੫੬. ਯਸਵਗ੍ਗੋ

੧. ਯਸਤ੍ਥੇਰਅਪਦਾਨਵਣ੍ਣਨਾ

ਛਪ੍ਪਞ੍ਞਾਸਮੇ ਵਗ੍ਗੇ ਪਠਮਾਪਦਾਨੇ ਮਹਾਸਮੁਦ੍ਦਂ ਓਗ੍ਗਯ੍ਹਾਤਿਆਦਿਕਂ ਆਯਸ੍ਮਤੋ ਯਸਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਮਹਾਨੁਭਾਵੋ ਨਾਗਰਾਜਾ ਹੁਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਅਤ੍ਤਨੋ ਭਵਨਂ ਨੇਤ੍ਵਾ ਮਹਾਦਾਨਂ ਪਵਤ੍ਤੇਸਿ, ਭਗਵਨ੍ਤਂ ਮਹਗ੍ਘੇਨ ਤਿਚੀਵਰੇਨ ਅਚ੍ਛਾਦੇਸਿ, ਏਕੇਕਞ੍ਚ ਭਿਕ੍ਖੁਂ ਮਹਗ੍ਘੇਨੇਵ ਪਚ੍ਚੇਕਦੁਸ੍ਸਯੁਗੇਨ ਸਬ੍ਬੇਨ ਚ ਸਮਣਪਰਿਕ੍ਖਾਰੇਨ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਸੇਟ੍ਠਿਪੁਤ੍ਤੋ ਹੁਤ੍ਵਾ ਮਹਾਬੋਧਿਮਣ੍ਡਲਂ ਸਤ੍ਤਹਿ ਰਤਨੇਹਿ ਪੂਜੇਸਿ. ਕਸ੍ਸਪਸ੍ਸ ਭਗਵਤੋ ਕਾਲੇ ਸਾਸਨੇ ਪਬ੍ਬਜਿਤ੍ਵਾ ਸਮਣਧਮ੍ਮਂ ਅਕਾਸਿ. ਏਵਂ ਸੋ ਸੁਗਤੀਸੁਯੇਵ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਕਾਲੇ ਬਾਰਾਣਸਿਯਂ ਮਹਾਵਿਭਵਸ੍ਸ ਸੇਟ੍ਠਿਨੋ ਪੁਤ੍ਤੋ ਹੁਤ੍ਵਾ ਸੁਜਾਤਾਯ ਭਗਵਤੋ ਖੀਰਪਾਯਾਸਂ ਦਿਨ੍ਨਾਯ ਸੇਟ੍ਠਿਧੀਤਾਯ ਕੁਚ੍ਛਿਮ੍ਹਿ ਨਿਬ੍ਬਤ੍ਤਿ, ਯਸੋ ਨਾਮ ਨਾਮੇਨ ਪਰਮਸੁਖੁਮਾਲੋ. ਤਸ੍ਸ ਤਯੋ ਪਾਸਾਦਾ ਹੋਨ੍ਤਿ – ਏਕੋ ਹੇਮਨ੍ਤਿਕੋ, ਏਕੋ ਗਿਮ੍ਹਿਕੋ, ਏਕੋ ਵਸ੍ਸਿਕੋਤਿ. ਸੋ ਵਸ੍ਸਿਕੇ ਪਾਸਾਦੇ ਵਸ੍ਸਿਕੇ ਚਤ੍ਤਾਰੋ ਮਾਸੇ ਨਿਪ੍ਪੁਰਿਸੇਹਿ ਤੂਰਿਯੇਹਿ ਪਰਿਚਾਰਯਮਾਨੋ ਵਸਤਿ, ਹੇਟ੍ਠਾਪਾਸਾਦਂ ਨ ਓਤਰਤਿ. ਹੇਮਨ੍ਤਿਕੇ ਪਾਸਾਦੇ ਚਤ੍ਤਾਰੋ ਮਾਸੇ ਸੁਫੁਸਿਤਵਾਤਪਾਨਕਵਾਟੇ ਤਤ੍ਥੇਵ ਪਟਿਵਸਤਿ. ਗਿਮ੍ਹਿਕੇ ਪਾਸਾਦੇ ਬਹੁਕਵਾਟਵਾਤਪਾਨਜਾਲਾਹਿ ਸਮ੍ਪਨ੍ਨੇ ਤਤ੍ਥੇਵ ਵਸਤਿ. ਹਤ੍ਥਪਾਦਾਨਂ ਸੁਖੁਮਾਲਤਾਯ ਭੂਮਿਯਂ ਨਿਸਜ੍ਜਾਦਿਕਿਚ੍ਚਂ ਨਤ੍ਥਿ. ਸਿਮ੍ਬਲਿਤੁਲਾਦਿਪੁਣ੍ਣਸਭਾਵੇ ਅਤ੍ਥਰਿਤ੍ਵਾ ਤਤ੍ਥ ਉਪਧਾਨਾਨਿ ਕਿਚ੍ਚਾਨਿ ਕਰੋਤਿ. ਏਵਂ ਦੇਵਲੋਕੇ ਦੇਵਕੁਮਾਰੋ ਵਿਯ ਪਞ੍ਚਹਿ ਕਾਮਗੁਣੇਹਿ ਸਮਪ੍ਪਿਤਸ੍ਸ ਸਮਙ੍ਗੀਭੂਤਸ੍ਸ ਪਰਿਚਾਰਯਮਾਨਸ੍ਸ ਪਟਿਕਚ੍ਚੇਵ ਨਿਦ੍ਦਾ ਓਕ੍ਕਮਿ, ਪਰਿਜਨਸ੍ਸਾਪਿ ਨਿਦ੍ਦਾ ਓਕ੍ਕਮਿ, ਸਬ੍ਬਰਤ੍ਤਿਯੋ ਚ ਤੇਲਪਦੀਪੋ ਝਾਯਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਪਟਿਕਚ੍ਚੇਵ ਪਬੁਜ੍ਝਿਤ੍ਵਾ ਅਦ੍ਦਸ ਸਕਂ ਪਰਿਜਨਂ ਸੁਪਨ੍ਤਂ ਅਞ੍ਞਿਸ੍ਸਾ ਕਚ੍ਛੇ ਵੀਣਂ, ਅਞ੍ਞਿਸ੍ਸਾ ਕਣ੍ਠੇ ਮੁਦਿਙ੍ਗਂ, ਅਞ੍ਞਿਸ੍ਸਾ ਕਚ੍ਛੇ ਆਲ਼ਮ੍ਬਰਂ, ਅਞ੍ਞਂ ਵਿਕੇਸਿਕਂ, ਵਿਕ੍ਖੇਲ਼ਿਕਂ, ਅਞ੍ਞਾ ਵਿਪ੍ਪਲਪਨ੍ਤਿਯੋ ਹਤ੍ਥਪਤ੍ਤਂ ਸੁਸਾਨਂ ਮਞ੍ਞੇ, ਦਿਸ੍ਵਾਨਸ੍ਸ ਆਦੀਨਵੋ ਪਾਤੁਰਹੋਸਿ, ਨਿਬ੍ਬਿਦਾਯ ਚਿਤ੍ਤਂ ਸਣ੍ਠਾਸਿ. ਅਥ ਖੋ ਯਸੋ ਕੁਲਪੁਤ੍ਤੋ ਉਦਾਨਂ ਉਦਾਨੇਸਿ – ‘‘ਉਪਦ੍ਦੁਤਂ ਵਤ ਭੋ, ਉਪਸ੍ਸਟ੍ਠਂ ਵਤ ਭੋ’’ਤਿ.

ਅਥ ਖੋ ਯਸੋ ਕੁਲਪੁਤ੍ਤੋ ਸੁਵਣ੍ਣਪਾਦੁਕਾਯੋ ਆਰੋਹਿਤ੍ਵਾ ਯੇਨ ਨਿਵੇਸਨਦ੍ਵਾਰਂ ਤੇਨੁਪਸਙ੍ਕਮਿ, ਅਮਨੁਸ੍ਸਾ ਦ੍ਵਾਰਂ ਵਿਵਰਿਂਸੁ – ‘‘ਮਾ ਯਸਸ੍ਸ ਕੁਲਪੁਤ੍ਤਸ੍ਸ ਕੋਚਿ ਅਨ੍ਤਰਾਯਮਕਾਸਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾਯਾ’’ਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਯੇਨ ਨਗਰਦ੍ਵਾਰਂ ਤੇਨੁਪਸਙ੍ਕਮਿ, ਅਮਨੁਸ੍ਸਾ ਦ੍ਵਾਰਂ ਵਿਵਰਿਂਸੁ – ‘‘ਮਾ ਯਸਸ੍ਸ ਕੁਲਪੁਤ੍ਤਸ੍ਸ ਕੋਚਿ ਅਨ੍ਤਰਾਯਮਕਾਸਿ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜ੍ਜਾਯਾ’’ਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਯੇਨ ਇਸਿਪਤਨਂ ਮਿਗਦਾਯੋ ਤੇਨੁਪਸਙ੍ਕਮਿ.

ਤੇਨ ਖੋ ਪਨ ਸਮਯੇਨ ਭਗਵਾ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਅਜ੍ਝੋਕਾਸੇ ਚਙ੍ਕਮਤਿ, ਅਦ੍ਦਸਾ ਖੋ ਭਗਵਾ ਯਸਂ ਕੁਲਪੁਤ੍ਤਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਚਙ੍ਕਮਾ ਓਰੋਹਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਖੋ ਯਸੋ ਕੁਲਪੁਤ੍ਤੋ ਭਗਵਤੋ ਅਵਿਦੂਰੇ ਉਦਾਨਂ ਉਦਾਨੇਸਿ – ‘‘ਉਪਦ੍ਦੁਤਂ ਵਤ ਭੋ, ਉਪਸ੍ਸਟ੍ਠਂ ਵਤ ਭੋ’’ਤਿ. ਅਥ ਖੋ ਭਗਵਾ ਯਸਂ ਕੁਲਪੁਤ੍ਤਂ ਏਤਦਵੋਚ – ‘‘ਇਦਂ ਖੋ, ਯਸ, ਅਨੁਪਦ੍ਦੁਤਂ, ਇਦਂ ਅਨੁਪਸ੍ਸਟ੍ਠਂ, ਏਹਿ, ਯਸ, ਨਿਸੀਦ, ਧਮ੍ਮਂ ਤੇ ਦੇਸੇਸ੍ਸਾਮੀ’’ਤਿ. ਅਥ ਖੋ ਯਸੋ ਕੁਲਪੁਤ੍ਤੋ, ‘‘ਇਦਂ ਕਿਰ ਅਨੁਪਦ੍ਦੁਤਂ, ਇਦਂ ਅਨੁਪਸ੍ਸਟ੍ਠ’’ਨ੍ਤਿ ਹਟ੍ਠੋ ਉਦਗ੍ਗੋ ਸੁਵਣ੍ਣਪਾਦੁਕਾਹਿ ਓਰੋਹਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ, ਸੇਯ੍ਯਥਿਦਂ, ਦਾਨਕਥਂ ਸੀਲਕਥਂ ਸਗ੍ਗਕਥਂ ਕਾਮਾਨਂ ਆਦੀਨਵਂ ਓਕਾਰਂ ਸਂਕਿਲੇਸਂ ਨੇਕ੍ਖਮ੍ਮੇ ਆਨਿਸਂਸਂ ਪਕਾਸੇਸਿ. ਯਦਾ ਭਗਵਾ ਅਞ੍ਞਾਸਿ ਯਸਂ ਕੁਲਪੁਤ੍ਤਂ ਕਲ੍ਲਚਿਤ੍ਤਂ ਮੁਦੁਚਿਤ੍ਤਂ ਵਿਨੀਵਰਣਚਿਤ੍ਤਂ ਉਦਗ੍ਗਚਿਤ੍ਤਂ ਪਸਨ੍ਨਚਿਤ੍ਤਂ, ਅਥ ਯਾ ਬੁਦ੍ਧਾਨਂ ਸਾਮੁਕ੍ਕਂਸਿਕਾ ਧਮ੍ਮਦੇਸਨਾ, ਤਂ ਪਕਾਸੇਸਿ ਦੁਕ੍ਖਂ ਸਮੁਦਯਂ ਨਿਰੋਧਂ ਮਗ੍ਗਂ. ਸੇਯ੍ਯਥਾਪਿ ਨਾਮ ਸੁਦ੍ਧਂ ਵਤ੍ਥਂ ਅਪਗਤਕਾਲ਼ਕਂ ਸਮ੍ਮਦੇਵ ਰਜਨਂ ਪਟਿਗ੍ਗਣ੍ਹੇਯ੍ਯ, ਏਵਮੇਵ ਯਸਸ੍ਸ ਕੁਲਪੁਤ੍ਤਸ੍ਸ ਤਸ੍ਮਿਂਯੇਵ ਆਸਨੇ ਵਿਰਜਂ ਵੀਤਮਲਂ ਧਮ੍ਮਚਕ੍ਖੁਂ ਉਦਪਾਦਿ – ‘‘ਯਂ ਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ.

ਅਥ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਮਾਤਾ ਪਾਸਾਦਂ ਅਭਿਰੁਹਿਤ੍ਵਾ ਯਸਂ ਕੁਲਪੁਤ੍ਤਂ ਅਪਸ੍ਸਨ੍ਤੀ ਯੇਨ ਸੇਟ੍ਠਿ ਗਹਪਤਿ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਪੁਤ੍ਤੋ ਤੇ ਗਹਪਤਿ ਯਸੋ ਨ ਦਿਸ੍ਸਤੀ’’ਤਿ. ਅਥ ਖੋ, ਸੇਟ੍ਠਿ ਗਹਪਤਿ, ਚਤੁਦ੍ਦਿਸਾ ਅਸ੍ਸਦੂਤੇ ਉਯ੍ਯੋਜੇਤ੍ਵਾ ਸਾਮਂਯੇਵ ਯੇਨ ਇਸਿਪਤਨਂ ਮਿਗਦਾਯੋ ਤੇਨੁਪਸਙ੍ਕਮਿ. ਅਦ੍ਦਸਾ ਖੋ, ਸੇਟ੍ਠਿ ਗਹਪਤਿ, ਸੁਵਣ੍ਣਪਾਦੁਕਾਨਂ ਨਿਕ੍ਖੇਪਂ, ਦਿਸ੍ਵਾਨ ਤਂਯੇਵ ਅਨੁਗਮਾਸਿ. ਅਦ੍ਦਸਾ ਖੋ ਭਗਵਾ ਸੇਟ੍ਠਿਂ ਗਹਪਤਿਂ ਦੂਰਤੋਵ ਆਗਚ੍ਛਨ੍ਤਂ, ਦਿਸ੍ਵਾਨ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੇਯ੍ਯਂ, ਯਥਾ ਸੇਟ੍ਠਿ ਗਹਪਤਿ ਇਧ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਨ ਪਸ੍ਸੇਯ੍ਯਾ’’ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰੇਸਿ. ਅਥ ਖੋ ਸੇਟ੍ਠਿ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਪਿ, ਭਨ੍ਤੇ, ਭਗਵਾ ਯਸਂ ਕੁਲਪੁਤ੍ਤਂ ਪਸ੍ਸੇਯ੍ਯਾ’’ਤਿ. ਤੇਨ ਹਿ ਗਹਪਤਿ ਨਿਸੀਦ, ਅਪ੍ਪੇਵ ਨਾਮ ਇਧ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਪਸ੍ਸੇਯ੍ਯਾਸੀਤਿ. ਅਥ ਖੋ ਸੇਟ੍ਠਿ ਗਹਪਤਿ ‘‘ਇਧੇਵ ਕਿਰਾਹਂ ਨਿਸਿਨ੍ਨੋ ਇਧ ਨਿਸਿਨ੍ਨਂ ਯਸਂ ਕੁਲਪੁਤ੍ਤਂ ਪਸ੍ਸਿਸ੍ਸਾਮੀ’’ਤਿ ਹਟ੍ਠੋ ਉਦਗ੍ਗੋ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ, ਏਕਮਨ੍ਤਂ ਨਿਸਿਨ੍ਨਸ੍ਸ ਖੋ ਸੇਟ੍ਠਿਸ੍ਸ ਗਹਪਤਿਸ੍ਸ ਭਗਵਾ ਅਨੁਪੁਬ੍ਬਿਂ ਕਥਂ ਕਥੇਸਿ…ਪੇ… ਅਪਰਪ੍ਪਚ੍ਚਯੋ ਅਤ੍ਥੁ ਸਾਸਨੇ ਭਗਵਨ੍ਤਂ ਏਤਦਵੋਚ – ‘‘ਅਭਿਕ੍ਕਨ੍ਤਂ ਭਨ੍ਤੇ, ਅਭਿਕ੍ਕਨ੍ਤਂ ਭਨ੍ਤੇ, ਸੇਯ੍ਯਥਾਪਿ, ਭਨ੍ਤੇ, ਨਿਕ੍ਕੁਜ੍ਜਿਤਂ ਵਾ ਉਕ੍ਕੁਜ੍ਜੇਯ੍ਯ, ਪਟਿਚ੍ਛਨ੍ਨਂ ਵਾ ਵਿਵਰੇਯ੍ਯ ਮੂਲ਼੍ਹਸ੍ਸ ਵਾ ਮਗ੍ਗਂ ਆਚਿਕ੍ਖੇਯ੍ਯ, ਅਨ੍ਧਕਾਰੇ ਵਾ ਤੇਲਪਜ੍ਜੋਤਂ ਧਾਰੇਯ੍ਯ ‘ਚਕ੍ਖੁਮਨ੍ਤੋ ਰੂਪਾਨਿ ਦਕ੍ਖਨ੍ਤੀ’ਤਿ, ਏਵਮੇਵਂ ਭਗਵਤਾ ਅਨੇਕਪਰਿਯਾਯੇਨ ਧਮ੍ਮੋ ਪਕਾਸਿਤੋ. ਏਸਾਹਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ, ਉਪਾਸਕਂ ਮਂ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ਸੋਵ ਲੋਕੇ ਪਠਮਂ ਉਪਾਸਕੋ ਅਹੋਸਿ ਤੇਵਾਚਿਕੋ.

ਅਥ ਖੋ ਯਸਸ੍ਸ ਕੁਲਪੁਤ੍ਤਸ੍ਸ ਪਿਤੁਨੋ ਧਮ੍ਮੇ ਦੇਸਿਯਮਾਨੇ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਯਵੇਹਿ ਚਿਤ੍ਤਂ ਵਿਮੁਚ੍ਚਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਸਸ੍ਸ ਖੋ ਕੁਲਪੁਤ੍ਤਸ੍ਸ ਪਿਤੁਨੋ ਧਮ੍ਮੇ ਦੇਸਿਯਮਾਨੇ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਅਭਬ੍ਬੋ ਖੋ ਯਸੋ ਕੁਲਪੁਤ੍ਤੋ ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ, ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ, ਯਂਨੂਨਾਹਂ ਤਂ ਇਦ੍ਧਾਭਿਸਙ੍ਖਾਰਂ ਪਟਿਪ੍ਪਸ੍ਸਮ੍ਭੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਤਂ ਇਦ੍ਧਾਭਿਸਙ੍ਖਾਰਂ ਪਟਿਪ੍ਪਸ੍ਸਮ੍ਭੇਸਿ. ਅਦ੍ਦਸਾ ਖੋ ਸੇਟ੍ਠਿ ਗਹਪਤਿ ਯਸਂ ਕੁਲਪੁਤ੍ਤਂ ਨਿਸਿਨ੍ਨਂ, ਦਿਸ੍ਵਾਨ ਯਸਂ ਕੁਲਪੁਤ੍ਤਂ ਏਤਦਵੋਚ – ‘‘ਮਾਤਾ ਤੇ ਤਾਤ, ਯਸ, ਪਰਿਦੇਵਸੋਕਸਮਾਪਨ੍ਨਾ, ਦੇਹਿ ਮਾਤੁਯਾ ਜੀਵਿਤ’’ਨ੍ਤਿ. ਅਥ ਖੋ ਯਸੋ ਕੁਲਪੁਤ੍ਤੋ ਭਗਵਨ੍ਤਂ ਉਲ੍ਲੋਕੇਸਿ. ਅਥ ਖੋ ਭਗਵਾ ਸੇਟ੍ਠਿਂ ਗਹਪਤਿਂ ਏਤਦਵੋਚ – ‘‘ਤਂ ਕਿਂ ਮਞ੍ਞਸਿ, ਗਹਪਤਿ, ਯਸ੍ਸ ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਵਿਦਿਤੋ ਸੇਯ੍ਯਥਾਪਿ ਤਯਾ, ਤਸ੍ਸ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਭਬ੍ਬੋ ਨੁ ਖੋ ਸੋ, ਗਹਪਤਿ, ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ’’ਤਿ? ‘‘ਨੋ ਹੇਤਂ, ਭਨ੍ਤੇ’’. ‘‘ਯਸਸ੍ਸ ਖੋ, ਗਹਪਤਿ, ਕੁਲਪੁਤ੍ਤਸ੍ਸ ਸੇਕ੍ਖੇਨ ਞਾਣੇਨ ਸੇਕ੍ਖੇਨ ਦਸ੍ਸਨੇਨ ਧਮ੍ਮੋ ਦਿਟ੍ਠੋ ਵਿਦਿਤੋ ਸੇਯ੍ਯਥਾਪਿ ਤਯਾ, ਤਸ੍ਸ ਯਥਾਦਿਟ੍ਠਂ ਯਥਾਵਿਦਿਤਂ ਭੂਮਿਂ ਪਚ੍ਚਵੇਕ੍ਖਨ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਅਭਬ੍ਬੋ ਖੋ, ਗਹਪਤਿ, ਯਸੋ ਕੁਲਪੁਤ੍ਤੋ ਹੀਨਾਯਾਵਤ੍ਤਿਤ੍ਵਾ ਕਾਮੇ ਪਰਿਭੁਞ੍ਜਿਤੁਂ ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋ’’ਤਿ. ‘‘ਲਾਭਾ, ਭਨ੍ਤੇ, ਯਸਸ੍ਸ ਕੁਲਪੁਤ੍ਤਸ੍ਸ, ਸੁਲਦ੍ਧਂ, ਭਨ੍ਤੇ, ਯਸਸ੍ਸ ਕੁਲਪੁਤ੍ਤਸ੍ਸ, ਯਥਾ ਯਸਸ੍ਸ ਕੁਲਪੁਤ੍ਤਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਂ ਵਿਮੁਤ੍ਤਂ, ਅਧਿਵਾਸੇਤੁ ਮੇ, ਭਨ੍ਤੇ ਭਗਵਾ, ਅਜ੍ਜਤਨਾਯ ਭਤ੍ਤਂ ਯਸੇਨ ਕੁਲਪੁਤ੍ਤੇਨ ਪਚ੍ਛਾਸਮਣੇਨਾ’’ਤਿ. ‘‘ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ’’. ਅਥ ਖੋ ਸੇਟ੍ਠਿ ਗਹਪਤਿ, ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਯਸੋ ਕੁਲਪੁਤ੍ਤੋ ਅਚਿਰਪਕ੍ਕਨ੍ਤੇ ਸੇਟ੍ਠਿਮ੍ਹਿ ਗਹਪਤਿਮ੍ਹਿ ਭਗਵਨ੍ਤਂ ਏਤਦਵੋਚ – ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ‘‘ਏਹਿ ਭਿਕ੍ਖੂ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ, ਸਾਵ ਤਸ੍ਸ ਆਯਸ੍ਮਤੋ ਉਪਸਮ੍ਪਦਾ ਅਹੋਸਿ.

