੧੪. ਚਿਤ੍ਤਗਹਪਤਿਵਤ੍ਥੁ

ਅਸਨ੍ਤਂ ਭਾਵਨਮਿਚ੍ਛੇਯ੍ਯਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਸੁਧਮ੍ਮਤ੍ਥੇਰਂ ਆਰਬ੍ਭ ਕਥੇਸਿ. ਦੇਸਨਾ ਮਚ੍ਛਿਕਾਸਣ੍ਡੇ ਸਮੁਟ੍ਠਾਯ ਸਾਵਤ੍ਥਿਯਂ ਨਿਟ੍ਠਿਤਾ.

ਮਚ੍ਛਿਕਾਸਣ੍ਡਨਗਰਸ੍ਮਿਞ੍ਹਿ ਚਿਤ੍ਤੋ ਨਾਮ ਗਹਪਤਿ ਪਞ੍ਚਵਗ੍ਗਿਯਾਨਂ ਅਬ੍ਭਨ੍ਤਰਂ ਮਹਾਨਾਮਤ੍ਥੇਰਂ ਨਾਮ ਪਿਣ੍ਡਾਯ ਚਰਮਾਨਂ ਦਿਸ੍ਵਾ ਤਸ੍ਸ ਇਰਿਯਾਪਥੇ ਪਸੀਦਿਤ੍ਵਾ ਪਤ੍ਤਂ ਆਦਾਯ ਗੇਹਂ ਪਵੇਸੇਤ੍ਵਾ ਭੋਜੇਤ੍ਵਾ ਭਤ੍ਤਕਿਚ੍ਚਾਵਸਾਨੇ ਧਮ੍ਮਕਥਂ ਸੁਣਨ੍ਤੋ ਸੋਤਾਪਤ੍ਤਿਫਲਂ ਪਤ੍ਵਾ ਅਚਲਸਦ੍ਧੋ ਹੁਤ੍ਵਾ ਅਮ੍ਬਾਟਕਵਨਂ ਨਾਮ ਅਤ੍ਤਨੋ ਉਯ੍ਯਾਨਂ ਸਙ੍ਘਾਰਾਮਂ ਕਤ੍ਤੁਕਾਮੋ ਥੇਰਸ੍ਸ ਹਤ੍ਥੇ ਉਦਕਂ ਪਾਤੇਤ੍ਵਾ ਨਿਯ੍ਯਾਦੇਸਿ. ਤਸ੍ਮਿਂ ਖਣੇ ‘‘ਪਤਿਟ੍ਠਿਤਂ ਬੁਦ੍ਧਸਾਸਨ’’ਨ੍ਤਿ ਉਦਕਪਰਿਯਨ੍ਤਂ ਕਤ੍ਵਾ ਮਹਾਪਥਵੀ ਕਮ੍ਪਿ. ਮਹਾਸੇਟ੍ਠਿ ਉਯ੍ਯਾਨੇ ਮਹਾਵਿਹਾਰਂ ਕਾਰੇਤ੍ਵਾ ਸਬ੍ਬਦਿਸਾਹਿ ਆਗਤਾਨਂ ਭਿਕ੍ਖੂਨਂ ਵਿਵਟਦ੍ਵਾਰੋ ਅਹੋਸਿ. ਮਚ੍ਛਿਕਾਸਣ੍ਡੇ ਸੁਧਮ੍ਮਤ੍ਥੇਰੋ ਨਾਮ ਨੇਵਾਸਿਕੋ ਅਹੋਸਿ.

ਅਪਰੇਨ ਸਮਯੇਨ ਚਿਤ੍ਤਸ੍ਸ ਗੁਣਕਥਂ ਸੁਤ੍ਵਾ ਦ੍ਵੇ ਅਗ੍ਗਸਾਵਕਾ ਤਸ੍ਸ ਸਙ੍ਗਹਂ ਕਤ੍ਤੁਕਾਮਾ ਮਚ੍ਛਿਕਾਸਣ੍ਡਂ ਅਗਮਂਸੁ. ਚਿਤ੍ਤੋ ਗਹਪਤਿ ਤੇਸਂ ਆਗਮਨਂ ਸੁਤ੍ਵਾ ਅਡ੍ਢਯੋਜਨਮਗ੍ਗਂ ਪਚ੍ਚੁਗ੍ਗਨ੍ਤ੍ਵਾ ਤੇ ਆਦਾਯ ਅਤ੍ਤਨੋ ਵਿਹਾਰਂ ਪਵੇਸੇਤ੍ਵਾ ਆਗਨ੍ਤੁਕਵਤ੍ਤਂ ਕਤ੍ਵਾ, ‘‘ਭਨ੍ਤੇ, ਥੋਕਂ ਧਮ੍ਮਕਥਂ ਸੋਤੁਕਾਮੋਮ੍ਹੀ’’ਤਿ ਧਮ੍ਮਸੇਨਾਪਤਿਂ ਯਾਚਿ. ਅਥ ਨਂ ਥੇਰੋ, ‘‘ਉਪਾਸਕ, ਅਦ੍ਧਾਨੇਨ ਆਗਤਾਮ੍ਹਾ ਕਿਲਨ੍ਤਰੂਪਾ. ਅਪਿਚ ਥੋਕਂ ਸੁਣਾਹੀ’’ਤਿ ਤਸ੍ਸ ਧਮ੍ਮਂ ਕਥੇਸਿ. ਸੋ ਥੇਰਸ੍ਸ ਧਮ੍ਮਂ ਸੁਣਨ੍ਤੋਵ ਅਨਾਗਾਮਿਫਲਂ ਪਾਪੁਣਿ. ਸੋ ਦ੍ਵੇ ਅਗ੍ਗਸਾਵਕੇ ਵਨ੍ਦਿਤ੍ਵਾ, ‘‘ਭਨ੍ਤੇ, ਸ੍ਵੇ ਭਿਕ੍ਖੁਸਹਸ੍ਸੇਨ ਸਦ੍ਧਿਂ ਮਮ ਗੇਹੇ ਭਿਕ੍ਖਂ ਗਣ੍ਹਥਾ’’ਤਿ ਨਿਮਨ੍ਤੇਤ੍ਵਾ ਪਚ੍ਛਾ ਨੇਵਾਸਿਕਂ ਸੁਧਮ੍ਮਤ੍ਥੇਰਂ ‘‘ਤੁਮ੍ਹੇਪਿ, ਭਨ੍ਤੇ, ਸ੍ਵੇ ਥੇਰੇਹਿ ਸਦ੍ਧਿਂ ਆਗਚ੍ਛੇਯ੍ਯਾਥਾ’’ਤਿ ਨਿਮਨ੍ਤੇਸਿ. ਸੋ ‘‘ਅਯਂ ਮਂ ਪਚ੍ਛਾ ਨਿਮਨ੍ਤੇਤੀ’’ਤਿ ਕੁਦ੍ਧੋ ਪਟਿਕ੍ਖਿਪਿਤ੍ਵਾ ਪੁਨਪ੍ਪੁਨਂ ਯਾਚਿਯਮਾਨੋਪਿ ਪਟਿਕ੍ਖਿਪਿ ਏਵ. ਉਪਾਸਕੋ ‘‘ਪਞ੍ਞਾਯਿਸ੍ਸਥ, ਭਨ੍ਤੇ’’ਤਿ ਪਕ੍ਕਮਿਤ੍ਵਾ ਪੁਨਦਿਵਸੇ ਅਤ੍ਤਨੋ ਨਿਵੇਸਨੇ ਮਹਾਦਾਨਂ ਸਜ੍ਜੇਸਿ. ਸੁਧਮ੍ਮਤ੍ਥੇਰੋਪਿ ਪਚ੍ਚੂਸਕਾਲੇਯੇਵ ‘‘ਕੀਦਿਸੋ ਨੁ ਖੋ ਗਹਪਤਿਨਾ ਅਗ੍ਗਸਾਵਕਾਨਂ ਸਕ੍ਕਾਰੋ ਸਜ੍ਜਿਤੋ, ਸ੍ਵੇ ਗਨ੍ਤ੍ਵਾ ਪਸ੍ਸਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਪਾਤੋਵ ਪਤ੍ਤਚੀਵਰਂ ਆਦਾਯ ਤਸ੍ਸ ਗੇਹਂ ਅਗਮਾਸਿ.

