੧੦. ਸੁਧਾਵਗ੍ਗੋ
੧. ਸੁਧਾਪਿਣ੍ਡਿਯਤ੍ਥੇਰਅਪਦਾਨਵਣ੍ਣਨਾ
ਪੂਜਾਰਹੇ ਪੂਜਯਤੋਤਿਆਦਿਕਂ ਆਯਸ੍ਮਤੋ ਸੁਧਾਪਿਣ੍ਡਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਭਗਵਤਿ ਧਰਮਾਨੇ ਪੁਞ੍ਞਂ ਕਾਤੁਮਸਕ੍ਕੋਨ੍ਤੋ ਪਰਿਨਿਬ੍ਬੁਤੇ ਭਗਵਤਿ ਤਸ੍ਸ ਧਾਤੁਂ ਨਿਦਹਿਤ੍ਵਾ ਚੇਤਿਯੇ ਕਰੀਯਮਾਨੇ ਸੁਧਾਪਿਣ੍ਡਮਦਾਸਿ. ਸੋ ਤੇਨ ਪੁਞ੍ਞੇਨ ਚਤੁਨ੍ਨਵੁਤਿਕਪ੍ਪਤੋ ਪਟ੍ਠਾਯ ਏਤ੍ਥਨ੍ਤਰੇ ਚਤੁਰਾਪਾਯਮਦਿਸ੍ਵਾ ਦੇਵਮਨੁਸ੍ਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੧-੨. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪੂਜਾਰਹੇਤਿਆਦਿਮਾਹ. ਤਤ੍ਥ ਪੂਜਾਰਹਾ ਨਾਮ ਬੁਦ੍ਧਪਚ੍ਚੇਕਬੁਦ੍ਧਅਰਿਯਸਾਵਕਾਚਰਿਯੁਪਜ੍ਝਾਯਮਾਤਾਪਿਤੁਗਰੁਆਦਯੋ, ਤੇਸੁ ਪੂਜਾਰਹੇਸੁ ਮਾਲਾਦਿਪਦੁਮਵਤ੍ਥਾਭਰਣਚਤੁਪਚ੍ਚਯਾਦੀਹਿ ਪੂਜਯਤੋ ਪੂਜਯਨ੍ਤਸ੍ਸ ਪੁਗ੍ਗਲਸ੍ਸ ਪੁਞ੍ਞਕੋਟ੍ਠਾਸਂ ਸਹਸ੍ਸਸਤਸਹਸ੍ਸਾਦਿਵਸੇਨ ਸਙ੍ਖ੍ਯਂ ਕਾਤੁਂ ਕੇਨਚਿ ਮਹਾਨੁਭਾਵੇਨਾਪਿ ਨ ਸਕ੍ਕਾਤਿ ਅਤ੍ਥੋ. ਨ ਕੇਵਲਮੇਵ ਧਰਮਾਨੇ ਬੁਦ੍ਧਾਦਯੋ ਪੂਜਯਤੋ, ਪਰਿਨਿਬ੍ਬੁਤਸ੍ਸਾਪਿ ਭਗਵਤੋ ਚੇਤਿਯਪਟਿਮਾਬੋਧਿਆਦੀਸੁਪਿ ਏਸੇਵ ਨਯੋ.