੧. ਅਰਹਾ ਪਨ ਹੁਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਹਾਸਮੁਦ੍ਦਂ ਓਗ੍ਗਯ੍ਹਾਤਿਆਦਿਮਾਹ. ਤਤ੍ਥ ਸਮੁਦ੍ਦਨ੍ਤਿ ਅਙ੍ਗੁਲਿਮੁਦ੍ਦਾਯ ਸਂ ਸੁਟ੍ਠੁ ਦਸ੍ਸੇਤਬ੍ਬਤੋ ਸਮੁਦ੍ਦੋ, ਅਥ ਵਾ ਸਂ ਸੁਟ੍ਠੁ ਉਦਿਯਤਿ ਖੋਭਿਯਤਿ ਪਸੋਧਿਯਤਿ ਘੋਸਨਂ ਕਰੋਨ੍ਤੋ ਆਲੁਲ਼ਿਯਤੀਤਿ ਸਮੁਦ੍ਦੋ, ਮਹਨ੍ਤੋ ਚ ਸੋ ਸਮੁਦ੍ਦੋ ਚਾਤਿ ਮਹਾਸਮੁਦ੍ਦੋ, ਤਂ ਮਹਾਸਮੁਦ੍ਦਂ. ਓਗ੍ਗਯ੍ਹਾਤਿ ਅਜ੍ਝੋਗਾਹੇਤ੍ਵਾ ਅਬ੍ਭਨ੍ਤਰਂ ਪਵਿਸਿਤ੍ਵਾ ਤਸ੍ਸ ਮਹਾਸਮੁਦ੍ਦਸ੍ਸ ਅਨ੍ਤੋ ਪਵਿਸਿਤ੍ਵਾ, ਸਾਮ੍ਯਤ੍ਥੇ ਚੇਤਂ ਉਪਯੋਗਵਚਨਨ੍ਤਿ ਦਟ੍ਠਬ੍ਬਂ. ਭਵਨਂ ਮੇ ਸੁਮਾਪਿਤਨ੍ਤਿ ਏਤ੍ਥ ਭਵਨ੍ਤਿ ਨਿਬ੍ਬਤ੍ਤਨ੍ਤਿ ਨਿਵਸਨ੍ਤਿ ਚਤੂਹਿ ਇਰਿਯਾਪਥੇਹਿ ਵਾਸਂ ਕਪ੍ਪੇਨ੍ਤਿ ਏਤ੍ਥਾਤਿ ਭਵਨਂ, ਮਯ੍ਹਂ ਤਂ ਭਵਨਂ ਤਂ ਵਿਮਾਨਂ ਤਂ ਪਾਸਾਦਂ ਪਞ੍ਚਪਾਕਾਰਕੂਟਾਗਾਰੇਹਿ ਸਂ ਸੁਟ੍ਠੁ ਮਾਪਿਤਂ ਨਗਰਂ, ਅਤ੍ਤਨੋ ਬਲੇਨ ਸੁਟ੍ਠੁ ਨਿਮ੍ਮਿਤਨ੍ਤਿ ਅਤ੍ਥੋ. ਸੁਨਿਮ੍ਮਿਤਾ ਪੋਕ੍ਖਰਣੀਤਿ ਸੁਮਹਨ੍ਤਾ ਹੁਤ੍ਵਾ ਭੂਤਾ ਇਤਾ ਗਤਾ ਪਵਤ੍ਤਾ ਖਣਿਤਾ ਕਤਾਤਿ ਪੋਕ੍ਖਰਣੀ, ਮਚ੍ਛਕਚ੍ਛਪਪੁਪ੍ਫਪੁਲਿਨਤਿਤ੍ਥਮਧੁਰੋਦਕਾਦੀਹਿ ਸੁਟ੍ਠੁ ਨਿਬ੍ਬਤ੍ਤਾ ਨਿਮ੍ਮਿਤਾਤਿ ਅਤ੍ਥੋ. ਚਕ੍ਕਵਾਕੂਪਕੂਜਿਤਾਤਿ ਚਕ੍ਕਵਾਕਕੁਕ੍ਕੁਟਹਂਸਾਦੀਹਿ ਕੂਜਿਤਾ ਘੋਸਿਤਾ ਨਾਦਿਤਾ ਸਾ ਪੋਕ੍ਖਰਣੀਤਿ ਸਮ੍ਬਨ੍ਧੋ. ਇਤੋ ਪਰਂ ਨਦੀਵਨਦ੍ਵਿਪਦਚਤੁਪ੍ਪਦਪਾਦਪਪਕ੍ਖੀਨਂ ਵਣ੍ਣਞ੍ਚ ਸੁਮੇਧਸ੍ਸ ਭਗਵਤੋ ਦਸ੍ਸਨਞ੍ਚ ਨਿਮਨ੍ਤੇਤ੍ਵਾ ਸੁਮੇਧਸ੍ਸ ਭਗਵਤੋ ਦਾਨਕ੍ਕਮਞ੍ਚ ਸੁਵਿਞ੍ਞੇਯ੍ਯਮੇਵ.

ਲੋਕਾਹੁਤਿਪਟਿਗ੍ਗਹਨ੍ਤਿ ਏਤ੍ਥ ਲੋਕੇ ਆਹੁਤਿ ਲੋਕਾਹੁਤਿ, ਕਾਮਰੂਪਾਰੂਪਸਙ੍ਖਾਤਸ੍ਸ ਲੋਕਸ੍ਸ ਆਹੁਤਿਂ ਪੂਜਾਸਕ੍ਕਾਰਂ ਪਟਿਗ੍ਗਣ੍ਹਾਤੀਤਿ ਲੋਕਾਹੁਤਿਪਟਿਗ੍ਗਹਂ, ਸੁਮੇਧਂ ਭਗਵਨ੍ਤਨ੍ਤਿ ਅਤ੍ਥੋ. ਸੇਸਂ ਬ੍ਯਾਕਰਣਦਾਨਞ੍ਚ ਅਰਹਤ੍ਤਪ੍ਪਤ੍ਤਫਲਞ੍ਚ ਸੁਵਿਞ੍ਞੇਯ੍ਯਮੇਵਾਤਿ.

ਯਸਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਨਦੀਕਸ੍ਸਪਤ੍ਥੇਰਅਪਦਾਨਵਣ੍ਣਨਾ

ਦੁਤਿਯਾਪਦਾਨੇ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਨਦੀਕਸ੍ਸਪਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਸਤ੍ਥਾਰਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਤ੍ਤਨਾ ਰੋਪਿਤਸ੍ਸ ਅਮ੍ਬਰੁਕ੍ਖਸ੍ਸ ਪਠਮੁਪ੍ਪਨ੍ਨਂ ਮਨੋਸਿਲਾਵਣ੍ਣਂ ਏਕਂ ਅਮ੍ਬਫਲਂ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਮਗਧਰਟ੍ਠੇ ਬ੍ਰਾਹ੍ਮਣਕੁਲੇ ਉਰੁਵੇਲਕਸ੍ਸਪਸ੍ਸ ਭਾਤਾ ਹੁਤ੍ਵਾ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਨਿਸ੍ਸਰਣਜ੍ਝਾਸਯਤਾਯ ਘਰਾਵਾਸਂ ਅਨਿਚ੍ਛਨ੍ਤੋ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਤੀਹਿ ਤਾਪਸਸਤੇਹਿ ਸਦ੍ਧਿਂ ਨੇਰਞ੍ਜਰਾਯ ਨਦਿਯਾ ਤੀਰੇ ਅਸ੍ਸਮਂ ਮਾਪੇਤ੍ਵਾ ਵਿਹਰਤਿ. ਨਦੀਤੀਰੇ ਵਸਨਤੋ ਕਸ੍ਸਪਗੋਤ੍ਤਤਾਯ ਚ ਨਦੀਕਸ੍ਸਪੋਤਿ ਸਮਞ੍ਞਾ ਅਹੋਸਿ. ਤਸ੍ਸ ਭਗਵਾ ਸਪਰਿਸਸ੍ਸ ਏਹਿਭਿਕ੍ਖੁਭਾਵੇਨ ਉਪਸਮ੍ਪਦਂ ਅਦਾਸਿ. ਸੋ ਭਗਵਤੋ ਗਯਾਸੀਸੇ ਆਦਿਤ੍ਤਪਰਿਯਾਯ ਦੇਸਨਾਯ (ਮਹਾਵ. ੫੪; ਸਂ. ਨਿ. ੪.੨੮) ਅਰਹਤ੍ਤੇ ਪਤਿਟ੍ਠਾਸਿ.

ਤਤ੍ਰਾਯਂ ਅਨੁਪੁਬ੍ਬਿਕਥਾ – ਸਤ੍ਥਾ ਯਸਂ ਕੁਲਪੁਤ੍ਤਂ ਪਬ੍ਬਾਜੇਤ੍ਵਾ ਉਰੁਵੇਲਾਯਂ ਤਯੋ ਭਾਤਿਕਜਟਿਲੇ ਦਮੇਤੁਂ ਯੇਨ ਉਰੁਵੇਲਾ ਤਦਵਸਰਿ. ਤੇਨ ਖੋ ਪਨ ਸਮਯੇਨ ਉਰੁਵੇਲਾਯਂ ਤਯੋ ਜਟਿਲਾ ਪਟਿਵਸਨ੍ਤਿ ਉਰੁਵੇਲਕਸ੍ਸਪੋ ਨਦੀਕਸ੍ਸਪੋ ਗਯਾਕਸ੍ਸਪੋਤਿ, ਤੇਸੁ ਉਰੁਵੇਲਕਸ੍ਸਪੋ ਜਟਿਲੋ ਪਞ੍ਚਨ੍ਨਂ ਜਟਿਲਸਤਾਨਂ ਨਾਯਕੋ ਹੋਤਿ ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ, ਨਦੀਕਸ੍ਸਪੋ ਜਟਿਲੋ ਤਿਣ੍ਣਂ ਜਟਿਲਸਤਾਨਂ ਨਾਯਕੋ ਹੋਤਿ ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ, ਗਯਾਕਸ੍ਸਪੋ ਜਟਿਲੋ ਦ੍ਵਿਨ੍ਨਂ ਜਟਿਲਸਤਾਨਂ ਨਾਯਕੋ ਹੋਤਿ ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ. ਅਥ ਖੋ ਭਗਵਾ ਯੇਨ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਅਸ੍ਸਮੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਸਚੇ ਤੇ, ਕਸ੍ਸਪ, ਅਗਰੁ, ਵਸੇਯ੍ਯਾਮ ਏਕਰਤ੍ਤਂ ਅਗ੍ਯਾਗਾਰੇ’’ਤਿ. ਨ ਖੋ ਮੇ, ਮਹਾਸਮਣ, ਗਰੁ, ਚਣ੍ਡੇਤ੍ਥ ਨਾਗਰਾਜਾ ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ, ਸੋ ਤਂ ਮਾ ਵਿਹੇਠੇਸੀਤਿ. ਦੁਤਿਯਮ੍ਪਿ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ…ਪੇ… ਤਤਿਯਮ੍ਪਿ…ਪੇ… ਸੋ ਤਂ ਮਾ ਵਿਹੇਠੇਸੀਤਿ. ਅਪ੍ਪੇਵ ਮਂ ਨ ਵਿਹੇਠੇਯ੍ਯ, ਇਙ੍ਘ ਤ੍ਵਂ, ਕਸ੍ਸਪ, ਅਨੁਜਾਨਾਹਿ ਅਗ੍ਯਾਗਾਰਨ੍ਤਿ. ਵਿਹਰ, ਮਹਾਸਮਣ, ਯਥਾਸੁਖਨ੍ਤਿ. ਅਥ ਖੋ ਭਗਵਾ ਅਗ੍ਯਾਗਾਰਂ ਪਵਿਸਿਤ੍ਵਾ ਤਿਣਸਨ੍ਥਾਰਕਂ ਪਞ੍ਞਪੇਤ੍ਵਾ ਨਿਸੀਦਿ ਪਲ੍ਲਙ੍ਕਂ ਆਭੁਜਿਤ੍ਵਾ ਉਜੁਂ ਕਾਯਂ ਪਣਿਧਾਯ ਪਰਿਮੁਖਂ ਸਤਿਂ ਉਪਟ੍ਠਪੇਤ੍ਵਾ.

ਅਦ੍ਦਸਾ ਖੋ ਸੋ ਨਾਗੋ ਭਗਵਨ੍ਤਂ ਪਵਿਟ੍ਠਂ, ਦਿਸ੍ਵਾ ਦੁਮ੍ਮਨੋ ਪਧੂਪਾਯਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਇਮਸ੍ਸ ਨਾਗਸ੍ਸ ਅਨੁਪਹਚ੍ਚ ਛਵਿਞ੍ਚ ਚਮ੍ਮਞ੍ਚ ਮਂਸਞ੍ਚ ਨ੍ਹਾਰੁਞ੍ਚ ਅਟ੍ਠਿਞ੍ਚ ਅਟ੍ਠਿਮਿਞ੍ਜਞ੍ਚ ਤੇਜਸਾ ਤੇਜਂ ਪਰਿਯਾਦਿਯੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਰਿਤ੍ਵਾ ਪਧੂਪਾਯਿ. ਅਥ ਖੋ ਸੋ ਨਾਗੋ ਮਕ੍ਖਂ ਅਸਹਮਾਨੋ ਪਜ੍ਜਲਿ. ਭਗਵਾਪਿ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਜ੍ਜਲਿ. ਉਭਿਨ੍ਨਂ ਸਜੋਤਿਭੂਤਾਨਂ ਅਗ੍ਯਾਗਾਰਂ ਆਦਿਤ੍ਤਂ ਵਿਯ ਹੋਤਿ ਸਮ੍ਪਜ੍ਜਲਿਤਂ ਸਜੋਤਿਭੂਤਂ. ਅਥ ਖੋ ਤੇ ਜਟਿਲਾ ਅਗ੍ਯਾਗਾਰਂ ਪਰਿਵਾਰੇਤ੍ਵਾ ਏਵਮਾਹਂਸੁ – ‘‘ਅਭਿਰੂਪੋ ਵਤ, ਭੋ, ਮਹਾਸਮਣੋ ਨਾਗੇਨ ਵਿਹੇਠਿਯਤੀ’’ਤਿ. ਅਥ ਖੋ ਭਗਵਾ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਤਸ੍ਸ ਨਾਗਸ੍ਸ ਅਨੁਪਹਚ੍ਚ ਛਵਿਞ੍ਚ ਚਮ੍ਮਞ੍ਚ ਮਂਸਞ੍ਚ ਨ੍ਹਾਰੁਞ੍ਚ ਅਟ੍ਠਿਞ੍ਚ ਅਟ੍ਠਿਮਿਞ੍ਜਞ੍ਚ ਤੇਜਸਾ ਤੇਜਂ ਪਰਿਯਾਦਿਯਿਤ੍ਵਾ ਪਤ੍ਤੇ ਪਕ੍ਖਿਪਿਤ੍ਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਦਸ੍ਸੇਸਿ – ‘‘ਅਯਂ ਤੇ, ਕਸ੍ਸਪ, ਨਾਗੋ ਪਰਿਯਾਦਿਨ੍ਨੋ ਅਸ੍ਸ ਤੇਜਸਾ ਤੇਜੋ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚਣ੍ਡਸ੍ਸ ਨਾਗਰਾਜਸ੍ਸ ਇਦ੍ਧਿਮਤੋ ਆਸਿਵਿਸਸ੍ਸ ਘੋਰਵਿਸਸ੍ਸ ਤੇਜਸਾ ਤੇਜਂ ਪਰਿਯਾਦਿਯਿਸ੍ਸਤਿ, ਨ ਤ੍ਵੇਵ ਖੋ ਅਰਹਾ ਯਥਾ ਅਹ’’ਨ੍ਤਿ.

‘‘ਨੇਰਞ੍ਜਰਾਯਂ ਭਗਵਾ, ਉਰੁਵੇਲਕਸ੍ਸਪਂ ਜਟਿਲਂ ਅਵੋਚ;

ਸਚੇ ਤੇ ਕਸ੍ਸਪ ਅਗਰੁ, ਵਿਹਰੇਮੁ ਅਜ੍ਜਣ੍ਹੋ ਅਗ੍ਗਿਸਾਲਮ੍ਹੀ’’ਤਿ.

‘‘ਨ ਖੋ ਮੇ ਮਹਾਸਮਣ ਗਰੁ, ਫਾਸੁਕਾਮੋਵ ਤਂ ਨਿਵਾਰੇਮਿ;

ਚਣ੍ਡੇਤ੍ਥ ਨਾਗਰਾਜਾ, ਇਦ੍ਧਿਮਾ ਆਸਿਵਿਸੋ ਘੋਰਵਿਸੋ;

ਸੋ ਤਂ ਮਾ ਵਿਹੇਠੇਸੀ’’ਤਿ.

‘‘ਅਪ੍ਪੇਵ ਮਂ ਨ ਵਿਹੇਠੇਯ੍ਯ, ਇਙ੍ਘ ਤ੍ਵਂ ਕਸ੍ਸਪ ਅਨੁਜਾਨਾਹਿ ਅਗ੍ਯਾਗਾਰਨ੍ਤਿ;

ਦਿਨ੍ਨਨ੍ਤਿ ਨਂ ਵਿਦਿਤ੍ਵਾ, ਅਭੀਤੋ ਪਾਵਿਸਿ ਭਯਮਤੀਤੋ.

‘‘ਦਿਸ੍ਵਾ ਇਸਿਂ ਪਵਿਟ੍ਠਂ, ਅਹਿਨਾਗੋ ਦੁਮ੍ਮਨੋ ਪਧੂਪਾਯਿ;

ਸੁਮਨਮਨਸੋ ਅਧਿਮਨੋ, ਮਨੁਸ੍ਸਨਾਗੋਪਿ ਤਤ੍ਥ ਪਧੂਪਾਯਿ.

‘‘ਮਕ੍ਖਞ੍ਚ ਅਸਹਮਾਨੋ, ਅਹਿਨਾਗੋ ਪਾਵਕੋਵ ਪਜ੍ਜਲਿ;

ਤੇਜੋਧਾਤੁਸੁਕੁਸਲੋ, ਮਨੁਸ੍ਸਨਾਗੋਪਿ ਤਤ੍ਥ ਪਜ੍ਜਲਿ.

‘‘ਉਭਿਨ੍ਨਂ ਸਜੋਤਿਭੂਤਾਨਂ,

ਅਗ੍ਯਾਗਾਰਂ ਆਦਿਤ੍ਤਂ ਹੋਤਿ ਸਮ੍ਪਜ੍ਜਲਿਤਂ ਸਜੋਤਿਭੂਤਂ;

ਉਦਿਚ੍ਛਰੇ ਜਟਿਲਾ, ਅਭਿਰੂਪੋ ਵਤ ਭੋ ਮਹਾਸਮਣੋ;

ਨਾਗੇਨ ਵਿਹੇਠਿਯਤੀਤਿ ਭਣਨ੍ਤਿ.

‘‘ਅਥ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ, ਹਤਾ ਨਾਗਸ੍ਸ ਅਚ੍ਚਿਯੋ ਹੋਨ੍ਤਿ;

ਇਦ੍ਧਿਮਤੋ ਪਨ ਠਿਤਾ, ਅਨੇਕਵਣ੍ਣਾ ਅਚ੍ਚਿਯੋ ਹੋਨ੍ਤਿ.

‘‘ਨੀਲਾ ਅਥ ਲੋਹਿਤਿਕਾ, ਮਞ੍ਜਿਟ੍ਠਾ ਪੀਤਕਾ ਫਲਿਕਵਣ੍ਣਾਯੋ;

ਅਙ੍ਗੀਰਸਸ੍ਸ ਕਾਯੇ, ਅਨੇਕਵਣ੍ਣਾ ਅਚ੍ਚਿਯੋ ਹੋਨ੍ਤਿ.

‘‘ਪਤ੍ਤਮ੍ਹਿ ਓਦਹਿਤ੍ਵਾ, ਅਹਿਨਾਗਂ ਬ੍ਰਾਹ੍ਮਣਸ੍ਸ ਦਸ੍ਸੇਸਿ;

ਅਯਂ ਤੇ ਕਸ੍ਸਪ ਨਾਗੋ, ਪਰਿਯਾਦਿਨ੍ਨੋ ਅਸ੍ਸ ਤੇਜਸਾ ਤੇਜੋ’’ਤਿ.

ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਤੋ ਇਮਿਨਾ ਇਦ੍ਧਿਪਾਟਿਹਾਰਿਯੇਨ ਅਭਿਪ੍ਪਸਨ੍ਨੋ ਭਗਵਨ੍ਤਂ ਏਤਦਵੋਚ – ‘‘ਇਧੇਵ, ਮਹਾਸਮਣ, ਵਿਹਰ, ਅਹਂ ਤੇ ਧੁਵਭਤ੍ਤੇਨਾ’’ਤਿ.

ਪਠਮਂ ਪਾਟਿਹਾਰਿਯਂ.

ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਅਸ੍ਸਮਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਵਨਸਣ੍ਡੇ ਵਿਹਾਸਿ. ਅਥ ਖੋ ਚਤ੍ਤਾਰੋ ਮਹਾਰਾਜਾਨੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਚਤੁਦ੍ਦਿਸਾ ਅਟ੍ਠਂਸੁ ਸੇਯ੍ਯਥਾਪਿ ਮਹਨ੍ਤਾ ਅਗ੍ਗਿਕ੍ਖਨ੍ਧਾ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ, ਤੇ ਨੁ ਖੋ ਤੇ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਚਤੁਦ੍ਦਿਸਾ ਅਟ੍ਠਂਸੁ ਸੇਯ੍ਯਥਾਪਿ ਮਹਨ੍ਤਾ ਅਗ੍ਗਿਕ੍ਖਨ੍ਧਾ’’ਤਿ. ਏਤੇ ਖੋ, ਕਸ੍ਸਪ, ਚਤ੍ਤਾਰੋ ਮਹਾਰਾਜਾਨੋ ਯੇਨਾਹਂ ਤੇਨੁਪਸਙ੍ਕਮਿਂਸੁ ਧਮ੍ਮਸ੍ਸਵਨਾਯਾਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚਤ੍ਤਾਰੋਪਿ ਮਹਾਰਾਜਾਨੋ ਉਪਸਙ੍ਕਮਿਸ੍ਸਨ੍ਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਦੁਤਿਯਂ ਪਾਟਿਹਾਰਿਯਂ.

ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ, ਕੋ ਨੁ ਖੋ ਸੋ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿ. ਏਸੋ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਯੇਨਾਹਂ ਤੇਨੁਪਸਙ੍ਕਮਿ ਧਮ੍ਮਸ੍ਸਵਨਾਯਾਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਸਕ੍ਕੋਪਿ ਦੇਵਾਨਮਿਨ੍ਦੋ ਉਪਸਙ੍ਕਮਿਸ੍ਸਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਤਤਿਯਂ ਪਾਟਿਹਾਰਿਯਂ.

ਅਥ ਖੋ ਬ੍ਰਹ੍ਮਾ ਸਹਮ੍ਪਤਿ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ, ਕੋ ਨੁ ਖੋ ਸੋ, ਮਹਾਸਮਣ, ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣੋ ਕੇਵਲਕਪ੍ਪਂ ਵਨਸਣ੍ਡਂ ਓਭਾਸੇਤ੍ਵਾ ਯੇਨ ਤ੍ਵਂ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਾਸਿ ਸੇਯ੍ਯਥਾਪਿ ਮਹਾਅਗ੍ਗਿਕ੍ਖਨ੍ਧੋ ਪੁਰਿਮਾਹਿ ਵਣ੍ਣਨਿਭਾਹਿ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿ. ਏਸੋ ਖੋ, ਕਸ੍ਸਪ, ਬ੍ਰਹ੍ਮਾ ਸਹਮ੍ਪਤਿ ਯੇਨਾਹਂ ਤੇਨੁਪਸਙ੍ਕਮਿ ਧਮ੍ਮਸ੍ਸਵਨਾਯਾਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਬ੍ਰਹ੍ਮਾਪਿ ਸਹਮ੍ਪਤਿ ਉਪਸਙ੍ਕਮਿਸ੍ਸਤਿ ਧਮ੍ਮਸ੍ਸਵਨਾਯ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਚਤੁਤ੍ਥਂ ਪਾਟਿਹਾਰਿਯਂ.

ਤੇਨ ਖੋ ਪਨ ਸਮਯੇਨ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ ਹੋਤਿ, ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਤੁਕਾਮਾ ਹੋਨ੍ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਏਤਰਹਿ ਖੋ ਮੇ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ, ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਸ੍ਸਨ੍ਤਿ, ਸਚੇ ਮਹਾਸਮਣੋ ਮਹਾਜਨਕਾਯੇ ਇਦ੍ਧਿਪਾਟਿਹਾਰਿਯਂ ਕਰਿਸ੍ਸਤਿ, ਮਹਾਸਮਣਸ੍ਸ ਲਾਭਸਕ੍ਕਾਰੋ ਅਭਿਵਡ੍ਢਿਸ੍ਸਤਿ, ਮਮ ਲਾਭਸਕ੍ਕਾਰੋ ਪਰਿਹਾਯਿਸ੍ਸਤਿ, ਅਹੋ ਨੂਨ ਮਹਾਸਮਣੋ ਸ੍ਵਾਤਨਾਯ ਨਾਗਚ੍ਛੇਯ੍ਯਾ’’ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਉਤ੍ਤਰਕੁਰੁਂ ਗਨ੍ਤ੍ਵਾ ਤਤੋ ਪਿਣ੍ਡਪਾਤਂ ਆਹਰਿਤ੍ਵਾ ਅਨੋਤਤ੍ਤਦਹੇ ਪਰਿਭੁਞ੍ਜਿਤ੍ਵਾ ਤਤ੍ਥੇਵ ਦਿਵਾਵਿਹਾਰਂ ਅਕਾਸਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ, ਕਿਂ ਨੁ ਖੋ, ਮਹਾਸਮਣ, ਹਿਯ੍ਯੋ ਨਾਗਮਾਸਿ, ਅਪਿਚ ਮਯਂ ਤਂ ਸਰਾਮ, ‘ਕਿਂ ਨੁ ਖੋ ਮਹਾਸਮਣੋ ਨਾਗਚ੍ਛਤੀ’ਤਿ, ਖਾਦਨੀਯਸ੍ਸ ਚ ਭੋਜਨੀਯਸ੍ਸ ਚ ਤੇ ਪਟਿਵੀਸੋ ਠਪਿਤੋ’’ਤਿ. ਨਨੁ ਤੇ, ਕਸ੍ਸਪ, ਏਤਦਹੋਸਿ – ‘‘ਏਤਰਹਿ ਖੋ ਮੇ ਮਹਾਯਞ੍ਞੋ ਪਚ੍ਚੁਪਟ੍ਠਿਤੋ ਕੇਵਲਕਪ੍ਪਾ ਚ ਅਙ੍ਗਮਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਸ੍ਸਨ੍ਤਿ, ਸਚੇ ਮਹਾਸਮਣੋ ਮਹਾਜਨਕਾਯੇ ਇਦ੍ਧਿਪਾਟਿਹਾਰਿਯਂ ਕਰਿਸ੍ਸਤਿ, ਮਹਾਸਮਣਸ੍ਸ ਲਾਭਸਕ੍ਕਾਰੋ ਅਭਿਵਡ੍ਢਿਸ੍ਸਤਿ, ਮਮ ਲਾਭਸਕ੍ਕਾਰੋ ਪਰਿਹਾਯਿਸ੍ਸਤਿ, ਅਹੋ ਨੂਨ ਮਹਾਸਮਣੋ ਸ੍ਵਾਤਨਾਯ ਨਾਗਚ੍ਛੇਯ੍ਯਾ’’ਤਿ, ਸੋ ਖੋ ਅਹਂ, ਕਸ੍ਸਪ, ਤਵ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਉਤ੍ਤਰਕੁਰੁਂ ਗਨ੍ਤ੍ਵਾ ਤਤੋ ਪਿਣ੍ਡਪਾਤਂ ਆਹਰਿਤ੍ਵਾ ਅਨੋਤਤ੍ਤਦਹੇ ਪਰਿਭੁਞ੍ਜਿਤ੍ਵਾ ਤਤ੍ਥੇਵ ਦਿਵਾਵਿਹਾਰਂ ਅਕਾਸਿਨ੍ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਚੇਤਸਾਪਿ ਚਿਤ੍ਤਂ ਪਜਾਨਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਪਞ੍ਚਮਂ ਪਾਟਿਹਾਰਿਯਂ.

ਤੇਨ ਖੋ ਪਨ ਸਮਯੇਨ ਭਗਵਤੋ ਪਂਸੁਕੂਲਂ ਉਪ੍ਪਨ੍ਨਂ ਹੋਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਤ੍ਥ ਨੁ ਖੋ ਅਹਂ ਪਂਸੁਕੂਲਂ ਧੋਵੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਧੋਵਤੂ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਪਰਿਮਦ੍ਦੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਪਰਿਮਦ੍ਦਤੂ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਆਲਮ੍ਬਿਤ੍ਵਾ ਉਤ੍ਤਰੇਯ੍ਯ’’ਨ੍ਤਿ? ਅਥ ਖੋ ਕਕੁਧੇ ਅਧਿਵਤ੍ਥਾ ਦੇਵਤਾ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਸਾਖਂ ਓਨਾਮੇਸਿ – ‘‘ਇਧ, ਭਨ੍ਤੇ ਭਗਵਾ, ਆਲਮ੍ਬਿਤ੍ਵਾ ਉਤ੍ਤਰਤੂ’’ਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਵਿਸ੍ਸਜ੍ਜੇਯ੍ਯ’’ਨ੍ਤਿ? ਅਥ ਖੋ ਸਕ੍ਕੋ ਦੇਵਾਨਮਿਨ੍ਦੋ ਭਗਵਤੋ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਵਿਸ੍ਸਜ੍ਜੇਤੂ’’ਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤਂ, ਕਿਂ ਨੁ ਖੋ, ਮਹਾਸਮਣ, ਨਾਯਂ ਪੁਬ੍ਬੇ ਇਧ ਪੋਕ੍ਖਰਣੀ ਸਾਯਂ ਇਧ ਪੋਕ੍ਖਰਣੀ, ਨਯਿਮਾ ਸਿਲਾ ਪੁਬ੍ਬੇ ਉਪਨਿਕ੍ਖਿਤ੍ਤਾ, ਕੇਨਿਮਾ ਸਿਲਾ ਉਪਨਿਕ੍ਖਿਤ੍ਤਾ, ਨਯਿਮਸ੍ਸ ਕਕੁਧਸ੍ਸ ਪੁਬ੍ਬੇ ਸਾਖਾ ਓਨਤਾ, ਸਾਯਂ ਸਾਖਾ ਓਨਤਾ’’ਤਿ? ਇਧ ਮੇ, ਕਸ੍ਸਪ, ਪਂਸੁਕੂਲਂ ਉਪ੍ਪਨ੍ਨਂ ਅਹੋਸਿ, ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਤ੍ਥ ਨੁ ਖੋ ਅਹਂ ਪਂਸੁਕੂਲਂ ਧੋਵੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਪਾਣਿਨਾ ਪੋਕ੍ਖਰਣਿਂ ਖਣਿਤ੍ਵਾ ਮਂ ਏਤਦਵੋਚ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਧੋਵਤੂ’’ਤਿ. ਸਾਯਂ, ਕਸ੍ਸਪ, ਅਮਨੁਸ੍ਸੇਨ ਪਾਣਿਨਾ ਖਣਿਤਾ ਪੋਕ੍ਖਰਣੀ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਪਰਿਮਦ੍ਦੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਪਰਿਮਦ੍ਦਤੂ’’ਤਿ? ਸਾਯਂ, ਕਸ੍ਸਪ, ਅਮਨੁਸ੍ਸੇਨ ਉਪਨਿਕ੍ਖਿਤ੍ਤਾ ਸਿਲਾ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਆਲਮ੍ਬਿਤ੍ਵਾ ਉਤ੍ਤਰੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਕਕੁਧੇ ਅਧਿਵਤ੍ਥਾ ਦੇਵਤਾ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਸਾਖਂ ਓਨਾਮੇਸਿ – ‘‘ਇਧ, ਭਨ੍ਤੇ ਭਗਵਾ, ਆਲਮ੍ਬਿਤ੍ਵਾ ਉਤ੍ਤਰਤੂ’’ਤਿ? ਸ੍ਵਾਯਂ ਆਹਰਹਤ੍ਥੋ ਕਕੁਧੋ. ਤਸ੍ਸ ਮਯ੍ਹਂ, ਕਸ੍ਸਪ, ਏਤਦਹੋਸਿ – ‘‘ਕਿਮ੍ਹਿ ਨੁ ਖੋ ਅਹਂ ਪਂਸੁਕੂਲਂ ਵਿਸ੍ਸਜ੍ਜੇਯ੍ਯ’’ਨ੍ਤਿ? ਅਥ ਖੋ, ਕਸ੍ਸਪ, ਸਕ੍ਕੋ ਦੇਵਾਨਮਿਨ੍ਦੋ ਮਮ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ ਮਹਤਿਂ ਸਿਲਂ ਉਪਨਿਕ੍ਖਿਪਿ – ‘‘ਇਧ, ਭਨ੍ਤੇ ਭਗਵਾ, ਪਂਸੁਕੂਲਂ ਵਿਸ੍ਸਜ੍ਜੇਤੂ’’ਤਿ? ਸਾਯਂ, ਕਸ੍ਸਪ, ਅਮਨੁਸ੍ਸੇਨ ਉਪਨਿਕ੍ਖਿਤ੍ਤਾ ਸਿਲਾਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਸਕ੍ਕੋਪਿ ਦੇਵਾਨਮਿਨ੍ਦੋ ਵੇਯ੍ਯਾਵਚ੍ਚਂ ਕਰਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਸਿ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ‘‘ਗਚ੍ਛ ਤ੍ਵਂ, ਕਸ੍ਸਪ, ਆਯਾਮਹ’’ਨ੍ਤਿ ਉਰੁਵੇਲਕਸ੍ਸਪਂ ਜਟਿਲਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ਜਮ੍ਬੁਦੀਪੋ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਅਗ੍ਯਾਗਾਰੇ ਨਿਸਿਨ੍ਨਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਕਤਮੇਨ ਤ੍ਵਂ, ਮਹਾਸਮਣ, ਮਗ੍ਗੇਨ ਆਗਤੋ, ਅਹਂ ਤਯਾ ਪਠਮਤਰਂ ਪਕ੍ਕਨ੍ਤੋ, ਸੋ ਤ੍ਵਂ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ’’ਤਿ? ‘‘ਇਧਾਹਂ, ਕਸ੍ਸਪ, ਤਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ਜਮ੍ਬੁਦੀਪੋ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ. ਇਦਂ ਖੋ, ਕਸ੍ਸਪ, ਜਮ੍ਬੁਫਲਂ ਵਣ੍ਣਸਮ੍ਪਨ੍ਨਂ ਗਨ੍ਧਸਮ੍ਪਨ੍ਨਂ ਰਸਸਮ੍ਪਨ੍ਨਂ, ਸਚੇ ਆਕਙ੍ਖਸਿ ਪਰਿਭੁਞ੍ਜਾ’’ਤਿ. ‘‘ਅਲਂ, ਮਹਾਸਮਣ, ਤ੍ਵਂਯੇਵ ਤਂ ਅਰਹਸਿ, ਤ੍ਵਂਯੇਵ ਤਂ ਪਰਿਭੁਞ੍ਜਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਮਂ ਪਠਮਤਰਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ਜਮ੍ਬੁਦੀਪੋ ਪਞ੍ਞਾਯਤਿ, ਤਤੋ ਫਲਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਭਤ੍ਤਂ ਭੁਞ੍ਜਿਤ੍ਵਾ ਤਸ੍ਮਿਂਯੇਵ ਵਨਸਣ੍ਡੇ ਵਿਹਾਸਿ.

ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਤੋ ਕਾਲਂ ਆਰੋਚੇਸਿ – ‘‘ਕਾਲੋ, ਮਹਾਸਮਣ, ਨਿਟ੍ਠਿਤਂ ਭਤ੍ਤ’’ਨ੍ਤਿ. ‘‘ਗਚ੍ਛ ਤ੍ਵਂ, ਕਸ੍ਸਪ, ਆਯਾਮਹ’’ਨ੍ਤਿ ਉਰੁਵੇਲਕਸ੍ਸਪਂ ਜਟਿਲਂ ਉਯ੍ਯੋਜੇਤ੍ਵਾ ਯਾਯ ਜਮ੍ਬੁਯਾ ਜਮ੍ਬੁਦੀਪੋ ਪਞ੍ਞਾਯਤਿ, ਤਸ੍ਸਾ ਅਵਿਦੂਰੇ ਅਮ੍ਬੋ…ਪੇ… ਤਸ੍ਸਾ ਅਵਿਦੂਰੇ ਆਮਲਕੀ…ਪੇ… ਤਸ੍ਸਾ ਅਵਿਦੂਰੇ ਹਰੀਤਕੀ…ਪੇ… ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਅਗ੍ਯਾਗਾਰੇ ਨਿਸਿਨ੍ਨਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਕਤਮੇਨ ਤ੍ਵਂ, ਮਹਾਸਮਣ, ਮਗ੍ਗੇਨ ਆਗਤੋ, ਅਹਂ ਤਯਾ ਪਠਮਤਰਂ ਪਕ੍ਕਨ੍ਤੋ, ਸੋ ਤ੍ਵਂ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ’’ਤਿ? ‘‘ਇਧਾਹਂ, ਕਸ੍ਸਪ, ਤਂ ਉਯ੍ਯੋਜੇਤ੍ਵਾ ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸਿਨ੍ਨੋ. ਇਦਂ ਖੋ, ਕਸ੍ਸਪ, ਪਾਰਿਚ੍ਛਤ੍ਤਕਪੁਪ੍ਫਂ ਵਣ੍ਣਸਮ੍ਪਨ੍ਨਂ ਗਨ੍ਧਸਮ੍ਪਨ੍ਨਂ, ਸਚੇ ਆਕਙ੍ਖਸਿ ਗਣ੍ਹਾ’’ਤਿ. ‘‘ਅਲਂ, ਮਹਾਸਮਣ, ਤ੍ਵਂਯੇਵ ਤਂ ਅਰਹਸਿ, ਤ੍ਵਂਯੇਵ ਤਂ ਗਣ੍ਹਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਮਂ ਪਠਮਤਰਂ ਉਯ੍ਯੋਜੇਤ੍ਵਾ ਤਾਵਤਿਂਸਂ ਗਨ੍ਤ੍ਵਾ ਪਾਰਿਚ੍ਛਤ੍ਤਕਪੁਪ੍ਫਂ ਗਹੇਤ੍ਵਾ ਪਠਮਤਰਂ ਆਗਨ੍ਤ੍ਵਾ ਅਗ੍ਯਾਗਾਰੇ ਨਿਸੀਦਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤੁਕਾਮਾ ਨ ਸਕ੍ਕੋਨ੍ਤਿ ਕਟ੍ਠਾਨਿ ਫਾਲੇਤੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ ਯਥਾ ਮਯਂ ਨ ਸਕ੍ਕੋਮ ਕਟ੍ਠਾਨਿ ਫਾਲੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਫਾਲਿਯਨ੍ਤੁ, ਕਸ੍ਸਪ, ਕਟ੍ਠਾਨੀ’’ਤਿ. ‘‘ਫਾਲਿਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਕਟ੍ਠਸਤਾਨਿ ਫਾਲਿਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਕਟ੍ਠਾਨਿਪਿ ਫਾਲਿਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤੁਕਾਮਾ ਨ ਸਕ੍ਕੋਨ੍ਤਿ ਅਗ੍ਗਿਂ ਉਜ੍ਜਲੇਤੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ ਯਥਾ ਮਯਂ ਨ ਸਕ੍ਕੋਮ ਅਗ੍ਗਿਂ ਉਜ੍ਜਲੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਉਜ੍ਜਲਿਯਨ੍ਤੁ, ਕਸ੍ਸਪ, ਅਗ੍ਗੀ’’ਤਿ. ‘‘ਉਜ੍ਜਲਿਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਅਗ੍ਗਿਸਤਾਨਿ ਉਜ੍ਜਲਿਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਅਗ੍ਗੀਪਿ ਉਜ੍ਜਲਿਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਅਗ੍ਗਿਂ ਪਰਿਚਰਿਤ੍ਵਾ ਨ ਸਕ੍ਕੋਨ੍ਤਿ ਅਗ੍ਗਿਂ ਵਿਜ੍ਝਾਪੇਤੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ ਯਥਾ ਮਯਂ ਨ ਸਕ੍ਕੋਮ ਅਗ੍ਗਿਂ ਵਿਜ੍ਝਾਪੇਤੁ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਵਿਜ੍ਝਾਯਨ੍ਤੁ, ਕਸ੍ਸਪ, ਅਗ੍ਗੀ’’ਤਿ. ‘‘ਵਿਜ੍ਝਾਯਨ੍ਤੁ, ਮਹਾਸਮਣਾ’’ਤਿ. ਸਕਿਦੇਵ ਪਞ੍ਚ ਅਗ੍ਗਿਸਤਾਨਿ ਵਿਜ੍ਝਾਯਿਂਸੁ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਅਗ੍ਗੀਪਿ ਵਿਜ੍ਝਾਯਿਸ੍ਸਨ੍ਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਤੇ ਜਟਿਲਾ ਸੀਤਾਸੁ ਹੇਮਨ੍ਤਿਕਾਸੁ ਰਤ੍ਤੀਸੁ ਅਨ੍ਤਰਟ੍ਠਕਾਸੁ ਹਿਮਪਾਤਸਮਯੇ ਨਜ੍ਜਾ ਨੇਰਞ੍ਜਰਾਯ ਉਮ੍ਮੁਜ੍ਜਨ੍ਤਿਪਿ ਨਿਮੁਜ੍ਜਨ੍ਤਿਪਿ ਉਮ੍ਮੁਜ੍ਜਨਨਿਮੁਜ੍ਜਨਮ੍ਪਿ ਕਰੋਨ੍ਤਿ. ਅਥ ਖੋ ਭਗਵਾ ਪਞ੍ਚਮਤ੍ਤਾਨਿ ਮਨ੍ਦਾਮੁਖਿਸਤਾਨਿ ਅਭਿਨਿਮ੍ਮਿਨਿ ਯਤ੍ਥ ਤੇ ਜਟਿਲਾ ਉਤ੍ਤਰਿਤ੍ਵਾ ਵਿਸਿਬ੍ਬੇਸੁਂ. ਅਥ ਖੋ ਤੇਸਂ ਜਟਿਲਾਨਂ ਏਤਦਹੋਸਿ – ‘‘ਨਿਸ੍ਸਂਸਯਂ ਖੋ ਮਹਾਸਮਣਸ੍ਸ ਇਦ੍ਧਾਨੁਭਾਵੋ ਯਥਯਿਮਾ ਮਨ੍ਦਾਮੁਖਿਯੋ ਨਿਮ੍ਮਿਤਾ’’ਤਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਤਾਵ ਬਹੂ ਮਨ੍ਦਾਮੁਖਿਯੋਪਿ ਅਭਿਨਿਮ੍ਮਿਨਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਤੇਨ ਖੋ ਪਨ ਸਮਯੇਨ ਮਹਾ ਅਕਾਲਮੇਘੋ ਪਾਵਸ੍ਸਿ, ਮਹਾ ਉਦਕਵਾਹਕੋ ਸਞ੍ਜਾਯਿ, ਯਸ੍ਮਿਂ ਪਦੇਸੇ ਭਗਵਾ ਵਿਹਰਤਿ ਸੋ ਪਦੇਸੋ ਉਦਕੇਨ ਨ ਓਤ੍ਥਟੋ ਹੋਤਿ. ਅਥ ਖੋ ਭਗਵਤੋ ਏਤਦਹੋਸਿ – ‘‘ਯਂਨੂਨਾਹਂ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ‘‘ਮਾਹੇਵ ਖੋ ਮਹਾਸਮਣੋ ਉਦਕੇਨ ਵੂਲ਼੍ਹੋ ਅਹੋਸੀ’’ਤਿ ਨਾਵਾਯ ਸਮ੍ਬਹੁਲੇਹਿ ਜਟਿਲੇਹਿ ਸਦ੍ਧਿਂ ਯਸ੍ਮਿਂ ਪਦੇਸੇ ਭਗਵਾ ਵਿਹਰਤਿ, ਤਂ ਪਦੇਸਂ ਅਗਮਾਸਿ. ਅਦ੍ਦਸਾ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਨ੍ਤਂ ਸਮਨ੍ਤਾ ਉਦਕਂ ਉਸ੍ਸਾਰੇਤ੍ਵਾ ਮਜ੍ਝੇ ਰੇਣੁਹਤਾਯ ਭੂਮਿਯਾ ਚਙ੍ਕਮਨ੍ਤਂ, ਦਿਸ੍ਵਾਨ ਭਗਵਨ੍ਤਂ ਏਤਦਵੋਚ – ‘‘ਇਦਂ ਨੁ ਤ੍ਵਂ, ਮਹਾਸਮਣਾ’’ਤਿ. ‘‘ਅਯਮਹਮਸ੍ਮਿ, ਕਸ੍ਸਪਾ’’ਤਿ ਭਗਵਾ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਨਾਵਾਯ ਪਚ੍ਚੁਟ੍ਠਾਸਿ. ਅਥ ਖੋ ਉਰੁਵੇਲਕਸ੍ਸਪਸ੍ਸ ਜਟਿਲਸ੍ਸ ਏਤਦਹੋਸਿ – ‘‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਯਤ੍ਰ ਹਿ ਨਾਮ ਉਦਕਮ੍ਪਿ ਨ ਪਵਾਹਿਸ੍ਸਤਿ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’’ਨ੍ਤਿ.

