੧੧. ਭਿਕ੍ਖਦਾਯਿਵਗ੍ਗੋ

੧. ਭਿਕ੍ਖਾਦਾਯਕਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਭਿਕ੍ਖਾਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਵਿਭਵਸਮ੍ਪਨ੍ਨੋ ਸਦ੍ਧਾਜਾਤੋ ਵਿਹਾਰਤੋ ਨਿਕ੍ਖਮਿਤ੍ਵਾ ਪਿਣ੍ਡਾਯ ਚਰਮਾਨਂ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਆਹਾਰਮਦਾਸਿ. ਭਗਵਾ ਤਂ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਤੇਨੇਵ ਕੁਸਲੇਨ ਯਾਵਤਾਯੁਕਂ ਠਤ੍ਵਾ ਆਯੁਪਰਿਯੋਸਾਨੇ ਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਮਨੁਸ੍ਸਸਮ੍ਪਤ੍ਤਿਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਮੇਵ. ਪਵਰਾ ਅਭਿਨਿਕ੍ਖਨ੍ਤਨ੍ਤਿ ਪਕਾਰੇਨ ਵਰਿਤਬ੍ਬਂ ਪਤ੍ਥੇਤਬ੍ਬਨ੍ਤਿ ਪਵਰਂ, ਰਮ੍ਮਭੂਤਤੋ ਵਿਵੇਕਭੂਤਤੋ ਸਕਵਿਹਾਰਤੋ ਅਭਿ ਵਿਸੇਸੇਨ ਨਿਕ੍ਖਨ੍ਤਨ੍ਤਿ ਅਤ੍ਥੋ. ਵਾਨਾ ਨਿਬ੍ਬਾਨਮਾਗਤਨ੍ਤਿ ਵਾਨਂ ਵੁਚ੍ਚਤਿ ਤਣ੍ਹਾ, ਤਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਂ, ਵਾਨਨਾਮਂ ਤਣ੍ਹਂ ਪਧਾਨਂ ਕਤ੍ਵਾ ਸਬ੍ਬਕਿਲੇਸੇ ਪਹਾਯ ਨਿਬ੍ਬਾਨਂ ਪਤ੍ਤਨ੍ਤਿ ਅਤ੍ਥੋ.

੨. ਕਟਚ੍ਛੁਭਿਕ੍ਖਂ ਦਤ੍ਵਾਨਾਤਿ ਕਰਤਲੇਨ ਗਹੇਤਬ੍ਬਾ ਦਬ੍ਬਿ ਕਟਚ੍ਛੁ, ਭਿਕ੍ਖੀਯਤਿ ਆਯਾਚੀਯਤੀਤਿ ਭਿਕ੍ਖਾ, ਅਭਿ ਵਿਸੇਸੇਨ ਖਾਦਿਤਬ੍ਬਾ ਭਕ੍ਖਿਤਬ੍ਬਾਤਿ ਵਾ ਭਿਕ੍ਖਾ, ਕਟਚ੍ਛੁਨਾ ਗਹੇਤਬ੍ਬਾ ਭਿਕ੍ਖਾ ਕਟਚ੍ਛੁਭਿਕ੍ਖਾ, ਦਬ੍ਬਿਯਾ ਭਤ੍ਤਂ ਦਤ੍ਵਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਭਿਕ੍ਖਾਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਞਾਣਸਞ੍ਞਿਕਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਞਾਣਸਞ੍ਞਿਕਤ੍ਥੇਰਸ੍ਸ ਅਪਦਾਨਂ. ਕਾ ਉਪ੍ਪਤ੍ਤਿ? ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਸਦ੍ਧਮ੍ਮਸ੍ਸਵਨੇ ਸਾਦਰੋ ਸਾਲਯੋ ਭਗਵਤੋ ਧਮ੍ਮਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਘੋਸਪਮਾਣਤ੍ਤਾ ਭਗਵਤੋ ਞਾਣੇ ਪਸਨ੍ਨੋ ਪਞ੍ਚਙ੍ਗਅਟ੍ਠਙ੍ਗਨਮਕ੍ਕਾਰਵਸੇਨ ਪਣਾਮਂ ਕਤ੍ਵਾ ਪਕ੍ਕਾਮਿ. ਸੋ ਤਤੋ ਚੁਤੋ ਦੇਵਲੋਕੇਸੁ ਉਪ੍ਪਨ੍ਨੋ ਤਤ੍ਥ ਛ ਕਾਮਾਵਚਰੇ ਦਿਬ੍ਬਸਮ੍ਪਤ੍ਤਿਮਨੁਭਵਨ੍ਤੋ ਤਤੋ ਚਵਿਤ੍ਵਾ ਮਨੁਸ੍ਸਲੋਕੇ ਜਾਤੋ ਤਤ੍ਥਗ੍ਗਭੂਤਾ ਚਕ੍ਕਵਤ੍ਤਿਸਮ੍ਪਦਾਦਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੭. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਨਿਸਭਾਜਾਨਿਯਂ ਯਥਾਤਿ ਗਵਸਤਸਹਸ੍ਸਜੇਟ੍ਠੋ ਨਿਸਭੋ, ਨਿਸਭੋ ਚ ਸੋ ਆਜਾਨਿਯੋ ਸੇਟ੍ਠੋ ਉਤ੍ਤਮੋ ਚੇਤਿ ਨਿਸਭਾਜਾਨਿਯੋ. ਯਥਾ ਨਿਸਭਾਜਾਨਿਯੋ, ਤਥੇਵ ਭਗਵਾਤਿ ਅਤ੍ਥੋ. ਲੋਕਵਿਸਯਸਞ੍ਞਾਤਂ ਪਞ੍ਞਤ੍ਤਿਵਸੇਨ ਏਵਂ ਵੁਤ੍ਤਂ. ਅਨੁਪਮੇਯ੍ਯੋ ਹਿ ਭਗਵਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਞਾਣਸਞ੍ਞਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਉਪ੍ਪਲਹਤ੍ਥਿਯਤ੍ਥੇਰਅਪਦਾਨਵਣ੍ਣਨਾ

