੯. ਆਟਾਨਾਟਿਯਸੁਤ੍ਤਵਣ੍ਣਨਾ

ਪਠਮਭਾਣਵਾਰਵਣ੍ਣਨਾ

੨੭੫. ਏਵਂ ਮੇ ਸੁਤਨ੍ਤਿ ਆਟਾਨਾਟਿਯਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਚਤੁਦ੍ਦਿਸਂ ਰਕ੍ਖਂ ਠਪੇਤ੍ਵਾਤਿ ਅਸੁਰਸੇਨਾਯ ਨਿਵਾਰਣਤ੍ਥਂ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਚਤੂਸੁ ਦਿਸਾਸੁ ਆਰਕ੍ਖਂ ਠਪੇਤ੍ਵਾ. ਗੁਮ੍ਬਂ ਠਪੇਤ੍ਵਾਤਿ ਬਲਗੁਮ੍ਬਂ ਠਪੇਤ੍ਵਾ. ਓਵਰਣਂ ਠਪੇਤ੍ਵਾਤਿ ਚਤੂਸੁ ਦਿਸਾਸੁ ਆਰਕ੍ਖਕੇ ਠਪੇਤ੍ਵਾ. ਏਵਂ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਆਰਕ੍ਖਂ ਸੁਸਂਵਿਹਿਤਂ ਕਤ੍ਵਾ ਆਟਾਨਾਟਨਗਰੇ ਨਿਸਿਨ੍ਨਾ ਸਤ੍ਤ ਬੁਦ੍ਧੇ ਆਰਬ੍ਭ ਇਮਂ ਪਰਿਤ੍ਤਂ ਬਨ੍ਧਿਤ੍ਵਾ ‘‘ਯੇ ਸਤ੍ਥੁ ਧਮ੍ਮਆਣਂ ਅਮ੍ਹਾਕਞ੍ਚ ਰਾਜਆਣਂ ਨ ਸੁਣਨ੍ਤਿ, ਤੇਸਂ ਇਦਞ੍ਚਿਦਞ੍ਚ ਕਰਿਸ੍ਸਾਮਾ’’ਤਿ ਸਾਵਨਂ ਕਤ੍ਵਾ ਅਤ੍ਤਨੋਪਿ ਚਤੂਸੁ ਦਿਸਾਸੁ ਮਹਤਿਯਾ ਚ ਯਕ੍ਖਸੇਨਾਯਾਤਿਆਦੀਹਿ ਚਤੂਹਿ ਸੇਨਾਹਿ ਆਰਕ੍ਖਂ ਸਂਵਿਦਹਿਤ੍ਵਾ ਅਭਿਕ੍ਕਨ੍ਤਾਯ ਰਤ੍ਤਿਯਾ…ਪੇ… ਏਕਮਨ੍ਤਂ ਨਿਸੀਦਿਂਸੁ.

ਅਭਿਕ੍ਕਨ੍ਤਾਯ ਰਤ੍ਤਿਯਾਤਿ ਏਤ੍ਥ ਅਭਿਕ੍ਕਨ੍ਤਸਦ੍ਦੋ ਖਯਸੁਨ੍ਦਰਾਭਿਰੂਪਅਬ੍ਭਨੁਮੋਦਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਅਭਿਕ੍ਕਨ੍ਤਾ, ਭਨ੍ਤੇ ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ, ਚਿਰਨਿਸਿਨ੍ਨੋ ਭਿਕ੍ਖੁਸਙ੍ਘੋ ਉਦ੍ਦਿਸਤੁ, ਭਨ੍ਤੇ, ਭਗਵਾ ਭਿਕ੍ਖੂਨਂ ਪਾਤਿਮੋਕ੍ਖ’’ਨ੍ਤਿ (ਅ. ਨਿ. ੮.੨੦) ਏਵਮਾਦੀਸੁ ਖਯੇ ਦਿਸ੍ਸਤਿ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਪਣੀਤਤਰੋ ਚਾ’’ਤਿ (ਅ. ਨਿ. ੪.੧੦੦) ਏਵਮਾਦੀਸੁ ਸੁਨ੍ਦਰੇ.

‘‘ਕੋ ਮੇ ਵਨ੍ਦਤਿ ਪਾਦਾਨਿ, ਇਦ੍ਧਿਯਾ ਯਸਸਾ ਜਲਂ;

ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿ. (ਵਿ. ਵ. ੮੫੭);

ਏਵਮਾਦੀਸੁ ਅਭਿਰੂਪੇ. ‘‘ਅਭਿਕ੍ਕਨ੍ਤਂ, ਭੋ ਗੋਤਮਾਤਿ (ਪਾਰਾ. ੧੫) ਏਵਮਾਦੀਸੁ ਅਬ੍ਭਨੁਮੋਦਨੇ. ਇਧ ਪਨ ਖਯੇ. ਤੇਨ ਅਭਿਕ੍ਕਨ੍ਤਾਯ ਰਤ੍ਤਿਯਾ, ਪਰਿਕ੍ਖੀਣਾਯ ਰਤ੍ਤਿਯਾਤਿ ਵੁਤ੍ਤਂ ਹੋਤਿ.

ਅਭਿਕ੍ਕਨ੍ਤਵਣ੍ਣਾਤਿ ਇਧ ਅਭਿਕ੍ਕਨ੍ਤਸਦ੍ਦੋ ਅਭਿਰੂਪੇ. ਵਣ੍ਣਸਦ੍ਦੋ ਪਨ ਛਵਿਥੁਤਿਕੁਲਵਗ੍ਗਕਾਰਣਸਣ੍ਠਾਨਪਮਾਣਰੂਪਾਯਤਨਾਦੀਸੁ ਦਿਸ੍ਸਤਿ. ਤਤ੍ਥ ‘‘ਸੁਵਣ੍ਣਵਣ੍ਣੋਸਿ ਭਗਵਾ’’ਤਿ (ਮ. ਨਿ. ੨.੩੯੯) ਏਵਮਾਦੀਸੁ ਛਵਿਯਂ. ‘‘ਕਦਾ ਸਞ੍ਞੂਲ਼੍ਹਾ ਪਨ ਤੇ, ਗਹਪਤਿ, ਇਮੇ ਸਮਣਸ੍ਸ ਗੋਤਮਸ੍ਸ ਵਣ੍ਣਾ’’ਤਿ (ਮ. ਨਿ. ੨.੭੭) ਏਵਮਾਦੀਸੁ ਥੁਤਿਯਂ. ‘‘ਚਤ੍ਤਾਰੋਮੇ, ਭੋ ਗੋਤਮ, ਵਣ੍ਣਾ’’ਤਿ (ਦੀ. ਨਿ. ੧.੨੬੬) ਏਵਮਾਦੀਸੁ ਕੁਲਵਗ੍ਗੇ. ‘‘ਅਥ ਕੇਨ ਨੁ ਵਣ੍ਣੇਨ ਗਨ੍ਧਥੇਨੋਤਿ ਵੁਚ੍ਚਤੀ’’ਤਿਆਦੀਸੁ (ਸਂ. ਨਿ. ੧.੨੩੪) ਕਾਰਣੇ. ‘‘ਮਹਨ੍ਤਂ ਹਤ੍ਥਿਰਾਜਵਣ੍ਣਂ ਅਭਿਨਿਮ੍ਮਿਨਿਤ੍ਵਾ’’ਤਿ (ਸਂ. ਨਿ. ੧.੧੩੮) ਏਵਮਾਦੀਸੁ ਸਣ੍ਠਾਨੇ. ‘‘ਤਯੋ ਪਤ੍ਤਸ੍ਸ ਵਣ੍ਣਾ’’ਤਿ (ਪਾਰਾ. ੬੦੨) ਏਵਮਾਦੀਸੁ ਪਮਾਣੇ. ‘‘ਵਣ੍ਣੋ ਗਨ੍ਧੋ ਰਸੋ ਓਜਾ’’ਤਿ ਏਵਮਾਦੀਸੁ ਰੂਪਾਯਤਨੇ. ਸੋ ਇਧ ਛਵਿਯਂ ਦਟ੍ਠਬ੍ਬੋ. ਤੇਨ ‘‘ਅਭਿਕ੍ਕਨ੍ਤਵਣ੍ਣਾ ਅਭਿਰੂਪਚ੍ਛਵੀ’’ਤਿ ਵੁਤ੍ਤਂ ਹੋਤਿ.

ਕੇਵਲਕਪ੍ਪਨ੍ਤਿ ਏਤ੍ਥ ਕੇਵਲਸਦ੍ਦੋ ਅਨਵਸੇਸਯੇਭੁਯ੍ਯਅਬ੍ਯਾਮਿਸ੍ਸਾਨਤਿਰੇਕਦਲ਼੍ਹਤ੍ਥਵਿਸਂਯੋਗਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯ’’ਨ੍ਤਿ (ਪਾਰਾ. ੧) ਏਵਮਾਦੀਸੁ ਅਨਵਸੇਸਤਾ ਅਤ੍ਥੋ. ‘‘ਕੇਵਲਕਪ੍ਪਾ ਚ ਅਙ੍ਗਮਾਗਧਾ ਪਹੂਤਂ ਖਾਦਨੀਯਂ ਭੋਜਨੀਯਂ ਆਦਾਯ ਅਭਿਕ੍ਕਮਿਤੁਕਾਮਾ ਹੋਨ੍ਤੀ’’ਤਿ (ਮਹਾਵ. ੪੩) ਏਵਮਾਦੀਸੁ ਯੇਭੁਯ੍ਯਤਾ. ‘‘ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀ’’ਤਿ (ਮਹਾਵ. ੧) ਏਵਮਾਦੀਸੁ ਅਬ੍ਯਾਮਿਸ੍ਸਤਾ. ‘‘ਕੇਵਲਂ ਸਦ੍ਧਾਮਤ੍ਤਕਂ ਨੂਨ ਅਯਮਾਯਸ੍ਮਾ’’ਤਿ (ਅ. ਨਿ. ੬.੫੫) ਏਵਮਾਦੀਸੁ ਅਨਤਿਰੇਕਤਾ. ‘‘ਆਯਸ੍ਮਤੋ, ਭਨ੍ਤੇ, ਅਨੁਰੁਦ੍ਧਸ੍ਸ ਬਾਹਿਕੋ ਨਾਮ ਸਦ੍ਧਿਵਿਹਾਰਿਕੋ ਕੇਵਲਕਪ੍ਪਂ ਸਙ੍ਘਭੇਦਾਯ ਠਿਤੋ’’ਤਿ (ਅ. ਨਿ. ੪.੨੪੩) ਏਵਮਾਦੀਸੁ ਦਲ਼੍ਹਤ੍ਥਤਾ. ‘‘ਕੇਵਲੀ ਵੁਸਿਤਵਾ ਉਤ੍ਤਮਪੁਰਿਸੋਤਿ ਵੁਚ੍ਚਤੀ’’ਤਿ (ਅ. ਨਿ. ੧੦.੧੨) ਏਵਮਾਦੀਸੁ ਵਿਸਂਯੋਗੋ. ਇਧ ਪਨਸ੍ਸ ਅਨਵਸੇਸਤ੍ਥੋ ਅਧਿਪ੍ਪੇਤੋ.

