੧੩. ਸਟ੍ਠਿਕੂਟਪੇਤਵਤ੍ਥੁ

ਯਾਵਦੇਵ ਅਨਤ੍ਥਾਯਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਸਟ੍ਠਿਕੂਟਪੇਤਂ ਆਰਬ੍ਭ ਕਥੇਸਿ.

ਪੁਰਿਮਨਯੇਨੇਵ ਹਿ ਮਹਾਮੋਗ੍ਗਲ੍ਲਾਨਤ੍ਥੇਰੋ ਲਕ੍ਖਣਤ੍ਥੇਰੇਨ ਸਦ੍ਧਿਂ ਗਿਜ੍ਝਕੂਟਾ ਓਰੋਹਨ੍ਤੋ ਅਞ੍ਞਤਰਸ੍ਮਿਂ ਪਦੇਸੇ ਸਿਤਂ ਪਾਤ੍ਵਾਕਾਸਿ. ਥੇਰੇਨ ਸਿਤਕਾਰਣਂ ਪੁਟ੍ਠੋ ‘‘ਭਗਵਤੋ ਸਨ੍ਤਿਕੇ ਮਂ ਪੁਚ੍ਛੇਯ੍ਯਾਸੀ’’ਤਿ ਵਤ੍ਵਾ ਪਿਣ੍ਡਾਯ ਚਰਿਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਨਿਸਿਨ੍ਨਕਾਲੇ ਪੁਨ ਪੁਟ੍ਠੋ ਆਹ – ‘‘ਅਹਂ, ਆਵੁਸੋ, ਏਕਂ ਪੇਤਂ ਅਦ੍ਦਸਂ ਤਿਗਾਵੁਤਪ੍ਪਮਾਣੇਨ ਅਤ੍ਤਭਾਵੇਨ, ਤਸ੍ਸ ਸਟ੍ਠਿ ਅਯਕੂਟਸਹਸ੍ਸਾਨਿ ਆਦਿਤ੍ਤਾਨਿ ਸਮ੍ਪਜ੍ਜਲਿਤਾਨਿ ਉਪਰਿਮਤ੍ਥਕੇ ਪਤਿਤ੍ਵਾ ਪਤਿਤ੍ਵਾ ਉਟ੍ਠਹਨ੍ਤਿ ਸੀਸਂ ਭਿਨ੍ਦਨ੍ਤਿ, ਭਿਨ੍ਨਂ ਭਿਨ੍ਨਂ ਪੁਨ ਸਮੁਟ੍ਠਹਤਿ, ਇਮਿਨਾ ਅਤ੍ਤਭਾਵੇਨ ਮਯਾ ਏਵਰੂਪੋ ਅਤ੍ਤਭਾਵੋ ਨ ਦਿਟ੍ਠਪੁਬ੍ਬੋ, ਅਹਂ ਤਂ ਦਿਸ੍ਵਾ ਸਿਤਂ ਪਾਤ੍ਵਾਕਾਸਿ’’ਨ੍ਤਿ. ਪੇਤਵਤ੍ਥੁਸ੍ਮਿਞ੍ਹਿ –

‘‘ਸਟ੍ਠਿ ਕੂਟਸਹਸ੍ਸਾਨਿ, ਪਰਿਪੁਣ੍ਣਾਨਿ ਸਬ੍ਬਸੋ;