ਸੋ ਗਹਪਤਿਨਾ ‘‘ਨਿਸੀਦਥ, ਭਨ੍ਤੇ’’ਤਿ ਵੁਚ੍ਚਮਾਨੋਪਿ ‘‘ਨਾਹਂ ਨਿਸੀਦਾਮਿ, ਪਿਣ੍ਡਾਯ ਚਰਿਸ੍ਸਾਮੀ’’ਤਿ ਵਤ੍ਵਾ ਅਗ੍ਗਸਾਵਕਾਨਂ ਪਟਿਯਾਦਿਤਂ ਸਕ੍ਕਾਰਂ ਓਲੋਕੇਤ੍ਵਾ ਗਹਪਤਿਂ ਜਾਤਿਯਾ ਘਟ੍ਟੇਤੁਕਾਮੋ ‘‘ਉਲ਼ਾਰੋ ਤੇ, ਗਹਪਤਿ, ਸਕ੍ਕਾਰੋ, ਅਪਿਚੇਤ੍ਥ ਏਕਞ੍ਞੇਵ ਨਤ੍ਥੀ’’ਤਿ ਆਹ. ‘‘ਕਿਂ, ਭਨ੍ਤੇ’’ਤਿ? ‘‘ਤਿਲਸਂਗੁਲ਼ਿਕਾ, ਗਹਪਤੀ’’ਤਿ ਵਤ੍ਵਾ ਗਹਪਤਿਨਾ ਕਾਕੋਪਮਾਯ ਅਪਸਾਦਿਤੋ ਕੁਜ੍ਝਿਤ੍ਵਾ ‘‘ਏਸੋ ਤੇ, ਗਹਪਤਿ, ਆਵਾਸੋ, ਪਕ੍ਕਮਿਸ੍ਸਾਮਹ’’ਨ੍ਤਿ ਵਤ੍ਵਾ ਯਾਵਤਤਿਯਂ ਵਾਰਿਯਮਾਨੋਪਿ ਪਕ੍ਕਮਿਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਚਿਤ੍ਤੇਨ ਚ ਅਤ੍ਤਨਾ ਚ ਵੁਤ੍ਤਵਚਨਂ ਆਰੋਚੇਸਿ. ਸਤ੍ਥਾ ‘‘ਤਯਾ ਉਪਾਸਕੋ ਸਦ੍ਧੋ ਪਸਨ੍ਨੋ ਹੀਨੇਨ ਖੁਂਸਿਤੋ’’ਤਿ ਤਸ੍ਸੇਵ ਦੋਸਂ ਆਰੋਪੇਤ੍ਵਾ ਪਟਿਸਾਰਣੀਯਕਮ੍ਮਂ ਕਾਰਾਪੇਤ੍ਵਾ ‘‘ਗਚ੍ਛ, ਚਿਤ੍ਤਗਹਪਤਿਂ ਖਮਾਪੇਹੀ’’ਤਿ ਪੇਸੇਸਿ. ਸੋ ਤਤ੍ਥ ਗਨ੍ਤ੍ਵਾ, ‘‘ਗਹਪਤਿ, ਮਯ੍ਹਮੇਵ ਸੋ ਦੋਸੋ, ਖਮਾਹਿ ਮੇ’’ਤਿ ਵਤ੍ਵਾਪਿ ‘‘ਨਾਹਂ ਖਮਾਮੀ’’ਤਿ ਤੇਨ ਪਟਿਕ੍ਖਿਤ੍ਤੋ ਮਙ੍ਕੁਭੂਤੋ ਤਂ ਖਮਾਪੇਤੁਂ ਨਾਸਕ੍ਖਿ. ਪੁਨਦੇਵ ਸਤ੍ਥੁ ਸਨ੍ਤਿਕਂ ਪਚ੍ਚਾਗਮਾਸਿ. ਸਤ੍ਥਾ ‘‘ਨਾਸ੍ਸ ਉਪਾਸਕੋ ਖਮਿਸ੍ਸਤੀ’’ਤਿ ਜਾਨਨ੍ਤੋਪਿ ‘‘ਮਾਨਥਦ੍ਧੋ ਏਸ, ਤਿਂਸਯੋਜਨਂ ਤਾਵ ਮਗ੍ਗਂ ਗਨ੍ਤ੍ਵਾ ਪਚ੍ਚਾਗਚ੍ਛਤੂ’’ਤਿ ਖਮਨੂਪਾਯਂ ਅਨਾਚਿਕ੍ਖਿਤ੍ਵਾਵ ਉਯ੍ਯੋਜੇਸਿ. ਅਥਸ੍ਸ ਪੁਨਾਗਤਕਾਲੇ ਨਿਹਤਮਾਨਸ੍ਸ ਅਨੁਦੂਤਂ ਦਤ੍ਵਾ ‘‘ਗਚ੍ਛ, ਇਮਿਨਾ ਸਦ੍ਧਿਂ ਗਨ੍ਤ੍ਵਾ ਉਪਾਸਕਂ ਖਮਾਪੇਹੀ’’ਤਿ ਵਤ੍ਵਾ ‘‘ਸਮਣੇਨ ਨਾਮ ‘ਮਯ੍ਹਂ ਵਿਹਾਰੋ, ਮਯ੍ਹਂ ਨਿਵਾਸਟ੍ਠਾਨਂ, ਮਯ੍ਹਂ ਉਪਾਸਕੋ, ਮਯ੍ਹਂ ਉਪਾਸਿਕਾ’ਤਿ ਮਾਨਂ ਵਾ ਇਸ੍ਸਂ ਵਾ ਕਾਤੁਂ ਨ ਵਟ੍ਟਤਿ. ਏਵਂ ਕਰੋਨ੍ਤਸ੍ਸ ਹਿ ਇਚ੍ਛਾਮਾਨਾਦਯੋ ਕਿਲੇਸਾ ਵਡ੍ਢਨ੍ਤੀ’’ਤਿ ਅਨੁਸਨ੍ਧਿਂ ਘਟ੍ਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਾ ਗਾਥਾ ਅਭਾਸਿ –

