੪. ਕਾਲ਼ਯਕ੍ਖਿਨੀਵਤ੍ਥੁ

ਨ ਹਿ ਵੇਰੇਨਾਤਿ ਇਮਂ ਧਮ੍ਮਦੇਸਨਂ ਸਤ੍ਥਾ ਜੇਤਵਨੇ ਵਿਹਰਨ੍ਤੋ ਅਞ੍ਞਤਰਂ ਵਞ੍ਝਿਤ੍ਥਿਂ ਆਰਬ੍ਭ ਕਥੇਸਿ.

ਏਕੋ ਕਿਰ ਕੁਟੁਮ੍ਬਿਕਪੁਤ੍ਤੋ ਪਿਤਰਿ ਕਾਲਕਤੇ ਖੇਤ੍ਤੇ ਚ ਘਰੇ ਚ ਸਬ੍ਬਕਮ੍ਮਾਨਿ ਅਤ੍ਤਨਾਵ ਕਰੋਨ੍ਤੋ ਮਾਤਰਂ ਪਟਿਜਗ੍ਗਿ. ਅਥਸ੍ਸ ਮਾਤਾ ‘‘ਕੁਮਾਰਿਕਂ ਤੇ, ਤਾਤ, ਆਨੇਸ੍ਸਾਮੀ’’ਤਿ ਆਹ. ‘‘ਅਮ੍ਮ, ਮਾ ਏਵਂ ਵਦੇਥ, ਅਹਂ ਯਾਵਜੀਵਂ ਤੁਮ੍ਹੇ ਪਟਿਜਗ੍ਗਿਸ੍ਸਾਮੀ’’ਤਿ. ‘‘ਤਾਤ, ਖੇਤ੍ਤੇ ਚ ਘਰੇ ਚ ਕਿਚ੍ਚਂ ਤ੍ਵਮੇਵ ਕਰੋਸਿ, ਤੇਨ ਮਯ੍ਹਂ ਚਿਤ੍ਤਸੁਖਂ ਨਾਮ ਨ ਹੋਤਿ, ਆਨੇਸ੍ਸਾਮੀ’’ਤਿ. ਸੋ ਪੁਨਪ੍ਪੁਨਂ ਪਟਿਕ੍ਖਿਪਿਤ੍ਵਾ ਤੁਣ੍ਹੀ ਅਹੋਸਿ. ਸਾ ਏਕਂ ਕੁਲਂ ਗਨ੍ਤੁਕਾਮਾ ਗੇਹਾ ਨਿਕ੍ਖਮਿ. ਅਥ ਨਂ ਪੁਤ੍ਤੋ ‘‘ਕਤਰਂ ਕੁਲਂ ਗਚ੍ਛਥਾ’’ਤਿ ਪੁਚ੍ਛਿਤ੍ਵਾ ‘‘ਅਸੁਕਕੁਲਂ ਨਾਮਾ’’ਤਿ ਵੁਤ੍ਤੇ ਤਤ੍ਥ ਗਮਨਂ ਪਟਿਸੇਧੇਤ੍ਵਾ ਅਤ੍ਤਨੋ ਅਭਿਰੁਚਿਤਂ ਕੁਲਂ ਆਚਿਕ੍ਖਿ. ਸਾ ਤਤ੍ਥ ਗਨ੍ਤ੍ਵਾ ਕੁਮਾਰਿਕਂ ਵਾਰੇਤ੍ਵਾ ਦਿਵਸਂ ਵਵਤ੍ਥਪੇਤ੍ਵਾ ਤਂ ਆਨੇਤ੍ਵਾ ਤਸ੍ਸ ਘਰੇ ਅਕਾਸਿ. ਸਾ ਵਞ੍ਝਾ ਅਹੋਸਿ. ਅਥ ਨਂ ਮਾਤਾ, ਪੁਤ੍ਤ, ਤ੍ਵਂ ਅਤ੍ਤਨੋ ਰੁਚਿਯਾ ਕੁਮਾਰਿਕਂ ਆਣਾਪੇਸਿ, ਸਾ ਇਦਾਨਿ ਵਞ੍ਝਾ ਜਾਤਾ, ਅਪੁਤ੍ਤਕਞ੍ਚ ਨਾਮ ਕੁਲਂ ਵਿਨਸ੍ਸਤਿ, ਪਵੇਣੀ ਨ ਘਟੀਯਤਿ, ਤੇਨ ਅਞ੍ਞਂ ਤੇ ਕੁਮਾਰਿਕਂ ਆਨੇਮੀਤਿ. ਤੇਨ ‘‘ਅਲਂ, ਅਮ੍ਮਾ’’ਤਿ ਵੁਚ੍ਚਮਾਨਾਪਿ ਪੁਨਪ੍ਪੁਨਂ ਕਥੇਸਿ. ਵਞ੍ਝਿਤ੍ਥੀ ਤਂ ਕਥਂ ਸੁਤ੍ਵਾ ‘‘ਪੁਤ੍ਤਾ ਨਾਮ ਮਾਤਾਪਿਤੂਨਂ ਵਚਨਂ ਅਤਿਕ੍ਕਮਿਤੁਂ ਨ ਸਕ੍ਕੋਨ੍ਤਿ, ਇਦਾਨਿ ਅਞ੍ਞਂ ਵਿਜਾਯਿਨਿਂ ਇਤ੍ਥਿਂ ਆਨੇਤ੍ਵਾ ਮਂ ਦਾਸਿਭੋਗੇਨ ਭੁਞ੍ਜਿਸ੍ਸਤਿ. ਯਂਨੂਨਾਹਂ ਸਯਮੇਵ ਏਕਂ ਕੁਮਾਰਿਕਂ ਆਨੇਯ੍ਯ’’ਨ੍ਤਿ ਚਿਨ੍ਤੇਤ੍ਵਾ ਏਕਂ ਕੁਲਂ ਗਨ੍ਤ੍ਵਾ ਤਸ੍ਸਤ੍ਥਾਯ ਕੁਮਾਰਿਕਂ ਵਾਰੇਤ੍ਵਾ ‘‘ਕਿਂ ਨਾਮੇਤਂ, ਅਮ੍ਮ, ਵਦੇਸੀ’’ਤਿ ਤੇਹਿ ਪਟਿਕ੍ਖਿਤ੍ਤਾ ‘‘ਅਹਂ ਵਞ੍ਝਾ, ਅਪੁਤ੍ਤਕਂ ਨਾਮ ਕੁਲਂ ਵਿਨਸ੍ਸਤਿ, ਤੁਮ੍ਹਾਕਂ ਪਨ ਧੀਤਾ ਪੁਤ੍ਤਂ ਵਾ ਧੀਤਰਂ ਵਾ ਲਭਿਤ੍ਵਾ ਕੁਟੁਮ੍ਬਿਕਸ੍ਸ ਸਾਮਿਨੀ ਭਵਿਸ੍ਸਤਿ, ਮਯ੍ਹਂ ਸਾਮਿਕਸ੍ਸ ਨਂ ਦੇਥਾ’’ਤਿ ਯਾਚਿਤ੍ਵਾ ਸਮ੍ਪਟਿਚ੍ਛਾਪੇਤ੍ਵਾ ਆਨੇਤ੍ਵਾ ਸਾਮਿਕਸ੍ਸ ਘਰੇ ਅਕਾਸਿ.

ਅਥਸ੍ਸਾ ਏਤਦਹੋਸਿ – ‘‘ਸਚਾਯਂ ਪੁਤ੍ਤਂ ਵਾ ਧੀਤਰਂ ਵਾ ਲਭਿਸ੍ਸਤਿ, ਅਯਮੇਵ ਕੁਟੁਮ੍ਬਸ੍ਸ ਸਾਮਿਨੀ ਭਵਿਸ੍ਸਤਿ. ਯਥਾ ਦਾਰਕਂ ਨ ਲਭਤਿ, ਤਥੇਵ ਨਂ ਕਾਤੁਂ ਵਟ੍ਟਤੀ’’ਤਿ. ਅਥ ਨਂ ਸਾ ਆਹ – ‘‘ਅਮ੍ਮ, ਯਦਾ ਤੇ ਕੁਚ੍ਛਿਯਂ ਗਬ੍ਭੋ ਪਤਿਟ੍ਠਾਤਿ, ਅਥ ਮੇ ਆਰੋਚੇਯ੍ਯਾਸੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਗਬ੍ਭੇ ਪਤਿਟ੍ਠਿਤੇ ਤਸ੍ਸਾ ਆਰੋਚੇਸਿ. ਇਤਰਿਸ੍ਸਾ ਪਨ ਸਾ ਸਯਮੇਵ ਨਿਚ੍ਚਂ ਯਾਗੁਭਤ੍ਤਂ ਦੇਤਿ, ਅਥਸ੍ਸਾ ਆਹਾਰੇਨੇਵ ਸਦ੍ਧਿਂ ਗਬ੍ਭਪਾਤਨਭੇਸਜ੍ਜਮਦਾਸਿ, ਗਬ੍ਭੋ ਪਤਿ. ਦੁਤਿਯਮ੍ਪਿ ਗਬ੍ਭੇ ਪਤਿਟ੍ਠਿਤੇ ਆਰੋਚੇਸਿ, ਇਤਰਾ ਦੁਤਿਯਮ੍ਪਿ ਤਥੇਵ ਪਾਤੇਸਿ. ਅਥ ਨਂ ਪਟਿਵਿਸ੍ਸਕਿਤ੍ਥਿਯੋ ਪੁਚ੍ਛਿਂਸੁ – ‘‘ਕਚ੍ਚਿ ਤੇ ਸਪਤ੍ਤਿ ਅਨ੍ਤਰਾਯਂ ਕਰੋਤੀ’’ਤਿ? ਸਾ ਤਮਤ੍ਥਂ ਆਰੋਚੇਤ੍ਵਾ ‘‘ਅਨ੍ਧਬਾਲੇ, ਕਸ੍ਮਾ ਏਵਮਕਾਸਿ, ਅਯਂ ਤਵ ਇਸ੍ਸਰਿਯਭਯੇਨ ਗਬ੍ਭਸ੍ਸ ਪਾਤਨਭੇਸਜ੍ਜਂ ਯੋਜੇਤ੍ਵਾ ਦੇਤਿ, ਤੇਨ ਤੇ ਗਬ੍ਭੋ ਪਤਤਿ, ਮਾ ਪੁਨ ਏਵਮਕਤ੍ਥਾ’’ਤਿ ਵੁਤ੍ਤਾ ਤਤਿਯਵਾਰੇ ਨ ਕਥੇਸਿ. ਅਥ ਸਾ ਇਤਰਿਸ੍ਸਾ ਉਦਰਂ ਦਿਸ੍ਵਾ ‘‘ਕਸ੍ਮਾ ਮਯ੍ਹਂ ਗਬ੍ਭਸ੍ਸ ਪਤਿਟ੍ਠਿਤਭਾਵਂ ਨ ਕਥੇਸੀ’’ਤਿ ਵਤ੍ਵਾ ‘‘ਤ੍ਵਂ ਮਂ ਆਨੇਤ੍ਵਾ ਵਞ੍ਚੇਤ੍ਵਾ ਦ੍ਵੇ ਵਾਰੇ ਗਬ੍ਭਂ ਪਾਤੇਸਿ, ਕਿਮਤ੍ਥਂ ਤੁਯ੍ਹਂ ਕਥੇਮੀ’’ਤਿ ਵੁਤ੍ਤੇ ‘‘ਨਟ੍ਠਾ ਦਾਨਿਮ੍ਹੀ’’ਤਿ ਚਿਨ੍ਤੇਤ੍ਵਾ ਤਸ੍ਸਾ ਪਮਾਦਂ ਓਲੋਕੇਨ੍ਤੀ ਪਰਿਣਤੇ ਗਬ੍ਭੇ ਓਕਾਸਂ ਲਭਿਤ੍ਵਾ ਭੇਸਜ੍ਜਂ ਯੋਜੇਤ੍ਵਾ ਅਦਾਸਿ. ਗਬ੍ਭੋ ਪਰਿਣਤਤ੍ਤਾ ਪਤਿਤੁਂ ਅਸਕ੍ਕੋਨ੍ਤੋ ਤਿਰਿਯਂ ਨਿਪਤਿ, ਖਰਾ ਵੇਦਨਾ ਉਪ੍ਪਜ੍ਜਿ, ਜੀਵਿਤਸਂਸਯਂ ਪਾਪੁਣਿ. ਸਾ ‘‘ਨਾਸਿਤਮ੍ਹਿ ਤਯਾ, ਤ੍ਵਮੇਵ ਮਂ ਆਨੇਤ੍ਵਾ ਤ੍ਵਮੇਵ ਤਯੋਪਿ ਵਾਰੇ ਦਾਰਕੇ ਨਾਸੇਸਿ, ਇਦਾਨਿ ਅਹਮ੍ਪਿ ਨਸ੍ਸਾਮਿ, ਇਤੋ ਦਾਨਿ ਚੁਤਾ ਯਕ੍ਖਿਨੀ ਹੁਤ੍ਵਾ ਤਵ ਦਾਰਕੇ ਖਾਦਿਤੁਂ ਸਮਤ੍ਥਾ ਹੁਤ੍ਵਾ ਨਿਬ੍ਬਤ੍ਤੇਯ੍ਯ’’ਨ੍ਤਿ ਪਤ੍ਥਨਂ ਪਟ੍ਠਪੇਤ੍ਵਾ ਕਾਲਂ ਕਤ੍ਵਾ ਤਸ੍ਮਿਂਯੇਵ ਗੇਹੇ ਮਜ੍ਜਾਰੀ ਹੁਤ੍ਵਾ ਨਿਬ੍ਬਤ੍ਤਿ. ਇਤਰਮ੍ਪਿ ਸਾਮਿਕੋ ਗਹੇਤ੍ਵਾ ‘‘ਤਯਾ ਮੇ ਕੁਲੂਪਚ੍ਛੇਦੋ ਕਤੋ’’ਤਿ ਕਪ੍ਪਰਜਣ੍ਣੁਕਾਦੀਹਿ ਸੁਪੋਥਿਤਂ ਪੋਥੇਸਿ. ਸਾ ਤੇਨੇਵਾਬਾਧੇਨ ਕਾਲਂ ਕਤ੍ਵਾ ਤਤ੍ਥੇਵ ਕੁਕ੍ਕੁਟੀ ਹੁਤ੍ਵਾ ਨਿਬ੍ਬਤ੍ਤਾ.

