੯. ਤਿਮਿਰਵਗ੍ਗੋ

੧. ਤਿਮਿਰਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਚਨ੍ਦਭਾਗਾਨਦੀਤੀਰੇਤਿਆਦਿਕਂ ਆਯਸ੍ਮਤੋ ਤਿਮਿਰਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਕਾਮੇਸੁ ਆਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਚਨ੍ਦਭਾਗਾਯ ਨਦਿਯਾ ਸਮੀਪੇ ਵਸਤਿ, ਵਿਵੇਕਕਾਮਤਾਯ ਹਿਮਵਨ੍ਤਂ ਗਨ੍ਤ੍ਵਾ ਨਿਸਿਨ੍ਨਂ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਵਨ੍ਦਿਤ੍ਵਾ ਤਸ੍ਸ ਗੁਣਂ ਪਸੀਦਿਤ੍ਵਾ ਤਿਮਿਰਪੁਪ੍ਫਂ ਗਹੇਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵੇਸੁ ਚ ਮਨੁਸ੍ਸੇਸੁ ਚ ਸਮ੍ਪਤ੍ਤਿਮਨੁਭਵਨ੍ਤੋ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੧. ਸੋ ਅਪਰਭਾਗੇ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਭਾਗਾਨਦੀਤੀਰੇਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਅਨੁਭੋਤਂ ਵਜਾਮਹਨ੍ਤਿ ਗਙ੍ਗਾਯ ਆਸਨ੍ਨੇ ਵਸਨਭਾਵੇਨ ਸਬ੍ਬਤ੍ਥ ਰਮ੍ਮਭਾਵੇਨ ਗਙ੍ਗਾਤੋ ਹੇਟ੍ਠਾ ਸੋਤਾਨੁਸਾਰੇਨ ਅਹਂ ਵਜਾਮਿ ਗਚ੍ਛਾਮਿ ਤਤ੍ਥ ਤਤ੍ਥ ਵਸਾਮੀਤਿ ਅਤ੍ਥੋ. ਨਿਸਿਨ੍ਨਂ ਸਮਣਂ ਦਿਸ੍ਵਾਤਿ ਸਮਿਤਪਾਪਤ੍ਤਾ ਸੋਸਿਤਪਾਪਤ੍ਤਾ ਸਮਣਸਙ੍ਖਾਤਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾਤਿ ਅਤ੍ਥੋ.

੨. ਏਵਂ ਚਿਨ੍ਤੇਸਹਂ ਤਦਾਤਿ ਅਯਂ ਭਗਵਾ ਸਯਂ ਤਿਣ੍ਣੋ ਸਬ੍ਬਸਤ੍ਤੇ ਤਾਰਯਿਸ੍ਸਤਿ ਸਂਸਾਰਤੋ ਉਤ੍ਤਾਰੇਤਿ ਸਯਂ ਕਾਯਦ੍ਵਾਰਾਦੀਹਿ ਦਮਿਤੋ ਅਯਂ ਭਗਵਾ ਪਰੇ ਦਮੇਤਿ.

੩. ਸਯਂ ਅਸ੍ਸਤ੍ਥੋ ਅਸ੍ਸਾਸਮ੍ਪਤ੍ਤੋ, ਕਿਲੇਸਪਰਿਲ਼ਾਹਤੋ ਮੁਤ੍ਤੋ ਸਬ੍ਬਸਤ੍ਤੇ ਅਸ੍ਸਾਸੇਤਿ, ਸਨ੍ਤਭਾਵਂ ਆਪਾਪੇਤਿ. ਸਯਂ ਸਨ੍ਤੋ ਸਨ੍ਤਕਾਯਚਿਤ੍ਤੋ ਪਰੇਸਂ ਸਨ੍ਤਕਾਯਚਿਤ੍ਤਂ ਪਾਪੇਤਿ. ਸਯਂ ਮੁਤ੍ਤੋ ਸਂਸਾਰਤੋ ਮੁਚ੍ਚਿਤੋ ਪਰੇ ਸਂਸਾਰਤੋ ਮੋਚਯਿਸ੍ਸਤਿ. ਸੋ ਅਯਂ ਭਗਵਾ ਸਯਂ ਨਿਬ੍ਬੁਤੋ ਕਿਲੇਸਗ੍ਗੀਹਿ ਨਿਬ੍ਬੁਤੋ ਪਰੇਸਮ੍ਪਿ ਕਿਲੇਸਗ੍ਗੀਹਿ ਨਿਬ੍ਬਾਪੇਸ੍ਸਤੀਤਿ ਅਹਂ ਤਦਾ ਏਵਂ ਚਿਨ੍ਤੇਸਿਨ੍ਤਿ ਅਤ੍ਥੋ.

੪. ਗਹੇਤ੍ਵਾ ਤਿਮਿਰਪੁਪ੍ਫਨ੍ਤਿ ਸਕਲਂ ਵਨਨ੍ਤਂ ਨੀਲਕਾਲ਼ਰਂਸੀਹਿ ਅਨ੍ਧਕਾਰਂ ਵਿਯ ਕੁਰੁਮਾਨਂ ਖਾਯਤੀਤਿ ਤਿਮਿਰਂ ਪੁਪ੍ਫਂ ਤਂ ਗਹੇਤ੍ਵਾ ਕਣ੍ਣਿਕਾਵਣ੍ਟਂ ਗਹੇਤ੍ਵਾ ਮਤ੍ਥਕੇ ਸੀਸਸ੍ਸ ਉਪਰਿ ਆਕਾਸੇ ਓਕਿਰਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਤਿਮਿਰਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਗਤਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਜਾਤਿਯਾ ਸਤ੍ਤਵਸ੍ਸੋਹਨ੍ਤਿਆਦਿਕਂ ਆਯਸ੍ਮਤੋ ਗਤਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਪੁਰਾਕਤਵਾਸਨਾਵਸੇਨ ਸਦ੍ਧਾਜਾਤੋ ਸਤ੍ਤਵਸ੍ਸਿਕਕਾਲੇਯੇਵ ਪਬ੍ਬਜਿਤੋ ਭਗਵਤੋ ਪਣਾਮਕਰਣੇਨੇਵ ਪਾਕਟੋ ਅਹੋਸਿ. ਸੋ ਏਕਦਿਵਸਂ ਅਤੀਵ ਨੀਲਮਣਿਪ੍ਪਭਾਨਿ ਨਙ੍ਗਲਕਸਿਤਟ੍ਠਾਨੇ ਉਟ੍ਠਿਤਸਤ੍ਤਪੁਪ੍ਫਾਨਿ ਗਹੇਤ੍ਵਾ ਆਕਾਸੇ ਪੂਜੇਸਿ. ਸੋ ਯਾਵਤਾਯੁਕਂ ਸਮਣਧਮ੍ਮਂ ਕਤ੍ਵਾ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੦. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਜਾਤਿਯਾ ਸਤ੍ਤਵਸ੍ਸੋਹਨ੍ਤਿਆਦਿਮਾਹ. ਤਤ੍ਥ ਜਾਤਿਯਾ ਸਤ੍ਤਵਸ੍ਸੋਤਿ ਮਾਤੁਗਬ੍ਭਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਪਰਿਪੁਣ੍ਣਸਤ੍ਤਵਸ੍ਸਿਕੋਤਿ ਅਤ੍ਥੋ. ਪਬ੍ਬਜਿਂ ਅਨਗਾਰਿਯਨ੍ਤਿ ਅਗਾਰਸ੍ਸ ਹਿਤਂ ਆਗਾਰਿਯਂ ਕਸਿਵਾਣਿਜ੍ਜਾਦਿਕਮ੍ਮਂ ਨਤ੍ਥਿ ਆਗਾਰਿਯਨ੍ਤਿ ਅਨਗਾਰਿਯਂ, ਬੁਦ੍ਧਸਾਸਨੇ ਪਬ੍ਬਜਿਂ ਅਹਨ੍ਤਿ ਅਤ੍ਥੋ.

੧੨. ਸੁਗਤਾਨੁਗਤਂ ਮਗ੍ਗਨ੍ਤਿ ਬੁਦ੍ਧੇਨ ਗਤਂ ਮਗ੍ਗਂ. ਅਥ ਵਾ ਸੁਗਤੇਨ ਦੇਸਿਤਂ ਧਮ੍ਮਾਨੁਧਮ੍ਮਪਟਿਪਤ੍ਤਿਪੂਰਣਵਸੇਨ ਹਟ੍ਠਮਾਨਸੋ ਤੁਟ੍ਠਚਿਤ੍ਤੋ ਪੂਜੇਤ੍ਵਾਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਗਤਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਨਿਪਨ੍ਨਞ੍ਜਲਿਕਤ੍ਥੇਰਅਪਦਾਨਵਣ੍ਣਨਾ

ਰੁਕ੍ਖਮੂਲੇ ਨਿਸਿਨ੍ਨੋਹਨ੍ਤਿਆਦਿਕਂ ਆਯਸ੍ਮਤੋ ਨਿਪਨ੍ਨਞ੍ਜਲਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਪਬ੍ਬਜਿਤ੍ਵਾ ਰੁਕ੍ਖਮੂਲਿਕਙ੍ਗਂ ਪੂਰਯਮਾਨੋ ਅਰਞ੍ਞੇ ਵਿਹਰਤਿ. ਤਸ੍ਮਿਂ ਸਮਯੇ ਖਰੋ ਆਬਾਧੋ ਉਪ੍ਪਜ੍ਜਿ, ਤੇਨ ਪੀਲ਼ਿਤੋ ਪਰਮਕਾਰੁਞ੍ਞਪ੍ਪਤ੍ਤੋ ਅਹੋਸਿ. ਤਦਾ ਭਗਵਾ ਤਸ੍ਸ ਕਾਰੁਞ੍ਞੇਨ ਤਤ੍ਥ ਅਗਮਾਸਿ. ਅਥ ਸੋ ਨਿਪਨ੍ਨਕੋਵ ਉਟ੍ਠਿਤੁਂ ਅਸਕ੍ਕੋਨ੍ਤੋ ਸਿਰਸਿ ਅਞ੍ਜਲਿਂ ਕਤ੍ਵਾ ਭਗਵਤੋ ਪਣਾਮਂ ਅਕਾਸਿ. ਸੋ ਤਤੋ ਚੁਤੋ ਤੁਸਿਤਭਵਨੇ ਉਪ੍ਪਨ੍ਨੋ ਤਤ੍ਥ ਸਮ੍ਪਤ੍ਤਿਮਨੁਭਵਿਤ੍ਵਾ ਏਵਂ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ, ਪੁਰਾਕਤਪੁਞ੍ਞਵਸੇਨ ਨਿਪਨ੍ਨਞ੍ਜਲਿਕਤ੍ਥੇਰੋਤਿ ਪਾਕਟੋ.

੧੬. ਸੋ ਅਪਰਭਾਗੇ ਅਤ੍ਤਨੋ ਪੁਞ੍ਞਸਮ੍ਪਤ੍ਤਿਯੋ ਓਲੋਕੇਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਰੁਕ੍ਖਮੂਲੇ ਨਿਸਿਨ੍ਨੋਹਨ੍ਤਿਆਦਿਮਾਹ. ਤਤ੍ਥ ਰੁਹਤਿ ਪਟਿਰੁਹਤਿ ਉਦ੍ਧਮੁਦ੍ਧਂ ਆਰੋਹਤੀਤਿ ਰੁਕ੍ਖੋ, ਤਸ੍ਸ ਰੁਕ੍ਖਸ੍ਸ ਮੂਲੇ ਸਮੀਪੇਤਿ ਅਤ੍ਥੋ. ਬ੍ਯਾਧਿਤੋ ਪਰਮੇਨ ਚਾਤਿ ਪਰਮੇਨ ਅਧਿਕੇਨ ਖਰੇਨ ਕਕ੍ਖਲ਼ੇਨ ਬ੍ਯਾਧਿਨਾ ਰੋਗੇਨ ਬ੍ਯਾਧਿਤੋ, ਬ੍ਯਾਧਿਨਾ ਅਹਂ ਸਮਨ੍ਨਾਗਤੋਤਿ ਅਤ੍ਥੋ. ਪਰਮਕਾਰੁਞ੍ਞਪ੍ਪਤ੍ਤੋਮ੍ਹੀਤਿ ਪਰਮਂ ਅਧਿਕਂ ਕਾਰੁਞ੍ਞਂ ਦੀਨਭਾਵਂ ਦੁਕ੍ਖਿਤਭਾਵਂ ਪਤ੍ਤੋਮ੍ਹਿ ਅਰਞ੍ਞੇ ਕਾਨਨੇਤਿ ਸਮ੍ਬਨ੍ਧੋ.

