੮. ਨਾਗਸਮਾਲਵਗ੍ਗੋ

੧. ਨਾਗਸਮਾਲਤ੍ਥੇਰਅਪਦਾਨਵਣ੍ਣਨਾ

ਆਪਾਟਲਿਂ ਅਹਂ ਪੁਪ੍ਫਨ੍ਤਿਆਦਿਕਂ ਆਯਸ੍ਮਤੋ ਨਾਗਸਮਾਲਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਥਾਰੂਪਸਜ੍ਜਨਸਂਸਗ੍ਗਸ੍ਸ ਅਲਾਭੇਨ ਸਤ੍ਥਰਿ ਧਰਮਾਨਕਾਲੇ ਦਸ੍ਸਨਸਵਨਪੂਜਾਕਮ੍ਮਮਕਰਿਤ੍ਵਾ ਪਰਿਨਿਬ੍ਬੁਤਕਾਲੇ ਤਸ੍ਸ ਭਗਵਤੋ ਸਾਰੀਰਿਕਧਾਤੁਂ ਨਿਦਹਿਤ੍ਵਾ ਕਤਚੇਤਿਯਮ੍ਹਿ ਚਿਤ੍ਤਂ ਪਸਾਦੇਤ੍ਵਾ ਪਾਟਲਿਪੁਪ੍ਫਂ ਪੂਜੇਤ੍ਵਾ ਸੋਮਨਸ੍ਸਂ ਉਪ੍ਪਾਦੇਤ੍ਵਾ ਯਾਵਤਾਯੁਕਂ ਠਤ੍ਵਾ ਤੇਨੇਵ ਸੋਮਨਸ੍ਸੇਨ ਤਤੋ ਕਾਲਂ ਕਤੋ ਤੁਸਿਤਾਦੀਸੁ ਛਸੁ ਦੇਵਲੋਕੇਸੁ ਸੁਖਮਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਨਾਗਰੁਕ੍ਖਪਲ੍ਲਵਕੋਮਲ਼ਸਦਿਸਸਰੀਰਤ੍ਤਾ ਨਾਗਸਮਾਲੋਤਿ ਮਾਤਾਪਿਤੂਹਿ ਕਤਨਾਮਧੇਯ੍ਯੋ ਭਗਵਤਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧. ਸੋ ਪਚ੍ਛਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਆਪਾਟਲਿਂ ਅਹਂ ਪੁਪ੍ਫਨ੍ਤਿਆਦਿਮਾਹ. ਤਤ੍ਥ ਆਪਾਟਲਿਨ੍ਤਿ ਆ ਸਮਨ੍ਤਤੋ, ਆਦਰੇਨ ਵਾ ਪਾਟਲਿਪੁਪ੍ਫਂ ਗਹੇਤ੍ਵਾ ਅਹਂ ਥੂਪਮ੍ਹਿ ਅਭਿਰੋਪੇਸਿਂ ਪੂਜੇਸਿਨ੍ਤਿ ਅਤ੍ਥੋ. ਉਜ੍ਝਿਤਂ ਸੁਮਹਾਪਥੇਤਿ ਸਬ੍ਬਨਗਰਵਾਸੀਨਂ ਵਨ੍ਦਨਪੂਜਨਤ੍ਥਾਯ ਮਹਾਪਥੇ ਨਗਰਮਜ੍ਝੇ ਵੀਥਿਯਂ ਉਜ੍ਝਿਤਂ ਉਟ੍ਠਾਪਿਤਂ, ਇਟ੍ਠਕਕਮ੍ਮਸੁਧਾਕਮ੍ਮਾਦੀਹਿ ਨਿਪ੍ਫਾਦਿਤਨ੍ਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਮੇਵਾਤਿ.

ਨਾਗਸਮਾਲਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਪਦਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਅਕ੍ਕਨ੍ਤਞ੍ਚ ਪਦਂ ਦਿਸ੍ਵਾਤਿਆਦਿਕਂ ਆਯਸ੍ਮਤੋ ਪਦਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਉਪ੍ਪਨ੍ਨੁਪ੍ਪਨ੍ਨਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਸਦ੍ਧਾਸਮ੍ਪਨ੍ਨੇ ਉਪਾਸਕਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਭਗਵਤਾ ਤਸ੍ਸ ਅਨੁਕਮ੍ਪਾਯ ਦਸ੍ਸਿਤਂ ਪਦਚੇਤਿਯਂ ਦਿਸ੍ਵਾ ਪਸਨ੍ਨੋ ਲੋਮਹਟ੍ਠਜਾਤੋ ਵਨ੍ਦਨਪੂਜਨਾਦਿਬਹੁਮਾਨਮਕਾਸਿ. ਸੋ ਤੇਨੇਵ ਸੁਖੇਤ੍ਤੇ ਸੁਕਤੇਨ ਪੁਞ੍ਞੇਨ ਤਤੋ ਚੁਤੋ ਸਗ੍ਗੇ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸੁਖਮਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸੇਸੁ ਜਾਤੋ ਮਨੁਸ੍ਸਸਮ੍ਪਤ੍ਤਿਂ ਸਬ੍ਬਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ, ਪੁਰਾਕਤਪੁਞ੍ਞਨਾਮੇਨ ਪਦਸਞ੍ਞਕਤ੍ਥੇਰੋਤਿ ਪਾਕਟੋ.

੫. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਕ੍ਕਨ੍ਤਞ੍ਚ ਪਦਂ ਦਿਸ੍ਵਾਤਿਆਦਿਮਾਹ. ਤਤ੍ਥ ਅਕ੍ਕਨ੍ਤਨ੍ਤਿ ਅਕ੍ਕਮਿਤਂ ਦਸ੍ਸਿਤਂ. ਸਬ੍ਬਬੁਦ੍ਧਾਨਂ ਸਬ੍ਬਦਾ ਚਤੁਰਙ੍ਗੁਲੋਪਰਿਯੇਵ ਗਮਨਂ, ਅਯਂ ਪਨ ਤਸ੍ਸ ਸਦ੍ਧਾਸਮ੍ਪਨ੍ਨਤਂ ਞਤ੍ਵਾ ‘‘ਏਸੋ ਇਮਂ ਪਸ੍ਸਤੂ’’ਤਿ ਪਦਚੇਤਿਯਂ ਦਸ੍ਸੇਸਿ, ਤਸ੍ਮਾ ਸੋ ਤਸ੍ਮਿਂ ਪਸੀਦਿਤ੍ਵਾ ਵਨ੍ਦਨਪੂਜਨਾਦਿਸਕ੍ਕਾਰਮਕਾਸੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਦਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਬੁਦ੍ਧਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਦੁਮਗ੍ਗੇ ਪਂਸੁਕੂਲਿਕਨ੍ਤਿਆਦਿਕਂ ਆਯਸ੍ਮਤੋ ਬੁਦ੍ਧਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਜਾਤੋ ਦੁਮਗ੍ਗੇ ਲਗ੍ਗਿਤਂ ਭਗਵਤੋ ਪਂਸੁਕੂਲਚੀਵਰਂ ਦਿਸ੍ਵਾ ਪਸਨ੍ਨਮਾਨਸੋ ‘‘ਅਰਹਦ੍ਧਜ’’ਨ੍ਤਿ ਚਿਨ੍ਤੇਤ੍ਵਾ ਵਨ੍ਦਨਪੂਜਨਾਦਿਸਕ੍ਕਾਰਮਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸਸਮ੍ਪਤ੍ਤਿਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੯. ਸੋ ਪਤ੍ਤਅਰਹਤ੍ਤਾਧਿਗਮੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਦੁਮਗ੍ਗੇ ਪਂਸੁਕੂਲਿਕਨ੍ਤਿਆਦਿਮਾਹ. ਤਤ੍ਥ ਧੁਨਾਤਿ ਕਮ੍ਪਤੀਤਿ ਦੁਮੋ. ਦੁਹਤਿ ਪੂਰੇਤਿ ਆਕਾਸਤਲਨ੍ਤਿ ਵਾ ਦੁਮੋ, ਦੁਮਸ੍ਸ ਅਗ੍ਗੋ ਕੋਟੀਤਿ ਦੁਮਗ੍ਗੋ, ਤਸ੍ਮਿਂ ਦੁਮਗ੍ਗੇ. ਪਂਸੁਮਿਵ ਪਟਿਕ੍ਕੂਲਭਾਵਂ ਅਮਨੁਞ੍ਞਭਾਵਂ ਉਲਤਿ ਗਚ੍ਛਤੀਤਿ ਪਂਸੁਕੂਲਂ, ਪਂਸੁਕੂਲਮੇਵ ਪਂਸੁਕੂਲਿਕਂ, ਸਤ੍ਥੁਨੋ ਪਂਸੁਕੂਲਂ ਦੁਮਗ੍ਗੇ ਲਗ੍ਗਿਤਂ ਦਿਸ੍ਵਾ ਅਹਂ ਅਞ੍ਜਲਿਂ ਪਗ੍ਗਹੇਤ੍ਵਾ ਤਂ ਪਂਸੁਕੂਲਂ ਅਵਨ੍ਦਿਂ ਪਣਾਮਮਕਾਸਿਨ੍ਤਿ ਅਤ੍ਥੋ. ਤਨ੍ਤਿ ਨਿਪਾਤਮਤ੍ਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਬੁਦ੍ਧਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਭਿਸਾਲੁਵਦਾਯਕਤ੍ਥੇਰਅਪਦਾਨਵਣ੍ਣਨਾ

ਕਾਨਨਂ ਵਨਮੋਗ੍ਗਯ੍ਹਾਤਿਆਦਿਕਂ ਆਯਸ੍ਮਤੋ ਭਿਸਾਲੁਵਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਹਿਮਵਨ੍ਤਸ੍ਸ ਸਮੀਪੇ ਅਰਞ੍ਞਾਵਾਸੇ ਵਸਨ੍ਤੋ ਵਨਮੂਲਫਲਾਹਾਰੋ ਵਿਵੇਕਵਸੇਨਾਗਤਂ ਵਿਪਸ੍ਸਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਞ੍ਚਭਿਸਾਲੁਵੇ ਅਦਾਸਿ. ਭਗਵਾ ਤਸ੍ਸ ਚਿਤ੍ਤਂ ਪਸਾਦੇਤੁਂ ਪਸ੍ਸਨ੍ਤਸ੍ਸੇਵ ਪਰਿਭੁਞ੍ਜਿ. ਸੋ ਤੇਨ ਚਿਤ੍ਤਪ੍ਪਸਾਦੇਨ ਕਾਲਂ ਕਤ੍ਵਾ ਤੁਸਿਤਾਦੀਸੁ ਸਮ੍ਪਤ੍ਤਿਮਨੁਭਵਿਤ੍ਵਾ ਪਚ੍ਛਾ ਮਨੁਸ੍ਸਸਮ੍ਪਤ੍ਤਿਞ੍ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਭਵਸਮ੍ਪਤ੍ਤਿਂ ਪਤ੍ਤੋ ਤਂ ਪਹਾਯ ਸਾਸਨੇ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧੩. ਸੋ ਤਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕਾਨਨਂ ਵਨਮੋਗ੍ਗਯ੍ਹਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਵਸਾਮਿ ਵਿਪਿਨੇ ਅਹਨ੍ਤਿ ਵਿਵੇਕਵਾਸੋ ਅਹਂ ਵਸਾਮੀਤਿ ਸਮ੍ਬਨ੍ਧੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਭਿਸਾਲੁਵਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਛਟ੍ਠਭਾਣਵਾਰਵਣ੍ਣਨਾ ਨਿਟ੍ਠਿਤਾ.

