਪਾਜੇਨ੍ਤਿ ਪਾਣਿਨ’’ਨ੍ਤਿ.

ਤਤ੍ਥ ਪਾਜੇਤੀਤਿ ਛੇਕੋ ਗੋਪਾਲੋ ਕੇਦਾਰਨ੍ਤਰਂ ਪਵਿਸਨ੍ਤਿਯੋ ਗਾਵੋ ਦਣ੍ਡੇਨ ਨਿਵਾਰੇਤ੍ਵਾ ਤੇਨੇਵ ਪੋਥੇਨ੍ਤੋ ਸੁਲਭਤਿਣੋਦਕਂ ਗੋਚਰਂ ਨੇਤਿ. ਆਯੁਂ ਪਾਜੇਨ੍ਤੀਤਿ ਜੀਵਿਤਿਨ੍ਦ੍ਰਿਯਂ ਛਿਨ੍ਦਨ੍ਤਿ ਖੇਪੇਨ੍ਤਿ. ਗੋਪਾਲਕੋ ਵਿਯ ਹਿ ਜਰਾ ਚ ਮਚ੍ਚੁ ਚ, ਗੋਗਣੋ ਵਿਯ ਜੀਵਿਤਿਨ੍ਦ੍ਰਿਯਂ, ਗੋਚਰਭੂਮਿ ਵਿਯ ਮਰਣਂ. ਤਤ੍ਥ ਜਾਤਿ ਤਾਵ ਸਤ੍ਤਾਨਂ ਜੀਵਿਤਿਨ੍ਦ੍ਰਿਯਂ ਜਰਾਯ ਸਨ੍ਤਿਕਂ ਪੇਸੇਸਿ, ਜਰਾ ਬ੍ਯਾਧਿਨੋ ਸਨ੍ਤਿਕਂ, ਬ੍ਯਾਧਿ ਮਰਣਸ੍ਸ ਸਨ੍ਤਿਕਂ. ਤਮੇਵ ਮਰਣਂ ਕੁਠਾਰਿਯਾ ਛੇਦਂ ਵਿਯ ਛਿਨ੍ਦਿਤ੍ਵਾ ਗਚ੍ਛਤੀਤਿ ਇਦਮੇਤ੍ਥ ਓਪਮ੍ਮਸਮ੍ਪਟਿਪਾਦਨਂ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਉਪੋਸਥਿਕਇਤ੍ਥੀਨਂ ਵਤ੍ਥੁ ਪਞ੍ਚਮਂ.

੬. ਅਜਗਰਪੇਤਵਤ੍ਥੁ

ਅਥ ਪਾਪਾਨਿ ਕਮ੍ਮਾਨੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਅਜਗਰਪੇਤਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਮਹਾਮੋਗ੍ਗਲ੍ਲਾਨਤ੍ਥੇਰੋ ਲਕ੍ਖਣਤ੍ਥੇਰੇਨ ਸਦ੍ਧਿਂ ਗਿਜ੍ਝਕੂਟਤੋ ਓਤਰਨ੍ਤੋ ਦਿਬ੍ਬੇਨ ਚਕ੍ਖੁਨਾ ਪਞ੍ਚਵੀਸਤਿਯੋਜਨਿਕਂ ਅਜਗਰਪੇਤਂ ਨਾਮ ਅਦ੍ਦਸ. ਤਸ੍ਸ ਸੀਸਤੋ ਅਗ੍ਗਿਜਾਲਾ ਉਟ੍ਠਹਿਤ੍ਵਾ ਪਰਿਯਨ੍ਤਂ ਗਚ੍ਛਨ੍ਤਿ, ਪਰਿਯਨ੍ਤਤੋ ਉਟ੍ਠਹਿਤ੍ਵਾ ਸੀਸਂ ਗਚ੍ਛਨ੍ਤਿ, ਉਭਯਤੋ ਉਟ੍ਠਹਿਤ੍ਵਾ ਮਜ੍ਝੇ ਓਤਰਨ੍ਤਿ. ਥੇਰੋ ਤਂ ਦਿਸ੍ਵਾ ਸਿਤਂ ਪਾਤ੍ਵਾਕਾਸਿ. ਲਕ੍ਖਣਤ੍ਥੇਰੇਨ ਸਿਤਕਾਰਣਂ ਪੁਟ੍ਠੋ ‘‘ਅਕਾਲੋ, ਆਵੁਸੋ, ਇਮਸ੍ਸ ਪਞ੍ਹਸ੍ਸ ਵੇਯ੍ਯਾਕਰਣਾਯ, ਸਤ੍ਥੁ ਸਨ੍ਤਿਕੇ ਮਂ ਪੁਚ੍ਛੇਯ੍ਯਾਸੀ’’ਤਿ ਵਤ੍ਵਾ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਸਤ੍ਥੁ ਸਨ੍ਤਿਕਂ ਗਤਕਾਲੇ ਲਕ੍ਖਣਤ੍ਥੇਰੇਨ ਪੁਟ੍ਠੋ ਆਹ – ‘‘ਤਤ੍ਰਾਹਂ, ਆਵੁਸੋ, ਏਕਂ ਪੇਤਂ ਅਦ੍ਦਸਂ, ਤਸ੍ਸ ਏਵਰੂਪੋ ਨਾਮ ਅਤ੍ਤਭਾਵੋ, ਅਹਂ ਤਂ ਦਿਸ੍ਵਾ ‘ਨ ਵਤ ਮੇ ਏਵਰੂਪੋ ਅਤ੍ਤਭਾਵੋ ਦਿਟ੍ਠਪੁਬ੍ਬੋ’ਤਿ ਸਿਤਂ ਪਾਤ੍ਵਾਕਾਸਿ’’ਨ੍ਤਿ. ਸਤ੍ਥਾ ‘‘ਚਕ੍ਖੁਭੂਤਾ ਵਤ, ਭਿਕ੍ਖਵੇ, ਸਾਵਕਾ ਵਿਹਰਨ੍ਤੀ’’ਤਿਆਦੀਨਿ (ਪਾਰਾ. ੨੨੮; ਸਂ. ਨਿ. ੨.੨੦੨) ਵਦਨ੍ਤੋ ਥੇਰਸ੍ਸ ਕਥਂ ਪਤਿਟ੍ਠਾਪੇਤ੍ਵਾ ‘‘ਮਯਾਪਿ ਏਸੋ, ਭਿਕ੍ਖਵੇ, ਪੇਤੋ ਬੋਧਿਮਣ੍ਡੇਯੇਵ ਦਿਟ੍ਠੋ, ‘ਯੇ ਚ ਪਨ ਮੇ ਵਚਨਂ ਨ ਸਦ੍ਦਹੇਯ੍ਯੁਂ, ਤੇਸਂ ਤਂ ਅਹਿਤਾਯ ਅਸ੍ਸਾ’ਤਿ ਨ ਕਥੇਸਿਂ, ਇਦਾਨਿ ਮੋਗ੍ਗਲ੍ਲਾਨਂ ਸਕ੍ਖਿਂ ਲਭਿਤ੍ਵਾ ਕਥੇਮੀ’’ਤਿ ਵਤ੍ਵਾ ਭਿਕ੍ਖੂਹਿ ਤਸ੍ਸ ਪੁਬ੍ਬਕਮ੍ਮਂ ਪੁਟ੍ਠੋ ਬ੍ਯਾਕਾਸਿ –

ਕਸ੍ਸਪਬੁਦ੍ਧਕਾਲੇ ਕਿਰ ਸੁਮਙ੍ਗਲਸੇਟ੍ਠਿ ਨਾਮ ਸੁਵਣ੍ਣਿਟ੍ਠਕਾਹਿ ਭੂਮਿਂ ਸਨ੍ਥਰਿਤ੍ਵਾ ਵੀਸਤਿਉਸਭਟ੍ਠਾਨੇ ਤਤ੍ਤਕੇਨੇਵ ਧਨੇਨ ਵਿਹਾਰਂ ਕਾਰੇਤ੍ਵਾ ਤਾਵਤ੍ਤਕੇਨੇਵ ਵਿਹਾਰਮਹਂ ਕਾਰੇਸਿ. ਸੋ ਏਕਦਿਵਸਂ ਪਾਤੋਵ ਸਤ੍ਥੁ ਸਨ੍ਤਿਕਂ ਗਚ੍ਛਨ੍ਤੋ ਨਗਰਦ੍ਵਾਰੇ ਏਕਿਸ੍ਸਾ ਸਾਲਾਯ ਕਾਸਾਵਂ ਸਸੀਸਂ ਪਾਰੁਪਿਤ੍ਵਾ ਕਲਲਮਕ੍ਖਿਤੇਹਿ ਪਾਦੇਹਿ ਨਿਪਨ੍ਨਂ ਏਕਂ ਚੋਰਂ ਦਿਸ੍ਵਾ ‘‘ਅਯਂ ਕਲਲਮਕ੍ਖਿਤਪਾਦੋ ਰਤ੍ਤਿਂ ਵਿਚਰਿਤ੍ਵਾ ਦਿਵਾ ਨਿਪਨ੍ਨਮਨੁਸ੍ਸੋ ਭਵਿਸ੍ਸਤੀ’’ਤਿ ਆਹ. ਚੋਰੋ ਮੁਖਂ ਵਿਵਰਿਤ੍ਵਾ ਸੇਟ੍ਠਿਂ ਦਿਸ੍ਵਾ ‘‘ਹੋਤੁ, ਜਾਨਿਸ੍ਸਾਮਿ ਤੇ ਕਤ੍ਤਬ੍ਬ’’ਨ੍ਤਿ ਆਘਾਤਂ ਬਨ੍ਧਿਤ੍ਵਾ ਸਤ੍ਤਕ੍ਖਤ੍ਤੁਂ ਖੇਤ੍ਤਂ ਝਾਪੇਸਿ, ਸਤ੍ਤਕ੍ਖਤ੍ਤੁਂ ਵਜੇ ਗੁਨ੍ਨਂ ਪਾਦੇ ਛਿਨ੍ਦਿ, ਸਤ੍ਤਕ੍ਖਤ੍ਤੁਂ ਗੇਹਂ ਝਾਪੇਸਿ, ਸੋ ਏਤ੍ਤਕੇਨਾਪਿ ਕੋਪਂ ਨਿਬ੍ਬਾਪੇਤੁਂ ਅਸਕ੍ਕੋਨ੍ਤੋ ਤਸ੍ਸ ਚੂਲ਼ੂਪਟ੍ਠਾਕੇਨ ਸਦ੍ਧਿਂ ਮਿਤ੍ਤਸਨ੍ਥਵਂ ਕਤ੍ਵਾ ‘‘ਕਿਂ ਤੇ ਸੇਟ੍ਠਿਨੋ ਪਿਯ’’ਨ੍ਤਿ ਪੁਟ੍ਠੋ ‘‘ਗਨ੍ਧਕੁਟਿਤੋ ਅਞ੍ਞਂ ਤਸ੍ਸ ਪਿਯਤਰਂ ਨਤ੍ਥੀ’’ਤਿ ਸੁਤ੍ਵਾ ‘‘ਹੋਤੁ, ਗਨ੍ਧਕੁਟਿਂ ਝਾਪੇਤ੍ਵਾ ਕੋਪਂ ਨਿਬ੍ਬਾਪੇਸ੍ਸਾਮੀ’’ਤਿ ਸਤ੍ਥਰਿ ਪਿਣ੍ਡਾਯ ਪਵਿਟ੍ਠੇ ਪਾਨੀਯਪਰਿਭੋਜਨੀਯਘਟੇ ਭਿਨ੍ਦਿਤ੍ਵਾ ਗਨ੍ਧਕੁਟਿਯਂ ਅਗ੍ਗਿਂ ਅਦਾਸਿ. ਸੇਟ੍ਠਿ ‘‘ਗਨ੍ਧਕੁਟਿ ਕਿਰ ਝਾਯਤੀ’’ਤਿ ਸੁਤ੍ਵਾ ਆਗਚ੍ਛਨ੍ਤੋ ਝਾਮਕਾਲੇ ਆਗਨ੍ਤ੍ਵਾ ਗਨ੍ਧਕੁਟਿਂ ਝਾਮਂ ਓਲੋਕੇਨ੍ਤੋ ਵਾਲਗ੍ਗਮਤ੍ਤਮ੍ਪਿ ਦੋਮਨਸ੍ਸਂ ਅਕਤ੍ਵਾ ਵਾਮਬਾਹੁਂ ਸਮਞ੍ਜਿਤ੍ਵਾ ਦਕ੍ਖਿਣੇਨ ਹਤ੍ਥੇਨ ਮਹਾਅਪ੍ਫੋਟਨਂ ਅਪ੍ਫੋਟੇਸਿ. ਅਥ ਨਂ ਸਮੀਪੇ ਠਿਤਾ ਪੁਚ੍ਛਿਂਸੁ – ‘‘ਕਸ੍ਮਾ, ਸਾਮਿ, ਏਤ੍ਤਕਂ ਧਨਂ ਵਿਸ੍ਸਜ੍ਜੇਤ੍ਵਾ ਕਤਗਨ੍ਧਕੁਟਿਯਾ ਝਾਮਕਾਲੇ ਅਪ੍ਫੋਟੇਸੀ’’ਤਿ? ਸੋ ਆਹ – ‘‘ਏਤ੍ਤਕਂ ਮੇ, ਤਾਤਾ, ਅਗ੍ਗਿਆਦੀਹਿ ਅਸਾਧਾਰਣੇ ਬੁਦ੍ਧਸ੍ਸ ਸਾਸਨੇ ਧਨਂ ਨਿਦਹਿਤੁਂ ਲਦ੍ਧਂ, ‘ਪੁਨਪਿ ਏਤ੍ਤਕਂ ਧਨਂ ਵਿਸ੍ਸਜ੍ਜੇਤ੍ਵਾ ਸਤ੍ਥੁ ਗਨ੍ਧਕੁਟਿਂ ਕਾਤੁਂ ਲਭਿਸ੍ਸਾਮੀ’ਤਿ ਤੁਟ੍ਠਮਾਨਸੋ ਅਪ੍ਫੋਟੇਸਿ’’ਨ੍ਤਿ. ਸੋ ਪੁਨ ਤਤ੍ਤਕਂ ਧਨਂ ਵਿਸ੍ਸਜ੍ਜੇਤ੍ਵਾ ਗਨ੍ਧਕੁਟਿਂ ਕਾਰੇਤ੍ਵਾ ਵੀਸਤਿਸਹਸ੍ਸਭਿਕ੍ਖੁਪਰਿਵਾਰਸ੍ਸ ਸਤ੍ਥੁਨੋ ਦਾਨਂ ਅਦਾਸਿ. ਤਂ ਦਿਸ੍ਵਾ ਚੋਰੋ ਚਿਨ੍ਤੇਸਿ – ‘‘ਅਹਂ ਇਮਂ ਅਮਾਰੇਤ੍ਵਾ ਮਙ੍ਕੁਕਾਤੁਂ ਨ ਸਕ੍ਖਿਸ੍ਸਾਮਿ, ਹੋਤੁ, ਮਾਰੇਸ੍ਸਾਮਿ ਨ’’ਨ੍ਤਿ ਨਿਵਾਸਨਨ੍ਤਰੇ ਛੁਰਿਕਂ ਬਨ੍ਧਿਤ੍ਵਾ ਸਤ੍ਤਾਹਂ ਵਿਹਾਰੇ ਵਿਚਰਨ੍ਤੋਪਿ ਓਕਾਸਂ ਨ ਲਭਿ. ਮਹਾਸੇਟ੍ਠਿਪਿ ਸਤ੍ਤ ਦਿਵਸਾਨਿ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਦਾਨਂ ਦਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਮਮ ਏਕੇਨ ਪੁਰਿਸੇਨ ਸਤ੍ਤਕ੍ਖਤ੍ਤੁਂ ਖੇਤ੍ਤਂ ਝਾਪਿਤਂ, ਸਤ੍ਤਕ੍ਖਤ੍ਤੁਂ ਵਜੇ ਗੁਨ੍ਨਂ ਪਾਦਾ ਛਿਨ੍ਨਾ, ਸਤ੍ਤਕ੍ਖਤ੍ਤੁਂ ਗੇਹਂ ਝਾਪਿਤਂ, ਇਦਾਨਿ ਗਨ੍ਧਕੁਟਿਪਿ ਤੇਨੇਵ ਝਾਪਿਤਾ ਭਵਿਸ੍ਸਤਿ, ਅਹਂ ਇਮਸ੍ਮਿਂ ਦਾਨੇ ਪਠਮਂ ਪਤ੍ਤਿਂ ਤਸ੍ਸ ਦਮ੍ਮੀ’’ਤਿ.

ਤਂ ਸੁਤ੍ਵਾ ਚੋਰੋ ‘‘ਭਾਰਿਯਂ ਵਤ ਮੇ ਕਮ੍ਮਂ ਕਤਂ, ਏਵਂ ਅਪਰਾਧਕਾਰਕੇ ਮਯਿ ਇਮਸ੍ਸ ਕੋਪਮਤ੍ਤਮ੍ਪਿ ਨਤ੍ਥਿ, ਇਮਸ੍ਮਿਮ੍ਪਿ ਦਾਨੇ ਮਯ੍ਹਮੇਵ ਪਠਮਂ ਪਤ੍ਤਿਂ ਦੇਤਿ, ਅਹਂ ਇਮਸ੍ਮਿਂ ਦੁਬ੍ਭਾਮਿ, ਏਵਰੂਪਂ ਮੇ ਪੁਰਿਸਂ ਅਖਮਾਪੇਨ੍ਤਸ੍ਸ ਦੇਵਦਣ੍ਡੋਪਿ ਮੇ ਮਤ੍ਥਕੇ ਪਤੇਯ੍ਯਾ’’ਤਿ ਗਨ੍ਤ੍ਵਾ ਸੇਟ੍ਠਿਸ੍ਸ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਖਮਾਹਿ ਮੇ, ਸਾਮੀ’’ਤਿ ਵਤ੍ਵਾ ‘‘ਕਿਂ ਇਦ’’ਨ੍ਤਿ ਵੁਤ੍ਤੇ, ‘‘ਸਾਮਿ, ਏਵਂ ਅਯੁਤ੍ਤਕਂ ਕਮ੍ਮਂ ਮਯਾ ਕਤਂ, ਤਸ੍ਸ ਮੇ ਖਮਾਹੀ’’ਤਿ ਆਹ. ਅਥ ਨਂ ਸੇਟ੍ਠਿ ‘‘ਤਯਾ ਮੇ ਇਦਞ੍ਚਿਦਞ੍ਚ ਕਤ’’ਨ੍ਤਿ ਸਬ੍ਬਂ ਪੁਚ੍ਛਿਤ੍ਵਾ ‘‘ਆਮ, ਮਯਾ ਕਤ’’ਨ੍ਤਿ ਵੁਤ੍ਤੇ, ‘‘ਤ੍ਵਂ ਮਯਾ ਨ ਦਿਟ੍ਠਪੁਬ੍ਬੋ, ਕਸ੍ਮਾ ਮੇ ਕੁਜ੍ਝਿਤ੍ਵਾ ਏਵਮਕਾਸੀ’’ਤਿ ਪੁਚ੍ਛਿ. ਸੋ ਏਕਦਿਵਸਂ ਨਗਰਾ ਨਿਕ੍ਖਨ੍ਤੇਨ ਤੇਨ ਵੁਤ੍ਤਵਚਨਂ ਸਾਰੇਤ੍ਵਾ ‘‘ਇਮਿਨਾ ਮੇ ਕਾਰਣੇਨ ਕੋਪੋ ਉਪ੍ਪਾਦਿਤੋ’’ਤਿ ਆਹ. ਸੇਟ੍ਠਿ ਅਤ੍ਤਨਾ ਵੁਤ੍ਤਂ ਸਰਿਤ੍ਵਾ ‘‘ਆਮ, ਤਾਤ, ਵੁਤ੍ਤਂ ਮਯਾ, ਤਂ ਮੇ ਖਮਾਹੀ’’ਤਿ ਚੋਰਂ ਖਮਾਪੇਤ੍ਵਾ ‘‘ਉਟ੍ਠੇਹਿ, ਤਾਤ, ਖਮਾਮਿ ਤੇ, ਗਚ੍ਛ, ਤਾਤਾ’’ਤਿ ਆਹ. ਸਚੇ ਮੇ, ਸਾਮਿ, ਖਮਸਿ, ਸਪੁਤ੍ਤਦਾਰਂ ਮਂ ਗੇਹੇ ਦਾਸਂ ਕਰੋਹੀਤਿ. ਤਾਤ, ਤ੍ਵਂ ਮਯਾ ਏਤ੍ਤਕੇ ਕਥਿਤੇ ਏਵਰੂਪਂ ਛੇਦਨਂ ਅਕਾਸਿ, ਗੇਹੇ ਵਸਨ੍ਤੇਨ ਪਨ ਸਦ੍ਧਿਂ ਨ ਸਕ੍ਕਾ ਕਿਞ੍ਚਿ ਕਥੇਤੁਂ, ਨ ਮੇ ਤਯਾ ਗੇਹੇ ਵਸਨ੍ਤੇਨ ਕਿਚ੍ਚਂ ਅਤ੍ਥਿ, ਖਮਾਮਿ ਤੇ, ਗਚ੍ਛ, ਤਾਤਾਤਿ. ਚੋਰੋ ਤਂ ਕਮ੍ਮਂ ਕਤ੍ਵਾ ਆਯੁਪਰਿਯੋਸਾਨੇ ਅਵੀਚਿਮ੍ਹਿ ਨਿਬ੍ਬਤ੍ਤੋ ਦੀਘਰਤ੍ਤਂ ਤਤ੍ਥ ਪਚ੍ਚਿਤ੍ਵਾ ਵਿਪਾਕਾਵਸੇਸੇਨ ਇਦਾਨਿ ਗਿਜ੍ਝਕੂਟੇ ਪਬ੍ਬਤੇ ਪਚ੍ਚਤੀਤਿ.

ਏਵਂ ਸਤ੍ਥਾ ਤਸ੍ਸ ਪੁਬ੍ਬਕਮ੍ਮਂ ਕਥੇਤ੍ਵਾ, ‘‘ਭਿਕ੍ਖਵੇ, ਬਾਲਾ ਨਾਮ ਪਾਪਾਨਿ ਕਮ੍ਮਾਨਿ ਕਰੋਨ੍ਤਾ ਨ ਬੁਜ੍ਝਨ੍ਤਿ, ਪਚ੍ਛਾ ਪਨ ਅਤ੍ਤਨਾ ਕਤਕਮ੍ਮੇਹਿ ਡਯ੍ਹਮਾਨਾ ਅਤ੍ਤਨਾਵ ਅਤ੍ਤਨੋ ਦਾਵਗ੍ਗਿਸਦਿਸਾਵ ਹੋਨ੍ਤੀ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੩੬. ‘‘ਅਥ ਪਾਪਾਨਿ ਕਮ੍ਮਾਨਿ, ਕਰਂ ਬਾਲੋ ਨ ਬੁਜ੍ਝਤਿ;

ਸੇਹਿ ਕਮ੍ਮੇਹਿ ਦੁਮ੍ਮੇਧੋ, ਅਗ੍ਗਿਡਡ੍ਢੋਵ ਤਪ੍ਪਤੀ’’ਤਿ.

ਤਤ੍ਥ ਅਥ ਪਾਪਾਨੀਤਿ ਨ ਕੇਵਲਂ ਬਾਲੋ ਕੋਧਵਸੇਨ ਪਾਪਾਨਿ ਕਰੋਤਿ, ਕਰੋਨ੍ਤੋਪਿ ਪਨ ਨ ਬੁਜ੍ਝਤੀਤਿ ਅਤ੍ਥੋ. ਪਾਪਂ ਕਰੋਨ੍ਤੋ ਚ ‘‘ਪਾਪਂ ਕਰੋਮੀ’’ਤਿ ਅਬੁਜ੍ਝਨਕੋ ਨਾਮ ਨਤ੍ਥਿ. ‘‘ਇਮਸ੍ਸ ਕਮ੍ਮਸ੍ਸ ਏਵਰੂਪੋ ਨਾਮ ਵਿਪਾਕੋ’’ਤਿ ਅਜਾਨਨਤਾਯ ‘‘ਨ ਬੁਜ੍ਝਤੀ’’ਤਿ ਵੁਤ੍ਤਂ. ਸੇਹੀਤਿ ਸੋ ਤੇਹਿ ਅਤ੍ਤਨੋ ਸਨ੍ਤਕੇਹਿ ਕਮ੍ਮੇਹਿ ਦੁਮ੍ਮੇਧੋ ਨਿਪ੍ਪਞ੍ਞੋ ਪੁਗ੍ਗਲੋ ਨਿਰਯੇ ਨਿਬ੍ਬਤ੍ਤਿਤ੍ਵਾ ਅਗ੍ਗਿਡਡ੍ਢੋਵ ਤਪ੍ਪਤੀਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਅਜਗਰਪੇਤਵਤ੍ਥੁ ਛਟ੍ਠਂ.

