੫. ਉਪਾਲਿਵਗ੍ਗੋ

੧. ਭਾਗਿਨੇਯ੍ਯੁਪਾਲਿਤ੍ਥੇਰਅਪਦਾਨਵਣ੍ਣਨਾ

ਖੀਣਾਸਵਸਹਸ੍ਸੇਹੀਤਿਆਦਿਕਂ ਆਯਸ੍ਮਤੋ ਉਪਾਲਿਤ੍ਥੇਰਸ੍ਸ ਭਾਗਿਨੇਯ੍ਯੁਪਾਲਿਤ੍ਥੇਰਸ੍ਸ ਅਪਦਾਨਂ. ਏਸੋ ਹਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਸ੍ਮਿਂ ਤਸ੍ਮਿਂ ਭਵੇ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸੇ ਆਦੀਨਵਂ ਦਿਸ੍ਵਾ ਗੇਹਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਞ੍ਚਾਭਿਞ੍ਞਾਅਟ੍ਠਸਮਾਪਤ੍ਤਿਲਾਭੀ ਹੁਤ੍ਵਾ ਹਿਮਵਨ੍ਤੇ ਵਾਸਂ ਕਪ੍ਪੇਸਿ. ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗਵਾ ਵਿਵੇਕਕਾਮੋ ਹਿਮਵਨ੍ਤਂ ਪਾਵਿਸਿ. ਤਾਪਸੋ ਭਗਵਨ੍ਤਂ ਪੁਣ੍ਣਚਨ੍ਦਮਿਵ ਵਿਰੋਚਮਾਨਂ ਦੂਰਤੋਵ ਦਿਸ੍ਵਾ ਪਸਨ੍ਨਮਾਨਸੋ ਅਜਿਨਚਮ੍ਮਂ ਅਂਸੇ ਕਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਵਨ੍ਦਿਤ੍ਵਾ ਠਿਤਕੋਵ ਦਸਨਖਸਮੋਧਾਨਞ੍ਜਲਿਂ ਸਿਰਸਿ ਪਤਿਟ੍ਠਪੇਤ੍ਵਾ ਅਨੇਕਾਹਿ ਉਪਮਾਹਿ ਅਨੇਕੇਹਿ ਥੁਤਿਵਚਨੇਹਿ ਭਗਵਨ੍ਤਂ ਥੋਮੇਸਿ. ਤਂ ਸੁਤ੍ਵਾ ਭਗਵਾ – ‘‘ਅਯਂ ਤਾਪਸੋ ਅਨਾਗਤੇ ਗੋਤਮਸ੍ਸ ਨਾਮ ਭਗਵਤੋ ਸਾਸਨੇ ਪਬ੍ਬਜਿਤ੍ਵਾ ਵਿਨਯੇ ਤਿਖਿਣਪਞ੍ਞਾਨਂ ਅਗ੍ਗੋ ਭਵਿਸ੍ਸਤੀ’’ਤਿ ਬ੍ਯਾਕਰਣਮਦਾਸਿ. ਸੋ ਯਾਵਤਾਯੁਕਂ ਠਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ. ਤਤੋ ਚੁਤੋ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਪਿਲਵਤ੍ਥੁਨਗਰੇ ਉਪਾਲਿਤ੍ਥੇਰਸ੍ਸ ਭਾਗਿਨੇਯ੍ਯੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਕਮੇਨ ਵੁਦ੍ਧਿਪ੍ਪਤ੍ਤੋ ਮਾਤੁਲਸ੍ਸ ਉਪਾਲਿਤ੍ਥੇਰਸ ਸਨ੍ਤਿਕੇ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਸੋ ਅਤ੍ਤਨੋ ਆਚਰਿਯਸ੍ਸ ਸਮੀਪੇ ਵਸਿਤਤ੍ਤਾ ਵਿਨਯਪਞ੍ਹੇ ਤਿਖਿਣਞਾਣੋ ਅਹੋਸਿ. ਅਥ ਭਗਵਾ ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਵਿਨਯਪਞ੍ਹੇ ਤਿਖਿਣਪਞ੍ਞਾਨਂ ਭਿਕ੍ਖੂਨਂ ਯਦਿਦਂ ਭਾਗਿਨੇਯ੍ਯੁਪਾਲੀ’’ਤਿ ਤਂ ਏਤਦਗ੍ਗਟ੍ਠਾਨੇ ਠਪੇਸਿ.

੧. ਸੋ ਏਵਂ ਏਤਦਗ੍ਗਟ੍ਠਾਨਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਖੀਣਾਸਵਸਹਸ੍ਸੇਹੀਤਿਆਦਿਮਾਹ. ਤਤ੍ਥ ਆ ਸਮਨ੍ਤਤੋ ਯਾਵਭਵਗ੍ਗਾ ਸਵਨ੍ਤਿ ਪਵਤ੍ਤਨ੍ਤੀਤਿ ਆਸਵਾ. ਕਾਮਾਸਵਾਦਯੋ ਚਤ੍ਤਾਰੋ ਆਸਵਾ, ਤੇ ਖੀਣਾ ਸੋਸਿਤਾ ਵਿਸੋਸਿਤਾ ਵਿਦ੍ਧਂਸਿਤਾ ਯੇਹਿ ਤੇਤਿ ਖੀਣਾਸਵਾ, ਤੇਯੇਵ ਸਹਸ੍ਸਾ ਖੀਣਾਸਵਸਹਸ੍ਸਾ, ਤੇਹਿ ਖੀਣਾਸਵਸਹਸ੍ਸੇਹਿ. ਪਰੇਤੋ ਪਰਿਵੁਤੋ ਲੋਕਨਾਯਕੋ ਲੋਕਸ੍ਸ ਨਿਬ੍ਬਾਨਪਾਪਨਕੋ ਵਿਵੇਕਂ ਅਨੁਯੁਤ੍ਤੋ ਪਟਿਸਲ੍ਲਿਤੁਂ ਏਕੀਭਵਿਤੁਂ ਗਚ੍ਛਤੇਤਿ ਸਮ੍ਬਨ੍ਧੋ.

੨. ਅਜਿਨੇਨ ਨਿਵਤ੍ਥੋਹਨ੍ਤਿ ਅਹਂ ਅਜਿਨਮਿਗਚਮ੍ਮੇਨ ਪਟਿਚ੍ਛਨ੍ਨੋ, ਅਜਿਨਚਮ੍ਮਵਸਨੋਤਿ ਅਤ੍ਥੋ. ਤਿਦਣ੍ਡਪਰਿਧਾਰਕੋਤਿ ਕੁਣ੍ਡਿਕਟ੍ਠਪਨਤ੍ਥਾਯ ਤਿਦਣ੍ਡਂ ਗਹੇਤ੍ਵਾ ਧਾਰੇਨ੍ਤੋਤਿ ਅਤ੍ਥੋ. ਭਿਕ੍ਖੁਸਙ੍ਘੇਨ ਪਰਿਬ੍ਯੂਲ਼੍ਹਂ ਪਰਿਵਾਰਿਤਂ ਲੋਕਨਾਯਕਂ ਅਦ੍ਦਸਨ੍ਤਿ ਸਮ੍ਬਨ੍ਧੋ. ਸੇਸਂ ਪਾਕਟਮੇਵਾਤਿ.

