੧੪. ਸੋਭਿਤਵਗ੍ਗੋ

੧. ਸੋਭਿਤਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਕਂ ਆਯਸ੍ਮਤੋ ਸੋਭਿਤਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਏਕਦਿਵਸਂ ਸਤ੍ਥਾਰਾ ਧਮ੍ਮੇ ਦੇਸਿਯਮਾਨੇ ਸੋਮਨਸ੍ਸੇਨ ਪਸਨ੍ਨਮਾਨਸੋ ਨਾਨਪ੍ਪਕਾਰੇਹਿ ਥੋਮੇਸਿ. ਸੋ ਤੇਨੇਵ ਸੋਮਨਸ੍ਸੇਨ ਕਾਲਂ ਕਤ੍ਵਾ ਦੇਵੇਸੁ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸੁਖਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਮਨੁਸ੍ਸਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਤਵਸ੍ਸਿਕੋਵ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਛਲ਼ਭਿਞ੍ਞੋ ਅਰਹਾ ਅਹੋਸਿ.

੧. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰੋ ਨਾਮ ਜਿਨੋਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.

ਸੋਭਿਤਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਸੁਦਸ੍ਸਨਤ੍ਥੇਰਅਪਦਾਨਵਣ੍ਣਨਾ

ਵਿਤ੍ਥਤਾਯ ਨਦੀਤੀਰੇਤਿਆਦਿਕਂ ਆਯਸ੍ਮਤੋ ਸੁਦਸ੍ਸਨਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਕਤਪੁਞ੍ਞੂਪਚਯੋ ਸਿਖਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਵਿਤ੍ਥਤਾਯ ਨਾਮ ਗਙ੍ਗਾਯ ਸਮੀਪੇ ਪਿਲਕ੍ਖੁਫਲਿਤਂ ਪਰਿਯੇਸਨ੍ਤੋ ਤਸ੍ਸਾ ਤੀਰੇ ਨਿਸਿਨ੍ਨਂ ਜਲਮਾਨਅਗ੍ਗਿਸਿਖਂ ਇਵ ਸਿਖਿਂ ਸਮ੍ਮਾਸਮ੍ਬੁਦ੍ਧਂ ਦਿਸ੍ਵਾ ਪਸਨ੍ਨਮਾਨਸੋ ਕੇਤਕੀਪੁਪ੍ਫਂ ਵਣ੍ਟੇਨੇਵ ਛਿਨ੍ਦਿਤ੍ਵਾ ਪੂਜੇਨ੍ਤੋ ਏਵਮਾਹ – ‘‘ਭਨ੍ਤੇ, ਯੇਨ ਞਾਣੇਨ ਤ੍ਵਂ ਏਵਂ ਮਹਾਨੁਭਾਵੋ ਸਬ੍ਬਞ੍ਞੁਬੁਦ੍ਧੋ ਜਾਤੋ, ਤਂ ਞਾਣਂ ਅਹਂ ਪੂਜੇਮੀ’’ਤਿ. ਅਥ ਭਗਵਾ ਅਨੁਮੋਦਨਮਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਜਾਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੦. ਸੋ ਅਤ੍ਤਨੋ ਕਤਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਤ੍ਥਤਾਯ ਨਦੀਤੀਰੇਤਿਆਦਿਮਾਹ. ਤਤ੍ਥ ਵਿਤ੍ਥਤਾਯਾਤਿ ਵਿਤ੍ਥਰਤਿ ਪਤ੍ਥਰਤਿ ਵਿਤ੍ਥਿਣ੍ਣਾ ਹੋਤੀਤਿ ਵਿਤ੍ਥਤਾ, ਨਦਨ੍ਤਿ ਸਦ੍ਦਂ ਕਰੋਨ੍ਤਿ ਇਤਾ ਗਤਾ ਪਵਤ੍ਤਾਤਿ ਨਦੀ, ਨਦਿਂ ਤਰਨ੍ਤਾ ਏਤਂ ਪਤ੍ਵਾ ਤਿਣ੍ਣਾ ਨਾਮ ਹੋਨ੍ਤੀਤਿ ਤੀਰਂ, ਤਸ੍ਸਾ ਵਿਤ੍ਥਤਾਯ ਨਦਿਯਾ ਤੀਰੇ ਤੀਰਸਮੀਪੇਤਿ ਅਤ੍ਥੋ. ਕੇਤਕਿਂ ਪੁਪ੍ਫਿਤਂ ਦਿਸ੍ਵਾਤਿ ਕੁਚ੍ਛਿਤਾਕਾਰੇਨ ਗਣ੍ਹਨ੍ਤਾਨਂ ਹਤ੍ਥਂ ਕਣ੍ਡਕੋ ਛਿਨ੍ਦਤਿ ਵਿਜ੍ਝਤੀਤਿ ਕੇਤਂ, ਕੇਤਸ੍ਸ ਏਸਾ ਕੇਤਕੀਪੁਪ੍ਫਂ, ਤਂ ਦਿਸ੍ਵਾ ਵਣ੍ਟਂ ਛਿਨ੍ਦਿਤ੍ਵਾਤਿ ਸਮ੍ਬਨ੍ਧੋ.