ਕਪ੍ਪਸਦ੍ਦੋ ਪਨਾਯਂ ਅਭਿਸਦ੍ਦਹਨਵੋਹਾਰਕਾਲਪਞ੍ਞਤ੍ਤਿਛੇਦਨਵਿਕਪ੍ਪਲੇਸਸਮਨ੍ਤਭਾਵਾਦਿਅਨੇਕਤ੍ਥੋ. ਤਥਾ ਹਿਸ੍ਸ ‘‘ਓਕਪ੍ਪਨਿਯਮੇਤਂ ਭੋਤੋ ਗੋਤਮਸ੍ਸ. ਯਥਾ ਤਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸਾ’’ਤਿ (ਮ. ਨਿ. ੧.੩੮੭) ਏਵਮਾਦੀਸੁ ਅਭਿਸਦ੍ਦਹਨਮਤ੍ਥੋ. ‘‘ਅਨੁਜਾਨਾਮਿ, ਭਿਕ੍ਖਵੇ, ਪਞ੍ਚਹਿ ਸਮਣਕਪ੍ਪੇਹਿ ਫਲਂ ਪਰਿਭੁਞ੍ਜਿਤੁ’’ਨ੍ਤਿ (ਚੂਲ਼ਵ. ੨੫੦) ਏਵਮਾਦੀਸੁ ਵੋਹਾਰੋ. ‘‘ਯੇਨ ਸੁਦਂ ਨਿਚ੍ਚਕਪ੍ਪਂ ਵਿਹਰਾਮੀ’’ਤਿ (ਮ. ਨਿ. ੧.੩੮੭) ਏਵਮਾਦੀਸੁ ਕਾਲੋ. ‘‘ਇਚ੍ਚਾਯਸ੍ਮਾ ਕਪ੍ਪੋ’’ਤਿ (ਸੁ. ਨਿ. ੧੦੯੮) ਏਵਮਾਦੀਸੁ ਪਞ੍ਞਤ੍ਤਿ. ‘‘ਅਲਙ੍ਕਤੋ ਕਪ੍ਪਿਤਕੇਸਮਸ੍ਸੂ’’ਤਿ (ਵਿ. ਵ. ੧੦੯੪) ਏਵਮਾਦੀਸੁ ਛੇਦਨਂ. ‘‘ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ’’ਤਿ (ਚੂਲ਼ਵ. ੪੪੬) ਏਵਮਾਦੀਸੁ ਵਿਕਪ੍ਪੋ, ਅਤ੍ਥਿ ਕਪ੍ਪੋ ਨਿਪਜ੍ਜਿਤੁ’’ਨ੍ਤਿ (ਅ. ਨਿ. ੮.੮੦) ਏਵਮਾਦੀਸੁ ਲੇਸੋ. ‘‘ਕੇਵਲਕਪ੍ਪਂ ਵੇਲ਼ੁਵਨਂ ਓਭਾਸੇਤ੍ਵਾ’’ਤਿ (ਸਂ. ਨਿ. ੧.੯੪) ਏਵਮਾਦੀਸੁ ਸਮਨ੍ਤਭਾਵੋ. ਇਧ ਪਨ ਸਮਨ੍ਤਭਾਵੋ ਅਤ੍ਥੋ ਅਧਿਪ੍ਪੇਤੋ. ਤਸ੍ਮਾ ‘‘ਕੇਵਲਕਪ੍ਪਂ ਗਿਜ੍ਝਕੂਟ’’ਨ੍ਤਿ ਏਤ੍ਥ ਅਨਵਸੇਸਂ ਸਮਨ੍ਤਤੋ ਗਿਜ੍ਝਕੂਟਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ.

ਓਭਾਸੇਤ੍ਵਾਤਿ ਵਤ੍ਥਮਾਲਾਲਙ੍ਕਾਰਸਰੀਰਸਮੁਟ੍ਠਿਤਾਯ ਆਭਾਯ ਫਰਿਤ੍ਵਾ, ਚਨ੍ਦਿਮਾ ਵਿਯ ਸੂਰਿਯੋ ਵਿਯ ਚ ਏਕੋਭਾਸਂ ਏਕਪਜ੍ਜੋਤਂ ਕਰਿਤ੍ਵਾਤਿ ਅਤ੍ਥੋ. ਏਕਮਨ੍ਤਂ ਨਿਸੀਦਿਂਸੂਤਿ ਦੇਵਤਾਨਂ ਦਸਬਲਸ੍ਸ ਸਨ੍ਤਿਕੇ ਨਿਸਿਨ੍ਨਟ੍ਠਾਨਂ ਨਾਮ ਨ ਬਹੁ, ਇਮਸ੍ਮਿਂ ਪਨ ਸੁਤ੍ਤੇ ਪਰਿਤ੍ਤਗਾਰਵਵਸੇਨ ਨਿਸੀਦਿਂਸੁ.

੨੭੬. ਵੇਸ੍ਸਵਣੋਤਿ ਕਿਞ੍ਚਾਪਿ ਚਤ੍ਤਾਰੋ ਮਹਾਰਾਜਾਨੋ ਆਗਤਾ, ਵੇਸ੍ਸਵਣੋ ਪਨ ਦਸਬਲਸ੍ਸ ਵਿਸ੍ਸਾਸਿਕੋ ਕਥਾਪਵਤ੍ਤਨੇ ਬ੍ਯਤ੍ਤੋ ਸੁਸਿਕ੍ਖਿਤੋ, ਤਸ੍ਮਾ ਵੇਸ੍ਸਵਣੋ ਮਹਾਰਾਜਾ ਭਗਵਨ੍ਤਂ ਏਤਦਵੋਚ. ਉਲ਼ਾਰਾਤਿ ਮਹੇਸਕ੍ਖਾਨੁਭਾਵਸਮ੍ਪਨ੍ਨਾ. ਪਾਣਾਤਿਪਾਤਾ ਵੇਰਮਣਿਯਾਤਿ ਪਾਣਾਤਿਪਾਤੇ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਆਦੀਨਵਂ ਦਸ੍ਸੇਤ੍ਵਾ ਤਤੋ ਵੇਰਮਣਿਯਾ ਧਮ੍ਮਂ ਦੇਸੇਤਿ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਸਨ੍ਤਿ ਉਲ਼ਾਰਾ ਯਕ੍ਖਾ ਨਿਵਾਸਿਨੋਤਿ ਤੇਸੁ ਸੇਨਾਸਨੇਸੁ ਸਨ੍ਤਿ ਉਲ਼ਾਰਾ ਯਕ੍ਖਾ ਨਿਬਦ੍ਧਵਾਸਿਨੋ. ਆਟਾਨਾਟਿਯਨ੍ਤਿ ਆਟਾਨਾਟਨਗਰੇ ਬਦ੍ਧਤ੍ਤਾ ਏਵਂਨਾਮਂ. ਕਿਂ ਪਨ ਭਗਵਤੋ ਅਪਚ੍ਚਕ੍ਖਧਮ੍ਮੋ ਨਾਮ ਅਤ੍ਥੀਤਿ, ਨਤ੍ਥਿ. ਅਥ ਕਸ੍ਮਾ ਵੇਸ੍ਸਵਣੋ ‘‘ਉਗ੍ਗਣ੍ਹਾਤੁ, ਭਨ੍ਤੇ, ਭਗਵਾ’’ਤਿਆਦਿਮਾਹ? ਓਕਾਸਕਰਣਤ੍ਥਂ. ਸੋ ਹਿ ਭਗਵਨ੍ਤਂ ਇਮਂ ਪਰਿਤ੍ਤਂ ਸਾਵੇਤੁਂ ਓਕਾਸਂ ਕਾਰੇਨ੍ਤੋ ਏਵਮਾਹ. ਸਤ੍ਥੁ ਕਥਿਤੇ ਇਮਂ ਪਰਿਤ੍ਤਂ ਗਰੁ ਭਵਿਸ੍ਸਤੀਤਿਪਿ ਆਹ. ਫਾਸੁਵਿਹਾਰਾਯਾਤਿ ਗਮਨਟ੍ਠਾਨਾਦੀਸੁ ਚਤੂਸੁ ਇਰਿਯਾਪਥੇਸੁ ਸੁਖਵਿਹਾਰਾਯ.

੨੭੭. ਚਕ੍ਖੁਮਨ੍ਤਸ੍ਸਾਤਿ ਨ ਵਿਪਸ੍ਸੀਯੇਵ ਚਕ੍ਖੁਮਾ, ਸਤ੍ਤਪਿ ਬੁਦ੍ਧਾ ਚਕ੍ਖੁਮਨ੍ਤੋ, ਤਸ੍ਮਾ ਏਕੇਕਸ੍ਸ ਬੁਦ੍ਧਸ੍ਸ ਏਤਾਨਿ ਸਤ੍ਤ ਸਤ੍ਤ ਨਾਮਾਨਿ ਹੋਨ੍ਤਿ. ਸਬ੍ਬੇਪਿ ਬੁਦ੍ਧਾ ਚਕ੍ਖੁਮਨ੍ਤੋ, ਸਬ੍ਬੇ ਸਬ੍ਬਭੂਤਾਨੁਕਮ੍ਪਿਨੋ, ਸਬ੍ਬੇ ਨ੍ਹਾਤਕਿਲੇਸਤ੍ਤਾ ਨ੍ਹਾਤਕਾ. ਸਬ੍ਬੇ ਮਾਰਸੇਨਾਪਮਦ੍ਦਿਨੋ, ਸਬ੍ਬੇ ਵੁਸਿਤਵਨ੍ਤੋ, ਸਬ੍ਬੇ ਵਿਮੁਤ੍ਤਾ, ਸਬ੍ਬੇ ਅਙ੍ਗਤੋ ਰਸ੍ਮੀਨਂ ਨਿਕ੍ਖਨ੍ਤਤ੍ਤਾ ਅਙ੍ਗੀਰਸਾ. ਨ ਕੇਵਲਞ੍ਚ ਬੁਦ੍ਧਾਨਂ ਏਤਾਨੇਵ ਸਤ੍ਤ ਨਾਮਾਨਿ ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ ਸਗੁਣੇਨ ਮਹੇਸਿਨੋਤਿ ਵੁਤ੍ਤਂ.