ਤਿਵਰਾਯਂ ਨਿਵਾਸੀਹਨ੍ਤਿਆਦਿਕਂ ਆਯਸ੍ਮਤੋ ਉਪ੍ਪਲਹਤ੍ਥਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਕੁਸਲੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਮਾਲਾਕਾਰਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਮਾਲਾਕਾਰਕਮ੍ਮੇਨ ਅਨੇਕਾਨਿ ਪੁਪ੍ਫਾਨਿ ਵਿਕ੍ਕਿਣਨ੍ਤੋ ਜੀਵਤਿ. ਅਥੇਕਦਿਵਸਂ ਪੁਪ੍ਫਾਨਿ ਗਹੇਤ੍ਵਾ ਚਰਨ੍ਤੋ ਭਗਵਨ੍ਤਂ ਰਤਨਗ੍ਘਿਕਮਿਵ ਚਰਮਾਨਂ ਦਿਸ੍ਵਾ ਰਤ੍ਤੁਪ੍ਪਲਕਲਾਪੇਨ ਪੂਜੇਸਿ. ਸੋ ਤਤੋ ਚੁਤੋ ਤੇਨੇਵ ਪੁਞ੍ਞੇਨ ਸੁਗਤੀਸੁ ਪੁਞ੍ਞਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੩. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਵਰਾਯਂ ਨਿਵਾਸੀਹਨ੍ਤਿਆਦਿਮਾਹ. ਤਤ੍ਥ ਤਿਵਰਾਤਿ ਤੀਹਿ ਵਾਰੇਹਿ ਕਾਰਿਤਂ ਸਞ੍ਚਰਿਤਂ ਪਟਿਚ੍ਛਨ੍ਨਂ ਨਗਰਂ, ਤਸ੍ਸਂ ਤਿਵਰਾਯਂ ਨਿਵਾਸੀ, ਵਸਨਸੀਲੋ ਨਿਵਾਸਨਟ੍ਠਾਨਗੇਹੇ ਵਾ ਵਸਨ੍ਤੋ ਅਹਨ੍ਤਿ ਅਤ੍ਥੋ. ਅਹੋਸਿਂ ਮਾਲਿਕੋ ਤਦਾਤਿ ਤਦਾ ਨਿਬ੍ਬਾਨਤ੍ਥਾਯ ਪੁਞ੍ਞਸਮ੍ਭਾਰਕਰਣਸਮਯੇ ਮਾਲਿਕੋ ਮਾਲਾਕਾਰੋਵ ਪੁਪ੍ਫਾਨਿ ਕਯਵਿਕ੍ਕਯਂ ਕਤ੍ਵਾ ਜੀਵਨ੍ਤੋ ਅਹੋਸਿਨ੍ਤਿ ਅਤ੍ਥੋ.

