੧੩. ਸੇਰੇਯ੍ਯਵਗ੍ਗੋ

੧. ਸੇਰੇਯ੍ਯਕਤ੍ਥੇਰਅਪਦਾਨਵਣ੍ਣਨਾ

ਅਜ੍ਝਾਯਕੋ ਮਨ੍ਤਧਰੋਤਿਆਦਿਕਂ ਆਯਸ੍ਮਤੋ ਸੇਰੇਯ੍ਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤੋ ਪਰੇਸੁ ਅਤ੍ਤਭਾਵਸਹਸ੍ਸੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਤਿਣ੍ਣਂ ਵੇਦਾਨਂ ਪਾਰਂ ਗਨ੍ਤ੍ਵਾ ਇਤਿਹਾਸਾਦਿਸਕਲਬ੍ਰਾਹ੍ਮਣਧਮ੍ਮੇਸੁ ਕੋਟਿਪ੍ਪਤ੍ਤੋ ਏਕਸ੍ਮਿਂ ਦਿਵਸੇ ਅਬ੍ਭੋਕਾਸੇ ਸਪਰਿਵਾਰੋ ਠਿਤੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸੇਰੇਯ੍ਯਪੁਪ੍ਫਂ ਗਹੇਤ੍ਵਾ ਆਕਾਸੇ ਖਿਪਨ੍ਤੋ ਪੂਜੇਸਿ. ਤਾਨਿ ਪੁਪ੍ਫਾਨਿ ਆਕਾਸੇ ਵਿਤਾਨਂ ਹੁਤ੍ਵਾ ਸਤ੍ਤਾਹਂ ਠਤ੍ਵਾ ਪਚ੍ਛਾ ਅਨ੍ਤਰਧਾਯਿਂਸੁ. ਸੋ ਤਂ ਅਚ੍ਛਰਿਯਂ ਦਿਸ੍ਵਾ ਅਤੀਵ ਪਸਨ੍ਨਮਾਨਸੋ ਤੇਨੇਵ ਪੀਤਿਸੋਮਨਸ੍ਸੇਨ ਕਾਲਂ ਕਤ੍ਵਾ ਤੁਸਿਤਾਦੀਸੁ ਨਿਬ੍ਬਤ੍ਤੋ ਤਤ੍ਥ ਦਿਬ੍ਬਸੁਖਮਨੁਭਵਿਤ੍ਵਾ ਤਤੋ ਮਨੁਸ੍ਸਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਾਪੁਣਿਤ੍ਵਾ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧. ਸੋ ਅਪਰਭਾਗੇ ਪੁਰਾਕਤਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਜ੍ਝਾਯਕੋ ਮਨ੍ਤਧਰੋਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ.

੩. ਸੇਰੇਯ੍ਯਕਂ ਗਹੇਤ੍ਵਾਨਾਤਿ ਸਿਰਿਸੇ ਭਵਂ ਜਾਤਿਪੁਪ੍ਫਂ ਸੇਰੇਯ੍ਯਂ, ਸੇਰੇਯ੍ਯਮੇਵ ਸੇਰੇਯ੍ਯਕਂ, ਤਂ ਸੇਰੇਯ੍ਯਕਂ ਗਹੇਤ੍ਵਾਨਾਤਿ ਸਮ੍ਬਨ੍ਧੋ. ਭਗਵਤਿ ਪਸਨ੍ਨੋ ਜਾਤਿਸੁਮਨਮਕੁਲ਼ਚਮ੍ਪਕਾਦੀਨਿ ਪੁਪ੍ਫਾਨਿ ਪਤਿਟ੍ਠਪੇਤ੍ਵਾ ਪੂਜੇਤੁਂ ਕਾਲਂ ਨਤ੍ਥਿਤਾਯ ਤਤ੍ਥ ਸਮ੍ਪਤ੍ਤਂ ਤਂ ਸੇਰੇਯ੍ਯਕਂ ਪੁਪ੍ਫਂ ਗਹੇਤ੍ਵਾ ਪੂਜੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਸੇਰੇਯ੍ਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੨. ਪੁਪ੍ਫਥੂਪਿਯਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਪੁਪ੍ਫਥੂਪਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਬੁਦ੍ਧਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਤਤ੍ਥ ਸਾਰਂ ਅਪਸ੍ਸਨ੍ਤੋ ਗੇਹਂ ਪਹਾਯ ਹਿਮਵਨ੍ਤਂ ਪਵਿਸਿਤ੍ਵਾ ਅਤ੍ਤਨਾ ਸਹਗਤੇਹਿ ਪਞ੍ਚਸਿਸ੍ਸਸਹਸ੍ਸੇਹਿ ਸਦ੍ਧਿਂ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਕੁਕ੍ਕੁਰਨਾਮਪਬ੍ਬਤਸਮੀਪੇ ਪਣ੍ਣਸਾਲਂ ਕਾਰੇਤ੍ਵਾ ਪਟਿਵਸਤਿ. ਤਦਾ ਬੁਦ੍ਧੁਪ੍ਪਾਦਭਾਵਂ ਸੁਤ੍ਵਾ ਸਿਸ੍ਸੇਹਿ ਸਹ ਬੁਦ੍ਧਸ੍ਸ ਸਨ੍ਤਿਕਂ ਗਨ੍ਤੁਕਾਮੋ ਕੇਨਚਿ ਬ੍ਯਾਧਿਨਾ ਪੀਲ਼ਿਤੋ ਪਣ੍ਣਸਾਲਂ ਪਵਿਸਿਤ੍ਵਾ ਸਿਸ੍ਸਸਨ੍ਤਿਕਾ ਬੁਦ੍ਧਸ੍ਸਾਨੁਭਾਵਂ ਲਕ੍ਖਣਞ੍ਚ ਸੁਤ੍ਵਾ ਪਸਨ੍ਨਮਾਨਸੋ ਹਿਮਵਨ੍ਤਤੋ ਚਮ੍ਪਕਾਸੋਕਤਿਲਕਕੇਟਕਾਦ੍ਯਨੇਕੇ ਪੁਪ੍ਫੇ ਆਹਰਾਪੇਤ੍ਵਾ ਥੂਪਂ ਕਤ੍ਵਾ ਬੁਦ੍ਧਂ ਵਿਯ ਪੂਜੇਤ੍ਵਾ ਕਾਲਂ ਕਤ੍ਵਾ ਬ੍ਰਹ੍ਮਲੋਕੂਪਗੋ ਅਹੋਸਿ. ਅਥ ਤੇ ਸਿਸ੍ਸਾ ਤਸ੍ਸ ਆਲ਼ਹਨਂ ਕਤ੍ਵਾ ਬੁਦ੍ਧਸਨ੍ਤਿਕਂ ਗਨ੍ਤ੍ਵਾ ਤਂ ਪਵਤ੍ਤਿਂ ਆਰੋਚੇਸੁਂ. ਅਥ ਭਗਵਾ ਬੁਦ੍ਧਚਕ੍ਖੁਨਾ ਓਲੋਕੇਤ੍ਵਾ ਅਨਾਗਤਂਸਞਾਣੇਨ ਪਾਕਟੀਕਰਣਮਕਾਸਿ. ਸੋ ਅਪਰਭਾਗੇ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੧੦. ਅਥ ਸੋ ਅਤ੍ਤਨੋ ਪੁਬ੍ਬਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਤ੍ਥਮੇਵ. ਕੁਕ੍ਕੁਰੋ ਨਾਮ ਪਬ੍ਬਤੋਤਿ ਪਬ੍ਬਤਸ੍ਸ ਸਿਖਰਂ ਕੁਕ੍ਕੁਰਾਕਾਰੇਨ ਸੁਨਖਾਕਾਰੇਨ ਸਣ੍ਠਿਤਤ੍ਤਾ ‘‘ਕੁਕ੍ਕੁਰਪਬ੍ਬਤੋ’’ਤਿ ਸਙ੍ਖ੍ਯਂ ਗਤੋ, ਤਸ੍ਸ ਸਮੀਪੇ ਪਣ੍ਣਸਾਲਂ ਕਤ੍ਵਾ ਪਞ੍ਚਤਾਪਸਸਹਸ੍ਸੇਹਿ ਸਹ ਵਸਮਾਨੋਤਿ ਅਤ੍ਥੋ. ਨਯਾਨੁਸਾਰੇਨ ਸੇਸਂ ਸਬ੍ਬਂ ਉਤ੍ਤਾਨਤ੍ਥਮੇਵਾਤਿ.

