੪੦. ਪਿਲਿਨ੍ਦਵਚ੍ਛਵਗ੍ਗੋ

੧. ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਵਣ੍ਣਨਾ

ਚਤ੍ਤਾਲੀਸਮਵਗ੍ਗੇ ਅਪਦਾਨੇ ਨਗਰੇ ਹਂਸਵਤਿਯਾਤਿਆਦਿਕਂ ਆਯਸ੍ਮਤੋ ਪਿਲਿਨ੍ਦਵਚ੍ਛਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਂਸਵਤੀਨਗਰੇ ਦੋਵਾਰਿਕਕੁਲੇ ਨਿਬ੍ਬਤ੍ਤੋ ਮਹਦ੍ਧਨੋ ਮਹਾਭੋਗੋ ਅਹੋਸਿ. ਸੋ ਕੋਟਿਸਨ੍ਨਿਚਿਤਧਨਰਾਸਿਂ ਓਲੋਕੇਤ੍ਵਾ ਰਹੋ ਨਿਸਿਨ੍ਨੋ ‘‘ਇਮਂ ਸਬ੍ਬਧਨਂ ਮਯਾ ਸਮ੍ਮਾ ਗਹੇਤ੍ਵਾ ਗਨ੍ਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ‘‘ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਬ੍ਬਪਰਿਕ੍ਖਾਰਦਾਨਂ ਦਾਤੁਂ ਵਟ੍ਟਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਛਤ੍ਤਸਤਸਹਸ੍ਸਂ ਆਦਿਂ ਕਤ੍ਵਾ ਸਬ੍ਬਪਰਿਭੋਗਪਰਿਕ੍ਖਾਰਾਨਿਪਿ ਸਤਸਹਸ੍ਸਵਸੇਨ ਕਾਰੇਤ੍ਵਾ ਪਦੁਮੁਤ੍ਤਰਂ ਭਗਵਨ੍ਤਂ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਾਸਿ. ਏਵਂ ਸਤ੍ਤਾਹਂ ਦਾਨਂ ਦਤ੍ਵਾ ਪਰਿਯੋਸਾਨਦਿਵਸੇ ਨਿਬ੍ਬਾਨਾਧਿਗਮਂ ਪਤ੍ਥੇਤ੍ਵਾ ਯਾਵਜੀਵਂ ਪੁਞ੍ਞਾਨਿ ਕਤ੍ਵਾ ਜੀਵਿਤਪਰਿਯੋਸਾਨੇ ਦੇਵਲੋਕੇ ਨਿਬ੍ਬਤ੍ਤੋ ਛ ਕਾਮਾਵਚਰੇ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਗੋਤ੍ਤਵਸੇਨ ਪਿਲਿਨ੍ਦਵਚ੍ਛੋਤਿ ਪਾਕਟੋ ਅਹੋਸਿ.

੧. ਸੋ ਏਕਦਿਵਸਂ ਸਤ੍ਥੁ ਸਨ੍ਤਿਕੇ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਉਦਾਨਵਸੇਨ ਤਂ ਪਕਾਸੇਨ੍ਤੋ ਨਗਰੇ ਹਂਸਵਤਿਯਾਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਆਸਿਂ ਦੋਵਾਰਿਕੋ ਅਹਨ੍ਤਿ ਅਹਂ ਹਂਸਵਤੀਨਗਰੇ ਰਞ੍ਞੋ ਗੇਹਦ੍ਵਾਰੇ ਦ੍ਵਾਰਪਾਲਕੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਅਕ੍ਖੋਭਂ ਅਮਿਤਂ ਭੋਗਨ੍ਤਿ ਰਞ੍ਞੋ ਵਲ੍ਲਭਤ੍ਤਾ ਅਞ੍ਞੇਹਿ ਖੋਭੇਤੁਂ ਚਾਲੇਤੁਂ ਅਸਕ੍ਕੁਣੇਯ੍ਯਂ ਅਮਿਤਂ ਅਪਰਿਮਾਣਭੋਗਂ ਧਨਂ ਮਮ ਘਰੇ ਸਨ੍ਨਿਚਿਤਂ ਰਾਸੀਕਤਂ ਅਹੋਸੀਤਿ ਅਤ੍ਥੋ.

