੧੫. ਵਨਵਾਸੀਤਿਸ੍ਸਸਾਮਣੇਰਵਤ੍ਥੁ

ਅਞ੍ਞਾ ਹਿ ਲਾਭੂਪਨਿਸਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਵਨਵਾਸਿਕਤਿਸ੍ਸਤ੍ਥੇਰਂ ਆਰਬ੍ਭ ਕਥੇਸਿ. ਦੇਸਨਾ ਰਾਜਗਹੇ ਸਮੁਟ੍ਠਿਤਾ.

ਸਾਰਿਪੁਤ੍ਤਤ੍ਥੇਰਸ ਕਿਰ ਪਿਤੁ ਵਙ੍ਗਨ੍ਤਬ੍ਰਾਹ੍ਮਣਸ੍ਸ ਸਹਾਯਕੋ ਮਹਾਸੇਨਬ੍ਰਾਹ੍ਮਣੋ ਨਾਮ ਰਾਜਗਹੇ ਵਸਤਿ. ਸਾਰਿਪੁਤ੍ਤਤ੍ਥੇਰੋ ਏਕਦਿਵਸਂ ਪਿਣ੍ਡਾਯ ਚਰਨ੍ਤੋ ਤਸ੍ਮਿਂ ਅਨੁਕਮ੍ਪਾਯ ਤਸ੍ਸ ਗੇਹਦ੍ਵਾਰਂ ਅਗਮਾਸਿ. ਸੋ ਪਨ ਪਰਿਕ੍ਖੀਣਵਿਭਵੋ ਦਲਿਦ੍ਦੋ. ਸੋ ‘‘ਮਮ ਪੁਤ੍ਤੋ ਮਯ੍ਹਂ ਗੇਹਦ੍ਵਾਰਂ ਪਿਣ੍ਡਾਯ ਚਰਿਤੁਂ ਆਗਤੋ ਭਵਿਸ੍ਸਤਿ, ਅਹਞ੍ਚਮ੍ਹਿ ਦੁਗ੍ਗਤੋ, ਮਯ੍ਹਂ ਦੁਗ੍ਗਤਭਾਵਂ ਨ ਜਾਨਾਤਿ ਮਞ੍ਞੇ, ਨਤ੍ਥਿ ਮੇ ਕੋਚਿ ਦੇਯ੍ਯਧਮ੍ਮੋ’’ਤਿ ਥੇਰਸ੍ਸ ਸਮ੍ਮੁਖਾ ਭਵਿਤੁਂ ਅਸਕ੍ਕੋਨ੍ਤੋ ਨਿਲੀਯਿ. ਥੇਰੋ ਅਪਰਮ੍ਪਿ ਦਿਵਸਂ ਅਗਮਾਸਿ, ਬ੍ਰਾਹ੍ਮਣੋ ਤਥੇਵ ਨਿਲੀਯਿ. ‘‘ਕਿਞ੍ਚਿਦੇਵ ਲਭਿਤ੍ਵਾ ਦਸ੍ਸਾਮੀ’’ਤਿ ਚਿਨ੍ਤੇਨ੍ਤੋਪਿ ਨਾਲਭਿ. ਅਥੇਕਦਿਵਸਂ ਏਕਸ੍ਮਿਂ ਬ੍ਰਾਹ੍ਮਣਵਾਚਕੇ ਥੂਲਸਾਟਕੇਨ ਸਦ੍ਧਿਂ ਪਾਯਸਪਾਤਿਂ ਲਭਿਤ੍ਵਾ ਆਦਾਯ ਗੇਹਂ ਗਨ੍ਤ੍ਵਾਵ ਥੇਰਂ ਅਨੁਸ੍ਸਰਿ, ‘‘ਇਮਂ ਪਿਣ੍ਡਪਾਤਂ ਮਯਾ ਥੇਰਸ੍ਸ ਦਾਤੁਂ ਵਟ੍ਟਤੀ’’ਤਿ. ਥੇਰੋਪਿ ਤਂ ਖਣਂ ਝਾਨਂ ਸਮਾਪਜ੍ਜਿਤ੍ਵਾ ਸਮਾਪਤ੍ਤਿਤੋ ਵੁਟ੍ਠਾਯ ਤਂ ਬ੍ਰਾਹ੍ਮਣਂ ਦਿਸ੍ਵਾ ‘‘ਬ੍ਰਾਹ੍ਮਣੋ ਦੇਯ੍ਯਧਮ੍ਮਂ ਲਭਿਤ੍ਵਾ ਮਮ ਆਗਮਨਂ ਪਚ੍ਚਾਸੀਸਤਿ, ਮਯਾ ਤਤ੍ਥ ਗਨ੍ਤੁਂ ਵਟ੍ਟਤੀ’’ਤਿ ਸਙ੍ਘਾਟਿਂ ਪਾਰੁਪਿਤ੍ਵਾ ਪਤ੍ਤਂ ਆਦਾਯ ਤਸ੍ਸ ਗੇਹਦ੍ਵਾਰੇ ਠਿਤਮੇਵ ਅਤ੍ਤਾਨਂ ਦਸ੍ਸੇਸਿ.

ਬ੍ਰਾਹ੍ਮਣੋ ਥੇਰਂ ਦਿਸ੍ਵਾਵ ਚਿਤ੍ਤਂ ਪਸੀਦਿ. ਅਥ ਨਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਅਨ੍ਤੋਗੇਹੇ ਨਿਸੀਦਾਪੇਤ੍ਵਾ ਪਾਯਸਪਾਤਿਂ ਗਹੇਤ੍ਵਾ ਥੇਰਸ੍ਸ ਪਤ੍ਤੇ ਆਕਿਰਿ. ਥੇਰੋ ਉਪਡ੍ਢਂ ਸਮ੍ਪਟਿਚ੍ਛਿਤ੍ਵਾ ਹਤ੍ਥੇਨ ਪਤ੍ਤਂ ਪਿਦਹਿ. ਅਥ ਨਂ ਬ੍ਰਾਹ੍ਮਣੋ ਆਹ – ‘‘ਭਨ੍ਤੇ, ਏਕਪਟਿਵੀਸਮਤ੍ਤੋਵ ਅਯਂ ਪਾਯਸੋ, ਪਰਲੋਕਸਙ੍ਗਹਂ ਮੇ ਕਰੋਥ, ਮਾ ਇਧਲੋਕਸਙ੍ਗਹਂ, ਨਿਰਵਸੇਸਮੇਵ ਦਾਤੁਕਾਮੋਮ੍ਹੀ’’ਤਿ ਸਬ੍ਬਂ ਆਕਿਰਿ. ਥੇਰੋ ਤਤ੍ਥੇਵ ਪਰਿਭੁਞ੍ਜਿ. ਅਥਸ੍ਸ ਭਤ੍ਤਕਿਚ੍ਚਪਰਿਯੋਸਾਨੇ ਤਮ੍ਪਿ ਸਾਟਕਂ ਦਤ੍ਵਾ ਵਨ੍ਦਿਤ੍ਵਾ ਏਵਮਾਹ – ‘‘ਭਨ੍ਤੇ, ਅਹਮ੍ਪਿ ਤੁਮ੍ਹੇਹਿ ਦਿਟ੍ਠਧਮ੍ਮਮੇਵ ਪਾਪੁਣੇਯ੍ਯ’’ਨ੍ਤਿ. ਥੇਰੋ ‘‘ਏਵਂ ਹੋਤੁ ਬ੍ਰਾਹ੍ਮਣਾ’’ਤਿ ਤਸ੍ਸ ਅਨੁਮੋਦਨਂ ਕਤ੍ਵਾ ਉਟ੍ਠਾਯਾਸਨਾ ਪਕ੍ਕਮਨ੍ਤੋ ਅਨੁਪੁਬ੍ਬੇਨ ਚਾਰਿਕਂ ਚਰਨ੍ਤੋ ਜੇਤਵਨਂ ਅਗਮਾਸਿ. ‘‘ਦੁਗ੍ਗਤਕਾਲੇ ਦਿਨ੍ਨਦਾਨਂ ਪਨ ਅਤਿਵਿਯ ਤੋਸੇਤੀ’’ਤਿ ਬ੍ਰਾਹ੍ਮਣੋਪਿ ਤਂ ਦਾਨਂ ਦਤ੍ਵਾ ਪਸਨ੍ਨਚਿਤ੍ਤੋ ਸੋਮਨਸ੍ਸਜਾਤੋ ਥੇਰੇ ਅਧਿਮਤ੍ਤਂ ਸਿਨੇਹਮਕਾਸਿ. ਸੋ ਥੇਰੇ ਸਿਨੇਹੇਨੇਵ ਕਾਲਂ ਕਤ੍ਵਾ ਸਾਵਤ੍ਥਿਯਂ ਥੇਰਸ੍ਸੂਪਟ੍ਠਾਕਕੁਲੇ ਪਟਿਸਨ੍ਧਿਂ ਗਣ੍ਹਿ. ਤਂਖਣੇਯੇਵ ਪਨਸ੍ਸ ਮਾਤਾ ‘‘ਕੁਚ੍ਛਿਯਂ ਮੇ ਗਬ੍ਭੋ ਪਤਿਟ੍ਠਿਤੋ’’ਤਿ ਞਤ੍ਵਾ ਸਾਮਿਕਸ੍ਸ ਆਰੋਚੇਸਿ. ਸੋ ਤਸ੍ਸਾ ਗਬ੍ਭਪਰਿਹਾਰਂ ਅਦਾਸਿ.

ਤਸ੍ਸਾ ਅਚ੍ਚੁਣ੍ਹਅਤਿਸੀਤਅਤਿਅਮ੍ਬਿਲਾਦਿਪਰਿਭੋਗਂ ਵਜ੍ਜੇਤ੍ਵਾ ਸੁਖੇਨ ਗਬ੍ਭਂ ਪਰਿਹਰਿਯਮਾਨਾਯ ਏਵਰੂਪੋ ਦੋਹਲ਼ੋ ਉਪ੍ਪਜ੍ਜਿ ‘‘ਅਹੋ ਵਤਾਹਂ ਸਾਰਿਪੁਤ੍ਤਤ੍ਥੇਰਪ੍ਪਮੁਖਾਨਿ ਪਞ੍ਚ ਭਿਕ੍ਖੁਸਤਾਨਿ ਨਿਮਨ੍ਤੇਤ੍ਵਾ ਗੇਹੇ ਨਿਸੀਦਾਪੇਤ੍ਵਾ ਅਸਮ੍ਭਿਨ੍ਨਖੀਰਪਾਯਸਂ ਦਤ੍ਵਾ ਸਯਮ੍ਪਿ ਕਾਸਾਯਵਤ੍ਥਾਨਿ ਪਰਿਦਹਿਤ੍ਵਾ ਸੁਵਣ੍ਣਸਰਕਂ ਆਦਾਯ ਆਸਨਪਰਿਯਨ੍ਤੇ ਨਿਸੀਦਿਤ੍ਵਾ ਏਤ੍ਤਕਾਨਂ ਭਿਕ੍ਖੂਨਂ ਉਚ੍ਛਿਟ੍ਠਪਾਯਸਂ ਪਰਿਭੁਞ੍ਜੇਯ੍ਯ’’ਨ੍ਤਿ. ਤਸ੍ਸਾ ਕਿਰ ਸੋ ਕਾਸਾਯਵਤ੍ਥਪਰਿਦਹਨੇ ਦੋਹਲ਼ੋ ਕੁਚ੍ਛਿਯਂ ਪੁਤ੍ਤਸ੍ਸ ਬੁਦ੍ਧਸਾਸਨੇ ਪਬ੍ਬਜ੍ਜਾਯ ਪੁਬ੍ਬਨਿਮਿਤ੍ਤਂ ਅਹੋਸਿ. ਅਥਸ੍ਸਾ ਞਾਤਕਾ ‘‘ਧਮ੍ਮਿਕੋ ਨੋ ਧੀਤਾਯ ਦੋਹਲ਼ੋ’’ਤਿ ਸਾਰਿਪੁਤ੍ਤਤ੍ਥੇਰਂ ਸਙ੍ਘਤ੍ਥੇਰਂ ਕਤ੍ਵਾ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਸਮ੍ਭਿਨ੍ਨਖੀਰਪਾਯਸਂ ਅਦਂਸੁ. ਸਾਪਿ ਏਕਂ ਕਾਸਾਵਂ ਨਿਵਾਸੇਤ੍ਵਾ ਏਕਂ ਪਾਰੁਪਿਤ੍ਵਾ ਸੁਵਣ੍ਣਸਰਕਂ ਗਹੇਤ੍ਵਾ ਆਸਨਪਰਿਯਨ੍ਤੇ ਨਿਸਿਨ੍ਨਾ ਉਚ੍ਛਿਟ੍ਠਪਾਯਸਂ ਪਰਿਭੁਞ੍ਜਿ, ਦੋਹਲ਼ੋ ਪਟਿਪ੍ਪਸ੍ਸਮ੍ਭਿ. ਤਸ੍ਸਾ ਯਾਵ ਗਬ੍ਭਵੁਟ੍ਠਾਨਾ ਅਨ੍ਤਰਨ੍ਤਰਾ ਕਤਮਙ੍ਗਲੇਸੁਪਿ, ਦਸਮਾਸਚ੍ਚਯੇਨ ਪੁਤ੍ਤਂ ਵਿਜਾਤਾਯ ਕਤਮਙ੍ਗਲੇਸੁਪਿ ਸਾਰਿਪੁਤ੍ਤਤ੍ਥੇਰਪ੍ਪਮੁਖਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਪ੍ਪੋਦਕਮਧੁਪਾਯਸਮੇਵ ਅਦਂਸੁ. ਪੁਬ੍ਬੇ ਕਿਰੇਸ ਦਾਰਕੇਨ ਬ੍ਰਾਹ੍ਮਣਕਾਲੇ ਦਿਨ੍ਨਪਾਯਸਸ੍ਸ ਨਿਸ੍ਸਨ੍ਦੋ.