ਸੀਸੇ ਤੁਯ੍ਹਂ ਨਿਪਤਨ੍ਤਿ, ਵੋਭਿਨ੍ਦਨ੍ਤੇਵ ਮਤ੍ਥਕ’’ਨ੍ਤਿ. (ਪੇ. ਵ. ੮੦੮, ੮੧੦, ੮੧੩) ਆਦਿ –

ਇਮਮੇਵ ਪੇਤਂ ਸਨ੍ਧਾਯ ਵੁਤ੍ਤਂ. ਸਤ੍ਥਾ ਥੇਰਸ੍ਸ ਕਥਂ ਸੁਤ੍ਵਾਵ, ‘‘ਭਿਕ੍ਖਵੇ, ਮਯਾਪੇਸ ਸਤ੍ਤੋ ਬੋਧਿਮਣ੍ਡੇ ਨਿਸਿਨ੍ਨੇਨੇਵ ਦਿਟ੍ਠੋ ‘ਯੇ ਚ ਪਨ ਮੇ ਵਚਨਂ ਨ ਸਦ੍ਦਹੇਯ੍ਯੁਂ, ਤੇਸਂ ਅਹਿਤਾਯ ਭਵੇਯ੍ਯਾ’ਤਿ ਪਰੇਸਂ ਅਨੁਕਮ੍ਪਾਯ ਨ ਕਥੇਸਿਂ, ਇਦਾਨਿ ਪਨ ਮੋਗ੍ਗਲ੍ਲਾਨਸ੍ਸ ਸਕ੍ਖੀ ਹੁਤ੍ਵਾ ਕਥੇਮੀ’’ਤਿ ਆਹ. ਤਂ ਸੁਤ੍ਵਾ ਭਿਕ੍ਖੂ ਤਸ੍ਸ ਪੁਬ੍ਬਕਮ੍ਮਂ ਪੁਚ੍ਛਿਂਸੁ. ਸਤ੍ਥਾਪਿ ਨੇਸਂ ਕਥੇਸਿ –