੧੧. ਸਿਖਿਨੋ ਲੋਕਬਨ੍ਧੁਨੋਤਿ ਸਿਖੀ ਵੁਚ੍ਚਤਿ ਅਗ੍ਗਿ, ਸਿਖੀਸਦਿਸਾ ਨੀਲਪੀਤਾਦਿਭੇਦਾ ਜਲਮਾਨਾ ਛਬ੍ਬਣ੍ਣਘਨਰਂਸਿਯੋ ਯਸ੍ਸ ਸੋ ਸਿਖੀ, ਲੋਕਸ੍ਸ ਸਕਲਲੋਕਤ੍ਤਯਸ੍ਸ ਬਨ੍ਧੁ ਞਾਤਕੋਤਿ ਲੋਕਬਨ੍ਧੁ, ਤਸ੍ਸ ਸਿਖਿਨੋ ਲੋਕਬਨ੍ਧੁਨੋ ਕੇਤਕੀਪੁਪ੍ਫਂ ਵਣ੍ਟੇ ਛਿਨ੍ਦਿਤ੍ਵਾ ਪੂਜੇਸਿਨ੍ਤਿ ਸਮ੍ਬਨ੍ਧੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸੁਦਸ੍ਸਨਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਚਨ੍ਦਨਪੂਜਨਕਤ੍ਥੇਰਅਪਦਾਨਵਣ੍ਣਨਾ

ਚਨ੍ਦਭਾਗਾਨਦੀਤੀਰੇਤਿਆਦਿਕਂ ਆਯਸ੍ਮਤੋ ਚਨ੍ਦਨਪੂਜਨਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਹਿਮਵਨ੍ਤੇ ਚਨ੍ਦਭਾਗਾਨਦਿਯਾ ਸਮੀਪੇ ਕਿਨ੍ਨਰਯੋਨਿਯਂ ਨਿਬ੍ਬਤ੍ਤੋ ਪੁਪ੍ਫਭਕ੍ਖੋ ਪੁਪ੍ਫਨਿਵਸਨੋ ਚਨ੍ਦਨਅਗਰੁਆਦੀਸੁ ਗਨ੍ਧਵਿਭੂਸਿਤੋ ਹਿਮਵਨ੍ਤੇ ਭੁਮ੍ਮਦੇਵਤਾ ਵਿਯ ਉਯ੍ਯਾਨਕੀਲ਼ਜਲਕੀਲ਼ਾਦਿਅਨੇਕਸੁਖਂ ਅਨੁਭਵਨ੍ਤੋ ਵਾਸਂ ਕਪ੍ਪੇਸਿ. ਤਦਾ ਅਤ੍ਥਦਸ੍ਸੀ ਭਗਵਾ ਤਸ੍ਸਾਨੁਕਮ੍ਪਾਯ ਹਿਮਵਨ੍ਤਂ ਗਨ੍ਤ੍ਵਾ ਆਕਾਸਤੋ ਓਰੁਯ੍ਹ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਨਿਸੀਦਿ. ਸੋ ਕਿਨ੍ਨਰੋ ਤਂ ਭਗਵਨ੍ਤਂ ਵਿਜ੍ਜੋਤਮਾਨਂ ਤਤ੍ਥ ਨਿਸਿਨ੍ਨਂ ਦਿਸ੍ਵਾ ਪਸਨ੍ਨਮਾਨਸੋ ਸੁਗਨ੍ਧਚਨ੍ਦਨੇਨ ਪੂਜੇਸਿ. ਤਸ੍ਸ ਭਗਵਾ ਅਨੁਮੋਦਨਂ ਅਕਾਸਿ.