ਜਾਤਮਙ੍ਗਲਦਿਵਸੇ ਪਨ ਤਂ ਦਾਰਕਂ ਪਾਤੋਵ ਨ੍ਹਾਪੇਤ੍ਵਾ ਮਣ੍ਡੇਤ੍ਵਾ ਸਿਰਿਸਯਨੇ ਸਤਸਹਸ੍ਸਗ੍ਘਨਿਕਸ੍ਸ ਕਮ੍ਬਲਸ੍ਸ ਉਪਰਿ ਨਿਪਜ੍ਜਾਪੇਸੁਂ. ਸੋ ਤਤ੍ਥ ਨਿਪਨ੍ਨਕੋਵ ਥੇਰਂ ਓਲੋਕੇਤ੍ਵਾ ‘‘ਅਯਂ ਮੇ ਪੁਬ੍ਬਾਚਰਿਯੋ, ਮਯਾ ਥੇਰਂ ਨਿਸ੍ਸਾਯ ਅਯਂ ਸਮ੍ਪਤ੍ਤਿ ਲਦ੍ਧਾ, ਮਯਾ ਇਮਸ੍ਸ ਏਕਂ ਪਰਿਚ੍ਚਾਗਂ ਕਾਤੁਂ ਵਟ੍ਟਤੀ’’ਤਿ ਸਿਕ੍ਖਾਪਦਗਹਣਤ੍ਥਾਯ ਆਨੀਯਮਾਨੋ ਤਂ ਕਮ੍ਬਲਂ ਚੂਲ਼ਙ੍ਗੁਲਿਯਾ ਵੇਠੇਤ੍ਵਾ ਅਗ੍ਗਹੇਸਿ. ਅਥਸ੍ਸ ‘‘ਅਙ੍ਗੁਲਿਯਂ ਕਮ੍ਬਲੋ ਲਗ੍ਗੋ’’ਤਿ ਤੇ ਤਂ ਹਰਿਤੁਂ ਆਰਭਿਂਸੁ. ਸੋ ਪਰੋਦਿ. ਞਾਤਕਾ ‘‘ਅਪੇਥ, ਮਾ ਦਾਰਕਂ ਰੋਦਾਪੇਥਾ’’ਤਿ ਕਮ੍ਬਲੇਨੇਵ ਸਦ੍ਧਿਂ ਆਨਯਿਂਸੁ. ਸੋ ਥੇਰਂ ਵਨ੍ਦਨਕਾਲੇ ਕਮ੍ਬਲਤੋ ਅਙ੍ਗੁਲਿਂ ਅਪਕਡ੍ਢਿਤ੍ਵਾ ਕਮ੍ਬਲਂ ਥੇਰਸ੍ਸ ਪਾਦਮੂਲੇ ਪਾਤੇਸਿ. ਞਾਤਕਾ ‘‘ਦਹਰਕੁਮਾਰੇਨ ਅਜਾਨਿਤ੍ਵਾ ਕਤ’’ਨ੍ਤਿ ਅਵਤ੍ਵਾ ‘‘ਪੁਤ੍ਤੇਨ ਨੋ ਦਿਨ੍ਨਂ, ਪਰਿਚ੍ਚਤ੍ਤਮੇਵ ਹੋਤੁ, ਭਨ੍ਤੇ’’ਤਿ ਵਤ੍ਵਾ, ‘‘ਭਨ੍ਤੇ, ਸਤਸਹਸ੍ਸਗ੍ਘਨਿਕੇਨ ਕਮ੍ਬਲੇਨ ਪੂਜਾਕਾਰਕਸ੍ਸ ਤੁਮ੍ਹਾਕਂ ਦਾਸਸ੍ਸ ਸਿਕ੍ਖਾਪਦਾਨਿ ਦੇਥਾ’’ਤਿ ਆਹਂਸੁ. ‘‘ਕੋ ਨਾਮੋ ਅਯਂ ਦਾਰਕੋ’’ਤਿ? ‘‘ਭਨ੍ਤੇ, ਅਯ੍ਯੇਨ ਸਮਾਨਨਾਮਕੋ, ਤਿਸ੍ਸੋ ਨਾਮੇਸ ਭਵਿਸ੍ਸਤੀ’’ਤਿ. ਥੇਰੋ ਕਿਰ ਗਿਹਿਕਾਲੇ ਉਪਤਿਸ੍ਸਮਾਣਵੋ ਨਾਮ ਅਹੋਸਿ. ਮਾਤਾਪਿਸ੍ਸ ਚਿਨ੍ਤੇਸਿ – ‘‘ਨ ਮਯਾ ਪੁਤ੍ਤਸ੍ਸ ਅਜ੍ਝਾਸਯੋ ਭਿਨ੍ਦਿਤਬ੍ਬੋ’’ਤਿ. ਏਵਂ ਦਾਰਕਸ੍ਸ ਨਾਮਕਰਣਮਙ੍ਗਲਂ ਕਤ੍ਵਾ ਪੁਨ ਤਸ੍ਸ ਆਹਾਰਪਰਿਭੋਗਮਙ੍ਗਲੇਪਿ ਪੁਨ ਤਸ੍ਸ ਕਣ੍ਣਵਿਜ੍ਝਨਮਙ੍ਗਲੇਪਿ ਦੁਸ੍ਸਗਹਣਮਙ੍ਗਲੇਪਿ ਚੂਲ਼ਾਕਪ੍ਪਨਮਙ੍ਗਲੇਪਿ ਸਾਰਿਪੁਤ੍ਤਤ੍ਥੇਰਪ੍ਪਮੁਖਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਪ੍ਪੋਦਕਮਧੁਪਾਯਸਮੇਵ ਅਦਂਸੁ.

ਦਾਰਕੋ ਵੁਦ੍ਧਿਮਨ੍ਵਾਯ ਸਤ੍ਤਵਸ੍ਸਿਕਕਾਲੇ ਮਾਤਰਂ ਆਹ – ‘‘ਅਮ੍ਮ, ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ. ‘‘ਸਾਧੁ, ਤਾਤ, ਪੁਬ੍ਬੇਵਾਹਂ ‘ਨ ਮਯਾ ਪੁਤ੍ਤਸ੍ਸ ਅਜ੍ਝਾਸਯੋ ਭਿਨ੍ਦਿਤਬ੍ਬੋ’ਤਿ ਮਨਂ ਅਕਾਸਿਂ, ਪਬ੍ਬਜ, ਪੁਤ੍ਤਾ’’ਤਿ ਥੇਰਂ ਨਿਮਨ੍ਤਾਪੇਤ੍ਵਾ ਤਸ੍ਸ ਆਗਤਸ੍ਸ ਭਿਕ੍ਖਞ੍ਚ ਦਤ੍ਵਾ, ‘‘ਭਨ੍ਤੇ, ਤੁਮ੍ਹਾਕਂ ਦਾਸੋ ‘ਪਬ੍ਬਜਿਸ੍ਸਾਮੀ’ਤਿ ਵਦਤਿ, ਇਮਂ ਆਦਾਯ ਸਾਯਂ ਵਿਹਾਰਂ ਆਗਮਿਸ੍ਸਾਮਾ’’ਤਿ ਥੇਰਂ ਉਯ੍ਯੋਜੇਤ੍ਵਾ ਸਾਯਨ੍ਹਸਮਯੇ ਮਹਨ੍ਤੇਨ ਸਕ੍ਕਾਰਸਮ੍ਮਾਨੇਨ ਪੁਤ੍ਤਂ ਆਦਾਯ ਵਿਹਾਰਂ ਗਨ੍ਤ੍ਵਾ ਥੇਰਸ੍ਸ ਨਿਯ੍ਯਾਦੇਸਿ. ਥੇਰੋ ਤੇਨ ਸਦ੍ਧਿਂ ਕਥੇਸਿ – ‘‘ਤਿਸ੍ਸ, ਪਬ੍ਬਜ੍ਜਾ ਨਾਮ ਦੁਕ੍ਕਰਾ, ਉਣ੍ਹੇਨ ਅਤ੍ਥੇ ਸਤਿ ਸੀਤਂ ਲਭਤਿ, ਸੀਤੇਨ ਅਤ੍ਥੇ ਸਤਿ ਉਣ੍ਹਂ ਲਭਤਿ, ਪਬ੍ਬਜਿਤਾ ਕਿਚ੍ਛੇਨ ਜੀਵਨ੍ਤਿ, ਤ੍ਵਞ੍ਚ ਸੁਖੇਧਿਤੋ’’ਤਿ. ‘‘ਭਨ੍ਤੇ, ਅਹਂ ਤੁਮ੍ਹੇਹਿ ਵੁਤ੍ਤਨਿਯਾਮੇਨੇਵ ਸਬ੍ਬਂ ਕਾਤੁਂ ਸਕ੍ਖਿਸ੍ਸਾਮੀ’’ਤਿ. ਥੇਰੋ ‘‘ਸਾਧੂ’’ਤਿ ਵਤ੍ਵਾ ਤਸ੍ਸ ਪਟਿਕੂਲਮਨਸਿਕਾਰਵਸੇਨ ਤਚਪਞ੍ਚਕਕਮ੍ਮਟ੍ਠਾਨਂ ਆਚਿਕ੍ਖਿਤ੍ਵਾ ਤਂ ਪਬ੍ਬਾਜੇਸਿ. ਸਕਲਮ੍ਪਿ ਹਿ ਦ੍ਵਤ੍ਤਿਂਸਾਕਾਰਂ ਕਥੇਤੁਂ ਵਟ੍ਟਤਿਯੇਵ. ਸਬ੍ਬਂ ਕਥੇਤੁਂ ਅਸਕ੍ਕੋਨ੍ਤੇਨ ਪਨ ਤਚਪਞ੍ਚਕਕਮ੍ਮਟ੍ਠਾਨਂ ਕਥੇਤਬ੍ਬਮੇਵ. ਇਦਞ੍ਹਿ ਕਮ੍ਮਟ੍ਠਾਨਂ ਸਬ੍ਬਬੁਦ੍ਧਾਨਂ ਅਵਿਜਹਿਤਮੇਵ. ਕੇਸਾਦੀਸੁ ਏਕੇਕਕੋਟ੍ਠਾਸੇਸੁ ਅਰਹਤ੍ਤਂ ਪਤ੍ਤਾਨਂ ਭਿਕ੍ਖੂਨਮ੍ਪਿ ਭਿਕ੍ਖੁਨੀਨਮ੍ਪਿ ਉਪਾਸਕਾਨਮ੍ਪਿ ਉਪਾਸਿਕਾਨਮ੍ਪਿ ਪਰਿਚ੍ਛੇਦੋ ਨਤ੍ਥਿ. ਅਬ੍ਯਤ੍ਤਾ ਭਿਕ੍ਖੂ ਪਨ ਪਬ੍ਬਜੇਨ੍ਤਾ ਅਰਹਤ੍ਤਸ੍ਸੂਪਨਿਸ੍ਸਯਂ ਨਾਸੇਨ੍ਤਿ. ਤਸ੍ਮਾ ਥੇਰੋ ਕਮ੍ਮਟ੍ਠਾਨਂ ਆਚਿਕ੍ਖਿਤ੍ਵਾ ਪਬ੍ਬਾਜੇਤ੍ਵਾ ਦਸਸੁ ਸੀਲੇਸੁ ਪਤਿਟ੍ਠਾਪੇਸਿ.

