੬. ਮਹਾਕਾਲ਼ਤ੍ਥੇਰਵਤ੍ਥੁ

ਸੁਭਾਨੁਪਸ੍ਸਿਨ੍ਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਸੇਤਬ੍ਯਨਗਰਂ ਉਪਨਿਸ੍ਸਾਯ ਸਿਂਸਪਾਵਨੇ ਵਿਹਰਨ੍ਤੋ ਚੂਲ਼ਕਾਲ਼ਮਹਾਕਾਲ਼ੇ ਆਰਬ੍ਭ ਕਥੇਸਿ.

ਸੇਤਬ੍ਯਨਗਰਵਾਸਿਨੋ ਹਿ ਚੂਲ਼ਕਾਲ਼ੋ, ਮਜ੍ਝਿਮਕਾਲ਼ੋ, ਮਹਾਕਾਲ਼ੋਤਿ ਤਯੋ ਭਾਤਰੋ ਕੁਟੁਮ੍ਬਿਕਾ. ਤੇਸੁ ਜੇਟ੍ਠਕਨਿਟ੍ਠਾ ਦਿਸਾਸੁ ਵਿਚਰਿਤ੍ਵਾ ਪਞ੍ਚਹਿ ਸਕਟਸਤੇਹਿ ਭਣ੍ਡਂ ਆਹਰਨ੍ਤਿ, ਮਜ੍ਝਿਮਕਾਲ਼ੋ ਆਭਤਂ ਵਿਕ੍ਕਿਣਾਤਿ. ਅਥੇਕਸ੍ਮਿਂ ਸਮਯੇ ਤੇ ਉਭੋਪਿ ਭਾਤਰੋ ਪਞ੍ਚਹਿ ਸਕਟਸਤੇਹਿ ਨਾਨਾਭਣ੍ਡਂ ਗਹੇਤ੍ਵਾ ਸਾਵਤ੍ਥਿਂ ਗਨ੍ਤ੍ਵਾ ਸਾਵਤ੍ਥਿਯਾ ਚ ਜੇਤਵਨਸ੍ਸ ਚ ਅਨ੍ਤਰੇ ਸਕਟਾਨਿ ਮੋਚਯਿਂਸੁ. ਤੇਸੁ ਮਹਾਕਾਲ਼ੋ ਸਾਯਨ੍ਹਸਮਯੇ ਮਾਲਾਗਨ੍ਧਾਦਿਹਤ੍ਥੇ ਸਾਵਤ੍ਥਿਵਾਸਿਨੋ ਅਰਿਯਸਾਵਕੇ ਧਮ੍ਮਸ੍ਸਵਨਾਯ ਗਚ੍ਛਨ੍ਤੇ ਦਿਸ੍ਵਾ ‘‘ਕੁਹਿਂ ਇਮੇ ਗਚ੍ਛਨ੍ਤੀ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਅਹਮ੍ਪਿ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਕਨਿਟ੍ਠਂ ਆਮਨ੍ਤੇਤ੍ਵਾ, ‘‘ਤਾਤ, ਤੇਸੁ ਸਕਟੇਸੁ ਅਪ੍ਪਮਤ੍ਤੋ ਹੋਹਿ, ਅਹਂ ਧਮ੍ਮਂ ਸੋਤੁਂ ਗਚ੍ਛਾਮੀ’’ਤਿ ਵਤ੍ਵਾ ਗਨ੍ਤ੍ਵਾ ਤਥਾਗਤਂ ਵਨ੍ਦਿਤ੍ਵਾ ਪਰਿਸਪਰਿਯਨ੍ਤੇ ਨਿਸੀਦਿ. ਸਤ੍ਥਾ ਤਂ ਦਿਸ੍ਵਾ ਤਸ੍ਸ ਅਜ੍ਝਾਸਯਵਸੇਨ ਅਨੁਪੁਬ੍ਬਿਂ ਕਥਂ ਕਥੇਨ੍ਤੋ ਦੁਕ੍ਖਕ੍ਖਨ੍ਧਸੁਤ੍ਤਾਦਿਵਸੇਨ (ਮ. ਨਿ. ੧.੧੬੩ ਆਦਯੋ) ਅਨੇਕਪਰਿਯਾਯੇਨ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਞ੍ਚ ਕਥੇਸਿ. ਤਂ ਸੁਤ੍ਵਾ ਮਹਾਕਾਲ਼ੋ ‘‘ਸਬ੍ਬਂ ਕਿਰ ਪਹਾਯ ਗਨ੍ਤਬ੍ਬਂ, ਪਰਲੋਕਂ ਗਚ੍ਛਨ੍ਤਂ ਨੇਵ ਭੋਗਾ, ਨ ਞਾਤਕਾ ਚ ਅਨੁਗਚ੍ਛਨ੍ਤਿ, ਕਿਂ ਮੇ ਘਰਾਵਾਸੇਨ ਪਬ੍ਬਜਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਮਹਾਜਨੇ ਸਤ੍ਥਾਰਂ ਵਨ੍ਦਿਤ੍ਵਾ ਪਕ੍ਕਨ੍ਤੇ ਸਤ੍ਥਾਰਂ ਪਬ੍ਬਜ੍ਜਂ ਯਾਚਿਤ੍ਵਾ ਸਤ੍ਥਾਰਾ ‘‘ਨਤ੍ਥਿ ਤੇ ਕੋਚਿ ਅਪਲੋਕੇਤਬ੍ਬੋ’’ਤਿ ਵੁਤ੍ਤੇ, ‘‘ਕਨਿਟ੍ਠੋ ਮੇ, ਭਨ੍ਤੇ, ਅਤ੍ਥੀ’’ਤਿ ਵਤ੍ਵਾ ਤੇਨ ਹਿ ‘‘ਅਪਲੋਕੇਹਿ ਨ’’ਨ੍ਤਿ ਵੁਤ੍ਤੇ, ‘‘ਸਾਧੁ, ਭਨ੍ਤੇ’’ਤਿ ਵਤ੍ਵਾ ਗਨ੍ਤ੍ਵਾ ਕਨਿਟ੍ਠਂ ਪਕ੍ਕੋਸਾਪੇਤ੍ਵਾ, ‘‘ਤਾਤ, ਇਮਂ ਸਬ੍ਬਂ ਸਾਪਤੇਯ੍ਯਂ ਪਟਿਪਜ੍ਜਾਹੀ’’ਤਿ ਆਹ. ‘‘ਤੁਮ੍ਹੇ ਪਨ ਕਿਂ ਕਰਿਸ੍ਸਥ ਭਾਤਿਕਾ’’ਤਿ? ‘‘ਅਹਂ ਸਤ੍ਥੁ ਸਨ੍ਤਿਕੇ ਪਬ੍ਬਜਿਸ੍ਸਾਮੀ’’ਤਿ. ਸੋ ਤਂ ਨਾਨਪ੍ਪਕਾਰੇਹਿ ਯਾਚਿਤ੍ਵਾ ਨਿਵਤ੍ਤੇਤੁਂ ਅਸਕ੍ਕੋਨ੍ਤੋ ‘‘ਸਾਧੁ, ਸਾਮਿ, ਯਥਾ ਅਜ੍ਝਾਸਯਂ ਕਰੋਥਾ’’ਤਿ ਆਹ. ਮਹਾਕਾਲ਼ੋ ਗਨ੍ਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿ. ‘‘ਅਹਂ ਭਾਤਿਕਂ ਗਹੇਤ੍ਵਾਵ ਉਪ੍ਪਬ੍ਬਜਿਸ੍ਸਾਮੀ’’ਤਿ ਚੂਲ਼ਕਾਲ਼ੋਪਿ ਪਬ੍ਬਜਿ. ਅਪਰਭਾਗੇ ਮਹਾਕਾਲ਼ੋ ਉਪਸਮ੍ਪਦਂ ਲਭਿਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਾਸਨੇ ਧੁਰਾਨਿ ਪੁਚ੍ਛਿਤ੍ਵਾ ਸਤ੍ਥਾਰਾ ਦ੍ਵੀਸੁ ਧੁਰੇਸੁ ਕਥਿਤੇਸੁ ‘‘ਅਹਂ, ਭਨ੍ਤੇ, ਮਹਲ੍ਲਕਕਾਲੇ ਪਬ੍ਬਜਿਤਤ੍ਤਾ ਗਨ੍ਥਧੁਰਂ ਪੂਰੇਤੁਂ ਨ ਸਕ੍ਖਿਸ੍ਸਾਮਿ, ਵਿਪਸ੍ਸਨਾਧੁਰਂ ਪਨ ਪੂਰੇਸ੍ਸਾਮੀ’’ਤਿ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਾਪੇਤ੍ਵਾ ਸੋਸਾਨਿਕਧੁਤਙ੍ਗਂ ਸਮਾਦਾਯ ਪਠਮਯਾਮਾਤਿਕ੍ਕਨ੍ਤੇ ਸਬ੍ਬੇਸੁ ਨਿਦ੍ਦਂ ਓਕ੍ਕਨ੍ਤੇਸੁ ਸੁਸਾਨਂ ਗਨ੍ਤ੍ਵਾ ਪਚ੍ਚੂਸਕਾਲੇ ਸਬ੍ਬੇਸੁ ਅਨੁਟ੍ਠਿਤੇਸੁਯੇਵ ਵਿਹਾਰਂ ਆਗਚ੍ਛਤਿ.

