੧੬. ਬਨ੍ਧੁਜੀਵਕਵਗ੍ਗੋ

੧. ਬਨ੍ਧੁਜੀਵਕਤ੍ਥੇਰਅਪਦਾਨਵਣ੍ਣਨਾ

ਚਨ੍ਦਂਵ ਵਿਮਲਂ ਸੁਦ੍ਧਨ੍ਤਿਆਦਿਕਂ ਆਯਸ੍ਮਤੋ ਬਨ੍ਧੁਜੀਵਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਾਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਸਿਖਿਸ੍ਸ ਭਗਵਤੋ ਰੂਪਕਾਯਸਮ੍ਪਤ੍ਤਿਂ ਦਿਸ੍ਵਾ ਪਸਨ੍ਨਮਾਨਸੋ ਬਨ੍ਧੁਜੀਵਕਪੁਪ੍ਫਾਨਿ ਗਹੇਤ੍ਵਾ ਭਗਵਤੋ ਪਾਦਮੂਲੇ ਪੂਜੇਸਿ. ਭਗਵਾ ਤਸ੍ਸ ਚਿਤ੍ਤਪ੍ਪਸਾਦਵਡ੍ਢਨਤ੍ਥਾਯ ਅਨੁਮੋਦਨਮਕਾਸਿ. ਸੋ ਯਾਵਤਾਯੁਤਂ ਠਤ੍ਵਾ ਤੇਨੇਵ ਪੁਞ੍ਞੇਨ ਦੇਵਲੋਕੇ ਨਿਬ੍ਬਤ੍ਤੋ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਸ ਅਮ੍ਹਾਕਂ ਸਮ੍ਮਾਸਮ੍ਬੁਦ੍ਧਸ੍ਸ ਉਪ੍ਪਨ੍ਨਕਾਲੇ ਗਹਪਤਿਕੁਲੇ ਨਿਬ੍ਬਤ੍ਤੋ ਰੂਪਗ੍ਗਯਸਗ੍ਗਪ੍ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਦ੍ਧਾਜਾਤੋ ਗੇਹਂ ਪਹਾਯ ਪਬ੍ਬਜਿਤੋ ਅਰਹਤ੍ਤਂ ਪਾਪੁਣਿ.

੧. ਸੋ ਪੁਬ੍ਬੇਨਿਵਾਸਞਾਣੇਨ ਪੁਬ੍ਬੇ ਕਤਕੁਸਲਕਮ੍ਮਂ ਅਨੁਸ੍ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਂਵ ਵਿਮਲਂ ਸੁਦ੍ਧਨ੍ਤਿਆਦਿਮਾਹ. ਤਤ੍ਥ ਚਨ੍ਦਂਵ ਵਿਮਲਂ ਸੁਦ੍ਧਨ੍ਤਿ ਅਬ੍ਭਾ, ਮਹਿਕਾ, ਧੁਮੋ, ਰਜੋ, ਰਾਹੂਤਿ ਇਮੇਹਿ ਉਪਕ੍ਕਿਲੇਸਮਲੇਹਿ ਵਿਮੁਤ੍ਤਂ ਚਨ੍ਦਂ ਇਵ ਦਿਯਡ੍ਢਸਹਸ੍ਸੁਪਕ੍ਕਿਲੇਸਮਲਾਨਂ ਪਹੀਨਤ੍ਤਾ ਵਿਮਲਂ ਨਿਕ੍ਕਿਲੇਸਤ੍ਤਾ ਸੁਦ੍ਧਂ ਪਸਨ੍ਨਂ ਸਿਖਿਂ ਸਮ੍ਬੁਦ੍ਧਨ੍ਤਿ ਸਮ੍ਬਨ੍ਧੋ. ਕਿਲੇਸਕਦ੍ਦਮਾਨਂ ਅਭਾਵੇਨ ਅਨਾਵਿਲਂ. ਨਨ੍ਦੀਭਵਸਙ੍ਖਾਤਾਯ ਬਲਵਸ੍ਨੇਹਾਯ ਪਰਿਸਮਨ੍ਤਤੋ ਖੀਣਤ੍ਤਾ ਨਨ੍ਦੀਭਵਪਰਿਕ੍ਖੀਣਂ. ਤਿਣ੍ਣਂ ਲੋਕੇਤਿ ਲੋਕਤ੍ਤਯਤੋ ਤਿਣ੍ਣਂ ਉਤ੍ਤਿਣ੍ਣਂ ਅਤਿਕ੍ਕਨ੍ਤਂ. ਵਿਸਤ੍ਤਿਕਨ੍ਤਿ ਵਿਸਤ੍ਤਿਕਂ ਵੁਚ੍ਚਤਿ ਤਣ੍ਹਾ, ਨਿਤ੍ਤਣ੍ਹਨ੍ਤਿ ਅਤ੍ਥੋ.