ਮਾਤਾਪਿਤਰੋ ਪੁਤ੍ਤਸ੍ਸ ਪਬ੍ਬਜਿਤਸਕ੍ਕਾਰਂ ਕਰੋਨ੍ਤਾ ਸਤ੍ਤਾਹਂ ਵਿਹਾਰੇਯੇਵ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਅਪ੍ਪੋਦਕਮਧੁਪਾਯਸਮੇਵ ਅਦਂਸੁ. ਭਿਕ੍ਖੂਪਿ ‘‘ਨਿਬਦ੍ਧਂ ਅਪ੍ਪੋਦਕਮਧੁਪਾਯਸਂ ਪਰਿਭੁਞ੍ਜਿਤੁਂ ਨ ਸਕ੍ਕੋਮਾ’’ਤਿ ਉਜ੍ਝਾਯਿਂਸੁ. ਤਸ੍ਸਪਿ ਮਾਤਾਪਿਤਰੋ ਸਤ੍ਤਮੇ ਦਿਵਸੇ ਸਾਯਂ ਗੇਹਂ ਅਗਮਂਸੁ. ਸਾਮਣੇਰੋ ਅਟ੍ਠਮੇ ਦਿਵਸੇ ਭਿਕ੍ਖੂਹਿ ਸਦ੍ਧਿਂ ਪਿਣ੍ਡਾਯ ਪਾਵਿਸਿ. ਸਾਵਤ੍ਥਿਵਾਸਿਨੋ ‘‘ਸਾਮਣੇਰੋ ਕਿਰ ਅਜ੍ਜ ਪਿਣ੍ਡਾਯ ਪਵਿਸਿਸ੍ਸਤਿ, ਸਕ੍ਕਾਰਮਸ੍ਸ ਕਰਿਸ੍ਸਾਮਾ’’ਤਿ ਪਞ੍ਚਹਿ ਸਾਟਕਸਤੇਹਿ ਚੁਮ੍ਬਟਕਾਨਿ ਕਤ੍ਵਾ ਪਞ੍ਚ ਪਿਣ੍ਡਪਾਤਸਤਾਨਿ ਸਜ੍ਜੇਤ੍ਵਾ ਆਦਾਯ ਪਟਿਪਥੇ ਠਤ੍ਵਾ ਅਦਂਸੁ, ਪੁਨਦਿਵਸੇ ਵਿਹਾਰਸ੍ਸ ਉਪਵਨਂ ਆਗਨ੍ਤ੍ਵਾ ਅਦਂਸੁ. ਏਵਂ ਸਾਮਣੇਰੋ ਦ੍ਵੀਹੇਵ ਦਿਵਸੇਹਿ ਸਾਟਕਸਹਸ੍ਸੇਹਿ ਸਦ੍ਧਿਂ ਪਿਣ੍ਡਪਾਤਸਹਸ੍ਸਂ ਲਭਿਤ੍ਵਾ ਭਿਕ੍ਖੁਸਙ੍ਘਸ੍ਸ ਦਾਪੇਸਿ. ਬ੍ਰਾਹ੍ਮਣਕਾਲੇ ਦਿਨ੍ਨਥੂਲਸਾਟਕਸ੍ਸ ਕਿਰੇਸ ਨਿਸ੍ਸਨ੍ਦੋ. ਅਥਸ੍ਸ ਭਿਕ੍ਖੂ ‘‘ਪਿਣ੍ਡਪਾਤਦਾਯਕਤਿਸ੍ਸੋ’’ਤਿ ਨਾਮਂ ਕਰਿਂਸੁ.

ਪੁਨੇਕਦਿਵਸਂ ਸਾਮਣੇਰੋ ਸੀਤਕਾਲੇ ਵਿਹਾਰਚਾਰਿਕਂ ਚਰਨ੍ਤੋ ਭਿਕ੍ਖੂ ਤਤ੍ਥ ਤਤ੍ਥ ਅਗ੍ਗਿਸਾਲਾਦੀਸੁ ਵਿਸਿਬ੍ਬੇਨ੍ਤੇ ਦਿਸ੍ਵਾ ਆਹ – ‘‘ਕਿਂ, ਭਨ੍ਤੇ, ਵਿਸਿਬ੍ਬੇਨ੍ਤਾ ਨਿਸਿਨ੍ਨਾਤ੍ਥਾ’’ਤਿ? ‘‘ਸੀਤਂ ਨੋ ਪੀਲ਼ੇਤਿ ਸਾਮਣੇਰੋ’’ਤਿ. ‘‘ਭਨ੍ਤੇ, ਸੀਤਕਾਲੇ ਨਾਮ ਕਮ੍ਬਲਂ ਪਾਰੁਪਿਤੁਂ ਵਟ੍ਟਤਿ. ਸੋ ਹਿ ਸੀਤਂ ਪਟਿਬਾਹਿਤੁਂ ਸਮਤ੍ਥੋ’’ਤਿ. ਸਾਮਣੇਰ ‘‘ਤ੍ਵਂ ਮਹਾਪੁਞ੍ਞੋ ਕਮ੍ਬਲਂ ਲਭੇਯ੍ਯਾਸਿ, ਅਮ੍ਹਾਕਂ ਕੁਤੋ ਕਮ੍ਬਲੋ’’ਤਿ. ‘‘ਤੇਨ ਹਿ, ਭਨ੍ਤੇ, ਕਮ੍ਬਲਤ੍ਥਿਕਾ ਮਯਾ ਸਦ੍ਧਿਂ ਆਗਚ੍ਛਨ੍ਤੂ’’ਤਿ ਸਕਲਵਿਹਾਰੇ ਆਰੋਚਾਪੇਸਿ. ਅਥ ਭਿਕ੍ਖੂ ‘‘ਸਾਮਣੇਰੇਨ ਸਦ੍ਧਿਂ ਗਨ੍ਤ੍ਵਾ ਕਮ੍ਬਲਂ ਆਹਰਿਸ੍ਸਾਮਾ’’ਤਿ ਸਤ੍ਤਵਸ੍ਸਿਕਸਾਮਣੇਰਂ ਨਿਸ੍ਸਾਯ ਸਹਸ੍ਸਮਤ੍ਤਾ ਭਿਕ੍ਖੂ ਨਿਕ੍ਖਮਿਂਸੁ. ਸੋ ‘‘ਏਤ੍ਤਕਾਨਂ ਭਿਕ੍ਖੂਨਂ ਕੁਤੋ ਕਮ੍ਬਲਂ ਲਭਿਸ੍ਸਾਮੀ’’ਤਿ ਚਿਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ ਤੇ ਆਦਾਯ ਨਗਰਾਭਿਮੁਖੋ ਪਾਯਾਸਿ. ਸੁਦਿਨ੍ਨਸ੍ਸ ਹਿ ਦਾਨਸ੍ਸ ਏਵਰੂਪੋ ਆਨੁਭਾਵੋ ਹੋਤਿ. ਸੋ ਬਹਿਨਗਰੇਯੇਵ ਘਰਪਟਿਪਾਟਿਯਾ ਚਰਨ੍ਤੋ ਪਞ੍ਚ ਕਮ੍ਬਲਸਤਾਨਿ ਲਭਿਤ੍ਵਾ ਅਨ੍ਤੋਨਗਰਂ ਪਾਵਿਸਿ. ਮਨੁਸ੍ਸਾ ਇਤੋ ਚਿਤੋ ਚ ਕਮ੍ਬਲੇ ਆਹਰਨ੍ਤਿ.

ਏਕੋ ਪਨ ਪੁਰਿਸੋ ਆਪਣਦ੍ਵਾਰੇਨ ਆਗਚ੍ਛਨ੍ਤੋ ਪਞ੍ਚ ਕਮ੍ਬਲਸਤਾਨਿ ਪਸਾਰੇਤ੍ਵਾ ਨਿਸਿਨ੍ਨਂ ਏਕਂ ਆਪਣਿਕਂ ਦਿਸ੍ਵਾ ਆਹ – ‘‘ਅਮ੍ਭੋ, ਏਕੋ ਸਾਮਣੇਰੋ ਕਮ੍ਬਲੇ ਸਂਹਰਨ੍ਤੋ ਆਗਚ੍ਛਤਿ, ਤਵ ਕਮ੍ਬਲੇ ਪਟਿਚ੍ਛਾਦੇਹੀ’’ਤਿ? ‘‘ਕਿਂ ਪਨ ਸੋ ਦਿਨ੍ਨਕੇ ਗਣ੍ਹਾਤਿ, ਉਦਾਹੁ ਅਦਿਨ੍ਨਕੇ’’ਤਿ? ‘‘ਦਿਨ੍ਨਕੇ ਗਣ੍ਹਾਤੀ’’ਤਿ. ‘‘ਏਵਂ ਸਨ੍ਤੇ ਸਚੇ ਇਚ੍ਛਾਮਿ, ਦਸ੍ਸਾਮਿ, ਨੋ ਚੇ, ਨ ਦਸ੍ਸਾਮਿ, ਗਚ੍ਛ ਤ੍ਵ’’ਨ੍ਤਿ ਉਯ੍ਯੋਜੇਸਿ. ਮਚ੍ਛਰਿਨੋ ਹਿ ਅਨ੍ਧਬਾਲਾ ਏਵਰੂਪੇਸੁ ਦਾਨਂ ਦਦਮਾਨੇਸੁ ਮਚ੍ਛਰਾਯਿਤ੍ਵਾ ਅਸਦਿਸਦਾਨਂ ਦਿਸ੍ਵਾ ਮਚ੍ਛਰਾਯਨ੍ਤੋ ਕਾਲ਼ੋ (ਧ. ਪ. ੧੭੭) ਵਿਯ ਨਿਰਯੇ ਨਿਬ੍ਬਤ੍ਤਨ੍ਤਿ. ਆਪਣਿਕੋ ਚਿਨ੍ਤੇਸਿ – ‘‘ਅਯਂ ਪੁਰਿਸੋ ਅਤ੍ਤਨੋ ਧਮ੍ਮਤਾਯ ਆਗਚ੍ਛਮਾਨੋ ‘ਤਵ ਕਮ੍ਬਲੇ ਪਟਿਚ੍ਛਾਦੇਹੀ’ਤਿ ਮਂ ਆਹ. ‘ਸਚੇਪਿ ਸੋ ਦਿਨ੍ਨਕਂ ਗਣ੍ਹਾ’ਤਿ, ਅਹਂ ਪਨ ‘ਮਮ ਸਨ੍ਤਕਂ ਸਚੇ ਇਚ੍ਛਾਮਿ, ਦਸ੍ਸਾਮਿ, ਨੋ ਚੇ, ਨ ਦਸ੍ਸਾਮੀ’ਤਿ ਅਵਚਂ, ਦਿਟ੍ਠਕਂ ਪਨ ਅਦੇਨ੍ਤਸ੍ਸ ਲਜ੍ਜਾ ਉਪ੍ਪਜ੍ਜਤਿ, ਅਤ੍ਤਨੋ ਸਨ੍ਤਕਂ ਪਟਿਚ੍ਛਾਦੇਨ੍ਤਸ੍ਸ ਦੋਸੋ ਨਤ੍ਥਿ, ਇਮੇਸੁ ਪਞ੍ਚਕਮ੍ਬਲਸਤੇਸੁ ਦ੍ਵੇ ਕਮ੍ਬਲਾਨਿ ਸਤਸਹਸ੍ਸਗ੍ਘਨਿਕਾਨਿ, ਇਮਾਨੇਵ ਪਟਿਚ੍ਛਾਦੇਤੁਂ ਵਟ੍ਟਤੀ’’ਤਿ. ਦ੍ਵੇਪਿ ਕਮ੍ਬਲੇ ਦਸਾਯ ਦਸਂ ਸਮ੍ਬਨ੍ਧਿਤ੍ਵਾ ਤੇਸਂ ਅਨ੍ਤਰੇ ਪਕ੍ਖਿਪਿਤ੍ਵਾ ਪਟਿਚ੍ਛਾਦੇਸਿ. ਸਾਮਣੇਰੋਪਿ ਭਿਕ੍ਖੁਸਹਸ੍ਸੇਨ ਸਦ੍ਧਿਂ ਤਂ ਪਦੇਸਂ ਪਾਪੁਣਿ. ਆਪਣਿਕਸ੍ਸ ਸਾਮਣੇਰਂ ਦਿਸ੍ਵਾਵ ਪੁਤ੍ਤਸਿਨੇਹੋ ਉਪ੍ਪਜ੍ਜਿ, ਸਕਲਸਰੀਰਂ ਸਿਨੇਹੇਨ ਪਰਿਪੁਣ੍ਣਂ ਅਹੋਸਿ. ਸੋ ਚਿਨ੍ਤੇਸਿ – ‘‘ਤਿਟ੍ਠਤੁ ਕਮ੍ਬਲਾਨਿ, ਇਮਂ ਦਿਸ੍ਵਾ ਹਦਯਮਂਸਮ੍ਪਿ ਦਾਤੁਂ ਯੁਤ੍ਤ’’ਨ੍ਤਿ. ਤੇ ਦ੍ਵੇਪਿ ਕਮ੍ਬਲੇ ਨੀਹਰਿਤ੍ਵਾ ਸਾਮਣੇਰਸ੍ਸ ਪਾਦਮੂਲੇ ਠਪੇਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਤਯਾ ਦਿਟ੍ਠਧਮ੍ਮਸ੍ਸ ਭਾਗੀ ਅਸ੍ਸ’’ਨ੍ਤਿ ਅਵਚ. ਸੋਪਿਸ੍ਸ ‘‘ਏਵਂ ਹੋਤੂ’’ਤਿ ਅਨੁਮੋਦਨਂ ਅਕਾਸਿ.

