੭. ਦੇਵਦਤ੍ਤਵਤ੍ਥੁ

ਅਨਿਕ੍ਕਸਾਵੋਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਰਾਜਗਹੇ ਦੇਵਦਤ੍ਤਸ੍ਸ ਕਾਸਾਵਲਾਭਂ ਆਰਬ੍ਭ ਕਥੇਸਿ.

ਏਕਸ੍ਮਿਞ੍ਹਿ ਸਮਯੇ ਦ੍ਵੇ ਅਗ੍ਗਸਾਵਕਾ ਪਞ੍ਚਸਤੇ ਪਞ੍ਚਸਤੇ ਅਤ੍ਤਨੋ ਅਤ੍ਤਨੋ ਪਰਿਵਾਰੇ ਆਦਾਯ ਸਤ੍ਥਾਰਂ ਆਪੁਚ੍ਛਿਤ੍ਵਾ ਵਨ੍ਦਿਤ੍ਵਾ ਜੇਤਵਨਤੋ ਰਾਜਗਹਂ ਅਗਮਂਸੁ. ਰਾਜਗਹਵਾਸਿਨੋ ਦ੍ਵੇਪਿ ਤਯੋਪਿ ਬਹੂਪਿ ਏਕਤੋ ਹੁਤ੍ਵਾ ਆਗਨ੍ਤੁਕਦਾਨਂ ਅਦਂਸੁ. ਅਥੇਕਦਿਵਸਂ ਆਯਸ੍ਮਾ ਸਾਰਿਪੁਤ੍ਤੋ ਅਨੁਮੋਦਨਂ ਕਰੋਨ੍ਤੋ ‘‘ਉਪਾਸਕਾ ਏਕੋ ਸਯਂ ਦਾਨਂ ਦੇਤਿ, ਪਰਂ ਨ ਸਮਾਦਪੇਤਿ, ਸੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਭੋਗਸਮ੍ਪਦਂ ਲਭਤਿ, ਨੋ ਪਰਿਵਾਰਸਮ੍ਪਦਂ. ਏਕੋ ਸਯਂ ਨ ਦੇਤਿ, ਪਰਂ ਸਮਾਦਪੇਤਿ, ਸੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਪਰਿਵਾਰਸਮ੍ਪਦਂ ਲਭਤਿ, ਨੋ ਭੋਗਸਮ੍ਪਦਂ. ਏਕੋ ਸਯਮ੍ਪਿ ਨ ਦੇਤਿ, ਪਰਮ੍ਪਿ ਨ ਸਮਾਦਪੇਤਿ, ਸੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਕਞ੍ਜਿਕਮਤ੍ਤਮ੍ਪਿ ਕੁਚ੍ਛਿਪੂਰਂ ਨ ਲਭਤਿ, ਅਨਾਥੋ ਹੋਤਿ ਨਿਪ੍ਪਚ੍ਚਯੋ. ਏਕੋ ਸਯਮ੍ਪਿ ਦੇਤਿ, ਪਰਮ੍ਪਿ ਸਮਾਦਪੇਤਿ, ਸੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਅਤ੍ਤਭਾਵਸਤੇਪਿ ਅਤ੍ਤਭਾਵਸਹਸ੍ਸੇਪਿ ਅਤ੍ਤਭਾਵਸਤਸਹਸ੍ਸੇਪਿ ਭੋਗਸਮ੍ਪਦਞ੍ਚੇਵ ਪਰਿਵਾਰਸਮ੍ਪਦਞ੍ਚ ਲਭਤੀ’’ਤਿ ਏਵਂ ਧਮ੍ਮਂ ਦੇਸੇਸਿ.

