ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ
ਦੀਘਨਿਕਾਯੇ
ਪਾਥਿਕਵਗ੍ਗਟ੍ਠਕਥਾ
੧. ਪਾਥਿਕਸੁਤ੍ਤਵਣ੍ਣਨਾ
ਸੁਨਕ੍ਖਤ੍ਤਵਤ੍ਥੁਵਣ੍ਣਨਾ
੧. ਏਵਂ ਮੇ ਸੁਤਂ…ਪੇ… ਮਲ੍ਲੇਸੁ ਵਿਹਰਤੀਤਿ ਪਾਥਿਕਸੁਤ੍ਤਂ. ਤਤ੍ਰਾਯਂ ਅਪੁਬ੍ਬਪਦਵਣ੍ਣਨਾ. ਮਲ੍ਲੇਸੁ ਵਿਹਰਤੀਤਿ ਮਲ੍ਲਾ ਨਾਮ ਜਾਨਪਦਿਨੋ ਰਾਜਕੁਮਾਰਾ, ਤੇਸਂ ਨਿਵਾਸੋ ਏਕੋਪਿ ਜਨਪਦੋ ਰੁਲ਼੍ਹੀਸਦ੍ਦੇਨ ‘‘ਮਲ੍ਲਾ’’ਤਿ ਵੁਚ੍ਚਤਿ, ਤਸ੍ਮਿਂ ਮਲ੍ਲੇਸੁ ਜਨਪਦੇ. ‘‘ਅਨੁਪਿਯਂ ਨਾਮ ਮਲ੍ਲਾਨਂ ਨਿਗਮੋ’’ਤਿ ਅਨੁਪਿਯਨ੍ਤਿ ਏਵਂਨਾਮਕੋ ਮਲ੍ਲਾਨਂ ਜਨਪਦਸ੍ਸ ਏਕੋ ਨਿਗਮੋ, ਤਂ ਗੋਚਰਗਾਮਂ ਕਤ੍ਵਾ ਏਕਸ੍ਮਿਂ ਛਾਯੂਦਕਸਮ੍ਪਨ੍ਨੇ ਵਨਸਣ੍ਡੇ ਵਿਹਰਤੀਤਿ ਅਤ੍ਥੋ. ਅਨੋਪਿਯਨ੍ਤਿਪਿ ਪਾਠੋ. ਪਾਵਿਸੀਤਿ ਪਵਿਟ੍ਠੋ. ਭਗਵਾ ਪਨ ਨ ਤਾਵ ਪਵਿਟ੍ਠੋ, ਪਵਿਸਿਸ੍ਸਾਮੀਤਿ ਨਿਕ੍ਖਨ੍ਤਤ੍ਤਾ ਪਨ ਪਾਵਿਸੀਤਿ ਵੁਤ੍ਤੋ. ਯਥਾ ਕਿਂ, ਯਥਾ ‘‘ਗਾਮਂ ਗਮਿਸ੍ਸਾਮੀ’’ਤਿ ਨਿਕ੍ਖਨ੍ਤੋ ਪੁਰਿਸੋ ਤਂ ਗਾਮਂ ਅਪਤ੍ਤੋਪਿ ‘‘ਕੁਹਿਂ ਇਤ੍ਥਨ੍ਨਾਮੋ’’ਤਿ ਵੁਤ੍ਤੇ ‘‘ਗਾਮਂ ਗਤੋ’’ਤਿ ਵੁਚ੍ਚਤਿ, ਏਵਂ. ਏਤਦਹੋਸੀਤਿ ਗਾਮਸਮੀਪੇ ਠਤ੍ਵਾ ਸੂਰਿਯਂ ਓਲੋਕੇਨ੍ਤਸ੍ਸ ਏਤਦਹੋਸਿ. ਅਤਿਪ੍ਪਗੋ ਖੋਤਿ ਅਤਿਵਿਯ ਪਗੋ ਖੋ, ਨ ਤਾਵ ਕੁਲੇਸੁ ਯਾਗੁਭਤ੍ਤਂ ਨਿਟ੍ਠਿਤਨ੍ਤਿ. ਕਿਂ ਪਨ ਭਗਵਾ ਕਾਲਂ ਅਜਾਨਿਤ੍ਵਾ ਨਿਕ੍ਖਨ੍ਤੋਤਿ? ਨ ਅਜਾਨਿਤ੍ਵਾ. ਪਚ੍ਚੂਸਕਾਲੇਯੇਵ ਹਿ ਭਗਵਾ ਞਾਣਜਾਲਂ ਪਤ੍ਥਰਿਤ੍ਵਾ ਲੋਕਂ ਵੋਲੋਕੇਨ੍ਤੋ ਞਾਣਜਾਲਸ੍ਸ ਅਨ੍ਤੋ ਪਵਿਟ੍ਠਂ ਭਗ੍ਗਵਗੋਤ੍ਤਂ ਛਨ੍ਨਪਰਿਬ੍ਬਾਜਕਂ ਦਿਸ੍ਵਾ ‘‘ਅਜ੍ਜਾਹਂ ਇਮਸ੍ਸ ਪਰਿਬ੍ਬਾਜਕਸ੍ਸ ਮਯਾ ਪੁਬ੍ਬੇ ਕਤਕਾਰਣਂ ਸਮਾਹਰਿਤ੍ਵਾ ਧਮ੍ਮਂ ਕਥੇਸ੍ਸਾਮਿ, ਸਾ ਧਮ੍ਮਕਥਾ ਅਸ੍ਸ ਮਯਿ ਪਸਾਦਪ੍ਪਟਿਲਾਭਵਸੇਨ ਸਫਲਾ ਭਵਿਸ੍ਸਤੀ’’ਤਿ ਞਤ੍ਵਾਵ ਪਰਿਬ੍ਬਾਜਕਾਰਾਮਂ ਪਵਿਸਿਤੁਕਾਮੋ ਅਤਿਪ੍ਪਗੋਵ ਨਿਕ੍ਖਮਿ. ਤਸ੍ਮਾ ਤਤ੍ਥ ਪਵਿਸਿਤੁਕਾਮਤਾਯ ਏਵਂ ਚਿਤ੍ਤਂ ਉਪ੍ਪਾਦੇਸਿ.
੨. ਏਤਦਵੋਚਾਤਿ ਭਗਵਨ੍ਤਂ ਦਿਸ੍ਵਾ ਮਾਨਥਦ੍ਧਤਂ ਅਕਤ੍ਵਾ ਸਤ੍ਥਾਰਂ ਪਚ੍ਚੁਗ੍ਗਨ੍ਤ੍ਵਾ ਏਤਂ ਏਤੁ ਖੋ, ਭਨ੍ਤੇਤਿਆਦਿਕਂ ਵਚਨਂ ਅਵੋਚ. ਇਮਂ ਪਰਿਯਾਯਨ੍ਤਿ ਇਮਂ ਵਾਰਂ, ਅਜ੍ਜ ਇਮਂ ਆਗਮਨਵਾਰਨ੍ਤਿ ਅਤ੍ਥੋ. ਕਿਂ ਪਨ ਭਗਵਾ ਪੁਬ੍ਬੇਪਿ ਤਤ੍ਥ ਗਤਪੁਬ੍ਬੋਤਿ? ਨ ਗਤਪੁਬ੍ਬੋ, ਲੋਕਸਮੁਦਾਚਾਰਵਸੇਨ ਪਨ ਏਵਮਾਹ. ਲੋਕਿਯਾ ਹਿ ਚਿਰਸ੍ਸਂ ਆਗਤਮ੍ਪਿ ਅਨਾਗਤਪੁਬ੍ਬਮ੍ਪਿ ਮਨਾਪਜਾਤਿਕਂ ਆਗਤਂ ਦਿਸ੍ਵਾ ‘‘ਕੁਤੋ ਭਵਂ ਆਗਤੋ, ਚਿਰਸ੍ਸਂ ਭਵਂ ਆਗਤੋ, ਕਥਂ ਤੇ ਇਧਾਗਮਨਮਗ੍ਗੋ ਞਾਤੋ, ਕਿਂ ਮਗ੍ਗਮੂਲ਼੍ਹੋਸੀ’’ਤਿਆਦੀਨਿ ਵਦਨ੍ਤਿ. ਤਸ੍ਮਾ ਅਯਮ੍ਪਿ ਲੋਕਸਮੁਦਾਚਾਰਵਸੇਨ ਏਵਮਾਹਾਤਿ ਵੇਦਿਤਬ੍ਬੋ. ਇਦਮਾਸਨਨ੍ਤਿ ਅਤ੍ਤਨੋ ਨਿਸਿਨ੍ਨਾਸਨਂ ਪਪ੍ਫੋਟੇਤ੍ਵਾ ਸਮ੍ਪਾਦੇਤ੍ਵਾ ਦਦਮਾਨੋ ਏਵਮਾਹ. ਸੁਨਕ੍ਖਤ੍ਤੋ ਲਿਚ੍ਛਵਿਪੁਤ੍ਤੋਤਿ ਸੁਨਕ੍ਖਤ੍ਤੋ ਨਾਮ ਲਿਚ੍ਛਵਿਰਾਜਪੁਤ੍ਤੋ. ਸੋ ਕਿਰ ਤਸ੍ਸ ਗਿਹਿਸਹਾਯੋ ਹੋਤਿ, ਕਾਲੇਨ ਕਾਲਂ ਤਸ੍ਸ ਸਨ੍ਤਿਕਂ ਗਚ੍ਛਤਿ. ਪਚ੍ਚਕ੍ਖਾਤੋਤਿ ‘‘ਪਚ੍ਚਕ੍ਖਾਮਿ ਦਾਨਾਹਂ, ਭਨ੍ਤੇ, ਭਗਵਨ੍ਤਂ ਨ ਦਾਨਾਹਂ, ਭਨ੍ਤੇ, ਭਗਵਨ੍ਤਂ ਉਦ੍ਦਿਸ੍ਸ ਵਿਹਰਿਸ੍ਸਾਮੀ’’ਤਿ ਏਵਂ ਪਟਿਅਕ੍ਖਾਤੋ ਨਿਸ੍ਸਟ੍ਠੋ ਪਰਿਚ੍ਚਤ੍ਤੋ.
੩. ਭਗਵਨ੍ਤਂ ਉਦ੍ਦਿਸ੍ਸਾਤਿ ਭਗਵਾ ਮੇ ਸਤ੍ਥਾ ‘‘ਭਗਵਤੋ ਅਹਂ ਓਵਾਦਂ ਪਟਿਕਰੋਮੀ’’ਤਿ ਏਵਂ ਅਪਦਿਸਿਤ੍ਵਾ. ਕੋ ਸਨ੍ਤੋ ਕਂ ਪਚ੍ਚਾਚਿਕ੍ਖਸੀਤਿ ਯਾਚਕੋ ਵਾ ਯਾਚਿਤਕਂ ਪਚ੍ਚਾਚਿਕ੍ਖੇਯ੍ਯ, ਯਾਚਿਤਕੋ ਵਾ ਯਾਚਕਂ. ਤ੍ਵਂ ਪਨ ਨੇਵ ਯਾਚਕੋ ਨ ਯਾਚਿਤਕੋ, ਏਵਂ ਸਨ੍ਤੇ, ਮੋਘਪੁਰਿਸ, ਕੋ ਸਨ੍ਤੋ ਕੋ ਸਮਾਨੋ ਕਂ ਪਚ੍ਚਾਚਿਕ੍ਖਸੀਤਿ ਦਸ੍ਸੇਤਿ. ਪਸ੍ਸ ਮੋਘਪੁਰਿਸਾਤਿ ਪਸ੍ਸ ਤੁਚ੍ਛਪੁਰਿਸ. ਯਾਵਞ੍ਚ ਤੇ ਇਦਂ ਅਪਰਦ੍ਧਨ੍ਤਿ ਯਤ੍ਤਕਂ ਇਦਂ ਤਵ ਅਪਰਦ੍ਧਂ, ਯਤ੍ਤਕੋ ਤੇ ਅਪਰਾਧੋ ਤਤ੍ਤਕੋ ਦੋਸੋਤਿ ਏਵਾਹਂ ਭਗ੍ਗਵ ਤਸ੍ਸ ਦੋਸਂ ਆਰੋਪੇਸਿਨ੍ਤਿ ਦਸ੍ਸੇਤਿ.
੪. ਉਤ੍ਤਰਿਮਨੁਸ੍ਸਧਮ੍ਮਾਤਿ ਪਞ੍ਚਸੀਲਦਸਸੀਲਸਙ੍ਖਾਤਾ ਮਨੁਸ੍ਸਧਮ੍ਮਾਉਤ੍ਤਰਿ. ਇਦ੍ਧਿਪਾਟਿਹਾਰਿਯਨ੍ਤਿ ਇਦ੍ਧਿਭੂਤਂ ਪਾਟਿਹਾਰਿਯਂ. ਕਤੇ ਵਾਤਿ ਕਤਮ੍ਹਿ ਵਾ. ਯਸ੍ਸਤ੍ਥਾਯਾਤਿ ਯਸ੍ਸ ਦੁਕ੍ਖਕ੍ਖਯਸ੍ਸ ਅਤ੍ਥਾਯ. ਸੋ ਨਿਯ੍ਯਾਤਿ ਤਕ੍ਕਰਸ੍ਸਾਤਿ ਸੋ ਧਮ੍ਮੋ ਤਕ੍ਕਰਸ੍ਸ ਯਥਾ ਮਯਾ ਧਮ੍ਮੋ ਦੇਸਿਤੋ, ਤਥਾ ਕਾਰਕਸ੍ਸ ਸਮ੍ਮਾ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਸਬ੍ਬਵਟ੍ਟਦੁਕ੍ਖਕ੍ਖਯਾਯ ਅਮਤਨਿਬ੍ਬਾਨਸਚ੍ਛਿਕਿਰਿਯਾਯ ਗਚ੍ਛਤਿ, ਨ ਗਚ੍ਛਤਿ, ਸਂਵਤ੍ਤਤਿ, ਨ ਸਂਵਤ੍ਤਤੀਤਿ ਪੁਚ੍ਛਤਿ. ਤਤ੍ਰ ਸੁਨਕ੍ਖਤ੍ਤਾਤਿ ਤਸ੍ਮਿਂ ਸੁਨਕ੍ਖਤ੍ਤ ਮਯਾ ਦੇਸਿਤੇ ਧਮ੍ਮੇ ਤਕ੍ਕਰਸ੍ਸ ਸਮ੍ਮਾ ਦੁਕ੍ਖਕ੍ਖਯਾਯ ਸਂਵਤ੍ਤਮਾਨੇ ਕਿਂ ਉਤ੍ਤਰਿਮਨੁਸ੍ਸਧਮ੍ਮਾ ਇਦ੍ਧਿਪਾਟਿਹਾਰਿਯਂ ਕਤਂ ਕਰਿਸ੍ਸਤਿ, ਕੋ ਤੇਨ ਕਤੇਨ ਅਤ੍ਥੋ. ਤਸ੍ਮਿਞ੍ਹਿ ਕਤੇਪਿ ਅਕਤੇਪਿ ਮਮ ਸਾਸਨਸ੍ਸ ਪਰਿਹਾਨਿ ਨਤ੍ਥਿ, ਦੇਵਮਨੁਸ੍ਸਾਨਞ੍ਹਿ ਅਮਤਨਿਬ੍ਬਾਨਸਮ੍ਪਾਪਨਤ੍ਥਾਯ ਅਹਂ ਪਾਰਮਿਯੋ ਪੂਰੇਸਿਂ, ਨ ਪਾਟਿਹਾਰਿਯਕਰਣਤ੍ਥਾਯਾਤਿ ਪਾਟਿਹਾਰਿਯਸ੍ਸ ਨਿਰਤ੍ਥਕਤਂ ਦਸ੍ਸੇਤ੍ਵਾ ‘‘ਪਸ੍ਸ, ਮੋਘਪੁਰਿਸਾ’’ਤਿ ਦੁਤਿਯਂ ਦੋਸਂ ਆਰੋਪੇਸਿ.
੫. ਅਗ੍ਗਞ੍ਞਨ੍ਤਿ ਲੋਕਪਞ੍ਞਤ੍ਤਿਂ. ‘‘ਇਦਂ ਨਾਮ ਲੋਕਸ੍ਸ ਅਗ੍ਗ’’ਨ੍ਤਿ ਏਵਂ ਜਾਨਿਤਬ੍ਬਮ੍ਪਿ ਅਗ੍ਗਂ ਮਰਿਯਾਦਂ ਨ ਤਂ ਪਞ੍ਞਪੇਤੀਤਿ ਵਦਤਿ. ਸੇਸਮੇਤ੍ਥ ਅਨਨ੍ਤਰਵਾਦਾਨੁਸਾਰੇਨੇਵ ਵੇਦਿਤਬ੍ਬਂ.
੬. ਅਨੇਕਪਰਿਯਾਯੇਨ ਖੋਤਿ ਇਦਂ ਕਸ੍ਮਾ ਆਰਦ੍ਧਂ. ਸੁਨਕ੍ਖਤ੍ਤੋ ਕਿਰ ‘‘ਭਗਵਤੋ ਗੁਣਂ ਮਕ੍ਖੇਸ੍ਸਾਮਿ, ‘‘ਦੋਸਂ ਪਞ੍ਞਪੇਸ੍ਸਾਮੀ’’ਤਿ ਏਤ੍ਤਕਂ ਵਿਪ੍ਪਲਪਿਤ੍ਵਾ ਭਗਵਤੋ ਕਥਂ ਸੁਣਨ੍ਤੋ ਅਪ੍ਪਤਿਟ੍ਠੋ ਨਿਰਵੋ ਅਟ੍ਠਾਸਿ.
ਅਥ ਭਗਵਾ – ‘‘ਸੁਨਕ੍ਖਤ੍ਤ, ਏਵਂ ਤ੍ਵਂ ਮਕ੍ਖਿਭਾਵੇ ਠਿਤੋ ਸਯਮੇਵ ਗਰਹਂ ਪਾਪੁਣਿਸ੍ਸਸੀ’’ਤਿ ਮਕ੍ਖਿਭਾਵੇ ਆਦੀਨਵਦਸ੍ਸਨਤ੍ਥਂ ਅਨੇਕਪਰਿਯਾਯੇਨਾਤਿਆਦਿਮਾਹ. ਤਤ੍ਥ ਅਨੇਕਪਰਿਯਾਯੇਨਾਤਿ ਅਨੇਕਕਾਰਣੇਨ. ਵਜ੍ਜਿਗਾਮੇਤਿ ਵਜ੍ਜਿਰਾਜਾਨਂ ਗਾਮੇ, ਵੇਸਾਲੀਨਗਰੇ ਨੋ ਵਿਸਹੀਤਿ ਨਾਸਕ੍ਖਿ. ਸੋ ਅਵਿਸਹਨ੍ਤੋਤਿ ਸੋ ਸੁਨਕ੍ਖਤ੍ਤੋ ਯਸ੍ਸ ਪੁਬ੍ਬੇ ਤਿਣ੍ਣਂ ਰਤਨਾਨਂ ਵਣ੍ਣਂ ਕਥੇਨ੍ਤਸ੍ਸ ਮੁਖਂ ਨਪ੍ਪਹੋਤਿ, ਸੋ ਦਾਨਿ ਤੇਨੇਵ ਮੁਖੇਨ ਅਵਣ੍ਣਂ ਕਥੇਤਿ, ਅਦ੍ਧਾ ਅਵਿਸਹਨ੍ਤੋ ਅਸਕ੍ਕੋਨ੍ਤੋ ਬ੍ਰਹ੍ਮਚਰਿਯਂ ਚਰਿਤੁਂ ਅਤ੍ਤਨੋ ਬਾਲਤਾਯ ਅਵਣ੍ਣਂ ਕਥੇਤ੍ਵਾ ਹੀਨਾਯਾਵਤ੍ਤੋ. ਬੁਦ੍ਧੋ ਪਨ ਸੁਬੁਦ੍ਧੋਵ, ਧਮ੍ਮੋ ਸ੍ਵਾਕ੍ਖਾਤੋਵ, ਸਙ੍ਘੋ ਸੁਪ੍ਪਟਿਪਨ੍ਨੋਵ. ਏਵਂ ਤੀਣਿ ਰਤਨਾਨਿ ਥੋਮੇਨ੍ਤਾ ਮਨੁਸ੍ਸਾ ਤੁਯ੍ਹੇਵ ਦੋਸਂ ਦਸ੍ਸੇਸ੍ਸਨ੍ਤੀਤਿ. ਇਤਿ ਖੋ ਤੇਤਿ ਏਵਂ ਖੋ ਤੇ, ਸੁਨਕ੍ਖਤ੍ਤ, ਵਤ੍ਤਾਰੋ ਭਵਿਸ੍ਸਨ੍ਤਿ. ਤਤੋ ਏਵਂ ਦੋਸੇ ਉਪ੍ਪਨ੍ਨੇ ਸਤ੍ਥਾ ਅਤੀਤਾਨਾਗਤੇ ਅਪ੍ਪਟਿਹਤਞਾਣੋ, ਮਯ੍ਹਂ ਏਵਂ ਦੋਸੋ ਉਪ੍ਪਜ੍ਜਿਸ੍ਸਤੀਤਿ ਜਾਨਨ੍ਤੋਪਿ ਪੁਰੇਤਰਂ ਨ ਕਥੇਸੀਤਿ ਵਤ੍ਤੁਂ ਨ ਲਚ੍ਛਸੀਤਿ ਦਸ੍ਸੇਤਿ. ਅਪਕ੍ਕਮੇਵਾਤਿ ਅਪਕ੍ਕਮਿਯੇਵ, ਅਪਕ੍ਕਨ੍ਤੋ ਵਾ ਚੁਤੋਤਿ ਅਤ੍ਥੋ. ਯਥਾ ਤਂ ਆਪਾਯਿਕੋਤਿ ਯਥਾ ਅਪਾਯੇ ਨਿਬ੍ਬਤ੍ਤਨਾਰਹੋ ਸਤ੍ਤੋ ਅਪਕ੍ਕਮੇਯ੍ਯ, ਏਵਮੇਵ ਅਪਕ੍ਕਮੀਤਿ ਅਤ੍ਥੋ.
ਕੋਰਕ੍ਖਤ੍ਤਿਯਵਤ੍ਥੁਵਣ੍ਣਨਾ
੭. ਏਕਮਿਦਾਹਨ੍ਤਿ ਇਮਿਨਾ ਕਿਂ ਦਸ੍ਸੇਤਿ? ਇਦਂ ਸੁਤ੍ਤਂ ਦ੍ਵੀਹਿ ਪਦੇਹਿ ਆਬਦ੍ਧਂ ਇਦ੍ਧਿਪਾਟਿਹਾਰਿਯਂ ਨ ਕਰੋਤੀਤਿ ਚ ਅਗ੍ਗਞ੍ਞਂ ਨ ਪਞ੍ਞਪੇਤੀਤਿ ਚ. ਤਤ੍ਥ ‘‘ਅਗ੍ਗਞ੍ਞਂ ਨ ਪਞ੍ਞਪੇਤੀ’’ਤਿ ਇਦਂ ਪਦਂ ਸੁਤ੍ਤਪਰਿਯੋਸਾਨੇ ਦਸ੍ਸੇਸ੍ਸਤਿ. ‘‘ਪਾਟਿਹਾਰਿਯਂ ਨ ਕਰੋਤੀ’’ਤਿ ਇਮਸ੍ਸ ਪਨ ਪਦਸ੍ਸ ਅਨੁਸਨ੍ਧਿਦਸ੍ਸਨਵਸੇਨ ਅਯਂ ਦੇਸਨਾ ਆਰਦ੍ਧਾ.
ਤਤ੍ਥ ਏਕਮਿਦਾਹਨ੍ਤਿ ਏਕਸ੍ਮਿਂ ਅਹਂ. ਸਮਯਨ੍ਤਿ ਸਮਯੇ, ਏਕਸ੍ਮਿਂ ਕਾਲੇ ਅਹਨ੍ਤਿ ਅਤ੍ਥੋ. ਥੂਲੂਸੂਤਿ ਥੂਲੂ ਨਾਮ ਜਨਪਦੋ, ਤਤ੍ਥ ਵਿਹਰਾਮਿ. ਉਤ੍ਤਰਕਾ ਨਾਮਾਤਿ ਇਤ੍ਥਿਲਿਙ੍ਗਵਸੇਨ ਉਤ੍ਤਰਕਾਤਿ ਏਵਂਨਾਮਕੋ ਥੂਲੂਨਂ ਜਨਪਦਸ੍ਸ ਨਿਗਮੋ, ਤਂ ਨਿਗਮਂ ਗੋਚਰਗਾਮਂ ਕਤ੍ਵਾਤਿ ਅਤ੍ਥੋ. ਅਚੇਲੋਤਿ ਨਗ੍ਗੋ. ਕੋਰਕ੍ਖਤ੍ਤਿਯੋਤਿ ਅਨ੍ਤੋਵਙ੍ਕਪਾਦੋ ਖਤ੍ਤਿਯੋ. ਕੁਕ੍ਕੁਰਵਤਿਕੋਤਿ ਸਮਾਦਿਨ੍ਨਕੁਕ੍ਕੁਰਵਤੋ ਸੁਨਖੋ ਵਿਯ ਘਾਯਿਤ੍ਵਾ ਖਾਦਤਿ, ਉਦ੍ਧਨਨ੍ਤਰੇ ਨਿਪਜ੍ਜਤਿ, ਅਞ੍ਞਮ੍ਪਿ ਸੁਨਖਕਿਰਿਯਮੇਵ ਕਰੋਤਿ. ਚਤੁਕ੍ਕੁਣ੍ਡਿਕੋਤਿ ਚਤੁਸਙ੍ਘਟ੍ਟਿਤੋ ਦ੍ਵੇ ਜਾਣੂਨਿ ਦ੍ਵੇ ਚ ਕਪ੍ਪਰੇ ਭੂਮਿਯਂ ਠਪੇਤ੍ਵਾ ਵਿਚਰਤਿ. ਛਮਾਨਿਕਿਣ੍ਣਨ੍ਤਿ ਭੂਮਿਯਂ ਨਿਕਿਣ੍ਣਂ ਪਕ੍ਖਿਤ੍ਤਂ ਠਪਿਤਂ. ਭਕ੍ਖਸਨ੍ਤਿ ਭਕ੍ਖਂ ਯਂਕਿਞ੍ਚਿ ਖਾਦਨੀਯਂ ਭੋਜਨੀਯਂ. ਮੁਖੇਨੇਵਾਤਿ ਹਤ੍ਥੇਨ ਅਪਰਾਮਸਿਤ੍ਵਾ ਖਾਦਨੀਯਂ ਮੁਖੇਨੇਵ ਖਾਦਤਿ, ਭੋਜਨੀਯਮ੍ਪਿ ਮੁਖੇਨੇਵ ਭੁਞ੍ਜਤਿ. ਸਾਧੁਰੂਪੋਤਿ ਸੁਨ੍ਦਰਰੂਪੋ. ਅਯਂ ਸਮਣੋਤਿ ਅਯਂ ਅਰਹਤਂ ਸਮਣੋ ਏਕੋਤਿ. ਤਤ੍ਥ ਵਤਾਤਿ ਪਤ੍ਥਨਤ੍ਥੇ ਨਿਪਾਤੋ. ਏਵਂ ਕਿਰਸ੍ਸ ਪਤ੍ਥਨਾ ਅਹੋਸਿ ‘‘ਇਮਿਨਾ ਸਮਣੇਨ ਸਦਿਸੋ ਅਞ੍ਞੋ ਸਮਣੋ ਨਾਮ ਨਤ੍ਥਿ, ਅਯਞ੍ਹਿ ਅਪ੍ਪਿਚ੍ਛਤਾਯ ਵਤ੍ਥਂ ਨ ਨਿਵਾਸੇਤਿ, ‘ਏਸ ਪਪਞ੍ਚੋ’ਤਿ ਮਞ੍ਞਮਾਨੋ ਭਿਕ੍ਖਾਭਾਜਨਮ੍ਪਿ ਨ ਪਰਿਹਰਤਿ, ਛਮਾਨਿਕਿਣ੍ਣਮੇਵ ਖਾਦਤਿ, ਅਯਂ ਸਮਣੋ ਨਾਮ. ਮਯਂ ਪਨ ਕਿਂ ਸਮਣਾ’’ਤਿ? ਏਵਂ ਸਬ੍ਬਞ੍ਞੁਬੁਦ੍ਧਸ੍ਸ ਪਚ੍ਛਤੋ ਚਰਨ੍ਤੋਵ ਇਮਂ ਪਾਪਕਂ ਵਿਤਕ੍ਕਂ ਵਿਤਕ੍ਕੇਸਿ.
ਏਤਦਵੋਚਾਤਿ ਭਗਵਾ ਕਿਰ ਚਿਨ੍ਤੇਸਿ ‘‘ਅਯਂ ਸੁਨਕ੍ਖਤ੍ਤੋ ਪਾਪਜ੍ਝਾਸਯੋ, ਕਿਂ ਨੁ ਇਮਂ ਦਿਸ੍ਵਾ ਚਿਨ੍ਤੇਸੀ’’ਤਿ? ਅਥੇਵਂ ਚਿਨ੍ਤੇਨ੍ਤੋ ਤਸ੍ਸ ਅਜ੍ਝਾਸਯਂ ਵਿਦਿਤ੍ਵਾ ‘‘ਅਯਂ ਮੋਘਪੁਰਿਸੋ ਮਾਦਿਸਸ੍ਸ ਸਬ੍ਬਞ੍ਞੁਨੋ ਪਚ੍ਛਤੋ ਆਗਚ੍ਛਨ੍ਤੋ ਅਚੇਲਂ ਅਰਹਾਤਿ ਮਞ੍ਞਤਿ, ਇਧੇਵ ਦਾਨਾਯਂ ਬਾਲੋ ਨਿਗ੍ਗਹਂ ਅਰਹਤੀ’’ਤਿ ਅਨਿਵਤ੍ਤਿਤ੍ਵਾਵ ਏਤਂ ਤ੍ਵਮ੍ਪਿ ਨਾਮਾਤਿਆਦਿਵਚਨਮਵੋਚ. ਤਤ੍ਥ ਤ੍ਵਮ੍ਪਿ ਨਾਮਾਤਿ ਗਰਹਤ੍ਥੇ ਪਿਕਾਰੋ. ਗਰਹਨ੍ਤੋ ਹਿ ਨਂ ਭਗਵਾ ‘‘ਤ੍ਵਮ੍ਪਿ ਨਾਮਾ’’ਤਿ ਆਹ. ‘‘ਤ੍ਵਮ੍ਪਿ ਨਾਮ ਏਵਂ ਹੀਨਜ੍ਝਾਸਯੋ, ਅਹਂ ਸਮਣੋ ਸਕ੍ਯਪੁਤ੍ਤਿਯੋਤਿ ਏਵਂ ਪਟਿਜਾਨਿਸ੍ਸਸੀ’’ਤਿ ਅਯਞ੍ਹੇਤ੍ਥ ਅਧਿਪ੍ਪਾਯੋ. ਕਿਂ ਪਨ ਮਂ, ਭਨ੍ਤੇਤਿ ਮਯ੍ਹਂ, ਭਨ੍ਤੇ, ਕਿਂ ਗਾਰਯ੍ਹਂ ਦਿਸ੍ਵਾ ਭਗਵਾ ‘‘ਏਵਮਾਹਾ’’ਤਿ ਪੁਚ੍ਛਤਿ. ਅਥਸ੍ਸ ਭਗਵਾ ਆਚਿਕ੍ਖਨ੍ਤੋ ‘‘ਨਨੁ ਤੇ’’ਤਿਆਦਿਮਾਹ. ਮਚ੍ਛਰਾਯਤੀਤਿ ‘‘ਮਾ ਅਞ੍ਞਸ੍ਸ ਅਰਹਤ੍ਤਂ ਹੋਤੂ’’ਤਿ ਕਿਂ ਭਗਵਾ ਏਵਂ ਅਰਹਤ੍ਤਸ੍ਸ ਮਚ੍ਛਰਾਯਤੀਤਿ ਪੁਚ੍ਛਤਿ. ਨ ਖੋ ਅਹਨ੍ਤਿ ਅਹਂ, ਮੋਘਪੁਰਿਸ, ਸਦੇਵਕਸ੍ਸ ਲੋਕਸ੍ਸ ਅਰਹਤ੍ਤਪ੍ਪਟਿਲਾਭਮੇਵ ਪਚ੍ਚਾਸੀਸਾਮਿ, ਏਤਦਤ੍ਥਮੇਵ ਮੇ ਬਹੂਨਿ ਦੁਕ੍ਕਰਾਨਿ ਕਰੋਨ੍ਤੇਨ ਪਾਰਮਿਯੋ ਪੂਰਿਤਾ, ਨ ਖੋ ਅਹਂ, ਮੋਘਪੁਰਿਸ, ਅਰਹਤ੍ਤਸ੍ਸ ਮਚ੍ਛਰਾਯਾਮਿ. ਪਾਪਕਂ ਦਿਟ੍ਠਿਗਤਨ੍ਤਿ ਨ ਅਰਹਨ੍ਤਂ ਅਰਹਾਤਿ, ਅਰਹਨ੍ਤੇ ਚ ਅਨਰਹਨ੍ਤੋਤਿ ਏਵਂ ਤਸ੍ਸ ਦਿਟ੍ਠਿ ਉਪ੍ਪਨ੍ਨਾ. ਤਂ ਸਨ੍ਧਾਯ ‘‘ਪਾਪਕਂ ਦਿਟ੍ਠਿਗਤ’’ਨ੍ਤਿ ਆਹ. ਯਂ ਖੋ ਪਨਾਤਿ ਯਂ ਏਤਂ ਅਚੇਲਂ ਏਵਂ ਮਞ੍ਞਸਿ. ਸਤ੍ਤਮਂ ਦਿਵਸਨ੍ਤਿ ਸਤ੍ਤਮੇ ਦਿਵਸੇ. ਅਲਸਕੇਨਾਤਿ ਅਲਸਕਬ੍ਯਾਧਿਨਾ. ਕਾਲਙ੍ਕਰਿਸ੍ਸਤੀਤਿ ਉਦ੍ਧੁਮਾਤਉਦਰੋ ਮਰਿਸ੍ਸਤਿ.
ਕਾਲਕਞ੍ਚਿਕਾਤਿ ਤੇਸਂ ਅਸੁਰਾਨਂ ਨਾਮਂ. ਤੇਸਂ ਕਿਰ ਤਿਗਾਵੁਤੋ ਅਤ੍ਤਭਾਵੋ ਅਪ੍ਪਮਂਸਲੋਹਿਤੋ ਪੁਰਾਣਪਣ੍ਣਸਦਿਸੋ ਕਕ੍ਕਟਕਾਨਂ ਵਿਯ ਅਕ੍ਖੀਨਿ ਨਿਕ੍ਖਮਿਤ੍ਵਾ ਮਤ੍ਥਕੇ ਤਿਟ੍ਠਨ੍ਤਿ, ਮੁਖਂ ਸੂਚਿਪਾਸਕਸਦਿਸਂ ਮਤ੍ਥਕਸ੍ਮਿਂਯੇਵ ਹੋਤਿ, ਤੇਨ ਓਣਮਿਤ੍ਵਾ ਗੋਚਰਂ ਗਣ੍ਹਨ੍ਤਿ. ਬੀਰਣਤ੍ਥਮ੍ਬਕੇਤਿ ਬੀਰਣਤਿਣਤ੍ਥਮ੍ਬੋ ਤਸ੍ਮਿਂ ਸੁਸਾਨੇ ਅਤ੍ਥਿ, ਤਸ੍ਮਾ ਤਂ ਬੀਰਣਤ੍ਥਮ੍ਬਕਨ੍ਤਿ ਵੁਚ੍ਚਤਿ.
ਤੇਨੁਪਸਙ੍ਕਮੀਤਿ ਭਗਵਤਿ ਏਤ੍ਤਕਂ ਵਤ੍ਵਾ ਤਸ੍ਮਿਂ ਗਾਮੇ ਪਿਣ੍ਡਾਯ ਚਰਿਤ੍ਵਾ ਵਿਹਾਰਂ ਗਤੇ ਵਿਹਾਰਾ ਨਿਕ੍ਖਮਿਤ੍ਵਾ ਉਪਸਙ੍ਕਮਿ. ਯੇਨ ਤ੍ਵਨ੍ਤਿ ਯੇਨ ਕਾਰਣੇਨ ਤ੍ਵਂ. ਯਸ੍ਮਾਪਿ ਭਗਵਤਾ ਬ੍ਯਾਕਤੋ, ਤਸ੍ਮਾਤਿ ਅਤ੍ਥੋ. ਮਤ੍ਤਂ ਮਤ੍ਤਨ੍ਤਿ ਪਮਾਣਯੁਤ੍ਤਂ ਪਮਾਣਯੁਤ੍ਤਂ. ‘‘ਮਨ੍ਤਾ ਮਨ੍ਤਾ’’ਤਿਪਿ ਪਾਠੋ, ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਉਪਪਰਿਕ੍ਖਿਤ੍ਵਾਤਿ ਅਤ੍ਥੋ. ਯਥਾ ਸਮਣਸ੍ਸ ਗੋਤਮਸ੍ਸਾਤਿ ਯਥਾ ਸਮਣਸ੍ਸ ਗੋਤਮਸ੍ਸ ਮਿਚ੍ਛਾ ਵਚਨਂ ਅਸ੍ਸ, ਤਥਾ ਕਰੇਯ੍ਯਾਸੀਤਿ ਆਹ. ਏਵਂ ਵੁਤ੍ਤੇ ਅਚੇਲੋ ਸੁਨਖੋ ਵਿਯ ਉਦ੍ਧਨਟ੍ਠਾਨੇ ਨਿਪਨ੍ਨੋ ਸੀਸਂ ਉਕ੍ਖਿਪਿਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤੋ ਕਿਂ ਕਥੇਸਿ ‘‘ਸਮਣੋ ਨਾਮ ਗੋਤਮੋ ਅਮ੍ਹਾਕਂ ਵੇਰੀ ਵਿਸਭਾਗੋ, ਸਮਣਸ੍ਸ ਗੋਤਮਸ੍ਸ ਉਪ੍ਪਨ੍ਨਕਾਲਤੋ ਪਟ੍ਠਾਯ ਮਯਂ ਸੂਰਿਯੇ ਉਗ੍ਗਤੇ ਖਜ੍ਜੋਪਨਕਾ ਵਿਯ ਜਾਤਾ. ਸਮਣੋ ਗੋਤਮੋ ਅਮ੍ਹੇ, ਏਵਂ ਵਾਚਂ ਵਦੇਯ੍ਯ ਅਞ੍ਞਥਾ ਵਾ. ਵੇਰਿਨੋ ਪਨ ਕਥਾ ਨਾਮ ਤਚ੍ਛਾ ਨ ਹੋਤਿ, ਗਚ੍ਛ ਤ੍ਵਂ ਅਹਮੇਤ੍ਥ ਕਤ੍ਤਬ੍ਬਂ ਜਾਨਿਸ੍ਸਾਮੀ’’ਤਿ ਵਤ੍ਵਾ ਪੁਨਦੇਵ ਨਿਪਜ੍ਜਿ.
੮. ਏਕਦ੍ਵੀਹਿਕਾਯਾਤਿ ਏਕਂ ਦ੍ਵੇਤਿ ਵਤ੍ਵਾ ਗਣੇਸਿ. ਯਥਾ ਤਨ੍ਤਿ ਯਥਾ ਅਸਦ੍ਦਹਮਾਨੋ ਕੋਚਿ ਗਣੇਯ੍ਯ, ਏਵਂ ਗਣੇਸਿ. ਏਕਦਿਵਸਞ੍ਚ ਤਿਕ੍ਖਤ੍ਤੁਂ ਉਪਸਙ੍ਕਮਿਤ੍ਵਾ ਏਕੋ ਦਿਵਸੋ ਅਤੀਤੋ, ਦ੍ਵੇ ਦਿਵਸਾ ਅਤੀਤਾਤਿ ਆਰੋਚੇਸਿ. ਸਤ੍ਤਮਂ ਦਿਵਸਨ੍ਤਿ ਸੋ ਕਿਰ ਸੁਨਕ੍ਖਤ੍ਤਸ੍ਸ ਵਚਨਂ ਸੁਤ੍ਵਾ ਸਤ੍ਤਾਹਂ ਨਿਰਾਹਾਰੋਵ ਅਹੋਸਿ. ਅਥਸ੍ਸ ਸਤ੍ਤਮੇ ਦਿਵਸੇ ਏਕੋ ਉਪਟ੍ਠਾਕੋ ‘‘ਅਮ੍ਹਾਕਂ ਕੁਲੂਪਕਸਮਣਸ੍ਸ ਅਜ੍ਜ ਸਤ੍ਤਮੋ ਦਿਵਸੋ ਗੇਹਂ ਅਨਾਗਚ੍ਛਨ੍ਤਸ੍ਸ ਅਫਾਸੁ ਨੁ ਖੋ ਜਾਤ’’ਨ੍ਤਿ ਸੂਕਰਮਂਸਂ ਪਚਾਪੇਤ੍ਵਾ ਭਤ੍ਤਮਾਦਾਯ ਗਨ੍ਤ੍ਵਾ ਪੁਰਤੋ ਭੂਮਿਯਂ ਨਿਕ੍ਖਿਪਿ. ਅਚੇਲੋ ਦਿਸ੍ਵਾ ਚਿਨ੍ਤੇਸਿ ‘‘ਸਮਣਸ੍ਸ ਗੋਤਮਸ੍ਸ ਕਥਾ ਤਚ੍ਛਾ ਵਾ ਅਤਚ੍ਛਾ ਵਾ ਹੋਤੁ, ਆਹਾਰਂ ਪਨ ਖਾਦਿਤ੍ਵਾ ਸੁਹਿਤਸ੍ਸ ਮੇ ਮਰਣਮ੍ਪਿ ਸੁਮਰਣ’’ਨ੍ਤਿ ਦ੍ਵੇ ਹਤ੍ਥੇ ਜਣ੍ਣੁਕਾਨਿ ਚ ਭੂਮਿਯਂ ਠਪੇਤ੍ਵਾ ਕੁਚ੍ਛਿਪੂਰਂ ਭੁਞ੍ਜਿ. ਸੋ ਰਤ੍ਤਿਭਾਗੇ ਜੀਰਾਪੇਤੁਂ ਅਸਕ੍ਕੋਨ੍ਤੋ ਅਲਸਕੇਨ ਕਾਲਮਕਾਸਿ. ਸਚੇਪਿ ਹਿ ਸੋ ‘‘ਨ ਭੁਞ੍ਜੇਯ੍ਯ’’ਨ੍ਤਿ ਚਿਨ੍ਤੇਯ੍ਯ, ਤਥਾਪਿ ਤਂ ਦਿਵਸਂ ਭੁਞ੍ਜਿਤ੍ਵਾ ਅਲਸਕੇਨ ਕਾਲਂ ਕਰੇਯ੍ਯ. ਅਦ੍ਵੇਜ੍ਝਵਚਨਾ ਹਿ ਤਥਾਗਤਾਤਿ.
ਬੀਰਣਤ੍ਥਮ੍ਬਕੇਤਿ ਤਿਤ੍ਥਿਯਾ ਕਿਰ ‘‘ਕਾਲਙ੍ਕਤੋ ਕੋਰਕ੍ਖਤ੍ਤਿਯੋ’’ਤਿ ਸੁਤ੍ਵਾ ਦਿਵਸਾਨਿ ਗਣੇਤ੍ਵਾ ਇਦਂ ਤਾਵ ਸਚ੍ਚਂ ਜਾਤਂ, ਇਦਾਨਿ ਨਂ ਅਞ੍ਞਤ੍ਥ ਛਡ੍ਡੇਤ੍ਵਾ ‘‘ਮੁਸਾਵਾਦੇਨ ਸਮਣਂ ਗੋਤਮਂ ਨਿਗ੍ਗਣ੍ਹਿਸ੍ਸਾਮਾ’’ਤਿ ਗਨ੍ਤ੍ਵਾ ਤਸ੍ਸ ਸਰੀਰਂ ਵਲ੍ਲਿਯਾ ਬਨ੍ਧਿਤ੍ਵਾ ਆਕਡ੍ਢਨ੍ਤਾ ‘‘ਏਤ੍ਥ ਛਡ੍ਡੇਸ੍ਸਾਮ, ਏਤ੍ਥ ਛਡ੍ਡੇਸ੍ਸਾਮਾ’’ਤਿ ਗਚ੍ਛਨ੍ਤਿ. ਗਤਗਤਟ੍ਠਾਨਂ ਅਙ੍ਗਣਮੇਵ ਹੋਤਿ. ਤੇ ਕਡ੍ਢਮਾਨਾ ਬੀਰਣਤ੍ਥਮ੍ਬਕਸੁਸਾਨਂਯੇਵ ਗਨ੍ਤ੍ਵਾ ਸੁਸਾਨਭਾਵਂ ਞਤ੍ਵਾ ‘‘ਅਞ੍ਞਤ੍ਥ ਛਡ੍ਡੇਸ੍ਸਾਮਾ’’ਤਿ ਆਕਡ੍ਢਿਂਸੁ. ਅਥ ਨੇਸਂ ਵਲ੍ਲਿ ਛਿਜ੍ਜਿਤ੍ਥ, ਪਚ੍ਛਾ ਚਾਲੇਤੁਂ ਨਾਸਕ੍ਖਿਂਸੁ. ਤੇ ਤਤੋਵ ਪਕ੍ਕਨ੍ਤਾ. ਤੇਨ ਵੁਤ੍ਤਂ – ‘‘ਬੀਰਣਤ੍ਥਮ੍ਬਕੇ ਸੁਸਾਨੇ ਛਡ੍ਡੇਸੁ’’ਨ੍ਤਿ.
੯. ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਸੋ ਕਿਰ ਚਿਨ੍ਤੇਸਿ ‘‘ਅਵਸੇਸਂ ਤਾਵ ਸਮਣਸ੍ਸ ਗੋਤਮਸ੍ਸ ਵਚਨਂ ਸਮੇਤਿ, ਮਤਸ੍ਸ ਪਨ ਉਟ੍ਠਾਯ ਅਞ੍ਞੇਨ ਸਦ੍ਧਿਂ ਕਥਨਂ ਨਾਮ ਨਤ੍ਥਿ, ਹਨ੍ਦਾਹਂ ਗਨ੍ਤ੍ਵਾ ਪੁਚ੍ਛਾਮਿ. ਸਚੇ ਕਥੇਤਿ, ਸੁਨ੍ਦਰਂ. ਨੋ ਚੇ ਕਥੇਤਿ, ਸਮਣਂ ਗੋਤਮਂ ਮੁਸਾਵਾਦੇਨ ਨਿਗ੍ਗਣ੍ਹਿਸ੍ਸਾਮੀ’’ਤਿ ਇਮਿਨਾ ਕਾਰਣੇਨ ਉਪਸਙ੍ਕਮਿ. ਆਕੋਟੇਸੀਤਿ ਪਹਰਿ. ਜਾਨਾਮਿ ਆਵੁਸੋਤਿ ਮਤਸਰੀਰਂ ਉਟ੍ਠਹਿਤ੍ਵਾ ਕਥੇਤੁਂ ਸਮਤ੍ਥਂ ਨਾਮ ਨਤ੍ਥਿ, ਇਦਂ ਕਥਂ ਕਥੇਸੀਤਿ? ਬੁਦ੍ਧਾਨੁਭਾਵੇਨ. ਭਗਵਾ ਕਿਰ ਕੋਰਕ੍ਖਤ੍ਤਿਯਂ ਅਸੁਰਯੋਨਿਤੋ ਆਨੇਤ੍ਵਾ ਸਰੀਰੇ ਅਧਿਮੋਚੇਤ੍ਵਾ ਕਥਾਪੇਸਿ. ਤਮੇਵ ਵਾ ਸਰੀਰਂ ਕਥਾਪੇਸਿ, ਅਚਿਨ੍ਤੇਯ੍ਯੋ ਹਿ ਬੁਦ੍ਧਵਿਸਯੋ.
੧੦. ਤਥੇਵ ਤਂ ਵਿਪਾਕਨ੍ਤਿ ਤਸ੍ਸ ਵਚਨਸ੍ਸ ਵਿਪਾਕਂ ਤਥੇਵ, ਉਦਾਹੁ ਨੋਤਿ ਲਿਙ੍ਗਵਿਪਲ੍ਲਾਸੋ ਕਤੋ, ਤਥੇਵ ਸੋ ਵਿਪਾਕੋਤਿ ਅਤ੍ਥੋ. ਕੇਚਿ ਪਨ ‘‘ਵਿਪਕ੍ਕ’’ਨ੍ਤਿਪਿ ਪਠਨ੍ਤਿ, ਨਿਬ੍ਬਤ੍ਤਨ੍ਤਿ ਅਤ੍ਥੋ.
ਏਤ੍ਥ ਠਤ੍ਵਾ ਪਾਟਿਹਾਰਿਯਾਨਿ ਸਮਾਨੇਤਬ੍ਬਾਨਿ. ਸਬ੍ਬਾਨੇਵ ਹੇਤਾਨਿ ਪਞ੍ਚ ਪਾਟਿਹਾਰਿਯਾਨਿ ਹੋਨ੍ਤਿ. ‘‘ਸਤ੍ਤਮੇ ਦਿਵਸੇ ਮਰਿਸ੍ਸਤੀ’’ਤਿ ਵੁਤ੍ਤਂ, ਸੋ ਤਥੇਵ ਮਤੋ, ਇਦਂ ਪਠਮਂ ਪਾਟਿਹਾਰਿਯਂ. ‘‘ਅਲਸਕੇਨਾ’’ਤਿ ਵੁਤ੍ਤਂ, ਅਲਸਕੇਨੇਵ ਮਤੋ, ਇਦਂ ਦੁਤਿਯਂ. ‘‘ਕਾਲਕਞ੍ਚਿਕੇਸੁ ਨਿਬ੍ਬਤ੍ਤਿਸ੍ਸਤੀ’’ਤਿ ਵੁਤ੍ਤਂ, ਤਤ੍ਥੇਵ ਨਿਬ੍ਬਤ੍ਤੋ, ਇਦਂ ਤਤਿਯਂ. ‘‘ਬੀਰਣਤ੍ਥਮ੍ਬਕੇ ਸੁਸਾਨੇ ਛਡ੍ਡੇਸ੍ਸਨ੍ਤੀ’’ਤਿ ਵੁਤ੍ਤਂ, ਤਤ੍ਥੇਵ ਛਡ੍ਡਿਤੋ, ਇਦਂ ਚਤੁਤ੍ਥਂ. ‘‘ਨਿਬ੍ਬਤ੍ਤਟ੍ਠਾਨਤੋ ਆਗਨ੍ਤ੍ਵਾ ਸੁਨਕ੍ਖਤ੍ਤੇਨ ਸਦ੍ਧਿਂ ਕਥੇਸ੍ਸਤੀ’’ਤਿ ਵੁਤ੍ਤੋ, ਸੋ ਕਥੇਸਿਯੇਵ, ਇਦਂ ਪਞ੍ਚਮਂ ਪਾਟਿਹਾਰਿਯਂ.