ਸਾਮਣੇਰੋ ਅਨ੍ਤੋਨਗਰੇਪਿ ਪਞ੍ਚ ਕਮ੍ਬਲਸਤਾਨਿ ਲਭਿ. ਏਵਂ ਏਕਦਿਵਸਂਯੇਵ ਕਮ੍ਬਲਸਹਸ੍ਸਂ ਲਭਿਤ੍ਵਾ ਭਿਕ੍ਖੁਸਹਸ੍ਸਸ੍ਸ ਅਦਾਸਿ. ਅਥਸ੍ਸ ਕਮ੍ਬਲਦਾਯਕਤਿਸ੍ਸਤ੍ਥੇਰੋਤਿ ਨਾਮਂ ਕਰਿਂਸੁ. ਏਵਂ ਨਾਮਕਰਣਦਿਵਸੇ ਦਿਨ੍ਨਕਮ੍ਬਲੋ ਸਤ੍ਤਵਸ੍ਸਿਕਕਾਲੇ ਕਮ੍ਬਲਸਹਸ੍ਸਭਾਵਂ ਪਾਪੁਣਿ. ਬੁਦ੍ਧਸਾਸਨਞ੍ਹਿ ਠਪੇਤ੍ਵਾ ਨਤ੍ਥਞ੍ਞਂ ਤਂ ਠਾਨਂ, ਯਤ੍ਥ ਅਪ੍ਪਂ ਦਿਨ੍ਨਂ ਬਹੁਂ ਹੋਤਿ, ਬਹੁਂ ਦਿਨ੍ਨਂ ਬਹੁਤਰਂ. ਤੇਨਾਹ ਭਗਵਾ –

‘‘ਤਥਾਰੂਪੋਯਂ, ਭਿਕ੍ਖਵੇ, ਭਿਕ੍ਖੁਸਙ੍ਘੋ, ਯਥਾਰੂਪੇ ਭਿਕ੍ਖੁਸਙ੍ਘੇ ਅਪ੍ਪਂ ਦਿਨ੍ਨਂ ਬਹੁਂ ਹੋਤਿ, ਬਹੁਂ ਦਿਨ੍ਨਂ ਬਹੁਤਰ’’ਨ੍ਤਿ (ਮ. ਨਿ. ੩.੧੪੬) –

ਏਵਂ ਸਾਮਣੇਰੋ ਏਕਕਮ੍ਬਲਸ੍ਸ ਨਿਸ੍ਸਨ੍ਦੇਨ ਸਤ੍ਤਵਸ੍ਸਿਕੋਵ ਕਮ੍ਬਲਸਹਸ੍ਸਂ ਲਭਿ. ਤਸ੍ਸ ਜੇਤਵਨੇ ਵਿਹਰਨ੍ਤਸ੍ਸ ਅਭਿਕ੍ਖਣਂ ਞਾਤਿਦਾਯਕਾ ਸਨ੍ਤਿਕਂ ਆਗਨ੍ਤ੍ਵਾ ਕਥਾਸਲ੍ਲਾਪਂ ਕਰੋਨ੍ਤਿ. ਸੋ ਚਿਨ੍ਤੇਸਿ – ‘‘ਮਯਾ ਇਧ ਵਸਨ੍ਤੇਨ ਞਾਤਿਦਾਯਕੇਸੁ ਆਗਨ੍ਤ੍ਵਾ ਕਥੇਨ੍ਤੇਸੁ ਅਕਥੇਤੁਮ੍ਪਿ ਨ ਸਕ੍ਕਾ, ਏਤੇਹਿ ਸਦ੍ਧਿਂ ਕਥਾਪਪਞ੍ਚੇਨ ਅਤ੍ਤਨੋ ਪਤਿਟ੍ਠਂ ਕਾਤੁਂ ਨ ਸਕ੍ਕਾ, ਯਂਨੂਨਾਹਂ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਉਗ੍ਗਣ੍ਹਿਤ੍ਵਾ ਅਰਞ੍ਞਂ ਪਵਿਸੇਯ੍ਯ’’ਨ੍ਤਿ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਉਪਜ੍ਝਾਯਂ ਵਨ੍ਦਿਤ੍ਵਾ ਪਤ੍ਤਚੀਵਰਮਾਦਾਯ ਵਿਹਾਰਾ ਨਿਕ੍ਖਮਿਤ੍ਵਾ ‘‘ਸਚੇ ਆਸਨ੍ਨਟ੍ਠਾਨੇ ਵਸਿਸ੍ਸਾਮਿ, ਞਾਤਕਾ ਮਂ ਪਕ੍ਕੋਸਿਸ੍ਸਨ੍ਤੀ’’ਤਿ ਵੀਸਤਿ ਯੋਜਨਸਤਂ ਮਗ੍ਗਂ ਅਗਮਾਸਿ. ਅਥੇਕੇਨ ਗਾਮਦ੍ਵਾਰੇਨ ਗਚ੍ਛਨ੍ਤੋ ਏਕਂ ਮਹਲ੍ਲਕਪੁਰਿਸਂ ਦਿਸ੍ਵਾ ਪੁਚ੍ਛਿ – ‘‘ਕਿਂ ਨੁ ਖੋ, ਮਹਾਉਪਾਸਕ, ਇਮਸ੍ਮਿਂ ਪਦੇਸੇ ਵਸਨ੍ਤਾਨਂ ਆਰਞ੍ਞਕਵਿਹਾਰੋ ਅਤ੍ਥੀ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਤੇਨ ਹਿ ਮੇ ਮਗ੍ਗਂ ਆਚਿਕ੍ਖਾਹੀ’’ਤਿ. ਮਹਲ੍ਲਕਉਪਾਸਕਸ੍ਸ ਪਨ ਤਂ ਦਿਸ੍ਵਾਵ ਪੁਤ੍ਤਸਿਨੇਹੋ ਉਦਪਾਦਿ. ਅਥਸ੍ਸ ਤਤ੍ਥੇਵ ਠਿਤੋ ਅਨਾਚਿਕ੍ਖਿਤ੍ਵਾ ‘‘ਏਹਿ, ਭਨ੍ਤੇ, ਆਚਿਕ੍ਖਿਸ੍ਸਾਮਿ ਤੇ’’ਤਿ ਗਹੇਤ੍ਵਾ ਅਗਮਾਸਿ. ਸਾਮਣੇਰੋ ਤੇਨ ਸਦ੍ਧਿਂ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਨਾਨਾਪੁਪ੍ਫਫਲਪਟਿਮਣ੍ਡਿਤੇ ਰੁਕ੍ਖਪਬ੍ਬਤਪਦੇਸੇ ਦਿਸ੍ਵਾ ‘‘ਅਯਂ, ਉਪਾਸਕ, ਕਿਂ ਪਦੇਸੋ ਨਾਮ, ਅਯਂ ਉਪਾਸਕ ਕਿਂ ਪਦੇਸੋ ਨਾਮਾ’’ਤਿ ਪੁਚ੍ਛਿ. ਸੋਪਿਸ੍ਸ ਤੇਸਂ ਨਾਮਾਨਿ ਆਚਿਕ੍ਖਨ੍ਤੋ ਆਰਞ੍ਞਕਵਿਹਾਰਂ ਪਤ੍ਵਾ ‘‘ਇਦਂ, ਭਨ੍ਤੇ, ਫਾਸੁਕਟ੍ਠਾਨਂ, ਇਧੇਵ ਵਸਾਹੀ’’ਤਿ ਵਤ੍ਵਾ, ‘‘ਭਨ੍ਤੇ, ਕੋ ਨਾਮੋ ਤ੍ਵ’’ਨ੍ਤਿ ਨਾਮਂ ਪੁਚ੍ਛਿਤ੍ਵਾ ‘‘ਅਹਂ ਵਨਵਾਸੀਤਿਸ੍ਸੋ ਨਾਮ ਉਪਾਸਕਾ’’ਤਿ ਵੁਤ੍ਤੇ, ‘‘ਸ੍ਵੇ ਅਮ੍ਹਾਕਂ ਗਾਮੇ ਭਿਕ੍ਖਾਯ ਚਰਿਤੁਂ ਵਟ੍ਟਤੀ’’ਤਿ ਵਤ੍ਵਾ ਨਿਵਤ੍ਤਿਤ੍ਵਾ ਅਨ੍ਤੋਗਾਮਮੇਵ ਗਤੋ. ‘‘ਵਨਵਾਸੀਤਿਸ੍ਸੋ ਨਾਮ ਵਿਹਾਰਂ ਆਗਤੋ, ਤਸ੍ਸ ਯਾਗੁਭਤ੍ਤਾਦੀਨਿ ਪਟਿਯਾਦੇਥਾ’’ਤਿ ਮਨੁਸ੍ਸਾਨਂ ਆਰੋਚੇਸਿ.

ਸਾਮਣੇਰੋ ਪਠਮਮੇਵ ਤਿਸ੍ਸੋ ਨਾਮ ਹੁਤ੍ਵਾ ਤਤੋ ਪਿਣ੍ਡਪਾਤਦਾਯਕਤਿਸ੍ਸੋ ਕਮ੍ਬਲਦਾਯਕਤਿਸ੍ਸੋ ਵਨਵਾਸੀਤਿਸ੍ਸੋਤਿ ਤੀਣਿ ਨਾਮਾਨਿ ਲਭਿਤ੍ਵਾ ਸਤ੍ਤਵਸ੍ਸਬ੍ਭਨ੍ਤਰੇ ਚਤ੍ਤਾਰਿ ਨਾਮਾਨਿ ਲਭਿ. ਸੋ ਪੁਨਦਿਵਸੇ ਪਾਤੋਵ ਤਂ ਗਾਮਂ ਪਿਣ੍ਡਾਯ ਪਾਵਿਸਿ. ਮਨੁਸ੍ਸਾ ਭਿਕ੍ਖਂ ਦਤ੍ਵਾ ਵਨ੍ਦਿਂਸੁ. ਸਾਮਣੇਰੋ ‘‘ਸੁਖਿਤਾ ਹੋਥ, ਦੁਕ੍ਖਾ ਮੁਚ੍ਚਥਾ’’ਤਿ ਆਹ. ਏਕਮਨੁਸ੍ਸੋਪਿ ਤਸ੍ਸ ਭਿਕ੍ਖਂ ਦਤ੍ਵਾ ਪੁਨ ਗੇਹਂ ਗਨ੍ਤੁਂ ਨਾਸਕ੍ਖਿ, ਸਬ੍ਬੇਵ ਓਲੋਕੇਨ੍ਤਾ ਅਟ੍ਠਂਸੁ. ਸੋਪਿ ਅਤ੍ਤਨੋ ਯਾਪਨਮਤ੍ਤਮੇਵ ਗਣ੍ਹਿ. ਸਕਲਗਾਮਵਾਸਿਨੋ ਤਸ੍ਸ ਪਾਦਮੂਲੇ ਉਰੇਨ ਨਿਪਜ੍ਜਿਤ੍ਵਾ, ‘‘ਭਨ੍ਤੇ, ਤੁਮ੍ਹੇਸੁ ਇਮਂ ਤੇਮਾਸਂ ਇਧ ਵਸਨ੍ਤੇਸੁ ਮਯਂ ਤੀਣਿ ਸਰਣਾਨਿ ਗਹੇਤ੍ਵਾ ਪਞ੍ਚਸੁ ਸੀਲੇਸੁ ਪਤਿਟ੍ਠਾਯ ਮਾਸਸ੍ਸ ਅਟ੍ਠ ਉਪੋਸਥਕਮ੍ਮਾਨਿ ਉਪਵਸਿਸ੍ਸਾਮ, ਇਧ ਵਸਨਤ੍ਥਾਯ ਨੋ ਪਟਿਞ੍ਞਂ ਦੇਥਾ’’ਤਿ. ਸੋ ਉਪਕਾਰਂ ਸਲ੍ਲਕ੍ਖੇਤ੍ਵਾ ਤੇਸਂ ਪਟਿਞ੍ਞਂ ਦਤ੍ਵਾ ਨਿਬਦ੍ਧਂ ਤਤ੍ਥੇਵ ਪਿਣ੍ਡਪਾਤਚਾਰਂ ਚਰਿ. ਵਨ੍ਦਿਤਵਨ੍ਦਿਤਕ੍ਖਣੇ ਚ ‘‘ਸੁਖਿਤਾ ਹੋਥ, ਦੁਕ੍ਖਾ ਮੁਚ੍ਚਥਾ’’ਤਿ ਪਦਦ੍ਵਯਮੇਵ ਕਥੇਤ੍ਵਾ ਪਕ੍ਕਾਮਿ. ਸੋ ਤਤ੍ਥੇਵਪਠਮਮਾਸਞ੍ਚ ਦੁਤਿਯਮਾਸਞ੍ਚ ਵੀਤਿਨਾਮੇਤ੍ਵਾ ਤਤਿਯਮਾਸੇ ਗਚ੍ਛਨ੍ਤੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

ਅਥਸ੍ਸ ਪਵਾਰੇਤ੍ਵਾ ਵੁਟ੍ਠਵਸ੍ਸਕਾਲੇ ਉਪਜ੍ਝਾਯੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਆਹ – ‘‘ਅਹਂ, ਭਨ੍ਤੇ, ਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ ਗਚ੍ਛਾਮੀ’’ਤਿ. ‘‘ਗਚ੍ਛ, ਸਾਰਿਪੁਤ੍ਤਾ’’ਤਿ. ਸੋ ਅਤ੍ਤਨੋ ਪਰਿਵਾਰੇ ਪਞ੍ਚਸਤੇ ਭਿਕ੍ਖੂ ਆਦਾਯ ਪਕ੍ਕਨ੍ਤੋ, ‘‘ਆਵੁਸੋ ਮੋਗ੍ਗਲ੍ਲਾਨ, ਅਹਂ ਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ ਗਚ੍ਛਾਮੀ’’ਤਿ ਆਹ. ਮਹਾਮੋਗ੍ਗਲ੍ਲਾਨਤ੍ਥੇਰੋ ‘‘ਅਹਮ੍ਪਿ, ਆਵੁਸੋ, ਗਚ੍ਛਾਮੀ’’ਤਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਨਿਕ੍ਖਮਿ. ਏਤੇਨੁਪਾਯੇਨ ਮਹਾਕਸ੍ਸਪਤ੍ਥੇਰੋ ਅਨੁਰੁਦ੍ਧਤ੍ਥੇਰੋ ਉਪਾਲਿਤ੍ਥੇਰੋ ਪੁਣ੍ਣਤ੍ਥੇਰੋਤਿ ਸਬ੍ਬੇ ਮਹਾਸਾਵਕਾ ਪਞ੍ਚਹਿ ਪਞ੍ਚਹਿ ਭਿਕ੍ਖੁਸਤੇਹਿ ਸਦ੍ਧਿਂ ਨਿਕ੍ਖਮਿਂਸੁ. ਸਬ੍ਬੇਪਿ ਮਹਾਸਾਵਕਾਨਂ ਪਰਿਵਾਰਾ ਚਤ੍ਤਾਲੀਸ ਭਿਕ੍ਖੁਸਹਸ੍ਸਾਨਿ ਅਹੇਸੁਂ. ਤੇ ਵੀਸਤਿਯੋਜਨਸਤਂ ਮਗ੍ਗਂ ਗਨ੍ਤ੍ਵਾ ਗੋਚਰਗਾਮਂ ਸਮ੍ਪਤ੍ਤਾ. ਸਾਮਣੇਰਸ੍ਸ ਨਿਬਦ੍ਧੂਪਟ੍ਠਾਕੋ ਉਪਾਸਕੋ ਦ੍ਵਾਰੇਯੇਵ ਦਿਸ੍ਵਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿ.