੧੭. ਸੋ ਤੇਨ ਪੁਞ੍ਞੇਨ ਤੇਨ ਸੋਮਨਸ੍ਸੇਨ ਯਾਵਤਾਯੁਕਂ ਠਤ੍ਵਾ ਤਤੋ ਚੁਤੋ ਦੇਵਲੋਕੇ ਨਿਬ੍ਬਤ੍ਤੋ ਅਪਰਾਪਰਂ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚਕ੍ਕਵਤ੍ਤਿਰਜ੍ਜਪਦੇਸਰਜ੍ਜਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਚਨ੍ਦਭਾਗਾਨਦੀਤੀਰੇਤਿਆਦਿਮਾਹ. ਤਤ੍ਥ ਚਨ੍ਦਂ ਮਨਂ ਰੁਚਿਂ ਅਜ੍ਝਾਸਯਂ ਞਤ੍ਵਾ ਵਿਯ ਜਾਤੋਤਿ ਚਨ੍ਦੋ. ਚਨ੍ਦਮਣ੍ਡਲੇਨ ਪਸਨ੍ਨਨਿਮ੍ਮਲੋਦਕੇਨ ਉਭੋਸੁ ਪਸ੍ਸੇਸੁ ਮੁਤ੍ਤਾਦਲਸਦਿਸਸਨ੍ਥਰਧਵਲਪੁਲਿਨਤਲੇਨ ਚ ਸਮਨ੍ਨਾਗਤਤ੍ਤਾ ਚਨ੍ਦੇਨ ਭਾਗਾ ਸਦਿਸਾਤਿ ਚਨ੍ਦਭਾਗਾ, ਤਸ੍ਸਾ ਚਨ੍ਦਭਾਗਾਯ ਨਦਿਯਾ ਤੀਰੇ ਸਮੀਪੇਤਿ ਅਤ੍ਥੋ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.

ਚਨ੍ਦਨਪੂਜਨਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਅਟ੍ਠਮਭਾਣਵਾਰਵਣ੍ਣਨਾ ਸਮਤ੍ਤਾ.

੪. ਪੁਪ੍ਫਚ੍ਛਦਨਿਯਤ੍ਥੇਰਅਪਦਾਨਵਣ੍ਣਨਾ

ਸੁਨਨ੍ਦੋ ਨਾਮ ਨਾਮੇਨਾਤਿਆਦਿਕਂ ਆਯਸ੍ਮਤੋ ਪੁਪ੍ਫਚ੍ਛਦਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਮਹਾਭੋਗੋ ਮਹਾਯਸੋ ਦਾਨਾਭਿਰਤੋ ਅਹੋਸਿ. ਏਕਦਿਵਸਂ ਸੋ ‘‘ਸਕਲਜਮ੍ਬੁਦੀਪੇ ਇਮੇ ਯਾਚਕਾ ਨਾਮ ‘ਅਹਂ ਦਾਨਂ ਨ ਲਦ੍ਧੋਸ੍ਮੀ’ਤਿ ਵਤ੍ਤੁਂ ਮਾ ਲਭਨ੍ਤੂ’’ਤਿ ਮਹਾਦਾਨਂ ਸਜ੍ਜੇਸਿ. ਤਦਾ ਪਦੁਮੁਤ੍ਤਰੋ ਭਗਵਾ ਸਪਰਿਵਾਰੋ ਆਕਾਸੇਨ ਗਚ੍ਛਤਿ. ਬ੍ਰਾਹ੍ਮਣੋ ਤਂ ਦਿਸ੍ਵਾ ਪਸਨ੍ਨਚਿਤ੍ਤੋ ਸਕਸਿਸ੍ਸੇ ਪਕ੍ਕੋਸਾਪੇਤ੍ਵਾ ਪੁਪ੍ਫਾਨਿ ਆਹਰਾਪੇਤ੍ਵਾ ਆਕਾਸੇ ਉਕ੍ਖਿਪਿਤ੍ਵਾ ਪੂਜੇਸਿ. ਤਾਨਿ ਸਕਲਨਗਰਂ ਛਾਦੇਤ੍ਵਾ ਸਤ੍ਤ ਦਿਵਸਾਨਿ ਅਟ੍ਠਂਸੁ.

੨੬. ਸੋ ਤੇਨ ਪੁਞ੍ਞਕਮ੍ਮੇਨ ਦੇਵਮਨੁਸ੍ਸੇਸੁ ਸੁਖਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਨਨ੍ਦੋ ਨਾਮ ਨਾਮੇਨਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵਾਤਿ.

ਪੁਪ੍ਫਚ੍ਛਦਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਰਹੋਸਞ੍ਞਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਰਹੋਸਞ੍ਞਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਏਕਸ੍ਮਿਂ ਬੁਦ੍ਧਸੁਞ੍ਞਕਾਲੇ ਮਜ੍ਝਿਮਦੇਸੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਤਤ੍ਥ ਸਾਰਂ ਅਪਸ੍ਸਨ੍ਤੋ ਕੇਵਲਂ ਉਦਰਂ ਪੂਰੇਤ੍ਵਾ ਕੋਧਮਦਮਾਨਾਦਯੋ ਅਕੁਸਲੇਯੇਵ ਦਿਸ੍ਵਾ ਘਰਾਵਾਸਂ ਪਹਾਯ ਹਿਮਵਨ੍ਤਂ ਪਵਿਸਿਤ੍ਵਾ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਅਨੇਕਤਾਪਸਸਤਪਰਿਵਾਰੋ ਵਸਭਪਬ੍ਬਤਸਮੀਪੇ ਅਸ੍ਸਮਂ ਮਾਪੇਤ੍ਵਾ ਤੀਣਿ ਵਸ੍ਸਸਹਸ੍ਸਾਨਿ ਹਿਮਵਨ੍ਤੇਯੇਵ ਵਸਮਾਨੋ ‘‘ਅਹਂ ਏਤ੍ਤਕਾਨਂ ਸਿਸ੍ਸਾਨਂ ਆਚਰਿਯੋਤਿ ਸਮ੍ਮਤੋ ਗਰੁਟ੍ਠਾਨਿਯੋ ਗਰੁਕਾਤਬ੍ਬੋ ਵਨ੍ਦਨੀਯੋ, ਆਚਰਿਯੋ ਮੇ ਨਤ੍ਥੀ’’ਤਿ ਦੋਮਨਸ੍ਸਪ੍ਪਤ੍ਤੋ ਤੇ ਸਬ੍ਬੇ ਸਿਸ੍ਸੇ ਸਨ੍ਨਿਪਾਤੇਤ੍ਵਾ ਬੁਦ੍ਧਾਨਂ ਅਭਾਵੇ ਨਿਬ੍ਬਾਨਾਧਿਗਮਾਭਾਵਂ ਪਕਾਸੇਤ੍ਵਾ ਸਯਂ ਏਕਕੋ ਰਹੋ ਵਿਵੇਕਟ੍ਠਾਨੇਵ ਨਿਸਿਨ੍ਨੋ ਬੁਦ੍ਧਸ੍ਸ ਸਮ੍ਮੁਖਾ ਨਿਸਿਨ੍ਨੋ ਵਿਯ ਬੁਦ੍ਧਸਞ੍ਞਂ ਮਨਸਿ ਕਰਿਤ੍ਵਾ ਬੁਦ੍ਧਾਰਮ੍ਮਣਂ ਪੀਤਿਂ ਉਪ੍ਪਾਦੇਤ੍ਵਾ ਸਾਲਾਯਂ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਕਾਲਂ ਕਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ.

੩੪. ਸੋ ਤਤ੍ਥ ਝਾਨਸੁਖੇਨ ਚਿਰਂ ਵਸਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਕਾਮੇਸੁ ਅਨਲ੍ਲੀਨੋ ਸਤ੍ਤਵਸ੍ਸਿਕੋ ਪਬ੍ਬਜਿਤ੍ਵਾ ਖੁਰਗ੍ਗੇਯੇਵ ਅਰਹਤ੍ਤਂ ਪਤ੍ਵਾ ਛਲ਼ਭਿਞ੍ਞੋ ਹੁਤ੍ਵਾ ਪੁਬ੍ਬੇਨਿਵਾਸਞਾਣੇਨ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸਞ੍ਜਾਤਸੋਮਨਸ੍ਸੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਵਸਭੋ ਨਾਮ ਪਬ੍ਬਤੋਤਿ ਹਿਮਵਨ੍ਤਪਬ੍ਬਤਂ ਵਿਨਾ ਸੇਸਪਬ੍ਬਤਾਨਂ ਉਚ੍ਚਤਰਭਾਵੇਨ ਸੇਟ੍ਠਤਰਭਾਵੇਨ ਵਸਭੋਤਿ ਸਙ੍ਖਂ ਗਤੋ ਪਬ੍ਬਤੋਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਰਹੋਸਞ੍ਞਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਚਮ੍ਪਕਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਕਣਿਕਾਰਂਵ ਜੋਤਨ੍ਤਨ੍ਤਿਆਦਿਕਂ ਆਯਸ੍ਮਤੋ ਚਮ੍ਪਕਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵੇਸ੍ਸਭੁਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਵਾ ਤਤ੍ਥ ਸਾਰਂ ਅਪਸ੍ਸਨ੍ਤੋ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਵਨਨ੍ਤਰੇ ਵਸਨ੍ਤੋ ਵੇਸ੍ਸਭੁਂ ਭਗਵਨ੍ਤਂ ਉਦ੍ਦਿਸ੍ਸ ਸਿਸ੍ਸੇਹਿ ਆਨੀਤੇਹਿ ਚਮ੍ਪਕਪੁਪ੍ਫੇਹਿ ਪੂਜੇਸਿ. ਭਗਵਾ ਅਨੁਮੋਦਨਂ ਅਕਾਸਿ. ਸੋ ਤੇਨੇਵ ਕੁਸਲੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਾਪੁਣਿਤ੍ਵਾ ਪੁਬ੍ਬਵਾਸਨਾਬਲੇਨ ਘਰਾਵਾਸੇ ਅਨਲ੍ਲੀਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੪੧. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਪੁਞ੍ਞਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਕਣਿਕਾਰਂਵ ਜੋਤਨ੍ਤਨ੍ਤਿਆਦਿਮਾਹ. ਤਤ੍ਥ ਕਣਿਕਾਰਨ੍ਤਿ ਸਕਲਪਤ੍ਤਪਲਾਸਾਨਿ ਪਰਿਭਜ੍ਜ ਪਾਤੇਤ੍ਵਾ ਪੁਪ੍ਫਗਹਣਸਮਯੇ ਕਣ੍ਣਿਕਾਬਦ੍ਧੋ ਹੁਤ੍ਵਾ ਪੁਪ੍ਫਮਕੁਲ਼ਾਨਂ ਗਹਣਤੋ ਕਣ੍ਣਿਕਾਕਾਰੇਨ ਪਕਤੋਤਿ ਕਣਿਕਾਰੋ, ‘‘ਕਣ੍ਣਿਕਾਰੋ’’ਤਿ ਵਤ੍ਤਬ੍ਬੇ ਨਿਰੁਤ੍ਤਿਨਯੇਨ ਏਕਸ੍ਸ ਪੁਬ੍ਬ ਣ-ਕਾਰਸ੍ਸ ਲੋਪਂ ਕਤ੍ਵਾ ‘‘ਕਣਿਕਾਰ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਂ ਪੁਪ੍ਫਿਤਂ ਕਣਿਕਾਰਰੁਕ੍ਖਂ ਇਵ ਜੋਤਨ੍ਤਂ ਬੁਦ੍ਧਂ ਅਦ੍ਦਸਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਚਮ੍ਪਕਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਅਤ੍ਥਸਨ੍ਦਸ੍ਸਕਤ੍ਥੇਰਅਪਦਾਨਵਣ੍ਣਨਾ