ਭਾਗਿਨੇਯ੍ਯੁਪਾਲਿਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਸੋਣਕੋਲ਼ਿਵਿਸਤ੍ਥੇਰਅਪਦਾਨਵਣ੍ਣਨਾ

ਅਨੋਮਦਸ੍ਸਿਸ੍ਸ ਮੁਨਿਨੋਤਿਆਦਿਕਂ ਆਯਸ੍ਮਤੋ ਕੋਲ਼ਿਵਿਸਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਪੁਤ੍ਤਦਾਰੇਹਿ ਵਡ੍ਢਿਤੋ ਵਿਭਵਸਮ੍ਪਨ੍ਨੋ ਭਗਵਤੋ ਚਙ੍ਕਮਨਤ੍ਥਾਯ ਸੋਭਨਂ ਚਙ੍ਕਮਂ ਕਾਰੇਤ੍ਵਾ ਸੁਧਾਪਰਿਕਮ੍ਮਂ ਕਾਰੇਤ੍ਵਾ ਆਦਾਸਤਲਮਿਵ ਸਮਂ ਵਿਜ੍ਜੋਤਮਾਨਂ ਕਤ੍ਵਾ ਦੀਪਧੂਪਪੁਪ੍ਫਾਦੀਹਿ ਸਜ੍ਜੇਤ੍ਵਾ ਭਗਵਤੋ ਨਿਯ੍ਯਾਦੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਪਣੀਤੇਨਾਹਾਰੇਨ ਪੂਜੇਸਿ. ਸੋ ਏਵਂ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਲੋਕੇ ਨਿਬ੍ਬਤ੍ਤੋ. ਤਤ੍ਥ ਪਾਲ਼ਿਯਾ ਵੁਤ੍ਤਨਯੇਨ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਨ੍ਤਰਾ ਓਕ੍ਕਾਕਕੁਲਪ੍ਪਸੁਤੋਤਿ ਤਂ ਸਬ੍ਬਂ ਪਾਲ਼ਿਯਾ ਵੁਤ੍ਤਾਨੁਸਾਰੇਨ ਵੇਦਿਤਬ੍ਬਂ. ਪਚ੍ਛਿਮਭਵੇ ਪਨ ਕੋਲਿਯਰਾਜਵਂਸੇ ਜਾਤੋ ਵਯਪ੍ਪਤ੍ਤੋ ਕੋਟਿਅਗ੍ਘਨਕਸ੍ਸ ਕਣ੍ਣਪਿਲ਼ਨ੍ਧਨਸ੍ਸ ਧਾਰਿਤਤ੍ਤਾ ਕੋਟਿਕਣ੍ਣੋਤਿ, ਕੁਟਿਕਣ੍ਣੋਤਿ ਚ ਪਾਕਟੋ ਅਹੋਸਿ. ਸੋ ਭਗਵਤਿ ਪਸਨ੍ਨੋ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੨੫. ਸੋ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਨੋਮਦਸ੍ਸਿਸ੍ਸ ਮੁਨਿਨੋਤਿਆਦਿਮਾਹ. ਤਤ੍ਥ ਅਨੋਮਦਸ੍ਸਿਸ੍ਸਾਤਿ ਅਨੋਮਂ ਅਲਾਮਕਂ ਸੁਨ੍ਦਰਂ ਦਸ੍ਸਨਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪਟਿਮਣ੍ਡਿਤਤ੍ਤਾ ਬ੍ਯਾਮਪ੍ਪਭਾਮਣ੍ਡਲੋਪਸੋਭਿਤਤ੍ਤਾ ਆਰੋਹਪਰਿਣਾਹੇਨ ਸਮਨ੍ਨਾਗਤਤ੍ਤਾ ਚ ਦਸ੍ਸਨੀਯਂ ਸਰੀਰਂ ਯਸ੍ਸ ਭਗਵਤੋ ਸੋ ਅਨੋਮਦਸ੍ਸੀ, ਤਸ੍ਸ ਅਨੋਮਦਸ੍ਸਿਸ੍ਸ ਮੁਨਿਨੋਤਿ ਅਤ੍ਥੋ. ਤਾਦਿਨੋਤਿ ਇਟ੍ਠਾਨਿਟ੍ਠੇਸੁ ਅਕਮ੍ਪਿਯਸਭਾਵਸ੍ਸ. ਸੁਧਾਯ ਲੇਪਨਂ ਕਤ੍ਵਾਤਿ ਸੁਧਾਯ ਅਵਲਿਤ੍ਤਂ ਕਤ੍ਵਾ ਦੀਪਧੂਪਪੁਪ੍ਫਧਜਪਟਾਕਾਦੀਹਿ ਚ ਅਲਙ੍ਕਤਂ ਚਙ੍ਕਮਂ ਕਾਰਯਿਂ ਅਕਾਸਿਨ੍ਤਿ ਅਤ੍ਥੋ. ਸੇਸਗਾਥਾਨਂ ਅਤ੍ਥੋ ਪਾਲ਼ਿਯਾ ਅਨੁਸਾਰੇਨ ਸੁਵਿਞ੍ਞੇਯ੍ਯੋਵ.

੩੫. ਪਰਿਵਾਰਸਮ੍ਪਤ੍ਤਿਧਨਸਮ੍ਪਤ੍ਤਿਸਙ੍ਖਾਤਂ ਯਸਂ ਧਾਰੇਤੀਤਿ ਯਸੋਧਰੋ, ਸਬ੍ਬੇ ਏਤੇ ਸਤ੍ਤਸਤ੍ਤਤਿਚਕ੍ਕਵਤ੍ਤਿਰਾਜਾਨੋ ਯਸੋਧਰਨਾਮੇਨ ਏਕਨਾਮਕਾਤਿ ਸਮ੍ਬਨ੍ਧੋ.