ਅਥ ਖੋ ਭਗਵਤੋ ਏਤਦਹੋਸਿ – ‘‘ਚਿਰਮ੍ਪਿ ਖੋ ਇਮਸ੍ਸ ਮੋਘਪੁਰਿਸਸ੍ਸ ਏਵਂ ਭਵਿਸ੍ਸਤਿ ‘ਮਹਿਦ੍ਧਿਕੋ ਖੋ ਮਹਾਸਮਣੋ ਮਹਾਨੁਭਾਵੋ, ਨ ਤ੍ਵੇਵ ਚ ਖੋ ਅਰਹਾ ਯਥਾ ਅਹ’ਨ੍ਤਿ, ਯਂਨੂਨਾਹਂ ਇਮਂ ਜਟਿਲਂ ਸਂਵੇਜੇਯ੍ਯ’’ਨ੍ਤਿ. ਅਥ ਖੋ ਭਗਵਾ ਉਰੁਵੇਲਕਸ੍ਸਪਂ ਜਟਿਲਂ ਏਤਦਵੋਚ – ‘‘ਨੇਵ ਚ ਖੋ ਤ੍ਵਂ, ਕਸ੍ਸਪ, ਅਰਹਾ, ਨਾਪਿ ਅਰਹਤ੍ਤਮਗ੍ਗਸਮਾਪਨ੍ਨੋ, ਸਾਪਿ ਤੇ ਪਟਿਪਦਾ ਨਤ੍ਥਿ, ਯਾਯ ਤ੍ਵਂ ਅਰਹਾ ਵਾ ਅਸ੍ਸਸਿ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨੋ’’ਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਲਭੇਯ੍ਯਾਹਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਂ ਉਪਸਮ੍ਪਦ’’ਨ੍ਤਿ. ‘‘ਤ੍ਵਂ ਖੋਸਿ, ਕਸ੍ਸਪ, ਪਞ੍ਚਨ੍ਨਂ ਜਟਿਲਸਤਾਨਂ ਨਾਯਕੋ ਵਿਨਾਯਕੋ ਅਗ੍ਗੋ ਪਮੁਖੋ ਪਾਮੋਕ੍ਖੋ, ਤੇਪਿ ਤਾਵ ਅਪਲੋਕੇਹਿ, ਯਥਾ ਤੇ ਮਞ੍ਞਿਸ੍ਸਨ੍ਤਿ, ਤਥਾ ਤੇ ਕਰਿਸ੍ਸਨ੍ਤੀ’’ਤਿ. ਅਥ ਖੋ ਉਰੁਵੇਲਕਸ੍ਸਪੋ ਜਟਿਲੋ ਯੇਨ ਤੇ ਜਟਿਲਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤੇ ਜਟਿਲੇ ਏਤਦਵੋਚ – ‘‘ਇਚ੍ਛਾਮਹਂ, ਭੋ, ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਤੁਂ, ਯਥਾ ਭਵਨ੍ਤੋ ਮਞ੍ਞਨ੍ਤਿ ਤਥਾ ਕਰੋਨ੍ਤੂ’’ਤਿ. ‘‘ਚਿਰਪਟਿਕਾ ਮਯਂ, ਭੋ, ਮਹਾਸਮਣੇ ਅਭਿਪ੍ਪਸਨ੍ਨਾ, ਸਚੇ ਭਵਂ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਤਿ, ਸਬ੍ਬੇਵ ਮਯਂ ਮਹਾਸਮਣੇ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ, ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਅਦ੍ਦਸਾ ਖੋ ਨਦੀਕਸ੍ਸਪੋ ਜਟਿਲੋ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਵੁਯ੍ਹਮਾਨੇ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਮਾਹੇਵ ਮੇ ਭਾਤੁਨੋ ਉਪਸਗ੍ਗੋ ਅਹੋਸੀ’’ਤਿ, ਜਟਿਲੇ ਪਾਹੇਸਿ – ‘‘ਗਚ੍ਛਥ ਮੇ ਭਾਤਰਂ ਜਾਨਾਥਾ’’ਤਿ, ਸਾਮਞ੍ਚ ਤੀਹਿ ਜਟਿਲਸਤੇਹਿ ਸਦ੍ਧਿਂ ਯੇਨਾਯਸ੍ਮਾ ਉਰੁਵੇਲਕਸ੍ਸਪੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਰੁਵੇਲਕਸ੍ਸਪਂ ਏਤਦਵੋਚ – ‘‘ਇਦਂ ਨੁ ਖੋ, ਕਸ੍ਸਪ, ਸੇਯ੍ਯੋ’’ਤਿ? ‘‘ਆਮਾਵੁਸੋ, ਇਦਂ ਸੇਯ੍ਯੋ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ, ਭਿਕ੍ਖਵੋ’’ਤਿ ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

ਅਦ੍ਦਸਾ ਖੋ ਗਯਾਕਸ੍ਸਪੋ ਜਟਿਲੋ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਵੁਯ੍ਹਮਾਨੇ, ਦਿਸ੍ਵਾਨਸ੍ਸ ਏਤਦਹੋਸਿ – ‘‘ਮਾਹੇਵ ਮੇ ਭਾਤੂਨਂ ਉਪਸਗ੍ਗੋ ਅਹੋਸੀ’’ਤਿ, ਜਟਿਲੇ ਪਾਹੇਸਿ – ‘‘ਗਚ੍ਛਥ ਮੇ ਭਾਤਰੋ ਜਾਨਾਥਾ’’ਤਿ, ਸਾਮਞ੍ਚ ਦ੍ਵੀਹਿ ਜਟਿਲਸਤੇਹਿ ਸਦ੍ਧਿਂ ਯੇਨਾਯਸ੍ਮਾ ਉਰੁਵੇਲਕਸ੍ਸਪੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਰੁਵੇਲਕਸ੍ਸਪਂ ਏਤਦਵੋਚ – ‘‘ਇਦਂ ਨੁ ਖੋ, ਕਸ੍ਸਪ, ਸੇਯ੍ਯੋ’’ਤਿ? ‘‘ਆਮਾਵੁਸੋ, ਇਦਂ ਸੇਯ੍ਯੋ’’ਤਿ. ਅਥ ਖੋ ਤੇ ਜਟਿਲਾ ਕੇਸਮਿਸ੍ਸਂ ਜਟਾਮਿਸ੍ਸਂ ਖਾਰਿਕਾਜਮਿਸ੍ਸਂ ਅਗ੍ਗਿਹੁਤਮਿਸ੍ਸਂ ਉਦਕੇ ਪਵਾਹੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚੁਂ – ‘‘ਲਭੇਯ੍ਯਾਮ ਮਯਂ, ਭਨ੍ਤੇ, ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦ’’ਨ੍ਤਿ. ‘‘ਏਥ, ਭਿਕ੍ਖਵੋ’’ਤਿ, ਭਗਵਾ ਅਵੋਚ – ‘‘ਸ੍ਵਾਕ੍ਖਾਤੋ ਧਮ੍ਮੋ, ਚਰਥ ਬ੍ਰਹ੍ਮਚਰਿਯਂ ਸਮ੍ਮਾ ਦੁਕ੍ਖਸ੍ਸ ਅਨ੍ਤਕਿਰਿਯਾਯਾ’’ਤਿ. ਸਾਵ ਤੇਸਂ ਆਯਸ੍ਮਨ੍ਤਾਨਂ ਉਪਸਮ੍ਪਦਾ ਅਹੋਸਿ.

‘‘ਭਗਵਤੋ ਅਧਿਟ੍ਠਾਨੇਨ ਪਞ੍ਚ ਕਟ੍ਠਸਤਾਨਿ ਨ ਫਾਲਿਯਿਂਸੁ, ਫਾਲਿਯਿਂਸੁ, ਅਗ੍ਗੀ ਨ ਉਜ੍ਜਲਿਯਿਂਸੁ, ਉਜ੍ਜਲਿਯਿਂਸੁ, ਨ ਵਿਜ੍ਝਾਯਿਂਸੁ, ਵਿਜ੍ਝਾਯਿਂਸੁ, ਪਞ੍ਚ ਮਨ੍ਦਾਮੁਖਿਸਤਾਨਿ ਅਭਿਨਿਮ੍ਮਿਨਿ, ਏਤੇਨ ਨਯੇਨ ਅਡ੍ਢੁਡ੍ਢਪਾਟਿਹਾਰਿਯਸਹਸ੍ਸਾਨਿ ਹੋਨ੍ਤਿ.

‘‘ਅਥ ਖੋ ਭਗਵਾ ਉਰੁਵੇਲਾਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਗਯਾਸੀਸਂ ਤੇਨ ਚਾਰਿਕਂ ਪਕ੍ਕਾਮਿ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਸਹਸ੍ਸੇਨ ਸਬ੍ਬੇਹੇਵ ਪੁਰਾਣਜਟਿਲੇਹਿ. ਤਤ੍ਰ ਸੁਦਂ ਭਗਵਾ ਗਯਾਯਂ ਵਿਹਰਤਿ ਗਯਾਸੀਸੇ ਸਦ੍ਧਿਂ ਭਿਕ੍ਖੁਸਹਸ੍ਸੇਨ. ਤਤ੍ਰ ਖੋ ਭਗਵਾ ਭਿਕ੍ਖੁ ਆਮਨ੍ਤੇਸਿ (ਸਂ. ਨਿ. ੪.੨੮) – ‘ਸਬ੍ਬਂ, ਭਿਕ੍ਖਵੇ, ਆਦਿਤ੍ਤਂ, ਕਿਞ੍ਚ, ਭਿਕ੍ਖਵੇ, ਸਬ੍ਬਂ ਆਦਿਤ੍ਤਂ, ਚਕ੍ਖੁ, ਭਿਕ੍ਖਵੇ, ਆਦਿਤ੍ਤਂ, ਰੂਪਾ ਆਦਿਤ੍ਤਾ, ਚਕ੍ਖੁਵਿਞ੍ਞਾਣਂ ਆਦਿਤ੍ਤਂ, ਚਕ੍ਖੁਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ, ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤਨ੍ਤਿ ਵਦਾਮਿ? ਸੋਤਂ ਆਦਿਤ੍ਤਂ, ਸਦ੍ਦਾ ਆਦਿਤ੍ਤਾ…ਪੇ… ਘਾਨਂ ਆਦਿਤ੍ਤਂ, ਗਨ੍ਧਾ ਆਦਿਤ੍ਤਾ…ਪੇ… ਜਿਵ੍ਹਾ ਆਦਿਤ੍ਤਾ, ਰਸਾ ਆਦਿਤ੍ਤਾ…ਪੇ… ਕਾਯੋ ਆਦਿਤ੍ਤੋ, ਫੋਟ੍ਠਬ੍ਬਾ ਆਦਿਤ੍ਤਾ…ਪੇ… ਮਨੋ ਆਦਿਤ੍ਤੋ, ਧਮ੍ਮਾ ਆਦਿਤ੍ਤਾ, ਮਨੋਵਿਞ੍ਞਾਣਂ ਆਦਿਤ੍ਤਂ, ਮਨੋਸਮ੍ਫਸ੍ਸੋ ਆਦਿਤ੍ਤੋ, ਯਮਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਮ੍ਪਿ ਆਦਿਤ੍ਤਂ. ਕੇਨ ਆਦਿਤ੍ਤਂ, ਰਾਗਗ੍ਗਿਨਾ ਦੋਸਗ੍ਗਿਨਾ ਮੋਹਗ੍ਗਿਨਾ ਆਦਿਤ੍ਤਂ, ਜਾਤਿਯਾ ਜਰਾਯ ਮਰਣੇਨ ਸੋਕੇਹਿ ਪਰਿਦੇਵੇਹਿ ਦੁਕ੍ਖੇਹਿ ਦੋਮਨਸ੍ਸੇਹਿ ਉਪਾਯਾਸੇਹਿ ਆਦਿਤ੍ਤ’’’ਨ੍ਤਿ ਵਦਾਮਿ.

‘‘ਏਵਂ ਪਸ੍ਸਂ, ਭਿਕ੍ਖਵੇ, ਸੁਤਵਾ ਅਰਿਯਸਾਵਕੋ ਚਕ੍ਖੁਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਰੂਪੇਸੁਪਿ ਨਿਬ੍ਬਿਨ੍ਦਤਿ, ਚਕ੍ਖੁਵਿਞ੍ਞਾਣੇਪਿ ਨਿਬ੍ਬਿਨ੍ਦਤਿ, ਚਕ੍ਖੁਸਮ੍ਫਸ੍ਸੇਪਿ ਨਿਬ੍ਬਿਨ੍ਦਤਿ, ਯਮਿਦਂ ਚਕ੍ਖੁਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ. ਸੋਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਸਦ੍ਦੇਸੁਪਿ ਨਿਬ੍ਬਿਨ੍ਦਤਿ…ਪੇ… ਘਾਨਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਗਨ੍ਧੇਸੁਪਿ ਨਿਬ੍ਬਿਨ੍ਦਤਿ…ਪੇ… ਜਿਵ੍ਹਾਯਪਿ ਨਿਬ੍ਬਿਨ੍ਦਤਿ, ਰਸੇਸੁਪਿ ਨਿਬ੍ਬਿਨ੍ਦਤਿ…ਪੇ… ਕਾਯਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਫੋਟ੍ਠਬ੍ਬੇਸੁਪਿ ਨਿਬ੍ਬਿਨ੍ਦਤਿ…ਪੇ… ਮਨਸ੍ਮਿਮ੍ਪਿ ਨਿਬ੍ਬਿਨ੍ਦਤਿ, ਧਮ੍ਮੇਸੁਪਿ ਨਿਬ੍ਬਿਨ੍ਦਤਿ, ਮਨੋਵਿਞ੍ਞਾਣੇਪਿ ਨਿਬ੍ਬਿਨ੍ਦਤਿ, ਮਨੋਸਮ੍ਫਸ੍ਸੇਪਿ ਨਿਬ੍ਬਿਨ੍ਦਤਿ, ਯਮਿਦਂ ਮਨੋਸਮ੍ਫਸ੍ਸਪਚ੍ਚਯਾ ਉਪ੍ਪਜ੍ਜਤਿ ਵੇਦਯਿਤਂ ਸੁਖਂ ਵਾ ਦੁਕ੍ਖਂ ਵਾ ਅਦੁਕ੍ਖਮਸੁਖਂ ਵਾ ਤਸ੍ਮਿਮ੍ਪਿ ਨਿਬ੍ਬਿਨ੍ਦਤਿ. ਨਿਬ੍ਬਿਨ੍ਦਂ ਵਿਰਜ੍ਜਤਿ, ਵਿਰਾਗਾ ਵਿਮੁਚ੍ਚਤਿ, ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤਿ, ‘ਖੀਣਾ ਜਾਤਿ, ਵੁਸਿਤਂ ਬ੍ਰਹ੍ਮਚਰਿਯਂ, ਕਤਂ ਕਰਣੀਯਂ, ਨਾਪਰਂ ਇਤ੍ਥਤ੍ਤਾਯਾ’ਤਿ ਪਜਾਨਾਤੀ’’ਤਿ.

ਇਮਸ੍ਮਿਞ੍ਚ ਪਨ ਵੇਯ੍ਯਾਕਰਣਸ੍ਮਿਂ ਭਞ੍ਞਮਾਨੇ ਤਸ੍ਸ ਭਿਕ੍ਖੁਸਹਸ੍ਸਸ੍ਸ ਅਨੁਪਾਦਾਯ ਆਸਵੇਹਿ ਚਿਤ੍ਤਾਨਿ ਵਿਮੁਚ੍ਚਿਂਸੁ.

੨੯. ਏਵਂ ਆਦਿਤ੍ਤਪਰਿਯਾਯਦੇਸਨਂ ਸੁਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਸਮ੍ਪਤ੍ਤੋ ਨਦੀਕਸ੍ਸਪੋ ਥੇਰੋ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਮਾਹ. ਤਤ੍ਥ ਅਗ੍ਗਫਲਨ੍ਤਿ ਉਤ੍ਤਮਫਲਂ, ਅਤ੍ਤਨਾ ਰੋਪਿਤਅਮ੍ਬਰੁਕ੍ਖਸ੍ਸ ਆਦਿਮ੍ਹਿ ਗਹਿਤਫਲਂ ਵਾ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਨਦੀਕਸ੍ਸਪਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਗਯਾਕਸ੍ਸਪਤ੍ਥੇਰਅਪਦਾਨਵਣ੍ਣਨਾ

ਤਤਿਯਾਪਦਾਨੇ ਅਜਿਨਚਮ੍ਮਵਤ੍ਥੋਹਨ੍ਤਿਆਦਿਕਂ ਆਯਸ੍ਮਤੋ ਗਯਾਕਸ੍ਸਪਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਕੁਸਲਂ ਉਪਚਿਨਨ੍ਤੋ ਇਤੋ ਏਕਤਿਂਸਕਪ੍ਪੇ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਨਿਸ੍ਸਰਣਜ੍ਝਾਸਯਤਾਯ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਰਞ੍ਞਾਯਤਨੇ ਅਸ੍ਸਮਂ ਮਾਪੇਤ੍ਵਾ ਵਨਮੂਲਫਲਾਹਾਰੋ ਵਸਤਿ. ਤੇਨ ਚ ਸਮਯੇਨ ਭਗਵਾ ਏਕੋ ਅਦੁਤਿਯੋ ਤਸ੍ਸ ਅਸ੍ਸਮਸਮੀਪੇਨਾਗਚ੍ਛਿ, ਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਠਿਤੋ ਵੇਲਂ ਓਲੋਕੇਨ੍ਤੋ ਮਨੋਹਰਾਨਿ ਕੋਲਫਲਾਨਿ ਸਤ੍ਥੁ ਉਪਨੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਨਿਸ੍ਸਰਣਜ੍ਝਾਸਯਤਾਯ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਦ੍ਵੀਹਿ ਤਾਪਸਸਤੇਹਿ ਸਦ੍ਧਿਂ ਗਯਾਯ ਵਿਹਰਤਿ. ਗਯਾਯ ਵਸਨਤੋ ਹਿਸ੍ਸ ਕਸ੍ਸਪਗੋਤ੍ਤਤਾਯ ਚ ਗਯਾਕਸ੍ਸਪੋਤਿ ਸਮਞ੍ਞਾ ਅਹੋਸਿ. ਸੋ ਭਗਵਤੋ ਸਦ੍ਧਿਂ ਪਰਿਸਾਯ ਏਹਿਭਿਕ੍ਖੂਪਸਮ੍ਪਦਂ ਦਤ੍ਵਾ ਨਦੀਕਸ੍ਸਪਸ੍ਸ ਵੁਤ੍ਤਨਯੇਨ ਆਦਿਤ੍ਤਪਰਿਯਾਯ ਦੇਸਨਾਯ ਓਵਦਿਯਮਾਨੋ ਅਰਹਤ੍ਤੇ ਪਤਿਟ੍ਠਾਸਿ.