੨. ਨਿਬ੍ਬਾਪਯਨ੍ਤਂ ਜਨਤਨ੍ਤਿ ਧਮ੍ਮਵਸ੍ਸਂ ਵਸ੍ਸਨ੍ਤੋ ਜਨਤਂ ਜਨਸਮੂਹਂ ਕਿਲੇਸਪਰਿਲ਼ਾਹਾਭਾਵੇਨ ਨਿਬ੍ਬਾਪਯਨ੍ਤਂ ਵੂਪਸਮੇਨ੍ਤਂ. ਸਯਂ ਸਂਸਾਰਤੋ ਤਿਣ੍ਣਂ, ਸਬ੍ਬਸਤ੍ਤੇ ਸਂਸਾਰਤੋ ਤਾਰਯਨ੍ਤਂ ਅਤਿਕ੍ਕਮੇਨ੍ਤਂ ਚਤੁਨ੍ਨਂ ਸਚ੍ਚਾਨਂ ਮੁਨਨਤੋ ਜਾਨਨਤੋ ਮੁਨਿਂ ਸਿਖਿਂ ਸਮ੍ਬੁਦ੍ਧਨ੍ਤਿ ਸਮ੍ਬਨ੍ਧੋ. ਵਨਸ੍ਮਿਂ ਝਾਯਮਾਨਨ੍ਤਿ ਆਰਮ੍ਮਣੂਪਨਿਜ੍ਝਾਨਲਕ੍ਖਣੂਪਨਿਜ੍ਝਾਨੇਹਿ ਝਾਯਨ੍ਤਂ ਚਿਨ੍ਤੇਨ੍ਤਂ ਚਿਤ੍ਤੇਨ ਭਾਵੇਨ੍ਤਂ ਵਨਮਜ੍ਝੇਤਿ ਅਤ੍ਥੋ. ਏਕਗ੍ਗਂ ਏਕਗ੍ਗਚਿਤ੍ਤਂ ਸੁਸਮਾਹਿਤਂ ਸੁਟ੍ਠੁ ਆਰਮ੍ਮਣੇ ਆਹਿਤਂ ਠਪਿਤਚਿਤ੍ਤਂ ਸਿਖਿਂ ਮੁਨਿਂ ਦਿਸ੍ਵਾਤਿ ਸਮ੍ਬਨ੍ਧੋ.

