੬. ਬੀਜਨਿਵਗ੍ਗੋ

੧. ਵਿਧੂਪਨਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਵਿਧੂਪਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਪੂਰਿਤਪੁਞ੍ਞਸਮ੍ਭਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਵਿਭਵਸਮ੍ਪਨ੍ਨੋ ਸਦ੍ਧਾਜਾਤੋ ਭਗਵਤਿ ਪਸਨ੍ਨੋ ਗਿਮ੍ਹਕਾਲੇ ਸੁਵਣ੍ਣਰਜਤਮੁਤ੍ਤਾਮਣਿਮਯਂ ਬੀਜਨਿਂ ਕਾਰੇਤ੍ਵਾ ਭਗਵਤੋ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵੇਸੁ ਚ ਮਨੁਸ੍ਸੇਸੁ ਚ ਸਂਸਰਨ੍ਤੋ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਸ ਅਮ੍ਹਾਕਂ ਸਮ੍ਮਾਸਮ੍ਬੁਦ੍ਧਸ੍ਸ ਉਪ੍ਪਨ੍ਨਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਘਰਬਨ੍ਧਨੇਨ ਬਨ੍ਧਿਤ੍ਵਾ ਘਰਾਵਾਸੇ ਆਦੀਨਵਂ ਦਿਸ੍ਵਾ ਪਬ੍ਬਜ੍ਜਾਯ ਚ ਆਨਿਸਂਸਂ ਦਿਸ੍ਵਾ ਸਦ੍ਧਾਸਮ੍ਪਨ੍ਨੋ ਸਾਸਨੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧. ਸੋ ‘‘ਕੇਨ ਮਯਾ ਪੁਞ੍ਞਕਮ੍ਮੇਨ ਅਯਂ ਲੋਕੁਤ੍ਤਰਸਮ੍ਪਤ੍ਤਿ ਲਦ੍ਧਾ’’ਤਿ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਨ੍ਤੋ ਤਂ ਪਚ੍ਚਕ੍ਖਤੋ ਞਤ੍ਵਾ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਬੀਜਨਿਕਾ ਮਯਾ ਦਿਨ੍ਨਾਤਿ ਵਿਸੇਸੇਨ ਸਨ੍ਤਾਪਯਨ੍ਤਾਨਂ ਸਤ੍ਤਾਨਂ ਸਨ੍ਤਾਪਂ ਨਿਬ੍ਬਾਪੇਨ੍ਤਿ ਸੀਤਲਂ ਵਾਤਂ ਜਨੇਤੀਤਿ ਬੀਜਨੀ, ਬੀਜਨੀਯੇਵ ਬੀਜਨਿਕਾ, ਸਾ ਸਤ੍ਤਰਤਨਮਯਾ ਵਿਜ੍ਜੋਤਮਾਨਾ ਬੀਜਨਿਕਾ ਮਯਾ ਕਾਰਾਪੇਤ੍ਵਾ ਦਿਨ੍ਨਾਤਿ ਅਤ੍ਥੋ.

ਵਿਧੂਪਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਸਤਰਂਸਿਤ੍ਥੇਰਅਪਦਾਨਵਣ੍ਣਨਾ

ਉਚ੍ਚਿਯਂ ਸੇਲਮਾਰੁਯ੍ਹਾਤਿਆਦਿਕਂ ਆਯਸ੍ਮਤੋ ਸਤਰਂਸਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਕ੍ਕਟਬ੍ਯਾਕਰਣੇ ਵੇਦਤ੍ਤਯੇ ਚ ਪਾਰਙ੍ਗਤੋ ਘਰਾਵਾਸਂ ਪਹਾਯ ਅਰਞ੍ਞਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਾਸਂ ਕਪ੍ਪੇਸਿ. ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗਵਾ ਵਿਵੇਕਕਾਮਤਾਯ ਉਚ੍ਚਂ ਏਕਂ ਪਬ੍ਬਤਂ ਆਰੁਯ੍ਹ ਜਲਿਤਗ੍ਗਿਕ੍ਖਨ੍ਤੋ ਵਿਯ ਨਿਸੀਦਿ. ਤਂ ਤਥਾਨਿਸਿਨ੍ਨਂ ਭਗਵਨ੍ਤਂ ਦਿਸ੍ਵਾ ਤਾਪਸੋ ਸੋਮਨਸ੍ਸਜਾਤੋ ਅਞ੍ਜਲਿਂ ਪਗ੍ਗਯ੍ਹ ਅਨੇਕੇਹਿ ਕਾਰਣੇਹਿ ਥੋਮੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਤੋ ਚੁਤੋ ਛਸੁ ਕਾਮਾਵਚਰਦੇਵੇਸੁ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਮਨੁਸ੍ਸਲੋਕੇ ਸਤਰਂਸੀ ਨਾਮ ਚਕ੍ਕਵਤ੍ਤੀ ਰਾਜਾ ਹੁਤ੍ਵਾ ਨਿਬ੍ਬਤ੍ਤਿ. ਤਮ੍ਪਿ ਸਮ੍ਪਤ੍ਤਿਂ ਅਨੇਕਕ੍ਖਤ੍ਤੁਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਪੁਬ੍ਬਪੁਞ੍ਞਸਮ੍ਭਾਰਵਸੇਨ ਞਾਣਸ੍ਸ ਪਰਿਪਕ੍ਕਤ੍ਤਾ ਸਤ੍ਤਵਸ੍ਸਿਕੋਵ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ.