੩. ਬਹੂ ਮੇਧਿਗਤਾ ਭੋਗਾਤਿ ਅਨੇਕਾ ਭੋਗਾ ਮੇ ਮਯਾ ਅਧਿਗਤਾ ਪਤ੍ਤਾ ਪਟਿਲਦ੍ਧਾਤਿ ਅਤ੍ਥੋ. ਸਤ੍ਥਵਾਸਿਆਦੀਨਂ ਪਰਿਕ੍ਖਾਰਾਨਂ ਨਾਮਾਨਿ ਨਯਾਨੁਯੋਗੇਨ ਸੁਵਿਞ੍ਞੇਯ੍ਯਾਨਿ. ਪਰਿਕ੍ਖਾਰਦਾਨਾਨਿਸਂਸਾਨਿ ਚ ਸੁਵਿਞ੍ਞੇਯ੍ਯਾਨੇਵਾਤਿ.

ਪਿਲਿਨ੍ਦਵਚ੍ਛਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਦੁਤਿਯਤਤਿਯਚਤੁਤ੍ਥਪਞ੍ਚਮਾਪਦਾਨਾਨਿ ਉਤ੍ਤਾਨਾਨੇਵਾਤਿ.

੬. ਬਾਕੁਲਤ੍ਥੇਰਅਪਦਾਨਵਣ੍ਣਨਾ

ਛਟ੍ਠਾਪਦਾਨੇ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਬਾਕੁਲਤ੍ਥੇਰਸ੍ਸ ਅਪਦਾਨਂ. ਅਯਂ ਕਿਰ ਥੇਰੋ ਅਤੀਤੇ ਇਤੋ ਕਪ੍ਪਸਤਸਹਸ੍ਸਾਧਿਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਮਤ੍ਥਕੇ ਅਨੋਮਦਸ੍ਸਿਸ੍ਸ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਵਯਪ੍ਪਤ੍ਤੋ ਤਯੋ ਵੇਦੇ ਉਗ੍ਗਣ੍ਹਿਤ੍ਵਾ ਤਤ੍ਥ ਸਾਰਂ ਅਪਸ੍ਸਨ੍ਤੋ ‘‘ਸਮ੍ਪਰਾਯਿਕਤ੍ਥਂ ਗਵੇਸਿਸ੍ਸਾਮੀ’’ਤਿ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਪਬ੍ਬਤਪਾਦੇ ਵਿਹਰਨ੍ਤੋ ਪਞ੍ਚਾਭਿਞ੍ਞਾਅਟ੍ਠਸਮਾਪਤ੍ਤੀਨਂ ਲਾਭੀ ਹੁਤ੍ਵਾ ਵਿਹਰਨ੍ਤੋ ਬੁਦ੍ਧੁਪ੍ਪਾਦਂ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਸਰਣੇਸੁ ਪਤਿਟ੍ਠਿਤੋ ਸਤ੍ਥੁ ਵਾਤਾਬਾਧੇ ਉਪ੍ਪਨ੍ਨੇ ਅਰਞ੍ਞਤੋ ਭੇਸਜ੍ਜਾਨਿ ਆਨੇਤ੍ਵਾ ਤਂ ਵੂਪਸਮੇਤ੍ਵਾ ਤਂ ਪੁਞ੍ਞਂ ਆਰੋਗ੍ਯਤ੍ਥਾਯ ਪਰਿਣਾਮੇਤ੍ਵਾ ਤਤੋ ਚੁਤੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ ਏਕਂ ਅਸਙ੍ਖ੍ਯੇਯ੍ਯਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਪਦੁਮੁਤ੍ਤਰਬੁਦ੍ਧਕਾਲੇ ਹਂਸਵਤੀਨਗਰੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਤ੍ਥਾਰਂ ਏਕਂ ਭਿਕ੍ਖੁਂ ਅਪ੍ਪਾਬਾਧਾਨਂ ਅਗ੍ਗਟ੍ਠਾਨੇ ਠਪੇਨ੍ਤਂ ਦਿਸ੍ਵਾ ਸਯਂ ਤਂ ਠਾਨਨ੍ਤਰਂ ਆਕਙ੍ਖਨ੍ਤੋ ਪਣਿਧਾਨਂ ਕਤ੍ਵਾ ਯਾਵਜੀਵਂ ਕੁਸਲਕਮ੍ਮਂ ਉਪਚਿਨਿਤ੍ਵਾ ਸੁਗਤੀਸੁਯੇਵ ਸਂਸਰਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਬਨ੍ਧੁਮਤੀਨਗਰੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਸਬ੍ਬਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਤਤ੍ਥ ਸਾਰਂ ਅਪਸ੍ਸਨ੍ਤੋ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਾਭਿਞ੍ਞਾਲਾਭੀ ਹੁਤ੍ਵਾ ਪਬ੍ਬਤਪਾਦੇ ਵਸਨ੍ਤੋ ਬੁਦ੍ਧੁਪ੍ਪਾਦਂ ਸੁਤ੍ਵਾ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਸਰਣੇਸੁ ਪਤਿਟ੍ਠਾਯ ਭਿਕ੍ਖੂਨਂ ਤਿਣਪੁਪ੍ਫਕਰੋਗੇ ਉਪ੍ਪਨ੍ਨੇ ਤਂ ਵੂਪਸਮੇਤ੍ਵਾ ਤਤ੍ਥ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿਤ੍ਵਾ ਤਤੋ ਏਕਨਵੁਤਿਕਪ੍ਪੇ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਕਸ੍ਸਪਸ੍ਸ ਭਗਵਤੋ ਕਾਲੇ ਬਾਰਾਣਸਿਯਂ ਕੁਲਗੇਹੇ ਨਿਬ੍ਬਤ੍ਤਿਤ੍ਵਾ ਘਰਾਵਾਸਂ ਵਸਨ੍ਤੋ ਏਕਂ ਜਿਣ੍ਣਂ ਵਿਨਸ੍ਸਮਾਨਂ ਮਹਾਵਿਹਾਰਂ ਦਿਸ੍ਵਾ ਤਤ੍ਥ ਉਪੋਸਥਾਗਾਰਾਦਿਕਂ ਸਬ੍ਬਂ ਆਵਸਥਂ ਕਾਰਾਪੇਤ੍ਵਾ ਤਤ੍ਥ ਭਿਕ੍ਖੁਸਙ੍ਘਸ੍ਸ ਸਬ੍ਬਂ ਭੇਸਜ੍ਜਂ ਪਟਿਯਾਦੇਤ੍ਵਾ ਯਾਵਜੀਵਂ ਕੁਸਲਂ ਕਤ੍ਵਾ ਏਕਂ ਬੁਦ੍ਧਨ੍ਤਰਂ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਮ੍ਹਾਕਂ ਭਗਵਤੋ ਉਪ੍ਪਤ੍ਤਿਤੋ ਪੁਰੇਤਰਮੇਵ ਕੋਸਮ੍ਬਿਯਂ ਸੇਟ੍ਠਿਕੁਲੇ ਨਿਬ੍ਬਤ੍ਤਿ.