ਅਥੇਕਾ ਸੁਸਾਨਗੋਪਿਕਾ ਕਾਲੀ ਨਾਮ ਛਵਡਾਹਿਕਾ ਥੇਰਸ੍ਸ ਠਿਤਟ੍ਠਾਨਂ ਨਿਸਿਨ੍ਨਟ੍ਠਾਨਂ ਚਙ੍ਕਮਿਤਟ੍ਠਾਨਞ੍ਚ ਦਿਸ੍ਵਾ ‘‘ਕੋ ਨੁ ਖੋ ਇਧਾਗਚ੍ਛਤਿ, ਪਰਿਗ੍ਗਣ੍ਹਿਸ੍ਸਾਮਿ ਨ’’ਨ੍ਤਿ ਪਰਿਗ੍ਗਣ੍ਹਿਤੁਂ ਅਸਕ੍ਕੋਨ੍ਤੀ ਏਕਦਿਵਸਂ ਸੁਸਾਨਕੁਟਿਕਾਯਮੇਵ ਦੀਪਂ ਜਾਲੇਤ੍ਵਾ ਪੁਤ੍ਤਧੀਤਰੋ ਆਦਾਯ ਗਨ੍ਤ੍ਵਾ ਏਕਮਨ੍ਤੇ ਨਿਲੀਯਮਾਨਾ ਮਜ੍ਝਿਮਯਾਮੇ ਥੇਰਂ ਆਗਚ੍ਛਨ੍ਤਂ ਦਿਸ੍ਵਾ ਗਨ੍ਤ੍ਵਾ ਵਨ੍ਦਿਤ੍ਵਾ, ‘‘ਅਯ੍ਯੋ, ਨੋ, ਭਨ੍ਤੇ, ਇਮਸ੍ਮਿਂ ਠਾਨੇ ਵਿਹਰਤੀ’’ਤਿ ਆਹ. ‘‘ਆਮ, ਉਪਾਸਿਕੇ’’ਤਿ. ‘‘ਭਨ੍ਤੇ, ਸੁਸਾਨੇ ਵਿਹਰਨ੍ਤੇਹਿ ਨਾਮ ਵਤ੍ਤਂ ਉਗ੍ਗਣ੍ਹਿਤੁਂ ਵਟ੍ਟਤੀ’’ਤਿ. ਥੇਰੋ ‘‘ਕਿਂ ਪਨ ਮਯਂ ਤਯਾ ਕਥਿਤਵਤ੍ਤੇ ਵਤ੍ਤਿਸ੍ਸਾਮਾ’’ਤਿ ਅਵਤ੍ਵਾ ‘‘ਕਿਂ ਕਾਤੁਂ ਵਟ੍ਟਤਿ ਉਪਾਸਿਕੇ’’ਤਿ ਆਹ. ‘‘ਭਨ੍ਤੇ, ਸੋਸਾਨਿਕੇਹਿ ਨਾਮ ਸੁਸਾਨੇ ਵਸਨਭਾਵੋ ਸੁਸਾਨਗੋਪਕਾਨਞ੍ਚ ਵਿਹਾਰੇ ਮਹਾਥੇਰਸ੍ਸ ਚ ਗਾਮਭੋਜਕਸ੍ਸ ਚ ਕਥੇਤੁਂ ਵਟ੍ਟਤੀ’’ਤਿ. ‘‘ਥੇਰੋ ਕਿਂ ਕਾਰਣਾ’’ਤਿ? ‘‘ਕਤਕਮ੍ਮਾ ਚੋਰਾ ਧਨਸਾਮਿਕੇਹਿ ਪਦਾਨੁਪਦਂ ਅਨੁਬਦ੍ਧਾ ਸੁਸਾਨੇ ਭਣ੍ਡਕਂ ਛਡ੍ਡੇਤ੍ਵਾ ਪਲਾਯਨ੍ਤਿ, ਅਥ ਮਨੁਸ੍ਸਾ ਸੋਸਾਨਿਕਾਨਂ ਪਰਿਪਨ੍ਥਂ ਕਰੋਨ੍ਤਿ, ਏਤੇਸਂ ਪਨ ਕਥਿਤੇ ‘ਮਯਂ ਇਮਸ੍ਸ ਭਦ੍ਦਨ੍ਤਸ੍ਸ ਏਤ੍ਤਕਂ ਨਾਮ ਕਾਲਂ ਏਤ੍ਥ ਵਸਨਭਾਵਂ ਜਾਨਾਮ, ਅਚੋਰੋ ਏਸੋ’ਤਿ ਉਪਦ੍ਦਵਂ ਨਿਵਾਰੇਨ੍ਤਿ. ਤਸ੍ਮਾ ਏਤੇਸਂ ਕਥੇਤੁਂ ਵਟ੍ਟਤੀ’’ਤਿ.