ਅਚੇਲਕਲ਼ਾਰਮਟ੍ਟਕਵਤ੍ਥੁਵਣ੍ਣਨਾ
੧੧. ਕਲ਼ਾਰਮਟ੍ਟਕੋਤਿ ਨਿਕ੍ਖਨ੍ਤਦਨ੍ਤਮਤ੍ਤਕੋ. ਨਾਮਮੇਵ ਵਾ ਤਸ੍ਸੇਤਂ. ਲਾਭਗ੍ਗਪ੍ਪਤ੍ਤੋਤਿ ਲਾਭਗ੍ਗਂ ਪਤ੍ਤੋ, ਅਗ੍ਗਲਾਭਂ ਪਤ੍ਤੋਤਿ ਵੁਤ੍ਤਂ ਹੋਤਿ. ਯਸਗ੍ਗਪ੍ਪਤ੍ਤੋਤਿ ਯਸਗ੍ਗਂ ਅਗ੍ਗਪਰਿਵਾਰਂ ਪਤ੍ਤੋ. ਵਤਪਦਾਨੀਤਿ ਵਤਾਨਿਯੇਵ, ਵਤਕੋਟ੍ਠਾਸਾ ਵਾ. ਸਮਤ੍ਤਾਨੀਤਿ ਗਹਿਤਾਨਿ. ਸਮਾਦਿਨ੍ਨਾਨੀਤਿ ਤਸ੍ਸੇਵ ਵੇਵਚਨਂ. ਪੁਰਤ੍ਥਿਮੇਨ ਵੇਸਾਲਿਨ੍ਤਿ ਵੇਸਾਲਿਤੋ ਅਵਿਦੂਰੇ ਪੁਰਤ੍ਥਿਮਾਯ ਦਿਸਾਯ. ਚੇਤਿਯਨ੍ਤਿ ਯਕ੍ਖਚੇਤਿਯਟ੍ਠਾਨਂ. ਏਸ ਨਯੋ ਸਬ੍ਬਤ੍ਥ.
੧੨. ਯੇਨ ਅਚੇਲਕੋਤਿ ਭਗਵਤੋ ਵਤ੍ਤਂ ਕਤ੍ਵਾ ਯੇਨ ਅਚੇਲੋ ਕਲ਼ਾਰਮਟ੍ਟਕੋ ਤੇਨੁਪਸਙ੍ਕਮਿ. ਪਞ੍ਹਂ ਅਪੁਚ੍ਛੀਤਿ ਗਮ੍ਭੀਰਂ ਤਿਲਕ੍ਖਣਾਹਤਂ ਪਞ੍ਹਂ ਪੁਚ੍ਛਿ. ਨ ਸਮ੍ਪਾਯਾਸੀਤਿ ਨ ਸਮ੍ਮਾ ਞਾਣਗਤਿਯਾ ਪਾਯਾਸਿ, ਅਨ੍ਧੋ ਵਿਯ ਵਿਸਮਟ੍ਠਾਨੇ ਤਤ੍ਥ ਤਤ੍ਥੇਵ ਪਕ੍ਖਲਿ. ਨੇਵ ਆਦਿਂ, ਨ ਪਰਿਯੋਸਾਨਮਦ੍ਦਸ. ਅਥ ਵਾ ‘‘ਨ ਸਮ੍ਪਾਯਾਸੀ’’ਤਿ ਨ ਸਮ੍ਪਾਦੇਸਿ, ਸਮ੍ਪਾਦੇਤ੍ਵਾ ਕਥੇਤੁਂ ਨਾਸਕ੍ਖਿ. ਅਸਮ੍ਪਾਯਨ੍ਤੋਤਿ ਕਬਰਕ੍ਖੀਨਿ ਪਰਿਵਤ੍ਤੇਤ੍ਵਾ ਓਲੋਕੇਨ੍ਤੋ ‘‘ਅਸਿਕ੍ਖਿਤਕਸ੍ਸ ਸਨ੍ਤਿਕੇ ਵੁਟ੍ਠੋਸਿ, ਅਨੋਕਾਸੇਪਿ ਪਬ੍ਬਜਿਤੋ ਪਞ੍ਹਂ ਪੁਚ੍ਛਨ੍ਤੋ ਵਿਚਰਸਿ, ਅਪੇਹਿ ਮਾ ਏਤਸ੍ਮਿਂ ਠਾਨੇ ਅਟ੍ਠਾਸੀ’’ਤਿ ਵਦਨ੍ਤੋ. ਕੋਪਞ੍ਚ ਦੋਸਞ੍ਚ ਅਪ੍ਪਚ੍ਚਯਞ੍ਚ ਪਾਤ੍ਵਾਕਾਸੀਤਿ ਕੁਪ੍ਪਨਾਕਾਰਂ ਕੋਪਂ, ਦੁਸ੍ਸਨਾਕਾਰਂ ਦੋਸਂ, ਅਤੁਟ੍ਠਾਕਾਰਭੂਤਂ ਦੋਮਨਸ੍ਸਸਙ੍ਖਾਤਂ ਅਪ੍ਪਚ੍ਚਯਞ੍ਚ ਪਾਕਟਮਕਾਸਿ. ਆਸਾਦਿਮ੍ਹਸੇਤਿ ਆਸਾਦਿਯਿਮ੍ਹ ਘਟ੍ਟਯਿਮ੍ਹ. ਮਾ ਵਤ ਨੋ ਅਹੋਸੀਤਿ ਅਹੋ ਵਤ ਮੇ ਨ ਭਵੇਯ੍ਯ. ਮਂ ਵਤ ਨੋ ਅਹੋਸੀਤਿਪਿ ਪਾਠੋ. ਤਤ੍ਥ ਮਨ੍ਤਿ ਸਾਮਿਵਚਨਤ੍ਥੇ ਉਪਯੋਗਵਚਨਂ, ਅਹੋਸਿ ਵਤ ਨੁ ਮਮਾਤਿ ਅਤ੍ਥੋ. ਏਵਞ੍ਚ ਪਨ ਚਿਨ੍ਤੇਤ੍ਵਾ ਉਕ੍ਕੁਟਿਕਂ ਨਿਸੀਦਿਤ੍ਵਾ ‘‘ਖਮਥ ਮੇ, ਭਨ੍ਤੇ’’ਤਿ ਤਂ ਖਮਾਪੇਸਿ. ਸੋਪਿ ਇਤੋ ਪਟ੍ਠਾਯ ਅਞ੍ਞਂ ਕਿਞ੍ਚਿ ਪਞ੍ਹਂ ਨਾਮ ਨ ਪੁਚ੍ਛਿਸ੍ਸਸੀਤਿ. ਆਮ ਨ ਪੁਚ੍ਛਿਸ੍ਸਾਮੀਤਿ. ਯਦਿ ਏਵਂ ਗਚ੍ਛ, ਖਮਾਮਿ ਤੇਤਿ ਤਂ ਉਯ੍ਯੋਜੇਸਿ.
੧੪. ਪਰਿਹਿਤੋਤਿ ਪਰਿਦਹਿਤੋ ਨਿਵਤ੍ਥਵਤ੍ਥੋ. ਸਾਨੁਚਾਰਿਕੋਤਿ ਅਨੁਚਾਰਿਕਾ ਵੁਚ੍ਚਤਿ ਭਰਿਯਾ, ਸਹ ਅਨੁਚਾਰਿਕਾਯ ਸਾਨੁਚਾਰਿਕੋ, ਤਂ ਤਂ ਬ੍ਰਹ੍ਮਚਰਿਯਂ ਪਹਾਯ ਸਭਰਿਯੋਤਿ ਅਤ੍ਥੋ. ਓਦਨਕੁਮ੍ਮਾਸਨ੍ਤਿ ਸੁਰਾਮਂਸਤੋ ਅਤਿਰੇਕਂ ਓਦਨਮ੍ਪਿ ਕੁਮ੍ਮਾਸਮ੍ਪਿ ਭੁਞ੍ਜਮਾਨੋ. ਯਸਾ ਨਿਹੀਨੋਤਿ ਯਂ ਲਾਭਗ੍ਗਯਸਗ੍ਗਂ ਪਤ੍ਤੋ, ਤਤੋ ਪਰਿਹੀਨੋ ਹੁਤ੍ਵਾ. ‘‘ਕਤਂ ਹੋਤਿ ਉਤ੍ਤਰਿਮਨੁਸ੍ਸਧਮ੍ਮਾ ਇਦ੍ਧਿਪਾਟਿਹਾਰਿਯ’’ਨ੍ਤਿ ਇਧ ਸਤ੍ਤਵਤਪਦਾਤਿਕ੍ਕਮਵਸੇਨ ਸਤ੍ਤ ਪਾਟਿਹਾਰਿਯਾਨਿ ਵੇਦਿਤਬ੍ਬਾਨਿ.
ਅਚੇਲਪਾਥਿਕਪੁਤ੍ਤਵਤ੍ਥੁਵਣ੍ਣਨਾ
੧੫. ਪਾਥਿਕਪੁਤ੍ਤੋਤਿ ਪਾਥਿਕਸ੍ਸ ਪੁਤ੍ਤੋ. ਞਾਣਵਾਦੇਨਾਤਿ ਞਾਣਵਾਦੇਨ ਸਦ੍ਧਿਂ. ਉਪਡ੍ਢਪਥਨ੍ਤਿ ਯੋਜਨਂ ਚੇ, ਨੋ ਅਨ੍ਤਰੇ ਭਵੇਯ੍ਯ, ਗੋਤਮੋ ਅਡ੍ਢਯੋਜਨਂ, ਅਹਂ ਅਡ੍ਢਯੋਜਨਂ. ਏਸ ਨਯੋ ਅਡ੍ਢਯੋਜਨਾਦੀਸੁ. ਏਕਪਦਵਾਰਮ੍ਪਿ ਅਤਿਕ੍ਕਮ੍ਮ ਗਚ੍ਛਤੋ ਜਯੋ ਭਵਿਸ੍ਸਤਿ, ਅਨਾਗਚ੍ਛਤੋ ਪਰਾਜਯੋਤਿ. ਤੇ ਤਤ੍ਥਾਤਿ ਤੇ ਮਯਂ ਤਤ੍ਥ ਸਮਾਗਤਟ੍ਠਾਨੇ. ਤਦ੍ਦਿਗੁਣਂ ਤਦ੍ਦਿਗੁਣਾਹਨ੍ਤਿ ਤਤੋ ਤਤੋ ਦਿਗੁਣਂ ਦਿਗੁਣਂ ਅਹਂ ਕਰਿਸ੍ਸਾਮਿ, ਭਗਵਤਾ ਸਦ੍ਧਿਂ ਪਾਟਿਹਾਰਿਯਂ ਕਾਤੁਂ ਅਸਮਤ੍ਥਭਾਵਂ ਜਾਨਨ੍ਤੋਪਿ ‘‘ਉਤ੍ਤਮਪੁਰਿਸੇਨ ਸਦ੍ਧਿਂ ਪਟ੍ਠਪੇਤ੍ਵਾ ਅਸਕ੍ਕੁਣਨ੍ਤਸ੍ਸਾਪਿ ਪਾਸਂਸੋ ਹੋਤੀ’’ਤਿ ਞਤ੍ਵਾ ਏਵਮਾਹ. ਨਗਰਵਾਸਿਨੋਪਿ ਤਂ ਸੁਤ੍ਵਾ ‘‘ਅਸਮਤ੍ਥੋ ਨਾਮ ਏਵਂ ਨ ਗਜ੍ਜਤਿ, ਅਦ੍ਧਾ ਅਯਮ੍ਪਿ ਅਰਹਾ ਭਵਿਸ੍ਸਤੀ’’ਤਿ ਤਸ੍ਸ ਮਹਨ੍ਤਂ ਸਕ੍ਕਾਰਮਕਂਸੁ.
੧੬. ਯੇਨਾਹਂ ਤੇਨੁਪਸਙ੍ਕਮੀਤਿ ‘‘ਸੁਨਕ੍ਖਤ੍ਤੋ ਕਿਰ ਪਾਥਿਕਪੁਤ੍ਤੋ ਏਵਂ ਵਦਤੀ’’ਤਿ ਅਸ੍ਸੋਸਿ. ਅਥਸ੍ਸ ਹੀਨਜ੍ਝਾਸਯਤ੍ਤਾ ਹੀਨਦਸ੍ਸਨਾਯ ਚਿਤ੍ਤਂ ਉਦਪਾਦਿ.
ਸੋ ਭਗਵਤੋ ਵਤ੍ਤਂ ਕਤ੍ਵਾ ਭਗਵਤਿ ਗਨ੍ਧਕੁਟਿਂ ਪਵਿਟ੍ਠੇ ਪਾਥਿਕਪੁਤ੍ਤਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪੁਚ੍ਛਿ ‘‘ਤੁਮ੍ਹੇ ਕਿਰ ਏਵਰੂਪਿਂ ਕਥਂ ਕਥੇਥਾ’’ਤਿ? ‘‘ਆਮ, ਕਥੇਮਾ’’ਤਿ. ਯਦਿ ਏਵਂ ‘‘ਮਾ ਭਾਯਿਤ੍ਥ ਵਿਸ੍ਸਤ੍ਥਾ ਪੁਨਪ੍ਪੁਨਂ ਏਵਂ ਵਦਥ, ਅਹਂ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਕੋ, ਤਸ੍ਸ ਵਿਸਯਂ ਵਿਜਾਨਾਮਿ, ਤੁਮ੍ਹੇਹਿ ਸਦ੍ਧਿਂ ਪਾਟਿਹਾਰਿਯਂ ਕਾਤੁਂ ਨ ਸਕ੍ਖਿਸ੍ਸਤਿ, ਅਹਂ ਸਮਣਸ੍ਸ ਗੋਤਮਸ੍ਸ ਕਥੇਤ੍ਵਾ ਭਯਂ ਉਪ੍ਪਾਦੇਤ੍ਵਾ ਤਂ ਅਞ੍ਞਤੋ ਗਹੇਤ੍ਵਾ ਗਮਿਸ੍ਸਾਮਿ, ਤੁਮ੍ਹੇ ਮਾ ਭਾਯਿਤ੍ਥਾ’’ਤਿ ਤਂ ਅਸ੍ਸਾਸੇਤ੍ਵਾ ਭਗਵਤੋ ਸਨ੍ਤਿਕਂ ਗਤੋ. ਤੇਨ ਵੁਤ੍ਤਂ ‘‘ਯੇਨਾਹਂ ਤੇਨੁਪਸਙ੍ਕਮੀ’’ਤਿ. ਤਂ ਵਾਚਨ੍ਤਿਆਦੀਸੁ ‘‘ਅਹਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀਤਿ ਵਿਚਰਿਂ, ਅਭੂਤਂ ਮੇ ਕਥਿਤਂ ਨਾਹਂ ਬੁਦ੍ਧੋ’’ਤਿ ਵਦਨ੍ਤੋ ਤਂ ਵਾਚਂ ਪਜਹਤਿ ਨਾਮ. ਰਹੋ ਨਿਸੀਦਿਤ੍ਵਾ ਚਿਨ੍ਤਯਮਾਨੋ ‘‘ਅਹਂ ‘ਏਤ੍ਤਕਂ ਕਾਲਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀ’ਤਿ ਵਿਚਰਿਂ, ਇਤੋ ਦਾਨਿ ਪਟ੍ਠਾਯ ਨਾਹਂ ਬੁਦ੍ਧੋ’’ਤਿ ਚਿਨ੍ਤਯਨ੍ਤੋ ਤਂ ਚਿਤ੍ਤਂ ਪਜਹਤਿ ਨਾਮ. ‘‘ਅਹਂ ‘ਏਤ੍ਤਕਂ ਕਾਲਂ ਅਬੁਦ੍ਧੋਵ ਸਮਾਨੋ ਬੁਦ੍ਧੋਮ੍ਹੀ’ਤਿ ਪਾਪਕਂ ਦਿਟ੍ਠਿਂ ਗਹੇਤ੍ਵਾ ਵਿਚਰਿਂ, ਇਤੋ ਦਾਨਿ ਪਟ੍ਠਾਯ ਇਮਂ ਦਿਟ੍ਠਿਂ ਪਜਹਾਮੀ’’ਤਿ ਪਜਹਨ੍ਤੋ ਤਂ ਦਿਟ੍ਠਿਂ ਪਟਿਨਿਸ੍ਸਜ੍ਜਤਿ ਨਾਮ. ਏਵਂ ਅਕਰੋਨ੍ਤੋ ਪਨ ਤਂ ਵਾਚਂ ਅਪ੍ਪਹਾਯ ਤਂ ਚਿਤ੍ਤਂ ਅਪ੍ਪਹਾਯ ਤਂ ਦਿਟ੍ਠਿਂ ਅਪ੍ਪਟਿਨਿਸ੍ਸਜ੍ਜਿਤ੍ਵਾਤਿ ਵੁਚ੍ਚਤਿ. ਵਿਪਤੇਯ੍ਯਾਤਿ ਬਨ੍ਧਨਾ ਮੁਤ੍ਤਤਾਲਪਕ੍ਕਂ ਵਿਯ ਗੀਵਤੋ ਪਤੇਯ੍ਯ, ਸਤ੍ਤਧਾ ਵਾ ਪਨ ਫਲੇਯ੍ਯ.
੧੭. ਰਕ੍ਖਤੇਤਨ੍ਤਿ ਰਕ੍ਖਤੁ ਏਤਂ. ਏਕਂਸੇਨਾਤਿ ਨਿਪ੍ਪਰਿਯਾਯੇਨ. ਓਧਾਰਿਤਾਤਿ ਭਾਸਿਤਾ. ਅਚੇਲੋ ਚ, ਭਨ੍ਤੇ, ਪਾਥਿਕਪੁਤ੍ਤੋਤਿ ਏਵਂ ਏਕਂਸੇਨ ਭਗਵਤੋ ਵਾਚਾਯ ਓਧਾਰਿਤਾਯ ਸਚੇ ਅਚੇਲੋ ਪਾਥਿਕਪੁਤ੍ਤੋ. ਵਿਰੂਪਰੂਪੇਨਾਤਿ ਵਿਗਤਰੂਪੇਨ ਵਿਗਚ੍ਛਿਤਸਭਾਵੇਨ ਰੂਪੇਨ ਅਤ੍ਤਨੋ ਰੂਪਂ ਪਹਾਯ ਅਦਿਸ੍ਸਮਾਨੇਨ ਕਾਯੇਨ. ਸੀਹਬ੍ਯਗ੍ਘਾਦਿਵਸੇਨ ਵਾ ਵਿਵਿਧਰੂਪੇਨ ਸਮ੍ਮੁਖੀਭਾਵਂ ਆਗਚ੍ਛੇਯ੍ਯ. ਤਦਸ੍ਸ ਭਗਵਤੋ ਮੁਸਾਤਿ ਏਵਂ ਸਨ੍ਤੇ ਭਗਵਤੋ ਤਂ ਵਚਨਂ ਮੁਸਾ ਭਵੇਯ੍ਯਾਤਿ ਮੁਸਾਵਾਦੇਨ ਨਿਗ੍ਗਣ੍ਹਾਤਿ. ਠਪੇਤ੍ਵਾ ਕਿਰ ਏਤਂ ਨ ਅਞ੍ਞੇਨ ਭਗਵਾ ਮੁਸਾਵਾਦੇਨ ਨਿਗ੍ਗਹਿਤਪੁਬ੍ਬੋਤਿ.
੧੮. ਦ੍ਵਯਗਾਮਿਨੀਤਿ ਸਰੂਪੇਨ ਅਤ੍ਥਿਭਾਵਂ, ਅਤ੍ਥੇਨ ਨਤ੍ਥਿਭਾਵਨ੍ਤਿ ਏਵਂ ਦ੍ਵਯਗਾਮਿਨੀ. ਅਲਿਕਤੁਚ੍ਛਨਿਪ੍ਫਲਵਾਚਾਯ ਏਤਂ ਅਧਿਵਚਨਂ.
੧੯. ਅਜਿਤੋਪਿ ਨਾਮ ਲਿਚ੍ਛਵੀਨਂ ਸੇਨਾਪਤੀਤਿ ਸੋ ਕਿਰ ਭਗਵਤੋ ਉਪਟ੍ਠਾਕੋ ਅਹੋਸਿ, ਸੋ ਕਾਲਮਕਾਸਿ. ਅਥਸ੍ਸ ਸਰੀਰਕਿਚ੍ਚਂ ਕਤ੍ਵਾ ਮਨੁਸ੍ਸਾ ਪਾਥਿਕਪੁਤ੍ਤਂ ਪੁਚ੍ਛਿਂਸੁ ‘‘ਕੁਹਿਂ ਨਿਬ੍ਬਤ੍ਤੋ ਸੇਨਾਪਤੀ’’ਤਿ? ਸੋ ਆਹ – ‘‘ਮਹਾਨਿਰਯੇ ਨਿਬ੍ਬਤ੍ਤੋ’’ਤਿ. ਇਦਞ੍ਚ ਪਨ ਵਤ੍ਵਾ ਪੁਨ ਆਹ ‘‘ਤੁਮ੍ਹਾਕਂ ਸੇਨਾਪਤਿ ਮਮ ਸਨ੍ਤਿਕਂ ਆਗਮ੍ਮ ਅਹਂ ਤੁਮ੍ਹਾਕਂ ਵਚਨਮਕਤ੍ਵਾ ਸਮਣਸ੍ਸ ਗੋਤਮਸ੍ਸ ਵਾਦਂ ਪਤਿਟ੍ਠਪੇਤ੍ਵਾ ਨਿਰਯੇ ਨਿਬ੍ਬਤ੍ਤੋਮ੍ਹੀ’’ਤਿ ਪਰੋਦਿਤ੍ਥਾਤਿ. ਤੇਨੁਪਸਙ੍ਕਮਿ ਦਿਵਾਵਿਹਾਰਾਯਾਤਿ ਏਤ੍ਥ ‘‘ਪਾਟਿਹਾਰਿਯਕਰਣਤ੍ਥਾਯਾ’’ਤਿ ਕਸ੍ਮਾ ਨ ਵਦਤਿ? ਅਭਾਵਾ. ਸਮ੍ਮੁਖੀਭਾਵੋਪਿ ਹਿਸ੍ਸ ਤੇਨ ਸਦ੍ਧਿਂ ਨਤ੍ਥਿ, ਕੁਤੋ ਪਾਟਿਹਾਰਿਯਕਰਣਂ, ਤਸ੍ਮਾ ਤਥਾ ਅਵਤ੍ਵਾ ‘‘ਦਿਵਾਵਿਹਾਰਾਯਾ’’ਤਿ ਆਹ.
ਇਦ੍ਧਿਪਾਟਿਹਾਰਿਯਕਥਾਵਣ੍ਣਨਾ
੨੦. ਗਹਪਤਿਨੇਚਯਿਕਾਤਿ ਗਹਪਤਿ ਮਹਾਸਾਲਾ. ਤੇਸਞ੍ਹਿ ਮਹਾਧਨਧਞ੍ਞਨਿਚਯੋ, ਤਸ੍ਮਾ ‘‘ਨੇਚਯਿਕਾ’’ਤਿ ਵੁਚ੍ਚਨ੍ਤਿ. ਅਨੇਕਸਹਸ੍ਸਾਤਿ ਸਹਸ੍ਸੇਹਿਪਿ ਅਪਰਿਮਾਣਗਣਨਾ. ਏਵਂ ਮਹਤਿਂ ਕਿਰ ਪਰਿਸਂ ਠਪੇਤ੍ਵਾ ਸੁਨਕ੍ਖਤ੍ਤਂ ਅਞ੍ਞੋ ਸਨ੍ਨਿਪਾਤੇਤੁਂ ਸਮਤ੍ਥੋ ਨਤ੍ਥਿ. ਤੇਨੇਵ ਭਗਵਾ ਏਤ੍ਤਕਂ ਕਾਲਂ ਸੁਨਕ੍ਖਤ੍ਤਂ ਗਹੇਤ੍ਵਾ ਵਿਚਰਿ.
੨੧. ਭਯਨ੍ਤਿ ਚਿਤ੍ਤੁਤ੍ਰਾਸਭਯਂ. ਛਮ੍ਭਿਤਤ੍ਤਨ੍ਤਿ ਸਕਲਸਰੀਰਚਲਨਂ. ਲੋਮਹਂਸੋਤਿ ਲੋਮਾਨਂ ਉਦ੍ਧਗ੍ਗਭਾਵੋ. ਸੋ ਕਿਰ ਚਿਨ੍ਤੇਸਿ – ‘‘ਅਹਂ ਅਤਿਮਹਨ੍ਤਂ ਕਥਂ ਕਥੇਤ੍ਵਾ ਸਦੇਵਕੇ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਪਟਿਵਿਰੁਦ੍ਧੋ, ਮਯ੍ਹਂ ਖੋ ਪਨਬ੍ਭਨ੍ਤਰੇ ਅਰਹਤ੍ਤਂ ਵਾ ਪਾਟਿਹਾਰਿਯਕਰਣਹੇਤੁ ਵਾ ਨਤ੍ਥਿ, ਸਮਣੋ ਪਨ ਗੋਤਮੋ ਪਾਟਿਹਾਰਿਯਂ ਕਰਿਸ੍ਸਤਿ, ਅਥਸ੍ਸ ਪਾਟਿਹਾਰਿਯਂ ਦਿਸ੍ਵਾ ਮਹਾਜਨੋ ‘ਤ੍ਵਂ ਦਾਨਿ ਪਾਟਿਹਾਰਿਯਂ ਕਾਤੁਂ ਅਸਕ੍ਕੋਨ੍ਤੋ ਕਸ੍ਮਾ ਅਤ੍ਤਨੋ ਪਮਾਣਮਜਾਨਿਤ੍ਵਾ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਪਟਿਮਲ੍ਲੋ ਹੁਤ੍ਵਾ ਗਜ੍ਜਸੀ’ਤਿ ਕਟ੍ਠਲੇਡ੍ਡੁਦਣ੍ਡਾਦੀਹਿ ਵਿਹੇਠੇਸ੍ਸਤੀ’’ਤਿ. ਤੇਨਸ੍ਸ ਮਹਾਜਨਸਨ੍ਨਿਪਾਤਞ੍ਚੇਵ ਤੇਨ ਭਗਵਤੋ ਚ ਆਗਮਨਂ ਸੁਤ੍ਵਾ ਭਯਂ ਵਾ ਛਮ੍ਭਿਤਤ੍ਤਂ ਵਾ ਲੋਮਹਂਸੋ ਵਾ ਉਦਪਾਦਿ. ਸੋ ਤਤੋ ਦੁਕ੍ਖਾ ਮੁਚ੍ਚਿਤੁਕਾਮੋ ਤਿਨ੍ਦੁਕਖਾਣੁਕਪਰਿਬ੍ਬਾਜਕਾਰਾਮਂ ਅਗਮਾਸਿ. ਤਮਤ੍ਥਂ ਦਸ੍ਸੇਤੁਂ ਅਥ ਖੋ ਭਗਵਾਤਿਆਦਿਮਾਹ. ਤਤ੍ਥ ਉਪਸਙ੍ਕਮੀਤਿ ਨ ਕੇਵਲਂ ਉਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਪਨ ਦੂਰਂ ਅਡ੍ਢਯੋਜਨਨ੍ਤਰਂ ਪਰਿਬ੍ਬਾਜਕਾਰਾਮਂ ਪਵਿਟ੍ਠੋ. ਤਤ੍ਥਪਿ ਚਿਤ੍ਤਸ੍ਸਾਦਂ ਅਲਭਮਾਨੋ ਅਨ੍ਤਨ੍ਤੇਨ ਆਵਿਜ੍ਝਿਤ੍ਵਾ ਆਰਾਮਪਚ੍ਚਨ੍ਤੇ ਏਕਂ ਗਹਨਟ੍ਠਾਨਂ ਉਪਧਾਰੇਤ੍ਵਾ ਪਾਸਾਣਫਲਕੇ ਨਿਸੀਦਿ. ਅਥ ਭਗਵਾ ਚਿਨ੍ਤੇਸਿ – ‘‘ਸਚੇ ਅਯਂ ਬਾਲੋ ਕਸ੍ਸਚਿਦੇਵ ਕਥਂ ਗਹੇਤ੍ਵਾ ਇਧਾਗਚ੍ਛੇਯ੍ਯ, ਮਾ ਨਸ੍ਸਤੁ ਬਾਲੋ’’ਤਿ ‘‘ਨਿਸਿਨ੍ਨਪਾਸਾਣਫਲਕਂ ਤਸ੍ਸ ਸਰੀਰੇ ਅਲ੍ਲੀਨਂ ਹੋਤੂ’’ਤਿ ਅਧਿਟ੍ਠਾਸਿ. ਸਹ ਅਧਿਟ੍ਠਾਨਚਿਤ੍ਤੇਨ ਤਂ ਤਸ੍ਸ ਸਰੀਰੇ ਅਲ੍ਲੀਯਿ. ਸੋ ਮਹਾਅਦ੍ਦੁਬਨ੍ਧਨਬਦ੍ਧੋ ਵਿਯ ਛਿਨ੍ਨਪਾਦੋ ਵਿਯ ਚ ਅਹੋਸਿ.