ਤਮੇਕੋ ਪਣ੍ਡਿਤਪੁਰਿਸੋ ਧਮ੍ਮਂ ਸੁਤ੍ਵਾ ‘‘ਅਚ੍ਛਰਿਯਾ ਵਤ ਭੋ, ਅਬ੍ਭੁਤਾ ਵਤ ਭੋ ਧਮ੍ਮਦੇਸਨਾ, ਸੁਕਾਰਣਂ ਕਥਿਤਂ, ਮਯਾ ਇਮਾਸਂ ਦ੍ਵਿਨ੍ਨਂ ਸਮ੍ਪਤ੍ਤੀਨਂ ਨਿਪ੍ਫਾਦਕਂ ਕਮ੍ਮਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ – ‘‘ਭਨ੍ਤੇ, ਸ੍ਵੇ ਮਯ੍ਹਂ ਭਿਕ੍ਖਂ ਗਣ੍ਹਥਾ’’ਤਿ ਥੇਰਂ ਨਿਮਨ੍ਤੇਸਿ. ‘‘ਕਿਤ੍ਤਕੇਹਿ ਤੇ ਭਿਕ੍ਖੂਹਿ ਅਤ੍ਥੋ ਉਪਾਸਕਾ’’ਤਿ. ‘‘ਕਿਤ੍ਤਕਾ ਪਨ ਵੋ, ਭਨ੍ਤੇ, ਪਰਿਵਾਰਾ’’ਤਿ? ‘‘ਸਹਸ੍ਸਮਤ੍ਤਾ ਉਪਾਸਕਾ’’ਤਿ. ‘‘ਸਬ੍ਬੇਹਿ ਸਦ੍ਧਿਂਯੇਵ ਸ੍ਵੇ ਭਿਕ੍ਖਂ ਗਣ੍ਹਥ, ਭਨ੍ਤੇ’’ਤਿ. ‘‘ਥੇਰੋ ਅਧਿਵਾਸੇਸਿ’’. ਉਪਾਸਕੋ ਨਗਰਵੀਥਿਯਂ ਚਰਨ੍ਤੋ – ‘‘ਅਮ੍ਮਾ, ਤਾਤਾ, ਮਯਾ ਭਿਕ੍ਖੁਸਹਸ੍ਸਂ ਨਿਮਨ੍ਤਿਤਂ, ਤੁਮ੍ਹੇ ਕਿਤ੍ਤਕਾਨਂ ਭਿਕ੍ਖੂਨਂ ਭਿਕ੍ਖਂ ਦਾਤੁਂ ਸਕ੍ਖਿਸ੍ਸਥ, ਤੁਮ੍ਹੇ ਕਿਤ੍ਤਕਾਨ’’ਨ੍ਤਿ ਸਮਾਦਪੇਸਿ. ਮਨੁਸ੍ਸਾ ਅਤ੍ਤਨੋ ਅਤ੍ਤਨੋ ਪਹੋਨਕਨਿਯਾਮੇਨ – ‘‘ਮਯਂ ਦਸਨ੍ਨਂ ਦਸ੍ਸਾਮ, ਮਯਂ ਵੀਸਤਿਯਾ, ਮਯਂ ਸਤਸ੍ਸਾ’’ਤਿ ਆਹਂਸੁ. ਉਪਾਸਕੋ – ‘‘ਤੇਨ ਹਿ ਏਕਸ੍ਮਿਂ ਠਾਨੇ ਸਮਾਗਮਂ ਕਤ੍ਵਾ ਏਕਤੋਵ ਪਰਿਵਿਸਿਸ੍ਸਾਮ, ਸਬ੍ਬੇ ਤਿਲਤਣ੍ਡੁਲਸਪ੍ਪਿਮਧੁਫਾਣਿਤਾਦੀਨਿ ਸਮਾਹਰਥਾ’’ਤਿ ਏਕਸ੍ਮਿਂ ਠਾਨੇ ਸਮਾਹਰਾਪੇਸਿ.