ਪੁਪ੍ਫਥੂਪਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੩. ਪਾਯਸਦਾਯਕਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋਤਿਆਦਿਕਂ ਆਯਸ੍ਮਤੋ ਪਾਯਸਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਵਿਭਵਸਮ੍ਪਨ੍ਨੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਘਰਾਵਾਸਂ ਵਸਨ੍ਤੋ ਹਤ੍ਥਿਅਸ੍ਸਧਨਧਞ੍ਞਸਤ੍ਤਰਤਨਾਦਿਵਿਭਵਸਮ੍ਪਨ੍ਨੋ ਸਦ੍ਧਾਸਮ੍ਪਨ੍ਨੋ ਕਮ੍ਮਫਲਂ ਸਦ੍ਦਹਿਤ੍ਵਾ ਸਹਸ੍ਸਮਤ੍ਤਾ ਸੁਵਣ੍ਣਪਾਤਿਯੋ ਕਾਰੇਤ੍ਵਾ ਤਸ੍ਮਿਂ ਖੀਰਪਾਯਸਸਹਸ੍ਸਸ੍ਸ ਪੂਰੇਤ੍ਵਾ ਤਾ ਸਬ੍ਬਾ ਗਾਹਾਪੇਤ੍ਵਾ ਸਿਮ੍ਬਲਿਵਨਂ ਅਗਮਾਸਿ. ਤਸ੍ਮਿਂ ਸਮਯੇ ਵਿਪਸ੍ਸੀ ਭਗਵਾ ਛਬ੍ਬਣ੍ਣਰਂਸਿਯੋ ਵਿਸ੍ਸਜ੍ਜੇਤ੍ਵਾ ਆਕਾਸੇ ਚਙ੍ਕਮਂ ਮਾਪੇਤ੍ਵਾ ਚਙ੍ਕਮਤਿ. ਸੋ ਪਨ ਸੇਟ੍ਠਿ ਤਂ ਅਚ੍ਛਰਿਯਂ ਦਿਸ੍ਵਾ ਅਤੀਵ ਪਸਨ੍ਨੋ ਪਾਤਿਯੋ ਠਪੇਤ੍ਵਾ ਵਨ੍ਦਿਤ੍ਵਾ ਆਰੋਚੇਸਿ ਪਟਿਗ੍ਗਹਣਾਯ. ਅਥ ਭਗਵਾ ਅਨੁਕਮ੍ਪਂ ਉਪਾਦਾਯ ਪਟਿਗ੍ਗਹੇਸਿ, ਪਟਿਗ੍ਗਹੇਤ੍ਵਾ ਚ ਪਨ ਤਸ੍ਸ ਸੋਮਨੁਸ੍ਸੁਪ੍ਪਾਦਨਤ੍ਥਂ ਸਹਸ੍ਸਮਤ੍ਤੇਹਿ ਭਿਕ੍ਖੁਸਙ੍ਘੇਹਿ ਸਦ੍ਧਿਂ ਪਰਿਭੁਞ੍ਜਿ, ਤਦਵਸੇਸਂ ਅਨੇਕਸਹਸ੍ਸਭਿਕ੍ਖੂ ਪਰਿਭੁਞ੍ਜਿਂਸੁ. ਸੋ ਤੇਨ ਪੁਞ੍ਞੇਨ ਸੁਗਤੀਸੁਯੇਵ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੨੬. ਸੋ ਅਪਰਭਾਗੇ ਅਤ੍ਤਨੋ ਕੁਸਲਂ ਪਚ੍ਚਵੇਕ੍ਖਮਾਨੋ ਤਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਮੇਵ.