‘‘ਥੇਰੋ ਅਞ੍ਞਂ ਕਿਂ ਕਾਤਬ੍ਬ’’ਨ੍ਤਿ? ‘‘ਭਨ੍ਤੇ, ਸੁਸਾਨੇ ਵਸਨ੍ਤੇਨ ਨਾਮ ਅਯ੍ਯੇਨ ਮਚ੍ਛਮਂਸਤਿਲਪਿਟ੍ਠਤੇਲਗੁਲ਼ਾਦੀਨਿ ਵਜ੍ਜੇਤਬ੍ਬਾਨਿ, ਦਿਵਾ ਨ ਨਿਦ੍ਦਾਯਿਤਬ੍ਬਂ, ਕੁਸੀਤੇਨ ਨ ਭਵਿਤਬ੍ਬਂ, ਆਰਦ੍ਧਵੀਰਿਯੇਨ ਭਵਿਤਬ੍ਬਂ, ਅਸਠੇਨ ਅਮਾਯਾਵਿਨਾ ਹੁਤ੍ਵਾ ਕਲ੍ਯਾਣਜ੍ਝਾਸਯੇਨ ਭਵਿਤਬ੍ਬਂ, ਸਾਯਂ ਸਬ੍ਬੇਸੁ ਸੁਤ੍ਤੇਸੁ ਵਿਹਾਰਤੋ ਆਗਨ੍ਤਬ੍ਬਂ, ਪਚ੍ਚੂਸਕਾਲੇ ਸਬ੍ਬੇਸੁ ਅਨੁਟ੍ਠਿਤੇਸੁਯੇਵ ਵਿਹਾਰਂ ਗਨ੍ਤਬ੍ਬਂ. ਸਚੇ, ਭਨ੍ਤੇ, ਅਯ੍ਯੋ ਇਮਸ੍ਮਿਂ ਠਾਨੇ ਏਵਂ ਵਿਹਰਨ੍ਤੋ ਪਬ੍ਬਜਿਤਕਿਚ੍ਚਂ ਮਤ੍ਥਕਂ ਪਾਪੇਤੁਂ ਸਕ੍ਖਿਸ੍ਸਤਿ, ਸਚੇ ਮਤਸਰੀਰਂ ਆਨੇਤ੍ਵਾ ਛਡ੍ਡੇਨ੍ਤਿ, ਅਹਂ ਕਮ੍ਬਲਕੂਟਾਗਾਰਂ ਆਰੋਪੇਤ੍ਵਾ ਗਨ੍ਧਮਾਲਾਦੀਹਿ ਸਕ੍ਕਾਰਂ ਕਤ੍ਵਾ ਸਰੀਰਕਿਚ੍ਚਂ ਕਰਿਸ੍ਸਾਮਿ. ਨੋ ਚੇ ਸਕ੍ਖਿਸ੍ਸਤਿ, ਚਿਤਕਂ ਆਰੋਪੇਤ੍ਵਾ ਅਗ੍ਗਿਂ ਜਾਲੇਤ੍ਵਾ ਸਙ੍ਕੁਨਾ ਆਕਡ੍ਢਿਤ੍ਵਾ ਬਹਿ ਖਿਪਿਤ੍ਵਾ ਫਰਸੁਨਾ ਕੋਟ੍ਟੇਤ੍ਵਾ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਅਗ੍ਗਿਮ੍ਹਿ ਪਕ੍ਖਿਪਿਤ੍ਵਾ ਝਾਪੇਸ੍ਸਾਮੀ’’ਤਿ ਆਹ. ਅਥ ਨਂ ਥੇਰੋ ‘‘ਸਾਧੁ ਭਦ੍ਦੇ, ਏਕਂ ਪਨ ਰੂਪਾਰਮ੍ਮਣਂ ਦਿਸ੍ਵਾ ਮਯ੍ਹਂ ਕਥੇਯ੍ਯਾਸੀ’’ਤਿ ਆਹ. ਸਾ ‘‘ਸਾਧੂ’’ਤਿ ਪਚ੍ਚਸ੍ਸੋਸਿ. ਥੇਰੋ ਯਥਾਜ੍ਝਾਸਯੇਨ ਸੁਸਾਨੇ ਸਮਣਧਮ੍ਮਂ ਕਰੋਤਿ. ਚੂਲ਼ਕਾਲ਼ਤ੍ਥੇਰੋ ਪਨ ਉਟ੍ਠਾਯ ਸਮੁਟ੍ਠਾਯ ਘਰਾਵਾਸਂ ਚਿਨ੍ਤੇਤਿ, ਪੁਤ੍ਤਦਾਰਂ ਅਨੁਸ੍ਸਰਤਿ. ‘‘ਭਾਤਿਕੋ ਮੇ ਅਤਿਭਾਰਿਯਂ ਕਮ੍ਮਂ ਕਰੋਤੀ’’ਤਿ ਚਿਨ੍ਤੇਤਿ.