ਅਥਸ੍ਸ ਏਕੋ ਕੁਟੁਮ੍ਬਿਕੋ ਸਤਸਹਸ੍ਸਗ੍ਘਨਿਕਂ ਗਨ੍ਧਕਾਸਾਵਵਤ੍ਥਂ ਦਤ੍ਵਾ – ‘‘ਸਚੇ ਤੇ ਦਾਨਵਤ੍ਤਂ ਨਪ੍ਪਹੋਤਿ, ਇਦਂ ਵਿਸ੍ਸਜ੍ਜੇਤ੍ਵਾ ਯਂ ਊਨਂ, ਤਂ ਪੂਰੇਯ੍ਯਾਸਿ. ਸਚੇ ਪਹੋਤਿ, ਯਸ੍ਸਿਚ੍ਛਸਿ, ਤਸ੍ਸ ਭਿਕ੍ਖੁਨੋ ਦਦੇਯ੍ਯਾਸੀ’’ਤਿ ਆਹ. ਤਦਾ ਤਸ੍ਸ ਸਬ੍ਬਂ ਦਾਨਵਤ੍ਤਂ ਪਹੋਸਿ, ਕਿਞ੍ਚਿ ਊਨਂ ਨਾਮ ਨਾਹੋਸਿ. ਸੋ ਮਨੁਸ੍ਸੇ ਪੁਚ੍ਛਿ – ‘‘ਇਦਂ, ਅਯ੍ਯਾ, ਕਾਸਾਵਂ ਏਕੇਨ ਕੁਟੁਮ੍ਬਿਕੇਨ ਏਵਂ ਨਾਮ ਵਤ੍ਵਾ ਦਿਨ੍ਨਂ ਅਤਿਰੇਕਂ ਜਾਤਂ, ਕਸ੍ਸ ਨਂ ਦੇਮਾ’’ਤਿ. ਏਕਚ੍ਚੇ ‘‘ਸਾਰਿਪੁਤ੍ਤਤ੍ਥੇਰਸ੍ਸਾ’’ਤਿ ਆਹਂਸੁ. ਏਕਚ੍ਚੇ ‘‘ਥੇਰੋ ਸਸ੍ਸਪਾਕਸਮਯੇ ਆਗਨ੍ਤ੍ਵਾ ਗਮਨਸੀਲੋ, ਦੇਵਦਤ੍ਤੋ ਅਮ੍ਹਾਕਂ ਮਙ੍ਗਲਾਮਙ੍ਗਲੇਸੁ ਸਹਾਯੋ ਉਦਕਮਣਿਕੋ ਵਿਯ ਨਿਚ੍ਚਂ ਪਤਿਟ੍ਠਿਤੋ, ਤਸ੍ਸ ਤਂ ਦੇਮਾ’’ਤਿ ਆਹਂਸੁ. ਸਮ੍ਬਹੁਲਿਕਾਯ ਕਥਾਯਪਿ ‘‘ਦੇਵਦਤ੍ਤਸ੍ਸ ਦਾਤਬ੍ਬ’’ਨ੍ਤਿ ਵਤ੍ਤਾਰੋ ਬਹੁਤਰਾ ਅਹੇਸੁਂ, ਅਥ ਨਂ ਦੇਵਦਤ੍ਤਸ੍ਸ ਅਦਂਸੁ. ਸੋ ਤਂ ਛਿਨ੍ਦਿਤ੍ਵਾ ਸਿਬ੍ਬਿਤ੍ਵਾ ਰਜਿਤ੍ਵਾ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਵਿਚਰਤਿ. ਤਂ ਦਿਸ੍ਵਾ ਮਨੁਸ੍ਸਾ ‘‘ਨਯਿਦਂ ਦੇਵਦਤ੍ਤਸ੍ਸ ਅਨੁਚ੍ਛਵਿਕਂ, ਸਾਰਿਪੁਤ੍ਤਤ੍ਥੇਰਸ੍ਸ ਅਨੁਚ੍ਛਵਿਕਂ. ਦੇਵਦਤ੍ਤੋ ਅਤ੍ਤਨੋ ਅਨਨੁਚ੍ਛਵਿਕਂ ਨਿਵਾਸੇਤ੍ਵਾ ਪਾਰੁਪਿਤ੍ਵਾ ਵਿਚਰਤੀ’’ਤਿ ਵਦਿਂਸੁ. ਅਥੇਕੋ ਦਿਸਾਵਾਸਿਕੋ ਭਿਕ੍ਖੁ ਰਾਜਗਹਾ ਸਾਵਤ੍ਥਿਂ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਕਤਪਟਿਸਨ੍ਥਾਰੋ ਸਤ੍ਥਾਰਾ ਦ੍ਵਿਨ੍ਨਂ ਅਗ੍ਗਸਾਵਕਾਨਂ ਫਾਸੁਵਿਹਾਰਂ ਪੁਚ੍ਛਿਤੋ ਆਦਿਤੋ ਪਟ੍ਠਾਯ ਸਬ੍ਬਂ ਤਂ ਪਵਤ੍ਤਿਂ ਆਰੋਚੇਸਿ. ਸਤ੍ਥਾ ‘‘ਨ ਖੋ ਭਿਕ੍ਖੁ ਇਦਾਨੇਵੇਸੋ ਅਤ੍ਤਨੋ ਅਨਨੁਚ੍ਛਵਿਕਂ ਵਤ੍ਥਂ ਧਾਰੇਤਿ, ਪੁਬ੍ਬੇਪਿ ਧਾਰੇਸਿਯੇਵਾ’’ਤਿ ਵਤ੍ਵਾ ਅਤੀਤਂ ਆਹਰਿ –

ਅਤੀਤੇ ਬਾਰਾਣਸਿਯਂ ਬ੍ਰਹ੍ਮਦਤ੍ਤੇ ਰਜ੍ਜਂ ਕਾਰੇਨ੍ਤੇ ਬਾਰਾਣਸਿਵਾਸੀ ਏਕੋ ਹਤ੍ਥਿਮਾਰਕੋ ਹਤ੍ਥਿਂ ਮਾਰੇਤ੍ਵਾ ਮਾਰੇਤ੍ਵਾ ਦਨ੍ਤੇ ਚ ਨਖੇ ਚ ਅਨ੍ਤਾਨਿ ਚ ਘਨਮਂਸਞ੍ਚ ਆਹਰਿਤ੍ਵਾ ਵਿਕ੍ਕਿਣਨ੍ਤੋ ਜੀਵਿਤਂ ਕਪ੍ਪੇਤਿ. ਅਥੇਕਸ੍ਮਿਂ ਅਰਞ੍ਞੇ ਅਨੇਕਸਹਸ੍ਸਾ ਹਤ੍ਥਿਨੋ ਗੋਚਰਂ ਗਹੇਤ੍ਵਾ ਗਚ੍ਛਨ੍ਤਾ ਪਚ੍ਚੇਕਬੁਦ੍ਧੇ ਦਿਸ੍ਵਾ ਤਤੋ ਪਟ੍ਠਾਯ ਗਚ੍ਛਮਾਨਾ ਗਮਨਾਗਮਨਕਾਲੇ ਜਣ੍ਣੁਕੇਹਿ ਨਿਪਤਿਤ੍ਵਾ ਵਨ੍ਦਿਤ੍ਵਾ ਪਕ੍ਕਮਨ੍ਤਿ. ਏਕਦਿਵਸਞ੍ਹਿ ਹਤ੍ਥਿਮਾਰਕੋ ਤਂ ਕਿਰਿਯਂ ਦਿਸ੍ਵਾ – ‘‘ਅਹਂ ਇਮੇ ਕਿਚ੍ਛੇਨ ਮਾਰੇਮਿ, ਇਮੇ ਚ ਗਮਨਾਗਮਨਕਾਲੇ ਪਚ੍ਚੇਕਬੁਦ੍ਧੇ ਵਨ੍ਦਨ੍ਤਿ, ਕਿਂ ਨੁ ਖੋ ਦਿਸ੍ਵਾ ਵਨ੍ਦਨ੍ਤੀ’’ਤਿ ਚਿਨ੍ਤੇਨ੍ਤੋ – ‘‘ਕਾਸਾਵ’’ਨ੍ਤਿ ਸਲ੍ਲਕ੍ਖੇਤ੍ਵਾ, ‘‘ਮਯਾਪਿ ਇਦਾਨਿ ਕਾਸਾਵਂ ਲਦ੍ਧੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਏਕਸ੍ਸ ਪਚ੍ਚੇਕਬੁਦ੍ਧਸ੍ਸ ਜਾਤਸ੍ਸਰਂ ਓਰੁਯ੍ਹ ਨ੍ਹਾਯਨ੍ਤਸ੍ਸ ਤੀਰੇ ਠਪਿਤੇਸੁ ਕਾਸਾਵੇਸੁ ਚੀਵਰਂ ਥੇਨੇਤ੍ਵਾ ਤੇਸਂ ਹਤ੍ਥੀਨਂ ਗਮਨਾਗਮਨਮਗ੍ਗੇ ਸਤ੍ਤਿਂ ਗਹੇਤ੍ਵਾ ਸਸੀਸਂ ਪਾਰੁਪਿਤ੍ਵਾ ਨਿਸੀਦਤਿ. ਹਤ੍ਥਿਨੋ ਤਂ ਦਿਸ੍ਵਾ – ‘‘ਪਚ੍ਚੇਕਬੁਦ੍ਧੋ’’ਤਿ ਸਞ੍ਞਾਯ ਵਨ੍ਦਿਤ੍ਵਾ ਪਕ੍ਕਮਨ੍ਤਿ. ਸੋ ਤੇਸਂ ਸਬ੍ਬਪਚ੍ਛਤੋ ਗਚ੍ਛਨ੍ਤਂ ਸਤ੍ਤਿਯਾ ਪਹਰਿਤ੍ਵਾ ਮਾਰੇਤ੍ਵਾ ਦਨ੍ਤਾਦੀਨਿ ਗਹੇਤ੍ਵਾ ਸੇਸਂ ਭੂਮਿਯਂ ਨਿਖਣਿਤ੍ਵਾ ਗਚ੍ਛਤਿ. ਅਪਰਭਾਗੇ ਬੋਧਿਸਤ੍ਤੋ ਹਤ੍ਥਿਯੋਨਿਯਂ ਪਟਿਸਨ੍ਧਿਂ ਗਹੇਤ੍ਵਾ ਹਤ੍ਥਿਜੇਟ੍ਠਕੋ ਯੂਥਪਤਿ ਅਹੋਸਿ. ਤਦਾਪਿ ਸੋ ਤਥੇਵ ਕਰੋਤਿ. ਮਹਾਪੁਰਿਸੋ ਅਤ੍ਤਨੋ ਪਰਿਸਾਯ ਪਰਿਹਾਨਿਂ ਞਤ੍ਵਾ, ‘‘ਕੁਹਿਂ ਇਮੇ ਹਤ੍ਥੀ ਗਤਾ, ਮਨ੍ਦਾ ਜਾਤਾ’’ਤਿ ਪੁਚ੍ਛਿਤ੍ਵਾ, ‘‘ਨ ਜਾਨਾਮ, ਸਾਮੀ’’ਤਿ ਵੁਤ੍ਤੇ, ‘‘ਕੁਹਿਞ੍ਚਿ ਗਚ੍ਛਨ੍ਤਾ ਮਂ ਅਨਾਪੁਚ੍ਛਿਤ੍ਵਾ ਨ ਗਮਿਸ੍ਸਨ੍ਤਿ, ਪਰਿਪਨ੍ਥੇਨ ਭਵਿਤਬ੍ਬ’’ਨ੍ਤਿ ਵਤ੍ਵਾ, ‘‘ਏਕਸ੍ਮਿਂ ਠਾਨੇ ਕਾਸਾਵਂ ਪਾਰੁਪਿਤ੍ਵਾ ਨਿਸਿਨ੍ਨਸ੍ਸ ਸਨ੍ਤਿਕਾ ਪਰਿਪਨ੍ਥੇਨ ਭਵਿਤਬ੍ਬ’’ਨ੍ਤਿ ਪਰਿਸਙ੍ਕਿਤ੍ਵਾ, ‘‘ਤਂ ਪਰਿਗ੍ਗਣ੍ਹਿਤੁਂ ਵਟ੍ਟਤੀ’’ਤਿ ਸਬ੍ਬੇ ਹਤ੍ਥੀ ਪੁਰਤੋ ਪੇਸੇਤ੍ਵਾ ਸਯਂ ਪਚ੍ਛਤੋ ਵਿਲਮ੍ਬਮਾਨੋ ਆਗਚ੍ਛਤਿ. ਸੋ ਸੇਸਹਤ੍ਥੀਸੁ ਵਨ੍ਦਿਤ੍ਵਾ ਗਤੇਸੁ ਮਹਾਪੁਰਿਸਂ ਆਗਚ੍ਛਨ੍ਤਂ ਦਿਸ੍ਵਾ ਚੀਵਰਂ ਸਂਹਰਿਤ੍ਵਾ ਸਤ੍ਤਿਂ ਵਿਸ੍ਸਜ੍ਜਿ. ਮਹਾਪੁਰਿਸੋ ਸਤਿਂ ਉਪ੍ਪਟ੍ਠਪੇਤ੍ਵਾ ਆਗਚ੍ਛਨ੍ਤੋ ਪਚ੍ਛਤੋ ਪਟਿਕ੍ਕਮਿਤ੍ਵਾ ਸਤ੍ਤਿਂ ਵਿਵਜ੍ਜੇਸਿ. ਅਥ ਨਂ ‘‘ਇਮਿਨਾ ਇਮੇ ਹਤ੍ਥੀ ਨਾਸਿਤਾ’’ਤਿ ਗਣ੍ਹਿਤੁਂ ਪਕ੍ਖਨ੍ਦਿ. ਇਤਰੋ ਏਕਂ ਰੁਕ੍ਖਂ ਪੁਰਤੋ ਕਤ੍ਵਾ ਨਿਲੀਯਿ. ਅਥ ‘‘ਨਂ ਰੁਕ੍ਖੇਨ ਸਦ੍ਧਿਂ ਸੋਣ੍ਡਾਯ ਪਰਿਕ੍ਖਿਪਿਤ੍ਵਾ ਗਹੇਤ੍ਵਾ ਭੂਮਿਯਂ ਪੋਥੇਸ੍ਸਾਮੀ’’ਤਿ ਤੇਨ ਨੀਹਰਿਤ੍ਵਾ ਦਸ੍ਸਿਤਂ ਕਾਸਾਵਂ ਦਿਸ੍ਵਾ – ‘‘ਸਚਾਹਂ ਇਮਸ੍ਮਿਂ ਦੁਬ੍ਭਿਸ੍ਸਾਮਿ, ਅਨੇਕਸਹਸ੍ਸੇਸੁ ਮੇ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵੇਸੁ ਲਜ੍ਜਾ ਨਾਮ ਭਿਨ੍ਨਾ ਭਵਿਸ੍ਸਤੀ’’ਤਿ ਅਧਿਵਾਸੇਤ੍ਵਾ – ‘‘ਤਯਾ ਮੇ ਏਤ੍ਤਕਾ ਞਾਤਕਾ ਨਾਸਿਤਾ’’ਤਿ ਪੁਚ੍ਛਿ. ‘‘ਆਮ, ਸਾਮੀ’’ਤਿ. ‘‘ਕਸ੍ਮਾ ਏਵਂ ਭਾਰਿਯਕਮ੍ਮਮਕਾਸਿ, ਅਤ੍ਤਨੋ ਅਨਨੁਚ੍ਛਵਿਕਂ ਵੀਤਰਾਗਾਨਂ ਅਨੁਚ੍ਛਵਿਕਂ ਵਤ੍ਥਂ ਪਰਿਦਹਿਤ੍ਵਾ ਏਵਰੂਪਂ ਕਮ੍ਮਂ ਕਰੋਨ੍ਤੇਨ ਭਾਰਿਯਂ ਤਯਾ ਕਤ’’ਨ੍ਤਿ. ਏਵਞ੍ਚ ਪਨ ਵਤ੍ਵਾ ਉਤ੍ਤਰਿਪਿ ਨਂ ਨਿਗ੍ਗਣ੍ਹਨ੍ਤੋ ‘‘ਅਨਿਕ੍ਕਸਾਵੋ ਕਾਸਾਵਂ…ਪੇ… ਸ ਵੇ ਕਾਸਾਵਮਰਹਤੀ’’ਤਿ ਗਾਥਂ ਵਤ੍ਵਾ – ‘‘ਅਯੁਤ੍ਤਂ ਤੇ ਕਤ’’ਨ੍ਤਿ ਵਤ੍ਵਾ ਤਂ ਵਿਸ੍ਸਜ੍ਜੇਸਿ.

ਸਤ੍ਥਾ ਇਮਂ ਧਮ੍ਮਦੇਸਨਂ ਆਹਰਿਤ੍ਵਾ, ‘‘ਤਦਾ ਹਤ੍ਥਿਮਾਰਕੋ ਦੇਵਦਤ੍ਤੋ ਅਹੋਸਿ, ਤਸ੍ਸ ਨਿਗ੍ਗਾਹਕੋ ਹਤ੍ਥਿਨਾਗੋ ਅਹਮੇਵਾ’’ਤਿ ਜਾਤਕਂ ਸਮੋਧਾਨੇਤ੍ਵਾ, ‘‘ਨ, ਭਿਕ੍ਖਵੇ, ਇਦਾਨੇਵ, ਪੁਬ੍ਬੇਪਿ ਦੇਵਦਤ੍ਤੋ ਅਤ੍ਤਨੋ ਅਨਨੁਚ੍ਛਵਿਕਂ ਵਤ੍ਥਂ ਧਾਰੇਸਿਯੇਵਾ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੯. ‘‘ਅਨਿਕ੍ਕਸਾਵੋ ਕਾਸਾਵਂ, ਯੋ ਵਤ੍ਥਂ ਪਰਿਦਹਿਸ੍ਸਤਿ;

ਅਪੇਤੋ ਦਮਸਚ੍ਚੇਨ, ਨ ਸੋ ਕਾਸਾਵਮਰਹਤਿ.