੨੮. ਚਙ੍ਕਮਂ ਸੁਸਮਾਰੂਲ਼੍ਹੋਤਿ ਚਦਿਨਨ੍ਤੋ ਪਦਵਿਕ੍ਖੇਪਂ ਕਰੋਨ੍ਤੋ ਕਮਤਿ ਗਚ੍ਛਤੀਤਿ ਚਙ੍ਕਮਂ, ਚਙ੍ਕਮਸ੍ਸ ਪਦਵਿਕ੍ਖੇਪਸ੍ਸ ਆਧਾਰਭੂਤਪਥਵਿਪਦੇਸੋ ਚਙ੍ਕਮਂ ਨਾਮਾਤਿ ਅਤ੍ਥੋ, ਏਤਂ ਚਙ੍ਕਮਂਸੁ ਵਿਸੇਸੇਨ ਆਰੂਲ਼੍ਹੋਤਿ ਸਮ੍ਬਨ੍ਧੋ. ਅਮ੍ਬਰੇ ਅਨਿਲਾਯਨੇਤਿ ਵਰੀਯਤਿ ਛਾਦਿਯਤਿ ਅਨੇਨਾਤਿ ਵਰਂ, ਨ ਬਰਨ੍ਤਿ ਅਮ੍ਬਰਂ, ਸੇਤਵਤ੍ਥਸਦਿਸਂ ਆਕਾਸਨ੍ਤਿ ਅਤ੍ਥੋ. ਨਤ੍ਥਿ ਨਿਲੀਯਨਂ ਗੋਪਨਂ ਏਤ੍ਥਾਤਿ ਅਨਿਲਂ, ਆ ਸਮਨ੍ਤਤੋ ਯਨ੍ਤਿ ਗਚ੍ਛਨ੍ਤਿ ਅਨੇਨ ਇਦ੍ਧਿਮਨ੍ਤੋਤਿ ਆਯਨਂ, ਅਨਿਲਞ੍ਚ ਤਂ ਆਯਨਞ੍ਚੇਤਿ ਅਨਿਲਾਯਨਂ, ਤਸ੍ਮਿਂ ਅਮ੍ਬਰੇ ਅਨਿਲਾਯਨੇ ਚਙ੍ਕਮਂ ਮਾਪਯਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਾਯਸਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੪. ਗਨ੍ਧੋਦਕਿਯਤ੍ਥੇਰਅਪਦਾਨਵਣ੍ਣਨਾ

ਨਿਸਜ੍ਜ ਪਾਸਾਦਵਰੇਤਿਆਦਿਕਂ ਆਯਸ੍ਮਤੋ ਗਨ੍ਧੋਦਕਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਨਿਬ੍ਬਾਨੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸੀਭਗਵਤੋ ਕਾਲੇ ਸੇਟ੍ਠਿਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਮਹਦ੍ਧਨੋ ਮਹਾਭੋਗੋ ਦਿਬ੍ਬਸੁਖਮਨੁਭਵਨ੍ਤੋ ਵਿਯ ਮਨੁਸ੍ਸਸੁਖਮਨੁਭਵਨ੍ਤੋ ਏਕਸ੍ਮਿਂ ਦਿਵਸੇ ਪਾਸਾਦਵਰੇ ਨਿਸਿਨ੍ਨੋ ਹੋਤਿ. ਤਦਾ ਭਗਵਾ ਸੁਵਣ੍ਣਮਹਾਮੇਰੁ ਵਿਯ ਵੀਥਿਯਾ ਵਿਚਰਤਿ, ਤਂ ਵਿਚਰਮਾਨਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਗਨ੍ਤ੍ਵਾ ਵਨ੍ਦਿਤ੍ਵਾ ਸੁਗਨ੍ਧੋਦਕੇਨ ਭਗਵਨ੍ਤਂ ਓਸਿਞ੍ਚਮਾਨੋ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਘਰਾਵਾਸੇਨ ਅਨਲ੍ਲੀਨੋ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਕਮ੍ਮਟ੍ਠਾਨਂ ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੫. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕੁਸਲਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਿਸਜ੍ਜ ਪਾਸਾਦਵਰੇਤਿਆਦਿਮਾਹ. ਤਤ੍ਥ ਪਾਸਾਦੋਤਿ ਪਸਾਦਂ ਸੋਮਨਸ੍ਸਂ ਜਨੇਤਿ ਉਪ੍ਪਾਦੇਤੀਤਿ ਪਾਸਾਦੋ, ਮਾਲਾਕਮ੍ਮਚਿਤ੍ਤਕਮ੍ਮਸੁਵਣ੍ਣਕਮ੍ਮਾਦ੍ਯਨੇਕਵਿਚਿਤ੍ਤਂ ਦਿਸ੍ਵਾ ਤਤ੍ਥ ਪਵਿਟ੍ਠਾਨਂ ਜਨਾਨਂ ਪਸਾਦਂ ਜਨਯਤੀਤਿ ਅਤ੍ਥੋ. ਪਾਸਾਦੋ ਚ ਸੋ ਪਤ੍ਥੇਤਬ੍ਬਟ੍ਠੇਨ ਵਰੋ ਚਾਤਿ ਪਾਸਾਦਵਰੋ, ਤਸ੍ਮਿਂ ਪਾਸਾਦਵਰੇ ਨਿਸਜ੍ਜ ਨਿਸੀਦਿਤ੍ਵਾ ਵਿਪਸ੍ਸਿਂ ਜਿਨਵਰਂ ਅਦ੍ਦਸਨ੍ਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਗਨ੍ਧੋਦਕਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੫. ਸਮ੍ਮੁਖਾਥਵਿਕਤ੍ਥੇਰਅਪਦਾਨਵਣ੍ਣਨਾ