ਸੋ ਮਾਤੁਕੁਚ੍ਛਿਤੋ ਨਿਕ੍ਖਮਿਤ੍ਵਾ ਧਾਤੀਹਿ ਅਰੋਗਭਾਵਾਯ ਯਮੁਨਾਯਂ ਨ੍ਹਾਪਿਯਮਾਨੋ ਤਾਸਂ ਹਤ੍ਥਤੋ ਮੁਚ੍ਚਿਤ੍ਵਾ ਮਚ੍ਛੇਨ ਗਿਲਿਤੋ ਅਹੋਸਿ. ਕੇਵਟ੍ਟਾ ਤਂ ਮਚ੍ਛਂ ਜਾਲਾਯ ਗਹੇਤ੍ਵਾ ਬਾਰਾਣਸਿਯਂ ਸੇਟ੍ਠਿਭਰਿਯਾਯ ਵਿਕ੍ਕਿਣਿਂਸੁ. ਸਾ ਤਂ ਗਹੇਤ੍ਵਾ ਫਾਲਯਮਾਨਾ ਪੁਬ੍ਬੇ ਕਤਪੁਞ੍ਞਫਲੇਨ ਅਰੋਗਂ ਦਾਰਕਂ ਦਿਸ੍ਵਾ ‘‘ਪੁਤ੍ਤੋ ਮੇ ਲਦ੍ਧੋ’’ਤਿ ਗਹੇਤ੍ਵਾ ਪੋਸੇਸਿ. ਸੋ ਜਨਕੇਹਿ ਮਾਤਾਪਿਤੂਹਿ ਤਂ ਪਵਤ੍ਤਿਂ ਸੁਤ੍ਵਾ ਆਗਨ੍ਤ੍ਵਾ ‘‘ਅਯਂ ਅਮ੍ਹਾਕਂ ਪੁਤ੍ਤੋ, ਦੇਥ ਨੋ ਪੁਤ੍ਤ’’ਨ੍ਤਿ ਅਨੁਯੋਗੇ ਕਤੇ ਰਞ੍ਞਾ ‘‘ਉਭਯੇਸਮ੍ਪਿ ਸਾਧਾਰਣੋ ਹੋਤੂ’’ਤਿ ਦ੍ਵਿਨ੍ਨਂ ਕੁਲਾਨਂ ਦਾਯਾਦਭਾਵੇਨ ਵਿਨਿਚ੍ਛਯਂ ਕਤ੍ਵਾ ਠਪਿਤਤ੍ਤਾ ਬਾਕੁਲੋਤਿ ਲਦ੍ਧਨਾਮੋ ਵਯਪ੍ਪਤ੍ਤੋ ਮਹਾਸਮ੍ਪਤ੍ਤਿਂ ਅਨੁਭਵਨ੍ਤੋ ਦ੍ਵੀਸੁ ਸੇਟ੍ਠਿਕੁਲੇਸੁ ਏਕੇਕਸ੍ਮਿਂ ਛਮਾਸਂ ਛਮਾਸਂ ਵਸਤਿ. ਤੇ ਅਤ੍ਤਨੋ ਵਾਰੇ ਸਮ੍ਪਤ੍ਤੇ ਨਾਵਾਸਙ੍ਘਾਟਂ ਬਨ੍ਧਿਤ੍ਵਾ ਤਤ੍ਰੂਪਰਿ ਰਤਨਮਣ੍ਡਪਂ ਕਾਰੇਤ੍ਵਾ ਪਞ੍ਚਙ੍ਗਿਕਤੂਰਿਯੇ ਨਿਪ੍ਫਾਦੇਤ੍ਵਾ ਕੁਮਾਰਂ ਤਤ੍ਥ ਨਿਸੀਦਾਪੇਤ੍ਵਾ ਉਭਯਨਗਰਮਜ੍ਝਟ੍ਠਾਨਂ ਗਙ੍ਗਾਯ ਆਗਚ੍ਛਨ੍ਤਿ, ਅਪਰਸੇਟ੍ਠਿਮਨੁਸ੍ਸਾਪਿ ਏਵਮੇਵ ਸਜ੍ਜੇਤ੍ਵਾ ਤਂ ਠਾਨਂ ਗਨ੍ਤ੍ਵਾ ਕੁਮਾਰਂ ਤਤ੍ਥ ਆਰੋਪੇਤ੍ਵਾ ਗਚ੍ਛਨ੍ਤਿ. ਸੋ ਏਵਂ ਵਡ੍ਢਮਾਨੋ ਆਸੀਤਿਕੋ ਹੁਤ੍ਵਾ ਉਭਯਸੇਟ੍ਠਿਪੁਤ੍ਤੋਤਿ ਪਾਕਟੋ. ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਤ੍ਤਾਹਂ ਵਾਯਮਨ੍ਤੋ ਅਟ੍ਠਮੇ ਦਿਵਸੇ ਸਹ ਪਟਿਸਮ੍ਭਿਦਾਯ ਅਰਹਤ੍ਤਂ ਪਾਪੁਣਿ.

