੭. ਸਕਚਿਨ੍ਤਨਿਯਵਗ੍ਗੋ

੧. ਸਕਚਿਨ੍ਤਨਿਯਤ੍ਥੇਰਅਪਦਾਨਵਣ੍ਣਨਾ

ਪਵਨਂ ਕਾਨਨਂ ਦਿਸ੍ਵਾਤਿਆਦਿਕਂ ਆਯਸ੍ਮਤੋ ਸਕਚਿਨ੍ਤਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਤਸ੍ਸ ਭਗਵਤੋ ਆਯੁਪਰਿਯੋਸਾਨੇ ਉਪ੍ਪਨ੍ਨੋ ਧਰਮਾਨਂ ਭਗਵਨ੍ਤਂ ਅਪਾਪੁਣਿਤ੍ਵਾ ਪਰਿਨਿਬ੍ਬੁਤਕਾਲੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਵਿਵੇਕਂ ਰਮਣੀਯਂ ਏਕਂ ਵਨਂ ਪਤ੍ਵਾ ਤਤ੍ਥੇਵੇਕਾਯ ਕਨ੍ਦਰਾਯ ਪੁਲਿਨਚੇਤਿਯਂ ਕਤ੍ਵਾ ਭਗਵਤਿ ਸਞ੍ਞਂ ਕਤ੍ਵਾ ਸਧਾਤੁਕਸਞ੍ਞਞ੍ਚ ਕਤ੍ਵਾ ਵਨਪੁਪ੍ਫੇਹਿ ਪੂਜੇਤ੍ਵਾ ਨਮਸ੍ਸਮਾਨੋ ਪਰਿਚਰਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਦ੍ਵੀਸੁ ਅਗ੍ਗਂ ਅਗ੍ਗਸਮ੍ਪਤ੍ਤਿਂ ਅਗ੍ਗਞ੍ਚ ਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਭਵਸਮ੍ਪਨ੍ਨੋ ਸਦ੍ਧਾਸਮ੍ਪਨ੍ਨੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਅਰਹਾ ਛਲ਼ਭਿਞ੍ਞੋ ਅਹੋਸਿ.

੧. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਵਨਂ ਕਾਨਨਂ ਦਿਸ੍ਵਾਤਿਆਦਿਮਾਹ. ਤਤ੍ਥ ਪਵਨਨ੍ਤਿ ਪਕਾਰੇਨ ਵਨਂ ਪਤ੍ਥਟਂ ਵਿਤ੍ਥਿਣ੍ਣਂ ਗਹਨਭੂਤਨ੍ਤਿ ਪਵਨਂ. ਕਾਨਨਂ ਅਵਕੁਚ੍ਛਿਤਂ ਆਨਨਂ ਅਵਹਨਂ ਸਤਤਂ ਸੀਹਬ੍ਯਗ੍ਘਯਕ੍ਖਰਕ੍ਖਸਮਦ੍ਦਹਤ੍ਥਿਅਸ੍ਸਸੁਪਣ੍ਣਉਰਗੇਹਿ ਵਿਹਙ੍ਗਗਣਸਦ੍ਦਕੁਕ੍ਕੁਟਕੋਕਿਲੇਹਿ ਵਾ ਬਹਲਨ੍ਤਿ ਕਾਨਨਂ, ਤਂ ਕਾਨਨਸਙ੍ਖਾਤਂ ਪਵਨਂ ਮਨੁਸ੍ਸਸਦ੍ਦਵਿਰਹਿਤਤ੍ਤਾ ਅਪ੍ਪਸਦ੍ਦਂ ਨਿਸ੍ਸਦ੍ਦਨ੍ਤਿ ਅਤ੍ਥੋ. ਅਨਾਵਿਲਨ੍ਤਿ ਨ ਆਵਿਲਂ ਉਪਦ੍ਦਵਰਹਿਤਨ੍ਤਿ ਅਤ੍ਥੋ. ਇਸੀਨਂ ਅਨੁਚਿਣ੍ਣਨ੍ਤਿ ਬੁਦ੍ਧਪਚ੍ਚੇਕਬੁਦ੍ਧਅਰਹਨ੍ਤਖੀਣਾਸਵਸਙ੍ਖਾਤਾਨਂ ਇਸੀਨਂ ਅਨੁਚਿਣ੍ਣਂ ਨਿਸੇਵਿਤਨ੍ਤਿ ਅਤ੍ਥੋ. ਆਹੁਤੀਨਂ ਪਟਿਗ੍ਗਹਨ੍ਤਿ ਆਹੁਨਂ ਵੁਚ੍ਚਤਿ ਪੂਜਾਸਕ੍ਕਾਰਂ ਪਟਿਗ੍ਗਹਂ ਗੇਹਸਦਿਸਨ੍ਤਿ ਅਤ੍ਥੋ.

੨. ਥੂਪਂ ਕਤ੍ਵਾਨ ਵੇਲ਼ੁਨਾਤਿ ਵੇਲ਼ੁਪੇਸਿਕਾਹਿ ਚੇਤਿਯਂ ਕਤ੍ਵਾਤਿ ਅਤ੍ਥੋ. ਨਾਨਾਪੁਪ੍ਫਂ ਸਮੋਕਿਰਿਨ੍ਤਿ ਚਮ੍ਪਕਾਦੀਹਿ ਅਨੇਕੇਹਿ ਪੁਪ੍ਫੇਹਿ ਸਮੋਕਿਰਿਂ ਪੂਜੇਸਿਨ੍ਤਿ ਅਤ੍ਥੋ. ਸਮ੍ਮੁਖਾ ਵਿਯ ਸਮ੍ਬੁਦ੍ਧਨ੍ਤਿ ਸਜੀਵਮਾਨਸ੍ਸ ਸਮ੍ਬੁਦ੍ਧਸ੍ਸ ਸਮ੍ਮੁਖਾ ਇਵ ਨਿਮ੍ਮਿਤਂ ਉਪ੍ਪਾਦਿਤਂ ਚੇਤਿਯਂ ਅਹਂ ਅਭਿ ਵਿਸੇਸੇਨ ਵਨ੍ਦਿਂ ਪਣਾਮਮਕਾਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਸਕਚਿਨ੍ਤਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਅਵੋਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਵਿਹਾਰਾ ਅਭਿਨਿਕ੍ਖਮ੍ਮਾਤਿਆਦਿਕਂ ਆਯਸ੍ਮਤੋ ਅਵੋਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਸਮ੍ਪਨ੍ਨੋ ਧਮ੍ਮਂ ਸੁਤ੍ਵਾ ਸੋਮਨਸ੍ਸਪ੍ਪਤ੍ਤੋ ਨਾਨਾਪੁਪ੍ਫਾਨਿ ਉਭੋਹਿ ਹਤ੍ਥੇਹਿ ਗਹੇਤ੍ਵਾ ਬੁਦ੍ਧਸ੍ਸ ਉਪਰਿ ਅਬ੍ਭੁਕ੍ਕਿਰਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਗ੍ਗਸਮ੍ਪਤ੍ਤਿਞ੍ਚ ਚਕ੍ਕਵਤ੍ਤਿਸਮ੍ਪਤ੍ਤਿਞ੍ਚ ਅਨੁਭਵਿਤ੍ਵਾ ਸਬ੍ਬਤ੍ਥ ਪੂਜਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤੋ ਵੁਦ੍ਧਿਪ੍ਪਤ੍ਤੋ ਸਾਸਨੇ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਆ ਸਮਨ੍ਤਤੋ ਕਾਸਤਿ ਦਿਪ੍ਪਤੀਤਿ ਆਕਾਸੋ, ਤਸ੍ਮਿਂ ਆਕਾਸੇ ਪੁਪ੍ਫਾਨਂ ਅਵਕਿਰਿਤਤ੍ਤਾ ਅਵੋਪੁਪ੍ਫਿਯਤ੍ਥੇਰੋਤਿ ਪਾਕਟੋ.