ਵੇਸ੍ਸਵਣੋ ਪਨ ਅਤ੍ਤਨੋ ਪਾਕਟਨਾਮਵਸੇਨ ਏਵਮਾਹ. ਤੇ ਜਨਾਤਿ ਇਧ ਖੀਣਾਸਵਾ ਜਨਾਤਿ ਅਧਿਪ੍ਪੇਤਾ. ਅਪਿਸੁਣਾਥਾਤਿ ਦੇਸਨਾਸੀਸਮਤ੍ਤਮੇਤਂ, ਅਮੁਸਾ ਅਪਿਸੁਣਾ ਅਫਰੁਸਾ ਮਨ੍ਤਭਾਣਿਨੋਤਿ ਅਤ੍ਥੋ. ਮਹਤ੍ਤਾਤਿ ਮਹਨ੍ਤਭਾਵਂ ਪਤ੍ਤਾ. ‘‘ਮਹਨ੍ਤਾ’’ਤਿਪਿ ਪਾਠੋ, ਮਹਨ੍ਤਾਤਿ ਅਤ੍ਥੋ. ਵੀਤਸਾਰਦਾਤਿ ਨਿਸ੍ਸਾਰਦਾ ਵਿਗਤਲੋਮਹਂਸਾ.

ਹਿਤਨ੍ਤਿ ਮੇਤ੍ਤਾਫਰਣੇਨ ਹਿਤਂ. ਯਂ ਨਮਸ੍ਸਨ੍ਤੀਤਿ ਏਤ੍ਥ ਯਨ੍ਤਿ ਨਿਪਾਤਮਤ੍ਤਂ. ਮਹਤ੍ਤਨ੍ਤਿ ਮਹਨ੍ਤਂ. ਅਯਮੇਵ ਵਾ ਪਾਠੋ, ਇਦਂ ਵੁਤ੍ਤਂ ਹੋਤਿ ‘‘ਯੇ ਚਾਪਿ ਲੋਕੇ ਕਿਲੇਸਨਿਬ੍ਬਾਨੇਨ ਨਿਬ੍ਬੁਤਾ ਯਥਾਭੂਤਂ ਵਿਪਸ੍ਸਿਸੁਂ, ਵਿਜ੍ਜਾਦਿਗੁਣਸਮ੍ਪਨ੍ਨਞ੍ਚ ਹਿਤਂ ਦੇਵਮਨੁਸ੍ਸਾਨਂ ਗੋਤਮਂ ਨਮਸ੍ਸਨ੍ਤਿ, ਤੇ ਜਨਾ ਅਪਿਸੁਣਾ, ਤੇਸਮ੍ਪਿ ਨਮਤ੍ਥੂ’’ਤਿ. ਅਟ੍ਠਕਥਾਯਂ ਪਨ ਤੇ ਜਨਾ ਅਪਿਸੁਣਾਤਿ ਤੇ ਬੁਦ੍ਧਾ ਅਪਿਸੁਣਾਤਿ ਏਵਂ ਪਠਮਗਾਥਾਯ ਬੁਦ੍ਧਾਨਂਯੇਵ ਵਣ੍ਣੋ ਕਥਿਤੋ, ਤਸ੍ਮਾ ਪਠਮਗਾਥਾ ਸਤ੍ਤਨ੍ਨਂ ਬੁਦ੍ਧਾਨਂ ਵਸੇਨ ਵੁਤ੍ਤਾ. ਦੁਤਿਯਗਾਥਾਯ ‘‘ਗੋਤਮ’’ਨ੍ਤਿ ਦੇਸਨਾਮੁਖਮਤ੍ਤਮੇਤਂ. ਅਯਮ੍ਪਿ ਹਿ ਸਤ੍ਤਨ੍ਨਂਯੇਵ ਵਸੇਨ ਵੁਤ੍ਤਾਤਿ ਵੇਦਿਤਬ੍ਬਾ. ਅਯਞ੍ਹੇਤ੍ਥ ਅਤ੍ਥੋ – ਲੋਕੇ ਪਣ੍ਡਿਤਾ ਦੇਵਮਨੁਸ੍ਸਾ ਯਂ ਨਮਸ੍ਸਨ੍ਤਿ ਗੋਤਮਂ, ਤਸ੍ਸ ਚ ਤਤੋ ਪੁਰਿਮਾਨਞ੍ਚ ਬੁਦ੍ਧਾਨਂ ਨਮਤ੍ਥੂਤਿ.

੨੭੮. ਯਤੋ ਉਗ੍ਗਚ੍ਛਤੀਤਿ ਯਤੋ ਠਾਨਤੋ ਉਦੇਤਿ. ਆਦਿਚ੍ਚੋਤਿ ਅਦਿਤਿਯਾ ਪੁਤ੍ਤੋ, ਵੇਵਚਨਮਤ੍ਤਂ ਵਾ ਏਤਂ ਸੂਰਿਯਸਦ੍ਦਸ੍ਸ. ਮਹਨ੍ਤਂ ਮਣ੍ਡਲਂ ਅਸ੍ਸਾਤਿ ਮਣ੍ਡਲੀਮਹਾ. ਯਸ੍ਸ ਚੁਗ੍ਗਚ੍ਛਮਾਨਸ੍ਸਾਤਿ ਯਮ੍ਹਿ ਉਗ੍ਗਚ੍ਛਮਾਨੇ. ਸਂਵਰੀਪਿ ਨਿਰੁਜ੍ਝਤੀਤਿ ਰਤ੍ਤਿ ਅਨ੍ਤਰਧਾਯਤਿ. ਯਸ੍ਸ ਚੁਗ੍ਗਤੇਤਿ ਯਸ੍ਮਿਂ ਉਗ੍ਗਤੇ.

ਰਹਦੋਤਿ ਉਦਕਰਹਦੋ. ਤਤ੍ਥਾਤਿ ਯਤੋ ਉਗ੍ਗਚ੍ਛਤਿ ਸੂਰਿਯੋ, ਤਸ੍ਮਿਂ ਠਾਨੇ. ਸਮੁਦ੍ਦੋਤਿ ਯੋ ਸੋ ਰਹਦੋਤਿ ਵੁਤ੍ਤੋ, ਸੋ ਨ ਅਞ੍ਞੋ, ਅਥ ਖੋ ਸਮੁਦ੍ਦੋ. ਸਰਿਤੋਦਕੋਤਿ ਵਿਸਟੋਦਕੋ, ਸਰਿਤਾ ਨਾਨਪ੍ਪਕਾਰਾ ਨਦਿਯੋ ਅਸ੍ਸ ਉਦਕੇ ਪਵਿਟ੍ਠਾਤਿ ਵਾ ਸਰਿਤੋਦਕੋ. ਏਵਂ ਤਂ ਤਤ੍ਥ ਜਾਨਨ੍ਤੀਤਿ ਤਂ ਰਹਦਂ ਤਤ੍ਥ ਏਵਂ ਜਾਨਨ੍ਤਿ. ਕਿਨ੍ਤਿ ਜਾਨਨ੍ਤਿ? ਸਮੁਦ੍ਦੋ ਸਰਿਤੋਦਕੋਤਿ ਏਵਂ ਜਾਨਨ੍ਤਿ.

ਇਤੋਤਿ ਸਿਨੇਰੁਤੋ ਵਾ ਤੇਸਂ ਨਿਸਿਨ੍ਨਟ੍ਠਾਨਤੋ ਵਾ. ਜਨੋਤਿ ਅਯਂ ਮਹਾਜਨੋ. ਏਕਨਾਮਾਤਿ ਇਨ੍ਦਨਾਮੇਨ ਏਕਨਾਮਾ. ਸਬ੍ਬੇਸਂ ਕਿਰ ਤੇਸਂ ਸਕ੍ਕਸ੍ਸ ਦੇਵਰਞ੍ਞੋ ਨਾਮਮੇਵ ਨਾਮਮਕਂਸੁ. ਅਸੀਤਿ ਦਸ ਏਕੋ ਚਾਤਿ ਏਕਨਵੁਤਿਜਨਾ. ਇਨ੍ਦਨਾਮਾਤਿ ਇਨ੍ਦੋਤਿ ਏਵਂਨਾਮਾ. ਬੁਦ੍ਧਂ ਆਦਿਚ੍ਚਬਨ੍ਧੁਨਨ੍ਤਿ ਕਿਲੇਸਨਿਦ੍ਦਾਪਗਮਨੇਨਾਪਿ ਬੁਦ੍ਧਂ. ਆਦਿਚ੍ਚੇਨ ਸਮਾਨਗੋਤ੍ਤਤਾਯਪਿ ਆਦਿਚ੍ਚਬਨ੍ਧੁਨਂ. ਕੁਸਲੇਨ ਸਮੇਕ੍ਖਸੀਤਿ ਅਨਵਜ੍ਜੇਨ ਨਿਪੁਣੇਨ ਵਾ ਸਬ੍ਬਞ੍ਞੁਤਞ੍ਞਾਣੇਨ ਮਹਾਜਨਂ ਓਲੋਕੇਸਿ. ਅਮਨੁਸ੍ਸਾਪਿ ਤਂ ਵਨ੍ਦਨ੍ਤੀਤਿ ਅਮਨੁਸ੍ਸਾਪਿ ਤਂ ‘‘ਸਬ੍ਬਞ੍ਞੁਤਞ੍ਞਾਣੇਨ ਮਹਾਜਨਂ ਓਲੋਕੇਸੀ’’ਤਿ ਵਤ੍ਵਾ ਵਨ੍ਦਨ੍ਤਿ. ਸੁਤਂ ਨੇਤਂ ਅਭਿਣ੍ਹਸੋਤਿ ਏਤਂ ਅਮ੍ਹੇਹਿ ਅਭਿਕ੍ਖਣਂ ਸੁਤਂ. ਜਿਨਂ ਵਨ੍ਦਥ ਗੋਤਮਂ, ਜਿਨਂ ਵਨ੍ਦਾਮ ਗੋਤਮਨ੍ਤਿ ਅਮ੍ਹੇਹਿ ਪੁਟ੍ਠਾ ਜਿਨਂ ਵਨ੍ਦਾਮ ਗੋਤਮਨ੍ਤਿ ਵਦਨ੍ਤਿ.