੭. ਮਹਾਮੋਗ੍ਗਲ੍ਲਾਨਤ੍ਥੇਰਵਤ੍ਥੁ

ਯੋ ਦਣ੍ਡੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਮਹਾਮੋਗ੍ਗਲ੍ਲਾਨਤ੍ਥੇਰਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਤਿਤ੍ਥਿਯਾ ਸਨ੍ਨਿਪਤਿਤ੍ਵਾ ਮਨ੍ਤੇਸੁਂ – ‘‘ਜਾਨਾਥਾਵੁਸੋ, ‘ਕੇਨ ਕਾਰਣੇਨ ਸਮਣਸ੍ਸ ਗੋਤਮਸ੍ਸ ਲਾਭਸਕ੍ਕਾਰੋ ਮਹਾ ਹੁਤ੍ਵਾ ਨਿਬ੍ਬਤ੍ਤੋ’ਤਿ. ਮਯਂ ਨ ਜਾਨਾਮ, ਤੁਮ੍ਹੇ ਪਨ ਜਾਨਾਥਾਤਿ. ਆਮ, ਜਾਨਾਮ, ਮਹਾਮੋਗ੍ਗਲ੍ਲਾਨਂ ਨਾਮ ਏਕਂ ਨਿਸ੍ਸਾਯ ਉਪ੍ਪਨ੍ਨੋ. ਸੋ ਹਿ ਦੇਵਲੋਕਂ ਗਨ੍ਤ੍ਵਾ ਦੇਵਤਾਹਿ ਕਤਕਮ੍ਮਂ ਪੁਚ੍ਛਿਤ੍ਵਾ ਆਗਨ੍ਤ੍ਵਾ ਮਨੁਸ੍ਸਾਨਂ ਕਥੇਤਿ ‘ਇਦਂ ਨਾਮ ਕਤ੍ਵਾ ਏਵਰੂਪਂ ਸਮ੍ਪਤ੍ਤਿਂ ਲਭਨ੍ਤੀ’ਤਿ. ਨਿਰਯੇ ਨਿਬ੍ਬਤ੍ਤਾਨਮ੍ਪਿ ਕਮ੍ਮਂ ਪੁਚ੍ਛਿਤ੍ਵਾ ਆਗਨ੍ਤ੍ਵਾ ਮਨੁਸ੍ਸਾਨਂ ਕਥੇਤਿ ‘ਇਦਂ ਨਾਮ ਕਤ੍ਵਾ ਏਵਰੂਪਂ ਦੁਕ੍ਖਂ ਅਨੁਭਵਨ੍ਤੀ’ਤਿ. ਮਨੁਸ੍ਸਾ ਤਸ੍ਸ ਕਥਂ ਸੁਤ੍ਵਾ ਮਹਨ੍ਤਂ ਲਾਭਸਕ੍ਕਾਰਂ ਅਭਿਹਰਨ੍ਤਿ, ਸਚੇ ਤਂ ਮਾਰੇਤੁਂ ਸਕ੍ਖਿਸ੍ਸਾਮ, ਸੋ ਲਾਭਸਕ੍ਕਾਰੋ ਅਮ੍ਹਾਕਂ ਨਿਬ੍ਬਤ੍ਤਿਸ੍ਸਤੀ’’ਤਿ. ਤੇ ‘‘ਅਤ੍ਥੇਕੋ ਉਪਾਯੋ’’ਤਿ ਸਬ੍ਬੇ ਏਕਚ੍ਛਨ੍ਦਾ ਹੁਤ੍ਵਾ ‘‘ਯਂਕਿਞ੍ਚਿ ਕਤ੍ਵਾ ਤਂ ਮਾਰਾਪੇਸ੍ਸਾਮਾ’’ਤਿ ਅਤ੍ਤਨੋ ਉਪਟ੍ਠਾਕੇ ਸਮਾਦਪੇਤ੍ਵਾ ਕਹਾਪਣਸਹਸ੍ਸਂ ਲਭਿਤ੍ਵਾ ਪੁਰਿਸਘਾਤਕਮ੍ਮਂ ਕਤ੍ਵਾ ਚਰਨ੍ਤੇ ਚੋਰੇ ਪਕ੍ਕੋਸਾਪੇਤ੍ਵਾ ‘‘ਮਹਾਮੋਗ੍ਗਲ੍ਲਾਨਤ੍ਥੇਰੋ ਨਾਮ ਕਾਲ਼ਸਿਲਾਯਂ ਵਸਤਿ, ਤਤ੍ਥ ਗਨ੍ਤ੍ਵਾ ਤਂ ਮਾਰੇਥਾ’’ਤਿ ਤੇਸਂ ਕਹਾਪਣੇ ਅਦਂਸੁ. ਚੋਰਾ ਧਨਲੋਭੇਨ ਸਮ੍ਪਟਿਚ੍ਛਿਤ੍ਵਾ ‘‘ਥੇਰਂ ਮਾਰੇਸ੍ਸਾਮਾ’’ਤਿ ਗਨ੍ਤ੍ਵਾ ਤਸ੍ਸ ਵਸਨਟ੍ਠਾਨਂ ਪਰਿਵਾਰੇਸੁਂ. ਥੇਰੋ ਤੇਹਿ ਪਰਿਕ੍ਖਿਤ੍ਤਭਾਵਂ ਞਤ੍ਵਾ ਕੁਞ੍ਚਿਕਚ੍ਛਿਦ੍ਦੇਨ ਨਿਕ੍ਖਮਿਤ੍ਵਾ ਪਕ੍ਕਾਮਿ. ਤੇ ਚੋਰਾ ਤਂ ਦਿਵਸਂ ਥੇਰਂ ਅਦਿਸ੍ਵਾ ਪੁਨੇਕਦਿਵਸਂ ਗਨ੍ਤ੍ਵਾ ਪਰਿਕ੍ਖਿਪਿਂਸੁ. ਥੇਰੋ ਞਤ੍ਵਾ ਕਣ੍ਣਿਕਾਮਣ੍ਡਲਂ ਭਿਨ੍ਦਿਤ੍ਵਾ ਆਕਾਸਂ ਪਕ੍ਖਨ੍ਦਿ. ਏਵਂ ਤੇ ਪਠਮਮਾਸੇਪਿ ਮਜ੍ਝਿਮਮਾਸੇਪਿ ਥੇਰਂ ਗਹੇਤੁਂ ਨਾਸਕ੍ਖਿਂਸੁ. ਪਚ੍ਛਿਮਮਾਸੇ ਪਨ ਸਮ੍ਪਤ੍ਤੇ ਥੇਰੋ ਅਤ੍ਤਨਾ ਕਤਕਮ੍ਮਸ੍ਸ ਆਕਡ੍ਢਨਭਾਵਂ ਞਤ੍ਵਾ ਨ ਅਪਗਚ੍ਛਿ. ਚੋਰਾ ਗਨ੍ਤ੍ਵਾ ਥੇਰਂ ਗਹੇਤ੍ਵਾ ਤਣ੍ਡੁਲਕਣਮਤ੍ਤਾਨਿਸ੍ਸ ਅਟ੍ਠੀਨਿ ਕਰੋਨ੍ਤਾ ਭਿਨ੍ਦਿਂਸੁ. ਅਥ ਨਂ ‘‘ਮਤੋ’’ਤਿ ਸਞ੍ਞਾਯ ਏਕਸ੍ਮਿਂ ਗੁਮ੍ਬਪਿਟ੍ਠੇ ਖਿਪਿਤ੍ਵਾ ਪਕ੍ਕਮਿਂਸੁ.

ਥੇਰੋ ‘‘ਸਤ੍ਥਾਰਂ ਪਸ੍ਸਿਤ੍ਵਾਵ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਅਤ੍ਤਭਾਵਂ ਝਾਨਵੇਠਨੇਨ ਵੇਠੇਤ੍ਵਾ ਥਿਰਂ ਕਤ੍ਵਾ ਆਕਾਸੇਨ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਆਹ. ‘‘ਪਰਿਨਿਬ੍ਬਾਯਿਸ੍ਸਸਿ, ਮੋਗ੍ਗਲ੍ਲਾਨਾ’’ਤਿ? ‘‘ਆਮ, ਭਨ੍ਤੇ’’ਤਿ. ‘‘ਕਤ੍ਥ ਗਨ੍ਤ੍ਵਾ’’ਤਿ? ‘‘ਕਾਲ਼ਸਿਲਾਪਦੇਸਂ, ਭਨ੍ਤੇ’’ਤਿ. ਤੇਨ ਹਿ, ਮੋਗ੍ਗਲ੍ਲਾਨ, ਮਯ੍ਹਂ ਧਮ੍ਮਂ ਕਥੇਤ੍ਵਾ ਯਾਹਿ. ਤਾਦਿਸਸ੍ਸ ਹਿ ਮੇ ਸਾਵਕਸ੍ਸ ਇਦਾਨਿ ਦਸ੍ਸਨਂ ਨਤ੍ਥੀਤਿ. ਸੋ ‘‘ਏਵਂ ਕਰਿਸ੍ਸਾਮਿ, ਭਨ੍ਤੇ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ ਆਕਾਸਂ ਉਪ੍ਪਤਿਤ੍ਵਾ ਪਰਿਨਿਬ੍ਬਾਨਦਿਵਸੇ ਸਾਰਿਪੁਤ੍ਤਤ੍ਥੇਰੋ ਵਿਯ ਨਾਨਪ੍ਪਕਾਰਾ ਇਦ੍ਧਿਯੋ ਕਤ੍ਵਾ ਧਮ੍ਮਂ ਕਥੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਾਲ਼ਸਿਲਾਟਵਿਂ ਗਨ੍ਤ੍ਵਾ ਪਰਿਨਿਬ੍ਬਾਯਿ. ‘‘ਥੇਰਂ ਕਿਰ ਚੋਰਾ ਮਾਰੇਸੁ’’ਨ੍ਤਿ ਅਯਮ੍ਪਿ ਕਥਾ ਸਕਲਜਮ੍ਬੁਦੀਪੇ ਪਤ੍ਥਰਿ. ਰਾਜਾ ਅਜਾਤਸਤ੍ਤੁ ਚੋਰੇ ਪਰਿਯੇਸਨਤ੍ਥਾਯ ਚਰਪੁਰਿਸੇ ਪਯੋਜੇਸਿ. ਤੇਸੁਪਿ ਚੋਰੇਸੁ ਸੁਰਾਪਾਨੇ ਸੁਰਂ ਪਿਵਨ੍ਤੇਸੁ ਏਕੋ ਏਕਸ੍ਸ ਪਿਟ੍ਠਿਂ ਪਹਰਿਤ੍ਵਾ ਪਾਤੇਸਿ. ਸੋ ਤਂ ਸਨ੍ਤੇਜ੍ਜੇਤ੍ਵਾ ‘‘ਅਮ੍ਭੋ ਦੁਬ੍ਬਿਨੀਤ, ਤ੍ਵਂ ਕਸ੍ਮਾ ਮੇ ਪਿਟ੍ਠਿਂ ਪਾਤੇਸੀ’’ਤਿ ਆਹ. ਕਿਂ ਪਨ ਹਰੇ ਦੁਟ੍ਠਚੋਰ, ਤਯਾ ਮਹਾਮੋਗ੍ਗਲ੍ਲਾਨਤ੍ਥੇਰੋ ਪਠਮਂ ਪਹਟੋਤਿ? ਕਿਂ ਪਨ ਮਯਾ ਪਹਟਭਾਵਂ ਤ੍ਵਂ ਨ ਜਾਨਾਸੀਤਿ? ਇਤਿ ਨੇਸਂ ‘‘ਮਯਾ ਪਹਟੋ, ਮਯਾ ਪਹਟੋ’’ਤਿ ਵਦਨ੍ਤਾਨਂ ਵਚਨਂ ਸੁਤ੍ਵਾ ਤੇ ਚਰਪੁਰਿਸਾ ਤੇ ਸਬ੍ਬੇ ਚੋਰੇ ਗਹੇਤ੍ਵਾ ਰਞ੍ਞੋ ਆਰੋਚੇਸੁਂ. ਰਾਜਾ ਚੋਰੇ ਪਕ੍ਕੋਸਾਪੇਤ੍ਵਾ ਪੁਚ੍ਛਿ – ‘‘ਤੁਮ੍ਹੇਹਿ ਥੇਰੋ ਮਾਰਿਤੋ’’ਤਿ? ‘‘ਆਮ, ਦੇਵਾ’’ਤਿ. ‘‘ਕੇਨ ਤੁਮ੍ਹੇ ਉਯ੍ਯੋਜਿਤਾ’’ਤਿ? ‘‘ਨਗ੍ਗਸਮਣਕੇਹਿ, ਦੇਵਾ’’ਤਿ. ਰਾਜਾ ਪਞ੍ਚਸਤੇ ਨਗ੍ਗਸਮਣਕੇ ਗਾਹਾਪੇਤ੍ਵਾ ਪਞ੍ਚਸਤੇਹਿ ਚੋਰੇਹਿ ਸਦ੍ਧਿਂ ਰਾਜਙ੍ਗਣੇ ਨਾਭਿਪ੍ਪਮਾਣੇਸੁ ਆਵਾਟੇਸੁ ਨਿਖਣਾਪੇਤ੍ਵਾ ਪਲਾਲੇਹਿ ਪਟਿਚ੍ਛਾਦਾਪੇਤ੍ਵਾ ਅਗ੍ਗਿਂ ਦਾਪੇਸਿ. ਅਥ ਨੇਸਂ ਝਾਮਭਾਵਂ ਞਤ੍ਵਾ ਅਯਨਙ੍ਗਲੇਹਿ ਕਸਾਪੇਤ੍ਵਾ ਸਬ੍ਬੇ ਖਣ੍ਡਾਖਣ੍ਡਿਕਂ ਕਾਰਾਪੇਸਿ.

ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ – ‘‘ਮਹਾਮੋਗ੍ਗਲ੍ਲਾਨਤ੍ਥੇਰੋ ਅਤ੍ਤਨੋ ਅਨਨੁਰੂਪਮੇਵ ਮਰਣਂ ਪਤ੍ਤੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਮੋਗ੍ਗਲ੍ਲਾਨੋ ਇਮਸ੍ਸੇਵ ਅਤ੍ਤਭਾਵਸ੍ਸ ਅਨਨੁਰੂਪਂ ਮਰਣਂ ਪਤ੍ਤੋ, ਪੁਬ੍ਬੇ ਪਨ ਤੇਨ ਕਤਸ੍ਸ ਕਮ੍ਮਸ੍ਸ ਅਨੁਰੂਪਮੇਵ ਮਰਣਂ ਪਤ੍ਤੋ’’ਤਿ ਵਤ੍ਵਾ ‘‘ਕਿਂ ਪਨਸ੍ਸ, ਭਨ੍ਤੇ, ਪੁਬ੍ਬਕਮ੍ਮ’’ਨ੍ਤਿ ਪੁਟ੍ਠੋ ਵਿਤ੍ਥਾਰੇਤ੍ਵਾ ਕਥੇਸਿ –

ਅਤੀਤੇ ਕਿਰ ਬਾਰਾਣਸਿਵਾਸੀ ਏਕੋ ਕੁਲਪੁਤ੍ਤੋ ਸਯਮੇਵ ਕੋਟ੍ਟਨਪਚਨਾਦੀਨਿ ਕਮ੍ਮਾਨਿ ਕਰੋਨ੍ਤੋ ਮਾਤਾਪਿਤਰੋ ਪਟਿਜਗ੍ਗਿ. ਅਥਸ੍ਸ ਮਾਤਾਪਿਤਰੋ ਨਂ, ‘‘ਤਾਤ, ਤ੍ਵਂ ਏਕਕੋਵ ਗੇਹੇ ਚ ਅਰਞ੍ਞੇ ਚ ਕਮ੍ਮਂ ਕਰੋਨ੍ਤੋ ਕਿਲਮਸਿ, ਏਕਂ ਤੇ ਕੁਮਾਰਿਕਂ ਆਨੇਸ੍ਸਾਮਾ’’ਤਿ ਵਤ੍ਵਾ, ‘‘ਅਮ੍ਮਤਾਤਾ, ਨ ਮਯ੍ਹਂ ਏਵਰੂਪਾਯਤ੍ਥੋ, ਅਹਂ ਯਾਵ ਤੁਮ੍ਹੇ ਜੀਵਥ, ਤਾਵ ਵੋ ਸਹਤ੍ਥਾ ਉਪਟ੍ਠਹਿਸ੍ਸਾਮੀ’’ਤਿ ਤੇਨ ਪਟਿਕ੍ਖਿਤ੍ਤਾ ਪੁਨਪ੍ਪੁਨਂ ਤਂ ਯਾਚਿਤ੍ਵਾ ਕੁਮਾਰਿਕਂ ਆਨਯਿਂਸੁ. ਸਾ ਕਤਿਪਾਹਮੇਵ ਤੇ ਉਪਟ੍ਠਹਿਤ੍ਵਾ ਪਚ੍ਛਾ ਤੇਸਂ ਦਸ੍ਸਨਮ੍ਪਿ ਅਨਿਚ੍ਛਨ੍ਤੀ ‘‘ਨ ਸਕ੍ਕਾ ਤਵ ਮਾਤਾਪਿਤੂਹਿ ਸਦ੍ਧਿਂ ਏਕਟ੍ਠਾਨੇ ਵਸਿਤੁ’’ਨ੍ਤਿ ਉਜ੍ਝਾਯਿਤ੍ਵਾ ਤਸ੍ਮਿਂ ਅਤ੍ਤਨੋ ਕਥਂ ਅਗ੍ਗਣ੍ਹਨ੍ਤੇ ਤਸ੍ਸ ਬਹਿਗਤਕਾਲੇ ਮਕਚਿਵਾਕਖਣ੍ਡਾਨਿ ਚ ਯਾਗੁਫੇਣਞ੍ਚ ਗਹੇਤ੍ਵਾ ਤਤ੍ਥ ਤਤ੍ਥ ਆਕਿਰਿਤ੍ਵਾ ਤੇਨਾਗਨ੍ਤ੍ਵਾ ‘‘ਕਿਂ ਇਦ’’ਨ੍ਤਿ ਪੁਟ੍ਠਾ ਆਹ – ‘‘ਇਮੇਸਂ ਅਨ੍ਧਮਹਲ੍ਲਕਾਨਂ ਏਤਂ ਕਮ੍ਮਂ, ਸਬ੍ਬਂ ਗੇਹਂ ਕਿਲਿਟ੍ਠਂ ਕਰੋਨ੍ਤਾ ਵਿਚਰਨ੍ਤਿ, ਨ ਸਕ੍ਕਾ ਏਤੇਹਿ ਸਦ੍ਧਿਂ ਏਕਟ੍ਠਾਨੇ ਵਸਿਤੁ’’ਨ੍ਤਿ. ਏਵਂ ਤਾਯ ਨਂ ਪੁਨਪ੍ਪੁਨਂ ਕਥਯਮਾਨਾਯ ਏਵਰੂਪੋਪਿ ਪੂਰਿਤਪਾਰਮੀ ਸਤ੍ਤੋ ਮਾਤਾਪਿਤੂਹਿ ਸਦ੍ਧਿਂ ਭਿਜ੍ਜਿ. ਸੋ ‘‘ਹੋਤੁ, ਜਾਨਿਸ੍ਸਾਮਿ ਨੇਸਂ ਕਤ੍ਤਬ੍ਬ’’ਨ੍ਤਿ ਤੇ ਭੋਜੇਤ੍ਵਾ, ‘‘ਅਮ੍ਮਤਾਤਾ, ਅਸੁਕਟ੍ਠਾਨੇ ਨਾਮ ਤੁਮ੍ਹਾਕਂ ਞਾਤਕਾ ਆਗਮਨਂ ਪਚ੍ਚਾਸੀਸਨ੍ਤਿ, ਤਤ੍ਥ ਗਮਿਸ੍ਸਾਮਾ’’ਤਿ ਤੇ ਯਾਨਕਂ ਆਰੋਪੇਤ੍ਵਾ ਆਦਾਯ ਗਚ੍ਛਨ੍ਤੋ ਅਟਵਿਮਜ੍ਝਂ ਪਤ੍ਤਕਾਲੇ, ‘‘ਤਾਤ, ਰਸ੍ਮਿਯੋ ਗਣ੍ਹਾਥ, ਗਾਵੋ ਪਤੋਦਸਞ੍ਞਾਯ ਗਮਿਸ੍ਸਨ੍ਤਿ, ਇਮਸ੍ਮਿਂ ਠਾਨੇ ਚੋਰਾ ਵਸਨ੍ਤਿ, ਅਹਂ ਓਤਰਾਮੀ’’ਤਿ ਪਿਤੁ ਹਤ੍ਥੇ ਰਸ੍ਮਿਯੋ ਦਤ੍ਵਾ ਓਤਰਿਤ੍ਵਾ ਗਚ੍ਛਨ੍ਤੋ ਸਦ੍ਦਂ ਪਰਿਵਤ੍ਤੇਤ੍ਵਾ ਚੋਰਾਨਂ ਉਟ੍ਠਿਤਸਦ੍ਦਮਕਾਸਿ. ਮਾਤਾਪਿਤਰੋ ਸਦ੍ਦਂ ਸੁਤ੍ਵਾ ‘‘ਚੋਰਾ ਉਟ੍ਠਿਤਾ’’ਤਿ ਸਞ੍ਞਾਯ, ‘‘ਤਾਤ, ਮਯਂ ਮਹਲ੍ਲਕਾ, ਤ੍ਵਂ ਅਤ੍ਤਾਨਮੇਵ ਰਕ੍ਖਾਹੀ’’ਤਿ ਆਹਂਸੁ. ਸੋ ਮਾਤਾਪਿਤਰੋ ਤਥਾਵਿਰਵਨ੍ਤੇਪਿ ਚੋਰਸਦ੍ਦਂ ਕਰੋਨ੍ਤੋ ਕੋਟ੍ਟੇਤ੍ਵਾ ਮਾਰੇਤ੍ਵਾ ਅਟਵਿਯਂ ਖਿਪਿਤ੍ਵਾ ਪਚ੍ਚਾਗਮਿ.

ਸਤ੍ਥਾ ਇਦਂ ਤਸ੍ਸ ਪੁਬ੍ਬਕਮ੍ਮਂ ਕਥੇਤ੍ਵਾ, ‘‘ਭਿਕ੍ਖਵੇ, ਮੋਗ੍ਗਲ੍ਲਾਨੋ ਏਤ੍ਤਕਂ ਕਮ੍ਮਂ ਕਤ੍ਵਾ ਅਨੇਕਵਸ੍ਸਸਤਸਹਸ੍ਸਾਨਿ ਨਿਰਯੇ ਪਚ੍ਚਿਤ੍ਵਾ ਵਿਪਾਕਾਵਸੇਸੇਨ ਅਤ੍ਤਭਾਵਸਤੇ ਏਵਮੇਵ ਕੋਟ੍ਟੇਤ੍ਵਾ ਸਂਚੁਣ੍ਣਿਤੋ ਮਰਣਂ ਪਤ੍ਤੋ. ਏਵਂ ਮੋਗ੍ਗਲ੍ਲਾਨੇਨ ਅਤ੍ਤਨੋ ਕਮ੍ਮਾਨੁਰੂਪਮੇਵ ਮਰਣਂ ਲਦ੍ਧਂ, ਪਞ੍ਚਹਿ ਚੋਰਸਤੇਹਿ ਸਦ੍ਧਿਂ ਲਭਿਂਸੁ. ਅਪ੍ਪਦੁਟ੍ਠੇਸੁ ਹਿ ਪਦੁਸ੍ਸਨ੍ਤੋ ਦਸਹਿ ਕਾਰਣੇਹਿ ਅਨਯਬ੍ਯਸਨਂ ਪਾਪੁਣਾਤਿਯੇਵਾ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੧੩੭. ‘‘ਯੋ ਦਣ੍ਡੇਨ ਅਦਣ੍ਡੇਸੁ, ਅਪ੍ਪਦੁਟ੍ਠੇਸੁ ਦੁਸ੍ਸਤਿ;

ਦਸਨ੍ਨਮਞ੍ਞਤਰਂ ਠਾਨਂ, ਖਿਪ੍ਪਮੇਵ ਨਿਗਚ੍ਛਤਿ.