੩੫. ਸੋ ਅਰਹਤ੍ਤਂ ਪਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਜਿਨਚਮ੍ਮਵਤ੍ਥੋਹਨ੍ਤਿਆਦਿਮਾਹ. ਤਤ੍ਥ ਅਜਿਨਚਮ੍ਮਵਤ੍ਥੋਤਿ ਤਾਪਸਪਬ੍ਬਜਿਤਤ੍ਤਾ ਅਜਿਨਚਮ੍ਮਨਿਵਾਸਨਪਾਵੁਰਣੋਤਿ ਅਤ੍ਥੋ. ਖਾਰਿਭਾਰਧਰੋਤਿ ਤਾਪਸਕਾਲੇ ਤਾਪਸਪਰਿਕ੍ਖਾਰਪਰਿਪੁਣ੍ਣਕਾਜਧਰੋਤਿ ਅਤ੍ਥੋ. ਖਾਰਿਕਤਾਪਸਪਰਿਕ੍ਖਾਰੇ ਪੂਰੇਤ੍ਵਾ. ਕੋਲਂ ਅਹਾਸਿ ਅਸ੍ਸਮਨ੍ਤਿ ਕੋਲਫਲਂ ਅਸ੍ਸਮੇ ਪੂਰੇਤ੍ਵਾ ਅਸ੍ਸਮੇ ਨਿਸਿਨ੍ਨੋਤਿ ਅਤ੍ਥੋ. ਅਗੋਪਯਿਨ੍ਤਿ ਪਾਠੇ ਕੋਲਫਲਂ ਪਰਿਯੇਸਿਤ੍ਵਾ ਅਸ੍ਸਮਂ ਗੋਪੇਸਿਂ ਰਕ੍ਖਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਗਯਾਕਸ੍ਸਪਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਕਿਮਿਲਤ੍ਥੇਰਅਪਦਾਨਵਣ੍ਣਨਾ

ਚਤੁਤ੍ਥਾਪਦਾਨੇ ਨਿਬ੍ਬੁਤੇ ਕਕੁਸਨ੍ਧਮ੍ਹੀਤਿਆਦਿਕਂ ਆਯਸ੍ਮਤੋ ਕਿਮਿਲਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਕਕੁਸਨ੍ਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਪਰਿਨਿਬ੍ਬੁਤੇ ਸਤ੍ਥਰਿ ਤਸ੍ਸ ਧਾਤੁਯੋ ਉਦ੍ਦਿਸ੍ਸ ਸਲਲਮਾਲਾਹਿ ਮਣ੍ਡਪਂ ਕਾਰੇਤ੍ਵਾ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਾਵਤਿਂਸੇਸੁ ਉਪ੍ਪਜ੍ਜਿਤ੍ਵਾ ਅਪਰਾਪਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਨਗਰੇ ਸਕ੍ਯਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਕਿਮਿਲੋਤਿ ਤਸ੍ਸ ਨਾਮਂ ਅਕਾਸਿ. ਸੋ ਵਯਪ੍ਪਤ੍ਤੋ ਭੋਗਸਮ੍ਪਤ੍ਤਿਯਾ ਪਮਤ੍ਤੋ ਵਿਹਰਤਿ. ਤਸ੍ਸ ਞਾਣਪਰਿਪਾਕਂ ਞਤ੍ਵਾ ਸਂਵੇਗਜਨਨਤ੍ਥਂ ਅਨੁਪਿਯਾਯਂ ਵਿਹਰਨ੍ਤੋ ਸਤ੍ਥਾ ਪਠਮਯੋਬ੍ਬਨੇ ਠਿਤਂ ਰਮਣੀਯਂ ਇਤ੍ਥਿਰੂਪਂ ਅਭਿਨਿਮ੍ਮਿਨਿਤ੍ਵਾ ਪੁਰਤੋ ਦਸ੍ਸੇਤ੍ਵਾ ਪੁਨ ਅਨੁਕ੍ਕਮੇਨ ਯਥਾ ਜਰਾਰੋਗਵਿਪਤ੍ਤੀਹਿ ਅਭਿਭੂਤਾ ਦਿਸ੍ਸਤਿ, ਤਥਾ ਅਕਾਸਿ. ਤਂ ਦਿਸ੍ਵਾ ਕਿਮਿਲਕੁਮਾਰੋ ਅਤਿਵਿਯ ਸਂਵੇਗਜਾਤੋ ਅਤ੍ਤਨੋ ਸਂਵੇਗਂ ਪਕਾਸੇਨ੍ਤੋ ਭਗਵਤੋ ਪਾਕਟਂ ਕਤ੍ਵਾ ਲਦ੍ਧਾਨੁਸਾਸਨੋ ਅਰਹਤ੍ਤਂ ਪਾਪੁਣਿ.

੪੨. ਸੋ ਅਰਹਤ੍ਤਂ ਪਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਕਕੁਸਨ੍ਧਮ੍ਹੀਤਿਆਦਿਮਾਹ. ਬ੍ਰਾਹ੍ਮਣਮ੍ਹਿ ਵੁਸੀਮਤੀਤਿ ਪਞ੍ਚਹਿ ਵਸਿਤਾਹਿ ਵਸਿਪ੍ਪਤ੍ਤਮ੍ਹਿ ਭਗਵਤਿ. ਬ੍ਰਾਹ੍ਮਣਸ੍ਸ ਸਬ੍ਬਗੁਣਗਣੇਹਿ ਮਣ੍ਡਿਤਤ੍ਤਾ ਅਭਿਵੂਲ਼੍ਹੀਤਤ੍ਤਾ ਬ੍ਰਾਹ੍ਮਣਮ੍ਹਿ ਕਕੁਸਨ੍ਧੇ ਭਗਵਤਿ ਪਰਿਨਿਬ੍ਬੁਤੇਤਿ ਅਤ੍ਥੋ. ਸੇਸਂ ਸਬ੍ਬਂ ਉਤ੍ਤਾਨਮੇਵਾਤਿ.

ਕਿਮਿਲਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਵਜ੍ਜਿਪੁਤ੍ਤਤ੍ਥੇਰਅਪਦਾਨਵਣ੍ਣਨਾ

ਸਹਸ੍ਸਰਂਸੀ ਭਗਵਾਤਿਆਦਿਕਂ ਆਯਸ੍ਮਤੋ ਵਜ੍ਜਿਪੁਤ੍ਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਂ ਪੁਞ੍ਞਂ ਉਪਚਿਨਨ੍ਤੋ ਇਤੋ ਚਤੁਨਵੁਤਿਕਪ੍ਪੇ ਏਕਂ ਪਚ੍ਚੇਕਬੁਦ੍ਧਂ ਭਿਕ੍ਖਾਯ ਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਕਦਲਿਫਲਾਨਿ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੇਸਾਲਿਯਂ ਲਿਚ੍ਛਵਿਰਾਜਕੁਮਾਰੋ ਹੁਤ੍ਵਾ ਨਿਬ੍ਬਤ੍ਤਿ, ਵਜ੍ਜਿਰਾਜਪੁਤ੍ਤਤ੍ਤਾ ਵਜ੍ਜਿਪੁਤ੍ਤੋਤ੍ਵੇਵਸ੍ਸ ਸਮਞ੍ਞਾ. ਸੋ ਦਹਰੋ ਹੁਤ੍ਵਾ ਹਤ੍ਥਿਸਿਪ੍ਪਾਦਿਸਿਕ੍ਖਨਕਾਲੇਪਿ ਹੇਤੁਸਮ੍ਪਨ੍ਨਤਾਯ ਨਿਸ੍ਸਰਣਜ੍ਝਾਸਯੋਵ ਹੁਤ੍ਵਾ ਵਿਚਰਨ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਛਲ਼ਭਿਞ੍ਞੋ ਪਨ ਹੁਤ੍ਵਾ ਅਪਰਭਾਗੇ ਅਚਿਰਪਰਿਨਿਬ੍ਬੁਤੇ ਸਤ੍ਥਰਿ ਧਮ੍ਮਂ ਸਙ੍ਗਾਯਿਤੁਂ ਸਙ੍ਕੇਤਂ ਕਤ੍ਵਾ ਮਹਾਥੇਰੇਸੁ ਤਤ੍ਥ ਤਤ੍ਥ ਵਿਹਰਨ੍ਤੇਸੁ ਏਕਦਿਵਸਂ ਆਯਸ੍ਮਨ੍ਤਂ ਆਨਨ੍ਦਂ ਸੇਖਂਯੇਵ ਸਮਾਨਂ ਮਹਤਿਯਾ ਪਰਿਸਾਯ ਪਰਿਵੁਤਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਤਸ੍ਸ ਉਪਰਿਮਗ੍ਗਾਧਿਗਮਾਯ ਉਸ੍ਸਾਹਂ ਜਨੇਨ੍ਤੋ –

‘‘ਰੁਕ੍ਖਮੂਲਗਹਨਂ ਪਸਕ੍ਕਿਯ, ਨਿਬ੍ਬਾਨਂ ਹਦਯਸ੍ਮਿਂ ਓਪਿਯ;

ਝਾਯ ਗੋਤਮ ਮਾ ਚ ਪਮਾਦੋ, ਕਿਂ ਤੇ ਬਿਲ਼ਿਬਿਲ਼ਿਕਾ ਕਰਿਸ੍ਸਤੀ’’ਤਿ. (ਥੇਰਗਾ. ੧੧੯) – ਗਾਥਂ ਅਭਾਸਿ;

ਤਤ੍ਥ ਰੁਕ੍ਖਮੂਲਗਹਨਨ੍ਤਿ ਰੁਕ੍ਖਮੂਲਭੂਤਂ ਗਹਨਂ, ਗਹਨਞ੍ਹਿ ਅਤ੍ਥਿ, ਨ ਰੁਕ੍ਖਮੂਲਂ, ਰੁਕ੍ਖਮੂਲਞ੍ਚ ਅਤ੍ਥਿ, ਨ ਗਹਨਂ, ਤੇਸੁ ਰੁਕ੍ਖਮੂਲਗ੍ਗਹਣੇਨ ਠਾਨਸ੍ਸ ਛਾਯਾਯ ਸਮ੍ਪਨ੍ਨਤਾਯ ਵਾਤਾਤਪਪਰਿਸ੍ਸਯਾਭਾਵਂ ਦੀਪੇਤਿ, ਗਹਨਗ੍ਗਹਣੇਨ ਨਿਵਾਤਭਾਵੇਨ ਵਾਤਪਰਿਸ੍ਸਯਾਭਾਵਂ ਜਨਸਮ੍ਬਾਧਾਭਾਵਞ੍ਚ ਦਸ੍ਸੇਤਿ, ਤਦੁਭਯੇਨ ਚ ਭਾਵਨਾਯੋਗ੍ਯਤਂ. ਪਸਕ੍ਕਿਯਾਤਿ ਉਪਗਨ੍ਤ੍ਵਾ. ਨਿਬ੍ਬਾਨਂ ਹਦਯਸ੍ਮਿਂ ਓਪਿਯਾਤਿ ‘‘ਏਵਂ ਮਯਾ ਪਟਿਪਜ੍ਜਿਤ੍ਵਾ ਨਿਬ੍ਬਾਨਂ ਅਧਿਗਨ੍ਤਬ੍ਬ’’ਨ੍ਤਿ ਨਿਬ੍ਬੁਤਿਂ ਹਦਯੇ ਠਪੇਤ੍ਵਾ ਚਿਤ੍ਤੇ ਕਤ੍ਵਾ. ਝਾਯਾਤਿ ਤਿਲਕ੍ਖਣੂਪਨਿਜ੍ਝਾਨੇਨ ਝਾਯ, ਵਿਪਸ੍ਸਨਾਭਾਵਨਾਸਹਿਤਂ ਮਗ੍ਗਭਾਵਨਂ ਭਾਵੇਹਿ. ਗੋਤਮਾਤਿ ਧਮ੍ਮਭਣ੍ਡਾਗਾਰਿਕਂ ਗੋਤ੍ਤੇਨਾਲਪਤਿ. ਮਾ ਚ ਪਮਾਦੋਤਿ ਅਧਿਕੁਸਲੇਸੁ ਧਮ੍ਮੇਸੁ ਮਾ ਪਮਾਦਂ ਆਪਜ੍ਜਿ. ਇਦਾਨਿ ਯਾਦਿਸੋ ਥੇਰਸ੍ਸ ਪਮਾਦੋ, ਤਂ ਪਟਿਕ੍ਖੇਪਵਸੇਨ ਦਸ੍ਸੇਨ੍ਤੋ ‘‘ਕਿਂ ਤੇ ਬਿਲ਼ਿਬਿਲ਼ਿਕਾ ਕਰਿਸ੍ਸਤੀ’’ਤਿ ਆਹ. ਤਤ੍ਥ ਬਿਲ਼ਿਬਿਲ਼ਿਕਾਤਿ ਬਿਲ਼ਿਬਿਲ਼ਿਕਿਰਿਯਾ, ਬਿਲ਼ਿਬਿਲ਼ਿਤਿਸਦ੍ਦਪਵਤ੍ਤਿ ਯਥਾ ਨਿਰਤ੍ਥਕਾ, ਏਵਂ ਬਿਲ਼ਿਬਿਲ਼ਿਕਾਸਦਿਸਾ ਜਨਪਞ੍ਞਤ੍ਤਿ. ਕਿਂ ਤੇ ਕਰਿਸ੍ਸਤੀਤਿ ਕੀਦਿਸਂ ਅਤ੍ਥਂ ਤੁਯ੍ਹਂ ਸਾਧੇਸ੍ਸਤਿ, ਤਸ੍ਮਾ ਜਨਪਞ੍ਞਤ੍ਤਿਂ ਪਹਾਯ ਸਦਤ੍ਥਪਸੁਤੋ ਹੋਹੀਤਿ ਓਵਾਦਂ ਅਦਾਸਿ.

ਤਂ ਸੁਤ੍ਵਾ ਅਞ੍ਞੇਹਿ ਵੁਤ੍ਤੇਨ ਵਿਸ੍ਸਗਨ੍ਧਵਾਯਨਵਚਨੇਨ ਸਂਵੇਗਜਾਤੋ ਬਹੁਦੇਵ ਰਤ੍ਤਿਂ ਚਙ੍ਕਮੇਨ ਵੀਤਿਨਾਮੇਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਮਞ੍ਚਕੇ ਨਿਸਿਨ੍ਨਮਤ੍ਤੋਵ ‘‘ਕਿਞ੍ਚਿ ਸਯਾਮੀ’’ਤਿ ਸੀਸਂ ਬਿਮ੍ਬੋਹਨਮਸਮ੍ਪਤ੍ਤਂ ਪਾਦਂ ਭੂਮਿਤੋ ਉਗ੍ਗਤਂ ਸਰੀਰਸ੍ਸ ਆਕਾਸਗਤਕ੍ਖਣੇਯੇਵ ਅਰਹਤ੍ਤਂ ਪਾਪੁਣਿ.

੪੯. ਵਜ੍ਜਿਪੁਤ੍ਤਤ੍ਥੇਰੋ ਅਪਰਭਾਗੇ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਹਸ੍ਸਰਂਸੀ ਭਗਵਾਤਿਆਦਿਮਾਹ. ਤਤ੍ਥ ਸਹਸ੍ਸਰਂਸੀਤਿ ਏਤ੍ਥ ‘‘ਅਨੇਕਸਤਸਹਸ੍ਸਰਂਸੀ’’ਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ‘‘ਸਹਸ੍ਸਰਂਸੀ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵਜ੍ਜਿਪੁਤ੍ਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਉਤ੍ਤਰਤ੍ਥੇਰਅਪਦਾਨਵਣ੍ਣਨਾ

ਛਟ੍ਠਾਪਦਾਨੇ ਸੁਮੇਧੋ ਨਾਮ ਸਮ੍ਬੁਦ੍ਧੋਤਿਆਦਿਕਂ ਆਯਸ੍ਮਤੋ ਉਤ੍ਤਰਸਾਮਣੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਵਿਜ੍ਜਾਧਰੋ ਹੁਤ੍ਵਾ ਆਕਾਸੇਨ ਵਿਚਰਤਿ. ਤੇਨ ਚ ਸਮਯੇਨ ਸਤ੍ਥਾ ਤਸ੍ਸੇਵ ਅਨੁਗ੍ਗਣ੍ਹਨਤ੍ਥਂ ਵਨਨ੍ਤਰੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਨ੍ਤੋ. ਸੋ ਅਨ੍ਤਲਿਕ੍ਖੇਨ ਗਚ੍ਛਨ੍ਤੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਆਕਾਸਤੋ ਓਰੁਯ੍ਹ ਸੁਵਿਸੁਦ੍ਧੇਹਿ ਵਿਪੁਲੇਹਿ ਕਣਿਕਾਰਪੁਪ੍ਫੇਹਿ ਭਗਵਨ੍ਤਂ ਪੂਜੇਸਿ, ਪੁਪ੍ਫਾਨਿ ਬੁਦ੍ਧਾਨੁਭਾਵੇਨ ਸਤ੍ਥੁ ਉਪਰਿ ਛਤ੍ਤਾਕਾਰੇਨ ਅਟ੍ਠਂਸੁ, ਸੋ ਤੇਨ ਭਿਯ੍ਯੋਸੋਮਤ੍ਤਾਯ ਪਸਨ੍ਨਚਿਤ੍ਤੋ ਹੁਤ੍ਵਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੋ ਯਾਵਤਾਯੁਕਂ ਤਤ੍ਥ ਠਤ੍ਵਾ ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਮਹਾਸਾਲਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਉਤ੍ਤਰੋਤਿਸ੍ਸ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਤੋ ਬ੍ਰਾਹ੍ਮਣਵਿਜ੍ਜਾਸੁ ਨਿਪ੍ਫਤ੍ਤਿਂ ਗਨ੍ਤ੍ਵਾ ਜਾਤਿਯਾ ਰੂਪੇਨ ਵਿਜ੍ਜਾਯ ਵਯੇਨ ਸੀਲਾਚਾਰੇਨ ਚ ਲੋਕਸ੍ਸ ਸਮ੍ਭਾਵਨੀਯੋ ਜਾਤੋ.

ਤਸ੍ਸ ਤਂ ਸਮ੍ਪਤ੍ਤਿਂ ਦਿਸ੍ਵਾ ਵਸ੍ਸਕਾਰੋ ਮਗਧਮਹਾਮਤ੍ਤੋ ਅਤ੍ਤਨੋ ਧੀਤਰਂ ਦਾਤੁਕਾਮੋ ਹੁਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਸਿ. ਸੋ ਨਿਸ੍ਸਰਣਜ੍ਝਾਸਯਤਾਯ ਤਂ ਪਟਿਕ੍ਖਿਪਿਤ੍ਵਾ ਕਾਲੇਨ ਕਾਲਂ ਧਮ੍ਮਸੇਨਾਪਤਿਂ ਪਯਿਰੁਪਾਸਨ੍ਤੋ ਤਸ੍ਸ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਤ੍ਤਸਮ੍ਪਨ੍ਨੋ ਹੁਤ੍ਵਾ ਥੇਰਂ ਉਪਟ੍ਠਹਤਿ.