੫੨. ਅਙ੍ਗੀਰਸੋਤਿ ਅਙ੍ਗਤੋ ਸਰੀਰਤੋ ਨਿਗ੍ਗਤਾ ਰਸ੍ਮਿ ਯਸ੍ਸ ਸੋ ਅਙ੍ਗੀਰਸੋ, ਛਨ੍ਦਦੋਸਮੋਹਭਯਾਗਤੀਹਿ ਵਾ ਪਾਪਾਚਾਰਵਸੇਨ ਵਾ ਚਤੁਰਾਪਾਯਂ ਨ ਗਚ੍ਛਤੀਤਿ ਨਾਗੋ, ਮਹਨ੍ਤੋ ਪੂਜਿਤੋ ਚ ਸੋ ਨਾਗੋ ਚੇਤਿ ਮਹਾਨਾਗੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਕੋਲ਼ਿਵਿਸਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਕਾਲ਼ਿਗੋਧਾਪੁਤ੍ਤਭਦ੍ਦਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਸਮ੍ਬੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਭਦ੍ਦਿਯਸ੍ਸ ਕਾਲ਼ਿਗੋਧਾਪੁਤ੍ਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਪੁਤ੍ਤਦਾਰੇਹਿ ਵਡ੍ਢਿਤੋ ਨਗਰਵਾਸਿਨੋ ਪੁਞ੍ਞਾਨਿ ਕਰੋਨ੍ਤੇ ਦਿਸ੍ਵਾ ਸਯਮ੍ਪਿ ਪੁਞ੍ਞਾਨਿ ਕਾਤੁਕਾਮੋ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਨਿਮਨ੍ਤੇਤ੍ਵਾ ਥੂਲਪਟਲਿਕਾਦਿਅਨੇਕਾਨਿ ਮਹਾਰਹਾਨਿ ਸਯਨਾਨਿ ਪਞ੍ਞਾਪੇਤ੍ਵਾ ਤਤ੍ਥ ਨਿਸਿਨ੍ਨੇ ਭਗਵਤਿ ਸਸਙ੍ਘੇ ਪਣੀਤੇਨਾਹਾਰੇਨ ਭੋਜੇਤ੍ਵਾ ਮਹਾਦਾਨਂ ਅਦਾਸਿ. ਸੋ ਏਵਂ ਯਾਵਤਾਯੁਕਂ ਪੁਞ੍ਞਾਨਿ ਕਤ੍ਵਾ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕਾਲ਼ਿਗੋਧਾਯ ਨਾਮ ਦੇਵਿਯਾ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ. ਸੋ ਵਿਞ੍ਞੁਤਂ ਪਤ੍ਤੋ ਆਰੋਹਪਰਿਣਾਹਹਤ੍ਥਪਾਦਰੂਪਸਮ੍ਪਤ੍ਤਿਯਾ ਭਦ੍ਦਤ੍ਤਾ ਚ ਕਾਲ਼ਿਗੋਧਾਯ ਦੇਵਿਯਾ ਪੁਤ੍ਤਤ੍ਤਾ ਚ ਭਦ੍ਦਿਯੋ ਕਾਲ਼ਿਗੋਧਾਪੁਤ੍ਤੋਤਿ ਪਾਕਟੋ. ਸਤ੍ਥਰਿ ਪਸੀਦਿਤ੍ਵਾ ਮਾਤਾਪਿਤਰੋ ਆਰਾਧੇਤ੍ਵਾ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੫੪. ਸੋ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਸਮ੍ਬੁਦ੍ਧਨ੍ਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਮੇਤ੍ਤਚਿਤ੍ਤਨ੍ਤਿ ਮਿਜ੍ਜਤਿ ਸਿਨੇਹਤਿ ਨਨ੍ਦਤਿ ਸਬ੍ਬਸਤ੍ਤੇਤਿ ਮੇਤ੍ਤਾ, ਮੇਤ੍ਤਾਯ ਸਹਗਤਂ ਚਿਤ੍ਤਂ ਮੇਤ੍ਤਚਿਤ੍ਤਂ, ਤਂ ਯਸ੍ਸ ਭਗਵਤੋ ਅਤ੍ਥੀਤਿ ਮੇਤ੍ਤਚਿਤ੍ਤੋ, ਤਂ ਮੇਤ੍ਤਚਿਤ੍ਤਂ. ਮਹਾਮੁਨਿਨ੍ਤਿ ਸਕਲਭਿਕ੍ਖੂਨਂ ਮਹਨ੍ਤਤ੍ਤਾ ਮਹਾਮੁਨਿ, ਤਂ ਪਦੁਮੁਤ੍ਤਰਂ ਸਮ੍ਬੁਦ੍ਧਨ੍ਤਿ ਸਮ੍ਬਨ੍ਧੋ. ਜਨਤਾ ਸਬ੍ਬਾਤਿ ਸਬ੍ਬੋ ਜਨਕਾਯੋ, ਸਬ੍ਬਨਗਰਵਾਸਿਨੋਤਿ ਅਤ੍ਥੋ. ਸਬ੍ਬਲੋਕਗ੍ਗਨਾਯਕਨ੍ਤਿ ਸਕਲਲੋਕਸ੍ਸ ਅਗ੍ਗਂ ਸੇਟ੍ਠਂ ਨਿਬ੍ਬਾਨਸ੍ਸ ਨਯਨਤੋ ਪਾਪਨਤੋ ਨਾਯਕਂ ਪਦੁਮੁਤ੍ਤਰਸਮ੍ਬੁਦ੍ਧਂ ਜਨਤਾ ਉਪੇਤਿ ਸਮੀਪਂ ਗਚ੍ਛਤੀਤਿ ਸਮ੍ਬਨ੍ਧੋ.

੫੫. ਸਤ੍ਤੁਕਞ੍ਚ ਬਦ੍ਧਕਞ੍ਚਾਤਿ ਬਦ੍ਧਸਤ੍ਤੁਅਬਦ੍ਧਸਤ੍ਤੁਸਙ੍ਖਾਤਂ ਆਮਿਸਂ. ਅਥ ਵਾ ਭਤ੍ਤਪੂਪਖਜ੍ਜਭੋਜ੍ਜਯਾਗੁਆਦਯੋ ਯਾਵਕਾਲਿਕਤ੍ਤਾ ਆਮਿਸਂ ਪਾਨਭੋਜਨਞ੍ਚ ਗਹੇਤ੍ਵਾ ਪੁਞ੍ਞਕ੍ਖੇਤ੍ਤੇ ਅਨੁਤ੍ਤਰੇ ਸਤ੍ਥੁਨੋ ਦਦਨ੍ਤੀਤਿ ਸਮ੍ਬਨ੍ਧੋ.

੫੮. ਆਸਨਂ ਬੁਦ੍ਧਯੁਤ੍ਤਕਨ੍ਤਿ ਬੁਦ੍ਧਯੋਗ੍ਗਂ ਬੁਦ੍ਧਾਰਹਂ ਬੁਦ੍ਧਾਨੁਚ੍ਛਵਿਕਂ ਸਤ੍ਤਰਤਨਮਯਂ ਆਸਨਨ੍ਤਿ ਅਤ੍ਥੋ. ਸੇਸਂ ਨਯਾਨੁਯੋਗੇਨ ਸੁਵਿਞ੍ਞੇਯ੍ਯਮੇਵਾਤਿ.

ਕਾਲ਼ਿਗੋਧਾਪੁਤ੍ਤਭਦ੍ਦਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਸਨ੍ਨਿਟ੍ਠਾਪਕਤ੍ਥੇਰਅਪਦਾਨਵਣ੍ਣਨਾ

ਅਰਞ੍ਞੇ ਕੁਟਿਕਂ ਕਤ੍ਵਾਤਿਆਦਿਕਂ ਆਯਸ੍ਮਤੋ ਸਨ੍ਨਿਟ੍ਠਾਪਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਬਨ੍ਧਨੇਨ ਬਦ੍ਧੋ ਘਰਾਵਾਸੇ ਆਦੀਨਵਂ ਦਿਸ੍ਵਾ ਵਤ੍ਥੁਕਾਮਕਿਲੇਸਕਾਮੇ ਪਹਾਯ ਹਿਮਵਨ੍ਤਸ੍ਸ ਅਵਿਦੂਰੇ ਪਬ੍ਬਤਨ੍ਤਰੇ ਅਰਞ੍ਞਵਾਸਂ ਕਪ੍ਪੇਸਿ. ਤਸ੍ਮਿਂ ਕਾਲੇ ਪਦੁਮੁਤ੍ਤਰੋ ਭਗਵਾ ਵਿਵੇਕਕਾਮਤਾਯ ਤਂ ਠਾਨਂ ਪਾਪੁਣਿ. ਅਥ ਸੋ ਤਾਪਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਵਨ੍ਦਿਤ੍ਵਾ ਨਿਸੀਦਨਤ੍ਥਾਯ ਤਿਣਸਨ੍ਥਰਂ ਪਞ੍ਞਾਪੇਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨਂ ਭਗਵਨ੍ਤਂ ਅਨੇਕੇਹਿ ਮਧੁਰੇਹਿ ਤਿਣ੍ਡੁਕਾਦੀਹਿ ਫਲਾਫਲੇਹਿ ਸਨ੍ਤਪ੍ਪੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਤੋ ਚੁਤੋ ਦੇਵੇਸੁ ਚ ਮਨੁਸ੍ਸੇਸੁ ਚ ਅਪਰਾਪਰਂ ਸਂਸਰਨ੍ਤੋ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧਾਸਮ੍ਪਨ੍ਨੋ ਪਬ੍ਬਜਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਖੁਰਗ੍ਗੇ ਅਰਹਤ੍ਤਫਲਪ੍ਪਤ੍ਤਿਯਂ ਵਿਯ ਨਿਰੁਸ੍ਸਾਹੇਨੇਵ ਸਨ੍ਤਿਪਦਸਙ੍ਖਾਤੇ ਨਿਬ੍ਬਾਨੇ ਸੁਟ੍ਠੁ ਠਿਤਤ੍ਤਾ ਸਨ੍ਨਿਟ੍ਠਾਪਕਤ੍ਥੇਰੋਤਿ ਪਾਕਟੋ.

