੧੫. ਛਤ੍ਤਵਗ੍ਗੋ

੧. ਅਤਿਛਤ੍ਤਿਯਤ੍ਥੇਰਅਪਦਾਨਵਣ੍ਣਨਾ

ਪਰਿਨਿਬ੍ਬੁਤੇ ਭਗਵਤੀਤਿਆਦਿਕਂ ਆਯਸ੍ਮਤੋ ਅਤਿਛਤ੍ਤਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਧਰਮਾਨਸ੍ਸ ਭਗਵਤੋ ਅਦਿਟ੍ਠਤ੍ਤਾ ਪਰਿਨਿਬ੍ਬੁਤਕਾਲੇ ‘‘ਅਹੋ ਮਮ ਪਰਿਹਾਨੀ’’ਤਿ ਚਿਨ੍ਤੇਤ੍ਵਾ ‘‘ਮਮ ਜਾਤਿਂ ਸਫਲਂ ਕਰਿਸ੍ਸਾਮੀ’’ਤਿ ਕਤਸਨ੍ਨਿਟ੍ਠਾਨੋ ਛਤ੍ਤਾਧਿਛਤ੍ਤਂ ਕਾਰੇਤ੍ਵਾ ਤਸ੍ਸ ਭਗਵਤੋ ਸਰੀਰਧਾਤੁਂ ਨਿਹਿਤਧਾਤੁਗਬ੍ਭਂ ਪੂਜੇਸਿ. ਅਪਰਭਾਗੇ ਪੁਪ੍ਫਚ੍ਛਤ੍ਤਂ ਕਾਰੇਤ੍ਵਾ ਤਮੇਵ ਧਾਤੁਗਬ੍ਭਂ ਪੂਜੇਸਿ. ਸੋ ਤੇਨੇਵ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੧. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਰਿਨਿਬ੍ਬੁਤੇ ਭਗਵਤੀਤਿਆਦਿਮਾਹ. ਤਤ੍ਥ ਛਤ੍ਤਾਤਿਛਤ੍ਤਨ੍ਤਿ ਛਾਦਿਯਤਿ ਸਂਵਰਿਯਤਿ ਆਤਪਾਦਿਨ੍ਤਿ ਛਤ੍ਤਂ, ਛਤ੍ਤਸ੍ਸ ਅਤਿਛਤ੍ਤਂ ਛਤ੍ਤਸ੍ਸ ਉਪਰਿ ਕਤਛਤ੍ਤਂ ਛਤ੍ਤਾਤਿਛਤ੍ਤਂ, ਛਤ੍ਤਸ੍ਸ ਉਪਰੂਪਰਿ ਛਤ੍ਤਨ੍ਤਿ ਅਤ੍ਥੋ. ਥੂਪਮ੍ਹਿ ਅਭਿਰੋਪਯਿਨ੍ਤਿ ਥੂਪਿਯਤਿ ਰਾਸਿਕਰੀਯਤੀਤਿ ਥੂਪੋ, ਅਥ ਵਾ ਥੂਪਤਿ ਥਿਰਭਾਵੇਨ ਵੁਦ੍ਧਿਂ ਵਿਰੂਲ਼੍ਹਿਂ ਵੇਪੁਲ੍ਲਂ ਆਪਜ੍ਜਮਾਨੋ ਪਤਿਟ੍ਠਾਤੀਤਿ ਥੂਪੋ, ਤਸ੍ਮਿਂ ਥੂਪਮ੍ਹਿ ਮਯਾ ਕਾਰਿਤਂ ਛਤ੍ਤਂ ਉਪਰੂਪਰਿ ਠਪਨਵਸੇਨ ਅਭਿ ਵਿਸੇਸੇਨ ਆਰੋਪਯਿਂ ਪੂਜੇਸਿਨ੍ਤਿ ਅਤ੍ਥੋ.

੨. ਪੁਪ੍ਫਚ੍ਛਦਨਂ ਕਤ੍ਵਾਨਾਤਿ ਵਿਕਸਿਤੇਹਿ ਸੁਗਨ੍ਧੇਹਿ ਅਨੇਕੇਹਿ ਫੁਪ੍ਫੇਹਿ ਛਦਨਂ ਛਤ੍ਤੁਪਰਿ ਵਿਤਾਨਂ ਕਤ੍ਵਾ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਅਤਿਛਤ੍ਤਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਥਮ੍ਭਾਰੋਪਕਤ੍ਥੇਰਅਪਦਾਨਵਣ੍ਣਨਾ

ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਥਮ੍ਭਾਰੋਪਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਧਮ੍ਮਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧੋ ਪਸਨ੍ਨੋ ਪਰਿਨਿਬ੍ਬੁਤੇ ਭਗਵਤਿ ਤਸ੍ਸ ਭਗਵਤੋ ਧਾਤੁਗਬ੍ਭਮਾਲ਼ਕੇ ਥਮ੍ਭਂ ਨਿਖਨਿਤ੍ਵਾ ਧਜਂ ਆਰੋਪੇਸਿ. ਬਹੂਨਿ ਜਾਤਿਸੁਮਨਪੁਪ੍ਫਾਨਿ ਗਨ੍ਥਿਤ੍ਵਾ ਨਿਸ੍ਸੇਣਿਯਾ ਆਰੋਹਿਤ੍ਵਾ ਪੂਜੇਸਿ.