ਕੁਕ੍ਕੁਟੀ ਨ ਚਿਰਸ੍ਸੇਵ ਅਣ੍ਡਾਨਿ ਵਿਜਾਯਿ, ਮਜ੍ਜਾਰੀ ਆਗਨ੍ਤ੍ਵਾ ਤਾਨਿ ਅਣ੍ਡਾਨਿ ਖਾਦਿ. ਦੁਤਿਯਮ੍ਪਿ ਤਤਿਯਮ੍ਪਿ ਖਾਦਿਯੇਵ. ਕੁਕ੍ਕੁਟੀ ਚਿਨ੍ਤੇਸਿ – ‘‘ਤਯੋ ਵਾਰੇ ਮਮ ਅਣ੍ਡਾਨਿ ਖਾਦਿਤ੍ਵਾ ਇਦਾਨਿ ਮਮ੍ਪਿ ਖਾਦਿਤੁਕਾਮਾਸੀ’’ਤਿ. ‘‘ਇਤੋ ਚੁਤਾ ਸਪੁਤ੍ਤਕਂ ਤਂ ਖਾਦਿਤੁਂ ਲਭੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਤਤੋ ਚੁਤਾ ਅਰਞ੍ਞੇ ਦੀਪਿਨੀ ਹੁਤ੍ਵਾ ਨਿਬ੍ਬਤ੍ਤਿ. ਇਤਰਾ ਮਿਗੀ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸਾ ਵਿਜਾਤਕਾਲੇ ਦੀਪਿਨੀ ਆਗਨ੍ਤ੍ਵਾ ਤਯੋ ਵਾਰੇ ਪੁਤ੍ਤਕੇ ਖਾਦਿ. ਮਿਗੀ ਮਰਣਕਾਲੇ ‘‘ਅਯਂ ਮੇ ਤਿਕ੍ਖਤ੍ਤੁਂ ਪੁਤ੍ਤਕੇ ਖਾਦਿਤ੍ਵਾ ਇਦਾਨਿ ਮਮ੍ਪਿ ਖਾਦਿਸ੍ਸਤਿ, ਇਤੋ ਦਾਨਿ ਚੁਤਾ ਏਤਂ ਸਪੁਤ੍ਤਕਂ ਖਾਦਿਤੁਂ ਲਭੇਯ੍ਯ’’ਨ੍ਤਿ ਪਤ੍ਥਨਂ ਕਤ੍ਵਾ ਇਤੋ ਚੁਤਾ ਯਕ੍ਖਿਨੀ ਹੁਤ੍ਵਾ ਨਿਬ੍ਬਤ੍ਤਿ. ਦੀਪਿਨੀਪਿ ਤਥੇਵ ਤਤੋ ਚੁਤਾ ਸਾਵਤ੍ਥਿਯਂ ਕੁਲਧੀਤਾ ਹੁਤ੍ਵਾ ਨਿਬ੍ਬਤ੍ਤਿ, ਸਾ ਵੁਦ੍ਧਿਪ੍ਪਤ੍ਤਾ ਦ੍ਵਾਰਗਾਮਕੇ ਪਤਿਕੁਲਂ ਅਗਮਾਸਿ, ਅਪਰਭਾਗੇ ਚ ਪੁਤ੍ਤਂ ਵਿਜਾਯਿ. ਯਕ੍ਖਿਨੀਪਿ ਤਸ੍ਸਾ ਪਿਯਸਹਾਯਿਕਾਵਣ੍ਣੇਨ ਆਗਨ੍ਤ੍ਵਾ ‘‘ਕੁਹਿਂ ਮੇ ਸਹਾਯਿਕਾ’’ਤਿ ‘‘ਅਨ੍ਤੋਗਬ੍ਭੇ ਵਿਜਾਤਾ’’ਤਿ ਵੁਤ੍ਤੇ ‘‘ਪੁਤ੍ਤਂ ਨੁ ਖੋ ਵਿਜਾਤਾ, ਉਦਾਹੁ ਧੀਤਰਨ੍ਤਿ ਪਸ੍ਸਿਸ੍ਸਾਮਿ ਨ’’ਨ੍ਤਿ ਗਬ੍ਭਂ ਪਵਿਸਿਤ੍ਵਾ ਪਸ੍ਸਨ੍ਤੀ ਵਿਯ ਦਾਰਕਂ ਗਹੇਤ੍ਵਾ ਖਾਦਿਤ੍ਵਾ ਗਤਾ. ਪੁਨ ਦੁਤਿਯਵਾਰੇਪਿ ਤਥੇਵ ਖਾਦਿ. ਤਤਿਯਵਾਰੇ ਇਤਰਾ ਗਰੁਭਾਰਾ ਹੁਤ੍ਵਾ ਸਾਮਿਕਂ ਆਮਨ੍ਤੇਤ੍ਵਾ, ‘‘ਸਾਮਿ, ਇਮਸ੍ਮਿਂ ਠਾਨੇ ਏਕਾ ਯਕ੍ਖਿਨੀ ਮਮ ਦ੍ਵੇ ਪੁਤ੍ਤੇ ਖਾਦਿਤ੍ਵਾ ਗਤਾ, ਇਦਾਨਿ ਮਮ ਕੁਲਗੇਹਂ ਗਨ੍ਤ੍ਵਾ ਵਿਜਾਯਿਸ੍ਸਾਮੀ’’ਤਿ ਕੁਲਗੇਹਂ ਗਨ੍ਤ੍ਵਾ ਵਿਜਾਯਿ.