ਅਤੀਤੇ ਕਿਰ ਬਾਰਾਣਸਿਯਂ ਸਾਲ਼ਿਤ੍ਤਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਏਕੋ ਪੀਠਸਪ੍ਪਿ ਅਹੋਸਿ. ਸੋ ਨਗਰਦ੍ਵਾਰੇ ਏਕਸ੍ਸ ਵਟਰੁਕ੍ਖਸ੍ਸ ਹੇਟ੍ਠਾ ਨਿਸਿਨ੍ਨੋ ਸਕ੍ਖਰਾਨਿ ਖਿਪਿਤ੍ਵਾ ਤਸ੍ਸ ਪਣ੍ਣਾਨਿ ਛਿਨ੍ਦਨ੍ਤੋ ‘‘ਹਤ੍ਥਿਰੂਪਕਂ ਨੋ ਦਸ੍ਸੇਹਿ, ਅਸ੍ਸਰੂਪਕਂ ਨੋ ਦਸ੍ਸੇਹੀ’’ਤਿ ਗਾਮਦਾਰਕੇਹਿ ਵੁਚ੍ਚਮਾਨੋ ਇਚ੍ਛਿਤਿਚ੍ਛਿਤਾਨਿ ਰੂਪਾਨਿ ਦਸ੍ਸੇਤ੍ਵਾ ਤੇਸਂ ਸਨ੍ਤਿਕਾ ਖਾਦਨੀਯਾਦੀਨਿ ਲਭਤਿ. ਅਥੇਕਦਿਵਸਂ ਰਾਜਾ ਉਯ੍ਯਾਨਂ ਗਚ੍ਛਨ੍ਤੋ ਤਂ ਪਦੇਸਂ ਪਾਪੁਣਿ. ਦਾਰਕਾ ਪੀਠਸਪ੍ਪਿਂ ਪਾਰੋਹਨ੍ਤਰੇ ਕਤ੍ਵਾ ਪਲਾਯਿਂਸੁ. ਰਞ੍ਞੋ ਠਿਤਮਜ੍ਝਨ੍ਹਿਕੇ ਰੁਕ੍ਖਮੂਲਂ ਪਵਿਟ੍ਠਸ੍ਸ ਛਿਦ੍ਦਾਵਛਿਦ੍ਦਚ੍ਛਾਯਾ ਸਰੀਰਂ ਫਰਿ. ਸੋ ‘‘ਕਿਂ ਨੁ ਖੋ ਏਤ’’ਨ੍ਤਿ ਉਦ੍ਧਂ ਓਲੋਕੇਨ੍ਤੋ ਰੁਕ੍ਖਪਣ੍ਣੇਸੁ ਹਤ੍ਥਿਰੂਪਕਾਦੀਨਿ ਦਿਸ੍ਵਾ ‘‘ਕਸ੍ਸੇਤਂ ਕਮ੍ਮ’’ਨ੍ਤਿ ਪੁਚ੍ਛਿਤ੍ਵਾ ‘‘ਪੀਠਸਪ੍ਪਿਨੋ’’ਤਿ ਸੁਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ਆਹ – ‘‘ਮਯ੍ਹਂ ਪੁਰੋਹਿਤੋ ਅਤਿਮੁਖਰੋ ਅਪ੍ਪਮਤ੍ਤਕੇਪਿ ਵੁਤ੍ਤੇ ਬਹੁਂ ਭਣਨ੍ਤੋ ਮਂ ਉਪਦ੍ਦਵੇਤਿ, ਸਕ੍ਖਿਸ੍ਸਸਿ ਤਸ੍ਸ ਮੁਖੇ ਨਾਲ਼ਿਮਤ੍ਤਾ ਅਜਲਣ੍ਡਿਕਾ ਖਿਪਿਤੁ’’ਨ੍ਤਿ? ‘‘ਸਕ੍ਖਿਸ੍ਸਾਮਿ, ਦੇਵ. ਅਜਲਣ੍ਡਿਕਾ ਆਹਰਾਪੇਤ੍ਵਾ ਪੁਰੋਹਿਤੇਨ ਸਦ੍ਧਿਂ ਤੁਮ੍ਹੇ ਅਨ੍ਤੋਸਾਣਿਯਂ ਨਿਸੀਦਥ, ਅਹਮੇਤ੍ਥ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ. ਅਥ ਰਾਜਾ ਤਥਾ ਕਾਰੇਸਿ. ਇਤਰੋ ਕਤ੍ਤਰਿਯਗ੍ਗੇਨ ਸਾਣਿਯਾ ਛਿਦ੍ਦਂ ਕਤ੍ਵਾ ਪੁਰੋਹਿਤਸ੍ਸ ਰਞ੍ਞਾ ਸਦ੍ਧਿਂ ਕਥੇਨ੍ਤਸ੍ਸ ਮੁਖੇ ਵਿਵਟਮਤ੍ਤੇ ਏਕੇਕਂ ਅਜਲਣ੍ਡਿਕਂ ਖਿਪਿ. ਪੁਰੋਹਿਤੋ ਮੁਖਂ ਪਵਿਟ੍ਠਂ ਪਵਿਟ੍ਠਂ ਗਿਲਿ. ਪੀਠਸਪ੍ਪੀ ਖੀਣਾਸੁ ਅਜਲਣ੍ਡਿਕਾਸੁ ਸਾਣਿਂ ਚਾਲੇਸਿ. ਰਾਜਾ ਤਾਯ ਸਞ੍ਞਾਯ ਅਜਲਣ੍ਡਿਕਾਨਂ ਖੀਣਭਾਵਂ ਞਤ੍ਵਾ ਆਹ – ‘‘ਆਚਰਿਯ, ਅਹਂ ਤੁਮ੍ਹੇਹਿ ਸਦ੍ਧਿਂ ਕਥੇਨ੍ਤੋ ਕਥਂ ਨਿਤ੍ਥਰਿਤੁਂ ਨ ਸਕ੍ਖਿਸ੍ਸਾਮਿ, ਤੁਮ੍ਹੇ ਅਤਿਮੁਖਰਤਾਯ ਨਾਲ਼ਿਮਤ੍ਤਾ ਅਜਲਣ੍ਡਿਕਾ ਗਿਲਨ੍ਤਾਪਿ ਤੁਣ੍ਹੀਭਾਵਂ ਨਾਪਜ੍ਜਥਾ’’ਤਿ. ਬ੍ਰਾਹ੍ਮਣੋ ਮਙ੍ਗੁਉਭਾਵਂ ਆਪਜ੍ਜਿਤ੍ਵਾ ਤਤੋ ਪਟ੍ਠਾਯ ਮੁਖਂ ਵਿਵਰਿਤ੍ਵਾ ਰਞ੍ਞਾ ਸਦ੍ਧਿਂ ਸਲ੍ਲਪਿਤੁਂ ਨਸਕ੍ਖਿ. ਰਾਜਾ ਪੀਠਸਪ੍ਪਿਗੁਣਂ ਅਨੁਸ੍ਸਰਿਤ੍ਵਾ ਤਂ ਪਕ੍ਕੋਸਾਪੇਤ੍ਵਾ ‘‘ਤਂ ਨਿਸ੍ਸਾਯ ਮੇ ਸੁਖਂ ਲਦ੍ਧ’’ਨ੍ਤਿ ਤੁਟ੍ਠੋ ਤਸ੍ਸ ਸਬ੍ਬਟ੍ਠਕਂ ਨਾਮ ਧਨਂ ਦਤ੍ਵਾ ਨਗਰਸ੍ਸ ਚਤੂਸੁ ਦਿਸਾਸੁ ਚਤ੍ਤਾਰੋ ਵਰਗਾਮੇ ਅਦਾਸਿ. ਤਮਤ੍ਥਂ ਵਿਦਿਤ੍ਵਾ ਰਞ੍ਞੋ ਅਤ੍ਥਧਮ੍ਮਾਨੁਸਾਸਕੋ ਅਮਚ੍ਚੋ ਇਮਂ ਗਾਥਮਾਹ –