੫. ਏਕਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਖਣ੍ਡੋ ਨਾਮਾਸਿ ਨਾਮੇਨਾਤਿਆਦਿਕਂ ਆਯਸ੍ਮਤੋ ਏਕਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨਮਾਨਸੋ ਤਸ੍ਸ ਸਤ੍ਥੁਨੋ ਖਣ੍ਡਂ ਨਾਮ ਅਗ੍ਗਸਾਵਕਂ ਭਿਕ੍ਖਾਯ ਚਰਮਾਨਂ ਦਿਸ੍ਵਾ ਸਦ੍ਦਹਿਤ੍ਵਾ ਪਿਣ੍ਡਪਾਤਮਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਸੋ ਏਕਦਿਵਸਂ ਪਿਣ੍ਡਪਾਤਸ੍ਸ ਸਞ੍ਞਂ ਮਨਸਿਕਰਿਤ੍ਵਾ ਪਟਿਲਦ੍ਧਵਿਸੇਸਤ੍ਤਾ ਏਕਸਞ੍ਞਕਤ੍ਥੇਰੋਤਿ ਪਾਕਟੋ.

੧੮. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਖਣ੍ਡੋ ਨਾਮਾਸਿ ਨਾਮੇਨਾਤਿਆਦਿਮਾਹ. ਤਤ੍ਥ ਤਸ੍ਸ ਅਗ੍ਗਸਾਵਕਤ੍ਥੇਰਸ੍ਸ ਕਿਲੇਸਾਨਂ ਖਣ੍ਡਿਤਤ੍ਤਾ ਖਣ੍ਡੋਤਿ ਨਾਮਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਏਕਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਤਿਣਸਨ੍ਥਰਦਾਯਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਤਿਣਸਨ੍ਥਰਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਬੁਦ੍ਧੁਪ੍ਪਾਦਤੋ ਪਗੇਵ ਉਪ੍ਪਨ੍ਨਤ੍ਤਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਸ੍ਸ ਅਵਿਦੂਰੇ ਏਕਂ ਸਰਂ ਨਿਸ੍ਸਾਯ ਪਟਿਵਸਤਿ. ਤਸ੍ਮਿਂ ਸਮਯੇ ਤਿਸ੍ਸੋ ਭਗਵਾ ਤਸ੍ਸਾਨੁਕਮ੍ਪਾਯ ਆਕਾਸੇਨ ਅਗਮਾਸਿ. ਅਥ ਖੋ ਸੋ ਤਾਪਸੋ ਆਕਾਸਤੋ ਓਰੁਯ੍ਹ ਠਿਤਂ ਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਤਿਣਂ ਲਾਯਿਤ੍ਵਾ ਤਿਣਸਨ੍ਥਰਂ ਕਤ੍ਵਾ ਨਿਸੀਦਾਪੇਤ੍ਵਾ ਬਹੁਮਾਨਾਦਰੇਨ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਪਟਿਕੁਟਿਕੋ ਹੁਤ੍ਵਾ ਪਕ੍ਕਾਮਿ. ਸੋ ਯਾਵਤਾਯੁਕਂ ਠਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਨੇਕਵਿਧਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੨. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਮਹਾਜਾਤਸ੍ਸਰੋਤਿ ਏਤ੍ਥ ਪਨ ਸਰਨ੍ਤਿ ਏਤ੍ਥ ਪਾਨੀਯਤ੍ਥਿਕਾ ਦ੍ਵਿਪਦਚਤੁਪ੍ਪਦਾਦਯੋ ਸਤ੍ਤਾਤਿ ਸਰਂ, ਅਥ ਵਾ ਸਰਨ੍ਤਿ ਏਤ੍ਥ ਨਦੀਕਨ੍ਦਰਾਦਯੋਤਿ ਸਰਂ, ਮਹਨ੍ਤੋ ਚ ਸੋ ਸਯਮੇਵ ਜਾਤਤ੍ਤਾ ਸਰੋ ਚੇਤਿ ਮਹਾਜਾਤਸ੍ਸਰੋ. ਅਨੋਤਤ੍ਤਛਦ੍ਦਨ੍ਤਦਹਾਦਯੋ ਵਿਯ ਅਪਾਕਟਨਾਮਤ੍ਤਾ ‘‘ਮਹਾਜਾਤਸ੍ਸਰੋ’’ਤਿ ਵੁਤ੍ਤੋਤਿ ਦਟ੍ਠਬ੍ਬੋ. ਸਤਪਤ੍ਤੇਹਿ ਸਞ੍ਛਨ੍ਨੋਤਿ ਏਕੇਕਸ੍ਮਿਂ ਪੁਪ੍ਫੇ ਸਤਸਤਪਤ੍ਤਾਨਂ ਵਸੇਨ ਸਤਪਤ੍ਤੋ, ਸਤਪਤ੍ਤਸੇਤਪਦੁਮੇਹਿ ਸਞ੍ਛਨ੍ਨੋ ਗਹਨੀਭੂਤੋਤਿ ਅਤ੍ਥੋ. ਨਾਨਾਸਕੁਣਮਾਲਯੋਤਿ ਅਨੇਕੇ ਹਂਸਕੁਕ੍ਕੁਟਕੁਕ੍ਕੁਹਦੇਣ੍ਡਿਭਾਦਯੋ ਏਕਤੋ ਕੁਣਨ੍ਤਿ ਸਦ੍ਦਂ ਕਰੋਨ੍ਤੀਤਿ ਸਕੁਣਾਤਿ ਲਦ੍ਧਨਾਮਾਨਂ ਪਕ੍ਖੀਨਂ ਆਲਯੋ ਆਧਾਰਭੂਤੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਤਿਣਸਨ੍ਥਰਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਸੂਚਿਦਾਯਕਤ੍ਥੇਰਅਪਦਾਨਵਣ੍ਣਨਾ

ਤਿਂਸਕਪ੍ਪਸਹਸ੍ਸਮ੍ਹੀਤਿਆਦਿਕਂ ਆਯਸ੍ਮਤੋ ਸੂਚਿਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਭਗਵਤੋ ਚੀਵਰਕਮ੍ਮਂ ਕਾਤੁਂ ਪਞ੍ਚ ਸੂਚਿਯੋ ਅਦਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਪੁਞ੍ਞਮਨੁਭਵਿਤ੍ਵਾ ਵਿਚਰਨ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਤਿਕ੍ਖਪਞ੍ਞੋ ਹੁਤ੍ਵਾ ਪਾਕਟੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਨ੍ਤੋ ਤਿਕ੍ਖਪਞ੍ਞਤਾਯ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ.

੩੦. ਸੋ ਅਪਰਭਾਗੇ ਪੁਞ੍ਞਂ ਪਚ੍ਚਵੇਕ੍ਖਨ੍ਤੋ ਤਂ ਦਿਸ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਤਿਂਸਕਪ੍ਪਸਹਸ੍ਸਮ੍ਹੀਤਿਆਦਿਮਾਹ. ਅਨ੍ਤਰਨ੍ਤਰਂ ਪਨੇਤ੍ਥ ਸੁਵਿਞ੍ਞੇਯ੍ਯਮੇਵ.