ਤਦਾ ਸਾ ਯਕ੍ਖਿਨੀ ਉਦਕਵਾਰਂ ਗਤਾ ਹੋਤਿ. ਵੇਸ੍ਸਵਣਸ੍ਸ ਹਿ ਯਕ੍ਖਿਨਿਯੋ ਵਾਰੇਨ ਅਨੋਤਤ੍ਤਦਹਤੋ ਸੀਸਪਰਮ੍ਪਰਾਯ ਉਦਕਮਾਹਰਨ੍ਤਿ. ਤਾ ਚਤੁਮਾਸਚ੍ਚਯੇਨਪਿ ਪਞ੍ਚਮਾਸਚ੍ਚਯੇਨਪਿ ਮੁਚ੍ਚਨ੍ਤਿ. ਅਪਰਾ ਯਕ੍ਖਿਨਿਯੋ ਕਿਲਨ੍ਤਕਾਯਾ ਜੀਵਿਤਕ੍ਖਯਮ੍ਪਿ ਪਾਪੁਣਨ੍ਤਿ. ਸਾ ਪਨ ਉਦਕਵਾਰਤੋ ਮੁਤ੍ਤਮਤ੍ਤਾਵ ਵੇਗੇਨ ਤਂ ਘਰਂ ਗਨ੍ਤ੍ਵਾ ‘‘ਕੁਹਿਂ ਮੇ ਸਹਾਯਿਕਾ’’ਤਿ ਪੁਚ੍ਛਿ. ‘‘ਕੁਹਿਂ ਨਂ ਪਸ੍ਸਿਸ੍ਸਸਿ, ਤਸ੍ਸਾ ਇਮਸ੍ਮਿਂ ਠਾਨੇ ਜਾਤਜਾਤਦਾਰਕੇ ਯਕ੍ਖਿਨੀ ਆਗਨ੍ਤ੍ਵਾ ਖਾਦਤਿ, ਤਸ੍ਮਾ ਕੁਲਗੇਹਂ ਗਤਾ’’ਤਿ. ਸਾ ‘‘ਯਤ੍ਥ ਵਾ ਤਤ੍ਥ ਵਾ ਗਚ੍ਛਤੁ, ਨ ਮੇ ਮੁਚ੍ਚਿਸ੍ਸਤੀ’’ਤਿ ਵੇਰਵੇਗਸਮੁਸ੍ਸਾਹਿਤਮਾਨਸਾ ਨਗਰਾਭਿਮੁਖੀ ਪਕ੍ਖਨ੍ਦਿ. ਇਤਰਾਪਿ ਨਾਮਗ੍ਗਹਣਦਿਵਸੇ ਨਂ ਦਾਰਕਂ ਨ੍ਹਾਪੇਤ੍ਵਾ ਨਾਮਂ ਕਤ੍ਵਾ, ‘‘ਸਾਮਿ, ਇਦਾਨਿ ਸਕਘਰਂ ਗਚ੍ਛਾਮਾ’’ਤਿ ਪੁਤ੍ਤਮਾਦਾਯ ਸਾਮਿਕੇਨ ਸਦ੍ਧਿਂ ਵਿਹਾਰਮਜ੍ਝੇ ਗਤਮਗ੍ਗੇਨ ਗਚ੍ਛਨ੍ਤੀ ਪੁਤ੍ਤਂ ਸਾਮਿਕਸ੍ਸ ਦਤ੍ਵਾ ਵਿਹਾਰਪੋਕ੍ਖਰਣਿਯਾ ਨ੍ਹਾਤ੍ਵਾ ਸਾਮਿਕੇ ਨ੍ਹਾਯਨ੍ਤੇ ਉਤ੍ਤਰਿਤ੍ਵਾ ਪੁਤ੍ਤਸ੍ਸ ਥਞ੍ਞਂ ਪਾਯਮਾਨਾ ਠਿਤਾ ਯਕ੍ਖਿਨਿਂ ਆਗਚ੍ਛਨ੍ਤਿਂ ਦਿਸ੍ਵਾ ਸਞ੍ਜਾਨਿਤ੍ਵਾ, ‘‘ਸਾਮਿ, ਵੇਗੇਨ ਏਹਿ, ਅਯਂ ਸਾ ਯਕ੍ਖਿਨੀ, ਵੇਗੇਨ ਏਹਿ, ਅਯਂ ਸਾ ਯਕ੍ਖਿਨੀ’’ਤਿ ਉਚ੍ਚਾਸਦ੍ਦਂ ਕਤ੍ਵਾ ਯਾਵ ਤਸ੍ਸ ਆਗਮਨਂ ਸਣ੍ਠਾਤੁਂ ਅਸਕ੍ਕੋਨ੍ਤੀ ਨਿਵਤ੍ਤੇਤ੍ਵਾ ਅਨ੍ਤੋਵਿਹਾਰਾਭਿਮੁਖੀ ਪਕ੍ਖਨ੍ਦਿ.

ਤਸ੍ਮਿਂ ਸਮਯੇ ਸਤ੍ਥਾ ਪਰਿਸਮਜ੍ਝੇ ਧਮ੍ਮਂ ਦੇਸੇਸਿ. ਸਾ ਪੁਤ੍ਤਂ ਤਥਾਗਤਸ੍ਸ ਪਾਦਪਿਟ੍ਠੇ ਨਿਪਜ੍ਜਾਪੇਤ੍ਵਾ ‘‘ਤੁਮ੍ਹਾਕਂ ਮਯਾ ਏਸ ਦਿਨ੍ਨੋ, ਪੁਤ੍ਤਸ੍ਸ ਮੇ ਜੀਵਿਤਂ ਦੇਥਾ’’ਤਿ ਆਹ. ਦ੍ਵਾਰਕੋਟ੍ਠਕੇ ਅਧਿਵਤ੍ਥੋ ਸੁਮਨਦੇਵੋ ਨਾਮ ਯਕ੍ਖਿਨਿਯਾ ਅਨ੍ਤੋ ਪਵਿਸਿਤੁਂ ਨਾਦਾਸਿ. ਸਤ੍ਥਾ ਆਨਨ੍ਦਤ੍ਥੇਰਂ ਆਮਨ੍ਤੇਤ੍ਵਾ ‘‘ਗਚ੍ਛ, ਆਨਨ੍ਦ, ਤਂ ਯਕ੍ਖਿਨਿਂ ਪਕ੍ਕੋਸਾਹੀ’’ਤਿ ਆਹ. ਥੇਰੋ ਪਕ੍ਕੋਸਿ. ਇਤਰਾ ‘‘ਅਯਂ, ਭਨ੍ਤੇ, ਆਗਚ੍ਛਤੀ’’ਤਿ ਆਹ. ਸਤ੍ਥਾ ‘‘ਏਤੁ, ਮਾ ਸਦ੍ਦਮਕਾਸੀ’’ਤਿ ਵਤ੍ਵਾ ਤਂ ਆਗਨ੍ਤ੍ਵਾ ਠਿਤਂ ‘‘ਕਸ੍ਮਾ ਏਵਂ ਕਰੋਸਿ, ਸਚੇ ਤੁਮ੍ਹੇ ਮਾਦਿਸਸ੍ਸ ਬੁਦ੍ਧਸ੍ਸ ਸਮ੍ਮੁਖੀਭਾਵਂ ਨਾਗਮਿਸ੍ਸਥ, ਅਹਿਨਕੁਲਾਨਂ ਵਿਯ ਅਚ੍ਛਫਨ੍ਦਨਾਨਂ ਵਿਯ ਕਾਕੋਲੂਕਾਨਂ ਵਿਯ ਚ ਕਪ੍ਪਟ੍ਠਿਤਿਕਂ ਵੋ ਵੇਰਂ ਅਭਵਿਸ੍ਸ, ਕਸ੍ਮਾ ਵੇਰਂ ਪਟਿਵੇਰਂ ਕਰੋਥ. ਵੇਰਞ੍ਹਿ ਅਵੇਰੇਨ ਉਪਸਮ੍ਮਤਿ, ਨੋ ਵੇਰੇਨਾ’’ਤਿ ਵਤ੍ਵਾ ਇਮਂ ਗਾਥਮਾਹ –

੫. ‘‘ਨ ਹਿ ਵੇਰੇਨ ਵੇਰਾਨਿ, ਸਮ੍ਮਨ੍ਤੀਧ ਕੁਦਾਚਨਂ;

ਅਵੇਰੇਨ ਚ ਸਮ੍ਮਨ੍ਤਿ, ਏਸ ਧਮ੍ਮੋ ਸਨਨ੍ਤਨੋ’’ਤਿ.

