੧੧. ਜਮ੍ਬੁਕਤ੍ਥੇਰਵਤ੍ਥੁ

ਮਾਸੇ ਮਾਸੇਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਵੇਲ਼ੁਵਨੇ ਵਿਹਰਨ੍ਤੋ ਜਮ੍ਬੁਕਂ ਆਜੀਵਕਂ ਆਰਬ੍ਭ ਕਥੇਸਿ.

ਅਤੀਤੇ ਕਿਰ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਗਾਮਵਾਸੀ ਏਕੋ ਕੁਟੁਮ੍ਬਿਕੋ ਏਕਸ੍ਸ ਥੇਰਸ੍ਸ ਵਿਹਾਰਂ ਕਤ੍ਵਾ ਤਂ ਤਤ੍ਥ ਵਿਹਰਨ੍ਤਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿ. ਥੇਰੋ ਤਸ੍ਸ ਗੇਹੇ ਨਿਬਦ੍ਧਂ ਭੁਞ੍ਜਤਿ. ਅਥੇਕੋ ਖੀਣਾਸਵੋ ਭਿਕ੍ਖੁ ਦਿਵਾ ਪਿਣ੍ਡਾਯ ਚਰਨ੍ਤੋ ਤਸ੍ਸ ਗੇਹਦ੍ਵਾਰਂ ਪਾਪੁਣਿ. ਕੁਟੁਮ੍ਬਿਕੋ ਤਂ ਦਿਸ੍ਵਾ ਤਸ੍ਸ ਇਰਿਯਾਪਥੇ ਪਸਨ੍ਨੋ ਗੇਹਂ ਪਵੇਸੇਤ੍ਵਾ ਸਕ੍ਕਚ੍ਚਂ ਪਣੀਤੇਨ ਭੋਜਨੇਨ ਪਰਿਵਿਸਿਤ੍ਵਾ, ‘‘ਭਨ੍ਤੇ, ਇਮਂ ਸਾਟਕਂ ਰਜਿਤ੍ਵਾ ਨਿਵਾਸੇਯ੍ਯਾਥਾ’’ਤਿ ਮਹਨ੍ਤਂ ਸਾਟਕਂ ਦਤ੍ਵਾ, ‘‘ਭਨ੍ਤੇ, ਕੇਸਾ ਵੋ ਦੀਘਾ, ਤੁਮ੍ਹਾਕਂ ਕੇਸੋਰੋਪਨਤ੍ਥਾਯ ਨ੍ਹਾਪਿਤਂ ਆਨੇਸ੍ਸਾਮਿ, ਸਯਨਤ੍ਥਾਯ ਚ ਵੋ ਮਞ੍ਚਕਂ ਗਾਹਾਪੇਤ੍ਵਾ ਆਗਮਿਸ੍ਸਾਮੀ’’ਤਿ ਆਹ. ਨਿਬਦ੍ਧਂ ਗੇਹੇ ਭੁਞ੍ਜਨ੍ਤੋ ਕੁਲੂਪਕੋ ਭਿਕ੍ਖੁ ਤਂ ਤਸ੍ਸ ਸਕ੍ਕਾਰਂ ਦਿਸ੍ਵਾ ਚਿਤ੍ਤਂ ਪਸਾਦੇਤੁਂ ਨਾਸਕ੍ਖਿ, ‘‘ਅਯਂ ਤਂ ਮੁਹੁਤ੍ਤਂ ਦਿਟ੍ਠਕਸ੍ਸ ਏਵਰੂਪਂ ਸਕ੍ਕਾਰਂ ਕਰੋਤਿ, ਨਿਬਦ੍ਧਂ ਗੇਹੇ ਭੁਞ੍ਜਨ੍ਤਸ੍ਸ ਪਨ ਮਯ੍ਹਂ ਨ ਕਰੋਤੀ’’ਤਿ ਚਿਨ੍ਤੇਤ੍ਵਾ ਵਿਹਾਰਂ ਅਗਮਾਸਿ. ਇਤਰੋਪਿ ਤੇਨੇਵ ਸਦ੍ਧਿਂ ਗਨ੍ਤ੍ਵਾ ਕੁਟੁਮ੍ਬਿਕੇਨ ਦਿਨ੍ਨਸਾਟਕਂ ਰਜਿਤ੍ਵਾ ਨਿਵਾਸੇਸਿ. ਕੁਟਮ੍ਬਿਕੋਪਿ ਨ੍ਹਾਪਿਤਂ ਆਦਾਯ ਗਨ੍ਤ੍ਵਾ ਥੇਰਸ੍ਸ ਕੇਸੇ ਓਹਾਰਾਪੇਤ੍ਵਾ ਮਞ੍ਚਕਂ ਅਤ੍ਥਰਾਪੇਤ੍ਵਾ, ‘‘ਭਨ੍ਤੇ, ਇਮਸ੍ਮਿਂਯੇਵ ਮਞ੍ਚਕੇ ਸਯਥਾ’’ਤਿ ਵਤ੍ਵਾ ਦ੍ਵੇਪਿ ਥੇਰੇ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪਕ੍ਕਾਮਿ.

