੯. ਵਨਵਚ੍ਛਤ੍ਥੇਰਅਪਦਾਨਵਣ੍ਣਨਾ

ਨਵਮਾਪਦਾਨੇ ਇਮਮ੍ਹਿ ਭਦ੍ਦਕੇ ਕਪ੍ਪੇਤਿਆਦਿਕਂ ਆਯਸ੍ਮਤੋ ਵਨਵਚ੍ਛਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਕਸ੍ਸਪਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਚਰਿਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ, ਤਤੋ ਚੁਤੋ ਅਰਞ੍ਞਾਯਤਨੇ ਭਿਕ੍ਖੂਨਂ ਸਮੀਪੇ ਕਪੋਤਯੋਨਿਯਂ ਨਿਬ੍ਬਤ੍ਤੋ. ਤੇਸੁ ਮੇਤ੍ਤਚਿਤ੍ਤੋ ਧਮ੍ਮਂ ਸੁਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਸ੍ਮਿਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿ. ਤਸ੍ਸ ਮਾਤੁਕੁਚ੍ਛਿਗਤਕਾਲੇਯੇਵ ਮਾਤੁ ਦੋਹਲ਼ੋ ਉਦਪਾਦਿ ਵਨੇ ਵਸਿਤੁਂ ਵਨੇ ਵਿਜਾਯਿਤੁਂ. ਤਤੋ ਇਚ੍ਛਾਨੁਰੂਪਵਸੇਨ ਵਨੇ ਵਸਨ੍ਤਿਯਾ ਗਬ੍ਭਵੁਟ੍ਠਾਨਂ ਅਹੋਸਿ. ਗਬ੍ਭਤੋ ਨਿਕ੍ਖਨ੍ਤਞ੍ਚ ਨਂ ਕਾਸਾਵਖਣ੍ਡੇਨ ਪਟਿਗ੍ਗਹੇਸੁਂ. ਤਦਾ ਬੋਧਿਸਤ੍ਤਸ੍ਸ ਉਪ੍ਪਨ੍ਨਕਾਲੋ, ਰਾਜਾ ਤਂ ਕੁਮਾਰਂ ਆਹਰਾਪੇਤ੍ਵਾ ਸਹੇਵ ਪੋਸੇਸਿ. ਅਥ ਬੋਧਿਸਤ੍ਤੋ ਮਹਾਭਿਨਿਕ੍ਖਮਨਂ ਨਿਕ੍ਖਮਿਤ੍ਵਾ ਪਬ੍ਬਜਿਤ੍ਵਾ ਛਬ੍ਬਸਾਨਿ ਦੁਕ੍ਕਰਕਾਰਿਕਂ ਕਤ੍ਵਾ ਬੁਦ੍ਧੇ ਜਾਤੇ ਸੋ ਮਹਾਕਸ੍ਸਪਸ੍ਸ ਸਨ੍ਤਿਕਂ ਗਨ੍ਤ੍ਵਾ ਤਸ੍ਸੋਵਾਦੇ ਪਸਨ੍ਨੋ ਤਸ੍ਸ ਸਨ੍ਤਿਕਾ ਬੁਦ੍ਧੁਪ੍ਪਾਦਭਾਵਂ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਰਹਾ ਅਹੋਸਿ.

੨੫੧. ਸੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਇਮਮ੍ਹਿ ਭਦ੍ਦਕੇ ਕਪ੍ਪੇਤਿਆਦਿਮਾਹ. ਤਤ੍ਥ ਬ੍ਰਹ੍ਮਬਨ੍ਧੁ ਮਹਾਯਸੋਤਿ ਏਤ੍ਥ ਬ੍ਰਾਹ੍ਮਣਾਨਂ ਬਨ੍ਧੁ ਞਾਤਕੋਤਿ ਬ੍ਰਾਹ੍ਮਣਬਨ੍ਧੂਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ‘‘ਬ੍ਰਹ੍ਮਬਨ੍ਧੂ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਲੋਕਤ੍ਤਯਬ੍ਯਾਪਕਯਸਤ੍ਤਾ ਮਹਾਯਸੋ. ਸੇਸਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵਾਤਿ.

ਵਨਵਚ੍ਛਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.