ਅਸ੍ਸੋਸੀਤਿ ਇਤੋ ਚਿਤੋ ਚ ਪਾਥਿਕਪੁਤ੍ਤਂ ਪਰਿਯੇਸਮਾਨਾ ਪਰਿਸਾ ਤਸ੍ਸ ਅਨੁਪਦਂ ਗਨ੍ਤ੍ਵਾ ਨਿਸਿਨ੍ਨਟ੍ਠਾਨਂ ਞਤ੍ਵਾ ਆਗਤੇਨ ਅਞ੍ਞਤਰੇਨ ਪੁਰਿਸੇਨ ‘‘ਤੁਮ੍ਹੇ ਕਂ ਪਰਿਯੇਸਥਾ’’ਤਿ ਵੁਤ੍ਤੇ ਪਾਥਿਕਪੁਤ੍ਤਨ੍ਤਿ. ਸੋ ‘‘ਤਿਨ੍ਦੁਕਖਾਣੁਕਪਰਿਬ੍ਬਾਜਕਾਰਾਮੇ ਨਿਸਿਨ੍ਨੋ’’ਤਿ ਵੁਤ੍ਤਵਚਨੇਨ ਅਸ੍ਸੋਸਿ.
੨੨. ਸਂਸਪ੍ਪਤੀਤਿ ਓਸੀਦਤਿ. ਤਤ੍ਥੇਵ ਸਞ੍ਚਰਤਿ. ਪਾਵਲ਼ਾ ਵੁਚ੍ਚਤਿ ਆਨਿਸਦਟ੍ਠਿਕਾ.
੨੩. ਪਰਾਭੂਤਰੂਪੋਤਿ ਪਰਾਜਿਤਰੂਪੋ, ਵਿਨਟ੍ਠਰੂਪੋ ਵਾ.
੨੫. ਗੋਯੁਗੇਹੀਤਿ ਗੋਯੁਤ੍ਤੇਹਿ ਸਤਮਤ੍ਤੇਹਿ ਵਾ ਸਹਸ੍ਸਮਤ੍ਤੇਹਿ ਵਾ ਯੁਗੇਹਿ. ਆਵਿਞ੍ਛੇਯ੍ਯਾਮਾਤਿ ਆਕਡ੍ਢੇਯ੍ਯਾਮ. ਛਿਜ੍ਜੇਯ੍ਯੁਨ੍ਤਿ ਛਿਨ੍ਦੇਯ੍ਯੁਂ. ਪਾਥਿਕਪੁਤ੍ਤੋ ਵਾ ਬਨ੍ਧਟ੍ਠਾਨੇ ਛਿਜ੍ਜੇਯ੍ਯ.
੨੬. ਦਾਰੁਪਤ੍ਤਿਕਨ੍ਤੇਵਾਸੀਤਿ ਦਾਰੁਪਤ੍ਤਿਕਸ੍ਸ ਅਨ੍ਤੇਵਾਸੀ. ਤਸ੍ਸ ਕਿਰ ਏਤਦਹੋਸਿ ‘‘ਤਿਟ੍ਠਤੁ ਤਾਵ ਪਾਟਿਹਾਰਿਯਂ, ਸਮਣੋ ਗੋਤਮੋ ‘ਅਚੇਲੋ ਪਾਥਿਕਪੁਤ੍ਤੋ ਆਸਨਾਪਿ ਨ ਵੁਟ੍ਠਹਿਸ੍ਸਤੀ’ਤਿ ਆਹ. ਹਨ੍ਦਾਹਂ ਗਨ੍ਤ੍ਵਾ ਯੇਨ ਕੇਨਚਿ ਉਪਾਯੇਨ ਤਂ ਆਸਨਾ ਵੁਟ੍ਠਾਪੇਮਿ. ਏਤ੍ਤਾਵਤਾ ਚ ਸਮਣਸ੍ਸ ਗੋਤਮਸ੍ਸ ਪਰਾਜਯੋ ਭਵਿਸ੍ਸਤੀ’’ਤਿ. ਤਸ੍ਮਾ ਏਵਮਾਹ.
੨੭. ਸੀਹਸ੍ਸਾਤਿ ਚਤ੍ਤਾਰੋ ਸੀਹਾ ਤਿਣਸੀਹੋ ਚ ਕਾਲ਼ਸੀਹੋ ਚ ਪਣ੍ਡੁਸੀਹੋ ਚ ਕੇਸਰਸੀਹੋ ਚ. ਤੇਸਂ ਚਤੁਨ੍ਨਂ ਸੀਹਾਨਂ ਕੇਸਰਸੀਹੋ ਅਗ੍ਗਤਂ ਗਤੋ, ਸੋ ਇਧਾਧਿਪ੍ਪੇਤੋ. ਮਿਗਰਞ੍ਞੋਤਿ ਸਬ੍ਬਚਤੁਪ੍ਪਦਾਨਂ ਰਞ੍ਞੋ. ਆਸਯਨ੍ਤਿ ਨਿਵਾਸਂ. ਸੀਹਨਾਦਨ੍ਤਿ ਅਭੀਤਨਾਦਂ. ਗੋਚਰਾਯ ਪਕ੍ਕਮੇਯ੍ਯਨ੍ਤਿ ਆਹਾਰਤ੍ਥਾਯ ਪਕ੍ਕਮੇਯ੍ਯਂ. ਵਰਂ ਵਰਨ੍ਤਿ ਉਤ੍ਤਮੁਤ੍ਤਮਂ, ਥੂਲਂ ਥੂਲਨ੍ਤਿ ਅਤ੍ਥੋ. ਮੁਦੁਮਂਸਾਨੀਤਿ ਮੁਦੂਨਿ ਮਂਸਾਨਿ. ‘‘ਮਧੁਮਂਸਾਨੀ’’ਤਿਪਿ ਪਾਠੋ, ਮਧੁਰਮਂਸਾਨੀਤਿ ਅਤ੍ਥੋ. ਅਜ੍ਝੁਪੇਯ੍ਯਨ੍ਤਿ ਉਪਗਚ੍ਛੇਯ੍ਯਂ. ਸੀਹਨਾਦਂ ਨਦਿਤ੍ਵਾਤਿ ਯੇ ਦੁਬ੍ਬਲਾ ਪਾਣਾ, ਤੇ ਪਲਾਯਨ੍ਤੂਤਿ ਅਤ੍ਤਨੋ ਸੂਰਭਾਵਸਨ੍ਨਿਸ੍ਸਿਤੇਨ ਕਾਰੁਞ੍ਞੇਨ ਨਦਿਤ੍ਵਾ.
੨੮. ਵਿਘਾਸਸਂਵਡ੍ਢੋਤਿ ਵਿਘਾਸੇਨ ਸਂਵਡ੍ਢੋ, ਵਿਘਾਸਂ ਭਕ੍ਖਿਤਾ ਤਿਰਿਤ੍ਤਮਂਸਂ ਖਾਦਿਤ੍ਵਾ ਵਡ੍ਢਿਤੋ. ਦਿਤ੍ਤੋਤਿ ਦਪ੍ਪਿਤੋ ਥੂਲਸਰੀਰੋ. ਬਲਵਾਤਿ ਬਲਸਮ੍ਪਨ੍ਨੋ. ਏਤਦਹੋਸੀਤਿ ਕਸ੍ਮਾ ਅਹੋਸਿ? ਅਸ੍ਮਿਮਾਨਦੋਸੇਨ.
ਤਤ੍ਰਾਯਂ ਅਨੁਪੁਬ੍ਬਿਕਥਾ – ਏਕਦਿਵਸਂ ਕਿਰ ਸੋ ਸੀਹੋ ਗੋਚਰਤੋ ਨਿਵਤ੍ਤਮਾਨੋ ਤਂ ਸਿਙ੍ਗਾਲਂ ਭਯੇਨ ਪਲਾਯਮਾਨਂ ਦਿਸ੍ਵਾ ਕਾਰੁਞ੍ਞਜਾਤੋ ਹੁਤ੍ਵਾ ‘‘ਵਯਸ, ਮਾ ਭਾਯਿ, ਤਿਟ੍ਠ ਕੋ ਨਾਮ ਤ੍ਵ’’ਨ੍ਤਿ ਆਹ. ਜਮ੍ਬੁਕੋ ਨਾਮਾਹਂ ਸਾਮੀਤਿ. ਵਯਸ, ਜਮ੍ਬੁਕ, ਇਤੋ ਪਟ੍ਠਾਯ ਮਂ ਉਪਟ੍ਠਾਤੁਂ ਸਕ੍ਖਿਸ੍ਸਸੀਤਿ. ਉਪਟ੍ਠਹਿਸ੍ਸਾਮੀਤਿ. ਸੋ ਤਤੋ ਪਟ੍ਠਾਯ ਉਪਟ੍ਠਾਤਿ. ਸੀਹੋ ਗੋਚਰਤੋ ਆਗਚ੍ਛਨ੍ਤੋ ਮਹਨ੍ਤਂ ਮਹਨ੍ਤਂ ਮਂਸਖਣ੍ਡਂ ਆਹਰਤਿ. ਸੋ ਤਂ ਖਾਦਿਤ੍ਵਾ ਅਵਿਦੂਰੇ ਪਾਸਾਣਪਿਟ੍ਠੇ ਵਸਤਿ. ਸੋ ਕਤਿਪਾਹਚ੍ਚਯੇਨੇਵ ਥੂਲਸਰੀਰੋ ਮਹਾਖਨ੍ਧੋ ਜਾਤੋ. ਅਥ ਨਂ ਸੀਹੋ ਅਵੋਚ – ‘‘ਵਯਸ, ਜਮ੍ਬੁਕ, ਮਮ ਵਿਜਮ੍ਭਨਕਾਲੇ ਅਵਿਦੂਰੇ ਠਤ੍ਵਾ ‘ਵਿਰੋਚ ਸਾਮੀ’ਤਿ ਵਤ੍ਤੁਂ ਸਕ੍ਖਿਸ੍ਸਸੀ’’ਤਿ. ਸਕ੍ਕੋਮਿ ਸਾਮੀਤਿ. ਸੋ ਤਸ੍ਸ ਵਿਜਮ੍ਭਨਕਾਲੇ ਤਥਾ ਕਰੋਤਿ. ਤੇਨ ਸੀਹਸ੍ਸ ਅਤਿਰੇਕੋ ਅਸ੍ਮਿਮਾਨੋ ਹੋਤਿ.
ਅਥੇਕਦਿਵਸਂ ਜਰਸਿਙ੍ਗਾਲੋ ਉਦਕਸੋਣ੍ਡਿਯਂ ਪਾਨੀਯਂ ਪਿਵਨ੍ਤੋ ਅਤ੍ਤਨੋ ਛਾਯਂ ਓਲੋਕੇਨ੍ਤੋ ਅਦ੍ਦਸ ਅਤ੍ਤਨੋ ਥੂਲਸਰੀਰਤਞ੍ਚੇਵ ਮਹਾਖਨ੍ਧਤਞ੍ਚ. ਦਿਸ੍ਵਾ ‘ਜਰਸਿਙ੍ਗਾਲੋਸ੍ਮੀ’ਤਿ ਮਨਂ ਅਕਤ੍ਵਾ ‘‘ਅਹਮ੍ਪਿ ਸੀਹੋ ਜਾਤੋ’’ਤਿ ਮਞ੍ਞਿ. ਤਤੋ ਅਤ੍ਤਨਾਵ ਅਤ੍ਤਾਨਂ ਏਤਦਵੋਚ – ‘‘ਵਯਸ, ਜਮ੍ਬੁਕ, ਯੁਤ੍ਤਂ ਨਾਮ ਤਵ ਇਮਿਨਾ ਅਤ੍ਤਭਾਵੇਨ ਪਰਸ੍ਸ ਉਚ੍ਛਿਟ੍ਠਮਂਸਂ ਖਾਦਿਤੁਂ, ਕਿਂ ਤ੍ਵਂ ਪੁਰਿਸੋ ਨ ਹੋਸਿ, ਸੀਹਸ੍ਸਾਪਿ ਚਤ੍ਤਾਰੋ ਪਾਦਾ ਦ੍ਵੇ ਦਾਠਾ ਦ੍ਵੇ ਕਣ੍ਣਾ ਏਕਂ ਨਙ੍ਗੁਟ੍ਠਂ, ਤਵਪਿ ਸਬ੍ਬਂ ਤਥੇਵ, ਕੇਵਲਂ ਤਵ ਕੇਸਰਭਾਰਮਤ੍ਤਮੇਵ ਨਤ੍ਥੀ’’ਤਿ. ਤਸ੍ਸੇਵਂ ਚਿਨ੍ਤਯਤੋ ਅਸ੍ਮਿਮਾਨੋ ਵਡ੍ਢਿ. ਅਥਸ੍ਸ ਤੇਨ ਅਸ੍ਮਿਮਾਨਦੋਸੇਨ ਏਤਂ ‘‘ਕੋ ਚਾਹ’’ਨ੍ਤਿਆਦਿ ਮਞ੍ਞਿਤਮਹੋਸਿ. ਤਤ੍ਥ ਕੋ ਚਾਹਨ੍ਤਿ ਅਹਂ ਕੋ, ਸੀਹੋ ਮਿਗਰਾਜਾ ਕੋ, ਨ ਮੇ ਞਾਤਿ, ਨ ਸਾਮਿਕੋ, ਕਿਮਹਂ ਤਸ੍ਸ ਨਿਪਚ੍ਚਕਾਰਂ ਕਰੋਮੀਤਿ ਅਧਿਪ੍ਪਾਯੋ. ਸਿਙ੍ਗਾਲਕਂਯੇਵਾਤਿ ਸਿਙ੍ਗਾਲਰਵਮੇਵ. ਭੇਰਣ੍ਡਕਂਯੇਵਾਤਿ ਅਪ੍ਪਿਯਅਮਨਾਪਸਦ੍ਦਮੇਵ. ਕੇ ਚ ਛਵੇ ਸਿਙ੍ਗਾਲੇਤਿ ਕੋ ਚ ਲਾਮਕੋ ਸਿਙ੍ਗਾਲੋ. ਕੇ ਪਨ ਸੀਹਨਾਦੇਤਿ ਕੋ ਪਨ ਸੀਹਨਾਦੋ ਸਿਙ੍ਗਾਲਸ੍ਸ ਚ ਸੀਹਨਾਦਸ੍ਸ ਚ ਕੋ ਸਮ੍ਬਨ੍ਧੋਤਿ ਅਧਿਪ੍ਪਾਯੋ. ਸੁਗਤਾਪਦਾਨੇਸੂਤਿ ਸੁਗਤਲਕ੍ਖਣੇਸੁ. ਸੁਗਤਸ੍ਸ ਸਾਸਨਸਮ੍ਭੂਤਾਸੁ ਤੀਸੁ ਸਿਕ੍ਖਾਸੁ. ਕਥਂ ਪਨੇਸ ਤਤ੍ਥ ਜੀਵਤਿ? ਏਤਸ੍ਸ ਹਿ ਚਤ੍ਤਾਰੋ ਪਚ੍ਚਯੇ ਦਦਮਾਨਾ ਸੀਲਾਦਿਗੁਣਸਮ੍ਪਨ੍ਨਾਨਂ ਸਮ੍ਬੁਦ੍ਧਾਨਂ ਦੇਮਾਤਿ ਦੇਨ੍ਤਿ, ਤੇਨ ਏਸ ਅਬੁਦ੍ਧੋ ਸਮਾਨੋ ਬੁਦ੍ਧਾਨਂ ਨਿਯਾਮਿਤਪਚ੍ਚਯੇ ਪਰਿਭੁਞ੍ਜਨ੍ਤੋ ਸੁਗਤਾਪਦਾਨੇਸੁ ਜੀਵਤਿ ਨਾਮ. ਸੁਗਤਾਤਿਰਿਤ੍ਤਾਨੀਤਿ ਤੇਸਂ ਕਿਰ ਭੋਜਨਾਨਿ ਦਦਮਾਨਾ ਬੁਦ੍ਧਾਨਞ੍ਚ ਬੁਦ੍ਧਸਾਵਕਾਨਞ੍ਚ ਦਤ੍ਵਾ ਪਚ੍ਛਾ ਅਵਸੇਸਂ ਸਾਯਨ੍ਹਸਮਯੇ ਦੇਨ੍ਤਿ. ਏਵਮੇਸ ਸੁਗਤਾਤਿਰਿਤ੍ਤਾਨਿ ਭੁਞ੍ਜਤਿ ਨਾਮ. ਤਥਾਗਤੇਤਿ ਤਥਾਗਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਆਸਾਦੇਤਬ੍ਬਂ ਘਟ੍ਟਯਿਤਬ੍ਬਂ. ਅਥ ਵਾ ‘‘ਤਥਾਗਤੇ’’ਤਿਆਦੀਨਿ ਉਪਯੋਗਬਹੁਵਚਨਾਨੇਵ. ਆਸਾਦੇਤਬ੍ਬਨ੍ਤਿ ਇਦਮ੍ਪਿ ਬਹੁਵਚਨਮੇਵ ਏਕਵਚਨਂ ਵਿਯ ਵੁਤ੍ਤਂ. ਆਸਾਦਨਾਤਿ ਅਹਂ ਬੁਦ੍ਧੇਨ ਸਦ੍ਧਿਂ ਪਾਟਿਹਾਰਿਯਂ ਕਰਿਸ੍ਸਾਮੀਤਿ ਘਟ੍ਟਨਾ.
੨੯. ਸਮੇਕ੍ਖਿਯਾਨਾਤਿ ਸਮੇਕ੍ਖਿਤ੍ਵਾ, ਮਞ੍ਞਿਤ੍ਵਾਤਿ ਅਤ੍ਥੋ. ਅਮਞ੍ਞੀਤਿ ਪੁਨ ਅਮਞ੍ਞਿਤ੍ਥ ਕੋਤ੍ਥੂਤਿ ਸਿਙ੍ਗਾਲੋ.
੩੦. ਅਤ੍ਤਾਨਂ ਵਿਘਾਸੇ ਸਮੇਕ੍ਖਿਯਾਤਿ ਸੋਣ੍ਡਿਯਂ ਉਚ੍ਛਿਟ੍ਠੋਦਕੇ ਥੂਲਂ ਅਤ੍ਤਭਾਵਂ ਦਿਸ੍ਵਾ. ਯਾਵ ਅਤ੍ਤਾਨਂ ਨ ਪਸ੍ਸਤੀਤਿ ਯਾਵ ਅਹਂ ਸੀਹਵਿਘਾਸਸਂਵਡ੍ਢਿਤਕੋ ਜਰਸਿਙ੍ਗਾਲੋਤਿ ਏਵਂ ਯਥਾਭੂਤਂ ਅਤ੍ਤਾਨਂ ਨ ਪਸ੍ਸਤਿ. ਬ੍ਯਗ੍ਘੋਤਿ ਮਞ੍ਞਤੀਤਿ ਸੀਹੋਹਮਸ੍ਮੀਤਿ ਮਞ੍ਞਤਿ, ਸੀਹੇਨ ਵਾ ਸਮਾਨਬਲੋ ਬ੍ਯਗ੍ਘੋਯੇਵ ਅਹਨ੍ਤਿ ਮਞ੍ਞਤਿ.
੩੧. ਭੁਤ੍ਵਾਨ ਭੇਕੇਤਿ ਆਵਾਟਮਣ੍ਡੂਕੇ ਖਾਦਿਤ੍ਵਾ. ਖਲਮੂਸਿਕਾਯੋਤਿ ਖਲੇਸੁ ਮੂਸਿਕਾਯੋ ਚ ਖਾਦਿਤ੍ਵਾ. ਕਟਸੀਸੁ ਖਿਤ੍ਤਾਨਿ ਚ ਕੋਣਪਾਨੀਤਿ ਸੁਸਾਨੇਸੁ ਛਡ੍ਡਿਤਕੁਣਪਾਨਿ ਚ ਖਾਦਿਤ੍ਵਾ. ਮਹਾਵਨੇਤਿ ਮਹਨ੍ਤੇ ਵਨਸ੍ਮਿਂ. ਸੁਞ੍ਞਵਨੇਤਿ ਤੁਚ੍ਛਵਨੇ. ਵਿਵਡ੍ਢੋਤਿ ਵਡ੍ਢਿਤੋ. ਤਥੇਵ ਸੋ ਸਿਙ੍ਗਾਲਕਂ ਅਨਦੀਤਿ ਏਵਂ ਸਂਵਡ੍ਢੋਪਿ ਮਿਗਰਾਜਾਹਮਸ੍ਮੀਤਿ ਮਞ੍ਞਿਤ੍ਵਾਪਿ ਯਥਾ ਪੁਬ੍ਬੇ ਦੁਬ੍ਬਲਸਿਙ੍ਗਾਲਕਾਲੇ, ਤਥੇਵ ਸੋ ਸਿਙ੍ਗਾਲਰਵਂਯੇਵ ਅਰਵੀਤਿ. ਇਮਾਯਪਿ ਗਾਥਾਯ ਭੇਕਾਦੀਨਿ ਭੁਤ੍ਵਾ ਵਡ੍ਢਿਤਸਿਙ੍ਗਾਲੋ ਵਿਯ ਲਾਭਸਕ੍ਕਾਰਗਿਦ੍ਧੋ ਤ੍ਵਨ੍ਤਿ ਪਾਥਿਕਪੁਤ੍ਤਮੇਵ ਘਟ੍ਟੇਸਿ.
ਨਾਗੇਹੀਤਿ ਹਤ੍ਥੀਹਿ. ਮਹਾਬਨ੍ਧਨਾਤਿ ਮਹਤਾ ਕਿਲੇਸਬਨ੍ਧਨਾ ਮੋਚੇਤ੍ਵਾ. ਮਹਾਵਿਦੁਗ੍ਗਾਤਿ ਮਹਾਵਿਦੁਗ੍ਗਂ ਨਾਮ ਚਤ੍ਤਾਰੋ ਓਘਾ. ਤਤੋ ਉਦ੍ਧਰਿਤ੍ਵਾ ਨਿਬ੍ਬਾਨਥਲੇ ਪਤਿਟ੍ਠਪੇਤ੍ਵਾ.