ਨੇਵਾਸਿਕੋ ਤਸ੍ਸ ਤਂ ਸਕ੍ਕਾਰਂ ਕਯਿਰਮਾਨਂ ਅਧਿਵਾਸੇਤੁਂ ਨਾਸਕ੍ਖਿ. ਅਥਸ੍ਸ ਸੋ ਸਾਯਂ ਥੇਰਸ੍ਸ ਨਿਪਨ੍ਨਟ੍ਠਾਨਂ ਗਨ੍ਤ੍ਵਾ ਚਤੂਹਾਕਾਰੇਹਿ ਥੇਰਂ ਅਕ੍ਕੋਸਿ, ‘‘ਆਵੁਸੋ, ਆਗਨ੍ਤੁਕ ਕੁਟੁਮ੍ਬਿਕਸ੍ਸ ਤੇ ਗੇਹੇ ਭਤ੍ਤਂ ਭੁਞ੍ਜਨਤੋ ਵਰਤਰਂ ਮੀਲ਼੍ਹਂ ਖਾਦਿਤੁਂ, ਕੁਟੁਮ੍ਬਿਕੇਨ ਆਨੀਤਨ੍ਹਾਪਿਤੇਨ ਕੇਸੋਹਾਰਾਪਨਤੋ ਵਰਤਰਂ ਤਾਲਟ੍ਠਿਕੇਨ ਕੇਸੇ ਲੁਞ੍ਚਾਪੇਤੁਂ. ਕੁਟੁਮ੍ਬਿਕੇਨ ਦਿਨ੍ਨਸਾਟਕਨਿਵਾਸਨਤੋ ਵਰਤਰਂ ਨਗ੍ਗੇਨ ਵਿਚਰਿਤੁਂ, ਕੁਟੁਮ੍ਬਿਕੇਨ ਆਭਤਮਞ੍ਚਕੇ ਨਿਪਜ੍ਜਨਤੋ ਵਰਤਰਂ ਭੂਮਿਯਂ ਨਿਪਜ੍ਜਿਤੁ’’ਨ੍ਤਿ. ਥੇਰੋਪਿ ‘‘ਮਾ ਏਸ ਬਾਲੋ ਮਂ ਨਿਸ੍ਸਾਯ ਨਸ੍ਸੀ’’ਤਿ ਨਿਮਨ੍ਤਨਂ ਅਨਾਦਿਯਿਤ੍ਵਾ ਪਾਤੋਵ ਉਟ੍ਠਾਯ ਯਥਾਸੁਖਂ ਅਗਮਾਸਿ. ਨੇਵਾਸਿਕੋਪਿ ਪਾਤੋਵ ਵਿਹਾਰੇ ਕਤ੍ਤਬ੍ਬਵਤ੍ਤਂ ਕਤ੍ਵਾ ਭਿਕ੍ਖਾਚਾਰਵੇਲਾਯ ‘‘ਇਦਾਨਿਪਿ ਆਗਨ੍ਤੁਕੋ ਨਿਦ੍ਦਾਯਤਿ, ਘਣ੍ਡਿਕਸਦ੍ਦੇਨ ਪਬੁਜ੍ਝੇਯ੍ਯਾ’’ਤਿ ਸਞ੍ਞਾਯ ਨਖਪਿਟ੍ਠੇਨੇਵ ਘਣ੍ਡਿਂ ਪਹਰਿਤ੍ਵਾ ਗਾਮਂ ਪਿਣ੍ਡਾਯ ਪਾਵਿਸਿ. ਕੁਟੁਮ੍ਬਿਕੋਪਿ ਸਕ੍ਕਾਰਂ ਕਤ੍ਵਾ ਥੇਰਾਨਂ ਆਗਮਨਮਗ੍ਗਂ ਓਲੋਕੇਨ੍ਤੋ ਨੇਵਾਸਿਕਂ ਦਿਸ੍ਵਾ, ‘‘ਭਨ੍ਤੇ, ਥੇਰੋ ਕੁਹਿ’’ਨ੍ਤਿ ਪੁਚ੍ਛਿ. ਅਥ ਨਂ ਨੇਵਾਸਿਕੋ ‘‘ਮਾ, ਆਵੁਸੋ, ਕਿਞ੍ਚਿ ਅਵਚ, ਤੁਯ੍ਹਂ ਕੁਲੂਪਕੋ ਹਿਯ੍ਯੋ, ਤਵ ਨਿਕ੍ਖਨ੍ਤਵੇਲਾਯ ਓਵਰਕਂ ਪਵਿਸਿਤ੍ਵਾ ਨਿਦ੍ਦਂ ਓਕ੍ਕਨ੍ਤੋ ਪਾਤੋਵ ਉਟ੍ਠਾਯ ਮਮ ਵਿਹਾਰਸਮ੍ਮਜ੍ਜਨਸਦ੍ਦਮ੍ਪਿ ਪਾਨੀਯਘਟਪਰਿਭੋਜਨੀਯਘਟੇਸੁ ਉਦਕਸਿਞ੍ਚਨਸਦ੍ਦਮ੍ਪਿ ਘਣ੍ਡਿਕਸਦ੍ਦਮ੍ਪਿ ਕਰੋਨ੍ਤਸ੍ਸ ਨ ਜਾਨਾਤੀ’’ਤਿ ਆਹ. ਕੁਟੁਮ੍ਬਿਕੋ ਚਿਨ੍ਤੇਸਿ – ‘‘ਤਾਦਿਸਾਯ ਇਰਿਯਾਪਥਸਮ੍ਪਤ੍ਤਿਯਾ ਸਮਨ੍ਨਾਗਤਸ੍ਸ ਮੇ ਅਯ੍ਯਸ੍ਸ ਯਾਵ ਇਮਮ੍ਹਾ ਕਾਲਾ ਨਿਦ੍ਦਾਯਨਂ ਨਾਮ ਨਤ੍ਥਿ, ਮਂ ਪਨ ਤਸ੍ਸ ਸਕ੍ਕਾਰਂ ਕਰੋਨ੍ਤਂ ਦਿਸ੍ਵਾ ਅਦ੍ਧਾ ਇਮਿਨਾ ਭਦਨ੍ਤੇਨ ਕਿਞ੍ਚਿ ਵੁਤ੍ਤਂ ਭਵਿਸ੍ਸਤੀ’’ਤਿ. ਸੋ ਅਤ੍ਤਨੋ ਪਣ੍ਡਿਤਭਾਵੇਨ ਤਂ ਸਕ੍ਕਚ੍ਚਂ ਭੋਜੇਤ੍ਵਾ ਤਸ੍ਸ ਪਤ੍ਤਂ ਸਾਧੁਕਂ ਧੋਵਿਤ੍ਵਾ ਨਾਨਗ੍ਗਰਸਭੋਜਨਸ੍ਸ ਪੂਰੇਤ੍ਵਾ, ‘‘ਭਨ੍ਤੇ, ਸਚੇ ਮੇ ਅਯ੍ਯਂ ਪਸ੍ਸੇਯ੍ਯਾਥ, ਇਮਮਸ੍ਸ ਪਿਣ੍ਡਪਾਤਂ ਦਦੇਯ੍ਯਾਥਾ’’ਤਿ ਆਹ.

ਇਤਰੋ ਤਂ ਗਹੇਤ੍ਵਾਵ ਚਿਨ੍ਤੇਸਿ – ‘‘ਸਚੇ ਸੋ ਏਵਰੂਪਂ ਪਿਣ੍ਡਪਾਤਂ ਭੁਞ੍ਜਿਸ੍ਸਤਿ, ਇਮਸ੍ਮਿਂਯੇਵ ਠਾਨੇ ਪਲੁਦ੍ਧੋ ਭਵਿਸ੍ਸਤੀ’’ਤਿ ਅਨ੍ਤਰਾਮਗ੍ਗੇ ਤਂ ਪਿਣ੍ਡਪਾਤਂ ਛਡ੍ਡੇਤ੍ਵਾ ਥੇਰਸ੍ਸ ਵਸਨਟ੍ਠਾਨਂ ਗਨ੍ਤ੍ਵਾ ਤਂ ਤਤ੍ਥ ਓਲੋਕੇਨ੍ਤੋ ਨ ਅਦ੍ਦਸ. ਅਥ ਨਂ ਏਤ੍ਤਕਸ੍ਸ ਕਮ੍ਮਸ੍ਸ ਕਤਤ੍ਤਾ ਵੀਸਤਿਵਸ੍ਸਸਹਸ੍ਸਾਨਿ ਕਤੋਪਿ ਸਮਣਧਮ੍ਮੋ ਰਕ੍ਖਿਤੁਂ ਨਾਸਕ੍ਖਿ. ਆਯੁਪਰਿਯੋਸਾਨੇ ਪਨ ਕਾਲਂ ਕਤ੍ਵਾ ਅਵੀਚਿਮ੍ਹਿ ਨਿਬ੍ਬਤ੍ਤਿਤ੍ਵਾ ਏਕਂ ਬੁਦ੍ਧਨ੍ਤਰਂ ਮਹਾਦੁਕ੍ਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹਨਗਰੇ ਏਕਸ੍ਮਿਂ ਬਹ੍ਵਨ੍ਨਪਾਨੇ ਕੁਲਘਰੇ ਨਿਬ੍ਬਤ੍ਤਿ. ਸੋ ਪਦਸਾ ਗਮਨਕਾਲਤੋ ਪਟ੍ਠਾਯ ਨੇਵ ਸਯਨੇ ਸਯਿਤੁਂ, ਨ ਭਤ੍ਤਂ ਭੁਞ੍ਜਿਤੁਂ ਇਚ੍ਛਤਿ, ਅਤ੍ਤਨੋ ਸਰੀਰਵਲਞ੍ਜਮੇਵ ਖਾਦਤਿ. ‘‘ਬਾਲਤਾਯ ਅਜਾਨਨ੍ਤੋ ਕਰੋਤੀ’’ਤਿ ਤਂ ਪੋਸਯਿਂਸੁ. ਮਹਲ੍ਲਕਕਾਲੇਪਿ ਵਤ੍ਥਂ ਨਿਵਾਸੇਤੁਂ ਨ ਇਚ੍ਛਤਿ, ਨਗ੍ਗੋਵ ਵਿਚਰਤਿ, ਭੂਮਿਯਂ ਸਯਤਿ, ਅਤ੍ਤਨੋ ਸਰੀਰਵਲਞ੍ਜਮੇਵ ਖਾਦਤਿ. ਅਥਸ੍ਸ ਮਾਤਾਪਿਤਰੋ ‘‘ਨਾਯਂ ਕੁਲਘਰਸ੍ਸ ਅਨੁਚ੍ਛਵਿਕੋ, ਕੇਵਲਂ ਅਲਜ੍ਜਨਕੋ ਆਜੀਵਕਾਨਂ ਏਸ ਅਨੁਚ੍ਛਵਿਕੋ’’ਤਿ ਤੇਸਂ ਸਨ੍ਤਿਕਂ ਨੇਤ੍ਵਾ ‘‘ਇਮਂ ਦਾਰਕਂ ਪਬ੍ਬਾਜੇਥਾ’’ਤਿ ਅਦਂਸੁ. ਅਥ ਨਂ ਤੇ ਪਬ੍ਬਾਜੇਸੁਂ. ਪਬ੍ਬਾਜੇਨ੍ਤਾ ਚ ਪਨ ਗਲਪ੍ਪਮਾਣੇ ਆਵਾਟੇ ਠਪੇਤ੍ਵਾ ਦ੍ਵਿਨ੍ਨਂ ਅਂਸਕੂਟਾਨਂ ਉਪਰਿਂ ਪਦਰਾਨਿ ਦਤ੍ਵਾ ਤੇਸਂ ਉਪਰਿ ਨਿਸੀਦਿਤ੍ਵਾ ਤਾਲਟ੍ਠਿਖਣ੍ਡੇਨ ਕੇਸੇ ਲੁਞ੍ਚਿਂਸੁ. ਅਥ ਨੇ ਤਸ੍ਸ ਮਾਤਾਪਿਤਰੋ ਸ੍ਵਾਤਨਾਯ ਨਿਮਨ੍ਤੇਤ੍ਵਾ ਪਕ੍ਕਮਿਂਸੁ.