੫. ਸੋ ਯਾਵਤਾਯੁਕਂ ਠਤ੍ਵਾ ਕਾਲਂ ਕਤ੍ਵਾ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਸਬ੍ਬਤ੍ਥ ਪੂਜਿਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਦਹਰਕਾਲਤੋ ਪਭੁਤਿ ਪੂਜਨੀਯੋ ਸਾਸਨੇ ਬਦ੍ਧਸਦ੍ਧੋ ਪਬ੍ਬਜਿਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਤ੍ਥ ਨਿਬ੍ਬੁਤੇ ਲੋਕਨਾਥਮ੍ਹੀਤਿ ਸਕਲਲੋਕਸ੍ਸ ਨਾਥੇ ਪਧਾਨਭੂਤੇ ਪਟਿਸਰਣੇ ਚ ਸਤ੍ਥਰਿ ਖਨ੍ਧਪਰਿਨਿਬ੍ਬਾਨੇਨ ਨਿਬ੍ਬੁਤੇ ਨਿਬ੍ਬੁਤਦੀਪਸਿਖਾ ਵਿਯ ਅਦਸ੍ਸਨਂ ਗਤੇਤਿ ਅਤ੍ਥੋ. ਧਮ੍ਮਦਸ੍ਸੀਨਰਾਸਭੇਤਿ ਚਤੁਸਚ੍ਚਧਮ੍ਮਂ ਪਸ੍ਸਤੀਤਿ ਧਮ੍ਮਦਸ੍ਸੀ, ਅਥ ਵਾ ਸਤਿਪਟ੍ਠਾਨਾਦਿਕੇ ਸਤ੍ਤਤਿਂਸਬੋਧਿਪਕ੍ਖਿਯਧਮ੍ਮੇ ਦਸ੍ਸਨਸੀਲੋ ਪਸ੍ਸਨਸੀਲੋਤਿ ਧਮ੍ਮਦਸ੍ਸੀ, ਨਰਾਨਂ ਆਸਭੋ ਪਵਰੋ ਉਤ੍ਤਮੋਤਿ ਨਰਾਸਭੋ, ਧਮ੍ਮਦਸ੍ਸੀ ਚ ਸੋ ਨਰਾਸਭੋ ਚੇਤਿ ਧਮ੍ਮਦਸ੍ਸੀਨਰਾਸਭੋ, ਤਸ੍ਮਿਂ ਧਮ੍ਮਦਸ੍ਸੀਨਰਾਸਭੇ. ਆਰੋਪੇਸਿਂ ਧਜਂ ਥਮ੍ਭਨ੍ਤਿ ਚੇਤਿਯਮਾਲ਼ਕੇ ਥਮ੍ਭਂ ਨਿਖਨਿਤ੍ਵਾ ਤਤ੍ਥ ਧਜਂ ਆਰੋਪੇਸਿਂ ਬਨ੍ਧਿਤ੍ਵਾ ਠਪੇਸਿਨ੍ਤਿ ਅਤ੍ਥੋ.

੬. ਨਿਸ੍ਸੇਣਿਂ ਮਾਪਯਿਤ੍ਵਾਨਾਤਿ ਨਿਸ੍ਸਾਯ ਤਂ ਇਣਨ੍ਤਿ ਗਚ੍ਛਨ੍ਤਿ ਆਰੋਹਨ੍ਤਿ ਉਪਰੀਤਿ ਨਿਸ੍ਸੇਣਿ, ਤਂ ਨਿਸ੍ਸੇਣਿਂ ਮਾਪਯਿਤ੍ਵਾ ਕਾਰੇਤ੍ਵਾ ਬਨ੍ਧਿਤ੍ਵਾ ਥੂਪਸੇਟ੍ਠਂ ਸਮਾਰੁਹਿਨ੍ਤਿ ਸਮ੍ਬਨ੍ਧੋ. ਜਾਤਿਪੁਪ੍ਫਂ ਗਹੇਤ੍ਵਾਨਾਤਿ ਜਾਯਮਾਨਮੇਵ ਜਨਾਨਂ ਸੁਨ੍ਦਰਂ ਮਨਂ ਕਰੋਤੀਤਿ ਜਾਤਿਸੁਮਨਂ, ਜਾਤਿਸੁਮਨਮੇਵ ਪੁਪ੍ਫਂ ‘‘ਜਾਤਿਸੁਮਨਪੁਪ੍ਫ’’ਨ੍ਤਿ ਵਤ੍ਤਬ੍ਬੇ ਗਾਥਾਬਨ੍ਧਸੁਖਤ੍ਥਂ ਸੁਮਨਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਜਾਤਿਪੁਪ੍ਫ’’ਨ੍ਤਿ ਵੁਤ੍ਤਂ, ਤਂ ਜਾਤਿਸੁਮਨਪੁਪ੍ਫਂ ਗਹੇਤ੍ਵਾ ਗਨ੍ਥਿਤ੍ਵਾ ਥੂਪਮ੍ਹਿ ਆਰੋਪਯਿਂ, ਆਰੋਪੇਤ੍ਵਾ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਥਮ੍ਭਾਰੋਪਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਵੇਦਿਕਾਰਕਤ੍ਥੇਰਅਪਦਾਨਵਣ੍ਣਨਾ

ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਕਂ ਆਯਸ੍ਮਤੋ ਵੇਦਿਕਾਰਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਿਯਦਸ੍ਸਿਸ੍ਸ ਭਗਵਤੋ ਕਾਲੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਘਰਾਵਾਸਂ ਸਣ੍ਠਪੇਤ੍ਵਾ ਨਿਬ੍ਬੁਤੇ ਸਤ੍ਥਰਿ ਪਸਨ੍ਨੋ ਤਸ੍ਸ ਚੇਤਿਯੇ ਵਲਯਂ ਕਾਰੇਸਿ, ਸਤ੍ਤਹਿ ਰਤਨੇਹਿ ਪਰਿਪੂਰੇਤ੍ਵਾ ਮਹਾਪੂਜਂ ਕਾਰੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਅਨੇਕੇਸੁ ਜਾਤਿਸਤਸਹਸ੍ਸੇਸੁ ਪੂਜਨੀਯੋ ਮਹਦ੍ਧਨੋ ਮਹਾਭੋਗੋ ਉਭਯਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਭਵਸਮ੍ਪਨ੍ਨੋ ਪਬ੍ਬਜਿਤ੍ਵਾ ਵਾਯਮਨ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੦. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬੇ ਕਤਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਨਾਥਮ੍ਹੀਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਪਿਯਦਸ੍ਸੀਨਰੁਤ੍ਤਮੇਤਿ ਪਿਯਂ ਸੋਮਨਸ੍ਸਾਕਾਰਂ ਦਸ੍ਸਨਂ ਯਸ੍ਸ ਸੋ ਪਿਯਦਸ੍ਸੀ, ਆਰੋਹਪਰਿਣਾਹਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਾਨੁਬ੍ਯਞ੍ਜਨਬ੍ਯਾਮਪ੍ਪਭਾਮਣ੍ਡਲੇਹਿ ਸਾਧੁ ਮਹਾਜਨਪ੍ਪਸਾਦਂ ਜਨਯਨਾਕਾਰਦਸ੍ਸਨੋਤਿ ਅਤ੍ਥੋ. ਨਰਾਨਂ ਉਤ੍ਤਮੋਤਿ ਨਰੁਤ੍ਤਮੋ, ਪਿਯਦਸ੍ਸੀ ਚ ਸੋ ਨਰੁਤ੍ਤਮੋ ਚੇਤਿ ਪਿਯਦਸ੍ਸੀਨਰੁਤ੍ਤਮੋ, ਤਸ੍ਮਿਂ ਪਿਯਦਸ੍ਸੀਨਰੁਤ੍ਤਮੇ ਨਿਬ੍ਬੁਤੇ ਧਾਤੁਗਬ੍ਭਮ੍ਹਿ ਮੁਤ੍ਤਵੇਦਿਂ ਅਹਂ ਅਕਾਸਿਨ੍ਤਿ ਸਮ੍ਬਨ੍ਧੋ. ਪੁਪ੍ਫਾਧਾਰਤ੍ਥਾਯ ਪਰਿਯੋਸਾਨੇ ਵੇਦਿਕਾਵਲਯਂ ਅਕਾਸਿਨ੍ਤਿ ਅਤ੍ਥੋ.