ਅਥੇਕਾ ਕੁਲਧੀਤਾ ਤਂਮੁਹੁਤ੍ਤਸਮੁਟ੍ਠਿਤੇਨ ਬ੍ਯਾਧਿਨਾ ਸਾਯਨ੍ਹਸਮਯੇ ਅਮਿਲਾਤਾ ਅਕਿਲਨ੍ਤਾ ਕਾਲਮਕਾਸਿ. ਤਮੇਨਂ ਞਾਤਕਾਦਯੋ ਦਾਰੁਤੇਲਾਦੀਹਿ ਸਦ੍ਧਿਂ ਸਾਯਂ ਸੁਸਾਨਂ ਨੇਤ੍ਵਾ ਸੁਸਾਨਗੋਪਿਕਾਯ ‘‘ਇਮਂ ਝਾਪੇਹੀ’’ਤਿ ਭਤਿਂ ਦਤ੍ਵਾ ਨਿਯ੍ਯਾਦੇਤ੍ਵਾ ਪਕ੍ਕਮਿਂਸੁ. ਸਾ ਤਸ੍ਸਾ ਪਾਰੁਤਵਤ੍ਥਂ ਅਪਨੇਤ੍ਵਾ ਤਂਮੁਹੁਤ੍ਤਮਤਂ ਪੀਣਿਤਪੀਣਿਤਂ ਸੁਵਣ੍ਣਵਣ੍ਣਂ ਸਰੀਰਂ ਦਿਸ੍ਵਾ, ‘‘ਇਮਂ ਅਯ੍ਯਸ੍ਸ ਦਸ੍ਸੇਤੁਂ ਪਤਿਰੂਪਂ ਆਰਮ੍ਮਣ’’ਨ੍ਤਿ ਚਿਨ੍ਤੇਤ੍ਵਾ ਗਨ੍ਤ੍ਵਾ ਥੇਰਂ ਵਨ੍ਦਿਤ੍ਵਾ, ‘‘ਭਨ੍ਤੇ, ਏਵਰੂਪਂ ਨਾਮ ਆਰਮ੍ਮਣਂ ਅਤ੍ਥਿ, ਓਲੋਕੇਥ ਅਯ੍ਯਾ’’ਤਿ ਆਹ. ਥੇਰੋ ‘‘ਸਾਧੂ’’ਤਿ ਵਤ੍ਵਾ ਪਾਰੁਪਨਂ ਨੀਹਰਾਪੇਤ੍ਵਾ ਪਾਦਤਲਤੋ ਯਾਵ ਕੇਸਗ੍ਗਾ ਓਲੋਕੇਤ੍ਵਾ ‘‘ਅਤਿਪੀਣਿਤਮੇਤਂ ਰੂਪਂ ਸੁਵਣ੍ਣਵਣ੍ਣਂ ਅਗ੍ਗਿਮ੍ਹਿ ਨਂ ਪਕ੍ਖਿਪਿਤ੍ਵਾ ਮਹਾਜਾਲਾਹਿ ਗਹਿਤਮਤ੍ਤਕਾਲੇ ਮਯ੍ਹਂ ਆਰੋਚੇਯ੍ਯਾਸੀ’’ਤਿ ਵਤ੍ਵਾ ਸਕਟ੍ਠਾਨਮੇਵ ਗਨ੍ਤ੍ਵਾ ਨਿਸੀਦਿ. ਸਾ ਤਥਾ ਕਤ੍ਵਾ ਥੇਰਸ੍ਸ ਆਰੋਚੇਸਿ. ਥੇਰੋ ਗਨ੍ਤ੍ਵਾ ਓਲੋਕੇਸਿ. ਜਾਲਾਯ ਪਹਟਪਹਟਟ੍ਠਾਨਂ ਕਬਰਗਾਵਿਯਾ ਵਿਯ ਸਰੀਰਵਣ੍ਣਂ ਅਹੋਸਿ, ਪਾਦਾ ਨਮਿਤ੍ਵਾ ਓਲਮ੍ਬਿਂਸੁ, ਹਤ੍ਥਾ ਪਟਿਕੁਟਿਂਸੁ, ਊਰੁਨਲਾਟਂ ਨਿਚ੍ਚਮ੍ਮਂ ਅਹੋਸਿ. ਥੇਰੋ ‘‘ਇਦਂ ਸਰੀਰਂ ਇਦਾਨੇਵ ਓਲੋਕੇਨ੍ਤਾਨਂ ਅਪਰਿਯਨ੍ਤਕਰਂ ਹੁਤ੍ਵਾ ਇਦਾਨੇਵ ਖਯਂ ਪਤ੍ਤਂ ਵਯਂ ਪਤ੍ਤ’’ਨ੍ਤਿ ਰਤ੍ਤਿਟ੍ਠਾਨਂ ਗਨ੍ਤ੍ਵਾ ਨਿਸੀਦਿਤ੍ਵਾ ਖਯਵਯਂ ਸਮ੍ਪਸ੍ਸਮਾਨੋ –

‘‘ਅਨਿਚ੍ਚਾ ਵਤ ਸਙ੍ਖਾਰਾ, ਉਪ੍ਪਾਦਵਯਧਮ੍ਮਿਨੋ;

ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ, ਤੇਸਂ ਵੂਪਸਮੋ ਸੁਖੋ’’ਤਿ. (ਦੀ. ਨਿ. ੨.੨੨੧, ੨੭੨; ਸਂ. ਨਿ. ੧.੧੮੬; ੨.੧੪੩; ਜਾ. ੧.੧.੯੫) –

ਗਾਥਂ ਵਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ.