ਪੁਨਦਿਵਸੇ ਆਜੀਵਕਾ ‘‘ਏਹਿ, ਗਾਮਂ ਪਵਿਸਿਸ੍ਸਾਮਾ’’ਤਿ ਤਂ ਵਦਿਂਸੁ. ਸੋ ‘‘ਗਚ੍ਛਥ ਤੁਮ੍ਹੇ, ਅਹਂ ਇਧੇਵ ਭਵਿਸ੍ਸਾਮੀ’’ਤਿ ਨ ਇਚ੍ਛਿ. ਅਥ ਨਂ ਪੁਨਪ੍ਪੁਨਂ ਵਤ੍ਵਾ ਅਨਿਚ੍ਛਮਾਨਂ ਓਹਾਯ ਅਗਮਂਸੁ. ਸੋਪਿ ਤੇਸਂ ਗਤਭਾਵਂ ਞਤ੍ਵਾ ਵਚ੍ਚਕੁਟਿਯਾ ਪਦਰਂ ਵਿਵਰਿਤ੍ਵਾ ਓਰੁਯ੍ਹ ਉਭੋਹਿ ਹਤ੍ਥੇਹਿ ਆਲੋਪਂ ਆਲੋਪਂ ਕਤ੍ਵਾ ਗੂਥਂ ਖਾਦਿ. ਆਜੀਵਕਾ ਤਸ੍ਸ ਅਨ੍ਤੋਗਾਮਤੋ ਆਹਾਰਂ ਪਹਿਣਿਂਸੁ. ਤਮ੍ਪਿ ਨ ਇਚ੍ਛਿ. ਪੁਨਪ੍ਪੁਨਂ ਵੁਚ੍ਚਮਾਨੋਪਿ ‘‘ਨ ਮੇ ਇਮਿਨਾ ਅਤ੍ਥੋ. ਲਦ੍ਧੋ ਮੇ ਆਹਾਰੋ’’ਤਿ ਆਹ. ‘‘ਕਹਂ ਲਦ੍ਧੋ’’ਤਿ? ‘‘ਇਧੇਵ ਲਦ੍ਧੋ’’ਤਿ. ਏਵਂ ਦੁਤਿਯੇ ਤਤਿਯੇ ਚਤੁਤ੍ਥੇਪਿ ਦਿਵਸੇ ਤੇਹਿ ਬਹੁਮ੍ਪਿ ਵੁਚ੍ਚਮਾਨੋ ‘‘ਅਹਂ ਇਧੇਵ ਭਵਿਸ੍ਸਾਮੀ’’ਤਿ ਗਾਮਂ ਗਨ੍ਤੁਂ ਨ ਇਚ੍ਛਿ. ਆਜੀਵਕਾ ‘‘ਅਯਂ ਦਿਵਸੇ ਦਿਵਸੇ ਨੇਵ ਗਾਮਂ ਪਵਿਸਿਤੁਂ ਇਚ੍ਛਤਿ, ਨ ਅਮ੍ਹੇਹਿ ਪਹਿਤਾਹਾਰਂ ਆਹਰਿਤੁਂ ਇਚ੍ਛਤਿ, ‘ਇਧੇਵ ਮੇ ਲਦ੍ਧੋ’ਤਿ ਵਦਤਿ, ਕਿਂ ਨੁ ਖੋ ਕਰੋਤਿ, ਪਰਿਗ੍ਗਣ੍ਹਿਸ੍ਸਾਮ ਨ’’ਨ੍ਤਿ ਗਾਮਂ ਪਵਿਸਨ੍ਤਾ ਏਕਂ ਦ੍ਵੇ ਜਨੇ ਤਸ੍ਸ ਪਰਿਗ੍ਗਣ੍ਹਨਤ੍ਥਂ ਓਹਾਯ ਗਮਿਂਸੁ. ਤੇ ਪਚ੍ਛਤੋ ਗਚ੍ਛਨ੍ਤਾ ਵਿਯ ਹੁਤ੍ਵਾ ਨਿਲੀਯਿਂਸੁ. ਸੋਪਿ ਤੇਸਂ ਗਤਭਾਵਂ ਞਤ੍ਵਾ ਪੁਰਿਮਨਯੇਨੇਵ ਵਚ੍ਚਕੁਟਿਂ ਓਰੁਯ੍ਹ ਗੂਥਂ ਖਾਦਿ.