੧੧. ਮਣੀਹਿ ਪਰਿਵਾਰੇਤ੍ਵਾਤਿ ਮਣਤਿ ਜੋਤਤਿ ਪਭਾਸਤੀਤਿ ਮਣਿ, ਅਥ ਵਾ ਜਨਾਨਂ ਮਨਂ ਪੂਰੇਨ੍ਤੋ ਸੋਮਨਸ੍ਸਂ ਕਰੋਨ੍ਤੋ ਇਤੋ ਗਤੋ ਪਵਤ੍ਤੋਤਿ ਮਣਿ, ਜਾਤਿਰਙ੍ਗਮਣਿਵੇਲ਼ੁਰਿਯਮਣਿਆਦੀਹਿ ਅਨੇਕੇਹਿ ਮਣੀਹਿ ਕਤਵੇਦਿਕਾਵਲਯਂ ਪਰਿਵਾਰੇਤ੍ਵਾ ਉਤ੍ਤਮਂ ਮਹਾਪੂਜਂ ਅਕਾਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਵੇਦਿਕਾਰਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਸਪਰਿਵਾਰਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਸਪਰਿਵਾਰਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਮਹਦ੍ਧਨੋ ਮਹਾਭੋਗੋ ਅਹੋਸਿ. ਅਥ ਪਦੁਮੁਤ੍ਤਰੇ ਭਗਵਤਿ ਪਰਿਨਿਬ੍ਬੁਤੇ ਮਹਾਜਨੋ ਤਸ੍ਸ ਧਾਤੁਂ ਨਿਦਹਿਤ੍ਵਾ ਮਹਨ੍ਤਂ ਚੇਤਿਯਂ ਕਾਰੇਤ੍ਵਾ ਪੂਜੇਸਿ. ਤਸ੍ਮਿਂ ਕਾਲੇ ਅਯਂ ਉਪਾਸਕੋ ਤਸ੍ਸੁਪਰਿ ਚਨ੍ਦਨਸਾਰੇਨ ਚੇਤਿਯਘਰਂ ਕਰਿਤ੍ਵਾ ਮਹਾਪੂਜਂ ਅਕਾਸਿ. ਸੋ ਤੇਨੇਵ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਕੁਸਲਂ ਕਤ੍ਵਾ ਸਦ੍ਧਾਯ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੫-੮. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਤ੍ਥ ਓਮਤ੍ਤਨ੍ਤਿ ਲਾਮਕਭਾਵਂ ਨੀਚਭਾਵਂ ਦੁਕ੍ਖਿਤਭਾਵਂ ਵਾ ਨ ਪਸ੍ਸਾਮਿ ਨ ਜਾਨਾਮਿ, ਨ ਦਿਟ੍ਠਪੁਬ੍ਬੋ ਮਯਾ ਨੀਚਭਾਵੋਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਸਪਰਿਵਾਰਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਉਮਾਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਨਿਬ੍ਬੁਤੇ ਲੋਕਮਹਿਤੇਤਿਆਦਿਕਂ ਆਯਸ੍ਮਤੋ ਉਮਾਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਨਿਬ੍ਬੁਤਸ੍ਸ ਭਗਵਤੋ ਚੇਤਿਯਮਹੇ ਵਤ੍ਤਮਾਨੇ ਇਨ੍ਦਨੀਲਮਣਿਵਣ੍ਣਂ ਉਮਾਪੁਪ੍ਫਂ ਗਹੇਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਸੁਗਤੀਸੁਯੇਵ ਸਂਸਰਨ੍ਤੋ ਦਿਬ੍ਬਮਾਨੁਸਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਉਪ੍ਪਨ੍ਨੁਪ੍ਪਨ੍ਨਭਵੇ ਬਹੁਲਂ ਨੀਲਵਣ੍ਣੋ ਜਾਤਿਸਮ੍ਪਨ੍ਨੋ ਵਿਭਵਸਮ੍ਪਨ੍ਨੋ ਅਹੋਸਿ. ਸੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਦ੍ਧਾਜਾਤੋ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੨੧. ਸੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਬ੍ਬੁਤੇ ਲੋਕਮਹਿਤੇਤਿਆਦਿ ਵੁਤ੍ਤਂ. ਤਤ੍ਥ ਲੋਕਮਹਿਤੇਤਿ ਲੋਕੇਹਿ ਮਹਿਤੋ ਪੂਜਿਤੋਤਿ ਲੋਕਮਹਿਤੋ, ਤਸ੍ਮਿਂ ਲੋਕਮਹਿਤੇ ਸਿਦ੍ਧਤ੍ਥਮ੍ਹਿ ਭਗਵਤਿ ਪਰਿਨਿਬ੍ਬੁਤੇਤਿ ਸਮ੍ਬਨ੍ਧੋ. ਆਹੁਤੀਨਂਪਟਿਗ੍ਗਹੇਤਿ ਆਹੁਤਿਨੋ ਵੁਚ੍ਚਨ੍ਤਿ ਪੂਜਾਸਕ੍ਕਾਰਾ, ਤੇਸਂ ਆਹੁਤੀਨਂ ਪਟਿਗ੍ਗਹੇਤੁਂ ਅਰਹਤੀਤਿ ਆਹੁਤੀਨਂਪਟਿਗ੍ਗਹੋ, ਅਲੁਤ੍ਤਕਿਤਨ੍ਤਸਮਾਸੋ, ਤਸ੍ਮਿਂ ਆਹੁਤੀਨਂਪਟਿਗ੍ਗਹੇ ਭਗਵਤਿ ਪਰਿਨਿਬ੍ਬੁਤੇਤਿ ਅਤ੍ਥੋ.