੩੧. ਪਞ੍ਚਸੂਚੀ ਮਯਾ ਦਿਨ੍ਨਾਤਿ ਏਤ੍ਥ ਸੂਚਤਿ ਛਿਦ੍ਦਂ ਕਰੋਤਿ ਵਿਜ੍ਝਤੀਤਿ ਸੂਚਿ, ਪਞ੍ਚਮਤ੍ਤਾ ਸੂਚੀ ਪਞ੍ਚਸੂਚੀ ਮਯਾ ਦਿਨ੍ਨਾਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਸੂਚਿਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਪਾਟਲਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਪਾਟਲਿਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਸੇਟ੍ਠਿਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਕੁਸਲਾਕੁਸਲਞ੍ਞੂ ਸਤ੍ਥਰਿ ਪਸੀਦਿਤ੍ਵਾ ਪਾਟਲਿਪੁਪ੍ਫਂ ਗਹੇਤ੍ਵਾ ਸਤ੍ਥੁ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਬਹੁਧਾ ਸੁਖਸਮ੍ਪਤ੍ਤਿਯੋ ਅਨੁਭਵਨ੍ਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੬. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਨ੍ਤਿਆਦਿਮਾਹ. ਤਤ੍ਥ ਅਨ੍ਤਰਾਪਣੇਤਿ ਆ ਸਮਨ੍ਤਤੋ ਹਿਰਞ੍ਞਸੁਵਣ੍ਣਾਦਿਕਂ ਭਣ੍ਡਂ ਪਣੇਨ੍ਤਿ ਵਿਕ੍ਕਿਣਨ੍ਤਿ ਪਤ੍ਥਰਨ੍ਤਿ ਏਤ੍ਥਾਤਿ ਆਪਣਂ, ਆਪਣਸ੍ਸ ਅਨ੍ਤਰਂ ਵੀਥੀਤਿ ਅਨ੍ਤਰਾਪਣਂ, ਤਸ੍ਮਿਂ ਅਨ੍ਤਰਾਪਣੇ. ਸੁਵਣ੍ਣਵਣ੍ਣਂ ਕਞ੍ਚਨਗ੍ਘਿਯਸਂਕਾਸਂ ਦ੍ਵਤ੍ਤਿਂਸਵਰਲਕ੍ਖਣਂ ਸਮ੍ਬੁਦ੍ਧਂ ਦਿਸ੍ਵਾ ਪਾਟਲਿਪੁਪ੍ਫਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਾਟਲਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਠਿਤਞ੍ਜਲਿਯਤ੍ਥੇਰਅਪਦਾਨਵਣ੍ਣਨਾ

ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਠਿਤਞ੍ਜਲਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥੁਪ੍ਪਨ੍ਨਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਪੁਰਾਕਤੇਨ ਏਕੇਨ ਕਮ੍ਮਚ੍ਛਿਦ੍ਦੇਨ ਨੇਸਾਦਯੋਨਿਯਂ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਮਿਗਸੂਕਰਾਦਯੋ ਮਾਰੇਤ੍ਵਾ ਨੇਸਾਦਕਮ੍ਮੇਨ ਅਰਞ੍ਞੇ ਵਾਸਂ ਕਪ੍ਪੇਸਿ. ਤਸ੍ਮਿਂ ਸਮਯੇ ਤਿਸ੍ਸੋ ਭਗਵਾ ਤਸ੍ਸਾਨੁਕਮ੍ਪਾਯ ਹਿਮਵਨ੍ਤਂ ਅਗਮਾਸਿ. ਸੋ ਤਂ ਦ੍ਵਤ੍ਤਿਂਸਵਰਲਕ੍ਖਣੇਹਿ ਅਸੀਤਾਨੁਬ੍ਯਞ੍ਜਨਬ੍ਯਾਮਪ੍ਪਭਾਹਿ ਚ ਜਲਮਾਨਂ ਭਗਵਨ੍ਤਂ ਦਿਸ੍ਵਾ ਸੋਮਨਸ੍ਸਜਾਤੋ ਪਣਾਮਂ ਕਤ੍ਵਾ ਗਨ੍ਤ੍ਵਾ ਪਣ੍ਣਸਨ੍ਥਰੇ ਨਿਸੀਦਿ. ਤਸ੍ਮਿਂ ਖਣੇ ਦੇਵੋ ਗਜ੍ਜਨ੍ਤੋ ਅਸਨਿ ਪਤਿ, ਤਤੋ ਮਰਣਸਮਯੇ ਬੁਦ੍ਧਮਨੁਸ੍ਸਰਿਤ੍ਵਾ ਪੁਨਞ੍ਜਲਿਮਕਾਸਿ. ਸੋ ਤੇਨ ਪੁਞ੍ਞੇਨ ਸੁਖੇਤ੍ਤੇ ਕਤਕੁਸਲਤ੍ਤਾ ਅਕੁਸਲਵਿਪਾਕਂ ਪਟਿਬਾਹਿਤ੍ਵਾ ਸਗ੍ਗੇ ਨਿਬ੍ਬਤ੍ਤੋ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਰਾਕਤਵਾਸਨਾਯ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੨. ਸੋ ਤਤੋ ਪਰਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਮਿਗਲੁਦ੍ਦੋਤਿ ਮਿਗਾਨਂ ਮਾਰਣਂ ਉਪਗਚ੍ਛਤੀਤਿ ਮਿਗਲੁਦ੍ਦੋ. ਮਿਗਨ੍ਤਿ ਸੀਘਂ ਵਾਤਵੇਗੇਨ ਗਚ੍ਛਨ੍ਤਿ ਧਾਵਨ੍ਤੀਤਿ ਮਿਗਾ, ਤੇਸਂ ਮਿਗਾਨਂ ਮਾਰਣੇ ਲੁਦ੍ਦੋ ਦਾਰੁਣੋ ਲੋਭੀਤਿ ਮਿਗਲੁਦ੍ਦੋ. ਸੋ ਅਹਂ ਪੁਰੇ ਭਗਵਤੋ ਦਸ੍ਸਨਸਮਯੇ ਮਿਗਲੁਦ੍ਦੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਅਰਞ੍ਞੇ ਕਾਨਨੇਤਿ ਅਰਤਿ ਗਚ੍ਛਤਿ ਮਿਗਸਮੂਹੋ ਏਤ੍ਥਾਤਿ ਅਰਞ੍ਞਂ, ਅਥ ਵਾ ਆ ਸਮਨ੍ਤਤੋ ਰਜ੍ਜਨ੍ਤਿ ਤਤ੍ਥ ਵਿਵੇਕਾਭਿਰਤਾ ਬੁਦ੍ਧਪਚ੍ਚੇਕਬੁਦ੍ਧਾਦਯੋ ਮਹਾਸਾਰਪ੍ਪਤ੍ਤਾ ਸਪ੍ਪੁਰਿਸਾਤਿ ਅਰਞ੍ਞਂ. ਕਾ ਕੁਚ੍ਛਿਤਾਕਾਰੇਨ ਵਾ ਭਯਾਨਕਾਕਾਰੇਨ ਵਾ ਨਦਨ੍ਤਿ ਸਦ੍ਦਂ ਕਰੋਨ੍ਤਿ, ਆਨਨ੍ਤਿ ਵਿਨ੍ਦਨ੍ਤੀਤਿ ਵਾ ਕਾਨਨਂ, ਤਸ੍ਮਿਂ ਅਰਞ੍ਞੇ ਕਾਨਨੇ ਮਿਗਲੁਦ੍ਦੋ ਪੁਰੇ ਆਸਿਨ੍ਤਿ ਸਮ੍ਬਨ੍ਧੋ. ਤਤ੍ਥ ਅਦ੍ਦਸਂ ਸਮ੍ਬੁਦ੍ਧਨ੍ਤਿ ਤਤ੍ਥ ਤਸ੍ਮਿਂ ਅਰਞ੍ਞੇ ਉਪਗਤਂ ਸਮ੍ਬੁਦ੍ਧਂ ਅਦ੍ਦਸਂ ਅਦ੍ਦਕ੍ਖਿਨ੍ਤਿ ਅਤ੍ਥੋ. ਦਸ੍ਸਨਂ ਪੁਰੇ ਅਹੋਸਿ ਅਵਿਦੂਰੇ, ਤਸ੍ਮਾ ਮਨੋਦ੍ਵਾਰਾਨੁਸਾਰੇਨ ਚਕ੍ਖੁਵਿਞ੍ਞਾਣਂ ਪੁਰੇਚਾਰਿਕਂ ਕਾਯਵਿਞ੍ਞਾਣਸਮਙ੍ਗਿਂ ਪਾਪੇਤਿ ਅਪ੍ਪੇਤੀਤਿ ਅਤ੍ਥੋ.