ਅਗ੍ਗਞ੍ਞਪਞ੍ਞਤ੍ਤਿਕਥਾਵਣ੍ਣਨਾ
੩੬. ਇਤਿ ‘‘ਭਗਵਾ ਏਤ੍ਤਕੇਨ ਕਥਾਮਗ੍ਗੇਨ ਪਾਟਿਹਾਰਿਯਂ ਨ ਕਰੋਤੀ’’ਤਿ ਪਦਸ੍ਸ ਅਨੁਸਨ੍ਧਿਂ ਦਸ੍ਸੇਤ੍ਵਾ ਇਦਾਨਿ ‘‘ਨ ਅਗ੍ਗਞ੍ਞਂ ਪਞ੍ਞਾਪੇਤੀ’’ਤਿ ਇਮਸ੍ਸ ਅਨੁਸਨ੍ਧਿਂ ਦਸ੍ਸੇਨ੍ਤੋ ਅਗ੍ਗਞ੍ਞਞ੍ਚਾਹਨ੍ਤਿ ਦੇਸਨਂ ਆਰਭਿ. ਤਤ੍ਥ ਅਗ੍ਗਞ੍ਞਞ੍ਚਾਹਨ੍ਤਿ ਅਹਂ, ਭਗ੍ਗਵ, ਅਗ੍ਗਞ੍ਞਞ੍ਚ ਪਜਾਨਾਮਿ ਲੋਕੁਪ੍ਪਤ੍ਤਿਚਰਿਯਵਂਸਞ੍ਚ. ਤਞ੍ਚ ਪਜਾਨਾਮੀਤਿ ਨ ਕੇਵਲਂ ਅਗ੍ਗਞ੍ਞਮੇਵ, ਤਞ੍ਚ ਅਗ੍ਗਞ੍ਞਂ ਪਜਾਨਾਮਿ. ਤਤੋ ਚ ਉਤ੍ਤਰਿਤਰਂ ਸੀਲਸਮਾਧਿਤੋ ਪਟ੍ਠਾਯ ਯਾਵ ਸਬ੍ਬਞ੍ਞੁਤਞ੍ਞਾਣਾ ਪਜਾਨਾਮਿ. ਤਞ੍ਚ ਪਜਾਨਂ ਨ ਪਰਾਮਸਾਮੀਤਿ ਤਞ੍ਚ ਪਜਾਨਨ੍ਤੋਪਿ ਅਹਂ ਇਦਂ ਨਾਮ ਪਜਾਨਾਮੀਤਿ ਤਣ੍ਹਾਦਿਟ੍ਠਿਮਾਨਵਸੇਨ ਨ ਪਰਾਮਸਾਮਿ. ਨਤ੍ਥਿ ਤਥਾਗਤਸ੍ਸ ਪਰਾਮਾਸੋਤਿ ਦੀਪੇਤਿ. ਪਚ੍ਚਤ੍ਤਞ੍ਞੇਵ ਨਿਬ੍ਬੁਤਿ ਵਿਦਿਤਾਤਿ ਅਤ੍ਤਨਾਯੇਵ ਅਤ੍ਤਨਿ ਕਿਲੇਸਨਿਬ੍ਬਾਨਂ ਵਿਦਿਤਂ. ਯਦਭਿਜਾਨਂ ਤਥਾਗਤੋਤਿ ਯਂ ਕਿਲੇਸਨਿਬ੍ਬਾਨਂ ਜਾਨਨ੍ਤੋ ਤਥਾਗਤੋ. ਨੋ ਅਨਯਂ ਆਪਜ੍ਜਤੀਤਿ ਅਵਿਦਿਤਨਿਬ੍ਬਾਨਾ ਤਿਤ੍ਥਿਯਾ ਵਿਯ ਅਨਯਂ ਦੁਕ੍ਖਂ ਬ੍ਯਸਨਂ ਨਾਪਜ੍ਜਤਿ.
੩੭. ਇਦਾਨਿ ਯਂ ਤਂ ਤਿਤ੍ਥਿਯਾ ਅਗ੍ਗਞ੍ਞਂ ਪਞ੍ਞਪੇਨ੍ਤਿ, ਤਂ ਦਸ੍ਸੇਨ੍ਤੋ ਸਨ੍ਤਿ ਭਗ੍ਗਵਾਤਿਆਦਿਮਾਹ. ਤਤ੍ਥ ਇਸ੍ਸਰਕੁਤ੍ਤਂ ਬ੍ਰਹ੍ਮਕੁਤ੍ਤਨ੍ਤਿ ਇਸ੍ਸਰਕਤਂ ਬ੍ਰਹ੍ਮਕਤਂ, ਇਸ੍ਸਰਨਿਮ੍ਮਿਤਂ ਬ੍ਰਹ੍ਮਨਿਮ੍ਮਿਤਨ੍ਤਿ ਅਤ੍ਥੋ. ਬ੍ਰਹ੍ਮਾ ਏਵ ਹਿ ਏਤ੍ਥ ਆਧਿਪਚ੍ਚਭਾਵੇਨ ਇਸ੍ਸਰੋਤਿ ਵੇਦਿਤਬ੍ਬੋ. ਆਚਰਿਯਕਨ੍ਤਿ ਆਚਰਿਯਭਾਵਂ ਆਚਰਿਯਵਾਦਂ. ਤਤ੍ਥ ਆਚਰਿਯਵਾਦੋ ਅਗ੍ਗਞ੍ਞਂ. ਅਗ੍ਗਞ੍ਞਂ ਪਨ ਏਤ੍ਥ ਦੇਸਿਤਨ੍ਤਿ ਕਤ੍ਵਾ ਸੋ ਅਗ੍ਗਞ੍ਞਂ ਤ੍ਵੇਵ ਵੁਤ੍ਤੋ. ਕਥਂ ਵਿਹਿਤਕਨ੍ਤਿ ਕੇਨ ਵਿਹਿਤਂ ਕਿਨ੍ਤਿ ਵਿਹਿਤਂ. ਸੇਸਂ ਬ੍ਰਹ੍ਮਜਾਲੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਂ.
੪੧. ਖਿਡ੍ਡਾਪਦੋਸਿਕਨ੍ਤਿ ਖਿਡ੍ਡਾਪਦੋਸਿਕਮੂਲਂ.
੪੭. ਅਸਤਾਤਿ ਅਵਿਜ੍ਜਮਾਨੇਨ, ਅਸਂਵਿਜ੍ਜਮਾਨਟ੍ਠੇਨਾਤਿ ਅਤ੍ਥੋ. ਤੁਚ੍ਛਾਤਿ ਤੁਚ੍ਛੇਨ ਅਨ੍ਤੋਸਾਰਵਿਰਹਿਤੇਨ. ਮੁਸਾਤਿ ਮੁਸਾਵਾਦੇਨ. ਅਭੂਤੇਨਾਤਿ ਭੂਤਤ੍ਥਵਿਰਹਿਤੇਨ. ਅਬ੍ਭਾਚਿਕ੍ਖਨ੍ਤੀਤਿ ਅਭਿਆਚਿਕ੍ਖਨ੍ਤਿ. ਵਿਪਰੀਤੋਤਿ ਵਿਪਰੀਤਸਞ੍ਞੋ ਵਿਪਰੀਤਚਿਤ੍ਤੋ. ਭਿਕ੍ਖਵੋ ਚਾਤਿ ਨ ਕੇਵਲਂ ਸਮਣੋ ਗੋਤਮੋਯੇਵ, ਯੇ ਚ ਅਸ੍ਸ ਅਨੁਸਿਟ੍ਠਿਂ ਕਰੋਨ੍ਤਿ, ਤੇ ਭਿਕ੍ਖੂ ਚ ਵਿਪਰੀਤਾ. ਅਥ ਯਂ ਸਨ੍ਧਾਯ ਵਿਪਰੀਤੋਤਿ ਵਦਨ੍ਤਿ, ਤਂ ਦਸ੍ਸੇਤੁਂ ਸਮਣੋ ਗੋਤਮੋਤਿਆਦਿ ਵੁਤ੍ਤਂ. ਸੁਭਂ ਵਿਮੋਕ੍ਖਨ੍ਤਿ ਵਣ੍ਣਕਸਿਣਂ. ਅਸੁਭਨ੍ਤ੍ਵੇਵਾਤਿ ਸੁਭਞ੍ਚ ਅਸੁਭਞ੍ਚ ਸਬ੍ਬਂ ਅਸੁਭਨ੍ਤਿ ਏਵਂ ਪਜਾਨਾਤਿ. ਸੁਭਨ੍ਤ੍ਵੇਵ ਤਸ੍ਮਿਂ ਸਮਯੇਤਿ ਸੁਭਨ੍ਤਿ ਏਵ ਚ ਤਸ੍ਮਿਂ ਸਮਯੇ ਪਜਾਨਾਤਿ, ਨ ਅਸੁਭਂ. ਭਿਕ੍ਖਵੋ ਚਾਤਿ ਯੇ ਤੇ ਏਵਂ ਵਦਨ੍ਤਿ, ਤੇਸਂ ਭਿਕ੍ਖਵੋ ਚ ਅਨ੍ਤੇਵਾਸਿਕਸਮਣਾ ਵਿਪਰੀਤਾ. ਪਹੋਤੀਤਿ ਸਮਤ੍ਥੋ ਪਟਿਬਲੋ.
੪੮. ਦੁਕ੍ਕਰਂ ਖੋਤਿ ਅਯਂ ਪਰਿਬ੍ਬਾਜਕੋ ਯਦਿਦਂ ‘‘ਏਵਂਪਸਨ੍ਨੋ ਅਹਂ, ਭਨ੍ਤੇ’’ਤਿਆਦਿਮਾਹ, ਤਂ ਸਾਠੇਯ੍ਯੇਨ ਕੋਹਞ੍ਞੇਨ ਆਹ. ਏਵਂ ਕਿਰਸ੍ਸ ਅਹੋਸਿ – ‘‘ਸਮਣੋ ਗੋਤਮੋ ਮਯ੍ਹਂ ਏਤ੍ਤਕਂ ਧਮ੍ਮਕਥਂ ਕਥੇਸਿ, ਤਮਹਂ ਸੁਤ੍ਵਾਪਿ ਪਬ੍ਬਜਿਤੁਂ ਨ ਸਕ੍ਕੋਮਿ, ਮਯਾ ਏਤਸ੍ਸ ਸਾਸਨਂ ਪਟਿਪਨ੍ਨਸਦਿਸੇਨ ਭਵਿਤੁਂ ਵਟ੍ਟਤੀ’’ਤਿ. ਤਤੋ ਸੋ ਸਾਠੇਯ੍ਯੇਨ ਕੋਹਞ੍ਞੇਨ ਏਵਮਾਹ. ਤੇਨਸ੍ਸ ਭਗਵਾ ਮਮ੍ਮਂ ਘਟ੍ਟੇਨ੍ਤੋ ਵਿਯ ‘‘ਦੁਕ੍ਕਰਂ ਖੋ ਏਤਂ, ਭਗ੍ਗਵ ਤਯਾ ਅਞ੍ਞਦਿਟ੍ਠਿਕੇਨਾ’’ਤਿਆਦਿਮਾਹ. ਤਂ ਪੋਟ੍ਠਪਾਦਸੁਤ੍ਤੇ ਵੁਤ੍ਤਤ੍ਥਮੇਵ. ਸਾਧੁਕਮਨੁਰਕ੍ਖਾਤਿ ਸੁਟ੍ਠੁ ਅਨੁਰਕ੍ਖ.
ਇਤਿ ਭਗਵਾ ਪਸਾਦਮਤ੍ਤਾਨੁਰਕ੍ਖਣੇ ਪਰਿਬ੍ਬਾਜਕਂ ਨਿਯੋਜੇਸਿ. ਸੋਪਿ ਏਵਂ ਮਹਨ੍ਤਂ ਸੁਤ੍ਤਨ੍ਤਂ ਸੁਤ੍ਵਾਪਿ ਨਾਸਕ੍ਖਿ ਕਿਲੇਸਕ੍ਖਯਂ ਕਾਤੁਂ. ਦੇਸਨਾ ਪਨਸ੍ਸ ਆਯਤਿਂ ਵਾਸਨਾਯ ਪਚ੍ਚਯੋ ਅਹੋਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ
ਪਾਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਉਦੁਮ੍ਬਰਿਕਸੁਤ੍ਤਵਣ੍ਣਨਾ
ਨਿਗ੍ਰੋਧਪਰਿਬ੍ਬਾਜਕਵਤ੍ਥੁਵਣ੍ਣਨਾ
੪੯. ਏਵਂ ਮੇ ਸੁਤਨ੍ਤਿ ਉਦੁਮ੍ਬਰਿਕਸੁਤ੍ਤਂ. ਤਤ੍ਰਾਯਮਪੁਬ੍ਬਪਦਵਣ੍ਣਨਾ – ਪਰਿਬ੍ਬਾਜਕੋਤਿ ਛਨ੍ਨਪਰਿਬ੍ਬਾਜਕੋ. ਉਦੁਮ੍ਬਰਿਕਾਯ ਪਰਿਬ੍ਬਾਜਕਾਰਾਮੇਤਿ ਉਦੁਮ੍ਬਰਿਕਾਯ ਦੇਵਿਯਾ ਸਨ੍ਤਕੇ ਪਰਿਬ੍ਬਾਜਕਾਰਾਮੇ. ਸਨ੍ਧਾਨੋਤਿ ਤਸ੍ਸ ਨਾਮਂ. ਅਯਂ ਪਨ ਮਹਾਨੁਭਾਵੋ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਪਞ੍ਚਨ੍ਨਂ ਉਪਾਸਕਸਤਾਨਂ ਅਗ੍ਗਪੁਰਿਸੋ ਅਨਾਗਾਮੀ ਭਗਵਤਾ ਮਹਾਪਰਿਸਮਜ੍ਝੇ ਏਵਂ ਸਂਵਣ੍ਣਿਤੋ –
‘‘ਛਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਸਨ੍ਧਾਨੋ ਗਹਪਤਿ ਤਥਾਗਤੇ ਨਿਟ੍ਠਙ੍ਗਤੋ ਸਦ੍ਧਮ੍ਮੇ ਇਰਿਯਤਿ. ਕਤਮੇਹਿ ਛਹਿ? ਬੁਦ੍ਧੇ ਅਵੇਚ੍ਚਪ੍ਪਸਾਦੇਨ ਧਮ੍ਮੇ ਅਵੇਚ੍ਚਪ੍ਪਸਾਦੇਨ ਸਙ੍ਘੇ ਅਵੇਚ੍ਚਪ੍ਪਸਾਦੇਨ ਅਰਿਯੇਨ ਸੀਲੇਨ ਅਰਿਯੇਨ ਞਾਣੇਨ ਅਰਿਯਾਯ ਵਿਮੁਤ੍ਤਿਯਾ. ਇਮੇਹਿ ਖੋ, ਭਿਕ੍ਖਵੇ, ਛਹਿ ਅਙ੍ਗੇਹਿ ਸਮਨ੍ਨਾਗਤੋ ਸਨ੍ਧਾਨੋ ਗਹਪਤਿ ਤਥਾਗਤੇ ਨਿਟ੍ਠਙ੍ਗਤੋ ਸਦ੍ਧਮ੍ਮੇ ਇਰਿਯਤੀ’’ਤਿ (ਅ. ਨਿ. ੬.੧੨੦-੧੩੯).
ਸੋ ਪਾਤੋਯੇਵ ਉਪੋਸਥਙ੍ਗਾਨਿ ਅਧਿਟ੍ਠਾਯ ਪੁਬ੍ਬਣ੍ਹਸਮਯੇ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਦਾਨਂ ਦਤ੍ਵਾ ਭਿਕ੍ਖੂਸੁ ਵਿਹਾਰਂ ਗਤੇਸੁ ਘਰੇ ਖੁਦ੍ਦਕਮਹਲ੍ਲਕਾਨਂ ਦਾਰਕਾਨਂ ਸਦ੍ਦੇਨ ਉਬ੍ਬਾਲ਼੍ਹੋ ਸਤ੍ਥੁ ਸਨ੍ਤਿਕੇ ‘‘ਧਮ੍ਮਂ ਸੋਸ੍ਸਾਮੀ’’ਤਿ ਨਿਕ੍ਖਨ੍ਤੋ. ਤੇਨ ਵੁਤ੍ਤਂ ਦਿਵਾ ਦਿਵਸ੍ਸ ਰਾਜਗਹਾ ਨਿਕ੍ਖਮੀਤਿ. ਤਤ੍ਥ ਦਿਵਾ ਦਿਵਸ੍ਸਾਤਿ ਦਿਵਸਸ੍ਸ ਦਿਵਾ ਨਾਮ ਮਜ੍ਝਨ੍ਹਾਤਿਕ੍ਕਮੋ, ਤਸ੍ਮਿਂ ਦਿਵਸਸ੍ਸਾਪਿ ਦਿਵਾਭੂਤੇ ਅਤਿਕ੍ਕਨ੍ਤਮਤ੍ਤੇ ਮਜ੍ਝਨ੍ਹਿਕੇ ਨਿਕ੍ਖਮੀਤਿ ਅਤ੍ਥੋ. ਪਟਿਸਲ੍ਲੀਨੋਤਿ ਤਤੋ ਤਤੋ ਰੂਪਾਦਿਗੋਚਰਤੋ ਚਿਤ੍ਤਂ ਪਟਿਸਂਹਰਿਤ੍ਵਾ ਨਿਲੀਨੋ ਝਾਨਰਤਿਸੇਵਨਾਵਸੇਨ ਏਕੀਭਾਵਂ ਗਤੋ. ਮਨੋਭਾਵਨੀਯਾਨਨ੍ਤਿ ਮਨਵਡ੍ਢਕਾਨਂ. ਯੇ ਚ ਆਵਜ੍ਜਤੋ ਮਨਸਿਕਰੋਤੋ ਚਿਤ੍ਤਂ ਵਿਨੀਵਰਣਂ ਹੋਤਿ ਉਨ੍ਨਮਤਿ ਵਡ੍ਢਤਿ.
੫੦. ਉਨ੍ਨਾਦਿਨਿਯਾਤਿਆਦੀਨਿ ਪੋਟ੍ਠਪਾਦਸੁਤ੍ਤੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਾਨਿ.
੫੧. ਯਾਵਤਾਤਿ ਯਤ੍ਤਕਾ. ਅਯਂ ਤੇਸਂ ਅਞ੍ਞਤਰੋਤਿ ਅਯਂ ਤੇਸਂ ਅਬ੍ਭਨ੍ਤਰੋ ਏਕੋ ਸਾਵਕੋ, ਭਗਵਤੋ ਕਿਰ ਸਾਵਕਾ ਗਿਹਿਅਨਾਗਾਮਿਨੋਯੇਵ ਪਞ੍ਚਸਤਾ ਰਾਜਗਹੇ ਪਟਿਵਸਨ੍ਤਿ. ਯੇਸਂ ਏਕੇਕਸ੍ਸ ਪਞ੍ਚ ਪਞ੍ਚ ਉਪਾਸਕਸਤਾਨਿ ਪਰਿਵਾਰਾ, ਤੇ ਸਨ੍ਧਾਯ ‘‘ਅਯਂ ਤੇਸਂ ਅਞ੍ਞਤਰੋ’’ਤਿ ਆਹ. ਅਪ੍ਪੇਵ ਨਾਮਾਤਿ ਤਸ੍ਸ ਉਪਸਙ੍ਕਮਨਂ ਪਤ੍ਥਯਮਾਨੋ ਆਹ. ਪਤ੍ਥਨਾਕਾਰਣਂ ਪਨ ਪੋਟ੍ਠਪਾਦਸੁਤ੍ਤੇ ਵੁਤ੍ਤਮੇਵ.
੫੨. ਏਤਦਵੋਚਾਤਿ ਆਗਚ੍ਛਨ੍ਤੋ ਅਨ੍ਤਰਾਮਗ੍ਗੇਯੇਵ ਤੇਸਂ ਕਥਾਯ ਸੁਤਤ੍ਤਾ ਏਤਂ ਅਞ੍ਞਥਾ ਖੋ ਇਮੇਤਿਆਦਿਵਚਨਂ ਅਵੋਚ. ਤਤ੍ਥ ਅਞ੍ਞਤਿਤ੍ਥਿਯਾਤਿ ਦਸ੍ਸਨੇਨਪਿ ਆਕਪ੍ਪੇਨਪਿ ਕੁਤ੍ਤੇਨਪਿ ਆਚਾਰੇਨਪਿ ਵਿਹਾਰੇਨਪਿ ਇਰਿਯਾਪਥੇਨਪਿ ਅਞ੍ਞੇ ਤਿਤ੍ਥਿਯਾਤਿ ਅਞ੍ਞਤਿਤ੍ਥਿਯਾ. ਸਙ੍ਗਮ੍ਮ ਸਮਾਗਮ੍ਮਾਤਿ ਸਙ੍ਗਨ੍ਤ੍ਵਾ ਸਮਾਗਨ੍ਤ੍ਵਾ ਰਾਸਿ ਹੁਤ੍ਵਾ ਨਿਸਿਨ੍ਨਟ੍ਠਾਨੇ. ਅਰਞ੍ਞਵਨਪਤ੍ਥਾਨੀਤਿ ਅਰਞ੍ਞਵਨਪਤ੍ਥਾਨਿ ਗਾਮੂਪਚਾਰਤੋ ਮੁਤ੍ਤਾਨਿ ਦੂਰਸੇਨਾਸਨਾਨਿ. ਪਨ੍ਤਾਨੀਤਿ ਦੂਰਤਰਾਨਿ ਮਨੁਸ੍ਸੂਪਚਾਰਵਿਰਹਿਤਾਨਿ. ਅਪ੍ਪਸਦ੍ਦਾਨੀਤਿ ਵਿਹਾਰੂਪਚਾਰੇਨ ਗਚ੍ਛਤੋ ਅਦ੍ਧਿਕਜਨਸ੍ਸਪਿ ਸਦ੍ਦੇਨ ਮਨ੍ਦਸਦ੍ਦਾਨਿ. ਅਪ੍ਪਨਿਗ੍ਘੋਸਾਨੀਤਿ ਅਵਿਭਾਵਿਤਤ੍ਥੇਨ ਨਿਗ੍ਘੋਸੇਨ ਮਨ੍ਦਨਿਗ੍ਘੋਸਾਨਿ. ਵਿਜਨਵਾਤਾਨੀਤਿ ਅਨ੍ਤੋਸਞ੍ਚਾਰਿਨੋ ਜਨਸ੍ਸ ਵਾਤੇਨ ਵਿਗਤਵਾਤਾਨਿ. ਮਨੁਸ੍ਸਰਾਹਸ੍ਸੇਯ੍ਯਕਾਨੀਤਿ ਮਨੁਸ੍ਸਾਨਂ ਰਹਸ੍ਸਕਰਣਸ੍ਸ ਯੁਤ੍ਤਾਨਿ ਅਨੁਚ੍ਛਵਿਕਾਨਿ. ਪਟਿਸਲ੍ਲਾਨਸਾਰੁਪ੍ਪਾਨੀਤਿ ਏਕੀਭਾਵਸ੍ਸ ਅਨੁਰੂਪਾਨਿ. ਇਤਿ ਸਨ੍ਧਾਨੋ ਗਹਪਤਿ ‘‘ਅਹੋ ਮਮ ਸਤ੍ਥਾ ਯੋ ਏਵਰੂਪਾਨਿ ਸੇਨਾਸਨਾਨਿ ਪਟਿਸੇਵਤੀ’’ਤਿ ਅਞ੍ਜਲਿਂ ਪਗ੍ਗਯ੍ਹ ਉਤ੍ਤਮਙ੍ਗੇ ਸਿਰਸ੍ਮਿਂ ਪਤਿਟ੍ਠਪੇਤ੍ਵਾ ਇਮਂ ਉਦਾਨਂ ਉਦਾਨੇਨ੍ਤੋ ਨਿਸੀਦਿ.
੫੩. ਏਵਂ ਵੁਤ੍ਤੇਤਿ ਏਵਂ ਸਨ੍ਧਾਨੇਨ ਗਹਪਤਿਨਾ ਉਦਾਨਂ ਉਦਾਨੇਨ੍ਤੇਨ ਵੁਤ੍ਤੇ. ਨਿਗ੍ਰੋਧੋ ਪਰਿਬ੍ਬਾਜਕੋ ਅਯਂ ਗਹਪਤਿ ਮਮ ਸਨ੍ਤਿਕੇ ਨਿਸਿਨ੍ਨੋਪਿ ਅਤ੍ਤਨੋ ਸਤ੍ਥਾਰਂਯੇਵ ਥੋਮੇਤਿ ਉਕ੍ਕਂਸਤਿ, ਅਮ੍ਹੇ ਪਨ ਅਤ੍ਥੀਤਿਪਿ ਨ ਮਞ੍ਞਤਿ, ਏਤਸ੍ਮਿਂ ਉਪ੍ਪਨ੍ਨਕੋਪਂ ਸਮਣਸ੍ਸ ਗੋਤਮਸ੍ਸ ਉਪਰਿ ਪਾਤੇਸ੍ਸਾਮੀਤਿ ਸਨ੍ਧਾਨਂ ਗਹਪਤਿਂ ਏਤਦਵੋਚ.
ਯਗ੍ਘੇਤਿ ਚੋਦਨਤ੍ਥੇ ਨਿਪਾਤੋ. ਜਾਨੇਯ੍ਯਾਸੀਤਿ ਬੁਜ੍ਝੇਯ੍ਯਾਸਿ ਪਸ੍ਸੇਯ੍ਯਾਸਿ. ਕੇਨ ਸਮਣੋ ਗੋਤਮੋ ਸਦ੍ਧਿਂ ਸਲ੍ਲਪਤੀਤਿ ਕੇਨ ਕਾਰਣੇਨ ਕੇਨ ਪੁਗ੍ਗਲੇਨ ਸਦ੍ਧਿਂ ਸਮਣੋ ਗੋਤਮੋ ਸਲ੍ਲਪਤਿ ਵਦਤਿ ਭਾਸਤਿ. ਕਿਂ ਵੁਤ੍ਤਂ ਹੋਤਿ – ‘‘ਯਦਿ ਕਿਞ੍ਚਿ ਸਲ੍ਲਾਪਕਾਰਣਂ ਭਵੇਯ੍ਯ, ਯਦਿ ਵਾ ਕੋਚਿ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਸਲ੍ਲਾਪਤ੍ਥਿਕੋ ਗਚ੍ਛੇਯ੍ਯ, ਸਲ੍ਲਪੇਯ੍ਯ, ਨ ਪਨ ਕਾਰਣਂ ਅਤ੍ਥਿ, ਨ ਤਸ੍ਸ ਸਨ੍ਤਿਕਂ ਕੋਚਿ ਗਚ੍ਛਤਿ, ਸ੍ਵਾਯਂ ਕੇਨ ਸਮਣੋ ਗੋਤਮੋ ਸਦ੍ਧਿਂ ਸਲ੍ਲਪਤਿ, ਅਸਲ੍ਲਪਨ੍ਤੋ ਕਥਂ ਉਨ੍ਨਾਦੀ ਭਵਿਸ੍ਸਤੀ’’ਤਿ.