੩. ਬਨ੍ਧੁਜੀਵਕਪੁਪ੍ਫਾਨੀਤਿ ਬਨ੍ਧੂਨਂ ਞਾਤੀਨਂ ਜੀਵਕਂ ਜੀਵਿਤਨਿਸ੍ਸਯਂ ਹਦਯਮਂਸਲੋਹਿਤਂ ਬਨ੍ਧੁਜੀਵਕਂ ਹਦਯਮਂਸਲੋਹਿਤਸਮਾਨਵਣ੍ਣਂ ਪੁਪ੍ਫਂ ਬਨ੍ਧੁਜੀਵਕਪੁਪ੍ਫਂ ਗਹੇਤ੍ਵਾ ਸਿਖਿਨੋ ਲੋਕਬਨ੍ਧੁਨੋ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਬਨ੍ਧੁਜੀਵਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਤਮ੍ਬਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਪਰਕਮ੍ਮਾਯਨੇ ਯੁਤ੍ਤੋਤਿਆਦਿਕਂ ਆਯਸ੍ਮਤੋ ਤਮ੍ਬਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਆਯਸ੍ਮਾ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਿਯਦਸ੍ਸਿਸ੍ਸ ਭਗਵਤੋ ਕਾਲੇ ਕੇਨਚਿ ਪੁਰੇ ਕਤੇਨ ਅਕੁਸਲਕਮ੍ਮੇਨ ਦੁਗ੍ਗਤਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਪਰੇਸਂ ਕਮ੍ਮਂ ਕਤ੍ਵਾ ਭਤਿਯਾ ਜੀਵਿਕਂ ਕਪ੍ਪੇਸਿ. ਸੋ ਏਵਂ ਦੁਕ੍ਖੇਨ ਵਸਨ੍ਤੋ ਪਰੇਸਂ ਅਪਰਾਧਂ ਕਤ੍ਵਾ ਮਰਣਭਯੇਨ ਪਲਾਯਿਤ੍ਵਾ ਵਨਂ ਪਾਵਿਸਿ. ਤਤ੍ਥ ਗਤਟ੍ਠਾਨੇ ਪਾਟਲਿਬੋਧਿਂ ਦਿਸ੍ਵਾ ਵਨ੍ਦਿਤ੍ਵਾ ਸਮ੍ਮਜ੍ਜਿਤ੍ਵਾ ਏਕਸ੍ਮਿਂ ਰੁਕ੍ਖੇ ਤਮ੍ਬਵਣ੍ਣਂ ਪੁਪ੍ਫਂ ਦਿਸ੍ਵਾ ਤਂ ਸਬ੍ਬਂ ਕਣ੍ਣਿਕੇ ਓਚਿਨਿਤ੍ਵਾ ਬੋਧਿਪੂਜਂ ਅਕਾਸਿ. ਤਤ੍ਥ ਚਿਤ੍ਤਂ ਪਸਾਦੇਤ੍ਵਾ ਵਨ੍ਦਿਤ੍ਵਾ ਪਲ੍ਲਙ੍ਕਮਾਭੁਜਿਤ੍ਵਾ ਨਿਸੀਦਿ. ਤਸ੍ਮਿਂ ਖਣੇ ਤੇ ਮਨੁਸ੍ਸਾ ਪਦਾਨੁਪਦਿਕਂ ਅਨੁਬਨ੍ਧਿਤ੍ਵਾ ਤਤ੍ਥ ਅਗਮਂਸੁ. ਸੋ ਤੇ ਦਿਸ੍ਵਾ ਬੋਧਿਂ ਆਵਜ੍ਜੇਨ੍ਤੋਵ ਪਲਾਯਿਤ੍ਵਾ ਭਯਾਨਕੇ ਗੀਰਿਦੁਗ੍ਗਪਪਾਤੇ ਪਤਿਤ੍ਵਾ ਮਰਿ.

੭. ਸੋ ਬੋਧਿਪੂਜਾਯ ਅਨੁਸ੍ਸਰਿਤਤ੍ਤਾ ਤੇਨੇਵ ਪੀਤਿਸੋਮਨਸ੍ਸੇਨ ਤਾਵਤਿਂਸਾਦੀਸੁ ਉਪਪਨ੍ਨੋ ਛ ਕਾਮਾਵਚਰਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਆਦਿਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਰਕਮ੍ਮਾਯਨੇ ਯੁਤ੍ਤੋਤਿਆਦਿਮਾਹ. ਤਤ੍ਥ ਪਰੇਸਂ ਕਮ੍ਮਾਨਿ ਪਰਕਮ੍ਮਾਨਿ, ਪਰਕਮ੍ਮਾਨਂ ਆਯਨੇ ਕਰਣੇ ਵਾਹਨੇ ਧਾਰਣੇ ਯੁਤ੍ਤੋ ਯੋਜਿਤੋ ਅਹੋਸਿਨ੍ਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਤਮ੍ਬਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਵੀਥਿਸਮ੍ਮਜ੍ਜਕਤ੍ਥੇਰਅਪਦਾਨਵਣ੍ਣਨਾ

ਉਦੇਨ੍ਤਂ ਸਤਰਂਸਿਂ ਵਾਤਿਆਦਿਕਂ ਆਯਸ੍ਮਤੋ ਵੀਥਿਸਮ੍ਮਜ੍ਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਜਾਤਿਸਤੇਸੁ ਕਤਪੁਞ੍ਞਸਞ੍ਚਯੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਘਰਾਵਾਸਂ ਵਸਨ੍ਤੋ ਨਗਰਵਾਸੀਹਿ ਸਦ੍ਧਿਂ ਵੀਥਿਂ ਸਜ੍ਜੇਤ੍ਵਾ ਨੀਯਮਾਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਵੀਥਿਂ ਸਮਂ ਕਤ੍ਵਾ ਧਜਂ ਤਤ੍ਥ ਉਸ੍ਸਾਪੇਸਿ.