੩. ਤਂ ਦੀਪੇਤੁਂ ਚਤੁਨ੍ਨਮਪਿ ਦੀਪਾਨਨ੍ਤਿਆਦਿਮਾਹ. ਤਤ੍ਥ ਚਤੁਨ੍ਨਮਪਿ ਦੀਪਾਨਨ੍ਤਿ ਜਮ੍ਬੁਦੀਪਅਪਰਗੋਯਾਨਉਤ੍ਤਰਕੁਰੁਪੁਬ੍ਬਵਿਦੇਹਸਙ੍ਖਾਤਾਨਂ ਚਤੁਨ੍ਨਂ ਦੀਪਾਨਂ ਤਦਨੁਗਤਾਨਂ ਦ੍ਵਿਸਹਸ੍ਸਪਰਿਤ੍ਤਦੀਪਾਨਞ੍ਚ ਏਕਤੋ ਕਤ੍ਵਾ ਸਕਲਚਕ੍ਕਵਾਲ਼ਗਬ੍ਭੇ ਇਸ੍ਸਰਂ ਚਕ੍ਕਵਤ੍ਤਿਰਜ੍ਜਂ ਕਰੇਯ੍ਯਾਤਿ ਅਤ੍ਥੋ. ਏਕਿਸ੍ਸਾ ਪੂਜਨਾਯੇਤਨ੍ਤਿ ਧਾਤੁਗਬ੍ਭੇ ਚੇਤਿਯੇ ਕਤਾਯ ਏਕਿਸ੍ਸਾ ਪੂਜਾਯ ਏਤਂ ਸਕਲਜਮ੍ਬੁਦੀਪੇ ਸਤ੍ਤਰਤਨਾਦਿਕਂ ਸਕਲਂ ਧਨਂ. ਕਲਂ ਨਾਗ੍ਘਤਿ ਸੋਲ਼ਸਿਨ੍ਤਿ ਚੇਤਿਯੇ ਕਤਪੂਜਾਯ ਸੋਲ਼ਸਕ੍ਖਤ੍ਤੁਂ ਵਿਭਤ੍ਤਸ੍ਸ ਸੋਲ਼ਸਮਕੋਟ੍ਠਾਸਸ੍ਸ ਨ ਅਗ੍ਘਤੀਤਿ ਅਤ੍ਥੋ.
੪. ਸਿਦ੍ਧਤ੍ਥਸ੍ਸ…ਪੇ… ਫਲਿਤਨ੍ਤਰੇਤਿ ਨਰਾਨਂ ਅਗ੍ਗਸ੍ਸ ਸੇਟ੍ਠਸ੍ਸ ਸਿਦ੍ਧਤ੍ਥਸ੍ਸ ਭਗਵਤੋ ਚੇਤਿਯੇ ਧਾਤੁਗਬ੍ਭਮ੍ਹਿ ਸੁਧਾਕਮ੍ਮੇ ਕਰੀਯਮਾਨੇ ਪਰਿਚ੍ਛੇਦਾਨਂ ਉਭਿਨ੍ਨਮਨ੍ਤਰੇ ਵੇਮਜ੍ਝੇ, ਅਥ ਵਾ ਪੁਪ੍ਫਦਾਨਟ੍ਠਾਨਾਨਂ ਅਨ੍ਤਰੇ ਫਲਨ੍ਤਿਯਾ ਮਯਾ ਸੁਧਾਪਿਣ੍ਡੋ ਦਿਨ੍ਨੋ ਮਕ੍ਖਿਤੋਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸੁਧਾਪਿਣ੍ਡਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੨. ਸੁਚਿਨ੍ਤਿਕਤ੍ਥੇਰਅਪਦਾਨਵਣ੍ਣਨਾ
ਤਿਸ੍ਸਸ੍ਸ ਲੋਕਨਾਥਸ੍ਸਾਤਿਆਦਿਕਂ ਆਯਸ੍ਮਤੋ ਸੁਚਿਨ੍ਤਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਨਿਬ੍ਬਾਨਾਧਿਗਮਾਯ ਪੁਞ੍ਞਂ ਉਪਚਿਨਿਤ੍ਵਾ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਸਤ੍ਥੁ ਨਿਸੀਦਨਤ੍ਥਾਯ ਪਰਿਸੁਦ੍ਧਂ ਸਿਲਿਟ੍ਠਂ ਕਟ੍ਠਮਯਮਨਗ੍ਘਪੀਠਮਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਸੁਗਤਿਸੁਖਮਨੁਭਵਿਤ੍ਵਾ ਤਤ੍ਥ ਤਤ੍ਥ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੮. ਸੋ ਪਤ੍ਤਅਰਹਤ੍ਤਫਲੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸਸ੍ਸ ਲੋਕਨਾਥਸ੍ਸਾਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.
