੧੦. ਚੂਲ਼ਸੁਗਨ੍ਧਤ੍ਥੇਰਅਪਦਾਨਵਣ੍ਣਨਾ
ਦਸਮਾਪਦਾਨੇ ਇਮਮ੍ਹਿ ਭਦ੍ਦਕੇ ਕਪ੍ਪੇਤਿਆਦਿਕਂ ਆਯਸ੍ਮਤੋ ਸੁਗਨ੍ਧਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਕਸ੍ਸਪਸਮ੍ਮਾਸਮ੍ਬੁਦ੍ਧਕਾਲੇ ਬਾਰਾਣਸਿਯਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਸਬ੍ਬਦਾ ਨਮਸ੍ਸਮਾਨੋ ਮਹਾਦਾਨਂ ਦਦਮਾਨੋ ਮਾਸਸ੍ਸ ਸਤ੍ਤਕ੍ਖਤ੍ਤੁਂ ਭਗਵਤੋ ਗਨ੍ਧਕੁਟਿਯਾ ਚਤੁਜ੍ਜਾਤਿਗਨ੍ਧੇਨ ਵਿਲਿਮ੍ਪੇਸਿ. ‘‘ਮਮ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਸਰੀਰਤੋ ਸੁਗਨ੍ਧਗਨ੍ਧੋ ਨਿਬ੍ਬਤ੍ਤਤੂ’’ਤਿ ਪਤ੍ਥਨਂ ਅਕਾਸਿ. ਭਗਵਾ ਤਂ ਬ੍ਯਾਕਾਸਿ. ਸੋ ਯਾਵਤਾਯੁਕਂ ਠਤ੍ਵਾ ਪੁਞ੍ਞਾਨਿ ਕਰੋਨ੍ਤੋ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਕਾਮਾਵਚਰਲੋਕਂ ਸਰੀਰਗਨ੍ਧੇਨ ਸੁਗਨ੍ਧਂ ਕੁਰੁਮਾਨੋ ਸੁਗਨ੍ਧਦੇਵਪੁਤ੍ਤੋਤਿ ਪਾਕਟੋ ਅਹੋਸਿ. ਸੋ ਦੇਵਲੋਕਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਤਤੋ ਚੁਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਹਾਭੋਗਕੁਲੇ ਨਿਬ੍ਬਤ੍ਤਿ, ਤਸ੍ਸ ਮਾਤੁਕੁਚ੍ਛਿਗਤਸ੍ਸੇਵ ਮਾਤੁਯਾ ਸਰੀਰਗਨ੍ਧੇਨ ਸਕਲਗੇਹਂ ਸਕਲਨਗਰਞ੍ਚ ਸੁਗਨ੍ਧੇਨ ਏਕਗਨ੍ਧਂ ਅਹੋਸਿ, ਜਾਤਕ੍ਖਣੇ ਸਕਲਂ ਸਾਵਤ੍ਥਿਨਗਰਂ ਸੁਗਨ੍ਧਕਰਣ੍ਡਕੋ ਵਿਯ ਅਹੋਸਿ, ਤੇਨਸ੍ਸ ਸੁਗਨ੍ਧੋਤਿ ਨਾਮਂ ਕਰਿਂਸੁ. ਸੋ ਵੁਦ੍ਧਿਂ ਅਗਮਾਸਿ. ਤਦਾ ਸਤ੍ਥਾ ਸਾਵਤ੍ਥਿਯਂ ਪਤ੍ਵਾ ਜੇਤਵਨਮਹਾਵਿਹਾਰਂ ਪਟਿਗ੍ਗਹੇਸਿ, ਤਂ ਦਿਸ੍ਵਾ ਪਸਨ੍ਨਮਾਨਸੋ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿ. ਤਸ੍ਸ ਉਪ੍ਪਨ੍ਨਦਿਵਸਤੋ ਪਟ੍ਠਾਯ ਯਾਵ ਪਰਿਨਿਬ੍ਬਾਨਾ ਏਤ੍ਥਨ੍ਤਰੇ ਨਿਪਨ੍ਨਟ੍ਠਾਨਾਦੀਸੁ ਸੁਗਨ੍ਧਮੇਵ ਵਾਯਿ. ਦੇਵਾਪਿ ਦਿਬ੍ਬਚੁਣ੍ਣਦਿਬ੍ਬਗਨ੍ਧਪੁਪ੍ਫਾਨਿ ਓਕਿਰਨ੍ਤਿ.
੨੭੨. ਸੋਪਿ ਥੇਰੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਇਮਮ੍ਹਿ ਭਦ੍ਦਕੇ ਕਪ੍ਪੇਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਮੇਵ, ਕੇਵਲਂ ਪੁਞ੍ਞਨਾਨਤ੍ਤਂ ਨਾਮਨਾਨਤ੍ਤਞ੍ਚ ਵਿਸੇਸੋ.
ਚੂਲ਼ਸੁਗਨ੍ਧਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.
ਪਞ੍ਚਪਞ੍ਞਾਸਮਵਗ੍ਗਵਣ੍ਣਨਾ ਸਮਤ੍ਤਾ.