੧੫. ਸੋ ਤੇਨੇਵ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਬਹੁਮਾਨਹਦਯੋ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਅਨੁਸ੍ਸਰਨ੍ਤੋ ਪਚ੍ਚਕ੍ਖਤੋ ਜਾਨਿਤ੍ਵਾ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਉਦੇਨ੍ਤਂ ਸਤਰਂਸਿਂ ਵਾਤਿਆਦਿਮਾਹ. ਤਤ੍ਥ ਉਦੇਨ੍ਤਂ ਉਗ੍ਗਚ੍ਛਨ੍ਤਂ ਸਤਰਂਸਿਂ ਸਤਪਭਂ. ਸਤਰਂਸੀਤਿ ਦੇਸਨਾਸੀਸਮਤ੍ਤਂ, ਅਨੇਕਸਤਸਹਸ੍ਸਪਭਂ ਸੂਰਿਯਂ ਇਵਾਤਿ ਅਤ੍ਥੋ. ਪੀਤਰਂਸਿਂਵ ਭਾਣੁਮਨ੍ਤਿ ਪੀਤਰਂਸਿਂ ਸਂਕੁਚਿਤਪਭਂ ਭਾਣੁਮਂ ਪਭਾਵਨ੍ਤਂ ਚਨ੍ਦਮਣ੍ਡਲਂ ਇਵ ਸਮ੍ਬੁਦ੍ਧਂ ਦਿਸ੍ਵਾਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਵੀਥਿਸਮ੍ਮਜ੍ਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ

ਦੇਵਪੁਤ੍ਤੋ ਅਹਂ ਸਨ੍ਤੋਤਿਆਦਿਕਂ ਆਯਸ੍ਮਤੋ ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਕਤਪੁਞ੍ਞਸਞ੍ਚਯੋ ਸਿਖਿਸ੍ਸ ਭਗਵਤੋ ਕਾਲੇ ਭੁਮ੍ਮਟ੍ਠਕਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਸਿਖਿਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਦਿਬ੍ਬਕਕ੍ਕਾਰੁਪੁਪ੍ਫਂ ਗਹੇਤ੍ਵਾ ਪੂਜੇਸਿ.

੨੧. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਏਕਤਿਂਸਕਪ੍ਪਬ੍ਭਨ੍ਤਰੇ ਉਭਯਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਦੇਵਪੁਤ੍ਤੋ ਅਹਂ ਸਨ੍ਤੋਤਿਆਦਿਮਾਹ. ਤਤ੍ਥ ਦਿਬ੍ਬਨ੍ਤਿ ਕੀਲ਼ਨ੍ਤਿ ਪਞ੍ਚਹਿ ਦਿਬ੍ਬੇਹਿ ਕਾਮਗੁਣੇਹੀਤਿ ਦੇਵਾ, ਦੇਵਾਨਂ ਪੁਤ੍ਤੋ, ਦੇਵੋ ਏਵ ਵਾ ਪੁਤ੍ਤੋ ਦੇਵਪੁਤ੍ਤੋ, ਅਹਂ ਦੇਵਪੁਤ੍ਤੋ ਸਨ੍ਤੋ ਵਿਜ੍ਜਮਾਨੋ ਦਿਬ੍ਬਂ ਕਕ੍ਕਾਰੁਪੁਪ੍ਫਂ ਪਗ੍ਗਯ੍ਹ ਪਕਾਰੇਨ, ਗਹੇਤ੍ਵਾ ਸਿਖਿਸ੍ਸ ਭਗਵਤੋ ਅਭਿਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਕਕ੍ਕਾਰੁਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਮਨ੍ਦਾਰਵਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ

ਦੇਵਪੁਤ੍ਤੋ ਅਹਂ ਸਨ੍ਤੋਤਿਆਦਿਕਂ ਆਯਸ੍ਮਤੋ ਮਨ੍ਦਾਰਵਪੁਪ੍ਫਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਭੁਮ੍ਮਟ੍ਠਕਦੇਵਪੁਤ੍ਤੋ ਹੁਤ੍ਵਾ ਨਿਬ੍ਬਤ੍ਤੋ ਸਿਖਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਦਿਬ੍ਬਮਨ੍ਦਾਰਵਪੁਪ੍ਫੇਹਿ ਪੂਜੇਸਿ.

੨੫. ਸੋ ਤੇਨ ਪੁਞ੍ਞੇਨਾਤਿਆਦਿਕਂ ਸਬ੍ਬਂ ਅਨਨ੍ਤਰਤ੍ਥੇਰਸ੍ਸ ਅਪਦਾਨਵਣ੍ਣਨਾਯ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ.