੭. ਏਵਂ ਪਤ੍ਤਸਨ੍ਤਿਪਦੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਹਾਰਾ ਅਭਿਨਿਕ੍ਖਮ੍ਮਾਤਿਆਦਿਮਾਹ. ਤਤ੍ਥ ਵਿਹਾਰਾਤਿ ਵਿਸੇਸੇਨ ਹਰਤਿ ਚਤੂਹਿ ਇਰਿਯਾਪਥੇਹਿ ਅਪਤਨ੍ਤਂ ਅਤ੍ਤਭਾਵਂ ਆਹਰਤਿ ਪਵਤ੍ਤੇਤਿ ਏਤ੍ਥਾਤਿ ਵਿਹਾਰੋ, ਤਸ੍ਮਾ ਵਿਹਾਰਾ ਅਭਿ ਵਿਸੇਸੇਨ ਨਿਕ੍ਖਮ੍ਮ ਨਿਕ੍ਖਮਿਤ੍ਵਾ. ਅਬ੍ਭੁਟ੍ਠਾਸਿ ਚ ਚਙ੍ਕਮੇਤਿ ਚਙ੍ਕਮਨਤ੍ਥਾਯ ਸਟ੍ਠਿਰਤਨੇ ਚਙ੍ਕਮੇ ਅਭਿਵਿਸੇਸੇਨ ਉਟ੍ਠਾਸਿ, ਅਭਿਰੁਹੀਤਿ ਅਤ੍ਥੋ. ਚਤੁਸਚ੍ਚਂ ਪਕਾਸੇਨ੍ਤੋਤਿ ਤਸ੍ਮਿਂ ਚਙ੍ਕਮੇ ਚਙ੍ਕਮਨ੍ਤੋ ਦੁਕ੍ਖਸਮੁਦਯਨਿਰੋਧਮਗ੍ਗਸਚ੍ਚਸਙ੍ਖਾਤਂ ਚਤੁਸਚ੍ਚਂ ਪਕਾਸੇਨ੍ਤੋ ਪਾਕਟਂ ਕਰੋਨ੍ਤੋ ਅਮਤਂ ਪਦਂ ਨਿਬ੍ਬਾਨਂ ਦੇਸੇਨ੍ਤੋ ਵਿਭਜਨ੍ਤੋ ਉਤ੍ਤਾਨੀਕਰੋਨ੍ਤੋ ਤਸ੍ਮਿਂ ਚਙ੍ਕਮੇਤਿ ਸਮ੍ਬਨ੍ਧੋ.

੮. ਸਿਖਿਸ੍ਸ ਗਿਰਮਞ੍ਞਾਯ, ਬੁਦ੍ਧਸੇਟ੍ਠਸ੍ਸ ਤਾਦਿਨੋਤਿ ਸੇਟ੍ਠਸ੍ਸ ਤਾਦਿਗੁਣਸਮਙ੍ਗਿਸ੍ਸ ਸਿਖਿਸ੍ਸ ਬੁਦ੍ਧਸ੍ਸ ਗਿਰਂ ਸਦ੍ਦਂ ਘੋਸਂ ਅਞ੍ਞਾਯ ਜਾਨਿਤ੍ਵਾ. ਨਾਨਾਪੁਪ੍ਫਂ ਗਹੇਤ੍ਵਾਨਾਤਿ ਨਾਗਪੁਨ੍ਨਾਗਾਦਿਅਨੇਕਾਨਿ ਪੁਪ੍ਫਾਨਿ ਗਹੇਤ੍ਵਾ ਆਹਰਿਤ੍ਵਾ. ਆਕਾਸਮ੍ਹਿ ਸਮੋਕਿਰਿਨ੍ਤਿ ਚਙ੍ਕਮਨ੍ਤਸ੍ਸ ਭਗਵਤੋ ਮੁਦ੍ਧਨਿ ਆਕਾਸੇ ਓਕਿਰਿਂ ਪੂਜੇਸਿਂ.

੯. ਤੇਨ ਕਮ੍ਮੇਨ ਦ੍ਵਿਪਦਿਨ੍ਦਾਤਿ ਦ੍ਵਿਪਦਾਨਂ ਦੇਵਬ੍ਰਹ੍ਮਮਨੁਸ੍ਸਾਨਂ ਇਨ੍ਦ ਪਧਾਨਭੂਤ. ਨਰਾਸਭ ਨਰਾਨਂ ਆਸਭਭੂਤ. ਪਤ੍ਤੋਮ੍ਹਿ ਅਚਲਂ ਠਾਨਨ੍ਤਿ ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਜਿਤ੍ਵਾ ਅਚਲਂ ਠਾਨਂ ਨਿਬ੍ਬਾਨਂ ਪਤ੍ਤੋ ਅਮ੍ਹਿ ਭਵਾਮਿ. ਹਿਤ੍ਵਾ ਜਯਪਰਾਜਯਨ੍ਤਿ ਦਿਬ੍ਬਮਨੁਸ੍ਸਸਮ੍ਪਤ੍ਤਿਸਙ੍ਖਾਤਂ ਜਯਞ੍ਚ ਚਤੁਰਾਪਾਯਦੁਕ੍ਖਸਙ੍ਖਾਤਂ ਪਰਾਜਯਞ੍ਚ ਹਿਤ੍ਵਾ ਛਡ੍ਡੇਤ੍ਵਾ ਨਿਬ੍ਬਾਨਂ ਪਤ੍ਤੋਸ੍ਮੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਅਵੋਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤੋ.