ਤਸ੍ਮਿਂ ਅਰਹਤ੍ਤਂ ਪਤ੍ਤੇ ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਚਾਰਿਕਂ ਚਰਮਾਨੋ ਸੇਤਬ੍ਯਂ ਗਨ੍ਤ੍ਵਾ ਸਿਂਸਪਾਵਨਂ ਪਾਵਿਸਿ. ਚੂਲ਼ਕਾਲ਼ਸ੍ਸ ਭਰਿਯਾਯੋ ‘‘ਸਤ੍ਥਾ ਕਿਰ ਅਨੁਪ੍ਪਤ੍ਤੋ ਸਿਂਸਪਾਵਨ’’ਨ੍ਤਿ ਸੁਤ੍ਵਾ ‘‘ਅਮ੍ਹਾਕਂ ਸਾਮਿਕਂ ਗਣ੍ਹਿਸ੍ਸਾਮਾ’’ਤਿ ਪੇਸੇਤ੍ਵਾ ਸਤ੍ਥਾਰਂ ਨਿਮਨ੍ਤਾਪੇਸੁਂ. ਬੁਦ੍ਧਾਨਂ ਪਨ ਅਪਰਿਚਿਣ੍ਣਟ੍ਠਾਨੇ ਆਸਨਪਞ੍ਞਤ੍ਤਿਂ ਆਚਿਕ੍ਖਨ੍ਤੇਨ ਏਕੇਨ ਭਿਕ੍ਖੁਨਾ ਪਠਮਤਰਂ ਗਨ੍ਤੁਂ ਵਟ੍ਟਤਿ. ਬੁਦ੍ਧਾਨਞ੍ਹਿ ਮਜ੍ਝਿਮਟ੍ਠਾਨੇ ਆਸਨਂ ਪਞ੍ਞਾਪੇਤ੍ਵਾ ਤਸ੍ਸ ਦਕ੍ਖਿਣਤੋ ਸਾਰਿਪੁਤ੍ਤਤ੍ਥੇਰਸ੍ਸ, ਵਾਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ, ਤਤੋ ਪਟ੍ਠਾਯ ਉਭੋਸੁ ਪਸ੍ਸੇਸੁ ਭਿਕ੍ਖੁਸਙ੍ਘਸ੍ਸ ਆਸਨਂ ਪਞ੍ਞਾਪੇਤਬ੍ਬਂ ਹੋਤਿ. ਤਸ੍ਮਾ ਮਹਾਕਾਲ਼ਤ੍ਥੇਰੋ ਚੀਵਰਪਾਰੁਪਨਟ੍ਠਾਨੇ ਠਤ੍ਵਾ, ‘‘ਚੂਲ਼ਕਾਲ਼, ਤ੍ਵਂ ਪੁਰਤੋ ਗਨ੍ਤ੍ਵਾ ਆਸਨਪਞ੍ਞਤ੍ਤਿਂ ਆਚਿਕ੍ਖਾ’’ਤਿ ਚੂਲ਼ਕਾਲ਼ਂ ਪੇਸੇਸਿ. ਤਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਗੇਹਜਨਾ ਤੇਨ ਸਦ੍ਧਿਂ ਪਰਿਹਾਸਂ ਕਰੋਨ੍ਤਾ ਨੀਚਾਸਨਾਨਿ ਸਙ੍ਘਤ੍ਥੇਰਸ੍ਸ ਕੋਟਿਯਂ ਅਤ੍ਥਰਨ੍ਤਿ, ਉਚ੍ਚਾਸਨਾਨਿ ਸਙ੍ਘਨਵਕਸ੍ਸ ਕੋਟਿਯਂ. ਇਤਰੋ ‘‘ਮਾ ਏਵਂ ਕਰੋਥ, ਨੀਚਾਸਨਾਨਿ ਉਪਰਿ ਮਾ ਪਞ੍ਞਾਪੇਥ, ਉਚ੍ਚਾਸਨਾਨਿ ਉਪਰਿ ਪਞ੍ਞਾਪੇਥ, ਨੀਚਾਸਨਾਨਿ ਹੇਟ੍ਠਾ’’ਤਿ ਆਹ. ਇਤ੍ਥਿਯੋ ਤਸ੍ਸ ਵਚਨਂ ਅਸੁਣਨ੍ਤਿਯੋ ਵਿਯ ‘‘ਤ੍ਵਂ ਕਿਂ ਕਰੋਨ੍ਤੋ ਵਿਚਰਸਿ, ਕਿਂ ਤਵ ਆਸਨਾਨਿ ਪਞ੍ਞਾਪੇਤੁਂ ਨ ਵਟ੍ਟਤਿ, ਤ੍ਵਂ ਕਂ ਆਪੁਚ੍ਛਿਤ੍ਵਾ ਪਬ੍ਬਜਿਤੋ, ਕੇਨ ਪਬ੍ਬਜਿਤੋਸਿ, ਕਸ੍ਮਾ ਇਧਾਗਤੋਸੀ’’ਤਿ ਵਤ੍ਵਾ ਨਿਵਾਸਨਪਾਰੁਪਨਂ ਅਚ੍ਛਿਨ੍ਦਿਤ੍ਵਾ ਸੇਤਕਾਨਿ ਨਿਵਾਸੇਤ੍ਵਾ ਸੀਸੇ ਚ ਮਾਲਾਚੁਮ੍ਬੁਟਕਂ ਠਪੇਤ੍ਵਾ, ‘‘ਗਚ੍ਛ ਸਤ੍ਥਾਰਂ ਆਨੇਹਿ, ਮਯਂ ਆਸਨਾਨਿ ਪਞ੍ਞਾਪੇਸ੍ਸਾਮਾ’’ਤਿ ਪਹਿਣਿਂਸੁ. ਨ ਚਿਰਂ ਭਿਕ੍ਖੁਭਾਵੇ ਠਤ੍ਵਾ ਅਵਸ੍ਸਿਕੋਵ ਉਪ੍ਪਬ੍ਬਜਿਤਤ੍ਤਾ ਲਜ੍ਜਿਤੁਂ ਨ ਜਾਨਾਤਿ, ਤਸ੍ਮਾ ਸੋ ਤੇਨ ਆਕਪ੍ਪੇਨ ਨਿਰਾਸਙ੍ਕੋਵ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਆਦਾਯ ਆਗਤੋ. ਭਿਕ੍ਖੁਸਙ੍ਘਸ੍ਸ ਪਨ ਭਤ੍ਤਕਿਚ੍ਚਾਵਸਾਨੇ ਮਹਾਕਾਲ਼ਸ੍ਸ ਭਰਿਯਾਯੋ ‘‘ਇਮਾਹਿ ਅਤ੍ਤਨੋ ਸਾਮਿਕੋ ਗਹਿਤੋ, ਮਯਮ੍ਪਿ ਅਮ੍ਹਾਕਂ ਸਾਮਿਕਂ ਗਣ੍ਹਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਪੁਨਦਿਵਸੇ ਸਤ੍ਥਾਰਂ ਨਿਮਨ੍ਤਯਿਂਸੁ. ਤਦਾ ਪਨ ਆਸਨਪਞ੍ਞਾਪਨਤ੍ਥਂ ਅਞ੍ਞੋ ਭਿਕ੍ਖੁ ਅਗਮਾਸਿ. ਤਾ ਤਸ੍ਮਿਂ ਖਣੇ ਓਕਾਸਂ ਅਲਭਿਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਭਿਕ੍ਖਂ ਅਦਂਸੁ. ਚੂਲ਼ਕਾਲ਼ਸ੍ਸ ਪਨ ਦ੍ਵੇ ਭਰਿਯਾਯੋ, ਮਜ੍ਝਿਮਕਾਲ਼ਸ੍ਸ ਚਤਸ੍ਸੋ, ਮਹਾਕਾਲ਼ਸ੍ਸ ਪਨ ਅਟ੍ਠ. ਭਿਕ੍ਖੂਪਿ ਭਤ੍ਤਕਿਚ੍ਚਂ ਕਾਤੁਕਾਮਾ ਨਿਸੀਦਿਤ੍ਵਾ ਭਤ੍ਤਕਿਚ੍ਚਮਕਂਸੁ, ਬਹਿ ਗਨ੍ਤੁਕਾਮਾ ਉਟ੍ਠਾਯ ਅਗਮਂਸੁ. ਸਤ੍ਥਾ ਪਨ ਨਿਸੀਦਿਤ੍ਵਾ ਭਤ੍ਤਕਿਚ੍ਚਂ ਕਰਿ. ਤਸ੍ਸ ਭਤ੍ਤਕਿਚ੍ਚਪਰਿਯੋਸਾਨੇ ਤਾ ਇਤ੍ਥਿਯੋ, ‘‘ਭਨ੍ਤੇ, ਮਹਾਕਾਲ਼ੋ ਅਮ੍ਹਾਕਂ ਅਨੁਮੋਦਨਂ ਕਤ੍ਵਾ ਆਗਚ੍ਛਿਸ੍ਸਤਿ, ਤੁਮ੍ਹੇ ਪੁਰਤੋ ਗਚ੍ਛਥਾ’’ਤਿ ਵਦਿਂਸੁ. ਸਤ੍ਥਾ ‘‘ਸਾਧੂ’’ਤਿ ਵਤ੍ਵਾ ਪੁਰਤੋ ਅਗਮਾਸਿ. ਗਾਮਦ੍ਵਾਰਂ ਪਤ੍ਵਾ ਭਿਕ੍ਖੂ ਉਜ੍ਝਾਯਿਂਸੁ ‘‘ਕਿਂ ਨਾਮੇਤਂ ਸਤ੍ਥਾਰਾ ਕਤਂ, ਞਤ੍ਵਾ ਨੁ ਖੋ ਕਤਂ, ਉਦਾਹੁ ਅਜਾਨਿਤ੍ਵਾ. ਹਿਯ੍ਯੋ ਚੂਲ਼ਕਾਲ਼ਸ੍ਸ ਪੁਰਤੋ ਗਤਤ੍ਤਾ ਪਬ੍ਬਜ੍ਜਨ੍ਤਰਾਯੋ ਜਾਤੋ, ਅਜ੍ਜ ਅਞ੍ਞਸ੍ਸ ਪੁਰਤੋ ਗਤਤ੍ਤਾ ਅਨ੍ਤਰਾਯੋ ਨਾਹੋਸਿ. ਇਦਾਨਿ ਮਹਾਕਾਲ਼ਂ ਠਪੇਤ੍ਵਾ ਆਗਤੋ, ਸੀਲਵਾ ਖੋ ਪਨ ਭਿਕ੍ਖੁ ਆਚਾਰਸਮ੍ਪਨ੍ਨੋ, ਕਰਿਸ੍ਸਤਿ ਨੁ ਖੋ ਤਸ੍ਸ ਪਬ੍ਬਜ੍ਜਨ੍ਤਰਾਯ’’ਨ੍ਤਿ. ਸਤ੍ਥਾ ਤੇਸਂ ਵਚਨਂ ਸੁਤ੍ਵਾ ਨਿਵਤ੍ਤਿਤ੍ਵਾ ਠਿਤੋ ‘‘ਕਿਂ ਕਥੇਥ, ਭਿਕ੍ਖਵੇ’’ਤਿ ਪੁਚ੍ਛਿ. ਤੇ ਤਮਤ੍ਥਂ ਆਰੋਚੇਸੁਂ. ‘‘ਕਿਂ ਪਨ ਤੁਮ੍ਹੇ, ਭਿਕ੍ਖਵੇ, ਚੂਲ਼ਕਾਲ਼ਂ ਵਿਯ ਮਹਾਕਾਲ਼ਂ ਸਲ੍ਲਕ੍ਖੇਥਾ’’ਤਿ? ‘‘ਆਮ, ਭਨ੍ਤੇ’’. ਤਸ੍ਸ ਹਿ ਦ੍ਵੇ ਪਜਾਪਤਿਯੋ, ਇਮਸ੍ਸ ਅਟ੍ਠ. ‘‘ਅਟ੍ਠਹਿ ਪਰਿਕ੍ਖਿਪਿਤ੍ਵਾ ਗਹਿਤੋ ਕਿਂ ਕਰਿਸ੍ਸਤਿ, ਭਨ੍ਤੇ’’ਤਿ? ਸਤ੍ਥਾ ‘‘ਮਾ, ਭਿਕ੍ਖਵੇ, ਏਵਂ ਅਵਚੁਤ੍ਥ, ਚੂਲ਼ਕਾਲ਼ੋ ਉਟ੍ਠਾਯ ਸਮੁਟ੍ਠਾਯ ਸੁਭਾਰਮ੍ਮਣਬਹੁਲੋ ਵਿਹਰਤਿ, ਪਪਾਤੇ ਠਿਤੋ ਦੁਬ੍ਬਲਰੁਕ੍ਖਸਦਿਸੋ. ਮਯ੍ਹਂ ਪਨ ਪੁਤ੍ਤੋ ਮਹਾਕਾਲ਼ੋ ਅਸੁਭਾਨੁਪਸ੍ਸੀ ਵਿਹਰਤਿ, ਘਨਸੇਲਪਬ੍ਬਤੋ ਵਿਯ ਅਚਲੋ’’ਤਿ ਵਤ੍ਵਾ ਇਮਾ ਗਾਥਾ ਅਭਾਸਿ –