੨੨. ਉਮਾਪੁਪ੍ਫਨ੍ਤਿ ਉਦ੍ਧਮੁਦ੍ਧਂ ਨੀਲਪਭਂ ਮੁਞ੍ਚਮਾਨਂ ਪੁਪ੍ਫਤਿ ਵਿਕਸਤੀਤਿ ਉਮਾਪੁਪ੍ਫਂ, ਤਂ ਉਮਾਪੁਪ੍ਫਂ ਗਹੇਤ੍ਵਾ ਚੇਤਿਯੇ ਪੂਜਂ ਅਕਾਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਉਮਾਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਅਨੁਲੇਪਦਾਯਕਤ੍ਥੇਰਅਪਦਾਨਵਣ੍ਣਨਾ

ਅਨੋਮਦਸ੍ਸੀਮੁਨਿਨੋਤਿਆਦਿਕਂ ਆਯਸ੍ਮਤੋ ਅਨੁਲੇਪਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਨੋਮਦਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਮਹਦ੍ਧਨੋ ਮਹਾਭੋਗੋ ਤਸ੍ਸ ਭਗਵਤੋ ਬੋਧਿਰੁਕ੍ਖਸ੍ਸ ਵੇਦਿਕਾਵਲਯਂ ਕਾਰੇਤ੍ਵਾ ਸੁਧਾਕਮ੍ਮਞ੍ਚ ਕਾਰੇਤ੍ਵਾ ਵਾਲੁਕਸਨ੍ਥਰਣਂ ਦਦ੍ਦਲ਼੍ਹਮਾਨਂ ਰਜਤਵਿਮਾਨਮਿਵ ਕਾਰੇਸਿ. ਸੋ ਤੇਨ ਪੁਞ੍ਞੇਨ ਸੁਖਪ੍ਪਤ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਰਜਤਵਿਮਾਨਰਜਤਗੇਹਰਜਤਪਾਸਾਦੇਸੁ ਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਵਿਪਸ੍ਸਨਮਨੁਯੁਤ੍ਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੬. ਸੋ ਅਪਰਭਾਗੇ ‘‘ਕਿਂ ਨੁ ਖੋ ਕੁਸਲਂ ਕਤ੍ਵਾ ਮਯਾ ਅਯਂ ਵਿਸੇਸੋ ਅਧਿਗਤੋ’’ਤਿ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣੇਨ ਪਟਿਪਾਟਿਯਾ ਅਨੁਸ੍ਸਰਿਤ੍ਵਾ ਪੁਬ੍ਬੇ ਕਤਕੁਸਲਂ ਜਾਨਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਨੋਮਦਸ੍ਸੀਮੁਨਿਨੋਤਿਆਦਿਮਾਹ. ਤਤ੍ਥ ਅਨੋਮਂ ਅਲਾਮਕਂ ਦਸ੍ਸਨਂ ਦਸ੍ਸਨੀਯਂ ਸਰੀਰਂ ਯਸ੍ਸ ਸੋ ਅਨੋਮਦਸ੍ਸੀ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਾਨੁਬ੍ਯਞ੍ਜਨਬ੍ਯਾਮਪ੍ਪਭਾਸਮੁਜ੍ਜਲਵਿਰਾਜਿਤਸਰੀਰਤ੍ਤਾ ਸੁਨ੍ਦਰਦਸ੍ਸਨੋਤਿ ਅਤ੍ਥੋ. ਸੁਧਾਯ ਪਿਣ੍ਡਂ ਦਤ੍ਵਾਨਾਤਿ ਬੋਧਿਘਰੇ ਵੇਦਿਕਾਵਲਯਂ ਕਾਰੇਤ੍ਵਾ ਸਕਲੇ ਬੋਧਿਘਰੇ ਸੁਧਾਲੇਪਨਂ ਕਤ੍ਵਾਤਿ ਅਤ੍ਥੋ. ਪਾਣਿਕਮ੍ਮਂ ਅਕਾਸਹਨ੍ਤਿ ਸਾਰਕਟ੍ਠੇਨ ਫਲਕਪਾਣਿਯੋ ਕਤ੍ਵਾ ਤਾਹਿ ਪਾਣੀਹਿ ਮਟ੍ਠਕਮ੍ਮਂ ਅਕਾਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਅਨੁਲੇਪਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਮਗ੍ਗਦਾਯਕਤ੍ਥੇਰਅਪਦਾਨਵਣ੍ਣਨਾ