ਜਾਯਮਾਨੇ ਵਿਪਸ੍ਸਿਮ੍ਹੀਤਿਆਦਿਕਂ ਆਯਸ੍ਮਤੋ ਸਮ੍ਮੁਖਾਥਵਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਸਤ੍ਤਵਸ੍ਸਿਕਕਾਲੇਯੇਵ ਸਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਵਸਨ੍ਤੋ ਵਿਪਸ੍ਸਿਮ੍ਹਿ ਬੋਧਿਸਤ੍ਤੇ ਉਪ੍ਪਨ੍ਨੇ ਸਬ੍ਬਬੁਦ੍ਧਾਨਂ ਲਕ੍ਖਣਾਨਿ ਵੇਦਤ੍ਤਯੇ ਦਿਸ੍ਸਮਾਨਾਨਿ ਤਾਨਿ ਰਾਜਪ੍ਪਮੁਖਸ੍ਸ ਜਨਕਾਯਸ੍ਸ ਵਿਪਸ੍ਸੀਬੋਧਿਸਤ੍ਤਸ੍ਸ ਲਕ੍ਖਣਞ੍ਚ ਬੁਦ੍ਧਭਾਵਞ੍ਚ ਬ੍ਯਾਕਰਿਤ੍ਵਾ ਜਨਾਨਂ ਮਾਨਸਂ ਨਿਬ੍ਬਾਪੇਸਿ, ਅਨੇਕਾਨਿ ਚ ਥੁਤਿਵਚਨਾਨਿ ਨਿਵੇਦੇਸਿ. ਸੋ ਤੇਨ ਕੁਸਲਕਮ੍ਮੇਨ ਛ ਕਾਮਾਵਚਰਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਮਨੁਸ੍ਸੇਸੁ ਚ ਚਕ੍ਕਵਤ੍ਤਿਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ. ਕਤਕੁਸਲਨਾਮੇਨ ਸਮ੍ਮੁਖਾਥਵਿਕਤ੍ਥੇਰੋਤਿ ਪਾਕਟੋ.

੪੧. ਸੋ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਜਾਯਮਾਨੇ ਵਿਪਸ੍ਸਿਮ੍ਹੀਤਿਆਦਿਮਾਹ. ਵਿਪਸ੍ਸਿਮ੍ਹਿ ਸਮ੍ਮਾਸਮ੍ਬੁਦ੍ਧੇ ਜਾਯਮਾਨੇ ਉਪ੍ਪਜ੍ਜਮਾਨੇ ਮਾਤੁਕੁਚ੍ਛਿਤੋ ਨਿਕ੍ਖਨ੍ਤੇ ਅਹਂ ਪਾਤੁਭੂਤਂ ਨਿਮਿਤ੍ਤਂ ਕਾਰਣਂ ਬੁਦ੍ਧਭਾਵਸ੍ਸ ਹੇਤੁਂ ਬ੍ਯਾਕਰਿਂ ਕਥੇਸਿਂ, ਅਨੇਕਾਨਿ ਅਚ੍ਛਰਿਯਾਨਿ ਪਾਕਟਾਨਿ ਅਕਾਸਿਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਾਨੁਸਾਰੇਨ ਸੁਵਿਞ੍ਞੇਯ੍ਯਮੇਵਾਤਿ.

ਸਮ੍ਮੁਖਾਥਵਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੬. ਕੁਸੁਮਾਸਨਿਯਤ੍ਥੇਰਅਪਦਾਨਵਣ੍ਣਨਾ

ਨਗਰੇ ਧਞ੍ਞਵਤਿਯਾਤਿਆਦਿਕਂ ਆਯਸ੍ਮਤੋ ਕੁਸੁਮਾਸਨਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਮਹਦ੍ਧਨੋ ਮਹਾਭੋਗੋ ਤਿਣ੍ਣਂ ਵੇਦਾਨਂ ਪਾਰਂ ਗਤੋ ਬ੍ਰਾਹ੍ਮਣਸਿਪ੍ਪੇਸੁ ਕੋਟਿਪ੍ਪਤ੍ਤੋ ਸਕਪਰਸਮਯਕੁਸਲੋ ਮਾਤਾਪਿਤਰੋ ਪੂਜੇਤੁਕਾਮੋ ਪਞ੍ਚ ਉਪ੍ਪਲਕਲਾਪੇ ਅਤ੍ਤਨੋ ਸਮੀਪੇ ਠਪੇਤ੍ਵਾ ਨਿਸਿਨ੍ਨੋ ਭਿਕ੍ਖੁਸਙ੍ਘਪਰਿਵੁਤਂ ਵਿਪਸ੍ਸਿਂ ਭਗਵਨ੍ਤਂ ਆਗਚ੍ਛਨ੍ਤਂ ਦਿਸ੍ਵਾ ਨੀਲਪੀਤਾਦਿਘਨਬੁਦ੍ਧਰਸ੍ਮਿਯੋ ਚ ਦਿਸ੍ਵਾ ਪਸਨ੍ਨਮਾਨਸੋ ਆਸਨਂ ਪਞ੍ਞਾਪੇਤ੍ਵਾ ਤਤ੍ਥ ਤਾਨਿ ਪੁਪ੍ਫਾਨਿ ਸਨ੍ਥਰਿਤ੍ਵਾ ਭਗਵਨ੍ਤਂ ਤਤ੍ਥ ਨਿਸੀਦਾਪੇਤ੍ਵਾ ਸਕਘਰੇ ਮਾਤੁ ਅਤ੍ਥਾਯ ਪਟਿਯਤ੍ਤਾਨਿ ਸਬ੍ਬਾਨਿ ਖਾਦਨੀਯਭੋਜਨੀਯਾਨਿ ਗਹੇਤ੍ਵਾ ਸਪਰਿਵਾਰਂ ਭਗਵਨ੍ਤਂ ਸਹਤ੍ਥੇਨ ਸਨ੍ਤਪ੍ਪੇਨ੍ਤੋ ਭੋਜੇਸਿ. ਭੋਜਨਾਵਸਾਨੇ ਏਕਂ ਉਪ੍ਪਲਹਤ੍ਥਂ ਅਦਾਸਿ. ਤੇਨ ਸੋਮਨਸ੍ਸਜਾਤੋ ਪਤ੍ਥਨਂ ਅਕਾਸਿ. ਭਗਵਾਪਿ ਅਨੁਮੋਦਨਂ ਕਤ੍ਵਾ ਪਕਾਮਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਦ੍ਵੇ ਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਤੋ ਭੋਗਯਸੇਹਿ ਵਡ੍ਢਿਤੋ ਕਾਮੇਸੁ ਆਦੀਨਵਂ ਦਿਸ੍ਵਾ ਘਰਾਵਾਸਂ ਪਹਾਯ ਪਬ੍ਬਜਿਤੋ ਨਚਿਰਸ੍ਸੇਵ ਅਰਹਾ ਅਹੋਸਿ.