ਤੇਨ ਚ ਸਮਯੇਨ ਥੇਰਸ੍ਸ ਅਞ੍ਞਤਰੋ ਆਬਾਧੋ ਉਪ੍ਪਨ੍ਨੋ, ਤਸ੍ਸ ਭੇਸਜ੍ਜਤ੍ਥਾਯ ਉਤ੍ਤਰੋ ਸਾਮਣੇਰੋ ਪਾਤੋਵ ਪਤ੍ਤਚੀਵਰਮਾਦਾਯ ਵਿਹਾਰਤੋ ਨਿਕ੍ਖਨ੍ਤੋ ਅਨ੍ਤਰਾਮਗ੍ਗੇ ਤਲ਼ਾਕਸ੍ਸ ਸਮੀਪੇ ਪਤ੍ਤਂ ਠਪੇਤ੍ਵਾ ਉਦਕਸਮੀਪਂ ਗਨ੍ਤ੍ਵਾ ਮੁਖਂ ਧੋਵਤਿ. ਅਥ ਅਞ੍ਞਤਰੋ ਉਮਙ੍ਗਚੋਰੋ ਕਤਕਮ੍ਮੋ ਆਰਕ੍ਖਪੁਰਿਸੇਹਿ ਅਨੁਬਦ੍ਧੋ ਅਗ੍ਗਮਗ੍ਗੇਨ ਨਗਰਤੋ ਨਿਕ੍ਖਮਿਤ੍ਵਾ ਪਲਾਯਨ੍ਤੋ ਅਤ੍ਤਨਾ ਗਹਿਤਂ ਰਤਨਭਣ੍ਡਿਤਂ ਸਾਮਣੇਰਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਪਲਾਯਿ. ਸਾਮਣੇਰੋਪਿ ਪਤ੍ਤਸਮੀਪਂ ਉਪਗਤੋ. ਚੋਰਂ ਅਨੁਬਨ੍ਧਨ੍ਤਾ ਰਾਜਪੁਰਿਸਾ ਸਾਮਣੇਰਸ੍ਸ ਪਤ੍ਤੇ ਭਣ੍ਡਿਕਂ ਦਿਸ੍ਵਾ ‘‘ਅਯਂ ਚੋਰੋ, ਇਮਿਨਾ ਚੋਰਿਯਂ ਕਤ’’ਨ੍ਤਿ ਸਾਮਣੇਰਂ ਪਚ੍ਛਾਬਾਹਂ ਬਨ੍ਧਿਤ੍ਵਾ ਵਸ੍ਸਕਾਰਸ੍ਸ ਬ੍ਰਾਹ੍ਮਣਸ੍ਸ ਦਸ੍ਸੇਸੁਂ. ਵਸ੍ਸਕਾਰੋ ਚ ਤਦਾ ਰਞ੍ਞੋ ਵਿਨਿਚ੍ਛਯੇ ਨਿਯੁਤ੍ਤੋ ਹੁਤ੍ਵਾ ਛੇਜ੍ਜਭੇਜ੍ਜਂ ਅਨੁਸਾਸਤਿ, ਸੋ ‘‘ਪੁਬ੍ਬੇ ਮਮ ਵਚਨਂ ਨਾਦਿਯਿ, ਸੁਦ੍ਧਪਾਸਣ੍ਡਿਯੇਸੁ ਪਬ੍ਬਜੀ’’ਤਿ (ਥੇਰਗਾ. ਅਟ੍ਠ. ੧.ਉਤ੍ਤਰਤ੍ਥੇਰਗਾਥਾਵਣ੍ਣਨਾ) ਕਮ੍ਮਂ ਅਸੋਧੇਤ੍ਵਾ ਘਾਤੁਕਾਮਤ੍ਤਾਵ ਜੀਵਨ੍ਤਮੇਵ ਤਂ ਸੂਲੇ ਉਤ੍ਤਾਸੇਸਿ.

ਅਥਸ੍ਸ ਭਗਵਾ ਞਾਣਪਰਿਪਾਕਂ ਓਲੋਕੇਤ੍ਵਾ ਤਂ ਠਾਨਂ ਗਨ੍ਤ੍ਵਾ ਵਿਪ੍ਫੁਰਨ੍ਤਹਤ੍ਥਨਖਮਣਿਮਯੂਖਸਮ੍ਭਿਨ੍ਨਸਿਤਾਭਤਾਯ ਪਗ੍ਘਰਨ੍ਤਜਾਤਿਹਿਙ੍ਗੁਲਕਸੁਵਣ੍ਣਰਸਧਾਰਂ ਵਿਯ ਜਾਲਾਗੁਣ੍ਠਿਤਮੁਦੁਤਲੁਨਦੀਘਙ੍ਗੁਲਿਹਤ੍ਥਂ ਉਤ੍ਤਰਸ੍ਸ ਸੀਸੇ ਠਪੇਤ੍ਵਾ ‘‘ਉਤ੍ਤਰ, ਇਦਂ ਤੇ ਪੁਰਿਮਕਮ੍ਮਸ੍ਸ ਫਲਂ ਉਪ੍ਪਨ੍ਨਂ, ਤਤ੍ਥ ਤਯਾ ਪਚ੍ਚਵੇਕ੍ਖਣਬਲੇਨ ਅਧਿਵਾਸਨਾ ਕਾਤਬ੍ਬਾ’’ਤਿ ਵਤ੍ਵਾ ਅਜ੍ਝਾਸਯਾਨੁਰੂਪਂ ਧਮ੍ਮਂ ਦੇਸੇਸਿ. ਉਤ੍ਤਰੋ ਅਮਤਾਭਿਸੇਕਸਦਿਸੇਨ ਸਤ੍ਥੁ ਹਤ੍ਥਸਮ੍ਫਸ੍ਸੇਨ ਸਞ੍ਜਾਤਪ੍ਪਸਾਦਸੋਮਨਸ੍ਸਤਾਯ ਉਲ਼ਾਰਪੀਤਿਪਾਮੋਜ੍ਜਂ ਪਟਿਲਭਿਤ੍ਵਾ ਯਥਾਪਰਿਚਿਤਂ ਵਿਪਸ੍ਸਨਾਮਗ੍ਗਂ ਸਮਾਰੂਲ਼੍ਹੋ ਞਾਣਸ੍ਸ ਪਰਿਪਾਕਂ ਗਤਤ੍ਤਾ ਸਤ੍ਥੁ ਚ ਦੇਸਨਾਵਿਲਾਸੇਨ ਤਾਵਦੇਵ ਮਗ੍ਗਪਟਿਪਾਟਿਯਾ ਸਬ੍ਬੇ ਕਿਲੇਸੇ ਖੇਪੇਤ੍ਵਾ ਛਲ਼ਭਿਞ੍ਞੋ ਅਹੋਸਿ. ਛਲ਼ਭਿਞ੍ਞੋ ਪਨ ਹੁਤ੍ਵਾ ਸੂਲਤੋ ਉਟ੍ਠਹਿਤ੍ਵਾ ਪਰਾਨੁਦ੍ਦਯਾਯ ਆਕਾਸੇ ਠਤ੍ਵਾ ਪਾਟਿਹਾਰਿਯਂ ਦਸ੍ਸੇਸਿ. ਮਹਾਜਨੋ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਅਹੋਸਿ. ਤਾਵਦੇਵਸ੍ਸ ਵਣੋ ਸਂਰੂਲ਼੍ਹਿ, ਸੋ ਭਿਕ੍ਖੂਹਿ, ‘‘ਆਵੁਸੋ, ਤਾਦਿਸਦੁਕ੍ਖਂ ਅਨੁਭਵਨ੍ਤੋ ਕਥਂ ਤ੍ਵਂ ਵਿਪਸ੍ਸਨਂ ਅਨੁਯੁਞ੍ਜਿਤੁਂ ਅਸਕ੍ਖੀ’’ਤਿ ਪੁਟ੍ਠੋ, ‘‘ਪਗੇਵ ਮੇ, ਆਵੁਸੋ, ਸਂਸਾਰੇ ਆਦੀਨਵੋ, ਸਙ੍ਖਾਰਾਨਞ੍ਚ ਸਭਾਵੋ ਸੁਦਿਟ੍ਠੋ, ਏਵਾਹਂ ਤਾਦਿਸਂ ਦੁਕ੍ਖਂ ਅਨੁਭਵਨ੍ਤੋਪਿ ਅਸਕ੍ਖਿਂ ਵਿਪਸ੍ਸਨਂ ਵਡ੍ਢੇਤ੍ਵਾ ਵਿਸੇਸਂ ਅਧਿਗਨ੍ਤੁ’’ਨ੍ਤਿ ਆਹ. ‘‘ਪੁਬ੍ਬਜਾਤਿਯਾ ਦਹਰਕਾਲੇ ਮਕ੍ਖਿਕਂ ਗਹੇਤ੍ਵਾ ਨਿਮ੍ਬਸੂਲਕਂ ਗਹੇਤ੍ਵਾ ਸੂਲਾਰੋਪਨਕੀਲ਼ਂ ਪਟਿਚ੍ਚ ਏਵਂ ਅਨੇਕਜਾਤਿਸਤੇਸੁ ਸੂਲਾਰੋਪਨਦੁਕ੍ਖਮਨੁਭਵਿਤ੍ਵਾ ਇਮਾਯ ਪਰਿਯੋਸਾਨਜਾਤਿਯਾ ਏਵਰੂਪਂ ਦੁਕ੍ਖਮਨੁਭੂਤ’’ਨ੍ਤਿ ਆਹ.

੫੫. ਅਥ ਅਪਰਭਾਗੇ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮੇਧੋ ਨਾਮ ਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਅਨੁਤ੍ਤਾਨਪਦਵਣ੍ਣਨਮੇਵ ਕਰਿਸ੍ਸਾਮ.

੫੭. ਵਿਜ੍ਜਾਧਰੋ ਤਦਾ ਆਸਿਨ੍ਤਿ ਬਾਹਿਰਕਮਨ੍ਤਾਦਿਵਿਜ੍ਜਾਸਿਦ੍ਧਿਯਾ ਆਕਾਸਗਾਮਿਸਮਤ੍ਥੋ ਹੁਤ੍ਵਾ ਚਰਣਵਸੇਨ ਤਂ ਵਿਜ੍ਜਂ ਰਕ੍ਖਿਤ੍ਵਾ ਅਵਿਨਾਸੇਤ੍ਵਾ ਪਰਿਹਰਣਵਸੇਨ ਵਿਜ੍ਜਾਧਰਯੋਨਿ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਅਨ੍ਤਲਿਕ੍ਖਚਰੋ ਅਹਨ੍ਤਿ ਅਨ੍ਤਂ ਪਰਿਯੋਸਾਨਂ ਕੋਟਿਂ ਲਿਖਤੇ ਸਂਕਰਿਸ੍ਸਤੀਤਿ ਅਨ੍ਤਲਿਕ੍ਖਂ. ਅਥ ਵਾ ਅਨ੍ਤਂ ਪਰਿਯੋਸਾਨਂ ਲਿਖ੍ਯਤੇ ਓਲੋਕਿਯਤੇ ਏਤੇਨਾਤਿ ਅਨ੍ਤਲਿਕ੍ਖਂ, ਤਸ੍ਮਿਂ ਅਨ੍ਤਲਿਕ੍ਖੇ, ਆਕਾਸੇ ਚਰਣਸੀਲੋ ਅਹਨ੍ਤਿ ਅਤ੍ਥੋ. ਤਿਸੂਲਂ ਸੁਕਤਂ ਗਯ੍ਹਾਤਿ ਤਿਖਿਣਂ ਸੂਲਂ, ਅਗ੍ਗਂ ਆਵੁਧਂ. ਤਿਸੂਲਂ ਸੁਨ੍ਦਰਂ ਕਤਂ, ਕੋਟ੍ਟਨਘਂਸਨਮਦ੍ਦਨਪਹਰਣਵਸੇਨ ਸੁਟ੍ਠੁ ਕਤਂ ਸੂਲਾਵੁਧਂ ਗਯ੍ਹ ਗਹੇਤ੍ਵਾ ਅਮ੍ਬਰਤੋ ਗਚ੍ਛਾਮੀਤਿ ਅਤ੍ਥੋ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾਵ ਨਯਾਨੁਯੋਗੇਨ ਸੁਵਿਞ੍ਞੇਯ੍ਯਮੇਵਾਤਿ.

ਉਤ੍ਤਰਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਅਪਰਉਤ੍ਤਰਤ੍ਥੇਰਅਪਦਾਨਵਣ੍ਣਨਾ

ਸਤ੍ਤਮਾਪਦਾਨੇ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਅਪਰਸ੍ਸ ਉਤ੍ਤਰਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਇਤੋ ਚਤੁਨ੍ਨਵੁਤਿਕਪ੍ਪੇ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਵਿਞ੍ਞੁਤਂ ਪਤ੍ਵਾ ਸਾਸਨੇ ਲਦ੍ਧਪ੍ਪਸਾਦੋ ਹੁਤ੍ਵਾ ਉਪਾਸਕਤ੍ਤਂ ਨਿਵੇਦੇਸਿ. ਸੋ ਸਤ੍ਥਰਿ ਪਰਿਨਿਬ੍ਬੁਤੇ ਅਤ੍ਤਨੋ ਞਾਤਕੇ ਸਨ੍ਨਿਪਾਤੇਤ੍ਵਾ ਬਹੁਪੂਜਾਸਕ੍ਕਾਰਂ ਸਂਹਰਿਤ੍ਵਾ ਧਾਤੁਪੂਜਂ ਅਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਕੇਤੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਤ੍ਤਰੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਕੇਨਚਿਦੇਵ ਕਰਣੀਯੇਨ ਸਾਵਤ੍ਥਿਂ ਗਤੋ ਕਣ੍ਡਮ੍ਬਮੂਲੇ ਕਤਂ ਯਮਕਪਾਟਿਹਾਰਿਯਂ ਦਿਸ੍ਵਾ ਪਸੀਦਿਤ੍ਵਾ ਪੁਨ ਕਾਲ਼ਕਾਰਾਮਸੁਤ੍ਤਦੇਸਨਾਯ ਅਭਿਵਡ੍ਢਮਾਨਸਦ੍ਧੋ ਪਬ੍ਬਜਿਤ੍ਵਾ ਸਤ੍ਥਾਰਾ ਸਦ੍ਧਿਂ ਰਾਜਗਹਂ ਗਨ੍ਤ੍ਵਾ ਉਪਸਮ੍ਪਦਂ ਲਭਿਤ੍ਵਾ ਤਥੇਵ ਚਰਨ੍ਤੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਹੋਸਿ. ਛਲ਼ਭਿਞ੍ਞੋ ਪਨ ਹੁਤ੍ਵਾ ਸਤ੍ਥਰਿ ਸਾਵਤ੍ਥਿਯਂ ਵਿਹਰਨ੍ਤੇ ਬੁਦ੍ਧੁਪਟ੍ਠਾਨਤ੍ਥਂ ਰਾਜਗਹਤੋ ਸਾਵਤ੍ਥਿਂ ਉਪਗਤੋ ਭਿਕ੍ਖੂਹਿ – ‘‘ਕਿਂ, ਆਵੁਸੋ, ਪਬ੍ਬਜ੍ਜਾਕਿਚ੍ਚਂ ਤਯਾ ਮਤ੍ਥਕਂ ਪਾਪਿਤ’’ਨ੍ਤਿ ਪੁਟ੍ਠੋ ਅਞ੍ਞਂ ਬ੍ਯਾਕਾਸਿ.

੯੩. ਅਰਹਤ੍ਤਂ ਪਨ ਪਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਅਪਰਉਤ੍ਤਰਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਭਦ੍ਦਜਿਤ੍ਥੇਰਅਪਦਾਨਵਣ੍ਣਨਾ

ਅਟ੍ਠਮਾਪਦਾਨੇ ਓਗਯ੍ਹਾਹਂ ਪੋਕ੍ਖਰਣਿਨ੍ਤਿਆਦਿਕਂ ਆਯਸ੍ਮਤੋ ਭਦ੍ਦਜਿਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਬ੍ਰਾਹ੍ਮਣਾਨਂ ਵਿਜ੍ਜਾਸਿਪ੍ਪੇਸੁ ਪਾਰਂ ਗਨ੍ਤ੍ਵਾ ਕਾਮੇ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਰਞ੍ਞਾਯਤਨੇ ਅਸ੍ਸਮਂ ਕਾਰੇਤ੍ਵਾ ਵਸਨ੍ਤੋ ਏਕਦਿਵਸਂ ਸਤ੍ਥਾਰਂ ਆਕਾਸੇਨ ਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਸਤ੍ਥਾ ਤਸ੍ਸ ਅਜ੍ਝਾਸਯਂ ਦਿਸ੍ਵਾ ਆਕਾਸਤੋ ਓਤਰਿ. ਓਤਿਣ੍ਣਸ੍ਸ ਪਨ ਭਗਵਤੋ ਮਧੁਞ੍ਚ ਭਿਸਮੁਲ਼ਾਲਞ੍ਚ ਸਪ੍ਪਿਖੀਰਞ੍ਚ ਉਪਨਾਮੇਸਿ, ਤਸ੍ਸ ਤਂ ਭਗਵਾ ਅਨੁਕਮ੍ਮਂ ਉਪਾਦਾਯ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸੋ ਤੇਨ ਪੁਞ੍ਞਕਮ੍ਮੇਨ ਤੁਸਿਤੇਸੁ ਨਿਬ੍ਬਤ੍ਤੋ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਅਪਰਾਪਰਂ ਸੁਗਤੀਸੁਯੇਵ ਸਂਸਰਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਮਹਦ੍ਧਨੋ ਸੇਟ੍ਠਿ ਹੁਤ੍ਵਾ ਅਟ੍ਠਸਟ੍ਠਿਭਿਕ੍ਖੁਸਤਸਹਸ੍ਸਂ ਭੋਜੇਤ੍ਵਾ ਤਿਚੀਵਰੇਨ ਅਚ੍ਛਾਦੇਸਿ.

ਏਵਂ ਬਹੁਂ ਕੁਸਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚਵਿਤ੍ਵਾ ਮਨੁਸ੍ਸਲੋਕੇਸੁ ਉਪ੍ਪਨ੍ਨੋ ਬੁਦ੍ਧਸੁਞ੍ਞੇ ਲੋਕੇ ਪਞ੍ਚ ਪਚ੍ਚੇਕਬੁਦ੍ਧਸਤਾਨਿ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਤ੍ਵਾ ਤਤੋ ਚੁਤੋ ਰਾਜਕੁਲੇ ਨਿਬ੍ਬਤ੍ਤਿਤ੍ਵਾ ਰਜ੍ਜਂ ਅਨੁਸਾਸਨ੍ਤੋ ਅਤ੍ਤਨੋ ਪੁਤ੍ਤਂ ਪਚ੍ਚੇਕਬੋਧਿਂ ਅਧਿਗਨ੍ਤ੍ਵਾ ਠਿਤਂ ਉਪਟ੍ਠਹਿਤ੍ਵਾ ਤਸ੍ਸ ਪਰਿਨਿਬ੍ਬੁਤਸ੍ਸ ਧਾਤੁਯੋ ਗਹੇਤ੍ਵਾ ਚੇਤਿਯਂ ਕਤ੍ਵਾ ਪੂਜੇਸਿ. ਏਵਂ ਤਤ੍ਥ ਤਤ੍ਥ ਤਾਨਿ ਤਾਨਿ ਪੁਞ੍ਞਾਨਿ ਕਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਭਦ੍ਦਿਯਨਗਰੇ ਅਸੀਤਿਕੋਟਿਵਿਭਵਸ੍ਸ ਭਦ੍ਦਿਯਸੇਟ੍ਠਿਸ੍ਸ ਏਕਪੁਤ੍ਤਕੋ ਹੁਤ੍ਵਾ ਨਿਬ੍ਬਤ੍ਤਿ, ਭਦ੍ਦਜੀਤਿਸ੍ਸ ਨਾਮਂ ਅਹੋਸਿ. ਤਸ੍ਸ ਕਿਰ ਇਸ੍ਸਰਿਯਭੋਗਪਰਿਵਾਰਸਮ੍ਪਤ੍ਤਿ ਚਰਿਮਭਵੇ ਬੋਧਿਸਤ੍ਤਸ੍ਸ ਵਿਯ ਅਹੋਸਿ.

ਤਦਾ ਸਤ੍ਥਾ ਸਾਵਤ੍ਥਿਯਂ ਵਸਿਤ੍ਵਾ ਭਦ੍ਦਜਿਕੁਮਾਰਂ ਸਙ੍ਗਣ੍ਹਨਤ੍ਥਾਯ ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਭਦ੍ਦਿਯਨਗਰਂ ਗਨ੍ਤ੍ਵਾ ਜਾਤਿਯਾਵਨੇ ਵਸਿ ਤਸ੍ਸ ਞਾਣਪਰਿਪਾਕਂ ਆਗਮਯਮਾਨੋ. ਸੋਪਿ ਉਪਰਿਪਾਸਾਦੇ ਨਿਸਿਨ੍ਨੋ ਸੀਹਪਞ੍ਜਰਂ ਵਿਵਰਿਤ੍ਵਾ ਓਲੋਕੇਨ੍ਤੋ ਭਗਵਤੋ ਸਨ੍ਤਿਕੇ ਧਮ੍ਮਂ ਸੋਤੁਂ ਗਚ੍ਛਨ੍ਤਂ ਮਹਾਜਨਂ ਦਿਸ੍ਵਾ, ‘‘ਕਤ੍ਥਾਯਂ ਮਹਾਜਨੋ ਗਚ੍ਛਤੀ’’ਤਿ ਪੁਚ੍ਛਿਤ੍ਵਾ ਤਂ ਕਾਰਣਂ ਸੁਤ੍ਵਾ ਸਯਮ੍ਪਿ ਮਹਤਾ ਪਰਿਵਾਰੇਨ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਣਨ੍ਤੋ ਸਬ੍ਬਾਭਰਣਪਟਿਮਣ੍ਡਿਤੋਵ ਸਬ੍ਬਕਿਲੇਸੇ ਖੇਪੇਤ੍ਵਾ ਅਰਹਤ੍ਤਂ ਪਾਪੁਣਿ. ਅਰਹਤ੍ਤੇ ਪਨ ਤੇਨ ਅਧਿਗਤੇ ਸਤ੍ਥਾ ਭਦ੍ਦਿਯਸੇਟ੍ਠਿਂ ਆਮਨ੍ਤੇਸਿ – ‘‘ਤਵ ਪੁਤ੍ਤੋ ਅਲਙ੍ਕਤਪਟਿਯਤ੍ਤੋ ਧਮ੍ਮਂ ਸੁਣਨ੍ਤੋ ਅਰਹਤ੍ਤੇ ਪਤਿਟ੍ਠਾਸਿ, ਤੇਨਸ੍ਸ ਇਦਾਨੇਵ ਪਬ੍ਬਜਿਤੁਂ ਯੁਤ੍ਤਂ, ਨੋ ਚੇ ਪਬ੍ਬਜਿਸ੍ਸਤਿ, ਪਰਿਨਿਬ੍ਬਾਯਿਸ੍ਸਤੀ’’ਤਿ. ਸੇਟ੍ਠਿ ‘‘ਨ ਮਯ੍ਹਂ ਪੁਤ੍ਤਸ੍ਸ ਦਹਰਸ੍ਸੇਵ ਸਤੋ ਪਰਿਨਿਬ੍ਬਾਨੇਨ ਕਿਚ੍ਚਂ ਅਤ੍ਥਿ, ਪਬ੍ਬਾਜੇਥ ਨ’’ਨ੍ਤਿ ਆਹ. ਤਂ ਸਤ੍ਥਾ ਪਬ੍ਬਾਜੇਤ੍ਵਾ ਉਪਸਮ੍ਪਾਦੇਤ੍ਵਾ ਤਤ੍ਥ ਸਤ੍ਤਾਹਂ ਵਸਿਤ੍ਵਾ ਕੋਟਿਗਾਮਂ ਪਾਪੁਣਿ, ਸੋ ਚ ਗਾਮੋ ਗਙ੍ਗਾਤੀਰੇ ਅਹੋਸਿ. ਕੋਟਿਗਾਮਵਾਸਿਨੋ ਚ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਸੁਂ. ਭਦ੍ਦਜਿਤ੍ਥੇਰੋ ਸਤ੍ਥਾਰਾ ਅਨੁਮੋਦਨਾਯ ਆਰਦ੍ਧਮਤ੍ਤਾਯ ਬਹਿਗਾਮਂ ਗਨ੍ਤ੍ਵਾ ‘‘ਗਙ੍ਗਾਤੀਰੇ ਮਗ੍ਗਸਮੀਪੇ ਸਤ੍ਥੁ ਆਗਤਕਾਲੇ ਵੁਟ੍ਠਹਿਸ੍ਸਾਮੀ’’ਤਿ ਕਾਲਪਰਿਚ੍ਛੇਦਂ ਕਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਨਿਸੀਦਿ. ਮਹਾਥੇਰੇਸੁ ਆਗਚ੍ਛਨ੍ਤੇਸੁਪਿ ਅਵੁਟ੍ਠਹਿਤ੍ਵਾ ਸਤ੍ਥੁ ਆਗਤਕਾਲੇਯੇਵ ਵੁਟ੍ਠਾਸਿ. ਪੁਥੁਜ੍ਜਨਾ ਭਿਕ੍ਖੂ – ‘‘ਅਯਂ ਅਧੁਨਾ ਪਬ੍ਬਜਿਤੋ, ਮਹਾਥੇਰੇਸੁ ਆਗਚ੍ਛਨ੍ਤੇਸੁ ਮਾਨਥਦ੍ਧੋ ਹੁਤ੍ਵਾ ਨ ਵੁਟ੍ਠਾਸੀ’’ਤਿ ਉਜ੍ਝਾਯਿਂਸੁ.