ਸਾਕਚ੍ਛਨ੍ਤਿ ਸਂਸਨ੍ਦਨਂ. ਪਞ੍ਞਾਵੇਯ੍ਯਤ੍ਤਿਯਨ੍ਤਿ ਉਤ੍ਤਰਪਚ੍ਚੁਤ੍ਤਰਨਯੇਨ ਞਾਣਬ੍ਯਤ੍ਤਭਾਵਂ. ਸੁਞ੍ਞਾਗਾਰਹਤਾਤਿ ਸੁਞ੍ਞਾਗਾਰੇਸੁ ਨਟ੍ਠਾ, ਸਮਣੇਨ ਹਿ ਗੋਤਮੇਨ ਬੋਧਿਮੂਲੇ ਅਪ੍ਪਮਤ੍ਤਿਕਾ ਪਞ੍ਞਾ ਅਧਿਗਤਾ, ਸਾਪਿਸ੍ਸ ਸੁਞ੍ਞਾਗਾਰੇਸੁ ਏਕਕਸ੍ਸ ਨਿਸੀਦਤੋ ਨਟ੍ਠਾ. ਯਦਿ ਪਨ ਮਯਂ ਵਿਯ ਗਣਸਙ੍ਗਣਿਕਂ ਕਤ੍ਵਾ ਨਿਸੀਦੇਯ੍ਯ, ਨਾਸ੍ਸ ਪਞ੍ਞਾ ਨਸ੍ਸੇਯ੍ਯਾਤਿ ਦਸ੍ਸੇਤਿ. ਅਪਰਿਸਾਵਚਰੋਤਿ ਅਵਿਸਾਰਦਤ੍ਤਾ ਪਰਿਸਂ ਓਤਰਿਤੁਂ ਨ ਸਕ੍ਕੋਤਿ. ਨਾਲਂ ਸਲ੍ਲਾਪਾਯਾਤਿ ਨ ਸਮਤ੍ਥੋ ਸਲ੍ਲਾਪਂ ਕਾਤੁਂ. ਅਨ੍ਤਮਨ੍ਤਾਨੇਵਾਤਿ ਕੋਚਿ ਮਂ ਪਞ੍ਹਂ ਪੁਚ੍ਛੇਯ੍ਯਾਤਿ ਪਞ੍ਹਾਭੀਤੋ ਅਨ੍ਤਮਨ੍ਤਾਨੇਵ ਪਨ੍ਤਸੇਨਾਸਨਾਨਿ ਸੇਵਤਿ. ਗੋਕਾਣਾਤਿ ਏਕਕ੍ਖਿਹਤਾ ਕਾਣਗਾਵੀ. ਸਾ ਕਿਰ ਪਰਿਯਨ੍ਤਚਾਰਿਨੀ ਹੋਤਿ, ਅਨ੍ਤਮਨ੍ਤਾਨੇਵ ਸੇਵਤਿ. ਸਾ ਕਿਰ ਕਾਣਕ੍ਖਿਭਾਵੇਨ ਵਨਨ੍ਤਾਭਿਮੁਖੀਪਿ ਨ ਸਕ੍ਕੋਤਿ ਭਵਿਤੁਂ. ਕਸ੍ਮਾ? ਯਸ੍ਮਾ ਪਤ੍ਤੇਨ ਵਾ ਸਾਖਾਯ ਵਾ ਕਣ੍ਟਕੇਨ ਵਾ ਪਹਾਰਸ੍ਸ ਭਾਯਤਿ. ਗੁਨ੍ਨਂ ਅਭਿਮੁਖੀਪਿ ਨ ਸਕ੍ਕੋਤਿ ਭਵਿਤੁਂ. ਕਸ੍ਮਾ? ਯਸ੍ਮਾ ਸਿਙ੍ਗੇਨ ਵਾ ਕਣ੍ਣੇਨ ਵਾ ਵਾਲੇਨ ਵਾ ਪਹਾਰਸ੍ਸ ਭਾਯਤਿ. ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਸਂਸਾਦੇਯ੍ਯਾਮਾਤਿ ਏਕਪਞ੍ਹਪੁਚ੍ਛਨੇਨੇਵ ਸਂਸਾਦਨਂ ਵਿਸਾਦਮਾਪਨ੍ਨਂ ਕਰੇਯ੍ਯਾਮ. ਤੁਚ੍ਛਕੁਮ੍ਭੀਵ ਨਨ੍ਤਿ ਰਿਤ੍ਤਘਟਂ ਵਿਯ ਨਂ. ਓਰੋਧੇਯ੍ਯਾਮਾਤਿ ਵਿਨਨ੍ਧੇਯ੍ਯਾਮ. ਪੂਰਿਤਘਟੋ ਹਿ ਇਤੋ ਚਿਤੋ ਚ ਪਰਿਵਤ੍ਤੇਤ੍ਵਾ ਨ ਸੁਵਿਨਨ੍ਧਨੀਯੋ ਹੋਤਿ. ਰਿਤ੍ਤਕੋ ਯਥਾਰੁਚਿ ਪਰਿਵਤ੍ਤੇਤ੍ਵਾ ਸਕ੍ਕਾ ਹੋਤਿ ਵਿਨਨ੍ਧਿਤੁਂ, ਏਵਮੇਵ ਹਤਪਞ੍ਞਤਾਯ ਰਿਤ੍ਤਕੁਮ੍ਭਿਸਦਿਸਂ ਸਮਣਂ ਗੋਤਮਂ ਵਾਦਵਿਨਨ੍ਧਨੇਨ ਸਮਨ੍ਤਾ ਵਿਨਨ੍ਧਿਸ੍ਸਾਮਾਤਿ ਵਦਤਿ.
ਇਤਿ ਪਰਿਬ੍ਬਾਜਕੋ ਸਤ੍ਥੁ ਸੁਵਣ੍ਣਵਣ੍ਣਂ ਨਲਾਟਮਣ੍ਡਲਂ ਅਪਸ੍ਸਨ੍ਤੋ ਦਸਬਲਸ੍ਸ ਪਰਮ੍ਮੁਖਾ ਅਤ੍ਤਨੋ ਬਲਂ ਦੀਪੇਨ੍ਤੋ ਅਸਮ੍ਭਿਨ੍ਨਂ ਖਤ੍ਤਿਯਕੁਮਾਰਂ ਜਾਤਿਯਾ ਘਟ੍ਟਯਨ੍ਤੋ ਚਣ੍ਡਾਲਪੁਤ੍ਤੋ ਵਿਯ ਅਸਮ੍ਭਿਨ੍ਨਕੇਸਰਸੀਹਂ ਮਿਗਰਾਜਾਨਂ ਥਾਮੇਨ ਘਟ੍ਟੇਨ੍ਤੋ ਜਰਸਿਙ੍ਗਾਲੋ ਵਿਯ ਚ ਨਾਨਪ੍ਪਕਾਰਂ ਤੁਚ੍ਛਗਜ੍ਜਿਤਂ ਗਜ੍ਜਿ. ਉਪਾਸਕੋਪਿ ਚਿਨ੍ਤੇਸਿ ‘‘ਅਯਂ ਪਰਿਬ੍ਬਾਜਕੋ ਅਤਿ ਵਿਯ ਗਜ੍ਜਤਿ, ਅਵੀਚਿਫੁਸਨਤ੍ਥਾਯ ਪਾਦਂ, ਭਵਗ੍ਗਗ੍ਗਹਣਤ੍ਥਾਯ ਹਤ੍ਥਂ ਪਸਾਰਯਨ੍ਤੋ ਵਿਯ ਨਿਰਤ੍ਥਕਂ ਵਾਯਮਤਿ. ਸਚੇ ਮੇ ਸਤ੍ਥਾ ਇਮਂ ਠਾਨਮਾਗਚ੍ਛੇਯ੍ਯ, ਇਮਸ੍ਸ ਪਰਿਬ੍ਬਾਜਕਸ੍ਸ ਯਾਵ ਭਵਗ੍ਗਾ ਉਸ੍ਸਿਤਂ ਮਾਨਦ੍ਧਜਂ ਠਾਨਸੋਵ ਓਪਾਤੇਯ੍ਯਾ’’ਤਿ.
੫੪. ਭਗਵਾਪਿ ਤੇਸਂ ਤਂ ਕਥਾਸਲ੍ਲਾਪਂ ਅਸ੍ਸੋਸਿਯੇਵ. ਤੇਨ ਵੁਤ੍ਤਂ ‘‘ਅਸ੍ਸੋਸਿ ਖੋ ਇਮਂ ਕਥਾਸਲ੍ਲਾਪ’’ਨ੍ਤਿ.
ਸੁਮਾਗਧਾਯਾਤਿ ਸੁਮਾਗਧਾ ਨਾਮ ਪੋਕ੍ਖਰਣੀ, ਯਸ੍ਸਾ ਤੀਰੇ ਨਿਸਿਨ੍ਨੋ ਅਞ੍ਞਤਰੋ ਪੁਰਿਸੋ ਪਦੁਮਨਾਲ਼ਨ੍ਤਰੇਹਿ ਅਸੁਰਭਵਨਂ ਪਵਿਸਨ੍ਤਂ ਅਸੁਰਸੇਨਂ ਅਦ੍ਦਸ. ਮੋਰਨਿਵਾਪੋਤਿ ਨਿਵਾਪੋ ਵੁਚ੍ਚਤਿ ਭਤ੍ਤਂ, ਯਤ੍ਥ ਮੋਰਾਨਂ ਅਭਯੇਨ ਸਦ੍ਧਿਂ ਨਿਵਾਪੋ ਦਿਨ੍ਨੋ, ਤਂ ਠਾਨਨ੍ਤਿ ਅਤ੍ਥੋ. ਅਬ੍ਭੋਕਾਸੇਤਿ ਅਙ੍ਗਣਟ੍ਠਾਨੇ. ਅਸ੍ਸਾਸਪਤ੍ਤਾਤਿ ਤੁਟ੍ਠਿਪਤ੍ਤਾ ਸੋਮਨਸ੍ਸਪਤ੍ਤਾ. ਅਜ੍ਝਾਸਯਨ੍ਤਿ ਉਤ੍ਤਮਨਿਸ੍ਸਯਭੂਤਂ. ਆਦਿਬ੍ਰਹ੍ਮਚਰਿਯਨ੍ਤਿ ਪੁਰਾਣਬ੍ਰਹ੍ਮਚਰਿਯਸਙ੍ਖਾਤਂ ਅਰਿਯਮਗ੍ਗਂ. ਇਦਂ ਵੁਤ੍ਤਂ ਹੋਤਿ – ‘‘ਕੋ ਨਾਮ ਸੋ, ਭਨ੍ਤੇ, ਧਮ੍ਮੋ ਯੇਨ ਭਗਵਤਾ ਸਾਵਕਾ ਵਿਨੀਤਾ ਅਜ੍ਝਾਸਯਾਦਿਬ੍ਰਹ੍ਮਚਰਿਯਭੂਤਂ ਅਰਿਯਮਗ੍ਗਂ ਪੂਰੇਤ੍ਵਾ ਅਰਹਤ੍ਤਾਧਿਗਮਵਸੇਨ ਅਸ੍ਸਾਸਪਤ੍ਤਾ ਪਟਿਜਾਨਨ੍ਤੀ’’ਤਿ.
ਤਪੋਜਿਗੁਚ੍ਛਾਵਾਦਵਣ੍ਣਨਾ
੫੫. ਵਿਪ੍ਪਕਤਾਤਿ ਮਮਾਗਮਨਪਚ੍ਚਯਾ ਅਨਿਟ੍ਠਿਤਾ, ਵ ਹੁਤ੍ਵਾ ਠਿਤਾ, ਕਥੇਹਿ, ਅਹਮੇਤਂ ਨਿਟ੍ਠਪੇਤ੍ਵਾ ਮਤ੍ਥਕਂ ਪਾਪੇਤ੍ਵਾ ਦਸ੍ਸੇਮੀਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ.
੫੬. ਦੁਜ੍ਜਾਨਂ ਖੋਤਿ ਭਗਵਾ ਪਰਿਬ੍ਬਾਜਕਸ੍ਸ ਵਚਨਂ ਸੁਤ੍ਵਾ ‘‘ਅਯਂ ਪਰਿਬ੍ਬਾਜਕੋ ਮਯਾ ਸਾਵਕਾਨਂ ਦੇਸੇਤਬ੍ਬਂ ਧਮ੍ਮਂ ਤੇਹਿ ਪੂਰੇਤਬ੍ਬਂ ਪਟਿਪਤ੍ਤਿਂ ਪੁਚ੍ਛਤਿ, ਸਚਸ੍ਸਾਹਂ ਆਦਿਤੋਵ ਤਂ ਕਥੇਸ੍ਸਾਮਿ, ਕਥਿਤਮ੍ਪਿ ਨਂ ਨ ਜਾਨਿਸ੍ਸਤਿ, ਅਯਂ ਪਨ ਵੀਰਿਯੇਨ ਪਾਪਜਿਗੁਚ੍ਛਨਵਾਦੋ, ਹਨ੍ਦਾਹਂ ਏਤਸ੍ਸੇਵ ਵਿਸਯੇ ਪਞ੍ਹਂ ਪੁਚ੍ਛਾਪੇਤ੍ਵਾ ਪੁਥੁਸਮਣਬ੍ਰਾਹ੍ਮਣਾਨਂ ਲਦ੍ਧਿਯਾ ਨਿਰਤ੍ਥਕਭਾਵਂ ਦਸ੍ਸੇਮਿ. ਅਥ ਪਚ੍ਛਾ ਇਮਂ ਪਞ੍ਹਂ ਬ੍ਯਾਕਰਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਦੁਜ੍ਜਾਨਂ ਖੋ ਏਤਨ੍ਤਿਆਦਿਮਾਹ. ਤਤ੍ਥ ਸਕੇ ਆਚਰਿਯਕੇਤਿ ਅਤ੍ਤਨੋ ਆਚਰਿਯਵਾਦੇ. ਅਧਿਜੇਗੁਚ੍ਛੇਤਿ ਵੀਰਿਯੇਨ ਪਾਪਜਿਗੁਚ੍ਛਨਭਾਵੇ. ਕਥਂ ਸਨ੍ਤਾਤਿ ਕਥਂ ਭੂਤਾ. ਤਪੋਜਿਗੁਚ੍ਛਾਤਿ ਵੀਰਿਯੇਨ ਪਾਪਜਿਗੁਚ੍ਛਾ ਪਾਪਵਿਵਜ੍ਜਨਾ. ਪਰਿਪੁਣ੍ਣਾਤਿ ਪਰਿਸੁਦ੍ਧਾ. ਕਥਂ ਅਪਰਿਪੁਣ੍ਣਾਤਿ ਕਥਂ ਅਪਰਿਸੁਦ੍ਧਾ ਹੋਤੀਤਿ ਏਵਂ ਪੁਚ੍ਛਾਤਿ. ਯਤ੍ਰ ਹਿ ਨਾਮਾਤਿ ਯੋ ਨਾਮ.
੫੭. ਅਪ੍ਪਸਦ੍ਦੇ ਕਤ੍ਵਾਤਿ ਨਿਰਵੇ ਅਪ੍ਪਸਦ੍ਦੇ ਕਤ੍ਵਾ. ਸੋ ਕਿਰ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਏਕਂ ਪਞ੍ਹਮ੍ਪਿ ਨ ਕਥੇਤਿ, ਸਲ੍ਲਾਪਕਥਾਪਿਸ੍ਸ ਅਤਿਬਹੁਕਾ ਨਤ੍ਥਿ, ਇਮੇ ਪਨ ਆਦਿਤੋ ਪਟ੍ਠਾਯ ਸਮਣਂ ਗੋਤਮਂ ਅਨੁਵਤ੍ਤਨ੍ਤਿ ਚੇਵ ਪਸਂਸਨ੍ਤਿ ਚ, ਹਨ੍ਦਾਹਂ ਇਮੇ ਨਿਸ੍ਸਦ੍ਦੇ ਕਤ੍ਵਾ ਸਯਂ ਕਥੇਮੀ’’ਤਿ. ਸੋ ਤਥਾ ਅਕਾਸਿ. ਤੇਨ ਵੁਤ੍ਤਂ ‘‘ਅਪ੍ਪਸਦ੍ਦੇ ਕਤ੍ਵਾ’’ਤਿ. ‘‘ਤਪੋਜਿਗੁਚ੍ਛਵਾਦਾ’’ਤਿਆਦੀਸੁ ਤਪੋਜਿਗੁਚ੍ਛਂ ਵਦਾਮ, ਮਨਸਾਪਿ ਤਮੇਵ ਸਾਰਤੋ ਗਹੇਤ੍ਵਾ ਵਿਚਰਾਮ, ਕਾਯੇਨਪਿਮ੍ਹਾ ਤਮੇਵ ਅਲ੍ਲੀਨਾ, ਨਾਨਪ੍ਪਕਾਰਕਂ ਅਤ੍ਤਕਿਲਮਥਾਨੁਯੋਗਮਨੁਯੁਤ੍ਤਾ ਵਿਹਰਾਮਾਤਿ ਅਤ੍ਥੋ.
ਉਪਕ੍ਕਿਲੇਸਵਣ੍ਣਨਾ
੫੮. ਤਪਸ੍ਸੀਤਿ ਤਪਨਿਸ੍ਸਿਤਕੋ. ‘‘ਅਚੇਲਕੋ’’ਤਿਆਦੀਨਿ ਸੀਹਨਾਦੇ (ਦੀ. ਨਿ. ਅਟ੍ਠ. ੧.੩੯੩) ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਾਨਿ. ਤਪਂ ਸਮਾਦਿਯਤੀਤਿ ਅਚੇਲਕਭਾਵਾਦਿਕਂ ਤਪਂ ਸਮ੍ਮਾ ਆਦਿਯਤਿ, ਦਲ਼੍ਹਂ ਗਣ੍ਹਾਤਿ. ਅਤ੍ਤਮਨੋ ਹੋਤੀਤਿ ਕੋ ਅਞ੍ਞੋ ਮਯਾ ਸਦਿਸੋ ਇਮਸ੍ਮਿਂ ਤਪੇ ਅਤ੍ਥੀਤਿ ਤੁਟ੍ਠਮਨੋ ਹੋਤਿ. ਪਰਿਪੁਣ੍ਣਸਙ੍ਕਪ੍ਪੋਤਿ ਅਲਮੇਤ੍ਤਾਵਤਾਤਿ ਏਵਂ ਪਰਿਯੋਸਿਤਸਙ੍ਕਪ੍ਪੋ, ਇਦਞ੍ਚ ਤਿਤ੍ਥਿਯਾਨਂ ਵਸੇਨ ਆਗਤਂ. ਸਾਸਨਾਵਚਰੇਨਾਪਿ ਪਨ ਦੀਪੇਤਬ੍ਬਂ. ਏਕਚ੍ਚੋ ਹਿ ਧੁਤਙ੍ਗਂ ਸਮਾਦਿਯਤਿ, ਸੋ ਤੇਨੇਵ ਧੁਤਙ੍ਗੇਨ ਕੋ ਅਞ੍ਞੋ ਮਯਾ ਸਦਿਸੋ ਧੁਤਙ੍ਗਧਰੋਤਿ ਅਤ੍ਤਮਨੋ ਹੋਤਿ ਪਰਿਪੁਣ੍ਣਸਙ੍ਕਪ੍ਪੋ. ਤਪਸ੍ਸਿਨੋ ਉਪਕ੍ਕਿਲੇਸੋ ਹੋਤੀਤਿ ਦੁਵਿਧਸ੍ਸਾਪੇਤਸ੍ਸ ਤਪਸ੍ਸਿਨੋ ਅਯਂ ਉਪਕ੍ਕਿਲੇਸੋ ਹੋਤਿ. ਏਤ੍ਤਾਵਤਾਯਂ ਤਪੋ ਉਪਕ੍ਕਿਲੇਸੋ ਹੋਤੀਤਿ ਵਦਾਮਿ.
ਅਤ੍ਤਾਨੁਕ੍ਕਂਸੇਤੀਤਿ ‘‘ਕੋ ਮਯਾ ਸਦਿਸੋ ਅਤ੍ਥੀ’’ਤਿ ਅਤ੍ਤਾਨਂ ਉਕ੍ਕਂਸਤਿ ਉਕ੍ਖਿਪਤਿ. ਪਰਂ ਵਮ੍ਭੇਤੀਤਿ ‘‘ਅਯਂ ਨ ਮਾਦਿਸੋ’’ਤਿ ਪਰਂ ਸਂਹਾਰੇਤਿ ਅਵਕ੍ਖਿਪਤਿ.
ਮਜ੍ਜਤੀਤਿ ਮਾਨਮਦਕਰਣੇਨ ਮਜ੍ਜਤਿ. ਮੁਚ੍ਛਤੀਤਿ ਮੁਚ੍ਛਿਤੋ ਹੋਤਿ ਗਧਿਤੋ ਅਜ੍ਝਾਪਨ੍ਨੋ. ਪਮਾਦਮਾਪਜ੍ਜਤੀਤਿ ਏਤਦੇਵ ਸਾਰਨ੍ਤਿ ਪਮਾਦਮਾਪਜ੍ਜਤਿ. ਸਾਸਨੇ ਪਬ੍ਬਜਿਤੋਪਿ ਧੁਤਙ੍ਗਸੁਦ੍ਧਿਕੋ ਹੋਤਿ, ਨ ਕਮ੍ਮਟ੍ਠਾਨਸੁਦ੍ਧਿਕੋ. ਧੁਤਙ੍ਗਮੇਵ ਅਰਹਤ੍ਤਂ ਵਿਯ ਸਾਰਤੋ ਪਚ੍ਚੇਤਿ.
੫੯. ਲਾਭਸਕ੍ਕਾਰਸਿਲੋਕਨ੍ਤਿ ਏਤ੍ਥ ਚਤ੍ਤਾਰੋ ਪਚ੍ਚਯਾ ਲਬ੍ਭਨ੍ਤੀਤਿ ਲਾਭਾ, ਤੇਯੇਵ ਸੁਟ੍ਠੁ ਕਤ੍ਵਾ ਪਟਿਸਙ੍ਖਰਿਤ੍ਵਾ ਲਦ੍ਧਾ ਸਕ੍ਕਾਰੋ, ਵਣ੍ਣਭਣਨਂ ਸਿਲੋਕੋ. ਅਭਿਨਿਬ੍ਬਤ੍ਤੇਤੀਤਿ ਅਚੇਲਕਾਦਿਭਾਵਂ ਤੇਰਸਧੁਤਙ੍ਗਸਮਾਦਾਨਂ ਵਾ ਨਿਸ੍ਸਾਯ ਮਹਾਲਾਭੋ ਉਪ੍ਪਜ੍ਜਤਿ, ਤਸ੍ਮਾ ‘‘ਅਭਿਨਿਬ੍ਬਤ੍ਤੇਤੀ’’ਤਿ ਵੁਤ੍ਤੋ. ਸੇਸਮੇਤ੍ਥ ਪੁਰਿਮਵਾਰਨਯੇਨੇਵ ਦੁਵਿਧਸ੍ਸਾਪਿ ਤਪਸ੍ਸਿਨੋ ਵਸੇਨ ਵੇਦਿਤਬ੍ਬਂ.
੬੦. ਵੋਦਾਸਂ ਆਪਜ੍ਜਤੀਤਿ ਦ੍ਵੇਭਾਗਂ ਆਪਜ੍ਜਤਿ, ਦ੍ਵੇ ਭਾਗੇ ਕਰੋਤਿ. ਖਮਤੀਤਿ ਰੁਚ੍ਚਤਿ. ਨਕ੍ਖਮਤੀਤਿ ਨ ਰੁਚ੍ਚਤਿ. ਸਾਪੇਕ੍ਖੋ ਪਜਹਤੀਤਿ ਸਤਣ੍ਹੋ ਪਜਹਤਿ. ਕਥਂ? ਪਾਤੋਵ ਖੀਰਭਤ੍ਤਂ ਭੁਤ੍ਤੋ ਹੋਤਿ. ਅਥਸ੍ਸ ਮਂਸਭੋਜਨਂ ਉਪਨੇਤਿ. ਤਸ੍ਸ ਏਵਂ ਹੋਤਿ ‘‘ਇਦਾਨਿ ਏਵਰੂਪਂ ਕਦਾ ਲਭਿਸ੍ਸਾਮ, ਸਚੇ ਜਾਨੇਯ੍ਯਾਮ, ਪਾਤੋਵ ਖੀਰਭਤ੍ਤਂ ਨ ਭੁਞ੍ਜੇਯ੍ਯਾਮ, ਕਿਂ ਮਯਾ ਸਕ੍ਕਾ ਕਾਤੁਂ, ਗਚ੍ਛ ਭੋ, ਤ੍ਵਮੇਵ ਭੁਞ੍ਜਾ’’ਤਿ ਜੀਵਿਤਂ ਪਰਿਚ੍ਚਜਨ੍ਤੋ ਵਿਯ ਸਾਪੇਕ੍ਖੋ ਪਜਹਤਿ. ਗਧਿਤੋਤਿ ਗੇਧਜਾਤੋ. ਮੁਚ੍ਛਿਤੋਤਿ ਬਲਵਤਣ੍ਹਾਯ ਮੁਚ੍ਛਿਤੋ ਸਂਮੁਟ੍ਠਸ੍ਸਤੀ ਹੁਤ੍ਵਾ. ਅਜ੍ਝਾਪਨ੍ਨੋਤਿ ਆਮਿਸੇ ਅਤਿਲਗ੍ਗੋ, ‘‘ਭੁਞ੍ਜਿਸ੍ਸਥ, ਆਵੁਸੋ’’ਤਿ ਧਮ੍ਮਨਿਮਨ੍ਤਨਮਤ੍ਤਮ੍ਪਿ ਅਕਤ੍ਵਾ ਮਹਨ੍ਤੇ ਮਹਨ੍ਤੇ ਕਬਲ਼ੇ ਕਰੋਤਿ. ਅਨਾਦੀਨਵਦਸ੍ਸਾਵੀਤਿਆਦੀਨਵਮਤ੍ਤਮ੍ਪਿ ਨ ਪਸ੍ਸਤਿ. ਅਨਿਸ੍ਸਰਣਪਞ੍ਞੋਤਿ ਇਧ ਮਤ੍ਤਞ੍ਞੁਤਾਨਿਸ੍ਸਰਣਪਚ੍ਚਵੇਕ੍ਖਣਪਰਿਭੋਗਮਤ੍ਤਮ੍ਪਿ ਨ ਕਰੋਤਿ. ਲਾਭਸਕ੍ਕਾਰਸਿਲੋਕਨਿਕਨ੍ਤਿਹੇਤੂਤਿ ਲਾਭਾਦੀਸੁ ਤਣ੍ਹਾਹੇਤੁ.