ਇਤਰੇ ਤਸ੍ਸ ਕਿਰਿਯਂ ਦਿਸ੍ਵਾ ਆਜੀਵਕਾਨਂ ਆਰੋਚਯਿਂਸੁ. ਤਂ ਸੁਤ੍ਵਾ ਆਜੀਵਕਾ ‘‘ਅਹੋ ਭਾਰਿਯਂ ਕਮ੍ਮਂ, ਸਚੇ ਸਮਣਸ੍ਸ ਗੋਤਮਸ੍ਸ ਸਾਵਕਾ ਜਾਨੇਯ੍ਯੁਂ, ‘ਆਜੀਵਕਾ ਗੂਥਂ ਖਾਦਮਾਨਾ ਵਿਚਰਨ੍ਤੀ’ਤਿ ਅਮ੍ਹਾਕਂ ਅਕਿਤ੍ਤਿਂ ਪਕਾਸੇਯ੍ਯੁਂ, ਨਾਯਂ ਅਮ੍ਹਾਕਂ ਅਨੁਚ੍ਛਵਿਕੋ’’ਤਿ ਤਂ ਅਤ੍ਤਨੋ ਸਨ੍ਤਿਕਾ ਨੀਹਰਿਂਸੁ. ਸੋ ਤੇਹਿ ਨੀਹਰਿਤੋ ਮਹਾਜਨਸ੍ਸ ਉਚ੍ਚਾਰਕਰਣਟ੍ਠਾਨੇ ਪਤ੍ਥਰਿਤੋ ਏਕੋ ਪਿਟ੍ਠਿਪਾਸਾਣੋ ਅਤ੍ਥਿ. ਤਸ੍ਮਿਂ ਮਹਨ੍ਤਂ ਸੋਣ੍ਡਿ, ਪਿਟ੍ਠਿਪਾਸਾਣਂ ਨਿਸ੍ਸਾਯ ਮਹਾਜਨਸ੍ਸ ਉਚ੍ਚਾਰਕਰਣਟ੍ਠਾਨਂ. ਸੋ ਤਤ੍ਥ ਗਨ੍ਤ੍ਵਾ ਰਤ੍ਤਿਂ ਗੂਥਂ ਖਾਦਿਤ੍ਵਾ ਮਹਾਜਨਸ੍ਸ ਸਰੀਰਵਲਞ੍ਜਨਤ੍ਥਾਯ ਆਗਮਨਕਾਲੇ ਏਕੇਨ ਹਤ੍ਥੇਨ ਪਾਸਾਣਸ੍ਸ ਏਕਂ ਅਨ੍ਤਂ ਓਲੁਬ੍ਭ ਏਕਂ ਪਾਦਂ ਉਕ੍ਖਿਪਿਤ੍ਵਾ ਜਣ੍ਣੁਕੇ ਠਪੇਤ੍ਵਾ ਉਦ੍ਧਂਵਾਤਾਭਿਮੁਖੋ ਮੁਖਂ ਵਿਵਰਿਤ੍ਵਾ ਤਿਟ੍ਠਤਿ. ਮਹਾਜਨੋ ਤਂ ਦਿਸ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ, ‘‘ਭਨ੍ਤੇ, ਕਸ੍ਮਾ ਅਯ੍ਯੋ ਮੁਖਂ ਵਿਵਰਿਤ੍ਵਾ ਠਿਤੋ’’ਤਿ ਪੁਚ੍ਛਤਿ. ‘‘ਅਹਂ ਵਾਤਭਕ੍ਖੋ, ਅਞ੍ਞੋ ਮੇ ਆਹਾਰੋ ਨਤ੍ਥੀ’’ਤਿ. ਅਥ ‘‘ਕਸ੍ਮਾ ਏਕਂ ਪਾਦਂ ਜਣ੍ਣੁਕੇ ਕਤ੍ਵਾ ਠਿਤੋਸਿ, ਭਨ੍ਤੇ’’ਤਿ? ‘‘ਅਹਂ ਉਗ੍ਗਤਪੋ ਘੋਰਤਪੋ, ਮਯਾ ਦ੍ਵੀਹਿ ਪਾਦੇਹਿ ਅਕ੍ਕਨ੍ਤਾ ਪਥਵੀ ਕਮ੍ਪਤਿ, ਤਸ੍ਮਾ ਏਕਂ ਪਾਦਂ ਉਕ੍ਖਿਪਿਤ੍ਵਾ ਜਣ੍ਣੁਕੇ ਠਪੇਤ੍ਵਾ ਠਿਤੋਮ੍ਹਿ. ਅਹਞ੍ਹਿ ਰਤ੍ਤਿਨ੍ਦਿਵਂ ਠਿਤਕੋਵ ਵੀਤਿਨਾਮੇਮਿ, ਨ ਨਿਸੀਦਾਮਿ, ਨ ਨਿਪਜ੍ਜਾਮੀ’’ਤਿ. ਮਨੁਸ੍ਸਾ ਨਾਮ ਯੇਭੁਯ੍ਯੇਨ ਵਚਨਮਤ੍ਤਮੇਵ ਸਦ੍ਦਹਨ੍ਤਿ, ਤਸ੍ਮਾ ‘‘ਅਹੋ ਅਚ੍ਛਰਿਯਂ, ਏਵਰੂਪਾਪਿ ਨਾਮ ਤਪਸ੍ਸਿਨੋ ਹੋਨ੍ਤਿ, ਨ ਨੋ ਏਵਰੂਪਾ ਦਿਟ੍ਠਪੁਬ੍ਬਾ’’ਤਿ ਯੇਭੁਯ੍ਯੇਨ ਅਙ੍ਗਮਗਧਵਾਸਿਨੋ ਸਙ੍ਖੁਭਿਤ੍ਵਾ ਉਪਸਙ੍ਕਮਿਤ੍ਵਾ ਮਾਸੇ ਮਾਸੇ ਮਹਨ੍ਤਂ ਸਕ੍ਕਾਰਂ ਅਭਿਹਰਨ੍ਤਿ. ਸੋ ‘‘ਅਹਂ ਵਾਤਮੇਵ ਭਕ੍ਖਾਮਿ, ਨ ਅਞ੍ਞਂ ਆਹਾਰਂ. ਅਞ੍ਞਞ੍ਹਿ ਮੇ ਖਾਦਨ੍ਤਸ੍ਸ ਤਪੋ ਨਸ੍ਸਤੀ’’ਤਿ ਤੇਹਿ ਅਭਿਹਟਂ ਨ ਕਿਞ੍ਚਿ ਇਚ੍ਛਤਿ. ਮਨੁਸ੍ਸਾ ‘‘ਮਾ ਨੋ, ਭਨ੍ਤੇ, ਨਾਸੇਥ, ਤੁਮ੍ਹਾਦਿਸੇਨ ਘੋਰਤਪੇਨ ਪਰਿਭੋਗੇ ਕਤੇ ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਤੀ’’ਤਿ ਪੁਨਪ੍ਪੁਨਂ ਯਾਚਨ੍ਤਿ. ਤਸ੍ਸ ਅਞ੍ਞੋ ਆਹਾਰੋ ਨ ਰੁਚ੍ਚਤਿ. ਮਹਾਜਨਸ੍ਸ ਪਨ ਯਾਚਨਾਯ ਪੀਲ਼ਿਤੋ ਤੇਹਿ ਆਭਤਾਨਿ ਸਪ੍ਪਿਫਾਣਿਤਾਦੀਨਿ ਕੁਸਗ੍ਗੇਨ ਜਿਵ੍ਹਗ੍ਗੇ ਠਪੇਤ੍ਵਾ ‘‘ਗਚ੍ਛਥ, ਅਲਂ ਵੋ ਏਤ੍ਤਕਂ ਹਿਤਾਯ ਸੁਖਾਯ ਚਾ’’ਤਿ ਉਯ੍ਯੋਜੇਸਿ. ਏਵਂ ਸੋ ਪਞ੍ਚਪਞ੍ਞਾਸ ਵਸ੍ਸਾਨਿ ਨਗ੍ਗੋ ਗੂਥਂ ਖਾਦਨ੍ਤੋ ਕੇਸੇ ਲੁਞ੍ਚਨ੍ਤੋ ਭੂਮਿਯਂ ਸਯਮਾਨੋ ਵੀਤਿਨਾਮੇਸਿ.

ਬੁਦ੍ਧਾਨਮ੍ਪਿ ਖੋ ਪਚ੍ਚੂਸਕਾਲੇ ਲੋਕਵੋਲੋਕਨਂ ਅਵਿਜਹਿਤਮੇਵ ਹੋਤਿ. ਤਸ੍ਮਾ ਏਕਦਿਵਸਂ ਭਗਵਤੋ ਪਚ੍ਚੂਸਸਮਯੇ ਲੋਕਂ ਵੋਲੋਕੇਨ੍ਤਸ੍ਸ ਅਯਂ ਜਮ੍ਬੁਕਾਜੀਵਕੋ ਞਾਣਜਾਲਸ੍ਸ ਅਨ੍ਤੋ ਪਞ੍ਞਾਯਿ. ਸਤ੍ਥਾ ‘‘ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਆਵਜ੍ਜੇਤ੍ਵਾ ਤਸ੍ਸ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਸ੍ਸੂਪਨਿਸ੍ਸਯਂ ਦਿਸ੍ਵਾ ‘‘ਅਹਂ ਏਤਂ ਆਦਿਂ ਕਤ੍ਵਾ ਏਕਂ ਗਾਥਂ ਭਾਸਿਸ੍ਸਾਮਿ, ਗਾਥਾਵਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਭਵਿਸ੍ਸਤਿ. ਇਮਂ ਕੁਲਪੁਤ੍ਤਂ ਨਿਸ੍ਸਾਯ ਮਹਾਜਨੋ ਸੋਤ੍ਥਿਭਾਵਂ ਪਾਪੁਣਿਸ੍ਸਤੀ’’ਤਿ ਞਤ੍ਵਾ ਪੁਨਦਿਵਸੇ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਆਨਨ੍ਦਤ੍ਥੇਰਂ ਆਮਨ੍ਤੇਸਿ – ‘‘ਆਨਨ੍ਦ, ਜਮ੍ਬੁਕਾਜੀਵਕਸ੍ਸ ਸਨ੍ਤਿਕਂ ਗਮਿਸ੍ਸਾਮੀ’’ਤਿ. ‘‘ਭਨ੍ਤੇ, ਕਿਂ ਤੁਮ੍ਹੇਯੇਵ ਗਮਿਸ੍ਸਥਾ’’ਤਿ? ‘‘ਆਮ, ਅਹਮੇਵਾ’’ਤਿ ਏਵਂ ਵਤ੍ਵਾ ਸਤ੍ਥਾ ਵਡ੍ਢਮਾਨਕਚ੍ਛਾਯਾਯ ਤਸ੍ਸ ਸਨ੍ਤਿਕਂ ਪਾਯਾਸਿ.