੭੩. ‘‘ਅਸਨ੍ਤਂ ਭਾਵਨਮਿਚ੍ਛੇਯ੍ਯ, ਪੁਰੇਕ੍ਖਾਰਞ੍ਚ ਭਿਕ੍ਖੁਸੁ;

ਆਵਾਸੇਸੁ ਇਸ੍ਸਰਿਯਂ, ਪੂਜਾ ਪਰਕੁਲੇਸੁ ਚ.

੭੪. ‘‘ਮਮੇਵ ਕਤ ਮਞ੍ਞਨ੍ਤੁ, ਗਿਹੀ ਪਬ੍ਬਜਿਤਾ ਉਭੋ.

ਮਮੇਵਾਤਿਵਸਾ ਅਸ੍ਸੁ, ਕਿਚ੍ਚਾਕਿਚ੍ਚੇਸੁ ਕਿਸ੍ਮਿਚਿ;

ਇਤਿ ਬਾਲਸ੍ਸ ਸਙ੍ਕਪ੍ਪੋ, ਇਚ੍ਛਾ ਮਾਨੋ ਚ ਵਡ੍ਢਤੀ’’ਤਿ.

ਤਤ੍ਥ ਅਸਨ੍ਤਨ੍ਤਿ ਯੋ ਬਾਲੋ ਭਿਕ੍ਖੁ ਅਵਿਜ੍ਜਮਾਨਂ ਸਮ੍ਭਾਵਨਂ ਇਚ੍ਛੇਯ੍ਯ, ‘‘ਅਸ੍ਸਦ੍ਧੋਵ ਸਮਾਨੋ ‘ਸਦ੍ਧੋਤਿ ਮਂ ਜਨੋ ਜਾਨਾਤੂ’ਤਿ ਇਚ੍ਛਤੀ’’ਤਿ. ਪਾਪਿਚ੍ਛਤਾਨਿਦ੍ਦੇਸੇ (ਵਿਭ. ੮੫੧) ਵੁਤ੍ਤਨਯੇਨੇਵ ਬਾਲੋ ‘‘ਅਸਦ੍ਧੋ ਦੁਸ੍ਸੀਲੋ ਅਪ੍ਪਸ੍ਸੁਤੋ ਅਪ੍ਪਵਿਵਿਤ੍ਤੋ ਕੁਸੀਤੋ ਅਨੁਪਟ੍ਠਿਤਸ੍ਸਤਿ ਅਸਮਾਹਿਤੋ ਦੁਪ੍ਪਞ੍ਞੋ ਅਖੀਣਾਸਵੋਵ ਸਮਾਨੋ ‘ਅਹੋ ਵਤ ਮਂ ਜਨੋ ਅਯਂ ਸਦ੍ਧੋ, ਸੀਲਵਾ, ਬਹੁਸ੍ਸੁਤੋ, ਪਵਿਵਿਤ੍ਤੋ, ਆਰਦ੍ਧਵੀਰਿਯੋ, ਉਪਟ੍ਠਿਤਸ੍ਸਤਿ, ਸਮਾਹਿਤੋ, ਪਞ੍ਞਵਾ, ਖੀਣਾਸਵੋ’ਤਿ ਜਾਨੇਯ੍ਯਾ’’ਤਿ ਇਦਂ ਅਸਨ੍ਤਸਮ੍ਭਾਵਨਂ ਇਚ੍ਛਤਿ. ਪੁਰੇਕ੍ਖਾਰਨ੍ਤਿ ਪਰਿਵਾਰਂ. ‘‘ਅਹੋ ਵਤ ਮਂ ਸਕਲਵਿਹਾਰੇ ਭਿਕ੍ਖੂ ਪਰਿਵਾਰੇਤ੍ਵਾ ਪਞ੍ਹਂ ਪੁਚ੍ਛਨ੍ਤਾ ਵਿਹਰੇਯ੍ਯੁ’’ਨ੍ਤਿ ਏਵਂ ਇਚ੍ਛਾਚਾਰੇ ਠਤ੍ਵਾ ਪੁਰੇਕ੍ਖਾਰਞ੍ਚ ਭਿਕ੍ਖੂਸੁ ਇਚ੍ਛਤਿ. ਆਵਾਸੇਸੂਤਿ ਸਙ੍ਘਿਕੇਸੁ ਚ ਆਵਾਸੇਸੁ ਯਾਨਿ ਵਿਹਾਰਮਜ੍ਝੇ ਪਣੀਤਸੇਨਾਸਨਾਨਿ, ਤਾਨਿ ਅਤ੍ਤਨੋ ਸਨ੍ਦਿਟ੍ਠਸਮ੍ਭਤ੍ਤਾਦੀਨਂ ਭਿਕ੍ਖੂਨਂ ‘‘ਤੁਮ੍ਹੇ ਇਧ ਵਸਥਾ’’ਤਿ ਵਿਚਾਰੇਨ੍ਤੋ ਸਯਮ੍ਪਿ ਵਰਤਰਂ ਸੇਨਾਸਨਂ ਪਲਿਬੋਧੇਨ੍ਤੋ, ਸੇਸਾਨਂ ਆਗਨ੍ਤੁਕਭਿਕ੍ਖੂਨਂ ਪਚ੍ਚਨ੍ਤਿਮਾਨਿ ਲਾਮਕਸੇਨਾਸਨਾਨਿ ਚੇਵ ਅਮਨੁਸ੍ਸਪਰਿਗ੍ਗਹਿਤਾਨਿ ਚ ‘‘ਤੁਮ੍ਹੇ ਇਧ ਵਸਥਾ’’ਤਿ ਵਿਚਾਰੇਨ੍ਤੋ ਆਵਾਸੇਸੁ ਇਸ੍ਸਰਿਯਂ ਇਚ੍ਛਤਿ. ਪੂਜਾ ਪਰਕੁਲੇਸੁ ਚਾਤਿ ਨੇਵ ਮਾਤਾਪਿਤੂਨਂ ਨ ਞਾਤਕਾਨਂ ਪਰੇਸੁਯੇਵ ਕੁਲੇਸੁ ‘‘ਅਹੋ ਵਤਿਮੇ ਮਯ੍ਹਮੇਵ ਦਦੇਯ੍ਯੁਂ, ਨ ਅਞ੍ਞੇਸ’’ਨ੍ਤਿ ਏਵਂ ਚਤੁਪ੍ਪਚ੍ਚਯੇਹਿ ਪੂਜਂ ਇਚ੍ਛਤਿ.