ਮਨ੍ਦਾਰਵਪੁਪ੍ਫਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਕਦਮ੍ਬਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਕਦਮ੍ਬਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਮ੍ਮਾਸਮ੍ਬੁਦ੍ਧਸੁਞ੍ਞੇ ਲੋਕੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਵਸਨ੍ਤੋ ਤਤ੍ਥ ਆਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਸਮੀਪੇ ਕੁਕ੍ਕੁਟੇ ਨਾਮ ਪਬ੍ਬਤੇ ਅਸ੍ਸਮਂ ਕਤ੍ਵਾ ਵਿਹਾਸਿ. ਸੋ ਤਤ੍ਥ ਸਤ੍ਤ ਪਚ੍ਚੇਕਬੁਦ੍ਧੇ ਦਿਸ੍ਵਾ ਪਸਨ੍ਨਮਾਨਸੋ ਪੁਪ੍ਫਿਤਂ ਕਦਮ੍ਬਪੁਪ੍ਫਂ ਓਚਿਨਿਤ੍ਵਾ ਤੇ ਪਚ੍ਚੇਕਬੁਦ੍ਧੇ ਪੂਜੇਸਿ. ਤੇਪਿ ‘‘ਇਚ੍ਛਿਤਂ ਪਤ੍ਥਿਤ’’ਨ੍ਤਿਆਦਿਨਾ ਅਨੁਮੋਦਨਂ ਅਕਂਸੁ.

੩੦. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਕੁਕ੍ਕੁਟੋ ਨਾਮ ਪਬ੍ਬਤੋਤਿ ਤਸ੍ਸ ਉਭੋਸੁ ਪਸ੍ਸੇਸੁ ਕੁਕ੍ਕੁਟਚੂਲ਼ਾਕਾਰੇਨ ਪਬ੍ਬਤਕੂਟਾਨਂ ਵਿਜ੍ਜਮਾਨਤ੍ਤਾ ਕੁਕ੍ਕੁਟੋਤਿ ਸਙ੍ਖਂ ਗਤੋ. ਪਕਾਰੇਨ ਤਿਰੋ ਹੁਤ੍ਵਾ ਪਤਿਟ੍ਠਹਤੀਤਿ ਪਬ੍ਬਤੋ. ਤਮ੍ਹਿ ਪਬ੍ਬਤਪਾਦਮ੍ਹੀਤਿ ਤਸ੍ਮਿਂ ਪਬ੍ਬਤਸਮੀਪੇ. ਸਤ੍ਤ ਬੁਦ੍ਧਾ ਵਸਨ੍ਤੀਤਿ ਸਤ੍ਤ ਪਚ੍ਚੇਕਬੁਦ੍ਧਾ ਤਸ੍ਮਿਂ ਕੁਕ੍ਕੁਟਪਬ੍ਬਤਪਾਦੇ ਪਣ੍ਣਸਾਲਾਯਂ ਵਸਨ੍ਤੀਤਿ ਅਤ੍ਥੋ.

੩੧. ਦੀਪਰਾਜਂਵ ਉਗ੍ਗਤਨ੍ਤਿ ਦੀਪਾਨਂ ਰਾਜਾ ਦੀਪਰਾਜਾ, ਸਬ੍ਬੇਸਂ ਦੀਪਾਨਂ ਜਲਮਾਨਾਨਂ ਤਾਰਕਾਨਂ ਰਾਜਾ ਚਨ੍ਦੋਤਿ ਅਤ੍ਥੋ. ਅਥ ਵਾ ਸਬ੍ਬੇਸੁ ਜਮ੍ਬੁਦੀਪਪੁਬ੍ਬਵਿਦੇਹਅਪਰਗੋਯਾਨਉਤ੍ਤਰਕੁਰੁਸਙ੍ਖਾਤੇਸੁ ਚਤੂਸੁ ਦੀਪੇਸੁ ਦ੍ਵਿਸਹਸ੍ਸਪਰਿਤ੍ਤਦੀਪੇਸੁ ਚ ਰਾਜਾ ਆਲੋਕਫਰਣਤੋ ਚਨ੍ਦੋ ਦੀਪਰਾਜਾਤਿ ਵੁਚ੍ਚਤਿ, ਤਂ ਨਭੇ ਉਗ੍ਗਤਂ ਚਨ੍ਦਂ ਇਵ ਪੁਪ੍ਫਿਤਂ ਫੁਲ੍ਲਿਤਂ ਕਦਮ੍ਬਰੁਕ੍ਖਂ ਦਿਸ੍ਵਾ ਤਤੋ ਪੁਪ੍ਫਂ ਓਚਿਨਿਤ੍ਵਾ ਉਭੋਹਿ ਹਤ੍ਥੇਹਿ ਪਗ੍ਗਯ੍ਹ ਪਕਾਰੇਨ ਗਹੇਤ੍ਵਾ ਸਤ੍ਤ ਪਚ੍ਚੇਕਬੁਦ੍ਧੇ ਸਮੋਕਿਰਿਂ ਸੁਟ੍ਠੁ ਓਕਿਰਿਂ, ਆਦਰੇਨ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਕਦਮ੍ਬਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਤਿਣਸੂਲਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਤਿਣਸੂਲਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਜਿਨਵਰੇਸੁ ਕਤਪੁਞ੍ਞਸਮ੍ਭਾਰੋ ਉਪ੍ਪਨ੍ਨੁਪ੍ਪਨ੍ਨਭਵੇ ਕੁਸਲਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥ ਦੋਸਂ ਦਿਸ੍ਵਾ ਤਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਸਨ੍ਤੋ ਹਿਮਵਨ੍ਤਸਮੀਪੇ ਭੂਤਗਣੇ ਨਾਮ ਪਬ੍ਬਤੇ ਵਸਨ੍ਤਂ ਏਕਤਂ ਵਿਵੇਕਮਨੁਬ੍ਰੂਹਨ੍ਤਂ ਸਿਖਿਂ ਸਮ੍ਬੁਦ੍ਧਂ ਦਿਸ੍ਵਾ ਪਸਨ੍ਨਮਾਨਸੋ ਤਿਣਸੂਲਪੁਪ੍ਫਂ ਗਹੇਤ੍ਵਾ ਪਾਦਮੂਲੇ ਪੂਜੇਸਿ. ਬੁਦ੍ਧੋਪਿ ਤਸ੍ਸ ਅਨੁਮੋਦਨਂ ਅਕਾਸਿ.