੧੩੮. ‘‘ਵੇਦਨਂ ਫਰੁਸਂ ਜਾਨਿਂ, ਸਰੀਰਸ੍ਸ ਵ ਭੇਦਨਂ;

ਗਰੁਕਂ ਵਾਪਿ ਆਬਾਧਂ, ਚਿਤ੍ਤਕ੍ਖੇਪਂ ਵ ਪਾਪੁਣੇ.

੧੩੯. ‘‘ਰਾਜਤੋ ਵਾ ਉਪਸਗ੍ਗਂ, ਅਬ੍ਭਕ੍ਖਾਨਂ ਵ ਦਾਰੁਣਂ;

ਪਰਿਕ੍ਖਯਂ ਵ ਞਾਤੀਨਂ, ਭੋਗਾਨਂ ਵ ਪਭਙ੍ਗੁਰਂ.

੧੪੦. ‘‘ਅਥ ਵਾਸ੍ਸ ਅਗਾਰਾਨਿ, ਅਗ੍ਗਿ ਡਹਤਿ ਪਾਵਕੋ;

ਕਾਯਸ੍ਸ ਭੇਦਾ ਦੁਪ੍ਪਞ੍ਞੋ, ਨਿਰਯਂ ਸੋਪਪਜ੍ਜਤੀ’’ਤਿ.

ਤਤ੍ਥ ਅਦਣ੍ਡੇਸੂਤਿ ਕਾਯਦਣ੍ਡਾਦਿਰਹਿਤੇਸੁ ਖੀਣਾਸਵੇਸੁ. ਅਪ੍ਪਦੁਟ੍ਠੇਸੂਤਿ ਪਰੇਸੁ ਵਾ ਅਤ੍ਤਨਿ ਵਾ ਨਿਰਪਰਾਧੇਸੁ. ਦਸਨ੍ਨਮਞ੍ਞਤਰਂ ਠਾਨਨ੍ਤਿ ਦਸਸੁ ਦੁਕ੍ਖਕਾਰਣੇਸੁ ਅਞ੍ਞਤਰਂ ਕਾਰਣਂ. ਵੇਦਨਨ੍ਤਿ ਸੀਸਰੋਗਾਦਿਭੇਦਂ ਫਰੁਸਂ ਵੇਦਨਂ. ਜਾਨਿਨ੍ਤਿ ਕਿਚ੍ਛਾਧਿਗਤਸ੍ਸ ਧਨਸ੍ਸ ਜਾਨਿਂ. ਭੇਦਨਨ੍ਤਿ ਹਤ੍ਥਚ੍ਛੇਦਾਦਿਕਂ ਸਰੀਰਭੇਦਨਂ. ਗਰੁਕਨ੍ਤਿ ਪਕ੍ਖਹਤਏਕਚਕ੍ਖੁਕਪੀਠਸਪ੍ਪਿਕੁਣੀਭਾਵਕੁਟ੍ਠਰੋਗਾਦਿਭੇਦਂ ਗਰੁਕਾਬਾਧਂ ਵਾ. ਚਿਤ੍ਤਕ੍ਖੇਪਨ੍ਤਿ ਉਮ੍ਮਾਦਂ. ਉਪਸਗ੍ਗਨ੍ਤਿ ਯਸਵਿਲੋਪਸੇਨਾਪਤਿਟ੍ਠਾਨਾਦਿਅਚ੍ਛਿਨ੍ਦਨਾਦਿਕਂ ਰਾਜਤੋ ਉਪਸਗ੍ਗਂ ਵਾ. ਅਬ੍ਭਕ੍ਖਾਨਨ੍ਤਿ ਅਦਿਟ੍ਠਅਸੁਤਅਚਿਨ੍ਤਿਤਪੁਬ੍ਬਂ ‘‘ਇਦਂ ਸਨ੍ਧਿਚ੍ਛੇਦਾਦਿਕਮ੍ਮਂ, ਇਦਂ ਵਾ ਰਾਜਾਪਰਾਧਿਤਕਮ੍ਮਂ ਤਯਾ ਕਤ’’ਨ੍ਤਿ ਏਵਰੂਪਂ ਦਾਰੁਣਂ ਅਬ੍ਭਕ੍ਖਾਨਂ ਵਾ. ਪਰਿਕ੍ਖਯਂ ਵ ਞਾਤੀਨਨ੍ਤਿ ਅਤ੍ਤਨੋ ਅਵਸ੍ਸਯੋ ਭਵਿਤੁਂ ਸਮਤ੍ਥਾਨਂ ਞਾਤੀਨਂ ਪਰਿਕ੍ਖਯਂ ਵਾ. ਪਭਙ੍ਗੁਰਨ੍ਤਿ ਪਭਙ੍ਗੁਭਾਵਂ ਪੂਤਿਭਾਵਂ. ਯਂ ਹਿਸ੍ਸ ਗੇਹੇ ਧਞ੍ਞਂ, ਤਂ ਪੂਤਿਭਾਵਂ ਆਪਜ੍ਜਤਿ, ਸੁਵਣ੍ਣਂ ਅਙ੍ਗਾਰਭਾਵਂ, ਮੁਤ੍ਤਾ ਕਪ੍ਪਾਸਟ੍ਠਿਭਾਵਂ, ਕਹਾਪਣਂ ਕਪਾਲਖਣ੍ਡਾਦਿਭਾਵਂ, ਦ੍ਵਿਪਦਚਤੁਪ੍ਪਦਾ ਕਾਣਕੁਣਾਦਿਭਾਵਨ੍ਤਿ ਅਤ੍ਥੋ. ਅਗ੍ਗਿ ਡਹਤੀਤਿ ਏਕਸਂਵਚ੍ਛਰੇ ਦ੍ਵਤ੍ਤਿਕ੍ਖਤ੍ਤੁਂ ਅਞ੍ਞਸ੍ਮਿਂ ਡਾਹਕੇ ਅਵਿਜ੍ਜਮਾਨੇਪਿ ਅਸਨਿਅਗ੍ਗਿ ਵਾ ਪਤਿਤ੍ਵਾ ਡਹਤਿ, ਅਤ੍ਤਨੋਵ ਧਮ੍ਮਤਾਯ ਉਟ੍ਠਿਤੋ ਪਾਵਕੋ ਵਾ ਡਹਤਿਯੇਵ. ਨਿਰਯਨ੍ਤਿ ਦਿਟ੍ਠੇਵ ਧਮ੍ਮੇ ਇਮੇਸਂ ਦਸਨ੍ਨਂ ਠਾਨਾਨਂ ਅਞ੍ਞਤਰਂ ਪਤ੍ਵਾਪਿ ਏਕਂਸੇਨ ਸਮ੍ਪਰਾਯੇ ਪਤ੍ਤਬ੍ਬਂ ਦਸ੍ਸੇਤੁਂ ‘‘ਨਿਰਯਂ ਸੋਪਪਜ੍ਜਤੀ’’ਤਿ ਵੁਤ੍ਤਂ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਮਹਾਮੋਗ੍ਗਲ੍ਲਾਨਤ੍ਥੇਰਵਤ੍ਥੁ ਸਤ੍ਤਮਂ.

੮. ਬਹੁਭਣ੍ਡਿਕਭਿਕ੍ਖੁਵਤ੍ਥੁ

ਨ ਨਗ੍ਗਚਰਿਯਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਬਹੁਭਣ੍ਡਿਕਂ ਭਿਕ੍ਖੁਂ ਆਰਬ੍ਭ ਕਥੇਸਿ.

ਸਾਵਤ੍ਥਿਵਾਸੀ ਕਿਰੇਕੋ ਕੁਟੁਮ੍ਬਿਕੋ ਭਰਿਯਾਯ ਕਾਲਕਤਾਯ ਪਬ੍ਬਜਿ. ਸੋ ਪਬ੍ਬਜਨ੍ਤੋ ਅਤ੍ਤਨੋ ਪਰਿਵੇਣਞ੍ਚ ਅਗ੍ਗਿਸਾਲਞ੍ਚ ਭਣ੍ਡਗਬ੍ਭਞ੍ਚ ਕਾਰੇਤ੍ਵਾ ਸਬ੍ਬਮ੍ਪਿ ਭਣ੍ਡਗਬ੍ਭਂ ਸਪ੍ਪਿਮਧੁਤੇਲਾਦੀਹਿ ਪੂਰੇਤ੍ਵਾ ਪਬ੍ਬਜਿ, ਪਬ੍ਬਜਿਤ੍ਵਾ ਚ ਪਨ ਅਤ੍ਤਨੋ ਦਾਸੇ ਪਕ੍ਕੋਸਾਪੇਤ੍ਵਾ ਯਥਾਰੁਚਿਕਂ ਆਹਾਰਂ ਪਚਾਪੇਤ੍ਵਾ ਭੁਞ੍ਜਤਿ. ਬਹੁਭਣ੍ਡੋ ਚ ਬਹੁਪਰਿਕ੍ਖਾਰੋ ਚ ਅਹੋਸਿ. ਰਤ੍ਤਿਂ ਅਞ੍ਞਂ ਨਿਵਾਸਨਪਾਰੁਪਨਂ ਹੋਤਿ, ਦਿਵਾ ਅਞ੍ਞਂ ਨਿਵਾਸਨਪਾਰੁਪਨਂ ਹੋਤਿ, ਦਿਵਾ ਅਞ੍ਞਂ ਵਿਹਾਰਪਚ੍ਚਨ੍ਤੇ ਵਸਤਿ. ਤਸ੍ਸੇਕਦਿਵਸਂ ਚੀਵਰਪਚ੍ਚਤ੍ਥਰਣਾਨਿ ਸੁਕ੍ਖਾਪੇਨ੍ਤਸ੍ਸ ਸੇਨਾਸਨਚਾਰਿਕਂ ਆਹਿਣ੍ਡਨ੍ਤਾ ਭਿਕ੍ਖੂ ਪਸ੍ਸਿਤ੍ਵਾ ‘‘ਕਸ੍ਸਿਮਾਨਿ, ਆਵੁਸੋ’’ਤਿ ਪੁਚ੍ਛਿਤ੍ਵਾ ‘‘ਮਯ੍ਹ’’ਨ੍ਤਿ ਵੁਤ੍ਤੇ, ‘‘ਆਵੁਸੋ, ਭਗਵਤਾ ਤਿਚੀਵਰਾਨਿ ਅਨੁਞ੍ਞਾਤਾਨਿ, ਤ੍ਵਞ੍ਚ ਪਨ ਏਵਂ ਅਪ੍ਪਿਚ੍ਛਸ੍ਸ ਬੁਦ੍ਧਸ੍ਸ ਸਾਸਨੇ ਪਬ੍ਬਜਿਤ੍ਵਾ ਏਵਂ ਬਹੁਪਰਿਕ੍ਖਾਰੋ ਜਾਤੋ’’ਤਿ ਤਂ ਸਤ੍ਥੁ ਸਨ੍ਤਿਕਂ ਨੇਤ੍ਵਾ, ‘‘ਭਨ੍ਤੇ, ਅਯਂ ਭਿਕ੍ਖੁ ਅਤਿਬਹੁਭਣ੍ਡੋ’’ਤਿ ਆਰੋਚੇਸੁਂ. ਸਤ੍ਥਾ ‘‘ਸਚ੍ਚਂ ਕਿਰ ਤਂ ਭਿਕ੍ਖੂ’’ਤਿ ਪੁਚ੍ਛਿਤ੍ਵਾ ‘‘ਸਚ੍ਚਂ, ਭਨ੍ਤੇ’’ਤਿ ਵੁਤ੍ਤੇ ਆਹ – ‘‘ਕਸ੍ਮਾ ਪਨ ਤ੍ਵਂ, ਭਿਕ੍ਖੁ, ਮਯਾ ਅਪ੍ਪਿਚ੍ਛਤਾਯ ਧਮ੍ਮੇ ਦੇਸਿਤੇ ਏਵਂ ਬਹੁਭਣ੍ਡੋ ਜਾਤੋ’’ਤਿ. ਸੋ ਤਾਵਤ੍ਤਕੇਨੇਵ ਕੁਪਿਤੋ ‘‘ਇਮਿਨਾ ਦਾਨਿ ਨੀਹਾਰੇਨ ਚਰਿਸ੍ਸਾਮੀ’’ਤਿ ਪਾਰੁਪਨਂ ਛਡ੍ਡੇਤ੍ਵਾ ਪਰਿਸਮਜ੍ਝੇ ਏਕਚੀਵਰੋ ਅਟ੍ਠਾਸਿ. ਅਥ ਨਂ ਸਤ੍ਥਾ ਉਪਤ੍ਥਮ੍ਭਯਮਾਨੋ ਨਨੁ ਤ੍ਵਂ ਭਿਕ੍ਖੁ ਪੁਬ੍ਬੇ ਹਿਰੋਤ੍ਤਪ੍ਪਗਵੇਸਕੋ ਦਕਰਕ੍ਖਸਕਾਲੇਪਿ ਹਿਰੋਤ੍ਤਪ੍ਪਂ ਗਵੇਸਮਾਨੋ ਦ੍ਵਾਦਸ ਵਸ੍ਸਾਨਿ ਵਿਹਾਸਿ, ਕਸ੍ਮਾ ਇਦਾਨਿ ਏਵਂ ਗਰੁਕੇ ਬੁਦ੍ਧਸਾਸਨੇ ਪਬ੍ਬਜਿਤ੍ਵਾ ਚਤੁਪਰਿਸਮਜ੍ਝੇ ਪਾਰੁਪਨਂ ਛਡ੍ਡੇਤ੍ਵਾ ਹਿਰੋਤ੍ਤਪ੍ਪਂ ਪਹਾਯ ਠਿਤੋਸੀਤਿ. ਸੋ ਸਤ੍ਥੁ ਵਚਨਂ ਸੁਤ੍ਵਾ ਹਿਰੋਤ੍ਤਪ੍ਪਂ ਪਚ੍ਚੁਪਟ੍ਠਾਪੇਤ੍ਵਾ ਤਂ ਚੀਵਰਂ ਪਾਰੁਪਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਭਿਕ੍ਖੂ ਤਸ੍ਸ ਅਤ੍ਥਸ੍ਸ ਆਵਿਭਾਵਤ੍ਥਂ ਭਗਵਨ੍ਤਂ ਯਾਚਿਂਸੁ. ਭਗਵਾ ਅਤੀਤਂ ਆਹਰਿਤ੍ਵਾ ਕਥੇਸਿ –

ਅਤੀਤੇ ਕਿਰ ਬਾਰਾਣਸਿਰਞ੍ਞੋ ਅਗ੍ਗਮਹੇਸਿਯਾ ਕੁਚ੍ਛਿਸ੍ਮਿਂ ਬੋਧਿਸਤ੍ਤੋ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਨਾਮਗ੍ਗਹਣਦਿਵਸੇ ਮਹਿਂਸਕੁਮਾਰੋਤਿ ਨਾਮਂ ਕਰਿਂਸੁ. ਤਸ੍ਸ ਕਨਿਟ੍ਠਭਾਤਾ ਚਨ੍ਦਕੁਮਾਰੋ ਨਾਮ ਅਹੋਸਿ. ਤੇਸਂ ਮਾਤਰਿ ਕਾਲਕਤਾਯ ਰਾਜਾ ਅਞ੍ਞਂ ਅਗ੍ਗਮਹੇਸਿਟ੍ਠਾਨੇ ਠਪੇਸਿ. ਸਾਪਿ ਪੁਤ੍ਤਂ ਵਿਜਾਯਿ, ਸੂਰਿਯਕੁਮਾਰੋਤਿਸ੍ਸ ਨਾਮਂ ਕਰਿਂਸੁ. ਤਂ ਦਿਸ੍ਵਾ ਰਾਜਾ ਤੁਟ੍ਠੋ ‘‘ਪੁਤ੍ਤਸ੍ਸ ਤੇ ਵਰਂ ਦਮ੍ਮੀ’’ਤਿ ਆਹ. ਸਾਪਿ ਖੋ, ‘‘ਦੇਵ, ਇਚ੍ਛਿਤਕਾਲੇ ਗਣ੍ਹਿਸ੍ਸਾਮੀ’’ਤਿ ਵਤ੍ਵਾ ਪੁਤ੍ਤਸ੍ਸ ਵਯਪ੍ਪਤ੍ਤਕਾਲੇ ਰਾਜਾਨਂ ਆਹ – ‘‘ਦੇਵੇਨ ਮਯ੍ਹਂ ਪੁਤ੍ਤਸ੍ਸ ਜਾਤਕਾਲੇ ਵਰੋ ਦਿਨ੍ਨੋ, ਇਦਾਨਿ ਮੇ ਪੁਤ੍ਤਸ੍ਸ ਰਜ੍ਜਂ ਦੇਹੀ’’ਤਿ. ਰਾਜਾ ‘‘ਮਮ ਦ੍ਵੇ ਪੁਤ੍ਤਾ ਅਗ੍ਗਿਕ੍ਖਨ੍ਧਾ ਵਿਯ ਜਲਨ੍ਤਾ ਵਿਚਰਨ੍ਤਿ, ਨ ਸਕ੍ਕਾ ਤਸ੍ਸ ਰਜ੍ਜਂ ਦਾਤੁ’’ਨ੍ਤਿ ਪਟਿਕ੍ਖਿਪਿਤ੍ਵਾਪਿ ਤਂ ਪੁਨਪ੍ਪੁਨਂ ਯਾਚਮਾਨਮੇਵ ਦਿਸ੍ਵਾ ‘‘ਅਯਂ ਮੇ ਪੁਤ੍ਤਾਨਂ ਅਨਤ੍ਥਮ੍ਪਿ ਕਰੇਯ੍ਯਾ’’ਤਿ ਪੁਤ੍ਤੇ ਪਕ੍ਕੋਸਾਪੇਤ੍ਵਾ, ‘‘ਤਾਤਾ, ਅਹਂ ਸੂਰਿਯਕੁਮਾਰਸ੍ਸ ਜਾਤਕਾਲੇ ਵਰਂ ਅਦਾਸਿਂ, ਇਦਾਨਿਸ੍ਸ ਮਾਤਾ ਰਜ੍ਜਂ ਯਾਚਤਿ, ਅਹਂ ਤਸ੍ਸ ਨ ਦਾਤੁਕਾਮੋ, ਤਸ੍ਸ ਮਾਤਾ ਤੁਮ੍ਹਾਕਂ ਅਨਤ੍ਥਮ੍ਪਿ ਕਰੇਯ੍ਯ, ਗਚ੍ਛਥ ਤੁਮ੍ਹੇ, ਅਰਞ੍ਞੇ ਵਸਿਤ੍ਵਾ ਮਮਚ੍ਚਯੇਨਾਗਨ੍ਤ੍ਵਾ ਰਜ੍ਜਂ ਗਣ੍ਹਥਾ’’ਤਿ ਉਯ੍ਯੋਜੇਸਿ. ਤੇ ਪਿਤਰਂ ਵਨ੍ਦਿਤ੍ਵਾ ਪਾਸਾਦਾ ਓਤਰਨ੍ਤੇ ਰਾਜਙ੍ਗਣੇ ਕੀਲ਼ਮਾਨੋ ਸੂਰਿਯਕੁਮਾਰੋ ਦਿਸ੍ਵਾ ਤਂ ਕਾਰਣਂ ਞਤ੍ਵਾ ਤੇਹਿ ਸਦ੍ਧਿਂ ਨਿਕ੍ਖਮਿ. ਤੇਸਂ ਹਿਮਵਨ੍ਤਂ ਪਵਿਟ੍ਠਕਾਲੇ ਬੋਧਿਸਤ੍ਤੋ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿਤ੍ਵਾ ਸੂਰਿਯਕੁਮਾਰਂ ਆਹ – ‘‘ਤਾਤ, ਏਤਂ ਸਰਂ ਗਨ੍ਤ੍ਵਾ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਅਮ੍ਹਾਕਮ੍ਪਿ ਪਦੁਮਿਨਿਪਣ੍ਣੇਹਿ ਉਦਕਂ ਆਹਰਾ’’ਤਿ. ਸੋ ਪਨ ਸਰੋ ਵੇਸ੍ਸਵਣ੍ਣਸ੍ਸ ਸਨ੍ਤਿਕਾ ਏਕੇਨ ਦਕਰਕ੍ਖਸੇਨ ਲਦ੍ਧੋ ਹੋਤਿ. ਵੇਸ੍ਸਵਣ੍ਣੋ ਚ ਤਂ ਆਹ – ‘‘ਠਪੇਤ੍ਵਾ ਦੇਵਧਮ੍ਮਜਾਨਨਕੇ ਯੇ ਚ ਅਞ੍ਞੇ ਇਮਂ ਸਰਂ ਓਤਰਨ੍ਤਿ, ਤੇ ਖਾਦਿਤੁਂ ਲਭਸੀ’’ਤਿ. ਤਤੋ ਪਟ੍ਠਾਯ ਸੋ ਤਂ ਸਰਂ ਓਤਿਣ੍ਣੋਤਿਣ੍ਣੇ ਦੇਵਧਮ੍ਮੇ ਪੁਚ੍ਛਿਤ੍ਵਾ ਅਜਾਨਨ੍ਤੇ ਖਾਦਤਿ, ਸੂਰਿਯਕੁਮਾਰੋਪਿ ਤਂ ਸਰਂ ਅਵੀਮਂਸਿਤ੍ਵਾਵ ਓਤਰਿ, ਤੇਨ ਚ ‘‘ਦੇਵਧਮ੍ਮੇ ਜਾਨਾਸੀ’’ਤਿ ਪੁਚ੍ਛਿਤੋ ‘‘ਦੇਵਧਮ੍ਮਾ ਨਾਮ ਚਨ੍ਦਿਮਸੂਰਿਯਾ’’ਤਿ ਆਹ. ਅਥ ਨਂ ‘‘ਤ੍ਵਂ ਦੇਵਧਮ੍ਮੇ ਨ ਜਾਨਾਸੀ’’ਤਿ ਉਦਕਂ ਪਵੇਸੇਤ੍ਵਾ ਅਤ੍ਤਨੋ ਭਵਨੇ ਠਪੇਸਿ. ਬੋਧਿਸਤ੍ਤੋਪਿ ਤਂ ਚਿਰਾਯਨ੍ਤਂ ਦਿਸ੍ਵਾ ਚਨ੍ਦਕੁਮਾਰਂ ਪੇਸੇਸਿ. ਸੋਪਿ ਤੇਨ ‘‘ਦੇਵਧਮ੍ਮੇ ਜਾਨਾਸੀ’’ਤਿ ਪੁਚ੍ਛਿਤੋ ‘‘ਦੇਵਧਮ੍ਮਾ ਨਾਮ ਚਤਸ੍ਸੋ ਦਿਸਾ’’ਤਿ ਆਹ. ਦਕਰਕ੍ਖਸੋ ਤਮ੍ਪਿ ਉਦਕਂ ਪਵੇਸੇਤ੍ਵਾ ਤਤ੍ਥੇਵ ਠਪੇਸਿ.