੧੪. ਪੁਪ੍ਫਹਤ੍ਥਮਦਾਸਹਨ੍ਤਿ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਉਪ੍ਪਲਕਲਾਪਂ ਅਦਾਸਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਉਪ੍ਪਲਹਤ੍ਥਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਪਦਪੂਜਕਤ੍ਥੇਰਅਪਦਾਨਵਣ੍ਣਨਾ

ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਪਦਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਸੁਮਨਪੁਪ੍ਫੇਨ ਪਾਦਮੂਲੇ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਕ੍ਕਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਫਲੇ ਪਤਿਟ੍ਠਾਸਿ.

੧੯. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਜਾਤਿਪੁਪ੍ਫਮਦਾਸਹਨ੍ਤਿ ਜਾਤਿਸੁਮਨਪੁਪ੍ਫਂ ਅਦਾਸਿਂ ਅਹਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ਸੁਮਨਸਦ੍ਦਸ੍ਸ ਲੋਪਂ ਕਤ੍ਵਾ ਵੁਤ੍ਤਂ. ਤਤ੍ਥ ਜਾਤਿਯਾ ਨਿਬ੍ਬਤ੍ਤੋ ਵਿਕਸਮਾਨੋਯੇਵ ਸੁਮਨਂ ਜਨਾਨਂ ਸੋਮਨਸ੍ਸਂ ਕਰੋਤੀਤਿ ਸੁਮਨਂ, ਪੁਪ੍ਫਨਟ੍ਠੇਨ ਵਿਕਸਨਟ੍ਠੇਨ ਪੁਪ੍ਫਂ, ਸੁਮਨਞ੍ਚ ਤਂ ਪੁਪ੍ਫਞ੍ਚਾਤਿ ਸੁਮਨਪੁਪ੍ਫਂ, ਤਾਨਿ ਸੁਮਨਪੁਪ੍ਫਾਨਿ ਸਿਦ੍ਧਤ੍ਥਸ੍ਸ ਭਗਵਤੋ ਅਹਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਦਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਮੁਟ੍ਠਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਸੁਦਸ੍ਸਨੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਮੁਟ੍ਠਿਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਮਾਲਾਕਾਰਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਏਕਦਿਵਸਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਜਾਤਿਸੁਮਨਪੁਪ੍ਫਾਨਿ ਉਭੋਹਿ ਹਤ੍ਥੇਹਿ ਭਗਵਤੋ ਪਾਦਮੂਲੇ ਓਕਿਰਿਤ੍ਵਾ ਪੂਜੇਸਿ. ਸੋ ਤੇਨ ਕੁਸਲਸਮ੍ਭਾਰੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭੋ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਪੁਬ੍ਬਵਾਸਨਾਵਸੇਨ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੪-੨੫. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਦਸ੍ਸਨੋ ਨਾਮ ਨਾਮੇਨਾਤਿਆਦਿਮਾਹ. ਤਤ੍ਥ ਸੁਦਸ੍ਸਨੋਤਿ ਆਰੋਹਪਰਿਣਾਹਰੂਪਸਣ੍ਠਾਨਯੋਬ੍ਬਞ੍ਞਸੋਭਨੇਨ ਸੁਨ੍ਦਰੋ ਦਸ੍ਸਨੋਤਿ ਸੁਦਸ੍ਸਨੋ, ਨਾਮੇਨ ਸੁਦਸ੍ਸਨੋ ਨਾਮ ਮਾਲਾਕਾਰੋ ਹੁਤ੍ਵਾ ਜਾਤਿਸੁਮਨਪੁਪ੍ਫੇਹਿ ਪਦੁਮੁਤ੍ਤਰਂ ਭਗਵਨ੍ਤਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਮੁਟ੍ਠਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਉਦਕਪੂਜਕਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਉਦਕਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਪੂਰਿਤਕੁਸਲਸਞ੍ਚਯੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਪਰਿਪੂਰਿਯਮਾਨੋ ਪੁਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਕੁਸਲਾਕੁਸਲਂ ਜਾਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਆਕਾਸੇ ਗਚ੍ਛਤੋ ਨਿਕ੍ਖਨ੍ਤਛਬ੍ਬਣ੍ਣਬੁਦ੍ਧਰਂਸੀਸੁ ਪਸਨ੍ਨੋ ਉਭੋਹਿ ਹਤ੍ਥੇਹਿ ਉਦਕਂ ਗਹੇਤ੍ਵਾ ਪੂਜੇਸਿ. ਤੇਨ ਪੂਜਿਤਂ ਉਦਕਂ ਰਜਤਬੁਬ੍ਬੁਲਂ ਵਿਯ ਆਕਾਸੇ ਅਟ੍ਠਾਸਿ. ਸੋ ਅਭਿਪ੍ਪਸਨ੍ਨੋ ਤੇਨੇਵ ਸੋਮਨਸ੍ਸੇਨ ਤੁਸਿਤਾਦੀਸੁ ਨਿਬ੍ਬਤ੍ਤੋ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੯. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਮੇਵ. ਘਤਾਸਨਂਵ ਜਲਿਤਨ੍ਤਿ ਘਤਂ ਵੁਚ੍ਚਤਿ ਸਪ੍ਪਿ, ਘਤਸ੍ਸ ਆਸਨਂ ਆਧਾਰਨ੍ਤਿ ਘਤਾਸਨਂ, ਅਗ੍ਗਿ, ਅਥ ਵਾ ਤਂ ਅਸਤਿ ਭੁਞ੍ਜਤੀਤਿ ਘਤਾਸਨਂ, ਅਗ੍ਗਿਯੇਵ. ਯਥਾ ਘਤੇ ਆਸਿਤ੍ਤੇ ਅਗ੍ਗਿਮ੍ਹਿ ਅਗ੍ਗਿਸਿਖਾ ਅਤੀਵ ਜਲਤਿ, ਏਵਂ ਅਗ੍ਗਿਕ੍ਖਨ੍ਧਂ ਇਵ ਜਲਮਾਨਂ ਭਗਵਨ੍ਤਨ੍ਤਿ ਅਤ੍ਥੋ. ਆਦਿਤ੍ਤਂਵ ਹੁਤਾਸਨਨ੍ਤਿ ਹੁਤਂ ਵੁਚ੍ਚਤਿ ਪੂਜਾਸਕ੍ਕਾਰੇ, ਹੁਤਸ੍ਸ ਪੂਜਾਸਕ੍ਕਾਰਸ੍ਸ ਆਸਨਨ੍ਤਿ ਹੁਤਾਸਨਂ, ਜਲਮਾਨਂ ਸੂਰਿਯਂ ਇਵ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਬ੍ਯਾਮਪ੍ਪਭਾਮਣ੍ਡਲੇਹਿ ਵਿਜ੍ਜੋਤਮਾਨਂ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ ਅਨਿਲਞ੍ਜਸੇ ਆਕਾਸੇ ਗਚ੍ਛਨ੍ਤਂ ਅਦ੍ਦਸਨ੍ਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਉਦਕਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਨਲ਼ਮਾਲਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਨਲ਼ਮਾਲਿਯਤ੍ਥੇਰਸ੍ਸ ਅਪਦਾਨਂ. ਏਸੋਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਵਿਵਟ੍ਟੂਪਨਿਸ੍ਸਯਾਨਿ ਕੁਸਲਕਮ੍ਮਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਕਾਮੇ ਆਦੀਨਵਂ ਦਿਸ੍ਵਾ ਗੇਹਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਤਤ੍ਥਾਗਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨੋ ਵਨ੍ਦਿਤ੍ਵਾ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਨਿਸਿਨ੍ਨਸ੍ਸ ਭਗਵਤੋ ਨਲ਼ਮਾਲੇਹਿ ਬੀਜਨਿਂ ਕਤ੍ਵਾ ਬੀਜੇਤ੍ਵਾ ਅਦਾਸਿ. ਪਟਿਗ੍ਗਹੇਸਿ ਭਗਵਾ ਤਸ੍ਸਾਨੁਕਮ੍ਪਾਯ, ਅਨੁਮੋਦਨਞ੍ਚ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਪਰਿਲ਼ਾਹਸਨ੍ਤਾਪਵਿਵਜ੍ਜਿਤੋ ਕਾਯਚਿਤ੍ਤਚੇਤਸਿਕਸੁਖਪ੍ਪਤ੍ਤੋ ਅਨੇਕਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੬. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਮੇਵ.