ਸੁਚਿਨ੍ਤਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੩. ਅਡ੍ਢਚੇਲ਼ਕਤ੍ਥੇਰਅਪਦਾਨਵਣ੍ਣਨਾ
ਤਿਸ੍ਸਸ੍ਸਾਹਂ ਭਗਵਤੋਤਿਆਦਿਕਂ ਆਯਸ੍ਮਤੋ ਅਡ੍ਢਚੇਲ਼ਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕੇਨਾਕੁਸਲੇਨ ਕਮ੍ਮੇਨ ਦੁਗ੍ਗਤਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਮ੍ਮਦੇਸਨਂ ਞਤ੍ਵਾ ਪਸਨ੍ਨਮਾਨਸੋ ਚੀਵਰਤ੍ਥਾਯ ਅਡ੍ਢਭਾਗਂ ਏਕਂ ਦੁਸ੍ਸਮਦਾਸਿ. ਸੋ ਤੇਨੇਵ ਪੀਤਿਸੋਮਨਸ੍ਸੇਨ ਕਾਲਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤੋ ਛ ਕਾਮਾਵਚਰਸਮ੍ਪਤ੍ਤਿਮਨੁਭਵਿਤ੍ਵਾ ਤਤੋ ਚੁਤੋ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤੀਨਂ ਅਗ੍ਗਭੂਤਂ ਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਅਦ੍ਧਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.
੧੪. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਸ੍ਸਸ੍ਸਾਹਂ ਭਗਵਤੋਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.
ਅਡ੍ਢਚੇਲ਼ਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੪. ਸੂਚਿਦਾਯਕਤ੍ਥੇਰਅਪਦਾਨਵਣ੍ਣਨਾ
ਕਮ੍ਮਾਰੋਹਂ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਸੂਚਿਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨ੍ਤਰਨ੍ਤਰਾ ਕੁਸਲਬੀਜਾਨਿ ਪੂਰੇਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਅਨ੍ਤਰਨ੍ਤਰਾ ਕਤੇਨ ਏਕੇਨ ਕਮ੍ਮਚ੍ਛਿਦ੍ਦੇਨ ਕਮ੍ਮਾਰਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਚੀਵਰਸਿਬ੍ਬਨਤ੍ਥਾਯ ਸੂਚਿਦਾਨਮਦਾਸਿ, ਤੇਨ ਪੁਞ੍ਞੇਨ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸੇਸੁ ਉਪ੍ਪਨ੍ਨੋ ਚਕ੍ਕਵਤ੍ਤਾਦਯੋ ਸਮ੍ਪਤ੍ਤਿਯੋ ਚ ਅਨੁਭਵਨ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਤਿਕ੍ਖਪਞ੍ਞੋ ਵਜੀਰਞਾਣੋ ਅਹੋਸਿ. ਸੋ ਕਮੇਨ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਮਹਦ੍ਧਨੋ ਸਦ੍ਧਾਜਾਤੋ ਤਿਕ੍ਖਪਞ੍ਞੋ ਅਹੋਸਿ. ਸੋ ਏਕਦਿਵਸਂ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਧਮ੍ਮਾਨੁਸਾਰੇਨ ਞਾਣਂ ਪੇਸੇਤ੍ਵਾ ਨਿਸਿਨ੍ਨਾਸਨੇਯੇਵ ਅਰਹਾ ਅਹੋਸਿ.
੧੯. ਸੋ ਅਰਹਾ ਸਮਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕਮ੍ਮਾਰੋਹਂ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਕਮ੍ਮਾਰੋਤਿ ਅਯੋਕਮ੍ਮਲੋਹਕਮ੍ਮਾਦਿਨਾ ਕਮ੍ਮੇਨ ਜੀਵਤਿ ਰੁਹਤਿ ਵੁਦ੍ਧਿਂ ਵਿਰੂਲ਼੍ਹਿਂ ਆਪਜ੍ਜਤੀਤਿ ਕਮ੍ਮਾਰੋ, ਪੁਬ੍ਬੇ ਪੁਞ੍ਞਕਰਣਕਾਲੇ ਕਮ੍ਮਾਰੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸੂਚਿਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੫. ਗਨ੍ਧਮਾਲਿਯਤ੍ਥੇਰਅਪਦਾਨਵਣ੍ਣਨਾ
ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਗਨ੍ਧਮਾਲਿਯਤ੍ਥੇਰਸ੍ਸ ਅਪਦਾਨ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਮਹਦ੍ਧਨੋ ਮਹਾਭੋਗੋ ਅਹੋਸਿ. ਸੋ ਸਤ੍ਥਰਿ ਪਸੀਦਿਤ੍ਵਾ ਚਨ੍ਦਨਾਗਰੁਕਪ੍ਪੂਰਕਸ੍ਸਤੁਰਾਦੀਨਿ ਅਨੇਕਾਨਿ ਸੁਗਨ੍ਧਾਨਿ ਵਡ੍ਢੇਤ੍ਵਾ ਸਤ੍ਥੁ ਗਨ੍ਧਥੂਪਂ ਕਾਰੇਸਿ. ਤਸ੍ਸੁਪਰਿ ਸੁਮਨਪੁਪ੍ਫੇਹਿ ਛਾਦੇਸਿ, ਬੁਦ੍ਧਞ੍ਚ ਅਟ੍ਠਙ੍ਗਨਮਕ੍ਕਾਰਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੨੪. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਤਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.