ਅਥ ਨਂ ਸਾਰਿਪੁਤ੍ਤਤ੍ਥੇਰੋ ਪੁਚ੍ਛਿ – ‘‘ਅਤ੍ਥਿ ਨੁ ਖੋ, ਉਪਾਸਕ, ਇਮਸ੍ਮਿਂ ਪਦੇਸੇ ਆਰਞ੍ਞਕਵਿਹਾਰੋ’’ਤਿ? ‘‘ਅਤ੍ਥਿ, ਭਨ੍ਤੇ’’ਤਿ. ‘‘ਸਭਿਕ੍ਖੁਕੋ, ਅਭਿਕ੍ਖੁਕੋ’’ਤਿ? ‘‘ਸਭਿਕ੍ਖੁਕੋ, ਭਨ੍ਤੇ’’ਤਿ. ‘‘ਕੋ ਨਾਮੋ ਤਤ੍ਥ ਵਸਤੀ’’ਤਿ? ‘‘ਵਨਵਾਸੀਤਿਸ੍ਸੋ, ਭਨ੍ਤੇ’’ਤਿ. ‘‘ਤੇਨ ਹਿ ਮਗ੍ਗਂ ਨੋ ਆਚਿਕ੍ਖਾ’’ਤਿ. ‘‘ਕੇ ਤੁਮ੍ਹੇ, ਭਨ੍ਤੇ’’ਤਿ? ‘‘ਮਯਂ ਸਾਮਣੇਰਸ੍ਸ ਸਨ੍ਤਿਕਂ ਆਗਤਾ’’ਤਿ. ਉਪਾਸਕੋ ਓਲੋਕੇਤ੍ਵਾ ਧਮ੍ਮਸੇਨਾਪਤਿਂ ਆਦਿਂ ਕਤ੍ਵਾ ਸਬ੍ਬੇਪਿ ਮਹਾਸਾਵਕੇ ਸਞ੍ਜਾਨਿਤ੍ਵਾ ਨਿਰਨ੍ਤਰਂ ਪੀਤਿਯਾ ਫੁਟ੍ਠਸਰੀਰੋ ਹੁਤ੍ਵਾ ‘‘ਤਿਟ੍ਠਥ ਤਾਵ, ਭਨ੍ਤੇ’’ਤਿ ਵੇਗੇਨ ਗਾਮਂ ਪਵਿਸਿਤ੍ਵਾ ‘‘ਏਤੇ, ਅਯ੍ਯਾ, ਸਾਰਿਪੁਤ੍ਤਤ੍ਥੇਰਂ ਆਦਿਂ ਕਤ੍ਵਾ ਅਸੀਤਿ ਮਹਾਸਾਵਕਾ ਅਤ੍ਤਨੋ ਅਤ੍ਤਨੋ ਪਰਿਵਾਰੇਹਿ ਸਦ੍ਧਿਂ ਸਾਮਣੇਰਸ੍ਸ ਸਨ੍ਤਿਕਂ ਆਗਤਾ, ਮਞ੍ਚਪੀਠਪਚ੍ਚਤ੍ਥਰਣਦੀਪਤੇਲਾਦੀਨਿ ਗਹੇਤ੍ਵਾ ਵੇਗੇਨ ਨਿਕ੍ਖਮਥਾ’’ਤਿ ਉਗ੍ਘੋਸੇਸਿ. ਮਨੁਸ੍ਸਾ ‘‘ਤਾਵਦੇਵ ਮਞ੍ਚਾਦੀਨਿ ਗਹੇਤ੍ਵਾ ਥੇਰਾਨਂ ਪਦਾਨੁਪਦਿਕਾ ਹੁਤ੍ਵਾ ਥੇਰੇਹਿ ਸਦ੍ਧਿਂਯੇਵ ਵਿਹਾਰਂ ਪਵਿਸਿਂਸੁ. ਸਾਮਣੇਰੋ ਭਿਕ੍ਖੁਸਙ੍ਘਂ ਸਞ੍ਜਾਨਿਤ੍ਵਾ ਕਤਿਪਯਾਨਂ ਮਹਾਥੇਰਾਨਂ ਪਤ੍ਤਚੀਵਰਾਨਿ ਪਟਿਗ੍ਗਹੇਤ੍ਵਾ ਵਤ੍ਤਮਕਾਸਿ. ਤਸ੍ਸ ਥੇਰਾਨਂ ਵਸਨਟ੍ਠਾਨਂ ਸਂਵਿਦਹਨ੍ਤਸ੍ਸ ਪਤ੍ਤਚੀਵਰਂ ਪਟਿਸਾਮੇਨ੍ਤਸ੍ਸੇਵ ਅਨ੍ਧਕਾਰੋ ਜਾਤਾ’’ਤਿ. ਸਾਰਿਪੁਤ੍ਤਤ੍ਥੇਰੋ ਉਪਾਸਕੇ ਆਹ – ‘‘ਗਚ੍ਛਥ, ਉਪਾਸਕਾ, ਤੁਮ੍ਹਾਕਂ ਅਨ੍ਧਕਾਰੋ ਜਾਤੋ’’ਤਿ. ‘‘ਭਨ੍ਤੇ, ਅਜ੍ਜ ਧਮ੍ਮਸ੍ਸਵਨਦਿਵਸੋ, ਨ ਮਯਂ ਗਮਿਸ੍ਸਾਮ, ਧਮ੍ਮਂ ਸੁਣਿਸ੍ਸਾਮ, ਇਤੋ ਪੁਬ੍ਬੇ ਧਮ੍ਮਸ੍ਸਵਨਮ੍ਪਿ ਨਤ੍ਥੀ’’ਤਿ. ‘‘ਤੇਨ ਹਿ, ਸਾਮਣੇਰ, ਦੀਪਂ ਜਾਲੇਤ੍ਵਾ ਧਮ੍ਮਸ੍ਸਵਨਸ੍ਸ ਕਾਲਂ ਘੋਸੇਹੀ’’ਤਿ. ਸੋ ਤਥਾ ਅਕਾਸਿ. ਅਥ ਨਂ ਥੇਰੋ ਆਹ – ‘‘ਤਿਸ੍ਸ ਤਵ ਉਪਟ੍ਠਾਕਾ ‘ਧਮ੍ਮਂ ਸੋਤੁਕਾਮਾਮ੍ਹਾ’ਤਿ ਵਦਨ੍ਤਿ, ਕਥੇਹਿ ਤੇਸਂ ਧਮ੍ਮ’’ਨ੍ਤਿ. ਉਪਾਸਕਾ ਏਕਪ੍ਪਹਾਰੇਨੇਵ ਉਟ੍ਠਾਯ, ‘‘ਭਨ੍ਤੇ, ਅਮ੍ਹਾਕਂ ਅਯ੍ਯੋ ‘ਸੁਖਿਤਾ ਹੋਥ, ਦੁਕ੍ਖਾ ਮੁਚ੍ਚਥਾ’ਤਿ ਇਮਾਨਿ ਦ੍ਵੇ ਪਦਾਨਿ ਠਪੇਤ੍ਵਾ ਅਞ੍ਞਂ ਧਮ੍ਮਕਥਂ ਨ ਜਾਨਾਤਿ, ਅਮ੍ਹਾਕਂ ਅਞ੍ਞਂ ਧਮ੍ਮਕਥਿਕਂ ਦੇਥਾ’’ਤਿ ਵਦਿਂਸੁ. ‘‘ਸਾਮਣੇਰੋ ਪਨ ਅਰਹਤ੍ਤਂ ਪਤ੍ਵਾਪਿ ਨੇਵ ਤੇਸਂ ਧਮ੍ਮਕਥਂ ਕਥੇਸੀ’’ਤਿ.

ਤਦਾ ਪਨ ਨਂ ਉਪਜ੍ਝਾਯੋ, ‘‘ਸਾਮਣੇਰ, ਕਥਂ ਪਨ ਸੁਖਿਤਾ ਹੋਨ੍ਤਿ, ‘ਕਥਂ ਪਨ ਦੁਕ੍ਖਾ ਮੁਚ੍ਚਨ੍ਤੀ’ਤਿ ਇਮੇਸਂ ਨੋ ਦ੍ਵਿਨ੍ਨਂ ਪਦਾਨਂ ਅਤ੍ਥਂ ਕਥੇਹੀ’’ਤਿ ਆਹ. ਸੋ ‘‘ਸਾਧੁ, ਭਨ੍ਤੇ’’ਤਿ ਚਿਤ੍ਤਬੀਜਨਿਂ ਗਹੇਤ੍ਵਾ ਧਮ੍ਮਾਸਨਂ ਆਰੁਯ੍ਹ ਪਞ੍ਚਹਿ ਨਿਕਾਯੇਹਿ ਅਤ੍ਥਞ੍ਚ ਕਾਰਣਞ੍ਚ ਆਕਡ੍ਢਿਤ੍ਵਾ ਘਨਵਸ੍ਸਂ ਵਸ੍ਸਨ੍ਤੋ ਚਾਤੁਦ੍ਦੀਪਕਮਹਾਮੇਘੋ ਵਿਯ ਖਨ੍ਧਧਾਤੁਆਯਤਨਬੋਧਿਪਕ੍ਖਿਯਧਮ੍ਮੇ ਵਿਭਜਨ੍ਤੋ ਅਰਹਤ੍ਤਕੂਟੇਨ ਧਮ੍ਮਕਥਂ ਕਥੇਤ੍ਵਾ, ‘‘ਭਨ੍ਤੇ, ਏਵਂ ਅਰਹਤ੍ਤਪ੍ਪਤ੍ਤਸ੍ਸ ਸੁਖਂ ਹੋਤਿ, ਅਰਹਤ੍ਤਂ ਪਤ੍ਤੋਯੇਵ ਦੁਕ੍ਖਾ ਮੁਚ੍ਚਤਿ, ਸੇਸਜਨਾ ਜਾਤਿਦੁਕ੍ਖਾਦੀਹਿ ਚੇਵ ਨਿਰਯਦੁਕ੍ਖਾਦੀਹਿ ਚ ਨ ਪਰਿਮੁਚ੍ਚਨ੍ਤੀ’’ਤਿ ਆਹ. ‘‘ਸਾਧੁ, ਸਾਮਣੇਰ, ਸੁਕਥਿਤੋ ਤੇ ਪਟਿਭਾਣੋ, ਇਦਾਨਿ ਸਰਭਞ੍ਞਂ ਭਣਾਹੀ’’ਤਿ. ਸੋ ਸਰਭਞ੍ਞਮ੍ਪਿ ਭਣਿ. ਅਰੁਣੇ ਉਗ੍ਗਚ੍ਛਨ੍ਤੇ ਸਾਮਣੇਰਸ੍ਸ ਉਪਟ੍ਠਾਕਮਨੁਸ੍ਸਾ ਦ੍ਵੇ ਭਾਗਾ ਅਹੇਸੁਂ. ਏਕਚ੍ਚੇ ‘‘ਨ ਵਤ ਨੋ ਇਤੋ ਪੁਬ੍ਬੇ ਏਵਰੂਪੋ ਕਕ੍ਖਲ਼ੋ ਦਿਟ੍ਠਪੁਬ੍ਬੋ. ਕਥਞ੍ਹਿ ਨਾਮ ਏਵਰੂਪਂ ਧਮ੍ਮਕਥਂ ਜਾਨਨ੍ਤੋ ਏਤ੍ਤਕਂ ਕਾਲਂ ਮਾਤਾਪਿਤੁਟ੍ਠਾਨੇ ਠਤ੍ਵਾ ਉਪਟ੍ਠਹਨ੍ਤਾਨਂ ਮਨੁਸ੍ਸਾਨਂ ਏਕਮ੍ਪਿ ਧਮ੍ਮਪਦਂ ਨ ਕਥੇਸੀ’’ਤਿ ਕੁਜ੍ਝਿਂਸੁ. ਏਕਚ੍ਚੇ ‘‘ਲਾਭਾ ਵਤ ਨੋ, ਯੇ ਮਯਂ ਏਵਰੂਪਂ ਭਦਨ੍ਤਂ ਗੁਣਂ ਵਾ ਅਗੁਣਂ ਵਾ ਅਜਾਨਨ੍ਤਾਪਿ ਉਪਟ੍ਠਹਿਮ੍ਹ, ਇਦਾਨਿ ਚ ਪਨਸ੍ਸ ਸਨ੍ਤਿਕੇ ਧਮ੍ਮਂ ਸੋਤੁਂ ਲਭਿਮ੍ਹਾ’’ਤਿ ਤੁਸ੍ਸਿਂਸੁ.

ਸਮ੍ਮਾਸਮ੍ਬੁਦ੍ਧੋਪਿ ਤਂ ਦਿਵਸਂ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤੋ ਵਨਵਾਸੀਤਿਸ੍ਸਸ੍ਸ ਉਪਟ੍ਠਾਕੇ ਅਤ੍ਤਨੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠੇ ਦਿਸ੍ਵਾ ‘‘ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਆਵਜ੍ਜੇਨ੍ਤੋ ਇਮਮਤ੍ਥਂ ਉਪਧਾਰੇਸਿ ‘‘ਵਨਵਾਸੀਤਿਸ੍ਸਸਾਮਣੇਰਸ੍ਸ ਉਪਟ੍ਠਾਕਾ ਏਕਚ੍ਚੇ ਤੁਟ੍ਠਾ, ਏਕਚ੍ਚੇ ਕੁਦ੍ਧਾ, ਮਯ੍ਹਂ ਪੁਤ੍ਤਸ੍ਸ ਪਨ ਸਾਮਣੇਰਸ੍ਸ ਕੁਦ੍ਧਾ ਨਿਰਯਭਾਗਿਨੋ ਭਵਿਸ੍ਸਨ੍ਤਿ, ਗਨ੍ਤਬ੍ਬਮੇਵ ਤਤ੍ਥ ਮਯਾ, ਮਯਿ ਗਤੇ ਸਬ੍ਬੇਪਿ ਤੇ ਸਾਮਣੇਰੇ ਮੇਤ੍ਤਚਿਤ੍ਤਂ ਕਤ੍ਵਾ ਦੁਕ੍ਖਾ ਮੁਚ੍ਚਿਸ੍ਸਨ੍ਤੀ’’ਤਿ. ਤੇਪਿ ਮਨੁਸ੍ਸਾ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਗਾਮਂ ਗਨ੍ਤ੍ਵਾ ਮਣ੍ਡਪਂ ਕਾਰੇਤ੍ਵਾ ਯਾਗੁਭਤ੍ਤਾਦੀਨਿ ਸਮ੍ਪਾਦੇਤ੍ਵਾ ਆਸਨਾਨਿ ਪਞ੍ਞਾਪੇਤ੍ਵਾ ਸਙ੍ਘਸ੍ਸ ਆਗਮਨਮਗ੍ਗਂ ਓਲੋਕੇਨ੍ਤਾ ਨਿਸੀਦਿਂਸੁ. ਭਿਕ੍ਖੂਪਿ ਸਰੀਰਪਟਿਜਗ੍ਗਨਂ ਕਤ੍ਵਾ ਭਿਕ੍ਖਾਚਾਰਵੇਲਾਯ ਗਾਮਂ ਪਿਣ੍ਡਾਯ ਪਵਿਸਨ੍ਤਾ ਸਾਮਣੇਰਂ ਪੁਚ੍ਛਿਂਸੁ – ‘‘ਕਿਂ, ਤਿਸ੍ਸ, ਤ੍ਵਂ ਅਮ੍ਹੇਹਿ ਸਦ੍ਧਿਂ ਗਮਿਸ੍ਸਸਿ, ਉਦਾਹੁ ਪਚ੍ਛਾ’’ਤਿ? ‘‘ਮਮ ਗਮਨਵੇਲਾਯਮੇਵ ਗਮਿਸ੍ਸਾਮਿ, ਗਚ੍ਛਥ ਤੁਮ੍ਹੇ, ਭਨ੍ਤੇ’’ਤਿ. ਭਿਕ੍ਖੂ ਪਤ੍ਤਚੀਵਰਮਾਦਾਯ ਪਵਿਸਿਂਸੁ.

ਸਤ੍ਥਾ ਜੇਤਵਨਸ੍ਮਿਂਯੇਵ ਚੀਵਰਂ ਪਾਰੁਪਿਤ੍ਵਾ ਪਤ੍ਤਮਾਦਾਯ ਏਕਚਿਤ੍ਤਕ੍ਖਣੇਨੇਵ ਗਨ੍ਤ੍ਵਾ ਭਿਕ੍ਖੂਨਂ ਪੁਰਤੋ ਠਿਤਮੇਵ ਅਤ੍ਤਾਨਂ ਦਸ੍ਸੇਸਿ. ‘‘ਸਮ੍ਮਾਸਮ੍ਬੁਦ੍ਧੋ ਆਗਤੋ’’ਤਿ ਸਕਲਗਾਮੋ ਸਙ੍ਖੁਭਿਤ੍ਵਾ ਏਕਕੋਲਾਹਲੋ ਅਹੋਸਿ. ਮਨੁਸ੍ਸਾ ਉਦਗ੍ਗਚਿਤ੍ਤਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਯਾਗੁਂ ਦਤ੍ਵਾ ਖਜ੍ਜਕਂ ਅਦਂਸੁ. ਸਾਮਣੇਰੋ ਭਤ੍ਤੇ ਅਨਿਟ੍ਠਿਤੇਯੇਵ ਅਨ੍ਤੋਗਾਮਂ ਪਾਵਿਸਿ. ਗਾਮਵਾਸਿਨੋ ਨੀਹਰਿਤ੍ਵਾ ਤਸ੍ਸ ਸਕ੍ਕਚ੍ਚਂ ਭਿਕ੍ਖਂ ਅਦਂਸੁ. ਸੋ ਯਾਪਨਮਤ੍ਤਂ ਗਹੇਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਤ੍ਤਂ ਉਪਨਾਮੇਸਿ. ਸਤ੍ਥਾ ‘‘ਆਹਰ, ਤਿਸ੍ਸਾ’’ਤਿ ਹਤ੍ਥਂ ਪਸਾਰੇਤ੍ਵਾ ਪਤ੍ਤਂ ਗਹੇਤ੍ਵਾ ‘‘ਪਸ੍ਸ, ਸਾਰਿਪੁਤ੍ਤ, ਤਵ ਸਾਮਣੇਰਸ੍ਸ ਪਤ੍ਤ’’ਨ੍ਤਿ ਥੇਰਸ੍ਸ ਦਸ੍ਸੇਸਿ. ਥੇਰੋ ਸਤ੍ਥੁ ਹਤ੍ਥਤੋ ਪਤ੍ਤਂ ਗਹੇਤ੍ਵਾ ਸਾਮਣੇਰਸ੍ਸ ਦਤ੍ਵਾ ‘‘ਗਚ੍ਛ, ਅਤ੍ਤਨੋ ਪਤ੍ਤਟ੍ਠਾਨੇ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਕਰੋਹੀ’’ਤਿ ਆਹ.

ਗਾਮਵਾਸਿਨੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਰਿਵਿਸਿਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਅਨੁਮੋਦਨਂ ਯਾਚਿਂਸੁ. ਸਤ੍ਥਾ ਅਨੁਮੋਦਨਂ ਕਰੋਨ੍ਤੋ ਏਵਮਾਹ – ‘‘ਲਾਭਾ ਵਤ ਵੋ ਉਪਾਸਕਾ, ਯੇ ਤੁਮ੍ਹੇ ਅਤ੍ਤਨੋ ਕੁਲੂਪਕਂ ਸਾਮਣੇਰਂ ਨਿਸ੍ਸਾਯ ਸਾਰਿਪੁਤ੍ਤਂ ਮੋਗ੍ਗਲ੍ਲਾਨਂ ਕਸ੍ਸਪਂ ਅਨੁਰੁਦ੍ਧਨ੍ਤਿ ਅਸੀਤਿਮਹਾਸਾਵਕੇ ਦਸ੍ਸਨਾਯ ਲਭਥ, ਅਹਮ੍ਪਿ ਤੁਮ੍ਹਾਕਂ ਕੁਲੂਪਕਮੇਵ ਨਿਸ੍ਸਾਯ ਆਗਤੋ, ਬੁਦ੍ਧਦਸ੍ਸਨਮ੍ਪਿ ਵੋ ਇਮਂ ਨਿਸ੍ਸਾਯੇਵ ਲਦ੍ਧਂ, ਲਾਭਾ ਵੋ, ਸੁਲਦ੍ਧਂ ਵੋ’’ਤਿ. ਮਨੁਸ੍ਸਾ ਚਿਨ੍ਤਯਿਂਸੁ – ‘‘ਅਹੋ ਅਮ੍ਹਾਕਂ ਲਾਭਾ, ਬੁਦ੍ਧਾਨਞ੍ਚੇਵ ਭਿਕ੍ਖੁਸਙ੍ਘਸ੍ਸ ਚ ਆਰਾਧਨਸਮਤ੍ਥਂ ਅਮ੍ਹਾਕਂ ਅਯ੍ਯਂ ਦਸ੍ਸਨਾਯ ਲਭਾਮ, ਦੇਯ੍ਯਧਮ੍ਮਞ੍ਚਸ੍ਸ ਦਾਤੁਂ ਲਭਾਮਾ’’ਤਿ ਸਾਮਣੇਰਸ੍ਸ ਕੁਦ੍ਧਾ ਮਨੁਸ੍ਸਾ ਤੁਸ੍ਸਿਂਸੁ. ਤੁਟ੍ਠਾ ਮਨੁਸ੍ਸਾ ਭਿਯ੍ਯੋਸੋਮਤ੍ਤਾਯ ਪਸੀਦਿਂਸੁ. ਅਨੁਮੋਦਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਸਤ੍ਥਾ ਉਟ੍ਠਾਯਾਸਨਾ ਪਕ੍ਕਾਮਿ. ਮਨੁਸ੍ਸਾ ਸਤ੍ਥਾਰਂ ਅਨੁਗਨ੍ਤ੍ਵਾ ਵਨ੍ਦਿਤ੍ਵਾ ਨਿਵਤ੍ਤਿਂਸੁ. ਸਤ੍ਥਾ ਸਾਮਣੇਰੇਨ ਸਦ੍ਧਿਂ ਸਮਧੁਰੇਨ ਗਚ੍ਛਨ੍ਤੋ, ‘‘ਸਾਮਣੇਰ, ਅਯਂ ਪਦੇਸੋ ਕੋਨਾਮੋ, ਅਯਂ ਪਦੇਸੋ ਕੋਨਾਮੋ’’ਤਿ ਪੁਬ੍ਬੇ ਤਸ੍ਸ ਉਪਾਸਕੇਨ ਦਸ੍ਸਿਤਪਦੇਸੇ ਪੁਚ੍ਛਨ੍ਤੋ ਅਗਮਾਸਿ. ਸਾਮਣੇਰੋਪਿ, ‘‘ਭਨ੍ਤੇ, ਅਯਂ ਇਤ੍ਥਨ੍ਨਾਮੋ, ਅਯਂ ਇਤ੍ਥਨ੍ਨਾਮੋ’’ਤਿ ਆਚਿਕ੍ਖਮਾਨੋਵ ਅਗਮਾਸਿ. ਸਤ੍ਥਾ ਤਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਪਬ੍ਬਤਮਤ੍ਥਕਂ ਅਭਿਰੁਹਿ. ਤਤ੍ਥ ਠਿਤਾਨਂ ਪਨ ਮਹਾਸਮੁਦ੍ਦੋ ਪਞ੍ਞਾਯਤਿ. ਸਤ੍ਥਾ ਸਾਮਣੇਰਂ ਪੁਚ੍ਛਿ – ‘‘ਤਿਸ੍ਸ, ਪਬ੍ਬਤਮਤ੍ਥਕੇ ਠਿਤੋ ਇਤੋ ਚਿਤੋ ਚ ਓਲੋਕੇਤ੍ਵਾ ਕਿਂ ਪਸ੍ਸਸੀ’’ਤਿ? ‘‘ਮਹਾਸਮੁਦ੍ਦਂ, ਭਨ੍ਤੇ’’ਤਿ. ‘‘ਮਹਾਸਮੁਦ੍ਦਂ ਦਿਸ੍ਵਾ ਕਿਂ ਚਿਨ੍ਤੇਸੀ’’ਤਿ? ‘‘ਮਮ ਦੁਕ੍ਖਿਤਕਾਲੇ ਰੋਦਨ੍ਤਸ੍ਸ ਚਤੂਹਿ ਮਹਾਸਮੁਦ੍ਦੇਹਿ ਅਤਿਰੇਕਤਰੇਨ ਅਸ੍ਸੁਨਾ ਭਵਿਤਬ੍ਬਨ੍ਤਿ ਇਦਂ, ਭਨ੍ਤੇ, ਚਿਨ੍ਤੇਸਿ’’ਨ੍ਤਿ. ‘‘ਸਾਧੁ ਸਾਧੁ, ਤਿਸ੍ਸ, ਏਵਮੇਤਂ. ਏਕੇਕਸ੍ਸ ਹਿ ਸਤ੍ਤਸ੍ਸ ਦੁਕ੍ਖਿਤਕਾਲੇ ਪਗ੍ਘਰਿਤਅਸ੍ਸੂਨਿ ਚਤੂਹਿ ਮਹਾਸਮੁਦ੍ਦੇਹਿ ਅਤਿਰੇਕਤਰਾਨੇਵਾ’’ਤਿ. ਇਦਞ੍ਚ ਪਨ ਵਤ੍ਵਾ ਇਮਂ ਗਾਥਮਾਹ –

‘‘ਚਤੂਸੁ ਸਮੁਦ੍ਦੇਸੁ ਜਲਂ ਪਰਿਤ੍ਤਕਂ,

ਤਤੋ ਬਹੁਂ ਅਸ੍ਸੁਜਲਂ ਅਨਪ੍ਪਕਂ;

ਦੁਕ੍ਖੇਨ ਫੁਟ੍ਠਸ੍ਸ ਨਰਸ੍ਸ ਸੋਚਨਾ,

ਕਿਂਕਾਰਣਾ ਸਮ੍ਮ ਤੁਵਂ ਪਮਜ੍ਜਸੀ’’ਤਿ.