ਵਿਸਾਲਮਾਲ਼ੇ ਆਸੀਨੋਤਿਆਦਿਕਂ ਆਯਸ੍ਮਤੋ ਅਤ੍ਥਸਨ੍ਦਸ੍ਸਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਅਤ੍ਤਭਾਵੇਸੁ ਕਤਪੁਞ੍ਞੂਪਚਯੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਸਕਸਿਪ੍ਪੇਸੁ ਨਿਪ੍ਫਤ੍ਤਿਂ ਪਤ੍ਤੋ ਤਤ੍ਥ ਸਾਰਂ ਅਪਸ੍ਸਨ੍ਤੋ ਗੇਹਂ ਪਹਾਯ ਹਿਮਵਨ੍ਤਂ ਗਨ੍ਤ੍ਵਾ ਰਮਣੀਯੇ ਠਾਨੇ ਪਣ੍ਣਸਾਲਂ ਕਤ੍ਵਾ ਪਟਿਵਸਤਿ, ਤਦਾ ਸਤ੍ਤਾਨੁਕਮ੍ਪਾਯ ਹਿਮਵਨ੍ਤਮਾਗਤਂ ਪਦੁਮੁਤ੍ਤਰਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਪਞ੍ਚਙ੍ਗਸਮਨ੍ਨਾਗਤੋ ਵਨ੍ਦਿਤ੍ਵਾ ਥੁਤਿਵਚਨੇਹਿ ਥੋਮੇਸਿ. ਸੋ ਤੇਨ ਪੁਞ੍ਞੇਨ ਯਾਵਤਾਯੁਕਂ ਕਤ੍ਵਾ ਕਾਲਙ੍ਕਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ. ਸੋ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਟਿਲਦ੍ਧਸਦ੍ਧੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ.

੪੭. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਵਿਸਾਲਮਾਲ਼ੇ ਆਸੀਨੋਤਿਆਦਿਮਾਹ. ਤਤ੍ਥ ਵਿਸਾਲਮਾਲ਼ੇਤਿ ਵਿਸਾਲਂ ਪਤ੍ਥਟਂ ਵਿਤ੍ਥਿਣ੍ਣਂ ਮਹਨ੍ਤਂ ਮਾਲ਼ਂ ਵਿਸਾਲਮਾਲ਼ਂ, ਤਸ੍ਮਿਂ ਵਿਸਾਲਮਾਲ਼ੇ ਆਸੀਨੋ ਨਿਸਿਨ੍ਨੋ ਅਹਂ ਲੋਕਨਾਯਕਂ ਅਦ੍ਦਸਨ੍ਤਿ ਸਮ੍ਬਨ੍ਧੋ. ਤੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਅਤ੍ਥਸਨ੍ਦਸ੍ਸਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਏਕਪਸਾਦਨਿਯਤ੍ਥੇਰਅਪਦਾਨਵਣ੍ਣਨਾ

ਨਾਰਦੋ ਇਤਿ ਮੇ ਨਾਮਨ੍ਤਿਆਦਿਕਂ ਆਯਸ੍ਮਤੋ ਏਕਪਸਾਦਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਕਤਕੁਸਲੋ ਅਤ੍ਥਦਸ੍ਸਿਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਕੇਸਵੋਤਿ ਪਾਕਟੋ ਹੁਤ੍ਵਾ ਵਿਞ੍ਞੁਤਂ ਪਤ੍ਵਾ ਘਰਾਵਾਸਂ ਪਹਾਯ ਪਬ੍ਬਜਿਤ੍ਵਾ ਵਸਨ੍ਤੋ ਏਕਦਿਵਸਂ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਪਸਨ੍ਨਮਾਨਸੋ ਅਞ੍ਜਲਿਂ ਪਗ੍ਗਯ੍ਹ ਅਤਿਵਿਯ ਪੀਤਿਸੋਮਨਸ੍ਸਜਾਤੋ ਪਕ੍ਕਾਮਿ. ਸੋ ਯਾਵਤਾਯੁਕਂ ਠਤ੍ਵਾ ਤੇਨੇਵ ਸੋਮਨਸ੍ਸੇਨ ਕਾਲਂ ਕਤ੍ਵਾ ਦੇਵੇਸੁ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਮਨੁਸ੍ਸੇਸੁ ਉਪ੍ਪਨ੍ਨੋ ਤਤ੍ਥ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਅਞ੍ਞਤਰਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਸਤ੍ਥਰਿ ਪਸੀਦਿਤ੍ਵਾ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੫੫. ਸੋ ਅਪਰਭਾਗੇ ਅਤ੍ਤਨੋ ਕਤਕੁਸਲਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਾਰਦੋ ਇਤਿ ਮੇ ਨਾਮਨ੍ਤਿਆਦਿਮਾਹ. ਤਤ੍ਥ ਨਾਰਦੋਤਿ ਜਾਤਿਵਸੇਨ ਸੁਦ੍ਧਸਰੀਰਤ੍ਤਾ ਨਤ੍ਥਿ ਰਜੋ ਧੂਲਿ ਮਲਂ ਏਤਸ੍ਸਾਤਿ ਨਾਰਦੋ, ਜ-ਕਾਰਸ੍ਸ ਦ-ਕਾਰਂ ਕਤ੍ਵਾ ਨਾਰਦੋਤਿ ਕੁਲਦਤ੍ਤਿਕਂ ਨਾਮਂ. ਕੇਸਵੋਤਿ ਕਿਸਵਚ੍ਛਗੋਤ੍ਤੇ ਜਾਤਤ੍ਤਾ ਕੇਸਵੋ ਨਾਰਦਕੇਸਵੋ ਇਤਿ ਮਂ ਜਨਾ ਵਿਦੂ ਜਾਨਨ੍ਤੀਤਿ ਅਤ੍ਥੋ. ਸੇਸਂ ਪਾਕਟਮੇਵਾਤਿ.

ਏਕਪਸਾਦਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਸਾਲਪੁਪ੍ਫਦਾਯਕਤ੍ਥੇਰਅਪਦਾਨਵਣ੍ਣਨਾ

ਮਿਗਰਾਜਾ ਤਦਾ ਆਸਿਨ੍ਤਿਆਦਿਕਂ ਆਯਸ੍ਮਤੋ ਸਾਲਪੁਪ੍ਫਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਕਤਕੁਸਲਸਞ੍ਚਯੋ ਕੇਨਚਿ ਕਮ੍ਮਚ੍ਛਿਦ੍ਦੇਨ ਹਿਮਵਨ੍ਤੇ ਸੀਹਯੋਨਿਯਂ ਨਿਬ੍ਬਤ੍ਤੋ ਅਨੇਕਸੀਹਪਰਿਵਾਰੋ ਵਿਹਾਸਿ. ਤਦਾ ਸਿਖੀ ਭਗਵਾ ਤਸ੍ਸਾਨੁਕਮ੍ਪਾਯ ਹਿਮਵਨ੍ਤਂ ਅਗਮਾਸਿ. ਸੀਹੋ ਤਂ ਉਪਗਤਂ ਦਿਸ੍ਵਾ ਪਸਨ੍ਨਮਾਨਸੋ ਸਾਖਾਭਙ੍ਗੇਨ ਸਕਣ੍ਣਿਕਸਾਲਪੁਪ੍ਫਂ ਗਹੇਤ੍ਵਾ ਪੂਜੇਸਿ. ਭਗਵਾ ਤਸ੍ਸ ਅਨੁਮੋਦਨਂ ਅਕਾਸਿ.

੬੦. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਤ੍ਤੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਮਿਗਰਾਜਾ ਤਦਾ ਆਸਿਨ੍ਤਿਆਦਿਮਾਹ. ਤਤ੍ਥ ਮਰਣਂ ਗਚ੍ਛਨ੍ਤੀਤਿ ਮਿਗਾ, ਅਥ ਵਾ ਘਾਸਂ ਮਗ੍ਗਨ੍ਤਿ ਗਵੇਸਨ੍ਤੀਤਿ ਮਿਗਾ, ਮਿਗਾਨਂ ਰਾਜਾ ਮਿਗਰਾਜਾ. ਸਕਲਚਤੁਪ੍ਪਦਾਨਂ ਰਾਜਭਾਵੇ ਸਤਿਪਿ ਗਾਥਾਬਨ੍ਧਸੁਖਤ੍ਥਂ ਮਿਗੇ ਆਦਿਂ ਕਤ੍ਵਾ ਮਿਗਰਾਜਾਤਿ ਵੁਤ੍ਤਂ. ਯਦਾ ਭਗਵਨ੍ਤਂ ਦਿਸ੍ਵਾ ਸਪੁਪ੍ਫਂ ਸਾਲਸਾਖਂ ਭਞ੍ਜਿਤ੍ਵਾ ਪੂਜੇਸਿਂ, ਤਦਾ ਅਹਂ ਮਿਗਰਾਜਾ ਅਹੋਸਿਨ੍ਤਿ ਅਤ੍ਥੋ.

੬੨. ਸਕੋਸਂ ਪੁਪ੍ਫਮਾਹਰਿਨ੍ਤਿ ਸਕਣ੍ਣਿਕਂ ਸਾਲਪੁਪ੍ਫਂ ਆਹਰਿਂ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਉਤ੍ਤਾਨਤ੍ਥਮੇਵਾਤਿ.