੩੭. ਨਲ਼ਮਾਲਂ ਗਹੇਤ੍ਵਾਨਾਤਿ ਨਲ਼ਤਿ ਅਸਾਰੋ ਨਿਸ੍ਸਾਰੋ ਹੁਤ੍ਵਾ ਵੇਲ਼ੁਵਂਸਤੋਪਿ ਤਨੁਕੋ ਸਲ੍ਲਹੁਕੋ ਜਾਤੋਤਿ ਨਲ਼ੋ, ਨਲ਼ਸ੍ਸ ਮਾਲਾ ਪੁਪ੍ਫਂ ਨਲ਼ਮਾਲਂ, ਤੇਨ ਨਲ਼ਮਾਲੇਨ ਬੀਜਨਿਂ ਕਾਰੇਸਿਨ੍ਤਿ ਸਮ੍ਬਨ੍ਧੋ. ਬੀਜਿਸ੍ਸਤਿ ਜਨਿਸ੍ਸਤਿ ਵਾਤੋ ਅਨੇਨਾਤਿ ਬੀਜਨੀ, ਤਂ ਬੀਜਨਿਂ ਬੁਦ੍ਧਸ੍ਸ ਉਪਨਾਮੇਸਿਂ, ਪਟਿਗ੍ਗਹੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਨਲ਼ਮਾਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸਤ੍ਤਮਭਾਣਵਾਰਵਣ੍ਣਨਾ ਸਮਤ੍ਤਾ.

੮. ਆਸਨੁਪਟ੍ਠਾਹਕਤ੍ਥੇਰਅਪਦਾਨਵਣ੍ਣਨਾ

ਕਾਨਨਂ ਵਨਮੋਗ੍ਗਯ੍ਹਾਤਿਆਦਿਕਂ ਆਯਸ੍ਮਤੋ ਆਸਨੁਪਟ੍ਠਾਹਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਘਰਾਵਾਸਂ ਵਸਨ੍ਤੋ ਤਤ੍ਥ ਦੋਸਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਤਤ੍ਥ ਸਮ੍ਪਤ੍ਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨੋ ਸੀਹਾਸਨਂ ਅਦਾਸਿ, ਤਤ੍ਥ ਨਿਸਿਨ੍ਨਂ ਭਗਵਨ੍ਤਂ ਮਾਲਾਕਲਾਪਂ ਗਹੇਤ੍ਵਾ ਪੂਜੇਤ੍ਵਾ ਤਂ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਨਿਬ੍ਬਤ੍ਤਨਿਬ੍ਬਤ੍ਤਭਵੇ ਉਚ੍ਚਕੁਲਿਕੋ ਵਿਭਵਸਮ੍ਪਨ੍ਨੋ ਅਹੋਸਿ. ਸੋ ਕਾਲਨ੍ਤਰੇਨ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੭. ਸੋ ਅਰਹਾ ਸਮਾਨੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕਾਨਨਂ ਵਨਮੋਗ੍ਗਯ੍ਹਾਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਤ੍ਥਮੇਵਾਤਿ.