ਅਥ ਨਂ ਪੁਨ ਪੁਚ੍ਛਿ – ‘‘ਤਿਸ੍ਸ, ਕਹਂ ਵਸਸੀ’’ਤਿ? ‘‘ਇਮਸ੍ਮਿਂ ਪਬ੍ਭਾਰੇ, ਭਨ੍ਤੇ’’ਤਿ. ‘‘ਤਤ੍ਥ ਪਨ ਵਸਨ੍ਤੋ ਕਿਂ ਚਿਨ੍ਤੇਸੀ’’ਤਿ? ‘‘ਮਯਾ ਮਰਨ੍ਤੇਨ ਇਮਸ੍ਮਿਂ ਠਾਨੇ ਕਤਸ੍ਸ ਸਰੀਰਨਿਕ੍ਖੇਪਸ੍ਸ ਪਰਿਚ੍ਛੇਦੋ ‘ਨਤ੍ਥੀ’ਤਿ ਚਿਨ੍ਤੇਸਿਂ, ਭਨ੍ਤੇ’’ਤਿ. ‘‘ਸਾਧੁ ਸਾਧੁ, ਤਿਸ੍ਸ, ਏਵਮੇਤਂ. ਇਮੇਸਞ੍ਹਿ ਸਤ੍ਤਾਨਂ ਪਥਵਿਯਂ ਨਿਪਜ੍ਜਿਤ੍ਵਾ ਅਮਤਟ੍ਠਾਨਂ ਨਾਮ ਨਤ੍ਥੀ’’ਤਿ ਵਤ੍ਵਾ –

‘‘ਉਪਸਾਲ਼ਕਨਾਮਾਨਿ, ਸਹਸ੍ਸਾਨਿ ਚਤੁਦ੍ਦਸ;

ਅਸ੍ਮਿਂ ਪਦੇਸੇ ਦਡ੍ਢਾਨਿ, ਨਤ੍ਥਿ ਲੋਕੇ ਅਨਾਮਤਂ.

‘‘ਯਮ੍ਹਿ ਸਚ੍ਚਞ੍ਚ ਧਮ੍ਮੋ ਚ, ਅਹਿਂਸਾ ਸਂਯਮੋ ਦਮੋ;

ਏਤਂ ਅਰਿਯਾ ਸੇਵਨ੍ਤਿ, ਏਤਂ ਲੋਕੇ ਅਨਾਮਤ’’ਨ੍ਤਿ. (ਜਾ.੧.੨.੩੧-੩੨) –

ਇਮਂ ਦੁਕਨਿਪਾਤੇ ਉਪਸਾਲ਼ਕਜਾਤਕਂ ਕਥੇਸਿ. ਇਤਿ ਪਥਵਿਯਂ ਸਰੀਰਨਿਕ੍ਖੇਪਂ ਕਤ੍ਵਾ ਮਰਨ੍ਤੇਸੁ ਸਤ੍ਤੇਸੁ ਅਮਤਪੁਬ੍ਬਪਦੇਸੇ ਮਰਨ੍ਤਾ ਨਾਮ ਨਤ੍ਥਿ, ਆਨਨ੍ਦਤ੍ਥੇਰਸਦਿਸਾ ਪਨ ਅਮਤਪੁਬ੍ਬਪਦੇਸੇ ਪਰਿਨਿਬ੍ਬਾਯਨ੍ਤਿ.

ਆਨਨ੍ਦਤ੍ਥੇਰੋ ਕਿਰ ਵੀਸਵਸ੍ਸਸਤਿਕਕਾਲੇ ਆਯੁਸਙ੍ਖਾਰਂ ਓਲੋਕੇਨ੍ਤੋ ਪਰਿਕ੍ਖੀਣਭਾਵਂ ਞਤ੍ਵਾ ‘‘ਇਤੋ ਸਤ੍ਤਮੇ ਦਿਵਸੇ ਪਰਿਨਿਬ੍ਬਾਯਿਸ੍ਸਾਮੀ’’ਤਿ ਆਰੋਚੇਸਿ. ਤਂ ਪਵਤ੍ਤਿਂ ਸੁਤ੍ਵਾ ਰੋਹਿਣੀਨਦਿਯਾ ਉਭਯਤੀਰਵਾਸਿਕੇਸੁ ਮਨੁਸ੍ਸੇਸੁ ਓਰਿਮਤੀਰਵਾਸਿਕਾ ‘‘ਮਯਂ ਥੇਰਸ੍ਸ ਬਹੂਪਕਾਰਾ, ਅਮ੍ਹਾਕਂ ਸਨ੍ਤਿਕੇ ਪਰਿਨਿਬ੍ਬਾਯਿਸ੍ਸਤੀ’’ਤਿ ਵਦਿਂਸੁ. ਪਰਤੀਰਵਾਸਿਕਾਪਿ ‘‘ਮਯਂ ਥੇਰਸ੍ਸ ਬਹੂਪਕਾਰਾ, ਅਮ੍ਹਾਕਂ ਸਨ੍ਤਿਕੇ ਪਰਿਨਿਬ੍ਬਾਯਿਸ੍ਸਤੀ’’ਤਿ ਵਦਿਂਸੁ. ਥੇਰੋ ਤੇਸਂ ਵਚਨਂ ਸੁਤ੍ਵਾ ‘‘ਉਭਯਤੀਰਵਾਸਿਨੋ ਮਯ੍ਹਂ ਉਪਕਾਰਾ, ਇਮੇ ਨਾਮ ਅਨੁਪਕਾਰਾਤਿ ਨ ਸਕ੍ਕਾ ਵਤ੍ਤੁਂ, ਸਚਾਹਂ ਓਰਿਮਤੀਰੇ ਪਰਿਨਿਬ੍ਬਾਯਿਸ੍ਸਾਮਿ, ਪਰਤੀਰਵਾਸਿਨੋ ਧਾਤੁਗਹਣਤ੍ਥਂ ਤੇਹਿ ਸਦ੍ਧਿਂ ਕਲਹਂ ਕਰਿਸ੍ਸਨ੍ਤਿ. ਸਚੇ ਪਰਤੀਰੇ ਪਰਿਨਿਬ੍ਬਾਯਿਸ੍ਸਾਮਿ, ਓਰਿਮਤੀਰਵਾਸਿਨੋਪਿ ਤਥਾ ਕਰਿਸ੍ਸਨ੍ਤਿ, ਕਲਹੋ ਉਪ੍ਪਜ੍ਜਮਾਨੋਪਿ ਮਂ ਨਿਸ੍ਸਾਯੇਵ ਉਪ੍ਪਜ੍ਜਿਸ੍ਸਤਿ, ਵੂਪਸਮਮਾਨੋਪਿ ਮਂ ਨਿਸ੍ਸਾਯੇਵ ਵੂਪਸਮਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ‘‘ਓਰਿਮਤੀਰਵਾਸਿਨੋਪਿ ਮਯ੍ਹਂ ਉਪਕਾਰਾ, ਪਰਤੀਰਵਾਸਿਨੋਪਿ ਮਯ੍ਹਂ ਉਪਕਾਰਾ, ਅਨੁਪਕਾਰਾਪਿ ਨਾਮ ਨਤ੍ਥਿ, ਓਰਿਮਤੀਰਵਾਸਿਨੋ ਓਰਿਮਤੀਰੇਯੇਵ ਸਨ੍ਨਿਪਤਨ੍ਤੁ, ਪਰਤੀਰਵਾਸਿਨੋਪਿ ਪਰਤੀਰੇਯੇਵਾ’’ਤਿ ਆਹ. ਤਤੋ ਸਤ੍ਤਮੇ ਦਿਵਸੇ ਮਜ੍ਝੇਨਦਿਯਾ ਸਤ੍ਤਤਾਲਪ੍ਪਮਾਣੇ ਆਕਾਸੇ ਪਲ੍ਲਙ੍ਕੇਨ ਨਿਸੀਦਿਤ੍ਵਾ ਮਹਾਜਨਸ੍ਸ ਧਮ੍ਮਂ ਕਥੇਤ੍ਵਾ ‘‘ਮਮ ਸਰੀਰਂ ਮਜ੍ਝੇ ਭਿਜ੍ਜਿਤ੍ਵਾ ਏਕੋ ਭਾਗੋ ਓਰਿਮਤੀਰੇ ਪਤਤੁ, ਏਕੋ ਭਾਗੋ ਪਰਤੀਰੇ’’ਤਿ ਅਧਿਟ੍ਠਾਯ ਯਥਾਨਿਸਿਨ੍ਨੋਵ ਤੇਜੋਧਾਤੁਂ ਸਮਾਪਜ੍ਜਿ, ਜਾਲਾ ਉਟ੍ਠਹਿਂਸੁ. ਸਰੀਰਂ ਮਜ੍ਝੇ ਭਿਜ੍ਜਿਤ੍ਵਾ ਏਕੋ ਭਾਗੋ ਓਰਿਮਤੀਰੇ ਪਤਿ, ਏਕੋ ਭਾਗੋ ਪਰਤੀਰੇ. ਤਤੋ ਮਹਾਜਨੋ ਪਰਿਦੇਵਿ, ਪਥਵਿਉਨ੍ਦ੍ਰਿਯਨਸਦ੍ਦੋ ਵਿਯ ਆਰੋਦਨਸਦ੍ਦੋ ਅਹੋਸਿ. ਸਤ੍ਥੁ ਪਰਿਨਿਬ੍ਬਾਨੇ ਆਰੋਦਨਸਦ੍ਦਤੋਪਿ ਕਾਰੁਞ੍ਞਤਰੋ ਅਹੋਸਿ. ਮਨੁਸ੍ਸਾ ਚਤ੍ਤਾਰੋ ਮਾਸੇ ਰੋਦਨ੍ਤਾ ਪਰਿਦੇਵਨ੍ਤਾ ‘‘ਸਤ੍ਥੁ ਪਤ੍ਤਚੀਵਰਗ੍ਗਾਹਕੇ ਤਿਟ੍ਠਨ੍ਤੇ ਸਤ੍ਥੁ ਠਿਤਕਾਲੋ ਵਿਯ ਨੋ ਅਹੋਸਿ, ਇਦਾਨਿ ਨੋ ਸਤ੍ਥਾ ਪਰਿਨਿਬ੍ਬੁਤੋ’’ਤਿ ਵਿਪ੍ਪਲਪਨ੍ਤਾ ਵਿਰਵਨ੍ਤਾ ਵਿਚਰਿਂਸੂਤਿ.

ਪੁਨ ਸਤ੍ਥਾ ਸਾਮਣੇਰਂ ਪੁਚ੍ਛਿ – ‘‘ਤਿਸ੍ਸ, ਇਮਸ੍ਮਿਂ ਵਨਸਣ੍ਡੇ ਦੀਪਿਆਦੀਨਂ ਸਦ੍ਦੇਨ ਭਾਯਸਿ, ਨ ਭਾਯਸੀ’’ਤਿ? ‘‘ਨ ਭਾਯਾਮਿ ਭਗਵਾ, ਅਪਿਚ ਖੋ ਪਨ ਮੇ ਏਤੇਸਂ ਸਦ੍ਦਂ ਸੁਤ੍ਵਾ ਵਨਰਤਿ ਨਾਮ ਉਪ੍ਪਜ੍ਜਤੀ’’ਤਿ ਵਤ੍ਵਾ ਸਟ੍ਠਿਮਤ੍ਤਾਹਿ ਗਾਥਾਹਿ ਵਨਵਣ੍ਣਨਂ ਨਾਮ ਕਥੇਸਿ. ਅਥ ਨਂ ਸਤ੍ਥਾ ‘‘ਤਿਸ੍ਸਾ’’ਤਿ ਆਮਨ੍ਤੇਸਿ. ‘‘ਕਿਂ, ਭਨ੍ਤੇ’’ਤਿ? ‘‘ਮਯਂ ਗਚ੍ਛਾਮ, ਤ੍ਵਂ ਗਮਿਸ੍ਸਸਿ, ਨਿਵਤ੍ਤਿਸ੍ਸਸੀ’’ਤਿ. ‘‘ਮਯ੍ਹਂ ਉਪਜ੍ਝਾਯੇ ਮਂ ਆਦਾਯ ਗਚ੍ਛਨ੍ਤੇ ਗਮਿਸ੍ਸਾਮਿ, ਨਿਵਤ੍ਤੇਨ੍ਤੇ ਨਿਵਤ੍ਤਿਸ੍ਸਾਮਿ, ਭਨ੍ਤੇ’’ਤਿ. ਸਤ੍ਥਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਪਕ੍ਕਾਮਿ. ਸਾਮਣੇਰਸ੍ਸ ਪਨ ਨਿਵਤ੍ਤਿਤੁਮੇਵ ਅਜ੍ਝਾਸਯੋ, ਥੇਰੋ ਤਂ ਞਤ੍ਵਾ ‘‘ਤਿਸ੍ਸ, ਸਚੇ ਨਿਵਤ੍ਤਿਤੁਕਾਮੋ, ਨਿਵਤ੍ਤਾ’’ਤਿ ਆਹ. ਸੋ ਸਤ੍ਥਾਰਞ੍ਚ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਨਿਵਤ੍ਤਿ. ਸਤ੍ਥਾ ਜੇਤਵਨਮੇਵ ਅਗਮਾਸਿ.