ਸਾਲਪੁਪ੍ਫਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪਿਯਾਲਫਲਦਾਯਕਤ੍ਥੇਰਅਪਦਾਨਵਣ੍ਣਨਾ

ਪਰੋਧਕੋ ਤਦਾ ਆਸਿਨ੍ਤਿਆਦਿਕਂ ਆਯਸ੍ਮਤੋ ਪਿਯਾਲਫਲਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਸਿਖਿਸ੍ਸ ਭਗਵਤੋ ਕਾਲੇ ਨੇਸਾਦਕੁਲੇ ਨਿਬ੍ਬਤ੍ਤੋ ਹਿਮਵਨ੍ਤੇ ਏਕਸ੍ਮਿਂ ਪਬ੍ਭਾਰੇ ਮਿਗੇ ਵਧਿਤ੍ਵਾ ਜੀਵਿਕਂ ਕਪ੍ਪੇਤ੍ਵਾ ਵਸਤਿ. ਤਸ੍ਮਿਂ ਕਾਲੇ ਤਤ੍ਥ ਗਤਂ ਸਿਖਿਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸਾਯਂ ਪਾਤਂ ਨਮਸ੍ਸਮਾਨੋ ਕਞ੍ਚਿ ਦੇਯ੍ਯਧਮ੍ਮਂ ਅਪਸ੍ਸਨ੍ਤੋ ਮਧੁਰਾਨਿ ਪਿਯਾਲਫਲਾਨਿ ਉਚ੍ਚਿਨਿਤ੍ਵਾ ਅਦਾਸਿ. ਭਗਵਾ ਤਾਨਿ ਪਰਿਭੁਞ੍ਜਿ. ਸੋ ਨੇਸਾਦੋ ਬੁਦ੍ਧਾਰਮ੍ਮਣਾਯ ਪੀਤਿਯਾ ਨਿਰਨ੍ਤਰਂ ਫੁਟ੍ਠਸਰੀਰੋ ਪਾਪਕਮ੍ਮੇ ਵਿਰਤ੍ਤਚਿਤ੍ਤੋ ਮੂਲਫਲਾਹਾਰੋ ਨਚਿਰਸ੍ਸੇਵ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ.

੬੬. ਸੋ ਤਤ੍ਥ ਦਿਬ੍ਬਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਅਨੇਕਵਿਧਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਗਹਪਤਿਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਤਤ੍ਥ ਅਨਭਿਰਤੋ ਗੇਹਂ ਪਹਾਯ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ ਅਤ੍ਤਨੋ ਕਤਫਲਦਾਨਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਰੋਧਕੋ ਤਦਾ ਆਸਿਨ੍ਤਿਆਦਿਮਾਹ. ਤਤ੍ਥ ਯਦਾ ਅਹਂ ਪਿਯਾਲਫਲਂ ਦਤ੍ਵਾ ਚਿਤ੍ਤਂ ਪਸਾਦੇਸਿਂ, ਤਦਾ ਅਹਂ ਪਰੋਧਕੋ ਆਸਿਨ੍ਤਿ ਸਮ੍ਬਨ੍ਧੋ. ਪਰੋਧਕੋਤਿ ਪਰਸਤ੍ਤਰੋਧਕੋ ਵਿਹੇਸਕੋ. ‘‘ਪਰਰੋਧਕੋ’’ਤਿ ਵਤ੍ਤਬ੍ਬੇ ਪੁਬ੍ਬਸ੍ਸ ਰ-ਕਾਰਸ੍ਸ ਲੋਪਂ ਕਤ੍ਵਾ ‘‘ਪਰੋਧਕੋ’’ਤਿ ਵੁਤ੍ਤਂ.

੬੯. ਪਰਿਚਾਰਿਂ ਵਿਨਾਯਕਨ੍ਤਿ ਤਂ ਨਿਬ੍ਬਾਨਪਾਪਕਂ ਸਤ੍ਥਾਰਂ, ‘‘ਭਨ੍ਤੇ, ਇਮਂ ਫਲਂ ਪਰਿਭੁਞ੍ਜਥਾ’’ਤਿ ਪਵਾਰਿਂ ਨਿਮਨ੍ਤੇਸਿਂ ਆਰਾਧੇਸਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਪਿਯਾਲਫਲਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਚੁਦ੍ਦਸਮਵਗ੍ਗਵਣ੍ਣਨਾ ਸਮਤ੍ਤਾ.