੬੧. ਸਂਭਕ੍ਖੇਤੀਤਿ ਸਂਖਾਦਤਿ. ਅਸਨਿਵਿਚਕ੍ਕਨ੍ਤਿ ਵਿਚਕ੍ਕਸਣ੍ਠਾਨਾ ਅਸਨਿਯੇਵ. ਇਦਂ ਵੁਤ੍ਤਂ ਹੋਤਿ ‘‘ਅਸਨਿਵਿਚਕ੍ਕਂ ਇਮਸ੍ਸ ਦਨ੍ਤਕੂਟਂ ਮੂਲਬੀਜਾਦੀਸੁ ਨ ਕਿਞ੍ਚਿ ਨ ਸਂਭੁਞ੍ਜਤਿ. ਅਥ ਚ ਪਨ ਨਂ ਸਮਣਪ੍ਪਵਾਦੇਨ ਸਮਣੋਤਿ ਸਞ੍ਜਾਨਨ੍ਤੀ’’ਤਿ. ਏਵਂ ਅਪਸਾਦੇਤਿ ਅਵਕ੍ਖਿਪਤਿ. ਇਦਂ ਤਿਤ੍ਥਿਯਵਸੇਨ ਆਗਤਂ. ਭਿਕ੍ਖੁਵਸੇਨ ਪਨੇਤ੍ਥ ਅਯਂ ਯੋਜਨਾ, ਅਤ੍ਤਨਾ ਧੁਤਙ੍ਗਧਰੋ ਹੋਤਿ, ਸੋ ਅਞ੍ਞਂ ਏਵਂ ਅਪਸਾਦੇਤਿ ‘‘ਕਿਂ ਸਮਣਾ ਨਾਮ ਇਮੇ ਸਮਣਮ੍ਹਾਤਿ ਵਦਨ੍ਤਿ, ਧੁਤਙ੍ਗਮਤ੍ਤਮ੍ਪਿ ਨਤ੍ਥਿ, ਉਦ੍ਦੇਸਭਤ੍ਤਾਦੀਨਿ ਪਰਿਯੇਸਨ੍ਤਾ ਪਚ੍ਚਯਬਾਹੁਲ੍ਲਿਕਾ ਵਿਚਰਨ੍ਤੀ’’ਤਿ. ਲੂਖਾਜੀਵਿਨ੍ਤਿ ਅਚੇਲਕਾਦਿਵਸੇਨ ਵਾ ਧੁਤਙ੍ਗਵਸੇਨ ਵਾ ਲੂਖਾਜੀਵਿਂ. ਇਸ੍ਸਾਮਚ੍ਛਰਿਯਨ੍ਤਿ ਪਰਸ੍ਸ ਸਕ੍ਕਾਰਾਦਿਸਮ੍ਪਤ੍ਤਿਖੀਯਨਲਕ੍ਖਣਂ ਇਸ੍ਸਂ, ਸਕ੍ਕਾਰਾਦਿਕਰਣਅਕ੍ਖਮਨਲਕ੍ਖਣਂ ਮਚ੍ਛਰਿਯਞ੍ਚ.
੬੨. ਆਪਾਥਕਨਿਸਾਦੀ ਹੋਤੀਤਿ ਮਨੁਸ੍ਸਾਨਂ ਆਪਾਥੇ ਦਸ੍ਸਨਟ੍ਠਾਨੇ ਨਿਸੀਦਤਿ. ਯਤ੍ਥ ਤੇ ਪਸ੍ਸਨ੍ਤਿ, ਤਤ੍ਥ ਠਿਤੋ ਵਗ੍ਗੁਲਿਵਤਂ ਚਰਤਿ, ਪਞ੍ਚਾਤਪਂ ਤਪ੍ਪਤਿ, ਏਕਪਾਦੇਨ ਤਿਟ੍ਠਤਿ, ਸੂਰਿਯਂ ਨਮਸ੍ਸਤਿ. ਸਾਸਨੇ ਪਬ੍ਬਜਿਤੋਪਿ ਸਮਾਦਿਨ੍ਨਧੁਤਙ੍ਗੋ ਸਬ੍ਬਰਤ੍ਤਿਂ ਸਯਿਤ੍ਵਾ ਮਨੁਸ੍ਸਾਨਂ ਚਕ੍ਖੁਪਥੇ ਤਪਂ ਕਰੋਤਿ, ਮਹਾਸਾਯਨ੍ਹੇਯੇਵ ਚੀਵਰਕੁਟਿਂ ਕਰੋਤਿ, ਸੂਰਿਯੇ ਉਗ੍ਗਤੇ ਪਟਿਸਂਹਰਤਿ, ਮਨੁਸ੍ਸਾਨਂ ਆਗਤਭਾਵਂ ਞਤ੍ਵਾ ਘਣ੍ਡਿਂ ਪਹਰਿਤ੍ਵਾ ਚੀਵਰਂ ਮਤ੍ਥਕੇ ਠਪੇਤ੍ਵਾ ਚਙ੍ਕਮਂ ਓਤਰਤਿ, ਸਮ੍ਮੁਞ੍ਜਨਿਂ ਗਹੇਤ੍ਵਾ ਵਿਹਾਰਙ੍ਗਣਂ ਸਮ੍ਮਜ੍ਜਤਿ.
ਅਤ੍ਤਾਨਨ੍ਤਿ ਅਤ੍ਤਨੋ ਗੁਣਂ ਅਦਸ੍ਸਯਮਾਨੋਤਿ ਏਤ੍ਥ ਅ-ਕਾਰੋ ਨਿਪਾਤਮਤ੍ਤਂ, ਦਸ੍ਸਯਮਾਨੋਤਿ ਅਤ੍ਥੋ. ਇਦਮ੍ਪਿ ਮੇ ਤਪਸ੍ਮਿਨ੍ਤਿ ਇਦਮ੍ਪਿ ਕਮ੍ਮਂ ਮਮੇਵ ਤਪਸ੍ਮਿਂ, ਪਚ੍ਚਤ੍ਤੇ ਵਾ ਭੁਮ੍ਮਂ, ਇਦਮ੍ਪਿ ਮਮ ਤਪੋਤਿ ਅਤ੍ਥੋ. ਸੋ ਹਿ ਅਸੁਕਸ੍ਮਿਂ ਠਾਨੇ ਅਚੇਲਕੋ ਅਤ੍ਥਿ ਮੁਤ੍ਤਾਚਾਰੋਤਿਆਦੀਨਿ ਸੁਤ੍ਵਾ ਅਮ੍ਹਾਕਂ ਏਸ ਤਪੋ, ਅਮ੍ਹਾਕਂ ਸੋ ਅਨ੍ਤੇਵਾਸਿਕੋਤਿਆਦੀਨਿ ਭਣਤਿ. ਅਸੁਕਸ੍ਮਿਂ ਵਾ ਪਨ ਠਾਨੇ ਪਂਸੁਕੂਲਿਕੋ ਭਿਕ੍ਖੁ ਅਤ੍ਥੀਤਿਆਦੀਨਿ ਸੁਤ੍ਵਾ ਅਮ੍ਹਾਕਂ ਏਸ ਤਪੋ, ਅਮ੍ਹਾਕਂ ਸੋ ਅਨ੍ਤੇਵਾਸਿਕੋਤਿਆਦੀਨਿ ਭਣਤਿ.
ਕਿਞ੍ਚਿਦੇਵਾਤਿ ਕਿਞ੍ਚਿ ਵਜ੍ਜਂ ਦਿਟ੍ਠਿਗਤਂ ਵਾ. ਪਟਿਚ੍ਛਨ੍ਨਂ ਸੇਵਤੀਤਿ ਯਥਾ ਅਞ੍ਞੇ ਨ ਜਾਨਨ੍ਤਿ, ਏਵਂ ਸੇਵਤਿ. ਅਕ੍ਖਮਮਾਨਂ ਆਹ ਖਮਤੀਤਿ ਅਰੁਚ੍ਚਮਾਨਂਯੇਵ ਰੁਚ੍ਚਤਿ ਮੇਤਿ ਵਦਤਿ. ਅਤ੍ਤਨਾ ਕਤਂ ਅਤਿਮਹਨ੍ਤਮ੍ਪਿ ਵਜ੍ਜਂ ਅਪ੍ਪਮਤ੍ਤਕਂ ਕਤ੍ਵਾ ਪਞ੍ਞਪੇਤਿ, ਪਰੇਨ ਕਤਂ ਦੁਕ੍ਕਟਮਤ੍ਤਂ ਵੀਤਿਕ੍ਕਮਮ੍ਪਿ ਪਾਰਾਜਿਕਸਦਿਸਂ ਕਤ੍ਵਾ ਦਸ੍ਸੇਤਿ. ਅਨੁਞ੍ਞੇਯ੍ਯਨ੍ਤਿ ਅਨੁਜਾਨਿਤਬ੍ਬਂ ਅਨੁਮੋਦਿਤਬ੍ਬਂ.
੬੩. ਕੋਧਨੋ ਹੋਤਿ ਉਪਨਾਹੀਤਿ ਕੁਜ੍ਝਨਲਕ੍ਖਣੇਨ ਕੋਧੇਨ, ਵੇਰਅਪ੍ਪਟਿਨਿਸ੍ਸਗ੍ਗਲਕ੍ਖਣੇਨ ਉਪਨਾਹੇਨ ਚ ਸਮਨ੍ਨਾਗਤੋ. ਮਕ੍ਖੀ ਹੋਤਿ ਪਲ਼ਾਸੀਤਿ ਪਰਗੁਣਮਕ੍ਖਨਲਕ੍ਖਣੇਨ ਮਕ੍ਖੇਨ, ਯੁਗਗ੍ਗਾਹਲਕ੍ਖਣੇਨ ਪਲ਼ਾਸੇਨ ਚ ਸਮਨ੍ਨਾਗਤੋ.
ਇਸ੍ਸੁਕੀ ਹੋਤਿ ਮਚ੍ਛਰੀਤਿ ਪਰਸਕ੍ਕਾਰਾਦੀਸੁ ਉਸੂਯਨਲਕ੍ਖਣਾਯ ਇਸ੍ਸਾਯ, ਆਵਾਸਕੁਲਲਾਭਵਣ੍ਣਧਮ੍ਮੇਸੁ ਮਚ੍ਛਰਾਯਨਲਕ੍ਖਣੇਨ ਪਞ੍ਚਵਿਧਮਚ੍ਛੇਰੇਨ ਚ ਸਮਨ੍ਨਾਗਤੋ ਹੋਤਿ. ਸਠੋ ਹੋਤਿ ਮਾਯਾਵੀਤਿ ਕੇਰਾਟਿਕਲਕ੍ਖਣੇਨ ਸਾਠੇਯ੍ਯੇਨ, ਕਤਪ੍ਪਟਿਚ੍ਛਾਦਨਲਕ੍ਖਣਾਯ ਮਾਯਾਯ ਚ ਸਮਨ੍ਨਾਗਤੋ ਹੋਤਿ. ਥਦ੍ਧੋ ਹੋਤਿ ਅਤਿਮਾਨੀਤਿ ਨਿਸ੍ਸਿਨੇਹਨਿਕ੍ਕਰੁਣਥਦ੍ਧਲਕ੍ਖਣੇਨ ਥਮ੍ਭੇਨ, ਅਤਿਕ੍ਕਮਿਤ੍ਵਾ ਮਞ੍ਞਨਲਕ੍ਖਣੇਨ ਅਤਿਮਾਨੇਨ ਚ ਸਮਨ੍ਨਾਗਤੋ ਹੋਤਿ. ਪਾਪਿਚ੍ਛੋ ਹੋਤੀਤਿ ਅਸਨ੍ਤਸਮ੍ਭਾਵਨਪਤ੍ਥਨਲਕ੍ਖਣਾਯ ਪਾਪਿਚ੍ਛਤਾਯ ਸਮਨ੍ਨਾਗਤੋ ਹੋਤਿ. ਪਾਪਿਕਾਨਨ੍ਤਿ ਤਾਸਂਯੇਵ ਲਾਮਕਾਨਂ ਇਚ੍ਛਾਨਂ ਵਸਂ ਗਤੋ. ਮਿਚ੍ਛਾਦਿਟ੍ਠਿਕੋਤਿ ਨਤ੍ਥਿ ਦਿਨ੍ਨਨ੍ਤਿਆਦਿਨਯਪ੍ਪਵਤ੍ਤਾਯ ਅਯਾਥਾਵਦਿਟ੍ਠਿਯਾ ਉਪੇਤੋ. ਅਨ੍ਤਗ੍ਗਾਹਿਕਾਯਾਤਿ ਸਾਯੇਵ ਦਿਟ੍ਠਿ ਉਚ੍ਛੇਦਨ੍ਤਸ੍ਸ ਗਹਿਤਤ੍ਤਾ ‘‘ਅਨ੍ਤਗ੍ਗਾਹਿਕਾ’’ਤਿ ਵੁਚ੍ਚਤਿ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ. ਸਨ੍ਦਿਟ੍ਠਿਪਰਾਮਾਸੀਤਿਆਦੀਸੁ ਸਯਂ ਦਿਟ੍ਠਿ ਸਨ੍ਦਿਟ੍ਠਿ, ਸਨ੍ਦਿਟ੍ਠਿਮੇਵ ਪਰਾਮਸਤਿ ਗਹੇਤ੍ਵਾ ਵਦਤੀਤਿ ਸਨ੍ਦਿਟ੍ਠਿਪਰਾਮਾਸੀ. ਆਧਾਨਂ ਵੁਚ੍ਚਤਿ ਦਲ਼੍ਹਂ ਸੁਟ੍ਠੁ ਠਪਿਤਂ, ਤਥਾ ਕਤ੍ਵਾ ਗਣ੍ਹਾਤੀਤਿ ਆਧਾਨਗ੍ਗਾਹੀ. ਅਰਿਟ੍ਠੋ ਵਿਯ ਨ ਸਕ੍ਕਾ ਹੋਤਿ ਪਟਿਨਿਸ੍ਸਜ੍ਜਾਪੇਤੁਨ੍ਤਿ ਦੁਪ੍ਪਟਿਨਿਸ੍ਸਗ੍ਗੀ. ਯਦਿਮੇਤਿ ਯਦਿ ਇਮੇ.
ਪਰਿਸੁਦ੍ਧਪਪਟਿਕਪ੍ਪਤ੍ਤਕਥਾਵਣ੍ਣਨਾ
੬੪. ਇਧ, ਨਿਗ੍ਰੋਧ, ਤਪਸ੍ਸੀਤਿ ਏਵਂ ਭਗਵਾ ਅਞ੍ਞਤਿਤ੍ਥਿਯੇਹਿ ਗਹਿਤਲਦ੍ਧਿਂ ਤੇਸਂ ਰਕ੍ਖਿਤਂ ਤਪਂ ਸਬ੍ਬਮੇਵ ਸਂਕਿਲਿਟ੍ਠਨ੍ਤਿ ਉਪਕ੍ਕਿਲੇਸਪਾਲ਼ਿਂ ਦਸ੍ਸੇਤ੍ਵਾ ਇਦਾਨਿ ਪਰਿਸੁਦ੍ਧਪਾਲ਼ਿਦਸ੍ਸਨਤ੍ਥਂ ਦੇਸਨਮਾਰਭਨ੍ਤੋ ਇਧ, ਨਿਗ੍ਰੋਧਾਤਿਆਦਿਮਾਹ. ਤਤ੍ਥ ‘‘ਨ ਅਤ੍ਤਮਨੋ’’ਤਿਆਦੀਨਿ ਵੁਤ੍ਤਵਿਪਕ੍ਖਵਸੇਨੇਵ ਵੇਦਿਤਬ੍ਬਾਨਿ. ਸਬ੍ਬਵਾਰੇਸੁ ਚ ਲੂਖਤਪਸ੍ਸਿਨੋ ਚੇਵ ਧੁਤਙ੍ਗਧਰਸ੍ਸ ਚ ਵਸੇਨ ਯੋਜਨਾ ਵੇਦਿਤਬ੍ਬਾ. ਏਵਂ ਸੋ ਤਸ੍ਮਿਂ ਠਾਨੇ ਪਰਿਸੁਦ੍ਧੋ ਹੋਤੀਤਿ ਏਵਂ ਸੋ ਤੇਨ ਨ ਅਤ੍ਤਮਨਤਾ ਨ ਪਰਿਪੁਣ੍ਣਸਙ੍ਕਪ੍ਪਭਾਵਸਙ੍ਖਾਤੇਨ ਕਾਰਣੇਨ ਪਰਿਸੁਦ੍ਧੋ ਨਿਰੁਪਕ੍ਕਿਲੇਸੋ ਹੋਤਿ, ਉਤ੍ਤਰਿ ਵਾਯਮਮਾਨੋ ਕਮ੍ਮਟ੍ਠਾਨਸੁਦ੍ਧਿਕੋ ਹੁਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.
੬੯. ਅਦ੍ਧਾ ਖੋ, ਭਨ੍ਤੇਤਿ ਭਨ੍ਤੇ ਏਵਂ ਸਨ੍ਤੇ ਏਕਂਸੇਨੇਵ ਵੀਰਿਯੇਨ ਪਾਪਜਿਗੁਚ੍ਛਨਵਾਦੋ ਪਰਿਸੁਦ੍ਧੋ ਹੋਤੀਤਿ ਅਨੁਜਾਨਾਤਿ. ਇਤੋ ਪਰਞ੍ਚ ਅਗ੍ਗਭਾਵਂ ਵਾ ਸਾਰਭਾਵਂ ਵਾ ਅਜਾਨਨ੍ਤੋ ਅਗ੍ਗਪ੍ਪਤ੍ਤਾ ਸਾਰਪ੍ਪਤ੍ਤਾ ਚਾਤਿ ਆਹ. ਅਥਸ੍ਸ ਭਗਵਾ ਸਾਰਪ੍ਪਤ੍ਤਭਾਵਂ ਪਟਿਸੇਧੇਨ੍ਤੋ ਨ ਖੋ ਨਿਗ੍ਰੋਧਾਤਿਆਦਿਮਾਹ. ਪਪਟਿਕਪ੍ਪਤ੍ਤਾ ਹੋਤੀਤਿ ਸਾਰਵਤੋ ਰੁਕ੍ਖਸ੍ਸ ਸਾਰਂ ਫੇਗ੍ਗੁਂ ਤਚਞ੍ਚ ਅਤਿਕ੍ਕਮ੍ਮ ਬਹਿਪਪਟਿਕਸਦਿਸਾ ਹੋਤੀਤਿ ਦਸ੍ਸੇਤਿ.
ਪਰਿਸੁਦ੍ਧਤਚਪ੍ਪਤ੍ਤਾਦਿਕਥਾਵਣ੍ਣਨਾ
੭੦. ਅਗ੍ਗਂ ਪਾਪੇਤੂਤਿ ਦੇਸਨਾਵਸੇਨ ਅਗ੍ਗਂ ਪਾਪੇਤ੍ਵਾ ਦੇਸੇਤੁ, ਸਾਰਂ ਪਾਪੇਤ੍ਵਾ ਦੇਸੇਤੂਤਿ ਦਸਬਲਂ ਯਾਚਤਿ. ਚਾਤੁਯਾਮਸਂਵਰਸਂਵੁਤੋਤਿ ਚਤੁਬ੍ਬਿਧੇਨ ਸਂਵਰੇਨ ਪਿਹਿਤੋ. ਨ ਪਾਣਂ ਅਤਿਪਾਤੇਤੀਤਿ ਪਾਣਂ ਨ ਹਨਤਿ. ਨ ਭਾਵਿਤਮਾਸੀਸਤੀਤਿ ਭਾਵਿਤਂ ਨਾਮ ਤੇਸਂ ਸਞ੍ਞਾਯ ਪਞ੍ਚ ਕਾਮਗੁਣਾ, ਤੇ ਨ ਆਸੀਸਤਿ ਨ ਸੇਵਤੀਤਿ ਅਤ੍ਥੋ.
ਅਦੁਂ ਚਸ੍ਸ ਹੋਤੀਤਿ ਏਤਞ੍ਚਸ੍ਸ ਇਦਾਨਿ ਵੁਚ੍ਚਮਾਨਂ ‘‘ਸੋ ਅਭਿਹਰਤੀ’’ਤਿਆਦਿਲਕ੍ਖਣਂ. ਤਪਸ੍ਸਿਤਾਯਾਤਿ ਤਪਸ੍ਸਿਭਾਵੇਨ ਹੋਤਿ. ਤਤ੍ਥ ਸੋ ਅਭਿਹਰਤੀਤਿ ਸੋ ਤਂ ਸੀਲਂ ਅਭਿਹਰਤਿ, ਉਪਰੂਪਰਿ ਵਡ੍ਢੇਤਿ. ਸੀਲਂ ਮੇ ਪਰਿਪੁਣ੍ਣਂ, ਤਪੋ ਆਰਦ੍ਧੋ, ਅਲਮੇਤ੍ਤਾਵਤਾਤਿ ਨ ਵੀਰਿਯਂ ਵਿਸ੍ਸਜ੍ਜੇਤਿ. ਨੋ ਹੀਨਾਯਾਵਤ੍ਤਤੀਤਿ ਹੀਨਾਯ ਗਿਹਿਭਾਵਤ੍ਥਾਯ ਨ ਆਵਤ੍ਤਤਿ. ਸੀਲਤੋ ਉਤ੍ਤਰਿ ਵਿਸੇਸਾਧਿਗਮਤ੍ਥਾਯ ਵੀਰਿਯਂ ਕਰੋਤਿਯੇਵ, ਏਵਂ ਕਰੋਨ੍ਤੋ ਸੋ ਵਿਵਿਤ੍ਤਂ ਸੇਨਾਸਨਂ ਭਜਤਿ. ‘‘ਅਰਞ੍ਞ’’ਨ੍ਤਿਆਦੀਨਿ ਸਾਮਞ੍ਞਫਲੇ (ਦੀ. ਨਿ. ਅਟ੍ਠ. ੧.੨੧੬) ਵਿਤ੍ਥਾਰਿਤਾਨੇਵ. ‘‘ਮੇਤ੍ਤਾਸਹਗਤੇਨਾ’’ਤਿਆਦੀਨਿ ਵਿਸੁਦ੍ਧਿਮਗ੍ਗੇ ਵਣ੍ਣਿਤਾਨਿ. ਤਚਪ੍ਪਤ੍ਤਾਤਿ ਪਪਟਿਕਤੋ ਅਬ੍ਭਨ੍ਤਰਂ ਤਚਂ ਪਤ੍ਤਾ. ਫੇਗ੍ਗੁਪ੍ਪਤ੍ਤਾਤਿ ਤਚਤੋ ਅਬ੍ਭਨ੍ਤਰਂ ਫੇਗ੍ਗੁਂ ਪਤ੍ਤਾ, ਫੇਗ੍ਗੁਸਦਿਸਾ ਹੋਤੀਤਿ ਅਤ੍ਥੋ.