ਮਮੇਵ ਕਤ ਮਞ੍ਞਨ੍ਤੂਤਿ ਯਸ੍ਸ ਚ ਬਾਲਸ੍ਸ ‘‘ਯਂਕਿਞ੍ਚਿ ਵਿਹਾਰੇ ਉਪੋਸਥਾਗਾਰਾਦਿਕਰਣਵਸੇਨ ਕਤਂ ਨਵਕਮ੍ਮਂ, ਤਂ ਸਬ੍ਬਂ ਅਮ੍ਹਾਕਂ ਥੇਰੇਨ ਕਤਨ੍ਤਿ ਏਵਂ ਗਿਹੀ ਚ ਪਬ੍ਬਜਿਤਾ ਚ ਉਭੋਪਿ ਮਮੇਵ ਨਿਸ੍ਸਾਯ ਕਤਂ ਪਰਿਕਮ੍ਮਂ ਨਿਟ੍ਠਿਤਂ ਮਞ੍ਞਨ੍ਤੂ’’ਤਿ ਸਙ੍ਕਪ੍ਪੋ ਉਪ੍ਪਜ੍ਜਤਿ. ਮਮੇਵਾਤਿਵਸਾ ਅਸ੍ਸੂਤਿ ‘‘ਗਿਹੀ ਚ ਪਬ੍ਬਜਿਤਾ ਚ ਸਬ੍ਬੇਪਿ ਮਮੇਵ ਵਸੇ ਵਤ੍ਤਨ੍ਤੁ, ਸਕਟਗੋਣਵਾਸਿਫਰਸੁਆਦੀਨਿ ਵਾ ਲਦ੍ਧਬ੍ਬਾਨਿ ਹੋਨ੍ਤੁ, ਅਨ੍ਤਮਸੋ ਯਾਗੁਮਤ੍ਤਮ੍ਪਿ ਤਾਪੇਤ੍ਵਾ ਪਿਵਨਾਦੀਨਿ ਵਾ, ਏਵਰੂਪੇਸੁ ਕਿਚ੍ਚਾਕਿਚ੍ਚੇਸੁ ਖੁਦ੍ਦਕਮਹਨ੍ਤੇਸੁ ਕਰਣੀਯੇਸੁ ਕਿਸ੍ਮਿਞ੍ਚਿ ਏਕਕਿਚ੍ਚੇਪਿ ਮਮੇਵ ਵਸੇ ਵਤ੍ਤਨ੍ਤੁ, ਮਮੇਵ ਆਪੁਚ੍ਛਿਤ੍ਵਾ ਕਰੋਨ੍ਤੂ’’ਤਿ ਸਙ੍ਕਪ੍ਪੋ ਉਪ੍ਪਜ੍ਜਤਿ. ਇਤਿ ਬਾਲਸ੍ਸਾਤਿ ਯਸ੍ਸ ਬਾਲਸ੍ਸ ਸਾ ਚ ਇਚ੍ਛਾ ਅਯਞ੍ਚ ਏਵਰੂਪੋ ਸਙ੍ਕਪ੍ਪੋ ਉਪ੍ਪਜ੍ਜਤਿ, ਤਸ੍ਸ ਨੇਵ ਵਿਪਸ੍ਸਨਾ, ਨ ਮਗ੍ਗਫਲਾਨਿ ਵਡ੍ਢਨ੍ਤਿ. ਕੇਵਲਂ ਪਨਸ੍ਸ ਚਨ੍ਦੋਦਯੇ ਸਮੁਦ੍ਦਸ੍ਸ ਉਦਕਂ ਵਿਯ ਛਸੁ ਦ੍ਵਾਰੇਸੁ ਉਪ੍ਪਜ੍ਜਮਾਨਾ ਤਣ੍ਹਾ ਚੇਵ ਨਵਵਿਧਮਾਨੋ ਚ ਵਡ੍ਢਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੂਤਿ.

ਸੁਧਮ੍ਮਤ੍ਥੇਰੋਪਿ ਇਮਂ ਓਵਾਦਂ ਸੁਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਦਕ੍ਖਿਣਂ ਕਤ੍ਵਾ ਤੇਨ ਅਨੁਦੂਤੇਨ ਭਿਕ੍ਖੁਨਾ ਸਦ੍ਧਿਂ ਗਨ੍ਤ੍ਵਾ ਉਪਾਸਕਸ੍ਸ ਚਕ੍ਖੁਪਥੇ ਆਪਤ੍ਤਿਂ ਪਟਿਕਰਿਤ੍ਵਾ ਉਪਾਸਕਂ ਖਮਾਪੇਸਿ. ਸੋ ਉਪਾਸਕੇਨ ‘‘ਖਮਾਮਹਂ, ਭਨ੍ਤੇ, ਸਚੇ ਮਯ੍ਹਂ ਦੋਸੋ ਅਤ੍ਥਿ, ਖਮਥ ਮੇ’’ਤਿ ਪਟਿਖਮਾਪਿਤੋ ਸਤ੍ਥਾਰਾ ਦਿਨ੍ਨੇ ਓਵਾਦੇ ਠਤ੍ਵਾ ਕਤਿਪਾਹੇਨੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਉਪਾਸਕੋਪਿ ਚਿਨ੍ਤੇਸਿ – ‘‘ਮਯਾ ਸਤ੍ਥਾਰਂ ਅਦਿਸ੍ਵਾਵ ਸੋਤਾਪਤ੍ਤਿਫਲਂ ਪਤ੍ਤਂ, ਅਦਿਸ੍ਵਾ ਏਵ ਅਨਾਗਾਮਿਫਲੇ ਪਤਿਟ੍ਠਿਤੋ, ਸਤ੍ਥਾਰਂ ਮੇ ਦਟ੍ਠੁਂ ਵਟ੍ਟਤੀ’’ਤਿ. ਸੋ ਤਿਲਤਣ੍ਡੁਲਸਪ੍ਪਿਫਾਣਿਤਵਤ੍ਥਚ੍ਛਾਦਨਾਦੀਹਿ ਪਰਿਪੂਰਾਨਿ ਪਞ੍ਚ ਸਕਟਸਤਾਨਿ ਯੋਜਾਪੇਤ੍ਵਾ ‘‘ਸਤ੍ਥਾਰਂ ਦਟ੍ਠੁਕਾਮਾ ਆਗਚ੍ਛਨ੍ਤੁ, ਪਿਣ੍ਡਪਾਤਾਦੀਹਿ ਨ ਕਿਲਮਿਸ੍ਸਨ੍ਤੀ’’ਤਿ ਭਿਕ੍ਖੁਸਙ੍ਘਸ੍ਸ ਆਰੋਚਾਪੇਤ੍ਵਾ ਭਿਕ੍ਖੁਨੀਸਙ੍ਘਸ੍ਸਾਪਿ ਉਪਾਸਕਾਨਮ੍ਪਿ ਉਪਾਸਿਕਾਨਮ੍ਪਿ ਆਰੋਚਾਪੇਸਿ. ਤੇਨ ਸਦ੍ਧਿਂ ਪਞ੍ਚਸਤਾ ਪਞ੍ਚਸਤਾ ਭਿਕ੍ਖੂ ਚ ਭਿਕ੍ਖੁਨਿਯੋ ਚ ਉਪਾਸਕਾ ਚ ਉਪਾਸਿਕਾਯੋ ਚ ਨਿਕ੍ਖਮਿਂਸੁ. ਸੋ ਤੇਸਞ੍ਚੇਵ ਅਤ੍ਤਨੋ ਪਰਿਸਾਯ ਚਾਤਿ ਤਿਣ੍ਣਂ ਜਨਸਹਸ੍ਸਾਨਂ ਯਥਾ ਤਿਂਸਯੋਜਨੇ ਮਗ੍ਗੇ ਯਾਗੁਭਤ੍ਤਾਦੀਹਿ ਕਿਞ੍ਚਿ ਵੇਕਲ੍ਲਂ ਨ ਹੋਤਿ, ਤਥਾ ਸਂਵਿਦਹਿ. ਤਸ੍ਸ ਪਨ ਨਿਕ੍ਖਨ੍ਤਭਾਵਂ ਞਤ੍ਵਾ ਯੋਜਨੇ ਯੋਜਨੇ ਦੇਵਤਾ ਖਨ੍ਧਾਵਾਰਂ ਬਨ੍ਧਿਤ੍ਵਾ ਦਿਬ੍ਬੇਹਿ ਯਾਗੁਖਜ੍ਜਕਭਤ੍ਤਪਾਨਕਾਦੀਹਿ ਤਂ ਮਹਾਜਨਂ ਉਪਟ੍ਠਹਿਂਸੁ, ਕਸ੍ਸਚਿ ਕੇਨਚਿ ਵੇਕਲ੍ਲਂ ਨ ਹੋਤਿ. ਏਵਂ ਦੇਵਤਾਹਿ ਉਪਟ੍ਠਿਯਮਾਨੋ ਦੇਵਸਿਕਂ ਯੋਜਨਂ ਗਚ੍ਛਨ੍ਤੋ ਮਾਸੇਨ ਸਾਵਤ੍ਥਿਂ ਪਾਪੁਣਿ, ਪਞ੍ਚ ਸਕਟਸਤਾਨਿ ਯਥਾਪੂਰਿਤਾਨੇਵ ਅਹੇਸੁਂ. ਦੇਵਤਾਹਿ ਚੇਵ ਮਨੁਸ੍ਸੇਹਿ ਚ ਅਭਿਹਟਂ ਪਣ੍ਣਾਕਾਰਂ ਵਿਸ੍ਸਜ੍ਜੇਨ੍ਤੋਵ ਅਗਮਾਸਿ.