੩. ਪਚ੍ਚਾਗਮਨਿਯਤ੍ਥੇਰਅਪਦਾਨਵਣ੍ਣਨਾ

ਸਿਨ੍ਧੁਯਾ ਨਦਿਯਾ ਤੀਰੇਤਿਆਦਿਕਂ ਆਯਸ੍ਮਤੋ ਪਚ੍ਚਾਗਮਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਸਿਨ੍ਧੁਯਾ ਗਙ੍ਗਾਯ ਸਮੀਪੇ ਚਕ੍ਕਵਾਕਯੋਨਿਯਂ ਨਿਬ੍ਬਤ੍ਤੋ ਪੁਬ੍ਬਸਮ੍ਭਾਰਯੁਤ੍ਤਤ੍ਤਾ ਪਾਣਿਨੋ ਅਖਾਦਨ੍ਤੋ ਸੇਵਾਲਮੇਵ ਭਕ੍ਖਯਨ੍ਤੋ ਚਰਤਿ. ਤਸ੍ਮਿਂ ਸਮਯੇ ਵਿਪਸ੍ਸਿਭਗਵਾ ਸਤ੍ਤਾਨੁਗ੍ਗਹਂ ਕਰੋਨ੍ਤੋ ਤਤ੍ਥ ਅਗਮਾਸਿ. ਤਸ੍ਮਿਂ ਖਣੇ ਸੋ ਚਕ੍ਕਵਾਕੋ ਵਿਜ੍ਜੋਤਮਾਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਤੁਣ੍ਡੇਨ ਸਾਲਰੁਕ੍ਖਤੋ ਸਾਲਪੁਪ੍ਫਂ ਛਿਨ੍ਦਿਤ੍ਵਾ ਆਗਮ੍ਮ ਪੂਜੇਸਿ. ਸੋ ਤੇਨੇਵ ਚਿਤ੍ਤਪ੍ਪਸਾਦੇਨ ਤਤੋ ਚੁਤੋ ਦੇਵਲੋਕੇ ਉਪ੍ਪਨ੍ਨੋ ਅਪਰਾਪਰਂ ਛਕਾਮਾਵਚਰਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਉਪ੍ਪਜ੍ਜਿਤ੍ਵਾ ਚਕ੍ਕਵਤ੍ਤਿਸਮ੍ਪਤ੍ਤਿਆਦਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਪੁਬ੍ਬਚਰਿਤਵਸੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ, ਚਕ੍ਕਵਾਕੋ ਹੁਤ੍ਵਾ ਭਗਵਨ੍ਤਂ ਦਿਸ੍ਵਾ ਕਤ੍ਥਚਿ ਗਨ੍ਤ੍ਵਾ ਪੁਪ੍ਫਮਾਹਰਿਤ੍ਵਾ ਪੂਜਿਤਤ੍ਤਾ ਪੁਬ੍ਬਪੁਞ੍ਞਨਾਮੇਨ ਪਚ੍ਚਾਗਮਨਿਯਤ੍ਥੇਰੋਤਿ ਪਾਕਟੋ.

੧੩. ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਨ੍ਧੁਯਾ ਨਦਿਯਾ ਤੀਰੇਤਿਆਦਿਮਾਹ. ਸੀਤਿ ਸਦ੍ਦਂ ਕੁਰੁਮਾਨਾ ਧੁਨਾਤਿ ਕਮ੍ਪਤੀਤਿ ਸਿਨ੍ਧੁ, ਨਦਤਿ ਸਦ੍ਦਂ ਕਰੋਨ੍ਤੋ ਗਚ੍ਛਤੀਤਿ ਨਦਿ. ਚਕ੍ਕਵਾਕੋ ਅਹਂ ਤਦਾਤਿ ਚਕ੍ਕਂ ਸੀਘਂ ਗਚ੍ਛਨ੍ਤਂ ਇਵ ਉਦਕੇ ਵਾ ਥਲੇ ਵਾ ਆਕਾਸੇ ਵਾ ਸੀਘਂ ਵਾਤਿ ਗਚ੍ਛਤੀਤਿ ਚਕ੍ਕਵਾਕੋ. ਤਦਾ ਵਿਪਸ੍ਸਿਂ ਭਗਵਨ੍ਤਂ ਦਸ੍ਸਨਕਾਲੇ ਅਹਂ ਚਕ੍ਕਵਾਕੋ ਅਹੋਸਿਨ੍ਤਿ ਅਤ੍ਥੋ. ਸੁਦ੍ਧਸੇਵਾਲਭਕ੍ਖੋਹਨ੍ਤਿ ਅਞ੍ਞਗੋਚਰਅਮਿਸ੍ਸਤ੍ਤਾ ਸੁਦ੍ਧਸੇਵਾਲਮੇਵ ਖਾਦਨ੍ਤੋ ਅਹਂ ਵਸਾਮਿ. ਪਾਪੇਸੁ ਚ ਸੁਸਞ੍ਞਤੋਤਿ ਪੁਬ੍ਬਵਾਸਨਾਵਸੇਨ ਪਾਪਕਰਣੇ ਸੁਟ੍ਠੁ ਸਞ੍ਞਤੋ ਤੀਹਿ ਦ੍ਵਾਰੇਹਿ ਸਞ੍ਞਤੋ ਸੁਸਿਕ੍ਖਿਤੋ.

੧੪. ਅਦ੍ਦਸਂ ਵਿਰਜਂ ਬੁਦ੍ਧਨ੍ਤਿ ਰਾਗਦੋਸਮੋਹਵਿਰਹਿਤਤ੍ਤਾ ਵਿਰਜਂ ਨਿਕ੍ਕਿਲੇਸਂ ਬੁਦ੍ਧਂ ਅਦ੍ਦਸਂ ਅਦ੍ਦਕ੍ਖਿਂ. ਗਚ੍ਛਨ੍ਤਂ ਅਨਿਲਞ੍ਜਸੇਤਿ ਅਨਿਲਞ੍ਜਸੇ ਆਕਾਸਪਥੇ ਗਚ੍ਛਨ੍ਤਂ ਬੁਦ੍ਧਂ. ਤੁਣ੍ਡੇਨ ਮਯ੍ਹਂ ਮੁਖਤੁਣ੍ਡੇਨ ਤਾਲਂ ਸਾਲਪੁਪ੍ਫਂ ਪਗ੍ਗਯ੍ਹ ਪਗ੍ਗਹੇਤ੍ਵਾ ਵਿਪਸ੍ਸਿਸ੍ਸਾਭਿਰੋਪਯਿਂ ਵਿਪਸ੍ਸਿਸ੍ਸ ਭਗਵਤੋ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਪਚ੍ਚਾਗਮਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਪਰਪ੍ਪਸਾਦਕਤ੍ਥੇਰਅਪਦਾਨਵਣ੍ਣਨਾ