‘‘ਸਾਧੁ ਖੋ ਸਿਪ੍ਪਕਂ ਨਾਮ, ਅਪਿ ਯਾਦਿਸ ਕੀਦਿਸਂ;

ਪਸ੍ਸ ਖਞ੍ਜਪ੍ਪਹਾਰੇਨ, ਲਦ੍ਧਾ ਗਾਮਾ ਚਤੁਦ੍ਦਿਸਾ’’ਤਿ. (ਜਾ. ੧.੧.੧੦੭);

ਸੋ ਪਨ ਅਮਚ੍ਚੋ ਤੇਨ ਸਮਯੇਨ ਅਯਮੇਵ ਭਗਵਾ ਅਹੋਸਿ. ਅਥੇਕੋ ਪੁਰਿਸੋ ਪੀਠਸਪ੍ਪਿਨਾ ਲਦ੍ਧਸਮ੍ਪਤ੍ਤਿਂ ਦਿਸ੍ਵਾ ਚਿਨ੍ਤੇਸਿ – ‘‘ਅਯਂ ਨਾਮ ਪੀਠਸਪ੍ਪੀ ਹੁਤ੍ਵਾ ਇਮਂ ਸਿਪ੍ਪਂ ਨਿਸ੍ਸਾਯ ਮਹਾਸਮ੍ਪਤ੍ਤਿਂ ਪਤ੍ਤੋ, ਮਯਾਪੇਤਂ ਸਿਕ੍ਖਿਤੁਂ ਵਟ੍ਟਤੀ’’ਤਿ. ਸੋ ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਇਦਂ ਮੇ, ਆਚਰਿਯ, ਸਿਪ੍ਪਂ ਦੇਥਾ’’ਤਿ ਆਹ. ‘‘ਨ ਸਕ੍ਕਾ, ਤਾਤ, ਦਾਤੁ’’ਨ੍ਤਿ. ਸੋ ਤੇਨ ਪਟਿਕ੍ਖਿਤ੍ਤੋ ‘‘ਹੋਤੁ, ਆਰਾਧੇਸ੍ਸਾਮਿ ਨ’’ਨ੍ਤਿ ਤਸ੍ਸ ਹਤ੍ਥਪਾਦਪਰਿਕਮ੍ਮਾਦੀਨਿ ਕਰੋਨ੍ਤੋ ਚਿਰਸ੍ਸਂ ਤਂ ਆਰਾਧੇਤ੍ਵਾ ਪੁਨਪ੍ਪੁਨਂ ਯਾਚਿ, ਪੀਠਸਪ੍ਪੀ ‘‘ਅਯਂ ਮੇ ਅਤਿਵਿਯ ਉਪਕਾਰੋ’’ਤਿ ਤਂ ਪਟਿਬਾਹਿਤੁਂ ਅਸਕ੍ਕੋਨ੍ਤੋ ਸਿਪ੍ਪਂ ਸਿਕ੍ਖਾਪੇਤ੍ਵਾ ‘‘ਨਿਪ੍ਫਨ੍ਨਂ ਤੇ, ਤਾਤ, ਸਿਪ੍ਪਂ, ਇਦਾਨਿ ਕਿਂ ਕਰਿਸ੍ਸਸੀ’’ਤਿ ਆਹ. ‘‘ਬਹਿ ਗਨ੍ਤ੍ਵਾ ਸਿਪ੍ਪਂ ਵੀਮਂਸਿਸ੍ਸਾਮੀ’’ਤਿ. ‘‘ਕਿਂ ਕਰਿਸ੍ਸਸੀ’’ਤਿ? ‘‘ਗਾਵਿਂ ਵਾ ਮਨੁਸ੍ਸਂ ਵਾ ਪਹਰਿਤ੍ਵਾ ਮਾਰੇਸ੍ਸਾਮੀ’’ਤਿ. ‘‘ਤਾਤਾ, ਗਾਵਿਂ ਮਾਰੇਨ੍ਤਸ੍ਸ ਸਤਂ ਦਣ੍ਡੋ ਹੋਤਿ ਮਨੁਸ੍ਸਂ ਮਾਰੇਨ੍ਤਸ੍ਸ ਸਹਸ੍ਸਂ, ਤ੍ਵਂ ਸਪੁਤ੍ਤਦਾਰੋਪਿ ਤਂ ਨਿਤ੍ਥਰਿਤੁਂ ਨ ਸਕ੍ਖਿਸ੍ਸਸਿ, ਮਾ ਵਿਨਸ੍ਸ, ਯਮ੍ਹਿ ਪਹਟੇ ਦਣ੍ਡੋ ਨਤ੍ਥਿ, ਤਾਦਿਸਂ ਨਿਮਾਤਾਪਿਤਿਕਂ ਕਞ੍ਚਿ ਉਪਧਾਰੇਹੀ’’ਤਿ. ਸੋ ‘‘ਸਾਧੂ’’ਤਿ ਸਕ੍ਖਰਾ ਉਚ੍ਛਙ੍ਗੇ ਕਤ੍ਵਾ ਤਾਦਿਸਂ ਉਪਧਾਰਯਮਾਨੋ ਵਿਚਰਨ੍ਤੋ ਗਾਵਿਂ ਦਿਸ੍ਵਾ ‘‘ਅਯਂ ਸਸਾਮਿਕਾ’’ਤਿ ਪਹਰਿਤੁਂ ਨ ਵਿਸਹਿ, ਮਨੁਸ੍ਸਂ ਦਿਸ੍ਵਾ ‘‘ਅਯਂ ਸਮਾਤਾਪਿਤਿਕੋ’’ਤਿ ਪਹਰਿਤੁਂ ਨ ਵਿਸਤਿ.