੩੫. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਾਸਨੇ ਪਸਨ੍ਨੋ ਪਬ੍ਬਜਿਤ੍ਵਾ ਉਪਨਿਸ੍ਸਯਸਮ੍ਪਨ੍ਨਤ੍ਤਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿਤ੍ਵਾ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਪ੍ਪਤ੍ਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਭੂਤਗਣੋ ਨਾਮ ਪਬ੍ਬਤੋਤਿ ਭੂਤਗਣਾਨਂ ਦੇਵਯਕ੍ਖਸਮੂਹਾਨਂ ਆਵਾਸਭੂਤਤ੍ਤਾ ਭਵਨਸਦਿਸਤ੍ਤਾ ਅਵਿਰੂਲ਼੍ਹਭਾਵੇਨ ਪਵਤ੍ਤਤ੍ਤਾ ਚ ਭੂਤਗਣੋ ਨਾਮ ਪਬ੍ਬਤੋ, ਤਸ੍ਮਿਂ ਏਕੋ ਅਦੁਤਿਯੋ ਜਿਨੋ ਜਿਤਮਾਰੋ ਬੁਦ੍ਧੋ ਵਸਤੇ ਦਿਬ੍ਬਬ੍ਰਹ੍ਮਅਰਿਯਇਰਿਯਾਪਥਵਿਹਾਰੇਹਿ ਵਿਹਰਤੀਤਿ ਅਤ੍ਥੋ.

੩੬. ਏਕੂਨਸਤਸਹਸ੍ਸਂ, ਕਪ੍ਪਂ ਨ ਵਿਨਿਪਾਤਿਕੋਤਿ ਤੇਨ ਤਿਣਸੂਲਪੁਪ੍ਫਪੂਜਾਕਰਣਫਲੇਨ ਨਿਰਨ੍ਤਰਂ ਏਕੂਨਸਤਸਹਸ੍ਸਕਪ੍ਪਾਨਂ ਅਵਿਨਿਪਾਤਕੋ ਚਤੁਰਾਪਾਯਵਿਨਿਮੁਤ੍ਤੋ ਸਗ੍ਗਸਮ੍ਪਤ੍ਤਿਭਵਮੇਵ ਉਪਪਨ੍ਨੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਤਿਣਸੂਲਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਨਾਗਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਸੁਵਚ੍ਛੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਨਾਗਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਜਿਨਨਿਸਭੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਵੇਦਤ੍ਤਯਾਦੀਸੁ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਤਤ੍ਥ ਸਾਰਂ ਅਦਿਸ੍ਵਾ ਹਿਮਵਨ੍ਤਂ ਪਵਿਸਿਤ੍ਵਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਝਾਨਸਮਾਪਤ੍ਤਿਸੁਖੇਨ ਵੀਤਿਨਾਮੇਸਿ. ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗਵਾ ਤਸ੍ਸਾਨੁਕਮ੍ਪਾਯ ਤਤ੍ਥ ਅਗਮਾਸਿ. ਸੋ ਤਾਪਸੋ ਤਂ ਭਗਵਨ੍ਤਂ ਦਿਸ੍ਵਾ ਲਕ੍ਖਣਸਤ੍ਥੇਸੁ ਛੇਕਤ੍ਤਾ ਭਗਵਤੋ ਲਕ੍ਖਣਰੂਪਸਮ੍ਪਤ੍ਤਿਯਾ ਪਸਨ੍ਨੋ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਅਟ੍ਠਾਸਿ. ਆਕਾਸਤੋ ਅਨੋਤਿਣ੍ਣਤ੍ਤਾ ਪੂਜਾਸਕ੍ਕਾਰੇ ਅਕਤੇਯੇਵ ਆਕਾਸੇਨੇਵ ਪਕ੍ਕਾਮਿ. ਅਥ ਸੋ ਤਾਪਸੋ ਸਸਿਸ੍ਸੋ ਨਾਗਪੁਪ੍ਫਂ ਓਚਿਨਿਤ੍ਵਾ ਤੇਨ ਪੁਪ੍ਫੇਨ ਭਗਵਤੋ ਗਤਦਿਸਾਭਾਗਮਗ੍ਗਂ ਪੂਜੇਸਿ.