੮-੯. ਸੋ ‘‘ਅਹਂ ਕੇਨ ਕਮ੍ਮੇਨ ਸਤ੍ਤਵਸ੍ਸਿਕੋਵ ਸਨ੍ਤਿਪਦਂ ਅਨੁਪ੍ਪਤ੍ਤੋਸ੍ਮੀ’’ਤਿ ਸਰਮਾਨੋ ਪੁਬ੍ਬਕਮ੍ਮਂ ਞਾਣੇਨ ਪਚ੍ਚਕ੍ਖਤੋ ਦਿਸ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਉਦਾਨਵਸੇਨ ਪਕਾਸੇਨ੍ਤੋ ਉਚ੍ਚਿਯਂ ਸੇਲਮਾਰੁਯ੍ਹਾਤਿਆਦਿਮਾਹ. ਤਤ੍ਥ ਉਚ੍ਚਿਯਨ੍ਤਿ ਉਚ੍ਚਂ ਸੇਲਮਯਂ ਪਬ੍ਬਤਂ ਆਰੁਯ੍ਹ ਨਿਸੀਦਿ ਪਦੁਮੁਤ੍ਤਰੋਤਿ ਸਮ੍ਬਨ੍ਧੋ. ਪਬ੍ਬਤਸ੍ਸਾਵਿਦੂਰਮ੍ਹੀਤਿ ਭਗਵਤੋ ਨਿਸਿਨ੍ਨਸ੍ਸ ਪਬ੍ਬਤਸ੍ਸ ਆਸਨ੍ਨਟ੍ਠਾਨੇਤਿ ਅਤ੍ਥੋ. ਬ੍ਰਾਹ੍ਮਣੋ ਮਨ੍ਤਪਾਰਗੂਤਿ ਮਨ੍ਤਸਙ੍ਖਾਤਸ੍ਸ ਵੇਦਤ੍ਤਯਸ੍ਸ ਪਾਰਂ ਪਰਿਯੋਸਾਨਂ ਕੋਟਿਂ ਗਤੋ ਏਕੋ ਬ੍ਰਾਹ੍ਮਣੋਤਿ ਅਤ੍ਥੋ, ਅਞ੍ਞਂ ਵਿਯ ਅਤ੍ਤਾਨਂ ਨਿਦ੍ਦਿਸਤਿ ਅਯਂ ਮਨ੍ਤਪਾਰਗੂਤਿ. ਉਪਵਿਟ੍ਠਂ ਮਹਾਵੀਰਨ੍ਤਿ ਤਸ੍ਮਿਂ ਪਬ੍ਬਤੇ ਨਿਸਿਨ੍ਨਂ ਵੀਰਵਨ੍ਤਂ ਜਿਨਂ, ਕਿਂ ਵਿਸਿਟ੍ਠਂ? ਦੇਵਦੇਵਂ ਸਕਲਛਕਾਮਾਵਚਰਬ੍ਰਹ੍ਮਦੇਵਾਨਂ ਅਤਿਦੇਵਂ ਨਰਾਸਭਂ ਨਰਾਨਂ ਆਸਤਂ ਸੇਟ੍ਠਂ ਲੋਕਨਾਯਕਂ ਸਕਲਸਤ੍ਤਲੋਕਂ ਨਯਨ੍ਤਂ ਨਿਬ੍ਬਾਨਂ ਪਾਪੇਨ੍ਤਂ ਅਹਂ ਅਞ੍ਜਲਿਂ ਦਸਨਖਸਮੋਧਾਨਞ੍ਜਲਿਪੁਟਂ ਸਿਰਸਿ ਮੁਦ੍ਧਨਿ ਪਗ੍ਗਹੇਤ੍ਵਾਨ ਪਤਿਟ੍ਠਪੇਤ੍ਵਾ ਸਨ੍ਥਵਿਂ ਸੁਟ੍ਠੁਂ ਥੋਮੇਸਿਨ੍ਤਿ ਸਮ੍ਬਨ੍ਧੋ.

੧੨. ਅਭਾਸਥਾਤਿ ‘‘ਯੇਨਾਯਂ ਅਞ੍ਜਲੀ ਦਿਨ੍ਨੋ…ਪੇ… ਅਰਹਾ ਸੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸਤਰਂਸਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਸਯਨਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਸਯਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਸੁਖਮਨੁਭਵਨ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਤ੍ਥਰਿ ਪਸਨ੍ਨੋ ਦਨ੍ਤਸੁਵਣ੍ਣਰਜਤਮੁਤ੍ਤਮਣਿਮਯਂ ਮਹਾਰਹਂ ਮਞ੍ਚਂ ਕਾਰਾਪੇਤ੍ਵਾ ਚੀਨਪਟ੍ਟਕਮ੍ਬਲਾਦੀਨਿ ਅਤ੍ਥਰਿਤ੍ਵਾ ਸਯਨਤ੍ਥਾਯ ਭਗਵਤੋ ਅਦਾਸਿ. ਭਗਵਾ ਤਸ੍ਸ ਅਨੁਗ੍ਗਹਂ ਕਰੋਨ੍ਤੋ ਤਤ੍ਥ ਸਯਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਤਦਨੁਰੂਪਂ ਆਕਾਸਗਮਨਸੁਖਸੇਯ੍ਯਾਦਿਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਾਪੁਣਿਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਵਿਪਸ੍ਸਨ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੦. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ.