੧੦. ‘‘ਯੋ ਚ ਵਨ੍ਤਕਸਾਵਸ੍ਸ, ਸੀਲੇਸੁ ਸੁਸਮਾਹਿਤੋ;

ਉਪੇਤੋ ਦਮਸਚ੍ਚੇਨ, ਸ ਵੇ ਕਾਸਾਵਮਰਹਤੀ’’ਤਿ.

ਛਦ੍ਦਨ੍ਤਜਾਤਕੇਨਾਪਿ (ਜਾ. ੧.੧੬.੧੨੨-੧੨੩) ਚ ਅਯਮਤ੍ਥੋ ਦੀਪੇਤਬ੍ਬੋ.

ਤਤ੍ਥ ਅਨਿਕ੍ਕਸਾਵੋਤਿ ਰਾਗਾਦੀਹਿ ਕਸਾਵੇਹਿ ਸਕਸਾਵੋ. ਪਰਿਦਹਿਸ੍ਸਤੀਤਿ ਨਿਵਾਸਨਪਾਰੁਪਨਅਤ੍ਥਰਣਵਸੇਨ ਪਰਿਭੁਞ੍ਜਿਸ੍ਸਤਿ. ਪਰਿਧਸ੍ਸਤੀਤਿਪਿ ਪਾਠੋ. ਅਪੇਤੋ ਦਮਸਚ੍ਚੇਨਾਤਿ ਇਨ੍ਦ੍ਰਿਯਦਮੇਨ ਚੇਵ ਪਰਮਤ੍ਥਸਚ੍ਚਪਕ੍ਖਿਕੇਨ ਵਚੀਸਚ੍ਚੇਨ ਚ ਅਪੇਤੋ, ਵਿਯੁਤ੍ਤੋ ਪਰਿਚ੍ਚਤ੍ਥੋਤਿ ਅਤ੍ਥੋ. ਨ ਸੋਤਿ ਸੋ ਏਵਰੂਪੋ ਪੁਗ੍ਗਲੋ ਕਾਸਾਵਂ ਪਰਿਦਹਿਤੁਂ ਨਾਰਹਤਿ. ਵਨ੍ਤਕਸਾਵਸ੍ਸਾਤਿ ਚਤੂਹਿ ਮਗ੍ਗੇਹਿ ਵਨ੍ਤਕਸਾਵੋ ਛਡ੍ਡਿਤਕਸਾਵੋ ਪਹੀਨਕਸਾਵੋ ਅਸ੍ਸ. ਸੀਲੇਸੂਤਿ ਚਤੁਪਾਰਿਸੁਦ੍ਧਿਸੀਲੇਸੁ. ਸੁਸਮਾਹਿਤੋਤਿ ਸੁਟ੍ਠੁ ਸਮਾਹਿਤੋ ਸੁਟ੍ਠਿਤੋ. ਉਪੇਤੋਤਿ ਇਨ੍ਦ੍ਰਿਯਦਮੇਨ ਚੇਵ ਵੁਤ੍ਤਪ੍ਪਕਾਰੇਨ ਚ ਸਚ੍ਚੇਨ ਉਪਗਤੋ. ਸ ਵੇਤਿ ਸੋ ਏਵਰੂਪੋ ਪੁਗ੍ਗਲੋ ਤਂ ਗਨ੍ਧਕਾਸਾਵਵਤ੍ਥਂ ਅਰਹਤੀਤਿ.

ਗਾਥਾਪਰਿਯੋਸਾਨੇ ਸੋ ਦਿਸਾਵਾਸਿਕੋ ਭਿਕ੍ਖੁ ਸੋਤਾਪਨ੍ਨੋ ਅਹੋਸਿ, ਅਞ੍ਞੇਪਿ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਦੇਵਦਤ੍ਤਵਤ੍ਥੁ ਸਤ੍ਤਮਂ.