ਭਿਕ੍ਖੂਨਂ ਧਮ੍ਮਸਭਾਯਂ ਕਥਾ ਉਦਪਾਦਿ – ‘‘ਅਹੋ ਵਤ ਵਨਵਾਸੀਤਿਸ੍ਸਸਾਮਣੇਰੋ ਦੁਕ੍ਕਰਂ ਕਰੋਤਿ, ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯਸ੍ਸ ਞਾਤਕਾ ਸਤ੍ਤਸੁ ਮਙ੍ਗਲੇਸੁ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਅਪ੍ਪੋਦਕਮਧੁਪਾਯਸਮੇਵ ਅਦਂਸੁ, ਪਬ੍ਬਜਿਤਕਾਲੇ ਅਨ੍ਤੋਵਿਹਾਰੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤ੍ਤ ਦਿਵਸਾਨਿ ਅਪ੍ਪੋਦਕਮਧੁਪਾਯਸਮੇਵ ਅਦਂਸੁ. ਪਬ੍ਬਜਿਤ੍ਵਾ ਅਟ੍ਠਮੇ ਦਿਵਸੇ ਅਨ੍ਤੋਗਾਮਂ ਪਵਿਸਨ੍ਤੋ ਦ੍ਵੀਹੇਵ ਦਿਵਸੇਹਿ ਸਾਟਕਸਹਸ੍ਸੇਨ ਸਦ੍ਧਿਂ ਪਿਣ੍ਡਪਾਤਸਹਸ੍ਸਂ ਲਭਿ, ਪੁਨੇਕਦਿਵਸਂ ਕਮ੍ਬਲਸਹਸ੍ਸਂ ਲਭਿ. ਇਤਿਸ੍ਸ ਇਧ ਵਸਨਕਾਲੇ ਮਹਾਲਾਭਸਕ੍ਕਾਰੋ ਉਪ੍ਪਜ੍ਜਿ, ਇਦਾਨਿ ਏਵਰੂਪਂ ਲਾਭਸਕ੍ਕਾਰਂ ਛਡ੍ਡੇਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਮਿਸ੍ਸਕਾਹਾਰੇਨ ਯਾਪੇਤਿ, ਦੁਕ੍ਕਰਕਾਰਕੋ ਵਤ ਤਿਸ੍ਸਸਾਮਣੇਰੋ’’ਤਿ. ਸਤ੍ਥਾ ਆਗਨ੍ਤ੍ਵਾ, ‘‘ਕਾਯ ਨੁਤ੍ਥ, ਭਿਕ੍ਖਵੇ, ਏਤਰਹਿ ਕਥਾਯ ਸਨ੍ਨਿਸਿਨ੍ਨਾ’’ਤਿ ਪੁਚ੍ਛਿਤ੍ਵਾ ‘‘ਇਮਾਯ ਨਾਮਾ’’ਤਿ ਵੁਤ੍ਤੇ ‘‘ਆਮ, ਭਿਕ੍ਖਵੇ, ਲਾਭੂਪਨਿਸਾ ਨਾਮੇਸਾ ਅਞ੍ਞਾ, ਨਿਬ੍ਬਾਨਗਾਮਿਨੀ ਪਟਿਪਦਾ ਅਞ੍ਞਾ. ‘ਏਵਂ ਲਾਭਂ ਲਭਿਸ੍ਸਾਮੀ’ਤਿ ਹਿ ਆਰਞ੍ਞਿਕਾਦਿਧੁਤਙ੍ਗਸਮਾਦਾਨਵਸੇਨ ਲਾਭੂਪਨਿਸਂ ਰਕ੍ਖਨ੍ਤਸ੍ਸ ਭਿਕ੍ਖੁਨੋ ਚਤ੍ਤਾਰੋ ਅਪਾਯਾ ਵਿਵਟਦ੍ਵਾਰਾ ਏਵ ਤਿਟ੍ਠਨ੍ਤਿ, ਨਿਬ੍ਬਾਨਗਾਮਿਨਿਯਾ ਪਨ ਪਟਿਪਦਾਯ ਉਪ੍ਪਨ੍ਨਂ ਲਾਭਸਕ੍ਕਾਰਂ ਪਹਾਯ ਅਰਞ੍ਞਂ ਪਵਿਸਿਤ੍ਵਾ ਘਟੇਨ੍ਤੋ ਵਾਯਮਨ੍ਤੋ ਅਰਹਤ੍ਤਂ ਗਣ੍ਹਾਤੀ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੭੫. ‘‘ਅਞ੍ਞਾ ਹਿ ਲਾਭੂਪਨਿਸਾ, ਅਞ੍ਞਾ ਨਿਬ੍ਬਾਨਗਾਮਿਨੀ;

ਏਵਮੇਤਂ ਅਭਿਞ੍ਞਾਯ, ਭਿਕ੍ਖੁ ਬੁਦ੍ਧਸ੍ਸ ਸਾਵਕੋ;

ਸਕ੍ਕਾਰਂ ਨਾਭਿਨਨ੍ਦੇਯ੍ਯ, ਵਿਵੇਕਮਨੁਬ੍ਰੂਹਯੇ’’ਤਿ.

ਤਤ੍ਥ ਅਞ੍ਞਾ ਹਿ ਲਾਭੂਪਨਿਸਾ, ਅਞ੍ਞਾ ਨਿਬ੍ਬਾਨਗਾਮਿਨੀਤਿ ਲਾਭੂਪਨਿਸਾ ਨਾਮੇਸਾ ਅਞ੍ਞਾ ਏਵ, ਅਞ੍ਞਾ ਨਿਬ੍ਬਾਨਗਾਮਿਨੀ ਪਟਿਪਦਾ. ਲਾਭੁਪ੍ਪਾਦਕੇਨ ਹਿ ਭਿਕ੍ਖੁਨਾ ਥੋਕਂ ਅਕੁਸਲਕਮ੍ਮਂ ਕਾਤੁਂ ਵਟ੍ਟਤਿ, ਕਾਯਵਙ੍ਕਾਦੀਨਿ ਕਾਤਬ੍ਬਾਨਿ ਹੋਨ੍ਤਿ. ਯਸ੍ਮਿਞ੍ਹਿ ਕਾਲੇ ਕਾਯਵਙ੍ਕਾਦੀਸੁ ਕਿਞ੍ਚਿ ਕਰੋਤਿ, ਤਦਾ ਲਾਭੋ ਉਪ੍ਪਜ੍ਜਤਿ. ਪਾਯਸਪਾਤਿਯਞ੍ਹਿ ਵਙ੍ਕਂ ਅਕਤ੍ਵਾ ਉਜੁਕਮੇਵ ਹਤ੍ਥਂ ਓਤਾਰੇਤ੍ਵਾ ਉਕ੍ਖਿਪਨ੍ਤਸ੍ਸ ਹਤ੍ਥੋ ਮਕ੍ਖਿਤਮਤ੍ਤਕੋਵ ਹੋਤਿ, ਵਙ੍ਕਂ ਕਤ੍ਵਾ ਓਤਾਰੇਤ੍ਵਾ ਉਕ੍ਖਿਪਨ੍ਤਸ੍ਸ ਪਨ ਪਾਯਸਪਿਣ੍ਡਂ ਉਦ੍ਧਰਨ੍ਤੋਵ ਨਿਕ੍ਖਮਤਿ, ਏਵਂ ਕਾਯਵਙ੍ਕਾਦੀਨਿ ਕਰਣਕਾਲੇਯੇਵ ਲਾਭੋ ਉਪ੍ਪਜ੍ਜਤਿ. ਅਯਂ ਅਧਮ੍ਮਿਕਾ ਲਾਭੂਪਨਿਸ੍ਸਾ ਨਾਮ. ਉਪਧਿਸਮ੍ਪਦਾ ਚੀਵਰਧਾਰਣਂ ਬਾਹੁਸਚ੍ਚਂ ਪਰਿਵਾਰੋ ਅਰਞ੍ਞਵਾਸੋਤਿ ਏਵਰੂਪੇਹਿ ਪਨ ਕਾਰਣੇਹਿ ਉਪ੍ਪਨ੍ਨੋ ਲਾਭੋ ਧਮ੍ਮਿਕੋ ਨਾਮ ਹੋਤਿ. ਨਿਬ੍ਬਾਨਗਾਮਿਨਿਂ ਪਟਿਪਦਂ ਪੂਰੇਨ੍ਤੇਨ ਪਨ ਭਿਕ੍ਖੁਨਾ ਕਾਯਵਙ੍ਕਾਦੀਨਿ ਪਹਾਤਬ੍ਬਾਨਿ. ਅਨਨ੍ਧੇਨੇਵ ਅਨ੍ਧੇਨ ਵਿਯ, ਅਮੂਗੇਨੇਵ ਮੂਗੇਨ ਵਿਯ, ਅਬਧਿਰੇਨੇਵ ਬਧਿਰੇਨ ਵਿਯ ਭਵਿਤੁਂ ਵਟ੍ਟਤਿ. ਅਸਠੇਨ ਅਮਾਯੇਨ ਭਵਿਤੁਂ ਵਟ੍ਟਤਿ. ਏਵਮੇਤਨ੍ਤਿ ਏਤਂ ਲਾਭੁਪ੍ਪਾਦਨਂ ਪਟਿਪਦਞ੍ਚ ਨਿਬ੍ਬਾਨਗਾਮਿਨਿਂ ਪਟਿਪਦਞ੍ਚ ਏਵਂ ਞਤ੍ਵਾ ਸਬ੍ਬੇਸਂ ਸਙ੍ਖਤਾਸਙ੍ਖਤਧਮ੍ਮਾਨਂ ਬੁਜ੍ਝਨਟ੍ਠੇਨ ਬੁਦ੍ਧਸ੍ਸ ਸਵਨਨ੍ਤੇ ਜਾਤਟ੍ਠੇਨ ਓਵਾਦਾਨੁਸਾਸਨਿਂ ਵਾ ਸਵਨਟ੍ਠੇਨ ਸਾਵਕੋ ਭਿਕ੍ਖੁ ਅਧਮ੍ਮਿਕਂ ਚਤੁਪਚ੍ਚਯਸਕ੍ਕਾਰਂ ਨਾਭਿਨਨ੍ਦੇਯ੍ਯ, ਨ ਚੇਵ ਧਮ੍ਮਿਕਂ ਪਟਿਕ੍ਕੋਸੇਯ੍ਯ, ਕਾਯਵਿਵੇਕਾਦਿਕਂ ਵਿਵੇਕਂ ਅਨੁਬ੍ਰੂਹਯੇ. ਤਤ੍ਥ ਕਾਯਵਿਵੇਕੋਤਿ ਕਾਯਸ੍ਸ ਏਕੀਭਾਵੋ. ਚਿਤ੍ਤਵਿਵੇਕੋਤਿ ਅਟ੍ਠ ਸਮਾਪਤ੍ਤਿਯੋ. ਉਪਧਿਵਿਵੇਕੋਤਿ ਨਿਬ੍ਬਾਨਂ. ਤੇਸੁ ਕਾਯਵਿਵੇਕੋ ਗਣਸਙ੍ਗਣਿਕਂ ਵਿਨੋਦੇਤਿ, ਚਿਤ੍ਤਵਿਵੇਕੋ ਕਿਲੇਸਸਙ੍ਗਣਿਕਂ ਵਿਨੋਦੇਤਿ, ਉਪਧਿਵਿਵੇਕੋ ਸਙ੍ਖਾਰਸਙ੍ਗਣਿਕਂ ਵਿਨੋਦੇਤਿ. ਕਾਯਵਿਵੇਕੋ ਚਿਤ੍ਤਵਿਵੇਕਸ੍ਸ ਪਚ੍ਚਯੋ ਹੋਤਿ, ਚਿਤ੍ਤਵਿਵੇਕੋ ਉਪਧਿਵਿਵੇਕਸ੍ਸ ਪਚ੍ਚਯੋ ਹੋਤਿ. ਵੁਤ੍ਤਮ੍ਪਿਹੇਤਂ –

‘‘ਕਾਯਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ, ਚਿਤ੍ਤਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ, ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨ’’ਨ੍ਤਿ (ਮਹਾਨਿ. ੧੫੦). –

ਇਮਂ ਤਿਵਿਧਮ੍ਪਿ ਵਿਵੇਕਂ ਬ੍ਰੂਹੇਯ੍ਯ ਵਡ੍ਢੇਯ੍ਯ, ਉਪਸਮ੍ਪਜ੍ਜ ਵਿਹਰੇਯ੍ਯਾਤਿ ਅਤ੍ਥੋ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਵਨਵਾਸੀਤਿਸ੍ਸਸਾਮਣੇਰਵਤ੍ਥੁ ਪਨ੍ਨਰਸਮਂ.

ਬਾਲਵਗ੍ਗਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮੋ ਵਗ੍ਗੋ.