੨੧. ਸੁਖੇਤ੍ਤੇ ਬੀਜਸਮ੍ਪਦਾਤਿ ਯਥਾ ਤਿਣਕਚਵਰਰਹਿਤੇ ਕਦ੍ਦਮਾਦਿਸਮ੍ਪਨ੍ਨੇ ਸੁਖੇਤ੍ਤੇ ਵੁਤ੍ਤਬੀਜਾਨਿ ਸਾਦੁਫਲਾਨਿ ਨਿਪ੍ਫਾਦੇਨ੍ਤਿ, ਏਵਮੇਵ ਰਾਗਦੋਸਾਦਿਦਿਯਡ੍ਢਸਹਸ੍ਸਕਿਲੇਸਸਙ੍ਖਾਤਤਿਣਕਚਵਰਰਹਿਤੇ ਸੁਦ੍ਧਸਨ੍ਤਾਨੇ ਪੁਞ੍ਞਕ੍ਖੇਤ੍ਤੇ ਵੁਤ੍ਤਦਾਨਾਨਿ ਅਪ੍ਪਾਨਿਪਿ ਸਮਾਨਾਨਿ ਮਹਪ੍ਫਲਾਨਿ ਹੋਨ੍ਤੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਸਯਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਗਨ੍ਧੋਦਕਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਗਨ੍ਧੋਦਕਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਮੁਨਿਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਪਰਿਨਿਬ੍ਬੁਤੇ ਭਗਵਤਿ ਨਗਰਵਾਸਿਨੋ ਬੋਧਿਪੂਜਂ ਕੁਰੁਮਾਨੇ ਦਿਸ੍ਵਾ ਵਿਚਿਤ੍ਤਘਟੇ ਚਨ੍ਦਨਕਪ੍ਪੁਰਾਗਰੁਆਦਿਮਿਸ੍ਸਕਸੁਗਨ੍ਧੋਦਕੇਨ ਪੂਰੇਤ੍ਵਾ ਬੋਧਿਰੁਕ੍ਖਂ ਅਭਿਸਿਞ੍ਚਿ. ਤਸ੍ਮਿਂ ਖਣੇ ਦੇਵੋ ਮਹਾਧਾਰਾਹਿ ਪਵਸ੍ਸਿ. ਤਦਾ ਸੋ ਅਸਨਿਵੇਗੇਨ ਕਾਲਂ ਕਤੋ. ਤੇਨੇਵ ਪੁਞ੍ਞਕਮ੍ਮੇਨ ਦੇਵਲੋਕੇ ਨਿਬ੍ਬਤ੍ਤਿ, ਤਤ੍ਥੇਵ ਠਿਤੋ ‘‘ਅਹੋ ਬੁਦ੍ਧੋ, ਅਹੋ ਧਮ੍ਮੋ’’ਤਿਆਦਿਗਾਥਾਯੋ ਅਭਾਸਿ. ਏਵਂ ਸੋ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਸਬ੍ਬਪਰਿਲ਼ਾਹਵਿਪ੍ਪਮੁਤ੍ਤੋ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸੀਤਿਭਾਵਮੁਪਗਤੋ ਸੁਖਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਆਰਭਿਤ੍ਵਾ ਵਿਪਸ੍ਸਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ. ਪੁਬ੍ਬੇ ਕਤਪੁਞ੍ਞੇਨ ਗਨ੍ਧੋਦਕਿਯਤ੍ਥੇਰੋਤਿ ਪਾਕਟੋ ਅਹੋਸਿ.

੨੫. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤਰਸ੍ਸਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਮਹਾਬੋਧਿਮਹੋ ਅਹੂਤਿ ਮਹਾਬੋਧਿਰੁਕ੍ਖਸ੍ਸ ਪੂਜਾ ਅਹੋਸੀਤਿ ਅਤ੍ਥੋ. ਵਿਚਿਤ੍ਤਂ ਘਟਮਾਦਾਯਾਤਿ ਅਨੇਕੇਹਿ ਚਿਤ੍ਤਕਮ੍ਮਸੁਵਣ੍ਣਕਮ੍ਮੇਹਿ ਵਿਚਿਤ੍ਤਂ ਸੋਭਮਾਨਂ ਗਨ੍ਧੋਦਕਪੁਣ੍ਣਂ ਘਟਂ ਗਹੇਤ੍ਵਾਤਿ ਅਤ੍ਥੋ. ਗਨ੍ਧੋਦਕਮਦਾਸਹਨ੍ਤਿ ਗਨ੍ਧੋਦਕਂ ਅਦਾਸਿਂ, ਅਹਂ ਗਨ੍ਧੋਦਕੇਨ ਅਭਿਸਿਞ੍ਚਿਨ੍ਤਿ ਅਤ੍ਥੋ.