ਗਨ੍ਧਮਾਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੬. ਤਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ
ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਤਿਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨ੍ਤਰਾ ਕੇਨਚਿ ਅਕੁਸਲਚ੍ਛਿਦ੍ਦੇਨ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਨੇਸਾਦਕੁਲੇ ਨਿਬ੍ਬਤ੍ਤੋ ਮਿਗਲੁਦ੍ਦੋ ਹੁਤ੍ਵਾ ਅਰਞ੍ਞੇ ਵਿਹਰਤਿ. ਤਦਾ ਵਿਪਸ੍ਸਿਸ੍ਸ ਭਗਵਤੋ ਪਾਟਲਿਬੋਧਿਂ ਸਮ੍ਪੁਣ੍ਣਪਤ੍ਤਪਲ੍ਲਵਂ ਹਰਿਤਵਣ੍ਣਂ ਨੀਲੋਭਾਸਂ ਮਨੋਰਮਂ ਦਿਸ੍ਵਾ ਤੀਹਿ ਪੁਪ੍ਫੇਹਿ ਪੂਜੇਤ੍ਵਾ ਪੁਰਾਣਪਤ੍ਤਂ ਛਡ੍ਡੇਤ੍ਵਾ ਭਗਵਤੋ ਸਮ੍ਮੁਖਾ ਵਿਯ ਪਾਟਲਿਮਹਾਬੋਧਿਂ ਵਨ੍ਦਿ. ਸੋ ਤੇਨ ਪੁਞ੍ਞੇਨ ਤਤੋ ਚੁਤੋ ਦੇਵਲੋਕੇ ਉਪ੍ਪਨ੍ਨੋ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਪਰਾਪਰਂ ਅਨੁਭਵਿਤ੍ਵਾ ਤਤੋ ਚੁਤੋ ਮਨੁਸ੍ਸੇਸੁ ਜਾਤੋ ਤਤ੍ਥ ਚਕ੍ਕਵਤ੍ਤਿਸਮ੍ਪਤ੍ਤਿਆਦਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸੋਮਨਸ੍ਸਹਦਯੋ ਗੇਹਂ ਪਹਾਯ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.
