੩੯. ਅਵਟਫਲਵਗ੍ਗੋ

੯. ਸੋਣਕੋਟਿਵੀਸਤ੍ਥੇਰਅਪਦਾਨਵਣ੍ਣਨਾ

ਨਵਮਾਪਦਾਨੇ ਪਨ ਵਿਪਸ੍ਸਿਨੋ ਪਾਵਚਨੇਤਿਆਦਿਕਂ ਆਯਸ੍ਮਤੋ ਸੋਣਸ੍ਸ ਕੋਟਿਵੀਸਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਮਹਾਵਿਭਵੇ ਸੇਟ੍ਠਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸੇਟ੍ਠਿ ਹੁਤ੍ਵਾ ਉਪਾਸਕੇਹਿ ਸਦ੍ਧਿਂ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਭਗਵਤੋ ਚਙ੍ਕਮਨਟ੍ਠਾਨੇ ਸੁਧਾਯ ਪਰਿਕਮ੍ਮਂ ਕਾਰੇਤ੍ਵਾ ਏਕਞ੍ਚ ਲੇਣਂ ਕਾਰੇਤ੍ਵਾ ਨਾਨਾਵਿਰਾਗਵਤ੍ਥੇਹਿ ਲੇਣਭੂਮਿਯਾ ਸਨ੍ਥਰਿਤ੍ਵਾ ਉਪਰਿ ਵਿਤਾਨਞ੍ਚ ਕਤ੍ਵਾ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਨਿਯ੍ਯਾਦੇਤ੍ਵਾ ਸਤ੍ਤਾਹਂ ਮਹਾਦਾਨਂ ਦਤ੍ਵਾ ਪਣਿਧਾਨਂ ਅਕਾਸਿ. ਸਤ੍ਥਾ ਅਨੁਮੋਦਨਂ ਅਕਾਸਿ. ਸੋ ਤੇਨ ਕੁਸਲਕਮ੍ਮੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਕਪ੍ਪੇ ਪਰਿਨਿਬ੍ਬੁਤੇ ਕਸ੍ਸਪਦਸਬਲੇ ਅਨੁਪ੍ਪਨ੍ਨੇ ਅਮ੍ਹਾਕਂ ਭਗਵਤਿ ਬਾਰਾਣਸਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਵਿਞ੍ਞੁਤਂ ਪਤ੍ਤੋ ਗਙ੍ਗਾਤੀਰੇ ਪਣ੍ਣਸਾਲਂ ਕਰਿਤ੍ਵਾ ਵਸਨ੍ਤਂ ਏਕਂ ਪਚ੍ਚੇਕਬੁਦ੍ਧਂ ਤੇਮਾਸਂ ਚਤੂਹਿ ਪਚ੍ਚਯੇਹਿ ਸਕ੍ਕਚ੍ਚਂ ਉਪਟ੍ਠਹਿ. ਪਚ੍ਚੇਕਬੁਦ੍ਧੋ ਵੁਟ੍ਠਵਸ੍ਸੋ ਪਰਿਪੁਣ੍ਣਪਰਿਕ੍ਖਾਰੋ ਗਨ੍ਧਮਾਦਨਮੇਵ ਅਗਮਾਸਿ. ਸੋਪਿ ਕੁਲਪੁਤ੍ਤੋ ਯਾਵਜੀਵਂ ਤਤ੍ਥ ਪੁਞ੍ਞਾਨਿ ਕਤ੍ਵਾ ਤਤੋ ਚਵਿਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਕਾਲੇ ਚਮ੍ਪਾਨਗਰੇ ਅਗ੍ਗਸੇਟ੍ਠਿਸ੍ਸ ਗੇਹੇ ਪਟਿਸਨ੍ਧਿਂ ਗਣ੍ਹਿ. ਤਸ੍ਸ ਪਟਿਸਨ੍ਧਿਗ੍ਗਹਣਕਾਲਤੋ ਪਟ੍ਠਾਯ ਸੇਟ੍ਠਿਸ੍ਸ ਮਹਾਭੋਗਕ੍ਖਨ੍ਧੋ ਅਭਿਵਡ੍ਢਿ. ਤਸ੍ਸ ਮਾਤੁਕੁਚ੍ਛਿਤੋ ਨਿਕ੍ਖਮਨਦਿਵਸੇ ਸਕਲਨਗਰੇ ਮਹਾਲਾਭਸਕ੍ਕਾਰਸਮ੍ਮਾਨੋ ਅਹੋਸਿ, ਤਸ੍ਸ ਪੁਬ੍ਬੇ ਪਚ੍ਚੇਕਬੁਦ੍ਧਸ੍ਸ ਸਤਸਹਸ੍ਸਗ੍ਘਨਿਕਰਤ੍ਤਕਮ੍ਬਲਪਰਿਚ੍ਚਾਗੇਨ ਸੁਵਣ੍ਣਵਣ੍ਣੋ ਸੁਖੁਮਾਲਤਰੋ ਚ ਅਤ੍ਤਭਾਵੋ ਅਹੋਸਿ, ਤੇਨਸ੍ਸ ਸੋਣੋਤਿ ਨਾਮਂ ਅਕਂਸੁ. ਸੋ ਮਹਤਾ ਪਰਿਵਾਰੇਨ ਅਭਿਵਡ੍ਢਿ. ਤਸ੍ਸ ਹਤ੍ਥਪਾਦਤਲਾਨਿ ਬਨ੍ਧੁਜੀਵਕਪੁਪ੍ਫਵਣ੍ਣਾਨਿ ਅਹੇਸੁਂ, ਤੇਸਂ ਸਤਵਾਰਂ ਵਿਹਤਕਪ੍ਪਾਸਂ ਵਿਯ ਮੁਦੁਸਮ੍ਫਸ੍ਸੋ ਅਹੋਸਿ. ਪਾਦਤਲੇਸੁ ਮਣਿਕੁਣ੍ਡਲਾਵਟ੍ਟਵਣ੍ਣਲੋਮਾਨਿ ਜਾਯਿਂਸੁ. ਵਯਪ੍ਪਤ੍ਤਸ੍ਸ ਤਸ੍ਸ ਤਿਣ੍ਣਂ ਉਤੂਨਂ ਅਨੁਚ੍ਛਵਿਕੇ ਤਯੋ ਪਾਸਾਦੇ ਕਾਰਾਪੇਤ੍ਵਾ ਨਾਟਕਿਤ੍ਥਿਯੋ ਉਪਟ੍ਠਾਪੇਸੁਂ. ਸੋ ਤਤ੍ਥ ਮਹਤਿਂ ਸਮ੍ਪਤ੍ਤਿਂ ਅਨੁਭਵਨ੍ਤੋ ਦੇਵਕੁਮਾਰੋ ਵਿਯ ਪਟਿਵਸਤਿ.

ਅਥ ਅਮ੍ਹਾਕਂ ਭਗਵਤਿ ਸਬ੍ਬਞ੍ਞੁਤਂ ਪਤ੍ਵਾ ਪਵਤ੍ਤਿਤਵਰਧਮ੍ਮਚਕ੍ਕੇ ਰਾਜਗਹਂ ਉਪਨਿਸ੍ਸਾਯ ਵਿਹਰਨ੍ਤੇ ਬਿਮ੍ਬਿਸਾਰਰਞ੍ਞਾ ਪਕ੍ਕੋਸਾਪਿਤੋ ਤੇਹਿ ਅਸੀਤਿਯਾ ਗਾਮਿਕਸਹਸ੍ਸੇਹਿ ਸਦ੍ਧਿਂ ਰਾਜਗਹਂ ਆਗਤੋ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਮਾਤਾਪਿਤਰੋ ਅਨੁਜਾਨਾਪੇਤ੍ਵਾ ਭਗਵਤੋ ਸਨ੍ਤਿਕੇ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਸਤ੍ਥੁ ਸਨ੍ਤਿਕੇ ਕਮ੍ਮਟ੍ਠਾਨਂ ਗਹੇਤ੍ਵਾ ਜਨਸਂਸਗ੍ਗਪਰਿਹਰਣਤ੍ਥਂ ਸੀਤਵਨੇ ਵਿਹਾਸਿ. ਸੋ ਤਤ੍ਥ ਵਸਨ੍ਤੋ ‘‘ਮਮ ਸਰੀਰਂ ਸੁਖੁਮਾਲਂ, ਨ ਚ ਸਕ੍ਕਾ ਸੁਖੇਨੇਵ ਸੁਖਂ ਅਧਿਗਨ੍ਤੁਂ, ਕਾਯਂ ਕਿਲਮੇਤ੍ਵਾਪਿ ਸਮਣਧਮ੍ਮਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਠਾਨਚਙ੍ਕਮਮੇਵ ਅਧਿਟ੍ਠਾਯ ਪਧਾਨਮਨੁਯੁਞ੍ਜਨ੍ਤੋ ਪਾਦਤਲੇਸੁ ਫੋਟੇਸੁ ਉਟ੍ਠਿਤੇਸੁਪਿ ਵੇਦਨਂ ਅਜ੍ਝੁਪੇਕ੍ਖਿਤ੍ਵਾ ਦਲ਼੍ਹਂ ਵੀਰਿਯਂ ਕਰੋਨ੍ਤੋ ਅਚ੍ਚਾਰਦ੍ਧਵੀਰਿਯਤਾਯ ਵਿਸੇਸਂ ਨਿਬ੍ਬਤ੍ਤੇਤੁਂ ਅਸਕ੍ਕੋਨ੍ਤੋ ‘‘ਏਵਂ ਅਹਂ ਵਾਯਮਨ੍ਤੋਪਿ ਮਗ੍ਗਫਲਾਨਿ ਨਿਬ੍ਬਤ੍ਤੇਤੁਂ ਨ ਸਕ੍ਕੋਮਿ, ਕਿਂ ਮੇ ਪਬ੍ਬਜ੍ਜਾਯ, ਹੀਨਾਯਾਵਤ੍ਤਿਤ੍ਵਾ ਭੋਗੇ ਚ ਭੁਞ੍ਜਾਮਿ, ਪੁਞ੍ਞਾਨਿ ਚ ਕਰਿਸ੍ਸਾਮੀ’’ਤਿ ਚਿਨ੍ਤੇਸਿ. ਅਥ ਸਤ੍ਥਾ ਤਸ੍ਸ ਚਿਤ੍ਤਾਚਾਰਂ ਞਤ੍ਵਾ ਤਤ੍ਥ ਗਨ੍ਤ੍ਵਾ ਵੀਣੋਪਮੋਵਾਦੇਨ (ਮਹਾਵ. ੨੪੩) ਓਵਦਿਤ੍ਵਾ ਵੀਰਿਯਸਮਤਾਯੋਜਨਵਿਧਿਂ ਦਸ੍ਸੇਨ੍ਤੋ ਕਮ੍ਮਟ੍ਠਾਨਂ ਸੋਧੇਤ੍ਵਾ ਗਿਜ੍ਝਕੂਟਂ ਗਤੋ. ਸੋਣੋਪਿ ਖੋ ਸਤ੍ਥੁ ਸਨ੍ਤਿਕਾ ਓਵਾਦਂ ਲਭਿਤ੍ਵਾ ਵੀਰਿਯਸਮਤਂ ਯੋਜੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਸਿ.