ਦੇਵਤਾ ਚਿਨ੍ਤਯਿਂਸੁ – ‘‘ਸਤ੍ਥਾ ਸਾਯਂ ਜਮ੍ਬੁਕਾਜੀਵਕਸ੍ਸ ਸਨ੍ਤਿਕਂ ਗਚ੍ਛਤਿ, ਸੋ ਚ ਜੇਗੁਚ੍ਛੇ ਉਚ੍ਚਾਰਪਸ੍ਸਾਵਦਨ੍ਤਕਟ੍ਠਕਿਲਿਟ੍ਠੇ ਪਿਟ੍ਠਿਪਾਸਾਣੇ ਵਸਤਿ, ਦੇਵਂ ਵਸ੍ਸਾਪੇਤੁਂ ਵਟ੍ਟਤੀ’’ਤਿ ਅਤ੍ਤਨੋ ਆਨੁਭਾਵੇਨ ਤਂ ਮੁਹੁਤ੍ਤਂਯੇਵ ਦੇਵਂ ਵਸ੍ਸਾਪੇਸੁਂ. ਪਿਟ੍ਠਿਪਾਸਾਣੋ ਸੁਚਿ ਨਿਮ੍ਮਲੋ ਅਹੋਸਿ. ਅਥਸ੍ਸ ਉਪਰਿ ਪਞ੍ਚਵਣ੍ਣਂ ਪੁਪ੍ਫਵਸ੍ਸਂ ਵਸ੍ਸਾਪੇਸੁਂ. ਸਤ੍ਥਾ ਸਾਯਂ ਜਮ੍ਬੁਕਾਜੀਵਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਜਮ੍ਬੁਕਾ’’ਤਿ ਸਦ੍ਦਮਕਾਸਿ. ਜਮ੍ਬੁਕੋ ‘‘ਕੋ ਨੁ ਖੋ ਏਸ, ਦੁਜ੍ਜਨੋ ਮਂ ਜਮ੍ਬੁਕਵਾਦੇਨ ਵਦਤੀ’’ਤਿ ਚਿਨ੍ਤੇਤ੍ਵਾ ‘‘ਕੋ ਏਸੋ’’ਤਿ ਆਹ. ‘‘ਅਹਂ ਸਮਣੋ’’ਤਿ. ‘‘ਕਿਂ ਮਹਾਸਮਣਾ’’ਤਿ? ‘‘ਅਜ੍ਜ ਮੇ ਏਕਰਤ੍ਤਿਂ ਇਧ ਵਸਨਟ੍ਠਾਨਂ ਦੇਹੀ’’ਤਿ. ‘‘ਨਤ੍ਥਿ, ਮਹਾਸਮਣ, ਇਮਸ੍ਮਿਂ ਠਾਨੇ ਵਸਨਟ੍ਠਾਨ’’ਨ੍ਤਿ. ‘‘ਜਮ੍ਬੁਕ, ਮਾ ਏਵਂ ਕਰਿ, ਏਕਰਤ੍ਤਿਂ ਮੇ ਵਸਨਟ੍ਠਾਨਂ ਦੇਹਿ, ਪਬ੍ਬਜਿਤਾ ਨਾਮ ਪਬ੍ਬਜਿਤਂ ਪਤ੍ਥੇਨ੍ਤਿ, ਮਨੁਸ੍ਸਾ ਮਨੁਸ੍ਸਂ, ਪਸਵੋ ਪਸਵ’’ਨ੍ਤਿ. ‘‘ਕਿਂ ਪਨ ਤ੍ਵਂ ਪਬ੍ਬਜਿਤੋ’’ਤਿ? ‘‘ਆਮ, ਪਬ੍ਬਜਿਤੋਮ੍ਹੀ’’ਤਿ. ‘‘ਸਚੇ ਤ੍ਵਂ ਪਬ੍ਬਜਿਤੋ, ਕਹਂ ਤੇ ਲਾਬੁਕਂ, ਕਹਂ ਧੂਮਕਟਚ੍ਛੁਕੋ, ਕਹਂ ਯਞ੍ਞਸੁਤ੍ਤਕ’’ਨ੍ਤਿ? ‘‘‘ਅਤ੍ਥੇਤਂ ਮਯ੍ਹਂ, ਵਿਸੁਂ ਵਿਸੁਂ ਪਨ ਗਹੇਤ੍ਵਾ ਵਿਚਰਣਂ ਦੁਕ੍ਖ’ਨ੍ਤਿ ਅਬ੍ਭਨ੍ਤਰੇਨੇਵ ਗਹੇਤ੍ਵਾ ਚਰਾਮੀ’’ਤਿ. ਸੋ ‘‘ਚਰਿਸ੍ਸਸਿ ਤ੍ਵਂ ਏਤਂ ਅਗ੍ਗਣ੍ਹਿਤ੍ਵਾ’’ਤਿ ਕੁਜ੍ਝਿ. ਅਥ ਨਂ ਸਤ੍ਥਾ ਆਹ – ‘‘ਹੋਤੁ, ਜਮ੍ਬੁਕ, ਮਾ ਕੁਜ੍ਝ, ਵਸਨਟ੍ਠਾਨਂ ਮੇ ਆਚਿਕ੍ਖਾ’’ਤਿ. ‘‘ਨਤ੍ਥਿ, ਮਹਾਸਮਣ, ਏਤ੍ਥ ਵਸਨਟ੍ਠਾਨ’’ਨ੍ਤਿ.