ਸਤ੍ਥਾ ਆਨਨ੍ਦਤ੍ਥੇਰਂ ਆਹ – ‘‘ਆਨਨ੍ਦ, ਅਜ੍ਜ ਵਡ੍ਢਮਾਨਕਚ੍ਛਾਯਾਯ ਚਿਤ੍ਤੋ ਗਹਪਤਿ ਪਞ੍ਚਹਿ ਉਪਾਸਕਸਤੇਹਿ ਪਰਿਵੁਤੋ ਆਗਨ੍ਤ੍ਵਾ ਮਂ ਵਨ੍ਦਿਸ੍ਸਤੀ’’ਤਿ. ‘‘ਕਿਂ ਪਨ, ਭਨ੍ਤੇ, ਤਸ੍ਸ ਤੁਮ੍ਹਾਕਂ ਵਨ੍ਦਨਕਾਲੇ ਕਿਞ੍ਚਿ ਪਾਟਿਹਾਰਿਯਂ ਭਵਿਸ੍ਸਤੀ’’ਤਿ? ‘‘ਭਵਿਸ੍ਸਤਿ, ਆਨਨ੍ਦਾ’’ਤਿ. ‘‘ਕਿਂ, ਭਨ੍ਤੇ’’ਤਿ? ਤਸ੍ਸ ਆਗਨ੍ਤ੍ਵਾ ‘‘ਮਂ ਵਨ੍ਦਨਕਾਲੇ ਰਾਜਮਾਨੇਨ ਅਟ੍ਠਕਰੀਸਮਤ੍ਤੇ ਪਦੇਸੇ ਜਣ੍ਣੁਕਮਤ੍ਤੇਨ ਓਧਿਨਾ ਪਞ੍ਚਵਣ੍ਣਾਨਂ ਦਿਬ੍ਬਪੁਪ੍ਫਾਨਂ ਘਨਵਸ੍ਸਂ ਵਸ੍ਸਿਸ੍ਸਤੀ’’ਤਿ. ਤਂ ਕਥਂ ਸੁਤ੍ਵਾ ਨਗਰਵਾਸਿਨੋ ‘‘ਏਵਂ ਮਹਾਪੁਞ੍ਞੋ ਕਿਰ ਚਿਤ੍ਤੋ ਨਾਮ ਗਹਪਤਿ ਆਗਨ੍ਤ੍ਵਾ ਅਜ੍ਜ ਸਤ੍ਥਾਰਂ ਵਨ੍ਦਿਸ੍ਸਤਿ, ਏਵਰੂਪਂ ਕਿਰ ਪਾਟਿਹਾਰਿਯਂ ਭਵਿਸ੍ਸਤਿ, ਮਯਮ੍ਪਿ ਤਂ ਮਹਾਪੁਞ੍ਞਂ ਦਟ੍ਠੁਂ ਲਭਿਸ੍ਸਾਮਾ’’ਤਿ ਪਣ੍ਣਾਕਾਰਂ ਆਦਾਯ ਮਗ੍ਗਸ੍ਸ ਉਭੋਸੁ ਪਸ੍ਸੇਸੁ ਅਟ੍ਠਂਸੁ. ਵਿਹਾਰਸਮੀਪੇ ਆਗਤਕਾਲੇ ਪਞ੍ਚ ਭਿਕ੍ਖੁਸਤਾਨਿ ਪਠਮਂ ਆਗਮਿਂਸੁ. ਚਿਤ੍ਤੋ ਗਹਪਤਿ, ‘‘ਅਮ੍ਮਾ, ਤੁਮ੍ਹੇ ਪਚ੍ਛਤੋ ਆਗਚ੍ਛਥਾ’’ਤਿ ਮਹਾਉਪਾਸਿਕਾਯੋ ਠਪੇਤ੍ਵਾ ਪਞ੍ਚਹਿ ਉਪਾਸਕਸਤੇਹਿ ਪਰਿਵੁਤੋ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਬੁਦ੍ਧਾਨਂ ਸਮ੍ਮੁਖਟ੍ਠਾਨੇ ਪਨ ਠਿਤਾ ਵਾ ਨਿਸਿਨ੍ਨਾ ਵਾ ਇਤੋ ਵਾ ਏਤ੍ਤੋ ਵਾ ਨ ਹੋਨ੍ਤਿ, ਬੁਦ੍ਧਵੀਥਿਯਾ ਦ੍ਵੀਸੁ ਪਸ੍ਸੇਸੁ ਨਿਚ੍ਚਲਾਵ ਤਿਟ੍ਠਨ੍ਤਿ. ਚਿਤ੍ਤੋ ਗਹਪਤਿ ਮਹਨ੍ਤਂ ਬੁਦ੍ਧਵੀਥਿਂ ਓਕ੍ਕਮਿ. ਤੀਣਿ ਫਲਾਨਿ ਪਤ੍ਤੇਨ ਅਰਿਯਸਾਵਕੇਨ ਓਲੋਕਿਤੋਲੋਕਿਤਟ੍ਠਾਨਂ ਕਮ੍ਪਿ. ‘‘ਏਸੋ ਕਿਰ ਚਿਤ੍ਤੋ ਗਹਪਤੀ’’ਤਿ ਮਹਾਜਨੋ ਓਲੋਕੇਸਿ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਛਬ੍ਬਣ੍ਣਾਨਂ ਬੁਦ੍ਧਰਸ੍ਮੀਨਂ ਅਨ੍ਤੋ ਪਵਿਸਿਤ੍ਵਾ ਦ੍ਵੀਸੁ ਗੋਪ੍ਫਕੇਸੁ ਸਤ੍ਥੁ ਪਾਦੇ ਗਹੇਤ੍ਵਾ ਵਨ੍ਦਿ. ਤਂ ਖਣਞ੍ਞੇਵ ਵੁਤ੍ਤਪ੍ਪਕਾਰਂ ਪੁਪ੍ਫਵਸ੍ਸਂ ਵਸ੍ਸਿ, ਸਾਧੁਕਾਰਸਹਸ੍ਸਾਨਿ ਪਵਤ੍ਤਯਿਂਸੁ. ਸੋ ਏਕਮਾਸਂ ਸਤ੍ਥੁ ਸਨ੍ਤਿਕੇ ਵਸਿ, ਵਸਮਾਨੋ ਚ ਸਕਲਂ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਵਿਹਾਰੇਯੇਵ ਨਿਸੀਦਾਪੇਤ੍ਵਾ ਮਹਾਦਾਨਂ ਅਦਾਸਿ, ਅਤ੍ਤਨਾ ਸਦ੍ਧਿਂ ਆਗਤੇਪਿ ਅਨ੍ਤੋਵਿਹਾਰੇਯੇਵ ਕਤ੍ਵਾ ਪਟਿਜਗ੍ਗਿ. ਏਕਦਿਵਸਮ੍ਪਿ ਅਤ੍ਤਨੋ ਸਕਟੇਸੁ ਕਿਞ੍ਚਿ ਗਹੇਤਬ੍ਬਂ ਨਾਹੋਸਿ, ਦੇਵਮਨੁਸ੍ਸੇਹਿ ਆਭਤਪਣ੍ਣਾਕਾਰੇਨੇਵ ਦਾਨਂ ਅਦਾਸਿ, ਸਬ੍ਬਕਿਚ੍ਚਾਨਿ ਅਕਾਸਿ. ਸੋ ਸਤ੍ਥਾਰਂ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਅਹਂ ‘ਤੁਮ੍ਹਾਕਂ ਦਾਨਂ ਦਸ੍ਸਾਮੀ’ਤਿ ਆਗਚ੍ਛਨ੍ਤੋ ਮਾਸਂ ਅਨ੍ਤਰਾਮਗ੍ਗੇ ਅਹੋਸਿਂ. ਇਧੇਵ ਮੇ ਮਾਸੋ ਵੀਤਿਵਤ੍ਤੋ, ਮਯਾ ਆਭਤਂ ਪਣ੍ਣਾਕਾਰਂ ਕਿਞ੍ਚਿ ਗਹੇਤੁਂ ਨ ਲਭਾਮਿ, ਏਤ੍ਤਕਂ ਕਾਲਂ ਦੇਵਮਨੁਸ੍ਸੇਹਿ ਆਭਤਪਣ੍ਣਾਕਾਰੇਨੇਵ ਦਾਨਂ ਅਦਾਸਿਂ, ਸੋਹਂ ਸਚੇਪਿ ਇਧ ਸਂਵਚ੍ਛਰਂ ਵਸਿਸ੍ਸਾਮਿ, ਨੇਵ ਮਮ ਦੇਯ੍ਯਧਮ੍ਮਂ ਦਾਤੁਂ ਲਭਿਸ੍ਸਾਮਿ. ਅਹਂ ਸਕਟਾਨਿ ਓਤਾਰੇਤ੍ਵਾ ਗਨ੍ਤੁਂ ਇਚ੍ਛਾਮਿ, ਪਟਿਸਾਮਨਟ੍ਠਾਨਂ ਮੇ ਆਰੋਚਾਪੇਥਾ’’ਤਿ.