ਉਤ੍ਤਰਿਤ੍ਵਾਨ ਨਦਿਕਨ੍ਤਿਆਦਿਕਂ ਆਯਸ੍ਮਤੋ ਮਗ੍ਗਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਨਿਬ੍ਬਾਨਾਧਿਗਮਤ੍ਥਾਯ ਪੁਞ੍ਞਾਨਿ ਉਪਚਿਨਨ੍ਤੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਲੋਕਸਮ੍ਮਤੇ ਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਵਸਨ੍ਤੋ ਏਕਦਿਵਸਂ ਭਗਵਨ੍ਤਂ ਏਕਂ ਨਦਿਂ ਉਤ੍ਤਰਿਤ੍ਵਾ ਵਨਨ੍ਤਰਂ ਗਚ੍ਛਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ‘‘ਇਦਾਨਿ ਮਯਾ ਭਗਵਤੋ ਮਗ੍ਗਂ ਸਮਂ ਕਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਕੁਦਾਲਞ੍ਚ ਪਿਟਕਞ੍ਚ ਆਦਾਯ ਭਗਵਤੋ ਗਮਨਮਗ੍ਗਂ ਸਮਂ ਕਤ੍ਵਾ ਵਾਲੁਕਂ ਓਕਿਰਿਤ੍ਵਾ ਭਗਵਤੋ ਪਾਦੇ ਵਨ੍ਦਿਤ੍ਵਾ, ‘‘ਭਨ੍ਤੇ, ਇਮਿਨਾ ਮਗ੍ਗਾਲਙ੍ਕਾਰਕਰਣੇਨ ਨਿਬ੍ਬਤ੍ਤਨਿਬ੍ਬਤ੍ਤਟ੍ਠਾਨੇ ਪੂਜਨੀਯੋ ਭਵੇਯ੍ਯਂ, ਨਿਬ੍ਬਾਨਞ੍ਚ ਪਾਪੁਣੇਯ੍ਯ’’ਨ੍ਤਿ ਪਤ੍ਥਨਂ ਅਕਾਸਿ. ਭਗਵਾ ‘‘ਯਥਾਧਿਪ੍ਪਾਯਂ ਸਮਿਜ੍ਝਤੂ’’ਤਿ ਅਨੁਮੋਦਨਂ ਵਤ੍ਵਾ ਪਕ੍ਕਾਮਿ.

੩੨-੩. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪੂਜਿਤੋ ਅਹੋਸਿ. ਇਮਸ੍ਮਿਂ ਪਨ ਬੁਦ੍ਧੁਪ੍ਪਾਦੇ ਪਾਕਟੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਪਚ੍ਚਕ੍ਖਤੋ ਞਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਉਤ੍ਤਰਿਤ੍ਵਾਨ ਨਦਿਕਨ੍ਤਿਆਦਿਮਾਹ. ਤਤ੍ਥ ਨਦਤਿ ਸਦ੍ਦਂ ਕਰੋਤਿ ਗਚ੍ਛਤੀਤਿ ਨਦੀ, ਨਦੀਯੇਵ ਨਦਿਕਾ, ਤਂ ਨਦਿਕਂ ਉਤ੍ਤਰਿਤ੍ਵਾ ਅਤਿਕ੍ਕਮਿਤ੍ਵਾਤਿ ਅਤ੍ਥੋ. ਕੁਦਾਲਪਿਟਕਮਾਦਾਯਾਤਿ ਕੁ ਵੁਚ੍ਚਤਿ ਪਥਵੀ, ਤਂ ਵਿਦਾਲਨੇ ਪਦਾਲਨੇ ਛਿਨ੍ਦਨੇ ਅਲਨ੍ਤਿ ਕੁਦਾਲਂ, ਪਿਟਕਂ ਵੁਚ੍ਚਤਿ ਪਂਸੁਵਾਲਿਕਾਦਿਵਾਹਕਂ, ਤਾਲਪਣ੍ਣਵੇਤ੍ਤਲਤਾਦੀਹਿ ਕਤਭਾਜਨਂ, ਕੁਦਾਲਞ੍ਚ ਪਿਟਕਞ੍ਚ ਕੁਦਾਲਪਿਟਕਂ, ਤਂ ਆਦਾਯ ਗਹੇਤ੍ਵਾਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਮਗ੍ਗਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਫਲਕਦਾਯਕਤ੍ਥੇਰਅਪਦਾਨਵਣ੍ਣਨਾ