ਉਸਭਂ ਪਵਰਂ ਵੀਰਨ੍ਤਿਆਦਿਕਂ ਆਯਸ੍ਮਤੋ ਪਰਪ੍ਪਸਾਦਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਤਿਣ੍ਣਂ ਵੇਦਾਨਂ ਪਾਰਗੂ ਇਤਿਹਾਸਪਞ੍ਚਮਾਨਂ ਪਦਕੋ ਵੇਯ੍ਯਾਕਰਣੋ ਸਨਿਘਣ੍ਡੁਕੇਟੁਭਾਨਂ ਸਾਕ੍ਖਰਪ੍ਪਭੇਦਾਨਂ ਲੋਕਾਯਤਮਹਾਪੁਰਿਸਲਕ੍ਖਣੇਸੁ ਅਨਵਯੋ ਨਾਮੇਨ ਸੇਲਬ੍ਰਾਹ੍ਮਣੋਤਿ ਪਾਕਟੋ ਸਿਦ੍ਧਤ੍ਥਂ ਭਗਵਨ੍ਤਂ ਦਿਸ੍ਵਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣੇਹਿ ਅਸੀਤਿਅਨੁਬ੍ਯਞ੍ਜਨੇਹਿ ਚਾਤਿ ਸਯਂ ਸੋਭਮਾਨਂ ਦਿਸ੍ਵਾ ਪਸਨ੍ਨਮਾਨਸੋ ਅਨੇਕੇਹਿ ਕਾਰਣੇਹਿ ਅਨੇਕਾਹਿ ਉਪਮਾਹਿ ਥੋਮਨਂ ਪਕਾਸੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਲੋਕੇ ਸਕ੍ਕਮਾਰਾਦਯੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਸ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਚਤੁਪਟਿਸਮ੍ਭਿਦਾਛਲ਼ਭਿਞ੍ਞਪ੍ਪਤ੍ਤੋ ਮਹਾਖੀਣਾਸਵੋ ਅਹੋਸਿ, ਬੁਦ੍ਧਸ੍ਸ ਥੁਤਿਯਾ ਸਤ੍ਤਾਨਂ ਸਬ੍ਬੇਸਂ ਚਿਤ੍ਤਪ੍ਪਸਾਦਕਰਣਤੋ ਪਰਪ੍ਪਸਾਦਕਤ੍ਥੇਰੋਤਿ ਪਾਕਟੋ.

੨੦. ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਉਸਭਂ ਪਵਰਂ ਵੀਰਨ੍ਤਿਆਦਿਮਾਹ. ਤਤ੍ਥ ਉਸਭਨ੍ਤਿ ਵਸਭੋ ਨਿਸਭੋ ਵਿਸਭੋ ਆਸਭੋਤਿ ਚਤ੍ਤਾਰੋ ਜੇਟ੍ਠਪੁਙ੍ਗਵਾ. ਤਤ੍ਥ ਗਵਸਤਜੇਟ੍ਠਕੋ ਵਸਭੋ, ਗਵਸਹਸ੍ਸਜੇਟ੍ਠਕੋ ਨਿਸਭੋ, ਗਵਸਤਸਹਸ੍ਸਜੇਟ੍ਠਕੋ ਵਿਸਭੋ, ਗਵਕੋਟਿਸਤਸਹਸ੍ਸਜੇਟ੍ਠਕੋ ਆਸਭੋਤਿ ਚ ਯਸ੍ਸ ਕਸ੍ਸਚਿ ਥੁਤਿਂ ਕਰੋਨ੍ਤਾ ਬ੍ਰਾਹ੍ਮਣਪਣ੍ਡਿਤਾ ਬਹੁਸ੍ਸੁਤਾ ਅਤ੍ਤਨੋ ਅਤ੍ਤਨੋ ਪਞ੍ਞਾਵਸੇਨ ਥੁਤਿਂ ਕਰੋਨ੍ਤਿ, ਬੁਦ੍ਧਾਨਂ ਪਨ ਸਬ੍ਬਾਕਾਰੇਨ ਥੁਤਿਂ ਕਾਤੁਂ ਸਮਤ੍ਥੋ ਏਕੋਪਿ ਨਤ੍ਥਿ. ਅਪ੍ਪਮੇਯ੍ਯੋ ਹਿ ਬੁਦ੍ਧੋ. ਵੁਤ੍ਤਞ੍ਹੇਤਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ, ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ, ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ. (ਦੀ. ਨਿ. ਅਟ੍ਠ. ੧.੩੦੪; ੩.੧੪੧; ਮ. ਨਿ. ਅਟ੍ਠ. ੨.੪੨੫; ਉਦਾ. ਅਟ੍ਠ. ੫੩) –

ਆਦਿਕਂ. ਅਯਮ੍ਪਿ ਬ੍ਰਾਹ੍ਮਣੋ ਮੁਖਾਰੂਲ਼੍ਹਵਸੇਨ ਏਕਪਸੀਦਨਵਸੇਨ ‘‘ਆਸਭ’’ਨ੍ਤਿ ਵਤ੍ਤਬ੍ਬੇ ‘‘ਉਸਭ’’ਨ੍ਤਿਆਦਿਮਾਹ. ਵਰਿਤਬ੍ਬੋ ਪਤ੍ਥੇਤਬ੍ਬੋਤਿ ਵਰੋ. ਅਨੇਕੇਸੁ ਕਪ੍ਪਸਤਸਹਸ੍ਸੇਸੁ ਕਤਵੀਰਿਯਤ੍ਤਾ ਵੀਰੋ. ਮਹਨ੍ਤਂ ਸੀਲਕ੍ਖਨ੍ਧਾਦਿਕਂ ਏਸਤਿ ਗਵੇਸਤੀਤਿ ਮਹੇਸੀ, ਤਂ ਮਹੇਸਿਂ ਬੁਦ੍ਧਂ. ਵਿਸੇਸੇਨ ਕਿਲੇਸਖਨ੍ਧਮਾਰਾਦਯੋ ਮਾਰੇ ਜਿਤਵਾਤਿ ਵਿਜਿਤਾਵੀ, ਤਂ ਵਿਜਿਤਾਵਿਨਂ ਸਮ੍ਬੁਦ੍ਧਂ. ਸੁਵਣ੍ਣਸ੍ਸ ਵਣ੍ਣੋ ਇਵ ਵਣ੍ਣੋ ਯਸ੍ਸ ਸਮ੍ਬੁਦ੍ਧਸ੍ਸ ਸੋ ਸੁਵਣ੍ਣਵਣ੍ਣੋ, ਤਂ ਸੁਵਣ੍ਣਵਣ੍ਣਂ ਸਮ੍ਬੁਦ੍ਧਂ ਦਿਸ੍ਵਾ ਕੋ ਨਾਮ ਸਤ੍ਤੋ ਨਪ੍ਪਸੀਦਤੀਤਿ.