੩੯. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਨ੍ਤੋ ਸਬ੍ਬਤ੍ਥ ਪੂਜਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਦ੍ਧਾਸਮ੍ਪਨ੍ਨੋ ਪਬ੍ਬਜਿਤ੍ਵਾ ਵਤ੍ਤਪਟਿਪਤ੍ਤਿਯਾ ਸਾਸਨਂ ਸੋਭਯਮਾਨੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ‘‘ਕੇਨ ਨੁ ਖੋ ਕੁਸਲਕਮ੍ਮੇਨ ਮਯਾ ਅਯਂ ਲੋਕੁਤ੍ਤਰਸਮ੍ਪਤ੍ਤਿ ਲਦ੍ਧਾ’’ਤਿ ਅਤੀਤਕਮ੍ਮਂ ਸਰਨ੍ਤੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਚ੍ਛੋ ਨਾਮ ਨਾਮੇਨਾਤਿਆਦਿਮਾਹ. ਤਤ੍ਥ ਵਚ੍ਛਗੋਤ੍ਤੇ ਜਾਤਤ੍ਤਾ ਵਚ੍ਛੋ, ਸੁਨ੍ਦਰੋ ਚ ਸੋ ਵਚ੍ਛੋ ਚੇਤਿ ਸੁਵਚ੍ਛੋ. ਨਾਮੇਨ ਸੁਵਚ੍ਛੋ ਨਾਮ ਬ੍ਰਾਹ੍ਮਣੋ ਮਨ੍ਤਪਾਰਗੂ ਵੇਦਤ੍ਤਯਾਦਿਸਕਲਮਨ੍ਤਸਤ੍ਥੇ ਕੋਟਿਪ੍ਪਤ੍ਤੋਤਿ ਅਤ੍ਥੋ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਨਾਗਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਪੁਨ੍ਨਾਗਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਕਾਨਨਂ ਵਨਮੋਗਯ੍ਹਾਤਿਆਦਿਕਂ ਆਯਸ੍ਮਤੋ ਪੁਨ੍ਨਾਗਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਫੁਸ੍ਸਸ੍ਸ ਭਗਵਤੋ ਕਾਲੇ ਨੇਸਾਦਕੁਲੇ ਨਿਬ੍ਬਤ੍ਤੋ ਮਹਾਵਨਂ ਪਵਿਟ੍ਠੋ ਤਤ੍ਥ ਸੁਪੁਪ੍ਫਿਤਪੁਨ੍ਨਾਗਪੁਪ੍ਫਂ ਦਿਸ੍ਵਾ ਹੇਤੁਸਮ੍ਪਨ੍ਨਤ੍ਤਾ ਬੁਦ੍ਧਾਰਮ੍ਮਣਪੀਤਿਵਸੇਨ ਭਗਵਨ੍ਤਂ ਸਰਿਤ੍ਵਾ ਤਂ ਪੁਪ੍ਫਂ ਸਹ ਕਣ੍ਣਿਕਾਹਿ ਓਚਿਨਿਤ੍ਵਾ ਵਾਲੁਕਾਹਿ ਚੇਤਿਯਂ ਕਤ੍ਵਾ ਪੂਜੇਸਿ.