੬੫. ਸੋ ਅਪਰਭਾਗੇ ਪੁਬ੍ਬੇ ਕਤਕੁਸਲਂ ਪੁਬ੍ਬੇਨਿਵਾਸਞਾਣੇਨ ਸਰਿਤ੍ਵਾ ਸੋਮਨਸ੍ਸਪ੍ਪਤ੍ਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਨਗਰੇ ਧਞ੍ਞਵਤਿਯਾਤਿਆਦਿਮਾਹ. ਧਞ੍ਞਾਨਂ ਪੁਞ੍ਞਵਨ੍ਤਾਨਂ ਖਤ੍ਤਿਯਬ੍ਰਾਹ੍ਮਣਗਹਪਤਿਮਹਾਸਾਲਾਨਂ ਅਨੇਕੇਸਂ ਕੁਲਾਨਂ ਆਕਰਤ੍ਤਾ ਧਞ੍ਞਵਤੀ, ਅਥ ਵਾ ਮੁਤ੍ਤਾਮਣਿਆਦਿਸਤ੍ਤਰਤਨਾਨਂ ਸਤ੍ਤਵਿਧਧਞ੍ਞਾਨਂ ਉਪਭੋਗਪਰਿਭੋਗਾਨਂ ਆਕਰਤ੍ਤਾ ਧਞ੍ਞਵਤੀ, ਅਥ ਵਾ ਧਞ੍ਞਾਨਂ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾਨਂ ਵਸਨਟ੍ਠਾਨਂ ਆਰਾਮਵਿਹਾਰਾਦੀਨਂ ਆਕਰਤ੍ਤਾ ਧਞ੍ਞਵਤੀ, ਤਸ੍ਸਾ ਧਞ੍ਞਵਤਿਯਾ. ਨਗਰਨ੍ਤਿ ਪਤ੍ਥੇਨ੍ਤਿ ਏਤ੍ਥ ਉਪਭੋਗਪਰਿਭੋਗਤ੍ਥਿਕਾ ਜਨਾਤਿ ਨਗਰਂ, ਨ ਗਚ੍ਛਤੀਤਿ ਵਾ ਨਗਂ, ਰਾਜਯੁਵਰਾਜਮਹਾਮਤ੍ਤਾਦੀਨਂ ਵਸਨਟ੍ਠਾਨਂ. ਨਗਂ ਰਾਤਿ ਆਦਦਾਤਿ ਗਣ੍ਹਾਤੀਤਿ ਨਗਰਂ, ਰਾਜਾਦੀਨਂ ਵਸਨਟ੍ਠਾਨਸਮੂਹਭੂਤਂ ਪਾਕਾਰਪਰਿਖਾਦੀਹਿ ਪਰਿਕ੍ਖਿਤ੍ਤਂ ਪਰਿਚ੍ਛਿਨ੍ਨਟ੍ਠਾਨਂ ਨਗਰਂ ਨਾਮਾਤਿ ਅਤ੍ਥੋ. ਨਗਰੇ ਯਦਾ ਅਹਂ ਵਿਪਸ੍ਸਿਸ੍ਸ ਭਗਵਤੋ ਸਨ੍ਤਿਕੇ ਬ੍ਯਾਕਰਣਂ ਅਲਭਿਂ, ਤਦਾ ਤਸ੍ਮਿਂ ਧਞ੍ਞਵਤਿਯਾ ਨਗਰੇ ਬ੍ਰਾਹ੍ਮਣੋ ਅਹੋਸਿਨ੍ਤਿ ਸਮ੍ਬਨ੍ਧੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਕੁਸੁਮਾਸਨਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੭. ਫਲਦਾਯਕਤ੍ਥੇਰਅਪਦਾਨਵਣ੍ਣਨਾ