ਬੋਧਿਸਤ੍ਤੋ ਤਸ੍ਮਿਮ੍ਪਿ ਚਿਰਾਯਨ੍ਤੇ ‘‘ਅਨ੍ਤਰਾਯੇਨ ਭਵਿਤਬ੍ਬ’’ਨ੍ਤਿ ਸਯਂ ਗਨ੍ਤ੍ਵਾ ਦ੍ਵਿਨ੍ਨਮ੍ਪਿ ਓਤਰਣਪਦਂਯੇਵ ਦਿਸ੍ਵਾ ‘‘ਅਯਂ ਸਰੋ ਰਕ੍ਖਸਪਰਿਗ੍ਗਹਿਤੋ’’ਤਿ ਞਤ੍ਵਾ ਖਗ੍ਗਂ ਸਨ੍ਨਯ੍ਹਿਤ੍ਵਾ ਧਨੁਂ ਗਹੇਤ੍ਵਾ ਅਟ੍ਠਾਸਿ. ਰਕ੍ਖਸੋ ਤਂ ਅਨੋਤਰਨ੍ਤਂ ਦਿਸ੍ਵਾ ਵਨਕਮ੍ਮਿਕਪੁਰਿਸਵੇਸੇਨਾਗਨ੍ਤ੍ਵਾ ਆਹ – ‘‘ਭੋ ਪੁਰਿਸ, ਤ੍ਵਂ ਮਗ੍ਗਕਿਲਨ੍ਤੋ, ਕਸ੍ਮਾ ਇਮਂ ਸਰਂ ਓਤਰਿਤ੍ਵਾ ਨ੍ਹਤ੍ਵਾ ਚ ਪਿਵਿਤ੍ਵਾ ਚ ਭਿਸਮੁਲਾਲਂ ਖਾਦਿਤ੍ਵਾ ਪੁਪ੍ਫਾਨਿ ਪਿਲਨ੍ਧਿਤ੍ਵਾ ਨ ਗਚ੍ਛਸੀ’’ਤਿ. ਬੋਧਿਸਤ੍ਤੋ ਤਂ ਦਿਸ੍ਵਾਵ ‘‘ਏਸ ਸੋ ਯਕ੍ਖੋ’’ਤਿ ਞਤ੍ਵਾ ‘‘ਤਯਾ ਮੇ ਭਾਤਰੋ ਗਹਿਤਾ’’ਤਿ ਆਹ. ਆਮ, ਮਯਾ ਗਹਿਤਾਤਿ. ਕਿਂ ਕਾਰਣਾਤਿ? ਅਹਂ ਇਮਂ ਸਰਂ ਓਤਿਣ੍ਣੋਤਿਣ੍ਣੇ ਲਭਾਮੀਤਿ. ਕਿਂ ਪਨ ਸਬ੍ਬੇਵ ਲਭਸੀਤਿ? ਦੇਵਧਮ੍ਮਜਾਨਨਕੇ ਠਪੇਤ੍ਵਾ ਅਵਸੇਸੇ ਲਭਾਮੀਤਿ. ਅਤ੍ਥਿ ਪਨ ਤੇ ਦੇਵਧਮ੍ਮੇਹਿ ਅਤ੍ਥੋਤਿ? ਆਮ, ਅਤ੍ਥੀਤਿ. ਅਹਂ ਕਥੇਸ੍ਸਾਮੀਤਿ. ਤੇਨ ਹਿ ਕਥੇਹੀਤਿ. ਨ ਸਕ੍ਕਾ ਕਿਲਿਟ੍ਠੇਨ ਗਤ੍ਤੇਨ ਕਥੇਤੁਨ੍ਤਿ. ਯਕ੍ਖੋ ਬੋਧਿਸਤ੍ਤਂ ਨ੍ਹਾਪੇਤ੍ਵਾ ਪਾਨੀਯਂ ਪਾਯੇਤ੍ਵਾ ਅਲਙ੍ਕਰਿਤ੍ਵਾ ਅਲਙ੍ਕਤਮਣ੍ਡਪਮਜ੍ਝੇ ਪਲ੍ਲਙ੍ਕਂ ਆਰੋਪੇਤ੍ਵਾ ਸਯਮਸ੍ਸ ਪਾਦਮੂਲੇ ਨਿਸੀਦਿ. ਅਥ ਨਂ ਬੋਧਿਸਤ੍ਤੋ ‘‘ਸਕ੍ਕਚ੍ਚਂ ਸੁਣਾਹੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਹਿਰਿਓਤ੍ਤਪ੍ਪਸਮ੍ਪਨ੍ਨਾ, ਸੁਕ੍ਕਧਮ੍ਮਸਮਾਹਿਤਾ;

ਸਨ੍ਤੋ ਸਪ੍ਪੁਰਿਸਾ ਲੋਕੇ, ਦੇਵਧਮ੍ਮਾਤਿ ਵੁਚ੍ਚਰੇ’’ਤਿ. (ਜਾ. ੧.੧.੬);

ਯਕ੍ਖੋ ਇਮਂ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨੋ ਬੋਧਿਸਤ੍ਤਂ ਆਹ – ‘‘ਪਣ੍ਡਿਤ, ਅਹਂ ਤੇ ਪਸਨ੍ਨੋ, ਏਕਂ ਭਾਤਰਂ ਦਮ੍ਮਿ, ਕਤਰਂ ਆਨੇਮੀ’’ਤਿ? ‘‘ਕਨਿਟ੍ਠਂ ਆਨੇਹੀ’’ਤਿ. ਪਣ੍ਡਿਤ, ਤ੍ਵਂ ਕੇਵਲਂ ਦੇਵਧਮ੍ਮੇ ਜਾਨਾਸਿਯੇਵ, ਨ ਪਨ ਤੇਸੁ ਵਤ੍ਤਸੀਤਿ. ਕਿਂ ਕਾਰਣਾਤਿ? ਯਸ੍ਮਾ ਜੇਟ੍ਠਂ ਠਪੇਤ੍ਵਾ ਕਨਿਟ੍ਠਂ ਆਹਰਾਪੇਨ੍ਤੋ ਜੇਟ੍ਠਾਪਚਾਯਿਕਕਮ੍ਮਂ ਨ ਕਰੋਸੀਤਿ, ਦੇਵਧਮ੍ਮੇ ਚਾਹਂ ਯਕ੍ਖ ਜਾਨਾਮਿ, ਤੇਸੁ ਚ ਵਤ੍ਤਾਮਿ. ਮਯਞ੍ਹਿ ਏਤਂ ਨਿਸ੍ਸਾਯ ਇਮਂ ਅਰਞ੍ਞਂ ਪਵਿਟ੍ਠਾ. ਏਤਸ੍ਸ ਹਿ ਅਤ੍ਥਾਯ ਅਮ੍ਹਾਕਂ ਪਿਤਰਂ ਏਤਸ੍ਸ ਮਾਤਾ ਰਜ੍ਜਂ ਯਾਚਿ, ਅਮ੍ਹਾਕਂ ਪਨ ਪਿਤਾ ਤਂ ਵਰਂ ਅਦਤ੍ਵਾ ਅਮ੍ਹਾਕਂ ਅਨੁਰਕ੍ਖਣਤ੍ਥਾਯ ਅਰਞ੍ਞੇ ਵਾਸਂ ਅਨੁਜਾਨਿ, ਸੋ ਕੁਮਾਰੋ ਅਨਿਵਤ੍ਤਿਤ੍ਵਾ ਅਮ੍ਹੇਹਿ ਸਦ੍ਧਿਂ ਆਗਤੋ. ‘‘ਤਂ ਅਰਞ੍ਞੇ ਏਕੋ ਯਕ੍ਖੋ ਖਾਦੀ’’ਤਿ ਵੁਤ੍ਤੇਪਿ ਨ ਕੋਚਿ ਸਦ੍ਦਹਿਸ੍ਸਤਿ. ਤੇਨਾਹਂ ਗਰਹਭਯਭੀਤੋ ਤਮੇਵਾਹਰਾਪੇਮੀਤਿ. ਯਕ੍ਖੋ ਬੋਧਿਸਤ੍ਤਸ੍ਸ ਪਸੀਦਿਤ੍ਵਾ ‘‘ਸਾਧੁ ਪਣ੍ਡਿਤ, ਤ੍ਵਮੇਵ ਦੇਵਧਮ੍ਮੇ ਜਾਨਾਸਿ, ਦੇਵਧਮ੍ਮੇਸੁ ਚ ਵਤ੍ਤਸੀ’’ਤਿ ਦ੍ਵੇ ਭਾਤਰੋ ਆਨੇਤ੍ਵਾ ਅਦਾਸਿ. ਅਥ ਨਂ ਬੋਧਿਸਤ੍ਤੋ ਯਕ੍ਖਭਾਵੇ ਆਦੀਨਵਂ ਕਥੇਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਪੇਸਿ. ਸੋ ਤੇਨ ਸੁਸਂਵਿਹਿਤਾਰਕ੍ਖੋ ਤਸ੍ਮਿਂ ਅਰਞ੍ਞੇ ਵਸਿਤ੍ਵਾ ਪਿਤਰਿ ਕਾਲਕਤੇ ਯਕ੍ਖਂ ਆਦਾਯ ਬਾਰਾਣਸਿਂ ਗਨ੍ਤ੍ਵਾ ਰਜ੍ਜਂ ਗਹੇਤ੍ਵਾ ਚਨ੍ਦਕੁਮਾਰਸ੍ਸ ਉਪਰਜ੍ਜਂ, ਸੂਰਿਯਕੁਮਾਰਸ੍ਸ ਸੇਨਾਪਤਿਟ੍ਠਾਨਂ ਦਤ੍ਵਾ ਯਕ੍ਖਸ੍ਸ ਰਮਣੀਯੇ ਠਾਨੇ ਆਯਤਨਂ ਕਾਰਾਪੇਤ੍ਵਾ ਯਥਾ ਸੋ ਲਾਭਗ੍ਗਪ੍ਪਤ੍ਤੋ ਹੋਤਿ, ਤਥਾ ਅਕਾਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ ਜਾਤਕਂ ਸਮੋਧਾਨੇਸਿ ‘‘ਤਦਾ ਰਕ੍ਖਸੋ ਬਹੁਭਣ੍ਡਿਕਭਿਕ੍ਖੁ ਅਹੋਸਿ, ਸੂਰਿਯਕੁਮਾਰੋ ਆਨਨ੍ਦੋ, ਚਨ੍ਦਕੁਮਾਰੋ ਸਾਰਿਪੁਤ੍ਤੋ, ਮਹਿਂਸਕੁਮਾਰੋ ਪਨ ਅਹਮੇਵਾ’’ਤਿ. ਏਵਂ ਸਤ੍ਥਾ ਜਾਤਕਂ ਕਥੇਤ੍ਵਾ ‘‘ਏਵਂ ਤ੍ਵਂ, ਭਿਕ੍ਖੁ, ਪੁਬ੍ਬੇ ਦੇਵਧਮ੍ਮੇ ਗਵੇਸਮਾਨੋ ਹਿਰਿਓਤ੍ਤਪ੍ਪਸਮ੍ਪਨ੍ਨੋ ਵਿਚਰਿਤ੍ਵਾ ਇਦਾਨਿ ਚਤੁਪਰਿਸਮਜ੍ਝੇ ਇਮਿਨਾ ਨੀਹਾਰੇਨ ਠਤ੍ਵਾ ਮਮ ਪੁਰਤੋ ‘ਅਪ੍ਪਿਚ੍ਛੋਮ੍ਹੀ’ਤਿ ਵਦਨ੍ਤੋ ਅਯੁਤ੍ਤਂ ਅਕਾਸਿ. ਨ ਹਿ ਸਾਟਕਪਟਿਕ੍ਖੇਪਾਦਿਮਤ੍ਤੇਨ ਸਮਣੋ ਨਾਮ ਹੋਤੀ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੪੧. ‘‘ਨ ਨਗ੍ਗਚਰਿਯਾ ਨ ਜਟਾ ਨ ਪਙ੍ਕਾ, ਨਾਨਾਸਕਾ ਥਣ੍ਡਿਲਸਾਯਿਕਾ ਵਾ;

ਰਜੋਜਲ੍ਲਂ ਉਕ੍ਕੁਟਿਕਪ੍ਪਧਾਨਂ, ਸੋਧੇਨ੍ਤਿ ਮਚ੍ਚਂ ਅਵਿਤਿਣ੍ਣਕਙ੍ਖ’’ਨ੍ਤਿ.

ਤਤ੍ਥ ਨਾਨਾਸਕਾਤਿ ਨ ਅਨਸਕਾ, ਭਤ੍ਤਪਟਿਕ੍ਖੇਪਕਾਤਿ ਅਤ੍ਥੋ. ਥਣ੍ਡਿਲਸਾਯਿਕਾਤਿ ਭੂਮਿਸਯਨਾ. ਰਜੋਜਲ੍ਲਨ੍ਤਿ ਕਦ੍ਦਮਲੇਪਨਾਕਾਰੇਨ ਸਰੀਰੇ ਸਨ੍ਨਿਹਿਤਰਜੋ. ਉਕ੍ਕੁਟਿਕਪ੍ਪਧਾਨਨ੍ਤਿ ਉਕ੍ਕੁਟਿਕਭਾਵੇਨ ਆਰਦ੍ਧਵੀਰਿਯਂ. ਇਦਂ ਵੁਤ੍ਤਂ ਹੋਤਿ – ਯੋ ਹਿ ਮਚ੍ਚੋ ‘‘ਏਵਂ ਅਹਂ ਲੋਕਨਿਸ੍ਸਰਣਸਙ੍ਖਾਤਂ ਸੁਦ੍ਧਿਂ ਪਾਪੁਣਿਸ੍ਸਾਮੀ’’ਤਿ ਇਮੇਸੁ ਨਗ੍ਗਚਰਿਯਾਦੀਸੁ ਯਂ ਕਿਞ੍ਚਿ ਸਮਾਦਾਯ ਵਤ੍ਤੇਯ੍ਯ, ਸੋ ਕੇਵਲਂ ਮਿਚ੍ਛਾਦਸ੍ਸਨਞ੍ਚੇਵ ਵਡ੍ਢੇਯ੍ਯ, ਕਿਲਮਥਸ੍ਸ ਚ ਭਾਗੀ ਅਸ੍ਸ. ਨ ਹਿ ਏਤਾਨਿ ਸੁਸਮਾਦਿਨ੍ਨਾਨਿਪਿ ਅਟ੍ਠਵਤ੍ਥੁਕਾਯ ਕਙ੍ਖਾਯ ਅਵਿਤਿਣ੍ਣਭਾਵੇਨ ਅਵਿਤਿਣ੍ਣਕਙ੍ਖਂ ਮਚ੍ਚਂ ਸੋਧੇਨ੍ਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਬਹੁਭਣ੍ਡਿਕਭਿਕ੍ਖੁਵਤ੍ਥੁ ਅਟ੍ਠਮਂ.

੯. ਸਨ੍ਤਤਿਮਹਾਮਤ੍ਤਵਤ੍ਥੁ

ਅਲਙ੍ਕਤੋ ਚੇਪੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸਨ੍ਤਤਿਮਹਾਮਤ੍ਤਂ ਆਰਬ੍ਭ ਕਥੇਸਿ.

ਸੋ ਹਿ ਏਕਸ੍ਮਿਂ ਕਾਲੇ ਰਞ੍ਞੋ ਪਸੇਨਦਿਕੋਸਲਸ੍ਸ ਪਚ੍ਚਨ੍ਤਂ ਕੁਪਿਤਂ ਵੂਪਸਮੇਤ੍ਵਾ ਆਗਤੋ. ਅਥਸ੍ਸ ਰਾਜਾ ਤੁਟ੍ਠੋ ਸਤ੍ਤ ਦਿਵਸਾਨਿ ਰਜ੍ਜਂ ਦਤ੍ਵਾ ਏਕਂ ਨਚ੍ਚਗੀਤਕੁਸਲਂ ਇਤ੍ਥਿਂ ਅਦਾਸਿ. ਸੋ ਸਤ੍ਤ ਦਿਵਸਾਨਿ ਸੁਰਾਮਦਮਤ੍ਤੋ ਹੁਤ੍ਵਾ ਸਤ੍ਤਮੇ ਦਿਵਸੇ ਸਬ੍ਬਾਲਙ੍ਕਾਰਪਟਿਮਣ੍ਡਿਤੋ ਹਤ੍ਥਿਕ੍ਖਨ੍ਧਵਰਗਤੋ ਨ੍ਹਾਨਤਿਤ੍ਥਂ ਗਚ੍ਛਨ੍ਤੋ ਸਤ੍ਥਾਰਂ ਪਿਣ੍ਡਾਯ ਪਵਿਸਨ੍ਤਂ ਦ੍ਵਾਰਨ੍ਤਰੇ ਦਿਸ੍ਵਾ ਹਤ੍ਥਿਕ੍ਖਨ੍ਧਵਰਗਤੋਵ ਸੀਸਂ ਚਾਲੇਤ੍ਵਾ ਵਨ੍ਦਿਤ੍ਵਾ ਪਕ੍ਕਾਮਿ. ਸਤ੍ਥਾ ਸਿਤਂ ਕਤ੍ਵਾ ‘‘ਕੋ ਨੁ ਖੋ, ਭਨ੍ਤੇ, ਸਿਤਪਾਤੁਕਰਣੇ ਹੇਤੂ’’ਤਿ ਆਨਨ੍ਦਤ੍ਥੇਰੇਨ ਪੁਟ੍ਠੋ ਸਿਤਕਾਰਣਂ ਆਚਿਕ੍ਖਨ੍ਤੋ ਆਹ – ‘‘ਪਸ੍ਸਾਨਨ੍ਦ, ਸਨ੍ਤਤਿਮਹਾਮਤ੍ਤਂ, ਅਜ੍ਜ ਸਬ੍ਬਾਭਰਣਪਟਿਮਣ੍ਡਿਤੋਵ ਮਮ ਸਨ੍ਤਿਕਂ ਆਗਨ੍ਤ੍ਵਾ ਚਤੁਪ੍ਪਦਿਕਗਾਥਾਵਸਾਨੇ ਅਰਹਤ੍ਤਂ ਪਤ੍ਵਾ ਸਤ੍ਤਤਾਲਮਤ੍ਤੇ ਆਕਾਸੇ ਨਿਸੀਦਿਤ੍ਵਾ ਪਰਿਨਿਬ੍ਬਾਯਿਸ੍ਸਤੀ’’ਤਿ. ਮਹਾਜਨੋ ਥੇਰੇਨ ਸਦ੍ਧਿਂ ਕਥੇਨ੍ਤਸ੍ਸ ਸਤ੍ਥੁ ਵਚਨਂ ਅਸ੍ਸੋਸਿ. ਤਤ੍ਥ ਮਿਚ੍ਛਾਦਿਟ੍ਠਿਕਾ ਚਿਨ੍ਤਯਿਂਸੁ – ‘‘ਪਸ੍ਸਥ ਸਮਣਸ੍ਸ ਗੋਤਮਸ੍ਸ ਕਿਰਿਯਂ, ਮੁਖਪ੍ਪਤ੍ਤਮੇਵ ਭਾਸਤਿ, ਅਜ੍ਜ ਕਿਰ ਏਸ ਏਵਂ ਸੁਰਾਮਦਮਤ੍ਤੋ ਯਥਾਲਙ੍ਕਤੋਵ ਏਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਰਿਨਿਬ੍ਬਾਯਿਸ੍ਸਤਿ, ਅਜ੍ਜੇਵ ਤਂ ਮੁਸਾਵਾਦੇਨ ਨਿਗ੍ਗਣ੍ਹਿਸ੍ਸਾਮਾ’’ਤਿ. ਸਮ੍ਮਾਦਿਟ੍ਠਿਕਾ ਚਿਨ੍ਤੇਸੁਂ – ‘‘ਅਹੋ ਬੁਦ੍ਧਾਨਂ ਮਹਾਨੁਭਾਵਤਾ, ਅਜ੍ਜ ਬੁਦ੍ਧਲੀਲ਼ਞ੍ਚੇਵ ਸਨ੍ਤਤਿਮਹਾਮਤ੍ਤਲੀਲ਼ਞ੍ਚ ਦਟ੍ਠੁਂ ਲਭਿਸ੍ਸਾਮਾ’’ਤਿ.

ਸਨ੍ਤਤਿਮਹਾਮਤ੍ਤੋਪਿ ਨ੍ਹਾਨਤਿਤ੍ਥੇ ਦਿਵਸਭਾਗਂ ਉਦਕਕੀਲ਼ਂ ਕੀਲ਼ਿਤ੍ਵਾ ਉਯ੍ਯਾਨਂ ਗਨ੍ਤ੍ਵਾ ਆਪਾਨਭੂਮਿਯਂ ਨਿਸੀਦਿ. ਸਾਪਿ ਇਤ੍ਥੀ ਰਙ੍ਗਮਜ੍ਝਂ ਓਤਰਿਤ੍ਵਾ ਨਚ੍ਚਗੀਤਂ ਦਸ੍ਸੇਤੁਂ ਆਰਭਿ. ਤਸ੍ਸਾ ਸਰੀਰਲੀਲ਼ਾਯ ਦਸ੍ਸਨਤ੍ਥਂ ਸਤ੍ਤਾਹਂ ਅਪ੍ਪਾਹਾਰਤਾਯ ਤਂ ਦਿਵਸਂ ਨਚ੍ਚਗੀਤਂ ਦਸ੍ਸਯਮਾਨਾਯ ਅਨ੍ਤੋਕੁਚ੍ਛਿਯਂ ਸਤ੍ਥਕਵਾਤਾ ਸਮੁਟ੍ਠਾਯ ਹਦਯਮਂਸਂ ਕਨ੍ਤਿਤ੍ਵਾ ਅਗਮਂਸੁ. ਸਾ ਤਙ੍ਖਣਞ੍ਞੇਵ ਮੁਖੇਨ ਚੇਵ ਅਕ੍ਖੀਹਿ ਚ ਵਿਵਟੇਹਿ ਕਾਲਮਕਾਸਿ. ਸਨ੍ਤਤਿਮਹਾਮਤ੍ਤੋ ‘‘ਉਪਧਾਰੇਥ ਨ’’ਨ੍ਤਿ ਵਤ੍ਵਾ ‘‘ਨਿਰੁਦ੍ਧਾ, ਸਾਮੀ’’ਤਿ ਚ ਵੁਤ੍ਤਮਤ੍ਤੇਯੇਵ ਬਲਵਸੋਕੇਨ ਅਭਿਭੂਤੋ ਤਙ੍ਖਣਞ੍ਞੇਵਸ੍ਸ ਸਤ੍ਤਾਹਂ ਪੀਤਸੁਰਾ ਤਤ੍ਤਕਪਾਲੇ ਉਦਕਬਿਨ੍ਦੁ ਵਿਯ ਪਰਿਕ੍ਖਯਂ ਅਗਮਾਸਿ. ਸੋ ‘‘ਨ ਮੇ ਇਮਂ ਸੋਕਂ ਅਞ੍ਞੇ ਨਿਬ੍ਬਾਪੇਤੁਂ ਸਕ੍ਖਿਸ੍ਸਨ੍ਤਿ ਅਞ੍ਞਤ੍ਰ ਤਥਾਗਤੇਨਾ’’ਤਿ ਬਲਕਾਯਪਰਿਵੁਤੋ ਸਾਯਨ੍ਹਸਮਯੇ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਏਵਮਾਹ – ‘‘ਭਨ੍ਤੇ, ‘ਏਵਰੂਪੋ ਮੇ ਸੋਕੋ ਉਪ੍ਪਨ੍ਨੋ, ਤਂ ਮੇ ਤੁਮ੍ਹੇ ਨਿਬ੍ਬਾਪੇਤੁਂ ਸਕ੍ਖਿਸ੍ਸਥਾ’ਤਿ ਆਗਤੋਮ੍ਹਿ, ਪਟਿਸਰਣਂ ਮੇ ਹੋਥਾ’’ਤਿ. ਅਥ ਨਂ ਸਤ੍ਥਾ ‘‘ਸੋਕਂ ਨਿਬ੍ਬਾਪੇਤੁਂ ਸਮਤ੍ਥਸ੍ਸੇਵ ਸਨ੍ਤਿਕਂ ਆਗਤੋਸਿ. ਇਮਿਸ੍ਸਾ ਹਿ ਇਤ੍ਥਿਯਾ ਇਮਿਨਾਵ ਆਕਾਰੇਨ ਮਤਕਾਲੇ ਤਵ ਰੋਦਨ੍ਤਸ੍ਸ ਪਗ੍ਘਰਿਤਅਸ੍ਸੂਨਿ ਚਤੁਨ੍ਨਂ ਮਹਾਸਮੁਦ੍ਦਾਨਂ ਉਦਕਤੋ ਅਤਿਰੇਕਤਰਾਨੀ’’ਤਿ ਵਤ੍ਵਾ ਇਮਂ ਗਾਥਮਾਹ –