੨੭੯. ਯੇਨ ਪੇਤਾ ਪਵੁਚ੍ਚਨ੍ਤੀਤਿ ਪੇਤਾ ਨਾਮ ਕਾਲਙ੍ਕਤਾ, ਤੇ ਯੇਨ ਦਿਸਾਭਾਗੇਨ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ. ਪਿਸੁਣਾ ਪਿਟ੍ਠਿਮਂਸਿਕਾਤਿ ਪਿਸੁਣਾਵਾਚਾ ਚੇਵ ਪਿਟ੍ਠਿਮਂਸਂ ਖਾਦਨ੍ਤਾ ਵਿਯ ਪਰਮ੍ਮੁਖਾ ਗਰਹਕਾ ਚ. ਏਤੇ ਚ ਯੇਨ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ, ਸਬ੍ਬੇਪਿ ਹੇਤੇ ਦਕ੍ਖਿਣਦ੍ਵਾਰੇਨ ਨੀਹਰਿਤ੍ਵਾ ਦਕ੍ਖਿਣਤੋ ਨਗਰਸ੍ਸ ਡਯ੍ਹਨ੍ਤੁ ਵਾ ਛਿਜ੍ਜਨ੍ਤੁ ਵਾ ਹਞ੍ਞਨ੍ਤੁ ਵਾਤਿ ਏਵਂ ਵੁਚ੍ਚਨ੍ਤਿ. ਇਤੋ ਸਾ ਦਕ੍ਖਿਣਾ ਦਿਸਾਤਿ ਯੇਨ ਦਿਸਾਭਾਗੇਨ ਤੇ ਪੇਤਾ ਚ ਪਿਸੁਣਾਦਿਕਾ ਚ ਨੀਹਰਿਯਨ੍ਤੂਤਿ ਵੁਚ੍ਚਨ੍ਤਿ, ਇਤੋ ਸਾ ਦਕ੍ਖਿਣਾ ਦਿਸਾ. ਇਤੋਤਿ ਸਿਨੇਰੁਤੋ ਵਾ ਤੇਸਂ ਨਿਸਿਨ੍ਨਟ੍ਠਾਨਤੋ ਵਾ. ਕੁਮ੍ਭਣ੍ਡਾਨਨ੍ਤਿ ਤੇ ਕਿਰ ਦੇਵਾ ਮਹੋਦਰਾ ਹੋਨ੍ਤਿ, ਰਹਸ੍ਸਙ੍ਗਮ੍ਪਿ ਚ ਨੇਸਂ ਕੁਮ੍ਭੋ ਵਿਯ ਮਹਨ੍ਤਂ ਹੋਤਿ. ਤਸ੍ਮਾ ਕੁਮ੍ਭਣ੍ਡਾਤਿ ਵੁਚ੍ਚਨ੍ਤਿ.

੨੮੦. ਯਤ੍ਥ ਚੋਗ੍ਗਚ੍ਛਤਿ ਸੂਰਿਯੋਤਿ ਯਸ੍ਮਿਂ ਦਿਸਾਭਾਗੇ ਸੂਰਿਯੋ ਅਤ੍ਥਂ ਗਚ੍ਛਤਿ.

੨੮੧. ਯੇਨਾਤਿ ਯੇਨ ਦਿਸਾਭਾਗੇਨ. ਮਹਾਨੇਰੂਤਿ ਮਹਾਸਿਨੇਰੁ ਪਬ੍ਬਤਰਾਜਾ. ਸੁਦਸ੍ਸਨੋਤਿ ਸੋਵਣ੍ਣਮਯਤ੍ਤਾ ਸੁਨ੍ਦਰਦਸ੍ਸਨੋ. ਸਿਨੇਰੁਸ੍ਸ ਹਿ ਪਾਚੀਨਪਸ੍ਸਂ ਰਜਤਮਯਂ, ਦਕ੍ਖਿਣਪਸ੍ਸਂ ਮਣਿਮਯਂ, ਪਚ੍ਛਿਮਪਸ੍ਸਂ ਫਲਿਕਮਯਂ, ਉਤ੍ਤਰਪਸ੍ਸਂ ਸੋਵਣ੍ਣਮਯਂ, ਤਂ ਮਨੁਞ੍ਞਦਸ੍ਸਨਂ ਹੋਤਿ. ਤਸ੍ਮਾ ਯੇਨ ਦਿਸਾਭਾਗੇਨ ਸਿਨੇਰੁ ਸੁਦਸ੍ਸਨੋਤਿ ਅਯਮੇਤ੍ਥਤ੍ਥੋ. ਮਨੁਸ੍ਸਾ ਤਤ੍ਥ ਜਾਯਨ੍ਤੀਤਿ ਤਤ੍ਥ ਉਤ੍ਤਰਕੁਰੁਮ੍ਹਿ ਮਨੁਸ੍ਸਾ ਜਾਯਨ੍ਤਿ. ਅਮਮਾਤਿ ਵਤ੍ਥਾਭਰਣਪਾਨਭੋਜਨਾਦੀਸੁਪਿ ਮਮਤ੍ਤਵਿਰਹਿਤਾ. ਅਪਰਿਗ੍ਗਹਾਤਿ ਇਤ੍ਥਿਪਰਿਗ੍ਗਹੇਨ ਅਪਰਿਗ੍ਗਹਾ. ਤੇਸਂ ਕਿਰ ‘‘ਅਯਂ ਮਯ੍ਹਂ ਭਰਿਯਾ’’ਤਿ ਮਮਤ੍ਤਂ ਨ ਹੋਤਿ, ਮਾਤਰਂ ਵਾ ਭਗਿਨਿਂ ਵਾ ਦਿਸ੍ਵਾ ਛਨ੍ਦਰਾਗੋ ਨੁਪ੍ਪਜ੍ਜਤਿ.

ਨਪਿ ਨੀਯਨ੍ਤਿ ਨਙ੍ਗਲਾਤਿ ਨਙ੍ਗਲਾਨਿਪਿ ਤਤ੍ਥ ‘‘ਕਸਿਕਮ੍ਮਂ ਕਰਿਸ੍ਸਾਮਾ’’ਤਿ ਨ ਖੇਤ੍ਤਂ ਨੀਯਨ੍ਤਿ. ਅਕਟ੍ਠਪਾਕਿਮਨ੍ਤਿ ਅਕਟ੍ਠੇ ਭੂਮਿਭਾਗੇ ਅਰਞ੍ਞੇ ਸਯਮੇਵ ਜਾਤਂ. ਤਣ੍ਡੁਲਪ੍ਫਲਨ੍ਤਿ ਤਣ੍ਡੁਲਾਵ ਤਸ੍ਸ ਫਲਂ ਹੋਤਿ.

ਤੁਣ੍ਡਿਕੀਰੇ ਪਚਿਤ੍ਵਾਨਾਤਿ ਉਕ੍ਖਲਿਯਂ ਆਕਿਰਿਤ੍ਵਾ ਨਿਦ੍ਧੁਮਙ੍ਗਾਰੇਨ ਅਗ੍ਗਿਨਾ ਪਚਿਤ੍ਵਾ. ਤਤ੍ਥ ਕਿਰ ਜੋਤਿਕਪਾਸਾਣਾ ਨਾਮ ਹੋਨ੍ਤਿ. ਅਥ ਖੋ ਤੇ ਤਯੋ ਪਾਸਾਣੇ ਠਪੇਤ੍ਵਾ ਤਂ ਉਕ੍ਖਲਿਂ ਆਰੋਪੇਨ੍ਤਿ. ਪਾਸਾਣੇਹਿ ਤੇਜੋ ਸਮੁਟ੍ਠਹਿਤ੍ਵਾ ਤਂ ਪਚਤਿ. ਤਤੋ ਭੁਞ੍ਜਨ੍ਤਿ ਭੋਜਨਨ੍ਤਿ ਤਤੋ ਉਕ੍ਖਲਿਤੋ ਭੋਜਨਮੇਵ ਭੁਞ੍ਜਨ੍ਤਿ, ਅਞ੍ਞੋ ਸੂਪੋ ਵਾ ਬ੍ਯਞ੍ਜਨਂ ਵਾ ਨ ਹੋਤਿ, ਭੁਞ੍ਜਨ੍ਤਾਨਂ ਚਿਤ੍ਤਾਨੁਕੂਲੋਯੇਵਸ੍ਸ ਰਸੋ ਹੋਤਿ. ਤੇ ਤਂ ਠਾਨਂ ਸਮ੍ਪਤ੍ਤਾਨਂ ਦੇਨ੍ਤਿਯੇਵ, ਮਚ੍ਛਰਿਯਚਿਤ੍ਤਂ ਨਾਮ ਨ ਹੋਤਿ. ਬੁਦ੍ਧਪਚ੍ਚੇਕਬੁਦ੍ਧਾਦਯੋਪਿ ਮਹਿਦ੍ਧਿਕਾ ਤਤ੍ਥ ਗਨ੍ਤ੍ਵਾ ਪਿਣ੍ਡਪਾਤਂ ਗਣ੍ਹਨ੍ਤਿ.

ਗਾਵਿਂ ਏਕਖੁਰਂ ਕਤ੍ਵਾਤਿ ਗਾਵਿਂ ਗਹੇਤ੍ਵਾ ਏਕਖੁਰਂ ਵਾਹਨਮੇਵ ਕਤ੍ਵਾ. ਤਂ ਅਭਿਰੁਯ੍ਹ ਵੇਸ੍ਸਵਣਸ੍ਸ ਪਰਿਚਾਰਕਾ ਯਕ੍ਖਾ. ਅਨੁਯਨ੍ਤਿ ਦਿਸੋਦਿਸਨ੍ਤਿ ਤਾਯ ਤਾਯ ਦਿਸਾਯ ਚਰਨ੍ਤਿ. ਪਸੁਂ ਏਕਖੁਰਂ ਕਤ੍ਵਾਤਿ ਠਪੇਤ੍ਵਾ ਗਾਵਿਂ ਅਵਸੇਸਚਤੁਪ੍ਪਦਜਾਤਿਕਂ ਪਸੁਂ ਏਕਖੁਰਂ ਵਾਹਨਮੇਵ ਕਤ੍ਵਾ ਦਿਸੋਦਿਸਂ ਅਨੁਯਨ੍ਤਿ.