ਅਜ੍ਝਾਯਕੋ ਮਨ੍ਤਧਰੋਤਿਆਦਿਕਂ ਆਯਸ੍ਮਤੋ ਫਲਦਾਯਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕੇਸੁ ਭਵੇਸੁ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਵੇਦਤ੍ਤਯਾਦਿਸਕਸਿਪ੍ਪੇਸੁ ਪਾਰਪ੍ਪਤ੍ਤੋ ਅਨੇਕੇਸਂ ਬ੍ਰਾਹ੍ਮਣਸਹਸ੍ਸਾਨਿਂ ਪਾਮੋਕ੍ਖੋ ਆਚਰਿਯੋ ਸਕਸਿਪ੍ਪਾਨਂ ਪਰਿਯੋਸਾਨਂ ਅਦਿਸ੍ਵਾ ਤਤ੍ਥ ਚ ਸਾਰਂ ਅਪਸ੍ਸਨ੍ਤੋ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਸ੍ਸ ਅਵਿਦੂਰੇ ਅਸ੍ਸਮਂ ਕਾਰੇਤ੍ਵਾ ਸਹ ਸਿਸ੍ਸੇਹਿ ਵਾਸਂ ਕਪ੍ਪੇਸਿ, ਤਸ੍ਮਿਂ ਸਮਯੇ ਪਦੁਮੁਤ੍ਤਰੋ ਭਗਵਾ ਭਿਕ੍ਖਾਯ ਚਰਮਾਨੋ ਤਸ੍ਸਾਨੁਕਮ੍ਪਾਯ ਤਂ ਪਦੇਸਂ ਸਮ੍ਪਾਪੁਣਿ. ਤਾਪਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਅਤ੍ਤਨੋ ਅਤ੍ਥਾਯ ਪੁਟਕੇ ਨਿਕ੍ਖਿਪਿਤ੍ਵਾ ਰੁਕ੍ਖਗ੍ਗੇ ਲਗ੍ਗਿਤਾਨਿ ਮਧੁਰਾਨਿ ਪਦੁਮਫਲਾਨਿ ਮਧੁਨਾ ਸਹ ਅਦਾਸਿ. ਭਗਵਾ ਤਸ੍ਸ ਸੋਮਨਸ੍ਸੁਪ੍ਪਾਦਨਤ੍ਥਂ ਪਸ੍ਸਨ੍ਤਸ੍ਸੇਵ ਪਰਿਭੁਞ੍ਜਿਤ੍ਵਾ ਆਕਾਸੇ ਠਿਤੋ ਫਲਦਾਨਾਨਿਸਂਸਂ ਕਥੇਤ੍ਵਾ ਪਕ੍ਕਾਮਿ.

੭੫. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵਿਭਵਸਮ੍ਪਨ੍ਨੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਤ੍ਤਵਸ੍ਸਿਕੋਯੇਵ ਅਰਹਤ੍ਤਂ ਪਤ੍ਵਾ ਪੁਬ੍ਬੇ ਕਤਕੁਸਲਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਅਜ੍ਝਾਯਕੋ ਮਨ੍ਤਧਰੋਤਿਆਦਿਮਾਹ. ਤਤ੍ਥ ਅਜ੍ਝੇਤਿ ਚਿਨ੍ਤੇਤੀਤਿ ਅਜ੍ਝਾਯਿ, ਅਜ੍ਝਾਯਿਯੇਵ ਅਜ੍ਝਾਯਕੋ. ਏਤ੍ਥ ਹਿ ਅਕਾਰੋ ‘‘ਪਟਿਸੇਧੇ ਵੁਦ੍ਧਿਤਬ੍ਭਾਵੇ…ਪੇ… ਅਕਾਰੋ ਵਿਰਹਪ੍ਪਕੇ’’ਤਿ ਏਵਂ ਵੁਤ੍ਤੇਸੁ ਦਸਸੁ ਅਤ੍ਥੇਸੁ ਤਬ੍ਭਾਵੇ ਵਤ੍ਤਤਿ. ਸਿਸ੍ਸਾਨਂ ਸਵਨਧਾਰਣਾਦਿਵਸੇਨ ਹਿਤਂ ਅਜ੍ਝੇਤਿ ਚਿਨ੍ਤੇਤਿ ਸਜ੍ਝਾਯਂ ਕਰੋਤੀਤਿ ਅਜ੍ਝਾਯਕੋ, ਚਿਨ੍ਤਕੋਤਿ ਅਤ੍ਥੋ. ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਹਿਤਂ ਸਬ੍ਬਂ ਮਨ੍ਤਂ ਮਨੇਨ ਧਾਰੇਤਿ ਪਵਤ੍ਤੇਤੀਤਿ ਮਨ੍ਤਧਰੋ. ਤਿਣ੍ਣਂ ਵੇਦਾਨ ਪਾਰਗੂਤਿ ਵੇਦਂ ਵੁਚ੍ਚਤਿ ਞਾਣਂ, ਵੇਦੇਨ ਵੇਦਿਤਬ੍ਬਾ ਬੁਜ੍ਝਿਤਬ੍ਬਾਤਿ ਵੇਦਾ, ਇਰੁਵੇਦਯਜੁਵੇਦਸਾਮਵੇਦਸਙ੍ਖਾਤਾ ਤਯੋ ਗਨ੍ਥਾ, ਤੇਸਂ ਵੇਦਾਨਂ ਪਾਰਂ ਪਰਿਯੋਸਾਨਂ ਕੋਟਿਂ ਗਤੋ ਪਤ੍ਤੋਤਿ ਪਾਰਗੂ. ਸੇਸਂ ਪਾਕਟਮੇਵਾਤਿ

ਫਲਦਾਯਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੮. ਞਾਣਸਞ੍ਞਿਕਤ੍ਥੇਰਅਪਦਾਨਵਣ੍ਣਨਾ

