੧੪. ਬਹੁਪੁਤ੍ਤਿਕਤ੍ਥੇਰੀਵਤ੍ਥੁ
ਯੋ ਚ ਵਸ੍ਸਸਤਂ ਜੀਵੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਬਹੁਪੁਤ੍ਤਿਕਂ ਥੇਰਿਂ ਆਰਬ੍ਭ ਕਥੇਸਿ.
ਸਾਵਤ੍ਥਿਯਂ ਕਿਰੇਕਸ੍ਮਿਂ ਕੁਲੇ ਸਤ੍ਤ ਪੁਤ੍ਤਾ ਸਤ੍ਤ ਚ ਧੀਤਰੋ ਅਹੇਸੁਂ. ਤੇ ਸਬ੍ਬੇਪਿ ਵਯਪ੍ਪਤ੍ਤਾ ਗੇਹੇ ਪਤਿਟ੍ਠਹਿਤ੍ਵਾ ਅਤ੍ਤਨੋ ਧਮ੍ਮਤਾਯ ਸੁਖਪ੍ਪਤ੍ਤਾ ਅਹੇਸੁਂ. ਤੇਸਂ ਅਪਰੇਨ ਸਮਯੇਨ ਪਿਤਾ ਕਾਲਮਕਾਸਿ. ਮਹਾਉਪਾਸਿਕਾ ਸਾਮਿਕੇ ਨਟ੍ਠੇਪਿ ਨ ਤਾਵ ਕੁਟੁਮ੍ਬਂ ਵਿਭਜਤਿ. ਅਥ ਨਂ ਪੁਤ੍ਤਾ ਆਹਂਸੁ – ‘‘ਅਮ੍ਮ, ਅਮ੍ਹਾਕਂ ਪਿਤਰਿ ਨਟ੍ਠੇ ਤੁਯ੍ਹਂ ਕੋ ਅਤ੍ਥੋ ਕੁਟੁਮ੍ਬੇਨ, ਕਿਂ ਮਯਂ ਤਂ ਉਪਟ੍ਠਾਤੁਂ ਨ ਸਕ੍ਕੋਮਾ’’ਤਿ. ਸਾ ਤੇਸਂ ਕਥਂ ਸੁਤ੍ਵਾ ਤੁਣ੍ਹੀ ਹੁਤ੍ਵਾ ਪੁਨਪ੍ਪੁਨਂ ਤੇਹਿ ਵੁਚ੍ਚਮਾਨਾ ‘‘ਪੁਤ੍ਤਾ ਮਂ ਪਟਿਜਗ੍ਗਿਸ੍ਸਨ੍ਤਿ, ਕਿਂ ਮੇ ਵਿਸੁਂ ਕੁਟੁਮ੍ਬੇਨਾ’’ਤਿ ਸਬ੍ਬਂ ਸਾਪਤੇਯ੍ਯਂ ਮਜ੍ਝੇ ਭਿਨ੍ਦਿਤ੍ਵਾ ਅਦਾਸਿ. ਅਥ ਨਂ ਕਤਿਪਾਹਚ੍ਚਯੇਨ ਜੇਟ੍ਠਪੁਤ੍ਤਸ੍ਸ ਭਰਿਯਾ ‘‘ਅਹੋ ਅਮ੍ਹਾਕਂ, ਅਯ੍ਯਾ, ‘ਜੇਟ੍ਠਪੁਤ੍ਤੋ ਮੇ’ਤਿ ਦ੍ਵੇ ਕੋਟ੍ਠਾਸੇ ਦਤ੍ਵਾ ਵਿਯ ਇਮਮੇਵ ਗੇਹਂ ਆਗਚ੍ਛਤੀ’’ਤਿ ਆਹ. ਸੇਸਪੁਤ੍ਤਾਨਂ ਭਰਿਯਾਪਿ ਏਵਮੇਵ ਵਦਿਂਸੁ. ਜੇਟ੍ਠਧੀਤਰਂ ਆਦਿਂ ਕਤ੍ਵਾ ਤਾਸਂ ਗੇਹਂ ਗਤਕਾਲੇਪਿ ਨਂ ਏਵਮੇਵ ਵਦਿਂਸੁ. ਸਾ ਅਵਮਾਨਪ੍ਪਤ੍ਤਾ ਹੁਤ੍ਵਾ ‘‘ਕਿਂ ਇਮੇਸਂ ਸਨ੍ਤਿਕੇ ਵੁਟ੍ਠੇਨ, ਭਿਕ੍ਖੁਨੀ ਹੁਤ੍ਵਾ ਜੀਵਿਸ੍ਸਾਮੀ’’ਤਿ ਭਿਕ੍ਖੁਨੀਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜ੍ਜਂ ਯਾਚਿ. ਤਾ ਨਂ ਪਬ੍ਬਾਜੇਸੁਂ. ਸਾ ਲਦ੍ਧੂਪਸਮ੍ਪਦਾ ਹੁਤ੍ਵਾ ਬਹੁਪੁਤ੍ਤਿਕਤ੍ਥੇਰੀਤਿ ਪਞ੍ਞਾਯਿ. ਸਾ ‘‘ਅਹਂ ਮਹਲ੍ਲਕਕਾਲੇ ਪਬ੍ਬਜਿਤਾ, ਅਪ੍ਪਮਤ੍ਤਾਯ ਮੇ ਭਵਿਤਬ੍ਬ’’ਨ੍ਤਿ ਭਿਕ੍ਖੁਨੀਨਂ ਵਤ੍ਤਪਟਿਵਤ੍ਤਂ ਕਰੋਨ੍ਤੀ ‘‘ਸਬ੍ਬਰਤ੍ਤਿਂ ਸਮਣਧਮ੍ਮਂ ਕਰਿਸ੍ਸਾਮੀ’’ਤਿ ਹੇਟ੍ਠਾਪਾਸਾਦੇ ਏਕਂ ਥਮ੍ਭਂ ਹਤ੍ਥੇਨ ਗਹੇਤ੍ਵਾ ਤਂ ਆਵਿਞ੍ਛਮਾਨਾਵ ਸਮਣਧਮ੍ਮਂ ਕਰੋਤਿ, ਚਙ੍ਕਮਮਾਨਾਪਿ ‘‘ਅਨ੍ਧਕਾਰਟ੍ਠਾਨੇ ਮੇ ਰੁਕ੍ਖੇ ਵਾ ਕਤ੍ਥਚਿ ਵਾ ਸੀਸਂ ਪਟਿਹਞ੍ਞੇਯ੍ਯਾ’’ਤਿ ਤਂ ਰੁਕ੍ਖਂ ਹਤ੍ਥੇਨ ਗਹੇਤ੍ਵਾ ਤਂ ਆਵਿਞ੍ਛਮਾਨਾਵ ਸਮਣਧਮ੍ਮਂ ਕਰੋਤਿ, ‘‘ਸਤ੍ਥਾਰਾ ਦੇਸਿਤਧਮ੍ਮਮੇਵ ਕਰਿਸ੍ਸਾਮੀ’’ਤਿ ਧਮ੍ਮਂ ਆਵਜ੍ਜੇਤ੍ਵਾ ਧਮ੍ਮਂ ਅਨੁਸ੍ਸਰਮਾਨਾਵ ਸਮਣਧਮ੍ਮਂ ਕਰੋਤਿ. ਅਥ ਸਤ੍ਥਾ ਗਨ੍ਧਕੁਟਿਯਂ ਨਿਸਿਨ੍ਨੋਵ ਓਭਾਸਂ ਫਰਿਤ੍ਵਾ ਸਮ੍ਮੁਖੇ ਨਿਸਿਨ੍ਨੋ ਵਿਯ ਤਾਯ ਸਦ੍ਧਿਂ ਕਥੇਨ੍ਤੋ ‘‘ਬਹੁਪੁਤ੍ਤਿਕੇ ਮਯਾ ਦੇਸਿਤਂ ਧਮ੍ਮਂ ਅਨਾਵਜ੍ਜੇਨ੍ਤਸ੍ਸ ਅਪਸ੍ਸਨ੍ਤਸ੍ਸ ਵਸ੍ਸਸਤਂ ਜੀਵਨਤੋ ਮਯਾ ਦੇਸਿਤਂ ਧਮ੍ਮਂ ਪਸ੍ਸਨ੍ਤਸ੍ਸ ਮੁਹੁਤ੍ਤਮ੍ਪਿ ਜੀਵਿਤਂ ਸੇਯ੍ਯੋ’’ਤਿ ਵਤ੍ਵਾ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –
੧੧੫. ‘‘ਯੋ ਚ ਵਸ੍ਸਸਤਂ ਜੀਵੇ, ਅਪਸ੍ਸਂ ਧਮ੍ਮਮੁਤ੍ਤਮਂ;
ਏਕਾਹਂ ਜੀਵਿਤਂ ਸੇਯ੍ਯੋ, ਪਸ੍ਸਤੋ ਧਮ੍ਮਮੁਤ੍ਤਮ’’ਨ੍ਤਿ.
ਤਤ੍ਥ ਧਮ੍ਮਮੁਤ੍ਤਮਨ੍ਤਿ ਨਵਵਿਧਂ ਲੋਕੁਤ੍ਤਰਧਮ੍ਮਂ. ਸੋ ਹਿ ਉਤ੍ਤਮੋ ਧਮ੍ਮੋ ਨਾਮ. ਯੋ ਹਿ ਤਂ ਨ ਪਸ੍ਸਤਿ, ਤਸ੍ਸ ਵਸ੍ਸਸਤਮ੍ਪਿ ਜੀਵਨਤੋ ਤਂ ਧਮ੍ਮਂ ਪਸ੍ਸਨ੍ਤਸ੍ਸ ਪਟਿਵਿਜ੍ਝਨ੍ਤਸ੍ਸ ਏਕਾਹਮ੍ਪਿ ਏਕਕ੍ਖਣਮ੍ਪਿ ਜੀਵਿਤਂ ਸੇਯ੍ਯੋਤਿ.
ਗਾਥਾਪਰਿਯੋਸਾਨੇ ਬਹੁਪੁਤ੍ਤਿਕਤ੍ਥੇਰੀ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤੇ ਪਤਿਟ੍ਠਹੀਤਿ.
ਬਹੁਪੁਤ੍ਤਿਕਤ੍ਥੇਰੀਵਤ੍ਥੁ ਚੁਦ੍ਦਸਮਂ.
ਸਹਸ੍ਸਵਗ੍ਗਵਣ੍ਣਨਾ ਨਿਟ੍ਠਿਤਾ.
ਅਟ੍ਠਮੋ ਵਗ੍ਗੋ.
ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