ਇਤ੍ਥਿਂ ਵਾ ਵਾਹਨਂ ਕਤ੍ਵਾਤਿ ਯੇਭੁਯ੍ਯੇਨ ਗਬ੍ਭਿਨਿਂ ਮਾਤੁਗਾਮਂ ਵਾਹਨਂ ਕਰਿਤ੍ਵਾ. ਤਸ੍ਸਾ ਪਿਟ੍ਠਿਯਾ ਨਿਸੀਦਿਤ੍ਵਾ ਚਰਨ੍ਤਿ. ਤਸ੍ਸਾ ਕਿਰ ਪਿਟ੍ਠਿ ਓਨਮਿਤੁਂ ਸਹਤਿ. ਇਤਰਾ ਪਨ ਇਤ੍ਥਿਯੋ ਯਾਨੇ ਯੋਜੇਨ੍ਤਿ. ਪੁਰਿਸਂ ਵਾਹਨਂ ਕਤ੍ਵਾਤਿ ਪੁਰਿਸੇ ਗਹੇਤ੍ਵਾ ਯਾਨੇ ਯੋਜੇਨ੍ਤਿ. ਗਣ੍ਹਨ੍ਤਾ ਚ ਸਮ੍ਮਾਦਿਟ੍ਠਿਕੇ ਗਹੇਤੁਂ ਨ ਸਕ੍ਕੋਨ੍ਤਿ. ਯੇਭੁਯ੍ਯੇਨ ਪਚ੍ਚਨ੍ਤਿਮਮਿਲਕ੍ਖੁਵਾਸਿਕੇ ਗਣ੍ਹਨ੍ਤਿ. ਅਞ੍ਞਤਰੋ ਕਿਰੇਤ੍ਥ ਜਾਨਪਦੋ ਏਕਸ੍ਸ ਥੇਰਸ੍ਸ ਸਮੀਪੇ ਨਿਸੀਦਿਤ੍ਵਾ ਨਿਦ੍ਦਾਯਤਿ, ਥੇਰੋ ‘‘ਉਪਾਸਕ ਅਤਿਵਿਯ ਨਿਦ੍ਦਾਯਸੀ’’ਤਿ ਪੁਚ੍ਛਿ. ‘‘ਅਜ੍ਜ, ਭਨ੍ਤੇ, ਸਬ੍ਬਰਤ੍ਤਿਂ ਵੇਸ੍ਸਵਣਦਾਸੇਹਿ ਕਿਲਮਿਤੋਮ੍ਹੀ’’ਤਿ ਆਹ.

ਕੁਮਾਰਿਂ ਵਾਹਨਂ ਕਤ੍ਵਾਤਿ ਕੁਮਾਰਿਯੋ ਗਹੇਤ੍ਵਾ ਏਕਖੁਰਂ ਵਾਹਨਂ ਕਤ੍ਵਾ ਰਥੇ ਯੋਜੇਨ੍ਤਿ. ਕੁਮਾਰਵਾਹਨੇਪਿ ਏਸੇਵ ਨਯੋ. ਪਚਾਰਾ ਤਸ੍ਸ ਰਾਜਿਨੋਤਿ ਤਸ੍ਸ ਰਞ੍ਞੋ ਪਰਿਚਾਰਿਕਾ. ਹਤ੍ਥਿਯਾਨਂ ਅਸ੍ਸਯਾਨਨ੍ਤਿ ਨ ਕੇਵਲਂ ਗੋਯਾਨਾਦੀਨਿਯੇਵ, ਹਤ੍ਥਿਅਸ੍ਸਯਾਨਾਦੀਨਿਪਿ ਅਭਿਰੁਹਿਤ੍ਵਾ ਵਿਚਰਨ੍ਤਿ. ਦਿਬ੍ਬਂ ਯਾਨਨ੍ਤਿ ਅਞ੍ਞਮ੍ਪਿ ਨੇਸਂ ਬਹੁਵਿਧਂ ਦਿਬ੍ਬਯਾਨਂ ਉਪਟ੍ਠਿਤਮੇਵ ਹੋਤਿ, ਏਤਾਨਿ ਤਾਵ ਨੇਸਂ ਉਪਕਪ੍ਪਨਯਾਨਾਨਿ. ਤੇ ਪਨ ਪਾਸਾਦੇ ਵਰਸਯਨਮ੍ਹਿ ਨਿਪਨ੍ਨਾਪਿ ਪੀਠਸਿਵਿਕਾਦੀਸੁ ਚ ਨਿਸਿਨ੍ਨਾਪਿ ਵਿਚਰਨ੍ਤਿ. ਤੇਨ ਵੁਤ੍ਤਂ ‘‘ਪਾਸਾਦਾ ਸਿਵਿਕਾ ਚੇਵਾ’’ਤਿ. ਮਹਾਰਾਜਸ੍ਸ ਯਸਸ੍ਸਿਨੋਤਿ ਏਵਂ ਆਨੁਭਾਵਸਮ੍ਪਨ੍ਨਸ੍ਸ ਯਸਸ੍ਸਿਨੋ ਮਹਾਰਾਜਸ੍ਸ ਏਤਾਨਿ ਯਾਨਾਨਿ ਨਿਬ੍ਬਤ੍ਤਨ੍ਤਿ.

ਤਸ੍ਸ ਚ ਨਗਰਾ ਅਹੁ ਅਨ੍ਤਲਿਕ੍ਖੇ ਸੁਮਾਪਿਤਾਤਿ ਤਸ੍ਸ ਰਞ੍ਞੋ ਆਕਾਸੇ ਸੁਟ੍ਠੁ ਮਾਪਿਤਾ ਏਤੇ ਆਟਾਨਾਟਾਦਿਕਾ ਨਗਰਾ ਅਹੇਸੁਂ, ਨਗਰਾਨਿ ਭਵਿਂਸੂਤਿ ਅਤ੍ਥੋ. ਏਕਞ੍ਹਿਸ੍ਸ ਨਗਰਂ ਆਟਾਨਾਟਾ ਨਾਮ ਆਸਿ, ਏਕਂ ਕੁਸਿਨਾਟਾ ਨਾਮ, ਏਕਂ ਪਰਕੁਸਿਨਾਟਾ ਨਾਮ, ਏਕਂ ਨਾਟਸੂਰਿਯਾ ਨਾਮ, ਏਕਂ ਪਰਕੁਸਿਟਨਾਟਾ ਨਾਮ.

ਉਤ੍ਤਰੇਨ ਕਸਿਵਨ੍ਤੋਤਿ ਤਸ੍ਮਿਂ ਠਤ੍ਵਾ ਉਜੁਂ ਉਤ੍ਤਰਦਿਸਾਯ ਕਸਿਵਨ੍ਤੋ ਨਾਮ ਅਞ੍ਞਂ ਨਗਰਂ. ਜਨੋਘਮਪਰੇਨ ਚਾਤਿ ਏਤਸ੍ਸ ਅਪਰਭਾਗੇ ਜਨੋਘਂ ਨਾਮ ਅਞ੍ਞਂ ਨਗਰਂ. ਨਵਨਵਤਿਯੋਤਿ ਅਞ੍ਞਮ੍ਪਿ ਨਵਨਵਤਿਯੋ ਨਾਮ ਏਕਂ ਨਗਰਂ. ਅਪਰਂ ਅਮ੍ਬਰਅਮ੍ਬਰਵਤਿਯੋ ਨਾਮ. ਆਲ਼ਕਮਨ੍ਦਾਤਿ ਅਪਰਮ੍ਪਿ ਆਲ਼ਕਮਨ੍ਦਾ ਨਾਮ ਰਾਜਧਾਨੀ.

ਤਸ੍ਮਾ ਕੁਵੇਰੋ ਮਹਾਰਾਜਾਤਿ ਅਯਂ ਕਿਰ ਅਨੁਪ੍ਪਨ੍ਨੇ ਬੁਦ੍ਧੇ ਕੁਵੇਰੋ ਨਾਮ ਬ੍ਰਾਹ੍ਮਣੋ ਹੁਤ੍ਵਾ ਉਚ੍ਛੁਵਪ੍ਪਂ ਕਾਰੇਤ੍ਵਾ ਸਤ੍ਤ ਯਨ੍ਤਾਨਿ ਯੋਜੇਸਿ. ਏਕਿਸ੍ਸਾਯ ਯਨ੍ਤਸਾਲਾਯ ਉਟ੍ਠਿਤਂ ਆਯਂ ਆਗਤਾਗਤਸ੍ਸ ਮਹਾਜਨਸ੍ਸ ਦਤ੍ਵਾ ਪੁਞ੍ਞਂ ਅਕਾਸਿ. ਅਵਸੇਸਸਾਲਾਹਿ ਤਤ੍ਥੇਵ ਬਹੁਤਰੋ ਆਯੋ ਉਟ੍ਠਾਸਿ, ਸੋ ਤੇਨ ਪਸੀਦਿਤ੍ਵਾ ਅਵਸੇਸਸਾਲਾਸੁਪਿ ਉਪ੍ਪਜ੍ਜਨਕਂ ਗਹੇਤ੍ਵਾ ਵੀਸਤਿ ਵਸ੍ਸਸਹਸ੍ਸਾਨਿ ਦਾਨਂ ਅਦਾਸਿ. ਸੋ ਕਾਲਂ ਕਤ੍ਵਾ ਚਾਤੁਮਹਾਰਾਜਿਕੇਸੁ ਕੁਵੇਰੋ ਨਾਮ ਦੇਵਪੁਤ੍ਤੋ ਜਾਤੋ. ਅਪਰਭਾਗੇ ਵਿਸਾਣਾਯ ਰਾਜਧਾਨਿਯਾ ਰਜ੍ਜਂ ਕਾਰੇਸਿ. ਤਤੋ ਪਟ੍ਠਾਯ ਵੇਸ੍ਸਵਣੋਤਿ ਵੁਚ੍ਚਤਿ.