ਤਤ੍ਥ ਨ ਹਿ ਵੇਰੇਨਾਤਿ ਯਥਾ ਹਿ ਖੇਲ਼ਸਿਙ੍ਘਾਣਿਕਾਦੀਹਿ ਅਸੁਚੀਹਿ ਮਕ੍ਖਿਤਂ ਠਾਨਂ ਤੇਹੇਵ ਅਸੁਚੀਹਿ ਧੋਵਨ੍ਤਾ ਸੁਦ੍ਧਂ ਨਿਗ੍ਗਨ੍ਧਂ ਕਾਤੁਂ ਨ ਸਕ੍ਕੋਨ੍ਤਿ, ਅਥ ਖੋ ਤਂ ਠਾਨਂ ਭਿਯ੍ਯੋਸੋਮਤ੍ਤਾਯ ਅਸੁਦ੍ਧਤਰਞ੍ਚੇਵ ਦੁਗ੍ਗਨ੍ਧਤਰਞ੍ਚ ਹੋਤਿ; ਏਵਮੇਵ ਅਕ੍ਕੋਸਨ੍ਤਂ ਪਚ੍ਚਕ੍ਕੋਸਨ੍ਤੋ ਪਹਰਨ੍ਤਂ ਪਟਿਪਹਰਨ੍ਤੋ ਵੇਰੇਨ ਵੇਰਂ ਵੂਪਸਮੇਤੁਂ ਨ ਸਕ੍ਕੋਤਿ, ਅਥ ਖੋ ਭਿਯ੍ਯੋ ਭਿਯ੍ਯੋ ਵੇਰਮੇਵ ਕਰੋਤਿ. ਇਤਿ ਵੇਰਾਨਿ ਨਾਮ ਵੇਰੇਨ ਕਿਸ੍ਮਿਞ੍ਚਿ ਕਾਲੇ ਨ ਸਮ੍ਮਨ੍ਤਿ, ਅਥ ਖੋ ਵਡ੍ਢਨ੍ਤਿਯੇਵ. ਅਵੇਰੇਨ ਚ ਸਮ੍ਮਨ੍ਤੀਤਿ ਯਥਾ ਪਨ ਤਾਨਿ ਖੇਲ਼ਾਦੀਨਿ ਅਸੁਚੀਨਿ ਵਿਪ੍ਪਸਨ੍ਨੇਨ ਉਦਕੇਨ ਧੋਵਿਯਮਾਨਾਨਿ ਨਸ੍ਸਨ੍ਤਿ, ਤਂ ਠਾਨਂ ਸੁਦ੍ਧਂ ਹੋਤਿ ਸੁਗਨ੍ਧਂ; ਏਵਮੇਵ ਅਵੇਰੇਨ ਖਨ੍ਤਿਮੇਤ੍ਤੋਦਕੇਨ ਯੋਨਿਸੋ ਮਨਸਿਕਾਰੇਨ ਪਚ੍ਚਵੇਕ੍ਖਣੇਨ ਵੇਰਾਨਿ ਵੂਪਸਮ੍ਮਨ੍ਤਿ ਪਟਿਪ੍ਪਸ੍ਸਮ੍ਭਨ੍ਤਿ ਅਭਾਵਂ ਗਚ੍ਛਨ੍ਤਿ. ਏਸ ਧਮ੍ਮੋ ਸਨਨ੍ਤਨੋਤਿ ਏਸ ਅਵੇਰੇਨ ਵੇਰੂਪਸਮਨਸਙ੍ਖਾਤੋ ਪੋਰਾਣਕੋ ਧਮ੍ਮੋ; ਸਬ੍ਬੇਸਂ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾਨਂ ਗਤਮਗ੍ਗੋਤਿ.

ਗਾਥਾਪਰਿਯੋਸਾਨੇ ਯਕ੍ਖਿਨੀ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਮ੍ਪਤ੍ਤਪਰਿਸਾਯਪਿ ਧਮ੍ਮਦੇਸਨਾ ਸਾਤ੍ਥਿਕਾ ਅਹੋਸਿ.

ਸਤ੍ਥਾ ਤਂ ਇਤ੍ਥਿਂ ਆਹ – ‘‘ਏਤਿਸ੍ਸਾ ਤਵ ਪੁਤ੍ਤਂ ਦੇਹੀ’’ਤਿ. ‘‘ਭਾਯਾਮਿ, ਭਨ੍ਤੇ’’ਤਿ. ‘‘ਮਾ ਭਾਯਿ, ਨਤ੍ਥਿ ਤੇ ਏਤਂ ਨਿਸ੍ਸਾਯ ਪਰਿਪਨ੍ਥੋ’’ਤਿ ਆਹ. ਸਾ ਤਸ੍ਸਾ ਪੁਤ੍ਤਮਦਾਸਿ. ਸਾ ਤਂ ਚੁਮ੍ਬਿਤ੍ਵਾ ਆਲਿਙ੍ਗੇਤ੍ਵਾ ਪੁਨ ਮਾਤੁਯੇਵ ਦਤ੍ਵਾ ਰੋਦਿਤੁਂ ਆਰਭਿ. ਅਥ ਨਂ ਸਤ੍ਥਾ ‘‘ਕਿਮੇਤ’’ਨ੍ਤਿ ਪੁਚ੍ਛਿ. ‘‘ਭਨ੍ਤੇ, ਅਹਂ ਪੁਬ੍ਬੇ ਯਥਾ ਵਾ ਤਥਾ ਵਾ ਜੀਵਿਕਂ ਕਪ੍ਪੇਨ੍ਤੀਪਿ ਕੁਚ੍ਛਿਪੂਰਂ ਨਾਲਤ੍ਥਂ, ਇਦਾਨਿ ਕਥਂ ਜੀਵਿਸ੍ਸਾਮੀ’’ਤਿ. ਅਥ ਨਂ ਸਤ੍ਥਾ ‘‘ਮਾ ਚਿਨ੍ਤਯੀ’’ਤਿ ਸਮਸ੍ਸਾਸੇਤ੍ਵਾ ਤਂ ਇਤ੍ਥਿਮਾਹ – ‘‘ਇਮਂ ਨੇਤ੍ਵਾ ਅਤ੍ਤਨੋ ਗੇਹੇ ਨਿਵਾਸਾਪੇਤ੍ਵਾ ਅਗ੍ਗਯਾਗੁਭਤ੍ਤੇਹਿ ਪਟਿਜਗ੍ਗਾਹੀ’’ਤਿ. ਸਾ ਤਂ ਨੇਤ੍ਵਾ ਪਿਟ੍ਠਿਵਂਸੇ ਪਤਿਟ੍ਠਾਪੇਤ੍ਵਾ ਅਗ੍ਗਯਾਗੁਭਤ੍ਤੇਹਿ ਪਟਿਜਗ੍ਗਿ, ਤਸ੍ਸਾ ਵੀਹਿਪਹਰਣਕਾਲੇ ਮੁਸਲਗ੍ਗੇਨ ਮੁਦ੍ਧਂ ਪਹਰਨ੍ਤਂ ਵਿਯ ਉਪਟ੍ਠਾਸਿ. ਸਾ ਸਹਾਯਿਕਂ ਆਮਨ੍ਤੇਤ੍ਵਾ ‘‘ਇਮਸ੍ਮਿਂ ਠਾਨੇ ਵਸਿਤੁਂ ਨ ਸਕ੍ਕੋਮਿ, ਅਞ੍ਞਤ੍ਥ ਮਂ ਪਤਿਟ੍ਠਾਪੇਹੀ’’ਤਿ ਵਤ੍ਵਾ ਮੁਸਲਸਾਲਾਯ ਉਦਕਚਾਟਿਯਂ ਉਦ੍ਧਨੇ ਨਿਬ੍ਬਕੋਸੇ ਸਙ੍ਕਾਰਕੂਟੇ ਗਾਮਦ੍ਵਾਰੇ ਚਾਤਿ ਏਤੇਸੁ ਠਾਨੇਸੁ ਪਤਿਟ੍ਠਾਪਿਤਾਪਿ ਇਧ ਮੇ ਮੁਸਲੇਨ ਸੀਸਂ ਭਿਨ੍ਦਨ੍ਤਂ ਵਿਯ ਉਪਟ੍ਠਾਤਿ, ਇਧ ਦਾਰਕਾ ਉਚ੍ਛਿਟ੍ਠੋਦਕਂ ਓਤਾਰੇਨ੍ਤਿ, ਇਧ ਸੁਨਖਾ ਨਿਪਜ੍ਜਨ੍ਤਿ, ਇਧ ਦਾਰਕਾ ਅਸੁਚਿਂ ਕਰੋਨ੍ਤਿ, ਇਧ ਕਚਵਰਂ ਛਡ੍ਡੇਨ੍ਤਿ, ਇਧ ਗਾਮਦਾਰਕਾ ਲਕ੍ਖਯੋਗ੍ਗਂ ਕਰੋਨ੍ਤੀਤਿ ਸਬ੍ਬਾਨਿ ਤਾਨਿ ਪਟਿਕ੍ਖਿਪਿ. ਅਥ ਨਂ ਬਹਿਗਾਮੇ ਵਿਵਿਤ੍ਤੋਕਾਸੇ ਪਤਿਟ੍ਠਾਪੇਤ੍ਵਾ ਤਤ੍ਥ ਤਸ੍ਸਾ ਅਗ੍ਗਯਾਗੁਭਤ੍ਤਾਦੀਨਿ ਹਰਿਤ੍ਵਾ ਪਟਿਜਗ੍ਗਿ. ਸਾ ਯਕ੍ਖਿਨੀ ਏਵਂ ਚਿਨ੍ਤੇਸਿ – ‘‘ਅਯਂ ਮੇ ਸਹਾਯਿਕਾ ਇਦਾਨਿ ਬਹੂਪਕਾਰਾ, ਹਨ੍ਦਾਹਂ ਕਿਞ੍ਚਿ ਪਟਿਗੁਣਂ ਕਰੋਮੀ’’ਤਿ. ਸਾ ‘‘ਇਮਸ੍ਮਿਂ ਸਂਵਚ੍ਛਰੇ ਸੁਬ੍ਬੁਟ੍ਠਿਕਾ ਭਵਿਸ੍ਸਤਿ, ਥਲਟ੍ਠਾਨੇ ਸਸ੍ਸਂ ਕਰੋਹਿ, ਇਮਸ੍ਮਿਂ ਸਂਵਚ੍ਛਰੇ ਦੁਬ੍ਬੁਟ੍ਠਿਕਾ ਭਵਿਸ੍ਸਤਿ, ਨਿਨ੍ਨਟ੍ਠਾਨੇਯੇਵ ਸਸ੍ਸਂ ਕਰੋਹੀ’’ਤਿ ਸਹਾਯਿਕਾਯ ਆਰੋਚੇਤਿ. ਸੇਸਜਨੇਹਿ ਕਤਸਸ੍ਸਂ ਅਤਿਉਦਕੇਨ ਵਾ ਅਨੋਦਕੇਨ ਵਾ ਨਸ੍ਸਤਿ, ਤਸ੍ਸਾ ਅਤਿਵਿਯ ਸਮ੍ਪਜ੍ਜਤਿ. ਅਥ ਨਂ ਸੇਸਜਨਾ, ‘‘ਅਮ੍ਮ, ਤਯਾ ਕਤਸਸ੍ਸਂ ਨੇਵ ਅਚ੍ਚੋਦਕੇਨ, ਨ ਅਨੁਦਕੇਨ ਨਸ੍ਸਤਿ, ਸੁਬ੍ਬੁਟ੍ਠਿਦੁਬ੍ਬੁਟ੍ਠਿਭਾਵਂ ਞਤ੍ਵਾ ਕਮ੍ਮਂ ਕਰੋਸਿ, ਕਿਂ ਨੁ ਖੋ ਏਤ’’ਨ੍ਤਿ ਪੁਚ੍ਛਿਂਸੁ. ‘‘ਅਮ੍ਹਾਕਂ ਸਹਾਯਿਕਾ ਯਕ੍ਖਿਨੀ ਸੁਬ੍ਬੁਟ੍ਠਿਦੁਬ੍ਬੁਟ੍ਠਿਭਾਵਂ ਆਚਿਕ੍ਖਤਿ, ਮਯਂ ਤਸ੍ਸਾ ਵਚਨੇਨ ਥਲੇਸੁ ਨਿਨ੍ਨੇਸੁ ਸਸ੍ਸਾਨਿ ਕਰੋਮ, ਤੇਨ ਨੋ ਸਮ੍ਪਜ੍ਜਤਿ. ਕਿਂ ਨ ਪਸ੍ਸਥ? ਨਿਬਦ੍ਧਂ ਅਮ੍ਹਾਕਂ ਗੇਹਤੋ ਯਾਗੁਭਤ੍ਤਾਦੀਨਿ ਹਰਿਯਮਾਨਾਨਿ, ਤਾਨਿ ਏਤਿਸ੍ਸਾ ਹਰੀਯਨ੍ਤਿ, ਤੁਮ੍ਹੇਪਿ ਏਤਿਸ੍ਸਾ ਅਗ੍ਗਯਾਗੁਭਤ੍ਤਾਦੀਨਿ ਹਰਥ, ਤੁਮ੍ਹਾਕਮ੍ਪਿ ਕਮ੍ਮਨ੍ਤੇ ਓਲੋਕੇਸ੍ਸਤੀ’’ਤਿ. ਅਥਸ੍ਸਾ ਸਕਲਨਗਰਵਾਸਿਨੋ ਸਕ੍ਕਾਰਂ ਕਰਿਂਸੁ. ਸਾਪਿ ਤਤੋ ਪਟ੍ਠਾਯ ਸਬ੍ਬੇਸਂ ਕਮ੍ਮਨ੍ਤੇ ਓਲੋਕੇਨ੍ਤੀ ਲਾਭਗ੍ਗਪ੍ਪਤ੍ਤਾ ਅਹੋਸਿ ਮਹਾਪਰਿਵਾਰਾ. ਸਾ ਅਪਰਭਾਗੇ ਅਟ੍ਠ ਸਲਾਕਭਤ੍ਤਾਨਿ ਪਟ੍ਠਪੇਸਿ. ਤਾਨਿ ਯਾਵਜ੍ਜਕਾਲਾ ਦੀਯਨ੍ਤਿਯੇਵਾਤਿ.

ਕਾਲ਼ਯਕ੍ਖਿਨੀਵਤ੍ਥੁ ਚਤੁਤ੍ਥਂ.