੪. ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ

ਦੇਵਪੁਤ੍ਤੋ ਅਹਂ ਸਨ੍ਤੋਤਿਆਦਿਕਂ ਆਯਸ੍ਮਤੋ ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਕਤਪੁਞ੍ਞਸਞ੍ਚਯੋ ਸਿਖਿਸ੍ਸ ਭਗਵਤੋ ਕਾਲੇ ਭੁਮ੍ਮਟ੍ਠਕਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਸਿਖਿਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਦਿਬ੍ਬਕਕ੍ਕਾਰੁਪੁਪ੍ਫਂ ਗਹੇਤ੍ਵਾ ਪੂਜੇਸਿ.

੨੧. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਏਕਤਿਂਸਕਪ੍ਪਬ੍ਭਨ੍ਤਰੇ ਉਭਯਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਦੇਵਪੁਤ੍ਤੋ ਅਹਂ ਸਨ੍ਤੋਤਿਆਦਿਮਾਹ. ਤਤ੍ਥ ਦਿਬ੍ਬਨ੍ਤਿ ਕੀਲ਼ਨ੍ਤਿ ਪਞ੍ਚਹਿ ਦਿਬ੍ਬੇਹਿ ਕਾਮਗੁਣੇਹੀਤਿ ਦੇਵਾ, ਦੇਵਾਨਂ ਪੁਤ੍ਤੋ, ਦੇਵੋ ਏਵ ਵਾ ਪੁਤ੍ਤੋ ਦੇਵਪੁਤ੍ਤੋ, ਅਹਂ ਦੇਵਪੁਤ੍ਤੋ ਸਨ੍ਤੋ ਵਿਜ੍ਜਮਾਨੋ ਦਿਬ੍ਬਂ ਕਕ੍ਕਾਰੁਪੁਪ੍ਫਂ ਪਗ੍ਗਯ੍ਹ ਪਕਾਰੇਨ, ਗਹੇਤ੍ਵਾ ਸਿਖਿਸ੍ਸ ਭਗਵਤੋ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.