ਸਤ੍ਥਾ ਤਸ੍ਸ ਵਸਨਟ੍ਠਾਨਤੋ ਅਵਿਦੂਰੇ ਏਕਂ ਪਬ੍ਭਾਰਂ ਅਤ੍ਥਿ, ਤਂ ਨਿਦ੍ਦਿਸਨ੍ਤੋ ‘‘ਏਤਸ੍ਮਿਂ ਪਬ੍ਭਾਰੇ ਕੋ ਵਸਤੀ’’ਤਿ ਆਹ. ‘‘ਨਤ੍ਥਿ ਕੋਚਿ, ਮਹਾਸਮਣਾ’’ਤਿ. ‘‘ਤੇਨ ਹਿ ਏਤਂ ਮਯ੍ਹਂ ਦੇਹੀ’’ਤਿ. ‘‘ਤ੍ਵਞ੍ਞੇਵ ਜਾਨ, ਮਹਾਸਮਣਾ’’ਤਿ. ਸਤ੍ਥਾ ਪਬ੍ਭਾਰੇ ਨਿਸੀਦਨਂ ਪਞ੍ਞਾਪੇਤ੍ਵਾ ਨਿਸੀਦਿ. ਪਠਮਯਾਮੇ ਚਤ੍ਤਾਰੋ ਮਹਾਰਾਜਾਨੋ ਚਤੁਦ੍ਦਿਸਂ ਏਕੋਭਾਸਂ ਕਰੋਨ੍ਤਾ ਸਤ੍ਥੁ ਉਪਟ੍ਠਾਨਂ ਆਗਮਿਂਸੁ. ਜਮ੍ਬੁਕੋ ਓਭਾਸਂ ਦਿਸ੍ਵਾ ‘‘ਕੋ ਓਭਾਸੋ ਨਾਮੇਸੋ’’ਤਿ ਚਿਨ੍ਤੇਸਿ. ਮਜ੍ਝਿਮਯਾਮੇ ਸਕ੍ਕੋ ਦੇਵਰਾਜਾ ਆਗਮਿ. ਜਮ੍ਬੁਕੋ ਤਮ੍ਪਿ ਦਿਸ੍ਵਾ ‘‘ਕੋ ਨਾਮੇਸੋ’’ਤਿ ਚਿਨ੍ਤੇਸਿ. ਪਚ੍ਛਿਮਯਾਮੇ ਏਕਾਯ ਅਙ੍ਗੁਲਿਯਾ ਏਕਂ, ਦ੍ਵੀਹਿ ਦ੍ਵੇ, ਦਸਹਿ ਦਸ ਚਕ੍ਕਵਾਲ਼ਾਨਿ ਓਭਾਸੇਤੁਂ ਸਮਤ੍ਥੋ ਮਹਾਬ੍ਰਹ੍ਮਾ ਸਕਲਂ ਅਰਞ੍ਞਂ ਏਕੋਭਾਸਂ ਕਰੋਨ੍ਤੋ ਆਗਮਿ. ਜਮ੍ਬੁਕੋ ਤਮ੍ਪਿ ਦਿਸ੍ਵਾ ‘‘ਕੋ ਨੁ ਖੋ ਏਸੋ’’ਤਿ ਚਿਨ੍ਤੇਤ੍ਵਾ ਪਾਤੋਵ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਏਕਮਨ੍ਤਂ ਠਿਤੋ ਸਤ੍ਥਾਰਂ ਪੁਚ੍ਛਿ – ‘‘ਮਹਾਸਮਣ, ਤੁਮ੍ਹਾਕਂ ਸਨ੍ਤਿਕਂ ਚਤਸ੍ਸੋ ਦਿਸਾ ਓਭਾਸੇਨ੍ਤੋ ਕੇ ਆਗਤਾ’’ਤਿ? ‘‘ਚਤ੍ਤਾਰੋ ਮਹਾਰਾਜਾਨੋ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਮਂ ਉਪਟ੍ਠਾਤੁ’’ਨ੍ਤਿ. ‘‘ਕਿਂ ਪਨ ਤ੍ਵਂ ਚਤੂਹਿ ਮਹਾਰਾਜੇਹਿ ਉਤ੍ਤਰਿਤਰੋ’’ਤਿ? ‘‘ਆਮ, ਜਮ੍ਬੁਕ, ਮਹਾਰਾਜੂਨਮ੍ਪਿ ਅਤਿਰਾਜਾ’’ਤਿ. ‘‘ਮਜ੍ਝਿਮਯਾਮੇ ਪਨ ਕੋ ਆਗਤੋ’’ਤਿ? ‘‘ਸਕ੍ਕੋ ਦੇਵਰਾਜਾ, ਜਮ੍ਬੁਕਾ’’ਤਿ. ‘‘ਕਿਂ ਕਾਰਣਾ’’ਤਿ? ‘‘ਮਂ ਉਪਟ੍ਠਾਤੁਮੇਵਾ’’ਤਿ. ‘‘ਕਿਂ ਪਨ ਤ੍ਵਂ ਸਕ੍ਕਦੇਵਰਾਜਤੋਪਿ ਉਤ੍ਤਰਿਤਰੋ’’ਤਿ? ‘‘ਆਮ, ਜਮ੍ਬੁਕ, ਸਕ੍ਕਤੋਪਿ ਉਤ੍ਤਰਿਤਰੋਮ੍ਹਿ, ਏਸੋ ਪਨ ਮਯ੍ਹਂ ਗਿਲਾਨੁਪਟ੍ਠਾਕੋ ਕਪ੍ਪਿਯਕਾਰਕਸਾਮਣੇਰਸਦਿਸੋ’’ਤਿ. ‘‘ਪਚ੍ਛਿਮਯਾਮੇ ਸਕਲਂ ਅਰਞ੍ਞਂ ਓਭਾਸੇਤ੍ਵਾ ਕੋ ਆਗਤੋ’’ਤਿ? ‘‘ਯਂ ਲੋਕੇ ਬ੍ਰਾਹ੍ਮਣਾਦਯੋ ਖਿਪਿਤ੍ਵਾ ਪਕ੍ਖਲਿਤ੍ਵਾ ‘ਨਮੋ ਮਹਾਬ੍ਰਹ੍ਮੁਨੋ’ਤਿ ਵਦਨ੍ਤਿ, ਸੋ ਏਵ ਮਹਾਬ੍ਰਹ੍ਮਾ’’ਤਿ. ‘‘ਕਿਂ ਪਨ ਤ੍ਵਂ ਮਹਾਬ੍ਰਹ੍ਮਤੋਪਿ ਉਤ੍ਤਰਿਤਰੋ’’ਤਿ? ‘‘ਆਮ, ਜਮ੍ਬੁਕ, ਅਹਞ੍ਹਿ ਬ੍ਰਹ੍ਮੁਨਾਪਿ ਅਤਿਬ੍ਰਹ੍ਮਾ’’ਤਿ. ‘‘ਅਚ੍ਛਰਿਯੋਸਿ ਤ੍ਵਂ, ਮਹਾਸਮਣ, ਮਯ੍ਹਂ ਪਨ ਪਞ੍ਚ ਪਞ੍ਞਾਸ ਵਸ੍ਸਾਨਿ ਇਧ ਵਸਨ੍ਤਸ੍ਸ ਏਤੇਸੁ ਏਕੋਪਿ ਮਂ ਉਪਟ੍ਠਾਤੁਂ ਨਾਗਤਪੁਬ੍ਬੋ. ਅਹਞ੍ਹਿ ਏਤ੍ਤਕਂ ਅਦ੍ਧਾਨਂ ਵਾਤਭਕ੍ਖੋ ਹੁਤ੍ਵਾ ਠਿਤਕੋਵ ਵੀਤਿਨਾਮੇਸਿਂ, ਨ ਤਾਵ ਤੇ ਮਯ੍ਹਂ ਉਪਟ੍ਠਾਨਂ ਆਗਤਪੁਬ੍ਬਾ’’ਤਿ.