ਪਬ੍ਬਤੇ ਹਿਮਵਨ੍ਤਮ੍ਹੀਤਿਆਦਿਕਂ ਆਯਸ੍ਮਤੋ ਞਾਣਸਞ੍ਞਿਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਸ੍ਮਿਂ ਤਸ੍ਮਿਂ ਉਪ੍ਪਨ੍ਨੁਪ੍ਪਨ੍ਨੇ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਪ੍ਪਤ੍ਤੋ ਘਰਾਵਾਸਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਸ੍ਸ ਅਵਿਦੂਰੇ ਪਬ੍ਬਤਨ੍ਤਰੇ ਪਣ੍ਣਸਾਲਂ ਕਾਰੇਤ੍ਵਾ ਪਞ੍ਚਾਭਿਞ੍ਞਾਅਟ੍ਠਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਵਸਨ੍ਤੋ ਏਕਦਿਵਸਂ ਪਰਿਸੁਦ੍ਧਂ ਪਣ੍ਡਰਂ ਪੁਲਿਨਤਲਂ ਦਿਸ੍ਵਾ ‘‘ਈਦਿਸਾ ਪਰਿਸੁਦ੍ਧਾ ਬੁਦ੍ਧਾ, ਈਦਿਸਂਵ ਪਰਿਸੁਦ੍ਧਂ ਬੁਦ੍ਧਞਾਣ’’ਨ੍ਤਿ ਬੁਦ੍ਧਞ੍ਚ ਤਸ੍ਸ ਞਾਣਞ੍ਚ ਅਨੁਸ੍ਸਰਿ ਥੋਮੇਸਿ ਚ.

੮੪. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਾਸਨੇ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਤ੍ਤੋ ਪੁਬ੍ਬੇ ਕਤਪੁਞ੍ਞਂ ਅਨੁਸ੍ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ‘‘ਪਬ੍ਬਤੇ ਹਿਮਵਨ੍ਤਮ੍ਹੀ’’ਤਿਆਦਿਮਾਹ. ਪੁਲਿਨਂ ਸੋਭਨਂ ਦਿਸ੍ਵਾਤਿ ਪਰਿਪੁਣ੍ਣਕਤਂ ਵਿਯ ਪੁਲਾਕਾਰੇਨ ਪਰਿਸੋਧਿਤਾਕਾਰੇਨ ਪਵਤ੍ਤਂ ਠਿਤਨ੍ਤਿ ਪੁਲਿਨਂ, ਸੋਭਨਂ ਵਾਲੁਕਂ ਦਿਸ੍ਵਾ ਸੇਟ੍ਠਂ ਬੁਦ੍ਧਂ ਅਨੁਸ੍ਸਰਿਨ੍ਤਿ ਅਤ੍ਥੋ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਞਾਣਸਞ੍ਞਿਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੯. ਗਣ੍ਠਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ

ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋਤਿਆਦਿਕਂ ਆਯਸ੍ਮਤੋ ਗਣ੍ਠਿਪੁਪ੍ਫਿਯਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਕਤਪੁਞ੍ਞਸਞ੍ਚਯੋ ਵਿਪਸ੍ਸਿਸ੍ਸ ਭਗਵਤੋ ਕਾਲੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਉਪਭੋਗਪਰਿਭੋਗੇਹਿ ਅਨੂਨੋ ਏਕਦਿਵਸਂ ਵਿਪਸ੍ਸਿਂ ਭਗਵਨ੍ਤਂ ਸਗਣਂ ਦਿਸ੍ਵਾ ਪਸਨ੍ਨਮਾਨਸੋ ਲਾਜਾਪਞ੍ਚਮੇਹਿ ਪੁਪ੍ਫੇਹਿ ਪੂਜੇਸਿ. ਸੋ ਤੇਨੇਵ ਚਿਤ੍ਤਪ੍ਪਸਾਦੇਨ ਯਾਵਤਾਯੁਕਂ ਠਤ੍ਵਾ ਤਤੋ ਦੇਵਲੋਕੇ ਨਿਬ੍ਬਤ੍ਤੋ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਅਪਰਭਾਗੇ ਮਨੁਸ੍ਸੇਸੁ ਮਨੁਸ੍ਸਸਮ੍ਪਤ੍ਤਿਂ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧਾਜਾਤੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿ.

੯੧. ਸੋ ਏਕਦਿਵਸਂ ਪੁਬ੍ਬੇ ਕਤਪੁਞ੍ਞਂ ਸਰਿਤ੍ਵਾ ਸੋਮਨਸ੍ਸਜਾਤੋ ‘‘ਇਮਿਨਾ ਕੁਸਲੇਨਾਹਂ ਨਿਬ੍ਬਾਨਂ ਪਤ੍ਤੋ’’ਤਿ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਸੁਵਣ੍ਣਵਣ੍ਣੋ ਸਮ੍ਬੁਦ੍ਧੋਤਿਆਦਿਮਾਹ. ਤਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਗਣ੍ਠਿਪੁਪ੍ਫਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

