੭. ਨਲ਼ਮਾਲਿਯਤ੍ਥੇਰਅਪਦਾਨਵਣ੍ਣਨਾ

ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਕਂ ਆਯਸ੍ਮਤੋ ਨਲ਼ਮਾਲਿਯਤ੍ਥੇਰਸ੍ਸ ਅਪਦਾਨਂ. ਏਸੋਪਿ ਪੁਰਿਮਜਿਨਵਰੇਸੁ ਕਤਾਧਿਕਾਰੋ ਅਨੇਕਾਸੁ ਜਾਤੀਸੁ ਵਿਵਟ੍ਟੂਪਨਿਸ੍ਸਯਾਨਿ ਕੁਸਲਕਮ੍ਮਾਨਿ ਉਪਚਿਨਨ੍ਤੋ ਪਦੁਮੁਤ੍ਤਰਸ੍ਸ ਭਗਵਤੋ ਕਾਲੇ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਘਰਾਵਾਸਂ ਸਣ੍ਠਪੇਤ੍ਵਾ ਕਾਮੇ ਆਦੀਨਵਂ ਦਿਸ੍ਵਾ ਗੇਹਂ ਪਹਾਯ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਹਿਮਵਨ੍ਤੇ ਵਸਨ੍ਤੋ ਤਤ੍ਥਾਗਤਂ ਭਗਵਨ੍ਤਂ ਦਿਸ੍ਵਾ ਪਸਨ੍ਨੋ ਵਨ੍ਦਿਤ੍ਵਾ ਤਿਣਸਨ੍ਥਰਂ ਸਨ੍ਥਰਿਤ੍ਵਾ ਤਤ੍ਥ ਨਿਸਿਨ੍ਨਸ੍ਸ ਭਗਵਤੋ ਨਲ਼ਮਾਲੇਹਿ ਬੀਜਨਿਂ ਕਤ੍ਵਾ ਬੀਜੇਤ੍ਵਾ ਅਦਾਸਿ. ਪਟਿਗ੍ਗਹੇਸਿ ਭਗਵਾ ਤਸ੍ਸਾਨੁਕਮ੍ਪਾਯ, ਅਨੁਮੋਦਨਞ੍ਚ ਅਕਾਸਿ. ਸੋ ਤੇਨ ਪੁਞ੍ਞੇਨ ਦੇਵਮਨੁਸ੍ਸੇਸੁ ਸਂਸਰਨ੍ਤੋ ਉਪ੍ਪਨ੍ਨੁਪ੍ਪਨ੍ਨਭਵੇ ਪਰਿਲ਼ਾਹਸਨ੍ਤਾਪਵਿਵਜ੍ਜਿਤੋ ਕਾਯਚਿਤ੍ਤਚੇਤਸਿਕਸੁਖਪ੍ਪਤ੍ਤੋ ਅਨੇਕਸੁਖਮਨੁਭਵਿਤ੍ਵਾ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਏਕਸ੍ਮਿਂ ਕੁਲਗੇਹੇ ਨਿਬ੍ਬਤ੍ਤੋ ਵੁਦ੍ਧਿਮਨ੍ਵਾਯ ਪੁਬ੍ਬਵਾਸਨਾਬਲੇਨ ਸਤ੍ਥਰਿ ਪਸਨ੍ਨੋ ਪਬ੍ਬਜਿਤ੍ਵਾ ਨਚਿਰਸ੍ਸੇਵ ਅਰਹਾ ਅਹੋਸਿ.

੩੬. ਸੋ ਅਪਰਭਾਗੇ ਅਤ੍ਤਨੋ ਪੁਬ੍ਬਕਮ੍ਮਂ ਸਰਿਤ੍ਵਾ ਸੋਮਨਸ੍ਸਜਾਤੋ ਪੁਬ੍ਬਚਰਿਤਾਪਦਾਨਂ ਪਕਾਸੇਨ੍ਤੋ ਪਦੁਮੁਤ੍ਤਰਬੁਦ੍ਧਸ੍ਸਾਤਿਆਦਿਮਾਹ. ਤਂ ਹੇਟ੍ਠਾ ਵੁਤ੍ਤਮੇਵ.

੩੭. ਨਲ਼ਮਾਲਂ ਗਹੇਤ੍ਵਾਨਾਤਿ ਨਲ਼ਤਿ ਅਸਾਰੋ ਨਿਸ੍ਸਾਰੋ ਹੁਤ੍ਵਾ ਵੇਲ਼ੁਵਂਸਤੋਪਿ ਤਨੁਕੋ ਸਲ੍ਲਹੁਕੋ ਜਾਤੋਤਿ ਨਲ਼ੋ, ਨਲ਼ਸ੍ਸ ਮਾਲਾ ਪੁਪ੍ਫਂ ਨਲ਼ਮਾਲਂ, ਤੇਨ ਨਲ਼ਮਾਲੇਨ ਬੀਜਨਿਂ ਕਾਰੇਸਿਨ੍ਤਿ ਸਮ੍ਬਨ੍ਧੋ. ਬੀਜਿਸ੍ਸਤਿ ਜਨਿਸ੍ਸਤਿ ਵਾਤੋ ਅਨੇਨਾਤਿ ਬੀਜਨੀ, ਤਂ ਬੀਜਨਿਂ ਬੁਦ੍ਧਸ੍ਸ ਉਪਨਾਮੇਸਿਂ, ਪਟਿਗ੍ਗਹੇਸਿਨ੍ਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਨਲ਼ਮਾਲਿਯਤ੍ਥੇਰਅਪਦਾਨਵਣ੍ਣਨਾ ਸਮਤ੍ਤਾ.

ਸਤ੍ਤਮਭਾਣਵਾਰਵਣ੍ਣਨਾ ਸਮਤ੍ਤਾ.