੨੦. ਪਞ੍ਚੇਵਾਸੁਂ ਮਹਾਸਿਖਾਤਿ ਸਿਰਸਿ ਪਿਲ਼ਨ੍ਧਨਤ੍ਥੇਨ ਸਿਖਾ ਵੁਚ੍ਚਤਿ ਚੂਲ਼ਾ. ਮਣੀਤਿ ਜੋਤਮਾਨਂ ਮਕੁਟਂ ਤਸ੍ਸ ਅਤ੍ਥੀਤਿ ਸਿਖੋ, ਚਕ੍ਕਵਤ੍ਤਿਨੋ ਏਕਨਾਮਕਾ ਪਞ੍ਚੇਵ ਚਕ੍ਕਵਤ੍ਤਿਨੋ ਆਸੁਂ ਅਹੇਸੁਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਨਿਪਨ੍ਨਞ੍ਜਲਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਅਧੋਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਅਭਿਭੂ ਨਾਮ ਸੋ ਭਿਕ੍ਖੂਤਿਆਦਿਕਂ ਆਯਸ੍ਮਤੋ ਅਧੋਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਅਪਰਭਾਗੇ ਕਾਮੇਸੁ ਆਦੀਨਵਂ ਦਿਸ੍ਵਾ ਤਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਞ੍ਚਾਭਿਞ੍ਞਾਅਟ੍ਠਸਮਾਪਤ੍ਤਿਲਾਭੀ ਇਦ੍ਧੀਸੁ ਚ ਵਸੀਭਾਵਂ ਪਤ੍ਵਾ ਹਿਮਵਨ੍ਤਸ੍ਮਿਂ ਪਟਿਵਸਤਿ. ਤਸ੍ਸ ਸਿਖਿਸ੍ਸ ਭਗਵਤੋ ਅਭਿਭੂ ਨਾਮ ਅਗ੍ਗਸਾਵਕੋ ਵਿਵੇਕਾਭਿਰਤੋ ਹਿਮਵਨ੍ਤਮਗਮਾਸਿ. ਅਥ ਸੋ ਤਾਪਸੋ ਤਂ ਅਗ੍ਗਸਾਵਕਤ੍ਥੇਰਂ ਦਿਸ੍ਵਾ ਥੇਰਸ੍ਸ ਠਿਤਪਬ੍ਬਤਂ ਆਰੁਹਨ੍ਤੋ ਪਬ੍ਬਤਸ੍ਸ ਹੇਟ੍ਠਾਤਲਤੋ ਸੁਗਨ੍ਧਾਨਿ ਵਣ੍ਣਸਮ੍ਪਨ੍ਨਾਨਿ ਸਤ੍ਤ ਪੁਪ੍ਫਾਨਿ ਗਹੇਤ੍ਵਾ ਪੂਜੇਸਿ. ਅਥ ਸੋ ਥੇਰੋ ਤਸ੍ਸਾਨੁਮੋਦਨਮਕਾਸਿ. ਸੋਪਿ ਤਾਪਸੋ ਸਕਸ੍ਸਮਂ ਅਗਮਾਸਿ. ਤਤ੍ਥ ਏਕੇਨ ਅਜਗਰੇਨ ਪੀਲ਼ਿਤੋ ਅਪਰਭਾਗੇ ਅਪਰਿਹੀਨਜ੍ਝਾਨੋ ਤੇਨੇਵ ਉਪਦ੍ਦਵੇਨ ਉਪਦ੍ਦੁਤੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕਪਰਾਯਨੋ ਹੁਤ੍ਵਾ ਬ੍ਰਹ੍ਮਸਮ੍ਪਤ੍ਤਿਂ ਛਕਾਮਾਵਚਰਸਮ੍ਪਤ੍ਤਿਞ੍ਚ ਅਨੁਭਵਿਤ੍ਵਾ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਯੋ ਚ ਖੇਪੇਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਭਗਵਤੋ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਸੋ ਅਪਰਭਾਗੇ ਅਤ੍ਤਨੋ ਕਤਪੁਞ੍ਞਨਾਮੇਨ ਅਧੋਪੁਪ੍ਫਿਯਤ੍ਥੇਰੋਤਿ ਪਾਕਟੋ.