੭. ‘‘ਸੁਭਾਨੁਪਸ੍ਸਿਂ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਅਸਂਵੁਤਂ;

ਭੋਜਨਮ੍ਹਿ ਚਾਮਤ੍ਤਞ੍ਞੁਂ, ਕੁਸੀਤਂ ਹੀਨਵੀਰਿਯਂ;

ਤਂ ਵੇ ਪਸਹਤਿ ਮਾਰੋ, ਵਾਤੋ ਰੁਕ੍ਖਂਵ ਦੁਬ੍ਬਲਂ.

੮. ‘‘ਅਸੁਭਾਨੁਪਸ੍ਸਿਂ ਵਿਹਰਨ੍ਤਂ, ਇਨ੍ਦ੍ਰਿਯੇਸੁ ਸੁਸਂਵੁਤਂ;

ਭੋਜਨਮ੍ਹਿ ਚ ਮਤ੍ਤਞ੍ਞੁਂ, ਸਦ੍ਧਂ ਆਰਦ੍ਧਵੀਰਿਯਂ;

ਤਂ ਵੇ ਨਪ੍ਪਸਹਤੀ ਮਾਰੋ, ਵਾਤੋ ਸੇਲਂਵ ਪਬ੍ਬਤ’’ਨ੍ਤਿ.