ਅਥ ਨਂ ਸਤ੍ਥਾ ਆਹ – ਜਮ੍ਬੁਕ, ਤ੍ਵਂ ਲੋਕਸ੍ਮਿਂ ਅਨ੍ਧਬਾਲਂ ਮਹਾਜਨਂ ਵਞ੍ਚਯਮਾਨੋ ਮਮ੍ਪਿ ਵਞ੍ਚੇਤੁਕਾਮੋ ਜਾਤੋ, ਨਨੁ ਤ੍ਵਂ ਪਞ੍ਚਪਞ੍ਞਾਸ ਵਸ੍ਸਾਨਿ ਗੂਥਮੇਵ ਖਾਦਿ, ਭੂਮਿਯਂਯੇਵ ਨਿਪਜ੍ਜਿ, ਨਗ੍ਗੋ ਹੁਤ੍ਵਾ ਵਿਚਰਿ, ਤਾਲਟ੍ਠਿਖਣ੍ਡੇਨ ਕੇਸੇ ਲੁਞ੍ਚਿ. ਅਥ ਚ ਪਨ ਲੋਕਂ ਵਞ੍ਚੇਨ੍ਤੋ ‘‘ਅਹਂ ਵਾਤਭਕ੍ਖੋ, ਏਕਪਾਦੇਨ ਤਿਟ੍ਠਾਮਿ, ਨ ਨਿਸੀਦਾਮਿ, ਨ ਨਿਪਜ੍ਜਾਮੀ’’ਤਿ ਵਦੇਸਿ, ‘‘ਮਮਮ੍ਪਿ ਵਞ੍ਚੇਤੁਕਾਮੋਸਿ ਪੁਬ੍ਬੇਪਿ ਤ੍ਵਂ ਪਾਪਿਕਂ ਲਾਮਿਕਂ ਦਿਟ੍ਠਿਂ ਨਿਸ੍ਸਾਯ ਏਤ੍ਤਕਂ ਕਾਲਂ ਗੂਥਭਕ੍ਖੋ ਭੂਮਿਸਯੋ ਨਗ੍ਗੋ ਵਿਚਰਨ੍ਤੋ ਤਾਲਟ੍ਠਿਖਣ੍ਡੇਨ ਕੇਸਲੁਞ੍ਚਨਂ ਪਤ੍ਤੋ, ਇਦਾਨਿਪਿ ਪਾਪਿਕਂ ਲਾਮਿਕਂ ਦਿਟ੍ਠਿਮੇਵ ਗਣ੍ਹਾਸੀ’’ਤਿ. ‘‘ਕਿਂ ਪਨ ਮਯਾ ਕਤਂ, ਮਹਾਸਮਣਾ’’ਤਿ? ਅਥਸ੍ਸ ਸਤ੍ਥਾ ਪੁਬ੍ਬੇ ਕਤਕਮ੍ਮਂ ਆਚਿਕ੍ਖਿ. ਤਸ੍ਸ ਸਤ੍ਥਰਿ ਕਥੇਨ੍ਤੇਯੇਵ ਸਂਵੇਗੋ ਉਪ੍ਪਜ੍ਜਿ, ਹਿਰੋਤ੍ਤਪ੍ਪਂ ਉਪਟ੍ਠਿਤਂ, ਸੋ ਉਕ੍ਕੁਟਿਕੋ ਨਿਸੀਦਿ. ਅਥਸ੍ਸ ਸਤ੍ਥਾ ਉਦਕਸਾਟਿਕਂ ਖਿਪਿਤ੍ਵਾ ਅਦਾਸਿ. ਸੋ ਤਂ ਨਿਵਾਸੇਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਸਤ੍ਥਾਪਿਸ੍ਸ ਅਨੁਪੁਬ੍ਬਿਂ ਕਥਂ ਕਥੇਤ੍ਵਾ ਧਮ੍ਮਂ ਦੇਸੇਸਿ. ਸੋ ਦੇਸਨਾਵਸਾਨੇ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਬ੍ਬਜ੍ਜਞ੍ਚ ਉਪਸਮ੍ਪਦਞ੍ਚ ਯਾਚਿ. ਏਤ੍ਤਾਵਤਾ ਤਸ੍ਸ ਪੁਰਿਮਕਮ੍ਮਂ ਪਰਿਕ੍ਖੀਣਂ. ਅਯਞ੍ਹਿ ਖੀਣਾਸਵਮਹਾਥੇਰਂ ਚਤੂਹਿ ਅਕ੍ਕੋਸੇਹਿ ਅਕ੍ਕੋਸਿਤ੍ਵਾ ਯਾਵਾਯਂ ਮਹਾਪਥਵੀ ਤਿਗਾਵੁਤਾਧਿਕਂ ਯੋਜਨਂ ਉਸ੍ਸਨ੍ਨਾ, ਤਾਵ ਅਵੀਚਿਮ੍ਹਿ ਪਚ੍ਚਿਤ੍ਵਾ ਤਤ੍ਥ ਪਕ੍ਕਾਵਸੇਸੇਨ ਪਞ੍ਚਪਞ੍ਞਾਸ ਵਸ੍ਸਾਨਿ ਇਮਂ ਵਿਪ੍ਪਕਾਰਂ ਪਤ੍ਤੋ. ਤੇਨਸ੍ਸ ਤਂ ਕਮ੍ਮਂ ਖੀਣਂ. ਵੀਸਤਿ ਪਨ ਵਸ੍ਸਸਹਸ੍ਸਾਨਿ ਇਮਿਨਾ ਕਤਸ੍ਸ ਸਮਣਧਮ੍ਮਸ੍ਸ ਫਲਂ ਨਾਸੇਤੁਂ ਨ ਸਕ੍ਕਾ. ਤਸ੍ਮਾ ਸਤ੍ਥਾ ਦਕ੍ਖਿਣਹਤ੍ਥਂ ਪਸਾਰੇਤ੍ਵਾ ‘‘ਏਹਿ, ਭਿਕ੍ਖੁ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ ਆਹ. ਤਾਵਦੇਵਸ੍ਸ ਗਿਹਿਲਿਙ੍ਗਂ ਅਨ੍ਤਰਧਾਯਿ ਅਟ੍ਠਪਰਿਕ੍ਖਾਰਧਰੋ ਸਟ੍ਠਿਵਸ੍ਸਿਕਮਹਾਥੇਰੋ ਵਿਯ ਅਹੋਸਿ.

ਅਙ੍ਗਮਗਧਵਾਸੀਨਂ ਤਸ੍ਸ ਸਕ੍ਕਾਰਂ ਗਹੇਤ੍ਵਾ ਆਗਤਦਿਵਸੋ ਕਿਰੇਸ, ਤਸ੍ਮਾ ਉਭਯਰਟ੍ਠਵਾਸਿਨੋ ਸਕ੍ਕਾਰਂ ਗਹੇਤ੍ਵਾ ਆਗਤਾ ਤਥਾਗਤਂ ਦਿਸ੍ਵਾ ‘‘ਕਿਂ ਨੁ ਖੋ ਅਮ੍ਹਾਕਂ ਅਯ੍ਯੋ ਜਮ੍ਬੁਕੋ ਮਹਾ, ਉਦਾਹੁ ਸਮਣੋ ਗੋਤਮੋ’’ਤਿ ਚਿਨ੍ਤੇਤ੍ਵਾ ‘‘ਸਚੇ ਸਮਣੋ ਗੋਤਮੋ ਮਹਾ ਭਵੇਯ੍ਯ, ਅਯਂ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਚ੍ਛੇਯ੍ਯ, ਜਮ੍ਬੁਕਾਜੀਵਕਸ੍ਸ ਪਨ ਮਹਨ੍ਤਤਾਯ ਸਮਣੋ ਗੋਤਮੋ ਇਮਸ੍ਸ ਸਨ੍ਤਿਕਂ ਆਗਤੋ’’ਤਿ ਚਿਨ੍ਤਯਿਂਸੁ. ਸਤ੍ਥਾ ਮਹਾਜਨਸ੍ਸ ਪਰਿਵਿਤਕ੍ਕਂ ਞਤ੍ਵਾ, ‘‘ਜਮ੍ਬੁਕ, ਤਵ ਉਪਟ੍ਠਾਕਾਨਂ ਕਙ੍ਖਂ ਛਿਨ੍ਦਾਹੀ’’ਤਿ ਆਹ, ਸੋ ‘‘ਅਹਮ੍ਪਿ, ਭਨ੍ਤੇ, ਏਤ੍ਤਕਮੇਵ ਪਚ੍ਚਾਸੀਸਾਮੀ’’ਤਿ ਵਤ੍ਵਾ ਚਤੁਤ੍ਥਜ੍ਝਾਨਂ ਸਮਾਪਜ੍ਜਿਤ੍ਵਾ ਉਟ੍ਠਾਯ ਤਾਲਪ੍ਪਮਾਣਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ‘‘ਸਤ੍ਥਾ ਮੇ, ਭਨ੍ਤੇ ਭਗਵਾ, ਸਾਵਕੋਹਮਸ੍ਮੀ’’ਤਿ ਵਤ੍ਵਾ ਓਰੁਯ੍ਹ ਵਨ੍ਦਿਤ੍ਵਾ ਪੁਨ ਦ੍ਵਿਤਾਲਮਤ੍ਤਂ ਤਿਤਾਲਮਤ੍ਤਨ੍ਤਿ ਏਵਂ ਸਤ੍ਤਤਾਲਮਤ੍ਤਂ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਓਰੁਯ੍ਹ ਅਤ੍ਤਨੋ ਸਾਵਕਭਾਵਂ ਜਾਨਾਪੇਸਿ. ਤਂ ਦਿਸ੍ਵਾ ਮਹਾਜਨੋ ‘‘ਅਹੋ ਬੁਦ੍ਧਾ ਨਾਮ ਅਚ੍ਛਰਿਯਾ ਅਨੋਪਮਗੁਣਾ’’ਤਿ ਚਿਨ੍ਤੇਸਿ. ਸਤ੍ਥਾ ਮਹਾਜਨੇਨ ਸਦ੍ਧਿਂ ਕਥੇਨ੍ਤੋ ਏਵਮਾਹ – ‘‘ਅਯਂ ਏਤ੍ਤਕਂ ਕਾਲਂ ਤੁਮ੍ਹੇਹਿ ਆਭਤਂ ਸਕ੍ਕਾਰਂ ਕੁਸਗ੍ਗੇਨ ਜਿਵ੍ਹਗ੍ਗੇ ਠਪੇਤ੍ਵਾ ‘ਤਪਚਰਣਂ ਪੂਰੇਮੀ’ਤਿ ਇਧ ਨਿਵੁਟ੍ਠੋ, ਸਚੇਪਿ ਇਮਿਨਾ ਉਪਾਯੇਨ ਵਸ੍ਸਸਤਂ ਤਪਚਰਣਂ ਪੂਰੇਯ੍ਯ, ਯਾ ਚਸ੍ਸ ਇਦਾਨਿ ਕਾਲਂ ਵਾ ਭਤ੍ਤਂ ਵਾ ਕੁਕ੍ਕੁਚ੍ਚਾਯਿਤ੍ਵਾ ਅਭੁਞ੍ਜਨ੍ਤਸ੍ਸ ਭਤ੍ਤਚ੍ਛੇਦਨਕੁਸਲਚੇਤਨਾ, ਤਸ੍ਸਾ ਤਂ ਤਪਚਰਣਂ ਸੋਲ਼ਸਿਂ ਕਲਮ੍ਪਿ ਨ ਅਗ੍ਘਤੀ’’ਤਿ ਅਨੁਸਨ੍ਧਿਂ ਘਟੇਤ੍ਵਾ ਧਮ੍ਮਂ ਦੇਸੇਨ੍ਤੋ ਇਮਂ ਗਾਥਮਾਹ –

੭੦. ‘‘ਮਾਸੇ ਮਾਸੇ ਕੁਸਗ੍ਗੇਨ, ਬਾਲੋ ਭੁਞ੍ਜੇਯ੍ਯ ਭੋਜਨਂ;

ਨ ਸੋ ਸਙ੍ਖਾਤਧਮ੍ਮਾਨਂ, ਕਲਂ ਅਗ੍ਘਤਿ ਸੋਲ਼ਸਿ’’ਨ੍ਤਿ.

ਤਸ੍ਸਤ੍ਥੋ – ਸਚੇ ਬਾਲੋ ਅਪਰਿਞ੍ਞਾਤਧਮ੍ਮੋ ਸੀਲਾਦਿਗੁਣਾ ਪਰਿਬਾਹਿਰੋ ਤਿਤ੍ਥਾਯਤਨੇ ਪਬ੍ਬਜਿਤੋ ‘‘ਤਪਚਰਣਂ ਪੂਰੇਸ੍ਸਾਮੀ’’ਤਿ ਮਾਸੇ ਮਾਸੇ ਪਤ੍ਤੇ ਕੁਸਗ੍ਗੇਨ ਭੋਜਨਂ ਭੁਞ੍ਜਨ੍ਤੋ ਵਸ੍ਸਸਤਂ ਭੁਞ੍ਜੇਯ੍ਯ ਭੋਜਨਂ. ਨ ਸੋ ਸਙ੍ਖਾਤਧਮ੍ਮਾਨਂ, ਕਲਂ ਅਗ੍ਘਤਿ ਸੋਲ਼ਸਿਨ੍ਤਿ ਸਙ੍ਖਾਤਧਮ੍ਮਾ ਵੁਚ੍ਚਨ੍ਤਿ ਞਾਤਧਮ੍ਮਾ ਤੁਲਿਤਧਮ੍ਮਾ. ਤੇਸੁ ਹੇਟ੍ਠਿਮਕੋਟਿਯਾ ਸੋਤਾਪਨ੍ਨੋ ਸਙ੍ਖਾਤਧਮ੍ਮੋ, ਉਪਰਿਮਕੋਟਿਯਾ ਖੀਣਾਸਵੋ. ਇਮੇਸਂ ਸਙ੍ਖਾਤਧਮ੍ਮਾਨਂ ਸੋ ਬਾਲੋ ਕਲਂ ਨ ਅਗ੍ਘਤਿ ਸੋਲ਼ਸਿਨ੍ਤਿ ਪੁਗ੍ਗਲਾਧਿਟ੍ਠਾਨਾ ਦੇਸਨਾ. ਅਯਂ ਪਨੇਤ੍ਥ ਅਤ੍ਥੋ – ਯਾ ਚਸ੍ਸ ਤਥਾ ਤਪਚਰਣਂ ਪੂਰੇਨ੍ਤਸ੍ਸ ਵਸ੍ਸਸਤਂ ਚੇਤਨਾ ਯਾ ਚ ਸਙ੍ਖਾਤਧਮ੍ਮਾਨਂ ਕਾਲਂ ਵਾ ਭਤ੍ਤਂ ਵਾ ਕੁਕ੍ਕੁਚ੍ਚਾਯਿਤ੍ਵਾ ਅਭੁਞ੍ਜਨ੍ਤਾਨਂ ਏਕਾ ਭਤ੍ਤਚ੍ਛੇਦਨਕੁਸਲਚੇਤਨਾ, ਤਸ੍ਸਾ ਚੇਤਨਾਯ ਸਾ ਤਾਵ ਦੀਘਰਤ੍ਤਂ ਪਵਤ੍ਤਚੇਤਨਾ ਸੋਲ਼ਸਿਂ ਕਲਂ ਨ ਅਗ੍ਘਤਿ. ਇਦਂ ਵੁਤ੍ਤਂ ਹੋਤਿ – ਯਂ ਤਸ੍ਸਾ ਸਙ੍ਖਾਤਧਮ੍ਮਾਨਂ ਚੇਤਨਾਯ ਫਲਂ, ਤਂ ਸੋਲ਼ਸ ਕੋਟ੍ਠਾਸੇ ਕਤ੍ਵਾ ਤਤੋ ਏਕੇਕਂ ਪੁਨ ਸੋਲ਼ਸ ਸੋਲ਼ਸ ਕੋਟ੍ਠਾਸੇ ਕਤ੍ਵਾ ਤਤੋ ਏਕਸ੍ਸ ਕੋਟ੍ਠਾਸਸ੍ਸ ਯਂ ਫਲਂ, ਤਦੇਵ ਤਸ੍ਸ ਬਾਲਸ੍ਸ ਤਪਚਰਣਤੋ ਮਹਪ੍ਫਲਤਰਨ੍ਤਿ.

ਦੇਸਨਾਵਸਾਨੇ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸੀਤਿ.

ਜਮ੍ਬੁਕਤ੍ਥੇਰਵਤ੍ਥੁ ਏਕਾਦਸਮਂ.