੨੬. ਨ੍ਹਾਨਕਾਲੇ ਚ ਬੋਧਿਯਾਤਿ ਬੋਧਿਯਾ ਪੂਜਾਕਰਣਸਮਯੇਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਗਨ੍ਧੋਦਕਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਓਪਵਯ੍ਹਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਓਪਵਯ੍ਹਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਜਿਨਾਦਿਚ੍ਚੇ ਲੋਕੇ ਪਾਤੁਭੂਤੇ ਏਕਸ੍ਮਿਂ ਵਿਭਵਸਮ੍ਪਨ੍ਨਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਮਹਦ੍ਧਨੋ ਮਹਾਭੋਗੋ ਘਰਾਵਾਸਂ ਵਸਮਾਨੋ ਸਾਸਨੇ ਪਸਨ੍ਨੋ ਸਤ੍ਥਰਿ ਪਸਾਦਬਹੁਮਾਨੋ ਆਜਾਨੀਯੇਨ ਸਿਨ੍ਧਵੇਨ ਪੂਜਂ ਅਕਾਸਿ, ਪੂਜੇਤ੍ਵਾ ਚ ਪਨ ‘‘ਬੁਦ੍ਧਾਦੀਨਂ ਸਮਣਾਨਂ ਹਤ੍ਥਿਅਸ੍ਸਾਦਯੋ ਨ ਕਪ੍ਪਨ੍ਤਿ, ਕਪ੍ਪਿਯਭਣ੍ਡਂ ਦਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਤਂ ਅਗ੍ਘਾਪੇਤ੍ਵਾ ਤਦਗ੍ਘਨਕੇਨ ਕਹਾਪਣੇਨ ਕਪ੍ਪਿਯਂ ਕਪ੍ਪਾਸਿਕਕਮ੍ਬਲਕੋਜਵਾਦਿਕਂ ਚੀਵਰਂ ਕਪ੍ਪੂਰਤਕ੍ਕੋਲਾਦਿਕਂ ਭੇਸਜ੍ਜਪਰਿਕ੍ਖਾਰਞ੍ਚ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵੇਸੁ ਚ ਮਨੁਸ੍ਸੇਸੁ ਚ ਹਤ੍ਥਿਅਸ੍ਸਾਦਿਅਨੇਕਵਾਹਨਸਮ੍ਪਨ੍ਨੋ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਸਮ੍ਪਨ੍ਨੋ ਸਾਸਨੇ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗਪਟਿਪਾਟਿਯਾ ਅਰਹਤ੍ਤੇ ਪਤਿਟ੍ਠਾਸਿ, ਪੁਬ੍ਬੇ ਕਤਪੁਞ੍ਞਸਮ੍ਭਾਰਵਸੇਨ ਓਪਵਯ੍ਹਤ੍ਥੇਰੋਤਿ ਪਾਕਟੋ ਅਹੋਸਿ.

੩੩. ਸੋ ‘‘ਕੇਨ ਨੁ ਖੋ ਕਾਰਣੇਨ ਇਦਂ ਮਯਾ ਸਨ੍ਤਿਪਦਂ ਅਧਿਗਤ’’ਨ੍ਤਿ ਉਪਧਾਰੇਨ੍ਤੋ ਪੁਬ੍ਬਕਮ੍ਮਂ ਞਾਣੇਨ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਉਦਾਨਵਸੇਨ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਆਜਾਨੀਯਮਦਾਸਹਨ੍ਤਿ ਆਜਾਨੀਯਂ ਉਤ੍ਤਮਜਾਤਿਸਿਨ੍ਧਵਂ ਅਹਂ ਅਦਾਸਿਂ ਪੂਜੇਸਿਨ੍ਤਿ ਅਤ੍ਥੋ.

੩੫. ਸਪਤ੍ਤਭਾਰੋਤਿ ਸਸ੍ਸ ਅਤ੍ਤਨੋ ਪਤ੍ਤਾਨਿ ਅਟ੍ਠ ਪਰਿਕ੍ਖਾਰਾਨਿ ਭਾਰਾਨਿ ਯਸ੍ਸ ਸੋ ਸਪਤ੍ਤਭਾਰੋ, ਅਟ੍ਠਪਰਿਕ੍ਖਾਰਯੁਤ੍ਤੋਤਿ ਅਤ੍ਥੋ.

੩੬. ਖਮਨੀਯਮਦਾਸਹਨ੍ਤਿ ਖਮਨੀਯਯੋਗ੍ਗਂ ਚੀਵਰਾਦਿਕਪ੍ਪਿਯਪਰਿਕ੍ਖਾਰਨ੍ਤਿ ਅਤ੍ਥੋ.

੪੦. ਚਰਿਮੋਤਿ ਪਰਿਯੋਸਾਨੋ ਕੋਟਿਪ੍ਪਤ੍ਤੋ ਭਵੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਓਪਵਯ੍ਹਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਸਪਰਿਵਾਰਾਸਨਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਸਪਰਿਵਾਰਾਸਨਤ੍ਥੇਰਸ੍ਸ ਅਪਦਾਨਂ. ਸੋਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਜਾਤੋ ਸਾਸਨੇ ਪਸਨ੍ਨੋ ਦਾਨਫਲਂ ਸਦ੍ਦਹਨ੍ਤੋ ਨਾਨਗ੍ਗਰਸਭੋਜਨੇਨ ਭਗਵਤੋ ਪਿਣ੍ਡਪਾਤਂ ਅਦਾਸਿ, ਦਤ੍ਵਾ ਚ ਪਨ ਭੋਜਨਸਾਲਾਯਂ ਭੋਜਨਤ੍ਥਾਯ ਨਿਸਿਨ੍ਨਾਸਨਂ ਜਾਤਿਸੁਮਨਮਲ੍ਲਿਕਾਦੀਹਿ ਅਲਙ੍ਕਰਿ. ਭਗਵਾ ਚ ਭਤ੍ਤਾਨੁਮੋਦਨਮਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਨੇਕਵਿਧਂ ਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧੋ ਪਸਨ੍ਨੋ ਪਬ੍ਬਜਿਤ੍ਵਾ ਨ ਚਿਰਸ੍ਸੇਵ ਅਰਹਾ ਅਹੋਸਿ.