ਯਾਨਕਾਰੋ ਪੁਰੇ ਆਸਿਨ੍ਤਿਆਦਿਕਂ ਆਯਸ੍ਮਤੋ ਫਲਕਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਅਤ੍ਤਭਾਵੇਸੁ ਕਤਪੁਞ੍ਞਸਮ੍ਭਾਰੋ ਸਿਦ੍ਧਤ੍ਥਸ੍ਸ ਭਗਵਤੋ ਕਾਲੇ ਵਡ੍ਢਕਿਕੁਲੇ ਨਿਬ੍ਬਤ੍ਤੋ ਰਤਨਤ੍ਤਯੇ ਪਸਨ੍ਨੋ ਚਨ੍ਦਨੇਨ ਆਲਮ੍ਬਨਫਲਕਂ ਕਤ੍ਵਾ ਭਗਵਤੋ ਅਦਾਸਿ. ਭਗਵਾ ਤਸ੍ਸਾਨੁਮੋਦਨਂ ਅਕਾਸਿ.

੩੭. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਕਾਲੇ ਚਿਤ੍ਤਸੁਖਪੀਣਿਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸਞ੍ਜਾਤਪ੍ਪਸਾਦੋ ਪਬ੍ਬਜਿਤ੍ਵਾ ਵਾਯਮਨ੍ਤੋ ਨਚਿਰਸ੍ਸੇਵ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਯਾਨਕਾਰੋ ਪੁਰੇ ਆਸਿਨ੍ਤਿਆਦਿਮਾਹ. ਤਤ੍ਥ ਯਾਨਕਾਰੋਤਿ ਯਨ੍ਤਿ ਏਤੇਨ ਇਚ੍ਛਿਤਿਚ੍ਛਿਤਟ੍ਠਾਨਨ੍ਤਿ ਯਾਨਂ, ਤਂ ਕਰੋਤੀਤਿ ਯਾਨਕਾਰੋ, ਪੁਰੇ ਬੁਦ੍ਧਦਸ੍ਸਨਸਮਯੇ ਅਹਂ ਯਾਨਕਾਰੋ ਆਸਿਂ ਅਹੋਸਿਨ੍ਤਿ ਅਤ੍ਥੋ. ਚਨ੍ਦਨਂ ਫਲਕਂ ਕਤ੍ਵਾਤਿ ਚਨ੍ਦਤਿ ਪਰਿਲ਼ਾਹਂ ਵੂਪਸਮੇਤੀਤਿ ਚਨ੍ਦਨਂ. ਅਥ ਵਾ ਚਨ੍ਦਨ੍ਤਿ ਸੁਗਨ੍ਧਵਾਸਨਤ੍ਥਂ ਸਰੀਰਂ ਵਿਲਿਮ੍ਪਨ੍ਤਿ ਏਤੇਨਾਤਿ ਚਨ੍ਦਨਂ, ਤਂ ਆਲਮ੍ਬਨਫਲਕਂ ਕਤ੍ਵਾ. ਲੋਕਬਨ੍ਧੁਨੋਤਿ ਸਕਲਲੋਕਸ੍ਸ ਬਨ੍ਧੁ ਞਾਤਿਭੂਤੋਤਿ ਲੋਕਬਨ੍ਧੁ, ਤਸ੍ਸ ਲੋਕਬਨ੍ਧੁਨੋ ਸਤ੍ਥੁਸ੍ਸ ਅਦਾਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਫਲਕਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਵਟਂਸਕਿਯਤ੍ਥੇਰਅਪਦਾਨਵਣ੍ਣਨਾ

ਸੁਮੇਧੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਵਟਂਸਕਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਮੁਨਿਨ੍ਦੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸੁਮੇਧਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥ ਆਦੀਨਵਂ ਦਿਸ੍ਵਾ ਗੇਹਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਮਹਾਵਨੇ ਵਿਹਾਸਿ. ਤਸ੍ਮਿਂ ਸਮਯੇ ਸੁਮੇਧੋ ਭਗਵਾ ਵਿਵੇਕਕਾਮਤਾਯ ਤਂ ਵਨਂ ਸਮ੍ਪਾਪੁਣਿ. ਅਥ ਸੋ ਤਾਪਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਵਿਕਸਿਤਂ ਸਲ਼ਲਪੁਪ੍ਫਂ ਗਹੇਤ੍ਵਾ ਵਟਂਸਕਾਕਾਰੇਨ ਗਨ੍ਥੇਤ੍ਵਾ ਭਗਵਤੋ ਪਾਦਮੂਲੇ ਠਪੇਤ੍ਵਾ ਪੂਜੇਸਿ. ਭਗਵਾ ਤਸ੍ਸ ਚਿਤ੍ਤਪ੍ਪਸਾਦਤ੍ਥਾਯ ਅਨੁਮੋਦਨਮਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਕੁਲੇ ਜਾਤੋ ਵੁਦ੍ਧਿਮਨ੍ਵਾਯ ਸਦ੍ਧੋ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੩. ਸੋ ਅਪਰਭਾਗੇ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮੇਧੋ ਨਾਮ ਨਾਮੇਨਾਤਿਆਦਿ ਵੁਤ੍ਤਂ. ਵਿਵੇਕਮਨੁਬ੍ਰੂਹਨ੍ਤੋਤਿ ਜਨਾਕਿਣ੍ਣਤਂ ਪਹਾਯ ਜਨਵਿਵੇਕਂ ਚਿਤ੍ਤਵਿਵੇਕਞ੍ਚ ਅਨੁਬ੍ਰੂਹਨ੍ਤੋ ਵਡ੍ਢੇਨ੍ਤੋ ਬਹੁਲੀਕਰੋਨ੍ਤੋ ਮਹਾਵਨਂ ਅਜ੍ਝੋਗਾਹਿ ਪਾਵਿਸੀਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਵਟਂਸਕਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪਲ੍ਲਙ੍ਕਦਾਯਕਤ੍ਥੇਰਅਪਦਾਨਵਣ੍ਣਨਾ