‘‘ਯਂ ਪੁਬ੍ਬੇ ਤਂ ਵਿਸੋਸੇਹਿ, ਪਚ੍ਛਾ ਤੇ ਮਾਹੁ ਕਿਞ੍ਚਨਂ;

ਮਜ੍ਝੇ ਚੇ ਨੋ ਗਹੇਸ੍ਸਸਿ, ਉਪਸਨ੍ਤੋ ਚਰਿਸ੍ਸਸੀ’’ਤਿ. (ਸੁ. ਨਿ. ੯੫੫, ੧੧੦੫; ਚੂਲ਼ਨਿ. ਜਤੁਕਣ੍ਣਿਮਾਣਵਪੁਚ੍ਛਾਨਿਦ੍ਦੇਸ ੬੮);

ਗਾਥਾਪਰਿਯੋਸਾਨੇ ਸਨ੍ਤਤਿਮਹਾਮਤ੍ਤੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਆਯੁਸਙ੍ਖਾਰਂ ਓਲੋਕੇਨ੍ਤੋ ਤਸ੍ਸ ਅਪ੍ਪਵਤ੍ਤਨਭਾਵਂ ਞਤ੍ਵਾ ਸਤ੍ਥਾਰਂ ਆਹ – ‘‘ਭਨ੍ਤੇ, ਪਰਿਨਿਬ੍ਬਾਨਂ ਮੇ ਅਨੁਜਾਨਾਥਾ’’ਤਿ. ਸਤ੍ਥਾ ਤੇਨ ਕਤਕਮ੍ਮਂ ਜਾਨਨ੍ਤੋਪਿ ‘‘ਮੁਸਾਵਾਦੇਨ ਨਿਗ੍ਗਣ੍ਹਨਤ੍ਥਂ ਸਨ੍ਨਿਪਤਿਤਾ ਮਿਚ੍ਛਾਦਿਟ੍ਠਿਕਾ ਓਕਾਸਂ ਨ ਲਭਿਸ੍ਸਨ੍ਤਿ, ‘ਬੁਦ੍ਧਲੀਲ਼ਞ੍ਚੇਵ ਸਨ੍ਤਤਿਮਹਾਮਤ੍ਤਲੀਲ਼ਞ੍ਚ ਪਸ੍ਸਿਸ੍ਸਾਮਾ’ਤਿ ਸਨ੍ਨਿਪਤਿਤਾ ਸਮ੍ਮਾਦਿਟ੍ਠਿਕਾ ਇਮਿਨਾ ਕਤਕਮ੍ਮਂ ਸੁਤ੍ਵਾ ਪੁਞ੍ਞੇਸੁ ਆਦਰਂ ਕਰਿਸ੍ਸਨ੍ਤੀ’’ਤਿ ਸਲ੍ਲਕ੍ਖੇਤ੍ਵਾ ‘‘ਤੇਨ ਹਿ ਤਯਾ ਕਤਕਮ੍ਮਂ ਮਯ੍ਹਂ ਕਥੇਹਿ, ਕਥੇਨ੍ਤੋ ਚ ਭੂਮਿਯਂ ਠਿਤੋ ਅਕਥੇਤ੍ਵਾ ਸਤ੍ਤਤਾਲਮਤ੍ਤੇ ਆਕਾਸੇ ਠਿਤੋ ਕਥੇਹੀ’’ਤਿ ਆਹ. ਸੋ ‘‘ਸਾਧੁ, ਭਨ੍ਤੇ’’ਤਿ ਸਤ੍ਥਾਰਂ ਵਨ੍ਦਿਤ੍ਵਾ ਏਕਤਾਲਪ੍ਪਮਾਣਂ ਉਗ੍ਗਮ੍ਮ ਓਰੋਹਿਤ੍ਵਾ ਪੁਨ ਸਤ੍ਥਾਰਂ ਵਨ੍ਦਿਤ੍ਵਾ ਉਗ੍ਗਚ੍ਛਨ੍ਤੋ ਪਟਿਪਾਟਿਯਾ ਸਤ੍ਤਤਾਲਪ੍ਪਮਾਣੇ ਆਕਾਸੇ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ‘‘ਸੁਣਾਥ ਮੇ, ਭਨ੍ਤੇ, ਪੁਬ੍ਬਕਮ੍ਮ’’ਨ੍ਤਿ ਵਤ੍ਵਾ ਆਹ –

ਇਤੋ ਏਕਨਵੁਤਿਕਪ੍ਪੇ ਵਿਪਸ੍ਸੀਸਮ੍ਮਾਸਮ੍ਬੁਦ੍ਧਕਾਲੇ ਅਹਂ ਬਨ੍ਧੁਮਤਿਨਗਰੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਚਿਨ੍ਤੇਸਿਂ – ‘‘ਕਿਂ ਨੁ ਖੋ ਪਰੇਸਂ ਛੇਦਂ ਵਾ ਪੀਲ਼ਂ ਵਾ ਅਕਰਣਕਮ੍ਮ’’ਨ੍ਤਿ ਉਪਧਾਰੇਨ੍ਤੋ ਧਮ੍ਮਘੋਸਕਕਮ੍ਮਂ ਦਿਸ੍ਵਾ ਤਤੋ ਪਟ੍ਠਾਯ ਤਂ ਕਮ੍ਮਂ ਕਰੋਨ੍ਤੋ ਮਹਾਜਨਂ ਸਮਾਦਪੇਤ੍ਵਾ ‘‘ਪੁਞ੍ਞਾਨਿ ਕਰੋਥ, ਉਪੋਸਥਦਿਵਸੇਸੁ ਉਪੋਸਥਂ ਸਮਾਦਿਯਥ, ਦਾਨਂ ਦੇਥ, ਧਮ੍ਮਂ ਸੁਣਾਥ, ਬੁਦ੍ਧਰਤਨਾਦੀਹਿ ਸਦਿਸਂ ਅਞ੍ਞਂ ਨਾਮ ਨਤ੍ਥਿ, ਤਿਣ੍ਣਂ ਰਤਨਾਨਂ ਸਕ੍ਕਾਰਂ ਕਰੋਥਾ’’ਤਿ ਉਗ੍ਘੋਸੇਨ੍ਤੋ ਵਿਚਰਾਮਿ. ਤਸ੍ਸ ਮਯ੍ਹਂ ਸਦ੍ਦਂ ਸੁਤ੍ਵਾ ਬੁਦ੍ਧਪਿਤਾ ਬਨ੍ਧੁਮਤਿਮਹਾਰਾਜਾ ਮਂ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਕਿਂ ਕਰੋਨ੍ਤੋ ਵਿਚਰਸੀ’’ਤਿ ਪੁਚ੍ਛਿਤ੍ਵਾ, ‘‘ਦੇਵ, ਤਿਣ੍ਣਂ ਰਤਨਾਨਂ ਗੁਣਂ ਪਕਾਸੇਤ੍ਵਾ ਮਹਾਜਨਂ ਪੁਞ੍ਞਕਮ੍ਮੇਸੁ ਸਮਾਦਪੇਨ੍ਤੋ ਵਿਚਰਾਮੀ’’ਤਿ ਵੁਤ੍ਤੇ, ‘‘ਕਤ੍ਥ ਨਿਸਿਨ੍ਨੋ ਵਿਚਰਸੀ’’ਤਿ ਮਂ ਪੁਚ੍ਛਿਤ੍ਵਾ ‘‘ਪਦਸਾਵ, ਦੇਵਾ’’ਤਿ ਮਯਾ ਵੁਤ੍ਤੇ, ‘‘ਤਾਤ, ਨ ਤ੍ਵਂ ਏਵਂ ਵਿਚਰਿਤੁਂ ਅਰਹਸਿ, ਇਮਂ ਪੁਪ੍ਫਦਾਮਂ ਪਿਲਨ੍ਧਿਤ੍ਵਾ ਅਸ੍ਸਪਿਟ੍ਠੇ ਨਿਸਿਨ੍ਨੋਵ ਵਿਚਰਾ’’ਤਿ ਮਯ੍ਹਂ ਮੁਤ੍ਤਾਦਾਮਸਦਿਸਂ ਪੁਪ੍ਫਦਾਮਂ ਦਤ੍ਵਾ ਦਨ੍ਤਂ ਅਸ੍ਸਂ ਅਦਾਸਿ. ਅਥ ਮਂ ਰਞ੍ਞਾ ਦਿਨ੍ਨਪਰਿਹਾਰੇਨ ਤਥੇਵ ਉਗ੍ਘੋਸੇਤ੍ਵਾ ਵਿਚਰਨ੍ਤਂ ਪੁਨ ਰਾਜਾ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਕਿਂ ਕਰੋਨ੍ਤੋ ਵਿਚਰਸੀ’’ਤਿ ਪੁਚ੍ਛਿਤ੍ਵਾ ‘‘ਤਦੇਵ, ਦੇਵਾ’’ਤਿ ਵੁਤ੍ਤੇ, ‘‘ਤਾਤ, ਅਸ੍ਸੋਪਿ ਤੇ ਨਾਨੁਚ੍ਛਵਿਕੋ, ਇਧ ਨਿਸੀਦਿਤ੍ਵਾ ਵਿਚਰਾ’’ਤਿ ਚਤੁਸਿਨ੍ਧਵਯੁਤ੍ਤਰਥਂ ਅਦਾਸਿ. ਤਤਿਯਵਾਰੇਪਿ ਮੇ ਰਾਜਾ ਸਦ੍ਦਂ ਸੁਤ੍ਵਾ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਕਿਂ ਕਰੋਨ੍ਤੋ ਵਿਚਰਸੀ’’ਤਿ ਪੁਚ੍ਛਿਤ੍ਵਾ ‘‘ਤਦੇਵ, ਦੇਵਾ’’ਤਿ ਵੁਤ੍ਤੇ, ‘‘ਤਾਤ, ਰਥੋਪਿ ਤੇ ਨਾਨੁਚ੍ਛਵਿਕੋ’’ਤਿ ਮਯ੍ਹਂ ਮਹਨ੍ਤਂ ਭੋਗਕ੍ਖਨ੍ਧਂ ਮਹਾਪਸਾਧਨਞ੍ਚ ਦਤ੍ਵਾ ਏਕਞ੍ਚ ਹਤ੍ਥਿਂ ਅਦਾਸਿ. ਸ੍ਵਾਹਂ ਸਬ੍ਬਾਭਰਣਪਟਿਮਣ੍ਡਿਤੋ ਹਤ੍ਥਿਕ੍ਖਨ੍ਧੇ ਨਿਸਿਨ੍ਨੋ ਅਸੀਤਿ ਵਸ੍ਸਸਹਸ੍ਸਾਨਿ ਧਮ੍ਮਘੋਸਕਕਮ੍ਮਂ ਅਕਾਸਿਂ, ਤਸ੍ਸ ਮੇ ਏਤ੍ਤਕਂ ਕਾਲਂ ਕਾਯਤੋ ਚਨ੍ਦਨਗਨ੍ਧੋ ਵਾਯਤਿ, ਮੁਖਤੋ ਉਪ੍ਪਲਗਨ੍ਧੋ ਵਾਯਤਿ. ਇਦਂ ਮਯਾ ਕਤਕਮ੍ਮਨ੍ਤਿ.

ਏਵਂ ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਕਥੇਤ੍ਵਾ ਆਕਾਸੇ ਨਿਸਿਨ੍ਨੋਵ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਰਿਨਿਬ੍ਬਾਯਿ. ਸਰੀਰੇ ਅਗ੍ਗਿਜਾਲਾ ਉਟ੍ਠਹਿਤ੍ਵਾ ਮਂਸਲੋਹਿਤਂ ਝਾਪੇਸਿ, ਸੁਮਨਪੁਪ੍ਫਾਨਿ ਵਿਯ ਧਾਤੁਯੋ ਅਵਸਿਸ੍ਸਿਂਸੁ. ਸਤ੍ਥਾ ਸੁਦ੍ਧਵਤ੍ਥਂ ਪਸਾਰੇਸਿ, ਧਾਤੁਯੋ ਤਤ੍ਥ ਪਤਿਂਸੁ. ਤਾ ਪਤ੍ਤੇ ਪਕ੍ਖਿਪਿਤ੍ਵਾ ਚਤੁਮਹਾਪਥੇ ਥੂਪਂ ਕਾਰੇਸਿ ‘‘ਮਹਾਜਨੋ ਵਨ੍ਦਿਤ੍ਵਾ ਪੁਞ੍ਞਭਾਗੀ ਭਵਿਸ੍ਸਤੀ’’ਤਿ. ਭਿਕ੍ਖੂ ਧਮ੍ਮਸਭਾਯਂ ਕਥਂ ਸਮੁਟ੍ਠਾਪੇਸੁਂ, ‘‘ਆਵੁਸੋ, ਸਨ੍ਤਤਿਮਹਾਮਤ੍ਤੋ ਗਾਥਾਵਸਾਨੇ ਅਰਹਤ੍ਤਂ ਪਤ੍ਵਾ ਅਲਙ੍ਕਤਪਟਿਯਤ੍ਤੋਯੇਵ ਆਕਾਸੇ ਨਿਸੀਦਿਤ੍ਵਾ ਪਰਿਨਿਬ੍ਬੁਤੋ, ਕਿਂ ਨੁ ਖੋ ਏਤਂ ‘ਸਮਣੋ’ਤਿ ਵਤ੍ਤੁਂ ਵਟ੍ਟਤਿ ਉਦਾਹੁ ਬ੍ਰਾਹ੍ਮਣੋ’’ਤਿ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਮਮ ਪੁਤ੍ਤਂ ‘ਸਮਣੋ’ਤਿਪਿ ਵਤ੍ਤੁਂ ਵਟ੍ਟਤਿ, ‘ਬ੍ਰਾਹ੍ਮਣੋ’ਤਿਪਿ ਵਤ੍ਤੁਂ ਵਟ੍ਟਤਿਯੇਵਾ’’ਤਿ ਵਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੧੪੨. ਅਲਙ੍ਕਤੋ ਚੇਪਿ ਸਮਂ ਚਰੇਯ੍ਯ,

ਸਨ੍ਤੋ ਦਨ੍ਤੋ ਨਿਯਤੋ ਬ੍ਰਹ੍ਮਚਾਰੀ;

ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ,

ਸੋ ਬ੍ਰਾਹ੍ਮਣੋ ਸੋ ਸਮਣੋ ਸ ਭਿਕ੍ਖੂ’’ਤਿ.

ਤਤ੍ਥ ਅਲਙ੍ਕਤੋਤਿ ਵਤ੍ਥਾਭਰਣੇਹਿ ਪਟਿਮਣ੍ਡਿਤੋ. ਤਸ੍ਸਤ੍ਥੋ – ਵਤ੍ਥਾਲਙ੍ਕਾਰਾਦੀਹਿ ਅਲਙ੍ਕਤੋ ਚੇਪਿ ਪੁਗ੍ਗਲੋ ਕਾਯਾਦੀਹਿ ਸਮਂ ਚਰੇਯ੍ਯ, ਰਾਗਾਦਿਵੂਪਸਮੇਨ ਸਨ੍ਤੋ ਇਨ੍ਦ੍ਰਿਯਦਮਨੇਨ ਦਨ੍ਤੋ ਚਤੁਮਗ੍ਗਨਿਯਮੇਨ ਨਿਯਤੋ ਸੇਟ੍ਠਚਰਿਯਾਯ ਬ੍ਰਹ੍ਮਚਾਰੀ ਕਾਯਦਣ੍ਡਾਦੀਨਂ ਓਰੋਪਿਤਤਾਯ ਸਬ੍ਬੇਸੁ ਭੂਤੇਸੁ ਨਿਧਾਯ ਦਣ੍ਡਂ. ਸੋ ਏਵਰੂਪੋ ਬਾਹਿਤਪਾਪਤ੍ਤਾ ਬ੍ਰਾਹ੍ਮਣੋਤਿਪਿ ਸਮਿਤਪਾਪਤ੍ਤਾ ਸਮਣੋਤਿਪਿ ਭਿਨ੍ਨਕਿਲੇਸਤ੍ਤਾ ਭਿਕ੍ਖੂਤਿਪਿ ਵਤ੍ਤਬ੍ਬੋਯੇਵਾਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸਨ੍ਤਤਿਮਹਾਮਤ੍ਤਵਤ੍ਥੁ ਨਵਮਂ.

੧੦. ਪਿਲੋਤਿਕਤਿਸ੍ਸਤ੍ਥੇਰਵਤ੍ਥੁ

ਹਿਰੀਨਿਸੇਧੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਪਿਲੋਤਿਕਤ੍ਥੇਰਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਆਨਨ੍ਦਤ੍ਥੇਰੋ ਏਕਂ ਪਿਲੋਤਿਕਖਣ੍ਡਨਿਵਤ੍ਥਂ ਕਪਾਲਂ ਆਦਾਯ ਭਿਕ੍ਖਾਯ ਚਰਨ੍ਤਂ ਦਾਰਕਂ ਦਿਸ੍ਵਾ ‘‘ਕਿਂ ਤੇ ਏਵਂ ਵਿਚਰਿਤ੍ਵਾ ਜੀਵਨਤੋ ਪਬ੍ਬਜ੍ਜਾ ਨ ਉਤ੍ਤਰਿਤਰਾ’’ਤਿ ਵਤ੍ਵਾ, ‘‘ਭਨ੍ਤੇ, ਕੋ ਮਂ ਪਬ੍ਬਾਜੇਸ੍ਸਤੀ’’ਤਿ ਵੁਤ੍ਤੇ ‘‘ਅਹਂ ਪਬ੍ਬਾਜੇਸ੍ਸਾਮੀ’’ਤਿ ਤਂ ਆਦਾਯ ਗਨ੍ਤ੍ਵਾ ਸਹਤ੍ਥਾ ਨ੍ਹਾਪੇਤ੍ਵਾ ਕਮ੍ਮਟ੍ਠਾਨਂ ਦਤ੍ਵਾ ਪਬ੍ਬਾਜੇਸਿ. ਤਞ੍ਚ ਪਨ ਨਿਵਤ੍ਥਪਿਲੋਤਿਕਖਣ੍ਡਂ ਪਸਾਰੇਤ੍ਵਾ ਓਲੋਕੇਨ੍ਤੋ ਪਰਿਸ੍ਸਾਵਨਕਰਣਮਤ੍ਤਮ੍ਪਿ ਗਯ੍ਹੂਪਗਂ ਕਞ੍ਚਿ ਪਦੇਸਂ ਅਦਿਸ੍ਵਾ ਕਪਾਲੇਨ ਸਦ੍ਧਿਂ ਏਕਿਸ੍ਸਾ ਰੁਕ੍ਖਸਾਖਾਯ ਠਪੇਸਿ. ਸੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਬੁਦ੍ਧਾਨਂ ਉਪ੍ਪਨ੍ਨਲਾਭਸਕ੍ਕਾਰਂ ਪਰਿਭੁਞ੍ਜਮਾਨੋ ਮਹਗ੍ਘਾਨਿ ਚੀਵਰਾਨਿ ਅਚ੍ਛਾਦੇਤ੍ਵਾ ਵਿਚਰਨ੍ਤੋ ਥੂਲਸਰੀਰੋ ਹੁਤ੍ਵਾ ਉਕ੍ਕਣ੍ਠਿਤ੍ਵਾ ‘‘ਕਿਂ ਮੇ ਜਨਸ੍ਸ ਸਦ੍ਧਾਦੇਯ੍ਯਂ ਨਿਵਾਸੇਤ੍ਵਾ ਵਿਚਰਣੇਨ, ਅਤ੍ਤਨੋ ਪਿਲੋਤਿਕਮੇਵ ਨਿਵਾਸੇਸ੍ਸਾਮੀ’’ਤਿ ਤਂ ਠਾਨਂ ਗਨ੍ਤ੍ਵਾ ਪਿਲੋਤਿਕਂ ਗਹੇਤ੍ਵਾ ‘‘ਅਹਿਰਿਕ ਨਿਲ੍ਲਜ੍ਜ ਏਵਰੂਪਾਨਂ ਵਤ੍ਥਾਨਂ ਅਚ੍ਛਾਦਨਟ੍ਠਾਨਂ ਪਹਾਯ ਇਮਂ ਪਿਲੋਤਿਕਖਣ੍ਡਂ ਨਿਵਾਸੇਤ੍ਵਾ ਕਪਾਲਹਤ੍ਥੋ ਭਿਕ੍ਖਾਯ ਚਰਿਤੁਂ ਗਚ੍ਛਸੀ’’ਤਿ ਤਂ ਆਰਮ੍ਮਣਂ ਕਤ੍ਵਾ ਅਤ੍ਤਨਾਵ ਅਤ੍ਤਾਨਂ ਓਵਦਿ, ਓਵਦਨ੍ਤਸ੍ਸੇਵ ਪਨਸ੍ਸ ਚਿਤ੍ਤਂ ਸਨ੍ਨਿਸੀਦਿ. ਸੋ ਤਂ ਪਿਲੋਤਿਕਂ ਤਤ੍ਥੇਵ ਪਟਿਸਾਮੇਤ੍ਵਾ ਨਿਵਤ੍ਤਿਤ੍ਵਾ ਵਿਹਾਰਮੇਵ ਗਤੋ. ਸੋ ਕਤਿਪਾਹਚ੍ਚਯੇਨ ਪੁਨਪਿ ਉਕ੍ਕਣ੍ਠਿਤ੍ਵਾ ਤਥੇਵ ਵਤ੍ਵਾ ਨਿਵਤ੍ਤਿ, ਪੁਨਪਿ ਤਥੇਵਾਤਿ. ਤਂ ਏਵਂ ਅਪਰਾਪਰਂ ਵਿਚਰਨ੍ਤਂ ਦਿਸ੍ਵਾ ਭਿਕ੍ਖੂ ‘‘ਕਹਂ, ਆਵੁਸੋ, ਗਚ੍ਛਸੀ’’ਤਿ ਪੁਚ੍ਛਨ੍ਤਿ. ਸੋ ‘‘ਆਚਰਿਯਸ੍ਸ ਸਨ੍ਤਿਕਂ ਗਚ੍ਛਾਮਾਵੁਸੋ’’ਤਿ ਵਤ੍ਵਾ ਏਤੇਨੇਵ ਨੀਹਾਰੇਨ ਅਤ੍ਤਨੋ ਪਿਲੋਤਿਕਖਣ੍ਡਮੇਵ ਆਰਮ੍ਮਣਂ ਕਤ੍ਵਾ ਅਤ੍ਤਾਨਂ ਨਿਸੇਧੇਤ੍ਵਾ ਕਤਿਪਾਹੇਨੇਵ ਅਰਹਤ੍ਤਂ ਪਾਪੁਣਿ. ਭਿਕ੍ਖੂ ਆਹਂਸੁ – ‘‘ਕਿਂ, ਆਵੁਸੋ, ਨ ਦਾਨਿ ਆਚਰਿਯਸ੍ਸ ਸਨ੍ਤਿਕਂ ਗਚ੍ਛਸਿ, ਨਨੁ ਅਯਂ ਤੇ ਵਿਚਰਣਮਗ੍ਗੋ’’ਤਿ. ਆਵੁਸੋ, ਆਚਰਿਯੇਨ ਸਦ੍ਧਿਂ ਸਂਸਗ੍ਗੇ ਸਤਿ ਗਤੋਮ੍ਹਿ, ਇਦਾਨਿ ਪਨ ਮੇ ਛਿਨ੍ਨੋ ਸਂਸਗ੍ਗੋ, ਤੇਨਸ੍ਸ ਸਨ੍ਤਿਕਂ ਨ ਗਚ੍ਛਾਮੀਤਿ. ਭਿਕ੍ਖੂ ਤਥਾਗਤਸ੍ਸ ਆਰੋਚੇਸੁਂ – ‘‘ਭਨ੍ਤੇ, ਪਿਲੋਤਿਕਤ੍ਥੇਰੋ ਅਞ੍ਞਂ ਬ੍ਯਾਕਰੋਤੀ’’ਤਿ. ਕਿਮਾਹ, ਭਿਕ੍ਖਵੇਤਿ? ਇਦਂ ਨਾਮ, ਭਨ੍ਤੇਤਿ. ਤਂ ਸੁਤ੍ਵਾ ਸਤ੍ਥਾ ‘‘ਆਮ, ਭਿਕ੍ਖਵੇ, ਮਮ ਪੁਤ੍ਤੋ ਸਂਸਗ੍ਗੇ ਸਤਿ ਆਚਰਿਯਸ੍ਸ ਸਨ੍ਤਿਕਂ ਗਤੋ, ਇਦਾਨਿ ਪਨਸ੍ਸ ਸਂਸਗ੍ਗੋ ਛਿਨ੍ਨੋ, ਅਤ੍ਤਨਾਵ ਅਤ੍ਤਾਨਂ ਨਿਸੇਧੇਤ੍ਵਾ ਅਰਹਤ੍ਤਂ ਪਤ੍ਤੋ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੧੪੩. ‘‘ਹਿਰੀਨਿਸੇਧੋ ਪੁਰਿਸੋ, ਕੋਚਿ ਲੋਕਸ੍ਮਿਂ ਵਿਜ੍ਜਤਿ;

ਯੋ ਨਿਦ੍ਦਂ ਅਪਬੋਧੇਤਿ, ਅਸ੍ਸੋ ਭਦ੍ਰੋ ਕਸਾਮਿਵ.