ਪਰਪ੍ਪਸਾਦਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਭਿਸਦਾਯਕਤ੍ਥੇਰਅਪਦਾਨਵਣ੍ਣਨਾ

ਵੇਸ੍ਸਭੂ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਭਿਸਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵੇਸ੍ਸਭੁਸ੍ਸ ਭਗਵਤੋ ਕਾਲੇ ਹਿਮਵਨ੍ਤਸ੍ਮਿਂ ਹਤ੍ਥਿਯੋਨਿਯਂ ਨਿਬ੍ਬਤ੍ਤੋ ਤਸ੍ਮਿਂ ਪਟਿਵਸਤਿ. ਤਸ੍ਮਿਂ ਸਮਯੇ ਵੇਸ੍ਸਭੂ ਭਗਵਾ ਵਿਵੇਕਕਾਮੋ ਹਿਮਵਨ੍ਤਮਗਮਾਸਿ. ਤਂ ਦਿਸ੍ਵਾ ਸੋ ਹਤ੍ਥਿਨਾਗੋ ਪਸਨ੍ਨਮਾਨਸੋ ਭਿਸਮੁਲ਼ਾਲਂ ਗਹੇਤ੍ਵਾ ਭਗਵਨ੍ਤਂ ਭੋਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਹਤ੍ਥਿਯੋਨਿਤੋ ਚੁਤੋ ਦੇਵਲੋਕੇ ਉਪ੍ਪਜ੍ਜਿਤ੍ਵਾ ਤਤ੍ਥ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸਤ੍ਤਮਾਗਤੋ ਮਨੁਸ੍ਸੇਸੁ ਚਕ੍ਕਵਤ੍ਤਿਸਮ੍ਪਤ੍ਤਿਆਦਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਹਾਭੋਗੇ ਅਞ੍ਞਤਰਸ੍ਮਿਂ ਕੁਲੇ ਨਿਬ੍ਬਤ੍ਤੋ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ, ਸੋ ਪੁਬ੍ਬੇ ਕਤਕੁਸਲਨਾਮੇਨ ਭਿਸਦਾਯਕਤ੍ਥੇਰੋਤਿ ਪਾਕਟੋ.

੨੯. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪੁਬ੍ਬਚਰਿਤਾਪਦਾਨਂ ਦਸ੍ਸੇਨ੍ਤੋ ਵੇਸ੍ਸਭੂ ਨਾਮ ਨਾਮੇਨਾਤਿਆਦਿਮਾਹ. ਤਤ੍ਥ ਵੇਸ੍ਸਭੂਤਿ ਵੇਸ੍ਸਂ ਭੁਨਾਤਿ ਅਤਿਕ੍ਕਮਤੀਤਿ ਵੇਸ੍ਸਭੂ. ਅਥ ਵਾ ਵੇਸ੍ਸੇ ਵਾਣਿਜਕਮ੍ਮੇ ਵਾ ਕਾਮਰਾਗਾਦਿਕੇ ਵਾ ਕੁਸਲਾਦਿਕਮ੍ਮੇ ਵਾ ਵਤ੍ਥੁਕਾਮਕਿਲੇਸਕਾਮੇ ਵਾ ਭੁਨਾਤਿ ਅਭਿਭਵਤੀਤਿ ਵੇਸ੍ਸਭੂ, ਸੋ ਨਾਮੇਨ ਵੇਸ੍ਸਭੂ ਨਾਮ ਭਗਵਾ. ਇਸੀਨਂ ਤਤਿਯੋ ਅਹੂਤਿ ਕੁਸਲਧਮ੍ਮੇ ਏਸਤਿ ਗਵੇਸਤੀਤਿ ਇਸਿ, ‘‘ਵਿਪਸ੍ਸੀ, ਸਿਖੀ, ਵੇਸ੍ਸਭੂ’’ਤਿ ਵੁਤ੍ਤਤ੍ਤਾ ਤਤਿਯੋ ਇਸਿ ਤਤਿਯੋ ਭਗਵਾ ਅਹੁ ਅਹੋਸੀਤਿ ਅਤ੍ਥੋ. ਕਾਨਨਂ ਵਨਮੋਗ੍ਗਯ੍ਹਾਤਿ ਕਾਨਨਸਙ੍ਖਾਤਂ ਵਨਂ ਓਗਯ੍ਹ ਓਗਹੇਤ੍ਵਾ ਪਾਵਿਸੀਤਿ ਅਤ੍ਥੋ.

੩੦. ਭਿਸਮੁਲ਼ਾਲਂ ਗਣ੍ਹਿਤ੍ਵਾਤਿ ਦ੍ਵਿਪਦਚਤੁਪ੍ਪਦਾਨਂ ਛਾਤਕਂ ਭਿਸਤਿ ਹਿਂਸਤਿ ਵਿਨਾਸੇਤੀਤਿ ਭਿਸਂ, ਕੋ ਸੋ? ਪਦੁਮਕਨ੍ਦੋ, ਭਿਸਞ੍ਚ ਮੁਲ਼ਾਲਞ੍ਚ ਭਿਸਮੁਲ਼ਾਲਂ, ਤਂ ਭਿਸਮੁਲ਼ਾਲਂ ਗਹੇਤ੍ਵਾਤਿ ਅਤ੍ਥੋ.

੩੧. ਕਰੇਨ ਚ ਪਰਾਮਟ੍ਠੋਤਿ ਤਂ ਮਯਾ ਦਿਨ੍ਨਦਾਨਂ, ਵੇਸ੍ਸਭੂਵਰਬੁਦ੍ਧਿਨਾ ਉਤ੍ਤਮਬੁਦ੍ਧਿਨਾ ਵੇਸ੍ਸਭੁਨਾ ਕਰੇਨ ਹਤ੍ਥਤਲੇਨ ਪਰਾਮਟ੍ਠੋ ਕਤਸਮ੍ਫਸ੍ਸੋ ਅਹੋਸਿ. ਸੁਖਾਹਂ ਨਾਭਿਜਾਨਾਮਿ, ਸਮਂ ਤੇਨ ਕੁਤੋਤ੍ਤਰਿਨ੍ਤਿ ਤੇਨ ਸੁਖੇਨ ਸਮਂ ਸੁਖਂ ਨਾਭਿਜਾਨਾਮਿ, ਤਤੋ ਉਤ੍ਤਰਿਂ ਤਤੋ ਪਰਂ ਤਤੋ ਅਧਿਕਂ ਸੁਖਂ ਕੁਤੋਤਿ ਅਤ੍ਥੋ. ਸੇਸਂ ਨਯਾਨੁਸਾਰੇਨ ਸੁਵਿਞ੍ਞੇਯ੍ਯਨ੍ਤਿ.

ਭਿਸਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਸੁਚਿਨ੍ਤਿਤਤ੍ਥੇਰਅਪਦਾਨਵਣ੍ਣਨਾ

ਗਿਰਿਦੁਗ੍ਗਚਰੋ ਆਸਿਨ੍ਤਿਆਦਿਕਂ ਆਯਸ੍ਮਤੋ ਸੁਚਿਨ੍ਤਿਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਹਿਮਵਨ੍ਤਪ੍ਪਦੇਸੇ ਨੇਸਾਦਕੁਲੇ ਉਪ੍ਪਨ੍ਨੋ ਮਿਗਸੂਕਰਾਦਯੋ ਵਧਿਤ੍ਵਾ ਖਾਦਨ੍ਤੋ ਵਿਹਰਤਿ. ਤਦਾ ਲੋਕਨਾਥੋ ਲੋਕਾਨੁਗ੍ਗਹਂ ਸਤ੍ਤਾਨੁਦ੍ਦਯਤਞ੍ਚ ਪਟਿਚ੍ਚ ਹਿਮਵਨ੍ਤਮਗਮਾਸਿ. ਤਦਾ ਸੋ ਨੇਸਾਦੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਤ੍ਤਨੋ ਖਾਦਨਤ੍ਥਾਯ ਆਨੀਤਂ ਵਰਮਧੁਰਮਂਸਂ ਅਦਾਸਿ. ਪਟਿਗ੍ਗਹੇਸਿ ਭਗਵਾ ਤਸ੍ਸਾਨੁਕਮ੍ਪਾਯ, ਤਂ ਭੁਞ੍ਜਿਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਤੇਨੇਵ ਪੁਞ੍ਞੇਨ ਤੇਨੇਵ ਸੋਮਨਸ੍ਸੇਨ ਤਤੋ ਚੁਤੋ ਸੁਗਤੀਸੁ ਸਂਸਰਨ੍ਤੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਸਮ੍ਪਤ੍ਤਿਆਦਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੬. ਚਤੁਪਟਿਸਮ੍ਭਿਦਾਪਞ੍ਚਾਭਿਞ੍ਞਾਦਿਭੇਦਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਗਿਰਿਦੁਗ੍ਗਚਰੋ ਆਸਿਨ੍ਤਿਆਦਿਮਾਹ. ਗਿਰਤਿ ਸਦ੍ਦਂ ਕਰੋਤੀਤਿ ਗਿਰਿ, ਕੋ ਸੋ? ਸਿਲਾਪਂਸੁਮਯਪਬ੍ਬਤੋ, ਦੁਟ੍ਠੁ ਦੁਕ੍ਖੇਨ ਗਮਨੀਯਂ ਦੁਗ੍ਗਂ, ਗਿਰੀਹਿ ਦੁਗ੍ਗਂ ਗਿਰਿਦੁਗ੍ਗਂ, ਦੁਗ੍ਗਮੋਤਿ ਅਤ੍ਥੋ. ਤਸ੍ਮਿਂ ਗਿਰਿਦੁਗ੍ਗੇ ਪਬ੍ਬਤਨ੍ਤਰੇ ਚਰੋ ਚਰਣਸੀਲੋ ਆਸਿਂ ਅਹੋਸਿਂ. ਅਭਿਜਾਤੋਵ ਕੇਸਰੀਤਿ ਅਭਿ ਵਿਸੇਸੇਨ ਜਾਤੋ ਨਿਬ੍ਬਤ੍ਤੋ ਕੇਸਰੀਵ ਕੇਸਰਸੀਹੋ ਇਵ ਗਿਰਿਦੁਗ੍ਗਸ੍ਮਿਂ ਚਰਾਮੀਤਿ ਅਤ੍ਥੋ.

੪੦. ਗਿਰਿਦੁਗ੍ਗਂ ਪਵਿਸਿਂ ਅਹਨ੍ਤਿ ਅਹਂ ਤਦਾ ਤੇਨ ਮਂਸਦਾਨੇਨ ਪੀਤਿਸੋਮਨਸ੍ਸਜਾਤੋ ਪਬ੍ਬਤਨ੍ਤਰਂ ਪਾਵਿਸਿਂ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸੁਚਿਨ੍ਤਿਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਵਤ੍ਥਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਕ੍ਖਿਜਾਤੋ ਤਦਾ ਆਸਿਨ੍ਤਿਆਦਿਕਂ ਆਯਸ੍ਮਤੋ ਵਤ੍ਥਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਸੁਪਣ੍ਣਯੋਨਿਯਂ ਨਿਬ੍ਬਤ੍ਤੋ ਗਨ੍ਧਮਾਦਨਪਬ੍ਬਤਂ ਗਚ੍ਛਨ੍ਤਂ ਅਤ੍ਥਦਸ੍ਸਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸੁਪਣ੍ਣਵਣ੍ਣਂ ਵਿਜਹਿਤ੍ਵਾ ਮਾਣਵਕਵਣ੍ਣਂ ਨਿਮ੍ਮਿਨਿਤ੍ਵਾ ਮਹਗ੍ਘਂ ਦਿਬ੍ਬਵਤ੍ਥਂ ਆਦਾਯ ਭਗਵਨ੍ਤਂ ਪੂਜੇਸਿ. ਸੋਪਿ ਭਗਵਾ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਸੋ ਤੇਨੇਵ ਸੋਮਨਸ੍ਸੇਨ ਵੀਤਿਨਾਮੇਤ੍ਵਾ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਤਤ੍ਥ ਅਪਰਾਪਰਂ ਸਂਸਰਨ੍ਤੋ ਪੁਞ੍ਞਾਨਿ ਅਨੁਭਵਿਤ੍ਵਾ ਤਤੋ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਨ੍ਤਿ ਸਬ੍ਬਤ੍ਥ ਮਹਗ੍ਘਂ ਵਤ੍ਥਾਭਰਣਂ ਲਦ੍ਧਂ, ਤਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਵਤ੍ਥਚ੍ਛਾਯਾਯ ਗਤਗਤਟ੍ਠਾਨੇ ਵਸਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਛਲ਼ਭਿਞ੍ਞਪ੍ਪਤ੍ਤਖੀਣਾਸਵੋ ਅਹੋਸਿ, ਪੁਬ੍ਬੇ ਕਤਪੁਞ੍ਞਨਾਮੇਨ ਵਤ੍ਥਦਾਯਕਤ੍ਥੇਰੋਤਿ ਪਾਕਟੋ.

੪੫. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਕ੍ਖਿਜਾਤੋ ਤਦਾ ਆਸਿਨ੍ਤਿਆਦਿਮਾਹ. ਤਤ੍ਥ ਪਕ੍ਖਿਜਾਤੋਤਿ ਪਕ੍ਖਨ੍ਦਤਿ ਉਪਲਵਤਿ ਸਕੁਣੋ ਏਤੇਨਾਤਿ ਪਕ੍ਖਂ, ਪਕ੍ਖਮਸ੍ਸ ਅਤ੍ਥੀਤਿ ਪਕ੍ਖੀ, ਪਕ੍ਖਿਯੋਨਿਯਂ ਜਾਤੋ ਨਿਬ੍ਬਤ੍ਤੋਤਿ ਅਤ੍ਥੋ. ਸੁਪਣ੍ਣੋਤਿ ਸੁਨ੍ਦਰਂ ਪਣ੍ਣਂ ਪਤ੍ਤਂ ਯਸ੍ਸ ਸੋ ਸੁਪਣ੍ਣੋ, ਵਾਤਗ੍ਗਾਹਸੁਵਣ੍ਣਵਣ੍ਣਜਲਮਾਨਪਤ੍ਤਮਹਾਭਾਰੋਤਿ ਅਤ੍ਥੋ. ਗਰੁਲ਼ਾਧਿਪੋਤਿ ਨਾਗੇ ਗਣ੍ਹਨਤ੍ਥਾਯ ਗਰੁਂ ਭਾਰਂ ਪਾਸਾਣਂ ਗਿਲ਼ਨ੍ਤੀਤਿ ਗਰੁਲ਼ਾ, ਗਰੁਲ਼ਾਨਂ ਅਧਿਪੋ ਰਾਜਾਤਿ ਗਰੁਲ਼ਾਧਿਪੋ, ਵਿਰਜਂ ਬੁਦ੍ਧਂ ਅਦ੍ਦਸਾਹਨ੍ਤਿ ਸਮ੍ਬਨ੍ਧੋ.