ਤਤ੍ਥ ਸੁਭਾਨੁਪਸ੍ਸਿਂ ਵਿਹਰਨ੍ਤਨ੍ਤਿ ਸੁਤਂ ਅਨੁਪਸ੍ਸਨ੍ਤਂ, ਇਟ੍ਠਾਰਮ੍ਮਣੇ ਮਾਨਸਂ ਵਿਸ੍ਸਜ੍ਜੇਤ੍ਵਾ ਵਿਹਰਨ੍ਤਨ੍ਤਿ ਅਤ੍ਥੋ. ਯੋ ਹਿ ਪੁਗ੍ਗਲੋ ਨਿਮਿਤ੍ਤਗ੍ਗਾਹਂ ਅਨੁਬ੍ਯਞ੍ਜਨਗ੍ਗਾਹਂ ਗਣ੍ਹਨ੍ਤੋ ‘‘ਨਖਾ ਸੋਭਨਾ’’ਤਿ ਗਣ੍ਹਾਤਿ, ‘‘ਅਙ੍ਗੁਲਿਯੋ ਸੋਭਨਾ’’ਤਿ ਗਣ੍ਹਾਤਿ, ‘‘ਹਤ੍ਥਪਾਦਾ, ਜਙ੍ਘਾ, ਊਰੁ, ਕਟਿ, ਉਦਰਂ, ਥਨਾ, ਗੀਵਾ, ਓਟ੍ਠਾ, ਦਨ੍ਤਾ, ਮੁਖਂ, ਨਾਸਾ, ਅਕ੍ਖੀਨਿ, ਕਣ੍ਣਾ, ਭਮੁਕਾ, ਨਲਾਟਂ, ਕੇਸਾ, ਸੋਭਨਾ’’ਤਿ ਗਣ੍ਹਾਤਿ, ‘‘ਕੇਸਾ, ਲੋਮਾ, ਨਖਾ, ਦਨ੍ਤਾ, ਤਚੋ, ਸੋਭਨਾ’’ਤਿ ਗਣ੍ਹਾਤਿ, ਵਣ੍ਣੋ ਸੁਭੋ, ਸਣ੍ਠਾਨਂ ਸੁਭਨ੍ਤਿ, ਅਯਂ ਸੁਭਾਨੁਪਸ੍ਸੀ ਨਾਮ. ਏਵਂ ਤਂ ਸੁਭਾਨੁਪਸ੍ਸਿਂ ਵਿਹਰਨ੍ਤਂ. ਇਨ੍ਦ੍ਰਿਯੇਸੂਤਿ ਚਕ੍ਖਾਦੀਸੁ ਛਸੁ ਇਨ੍ਦ੍ਰਿਯੇਸੁ. ਅਸਂਵੁਤਨ੍ਤਿ ਚਕ੍ਖੁਦ੍ਵਾਰਾਦੀਨਿ ਅਰਕ੍ਖਨ੍ਤਂ. ਪਰਿਯੇਸਨਮਤ੍ਤਾ ਪਟਿਗ੍ਗਹਣਮਤ੍ਤਾ ਪਰਿਭੋਗਮਤ੍ਤਾਤਿ ਇਮਿਸ੍ਸਾ ਮਤ੍ਤਾਯ ਅਜਾਨਨਤੋ ਭੋਜਨਮ੍ਹਿ ਚਾਮਤ੍ਤਞ੍ਞੁਂ. ਅਪਿਚ ਪਚ੍ਚਵੇਕ੍ਖਣਮਤ੍ਤਾ ਵਿਸ੍ਸਜ੍ਜਨਮਤ੍ਤਾਤਿ ਇਮਿਸ੍ਸਾਪਿ ਮਤ੍ਤਾਯ ਅਜਾਨਨਤੋ ਅਮਤ੍ਤਞ੍ਞੁਂ, ਇਦਂ ਭੋਜਨਂ ਧਮ੍ਮਿਕਂ, ਇਦਂ ਅਧਮ੍ਮਿਕਨ੍ਤਿਪਿ ਅਜਾਨਨ੍ਤਂ. ਕਾਮਚ੍ਛਨ੍ਦਬ੍ਯਾਪਾਦਵਿਹਿਂਸਾਵਿਤਕ੍ਕਵਸਿਤਾਯ ਕੁਸੀਤਂ. ਹੀਨਵੀਰਿਯਨ੍ਤਿ ਨਿਬ੍ਬੀਰਿਯਂ ਚਤੂਸੁ ਇਰਿਯਾਪਥੇਸੁ ਵੀਰਿਯਕਰਣਰਹਿਤਂ. ਪਸਹਤੀਤਿ ਅਭਿਭਵਤਿ ਅਜ੍ਝੋਤ੍ਥਰਤਿ. ਵਾਤੋ ਰੁਕ੍ਖਂਵ ਦੁਬ੍ਬਲਨ੍ਤਿ ਬਲਵਵਾਤੋ ਛਿਨ੍ਨਪਪਾਤੇ ਜਾਤਂ ਦੁਬ੍ਬਲਰੁਕ੍ਖਂ ਵਿਯ. ਯਥਾ ਹਿ ਸੋ ਵਾਤੋ ਤਸ੍ਸ ਦੁਬ੍ਬਲਰੁਕ੍ਖਸ੍ਸ ਪੁਪ੍ਫਫਲਪਲ੍ਲਵਾਦੀਨਿਪਿ ਪਾਤੇਤਿ, ਖੁਦ੍ਦਕਸਾਖਾਪਿ ਭਞ੍ਜਤਿ, ਮਹਾਸਾਖਾਪਿ ਭਞ੍ਜਤਿ, ਸਮੂਲਕਮ੍ਪਿ ਤਂ ਰੁਕ੍ਖਂ ਉਪ੍ਪਾਟੇਤ੍ਵਾ ਉਦ੍ਧਂਮੂਲਂ ਅਧੋਸਾਖਂ ਕਤ੍ਵਾ ਗਚ੍ਛਤਿ, ਏਵਮੇਵ ਏਵਰੂਪਂ ਪੁਗ੍ਗਲਂ ਅਨ੍ਤੋ ਉਪ੍ਪਨ੍ਨੋ ਕਿਲੇਸਮਾਰੋ ਪਸਹਤਿ, ਬਲਵਵਾਤੋ ਦੁਬ੍ਬਲਰੁਕ੍ਖਸ੍ਸ ਪੁਪ੍ਫਫਲਪਲ੍ਲਵਾਦਿਪਾਤਨਂ ਵਿਯ ਖੁਦ੍ਦਾਨੁਖੁਦ੍ਦਕਾਪਤ੍ਤਿਆਪਜ੍ਜਨਮ੍ਪਿ ਕਰੋਤਿ, ਖੁਦ੍ਦਕਸਾਖਾਭਞ੍ਜਨਂ ਵਿਯ ਨਿਸ੍ਸਗ੍ਗਿਯਾਦਿਆਪਤ੍ਤਿਆਪਜ੍ਜਨਮ੍ਪਿ ਕਰੋਤਿ, ਮਹਾਸਾਖਾਭਞ੍ਜਨਂ ਵਿਯ ਤੇਰਸਸਙ੍ਘਾਦਿਸੇਸਾਪਤ੍ਤਿਆਪਜ੍ਜਨਮ੍ਪਿ ਕਰੋਤਿ, ਉਪ੍ਪਾਟੇਤ੍ਵਾ ਉਦ੍ਧਂ, ਮੂਲਕਂ ਹੇਟ੍ਠਾਸਾਖਂ ਕਤ੍ਵਾ ਪਾਤਨਂ ਵਿਯ ਪਾਰਾਜਿਕਾਪਤ੍ਤਿਆਪਜ੍ਜਨਮ੍ਪਿ ਕਰੋਤਿ, ਸ੍ਵਾਕ੍ਖਾਤਸਾਸਨਾ ਨੀਹਰਿਤ੍ਵਾ ਕਤਿਪਾਹੇਨੇਵ ਗਿਹਿਭਾਵਂ ਪਾਪੇਤੀਤਿ ਏਵਂ ਏਵਰੂਪਂ ਪੁਗ੍ਗਲਂ ਕਿਲੇਸਮਾਰੋ ਅਤ੍ਤਨੋ ਵਸੇ ਵਤ੍ਤੇਤੀਤਿ ਅਤ੍ਥੋ.