੩੧. ਸੋ ਏਵਂ ਸਿਦ੍ਧਿਪ੍ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਮਰਣਾਯ ਗਚ੍ਛਤਿ ਪਾਪੁਣਾਤੀਤਿ ਮਿਗੋ, ਅਥ ਵਾ ਮਗਯਮਾਨੋ ਇਹਤਿ ਪਵਤ੍ਤਤੀਤਿ ਮਿਗੋ, ਮਿਗਾਨਂ ਮਾਰਣੇ ਲੁਦ੍ਦੋ ਲੋਭੀ ਗੇਧੋਤਿ ਮਿਗਲੁਦ੍ਦੋ, ਪੁਰੇ ਮਯ੍ਹਂ ਪੁਞ੍ਞਕਰਣਸਮਯੇ ਕਾਨਨਸਙ੍ਖਾਤੇ ਮਹਾਅਰਞ੍ਞੇ ਮਿਗਲੁਦ੍ਦੋ ਆਸਿਨ੍ਤਿ ਸਮ੍ਬਨ੍ਧੋ. ਪਾਟਲਿਂ ਹਰਿਤਂ ਦਿਸ੍ਵਾਤਿ ਤਤ੍ਥ ਪਕਾਰੇਨ ਤਲੇਨ ਰਤ੍ਤਵਣ੍ਣੇਨ ਭਵਤੀਤਿ ਪਾਟਲਿ, ਪੁਪ੍ਫਾਨਂ ਰਤ੍ਤਵਣ੍ਣਤਾਯ ਪਾਟਲੀਤਿ ਵੋਹਾਰੋ, ਪਤ੍ਤਾਨਂ ਹਰਿਤਤਾਯ ਹਰਿਤਂ ਨੀਲਵਣ੍ਣਂ ਪਾਟਲਿਬੋਧਿਂ ਦਿਸ੍ਵਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਤਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੭. ਮਧੁਪਿਣ੍ਡਿਕਤ੍ਥੇਰਅਪਦਾਨਵਣ੍ਣਨਾ
ਵਿਵਨੇ ਕਾਨਨੇ ਦਿਸ੍ਵਾਤਿਆਦਿਕਂ ਆਯਸ੍ਮਤੋ ਮਧੁਪਿਣ੍ਡਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਨੇਸਾਦਯੋਨਿਯਂ ਨਿਬ੍ਬਤ੍ਤੋ ਮਹਾਅਰਞ੍ਞੇ ਪਟਿਵਸਤਿ. ਤਦਾ ਵਿਵੇਕਾਭਿਰਤਿਯਾ ਸਮ੍ਪਤ੍ਤਂ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਸਮਾਧਿਤੋ ਵੁਟ੍ਠਿਤਸ੍ਸ ਤਸ੍ਸ ਸੁਮਧੁਰਂ ਮਧੁਮਦਾਸਿ. ਤਤ੍ਥ ਚ ਪਸਨ੍ਨਮਾਨਸੋ ਵਨ੍ਦਿਤ੍ਵਾ ਪਕ੍ਕਾਮਿ. ਸੋ ਤੇਨੇਵ ਪੁਞ੍ਞੇਨ ਸਮ੍ਪਤ੍ਤਿਂ ਅਨੁਭਵਨ੍ਤੋ ਦੇਵਮਨੁਸ੍ਸੇਸੁ ਸਂਸਰਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੩੭. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਵਨੇ ਕਾਨਨੇ ਦਿਸ੍ਵਾਤਿਆਦਿਮਾਹ. ਤਤ੍ਥ ਵਿਵਨੇਤਿ ਵਿਸੇਸੇਨ ਵਨਂ ਪਤ੍ਥਟਂ ਵਿਵਨਂ, ਹਤ੍ਥਿਅਸ੍ਸਰਥਸਦ੍ਦੇਹਿ ਭੇਰਿਸਦ੍ਦੇਹਿ ਚ ਵਤ੍ਥੁਕਾਮਕਿਲੇਸਕਾਮੇਹਿ ਚ ਵਿਗਤਂ ਬ੍ਯਾਪਗਤਨ੍ਤਿ ਅਤ੍ਥੋ, ਕਾਨਨਸਙ੍ਖਾਤੇ ਮਹਾਅਰਞ੍ਞੇ ਵਿਵਨੇਤਿ ਸਮ੍ਬਨ੍ਧੋ. ਓਸਧਿਂਵ ਵਿਰੋਚਨ੍ਤਨ੍ਤਿ ਭਵਵਡ੍ਢਕਿਜਨਾਨਂ ਇਚ੍ਛਿਤਿਚ੍ਛਿਤਂ ਨਿਪ੍ਫਾਦੇਤੀਤਿ ਓਸਧਂ. ਓਜਾਨਿਬ੍ਬਤ੍ਤਿਕਾਰਣਂ ਪਟਿਚ੍ਚ ਯਾਯ ਤਾਰਕਾਯ ਉਗ੍ਗਤਾਯ ਉਦ੍ਧਰਨ੍ਤਿ ਗਣ੍ਹਨ੍ਤੀਤਿ ਸਾ ਓਸਧਿ. ਓਸਧਿਤਾਰਕਾ ਇਵ ਵਿਰੋਚਨ੍ਤੀਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ‘‘ਓਸਧਿਂਵ ਵਿਰੋਚਨ੍ਤ’’ਨ੍ਤਿ ਚ ਵੁਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਮਧੁਪਿਣ੍ਡਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੮. ਸੇਨਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ
ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਸੇਨਾਸਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਵਨਨ੍ਤਰਂ ਸਮ੍ਪਤ੍ਤਸ੍ਸ ਭਗਵਤੋ ਪਣਾਮਂ ਕਤ੍ਵਾ ਪਣ੍ਣਸਨ੍ਥਰਂ ਸਨ੍ਥਰਿਤ੍ਵਾ ਅਦਾਸਿ. ਭਗਵਤੋ ਨਿਸਿਨ੍ਨਟ੍ਠਾਨਸ੍ਸ ਸਮਨ੍ਤਤੋ ਭਿਤ੍ਤਿਪਰਿਚ੍ਛੇਦਂ ਕਤ੍ਵਾ ਪੁਪ੍ਫਪੂਜਮਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.