੪੩. ਸੋ ਏਵਂ ਪਤ੍ਤਸਨ੍ਤਿਪਦੋ ‘‘ਕੇਨ ਨੁ ਖੋ ਪੁਞ੍ਞੇਨ ਇਦਂ ਸਨ੍ਤਿਪਦਂ ਅਨੁਪ੍ਪਤ੍ਤ’’ਨ੍ਤਿ ਞਾਣੇਨ ਉਪਧਾਰੇਨ੍ਤੋ ਪੁਬ੍ਬਕਮ੍ਮਂ ਦਿਸ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਪਿਣ੍ਡਪਾਤਂ ਅਦਾਸਹਨ੍ਤਿ ਤਤ੍ਥ ਤਤ੍ਥ ਲਦ੍ਧਾਨਂ ਪਿਣ੍ਡਾਨਂ ਕਬਲ਼ਂ ਕਬਲ਼ਂ ਕਤ੍ਵਾ ਪਾਤਬ੍ਬਤੋ ਖਾਦਿਤਬ੍ਬਤੋ ਆਹਾਰੋ ਪਿਣ੍ਡਪਾਤੋ, ਤਂ ਪਿਣ੍ਡਪਾਤਂ ਭਗਵਤੋ ਅਦਾਸਿਂ, ਭਗਵਨ੍ਤਂ ਭੋਜੇਸਿਨ੍ਤਿ ਅਤ੍ਥੋ.

੪੪. ਅਕਿਤ੍ਤਯਿ ਪਿਣ੍ਡਪਾਤਨ੍ਤਿ ਮਯਾ ਦਿਨ੍ਨਪਿਣ੍ਡਪਾਤਸ੍ਸ ਗੁਣਂ ਆਨਿਸਂਸਂ ਪਕਾਸੇਸੀਤਿ ਅਤ੍ਥੋ.

੪੮. ਸਂਵੁਤੋ ਪਾਤਿਮੋਕ੍ਖਸ੍ਮਿਨ੍ਤਿ ਪਾਤਿਮੋਕ੍ਖਸਂਵਰਸੀਲੇਨ ਸਂਵੁਤੋ ਪਿਹਿਤੋ ਪਟਿਚ੍ਛਨ੍ਨੋਤਿ ਅਤ੍ਥੋ. ਇਨ੍ਦ੍ਰਿਯੇਸੁ ਚ ਪਞ੍ਚਸੂਤਿ ਚਕ੍ਖੁਨ੍ਦ੍ਰਿਯਾਦੀਸੁ ਪਞ੍ਚਸੁ ਇਨ੍ਦ੍ਰਿਯੇਸੁ ਰੂਪਾਦੀਹਿ ਗੋਪਿਤੋ ਇਨ੍ਦ੍ਰਿਯਸਂਵਰਸੀਲਞ੍ਚ ਗੋਪਿਤੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਸਪਰਿਵਾਰਾਸਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਪਞ੍ਚਦੀਪਕਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਪਞ੍ਚਦੀਪਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਉਪ੍ਪਨ੍ਨੁਪ੍ਪਨ੍ਨਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸੇ ਵਸਨ੍ਤੋ ਭਗਵਤੋ ਧਮ੍ਮਂ ਸੁਤ੍ਵਾ ਸਮ੍ਮਾਦਿਟ੍ਠਿਯਂ ਪਤਿਟ੍ਠਿਤੋ ਸਦ੍ਧੋ ਪਸਨ੍ਨੋ ਮਹਾਜਨੇਹਿ ਬੋਧਿਪੂਜਂ ਕਯਿਰਮਾਨਂ ਦਿਸ੍ਵਾ ਸਯਮ੍ਪਿ ਬੋਧਿਂ ਪਰਿਵਾਰੇਤ੍ਵਾ ਦੀਪਂ ਜਾਲੇਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਚਕ੍ਕਵਤ੍ਤਿਸਮ੍ਪਤ੍ਤਿਆਦਯੋ ਅਨੁਭਵਿਤ੍ਵਾ ਸਬ੍ਬਤ੍ਥੇਵ ਉਪ੍ਪਨ੍ਨਭਵੇ ਜਲਮਾਨੋ ਜੋਤਿਸਮ੍ਪਨ੍ਨਵਿਮਾਨਾਦੀਸੁ ਵਸਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਵਿਭਵਸਮ੍ਪਨ੍ਨੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ, ਦੀਪਪੂਜਾਨਿਸ੍ਸਨ੍ਦੇਨ ਦੀਪਕਤ੍ਥੇਰੋਤਿ ਪਾਕਟੋ.

੫੦. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਉਜੁਦਿਟ੍ਠਿ ਅਹੋਸਹਨ੍ਤਿ ਵਙ੍ਕਂ ਮਿਚ੍ਛਾਦਿਟ੍ਠਿਂ ਛਡ੍ਡੇਤ੍ਵਾ ਉਜੁ ਅਵਙ੍ਕਂ ਨਿਬ੍ਬਾਨਾਭਿਮੁਖਂ ਪਾਪੁਣਨਸਮ੍ਮਾਦਿਟ੍ਠਿ ਅਹੋਸਿਨ੍ਤਿ ਅਤ੍ਥੋ.