ਵਤ੍ਥਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਅਮ੍ਬਦਾਯਕਤ੍ਥੇਰਅਪਦਾਨਵਣ੍ਣਨਾ

ਅਨੋਮਦਸ੍ਸੀ ਭਗਵਾਤਿਆਦਿਕਂ ਆਯਸ੍ਮਤੋ ਅਮ੍ਬਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਵਾਨਰਯੋਨਿਯਂ ਨਿਬ੍ਬਤ੍ਤੋ ਹਿਮਵਨ੍ਤੇ ਕਪਿਰਾਜਾ ਹੁਤ੍ਵਾ ਪਟਿਵਸਤਿ. ਤਸ੍ਮਿਂ ਸਮਯੇ ਅਨੋਮਦਸ੍ਸੀ ਭਗਵਾ ਤਸ੍ਸਾਨੁਕਮ੍ਪਾਯ ਹਿਮਵਨ੍ਤਮਗਮਾਸਿ. ਅਥ ਸੋ ਕਪਿਰਾਜਾ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸੁਮਧੁਰਂ ਅਮ੍ਬਫਲਂ ਖੁਦ੍ਦਮਧੁਨਾ ਅਦਾਸਿ. ਅਥ ਭਗਵਾ ਤਸ੍ਸ ਪਸ੍ਸਨ੍ਤਸ੍ਸੇਵ ਤਂ ਸਬ੍ਬਂ ਪਰਿਭੁਞ੍ਜਿਤ੍ਵਾ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ. ਅਥ ਸੋ ਸੋਮਨਸ੍ਸਸਮ੍ਪਨ੍ਨਹਦਯੋ ਤੇਨੇਵ ਪੀਤਿਸੋਮਨਸ੍ਸੇਨ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਤਤ੍ਥ ਦਿਬ੍ਬਸੁਖਮਨੁਭਵਿਤ੍ਵਾ ਮਨੁਸ੍ਸੇਸੁ ਚ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞਪ੍ਪਤ੍ਤੋ ਅਹੋਸਿ. ਪੁਬ੍ਬਪੁਞ੍ਞਨਾਮੇਨ ਅਮ੍ਬਦਾਯਕਤ੍ਥੇਰੋਤਿ ਪਾਕਟੋ.

੫੩. ਸੋ ਅਪਰਭਾਗੇ ਅਤ੍ਤਨਾ ਕਤਕੁਸਲਬੀਜਂ ਦਿਸ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਨੋਮਦਸ੍ਸੀ ਭਗਵਾਤਿਆਦਿਮਾਹ. ਮੇਤ੍ਤਾਯ ਅਫਰਿ ਲੋਕੇ, ਅਪ੍ਪਮਾਣੇ ਨਿਰੂਪਧੀਤਿ ਸੋ ਭਗਵਾ ਸਬ੍ਬਲੋਕੇ ਅਪ੍ਪਮਾਣੇ ਸਤ੍ਤੇ ‘‘ਸੁਖੀ ਹੋਨ੍ਤੂ’’ਤਿਆਦਿਨਾ ਨਿਰੁਪਧਿ ਉਪਧਿਵਿਰਹਿਤਂ ਕਤ੍ਵਾ ਮੇਤ੍ਤਾਯ ਮੇਤ੍ਤਚਿਤ੍ਤੇਨ ਅਫਰਿ ਪਤ੍ਥਰਿ ਵਡ੍ਢੇਸੀਤਿ ਅਤ੍ਥੋ.

੫੪. ਕਪਿ ਅਹਂ ਤਦਾ ਆਸਿਨ੍ਤਿ ਤਦਾ ਤਸ੍ਸਾਗਮਨਕਾਲੇ ਕਪਿਰਾਜਾ ਅਹੋਸਿਨ੍ਤਿ ਅਤ੍ਥੋ.

ਅਮ੍ਬਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਸੁਮਨਤ੍ਥੇਰਅਪਦਾਨਵਣ੍ਣਨਾ

ਸੁਮਨੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਸੁਮਨਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਮਾਲਾਕਾਰਸ੍ਸ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਭਗਵਤਿ ਪਸਨ੍ਨਮਾਨਸੋ ਸੁਮਨਮਾਲਾਮੁਟ੍ਠਿਯੋ ਗਹੇਤ੍ਵਾ ਉਭੋਹਿ ਹਤ੍ਥੇਹਿ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਤ੍ਤਦਾਰੇਹਿ ਵਡ੍ਢਿਤ੍ਵਾ ਸੁਮਨਨਾਮੇਨ ਪਾਕਟੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੬੨. ਸੋ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮਨੋ ਨਾਮ ਨਾਮੇਨਾਤਿਆਦਿਮਾਹ. ਸੁਨ੍ਦਰਂ ਮਨਂ ਚਿਤ੍ਤਂ ਯਸ੍ਸ ਸੋ ਸੁਮਨੋ. ਸਦ੍ਧਾਪਸਾਦਬਹੁਮਾਨੇਨ ਯੁਤ੍ਤੋ ਨਾਮੇਨ ਸੁਮਨੋ ਨਾਮ ਮਾਲਾਕਾਰੋ ਤਦਾ ਅਹਂ ਅਹੋਸਿਂ.