ਆਸਨੁਪਟ੍ਠਾਹਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਬਿਲ਼ਾਲਿਦਾਯਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਬਿਲ਼ਾਲਿਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਵਸਨ੍ਤੋ ਤਤ੍ਥਾਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਅਤੀਵ ਅਪ੍ਪਿਚ੍ਛਸਨ੍ਤੁਟ੍ਠੋ ਆਲੁਵਾਦੀਹਿ ਯਾਪੇਨ੍ਤੋ ਵਸਤਿ. ਤਦਾ ਪਦੁਮੁਤ੍ਤਰੋ ਭਗਵਾ ਤਸ੍ਸ ਅਨੁਕਮ੍ਪਾਯ ਤਂ ਹਿਮਵਨ੍ਤਂ ਅਗਮਾਸਿ. ਤਂ ਦਿਸ੍ਵਾ ਪਸਨ੍ਨੋ ਵਨ੍ਦਿਤ੍ਵਾ ਬਿਲ਼ਾਲਿਯੋ ਗਹੇਤ੍ਵਾ ਪਤ੍ਤੇ ਓਕਿਰਿ. ਤਂ ਤਥਾਗਤੋ ਤਸ੍ਸਾਨੁਕਮ੍ਪਾਯ ਸੋਮਨਸ੍ਸੁਪ੍ਪਾਦਯਨ੍ਤੋ ਪਰਿਭੁਞ੍ਜਿ. ਸੋ ਤੇਨ ਕਮ੍ਮੇਨ ਤਤੋ ਚੁਤੋ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੫੩. ਸੋ ਅਪਰਭਾਗੇ ਅਤ੍ਤਨੋ ਕੁਸਲਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ. ਆਲੁਵਕਰਮ੍ਭਾਦਯੋ ਤੇਸਂ ਤੇਸਂ ਕਨ੍ਦਜਾਤੀਨਂ ਨਾਮਾਨੇਵਾਤਿ.

ਬਿਲ਼ਾਲਿਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਰੇਣੁਪੂਜਕਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਰੇਣੁਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਵਿਞ੍ਞੁਤਂ ਪਤ੍ਤੋ ਅਗ੍ਗਿਕ੍ਖਨ੍ਧਂ ਵਿਯ ਵਿਜ੍ਜੋਤਮਾਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਨਾਗਪੁਪ੍ਫਕੇਸਰਂ ਗਹੇਤ੍ਵਾ ਪੂਜੇਸਿ. ਅਥ ਭਗਵਾ ਅਨੁਮੋਦਨਮਕਾਸਿ.

੬੨-੩. ਸੋ ਤੇਨ ਪੁਞ੍ਞੇਨ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਉਪ੍ਪਨ੍ਨੁਪ੍ਪਨ੍ਨਭਵੇ ਸਬ੍ਬਤ੍ਥ ਪੂਜਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਸਾਸਨੇ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਦਿਬ੍ਬਚਕ੍ਖੁਨਾ ਅਤ੍ਤਨੋ ਪੁਬ੍ਬਕਮ੍ਮਂ ਦਿਸ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਸਤਰਂਸਿਂਵ ਭਾਣੁਮਨ੍ਤਿ ਸਤਮਤ੍ਤਾ ਸਤਪ੍ਪਮਾਣਾ ਰਂਸਿ ਪਭਾ ਯਸ੍ਸ ਸੂਰਿਯਸ੍ਸ ਸੋ ਸਤਰਂਸਿ, ਗਾਥਾਬਨ੍ਧਸੁਖਤ੍ਥਂ ਸਤਰਂਸੀਤਿ ਵੁਤ੍ਤਂ, ਅਨੇਕਸਤਸ੍ਸ ਅਨੇਕਸਤਸਹਸ੍ਸਰਂਸੀਤਿ ਅਤ੍ਥੋ. ਭਾਣੁ ਵੁਚ੍ਚਤਿ ਪਭਾ, ਭਾਣੁ ਪਭਾ ਯਸ੍ਸ ਸੋ ਭਾਣੁਮਾ, ਭਾਣੁਮਸਙ੍ਖਾਤਂ ਸੂਰਿਯਂ ਇਵ ਵਿਪਸ੍ਸਿਂ ਭਗਵਨ੍ਤਂ ਦਿਸ੍ਵਾ ਸਕੇਸਰਂ ਨਾਗਪੁਪ੍ਫਂ ਗਹੇਤ੍ਵਾ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵਾਤਿ.

ਰੇਣੁਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਏਕਾਦਸਮਵਗ੍ਗਵਣ੍ਣਨਾ ਸਮਤ੍ਤਾ.