੨੨. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਭਿਭੂ ਨਾਮ ਸੋ ਭਿਕ੍ਖੂਤਿਆਦਿਮਾਹ. ਤਤ੍ਥ ਸੀਲਸਮਾਧੀਹਿ ਪਰੇ ਅਭਿਭਵਤੀਤਿ ਅਭਿਭੂ, ਖਨ੍ਧਮਾਰਾਦਿਮਾਰੇ ਅਭਿਭਵਤਿ ਅਜ੍ਝੋਤ੍ਥਰਤੀਤਿ ਵਾ ਅਭਿਭੂ, ਸਸਨ੍ਤਾਨਪਰਸਨ੍ਤਾਨਗਤਕਿਲੇਸੇ ਅਭਿਭਵਤਿ ਵਿਹੇਸੇਤਿ ਵਿਦ੍ਧਂਸੇਤੀਤਿ ਵਾ ਅਭਿਭੂ. ਭਿਕ੍ਖਨਸੀਲੋ ਯਾਚਨਸੀਲੋਤਿ ਭਿਕ੍ਖੁ, ਛਿਨ੍ਨਭਿਨ੍ਨਪਟਧਰੋਤਿ ਵਾ ਭਿਕ੍ਖੁ. ਅਭਿਭੂ ਨਾਮ ਅਗ੍ਗਸਾਵਕੋ ਸੋ ਭਿਕ੍ਖੂਤਿ ਅਤ੍ਥੋ, ਸਿਖਿਸ੍ਸ ਭਗਵਤੋ ਅਗ੍ਗਸਾਵਕੋਤਿ ਸਮ੍ਬਨ੍ਧੋ.

੨੭. ਅਜਗਰੋ ਮਂ ਪੀਲ਼ੇਸੀਤਿ ਤਥਾਰੂਪਂ ਸੀਲਸਮ੍ਪਨ੍ਨਂ ਝਾਨਸਮ੍ਪਨ੍ਨਂ ਤਾਪਸਂ ਪੁਬ੍ਬੇ ਕਤਪਾਪੇਨ ਵੇਰੇਨ ਚ ਮਹਨ੍ਤੋ ਅਜਗਰਸਪ੍ਪੋ ਪੀਲ਼ੇਸਿ. ਸੋ ਤੇਨੇਵ ਉਪਦ੍ਦਵੇਨ ਉਪਦ੍ਦੁਤੋ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕਪਰਾਯਣੋ ਆਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਅਧੋਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਰਂਸਿਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਰਂਸਿਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤੇਸੁ ਤੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਕਾਮੇਸੁ ਆਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਜਿਨਚਮ੍ਮਧਰੋ ਹਿਮਵਨ੍ਤਮ੍ਹਿ ਵਾਸਂ ਕਪ੍ਪੇਸਿ. ਤਸ੍ਮਿਂ ਸਮਯੇ ਵਿਪਸ੍ਸੀ ਭਗਵਾ ਹਿਮਵਨ੍ਤਮਗਮਾਸਿ. ਅਥ ਸੋ ਤਾਪਸੋ ਤਮੁਪਗਤਂ ਭਗਵਨ੍ਤਂ ਦਿਸ੍ਵਾ ਤਸ੍ਸ ਭਗਵਤੋ ਸਰੀਰਤੋ ਨਿਕ੍ਖਨ੍ਤਛਬ੍ਬਣ੍ਣਬੁਦ੍ਧਰਂਸੀਸੁ ਪਸੀਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਪਞ੍ਚਙ੍ਗੇਨ ਨਮਕ੍ਕਾਰਮਕਾਸਿ. ਸੋ ਤੇਨੇਵ ਪੁਞ੍ਞੇਨ ਇਤੋ ਚੁਤੋ ਤੁਸਿਤਾਦੀਸੁ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥਾਦੀਨਵਂ ਦਿਸ੍ਵਾ ਗੇਹਂ ਪਹਾਯ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੦. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਮਾਹ. ਤਤ੍ਥ ਪਬ੍ਬਤੇਤਿ ਪਕਾਰੇਨ ਬ੍ਰੂਹਤਿ ਵਡ੍ਢੇਤੀਤਿ ਪਬ੍ਬਤੋ, ਹਿਮੋ ਅਸ੍ਸ ਅਤ੍ਥੀਤਿ ਹਿਮਵਨ੍ਤੋ, ਹਿਮਵਨ੍ਤੋ ਚ ਸੋ ਪਬ੍ਬਤੋ ਚਾਤਿ ਹਿਮਵਨ੍ਤਪਬ੍ਬਤੋ. ਹਿਮਵਨ੍ਤਪਬ੍ਬਤੇਤਿ ਵਤ੍ਤਬ੍ਬੇ ਗਾਥਾਵਚਨਸੁਖਤ੍ਥਂ ‘‘ਪਬ੍ਬਤੇ ਹਿਮਵਨ੍ਤਮ੍ਹੀ’’ਤਿ ਵੁਤ੍ਤਂ. ਤਸ੍ਮਿਂ ਹਿਮਵਨ੍ਤਮ੍ਹਿ ਪਬ੍ਬਤੇ ਵਾਸਂ ਕਪ੍ਪੇਸਿਂ ਪੁਰੇ ਅਹਨ੍ਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਨਯਾਨੁਸਾਰੇਨ ਉਤ੍ਤਾਨਮੇਵਾਤਿ.

ਰਂਸਿਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਦੁਤਿਯਰਂਸਿਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਦੁਤਿਯਰਂਸਿਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਕੁਸਲੋ ਉਪ੍ਪਨ੍ਨੁਪ੍ਪਨ੍ਨਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥ ਦੋਸਂ ਦਿਸ੍ਵਾ ਤਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਪਬ੍ਬਤੇ ਵਸਨ੍ਤੋ ਵਾਕਚੀਰਨਿਵਸਨੋ ਵਿਵੇਕਸੁਖੇਨ ਵਿਹਰਤਿ. ਤਸ੍ਮਿਂ ਸਮਯੇ ਸੋ ਫੁਸ੍ਸਂ ਭਗਵਨ੍ਤਂ ਤਂ ਪਦੇਸਂ ਸਮ੍ਪਤ੍ਤਂ ਦਿਸ੍ਵਾ ਤਸ੍ਸ ਸਰੀਰਤੋ ਨਿਕ੍ਖਨ੍ਤਛਬ੍ਬਣ੍ਣਬੁਦ੍ਧਰਂਸਿਯੋ ਇਤੋ ਚਿਤੋ ਵਿਧਾਵਨ੍ਤਿਯੋ ਦਣ੍ਡਦੀਪਿਕਾਨਿਕ੍ਖਨ੍ਤਵਿਪ੍ਫੁਰਨ੍ਤਮਿਵ ਦਿਸ੍ਵਾ ਤਸ੍ਮਿਂ ਪਸਨ੍ਨੋ ਅਞ੍ਜਲਿਂ ਪਗ੍ਗਹੇਤ੍ਵਾ ਵਨ੍ਦਿਤ੍ਵਾ ਚਿਤ੍ਤਂ ਪਸਾਦੇਤ੍ਵਾ ਤੇਨੇਵ ਪੀਤਿਸੋਮਨਸ੍ਸੇਨ ਕਾਲਂ ਕਤ੍ਵਾ ਤੁਸਿਤਾਦੀਸੁ ਨਿਬ੍ਬਤ੍ਤੋ ਤਤ੍ਥ ਛ ਕਾਮਾਵਚਰਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਪੁਬ੍ਬਵਾਸਨਾਵਸੇਨ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੫. ਸੋ ਅਪਰਭਾਗੇ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਦੁਤਿਯਰਂਸਿਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਫਲਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਫਲਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਕੁਸਲਸਮ੍ਭਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸੁਖਪ੍ਪਤ੍ਤੋ ਤਂ ਸਬ੍ਬਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਖਰਾਜਿਨਚਮ੍ਮਧਾਰੀ ਹੁਤ੍ਵਾ ਵਿਹਰਤਿ. ਤਸ੍ਮਿਞ੍ਚ ਸਮਯੇ ਫੁਸ੍ਸਂ ਭਗਵਨ੍ਤਂ ਤਤ੍ਥ ਸਮ੍ਪਤ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਮਧੁਰਾਨਿ ਫਲਾਨਿ ਗਹੇਤ੍ਵਾ ਭੋਜੇਸਿ. ਸੋ ਤੇਨੇਵ ਕੁਸਲੇਨ ਦੇਵਲੋਕਾਦੀਸੁ ਪੁਞ੍ਞਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੯. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਿਤ੍ਵਾ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਫਲਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਸਦ੍ਦਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਸਦ੍ਦਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਜਾਤੋ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਮ੍ਹਿ ਅਰਞ੍ਞਾਵਾਸੇ ਵਸਨ੍ਤੋ ਅਤ੍ਤਨੋ ਅਨੁਕਮ੍ਪਾਯ ਉਪਗਤਸ੍ਸ ਭਗਵਤੋ ਧਮ੍ਮਂ ਸੁਤ੍ਵਾ ਧਮ੍ਮੇਸੁ ਚਿਤ੍ਤਂ ਪਸਾਦੇਤ੍ਵਾ ਯਾਵਤਾਯੁਕਂ ਠਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਤੁਸਿਤਾਦੀਸੁ ਛਸੁ ਕਾਮਾਵਚਰਸਮ੍ਪਤ੍ਤਿਯੋ ਚ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ.

੪੩. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਸਦ੍ਦਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਬੋਧਿਸਿਞ੍ਚਕਤ੍ਥੇਰਅਪਦਾਨਵਣ੍ਣਨਾ

ਵਿਪਸ੍ਸਿਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਬੋਧਿਸਿਞ੍ਚਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਸਾਸਨੇ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਯਾ ਸਾਸਨਂ ਸੋਭਯਨ੍ਤੋ ਮਹਾਜਨੇ ਬੋਧਿਪੂਜਂ ਕੁਰੁਮਾਨੇ ਦਿਸ੍ਵਾ ਅਨੇਕਾਨਿ ਪੁਪ੍ਫਾਨਿ ਸੁਗਨ੍ਧੋਦਕਾਨਿ ਚ ਗਾਹਾਪੇਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਲੋਕੇ ਨਿਬ੍ਬਤ੍ਤੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੬. ਸੋ ਅਰਹਾ ਹੁਤ੍ਵਾ ਝਾਨਫਲਸੁਖੇਨ ਵੀਤਿਨਾਮੇਤ੍ਵਾ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਪਸ੍ਸਿਸ੍ਸ ਭਗਵਤੋਤਿਆਦਿਮਾਹ. ਤਤ੍ਥ ਵਿਸੇਸਂ ਪਰਮਤ੍ਥਂ ਨਿਬ੍ਬਾਨਂ ਪਸ੍ਸਤੀਤਿ ਵਿਪਸ੍ਸੀ, ਵਿਸੇਸੇਨ ਭਬ੍ਬਾਭਬ੍ਬਜਨੇ ਪਸ੍ਸਤੀਤਿ ਵਾ ਵਿਪਸ੍ਸੀ, ਵਿਪਸ੍ਸਨ੍ਤੋ ਚਤੁਸਚ੍ਚਂ ਪਸ੍ਸਨਦਕ੍ਖਨਸੀਲੋਤਿ ਵਾ ਵਿਪਸ੍ਸੀ, ਤਸ੍ਸ ਵਿਪਸ੍ਸਿਸ੍ਸ ਭਗਵਤੋ ਮਹਾਬੋਧਿਮਹੋ ਅਹੂਤਿ ਸਮ੍ਬਨ੍ਧੋ. ਤਤ੍ਰਾਪਿ ਮਹਾਬੋਧੀਤਿ ਬੋਧਿ ਵੁਚ੍ਚਤਿ ਚਤੂਸੁ ਮਗ੍ਗੇਸੁ ਞਾਣਂ, ਤਮੇਤ੍ਥ ਨਿਸਿਨ੍ਨੋ ਭਗਵਾ ਪਟਿਵਿਜ੍ਝਤੀਤਿ ਕਣਿਕਾਰਪਾਦਪਰੁਕ੍ਖੋਪਿ ਬੋਧਿਚ੍ਚੇਵ ਵੁਚ੍ਚਤਿ, ਮਹਿਤੋ ਚ ਸੋ ਦੇਵਬ੍ਰਹ੍ਮਨਰਾਸੁਰੇਹਿ ਬੋਧਿ ਚੇਤਿ ਮਹਾਬੋਧਿ, ਮਹਤੋ ਬੁਦ੍ਧਸ੍ਸ ਭਗਵਤੋ ਬੋਧੀਤਿ ਵਾ ਮਹਾਬੋਧਿ, ਤਸ੍ਸ ਮਹੋ ਪੂਜਾ ਅਹੋਸੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਬੋਧਿਸਿਞ੍ਚਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪਦੁਮਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਪੋਕ੍ਖਰਵਨਂ ਪਵਿਟ੍ਠੋਤਿਆਦਿਕਂ ਆਯਸ੍ਮਤੋ ਪਦੁਮਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪਦੁਮਸਮ੍ਪਨ੍ਨਂ ਏਕਂ ਪੋਕ੍ਖਰਣਿਂ ਪਵਿਸਿਤ੍ਵਾ ਭਿਸਮੁਲ਼ਾਲੇ ਖਾਦਨ੍ਤੋ ਪੋਕ੍ਖਰਣਿਯਾ ਅਵਿਦੂਰੇ ਗਚ੍ਛਮਾਨਂ ਫੁਸ੍ਸਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਤਤੋ ਪਦੁਮਾਨਿ ਓਚਿਨਿਤ੍ਵਾ ਆਕਾਸੇ ਉਕ੍ਖਿਪਿਤ੍ਵਾ ਭਗਵਨ੍ਤਂ ਪੂਜੇਸਿ, ਤਾਨਿ ਪੁਪ੍ਫਾਨਿ ਆਕਾਸੇ ਵਿਤਾਨਂ ਹੁਤ੍ਵਾ ਅਟ੍ਠਂਸੁ. ਸੋ ਭਿਯ੍ਯੋਸੋਮਤ੍ਤਾਯ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਸਾਰੋ ਸਮਣਧਮ੍ਮਂ ਪੂਰੇਤ੍ਵਾ ਤਤੋ ਚੁਤੋ ਤੁਸਿਤਭਵਨਮਲਂ ਕੁਰੁਮਾਨੋ ਵਿਯ ਤਤ੍ਥ ਉਪ੍ਪਜ੍ਜਿਤ੍ਵਾ ਕਮੇਨ ਛ ਕਾਮਾਵਚਰਸਮ੍ਪਤ੍ਤਿਯੋ ਚ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੫੧. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪੋਕ੍ਖਰਵਨਂ ਪਵਿਟ੍ਠੋਤਿਆਦਿਮਾਹ. ਤਤ੍ਥ ਪਕਾਰੇਨ ਨਲ਼ਦਣ੍ਡਪਤ੍ਤਾਦੀਹਿ ਖਰਨ੍ਤੀਤਿ ਪੋਕ੍ਖਰਾ, ਪੋਕ੍ਖਰਾਨਂ ਸਮੁਟ੍ਠਿਤਟ੍ਠੇਨ ਸਮੂਹਨ੍ਤਿ ਪੋਕ੍ਖਰਵਨਂ, ਪਦੁਮਗਚ੍ਛਸਣ੍ਡੇਹਿ ਮਣ੍ਡਿਤਂ ਮਜ੍ਝਂ ਪਵਿਟ੍ਠੋ ਅਹਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਦੁਮਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਨਵਮਵਗ੍ਗਵਣ੍ਣਨਾ ਸਮਤ੍ਤਾ.