ਸੁਮੇਧਸ੍ਸ ਭਗਵਤੋਤਿਆਦਿਕਂ ਆਯਸ੍ਮਤੋ ਪਲ੍ਲਙ੍ਕਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਨਿਬ੍ਬਾਨਾਧਿਗਮਤ੍ਥਾਯ ਕਤਪੁਞ੍ਞੂਪਚਯੋ ਸੁਮੇਧਸ੍ਸ ਭਗਵਤੋ ਕਾਲੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਮਹਾਭੋਗਸਮ੍ਪਨ੍ਨੋ ਸਤ੍ਥਰਿ ਪਸੀਦਿਤ੍ਵਾ ਧਮ੍ਮਂ ਸੁਤ੍ਵਾ ਤਸ੍ਸ ਸਤ੍ਥੁਨੋ ਸਤ੍ਤਰਤਨਮਯਂ ਪਲ੍ਲਙ੍ਕਂ ਕਾਰੇਤ੍ਵਾ ਮਹਨ੍ਤਂ ਪੂਜਂ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਸਬ੍ਬਤ੍ਥ ਪੂਜਿਤੋ ਅਹੋਸਿ. ਸੋ ਅਨੁਕ੍ਕਮੇਨ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਪੁਬ੍ਬੇ ਕਤਪੁਞ੍ਞਨਾਮੇਨ ਪਲ੍ਲਙ੍ਕਦਾਯਕਤ੍ਥੇਰੋਤਿ ਪਾਕਟੋ ਅਹੋਸਿ. ਹੇਟ੍ਠਾ ਵਿਯ ਉਪਰਿਪਿ ਪੁਬ੍ਬੇ ਕਤਪੁਞ੍ਞਨਾਮੇਨ ਥੇਰਾਨਂ ਨਾਮਾਨਿ ਏਵਮੇਵ ਵੇਦਿਤਬ੍ਬਾਨਿ.

੪੭. ਸੋ ਏਕਦਿਵਸਂ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਮੇਧਸ੍ਸ ਭਗਵਤੋਤਿਆਦਿਮਾਹ. ਪਲ੍ਲਙ੍ਕੋ ਹਿ ਮਯਾ ਦਿਨ੍ਨੋਤਿ ਪਲ੍ਲਙ੍ਕਂ ਊਰੁਬਦ੍ਧਾਸਨਂ ਕਤ੍ਵਾ ਯਤ੍ਥ ਉਪਵੀਸਨ੍ਤਿ ਨਿਸੀਦਨ੍ਤਿ, ਸੋ ਪਲ੍ਲਙ੍ਕੋਤਿ ਵੁਚ੍ਚਤਿ, ਸੋ ਪਲ੍ਲਙ੍ਕੋ ਸਤ੍ਤਰਤਨਮਯੋ ਮਯਾ ਦਿਨ੍ਨੋ ਪੂਜਿਤੋਤਿ ਅਤ੍ਥੋ. ਸਉਤ੍ਤਰਸਪਚ੍ਛਦੋਤਿ ਸਹ ਉਤ੍ਤਰਚ੍ਛਦੇਨ ਸਹ ਪਚ੍ਛਦੇਨ ਸਉਤ੍ਤਰਸਪਚ੍ਛਦੋ, ਉਪਰਿਵਿਤਾਨਂ ਬਨ੍ਧਿਤ੍ਵਾ ਆਸਨਂ ਉਤ੍ਤਮਵਤ੍ਥੇਹਿ ਅਚ੍ਛਾਦੇਤ੍ਵਾਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਪਲ੍ਲਙ੍ਕਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਪਨ੍ਨਰਸਮਵਗ੍ਗਵਣ੍ਣਨਾ ਸਮਤ੍ਤਾ.