੪੪. ਤਤੋ ਮੇ ਅਸਨੀਪਾਤੋਤਿ ਆ ਸਮਨ੍ਤਤੋ ਸਨਨ੍ਤੋ ਗਜ੍ਜਨ੍ਤੋ ਪਤਤੀਤਿ ਅਸਨਿ, ਅਸਨਿਯਾ ਪਾਤੋ ਪਤਨਂ ਅਸਨੀਪਾਤੋ, ਦੇਵਦਣ੍ਡੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਠਿਤਞ੍ਜਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਤਿਪਦੁਮਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਤਿਪਦੁਮਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤਿਯਂ ਮਾਲਾਕਾਰਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਮਾਲਾਕਾਰਕਮ੍ਮਂ ਕਤ੍ਵਾ ਵਸਨ੍ਤੋ ਏਕਦਿਵਸਂ ਅਨੇਕਵਿਧਾਨਿ ਜਲਜਥਲਜਪੁਪ੍ਫਾਨਿ ਗਹੇਤ੍ਵਾ ਰਞ੍ਞੋ ਸਨ੍ਤਿਕਂ ਗਨ੍ਤੁਕਾਮੋ ਏਵਂ ਚਿਨ੍ਤੇਸਿ – ‘‘ਰਾਜਾ ਇਮਾਨਿ ਤਾਵ ਪੁਪ੍ਫਾਨਿ ਦਿਸ੍ਵਾ ਪਸਨ੍ਨੋ ਸਹਸ੍ਸਂ ਵਾ ਧਨਂ ਗਾਮਾਦਿਕਂ ਵਾ ਦਦੇਯ੍ਯ, ਲੋਕਨਾਥਂ ਪਨ ਪੂਜੇਤ੍ਵਾ ਨਿਬ੍ਬਾਨਾਮਤਧਨਂ ਲਭਾਮਿ, ਕਿਂ ਮੇ ਏਤੇਸੁ ਸੁਨ੍ਦਰ’’ਨ੍ਤਿ ਤੇਨ ‘‘ਭਗਵਨ੍ਤਂ ਪੂਜੇਤ੍ਵਾ ਸਗ੍ਗਮੋਕ੍ਖਸਮ੍ਪਤ੍ਤਿਯੋ ਨਿਪ੍ਫਾਦੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਵਣ੍ਣਵਨ੍ਤਂ ਅਤੀਵ ਰਤ੍ਤਪੁਪ੍ਫਤ੍ਤਯਂ ਗਹੇਤ੍ਵਾ ਪੂਜੇਸਿ. ਤਾਨਿ ਗਨ੍ਤ੍ਵਾ ਆਕਾਸਂ ਛਾਦੇਤ੍ਵਾ ਪਤ੍ਥਰਿਤ੍ਵਾ ਅਟ੍ਠਂਸੁ. ਨਗਰਵਾਸਿਨੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ਚੇਲੁਕ੍ਖੇਪਸਹਸ੍ਸਾਨਿ ਪਵਤ੍ਤਯਿਂਸੁ. ਤਂ ਦਿਸ੍ਵਾ ਭਗਵਾ ਅਨੁਮੋਦਨਂ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੮. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਸਬ੍ਬਧਮ੍ਮਾਨ ਪਾਰਗੂਤਿ ਸਬ੍ਬੇਸਂ ਨਵਲੋਕੁਤ੍ਤਰਧਮ੍ਮਾਨਂ ਪਾਰਂ ਨਿਬ੍ਬਾਨਂ ਗਤੋ ਪਚ੍ਚਕ੍ਖਂ ਕਤੋਤਿ ਅਤ੍ਥੋ. ਦਨ੍ਤੋ ਦਨ੍ਤਪਰਿਵੁਤੋਤਿ ਸਯਂ ਕਾਯਵਾਚਾਦੀਹਿ ਦਨ੍ਤੋ ਏਤਦਗ੍ਗੇ ਠਪਿਤੇਹਿ ਸਾਵਕੇਹਿ ਪਰਿਵੁਤੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਸਮ੍ਬਨ੍ਧਵਸੇਨ ਉਤ੍ਤਾਨਤ੍ਥਮੇਵਾਤਿ.

ਤਿਪਦੁਮਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਅਟ੍ਠਮਵਗ੍ਗਵਣ੍ਣਨਾ ਸਮਤ੍ਤਾ.