੧੪੪. ‘‘ਅਸ੍ਸੋ ਯਥਾ ਭਦ੍ਰੋ ਕਸਾਨਿਵਿਟ੍ਠੋ,

ਆਤਾਪਿਨੋ ਸਂਵੇਗਿਨੋ ਭਵਾਥ;

ਸਦ੍ਧਾਯ ਸੀਲੇਨ ਚ ਵੀਰਿਯੇਨ ਚ,

ਸਮਾਧਿਨਾ ਧਮ੍ਮਵਿਨਿਚ੍ਛਯੇਨ ਚ;

ਸਮ੍ਪਨ੍ਨਵਿਜ੍ਜਾਚਰਣਾ ਪਤਿਸ੍ਸਤਾ,

ਜਹਿਸ੍ਸਥ ਦੁਕ੍ਖਮਿਦਂ ਅਨਪ੍ਪਕ’’ਨ੍ਤਿ.

ਤਤ੍ਥ ਅਨ੍ਤੋ ਉਪ੍ਪਨ੍ਨਂ ਅਕੁਸਲਵਿਤਕ੍ਕਂ ਹਿਰਿਯਾ ਨਿਸੇਧੇਤੀਤਿ ਹਿਰੀਨਿਸੇਧੋ. ਕੋਚਿ ਲੋਕਸ੍ਮਿਨ੍ਤਿ ਏਵਰੂਪੋ ਪੁਗ੍ਗਲੋ ਦੁਲ੍ਲਭੋ, ਕੋਚਿਦੇਵ ਲੋਕਸ੍ਮਿਂ ਵਿਜ੍ਜਤਿ. ਯੋ ਨਿਦ੍ਦਨ੍ਤਿ ਅਪ੍ਪਮਤ੍ਤੋ ਸਮਣਧਮ੍ਮਂ ਕਰੋਨ੍ਤੋ ਅਤ੍ਤਨੋ ਉਪ੍ਪਨ੍ਨਂ ਨਿਦ੍ਦਂ ਅਪਹਰਨ੍ਤੋ ਬੁਜ੍ਝਤੀਤਿ ਅਪਬੋਧੇਤਿ. ਕਸਾਮਿਵਾਤਿ ਯਥਾ ਭਦ੍ਰੋ ਅਸ੍ਸੋ ਅਤ੍ਤਨਿ ਪਤਮਾਨਂ ਕਸਂ ਅਪਹਰਤਿ, ਅਤ੍ਤਨਿ ਪਤਿਤੁਂ ਨ ਦੇਤਿ. ਯੋ ਏਵਂ ਨਿਦ੍ਦਂ ਅਪਬੋਧੇਤਿ, ਸੋ ਦੁਲ੍ਲਭੋਤਿ ਅਤ੍ਥੋ.

ਦੁਤਿਯਗਾਥਾਯ ਅਯਂ ਸਙ੍ਖੇਪਤ੍ਥੋ – ‘‘ਭਿਕ੍ਖਵੇ, ਯਥਾ ਭਦ੍ਰੋ ਅਸ੍ਸੋ ਪਮਾਦਮਾਗਮ੍ਮ ਕਸਾਯ ਨਿਵਿਟ੍ਠੋ, ਅਹਮ੍ਪਿ ਨਾਮ ਕਸਾਯ ਪਹਟੋ’’ਤਿ ਅਪਰਭਾਗੇ ਆਤਪ੍ਪਂ ਕਰੋਤਿ, ਏਵਂ ਤੁਮ੍ਹੇਪਿ ਆਤਾਪਿਨੋ ਸਂਵੇਗਿਨੋ ਭਵਥ, ਏਵਂਭੂਤਾ ਲੋਕਿਯਲੋਕੁਤ੍ਤਰਾਯ ਦੁਵਿਧਾਯ ਸਦ੍ਧਾਯ ਚ ਚਤੁਪਾਰਿਸੁਦ੍ਧਿਸੀਲੇਨ ਚ ਕਾਯਿਕਚੇਤਸਿਕਵੀਰਿਯੇਨ ਚ ਅਟ੍ਠਸਮਾਪਤ੍ਤਿਸਮਾਧਿਨਾ ਚ ਕਾਰਣਾਕਾਰਣਜਾਨਨਲਕ੍ਖਣੇਨ ਧਮ੍ਮਵਿਨਿਚ੍ਛਯੇਨ ਚ ਸਮਨ੍ਨਾਗਤਾ ਹੁਤ੍ਵਾ ਤਿਸ੍ਸਨ੍ਨਂ ਵਾ ਅਟ੍ਠਨ੍ਨਂ ਵਾ ਵਿਜ੍ਜਾਨਂ, ਪਞ੍ਚਦਸਨ੍ਨਞ੍ਚ ਚਰਣਾਨਂ ਸਮ੍ਪਤ੍ਤਿਯਾ ਸਮ੍ਪਨ੍ਨਵਿਜ੍ਜਾਚਰਣਾ. ਉਪਟ੍ਠਿਤਸਤਿਤਾਯ ਪਤਿਸ੍ਸਤਾ ਹੁਤ੍ਵਾ ਇਦਂ ਅਨਪ੍ਪਕਂ ਵਟ੍ਟਦੁਕ੍ਖਂ ਪਜਹਿਸ੍ਸਥਾਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਪਿਲੋਤਿਕਤਿਸ੍ਸਤ੍ਥੇਰਵਤ੍ਥੁ ਦਸਮਂ.

੧੧. ਸੁਖਸਾਮਣੇਰਵਤ੍ਥੁ

ਉਦਕਞ੍ਹਿ ਨਯਨ੍ਤੀਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸੁਖਸਾਮਣੇਰਂ ਆਰਬ੍ਭ ਕਥੇਸਿ.

ਅਤੀਤਸ੍ਮਿਞ੍ਹਿ ਬਾਰਾਣਸਿਸੇਟ੍ਠਿਨੋ ਗਨ੍ਧਕੁਮਾਰੋ ਨਾਮ ਪੁਤ੍ਤੋ ਅਹੋਸਿ. ਰਾਜਾ ਤਸ੍ਸ ਪਿਤਰਿ ਕਾਲਕਤੇ ਤਂ ਪਕ੍ਕੋਸਾਪੇਤ੍ਵਾ ਸਮਸ੍ਸਾਸੇਤ੍ਵਾ ਮਹਨ੍ਤੇਨ ਸਕ੍ਕਾਰੇਨ ਤਸ੍ਸੇਵ ਸੇਟ੍ਠਿਟ੍ਠਾਨਂ ਅਦਾਸਿ. ਸੋ ਤਤੋ ਪਟ੍ਠਾਯ ਗਨ੍ਧਸੇਟ੍ਠੀਤਿ ਪਞ੍ਞਾਯਿ. ਅਥਸ੍ਸ ਭਣ੍ਡਾਗਾਰਿਕੋ ਧਨਗਬ੍ਭਦ੍ਵਾਰਂ ਵਿਵਰਿਤ੍ਵਾ, ‘‘ਸਾਮਿ, ਇਦਂ ਤੇ ਏਤ੍ਤਕਂ ਪਿਤੁ ਧਨਂ, ਏਤ੍ਤਕਂ ਪਿਤਾਮਹਾਦੀਨ’’ਨ੍ਤਿ ਨੀਹਰਿਤ੍ਵਾ ਦਸ੍ਸੇਸਿ. ਸੋ ਤਂ ਧਨਰਾਸਿਂ ਓਲੋਕੇਤ੍ਵਾ ਆਹ – ‘‘ਕਿਂ ਪਨ ਤੇ ਇਮਂ ਧਨਂ ਗਹੇਤ੍ਵਾ ਨ ਗਮਿਂਸੂ’’ਤਿ. ‘‘ਸਾਮਿ, ਧਨਂ ਗਹੇਤ੍ਵਾ ਗਤਾ ਨਾਮ ਨਤ੍ਥਿ. ਅਤ੍ਤਨਾ ਕਤਂ ਕੁਸਲਾਕੁਸਲਮੇਵ ਹਿ ਆਦਾਯ ਸਤ੍ਤਾ ਗਚ੍ਛਨ੍ਤੀ’’ਤਿ. ਸੋ ਚਿਨ੍ਤੇਸਿ – ‘‘ਤੇ ਬਾਲਤਾਯ ਧਨਂ ਸਣ੍ਠਾਪੇਤ੍ਵਾ ਪਹਾਯ ਗਤਾ, ਅਹਂ ਪਨੇਤਂ ਗਹੇਤ੍ਵਾਵ ਗਮਿਸ੍ਸਾਮੀ’’ਤਿ. ਏਵਂ ਪਨ ਚਿਨ੍ਤੇਨ੍ਤੋ ‘‘ਦਾਨਂ ਵਾ ਦਸ੍ਸਾਮਿ, ਪੂਜਂ ਵਾ ਕਰਿਸ੍ਸਾਮੀ’’ਤਿ ਅਚਿਨ੍ਤੇਤ੍ਵਾ ‘‘ਇਦਂ ਸਬ੍ਬਂ ਖਾਦਿਤ੍ਵਾਵ ਗਮਿਸ੍ਸਾਮੀ’’ਤਿ ਚਿਨ੍ਤੇਸਿ. ਸੋ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਫਲਿਕਮਯਂ ਨ੍ਹਾਨਕੋਟ੍ਠਕਂ ਕਾਰੇਸਿ, ਸਤਸਹਸ੍ਸਂ ਦਤ੍ਵਾ ਫਲਿਕਮਯਮੇਵ ਨ੍ਹਾਨਫਲਕਂ, ਸਤਸਹਸ੍ਸਂ ਦਤ੍ਵਾ ਨਿਸੀਦਨਪਲ੍ਲਙ੍ਕਂ, ਸਤਸਹਸ੍ਸਂ ਦਤ੍ਵਾ ਭੋਜਨਪਾਤਿਂ, ਸਤਸਹਸ੍ਸਮੇਵ ਦਤ੍ਵਾ ਭੋਜਨਟ੍ਠਾਨੇ ਮਣ੍ਡਪਂ ਕਾਰਾਪੇਸਿ, ਸਤਸਹਸ੍ਸਂ ਦਤ੍ਵਾ ਭੋਜਨਪਾਤਿਯਾ ਆਸਿਤ੍ਤਕੂਪਧਾਨਂ ਕਾਰੇਸਿ, ਸਤਸਹਸ੍ਸੇਨੇਵ ਗੇਹੇ ਸੀਹਪਞ੍ਜਰਂ ਸਣ੍ਠਾਪੇਸਿ, ਅਤ੍ਤਨੋ ਪਾਤਰਾਸਤ੍ਥਾਯ ਸਹਸ੍ਸਂ ਅਦਾਸਿ, ਸਾਯਮਾਸਤ੍ਥਾਯਪਿ ਸਹਸ੍ਸਮੇਵ. ਪੁਣ੍ਣਮਦਿਵਸੇ ਪਨ ਭੋਜਨਤ੍ਥਾਯ ਸਤਸਹਸ੍ਸਂ ਦਾਪੇਸਿ, ਤਂ ਭਤ੍ਤਂ ਭੁਞ੍ਜਨਦਿਵਸੇ ਸਤਸਹਸ੍ਸਂ ਵਿਸ੍ਸਜ੍ਜੇਤ੍ਵਾ ਨਗਰਂ ਅਲਙ੍ਕਰਿਤ੍ਵਾ ਭੇਰਿਂ ਚਰਾਪੇਸਿ – ‘‘ਗਨ੍ਧਸੇਟ੍ਠਿਸ੍ਸ ਕਿਰ ਭਤ੍ਤਭੁਞ੍ਜਨਾਕਾਰਂ ਓਲੋਕੇਨ੍ਤੂ’’ਤਿ.

ਮਹਾਜਨੋ ਮਞ੍ਚਾਤਿਮਞ੍ਚੇ ਬਨ੍ਧਿਤ੍ਵਾ ਸਨ੍ਨਿਪਤਿ. ਸੋਪਿ ਸਤਸਹਸ੍ਸਗ੍ਘਨਕੇ ਨ੍ਹਾਨਕੋਟ੍ਠਕੇ ਸਤਸਹਸ੍ਸਗ੍ਘਨਕੇ ਫਲਕੇ ਨਿਸੀਦਿਤ੍ਵਾ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਤ੍ਵਾ ਤਂ ਸੀਹਪਞ੍ਜਰਂ ਵਿਵਰਿਤ੍ਵਾ ਤਸ੍ਮਿਂ ਪਲ੍ਲਙ੍ਕੇ ਨਿਸੀਦਿ. ਅਥਸ੍ਸ ਤਸ੍ਮਿਂ ਆਸਿਤ੍ਤਕੂਪਧਾਨੇ ਤਂ ਪਾਤਿਂ ਠਪੇਤ੍ਵਾ ਸਤਸਹਸ੍ਸਗ੍ਘਨਕਂ ਭੋਜਨਂ ਵਡ੍ਢੇਸੁਂ. ਸੋ ਨਾਟਕਪਰਿਵੁਤੋ ਏਵਰੂਪਾਯ ਸਮ੍ਪਤ੍ਤਿਯਾ ਤਂ ਭੋਜਨਂ ਭੁਞ੍ਜਤਿ. ਅਪਰੇਨ ਸਮਯੇਨ ਏਕੋ ਗਾਮਿਕਮਨੁਸ੍ਸੋ ਅਤ੍ਤਨੋ ਪਰਿਬ੍ਬਯਾਹਰਣਤ੍ਥਂ ਦਾਰੁਆਦੀਨਿ ਯਾਨਕੇ ਪਕ੍ਖਿਪਿਤ੍ਵਾ ਨਗਰਂ ਗਨ੍ਤ੍ਵਾ ਸਹਾਯਕਸ੍ਸ ਗੇਹੇ ਨਿਵਾਸਂ ਗਣ੍ਹਿ. ਤਦਾ ਪਨ ਪੁਣ੍ਣਮਦਿਵਸੋ ਹੋਤਿ. ‘‘ਗਨ੍ਧਸੇਟ੍ਠਿਨੋ ਭੁਞ੍ਜਨਲੀਲ਼ਂ ਓਲੋਕੇਨ੍ਤੂ’’ਤਿ ਨਗਰੇ ਭੇਰਿਂ ਚਰਾਪੇਸਿ. ਅਥ ਨਂ ਸਹਾਯਕੋ ਆਹ – ‘‘ਸਮ੍ਮ, ਗਨ੍ਧਸੇਟ੍ਠਿਨੋ ਤੇ ਭੁਞ੍ਜਨਲੀਲ਼ਂ ਦਿਟ੍ਠਪੁਬ੍ਬ’’ਨ੍ਤਿ. ‘‘ਨ ਦਿਟ੍ਠਪੁਬ੍ਬਂ, ਸਮ੍ਮਾ’’ਤਿ. ‘‘ਤੇਨ ਹਿ ਏਹਿ, ਗਚ੍ਛਾਮ, ਅਯਂ ਨਗਰੇ ਭੇਰੀ ਚਰਤਿ, ਏਤਸ੍ਸ ਮਹਾਸਮ੍ਪਤ੍ਤਿਂ ਪਸ੍ਸਾਮਾ’’ਤਿ ਨਗਰਵਾਸੀ ਜਨਪਦਵਾਸਿਂ ਗਹੇਤ੍ਵਾ ਅਗਮਾਸਿ. ਮਹਾਜਨੋਪਿ ਮਞ੍ਚਾਤਿਮਞ੍ਚੇ ਅਭਿਰੁਹਿਤ੍ਵਾ ਪਸ੍ਸਤਿ. ਗਾਮਵਾਸੀ ਭਤ੍ਤਗਨ੍ਧਂ ਘਾਯਿਤ੍ਵਾਵ ਨਗਰਵਾਸਿਂ ਆਹ – ‘‘ਮਯ੍ਹਂ ਏਤਾਯ ਪਾਤਿਯਾ ਭਤ੍ਤਪਿਣ੍ਡੇ ਪਿਪਾਸਾ ਜਾਤਾ’’ਤਿ. ਸਮ੍ਮ, ਮਾ ਏਤਂ ਪਤ੍ਥਯਿ, ਨ ਸਕ੍ਕਾ ਲਦ੍ਧੁਨ੍ਤਿ. ਸਮ੍ਮ, ਅਲਭਨ੍ਤੋ ਨ ਜੀਵਿਸ੍ਸਾਮੀਤਿ. ਸੋ ਤਂ ਪਟਿਬਾਹਿਤੁਂ ਅਸਕ੍ਕੋਨ੍ਤੋ ਪਰਿਸਪਰਿਯਨ੍ਤੇ ਠਤ੍ਵਾ ‘‘ਪਣਮਾਮਿ ਤੇ, ਸਾਮੀ’’ਤਿ ਤਿਕ੍ਖਤ੍ਤੁਂ ਮਹਾਸਦ੍ਦਂ ਨਿਚ੍ਛਾਰੇਤ੍ਵਾ ‘‘ਕੋ ਏਸੋ’’ਤਿ ਵੁਤ੍ਤੇ ਅਹਂ, ਸਾਮੀਤਿ. ‘‘ਕਿਮੇਤ’’ਨ੍ਤਿ. ‘‘ਅਯਂ ਏਕੋ ਗਾਮਵਾਸੀ ਤੁਮ੍ਹਾਕਂ ਪਾਤਿਯਂ ਭਤ੍ਤਪਿਣ੍ਡੇ ਪਿਪਾਸਂ ਉਪਾਦੇਸਿ, ਏਕਂ ਭਤ੍ਤਪਿਣ੍ਡਂ ਦਾਪੇਥਾ’’ਤਿ. ‘‘ਨ ਸਕ੍ਕਾ ਲਦ੍ਧੁ’’ਨ੍ਤਿ. ‘‘ਕਿਂ, ਸਮ੍ਮ, ਸੁਤਂ ਤੇ’’ਤਿ? ‘‘ਸੁਤਂ ਮੇ, ਅਪਿਚ ਲਭਨ੍ਤੋ ਜੀਵਿਸ੍ਸਾਮਿ, ਅਲਭਨ੍ਤਸ੍ਸ ਮੇ ਮਰਣਂ ਭਵਿਸ੍ਸਤੀ’’ਤਿ. ਸੋ ਪੁਨਪਿ ਵਿਰਵਿ – ‘‘ਅਯਂ ਕਿਰ, ਸਾਮਿ, ਅਲਭਨ੍ਤੋ ਮਰਿਸ੍ਸਤਿ, ਜੀਵਿਤਮਸ੍ਸ ਦੇਥਾ’’ਤਿ. ਅਮ੍ਭੋ ਭਤ੍ਤਪਿਣ੍ਡੋ ਨਾਮ ਸਤਮ੍ਪਿ ਅਗ੍ਘਤਿ, ਸਤਦ੍ਵਯਮ੍ਪਿ ਅਗ੍ਘਤਿ. ਯੋ ਯੋ ਯਾਚਤਿ, ਤਸ੍ਸ ਤਸ੍ਸ ਦਦਮਾਨੋ ਅਹਂ ਕਿਂ ਭੁਞ੍ਜਿਸ੍ਸਾਮੀਤਿ? ਸਾਮਿ, ਅਯਂ ਅਲਭਨ੍ਤੋ ਮਰਿਸ੍ਸਤਿ, ਜੀਵਿਤਮਸ੍ਸ ਦੇਥਾਤਿ. ਨ ਸਕ੍ਕਾਵ ਮੁਧਾ ਲਦ੍ਧੁਂ, ਯਦਿ ਪਨ ਅਲਭਨ੍ਤੋ ਨ ਜੀਵਤਿ, ਤੀਣਿ ਸਂਵਚ੍ਛਰਾਨਿ ਮਮ ਗੇਹੇ ਭਤਿਂ ਕਰੋਤੁ, ਏਵਮਸ੍ਸ ਭਤ੍ਤਪਾਤਿਂ ਦਾਪੇਸ੍ਸਾਮੀਤਿ. ਗਾਮਵਾਸੀ ਤਂ ਸੁਤ੍ਵਾ ‘‘ਏਵਂ ਹੋਤੁ, ਸਮ੍ਮਾ’’ਤਿ ਸਹਾਯਕਂ ਵਤ੍ਵਾ ਪੁਤ੍ਤਦਾਰਂ ਪਹਾਯ ‘‘ਭਤ੍ਤਪਾਤਿਅਤ੍ਥਾਯ ਤੀਣਿ ਸਂਵਚ੍ਛਰਾਨਿ ਭਤਿਂ ਕਰਿਸ੍ਸਾਮੀ’’ਤਿ ਸੇਟ੍ਠਿਸ੍ਸ ਗੇਹਂ ਪਾਵਿਸਿ. ਸੋ ਭਤਿਂ ਕਰੋਨ੍ਤੋ ਸਬ੍ਬਕਿਚ੍ਚਾਨਿ ਸਕ੍ਕਚ੍ਚਂ ਅਕਾਸਿ. ਗੇਹੇ ਵਾ ਅਰਞ੍ਞੇ ਵਾ ਰਤ੍ਤਿਂ ਵਾ ਦਿਵਾ ਵਾ ਸਬ੍ਬਾਨਿ ਕਤ੍ਤਬ੍ਬਕਮ੍ਮਾਨਿ ਕਤਾਨੇਵ ਪਞ੍ਞਾਯਿਂਸੁ. ‘‘ਭਤ੍ਤਭਤਿਕੋ’’ਤਿ ਚ ਵੁਤ੍ਤੇ ਸਕਲਨਗਰੇਪਿ ਪਞ੍ਞਾਯਿ. ਅਥਸ੍ਸ ਦਿਵਸੇ ਪਰਿਪੁਣ੍ਣੇ ਭਤ੍ਤਵੇਯ੍ਯਾਵਟਿਕੋ ‘‘ਭਤ੍ਤਭਤਿਕਸ੍ਸ, ਸਾਮਿ, ਦਿਵਸੋ ਪੁਣ੍ਣੋ, ਦੁਕ੍ਕਰਂ ਤੇਨ ਕਤਂ ਤੀਣਿ ਸਂਵਚ੍ਛਰਾਨਿ ਭਤਿਂ ਕਰੋਨ੍ਤੇਨ, ਏਕਮ੍ਪਿ ਕਮ੍ਮਂ ਨ ਕੋਪਿਤਪੁਬ੍ਬ’’ਨ੍ਤਿ ਆਹ.