ਪਚ੍ਚੇਸਨ੍ਤੋ ਪਕਾਸੇਨ੍ਤੀਤਿ ਪਟਿਏਸਨ੍ਤੋ ਵਿਸੁਂ ਵਿਸੁਂ ਅਤ੍ਥੇ ਉਪਪਰਿਕ੍ਖਮਾਨਾ ਅਨੁਸਾਸਮਾਨਾ ਅਞ੍ਞੇ ਦ੍ਵਾਦਸ ਯਕ੍ਖਰਟ੍ਠਿਕਾ ਪਕਾਸੇਨ੍ਤਿ. ਤੇ ਕਿਰ ਯਕ੍ਖਰਟ੍ਠਿਕਾ ਸਾਸਨਂ ਗਹੇਤ੍ਵਾ ਦ੍ਵਾਦਸਨ੍ਨਂ ਯਕ੍ਖਦੋਵਾਰਿਕਾਨਂ ਨਿਵੇਦੇਨ੍ਤਿ. ਯਕ੍ਖਦੋਵਾਰਿਕਾ ਤਂ ਸਾਸਨਂ ਮਹਾਰਾਜਸ੍ਸ ਨਿਵੇਦੇਨ੍ਤਿ. ਇਦਾਨਿ ਤੇਸਂ ਯਕ੍ਖਰਟ੍ਠਿਕਾਨਂ ਨਾਮਂ ਦਸ੍ਸੇਨ੍ਤੋ ਤਤੋਲਾਤਿਆਦਿਮਾਹ. ਤੇਸੁ ਕਿਰ ਏਕੋ ਤਤੋਲਾ ਨਾਮ, ਏਕੋ ਤਤ੍ਤਲਾ ਨਾਮ, ਏਕੋ ਤਤੋਤਲਾ ਨਾਮ, ਏਕੋ ਓਜਸਿ ਨਾਮ, ਏਕੋ ਤੇਜਸਿ ਨਾਮ, ਏਕੋ ਤਤੋਜਸੀ ਨਾਮ. ਸੂਰੋ ਰਾਜਾਤਿ ਏਕੋ ਸੂਰੋ ਨਾਮ, ਏਕੋ ਰਾਜਾ ਨਾਮ, ਏਕੋ ਸੂਰੋਰਾਜਾ ਨਾਮ, ਅਰਿਟ੍ਠੋ ਨੇਮੀਤਿ ਏਕੋ ਅਰਿਟ੍ਠੋ ਨਾਮ, ਏਕੋ ਨੇਮਿ ਨਾਮ, ਏਕੋ ਅਰਿਟ੍ਠਨੇਮਿ ਨਾਮ.

ਰਹਦੋਪਿ ਤਤ੍ਥ ਧਰਣੀ ਨਾਮਾਤਿ ਤਤ੍ਥ ਪਨੇਕੋ ਨਾਮੇਨ ਧਰਣੀ ਨਾਮ ਉਦਕਰਹਦੋ ਅਤ੍ਥਿ, ਪਣ੍ਣਾਸਯੋਜਨਾ ਮਹਾਪੋਕ੍ਖਰਣੀ ਅਤ੍ਥੀਤਿ ਵੁਤ੍ਤਂ ਹੋਤਿ. ਯਤੋ ਮੇਘਾ ਪਵਸ੍ਸਨ੍ਤੀਤਿ ਯਤੋ ਪੋਕ੍ਖਰਣਿਤੋ ਉਦਕਂ ਗਹੇਤ੍ਵਾ ਮੇਘਾ ਪਵਸ੍ਸਨ੍ਤਿ. ਵਸ੍ਸਾ ਯਤੋ ਪਤਾਯਨ੍ਤੀਤਿ ਯਤੋ ਵੁਟ੍ਠਿਯੋ ਅਵਤ੍ਥਰਮਾਨਾ ਨਿਗਚ੍ਛਨ੍ਤਿ. ਮੇਘੇਸੁ ਕਿਰ ਉਟ੍ਠਿਤੇਸੁ ਤਤੋ ਪੋਕ੍ਖਰਣਿਤੋ ਪੁਰਾਣਉਦਕਂ ਭਸ੍ਸਤਿ. ਉਪਰਿ ਮੇਘੋ ਉਟ੍ਠਹਿਤ੍ਵਾ ਤਂ ਪੋਕ੍ਖਰਣਿਂ ਨਵੋਦਕੇਨ ਪੂਰੇਤਿ. ਪੁਰਾਣੋਦਕਂ ਹੇਟ੍ਠਿਮਂ ਹੁਤ੍ਵਾ ਨਿਕ੍ਖਮਤਿ. ਪਰਿਪੁਣ੍ਣਾਯ ਪੋਕ੍ਖਰਣਿਯਾ ਵਲਾਹਕਾ ਵਿਗਚ੍ਛਨ੍ਤਿ. ਸਭਾਪੀਤਿ ਸਭਾ. ਤਸ੍ਸਾ ਕਿਰ ਪੋਕ੍ਖਰਣਿਯਾ ਤੀਰੇ ਸਾਲਵਤਿਯਾ ਨਾਮ ਲਤਾਯ ਪਰਿਕ੍ਖਿਤ੍ਤੋ ਦ੍ਵਾਦਸਯੋਜਨਿਕੋ ਰਤਨਮਣ੍ਡਪੋ ਅਤ੍ਥਿ, ਤਂ ਸਨ੍ਧਾਯੇਤਂ ਵੁਤ੍ਤਂ.

ਪਯਿਰੁਪਾਸਨ੍ਤੀਤਿ ਨਿਸੀਦਨ੍ਤਿ. ਤਤ੍ਥ ਨਿਚ੍ਚਫਲਾ ਰੁਕ੍ਖਾਤਿ ਤਸ੍ਮਿਂ ਠਾਨੇ ਤਂ ਮਣ੍ਡਪਂ ਪਰਿਵਾਰੇਤ੍ਵਾ ਸਦਾ ਫਲਿਤਾ ਅਮ੍ਬਜਮ੍ਬੁਆਦਯੋ ਰੁਕ੍ਖਾ ਨਿਚ੍ਚਪੁਪ੍ਫਿਤਾ ਚ ਚਮ੍ਪਕਮਾਲਾਦਯੋਤਿ ਦਸ੍ਸੇਤਿ. ਨਾਨਾਦਿਜਗਣਾਯੁਤਾਤਿ ਵਿਵਿਧਪਕ੍ਖਿਸਙ੍ਘਸਮਾਕੁਲਾ. ਮਯੂਰਕੋਞ੍ਚਾਭਿਰੁਦਾਤਿ ਮਯੂਰੇਹਿ ਕੋਞ੍ਚਸਕੁਣੇਹਿ ਚ ਅਭਿਰੁਦਾ ਉਪਗੀਤਾ.

ਜੀਵਞ੍ਜੀਵਕਸਦ੍ਦੇਤ੍ਥਾਤਿ ‘‘ਜੀਵ ਜੀਵਾ’’ਤਿ ਏਵਂ ਵਿਰਵਨ੍ਤਾਨਂ ਜੀਵਞ੍ਜੀਵਕਸਕੁਣਾਨਮ੍ਪਿ ਏਤ੍ਥ ਸਦ੍ਦੋ ਅਤ੍ਥਿ. ਓਟ੍ਠਵਚਿਤ੍ਤਕਾਤਿ ‘‘ਉਟ੍ਠੇਹਿ, ਚਿਤ੍ਤ, ਉਟ੍ਠੇਹਿ ਚਿਤ੍ਤਾ’’ਤਿ ਏਵਂ ਵਸ੍ਸਮਾਨਾ ਉਟ੍ਠਵਚਿਤ੍ਤਕਸਕੁਣਾਪਿ ਤਤ੍ਥ ਵਿਚਰਨ੍ਤਿ. ਕੁਕ੍ਕੁਟਕਾਤਿ ਵਨਕੁਕ੍ਕੁਟਕਾ. ਕੁਲ਼ੀਰਕਾਤਿ ਸੁਵਣ੍ਣਕਕ੍ਕਟਕਾ. ਵਨੇਤਿ ਪਦੁਮਵਨੇ. ਪੋਕ੍ਖਰਸਾਤਕਾਤਿ ਪੋਕ੍ਖਰਸਾਤਕਾ ਨਾਮ ਸਕੁਣਾ.

ਸੁਕਸਾਲ਼ਿਕਸਦ੍ਦੇਤ੍ਥਾਤਿ ਸੁਕਾਨਞ੍ਚ ਸਾਲ਼ਿਕਾਨਞ੍ਚ ਸਦ੍ਦੋ ਏਤ੍ਥ. ਦਣ੍ਡਮਾਣਵਕਾਨਿ ਚਾਤਿ ਮਨੁਸ੍ਸਮੁਖਸਕੁਣਾ. ਤੇ ਕਿਰ ਦ੍ਵੀਹਿ ਹਤ੍ਥੇਹਿ ਸੁਵਣ੍ਣਦਣ੍ਡਂ ਗਹੇਤ੍ਵਾ ਏਕਂ ਪੋਕ੍ਖਰਪਤ੍ਤਂ ਅਕ੍ਕਮਿਤ੍ਵਾ ਅਨਨ੍ਤਰੇ ਪੋਕ੍ਖਰਪਤ੍ਤੇ ਸੁਵਣ੍ਣਦਣ੍ਡਂ ਨਿਕ੍ਖਿਪਨ੍ਤਾ ਵਿਚਰਨ੍ਤਿ. ਸੋਭਤਿ ਸਬ੍ਬਕਾਲਂ ਸਾਤਿ ਸਾ ਪੋਕ੍ਖਰਣੀ ਸਬ੍ਬਕਾਲਂ ਸੋਭਤਿ. ਕੁਵੇਰਨਲ਼ਿਨੀਤਿ ਕੁਵੇਰਸ੍ਸ ਨਲ਼ਿਨੀ ਪਦੁਮਸਰਭੂਤਾ, ਸਾ ਧਰਣੀ ਨਾਮ ਪੋਕ੍ਖਰਣੀ ਸਦਾ ਨਿਰਨ੍ਤਰਂ ਸੋਭਤਿ.