ਤੇਨ ਸਮਯੇਨ ਸੁਨੇਤ੍ਤੋ ਨਾਮ ਪਚ੍ਚੇਕਬੁਦ੍ਧੋ ਤਂ ਨਗਰਂ ਨਿਸ੍ਸਾਯ ਪਣ੍ਣਸਾਲਾਯ ਵਿਹਰਤਿ. ਸੋ ਤਂ ਪਿਣ੍ਡਾਯ ਪਵਿਸਨ੍ਤਂ ਨਗਰਦ੍ਵਾਰਨ੍ਤਰੇ ਦਿਸ੍ਵਾ ‘‘ਅਯਂ ਨਿਮਾਤਾਪਿਤਿਕੋ, ਇਮਸ੍ਮਿਂ ਪਹਟੇ ਦਣ੍ਡੋ ਨਤ੍ਥਿ, ਇਮਂ ਪਹਰਿਤ੍ਵਾ ਸਿਪ੍ਪਂ ਵੀਮਂਸਿਸ੍ਸਾਮੀ’’ਤਿ ਪਚ੍ਚੇਕਬੁਦ੍ਧਸ੍ਸ ਦਕ੍ਖਿਣਕਣ੍ਣਸੋਤਂ ਸਨ੍ਧਾਯ ਸਕ੍ਖਰਂ ਖਿਪਿ. ਸਾ ਦਕ੍ਖਿਣਕਣ੍ਣਸੋਤੇਨ ਪਵਿਸਿਤ੍ਵਾ ਵਾਮੇਨ ਨਿਕ੍ਖਮਿ, ਦੁਕ੍ਖਾ ਵੇਦਨਾ ਉਪ੍ਪਜ੍ਜਿ. ਪਚ੍ਚੇਕਬੁਦ੍ਧੋ ਭਿਕ੍ਖਾਯ ਚਰਿਤੁਂ ਨਾਸਕ੍ਖਿ, ਆਕਾਸੇਨ ਪਣ੍ਣਸਾਲਂ ਗਨ੍ਤ੍ਵਾ ਪਰਿਨਿਬ੍ਬਾਯਿ. ਮਨੁਸ੍ਸਾ ਪਚ੍ਚੇਕਬੁਦ੍ਧੇ ਅਨਾਗਚ੍ਛਨ੍ਤੇ ‘‘ਕਿਞ੍ਚਿ ਅਫਾਸੁਕਂ ਭਵਿਸ੍ਸਤੀ’’ਤਿ ਚਿਨ੍ਤੇਤ੍ਵਾ ਤਤ੍ਥ ਗਨ੍ਤ੍ਵਾ ਤਂ ਪਰਿਨਿਬ੍ਬੁਤਂ ਦਿਸ੍ਵਾ ਰੋਦਿਂਸੁ ਪਰਿਦੇਵਿਂਸੁ. ਸੋਪਿ ਮਹਾਜਨਂ ਗਚ੍ਛਨ੍ਤਂ ਦਿਸ੍ਵਾ ਤਤ੍ਥ ਗਨ੍ਤ੍ਵਾ ਪਚ੍ਚੇਕਬੁਦ੍ਧਂ ਸਞ੍ਜਾਨਿਤ੍ਵਾ ‘‘ਅਯਂ ਪਿਣ੍ਡਾਯ ਪਵਿਸਨ੍ਤੋ ਦ੍ਵਾਰਨ੍ਤਰੇ ਮਮ ਸਮ੍ਮੁਖੀਭੂਤੋ, ਅਹਂ ਅਤ੍ਤਨੋ ਸਿਪ੍ਪਂ ਵੀਮਂਸਨ੍ਤੋ ਇਮਂ ਪਹਰਿ’’ਨ੍ਤਿ ਆਹ. ਮਨੁਸ੍ਸਾ ‘‘ਇਮਿਨਾ ਕਿਰ ਪਾਪਕੇਨ ਪਚ੍ਚੇਕਬੁਦ੍ਧੋ ਪਹਟੋ, ਗਣ੍ਹਥ ਗਣ੍ਹਥਾ’’ਤਿ ਪੋਥੇਤ੍ਵਾ ਤਤ੍ਥੇਵ ਨਂ ਜੀਵਿਤਕ੍ਖਯਂ ਪਾਪੇਸੁਂ. ਸੋ ਅਵੀਚਿਮ੍ਹਿ ਨਿਬ੍ਬਤ੍ਤਿਤ੍ਵਾ ਯਾਵਾਯਂ ਮਹਾਪਥਵੀ ਯੋਜਨਮਤ੍ਤਂ ਉਸ੍ਸਨ੍ਨਾ, ਤਾਵ ਪਚ੍ਚਿਤ੍ਵਾ ਵਿਪਾਕਾਵਸੇਸੇਨ ਗਿਜ੍ਝਕੂਟਮਤ੍ਥਕੇ ਸਟ੍ਠਿਕੂਟਪੇਤੋ ਹੁਤ੍ਵਾ ਨਿਬ੍ਬਤ੍ਤਿ. ਸਤ੍ਥਾ ਤਸ੍ਸ ਇਮਂ ਪੁਬ੍ਬਕਮ੍ਮਂ ਕਥੇਤ੍ਵਾ, ‘‘ਭਿਕ੍ਖਵੇ, ਬਾਲਸ੍ਸ ਨਾਮ ਸਿਪ੍ਪਂ ਵਾ ਇਸ੍ਸਰਿਯਂ ਵਾ ਉਪ੍ਪਜ੍ਜਮਾਨਂ ਅਨਤ੍ਥਾਯ ਉਪ੍ਪਜ੍ਜਤਿ. ਬਾਲੋ ਹਿ ਸਿਪ੍ਪਂ ਵਾ ਇਸ੍ਸਰਿਯਂ ਵਾ ਲਭਿਤ੍ਵਾ ਅਤ੍ਤਨੋ ਅਨਤ੍ਥਮੇਵ ਕਰੋਤੀ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ.