ਅਥਸ੍ਸ ਸੇਟ੍ਠਿ ਅਤ੍ਤਨੋ ਸਾਯਪਾਤਰਾਸਤ੍ਥਾਯ ਦ੍ਵੇ ਸਹਸ੍ਸਾਨਿ, ਤਸ੍ਸ ਪਾਤਰਾਸਤ੍ਥਾਯ ਸਹਸ੍ਸਨ੍ਤਿ ਤੀਣਿ ਸਹਸ੍ਸਾਨਿ ਦਾਪੇਤ੍ਵਾ ਆਹ – ‘‘ਅਜ੍ਜ ਮਯ੍ਹਂ ਕਤ੍ਤਬ੍ਬਂ ਪਰਿਹਾਰਂ ਤਸ੍ਸੇਵ ਕਰੋਥਾ’’ਤਿ. ਵਤ੍ਵਾ ਚ ਪਨ ਠਪੇਤ੍ਵਾ ਏਕਂ ਚਿਨ੍ਤਾਮਣਿਂ ਨਾਮ ਪਿਯਭਰਿਯਂ ਅਵਸੇਸਜਨਮ੍ਪਿ ‘‘ਅਜ੍ਜ ਤਮੇਵ ਪਰਿਵਾਰੇਥਾ’’ਤਿ ਵਤ੍ਵਾ ਸਬ੍ਬਸਮ੍ਪਤ੍ਤਿਂ ਤਸ੍ਸ ਨਿਯ੍ਯਾਦੇਸਿ. ਸੋ ਸੇਟ੍ਠਿਨੋ ਨ੍ਹਾਨੋਦਕੇਨ ਤਸ੍ਸੇਵ ਕੋਟ੍ਠਕੇ ਤਸ੍ਮਿਂ ਫਲਕੇ ਨਿਸਿਨ੍ਨੋ ਨ੍ਹਤ੍ਵਾ ਤਸ੍ਸੇਵ ਨਿਵਾਸਨਸਾਟਕੇ ਨਿਵਾਸੇਤ੍ਵਾ ਤਸ੍ਸੇਵ ਪਲ੍ਲਙ੍ਕੇ ਨਿਸੀਦਿ. ਸੇਟ੍ਠਿਪਿ ਨਗਰੇ ਭੇਰਿਂ ਚਰਾਪੇਸਿ – ‘‘ਭਤ੍ਤਭਤਿਕੋ ਗਨ੍ਧਸੇਟ੍ਠਿਸ੍ਸ ਗੇਹੇ ਤੀਣਿ ਸਂਵਚ੍ਛਰਾਨਿ ਭਤਿਂ ਕਤ੍ਵਾ ਪਾਤਿਂ ਲਭਿ, ਤਸ੍ਸ ਭੁਞ੍ਜਨਸਮ੍ਪਤ੍ਤਿਂ ਓਲੋਕੇਨ੍ਤੂ’’ਤਿ. ਮਹਾਜਨੋ ਮਞ੍ਚਾਤਿਮਞ੍ਚੇ ਅਭਿਰੁਹਿਤ੍ਵਾ ਪਸ੍ਸਤਿ, ਗਾਮਵਾਸਿਸ੍ਸ ਓਲੋਕਿਤੋਲੋਕਿਤਟ੍ਠਾਨਂ ਕਮ੍ਪਨਾਕਾਰਪ੍ਪਤ੍ਤਂ ਅਹੋਸਿ. ਨਾਟਕਾ ਪਰਿਵਾਰੇਤ੍ਵਾ ਅਟ੍ਠਸੁਂ, ਤਸ੍ਸ ਪੁਰਤੋ ਭਤ੍ਤਪਾਤਿਂ ਵਡ੍ਢੇਤ੍ਵਾ ਠਪਯਿਂਸੁ. ਅਥਸ੍ਸ ਹਤ੍ਥਧੋਵਨਵੇਲਾਯ ਗਨ੍ਧਮਾਦਨੇ ਏਕੋ ਪਚ੍ਚੇਕਬੁਦ੍ਧੋ ਸਤ੍ਤਮੇ ਦਿਵਸੇ ਸਮਾਪਤ੍ਤਿਤੋ ਵੁਟ੍ਠਾਯ ‘‘ਕਤ੍ਥ ਨੁ ਖੋ ਅਜ੍ਜ ਭਿਕ੍ਖਾਚਾਰਤ੍ਥਾਯ ਗਚ੍ਛਾਮੀ’’ਤਿ ਉਪਧਾਰੇਨ੍ਤੋ ਭਤ੍ਤਭਤਿਕਂ ਅਦ੍ਦਸ. ਅਥ ਸੋ ‘‘ਅਯਂ ਤੀਣਿ ਸਂਵਚ੍ਛਰਾਨਿ ਭਤਿਂ ਕਤ੍ਵਾ ਭਤ੍ਤਪਾਤਿਂ ਲਭਿ, ਅਤ੍ਥਿ ਨੁ ਖੋ ਏਤਸ੍ਸ ਸਦ੍ਧਾ, ਨਤ੍ਥੀ’’ਤਿ ਉਪਧਾਰੇਨ੍ਤੋ ‘‘ਅਤ੍ਥੀ’’ਤਿ ਞਤ੍ਵਾ ‘‘ਸਦ੍ਧਾਪਿ ਏਕਚ੍ਚੇ ਸਙ੍ਗਹਂ ਕਾਤੁਂ ਨ ਸਕ੍ਕੋਨ੍ਤਿ, ਸਕ੍ਖਿਸ੍ਸਤਿ ਨੁ ਖੋ ਮੇ ਸਙ੍ਗਹਂ ਕਾਤੁ’’ਨ੍ਤਿ ਚਿਨ੍ਤੇਤ੍ਵਾ ‘‘ਸਕ੍ਖਿਸ੍ਸਤਿ ਚੇਵ ਮਮ ਚ ਸਙ੍ਗਹਕਰਣਂ ਨਿਸ੍ਸਾਯ ਮਹਾਸਮ੍ਪਤ੍ਤਿਂ ਲਭਿਸ੍ਸਤੀ’’ਤਿ ਞਤ੍ਵਾ ਚੀਵਰਂ ਪਾਰੁਪਿਤ੍ਵਾ ਪਤ੍ਤਮਾਦਾਯ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਪਰਿਸਨ੍ਤਰੇਨ ਗਨ੍ਤ੍ਵਾ ਤਸ੍ਸ ਪੁਰਤੋ ਠਿਤਮੇਵ ਅਤ੍ਤਾਨਂ ਦਸ੍ਸੇਸਿ.

ਸੋ ਪਚ੍ਚੇਕਬੁਦ੍ਧਂ ਦਿਸ੍ਵਾ ਚਿਨ੍ਤੇਸਿ – ‘‘ਅਹਂ ਪੁਬ੍ਬੇ ਅਦਿਨ੍ਨਭਾਵੇਨ ਏਕਿਸ੍ਸਾ ਭਤ੍ਤਪਾਤਿਯਾ ਅਤ੍ਥਾਯ ਤੀਣਿ ਸਂਵਚ੍ਛਰਾਨਿ ਪਰਗੇਹੇ ਭਤਿਂ ਅਕਾਸਿਂ, ਇਦਾਨਿ ਮੇ ਇਦਂ ਭਤ੍ਤਂ ਏਕਂ ਰਤ੍ਤਿਨ੍ਦਿਵਂ ਰਕ੍ਖੇਯ੍ਯ, ਸਚੇ ਪਨ ਨਂ ਅਯ੍ਯਸ੍ਸ ਦਸ੍ਸਾਮਿ, ਅਨੇਕਾਨਿਪਿ ਕਪ੍ਪਕੋਟਿਸਹਸ੍ਸਾਨਿ ਰਕ੍ਖਿਸ੍ਸਤਿ, ਅਯ੍ਯਸ੍ਸੇਵ ਨਂ ਦਸ੍ਸਾਮੀ’’ਤਿ. ਸੋ ਤੀਣਿ ਸਂਵਚ੍ਛਰਾਨਿ ਭਤਿਂ ਕਤ੍ਵਾ ਲਦ੍ਧਭਤ੍ਤਪਾਤਿਤੋ ਏਕਪਿਣ੍ਡਮ੍ਪਿ ਮੁਖੇ ਅਟ੍ਠਪੇਤ੍ਵਾ ਤਣ੍ਹਂ ਵਿਨੋਦੇਤ੍ਵਾ ਸਯਮੇਵ ਪਾਤਿਂ ਉਕ੍ਖਿਪਿਤ੍ਵਾ ਪਚ੍ਚੇਕਬੁਦ੍ਧਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਾਤਿਂ ਅਞ੍ਞਸ੍ਸ ਹਤ੍ਥੇ ਦਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਾਤਿਂ ਵਾਮਹਤ੍ਥੇਨ ਗਹੇਤ੍ਵਾ ਦਕ੍ਖਿਣਹਤ੍ਥੇਨ ਤਸ੍ਸ ਪਤ੍ਤੇ ਭਤ੍ਤਂ ਆਕਿਰਿ. ਪਚ੍ਚੇਕਬੁਦ੍ਧੋ ਭਤ੍ਤਸ੍ਸ ਉਪਡ੍ਢਸੇਸਕਾਲੇ ਪਤ੍ਤਂ ਹਤ੍ਥੇਨ ਪਿਦਹਿ. ਅਥ ਨਂ ਸੋ ਆਹ – ‘‘ਭਨ੍ਤੇ, ਏਕੋਵ ਪਟਿਵਿਸੋ ਨ ਸਕ੍ਕਾ ਦ੍ਵਿਧਾ ਕਾਤੁਂ, ਮਾ ਮਂ ਇਧਲੋਕੇਨ ਸਙ੍ਗਣ੍ਹਥ, ਪਰਲੋਕੇਨ ਸਙ੍ਗਹਮੇਵ ਕਰੋਥ, ਸਾਵਸੇਸਂ ਅਕਤ੍ਵਾ ਨਿਰਵਸੇਸਮੇਵ ਦਸ੍ਸਾਮੀ’’ਤਿ. ਅਤ੍ਤਨੋ ਹਿ ਥੋਕਮ੍ਪਿ ਅਨਵਸੇਸੇਤ੍ਵਾ ਦਿਨ੍ਨਂ ਨਿਰਵਸੇਸਦਾਨਂ ਨਾਮ, ਤਂ ਮਹਪ੍ਫਲਂ ਹੋਤਿ. ਸੋ ਤਥਾ ਕਰੋਨ੍ਤੋ ਸਬ੍ਬਂ ਦਤ੍ਵਾ ਪੁਨ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਏਕਂ ਭਤ੍ਤਪਾਤਿਂ ਨਿਸ੍ਸਾਯ ਤੀਣਿ ਸਂਵਚ੍ਛਰਾਨਿ ਮੇ ਪਰਗੇਹੇ ਭਤਿਂ ਕਰੋਨ੍ਤੇਨ ਦੁਕ੍ਖਂ ਅਨੁਭੂਤਂ, ਇਦਾਨਿ ਮੇ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੁਖਮੇਵ ਹੋਤੁ, ਤੁਮ੍ਹੇਹਿ ਦਿਟ੍ਠਧਮ੍ਮਸ੍ਸੇਵ ਭਾਗੀ ਅਸ੍ਸ’’ਨ੍ਤਿ. ਪਚ੍ਚੇਕਬੁਦ੍ਧੋ ‘‘ਏਵਂ ਹੋਤੁ, ਚਿਨ੍ਤਾਮਣਿ ਵਿਯ ਤੇ ਸਬ੍ਬਕਾਮਦਦੋ ਮਨੋਸਙ੍ਕਪ੍ਪਾ ਪੁਣ੍ਣਚਨ੍ਦੋ ਵਿਯ ਪੂਰੇਨ੍ਤੂ’’ਤਿ ਅਨੁਮੋਦਨਂ ਕਰੋਨ੍ਤੋ –

‘‘ਇਚ੍ਛਿਤਂ ਪਤ੍ਥਿਤਂ ਤੁਯ੍ਹਂ, ਸਬ੍ਬਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਚਨ੍ਦੋ ਪਨ੍ਨਰਸੋ ਯਥਾ.

‘‘ਇਚ੍ਛਿਤਂ ਪਤ੍ਥਿਕਂ ਤੁਯ੍ਹਂ, ਖਿਪ੍ਪਮੇਵ ਸਮਿਜ੍ਝਤੁ;

ਸਬ੍ਬੇ ਪੂਰੇਨ੍ਤੁ ਸਙ੍ਕਪ੍ਪਾ, ਮਣਿ ਜੋਤਿਰਸੋ ਯਥਾ’’ਤਿ. –

ਵਤ੍ਵਾ ‘‘ਅਯਂ ਮਹਾਜਨੋ ਯਾਵ ਗਨ੍ਧਮਾਦਨਪਬ੍ਬਤਗਮਨਾ ਮਂ ਪਸ੍ਸਨ੍ਤੋ ਤਿਟ੍ਠਤੂ’’ਤਿ ਅਧਿਟ੍ਠਾਯ ਆਕਾਸੇਨ ਗਨ੍ਧਮਾਦਨਂ ਅਗਮਾਸਿ.

ਮਹਾਜਨੋਪਿ ਨਂ ਪਸ੍ਸਨ੍ਤੋਵ ਅਟ੍ਠਾਸਿ. ਸੋ ਤਤ੍ਥ ਗਨ੍ਤ੍ਵਾ ਤਂ ਪਿਣ੍ਡਪਾਤਂ ਪਞ੍ਚਸਤਾਨਂ ਪਚ੍ਚੇਕਬੁਦ੍ਧਾਨਂ ਵਿਭਜਿਤ੍ਵਾ ਅਦਾਸਿ. ਸਬ੍ਬੇ ਅਤ੍ਤਨੋ ਪਹੋਨਕਂ ਗਣ੍ਹਿਂਸੁ. ‘‘ਅਪ੍ਪੋ ਪਿਣ੍ਡਪਾਤੋ ਕਥਂ ਪਹੋਸੀ’’ਤਿ ਨ ਚਿਨ੍ਤੇਤਬ੍ਬਂ. ਚਤ੍ਤਾਰਿ ਹਿ ਅਚਿਨ੍ਤੇਯ੍ਯਾਨਿ (ਅ. ਨਿ. ੪.੭੭) ਵੁਤ੍ਤਾਨਿ, ਤਤ੍ਰਾਯਂ ਪਚ੍ਚੇਕਬੁਦ੍ਧਵਿਸਯੋਤਿ. ਮਹਾਜਨੋ ਪਚ੍ਚੇਕਬੁਦ੍ਧਾਨਂ ਪਿਣ੍ਡਪਾਤਂ ਵਿਭਜਿਤ੍ਵਾ ਦਿਯ੍ਯਮਾਨਂ ਦਿਸ੍ਵਾ ਸਾਧੁਕਾਰਸਹਸ੍ਸਾਨਿ ਪਵਤ੍ਤੇਸਿ, ਅਸਨਿਸਤਨਿਪਾਕਸਦ੍ਦੋ ਵਿਯ ਅਹੋਸਿ. ਤਂ ਸੁਤ੍ਵਾ ਗਨ੍ਧਸੇਟ੍ਠਿ ਚਿਨ੍ਤੇਸਿ – ‘‘ਭਤ੍ਤਭਤਿਕੋ ਮਯਾ ਦਿਨ੍ਨਸਮ੍ਪਤ੍ਤਿਂ ਧਾਰੇਤੁਂ ਨਾਸਕ੍ਖਿ ਮਞ੍ਞੇ, ਤੇਨਾਯਂ ਮਹਾਜਨੋ ਪਰਿਹਾਸਂ ਕਰੋਨ੍ਤੋ ਸਨ੍ਨਿਪਤਿਤੋ ਨਦਤੀ’’ਤਿ. ਸੋ ਤਪ੍ਪਵਤ੍ਤਿਜਾਨਨਤ੍ਥਂ ਮਨੁਸ੍ਸੇ ਪੇਸੇਸਿ. ਤੇ ਆਗਨ੍ਤ੍ਵਾ ‘‘ਸਮ੍ਪਤ੍ਤਿਧਾਰਕਾ ਨਾਮ, ਸਾਮਿ, ਏਵਂ ਹੋਨ੍ਤੂ’’ਤਿ ਵਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਸੇਟ੍ਠਿ ਤਂ ਸੁਤ੍ਵਾਵ ਪਞ੍ਚਵਣ੍ਣਾਯ ਪੀਤਿਯਾ ਫੁਟ੍ਠਸਰੀਰੋ ਹੁਤ੍ਵਾ ‘‘ਅਹੋ ਦੁਕ੍ਕਰਂ ਤੇਨ ਕਤਂ, ਅਹਂ ਏਤ੍ਤਕਂ ਕਾਲਂ ਏਵਰੂਪਾਯ ਸਮ੍ਪਤ੍ਤਿਯਾ ਠਿਤੋ ਕਿਞ੍ਚਿ ਦਾਤੁਂ ਨਾਸਕ੍ਖਿ’’ਨ੍ਤਿ ਤਂ ਪਕ੍ਕੋਸਾਪੇਤ੍ਵਾ ‘‘ਸਚ੍ਚਂ ਕਿਰ ਤਯਾ ਇਦਂ ਨਾਮ ਕਤ’’ਨ੍ਤਿ ਪੁਚ੍ਛਿਤ੍ਵਾ ‘‘ਆਮ, ਸਾਮੀ’’ਤਿ ਵੁਤ੍ਤੇ, ‘‘ਹਨ੍ਦ, ਸਹਸ੍ਸਂ ਗਹੇਤ੍ਵਾ ਤਵ ਦਾਨੇ ਮਯ੍ਹਮ੍ਪਿ ਪਤ੍ਤਿਂ ਦੇਹੀ’’ਤਿ ਆਹ. ਸੋ ਤਥਾ ਅਕਾਸਿ. ਸੇਟ੍ਠਿਪਿਸ੍ਸ ਸਬ੍ਬਂ ਅਤ੍ਤਨੋ ਸਨ੍ਤਕਂ ਮਜ੍ਝੇ ਭਿਨ੍ਦਿਤ੍ਵਾ ਅਦਾਸਿ.

ਚਤਸ੍ਸੋ ਹਿ ਸਮ੍ਪਦਾ ਨਾਮ – ਵਤ੍ਥੁਸਮ੍ਪਦਾ, ਪਚ੍ਚਯਸਮ੍ਪਦਾ, ਚੇਤਨਾਸਮ੍ਪਦਾ, ਗੁਣਾਤਿਰੇਕਸਮ੍ਪਦਾਤਿ. ਤਤ੍ਥ ਨਿਰੋਧਸਮਾਪਤ੍ਤਿਰਹੋ ਅਰਹਾ ਵਾ ਅਨਾਗਾਮੀ ਵਾ ਦਕ੍ਖਿਣੇਯ੍ਯੋ ਵਤ੍ਥੁਸਮ੍ਪਦਾ ਨਾਮ. ਪਚ੍ਚਯਾਨਂ ਧਮ੍ਮੇਨ ਸਮੇਨ ਉਪ੍ਪਤ੍ਤਿ ਪਚ੍ਚਯਸਮ੍ਪਦਾ ਨਾਮ. ਦਾਨਤੋ ਪੁਬ੍ਬੇ ਦਾਨਕਾਲੇ ਪਚ੍ਛਾ ਭਾਗੇਤਿ ਤੀਸੁ ਕਾਲੇਸੁ ਚੇਤਨਾਯ ਸੋਮਨਸ੍ਸਸਹਗਤਞਾਣਸਮ੍ਪਯੁਤ੍ਤਭਾਵੋ ਚੇਤਨਾਸਮ੍ਪਦਾ ਨਾਮ. ਦਕ੍ਖਿਣੇਯ੍ਯਸ੍ਸ ਸਮਾਪਤ੍ਤਿਤੋ ਵੁਟ੍ਠਿਤਭਾਵੋ ਗੁਣਾਤਿਰੇਕਸਮ੍ਪਦਾ ਨਾਮਾਤਿ. ਇਮਸ੍ਸ ਚ ਖੀਣਾਸਵੋ ਪਚ੍ਚੇਕਬੁਦ੍ਧੋ ਦਕ੍ਖਿਣੇਯ੍ਯਾ, ਭਤਿਂ ਕਤ੍ਵਾ ਲਦ੍ਧਭਾਵੇਨ ਪਚ੍ਚਯੋ ਧਮ੍ਮਤੋ ਉਪ੍ਪਨ੍ਨੋ, ਤੀਸੁ ਕਾਲੇਸੁ ਪਰਿਸੁਦ੍ਧਾ ਚੇਤਨਾ, ਸਮਾਪਤ੍ਤਿਤੋ ਵੁਟ੍ਠਿਤਮਤ੍ਤੋ ਪਚ੍ਚੇਕਬੁਦ੍ਧੋ ਗੁਣਾਤਿਰੇਕੋਤਿ ਚਤਸ੍ਸੋਪਿ ਸਮ੍ਪਦਾ ਨਿਪ੍ਫਨ੍ਨਾ. ਏਤਾਸਂ ਆਨੁਭਾਵੇਨ ਦਿਟ੍ਠੇਵ ਧਮ੍ਮੇ ਮਹਾਸਮ੍ਪਤ੍ਤਿਂ ਪਾਪੁਣਨ੍ਤਿ. ਤਸ੍ਮਾ ਸੋ ਸੇਟ੍ਠਿਨੋ ਸਨ੍ਤਿਕਾ ਸਮ੍ਪਤ੍ਤਿਂ ਲਭਿ. ਅਪਰਭਾਗੇ ਚ ਰਾਜਾਪਿ ਇਮਿਨਾ ਕਤਕਮ੍ਮਂ ਸੁਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ਸਹਸ੍ਸਂ ਦਤ੍ਵਾ ਪਤ੍ਤਿਂ ਗਹੇਤ੍ਵਾ ਤੁਟ੍ਠਮਾਨਸੋ ਮਹਨ੍ਤਂ ਭੋਗਕ੍ਖਨ੍ਧਂ ਦਤ੍ਵਾ ਸੇਟ੍ਠਿਟ੍ਠਾਨਂ ਅਦਾਸਿ. ਭਤ੍ਤਭਤਿਕਸੇਟ੍ਠੀਤਿਸ੍ਸ ਨਾਮਂ ਅਕਾਸਿ. ਸੋ ਗਨ੍ਧਸੇਟ੍ਠਿਨਾ ਸਦ੍ਧਿਂ ਸਹਾਯੋ ਹੁਤ੍ਵਾ ਏਕਤੋ ਖਾਦਨ੍ਤੋ ਪਿਵਨ੍ਤੋ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਸਾਰਿਪੁਤ੍ਤਤ੍ਥੇਰਸ੍ਸੂਪਟ੍ਠਾਕਕੁਲੇ ਪਟਿਸਨ੍ਧਿਂ ਗਣ੍ਹਿ. ਅਥਸ੍ਸ ਮਾਤਾ ਲਦ੍ਧਗਬ੍ਭਪਰਿਹਾਰਾ ਕਤਿਪਾਹਚ੍ਚਯੇਨ ‘‘ਅਹੋ ਵਤਾਹਂ ਪਞ੍ਚਸਤੇਹਿ ਭਿਕ੍ਖੂਹਿ ਸਦ੍ਧਿਂ ਸਾਰਿਪੁਤ੍ਤਤ੍ਥੇਰਸ੍ਸ ਸਤਰਸਭੋਜਨਂ ਦਤ੍ਵਾ ਕਾਸਾਯਵਤ੍ਥਨਿਵਤ੍ਥਾ ਸੁਵਣ੍ਣਸਰਕਂ ਆਦਾਯ ਆਸਨਪਰਿਯਨ੍ਤੇ ਨਿਸਿਨ੍ਨਾ ਤੇਸਂ ਭਿਕ੍ਖੂਨਂ ਉਚ੍ਛਿਟ੍ਠਾਵਸੇਸਕਂ ਪਰਿਭੁਞ੍ਜੇਯ੍ਯ’’ਨ੍ਤਿ ਦੋਹਲ਼ਿਨੀ ਹੁਤ੍ਵਾ ਤਥੇਵ ਕਤ੍ਵਾ ਦੋਹਲ਼ਂ ਪਟਿਵਿਨੋਦੇਸਿ. ਸਾ ਸੇਸਮਙ੍ਗਲੇਸੁਪਿ ਤਥਾਰੂਪਮੇਵ ਦਾਨਂ ਦਤ੍ਵਾ ਪੁਤ੍ਤਂ ਵਿਜਾਯਿਤ੍ਵਾ ਨਾਮਗ੍ਗਹਣਦਿਵਸੇ ‘‘ਪੁਤ੍ਤਸ੍ਸ ਮੇ, ਭਨ੍ਤੇ, ਸਿਕ੍ਖਾਪਦਾਨਿ ਦੇਥਾ’’ਤਿ ਥੇਰਂ ਆਹ. ਥੇਰੋ ‘‘ਕਿਮਸ੍ਸ ਨਾਮ’’ਨ੍ਤਿ ਪੁਚ੍ਛਿ. ‘‘ਭਨ੍ਤੇ, ਪੁਤ੍ਤਸ੍ਸ ਮੇ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਇਮਸ੍ਮਿਂ ਗੇਹੇ ਕਸ੍ਸਚਿ ਦੁਕ੍ਖਂ ਨਾਮ ਨ ਭੂਤਪੁਬ੍ਬਂ, ਤੇਨੇਵਸ੍ਸ ਸੁਖਕੁਮਾਰੋਤਿ ਨਾਮਂ ਭਵਿਸ੍ਸਤੀ’’ਤਿ ਵੁਤ੍ਤੇ ਤਦੇਵਸ੍ਸ ਨਾਮਂ ਗਹੇਤ੍ਵਾ ਸਿਕ੍ਖਾਪਦਾਨਿ ਅਦਾਸਿ.