੧੦. ਪਦੁਮਪੂਜਕਤ੍ਥੇਰਅਪਦਾਨਵਣ੍ਣਨਾ

ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਕਂ ਆਯਸ੍ਮਤੋ ਪਦੁਮਪੂਜਕਤ੍ਥੇਰਸ੍ਸ ਅਪਦਾਨਂ. ਅਯਮ੍ਪਿ ਪੁਰਿਮਬੁਦ੍ਧੇਸੁ ਕਤਾਧਿਕਾਰੋ ਤਤ੍ਥ ਤਤ੍ਥ ਭਵੇ ਵਿਵਟ੍ਟੂਪਨਿਸ੍ਸਯਾਨਿ ਪੁਞ੍ਞਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤੋ ਵਿਞ੍ਞੁਤਂ ਪਤ੍ਵਾ ਸਕਸਿਪ੍ਪੇ ਨਿਪ੍ਫਤ੍ਤਿਂ ਪਤ੍ਵਾ ਤਤ੍ਥ ਸਾਰਂ ਅਪਸ੍ਸਨ੍ਤੋ ਬੁਦ੍ਧੁਪ੍ਪਤ੍ਤਿਤੋ ਪੁਰੇਤਰਂ ਉਪ੍ਪਨ੍ਨਤ੍ਤਾ ਓਵਾਦਾਨੁਸਾਸਨਂ ਅਲਭਿਤ੍ਵਾ ਘਰਾਵਾਸਂ ਪਹਾਯ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤਸ੍ਸ ਅਵਿਦੂਰੇ ਗੋਤਮਕਂ ਨਾਮ ਪਬ੍ਬਤਂ ਨਿਸ੍ਸਾਯ ਅਸ੍ਸਮਂ ਕਾਰੇਤ੍ਵਾ ਪਞ੍ਚਾਭਿਞ੍ਞਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਝਾਨਸੁਖੇਨੇਵ ਵਿਹਾਸਿ. ਤਦਾ ਪਦੁਮੁਤ੍ਤਰੋ ਭਗਵਾ ਬੁਦ੍ਧੋ ਹੁਤ੍ਵਾ ਸਤ੍ਤੇ ਸਂਸਾਰਤੋ ਉਦ੍ਧਰਨ੍ਤੋ ਤਸ੍ਸਾਨੁਕਮ੍ਪਾਯ ਹਿਮਵਨ੍ਤਂ ਅਗਮਾਸਿ. ਤਾਪਸੋ ਭਗਵਨ੍ਤਂ ਦਿਸ੍ਵਾ ਪਸਨ੍ਨਮਾਨਸੋ ਸਕਸਿਸ੍ਸੇ ਸਮਾਨੇਤ੍ਵਾ ਤੇਹਿ ਪਦੁਮਪੁਪ੍ਫਾਨਿ ਆਹਰਾਪੇਤ੍ਵਾ ਪੂਜੇਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਭਯਸਮ੍ਪਤ੍ਤਿਯੋ ਅਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਸਾਵਤ੍ਥਿਯਂ ਕੁਲਗੇਹੇ ਨਿਬ੍ਬਤ੍ਤੋ ਸਦ੍ਧੋ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੯੭. ਸੋ ਅਤ੍ਤਨੋ ਪੁਞ੍ਞਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਹਿਮਵਨ੍ਤਸ੍ਸਾਵਿਦੂਰੇਤਿਆਦਿਮਾਹ. ਗੋਤਮੋ ਨਾਮ ਪਬ੍ਬਤੋਤਿ ਅਨੇਕੇਸਂ ਯਕ੍ਖਦੇਵਤਾਨਂ ਆਵਾਸਭਾਵੇਨ ਅਧਿਟ੍ਠਾਨਵਸੇਨ ਗੋਤਮਸ੍ਸ ਭਵਨਤ੍ਤਾ ਗੋਤਮੋਤਿ ਪਾਕਟੋ ਅਹੋਸਿ. ਪਵਤ੍ਤਤਿ ਤਿਟ੍ਠਤੀਤਿ ਪਬ੍ਬਤੋ. ਨਾਗਰੁਕ੍ਖੇਹਿ ਸਞ੍ਛਨ੍ਨੋਤਿ ਰੁਹਤਿ ਤਿਟ੍ਠਤੀਤਿ ਰੁਕ੍ਖੋ. ਅਥ ਵਾ ਪਥਵਿਂ ਖਨਨ੍ਤੋ ਉਦ੍ਧਂ ਰੁਹਤੀਤਿ ਰੁਕ੍ਖੋ, ਨਾਨਾ ਅਨੇਕਪ੍ਪਕਾਰਾ ਚਮ੍ਪਕਕਪ੍ਪੂਰਨਾਗਅਗਰੁਚਨ੍ਦਨਾਦਯੋ ਰੁਕ੍ਖਾਤਿ ਨਾਨਾਰੁਕ੍ਖਾ, ਤੇਹਿ ਨਾਨਾਰੁਕ੍ਖੇਹਿ ਸਞ੍ਛਨ੍ਨੋ ਪਰਿਕਿਣ੍ਣੋ ਗੋਤਮੋ ਪਬ੍ਬਤੋਤਿ ਸਮ੍ਬਨ੍ਧੋ. ਮਹਾਭੂਤਗਣਾਲਯੋਤਿ ਭਵਨ੍ਤਿ ਜਾਯਨ੍ਤਿ ਉਪ੍ਪਜ੍ਜਨ੍ਤਿ ਵਡ੍ਢਨ੍ਤਿ ਚਾਤਿ ਭੂਤਾ, ਮਹਨ੍ਤਾ ਚ ਤੇ ਭੂਤਾ ਚਾਤਿ ਮਹਾਭੂਤਾ, ਮਹਾਭੂਤਾਨਂ ਗਣੋ ਸਮੂਹੋਤਿ ਮਹਾਭੂਤਗਣੋ, ਮਹਾਭੂਤਗਣਸ੍ਸ ਆਲਯੋ ਪਤਿਟ੍ਠਾਤਿ ਮਹਾਭੂਤਗਣਾਲਯੋ.

੯੮. ਵੇਮਜ੍ਝਮ੍ਹਿ ਚ ਤਸ੍ਸਾਸੀਤਿ ਤਸ੍ਸ ਗੋਤਮਸ੍ਸ ਪਬ੍ਬਤਸ੍ਸ ਵੇਮਜ੍ਝੇ ਅਬ੍ਭਨ੍ਤਰੇ ਅਸ੍ਸਮੋ ਅਭਿਨਿਮ੍ਮਿਤੋ ਨਿਪ੍ਫਾਦਿਤੋ ਕਤੋਤਿ ਅਤ੍ਥੋ. ਸੇਸਂ ਉਤ੍ਤਾਨਮੇਵਾਤਿ.

ਪਦੁਮਪੂਜਕਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਤੇਰਸਮਵਗ੍ਗਵਣ੍ਣਨਾ ਸਮਤ੍ਤਾ.