੭੨. ‘‘ਯਾਵਦੇਵ ਅਨਤ੍ਥਾਯ, ਞਤ੍ਤਂ ਬਾਲਸ੍ਸ ਜਾਯਤਿ;

ਹਨ੍ਤਿ ਬਾਲਸ੍ਸ ਸੁਕ੍ਕਂਸਂ, ਮੁਦ੍ਧਮਸ੍ਸ ਵਿਪਾਤਯ’’ਨ੍ਤਿ.

ਤਤ੍ਥ ਯਾਵਦੇਵਾਤਿ ਅਵਧਿਪਰਿਚ੍ਛੇਦਨਤ੍ਥੇ ਨਿਪਾਤੋ. ਞਤ੍ਤਨ੍ਤਿ ਜਾਨਨਸਭਾਵੋ. ਯਂ ਸਿਪ੍ਪਂ ਜਾਨਾਤਿ, ਯਮ੍ਹਿ ਵਾ ਇਸ੍ਸਰਿਯੇ ਯਸੇ ਸਮ੍ਪਤ੍ਤਿਯਞ੍ਚ ਠਿਤੋ ਜਨੇਨ ਞਾਯਤਿ, ਪਾਕਟੋ ਪਞ੍ਞਾਤੋ ਹੋਤਿ, ਤਸ੍ਸੇਤਂ ਨਾਮਂ. ਸਿਪ੍ਪਂ ਵਾ ਹਿ ਇਸ੍ਸਰਿਯਾਦਿਭਾਵੋ ਵਾ ਬਾਲਸ੍ਸ ਅਨਤ੍ਥਾਯੇਵ ਜਾਯਤਿ. ਤਂ ਨਿਸ੍ਸਾਯ ਸੋ ਅਤ੍ਤਨੋ ਅਨਤ੍ਥਮੇਵ ਕਰੋਤਿ. ਹਨ੍ਤੀਤਿ ਵਿਨਾਸੇਤਿ. ਸੁਕ੍ਕਂਸਨ੍ਤਿ ਕੁਸਲਕੋਟ੍ਠਾਸਂ, ਬਾਲਸ੍ਸ ਹਿ ਸਿਪ੍ਪਂ ਵਾ ਇਸ੍ਸਰਿਯਂ ਵਾ ਉਪ੍ਪਜ੍ਜਮਾਨਂ ਕੁਸਲਕੋਟ੍ਠਾਸਂ ਘਾਤੇਨ੍ਤਮੇਵ ਉਪ੍ਪਜ੍ਜਤਿ. ਮੁਦ੍ਧਨ੍ਤਿ ਪਞ੍ਞਾਯੇਤਂ ਨਾਮਂ. ਵਿਪਾਤਯਨ੍ਤਿ ਵਿਦ੍ਧਂਸਯਮਾਨਂ. ਤਸ੍ਸ ਹਿ ਤਂ ਸੁਕ੍ਕਂਸਂ ਹਨਨ੍ਤਂ ਪਞ੍ਞਾਸਙ੍ਖਾਤਂ ਮੁਦ੍ਧਂ ਵਿਪਾਤੇਨ੍ਤਂ ਵਿਦ੍ਧਂਸੇਨ੍ਤਮੇਵ ਹਨ੍ਤੀਤਿ.

ਦੇਸਨਾਵਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ.

ਸਟ੍ਠਿਕੂਟਪੇਤਵਤ੍ਥੁ ਤੇਰਸਮਂ.