੨੮੨. ਯਸ੍ਸ ਕਸ੍ਸਚੀਤਿ ਇਦਂ ਵੇਸ੍ਸਵਣੋ ਆਟਾਨਾਟਿਯਂ ਰਕ੍ਖਂ ਨਿਟ੍ਠਪੇਤ੍ਵਾ ਤਸ੍ਸਾ ਪਰਿਕਮ੍ਮਂ ਦਸ੍ਸੇਨ੍ਤੋ ਆਹ. ਤਤ੍ਥ ਸੁਗ੍ਗਹਿਤਾਤਿ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਪਰਿਸੋਧੇਤ੍ਵਾ ਸੁਟ੍ਠੁ ਉਗ੍ਗਹਿਤਾ. ਸਮਤ੍ਤਾ ਪਰਿਯਾਪੁਤਾਤਿ ਪਦਬ੍ਯਞ੍ਜਨਾਨਿ ਅਹਾਪੇਤ੍ਵਾ ਪਰਿਪੁਣ੍ਣਂ ਉਗ੍ਗਹਿਤਾ. ਅਤ੍ਥਮ੍ਪਿ ਪਾਲ਼ਿਮ੍ਪਿ ਵਿਸਂਵਾਦੇਤ੍ਵਾ ਸਬ੍ਬਸੋ ਵਾ ਪਨ ਅਪ੍ਪਗੁਣਂ ਕਤ੍ਵਾ ਭਣਨ੍ਤਸ੍ਸ ਹਿ ਪਰਿਤ੍ਤਂ ਤੇਜਵਨ੍ਤਂ ਨ ਹੋਤਿ, ਸਬ੍ਬਸੋ ਪਗੁਣਂ ਕਤ੍ਵਾ ਭਣਨ੍ਤਸ੍ਸੇਵ ਤੇਜਵਨ੍ਤਂ ਹੋਤਿ. ਲਾਭਹੇਤੁ ਉਗ੍ਗਹੇਤ੍ਵਾ ਭਣਨ੍ਤਸ੍ਸਾਪਿ ਅਤ੍ਥਂ ਨ ਸਾਧੇਤਿ, ਨਿਸ੍ਸਰਣਪਕ੍ਖੇ ਠਤ੍ਵਾ ਮੇਤ੍ਤਂ ਪੁਰੇਚਾਰਿਕਂ ਕਤ੍ਵਾ ਭਣਨ੍ਤਸ੍ਸੇਵ ਅਤ੍ਥਾਯ ਹੋਤੀਤਿ ਦਸ੍ਸੇਤਿ. ਯਕ੍ਖਪਚਾਰੋਤਿ ਯਕ੍ਖਪਰਿਚਾਰਕੋ.

ਵਤ੍ਥੁਂ ਵਾਤਿ ਘਰਵਤ੍ਥੁਂ ਵਾ. ਵਾਸਂ ਵਾਤਿ ਤਤ੍ਥ ਨਿਬਦ੍ਧਵਾਸਂ ਵਾ. ਸਮਿਤਿਨ੍ਤਿ ਸਮਾਗਮਂ. ਅਨਾਵਯ੍ਹਨ੍ਤਿ ਨ ਆਵਾਹਯੁਤ੍ਤਂ. ਅਵਿਵਯ੍ਹਨ੍ਤਿ ਨ ਵਿਵਾਹਯੁਤ੍ਤਂ. ਤੇਨ ਸਹ ਆਵਾਹਵਿਵਾਹਂ ਨ ਕਰੇਯ੍ਯੁਨ੍ਤਿ ਅਤ੍ਥੋ. ਅਤ੍ਤਾਹਿਪਿ ਪਰਿਪੁਣ੍ਣਾਹੀਤਿ ‘‘ਕਲ਼ਾਰਕ੍ਖਿ ਕਲ਼ਾਰਦਨ੍ਤਾ’’ਤਿ ਏਵਂ ਏਤੇਸਂ ਅਤ੍ਤਭਾਵਂ ਉਪਨੇਤ੍ਵਾ ਵੁਤ੍ਤਾਹਿ ਪਰਿਪੁਣ੍ਣਬ੍ਯਞ੍ਜਨਾਹਿ ਪਰਿਭਾਸਾਹਿ ਪਰਿਭਾਸੇਯ੍ਯੁਂ ਯਕ੍ਖਅਕ੍ਕੋਸੇਹਿ ਨਾਮ ਅਕ੍ਕੋਸੇਯ੍ਯੁਨ੍ਤਿ ਅਤ੍ਥੋ. ਰਿਤ੍ਤਮ੍ਪਿਸ੍ਸ ਪਤ੍ਤਨ੍ਤਿ ਭਿਕ੍ਖੂਨਂ ਪਤ੍ਤਸਦਿਸਮੇਵ ਲੋਹਪਤ੍ਤਂ ਹੋਤਿ. ਤਂ ਸੀਸੇ ਨਿਕ੍ਕੁਜ੍ਜਿਤਂ ਯਾਵ ਗਲਵਾਟਕਾ ਭਸ੍ਸਤਿ. ਅਥ ਨਂ ਮਜ੍ਝੇ ਅਯੋਖੀਲੇਨ ਆਕੋਟੇਨ੍ਤਿ.

ਚਣ੍ਡਾਤਿ ਕੋਧਨਾ. ਰੁਦ੍ਧਾਤਿ ਵਿਰੁਦ੍ਧਾ. ਰਭਸਾਤਿ ਕਰਣੁਤ੍ਤਰਿਯਾ. ਨੇਵ ਮਹਾਰਾਜਾਨਂ ਆਦਿਯਨ੍ਤੀਤਿ ਵਚਨਂ ਨ ਗਣ੍ਹਨ੍ਤਿ, ਆਣਂ ਨ ਕਰੋਨ੍ਤਿ. ਮਹਾਰਾਜਾਨਂ ਪੁਰਿਸਕਾਨਨ੍ਤਿ ਅਟ੍ਠਵੀਸਤਿਯਕ੍ਖਸੇਨਾਪਤੀਨਂ. ਪੁਰਿਸਕਾਨਨ੍ਤਿ ਯਕ੍ਖਸੇਨਾਪਤੀਨਂ ਯੇ ਮਨਸ੍ਸਾ ਤੇਸਂ. ਅਵਰੁਦ੍ਧਾ ਨਾਮਾਤਿ ਪਚ੍ਚਾਮਿਤ੍ਤਾ ਵੇਰਿਨੋ. ਉਜ੍ਝਾਪੇਤਬ੍ਬਨ੍ਤਿ ਪਰਿਤ੍ਤਂ ਵਤ੍ਵਾ ਅਮਨੁਸ੍ਸੇ ਪਟਿਕ੍ਕਮਾਪੇਤੁਂ ਅਸਕ੍ਕੋਨ੍ਤੇਨ ਏਤੇਸਂ ਯਕ੍ਖਾਨਂ ਉਜ੍ਝਾਪੇਤਬ੍ਬਂ, ਏਤੇ ਜਾਨਾਪੇਤਬ੍ਬਾਤਿ ਅਤ੍ਥੋ.

ਪਰਿਤ੍ਤਪਰਿਕਮ੍ਮਕਥਾ

ਇਧ ਪਨ ਠਤ੍ਵਾ ਪਰਿਤ੍ਤਸ੍ਸ ਪਰਿਕਮ੍ਮਂ ਕਥੇਤਬ੍ਬਂ. ਪਠਮਮੇਵ ਹਿ ਆਟਾਨਾਟਿਯਸੁਤ੍ਤਂ ਨ ਭਣਿਤਬ੍ਬਂ, ਮੇਤ੍ਤਸੁਤ੍ਤਂ ਧਜਗ੍ਗਸੁਤ੍ਤਂ ਰਤਨਸੁਤ੍ਤਨ੍ਤਿ ਇਮਾਨਿ ਸਤ੍ਤਾਹਂ ਭਣਿਤਬ੍ਬਾਨਿ. ਸਚੇ ਮੁਞ੍ਚਤਿ, ਸੁਨ੍ਦਰਂ. ਨੋ ਚੇ ਮੁਞ੍ਚਤਿ, ਆਟਾਨਾਟਿਯਸੁਤ੍ਤਂ ਭਣਿਤਬ੍ਬਂ, ਤਂ ਭਣਨ੍ਤੇਨ ਭਿਕ੍ਖੁਨਾ ਪਿਟ੍ਠਂ ਵਾ ਮਂਸਂ ਵਾ ਨ ਖਾਦਿਤਬ੍ਬਂ, ਸੁਸਾਨੇ ਨ ਵਸਿਤਬ੍ਬਂ. ਕਸ੍ਮਾ? ਅਮਨੁਸ੍ਸਾ ਓਕਾਸਂ ਲਭਨ੍ਤਿ. ਪਰਿਤ੍ਤਕਰਣਟ੍ਠਾਨਂ ਹਰਿਤੁਪਲਿਤ੍ਤਂ ਕਾਰੇਤ੍ਵਾ ਤਤ੍ਥ ਪਰਿਸੁਦ੍ਧਂ ਆਸਨਂ ਪਞ੍ਞਪੇਤ੍ਵਾ ਨਿਸੀਦਿਤਬ੍ਬਂ.