ਅਸੁਭਾਨੁਪਸ੍ਸਿਨ੍ਤਿ ਦਸਸੁ ਅਸੁਭੇਸੁ ਅਞ੍ਞਤਰਂ ਅਸੁਭਂ ਪਸ੍ਸਨ੍ਤਂ ਪਟਿਕੂਲਮਨਸਿਕਾਰੇ ਯੁਤ੍ਤਂ ਕੇਸੇ ਅਸੁਭਤੋ ਪਸ੍ਸਨ੍ਤਂ ਲੋਮੇ ਨਖੇ ਦਨ੍ਤੇ ਤਚਂ ਵਣ੍ਣਂ ਸਣ੍ਠਾਨਂ ਅਸੁਭਤੋ ਪਸ੍ਸਨ੍ਤਂ. ਇਨ੍ਦ੍ਰਿਯੇਸੂਤਿ ਛਸੁ ਇਨ੍ਦ੍ਰਿਯੇਸੁ. ਸੁਸਂਵੁਤਨ੍ਤਿ ਨਿਮਿਤ੍ਤਾਦਿਗ੍ਗਾਹਰਹਿਤਂ ਪਿਹਿਤਦ੍ਵਾਰਂ. ਅਮਤ੍ਤਞ੍ਞੁਤਾਪਟਿਕ੍ਖੇਪੇਨ ਭੋਜਨਮ੍ਹਿ ਚ ਮਤ੍ਤਞ੍ਞੁਂ. ਸਦ੍ਧਨ੍ਤਿ ਕਮ੍ਮਸ੍ਸ ਚੇਵ ਫਲਸ੍ਸ ਚ ਸਦ੍ਦਹਨਲਕ੍ਖਣਾਯ ਲੋਕਿਕਾਯ ਸਦ੍ਧਾਯ ਚੇਵ ਤੀਸੁ ਵਤ੍ਥੂਸੁ ਅਵੇਚ੍ਚਪ੍ਪਸਾਦਸਙ੍ਖਾਤਾਯ ਲੋਕੁਤ੍ਤਰਸਦ੍ਧਾਯ ਚ ਸਮਨ੍ਨਾਗਤਂ. ਆਰਦ੍ਧਵੀਰਿਯਨ੍ਤਿ ਪਗ੍ਗਹਿਤਵੀਰਿਯਂ ਪਰਿਪੁਣ੍ਣਵੀਰਿਯਂ. ਤਂ ਵੇਤਿ ਏਵਰੂਪਂ ਤਂ ਪੁਗ੍ਗਲਂ ਯਥਾ ਦੁਬ੍ਬਲਵਾਤੋ ਸਣਿਕਂ ਪਹਰਨ੍ਤੋ ਏਕਗ੍ਘਨਂ ਸੇਲਂ ਚਾਲੇਤੁਂ ਨ ਸਕ੍ਕੋਤਿ, ਤਥਾ ਅਬ੍ਭਨ੍ਤਰੇ ਉਪ੍ਪਜ੍ਜਮਾਨੋਪਿ ਦੁਬ੍ਬਲਕਿਲੇਸਮਾਰੋ ਨਪ੍ਪਸਹਤਿ, ਖੋਭੇਤੁਂ ਵਾ ਚਾਲੇਤੁਂ ਵਾ ਨ ਸਕ੍ਕੋਤੀਤਿ ਅਤ੍ਥੋ.

ਤਾਪਿ ਖੋ ਤਸ੍ਸ ਪੁਰਾਣਦੁਤਿਯਿਕਾਯੋ ਥੇਰਂ ਪਰਿਵਾਰੇਤ੍ਵਾ ‘‘ਤ੍ਵਂ ਕਂ ਆਪੁਚ੍ਛਿਤ੍ਵਾ ਪਬ੍ਬਜਿਤੋ, ਇਦਾਨਿ ਗਿਹੀ ਭਵਿਸ੍ਸਸਿ ਨ ਭਵਿਸ੍ਸਸੀ’’ਤਿਆਦੀਨਿ ਵਤ੍ਵਾ ਕਾਸਾਵਂ ਨੀਹਰਿਤੁਕਾਮਾ ਅਹੇਸੁਂ. ਥੇਰੋ ਤਾਸਂ ਆਕਾਰਂ ਸਲ੍ਲਕ੍ਖੇਤ੍ਵਾ ਨਿਸਿਨ੍ਨਾਸਨਾ ਵੁਟ੍ਠਾਯ ਇਦ੍ਧਿਯਾ ਉਪ੍ਪਤ੍ਤਿਤ੍ਵਾ ਕੂਟਾਗਾਰਕਣ੍ਣਿਕਂ ਦ੍ਵਿਧਾ ਭਿਨ੍ਦਿਤ੍ਵਾ ਆਕਾਸੇਨਾਗਨ੍ਤ੍ਵਾ ਸਤ੍ਥਰਿ ਗਾਥਾ ਪਰਿਯੋਸਾਪੇਨ੍ਤੇਯੇਵ ਸਤ੍ਥੁ ਸੁਵਣ੍ਣਵਣ੍ਣਂ ਸਰੀਰਂ ਅਭਿਤ੍ਥਵਨ੍ਤੋ ਆਕਾਸਤੋ ਓਤਰਿਤ੍ਵਾ ਤਥਾਗਤਸ੍ਸ ਪਾਦੇ ਵਨ੍ਦਿ.

ਗਾਥਾਪਰਿਯੋਸਾਨੇ ਸਮ੍ਪਤ੍ਤਭਿਕ੍ਖੂ ਸੋਤਾਪਤ੍ਤਿਫਲਾਦੀਸੁ ਪਤਿਟ੍ਠਹਿਂਸੂਤਿ.

ਮਹਾਕਾਲ਼ਤ੍ਥੇਰਵਤ੍ਥੁ ਛਟ੍ਠਂ.