੪੬. ਸੋ ਤੇਨ ਪੁਞ੍ਞੇਨ ਦ੍ਵੇਨਵੁਤਿਕਪ੍ਪੇ ਨਿਰਨ੍ਤਰਂ ਦੇਵਮਨੁਸ੍ਸਸਮ੍ਪਤ੍ਤਿਯੋਯੇਵ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਵਿਭਵਸਮ੍ਪਨ੍ਨੇ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਬ੍ਬਵਾਸਨਾਬਲੇਨ ਸਾਸਨੇ ਪਸਨ੍ਨੋ ਪਬ੍ਬਜਿਤ੍ਵਾ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਪੁਬ੍ਬੇ ਕਤਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕਾਨਨਂ ਵਨਮੋਗਯ੍ਹਾਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਪੁਨ੍ਨਾਗਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਕੁਮੁਦਦਾਯਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਕੁਮੁਦਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਥੇਰੋ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਹਿਮਵਨ੍ਤਸ੍ਸ ਆਸਨ੍ਨੇ ਮਹਨ੍ਤੇ ਜਾਤਸ੍ਸਰੇ ਕੁਕੁਤ੍ਥੋ ਨਾਮ ਪਕ੍ਖੀ ਹੁਤ੍ਵਾ ਨਿਬ੍ਬਤ੍ਤੋ ਕੇਨਚਿ ਅਕੁਸਲੇਨ ਪਕ੍ਖੀ ਸਮਾਨੋਪਿ ਪੁਬ੍ਬੇ ਕਤਸਮ੍ਭਾਰੇਨ ਬੁਦ੍ਧਿਸਮ੍ਪਨ੍ਨੋ ਪੁਞ੍ਞਾਪੁਞ੍ਞੇਸੁ ਛੇਕੋ ਸੀਲਵਾ ਪਾਣਗੋਚਰਤੋ ਪਟਿਵਿਰਤੋ ਅਹੋਸਿ. ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗਵਾ ਆਕਾਸੇਨਾਗਨ੍ਤ੍ਵਾ ਤਸ੍ਸ ਸਮੀਪੇ ਚਙ੍ਕਮਤਿ. ਅਥ ਸੋ ਸਕੁਣੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਕੁਮੁਦਪੁਪ੍ਫਂ ਡਂਸਿਤ੍ਵਾ ਭਗਵਤੋ ਪਾਦਮੂਲੇ ਪੂਜੇਸਿ. ਭਗਵਾ ਤਸ੍ਸ ਸੋਮਨਸ੍ਸੁਪ੍ਪਾਦਨਤ੍ਥਂ ਪਟਿਗ੍ਗਹੇਤ੍ਵਾ ਅਨੁਮੋਦਨਮਕਾਸਿ.

੫੧. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਉਭਯਸਮ੍ਪਤ੍ਤਿਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਅਞ੍ਞਤਰਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਮਹਦ੍ਧਨੋ ਮਹਾਭੋਗੋ ਰਤਨਤ੍ਤਯੇ ਪਸਨ੍ਨੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਹੁਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਪਦੁਮੁਪ੍ਪਲਸਞ੍ਛਨ੍ਨੋਤਿ ਏਤ੍ਥ ਸਤਪਤ੍ਤੇਹਿ ਸਮ੍ਪੁਣ੍ਣੋ ਸੇਤਪਦੁਮੋ ਚ ਤੀਣਿ ਨੀਲਰਤ੍ਤਸੇਤੁਪ੍ਪਲਾਨਿ ਚ ਪਦੁਮੁਪ੍ਪਲਾਨਿ ਤੇਹਿ ਸਞ੍ਛਨ੍ਨੋ ਗਹਨੀਭੂਤੋ ਸਮ੍ਪੁਣ੍ਣੋ ਮਹਾਜਾਤਸ੍ਸਰੋ ਅਹੂਤਿ ਸਮ੍ਬਨ੍ਧੋ. ਪੁਣ੍ਡਰੀਕਸਮੋਤ੍ਥਟੋਤਿ ਪੁਣ੍ਡਰੀਕੇਹਿ ਰਤ੍ਤਪਦੁਮੇਹਿ ਓਤ੍ਥਟੋ ਸਮ੍ਪੁਣ੍ਣੋਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਕੁਮੁਦਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸੋਲ਼ਸਮਵਗ੍ਗਵਣ੍ਣਨਾ ਸਮਤ੍ਤਾ.