ਪਰਿਤ੍ਤਕਾਰਕੋ ਭਿਕ੍ਖੁ ਵਿਹਾਰਤੋ ਘਰਂ ਨੇਨ੍ਤੇਹਿ ਫਲਕਾਵੁਧੇਹਿ ਪਰਿਵਾਰੇਤ੍ਵਾ ਨੇਤਬ੍ਬੋ. ਅਬ੍ਭੋਕਾਸੇ ਨਿਸੀਦਿਤ੍ਵਾ ਨ ਵਤ੍ਤਬ੍ਬਂ, ਦ੍ਵਾਰਵਾਤਪਾਨਾਨਿ ਪਿਦਹਿਤ੍ਵਾ ਨਿਸਿਨ੍ਨੇਨ ਆਵੁਧਹਤ੍ਥੇਹਿ ਸਂਪਰਿਵਾਰਿਤੇਨ ਮੇਤ੍ਤਚਿਤ੍ਤਂ ਪੁਰੇਚਾਰਿਕਂ ਕਤ੍ਵਾ ਵਤ੍ਤਬ੍ਬਂ. ਪਠਮਂ ਸਿਕ੍ਖਾਪਦਾਨਿ ਗਾਹਾਪੇਤ੍ਵਾ ਸੀਲੇ ਪਤਿਟ੍ਠਿਤਸ੍ਸ ਪਰਿਤ੍ਤਂ ਕਾਤਬ੍ਬਂ. ਏਵਮ੍ਪਿ ਮੋਚੇਤੁਂ ਅਸਕ੍ਕੋਨ੍ਤੇਨ ਵਿਹਾਰਂ ਆਨੇਤ੍ਵਾ ਚੇਤਿਯਙ੍ਗਣੇ ਨਿਪਜ੍ਜਾਪੇਤ੍ਵਾ ਆਸਨਪੂਜਂ ਕਾਰੇਤ੍ਵਾ ਦੀਪੇ ਜਾਲਾਪੇਤ੍ਵਾ ਚੇਤਿਯਙ੍ਗਣਂ ਸਮ੍ਮਜ੍ਜਿਤ੍ਵਾ ਮਙ੍ਗਲਕਥਾ ਵਤ੍ਤਬ੍ਬਾ. ਸਬ੍ਬਸਨ੍ਨਿਪਾਤੋ ਘੋਸੇਤਬ੍ਬੋ. ਵਿਹਾਰਸ੍ਸ ਉਪਵਨੇ ਜੇਟ੍ਠਕਰੁਕ੍ਖੋ ਨਾਮ ਹੋਤਿ, ਤਤ੍ਥ ਭਿਕ੍ਖੁਸਙ੍ਘੋ ਤੁਮ੍ਹਾਕਂ ਆਗਮਨਂ ਪਟਿਮਾਨੇਤੀਤਿ ਪਹਿਣਿਤਬ੍ਬਂ. ਸਬ੍ਬਸਨ੍ਨਿਪਾਤਟ੍ਠਾਨੇ ਅਨਾਗਨ੍ਤੁਂ ਨਾਮ ਨ ਲਬ੍ਭਤਿ. ਤਤੋ ਅਮਨੁਸ੍ਸਗਹਿਤਕੋ ‘‘ਤ੍ਵਂ ਕੋ ਨਾਮਾ’’ਤਿ ਪੁਚ੍ਛਿਤਬ੍ਬੋ. ਨਾਮੇ ਕਥਿਤੇ ਨਾਮੇਨੇਵ ਆਲਪਿਤਬ੍ਬੋ. ਇਤ੍ਥਨ੍ਨਾਮ ਤੁਯ੍ਹਂ ਮਾਲਾਗਨ੍ਧਾਦੀਸੁ ਪਤ੍ਤਿ ਆਸਨਪੂਜਾਯ ਪਤ੍ਤਿ ਪਿਣ੍ਡਪਾਤੇ ਪਤ੍ਤਿ, ਭਿਕ੍ਖੁਸਙ੍ਘੇਨ ਤੁਯ੍ਹਂ ਪਣ੍ਣਾਕਾਰਤ੍ਥਾਯ ਮਹਾਮਙ੍ਗਲਕਥਾ ਵੁਤ੍ਤਾ, ਭਿਕ੍ਖੁਸਙ੍ਘੇ ਗਾਰਵੇਨ ਏਤਂ ਮੁਞ੍ਚਾਹੀਤਿ ਮੋਚੇਤਬ੍ਬੋ. ਸਚੇ ਨ ਮੁਞ੍ਚਤਿ, ਦੇਵਤਾਨਂ ਆਰੋਚੇਤਬ੍ਬਂ ‘‘ਤੁਮ੍ਹੇ ਜਾਨਾਥ, ਅਯਂ ਅਮਨੁਸ੍ਸੋ ਅਮ੍ਹਾਕਂ ਵਚਨਂ ਨ ਕਰੋਤਿ, ਮਯਂ ਬੁਦ੍ਧਆਣਂ ਕਰਿਸ੍ਸਾਮਾ’’ਤਿ ਪਰਿਤ੍ਤਂ ਕਾਤਬ੍ਬਂ. ਏਤਂ ਤਾਵ ਗਿਹੀਨਂ ਪਰਿਕਮ੍ਮਂ. ਸਚੇ ਪਨ ਭਿਕ੍ਖੁ ਅਮਨੁਸ੍ਸੇਨ ਗਹਿਤੋ ਹੋਤਿ, ਆਸਨਾਨਿ ਧੋਵਿਤ੍ਵਾ ਸਬ੍ਬਸਨ੍ਨਿਪਾਤਂ ਘੋਸਾਪੇਤ੍ਵਾ ਗਨ੍ਧਮਾਲਾਦੀਸੁ ਪਤ੍ਤਿਂ ਦਤ੍ਵਾ ਪਰਿਤ੍ਤਂ ਭਣਿਤਬ੍ਬਂ. ਇਦਂ ਭਿਕ੍ਖੂਨਂ ਪਰਿਕਮ੍ਮਂ.

ਵਿਕ੍ਕਨ੍ਦਿਤਬ੍ਬਨ੍ਤਿ ਸਬ੍ਬਸਨ੍ਨਿਪਾਤਂ ਘੋਸਾਪੇਤ੍ਵਾ ਅਟ੍ਠਵੀਸਤਿ ਯਕ੍ਖਸੇਨਾਪਤਯੋ ਕਨ੍ਦਿਤਬ੍ਬਾ. ਵਿਰਵਿਤਬ੍ਬਨ੍ਤਿ ‘‘ਅਯਂ ਯਕ੍ਖੋ ਗਣ੍ਹਾਤੀ’’ਤਿਆਦੀਨਿ ਭਣਨ੍ਤੇਨ ਤੇਹਿ ਸਦ੍ਧਿਂ ਕਥੇਤਬ੍ਬਂ. ਤਤ੍ਥ ਗਣ੍ਹਾਤੀਤਿ ਸਰੀਰੇ ਅਧਿਮੁਚ੍ਚਤਿ. ਆਵਿਸਤੀਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਲਗ੍ਗਤਿ ਨ ਅਪੇਤੀਤਿ ਵੁਤ੍ਤਂ ਹੋਤਿ. ਹੇਠੇਤੀਤਿ ਉਪ੍ਪਨ੍ਨਂ ਰੋਗਂ ਵਡ੍ਢੇਨ੍ਤੋ ਬਾਧਤਿ. ਵਿਹੇਠੇਤੀਤਿ ਤਸ੍ਸੇਵ ਵੇਵਚਨਂ. ਹਿਂਸਤੀਤਿ ਅਪ੍ਪਮਂਸਲੋਹਿਤਂ ਕਰੋਨ੍ਤੋ ਦੁਕ੍ਖਾਪੇਤਿ. ਵਿਹਿਂਸਤੀਤਿ ਤਸ੍ਸੇਵ ਵੇਵਚਨਂ. ਨ ਮੁਞ੍ਚਤੀਤਿ ਅਪ੍ਪਮਾਦਗਾਹੋ ਹੁਤ੍ਵਾ ਮੁਞ੍ਚਿਤੁਂ ਨ ਇਚ੍ਛਤਿ, ਏਵਂ ਏਤੇਸਂ ਵਿਰਵਿਤਬ੍ਬਂ.

੨੮੩. ਇਦਾਨਿ ਯੇਸਂ ਏਵਂ ਵਿਰਵਿਤਬ੍ਬਂ, ਤੇ ਦਸ੍ਸੇਤੁਂ ਕਤਮੇਸਂ ਯਕ੍ਖਾਨਨ੍ਤਿਆਦਿਮਾਹ. ਤਤ੍ਥ ਇਨ੍ਦੋ ਸੋਮੋਤਿਆਦੀਨਿ ਤੇਸਂ ਨਾਮਾਨਿ. ਤੇਸੁ ਵੇਸ੍ਸਾਮਿਤ੍ਤੋਤਿ ਵੇਸ੍ਸਾਮਿਤ੍ਤਪਬ੍ਬਤਵਾਸੀ ਏਕੋ ਯਕ੍ਖੋ. ਯੁਗਨ੍ਧਰੋਪਿ ਯੁਗਨ੍ਧਰਪਬ੍ਬਤਵਾਸੀਯੇਵ. ਹਿਰਿ ਨੇਤ੍ਤਿ ਚ ਮਨ੍ਦਿਯੋਤਿ ਹਿਰਿ ਚ ਨੇਤ੍ਤਿ ਚ ਮਨ੍ਦਿਯੋ ਚ. ਮਣਿ ਮਾਣਿ ਵਰੋ ਦੀਘੋਤਿ ਮਣਿ ਚ ਮਾਣਿ ਚ ਵਰੋ ਚ ਦੀਘੋ ਚ. ਅਥੋ ਸੇਰੀਸਕੋ ਸਹਾਤਿ ਤੇਹਿ ਸਹ ਅਞ੍ਞੋ ਸੇਰੀਸਕੋ ਨਾਮ. ‘‘ਇਮੇਸਂ ਯਕ੍ਖਾਨਂ…ਪੇ… ਉਜ੍ਝਾਪੇਤਬ੍ਬ’’ਨ੍ਤਿ ਅਯਂ ਯਕ੍ਖੋ ਇਮਂ ਹੇਠੇਤਿ ਵਿਹੇਠੇਤਿ ਨ ਮੁਞ੍ਚਤੀਤਿ ਏਵਂ ਏਤੇਸਂ ਯਕ੍ਖਸੇਨਾਪਤੀਨਂ ਆਰੋਚੇਤਬ੍ਬਂ. ਤਤੋ ਤੇ ਭਿਕ੍ਖੁਸਙ੍ਘੋ ਅਤ੍ਤਨੋ ਧਮ੍ਮਆਣਂ ਕਰੋਤਿ, ਮਯਮ੍ਪਿ ਅਮ੍ਹਾਕਂ ਯਕ੍ਖਰਾਜਆਣਂ ਕਰੋਮਾਤਿ ਉਸ੍ਸੁਕ੍ਕਂ ਕਰਿਸ੍ਸਨ੍ਤਿ. ਏਵਂ ਅਮਨੁਸ੍ਸਾਨਂ ਓਕਾਸੋ ਨ ਭਵਿਸ੍ਸਤਿ, ਬੁਦ੍ਧਸਾਵਕਾਨਂ ਫਾਸੁਵਿਹਾਰੋ ਚ ਭਵਿਸ੍ਸਤੀਤਿ ਦਸ੍ਸੇਨ੍ਤੋ ‘‘ਅਯਂ ਖੋ ਸਾ, ਮਾਰਿਸ, ਆਟਾਨਾਟਿਯਾ ਰਕ੍ਖਾ’’ਤਿਆਦਿਮਾਹ. ਤਂ ਸਬ੍ਬਂ, ਤਤੋ ਪਰਞ੍ਚ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਆਟਾਨਾਟਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.