੪੯. ਸੋ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਪਸ੍ਸਿਨੋ ਪਾਵਚਨੇਤਿਆਦਿਮਾਹ. ਤਤ੍ਥ ਵਿਪਸ੍ਸੀਤਿ ਵਿਸੇਸੇਨ, ਵਿਵਿਧਂ ਵਾ ਪਸ੍ਸਤੀਤਿ ਵਿਪਸ੍ਸੀ. ਪਾਵਚਨੇਤਿ ਪਕਾਰੇਨ ਵੁਚ੍ਚਤੀਤਿ ਪਾਵਚਨਂ, ਪਿਟਕਤ੍ਤਯਂ. ਤਸ੍ਸ ਵਿਪਸ੍ਸਿਨੋ ਤਸ੍ਮਿਂ ਪਾਵਚਨੇਤਿ ਅਤ੍ਥੋ. ਲੇਣਨ੍ਤਿ ਲਿਨਨ੍ਤੇ ਨਿਲੀਯਨ੍ਤੇ ਏਤ੍ਥਾਤਿ ਲੇਣਂ ਵਿਹਾਰਂ. ਬਨ੍ਧੁਮਾਰਾਜਧਾਨਿਯਾਤਿ ਬਨ੍ਧਨ੍ਤਿ ਕੁਲਪਰਮ੍ਪਰਾਯ ਵਸੇਨ ਅਞ੍ਞਮਞ੍ਞਂ ਸਮ੍ਬਜ੍ਝਨ੍ਤੀਤਿ ਬਨ੍ਧੂ, ਞਾਤਕਾ. ਤੇ ਏਤ੍ਥ ਪਟਿਵਸਨ੍ਤੀਤਿ ਬਨ੍ਧੁਮਾ, ਬਨ੍ਧੁ ਅਸ੍ਸ ਅਤ੍ਥੀਤਿ ਵਾ ਬਨ੍ਧੁਮਾ. ਰਾਜੂਨਂ ਵਸਨਟ੍ਠਾਨਨ੍ਤਿ ਰਾਜਧਾਨੀ, ਬਨ੍ਧੁਮਾ ਚ ਸਾ ਰਾਜਧਾਨੀ ਚੇਤਿ ਬਨ੍ਧੁਮਾਰਾਜਧਾਨੀ, ਤਸ੍ਸਾ ਬਨ੍ਧੁਮਾਰਾਜਧਾਨਿਯਾ, ਲੇਣਂ ਮਯਾ ਕਤਨ੍ਤਿ ਸਮ੍ਬਨ੍ਧੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੋਣਕੋਟਿਵੀਸਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪੁਬ੍ਬਕਮ੍ਮਪਿਲੋਤਿਕਬੁਦ੍ਧਅਪਦਾਨਵਣ੍ਣਨਾ

੬੪. ਦਸਮਾਪਦਾਨੇ ਅਨੋਤਤ੍ਤਸਰਾਸਨ੍ਨੇਤਿ ਪਬ੍ਬਤਕੂਟੇਹਿ ਪਟਿਚ੍ਛਨ੍ਨਤ੍ਤਾ ਚਨ੍ਦਿਮਸੂਰਿਯਾਨਂ ਸਨ੍ਤਾਪੇਹਿ ਓਤਤ੍ਤਂ ਉਣ੍ਹਂ ਉਦਕਂ ਏਤ੍ਥ ਨਤ੍ਥੀਤਿ ਅਨੋਤਤ੍ਤੋ. ਸਰਨ੍ਤਿ ਗਚ੍ਛਨ੍ਤਿ ਪਭਵਨ੍ਤਿ ਸਨ੍ਦਨ੍ਤਿ ਏਤਸ੍ਮਾ ਮਹਾਨਦਿਯੋਤਿ ਸਰੋ. ਸੀਹਮੁਖਾਦੀਹਿ ਨਿਕ੍ਖਨ੍ਤਾ ਮਹਾਨਦਿਯੋ ਤਿਕ੍ਖਤ੍ਤੁਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਨਿਕ੍ਖਨ੍ਤਨਿਕ੍ਖਨ੍ਤਦਿਸਾਭਾਗੇਨ ਸਰਨ੍ਤਿ ਗਚ੍ਛਨ੍ਤੀਤਿ ਅਤ੍ਥੋ. ਅਨੋਤਤ੍ਤੋ ਚ ਸੋ ਸਰੋ ਚਾਤਿ ਅਨੋਤਤ੍ਤਸਰੋ. ਤਸ੍ਸ ਆਸਨ੍ਨਂ ਸਮੀਪਟ੍ਠਾਨਨ੍ਤਿ ਅਨੋਤਤ੍ਤਸਰਾਸਨ੍ਨਂ, ਤਸ੍ਮਿਂ ਅਨੋਤਤ੍ਤਸਰਾਸਨ੍ਨੇ, ਸਮੀਪੇਤਿ ਅਤ੍ਥੋ. ਰਮਣੀਯੇਤਿ ਦੇਵਦਾਨਵਗਨ੍ਧਬ੍ਬਕਿਨ੍ਨਰੋਰਗਬੁਦ੍ਧਪਚ੍ਚੇਕਬੁਦ੍ਧਾਦੀਹਿ ਰਮਿਤਬ੍ਬਂ ਅਲ੍ਲੀਯਿਤਬ੍ਬਨ੍ਤਿ ਰਮਣੀਯਂ, ਤਸ੍ਮਿਂ ਰਮਣੀਯੇ. ਸਿਲਾਤਲੇਤਿ ਏਕਗ੍ਘਨਪਬ੍ਬਤਸਿਲਾਤਲੇਤਿ ਅਤ੍ਥੋ. ਨਾਨਾਰਤਨਪਜ੍ਜੋਤੇਤਿ ਪਦੁਮਰਾਗਵੇਲ਼ੁਰਿਯਾਦਿਨਾਨਾਅਨੇਕੇਹਿ ਰਤਨੇਹਿ ਪਜ੍ਜੋਤੇ ਪਕਾਰੇਨ ਜੋਤਮਾਨੇ. ਨਾਨਾਗਨ੍ਧਵਨਨ੍ਤਰੇਤਿ ਨਾਨਪ੍ਪਕਾਰੇਹਿ ਚਨ੍ਦਨਾਗਰੁਕਪ੍ਪੂਰਤਮਾਲਤਿਲਕਾਸੋਕਨਾਗਪੁਨ੍ਨਾਗਕੇਤਕਾਦੀਹਿ ਅਨੇਕੇਹਿ ਸੁਗਨ੍ਧਪੁਪ੍ਫੇਹਿ ਗਹਨੀਭੂਤਵਨਨ੍ਤਰੇ ਸਿਲਾਤਲੇਤਿ ਸਮ੍ਬਨ੍ਧੋ.

੬੫. ਗੁਣਮਹਨ੍ਤਤਾਯ ਸਙ੍ਖ੍ਯਾਮਹਨ੍ਤਤਾਯ ਚ ਮਹਤਾ ਭਿਕ੍ਖੁਸਙ੍ਘੇਨ, ਪਰੇਤੋ ਪਰਿਵੁਤੋ ਲੋਕਨਾਯਕੋ ਲੋਕਤ੍ਤਯਸਾਮਿਸਮ੍ਮਾਸਮ੍ਬੁਦ੍ਧੋ ਤਤ੍ਥ ਸਿਲਾਸਨੇ ਨਿਸਿਨ੍ਨੋ ਅਤ੍ਤਨੋ ਪੁਬ੍ਬਾਨਿ ਕਮ੍ਮਾਨਿ ਬ੍ਯਾਕਰੀ ਵਿਸੇਸੇਨ ਪਾਕਟਮਕਾਸੀਤਿ ਅਤ੍ਥੋ. ਸੇਸਮੇਤ੍ਥ ਹੇਟ੍ਠਾ ਬੁਦ੍ਧਾਪਦਾਨੇ (ਅਪ. ਥੇਰ ੧.੧.੧ ਆਦਯੋ) ਵੁਤ੍ਤਤ੍ਤਾ ਉਤ੍ਤਾਨਤ੍ਥਤ੍ਤਾ ਚ ਸੁਵਿਞ੍ਞੇਯ੍ਯਮੇਵ. ਬੁਦ੍ਧਾਪਦਾਨੇ ਅਨ੍ਤੋਗਧਮ੍ਪਿ ਇਧਾਪਦਾਨੇ ਕੁਸਲਾਕੁਸਲਂ ਕਮ੍ਮਸਂਸੂਚਕਤ੍ਤਾ ਵਗ੍ਗਸਙ੍ਗਹਵਸੇਨ ਧਮ੍ਮਸਙ੍ਗਾਹਕਤ੍ਥੇਰਾ ਸਙ੍ਗਾਯਿਂਸੂਤਿ.

ਪੁਬ੍ਬਕਮ੍ਮਪਿਲੋਤਿਕਬੁਦ੍ਧਅਪਦਾਨਵਣ੍ਣਨਾ ਸਮਤ੍ਤਾ.

ਏਕੂਨਚਤ੍ਤਾਲੀਸਮਵਗ੍ਗਵਣ੍ਣਨਾ ਸਮਤ੍ਤਾ.