ਤਦਾ ਏਵਞ੍ਚਸ੍ਸ ਮਾਤੁ ‘‘ਨਾਹਂ ਮਮ ਪੁਤ੍ਤਸ੍ਸ ਅਜ੍ਝਾਸਯਂ ਭਿਨ੍ਦਿਸ੍ਸਾਮੀ’’ਤਿ ਚਿਤ੍ਤਂ ਉਪ੍ਪਜ੍ਜਿ. ਸਾ ਤਸ੍ਸ ਕਣ੍ਣਵਿਜ੍ਝਨਮਙ੍ਗਲਾਦੀਸੁਪਿ ਤਥੇਵ ਦਾਨਂ ਅਦਾਸਿ. ਕੁਮਾਰੋਪਿ ਸਤ੍ਤਵਸ੍ਸਿਕਕਾਲੇ ‘‘ਇਚ੍ਛਾਮਹਂ, ਅਮ੍ਮ, ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤੁ’’ਨ੍ਤਿ ਆਹ. ਸਾ ‘‘ਸਾਧੁ, ਤਾਤ, ਨਾਹਂ ਤਵ ਅਜ੍ਝਾਸਯਂ ਭਿਨ੍ਦਿਸ੍ਸਾਮੀ’’ਤਿ ਥੇਰਂ ਨਿਮਨ੍ਤੇਤ੍ਵਾ ਭੋਜੇਤ੍ਵਾ, ‘‘ਭਨ੍ਤੇ, ਪੁਤ੍ਤੋ ਮੇ ਪਬ੍ਬਜਿਤੁਂ ਇਚ੍ਛਤਿ, ਇਮਾਹਂ ਸਾਯਨ੍ਹਸਮਯੇ ਵਿਹਾਰਂ ਆਨੇਸ੍ਸਾਮੀ’’ਤਿ ਥੇਰਂ ਉਯ੍ਯੋਜੇਤ੍ਵਾ ਞਾਤਕੇ ਸਨ੍ਨਿਪਾਤੇਤ੍ਵਾ ‘‘ਪੁਤ੍ਤਸ੍ਸ ਮੇ ਗਿਹਿਕਾਲੇ ਕਤ੍ਤਬ੍ਬਂ ਕਿਚ੍ਚਂ ਅਜ੍ਜੇਵ ਕਰਿਸ੍ਸਾਮਾ’’ਤਿ ਵਤ੍ਵਾ ਪੁਤ੍ਤਂ ਅਲਙ੍ਕਰਿਤ੍ਵਾ ਮਹਨ੍ਤੇਨ ਸਿਰਿਸੋਭਗ੍ਗੇਨ ਵਿਹਾਰਂ ਨੇਤ੍ਵਾ ਥੇਰਸ੍ਸ ਨਿਯ੍ਯਾਦੇਸਿ. ਥੇਰੋਪਿ ਤਂ, ‘‘ਤਾਤ, ਪਬ੍ਬਜ੍ਜਾ ਨਾਮ ਦੁਕ੍ਕਰਾ, ਸਕ੍ਖਿਸ੍ਸਸਿ ਅਭਿਰਮਿਤੁ’’ਨ੍ਤਿ ਵਤ੍ਵਾ ‘‘ਕਰਿਸ੍ਸਾਮਿ ਵੋ, ਭਨ੍ਤੇ, ਓਵਾਦ’’ਨ੍ਤਿ ਵੁਤ੍ਤੇ ਕਮ੍ਮਟ੍ਠਾਨਂ ਦਤ੍ਵਾ ਪਬ੍ਬਾਜੇਸਿ. ਮਾਤਾਪਿਤਰੋਪਿਸ੍ਸ ਪਬ੍ਬਜ੍ਜਾਯ ਸਕ੍ਕਾਰਂ ਕਰੋਨ੍ਤਾ ਅਨ੍ਤੋਵਿਹਾਰੇਯੇਵ ਸਤ੍ਤਾਹਂ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤਰਸਭੋਜਨਂ ਦਤ੍ਵਾ ਸਾਯਂ ਅਤ੍ਤਨੋ ਗੇਹਂ ਅਗਮਂਸੁ. ਅਟ੍ਠਮੇ ਦਿਵਸੇ ਸਾਰਿਪੁਤ੍ਤਤ੍ਥੇਰੋ ਭਿਕ੍ਖੁਸਙ੍ਘੇ ਗਾਮਂ ਪਵਿਟ੍ਠੇ ਵਿਹਾਰੇ ਕਤ੍ਤਬ੍ਬਕਿਚ੍ਚਂ ਕਤ੍ਵਾ ਸਾਮਣੇਰਂ ਪਤ੍ਤਚੀਵਰਂ ਗਾਹਾਪੇਤ੍ਵਾ ਗਾਮਂ ਪਿਣ੍ਡਾਯ ਪਾਵਿਸਿ. ਸਾਮਣੇਰੋ ਅਨ੍ਤਰਾਮਗ੍ਗੇ ਮਾਤਿਕਾਦੀਨਿ ਦਿਸ੍ਵਾ ਪਣ੍ਡਿਤਸਾਮਣੇਰੋ ਵਿਯ ਪੁਚ੍ਛਿ. ਥੇਰੋਪਿ ਤਸ੍ਸ ਤਥੇਵ ਬ੍ਯਾਕਾਸਿ. ਸਾਮਣੇਰੋ ਤਾਨਿ ਕਾਰਣਾਨਿ ਸੁਤ੍ਵਾ ‘‘ਸਚੇ ਤੁਮ੍ਹੇ ਅਤ੍ਤਨੋ ਪਤ੍ਤਚੀਵਰਂ ਗਣ੍ਹੇਯ੍ਯਾਥ, ਅਹਂ ਨਿਵਤ੍ਤੇਯ੍ਯ’’ਨ੍ਤਿ ਵਤ੍ਵਾ ਥੇਰੇਨ ਤਸ੍ਸ ਅਜ੍ਝਾਸਯਂ ਅਭਿਨ੍ਦਿਤ੍ਵਾ, ‘‘ਸਾਮਣੇਰ, ਦੇਹਿ ਮਮ ਪਤ੍ਤਚੀਵਰ’’ਨ੍ਤਿ ਪਤ੍ਤਚੀਵਰੇ ਗਹਿਤੇ ਥੇਰਂ ਵਨ੍ਦਿਤ੍ਵਾ ਨਿਵਤ੍ਤਮਾਨੋ, ‘‘ਭਨ੍ਤੇ, ਮਯ੍ਹਂ ਆਹਾਰਂ ਆਹਰਮਾਨੋ ਸਤਰਸਭੋਜਨਂ ਆਹਰੇਯ੍ਯਾਥਾ’’ਤਿ ਆਹ. ਕੁਤੋ ਤਂ ਲਭਿਸ੍ਸਾਮੀਤਿ? ਅਤ੍ਤਨੋ ਪੁਞ੍ਞੇਨ ਅਲਭਨ੍ਤੋ ਮਮ ਪੁਞ੍ਞੇਨ ਲਭਿਸ੍ਸਥ, ਭਨ੍ਤੇਤਿ. ਅਥਸ੍ਸ ਥੇਰੋ ਕੁਞ੍ਚਿਕਂ ਦਤ੍ਵਾ ਗਾਮਂ ਪਿਣ੍ਡਾਯ ਪਾਵਿਸਿ. ਸੋਪਿ ਵਿਹਾਰਂ ਆਗਨ੍ਤ੍ਵਾ ਥੇਰਸ੍ਸ ਗਬ੍ਭਂ ਵਿਵਰਿਤ੍ਵਾ ਪਵਿਸਿਤ੍ਵਾ ਦ੍ਵਾਰਂ ਪਿਧਾਯ ਅਤ੍ਤਨੋ ਕਾਯੇ ਞਾਣਂ ਓਤਾਰੇਤ੍ਵਾ ਨਿਸੀਦਿ.

ਤਸ੍ਸ ਗੁਣਤੇਜੇਨ ਸਕ੍ਕਸ੍ਸ ਆਸਨਂ ਉਣ੍ਹਾਕਾਰਂ ਦਸ੍ਸੇਸਿ. ਸਕ੍ਕੋ ‘‘ਕਿਂ ਨੁ ਖੋ ਏਤ’’ਨ੍ਤਿ ਓਲੋਕੇਨ੍ਤੋ ਸਾਮਣੇਰਂ ਦਿਸ੍ਵਾ ‘‘ਸੁਖਸਾਮਣੇਰੋ ਅਤ੍ਤਨੋ ਉਪਜ੍ਝਾਯਸ੍ਸ ਪਤ੍ਤਚੀਵਰਂ ਦਤ੍ਵਾ ‘ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਨਿਵਤ੍ਤੋ, ਮਯਾ ਤਤ੍ਥ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਚਤ੍ਤਾਰੋ ਮਹਾਰਾਜੇ ਪਕ੍ਕੋਸਾਪੇਤ੍ਵਾ ‘‘ਗਚ੍ਛਥ, ਤਾਤਾ, ਵਿਹਾਰਸ੍ਸੂਪਵਨੇ ਦੁਸ੍ਸਦ੍ਦਕੇ ਸਕੁਣੇ ਪਲਾਪੇਥਾ’’ਤਿ ਉਯ੍ਯੋਜੇਸਿ. ਤੇ ਤਥਾ ਕਤ੍ਵਾ ਸਾਮਨ੍ਤਾ ਆਰਕ੍ਖਂ ਗਣ੍ਹਿਂਸੁ. ਚਨ੍ਦਿਮਸੂਰਿਯੇ ‘‘ਅਤ੍ਤਨੋ ਵਿਮਾਨਾਨਿ ਗਹੇਤ੍ਵਾ ਤਿਟ੍ਠਥਾ’’ਤਿ ਆਣਾਪੇਸਿ. ਤੇਪਿ ਤਥਾ ਕਰਿਂਸੁ. ਸਯਮ੍ਪਿ ਆਵਿਞ੍ਛਨਟ੍ਠਾਨੇ ਆਰਕ੍ਖਂ ਗਣ੍ਹਿ. ਵਿਹਾਰੋ ਸਨ੍ਨਿਸਿਨ੍ਨੋ ਨਿਰਵੋ ਅਹੋਸਿ. ਸਾਮਣੇਰੋ ਏਕਗ੍ਗਚਿਤ੍ਤੇਨ ਵਿਪਸ੍ਸਨਂ ਵਡ੍ਢੇਤ੍ਵਾ ਤੀਣਿ ਮਗ੍ਗਫਲਾਨਿ ਪਾਪੁਣਿ. ਥੇਰੋ ‘‘ਸਾਮਣੇਰੇਨ ‘ਸਤਰਸਭੋਜਨਂ ਆਹਰੇਯ੍ਯਾਥਾ’ਤਿ ਵੁਤ੍ਤਂ, ਕਸ੍ਸ ਨੁ ਖੋ ਘਰੇ ਸਕ੍ਕਾ ਲਦ੍ਧੁ’’ਨ੍ਤਿ ਓਲੋਕੇਨ੍ਤੋ ਏਕਂ ਅਜ੍ਝਾਸਯਸਮ੍ਪਨ੍ਨਂ ਉਪਟ੍ਠਾਕਤੁਲਂ ਦਿਸ੍ਵਾ ਤਤ੍ਥ ਗਨ੍ਤ੍ਵਾ, ‘‘ਭਨ੍ਤੇ, ਸਾਧੁ ਵੋ ਕਤਂ ਅਜ੍ਜ ਇਧਾਗਚ੍ਛਨ੍ਤੇਹੀ’’ਤਿ ਤੇਹਿ ਤੁਟ੍ਠਮਾਨਸੇਹਿ ਪਤ੍ਤਂ ਗਹੇਤ੍ਵਾ ਨਿਸੀਦਾਪੇਤ੍ਵਾ ਯਾਗੁਖਜ੍ਜਕਂ ਦਤ੍ਵਾ ਯਾਵ ਭਤ੍ਤਕਾਲਂ ਧਮ੍ਮਕਥਂ ਯਾਚਿਤੋ ਤੇਸਂ ਸਾਰਣੀਯਧਮ੍ਮਕਥਂ ਕਥੇਤ੍ਵਾ ਕਾਲਂ ਸਲ੍ਲਕ੍ਖੇਤ੍ਵਾ ਦੇਸਨਂ ਨਿਟ੍ਠਾਪੇਸਿ. ਅਥਸ੍ਸ ਸਤਰਸਭੋਜਨਂ ਦਤ੍ਵਾ ਤਂ ਆਦਾਯ ਗਨ੍ਤੁਕਾਮਂ ਥੇਰਂ ਦਿਸ੍ਵਾ ‘‘ਭੁਞ੍ਜਥ, ਭਨ੍ਤੇ, ਅਪਰਮ੍ਪਿ ਤੇ ਦਸ੍ਸਾਮਾ’’ਤਿ ਥੇਰਂ ਭੋਜੇਤ੍ਵਾ ਪੁਨ ਪਤ੍ਤਪੂਰਂ ਅਦਂਸੁ. ਥੇਰੋ ਤਂ ਆਦਾਯ ‘‘ਸਾਮਣੇਰੋ ਮੇ ਛਾਤੋ’’ਤਿ ਤੁਰਿਤਤੁਰਿਤੋ ਵਿਹਾਰਂ ਪਾਯਾਸਿ. ਤਂ ਦਿਵਸਂ ਸਤ੍ਥਾ ਪਾਤੋਵ ਨਿਕ੍ਖਮਿਤ੍ਵਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਆਵਜ੍ਜੇਸਿ – ‘‘ਅਜ੍ਜ ਸੁਖਸਾਮਣੇਰੋ ਉਪਜ੍ਝਾਯਸ੍ਸ ਪਤ੍ਤਚੀਵਰਂ ਦਤ੍ਵਾ ‘ਸਮਣਧਮ੍ਮਂ ਕਰਿਸ੍ਸਾਮੀ’ਤਿ ਨਿਵਤ੍ਤੋ, ਨਿਪ੍ਫਨ੍ਨਂ ਨੁ ਖੋ ਤਸ੍ਸ ਕਿਚ੍ਚ’’ਨ੍ਤਿ. ਸੋ ਤਿਣ੍ਣਂਯੇਵ ਮਗ੍ਗਫਲਾਨਂ ਪਤ੍ਤਭਾਵਂ ਦਿਸ੍ਵਾ ਉਤ੍ਤਰਿਪਿ ਉਪਧਾਰੇਨ੍ਤੋ ‘‘ਸਕ੍ਖਿਸ੍ਸਤਾਯਂ ਅਜ੍ਜ ਅਰਹਤ੍ਤਂ ਪਾਪੁਣਿਤੁਂ, ਸਾਰਿਪੁਤ੍ਤੋ ਪਨ ‘ਸਾਮਣੇਰੋ ਮੇ ਛਾਤੋ’ਤਿ ਵੇਗੇਨ ਭਤ੍ਤਂ ਆਦਾਯ ਨਿਕ੍ਖਮਤਿ, ਸਚੇ ਇਮਸ੍ਮਿਂ ਅਰਹਤ੍ਤਂ ਅਪ੍ਪਤ੍ਤੇ ਭਤ੍ਤਂ ਆਹਰਿਸ੍ਸਤਿ, ਇਮਸ੍ਸ ਅਨ੍ਤਰਾਯੋ ਭਵਿਸ੍ਸਤਿ, ਮਯਾ ਗਨ੍ਤ੍ਵਾ ਦ੍ਵਾਰਕੋਟ੍ਠਕੇ ਆਰਕ੍ਖਂ ਗਣ੍ਹਿਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਗਨ੍ਧਕੁਟਿਤੋ ਨਿਕ੍ਖਮਿਤ੍ਵਾ ਦ੍ਵਾਰਕੋਟ੍ਠਕੇ ਠਤ੍ਵਾ ਆਰਕ੍ਖਂ ਗਣ੍ਹਿ.

ਥੇਰੋਪਿ ਭਤ੍ਤਂ ਆਹਰਿ. ਅਥ ਨਂ ਹੇਟ੍ਠਾ ਵੁਤ੍ਤਨਯੇਨੇਵ ਚਤ੍ਤਾਰੋ ਪਞ੍ਹੇ ਪੁਚ੍ਛਿ. ਪਞ੍ਹਵਿਸ੍ਸਜ੍ਜਨਾਵਸਾਨੇ ਸਾਮਣੇਰੋ ਅਰਹਤ੍ਤਂ ਪਾਪੁਣਿ. ਸਤ੍ਥਾ ਥੇਰਂ ਆਮਨ੍ਤੇਤ੍ਵਾ ‘‘ਗਚ੍ਛ, ਸਾਰਿਪੁਤ੍ਤ, ਸਾਮਣੇਰਸ੍ਸ ਤੇ ਭਤ੍ਤਂ ਦੇਹੀ’’ਤਿ ਆਹ. ਥੇਰੋ ਗਨ੍ਤ੍ਵਾ ਦ੍ਵਾਰਂ ਆਕੋਟੇਸਿ. ਸਾਮਣੇਰੋਪਿ ਨਿਕ੍ਖਮਿਤ੍ਵਾ ਉਪਜ੍ਝਾਯਸ੍ਸ ਵਤ੍ਤਂ ਕਤ੍ਵਾ ‘‘ਭਤ੍ਤਕਿਚ੍ਚਂ ਕਰੋਹੀ’’ਤਿ ਵੁਤ੍ਤੇ ਥੇਰਸ੍ਸ ਭਤ੍ਤੇਨ ਅਨਤ੍ਥਿਕਭਾਵਂ ਞਤ੍ਵਾ ਸਤ੍ਤਵਸ੍ਸਿਕਕੁਮਾਰੋ ਤਙ੍ਖਣਞ੍ਞੇਵ ਅਰਹਤ੍ਤਂ ਪਤ੍ਤੋ ਨੀਚਾਸਨਟ੍ਠਾਨਂ ਪਚ੍ਚਵੇਕ੍ਖਨ੍ਤੋ ਭਤ੍ਤਕਿਚ੍ਚਂ ਕਤ੍ਵਾ ਪਤ੍ਤਂ ਧੋਵਿ. ਤਸ੍ਮਿਂ ਕਾਲੇ ਚਤ੍ਤਾਰੋ ਮਹਾਰਾਜਾਨੋ ਆਰਕ੍ਖਂ ਵਿਸ੍ਸਜ੍ਜੇਸੁਂ. ਚਨ੍ਦਿਮਸੂਰਿਯਾਪਿ ਵਿਮਾਨਾਨਿ ਮੁਞ੍ਚਿਂਸੁ. ਸਕ੍ਕੋਪਿ ਆਵਿਞ੍ਛਨਟ੍ਠਾਨੇ ਆਰਕ੍ਖਂ ਵਿਸ੍ਸਜ੍ਜੇਸਿ. ਸੂਰਿਯੋ ਨਭਮਜ੍ਝਂ ਅਤਿਕ੍ਕਨ੍ਤੋਯੇਵ ਪਞ੍ਞਾਯਿ. ਭਿਕ੍ਖੂ ‘‘ਸਾਯਨ੍ਹੋ ਪਞ੍ਞਾਯਤਿ, ਸਾਮਣੇਰੇਨ ਚ ਇਦਾਨੇਵ ਭਤ੍ਤਕਿਚ੍ਚਂ ਕਤਂ, ਕਿਂ ਨੁ ਖੋ ਅਜ੍ਜ ਪੁਬ੍ਬਣ੍ਹੋ ਬਲਵਾ ਜਾਤੋ, ਸਾਯਨ੍ਹੋ ਮਨ੍ਦੋ’’ਤਿ ਵਦਿਂਸੁ. ਸਤ੍ਥਾ ਆਗਨ੍ਤ੍ਵਾ ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ, ‘‘ਭਨ੍ਤੇ, ਅਜ੍ਜ ਪੁਬ੍ਬਣ੍ਹੋ ਬਲਵਾ ਜਾਤੋ, ਸਾਯਨ੍ਹੋ ਮਨ੍ਦੋ, ਸਾਮਣੇਰੇਨ ਚ ਇਦਾਨੇਵ ਭਤ੍ਤਕਿਚ੍ਚਂ ਕਤਂ, ਅਥ ਚ ਪਨ ਸੂਰਿਯੋ ਨਭਮਜ੍ਝਂ ਅਤਿਕ੍ਕਨ੍ਤੋਯੇਵ ਪਞ੍ਞਾਯਤੀ’’ਤਿ ਵੁਤ੍ਤੇ, ‘‘ਭਿਕ੍ਖਵੇ, ਏਵਮੇਵਂ ਹੋਤਿ ਪੁਞ੍ਞਵਨ੍ਤਾਨਂ ਸਮਣਧਮ੍ਮਕਰਣਕਾਲੇ. ਅਜ੍ਜ ਹਿ ਚਤ੍ਤਾਰੋ ਮਹਾਰਾਜਾਨੋ ਸਾਮਨ੍ਤਾ ਆਰਕ੍ਖਂ ਗਣ੍ਹਿਂਸੁ, ਚਨ੍ਦਿਮਸੂਰਿਯਾ ਵਿਮਾਨਾਨਿ ਗਹੇਤ੍ਵਾ ਅਟ੍ਠਂਸੁ, ਸਕ੍ਕੋ ਆਵਿਞ੍ਛਨਕੇ ਆਰਕ੍ਖਂ ਗਣ੍ਹਿ, ਅਹਮ੍ਪਿ ਦ੍ਵਾਰਕੋਟ੍ਠਕੇ ਆਰਕ੍ਖਂ ਗਣ੍ਹਿਂ, ਅਜ੍ਜ ਸੁਖਸਾਮਣੇਰੋ ਮਾਤਿਕਾਯ ਉਦਕਂ ਹਰਨ੍ਤੇ, ਉਸੁਕਾਰੇ ਉਸੁਂ ਉਜੁਂ ਕਰੋਨ੍ਤੇ, ਤਚ੍ਛਕੇ ਚਕ੍ਕਾਦੀਨਿ ਕਰੋਨ੍ਤੇ ਦਿਸ੍ਵਾ ਅਤ੍ਤਾਨਂ ਦਮੇਤ੍ਵਾ ਅਰਹਤ੍ਤਂ ਪਤ੍ਤੋ’’ਤਿ ਵਤ੍ਵਾ ਇਮਂ ਗਾਥਮਾਹ –

੧੪੫. ‘‘ਉਦਕਞ੍ਹਿ ਨਯਨ੍ਤਿ ਨੇਤ੍ਤਿਕਾ, ਉਸੁਕਾਰਾ ਨਮਯਨ੍ਤਿ ਤੇਜਨਂ;

ਦਾਰੁਂ ਨਮਯਨ੍ਤਿ ਤਚ੍ਛਕਾ, ਅਤ੍ਤਾਨਂ ਦਮਯਨ੍ਤਿ ਸੁਬ੍ਬਤਾ’’ਤਿ.

ਤਤ੍ਥ ਸੁਬ੍ਬਤਾਤਿ ਸੁਵਦਾ, ਸੁਖੇਨ ਓਵਦਿਤਬ੍ਬਾ ਅਨੁਸਾਸਿਤਬ੍ਬਾਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸੁਖਸਾਮਣੇਰਵਤ੍ਥੁ ਏਕਾਦਸਮਂ.

ਦਣ੍ਡਵਗ੍ਗਵਣ੍ਣਨਾ ਨਿਟ੍ਠਿਤਾ.

ਦਸਮੋ ਵਗ੍ਗੋ.