੬੩. ਸਿਖਿਨੋ ਲੋਕਬਨ੍ਧੁਨੋਤਿ ਸਿਖਾ ਮੁਦ੍ਧਾ ਕਾਸਤੀਤਿ ਸਿਖੀ. ਅਥ ਵਾ ਸਮ੍ਪਯੁਤ੍ਤਸਮ੍ਪਯੋਗੇ ਖਾਦਤਿ ਵਿਦ੍ਧਂਸੇਤੀਤਿ ਸਿਖੀ, ਕਾ ਸਾ? ਅਗ੍ਗਿਸਿਖਾ, ਅਗ੍ਗਿਸਿਖਾ ਵਿਯ ਸਿਖਾਯ ਦਿਪ੍ਪਨਤੋ ਸਿਖੀ. ਯਥਾ ਅਗ੍ਗਿਸਿਖਾ ਜੋਤਤਿ ਪਾਕਟਾ ਹੋਤਿ, ਸਿਖੀ ਪਤ੍ਤਤਿਣਕਟ੍ਠਪਲਾਸਾਦਿਕੇ ਦਹਤਿ, ਏਵਮਯਮ੍ਪਿ ਭਗਵਾ ਨੀਲਪੀਤਾਦਿਰਂਸੀਹਿ ਜੋਤਤਿ ਸਕਲਲੋਕਸਨ੍ਨਿਵਾਸੇ ਪਾਕਟੋ ਹੋਤਿ. ਸਕਸਨ੍ਤਾਨਗਤਸਬ੍ਬਕਿਲੇਸੇ ਸੋਸੇਤਿ ਵਿਦ੍ਧਂਸੇਤਿ ਝਾਪੇਤੀਤਿ ਵੋਹਾਰਨਾਮਂ ਨਾਮਕਮ੍ਮਂ ਨਾਮਧੇਯ੍ਯਂ, ਤਸ੍ਸ ਸਿਖਿਨੋ. ਸਕਲਲੋਕਸ੍ਸ ਬਨ੍ਧੁਞਾਤਕੋਤਿ ਲੋਕਬਨ੍ਧੁ, ਤਸ੍ਸ ਸਿਖਿਨੋ ਲੋਕਬਨ੍ਧੁਨੋ ਭਗਵਤੋ ਸੁਮਨਪੁਪ੍ਫਂ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ.

ਸੁਮਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨਵਣ੍ਣਨਾ

ਅਭੀਤਰੂਪਂ ਸੀਹਂ ਵਾਤਿਆਦਿਕਂ ਆਯਸ੍ਮਤੋ ਪੁਪ੍ਫਚਙ੍ਕੋਟਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਮਹਾਵਿਭਵਸਮ੍ਪਨ੍ਨੋ ਸਤ੍ਥਰਿ ਪਸੀਦਿਤ੍ਵਾ ਪਸਨ੍ਨਾਕਾਰਂ ਦਸ੍ਸੇਨ੍ਤੋ ਸੁਵਣ੍ਣਵਣ੍ਣਂ ਅਨੋਜਪੁਪ੍ਫਮੋਚਿਨਿਤ੍ਵਾ ਚਙ੍ਕੋਟਕਂ ਪੂਰੇਤ੍ਵਾ ਭਗਵਨ੍ਤਂ ਪੂਜੇਤ੍ਵਾ ‘‘ਭਗਵਾ, ਇਮਸ੍ਸ ਨਿਸ੍ਸਨ੍ਦੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੁਵਣ੍ਣਵਣ੍ਣੋ ਪੂਜਨੀਯੋ ਹੁਤ੍ਵਾ ਨਿਬ੍ਬਾਨਂ ਪਾਪੁਣੇਯ੍ਯ’’ਨ੍ਤਿ ਪਤ੍ਥਨਮਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਨਿਬ੍ਬਤ੍ਤੋ ਸਬ੍ਬਤ੍ਥ ਪੂਜਿਤੋ ਸੁਵਣ੍ਣਵਣ੍ਣੋ ਅਭਿਰੂਪੋ ਅਹੋਸਿ. ਸੋ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੬੮-੯. ਸੋ ਪਤ੍ਤਅਰਹਤ੍ਤਫਲੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਭੀਤਰੂਪਂ ਸੀਹਂ ਵਾਤਿਆਦਿਮਾਹ. ਤਤ੍ਥ ਸੀਹਨ੍ਤਿ ਦ੍ਵਿਪਦਚਤੁਪ੍ਪਦਾਦਯੋ ਸਤ੍ਤੇ ਅਭਿਭਵਤਿ ਅਜ੍ਝੋਤ੍ਥਰਤੀਤਿ ਸੀਹੋ, ਅਭੀਤਰੂਪੋ ਅਭੀਤਸਭਾਵੋ, ਤਂ ਅਭੀਤਰੂਪਂ ਸੀਹਂ ਇਵ ਨਿਸਿਨ੍ਨਂ ਪੂਜੇਸਿਨ੍ਤਿ ਸਮ੍ਬਨ੍ਧੋ. ਪਕ੍ਖੀਨਂ ਅਗ੍ਗਂ ਗਰੁਲ਼ਰਾਜਂ ਇਵ ਪਵਰਂ ਉਤ੍ਤਮਂ ਬ੍ਯਗ੍ਘਰਾਜਂ ਇਵ ਅਭਿ ਵਿਸੇਸੇਨ ਜਾਤਂ ਸਬ੍ਬਸੀਹਾਨਂ ਵਿਸੇਸਂ ਕੇਸਰਸੀਹਂ ਇਵ ਤਿਲੋਕਸ੍ਸ ਸਰਣਂ ਸਿਖਿਂ ਸਮ੍ਮਾਸਮ੍ਬੁਦ੍ਧਂ. ਕਿਂ ਭੂਤਂ? ਅਨੇਜਂ ਨਿਕ੍ਕਿਲੇਸਂ ਖਨ੍ਧਮਾਰਾਦੀਹਿ ਅਪਰਾਜਿਤਂ ਨਿਸਿਨ੍ਨਂ ਸਿਖਿਨ੍ਤਿ ਸਮ੍ਬਨ੍ਧੋ. ਮਾਰਣਾਨਗ੍ਗਨ੍ਤਿ ਸਬ੍ਬਕਿਲੇਸਾਨਂ ਮਾਰਣੇ ਸੋਸਨੇ ਵਿਦ੍ਧਂਸਨੇ ਅਗ੍ਗਂ ਸੇਟ੍ਠਂ ਕਿਲੇਸੇ ਮਾਰੇਨ੍ਤਾਨਂ ਪਚ੍ਚੇਕਬੁਦ੍ਧਬੁਦ੍ਧਸਾਵਕਾਨਂ ਵਿਜ੍ਜਮਾਨਾਨਮ੍ਪਿ ਤੇਸਂ ਅਗ੍ਗਨ੍ਤਿ ਅਤ੍ਥੋ. ਭਿਕ੍ਖੁਸਙ੍ਘਪੁਰਕ੍ਖਤਂ ਪਰਿਵਾਰਿਤਂ ਪਰਿਵਾਰੇਤ੍ਵਾ ਨਿਸਿਨ੍ਨਂ ਸਿਖਿਨ੍ਤਿ ਸਮ੍ਬਨ੍ਧੋ.

੭੦. ਚਙ੍ਕੋਟਕੇ ਠਪੇਤ੍ਵਾਨਾਤਿ ਉਤ੍ਤਮਂ ਅਨੋਜਪੁਪ੍ਫਂ ਕਰਣ੍ਡਕੇ ਪੂਰੇਤ੍ਵਾ ਸਿਖੀਸਮ੍ਬੁਦ੍ਧਂ ਸੇਟ੍ਠਂ ਸਮੋਕਿਰਿਂ ਪੂਜੇਸਿਨ੍ਤਿ ਅਤ੍ਥੋ.

ਪੁਪ੍ਫਚਙ੍ਕੋਟਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸਤ੍ਤਮਵਗ੍ਗਵਣ੍ਣਨਾ ਸਮਤ੍ਤਾ.