ਸਤ੍ਥਾ ਆਨਨ੍ਦਤ੍ਥੇਰਂ ਆਹ – ‘‘ਆਨਨ੍ਦ, ਉਪਾਸਕਸ੍ਸ ਏਕਂ ਪਦੇਸਂ ਤੁਚ੍ਛਂ ਕਾਰੇਤ੍ਵਾ ਦੇਹੀ’’ਤਿ. ਥੇਰੋ ਤਥਾ ਅਕਾਸਿ. ਕਪ੍ਪਿਯਭੂਮਿ (ਮਹਾਵ. ੨੯੫) ਕਿਰ ਚਿਤ੍ਤਸ੍ਸ ਗਹਪਤਿਨੋ ਅਨੁਞ੍ਞਾਤਾ. ਉਪਾਸਕੋਪਿ ਅਤ੍ਤਨਾ ਸਦ੍ਧਿਂ ਆਗਤੇਹਿ ਤੀਹਿ ਜਨਸਹਸ੍ਸੇਹਿ ਸਦ੍ਧਿਂ ਤੁਚ੍ਛਸਕਟੇਹਿ ਪੁਨ ਮਗ੍ਗਂ ਪਟਿਪਜ੍ਜਿ. ਦੇਵਮਨੁਸ੍ਸਾ ਉਟ੍ਠਾਯ, ‘‘ਅਯ੍ਯ, ਤਯਾ ਤੁਚ੍ਛਸਕਟੇਹਿ ਗਮਨਕਮ੍ਮਂ ਕਤ’’ਨ੍ਤਿ ਸਤ੍ਤਹਿ ਰਤਨੇਹਿ ਸਕਟਾਨਿ ਪੂਰਯਿਂਸੁ. ਸੋ ਅਤ੍ਤਨੋ ਆਭਤਪਣ੍ਣਾਕਾਰੇਨੇਵ ਮਹਾਜਨਂ ਪਟਿਜਗ੍ਗਨ੍ਤੋ ਅਗਮਾਸਿ. ਆਨਨ੍ਦਤ੍ਥੇਰੋ ਸਤ੍ਥਾਰਂ ਵਨ੍ਦਿਤ੍ਵਾ ਆਹ – ‘‘ਭਨ੍ਤੇ, ਤੁਮ੍ਹਾਕਂ ਸਨ੍ਤਿਕਂ ਆਗਚ੍ਛਨ੍ਤੋਪਿ ਮਾਸੇਨ ਆਗਤੋ, ਇਧਾਪਿ ਮਾਸਮੇਵ ਵੁਟ੍ਠੋ, ਏਤ੍ਤਕਂ ਕਾਲਂ ਦੇਵਮਨੁਸ੍ਸੇਹਿ ਅਭਿਹਟਪਣ੍ਣਾਕਾਰੇਨੇਵ ਮਹਾਵਦਾਨਂ ਅਦਾਸਿ, ਇਦਾਨਿ ਪਞ੍ਚ ਸਕਟਸਤਾਨਿ ਤੁਚ੍ਛਾਨਿ ਕਤ੍ਵਾ ਮਾਸੇਨੇਵ ਕਿਰ ਗਮਿਸ੍ਸਤਿ, ਦੇਵਮਨੁਸ੍ਸਾ ਪਨਸ੍ਸ ਉਟ੍ਠਾਯ, ‘ਅਯ੍ਯ, ਤਯਾ ਤੁਚ੍ਛਸਕਟੇਹਿ ਗਮਨਕਮ੍ਮਂ ਕਤ’ਨ੍ਤਿ ਪਞ੍ਚ ਸਕਟਸਤਾਨਿ ਸਤ੍ਤਰਤਨੇਹਿ ਪੂਰਯਿਂਸੁ. ਸੋ ਪੁਨ ਅਤ੍ਤਨੋ ਆਭਤਪਣ੍ਣਾਕਾਰੇਨੇਵ ਕਿਰ ਮਹਾਜਨਂ ਪਟਿਜਗ੍ਗਨ੍ਤੋ ਗਮਿਸ੍ਸਤੀ’’ਤਿ. ‘‘ਕਿਂ ਪਨ, ਭਨ੍ਤੇ, ਏਤਸ੍ਸ ਤੁਮ੍ਹਾਕਂ ਸਨ੍ਤਿਕਂ ਆਗਚ੍ਛਨ੍ਤਸ੍ਸੇਵਾਯਂ ਸਕ੍ਕਾਰੋ ਉਪ੍ਪਜ੍ਜਤਿ, ਉਦਾਹੁ ਅਞ੍ਞਤ੍ਥ ਗਚ੍ਛਨ੍ਤਸ੍ਸਾਪਿ ਉਪ੍ਪਜ੍ਜਤੀ’’ਤਿ? ‘‘ਆਨਨ੍ਦ, ਮਮ ਸਨ੍ਤਿਕਂ ਆਗਚ੍ਛਨ੍ਤਸ੍ਸਾਪਿ ਅਞ੍ਞਤ੍ਥ ਗਚ੍ਛਨ੍ਤਸ੍ਸਾਪਿ ਏਤਸ੍ਸ ਉਪ੍ਪਜ੍ਜਤੇਵ. ਅਯਞ੍ਹਿ ਉਪਾਸਕੋ ਸਦ੍ਧੋ ਪਸਨ੍ਨੋ ਸਮ੍ਪਨ੍ਨਸੀਲੋ, ਏਵਰੂਪੋ ਪੁਗ੍ਗਲੋ ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵਸ੍ਸ ਲਾਭਸਕ੍ਕਾਰੋ ਨਿਬ੍ਬਤ੍ਤਤੀ’’ਤਿ ਵਤ੍ਵਾ ਸਤ੍ਥਾ ਇਮਂ ਪਕਿਣ੍ਣਕਵਗ੍ਗੇ ਗਾਥਮਾਹ –

‘‘ਸਦ੍ਧੋ ਸੀਲੇਨ ਸਮ੍ਪਨ੍ਨੋ, ਯਸੋ ਭੋਗਸਮਪ੍ਪਿਤੋ;

ਯਂ ਯਂ ਪਦੇਸਂ ਭਜਤਿ, ਤਤ੍ਥ ਤਤ੍ਥੇਵ ਪੂਜਿਤੋ’’ਤਿ. (ਧ. ਪ. ੩੦੩);

ਅਤ੍ਥੋ ਪਨਸ੍ਸਾ ਤਤ੍ਥੇਵ ਆਵਿਭਵਿਸ੍ਸਤਿ.