੫੧. ਪਦੀਪਦਾਨਂ ਪਾਦਾਸਿਨ੍ਤਿ ਏਤ੍ਥ ਪਕਾਰੇਨ ਦਿਬ੍ਬਤਿ ਜੋਤਤੀਤਿ ਪਦੀਪੋ, ਤਸ੍ਸ ਦਾਨਂ ਪਦੀਪਦਾਨਂ, ਤਂ ਅਦਾਸਿਂ ਪਦੀਪਪੂਜਂ ਅਕਾਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਞ੍ਚਦੀਪਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਧਜਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਧਜਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸੀਦਿਤ੍ਵਾ ਸੁਨ੍ਦਰੇਹਿ ਅਨੇਕੇਹਿ ਵਤ੍ਥੇਹਿ ਧਜਂ ਕਾਰਾਪੇਤ੍ਵਾ ਧਜਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਉਪ੍ਪਨ੍ਨੁਪ੍ਪਨ੍ਨਭਵੇ ਉਚ੍ਚਕੁਲੇ ਨਿਬ੍ਬਤ੍ਤੋ ਪੂਜਨਿਯੋ ਅਹੋਸਿ. ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਤ੍ਤਦਾਰੇਹਿ ਵਡ੍ਢਿਤ੍ਵਾ ਮਹਾਭੋਗੋ ਯਸਵਾ ਸਦ੍ਧਾਜਾਤੋ ਸਤ੍ਥਰਿ ਪਸਨ੍ਨੋ ਘਰਾਵਾਸਂ ਪਹਾਯ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੫੭. ਸੋ ਪਤ੍ਤਅਰਹਤ੍ਤਫਲੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਸ੍ਸਤ੍ਥੋ ਪੁਬ੍ਬੇ ਵੁਤ੍ਤੋਯੇਵ. ਹਟ੍ਠੋ ਹਟ੍ਠੇਨ ਚਿਤ੍ਤੇਨਾਤਿ ਸੋਮਨਸ੍ਸਸਹਗਤਚਿਤ੍ਤਯੁਤ੍ਤਤ੍ਤਾ ਹਟ੍ਠੋ ਪਰਿਪੁਣ੍ਣਰੂਪਕਾਯੋ ਸਦ੍ਧਾਸਮ੍ਪਯੁਤ੍ਤਚਿਤ੍ਤਤਾਯ ਹਟ੍ਠੇਨ ਚਿਤ੍ਤੇਨ ਸਨ੍ਤੁਟ੍ਠੇਨ ਚਿਤ੍ਤੇਨਾਤਿ ਅਤ੍ਥੋ. ਧਜਮਾਰੋਪਯਿਂ ਅਹਨ੍ਤਿ ਧੁਨਾਤਿ ਕਮ੍ਪਤਿ ਚਲਤੀਤਿ ਧਜਂ, ਤਂ ਧਜਂ ਆਰੋਪਯਿਂ ਵੇਲ਼ਗ੍ਗੇ ਲਗ੍ਗੇਤ੍ਵਾ ਪੂਜੇਸਿਨ੍ਤਿ ਅਤ੍ਥੋ.

੫੮-੯. ਪਤਿਤਪਤ੍ਤਾਨਿ ਗਣ੍ਹਿਤ੍ਵਾਤਿ ਪਤਿਤਾਨਿ ਬੋਧਿਪਤ੍ਤਾਨਿ ਗਹੇਤ੍ਵਾ ਅਹਂ ਬਹਿ ਛਡ੍ਡੇਸਿਨ੍ਤਿ ਅਤ੍ਥੋ. ਅਨ੍ਤੋਸੁਦ੍ਧਂ ਬਹਿਸੁਦ੍ਧਨ੍ਤਿ ਅਨ੍ਤੋ ਚਿਤ੍ਤਸਨ੍ਤਾਨਨਾਮਕਾਯਤੋ ਚ ਬਹਿ ਚਕ੍ਖੁਸੋਤਾਦਿਰੂਪਕਾਯਤੋ ਚ ਸੁਦ੍ਧਿਂ ਅਧਿ ਵਿਸੇਸੇਨ ਮੁਤ੍ਤਂ ਕਿਲੇਸਤੋ ਵਿਮੁਤ੍ਤਂ ਅਨਾਸਵਂ ਸਮ੍ਬੁਦ੍ਧਂ ਵਿਯ ਸਮ੍ਮੁਖਾ ਉਤ੍ਤਮਂ ਬੋਧਿਂ ਅਵਨ੍ਦਿਂ ਪਣਾਮਮਕਾਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਧਜਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਪਦੁਮਤ੍ਥੇਰਅਪਦਾਨਵਣ੍ਣਨਾ

ਚਤੁਸਚ੍ਚਂ ਪਕਾਸੇਨ੍ਤੋਤਿਆਦਿਕਂ ਆਯਸ੍ਮਤੋ ਪਦੁਮਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਕੁਸਲਸਮ੍ਭਾਰੋ ਪਦੁਮੁਤ੍ਤਰਮੁਨਿਨਾ ਧਮ੍ਮਪਜ੍ਜੋਤੇ ਜੋਤਮਾਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਭੋਗਸਮ੍ਪਨ੍ਨੋਤਿ ਪਾਕਟੋ. ਸੋ ਸਤ੍ਥਰਿ ਪਸੀਦਿਤ੍ਵਾ ਮਹਾਜਨੇਨ ਸਦ੍ਧਿਂ ਧਮ੍ਮਂ ਸੁਣਨ੍ਤੋ ਧਜੇਨ ਸਹ ਪਦੁਮਕਲਾਪਂ ਗਹੇਤ੍ਵਾ ਅਟ੍ਠਾਸਿ, ਸਧਜਂ ਤਂ ਪਦੁਮਕਲਾਪਂ ਆਕਾਸਮੁਕ੍ਖਿਪਿਂ, ਤਂ ਅਚ੍ਛਰਿਯਂ ਦਿਸ੍ਵਾ ਅਤਿਵਿਯ ਸੋਮਨਸ੍ਸਜਾਤੋ ਅਹੋਸਿ. ਸੋ ਯਾਵਜੀਵਂ ਕੁਸਲਂ ਕਤ੍ਵਾ ਜੀਵਿਤਪਰਿਯੋਸਾਨੇ ਸਗ੍ਗੇ ਨਿਬ੍ਬਤ੍ਤੋ ਧਜਮਿਵ ਛਕਾਮਾਵਚਰੇ ਪਾਕਟੋ ਪੂਜਿਤੋ ਚ ਦਿਬ੍ਬਸਮ੍ਪਤ੍ਤਿਮਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਸਮ੍ਪਤ੍ਤਿਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਸਦ੍ਧਾਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਜਾਤੋ ਪਞ੍ਚਵਸ੍ਸਿਕੋਵ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਕਤਪੁਞ੍ਞਨਾਮੇਨ ਪਦੁਮਤ੍ਥੇਰੋਤਿ ਪਾਕਟੋ.