੭੦. ਅਰਹਾ ਪਨ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਰਞ੍ਞੇ ਕੁਟਿਕਂ ਕਤ੍ਵਾਤਿਆਦਿਮਾਹ. ਤਤ੍ਥ ਅਰਞ੍ਞੇਤਿ ਸੀਹਬ੍ਯਗ੍ਘਾਦੀਨਂ ਭਯੇਨ ਮਨੁਸ੍ਸਾ ਏਤ੍ਥ ਨ ਰਜ੍ਜਨ੍ਤਿ ਨ ਰਮਨ੍ਤਿ ਨ ਅਲ੍ਲੀਯਨ੍ਤੀਤਿ ਅਰਞ੍ਞਂ, ਤਸ੍ਮਿਂ ਅਰਞ੍ਞੇ. ਕੁਟਿਕਨ੍ਤਿ ਤਿਣਚ੍ਛਦਨਕੁਟਿਕਂ ਕਤ੍ਵਾ ਪਬ੍ਬਤਨ੍ਤਰੇ ਵਸਾਮਿ ਵਾਸਂ ਕਪ੍ਪੇਸਿਨ੍ਤਿ ਅਤ੍ਥੋ. ਲਾਭੇਨ ਚ ਅਲਾਭੇਨ ਚ ਯਸੇਨ ਚ ਅਯਸੇਨ ਚ ਸਨ੍ਤੁਟ੍ਠੋ ਵਿਹਾਸਿਨ੍ਤਿ ਸਮ੍ਬਨ੍ਧੋ.

੭੨. ਜਲਜੁਤ੍ਤਮਨਾਮਕਨ੍ਤਿ ਜਲੇ ਜਾਤਂ ਜਲਜਂ, ਪਦੁਮਂ, ਜਲਜਂ ਉਤ੍ਤਮਂ ਜਲਜੁਤ੍ਤਮਂ, ਜਲਜੁਤ੍ਤਮੇਨ ਸਮਾਨਂ ਨਾਮਂ ਯਸ੍ਸ ਸੋ ਜਲਜੁਤ੍ਤਮਨਾਮਕੋ, ਤਂ ਜਲਜੁਤ੍ਤਮਨਾਮਕਂ ਬੁਦ੍ਧਨ੍ਤਿ ਅਤ੍ਥੋ. ਸੇਸਂ ਪਾਲ਼ਿਨਯਾਨੁਯੋਗੇਨ ਸੁਵਿਞ੍ਞੇਯ੍ਯਮੇਵਾਤਿ.

ਸਨ੍ਨਿਟ੍ਠਾਪਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਪਞ੍ਚਹਤ੍ਥਿਯਤ੍ਥੇਰਅਪਦਾਨਵਣ੍ਣਨਾ

ਸੁਮੇਧੋ ਨਾਮ ਸਮ੍ਬੁਦ੍ਧੋਤਿਆਦਿਕਂ ਆਯਸ੍ਮਤੋ ਪਞ੍ਚਹਤ੍ਥਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਰਤਨਤ੍ਤਯੇ ਪਸਨ੍ਨੋ ਵਿਹਾਸਿ. ਤਸ੍ਮਿਂ ਸਮਯੇ ਪਞ੍ਚਉਪ੍ਪਲਹਤ੍ਥਾਨਿ ਆਨੇਸੁਂ. ਸੋ ਤੇਹਿ ਪਞ੍ਚਉਪ੍ਪਲਹਤ੍ਥੇਹਿ ਵੀਥਿਯਂ ਚਰਮਾਨਂ ਸੁਮੇਧਂ ਭਗਵਨ੍ਤਂ ਪੂਜੇਸਿ. ਤਾਨਿ ਗਨ੍ਤ੍ਵਾ ਆਕਾਸੇ ਵਿਤਾਨਂ ਹੁਤ੍ਵਾ ਛਾਯਂ ਕੁਰੁਮਾਨਾਨਿ ਤਥਾਗਤੇਨੇਵ ਸਦ੍ਧਿਂ ਗਚ੍ਛਿਂਸੁ. ਸੋ ਤਂ ਦਿਸ੍ਵਾ ਸੋਮਨਸ੍ਸਜਾਤੋ ਪੀਤਿਯਾ ਫੁਟ੍ਠਸਰੀਰੋ ਯਾਵਜੀਵਂ ਤਦੇਵ ਪੁਞ੍ਞਂ ਅਨੁਸ੍ਸਰਿਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਕਤਕੁਸਲਨਾਮੇਨ ਪਞ੍ਚਹਤ੍ਥਿਯਤ੍ਥੇਰੋਤਿ ਪਾਕਟੋ.

੭੭. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਪਚ੍ਚਕ੍ਖਤੋ ਪਞ੍ਞਾਯ ਦਿਟ੍ਠਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮੇਧੋ ਨਾਮ ਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਸੁਮੇਧੋਤਿ ਸੁਨ੍ਦਰਾ ਮੇਧਾ ਚਤੁਸਚ੍ਚਪਟਿਵੇਧਪਟਿਸਮ੍ਭਿਦਾਦਯੋ ਪਞ੍ਞਾ ਯਸ੍ਸ ਸੋ ਭਗਵਾ ਸੁਮੇਧੋ ਸਮ੍ਬੁਦ੍ਧੋ ਅਨ੍ਤਰਾਪਣੇ ਅਨ੍ਤਰਵੀਥਿਯਂ ਗਚ੍ਛਤੀਤਿ ਸਮ੍ਬਨ੍ਧੋ. ਓਕ੍ਖਿਤ੍ਤਚਕ੍ਖੂਤਿ ਅਧੋਖਿਤ੍ਤਚਕ੍ਖੁ. ਮਿਤਭਾਣੀਤਿ ਪਮਾਣਂ ਞਤ੍ਵਾ ਭਣਨਸੀਲੋ, ਪਮਾਣਂ ਜਾਨਿਤ੍ਵਾ ਧਮ੍ਮਂ ਦੇਸੇਸੀਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਪਞ੍ਚਹਤ੍ਥਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਪਦੁਮਚ੍ਛਦਨਿਯਤ੍ਥੇਰਅਪਦਾਨਵਣ੍ਣਨਾ

ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਪਦੁਮਚ੍ਛਦਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਪੁਞ੍ਞਸਮ੍ਭਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਰਤਨਤ੍ਤਯੇ ਪਸਨ੍ਨੋ ਪਰਿਨਿਬ੍ਬੁਤਸ੍ਸ ਵਿਪਸ੍ਸਿਸ੍ਸ ਭਗਵਤੋ ਚਿਤਕਂ ਪਦੁਮਪੁਪ੍ਫੇਹਿ ਪੂਜੇਸਿ. ਸੋ ਤੇਨੇਵ ਚਿਤ੍ਤਪ੍ਪਸਾਦੇਨ ਯਾਵਤਾਯੁਕਂ ਠਤ੍ਵਾ ਤਤੋ ਸੁਗਤੀਸੁਯੇਵ ਸਂਸਰਨ੍ਤੋ ਦਿਬ੍ਬਸਮ੍ਪਤ੍ਤਿਂ ਮਨੁਸ੍ਸਸਮ੍ਪਤ੍ਤਿਞ੍ਚਾਤਿ ਦ੍ਵੇ ਸਮ੍ਪਤ੍ਤਿਯੋ ਅਨੇਕਕ੍ਖਤ੍ਤੁਂ ਅਨੁਭਵਿਤ੍ਵਾ ਇਮਸ੍ਮਿਂ ਅਮ੍ਹਾਕਂ ਸਮ੍ਮਾਸਮ੍ਬੁਦ੍ਧਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਸਾਸਨੇ ਪਬ੍ਬਜਿਤੋ ਘਟੇਨ੍ਤੋ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ. ਤਸ੍ਸ ਰਤ੍ਤਿਟ੍ਠਾਨਦਿਵਾਟ੍ਠਾਨਾਦੀਸੁ ਤਤ੍ਥ ਤਤ੍ਥ ਵਿਹਰਨ੍ਤਸ੍ਸ ਵਿਹਾਰੋ ਪਦੁਮਪੁਪ੍ਫੇਹਿ ਛਾਦੀਯਤਿ, ਤੇਨ ਸੋ ਪਦੁਮਚ੍ਛਦਨਿਯਤ੍ਥੇਰੋਤਿ ਪਾਕਟੋ.