ਏਵਂ ਵੁਤ੍ਤੇ ਆਨਨ੍ਦਤ੍ਥੇਰੋ ਚਿਤ੍ਤਸ੍ਸ ਪੁਬ੍ਬਕਮ੍ਮਂ ਪੁਚ੍ਛਿ. ਅਥਸ੍ਸ ਸਤ੍ਥਾ ਆਚਿਕ੍ਖਨ੍ਤੋ ਆਹ –

ਆਨਨ੍ਦ, ਅਯਂ ਪਦੁਮੁਤ੍ਤਰਸ੍ਸ ਭਗਵਤੋ ਪਾਦਮੂਲੇ ਕਤਾਭਿਨੀਹਾਰੋ ਕਪ੍ਪਸਤਸਹਸ੍ਸਂ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਕਸ੍ਸਪਬੁਦ੍ਧਕਾਲੇ ਮਿਗਲੁਦ੍ਦਕਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਏਕਦਿਵਸਂ ਦੇਵੇ ਵਸ੍ਸਨ੍ਤੇ ਮਿਗਾਨਂ ਮਾਰਣਤ੍ਤਾਯ ਸਤ੍ਤਿਂ ਆਦਾਯ ਅਰਞ੍ਞਂ ਗਨ੍ਤ੍ਵਾ ਮਿਗੇ ਓਲੋਕੇਨ੍ਤੋ ਏਕਸ੍ਮਿਂ ਅਕਟਪਬ੍ਭਾਰੇ ਸਸੀਸਂ ਪਾਰੁਪਿਤ੍ਵਾ ਏਕਂ ਭਿਕ੍ਖੁਂ ਨਿਸਿਨ੍ਨਂ ਦਿਸ੍ਵਾ ‘‘ਏਕੋ, ਅਯ੍ਯੋ, ਸਮਣਧਮ੍ਮਂ ਕਰੋਨ੍ਤੋ ਨਿਸਿਨ੍ਨੋ ਭਵਿਸ੍ਸਤਿ, ਭਤ੍ਤਮਸ੍ਸ ਆਹਰਿਸ੍ਸਾਮੀ’’ਤਿ ਵੇਗੇਨ ਗੇਹਂ ਗਨ੍ਤ੍ਵਾ ਏਕਸ੍ਮਿਂ ਉਦ੍ਧਨੇ ਹਿਯ੍ਯੋ, ਆਭਤਮਂਸਂ, ਏਕਸ੍ਮਿਂ ਭਤ੍ਤਂ ਪਚਾਪੇਤ੍ਵਾ ਅਞ੍ਞੇ ਪਿਣ੍ਡਪਾਤਚਾਰਿਕੇ ਭਿਕ੍ਖੂ ਦਿਸ੍ਵਾ ਤੇਸਮ੍ਪਿ ਪਤ੍ਤੇ ਆਦਾਯ ਪਞ੍ਞਤ੍ਤਾਸਨੇ ਨਿਸੀਦਾਪੇਤ੍ਵਾ ਭਿਕ੍ਖਂ ਸਮ੍ਪਾਦੇਤ੍ਵਾ, ‘‘ਅਯ੍ਯੇ, ਪਰਿਵਿਸਥਾ’’ਤਿ ਅਞ੍ਞਂ ਆਣਾਪੇਤ੍ਵਾ ਤਂ ਭਤ੍ਤਂ ਪੁਟਕੇ ਪਕ੍ਖਿਪਿਤ੍ਵਾ ਆਦਾਯ ਗਚ੍ਛਨ੍ਤੋ ਅਨ੍ਤਰਾਮਗ੍ਗੇ ਨਾਨਾਪੁਪ੍ਫਾਨਿ ਓਚਿਨਿਤ੍ਵਾ ਪਤ੍ਤਪੁਟੇ ਕਤ੍ਵਾ ਥੇਰਸ੍ਸ ਨਿਸਿਨ੍ਨਟ੍ਠਾਨਂ ਗਨ੍ਤ੍ਵਾ ‘‘ਮਯ੍ਹਂ, ਭਨ੍ਤੇ, ਸਙ੍ਗਹਂ ਕਰੋਥਾ’’ਤਿ ਵਤ੍ਵਾ ਪਤ੍ਤਂ ਆਦਾਯ ਪੂਰੇਤ੍ਵਾ ਥੇਰਸ੍ਸ ਹਤ੍ਥੇ ਠਪੇਤ੍ਵਾ ਤੇਹਿ ਪੁਪ੍ਫੇਹਿ ਪੂਜਂ ਕਤ੍ਵਾ ‘‘ਯਥਾ ਮੇ ਅਯਂ ਰਸਪਿਣ੍ਡਪਾਤੋ ਪੁਪ੍ਫਪੂਜਾਯ ਸਦ੍ਧਿਂ ਚਿਤ੍ਤਂ ਤੋਸੇਸਿ, ਏਵਂ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਪਣ੍ਣਾਕਾਰਸਹਸ੍ਸਾਨਿ ਆਦਾਯ ਆਗਨ੍ਤ੍ਵਾ ਮਯ੍ਹਂ ਚਿਤ੍ਤਂ ਤੋਸੇਨ੍ਤੁ, ਪਞ੍ਚਵਣ੍ਣਕੁਸੁਮਵਸ੍ਸਞ੍ਚ ਵਸ੍ਸਤੂ’’ਤਿ ਪਤ੍ਥਨਂ ਪਟ੍ਠਪੇਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ, ਨਿਬ੍ਬਤ੍ਤਟ੍ਠਾਨੇ ਜਣ੍ਣੁਕਮਤ੍ਤੇਨ ਓਧਿਨਾ ਦਿਬ੍ਬਪੁਪ੍ਫਵਸ੍ਸਂ ਵਸ੍ਸਿ. ਇਦਾਨਿਪਿਸ੍ਸ ਜਾਤਦਿਵਸੇ ਚੇਵ ਇਧ ਚ ਆਗਤਸ੍ਸ ਪੁਪ੍ਫਵਸ੍ਸਵਸ੍ਸਨਞ੍ਚ ਪਣ੍ਣਾਕਾਰਾਭਿਹਾਰੋ ਚ ਸਤ੍ਤਹਿ ਰਤਨੇਹਿ ਸਕਟਪੂਰਣਞ੍ਚ ਤਸ੍ਸੇਵ ਕਮ੍ਮਸ੍ਸ ਨਿਸ੍ਸਨ੍ਦੋਤਿ.

ਚਿਤ੍ਤਗਹਪਤਿਵਤ੍ਥੁ ਚੁਦ੍ਦਸਮਂ.