੬੭. ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਤੁਸਚ੍ਚਂ ਪਕਾਸੇਨ੍ਤੋਤਿਆਦਿਮਾਹ. ਤਤ੍ਥ ਸਚ੍ਚਨ੍ਤਿ ਤਥਂ ਅਵਿਤਥਂ ਅਵਿਪਰੀਤਂ ਸਚ੍ਚਂ, ਦੁਕ੍ਖਸਮੁਦਯਨਿਰੋਧਮਗ੍ਗਵਸੇਨ ਚਤ੍ਤਾਰਿ ਸਚ੍ਚਾਨਿ ਸਮਾਹਟਾਨੀਤਿ ਚਤੁਸਚ੍ਚਂ, ਤਂ ਚਤੁਸਚ੍ਚਂ ਪਕਾਸੇਨ੍ਤੋ ਲੋਕੇ ਪਾਕਟਂ ਕਰੋਨ੍ਤੋਤਿ ਅਤ੍ਥੋ. ਵਰਧਮ੍ਮਪ੍ਪਵਤ੍ਤਕੋਤਿ ਉਤ੍ਤਮਧਮ੍ਮਪ੍ਪਵਤ੍ਤਕੋ ਪਕਾਸਕੋਤਿ ਅਤ੍ਥੋ. ਅਮਤਂ ਵੁਟ੍ਠਿਨ੍ਤਿ ਅਮਤਮਹਾਨਿਬ੍ਬਾਨਵੁਟ੍ਠਿਧਾਰਂ ਪਵਸ੍ਸਨ੍ਤੋ ਪਗ੍ਘਰਨ੍ਤੋ ਸਦੇਵਕਂ ਲੋਕਂ ਤੇਮੇਨ੍ਤੋ ਸਬ੍ਬਕਿਲੇਸਪਰਿਲ਼ਾਹਂ ਨਿਬ੍ਬਾਪੇਨ੍ਤੋ ਧਮ੍ਮਵਸ੍ਸਂ ਵਸ੍ਸਤੀਤਿ ਅਤ੍ਥੋ.

੬੮. ਸਧਜਂ ਪਦੁਮਂ ਗਯ੍ਹਾਤਿ ਧਜੇਨ ਸਹ ਏਕਤੋ ਕਤ੍ਵਾ ਪਦੁਮਂ ਪਦੁਮਕਲਾਪਂ ਗਹੇਤ੍ਵਾਤਿ ਅਤ੍ਥੋ. ਅਡ੍ਢਕੋਸੇ ਠਿਤੋ ਅਹਨ੍ਤਿ ਉਭੋ ਉਕ੍ਖਿਪਿਤ੍ਵਾ ਠਿਤੋ ਅਹਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਦੁਮਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਅਸਨਬੋਧਿਯਤ੍ਥੇਰਅਪਦਾਨਵਣ੍ਣਨਾ

ਜਾਤਿਯਾ ਸਤ੍ਤਵਸ੍ਸੋਹਨ੍ਤਿਆਦਿਕਂ ਆਯਸ੍ਮਤੋ ਅਸਨਬੋਧਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਤਿਸ੍ਸਸ੍ਸ ਭਗਵਤੋ ਕਾਲੇ ਅਞ੍ਞਤਰਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸੁਖਪ੍ਪਤ੍ਤੋ ਸਾਸਨੇ ਪਸਨ੍ਨੋ ਅਸਨਬੋਧਿਤੋ ਫਲਂ ਗਹੇਤ੍ਵਾ ਤਤੋ ਵੁਟ੍ਠਿਤਬੋਧਿਤਰੁਣੇ ਗਹੇਤ੍ਵਾ ਬੋਧਿਂ ਰੋਪੇਸਿ, ਯਥਾ ਨ ਵਿਨਸ੍ਸਤਿ ਤਥਾ ਉਦਕਾਸਿਞ੍ਚਨਾਦਿਕਮ੍ਮੇਨ ਰਕ੍ਖਿਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਪਰਿਪਕ੍ਕਸਮ੍ਭਾਰਤ੍ਤਾ ਸਤ੍ਤਵਸ੍ਸਿਕੋਵ ਸਮਾਨੋ ਪਬ੍ਬਜਿਤ੍ਵਾ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ, ਪੁਰਾਕਤਪੁਞ੍ਞਨਾਮੇਨ ਅਸਨਬੋਧਿਯਤ੍ਥੇਰੋਤਿ ਪਾਕਟੋ.