੮੩. ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਤ੍ਥ ਨਿਬ੍ਬੁਤੇਤਿ ਖਨ੍ਧਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੇ ਸਤ੍ਥਰਿ, ਵਿਪਸ੍ਸਿਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਸਰੀਰੇ ਚਿਤਮਾਨਿਯਮਾਨੇ ਚਿਤਕੇ ਆਰੋਪਿਤੇ ਸੁਫੁਲ੍ਲਂ ਪਦੁਮਕਲਾਪਂ ਅਹਂ ਗਹੇਤ੍ਵਾ ਚਿਤਕਂ ਆਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਗਾਥਾਸੁ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਪਦੁਮਚ੍ਛਦਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਸਯਨਦਾਯਕਤ੍ਥੇਰਅਪਦਾਨਵਣ੍ਣਨਾ

ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਸਯਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਅਞ੍ਞਤਰਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਹਤ੍ਥਿਦਣ੍ਡਸੁਵਣ੍ਣਾਦੀਹਿ ਸਯਨਤ੍ਥਾਯ ਮਞ੍ਚਂ ਕਾਰੇਤ੍ਵਾ ਅਨਗ੍ਘੇਹਿ ਵਿਚਿਤ੍ਤਤ੍ਥਰਣੇਹਿ ਅਤ੍ਥਰਿਤ੍ਵਾ ਭਗਵਨ੍ਤਂ ਪੂਜੇਸਿ. ਸੋ ਭਗਵਾ ਤਸ੍ਸਾਨੁਕਮ੍ਪਾਯ ਪਟਿਗ੍ਗਹੇਤ੍ਵਾ ਅਨੁਭਵਿ. ਸੋ ਤੇਨ ਪੁਞ੍ਞਕਮ੍ਮੇਨ ਦਿਬ੍ਬਮਨੁਸ੍ਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਸਾਸਨੇ ਪਸਨ੍ਨੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਆਰਭਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਪੁਬ੍ਬੇ ਕਤਪੁਞ੍ਞਨਾਮੇਨ ਸਯਨਦਾਯਕਤ੍ਥੇਰੋਤਿ ਪਾਕਟੋ.

੮੮. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਤਂ ਸਬ੍ਬਂ ਪਾਲ਼ਿਨਯਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵਾਤਿ.

ਸਯਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਚਙ੍ਕਮਨਦਾਯਕਤ੍ਥੇਰਅਪਦਾਨਵਣ੍ਣਨਾ

ਅਤ੍ਥਦਸ੍ਸਿਸ੍ਸ ਮੁਨਿਨੋਤਿਆਦਿਕਂ ਆਯਸ੍ਮਤੋ ਚਙ੍ਕਮਨਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤੇਸੁ ਤੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਉਚ੍ਚਵਤ੍ਥੁਕਂ ਸੁਧਾਪਰਿਕਮ੍ਮਕਤਂ ਰਜਤਰਾਸਿਸਦਿਸਂ ਸੋਭਮਾਨਂ ਚਙ੍ਕਮਂ ਕਾਰੇਤ੍ਵਾ ਮੁਤ੍ਤਦਲਸਦਿਸਂ ਸੇਤਪੁਲਿਨਂ ਅਤ੍ਥਰਿਤ੍ਵਾ ਭਗਵਤੋ ਅਦਾਸਿ. ਪਟਿਗ੍ਗਹੇਸਿ ਭਗਵਾ, ਚਙ੍ਕਮਂ ਪਟਿਗ੍ਗਹੇਤ੍ਵਾ ਚ ਪਨ ਸੁਖਂ ਕਾਯਚਿਤ੍ਤਸਮਾਧਿਂ ਅਪ੍ਪੇਤ੍ਵਾ ‘‘ਅਯਂ ਅਨਾਗਤੇ ਗੋਤਮਸ੍ਸ ਭਗਵਤੋ ਸਾਸਨੇ ਸਾਵਕੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਅਪਰਾਪਰਂ ਸਂਸਰਨ੍ਤੋ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਦ੍ਧਾਸਮ੍ਪਨ੍ਨੋ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਕਤਪੁਞ੍ਞਨਾਮੇਨ ਚਙ੍ਕਮਨਦਾਯਕਤ੍ਥੇਰੋਤਿ ਪਾਕਟੋ ਅਹੋਸਿ.

੯੩. ਸੋ ਏਕਦਿਵਸਂ ਅਤ੍ਤਨਾ ਪੁਬ੍ਬੇ ਕਤਪੁਞ੍ਞਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਤ੍ਥਦਸ੍ਸਿਸ੍ਸ ਮੁਨਿਨੋਤਿਆਦਿਮਾਹ. ਤਤ੍ਥ ਅਤ੍ਥਦਸ੍ਸਿਸ੍ਸਾਤਿ ਅਤ੍ਥਂ ਪਯੋਜਨਂ ਵੁਦ੍ਧਿਂ ਵਿਰੂਲ਼੍ਹਿਂ ਨਿਬ੍ਬਾਨਂ ਦਕ੍ਖਤਿ ਪਸ੍ਸਤੀਤਿ ਅਤ੍ਥਦਸ੍ਸੀ, ਅਥ ਵਾ ਅਤ੍ਥਂ ਨਿਬ੍ਬਾਨਂ ਦਸ੍ਸਨਸੀਲੋ ਜਾਨਨਸੀਲੋਤਿ ਅਤ੍ਥਦਸ੍ਸੀ, ਤਸ੍ਸ ਅਤ੍ਥਦਸ੍ਸਿਸ੍ਸ ਮੁਨਿਨੋ ਮੋਨੇਨ ਞਾਣੇਨ ਸਮਨ੍ਨਾਗਤਸ੍ਸ ਭਗਵਤੋ ਮਨੋਰਮਂ ਮਨਲ੍ਲੀਨਂ ਭਾਵਨੀਯਂ ਮਨਸਿ ਕਾਤਬ੍ਬਂ ਚਙ੍ਕਮਂ ਕਾਰੇਸਿਨ੍ਤਿ ਸਮ੍ਬਨ੍ਧੋ. ਸੇਸਂ ਵੁਤ੍ਤਨਯਾਨੁਸਾਰੇਨੇਵ ਸੁਵਿਞ੍ਞੇਯ੍ਯਮੇਵਾਤਿ.

ਚਙ੍ਕਮਨਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਸੁਭਦ੍ਦਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਲੋਕਵਿਦੂਤਿਆਦਿਕਂ ਆਯਸ੍ਮਤੋ ਸੁਭਦ੍ਦਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਨਿਬ੍ਬਾਨਾਧਿਗਮਨਤ੍ਥਾਯ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਸਦ੍ਧਾਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤੋ ਵਿਞ੍ਞੁਤਂ ਪਤ੍ਵਾ ਘਰਬਨ੍ਧਨੇਨ ਬਦ੍ਧੋ ਰਤਨਤ੍ਤਯੇ ਪਸਨ੍ਨੋ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨਂ ਪਦੁਮੁਤ੍ਤਰਂ ਭਗਵਨ੍ਤਂ ਦਿਸ੍ਵਾ ਸਨ੍ਨਿਪਤਿਤਾ ਦਸਸਹਸ੍ਸਚਕ੍ਕਵਾਲ਼ਦੇਵਤਾਯੋ ਚ ਦਿਸ੍ਵਾ ਪਸਨ੍ਨਮਾਨਸੋ ਨਿਗ੍ਗੁਣ੍ਡਿਕੇਟਕਨੀਲਕਾਸੋਕਾਸਿਤਾਦਿਅਨੇਕੇਹਿ ਸੁਗਨ੍ਧਪੁਪ੍ਫੇਹਿ ਪੂਜੇਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਯਾਵਤਾਯੁਕਂ ਠਤ੍ਵਾ ਤਤੋ ਚਵਿਤ੍ਵਾ ਤੁਸਿਤਾਦੀਸੁ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਤਤੋ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇਸੁ ਚ ਸੁਗਨ੍ਧੇਹਿ ਪੁਪ੍ਫੇਹਿ ਪੂਜਿਤੋ ਅਹੋਸਿ. ਇਮਸ੍ਮਿਂ ਪਨ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਕਾਮੇਸੁ ਆਦੀਨਵਂ ਦਿਸ੍ਵਾਪਿ ਯਾਵ ਬੁਦ੍ਧਸ੍ਸ ਭਗਵਤੋ ਪਰਿਨਿਬ੍ਬਾਨਕਾਲੋ ਤਾਵ ਅਲਦ੍ਧਬੁਦ੍ਧਦਸ੍ਸਨੋ ਭਗਵਤੋ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨਕਾਲੇਯੇਵ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਪੁਬ੍ਬੇ ਕਤਪੁਞ੍ਞਨਾਮੇਨ ਸੁਭਦ੍ਦੋਤਿ ਪਾਕਟੋ ਅਹੋਸਿ.

੧੦੧. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਵਸੇਨ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਲੋਕਵਿਦੂਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵ. ਸੁਣਾਥ ਮਮ ਭਾਸਤੋ…ਪੇ… ਨਿਬ੍ਬਾਯਿਸ੍ਸਤਿਨਾਸਵੋਤਿ ਇਦਂ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨੋਵ ਪਦੁਮੁਤ੍ਤਰੋ ਭਗਵਾ ਬ੍ਯਾਕਾਸਿ.

ਪਞ੍ਚਮਭਾਣਵਾਰਵਣ੍ਣਨਾ ਸਮਤ੍ਤਾ.

੧੧੫. ਸੋ ਅਤ੍ਤਨੋ ਪਟਿਪਤ੍ਤਿਂ ਦਸ੍ਸੇਨ੍ਤੋ ਪੁਬ੍ਬਕਮ੍ਮੇਨ ਸਂਯੁਤ੍ਤੋਤਿਆਦਿਮਾਹ. ਏਕਗ੍ਗੋਤਿ ਏਕਗ੍ਗਚਿਤ੍ਤੋ. ਸੁਸਮਾਹਿਤੋਤਿ ਸੁਟ੍ਠੁ ਸਮਾਹਿਤੋ, ਸਨ੍ਤਕਾਯਚਿਤ੍ਤੋਤਿ ਅਤ੍ਥੋ. ਬੁਦ੍ਧਸ੍ਸ ਓਰਸੋ ਪੁਤ੍ਤੋਤਿ ਬੁਦ੍ਧਸ੍ਸ ਉਰਸਾ ਹਦਯੇਨ ਨਿਗ੍ਗਤਓਵਾਦਾਨੁਸਾਸਨਿਂ ਸੁਤ੍ਵਾ ਪਤ੍ਤਅਰਹਤ੍ਤਫਲੋਤਿ ਅਤ੍ਥੋ. ਧਮ੍ਮਜੋਮ੍ਹਿ ਸੁਨਿਮ੍ਮਿਤੋਤਿ ਧਮ੍ਮਤੋ ਕਮ੍ਮਟ੍ਠਾਨਧਮ੍ਮਤੋ ਜਾਤੋ ਅਰਿਯਾਯ ਜਾਤਿਯਾ ਸੁਨਿਮ੍ਮਿਤੋ ਸੁਟ੍ਠੁ ਨਿਪ੍ਫਾਦਿਤਸਬ੍ਬਕਿਚ੍ਚੋ ਅਮ੍ਹਿ ਭਵਾਮੀਤਿ ਅਤ੍ਥੋ.

੧੧੬. ਧਮ੍ਮਰਾਜਂ ਉਪਗਮ੍ਮਾਤਿ ਧਮ੍ਮੇਨ ਸਬ੍ਬਸਤ੍ਤਾਨਂ ਰਾਜਾਨਂ ਇਸ੍ਸਰਭੂਤਂ ਭਗਵਨ੍ਤਂ ਉਪਗਨ੍ਤ੍ਵਾ ਸਮੀਪਂ ਗਨ੍ਤ੍ਵਾਤਿ ਅਤ੍ਥੋ. ਅਪੁਚ੍ਛਿਂ ਪਞ੍ਹਮੁਤ੍ਤਮਨ੍ਤਿ ਉਤ੍ਤਮਂ ਖਨ੍ਧਾਯਤਨਧਾਤੁਸਚ੍ਚਸਮੁਪ੍ਪਾਦਾਦਿਪਟਿਸਂਯੁਤ੍ਤਂ ਪਞ੍ਹਂ ਅਪੁਚ੍ਛਿਨ੍ਤਿ ਅਤ੍ਥੋ. ਕਥਯਨ੍ਤੋ ਚ ਮੇ ਪਞ੍ਹਨ੍ਤਿ ਏਸੋ ਅਮ੍ਹਾਕਂ ਭਗਵਾ ਮੇ ਮਯ੍ਹਂ ਪਞ੍ਹਂ ਕਥਯਨ੍ਤੋ ਬ੍ਯਾਕਰੋਨ੍ਤੋ. ਧਮ੍ਮਸੋਤਂ ਉਪਾਨਯੀਤਿ ਅਨੁਪਾਦਿਸੇਸਨਿਬ੍ਬਾਨਧਾਤੁਸਙ੍ਖਾਤਂ ਧਮ੍ਮਸੋਤਂ ਧਮ੍ਮਪਵਾਹਂ ਉਪਾਨਯਿ ਪਾਵਿਸੀਤਿ ਅਤ੍ਥੋ.

੧੧੮. ਜਲਜੁਤ੍ਤਮਨਾਯਕੋਤਿ ਪਦੁਮੁਤ੍ਤਰਨਾਮਕੋ ਮ-ਕਾਰਸ੍ਸ ਯ-ਕਾਰਂ ਕਤ੍ਵਾ ਕਤਵੋਹਾਰੋ. ਨਿਬ੍ਬਾਯਿ ਅਨੁਪਾਦਾਨੋਤਿ ਉਪਾਦਾਨੇ ਪਞ੍ਚਕ੍ਖਨ੍ਧੇ ਅਗ੍ਗਹੇਤ੍ਵਾ ਨਿਬ੍ਬਾਯਿ ਨ ਪਞ੍ਞਾਯਿ ਅਦਸ੍ਸਨਂ ਅਗਮਾਸਿ, ਮਨੁਸ੍ਸਲੋਕਾਦੀਸੁ ਕਤ੍ਥਚਿਪਿ ਅਪਤਿਟ੍ਠਿਤੋਤਿ ਅਤ੍ਥੋ. ਦੀਪੋਵ ਤੇਲਸਙ੍ਖਯਾਤਿ ਵਟ੍ਟਿਤੇਲਾਨਂ ਸਙ੍ਖਯਾ ਅਭਾਵਾ ਪਦੀਪੋ ਇਵ ਨਿਬ੍ਬਾਯੀਤਿ ਸਮ੍ਬਨ੍ਧੋ.