੩੮੬. ਸੋ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤੋਵ. ਅਪਦਾਨਪਾਲ਼ਿਅਤ੍ਥੋਪਿ ਸੁਵਿਞ੍ਞੇਯ੍ਯੋਵ. ਸੋ ਅਰਹਤ੍ਤਂ ਪਤ੍ਵਾ ਵਿਮੁਤ੍ਤਿਸੁਖੇਨ ਵਿਹਰਨ੍ਤੋ ਸਟ੍ਠਿਵਸ੍ਸਸਤਾਯੁਕੋ ਹੁਤ੍ਵਾ ਪਰਿਨਿਬ੍ਬਾਯੀਤਿ.

ਬਾਕੁਲਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਗਿਰਿਮਾਨਨ੍ਦਤ੍ਥੇਰਅਪਦਾਨਵਣ੍ਣਨਾ

ਸਤ੍ਤਮਾਪਦਾਨੇ ਭਰਿਯਾ ਮੇ ਕਾਲਙ੍ਕਤਾਤਿਆਦਿਕਂ ਆਯਸ੍ਮਤੋ ਗਿਰਿਮਾਨਨ੍ਦਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਯਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਅਤ੍ਤਨੋ ਭਰਿਯਾਯ ਚ ਪੁਤ੍ਤੇ ਚ ਕਾਲਙ੍ਕਤੇ ਸੋਕਸਲ੍ਲਸਮਪ੍ਪਿਤੋ ਅਰਞ੍ਞਂ ਪਵਿਸਿਤ੍ਵਾ ਪਵਤ੍ਤਫਲਭੋਜਨੋ ਰੁਕ੍ਖਮੂਲੇ ਵਿਹਾਸਿ. ਤਦਾ ਸੁਮੇਧੋ ਭਗਵਾ ਤਸ੍ਸਾਨੁਕਮ੍ਪਾਯ ਤਤ੍ਥ ਗਨ੍ਤ੍ਵਾ ਧਮ੍ਮਂ ਦੇਸੇਤ੍ਵਾ ਸੋਕਸਲ੍ਲਂ ਅਬ੍ਬੂਲ਼੍ਹੇਸਿ. ਸੋ ਧਮ੍ਮਂ ਸੁਤ੍ਵਾ ਪਸਨ੍ਨਮਾਨਸੋ ਸੁਗਨ੍ਧਪੁਪ੍ਫੇਹਿ ਭਗਵਨ੍ਤਂ ਪੂਜੇਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਿਰਸਿ ਅਞ੍ਜਲਿਂ ਕਤ੍ਵਾ ਅਭਿਤ੍ਥਵਿ.

ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਤ੍ਥ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਰਾਜਗਹੇ ਬਿਮ੍ਬਿਸਾਰਰਞ੍ਞੋ ਪੁਰੋਹਿਤਸ੍ਸ ਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤਿ, ਗਿਰਿਮਾਨਨ੍ਦੋਤਿਸ੍ਸ ਨਾਮਂ ਅਹੋਸਿ. ਸੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਰਾਜਗਹਾਗਮਨੇ ਬੁਦ੍ਧਾਨੁਭਾਵਂ ਦਿਸ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋ ਕਤਿਪਯਂ ਦਿਵਸਂ ਗਾਮਕਾਵਾਸੇ ਵਸਿਤ੍ਵਾ ਸਤ੍ਥਾਰਂ ਵਨ੍ਦਿਤੁਂ ਰਾਜਗਹਂ ਅਗਮਾਸਿ. ਬਿਮ੍ਬਿਸਾਰਮਹਾਰਾਜਾ ਤਸ੍ਸ ਆਗਮਨਂ ਸੁਤ੍ਵਾ ਤਂ ਉਪਸਙ੍ਕਮਿਤ੍ਵਾ ‘‘ਇਧੇਵ, ਭਨ੍ਤੇ, ਵਸਥ, ਅਹਂ ਚਤੂਹਿ ਪਚ੍ਚਯੇਹਿ ਉਪਟ੍ਠਹਾਮੀ’’ਤਿ ਸਮ੍ਪਵਾਰੇਤ੍ਵਾ ਗਤੋਪਿ ਬਹੁਕਿਚ੍ਚਤ੍ਤਾ ਤਂ ਨ ਸਰਿ. ‘‘ਥੇਰੋ ਅਬ੍ਭੋਕਾਸੇਯੇਵ ਵਸਤੀ’’ਤਿ. ਦੇਵਤਾ ਥੇਰਸ੍ਸ ਤੇਮਨਭਯੇਨ ਵਸ੍ਸਧਾਰਂ ਵਾਰੇਸੁਂ. ਰਾਜਾ ਅਵਸ੍ਸਨਕਾਰਣਂ ਉਪਧਾਰੇਤ੍ਵਾ ਞਤ੍ਵਾ ਥੇਰਸ੍ਸ ਕੁਟਿਕਂ ਕਾਰਾਪੇਸਿ. ਥੇਰੋ ਕੁਟਿਕਾਯਂ ਵਸਨ੍ਤੋ ਸੇਨਾਸਨਸਪ੍ਪਾਯਲਾਭੇਨ ਚਿਤ੍ਤਸਮਾਧਾਨਂ ਲਭਿਤ੍ਵਾ ਵੀਰਿਯਸਮਤਂ ਯੋਜੇਤ੍ਵਾ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਹਤ੍ਤਂ ਪਾਪੁਣਿ.

੪੧੯. ਸੋ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਭਰਿਯਾ ਮੇ ਕਾਲਙ੍ਕਤਾਤਿਆਦਿਮਾਹ. ਤਂ ਭਗਵਤੋ ਨਿਵੇਦਨਞ੍ਚ ਭਗਵਤਾ ਕਤਾਨੁਸਾਸਨਞ੍ਚ ਮਗ੍ਗਂ ਫਲਾਧਿਗਮਾਪਦਾਨਞ੍ਚ ਪਾਠਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵਾਤਿ.

ਗਿਰਿਮਾਨਨ੍ਦਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਅਟ੍ਠਮਨਵਮਦਸਮਾਪਦਾਨਾਨਿ ਉਤ੍ਤਾਨਤ੍ਥਾਨੇਵਾਤਿ.

ਚਤ੍ਤਾਲੀਸਮਵਗ੍ਗਵਣ੍ਣਨਾ ਸਮਤ੍ਤਾ.