ਕੋਟਿਗਾਮਵਾਸਿਨੋ ਸਤ੍ਥੁ ਭਿਕ੍ਖੁਸਙ੍ਘਸ੍ਸ ਚ ਬਹੂ ਨਾਵਾਸਙ੍ਘਾਟੇ ਬਨ੍ਧਿਂਸੁ. ਸਤ੍ਥਾ ‘‘ਭਦ੍ਦਜਿਸ੍ਸਾਨੁਭਾਵਂ ਪਕਾਸੇਮੀ’’ਤਿ ਨਾਵਾਯ ਠਤ੍ਵਾ ‘‘ਕਹਂ ਭਦ੍ਦਜੀ’’ਤਿ ਪੁਚ੍ਛਿ. ਭਦ੍ਦਜਿਤ੍ਥੇਰੋ – ‘‘ਸੋਹਂ, ਭਨ੍ਤੇ’’ਤਿ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਞ੍ਜਲਿਂ ਕਤ੍ਵਾ ਅਟ੍ਠਾਸਿ. ਸਤ੍ਥਾ ‘‘ਏਹਿ, ਭਦ੍ਦਜਿ, ਅਮ੍ਹੇਹਿ ਸਦ੍ਧਿਂ ਏਕਨਾਵਂ ਅਭਿਰੁਹਾ’’ਤਿ. ਸੋ ਉਪ੍ਪਤਿਤ੍ਵਾ ਸਤ੍ਥੁ ਠਿਤਨਾਵਾਯਂ ਅਟ੍ਠਾਸਿ. ਸਤ੍ਥਾ ਗਙ੍ਗਾਯ ਮਜ੍ਝੇ ਗਤਕਾਲੇ, ‘‘ਭਦ੍ਦਜਿ, ਤਯਾ ਮਹਾਪਨਾਦਕਾਲੇ ਅਜ੍ਝਾਵੁਟ੍ਠਰਤਨਪਾਸਾਦੋ ਕਹ’’ਨ੍ਤਿ ਆਹ. ‘‘ਇਮਸ੍ਮਿਂ ਠਾਨੇ ਨਿਮੁਗ੍ਗੋ, ਭਨ੍ਤੇ’’ਤਿ. ‘‘ਤੇਨ ਹਿ, ਭਦ੍ਦਜਿ, ਸਬ੍ਰਹ੍ਮਚਾਰੀਨਂ ਕਙ੍ਖਂ ਛਿਨ੍ਦਾ’’ਤਿ. ਤਸ੍ਮਿਂ ਖਣੇ ਥੇਰੋ ਸਤ੍ਥਾਰਂ ਵਨ੍ਦਿਤ੍ਵਾ ਇਦ੍ਧਿਬਲੇਨ ਗਨ੍ਤ੍ਵਾ ਪਾਸਾਦਥੂਪਿਕਂ ਪਾਦਙ੍ਗੁਲਨ੍ਤਰੇਨ ਸਨ੍ਨਿਰੁਜ੍ਝਿਤ੍ਵਾ ਪਞ੍ਚਵੀਸਤਿਯੋਜਨਂ ਪਾਸਾਦਂ ਗਹੇਤ੍ਵਾ ਆਕਾਸੇ ਉਪ੍ਪਤਿ, ਉਪ੍ਪਤਨ੍ਤੋ ਚ ਪਞ੍ਞਾਸਯੋਜਨਾਨਿ ਉਕ੍ਖਿਪਿ. ਅਥਸ੍ਸ ਪੁਰਿਮਭਵੇ ਞਾਤਕਾ ਪਾਸਾਦਗਤੇਨ ਲੋਭੇਨ ਮਚ੍ਛਕਚ੍ਛਪਮਣ੍ਡੂਕਾ ਹੁਤ੍ਵਾ ਨਿਬ੍ਬਤ੍ਤਾ ਤਸ੍ਮਿਂ ਪਾਸਾਦੇ ਉਟ੍ਠਹਨ੍ਤੇ ਪਰਿਵਤ੍ਤਿਤ੍ਵਾ ਪਤਿਂਸੁ. ਸਤ੍ਥਾ ਤੇ ਸਮ੍ਪਤਨ੍ਤੇ ਦਿਸ੍ਵਾ ‘‘ਞਾਤਕਾ ਤੇ, ਭਦ੍ਦਜਿ, ਕਿਲਮਨ੍ਤੀ’’ਤਿ ਆਹ. ਥੇਰੋ ਸਤ੍ਥੁ ਵਚਨੇਨ ਪਾਸਾਦਂ ਵਿਸ੍ਸਜ੍ਜੇਸਿ. ਪਾਸਾਦੋ ਯਥਾਠਾਨੇਯੇਵ ਪਤਿਟ੍ਠਹਿ. ਸਤ੍ਥਾ ਪਾਰਙ੍ਗਤੋ ਭਿਕ੍ਖੂਹਿ – ‘‘ਕਦਾ, ਭਨ੍ਤੇ, ਭਦ੍ਦਜਿਤ੍ਥੇਰੇਨ ਅਯਂ ਪਾਸਾਦੋ ਅਜ੍ਝਾਵੁਟ੍ਠੋ’’ਤਿ ਪੁਟ੍ਠੋ ਮਹਾਪਨਾਦਜਾਤਕਂ (ਜਾ. ੧.੩.੪੦ ਆਦਯੋ) ਕਥੇਤ੍ਵਾ ਬਹੁਜਨਂ ਧਮ੍ਮਾਮਤਂ ਪਾਯੇਸਿ.

੯੮. ਥੇਰੋ ਪਨ ਅਰਹਤ੍ਤਂ ਪਤ੍ਤੋ ਪੁਬ੍ਬਸਮ੍ਭਾਰਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਤੁਂ ਓਗਯ੍ਹਾਹਂ ਪੋਕ੍ਖਰਣਿਨ੍ਤਿਆਦਿਮਾਹ. ਤਤ੍ਥ ਓਗਯ੍ਹਾਹਂ ਪੋਕ੍ਖਰਣਿਨ੍ਤਿ ਪੁਥੁਨਾਨਾਅਨੇਕਮਹੋਘੇਹਿ ਖਣਿਤਤ੍ਤਾ ‘‘ਪੋਕ੍ਖਰਣੀ’’ਤਿ ਲਦ੍ਧਨਾਮਂ ਜਲਾਸਯਂ ਓਗਯ੍ਹ ਓਗਹੇਤ੍ਵਾ ਪਵਿਸਿਤ੍ਵਾ ਅਜ੍ਝੋਗਾਹੇਤ੍ਵਾ ਘਾਸਹੇਤੁਖਾਦਨਤ੍ਥਾਯ ਤਤ੍ਥ ਪੋਕ੍ਖਰਣਿਯਂ ਪਵਿਸਿਤ੍ਵਾ ਭਿਸਂ ਪਦੁਮਪੁਣ੍ਡਰੀਕਮੂਲਂ ਉਦ੍ਧਰਾਮੀਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਪਦਤ੍ਥਤ੍ਤਾ ਚ ਨਯਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵਾਤਿ.

ਭਦ੍ਦਜਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਸਿਵਕਤ੍ਥੇਰਅਪਦਾਨਵਣ੍ਣਨਾ

ਨਵਮਾਪਦਾਨੇ ਏਸਨਾਯ ਚਰਨ੍ਤਸ੍ਸਾਤਿਆਦਿਕਂ ਆਯਸ੍ਮਤੋ ਸਿਵਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਭਗਵਨ੍ਤਂ ਪਿਣ੍ਡਾਯ ਚਰਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਤ੍ਤਂ ਆਦਾਯ ਕੁਮ੍ਮਾਸਸ੍ਸ ਪੂਰੇਤ੍ਵਾ ਅਦਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬ੍ਰਾਹ੍ਮਣਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਸਿਵਕੋਤਿਸ੍ਸ ਨਾਮਂ ਅਹੋਸਿ. ਸੋ ਵਯਪ੍ਪਤ੍ਤੋ ਵਿਜ੍ਜਾਸਿਪ੍ਪੇਸੁ ਨਿਪ੍ਫਤ੍ਤਿਂ ਗਤੋ ਨੇਕ੍ਖਮ੍ਮਜ੍ਝਾਸਯਤਾਯ ਕਾਮੇ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਿਚਰਨ੍ਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧੧੭. ਅਰਹਤ੍ਤਂ ਪਤ੍ਵਾ ਸੋਮਨਸ੍ਸਜਾਤੋ ਅਤ੍ਤਨੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਏਸਨਾਯ ਚਰਨ੍ਤਸ੍ਸਾਤਿਆਦਿਮਾਹ. ਤਂ ਸਬ੍ਬਂ ਸੁਵਿਞ੍ਞੇਯ੍ਯਮੇਵਾਤਿ.

ਸਿਵਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਉਪਵਾਨਤ੍ਥੇਰਅਪਦਾਨਵਣ੍ਣਨਾ

ਦਸਮਾਪਦਾਨੇ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਉਪਵਾਨਤ੍ਥੇਰਸ੍ਸ ਅਪਦਾਨਂ. ਅਯਂ ਕਿਰ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਕੇਨਚਿ ਕਮ੍ਮਚ੍ਛਿਦ੍ਦੇਨ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਦਲ੍ਲਿਦ੍ਦਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਭਗਵਤਿ ਪਰਿਨਿਬ੍ਬੁਤੇ ਤਸ੍ਸ ਧਾਤੁਂ ਗਹੇਤ੍ਵਾ ਮਨੁਸ੍ਸਦੇਵਨਾਗਗਰੁਲ਼ਯਕ੍ਖਕੁਮ੍ਭਣ੍ਡਗਨ੍ਧਬ੍ਬੇਹਿ ਸਤ੍ਤਰਤਨਮਯੇ ਸਤ੍ਤਯੋਜਨਿਕੇ ਥੂਪੇ ਕਤੇ ਤਤ੍ਥ ਸੁਧੋਤਂ ਅਤ੍ਤਨੋ ਉਤ੍ਤਰਾਸਙ੍ਗਂ ਵੇਲ਼ਗ੍ਗੇ ਆਬਨ੍ਧਿਤ੍ਵਾ ਧਜਂ ਕਤ੍ਵਾ ਪੂਜਂ ਅਕਾਸਿ. ਤਂ ਗਹੇਤ੍ਵਾ ਅਭਿਸਮ੍ਮਤਕੋ ਨਾਮ ਯਕ੍ਖਸੇਨਾਪਤਿ ਦੇਵੇਹਿ ਚੇਤਿਯਪੂਜਾਰਕ੍ਖਣਤ੍ਥਂ ਠਪਿਤੋ ਅਦਿਸ੍ਸਮਾਨਕਾਯੋ ਆਕਾਸੇ ਧਾਰੇਨ੍ਤੋ ਚੇਤਿਯਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਅਕਾਸਿ. ਤਂ ਦਿਸ੍ਵਾ ਭਿਯ੍ਯੋਸੋਮਤ੍ਤਾਯ ਪਸਨ੍ਨਮਾਨਸੋ ਅਹੋਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਉਪਵਾਨੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਜੇਤਵਨਪਟਿਗ੍ਗਹਣੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਛਲ਼ਭਿਞ੍ਞੋ ਅਹੋਸਿ. ਅਥਾਯਸ੍ਮਾ ਉਪਵਾਨੋ ਭਗਵਤੋ ਉਪਟ੍ਠਾਕੋ ਅਹੋਸਿ. ਤੇਨ ਚ ਸਮਯੇਨ ਭਗਵਤੋ ਵਾਤਾਬਾਧੋ ਉਪ੍ਪਜ੍ਜਿ. ਥੇਰਸ੍ਸ ਗਿਹਿਸਹਾਯੋ ਦੇਵਹਿਤੋ ਨਾਮ ਬ੍ਰਾਹ੍ਮਣੋ ਸਾਵਤ੍ਥਿਯਂ ਪਟਿਵਸਤਿ. ਸੋ ਥੇਰਂ ਚਤੂਹਿ ਪਚ੍ਚਯੇਹਿ ਪਵਾਰੇਸਿ. ਅਥਾਯਸ੍ਮਾ ਉਪਵਾਨੋ ਨਿਵਾਸੇਤ੍ਵਾ ਪਤ੍ਤਚੀਵਰਂ ਗਹੇਤ੍ਵਾ ਤਸ੍ਸ ਬ੍ਰਾਹ੍ਮਣਸ੍ਸ ਨਿਵੇਸਨਂ ਉਪਗਞ੍ਛਿ. ਬ੍ਰਾਹ੍ਮਣੋ ‘‘ਕੇਨਚਿ ਮਞ੍ਞੇ ਪਯੋਜਨੇਨ ਥੇਰੋ ਆਗਤੋ ਭਵਿਸ੍ਸਤੀ’’ਤਿ ਞਤ੍ਵਾ ‘‘ਵਦੇਯ੍ਯਾਥ, ਭਨ੍ਤੇ, ਕੇਨਤ੍ਥੋ’’ਤਿ ਆਹ. ਥੇਰੋ ਤਸ੍ਸ ਬ੍ਰਾਹ੍ਮਣਸ੍ਸ ਪਯੋਜਨਂ ਆਚਿਕ੍ਖਨ੍ਤੋ –

‘‘ਅਰਹਂ ਸੁਗਤੋ ਲੋਕੇ, ਵਾਤੇਹਾਬਾਧਿਕੋ ਮੁਨਿ;

ਸਚੇ ਉਣ੍ਹੋਦਕਂ ਅਤ੍ਥਿ, ਮੁਨਿਨੋ ਦੇਹਿ ਬ੍ਰਾਹ੍ਮਣ.

‘‘ਪੂਜਿਤੋ ਪੂਜਨੇਯ੍ਯਾਨਂ, ਸਕ੍ਕਰੇਯ੍ਯਾਨ ਸਕ੍ਕਤੋ;

ਅਪਚਿਤੋਪਚੇਯ੍ਯਾਨਂ, ਤਸ੍ਸ ਇਚ੍ਛਾਮਿ ਹਾਤਵੇ’’ਤਿ. (ਥੇਰਗਾ. ੧੮੫-੧੮੬) –

ਗਾਥਾਦ੍ਵਯਂ ਅਭਾਸਿ.

ਤਸ੍ਸਤ੍ਥੋ – ਯੋ ਇਮਸ੍ਮਿਂ ਲੋਕੇ ਪੂਜਨੇਯ੍ਯਾਨਂ ਪੂਜੇਤਬ੍ਬੇਹਿ ਸਕ੍ਕਾਦੀਹਿ ਦੇਵੇਹਿ ਮਹਾਬ੍ਰਹ੍ਮਾਦੀਹਿ ਚ ਬ੍ਰਹ੍ਮੇਹਿ ਪੂਜਿਤੋ, ਸਕ੍ਕਰੇਯ੍ਯਾਨਂ ਸਕ੍ਕਾਤਬ੍ਬੇਹਿ ਬਿਮ੍ਬਿਸਾਰਕੋਸਲਰਾਜਾਦੀਹਿ ਸਕ੍ਕਤੋ, ਅਪਚੇਯ੍ਯਾਨਂ ਅਪਚਾਯਿਤਬ੍ਬੇਹਿ ਮਹੇਸੀਹਿ ਖੀਣਾਸਵੇਹਿ ਅਪਚਿਤੋ, ਕਿਲੇਸੇਹਿ ਆਰਕਤ੍ਤਾਦਿਨਾ ਅਰਹਂ, ਸੋਭਨਗਮਨਾਦਿਨਾ ਸੁਗਤੋ ਸਬ੍ਬਞ੍ਞੂ ਮੁਨਿ ਮਯ੍ਹਂ ਸਤ੍ਥਾ ਦੇਵਦੇਵੋ ਸਕ੍ਕਾਨਂ ਅਤਿਸਕ੍ਕੋ ਬ੍ਰਹ੍ਮਾਨਂ ਅਤਿਬ੍ਰਹ੍ਮਾ, ਸੋ ਦਾਨਿ ਵਾਤੇਹਿ ਵਾਤਹੇਤੁ ਵਾਤਕ੍ਖੋਭਨਿਮਿਤ੍ਤਂ ਆਬਾਧਿਕੋ ਜਾਤੋ. ਸਚੇ, ਬ੍ਰਾਹ੍ਮਣ, ਉਣ੍ਹੋਦਕਂ ਅਤ੍ਥਿ, ਤਸ੍ਸ ਵਾਤਾਬਾਧਵੂਪਸਮਨਤ੍ਥਂ ਤਂ ਹਾਤਵੇ ਉਪਨੇਤੁਂ ਇਚ੍ਛਾਮੀਤਿ.

ਤਂ ਸੁਤ੍ਵਾ ਬ੍ਰਾਹ੍ਮਣੋ ਉਣ੍ਹੋਦਕਂ ਤਦਨੁਰੂਪਂ ਵਾਤਹਰਞ੍ਚ ਭੇਸਜ੍ਜਂ ਭਗਵਤੋ ਉਪਨਾਮੇਸਿ. ਤੇਨ ਚ ਸਤ੍ਥੁ ਰੋਗੋ ਵੂਪਸਮਿ. ਤਸ੍ਸ ਭਗਵਾ ਅਨੁਮੋਦਨਂ ਅਕਾਸਿ.

੧੨੨. ਅਥਾਯਸ੍ਮਾ ਉਪਵਾਨੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਤ੍ਥ ਪਦੁਮੁਤ੍ਤਰੋਤਿਆਦੀਨਿ ਪੁਬ੍ਬੇ ਵੁਤ੍ਤਤ੍ਥਾਨੇਵ.

੧੨੩. ਮਹਾਜਨਾ ਸਮਾਗਮ੍ਮਾਤਿ ਸਕਲਜਮ੍ਬੁਦੀਪਵਾਸਿਨੋ ਰਾਸਿਭੂਤਾਤਿ ਅਤ੍ਥੋ. ਚਿਤਕਂ ਕਤ੍ਵਾਤਿ ਯੋਜਨੁਬ੍ਬੇਧਂ ਚਨ੍ਦਨਰਾਸਿਚਿਤਕਂ ਕਤ੍ਵਾ ਭਗਵਤੋ ਸਰੀਰਂ ਤਤ੍ਥ ਅਭਿਰੋਪਯਿਂਸੂਤਿ ਸਮ੍ਬਨ੍ਧੋ.

੧੨੪. ਸਰੀਰਕਿਚ੍ਚਂ ਕਤ੍ਵਾਨਾਤਿ ਆਦਹਨਾਤਿ ਅਗ੍ਗਿਨਾ ਦਹਨਕਿਚ੍ਚਂ ਕਤ੍ਵਾਤਿ ਅਤ੍ਥੋ.

੧੨੭-੨੮. ਜਙ੍ਘਾ ਮਣਿਮਯਾ ਆਸੀਤਿ ਮਨੁਸ੍ਸੇਹਿ ਕਤਥੂਪੇ ਜਙ੍ਘਾ ਪੁਪ੍ਫਵਾਹਤ੍ਥਂ ਚਰਿਤਟ੍ਠਾਨਂ ਮਣਿਮਯਾ ਇਨ੍ਦਨੀਲਮਣਿਨਾ ਕਤਾਤਿ ਅਤ੍ਥੋ. ਮਯਮ੍ਪੀਤਿ ਸਬ੍ਬੇ ਦੇਵਾ ਥੂਪਂ ਕਰਿਸ੍ਸਾਮਾਤਿ ਅਤ੍ਥੋ.