੧੧੯. ਸਤ੍ਤਯੋਜਨਿਕਂ ਆਸੀਤਿ ਤਸ੍ਸ ਪਰਿਨਿਬ੍ਬੁਤਸ੍ਸ ਪਦੁਮੁਤ੍ਤਰਸ੍ਸ ਭਗਵਤੋ ਰਤਨਮਯਂ ਥੂਪਂ ਸਤ੍ਤਯੋਜਨੁਬ੍ਬੇਧਂ ਆਸਿ ਅਹੋਸੀਤਿ ਅਤ੍ਥੋ. ਧਜਂ ਤਤ੍ਥ ਅਪੂਜੇਸਿਨ੍ਤਿ ਤਤ੍ਥ ਤਸ੍ਮਿਂ ਚੇਤਿਯੇ ਸਬ੍ਬਭਦ੍ਦਂ ਸਬ੍ਬਤੋ ਭਦ੍ਦਂ ਸਬ੍ਬਸੋ ਮਨੋਰਮਂ ਧਜਂ ਪੂਜੇਸਿਨ੍ਤਿ ਅਤ੍ਥੋ.

੧੨੦. ਕਸ੍ਸਪਸ੍ਸ ਚ ਬੁਦ੍ਧਸ੍ਸਾਤਿ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲਤੋ ਪਟ੍ਠਾਯ ਆਗਤਸ੍ਸ ਦੇਵਮਨੁਸ੍ਸੇਸੁ ਸਂਸਰਤੋ ਮੇ ਮਯ੍ਹਂ ਓਰਸੋ ਪੁਤ੍ਤੋ ਤਿਸ੍ਸੋ ਨਾਮ ਕਸ੍ਸਪਸ੍ਸ ਸਮ੍ਮਾਸਮ੍ਬੁਦ੍ਧਸ੍ਸ ਅਗ੍ਗਸਾਵਕੋ ਜਿਨਸਾਸਨੇ ਬੁਦ੍ਧਸਾਸਨੇ ਦਾਯਾਦੋ ਆਸਿ ਅਹੋਸੀਤਿ ਸਮ੍ਬਨ੍ਧੋ.

੧੨੧. ਤਸ੍ਸ ਹੀਨੇਨ ਮਨਸਾਤਿ ਤਸ੍ਸ ਮਮ ਪੁਤ੍ਤਸ੍ਸ ਤਿਸ੍ਸਸ੍ਸ ਅਗ੍ਗਸਾਵਕਸ੍ਸ ਹੀਨੇਨ ਲਾਮਕੇਨ ਮਨਸਾ ਚਿਤ੍ਤੇਨ ਅਭਦ੍ਦਕਂ ਅਸੁਨ੍ਦਰਂ ਅਯੁਤ੍ਤਕਂ ‘‘ਅਨ੍ਤਕੋ ਪਚ੍ਛਿਮੋ’’ਤਿ ਵਾਚਂ ਵਚਨਂ ਅਭਾਸਿਂ ਕਥੇਸਿਨ੍ਤਿ ਅਤ੍ਥੋ. ਤੇਨ ਕਮ੍ਮਵਿਪਾਕੇਨਾਤਿ ਤੇਨ ਅਰਹਨ੍ਤਭਕ੍ਖਾਨਸਙ੍ਖਾਤਸ੍ਸ ਅਕੁਸਲਕਮ੍ਮਸ੍ਸ ਵਿਪਾਕੇਨ. ਪਚ੍ਛਿਮੇ ਅਦ੍ਦਸਂ ਜਿਨਨ੍ਤਿ ਪਚ੍ਛਿਮੇ ਪਰਿਯੋਸਾਨੇ ਪਰਿਨਿਬ੍ਬਾਨਕਾਲੇ ਮਲ੍ਲਾਨਂ ਉਪਵਤ੍ਤਨੇ ਸਾਲਵਨੇ ਪਰਿਨਿਬ੍ਬਾਨਮਞ੍ਚੇ ਨਿਪਨ੍ਨਂ ਜਿਨਂ ਜਿਤਸਬ੍ਬਮਾਰਂ ਅਮ੍ਹਾਕਂ ਗੋਤਮਸਮ੍ਮਾਸਮ੍ਬੁਦ੍ਧਂ ਅਦ੍ਦਸਂ ਅਹਨ੍ਤਿ ਅਤ੍ਥੋ. ‘‘ਪਚ੍ਛਾ ਮੇ ਆਸਿ ਭਦ੍ਦਕ’’ਨ੍ਤਿਪਿ ਪਾਠੋ. ਤਸ੍ਸ ਪਚ੍ਛਾ ਤਸ੍ਸ ਭਗਵਤੋ ਅਵਸਾਨਕਾਲੇ ਨਿਬ੍ਬਾਨਾਸਨ੍ਨਕਾਲੇ ਮੇ ਮਯ੍ਹਂ ਭਦ੍ਦਕਂ ਸੁਨ੍ਦਰਂ ਚਤੁਸਚ੍ਚਪਟਿਵਿਜ੍ਝਨਂ ਆਸਿ ਅਹੋਸੀਤਿ ਅਤ੍ਥੋ.

੧੨੨. ਪਬ੍ਬਾਜੇਸਿ ਮਹਾਵੀਰੋਤਿ ਮਹਾਵੀਰਿਯੋ ਸਬ੍ਬਸਤ੍ਤਹਿਤੋ ਕਰੁਣਾਯੁਤ੍ਤੋ ਜਿਤਮਾਰੋ ਮੁਨਿ ਮਲ੍ਲਾਨਂ ਉਪਵਤ੍ਤਨੇ ਸਾਲਵਨੇ ਪਚ੍ਛਿਮੇ ਸਯਨੇ ਪਰਿਨਿਬ੍ਬਾਨਮਞ੍ਚੇ ਸਯਿਤੋਵ ਮਂ ਪਬ੍ਬਾਜੇਸੀਤਿ ਸਮ੍ਬਨ੍ਧੋ.

੧੨੩. ਅਜ੍ਜੇਵ ਦਾਨਿ ਪਬ੍ਬਜ੍ਜਾਤਿ ਅਜ੍ਜ ਏਵ ਭਗਵਤੋ ਪਰਿਨਿਬ੍ਬਾਨਦਿਵਸੇਯੇਵ ਮਮ ਪਬ੍ਬਜ੍ਜਾ, ਤਥਾ ਅਜ੍ਜ ਏਵ ਉਪਸਮ੍ਪਦਾ, ਅਜ੍ਜ ਏਵ ਦ੍ਵਿਪਦੁਤ੍ਤਮਸ੍ਸ ਸਮ੍ਮੁਖਾ ਪਰਿਨਿਬ੍ਬਾਨਂ ਅਹੋਸੀਤਿ ਸਮ੍ਬਨ੍ਧੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਸੁਭਦ੍ਦਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਚੁਨ੍ਦਤ੍ਥੇਰਅਪਦਾਨਵਣ੍ਣਨਾ

ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਚੁਨ੍ਦਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਪੁਞ੍ਞਸਮ੍ਭਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥਰਿ ਪਸੀਦਿਤ੍ਵਾ ਸਤ੍ਤਰਤਨਮਯਂ ਸੁਵਣ੍ਣਗ੍ਘਿਯਂ ਕਾਰੇਤ੍ਵਾ ਸੁਮਨਪੁਪ੍ਫੇਹਿ ਛਾਦੇਤ੍ਵਾ ਭਗਵਨ੍ਤਂ ਪੂਜੇਸਿ. ਤਾਨਿ ਪੁਪ੍ਫਾਨਿ ਆਕਾਸਂ ਸਮੁਗ੍ਗਨ੍ਤ੍ਵਾ ਵਿਤਾਨਾਕਾਰੇਨ ਅਟ੍ਠਂਸੁ. ਅਥ ਨਂ ਭਗਵਾ ‘‘ਅਨਾਗਤੇ ਗੋਤਮਸ੍ਸ ਨਾਮ ਭਗਵਤੋ ਸਾਸਨੇ ਚੁਨ੍ਦੋ ਨਾਮ ਸਾਵਕੋ ਭਵਿਸ੍ਸਤੀ’’ਤਿ ਬ੍ਯਾਕਾਸਿ. ਸੋ ਤੇਨ ਪੁਞ੍ਞਕਮ੍ਮੇਨ ਤਤੋ ਚੁਤੋ ਦੇਵਲੋਕੇ ਉਪਪਨ੍ਨੋ ਕਮੇਨ ਛਸੁ ਕਾਮਾਵਚਰਦੇਵੇਸੁ ਸੁਖਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਚ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬ੍ਰਾਹ੍ਮਣਕੁਲੇ ਰੂਪਸਾਰਿਯਾ ਪੁਤ੍ਤੋ ਸਾਰਿਪੁਤ੍ਤਤ੍ਥੇਰਸ੍ਸ ਕਨਿਟ੍ਠੋ ਹੁਤ੍ਵਾ ਨਿਬ੍ਬਤ੍ਤਿ. ਤਸ੍ਸ ਵਿਞ੍ਞੁਤਂ ਪਤ੍ਤਸ੍ਸ ਆਰੋਹਪਰਿਣਾਹਰੂਪਵਯਾਨਂ ਸੁਨ੍ਦਰਤਾਯ ਸਕਾਰਸ੍ਸ ਚਕਾਰਂ ਕਤ੍ਵਾ ਚੁਨ੍ਦੋਤਿ ਨਾਮਂ ਕਰਿਂਸੁ. ਸੋ ਵਯਪ੍ਪਤ੍ਤੋ ਘਰਾਵਾਸੇ ਆਦੀਨਵਂ ਪਬ੍ਬਜ੍ਜਾਯ ਚ ਆਨਿਸਂਸਂ ਦਿਸ੍ਵਾ ਭਾਤੁਤ੍ਥੇਰਸ੍ਸ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧੨੫. ਸੋ ਪਤ੍ਤਅਰਹਤ੍ਤਫਲੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਅਗ੍ਘਿਯਨ੍ਤਿਆਦਯੋਪਿ ਉਤ੍ਤਾਨਤ੍ਥਾਯੇਵ.

੧੨੮. ਵਿਤਿਣ੍ਣਕਙ੍ਖੋ ਸਮ੍ਬੁਦ੍ਧੋਤਿ ਵਿਸੇਸੇਨ ਮਗ੍ਗਾਧਿਗਮੇਨ ਵਿਚਿਕਿਚ੍ਛਾਯ ਖੇਪਿਤਤ੍ਤਾ ਵਿਤਿਣ੍ਣਕਙ੍ਖੋ ਅਸਂਸਯੋ ਸਮ੍ਬੁਦ੍ਧੋ. ਤਿਣ੍ਣੋਘੇਹਿ ਪੁਰਕ੍ਖਤੋਤਿ ਕਾਮੋਘਾਦੀਨਂ ਚਤੁਨ੍ਨਂ ਓਘਾਨਂ ਤਿਣ੍ਣਤ੍ਤਾ ਅਤਿਕ੍ਕਨ੍ਤਤ੍ਤਾ ਓਘਤਿਣ੍ਣੇਹਿ ਖੀਣਾਸਵੇਹਿ ਪੁਰਕ੍ਖਤੋ ਪਰਿਵਾਰਿਤੋਤਿ ਅਤ੍ਥੋ. ਬ੍ਯਾਕਰਣਗਾਥਾ ਉਤ੍ਤਾਨਤ੍ਥਾਯੇਵ.

੧੩੯. ਉਪਟ੍ਠਹਿਂ ਮਹਾਵੀਰਨ੍ਤਿ ਉਤ੍ਤਮਤ੍ਥਸ੍ਸ ਨਿਬ੍ਬਾਨਸ੍ਸ ਪਤ੍ਤਿਯਾ ਪਾਪੁਣਨਤ੍ਥਾਯ ਕਪ੍ਪਸਤਸਹਸ੍ਸਾਧਿਕੇਸੁ ਚਤੁਰਾਸਙ੍ਖ੍ਯੇਯ੍ਯੇਸੁ ਕਪ੍ਪੇਸੁ ਪਾਰਮਿਯੋ ਪੂਰੇਨ੍ਤੇਨ ਕਤਵੀਰਿਯਤ੍ਤਾ ਮਹਾਵੀਰਂ ਬੁਦ੍ਧਂ ਉਪਟ੍ਠਹਿਂ ਉਪਟ੍ਠਾਨਂ ਅਕਾਸਿਨ੍ਤਿ ਅਤ੍ਥੋ. ਅਞ੍ਞੇ ਚ ਪੇਸਲੇ ਬਹੂਤਿ ਨ ਕੇਵਲਮੇਵ ਬੁਦ੍ਧਂ ਉਪਟ੍ਠਹਿਂ, ਪੇਸਲੇ ਪਿਯਸੀਲੇ ਸੀਲਵਨ੍ਤੇ ਅਞ੍ਞੇ ਚ ਬਹੁਅਗ੍ਗਪ੍ਪਤ੍ਤੇ ਸਾਵਕੇ, ਮੇ ਮਯ੍ਹਂ ਭਾਤਰਂ ਸਾਰਿਪੁਤ੍ਤਤ੍ਥੇਰਞ੍ਚ ਉਪਟ੍ਠਹਿਨ੍ਤਿ ਸਮ੍ਬਨ੍ਧੋ.

੧੪੦. ਭਾਤਰਂ ਮੇ ਉਪਟ੍ਠਹਿਤ੍ਵਾਤਿ ਮਯ੍ਹਂ ਭਾਤਰਂ ਉਪਟ੍ਠਹਿਤ੍ਵਾ ਵਤ੍ਤਪਟਿਵਤ੍ਤਂ ਕਤ੍ਵਾ ਤਸ੍ਸ ਪਰਿਨਿਬ੍ਬੁਤਕਾਲੇ ਭਗਵਤੋ ਪਠਮਂ ਪਰਿਨਿਬ੍ਬੁਤਤ੍ਤਾ ਤਸ੍ਸ ਧਾਤੁਯੋ ਗਹੇਤ੍ਵਾ ਪਤ੍ਤਮ੍ਹਿ ਓਕਿਰਿਤ੍ਵਾ ਲੋਕਜੇਟ੍ਠਸ੍ਸ ਨਰਾਨਂ ਆਸਭਸ੍ਸ ਬੁਦ੍ਧਸ੍ਸ ਉਪਨਾਮੇਸਿਂ ਅਦਾਸਿਨ੍ਤਿ ਅਤ੍ਥੋ.

੧੪੧. ਉਭੋ ਹਤ੍ਥੇਹਿ ਪਗ੍ਗਯ੍ਹਾਤਿ ਤਂ ਮਹਾ ਦਿਨ੍ਨਂ ਧਾਤੁਂ ਸੋ ਭਗਵਾ ਅਤ੍ਤਨੋ ਉਭੋਹਿ ਹਤ੍ਥੇਹਿ ਪਕਾਰੇਨ ਗਹੇਤ੍ਵਾ ਤਂ ਧਾਤੁਂ ਸਂਸੁਟ੍ਠੁ ਦਸ੍ਸਯਨ੍ਤੋ ਅਗ੍ਗਸਾਵਕਂ ਸਾਰਿਪੁਤ੍ਤਤ੍ਥੇਰਂ ਕਿਤ੍ਤਯਿ ਪਕਾਸੇਸੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਚੁਨ੍ਦਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਪਞ੍ਚਮਵਗ੍ਗਵਣ੍ਣਨਾ ਸਮਤ੍ਤਾ.