੪੫. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.
ਸੇਨਾਸਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੯. ਵੇਯ੍ਯਾਵਚ੍ਚਕਰਤ੍ਥੇਰਅਪਦਾਨਵਣ੍ਣਨਾ
ਵਿਪਸ੍ਸਿਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਵੇਯ੍ਯਾਵਚ੍ਚਕਰਤ੍ਥੇਰਸ੍ਸ ਅਪਦਾਨਂ. ਤਸ੍ਸ ਉਪ੍ਪਤ੍ਤਿਆਦਯੋ ਹੇਟ੍ਠਾ ਵੁਤ੍ਤਨਿਯਾਮੇਨੇਵ ਦਟ੍ਠਬ੍ਬਾ.
ਵੇਯ੍ਯਾਵਚ੍ਚਕਰਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
੧੦. ਬੁਦ੍ਧੁਪਟ੍ਠਾਕਤ੍ਥੇਰਅਪਦਾਨਵਣ੍ਣਨਾ
ਵਿਪਸ੍ਸਿਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਬੁਦ੍ਧੁਪਟ੍ਠਾਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਸਙ੍ਖਧਮਕਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਅਤ੍ਤਨੋ ਸਿਪ੍ਪੇ ਸਙ੍ਖਧਮਨੇ ਛੇਕੋ ਅਹੋਸਿ, ਨਿਚ੍ਚਕਾਲਂ ਭਗਵਤੋ ਸਙ੍ਖਂ ਧਮੇਤ੍ਵਾ ਸਙ੍ਖਸਦ੍ਦੇਨੇਵ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪਾਕਟੋ ਮਹਾਘੋਸੋ ਮਹਾਨਾਦੀ ਮਧੁਰਸ੍ਸਰੋ ਅਹੋਸਿ, ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਪਾਕਟਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਮਧੁਰਸ੍ਸਰੋਤਿ ਪਾਕਟੋ, ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ, ਅਪਰਭਾਗੇ ਮਧੁਰਸ੍ਸਰਤ੍ਥੇਰੋਤਿ ਪਾਕਟੋ.
੫੧. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਪਸ੍ਸਿਸ੍ਸ ਭਗਵਤੋਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਮੇਵ. ਅਹੋਸਿਂ ਸਙ੍ਖਧਮਕੋਤਿ ਸਂ ਸੁਟ੍ਠੁ ਖਨਨ੍ਤੋ ਗਚ੍ਛਤੀਤਿ ਸਙ੍ਖੋ, ਸਮੁਦ੍ਦਜਲਪਰਿਯਨ੍ਤੇ ਚਰਮਾਨੋ ਗਚ੍ਛਤਿ ਵਿਚਰਤੀਤਿ ਅਤ੍ਥੋ. ਤਂ ਸਙ੍ਖਂ ਧਮਤਿ ਘੋਸਂ ਕਰੋਤੀਤਿ ਸਙ੍ਖਧਮਕੋ, ਸੋਹਂ ਸਙ੍ਖਧਮਕੋਵ ਅਹੋਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਬੁਦ੍ਧੁਪਟ੍ਠਾਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
ਦਸਮਵਗ੍ਗਵਣ੍ਣਨਾ ਸਮਤ੍ਤਾ.