੧੨੯. ਧਾਤੁ ਆਵੇਣਿਕਾ ਨਤ੍ਥੀਤਿ ਦੇਵਮਨੁਸ੍ਸੇਹਿ ਵਿਸੁਂ ਵਿਸੁਂ ਚੇਤਿਯਂ ਕਾਤੁਂ ਆਵੇਣਿਕਾ ਵਿਸੁਂ ਧਾਤੁ ਨਤ੍ਥਿ, ਤਂ ਦਸ੍ਸੇਨ੍ਤੋ ਸਰੀਰਂ ਏਕਪਿਣ੍ਡਿਤਨ੍ਤਿ ਆਹ. ਅਧਿਟ੍ਠਾਨਬਲੇਨ ਸਕਲਸਰੀਰਧਾਤੁ ਏਕਘਨਸਿਲਾਮਯਪਟਿਮਾ ਵਿਯ ਏਕਮੇਵ ਅਹੋਸੀਤਿ ਅਤ੍ਥੋ. ਇਮਮ੍ਹਿ ਬੁਦ੍ਧਥੂਪਮ੍ਹੀਤਿ ਸਕਲਜਮ੍ਬੁਦੀਪਵਾਸੀਹਿ ਕਤਮ੍ਹਿ ਇਮਮ੍ਹਿ ਸੁਵਣ੍ਣਥੂਪਮ੍ਹਿ ਮਯਂ ਸਬ੍ਬੇ ਸਮਾਗਨ੍ਤ੍ਵਾ ਕਞ੍ਚੁਕਥੂਪਂ ਕਰਿਸ੍ਸਾਮਾਤਿ ਅਤ੍ਥੋ.

੧੩੩. ਇਨ੍ਦਨੀਲਂ ਮਹਾਨੀਲਨ੍ਤਿ ਇਨ੍ਦੀਵਰਪੁਪ੍ਫਵਣ੍ਣਾਭਂ ਮਣਿ ਇਨ੍ਦਨੀਲਮਣਿ. ਤਤੋ ਅਧਿਕਵਣ੍ਣਤਾ ਮਹਾਮਣਿ ਇਨ੍ਦਨੀਲਮਣਯੋ ਚ ਮਹਾਨੀਲਮਣਯੋ ਚ ਜੋਤਿਰਸਮਣਿਜਾਤਿਰਙ੍ਗਮਣਯੋ ਚ ਏਕਤੋ ਸਨ੍ਨਿਪਾਤੇਤ੍ਵਾ ਰਾਸੀ ਕਤ੍ਵਾ ਸੁਵਣ੍ਣਥੂਪੇ ਕਞ੍ਚੁਕਥੂਪਂ ਕਤ੍ਵਾ ਅਛਾਦਯੁਨ੍ਤਿ ਸਮ੍ਬਨ੍ਧੋ.

੧੪੪. ਪਚ੍ਚੇਕਂ ਬੁਦ੍ਧਸੇਟ੍ਠਸ੍ਸਾਤਿ ਬੁਦ੍ਧੁਤ੍ਤਮਸ੍ਸ ਪਤਿ ਏਕਂ ਵਿਸੁਂ ਉਪਰਿਛਦਨੇਨ ਥੂਪਂ ਅਕਂਸੂਤਿ ਅਤ੍ਥੋ.

੧੪੭. ਕੁਮ੍ਭਣ੍ਡਾ ਗੁਯ੍ਹਕਾ ਤਥਾਤਿ ਕੁਮ੍ਭਮਤ੍ਤਾਨਿ ਅਣ੍ਡਾਨਿ ਯੇਸਂ ਦੇਵਾਨਂ ਤੇ ਕੁਮ੍ਭਣ੍ਡਾ, ਪਟਿਚ੍ਛਾਦੇਤ੍ਵਾ ਨਿਗੁਹਿਤ੍ਵਾ ਪਟਿਚ੍ਛਾਦਨਤੋ ਗਰੁਲ਼ਾ ਗੁਯ੍ਹਕਾ ਨਾਮ ਜਾਤਾ, ਤੇ ਕੁਮ੍ਭਣ੍ਡਾ ਗੁਯ੍ਹਕਾਪਿ ਥੂਪਂ ਅਕਂਸੂਤਿ ਅਤ੍ਥੋ.

੧੫੧. ਅਤਿਭੋਨ੍ਤਿ ਨ ਤਸ੍ਸਾਭਾਤਿ ਤਸ੍ਸ ਚੇਤਿਯਸ੍ਸ ਪਭਂ ਚਨ੍ਦਸੂਰਿਯਤਾਰਕਾਨਂ ਪਭਾ ਨ ਅਤਿਭੋਨ੍ਤਿ, ਨ ਅਜ੍ਝੋਤ੍ਥਰਨ੍ਤੀਤਿ ਅਤ੍ਥੋ.

੧੫੮. ਅਹਮ੍ਪਿ ਕਾਰਂ ਕਸ੍ਸਾਮੀਤਿ ਤਾਦਿਨੋ ਲੋਕਨਾਥਸ੍ਸ ਥੂਪਸ੍ਮਿਂ ਅਹਮ੍ਪਿ ਕਾਰਂ ਪੁਞ੍ਞਕਿਰਿਯਂ ਕੁਸਲਕਮ੍ਮਂ ਧਜਪਟਾਕਪੂਜਂ ਕਰਿਸ੍ਸਾਮੀਤਿ ਅਤ੍ਥੋ.

ਉਪਵਾਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੧. ਰਟ੍ਠਪਾਲਤ੍ਥੇਰਅਪਦਾਨਵਣ੍ਣਨਾ

ਏਕਾਦਸਮਾਪਦਾਨੇ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਰਟ੍ਠਪਾਲਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਤਸ੍ਸ ਉਪ੍ਪਤ੍ਤਿਤੋ ਪੁਰੇਤਰਮੇਵ ਹਂਸਵਤੀਨਗਰੇ ਗਹਪਤਿਮਹਾਸਾਲਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਪਿਤੁ ਅਚ੍ਚਯੇਨ ਘਰਾਵਾਸੇ ਪਤਿਟ੍ਠਿਤੋ ਰਤਨਕੋਟ੍ਠਾਗਾਰਕਮ੍ਮਿਕੇਨ ਦਸ੍ਸਿਤਂ ਅਪਰਿਮਾਣਂ ਕੁਲਵਂਸਾਨੁਗਤਂ ਧਨਂ ਦਿਸ੍ਵਾ ‘‘ਇਮਂ ਏਤ੍ਤਕਂ ਧਨਰਾਸਿਂ ਮਯ੍ਹਂ ਅਯ੍ਯਕਪਯ੍ਯਕਾਦਯੋ ਅਤ੍ਤਨਾ ਸਦ੍ਧਿਂ ਗਹੇਤ੍ਵਾ ਗਨ੍ਤੁਂ ਨਾਸਕ੍ਖਿਂਸੁ, ਮਯਾ ਪਨ ਗਹੇਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਕਪਣਦ੍ਧਿਕਾਦੀਨਂ ਮਹਾਦਾਨਂ ਦੇਤਿ. ਸੋ ਅਭਿਞ੍ਞਾਲਾਭਿਂ ਏਕਂ ਤਾਪਸਂ ਉਪਟ੍ਠਹਨ੍ਤੋ ਤੇਨ ਦੇਵਲੋਕਾਧਿਪਚ੍ਚੇ ਉਯ੍ਯੋਜਿਤੋ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚੁਤੋ ਦੇਵੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਤਤ੍ਥ ਦੇਵਲੋਕੇ ਦੇਵਰਜ੍ਜਂ ਕਰੋਨ੍ਤੋ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਮਨੁਸ੍ਸਲੋਕੇ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥਸ੍ਸ ਕੁਲਸ੍ਸ ਏਕਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਤੇਨ ਚ ਸਮਯੇਨ ਪਦੁਮੁਤ੍ਤਰੋ ਨਾਮ ਭਗਵਾ ਲੋਕੇ ਉਪ੍ਪਜ੍ਜਿਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੋ ਵੇਨੇਯ੍ਯਸਤ੍ਤਂ ਨਿਬ੍ਬਾਨਮਹਾਨਗਰਸਙ੍ਖਾਤਖੇਮਨ੍ਤਭੂਮਿਂ ਸਮ੍ਪਾਪੇਸਿ. ਅਥ ਸੋ ਕੁਲਪੁਤ੍ਤੋ ਅਨੁਕ੍ਕਮੇਨ ਵਿਞ੍ਞੁਤਂ ਪਤ੍ਤੋ ਏਕਦਿਵਸਂ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਤੋ ਸਤ੍ਥਾਰਂ ਧਮ੍ਮਂ ਦੇਸੇਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਪਰਿਸਪਰਿਯਨ੍ਤੇ ਨਿਸੀਦਿ.

ਤੇਨ ਚ ਸਮਯੇਨ ਸਤ੍ਥਾ ਏਕਂ ਭਿਕ੍ਖੁਂ ਸਦ੍ਧਾਪਬ੍ਬਜਿਤਾਨਂ ਅਗ੍ਗਟ੍ਠਾਨੇ ਠਪੇਸਿ, ਤਂ ਦਿਸ੍ਵਾ ਪਸਨ੍ਨਮਾਨਸੋ ਤਦਤ੍ਥਾਯ ਚਿਤ੍ਤਂ ਠਪੇਤ੍ਵਾ ਸਤਸਹਸ੍ਸਭਿਕ੍ਖੁਪਰਿਵਾਰਸ੍ਸ ਭਗਵਤੋ ਮਹਤਾ ਸਕ੍ਕਾਰੇਨ ਸਤ੍ਤਾਹਂ ਮਹਾਦਾਨਂ ਪਵਤ੍ਤੇਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਤਸ੍ਸ ਅਨਨ੍ਤਰਾਯੇਨ ਇਜ੍ਝਨਭਾਵਂ ਦਿਸ੍ਵਾ ‘‘ਅਨਾਗਤੇ ਗੋਤਮਸ੍ਸ ਨਾਮ ਸਮ੍ਮਾਸਮ੍ਬੁਦ੍ਧਸ੍ਸ ਸਾਸਨੇ ਸਦ੍ਧਾਪਬ੍ਬਜਿਤਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਸਤ੍ਥਾਰਂ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ. ਸੋ ਤਤ੍ਥ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਤੋ ਦ੍ਵਾਨਵੁਤਿਕਪ੍ਪੇ ਫੁਸ੍ਸਸ੍ਸ ਭਗਵਤੋ ਕਾਲੇ ਸਤ੍ਥੁ ਵੇਮਾਤਿਕਭਾਤਿਕੇਸੁ ਤੀਸੁ ਰਾਜਪੁਤ੍ਤੇਸੁ ਸਤ੍ਥਾਰਂ ਉਪਟ੍ਠਹਨ੍ਤੇਸੁ ਤੇਸਂ ਪੁਞ੍ਞਕਿਰਿਯਾਯ ਸਹਾਯਕਿਚ੍ਚਂ ਅਕਾਸਿ. ਏਵਂ ਤਤ੍ਥ ਤਤ੍ਥ ਭਵੇ ਤਂ ਤਂ ਬਹੁਂ ਕੁਸਲਂ ਉਪਚਿਨਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਰੁਰਟ੍ਠੇ ਥੁਲ੍ਲਕੋਟ੍ਠਿਕਨਿਗਮੇ ਰਟ੍ਠਪਾਲਸੇਟ੍ਠਿਗੇਹੇ ਨਿਬ੍ਬਤ੍ਤਿ, ਤਸ੍ਸ ਭਿਨ੍ਨਂ ਰਟ੍ਠਂ ਸਨ੍ਧਾਰੇਤੁਂ ਸਮਤ੍ਥੇ ਕੁਲੇ ਨਿਬ੍ਬਤ੍ਤਤ੍ਤਾ ਰਟ੍ਠਪਾਲੋਤਿ ਵਂਸਾਨੁਗਤਮੇਵ ਨਾਮਂ ਅਹੋਸਿ. ਸੋ ਮਹਤਾ ਪਰਿਵਾਰੇਨ ਵਡ੍ਢਨ੍ਤੋ ਅਨੁਕ੍ਕਮੇਨ ਯੋਬ੍ਬਨਂ ਪਤ੍ਤੋ ਮਾਤਾਪਿਤੂਹਿ ਪਤਿਰੂਪੇਨ ਦਾਰੇਨ ਸਂਯੋਜੇਤ੍ਵਾ ਮਹਨ੍ਤੇ ਚ ਯਸੇ ਪਤਿਟ੍ਠਾਪਿਤੋ ਦਿਬ੍ਬਸਮ੍ਪਤ੍ਤਿਸਦਿਸਂ ਸਮ੍ਪਤ੍ਤਿਂ ਪਚ੍ਚਨੁਭੋਤਿ. ਅਥ ਭਗਵਾ ਕੁਰੁਰਟ੍ਠੇ ਜਨਪਦਚਾਰਿਕਂ ਚਰਨ੍ਤੋ ਥੁਲ੍ਲਕੋਟ੍ਠਿਕਂ ਅਨੁਪਾਪੁਣਿ. ਤਂ ਸੁਤ੍ਵਾ ਰਟ੍ਠਪਾਲੋ ਕੁਲਪੁਤ੍ਤੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਸਤ੍ਤਵਾਰੇ ਭਤ੍ਤਚ੍ਛੇਦੇ ਕਤ੍ਵਾ ਕਿਚ੍ਛੇਨ ਕਸਿਰੇਨ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿਤ੍ਵਾ ਸਤ੍ਥੁ ਆਣਤ੍ਤਿਯਾ ਅਞ੍ਞਤਰਸ੍ਸ ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਯੋਨਿਸੋਮਨਸਿਕਾਰੇਨ ਕਮ੍ਮਂ ਕਰੋਨ੍ਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ.

੧੭੯-੧੮੦. ਅਥਾਯਸ੍ਮਾ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋਤਿਆਦਿਮਾਹ. ਸੁਨਾਗੋ ਸੋ ਮਯਾ ਦਿਨ੍ਨੋਤਿ ਤਦਾ ਮਹਾਧਨਸੇਟ੍ਠਿ ਹੁਤ੍ਵਾ ਸਬ੍ਬਂ ਸਾਪਤੇਯ੍ਯਂ ਦਾਨਮੁਖੇ ਵਿਸ੍ਸਜ੍ਜਨਸਮਯੇ ਸਤ੍ਤਪ੍ਪਤਿਟ੍ਠੋ ਸੁਨ੍ਦਰੋ ਨਾਗੋ ਹਤ੍ਥਿਰਾਜਾ ਮਯਾ ਦਿਨ੍ਨੋ ਅਹੋਸਿ. ਤਂ ਦਸ੍ਸੇਨ੍ਤੋ ਈਸਾਦਨ੍ਤੋਤਿਆਦਿਮਾਹ. ਈਸਾਦਨ੍ਤੋ ਰਥਈਸਪ੍ਪਮਾਣਦਨ੍ਤੋ, ਸੋ ਮਯਾ ਦਿਨ੍ਨੋ ਹਤ੍ਥਿਨਾਗੋ. ਉਰੂਲ਼੍ਹਵਾਤਿ ਰਾਜਾਵਹਨਯੋਗ੍ਗਸਮਤ੍ਥੋ, ਰਾਜਾਰਹੋ ਵਾ. ਸੇਤਚ੍ਛਤ੍ਤੋਤਿ ਅਲਙ੍ਕਾਰਤ੍ਥਾਯ ਉਪਟ੍ਠਹਨਸੇਤਚ੍ਛਤ੍ਤਸਹਿਤੋਤਿ ਅਤ੍ਥੋ. ਪਸੋਭਿਤੋਤਿ ਆਰੋਹਪਰਿਣਾਹਵਾ ਰੂਪਸੋਭਾਹਿ ਸਮ੍ਪਨ੍ਨੋਤਿ ਅਤ੍ਥੋ. ਸਕਪ੍ਪਨੋ ਸਹਤ੍ਥਿਪੋਤਿ ਹਤ੍ਥਿਅਲਙ੍ਕਾਰਸਹਿਤੋ ਹਤ੍ਥਿਗੋਪਕਸਹਿਤੋਤਿ ਅਤ੍ਥੋ. ਇਤ੍ਥਮ੍ਭੂਤੋ ਹਤ੍ਥਿਨਾਗੋ ਪਦੁਮੁਤ੍ਤਰਸ੍ਸ ਭਗਵਤੋ ਮਯਾ ਦਿਨ੍ਨੋਤਿ ਅਤ੍ਥੋ.

੧੮੧. ਮਯਾ ਭਤ੍ਤਂ ਕਾਰੇਤ੍ਵਾਨਾਤਿ ਮਯਾ ਕਾਰਾਪਿਤਵਿਹਾਰੇ ਵਸਨ੍ਤਾਨਂ ਕੋਟਿਸਙ੍ਖਾਨਂ ਭਿਕ੍ਖੂਨਂ ਨਿਚ੍ਚਭਤ੍ਤਂ ਪਟ੍ਠਪੇਤ੍ਵਾ ਮਹੇਸਿਨੋ ਨਿਯ੍ਯਾਦੇਸਿਨ੍ਤਿ ਸਮ੍ਬਨ੍ਧੋ.

੧੮੩. ਜਲਜੁਤ੍ਤਮਨਾਮਕੋਤਿ ਜਲਤੋ ਜਾਤੋ ਜਲਜੋ, ਕਿਂ ਤਂ? ਪਦੁਮਂ, ਪਦੁਮੇਨ ਸਮਾਨਨਾਮਤ੍ਤਾ ਉਤ੍ਤਮਤ੍ਤਾ ਚ ਪਦੁਮੁਤ੍ਤਰੋ ਨਾਮ ਭਗਵਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਰਟ੍ਠਪਾਲਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਛਪ੍ਪਞ੍ਞਾਸਮਮਹਾਵਗ੍ਗਵਣ੍ਣਨਾ ਸਮਤ੍ਤਾ.

ਇਤਿ ਵਿਸੁਦ੍ਧਜਨਵਿਲਾਸਿਨਿਯਾ ਅਪਦਾਨ-ਅਟ੍ਠਕਥਾਯ

ਏਤ੍ਤਾਵਤਾ ਬੁਦ੍ਧਪਚ੍ਚੇਕਬੁਦ੍ਧਸਾਵਕਤ੍ਥੇਰਾਪਦਾਨ-ਅਟ੍ਠਕਥਾ ਸਮਤ੍ਤਾ.

ਨਿਗਮਨਕਥਾ

ਸੀਹਲ਼ਦੀਪਕੇ ਅਪ੍ਪਿਚ੍ਛਤਾਦਿਗੁਣਵਨ੍ਤਾਨਂ ਥੇਰਵਂਸਪ੍ਪਦੀਪਾਨਂ ਆਨਨ੍ਦਤ੍ਥੇਰਾਦੀਨਂ ਸਬ੍ਬਸਤ੍ਤਾਨਂ ਤਣ੍ਹਾਮਾਨਦਿਟ੍ਠਾਦਯੋ ਛੇਦਨਨਿਗ੍ਗਹਵਿਵੇਚਨਾਦ੍ਯਤ੍ਥਂ ਸਤ੍ਤਹਿ ਮਾਸੇਹਿ ਅਤਿਵਿਯ ਆਰਾਧਨੇਨ ਲਦ੍ਧਕੋਸਲ੍ਲੇਨ ਬੋਧਿਸਮ੍ਭਾਰਂ ਗਵੇਸਨ੍ਤੇਨ ਸਤਿਧਿਤਿਗਤਿਵੀਰਿਯਪਰਕ੍ਕਮਨ੍ਤੇਨ ਮਹਾਸਮਨ੍ਤਗੁਣਸੋਭਨੇਨ ਤਿਪਿਟਕਧਰੇਨ ਪਣ੍ਡਿਤੇਨ ਆਭਤਂ ਇਮਂ ਅਪਦਾਨ-ਅਟ੍ਠਕਥਂ ਸਬ੍ਬੋ ਸਦੇਵਲੋਕੋ ਜਾਨਾਤੂਤਿ.

ਅਨੇਨ ਲੋਭਾਦਿਮਲਾ ਪਜਾਨਂ, ਚਕ੍ਖਾਦਿਰੋਗਾ ਵਿਵਿਧਾ ਚ ਦੁਕ੍ਖਾ;

ਕਲਹਾਦਿਭਯਾ ਦੁਕ੍ਖਿਤਾ ਜਾਤਾ, ਚੋਰਾਦਯੋਨਤ੍ਥਕਰਾ ਚ ਲੋਕੇ.

ਨਸ੍ਸਨ੍ਤੁ ਮੇ ਪਞ੍ਚ ਵੇਰਾ ਚ ਪਾਪਾ, ਨਸ੍ਸਨ੍ਤੁ ਗਿਮ੍ਹੇ ਯਥਾ ਵੁਟ੍ਠਿਵਾਤਾ;

ਅਟ੍ਠਙ੍ਗਿਕਮਗ੍ਗਵਰੇਨ ਪਤ੍ਵਾ, ਨਿਬ੍ਬਾਨਪੁਰਂ ਪਟਿਪਾਦਯਾਮਿ.

ਸਬ੍ਬਦਿਟ੍ਠਿਞ੍ਚ ਮਦ੍ਦਨ੍ਤੋ, ਰਾਗਦੋਸਾਦਿਪਾਪਕੇ;

ਸਂਸਾਰਵਟ੍ਟਂ ਛਿਨ੍ਦਿਤ੍ਵਾ, ਉਪੇਮਿ ਸਗ੍ਗਮੋਕ੍ਖਕੇ.

ਆਣਾਖੇਤ੍ਤਮ੍ਹਿ ਸਬ੍ਬਤ੍ਥ, ਅਵੀਚਿਮ੍ਹਿ ਭਵਗ੍ਗਤੋ;

ਸਬ੍ਬੇ ਧਮ੍ਮਾਨੁਯਾਯਨ੍ਤੁ, ਤਯੋ ਲੋਕਾ ਉਤੁਪਿ ਚਾਤਿ.

ਅਪਦਾਨ-ਅਟ੍ਠਕਥਾ ਸਮਤ੍ਤਾ.