੭੮. ਸੋ ਪੁਬ੍ਬਸਮ੍ਭਾਰਮਨੁਸ੍ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਜਾਤਿਯਾ ਸਤ੍ਤਵਸ੍ਸੋਹਨ੍ਤਿਆਦਿਮਾਹ. ਤਤ੍ਥ ਜਾਤਿਯਾਤਿ ਮਾਤੁਗਬ੍ਭਤੋ ਨਿਕ੍ਖਨ੍ਤਕਾਲਤੋ ਪਟ੍ਠਾਯਾਤਿ ਅਤ੍ਥੋ. ਸਤ੍ਤਵਸ੍ਸੋ ਪਰਿਪੁਣ੍ਣਸਰਦੋ ਅਹਂ ਲੋਕਨਾਯਕਂ ਤਿਸ੍ਸਂ ਭਗਵਨ੍ਤਂ ਅਦ੍ਦਸਨ੍ਤਿ ਸਮ੍ਬਨ੍ਧੋ. ਪਸਨ੍ਨਚਿਤ੍ਤੋ ਸੁਮਨੋਤਿ ਪਕਾਰੇਨ ਪਸਨ੍ਨਅਨਾਲੁਲ਼ਿਤਅਵਿਕਮ੍ਪਿਤਚਿਤ੍ਤੋ, ਸੁਮਨੋ ਸੁਨ੍ਦਰਮਨੋ ਸੋਮਨਸ੍ਸਸਹਗਤਚਿਤ੍ਤੋਤਿ ਅਤ੍ਥੋ.

੭੯. ਤਿਸ੍ਸਸ੍ਸਾਹਂ ਭਗਵਤੋਤਿ ਤਿਕ੍ਖਤ੍ਤੁਂ ਜਾਤੋਤਿ ਤਿਸ੍ਸੋ, ਸੋ ਮਾਤੁਗਬ੍ਭਤੋ, ਮਨੁਸ੍ਸਜਾਤਿਤੋ, ਪਞ੍ਚਕ੍ਖਨ੍ਧਤੋ ਚ ਮੁਤ੍ਤੋ ਹੁਤ੍ਵਾ ਜਾਤੋ ਨਿਬ੍ਬਤ੍ਤੋ ਬੁਦ੍ਧੋ ਜਾਤੋਤਿ ਅਤ੍ਥੋ. ਤਸ੍ਸ ਤਿਸ੍ਸਸ੍ਸ ਭਗਵਤੋ ਤਾਦਿਨੋ, ਲੋਕਜੇਟ੍ਠਸ੍ਸ ਅਸਨਬੋਧਿਂ ਉਤ੍ਤਮਂ ਰੋਪਯਿਨ੍ਤਿ ਸਮ੍ਬਨ੍ਧੋ.

੮੦. ਅਸਨੋ ਨਾਮਧੇਯ੍ਯੇਨਾਤਿ ਨਾਮਪਞ੍ਞਤ੍ਤਿਯਾ ਨਾਮਸਞ੍ਞਾਯ ਅਸਨੋ ਨਾਮ ਅਸਨਰੁਕ੍ਖੋ ਬੋਧਿ ਅਹੋਸੀਤਿ ਅਤ੍ਥੋ. ਧਰਣੀਰੁਹਪਾਦਪੋਤਿ ਵਲ੍ਲਿਰੁਕ੍ਖਪਬ੍ਬਤਗਙ੍ਗਾਸਾਗਰਾਦਯੋ ਧਾਰੇਤੀਤਿ ਧਰਣੀ, ਕਾ ਸਾ? ਪਥਵੀ, ਤਸ੍ਸਂ ਰੁਹਤਿ ਪਤਿਟ੍ਠਹਤੀਤਿ ਧਰਣੀਰੁਹੋ, ਪਾਦੇਨ ਪਿਵਤੀਤਿ ਪਾਦਪੋ, ਪਾਦਸਙ੍ਖਾਤੇਨ ਮੂਲੇਨ ਸਿਞ੍ਚਿਤੋਦਕਂ ਪਿਵਤਿ ਆਪੋਰਸਂ ਸਿਨੇਹਂ ਧਾਰੇਤੀਤਿ ਅਤ੍ਥੋ. ਧਰਣੀਰੁਹੋ ਚ ਸੋ ਪਾਦਪੋ ਚਾਤਿ ਧਰਣੀਰੁਹਪਾਦਪੋ, ਤਂ ਉਤ੍ਤਮਂ ਅਸਨਂ ਬੋਧਿਂ ਪਞ੍ਚ ਵਸ੍ਸਾਨਿ ਪਰਿਚਰਿਂ ਪੋਸੇਸਿਨ੍ਤਿ ਅਤ੍ਥੋ.

੮੧. ਪੁਪ੍ਫਿਤਂ ਪਾਦਪਂ ਦਿਸ੍ਵਾਤਿ ਤਂ ਮਯਾ ਪੋਸਿਤਂ ਅਸਨਬੋਧਿਰੁਕ੍ਖਂ ਪੁਪ੍ਫਿਤਂ ਅਚ੍ਛਰਯੋਗ੍ਗਭੂਤਪੁਪ੍ਫਤ੍ਤਾ ਅਬ੍ਭੁਤਂ ਲੋਮਹਂਸਕਰਣਂ ਦਿਸ੍ਵਾ ਸਕਂ ਕਮ੍ਮਂ ਅਤ੍ਤਨੋ ਕਮ੍ਮਂ ਪਕਿਤ੍ਤੇਨ੍ਤੋ ਪਕਾਰੇਨ ਕਥਯਨ੍ਤੋ ਬੁਦ੍ਧਸੇਟ੍ਠਸ੍ਸ ਸਨ੍ਤਿਕਂ ਅਗਮਾਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਅਸਨਬੋਧਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਛਟ੍ਠਵਗ੍ਗਵਣ੍ਣਨਾ ਸਮਤ੍ਤਾ.