੭੪. ‘‘ਏਤ੍ਤਾਵਤਾ, ਖੋ ਨਿਗ੍ਰੋਧ, ਤਪੋਜਿਗੁਚ੍ਛਾ ਅਗ੍ਗਪ੍ਪਤ੍ਤਾ ਚ ਹੋਤਿ ਸਾਰਪ੍ਪਤ੍ਤਾ ਚਾ’’ਤਿ ਇਦਂ ਭਗਵਾ ਤਿਤ੍ਥਿਯਾਨਂ ਵਸੇਨਾਹ. ਤਿਤ੍ਥਿਯਾਨਞ੍ਹਿ ਲਾਭਸਕ੍ਕਾਰੋ ਰੁਕ੍ਖਸ੍ਸ ਸਾਖਾਪਲਾਸਸਦਿਸੋ. ਪਞ੍ਚਸੀਲਮਤ੍ਤਕਂ ਪਪਟਿਕਸਦਿਸਂ. ਅਟ੍ਠਸਮਾਪਤ੍ਤਿਮਤ੍ਤਂ ਤਚਸਦਿਸਂ. ਪੁਬ੍ਬੇਨਿਵਾਸਞਾਣਾਵਸਾਨਾ ਅਭਿਞ੍ਞਾ ਫੇਗ੍ਗੁਸਦਿਸਾ. ਦਿਬ੍ਬਚਕ੍ਖੁਂ ਪਨੇਤੇ ਅਰਹਤ੍ਤਨ੍ਤਿ ਗਹੇਤ੍ਵਾ ਵਿਚਰਨ੍ਤਿ. ਤੇਨ ਨੇਸਂ ਤਂ ਰੁਕ੍ਖਸ੍ਸ ਸਾਰਸਦਿਸਂ. ਸਾਸਨੇ ਪਨ ਲਾਭਸਕ੍ਕਾਰੋ ਸਾਖਾਪਲਾਸਸਦਿਸੋ. ਸੀਲਸਮ੍ਪਦਾ ਪਪਟਿਕਸਦਿਸਾ. ਝਾਨਸਮਾਪਤ੍ਤਿਯੋ ਤਚਸਦਿਸਾ. ਲੋਕਿਯਾਭਿਞ੍ਞਾ ਫੇਗ੍ਗੁਸਦਿਸਾ. ਮਗ੍ਗਫਲਂ ਸਾਰੋ. ਇਤਿ ਭਗਵਤਾ ਅਤ੍ਤਨੋ ਸਾਸਨਂ ਓਨਤਵਿਨਤਫਲਭਾਰਭਰਿਤਰੁਕ੍ਖੂਪਮਾਯ ਉਪਮਿਤਂ. ਸੋ ਦੇਸਨਾਕੁਸਲਤਾਯ ਤਤੋ ਤਚਸਾਰਸਮ੍ਪਤ੍ਤਿਤੋ ਮਮ ਸਾਸਨਂ ਉਤ੍ਤਰਿਤਰਞ੍ਚੇਵ ਪਣੀਤਤਰਞ੍ਚ, ਤਂ ਤੁਵਂ ਕਦਾ ਜਾਨਿਸ੍ਸਸੀਤਿ ਅਤ੍ਤਨੋਦੇਸਨਾਯ ਵਿਸੇਸਭਾਵਂ ਦਸ੍ਸੇਤੁਂ ‘‘ਇਤਿ ਖੋ ਨਿਗ੍ਰੋਧਾ’’ਤਿ ਦੇਸਨਂ ਆਰਭਿ. ਤੇ ਪਰਿਬ੍ਬਾਜਕਾਤਿ ਤੇ ਤਸ੍ਸ ਪਰਿਵਾਰਾ ਤਿਂਸਸਤਸਙ੍ਖ੍ਯਾ ਪਰਿਬ੍ਬਾਜਕਾ. ਏਤ੍ਥ ਮਯਂ ਅਨਸ੍ਸਾਮਾਤਿ ਏਤ੍ਥ ਅਚੇਲਕਪਾਲ਼ਿਆਦੀਸੁ, ਇਦਂ ਵੁਤ੍ਤਂ ਹੋਤਿ ‘‘ਅਮ੍ਹਾਕਂ ਅਚੇਲਕਪਾਲ਼ਿਮਤ੍ਤਮ੍ਪਿ ਨਤ੍ਥਿ, ਕੁਤੋ ਪਰਿਸੁਦ੍ਧਪਾਲ਼ਿ. ਅਮ੍ਹਾਕਂ ਪਰਿਸੁਦ੍ਧਪਾਲ਼ਿਮਤ੍ਤਮ੍ਪਿ ਨਤ੍ਥਿ, ਕੁਤੋ ਚਾਤੁਯਾਮਸਂਵਰਾਦੀਨਿ. ਚਾਤੁਯਾਮਸਂਵਰੋਪਿ ਨਤ੍ਥਿ, ਕੁਤੋ ਅਰਞ੍ਞਵਾਸਾਦੀਨਿ. ਅਰਞ੍ਞਵਾਸੋਪਿ ਨਤ੍ਥਿ, ਕੁਤੋ ਨੀਵਰਣਪ੍ਪਹਾਨਾਦੀਨਿ. ਨੀਵਰਣਪ੍ਪਹਾਨਮ੍ਪਿ ਨਤ੍ਥਿ, ਕੁਤੋ ਬ੍ਰਹ੍ਮਵਿਹਾਰਾਦੀਨਿ. ਬ੍ਰਹ੍ਮਵਿਹਾਰਮਤ੍ਤਮ੍ਪਿ ਨਤ੍ਥਿ, ਕੁਤੋ ਪੁਬ੍ਬੇਨਿਵਾਸਾਦੀਨਿ. ਪੁਬ੍ਬੇਨਿਵਾਸਞਾਣਮਤ੍ਤਮ੍ਪਿ ਨਤ੍ਥਿ, ਕੁਤੋ ਅਮ੍ਹਾਕਂ ਦਿਬ੍ਬਚਕ੍ਖੁ. ਏਤ੍ਥ ਮਯਂ ਸਆਚਰਿਯਕਾ ਨਟ੍ਠਾ’’ਤਿ. ਇਤੋ ਭਿਯ੍ਯੋ ਉਤ੍ਤਰਿਤਰਨ੍ਤਿ ਇਤੋ ਦਿਬ੍ਬਚਕ੍ਖੁਞਾਣਾਧਿਗਮਤੋ ਭਿਯ੍ਯੋ ਅਞ੍ਞਂ ਉਤ੍ਤਰਿਤਰਂ ਵਿਸੇਸਾਧਿਗਮਂ ਮਯਂ ਸੁਤਿਵਸੇਨਾਪਿ ਨ ਜਾਨਾਮਾਤਿ ਵਦਨ੍ਤਿ.
ਨਿਗ੍ਰੋਧਸ੍ਸਪਜ੍ਝਾਯਨਵਣ੍ਣਨਾ
੭੫. ਅਥ ਨਿਗ੍ਰੋਧਂ ਪਰਿਬ੍ਬਾਜਕਨ੍ਤਿ ਏਵਂ ਕਿਰਸ੍ਸ ਅਹੋਸਿ ‘‘ਇਮੇ ਪਰਿਬ੍ਬਾਜਕਾ ਇਦਾਨਿ ਭਗਵਤੋ ਭਾਸਿਤਂ ਸੁਸ੍ਸੂਸਨ੍ਤਿ, ਇਮਿਨਾ ਚ ਨਿਗ੍ਰੋਧੇਨ ਭਗਵਤੋ ਪਰਮ੍ਮੁਖਾ ਕਕ੍ਖਲ਼ਂ ਦੁਰਾਸਦਵਚਨਂ ਵੁਤ੍ਤਂ, ਇਦਾਨਿ ਅਯਮ੍ਪਿ ਸੋਤੁਕਾਮੋ ਜਾਤੋ, ਕਾਲੋ ਦਾਨਿ ਮੇ ਇਮਸ੍ਸ ਮਾਨਦ੍ਧਜਂ ਨਿਪਾਤੇਤ੍ਵਾ ਭਗਵਤੋ ਸਾਸਨਂ ਉਕ੍ਖਿਪਿਤੁ’’ਨ੍ਤਿ. ਅਥ ਨਿਗ੍ਰੋਧਂ ਪਰਿਬ੍ਬਾਜਕਂ ਏਤਦਵੋਚ. ਅਪਰਮ੍ਪਿਸ੍ਸ ਅਹੋਸਿ ‘‘ਅਯਂ ਮਯਿ ਅਕਥੇਨ੍ਤੇ ਸਤ੍ਥਾਰਂ ਨ ਖਮਾਪੇਸ੍ਸਤਿ, ਤਦਸ੍ਸ ਅਨਾਗਤੇ ਅਹਿਤਾਯ ਦੁਕ੍ਖਾਯ ਸਂਵਤ੍ਤਿਸ੍ਸਤਿ, ਮਯਾ ਪਨ ਕਥਿਤੇ ਖਮਾਪੇਸ੍ਸਤਿ, ਤਦਸ੍ਸ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਅਥ ਨਿਗ੍ਰੋਧਂ ਪਰਿਬ੍ਬਾਜਕਂ ਏਤਦਵੋਚ. ਅਪਰਿਸਾਵਚਰਂ ਪਨ ਨਂ ਕਰੋਥਾਤਿ ਏਤ੍ਥ ਪਨਾਤਿ ਨਿਪਾਤੋ, ਅਥ ਨਂ ਅਪਰਿਸਾਵਚਰਂ ਕਰੋਥਾਤਿ ਅਤ੍ਥੋ. ‘‘ਅਪਰਿਸਾਵਚਰੇਤ’’ਨ੍ਤਿਪਿ ਪਾਠੋ, ਅਪਰਿਸਾਵਚਰਂ ਵਾ ਏਤਂ ਕਰੋਥ, ਗੋਕਾਣਾਦੀਨਂ ਵਾ ਅਞ੍ਞਤਰਨ੍ਤਿ ਅਤ੍ਥੋ.
ਗੋਕਾਣਨ੍ਤਿ ਏਤ੍ਥਾਪਿ ਗੋਕਾਣਂ ਪਰਿਯਨ੍ਤਚਾਰਿਨਿਂ ਵਿਯ ਕਰੋਥਾਤਿ ਅਤ੍ਥੋ. ਤੁਣ੍ਹੀਭੂਤੋਤਿ ਤੁਣ੍ਹੀਭਾਵਂ ਉਪਗਤੋ. ਮਙ੍ਕੁਭੂਤੋਤਿ ਨਿਤ੍ਤੇਜਤਂ ਆਪਨ੍ਨੋ. ਪਤ੍ਤਕ੍ਖਨ੍ਧੋਤਿ ਓਨਤਗੀਵੋ. ਅਧੋਮੁਖੋਤਿ ਹੇਟ੍ਠਾਮੁਖੋ.
੭੬. ਬੁਦ੍ਧੋ ਸੋ ਭਗਵਾ ਬੋਧਾਯਾਤਿ ਸਯਂ ਬੁਦ੍ਧੋ ਸਤ੍ਤਾਨਮ੍ਪਿ ਚਤੁਸਚ੍ਚਬੋਧਤ੍ਥਾਯ ਧਮ੍ਮਂ ਦੇਸੇਤਿ. ਦਨ੍ਤੋਤਿ ਚਕ੍ਖੁਤੋਪਿ ਦਨ੍ਤੋ…ਪੇ… ਮਨਤੋਪਿ ਦਨ੍ਤੋ. ਦਮਥਾਯਾਤਿ ਅਞ੍ਞੇਸਮ੍ਪਿ ਦਮਨਤ੍ਥਾਯ ਏਵ, ਨ ਵਾਦਤ੍ਥਾਯ. ਸਨ੍ਤੋਤਿ ਰਾਗਸਨ੍ਤਤਾਯ ਸਨ੍ਤੋ, ਦੋਸਮੋਹਸਨ੍ਤਤਾਯ ਸਬ੍ਬ ਅਕੁਸਲਸਬ੍ਬਾਭਿਸਙ੍ਖਾਰਸਨ੍ਤਤਾਯ ਸਨ੍ਤੋ. ਸਮਥਾਯਾਤਿ ਮਹਾਜਨਸ੍ਸ ਰਾਗਾਦਿਸਮਨਤ੍ਥਾਯ ਧਮ੍ਮਂ ਦੇਸੇਤਿ. ਤਿਣ੍ਣੋਤਿ ਚਤ੍ਤਾਰੋ ਓਘੇ ਤਿਣ੍ਣੋ. ਤਰਣਾਯਾਤਿ ਮਹਾਜਨਸ੍ਸ ਓਘਨਿਤ੍ਥਰਣਤ੍ਥਾਯ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਪਰਿਨਿਬ੍ਬਾਨਾਯਾਤਿ ਮਹਾਜਨਸ੍ਸਾਪਿ ਸਬ੍ਬਕਿਲੇਸਪਰਿਨਿਬ੍ਬਾਨਤ੍ਥਾਯ ਧਮ੍ਮਂ ਦੇਸੇਤਿ.
ਬ੍ਰਹ੍ਮਚਰਿਯਪਰਿਯੋਸਾਨਾਦਿਵਣ੍ਣਨਾ
੭੭. ਅਚ੍ਚਯੋਤਿਆਦੀਨਿ ਸਾਮਞ੍ਞਫਲੇ (ਦੀ. ਨਿ. ਅਟ੍ਠ. ੧.੨੫੦) ਵੁਤ੍ਤਾਨਿ. ਉਜੁਜਾਤਿਕੋਤਿ ਕਾਯਵਙ੍ਕਾਦਿਵਿਰਹਿਤੋ ਉਜੁਸਭਾਵੋ. ਅਹਮਨੁਸਾਸਾਮੀਤਿ ਅਹਂ ਤਾਦਿਸਂ ਪੁਗ੍ਗਲਂ ਅਨੁਸਾਸਾਮਿ, ਧਮ੍ਮਂ ਅਸ੍ਸ ਦੇਸੇਮਿ. ਸਤ੍ਤਾਹਨ੍ਤਿ ਸਤ੍ਤਦਿਵਸਾਨਿ, ਇਦਂ ਸਬ੍ਬਮ੍ਪਿ ਭਗਵਾ ਦਨ੍ਧਪਞ੍ਞਂ ਪੁਗ੍ਗਲਂ ਸਨ੍ਧਾਯਾਹ ਅਸਠੋ ਪਨ ਅਮਾਯਾਵੀ ਉਜੁਜਾਤਿਕੋ ਤਂਮੁਹੁਤ੍ਤੇਨੇਵ ਅਰਹਤ੍ਤਂ ਪਤ੍ਤੁਂ ਸਕ੍ਖਿਸ੍ਸਤਿ. ਇਤਿ ਭਗਵਾ ‘‘ਅਸਠ’’ਨ੍ਤਿਆਦਿਵਚਨੇਨ ਸਠੋ ਹਿ ਵਙ੍ਕਵਙ੍ਕੋ, ਮਯਾਪਿ ਨ ਸਕ੍ਕਾ ਅਨੁਸਾਸਿਤੁਨ੍ਤਿ ਦੀਪੇਨ੍ਤੋ ਪਰਿਬ੍ਬਾਜਕਂ ਪਾਦੇਸੁ ਗਹੇਤ੍ਵਾ ਮਹਾਮੇਰੁਪਾਦਤਲੇ ਵਿਯ ਖਿਪਿਤ੍ਥ. ਕਸ੍ਮਾ? ਅਯਞ੍ਹਿ ਅਤਿਸਠੋ, ਕੁਟਿਲਚਿਤ੍ਤੋ ਸਤ੍ਥਰਿ ਏਵਂ ਕਥੇਨ੍ਤੇਪਿ ਬੁਦ੍ਧਧਮ੍ਮਸਙ੍ਘੇਸੁ ਨਾਧਿਮੁਚ੍ਚਤਿ, ਅਧਿਮੁਚ੍ਚਨਤ੍ਥਾਯ ਸੋਤਂ ਨ ਓਦਹਤਿ, ਕੋਹਞ੍ਞੇ ਠਿਤੋ ਸਤ੍ਥਾਰਂ ਖਮਾਪੇਤਿ. ਤਸ੍ਮਾ ਭਗਵਾ ਤਸ੍ਸਜ੍ਝਾਸਯਂ ਵਿਦਿਤ੍ਵਾ ‘‘ਏਤੁ ਵਿਞ੍ਞੂ ਪੁਰਿਸੋ ਅਸਠੋ’’ਤਿਆਦਿਮਾਹ. ਸਠਂ ਪਨਾਹਂ ਅਨੁਸਾਸਿਤੁਂ ਨ ਸਕ੍ਕੋਮੀਤਿ.
੭੮. ਅਨ੍ਤੇਵਾਸਿਕਮ੍ਯਤਾਤਿ ਅਨ੍ਤੇਵਾਸਿਕਮ੍ਯਤਾਯ, ਅਮ੍ਹੇ ਅਨ੍ਤੇਵਾਸਿਕੇ ਇਚ੍ਛਨ੍ਤੋ. ਏਵਮਾਹਾਤਿ ‘‘ਏਤੁ ਵਿਞ੍ਞੁਪੁਰਿਸੋ’’ਤਿਆਦਿਮਾਹ. ਯੋ ਏਵ ਵੋ ਆਚਰਿਯੋਤਿ ਯੋ ਏਵ ਤੁਮ੍ਹਾਕਂ ਪਕਤਿਯਾ ਆਚਰਿਯੋ. ਉਦ੍ਦੇਸਾ ਨੋ ਚਾਵੇਤੁਕਾਮੋਤਿ ਅਤ੍ਤਨੋ ਅਨੁਸਾਸਨਿਂ ਗਾਹਾਪੇਤ੍ਵਾ ਅਮ੍ਹੇ ਅਮ੍ਹਾਕਂ ਉਦ੍ਦੇਸਤੋ ਚਾਵੇਤੁਕਾਮੋ. ਸੋ ਏਵ ਵੋ ਉਦ੍ਦੇਸੋ ਹੋਤੂਤਿ ਯੋ ਤੁਮ੍ਹਾਕਂ ਪਕਤਿਯਾ ਉਦ੍ਦੇਸੋ, ਸੋ ਤੁਮ੍ਹਾਕਂਯੇਵ ਹੋਤੁ, ਨ ਮਯਂ ਤੁਮ੍ਹਾਕਂ ਉਦ੍ਦੇਸੇਨ ਅਤ੍ਥਿਕਾ. ਆਜੀਵਾਤਿ ਆਜੀਵਤੋ. ਅਕੁਸਲਸਙ੍ਖਾਤਾਤਿ ਅਕੁਸਲਾਤਿ ਕੋਟ੍ਠਾਸਂ ਪਤ੍ਤਾ. ਅਕੁਸਲਾ ਧਮ੍ਮਾਤਿ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਧਮ੍ਮਾ ਤਣ੍ਹਾਯੇਵ ਵਾ ਵਿਸੇਸੇਨ. ਸਾ ਹਿ ਪੁਨਬ੍ਭਵਕਰਣਤੋ ‘‘ਪੋਨੋਬ੍ਭਵਿਕਾ’’ਤਿ ਵੁਤ੍ਤਾ. ਸਦਰਥਾਤਿ ਕਿਲੇਸਦਰਥਸਮ੍ਪਯੁਤ੍ਤਾ. ਜਾਤਿਜਰਾਮਰਣਿਯਾਤਿ ਜਾਤਿਜਰਾਮਰਣਾਨਂ ਪਚ੍ਚਯਭੂਤਾ. ਸਂਕਿਲੇਸਿਕਾ ਧਮ੍ਮਾਤਿ ਦ੍ਵਾਦਸ ਅਕੁਸਲਚਿਤ੍ਤੁਪ੍ਪਾਦਾ. ਵੋਦਾਨਿਯਾਤਿ, ਸਮਥਵਿਪਸ੍ਸਨਾ ਧਮ੍ਮਾ. ਤੇ ਹਿ ਸਤ੍ਤੇ ਵੋਦਾਪੇਨ੍ਤਿ, ਤਸ੍ਮਾ ‘‘ਵੋਦਾਨਿਯਾ’’ਤਿ ਵੁਚ੍ਚਨ੍ਤਿ. ਪਞ੍ਞਾਪਾਰਿਪੂਰਿਨ੍ਤਿ ਮਗ੍ਗਪਞ੍ਞਾਪਾਰਿਪੂਰਿਂ. ਵੇਪੁਲ੍ਲਤ੍ਤਞ੍ਚਾਤਿ ਫਲਪਞ੍ਞਾਵੇਪੁਲ੍ਲਤਂ, ਉਭੋਪਿ ਵਾ ਏਤਾਨਿ ਅਞ੍ਞਮਞ੍ਞਵੇਵਚਨਾਨੇਵ. ਇਦਂ ਵੁਤ੍ਤਂ ਹੋਤਿ ‘‘ਤਤੋ ਤੁਮ੍ਹੇ ਮਗ੍ਗਪਞ੍ਞਞ੍ਚੇਵ ਫਲਪਞ੍ਞਞ੍ਚ ਦਿਟ੍ਠੇਵ ਧਮ੍ਮੇ ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਥਾ’’ਤਿ. ਏਵਂ ਭਗਵਾ ਪਰਿਬ੍ਬਾਜਕੇ ਆਰਬ੍ਭ ਅਤ੍ਤਨੋ ਓਵਾਦਾਨੁਸਾਸਨਿਯਾ ਫਲਂ ਦਸ੍ਸੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ.
੭੯. ਯਥਾ ਤਂ ਮਾਰੇਨਾਤਿ ਯਥਾ ਮਾਰੇਨ ਪਰਿਯੁਟ੍ਠਿਤਚਿਤ੍ਤਾ ਨਿਸੀਦਨ੍ਤਿ ਏਵਮੇਵ ਤੁਣ੍ਹੀਭੂਤਾ…ਪੇ… ਅਪ੍ਪਟਿਭਾਨਾ ਨਿਸਿਨ੍ਨਾ.
ਮਾਰੋ ਕਿਰ ਸਤ੍ਥਾ ਅਤਿਵਿਯ ਗਜ੍ਜਨ੍ਤੋ ਬੁਦ੍ਧਬਲਂ ਦੀਪੇਤ੍ਵਾ ਇਮੇਸਂ ਪਰਿਬ੍ਬਾਜਕਾਨਂ ਧਮ੍ਮਂ ਦੇਸੇਤਿ, ਕਦਾਚਿ ਧਮ੍ਮਾਭਿਸਮਯੋ ਭਵੇਯ੍ਯ, ਹਨ੍ਦਾਹਂ ਪਰਿਯੁਟ੍ਠਾਮੀਤਿ ਸੋ ਤੇਸਂ ਚਿਤ੍ਤਾਨਿ ਪਰਿਯੁਟ੍ਠਾਸਿ. ਅਪ੍ਪਹੀਨਵਿਪਲ੍ਲਾਸਾਨਞ੍ਹਿ ਚਿਤ੍ਤਂ ਮਾਰਸ੍ਸ ਯਥਾਕਾਮਕਰਣੀਯਂ ਹੋਤਿ. ਤੇਪਿ ਮਾਰੇਨ ਪਰਿਯੁਟ੍ਠਿਤਚਿਤ੍ਤਾ ਥਦ੍ਧਙ੍ਗਪਚ੍ਚਙ੍ਗਾ ਵਿਯ ਤੁਣ੍ਹੀ ਅਪ੍ਪਟਿਭਾਨਾ ਨਿਸੀਦਿਂਸੁ. ਅਥ ਸਤ੍ਥਾ ਇਮੇ ਪਰਿਬ੍ਬਾਜਕਾ ਅਤਿਵਿਯ ਨਿਰਵਾ ਹੁਤ੍ਵਾ ਨਿਸਿਨ੍ਨਾ, ਕਿਂ ਨੁ ਖੋਤਿ ਆਵਜ੍ਜਨ੍ਤੋ ਮਾਰੇਨ ਪਰਿਯੁਟ੍ਠਿਤਭਾਵਂ ਅਞ੍ਞਾਸਿ. ਸਚੇ ਪਨ ਤੇਸਂ ਮਗ੍ਗਫਲੁਪ੍ਪਤ੍ਤਿਹੇਤੁ ਭਵੇਯ੍ਯ, ਮਾਰਂ ਪਟਿਬਾਹਿਤ੍ਵਾਪਿ ਭਗਵਾ ਧਮ੍ਮਂ ਦੇਸੇਯ੍ਯ, ਸੋ ਪਨ ਤੇਸਂ ਨਤ੍ਥਿ. ‘‘ਸਬ੍ਬੇਪਿ ਮੇ ਤੁਚ੍ਛਪੁਰਿਸਾ’’ਤਿ ਅਞ੍ਞਾਸਿ. ਤੇਨ ਵੁਤ੍ਤਂ ‘‘ਅਥ ਖੋ ਭਗਵਤੋ ਏਤਦਹੋਸਿ ਸਬ੍ਬੇਪਿ ਮੇ ਮੋਘਪੁਰਿਸਾ’’ਤਿਆਦਿ.
ਤਤ੍ਥ ਫੁਟ੍ਠਾ ਪਾਪਿਮਤਾਤਿ ਪਾਪਿਮਤਾ ਮਾਰੇਨ ਫੁਟ੍ਠਾ. ਯਤ੍ਰ ਹਿ ਨਾਮਾਤਿ ਯੇਸੁ ਨਾਮ. ਅਞ੍ਞਾਣਤ੍ਥਮ੍ਪੀਤਿ ਜਾਨਨਤ੍ਥਮ੍ਪਿ. ਕਿਂ ਕਰਿਸ੍ਸਤਿ ਸਤ੍ਤਾਹੋਤਿ ਸਮਣੇਨ ਗੋਤਮੇਨ ਪਰਿਚ੍ਛਿਨ੍ਨਸਤ੍ਤਾਹੋ ਅਮ੍ਹਾਕਂ ਕਿਂ ਕਰਿਸ੍ਸਤਿ. ਇਦਂ ਵੁਤ੍ਤਂ ਹੋਤਿ ‘‘ਸਮਣੇਨ ਗੋਤਮੇਨ ‘ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾ ਉਪਸਮ੍ਪਜ੍ਜ ਵਿਹਰਿਸ੍ਸਤਿ ਸਤ੍ਤਾਹ’ਨ੍ਤਿ ਵੁਤ੍ਤਂ, ਸੋ ਸਤ੍ਤਾਹੋ ਅਮ੍ਹਾਕਂ ਕਿਂ ਅਪ੍ਫਾਸੁਕਂ ਕਰਿਸ੍ਸਤਿ. ਹਨ੍ਦ ਮਯਂ ਸਤ੍ਤਾਹਬ੍ਭਨ੍ਤਰੇ ਏਤਂ ਧਮ੍ਮਂ ਸਚ੍ਛਿਕਾਤੁਂ ਸਕ੍ਕਾ, ਨ ਸਕ੍ਕਾਤਿ ਅਞ੍ਞਾਣਤ੍ਥਮ੍ਪਿ ਬ੍ਰਹ੍ਮਚਰਿਯਂ ਚਰਿਸ੍ਸਾਮਾ’’ਤਿ. ਅਥ ਵਾ ਜਾਨਾਮ ਤਾਵਸ੍ਸ ਧਮ੍ਮਨ੍ਤਿ ਏਕਦਿਵਸੇ ਏਕਵਾਰਂ ਅਞ੍ਞਾਣਤ੍ਥਮ੍ਪਿ ਏਤੇਸਂ ਚਿਤ੍ਤਂ ਨੁਪ੍ਪਨ੍ਨਂ, ਸਤ੍ਤਾਹੋ ਪਨ ਏਤੇਸਂ ਕੁਸੀਤਾਨਂ ਕਿਂ ਕਰਿਸ੍ਸਤਿ, ਕਿਂ ਸਕ੍ਖਿਸ੍ਸਨ੍ਤਿ ਤੇ ਸਤ੍ਤਾਹਂ ਪੂਰੇਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ. ਸੀਹਨਾਦਨ੍ਤਿ ਪਰਵਾਦਭਿਨ੍ਦਨਂ ਸਕਵਾਦਸਮੁਸ੍ਸਾਪਨਞ੍ਚ ਅਭੀਤਨਾਦਂ ਨਦਿਤ੍ਵਾ. ਪਚ੍ਚੁਪਟ੍ਠਾਸੀਤਿ ਪਤਿਟ੍ਠਿਤੋ. ਤਾਵਦੇਵਾਤਿ ਤਸ੍ਮਿਞ੍ਞੇਵ ਖਣੇ. ਰਾਜਗਹਂ ਪਾਵਿਸੀਤਿ ਰਾਜਗਹਮੇਵ ਪਵਿਟ੍ਠੋ. ਤੇਸਂ ਪਨ ਪਰਿਬ੍ਬਾਜਕਾਨਂ ਕਿਞ੍ਚਾਪਿ ਇਦਂ ਸੁਤ੍ਤਨ੍ਤਂ ਸੁਤ੍ਵਾ ਵਿਸੇਸੋ ਨ ਨਿਬ੍ਬਤ੍ਤੋ, ਆਯਤਿਂ ਪਨ ਨੇਸਂ ਵਾਸਨਾਯ ਪਚ੍ਚਯੋ ਭਵਿਸ੍ਸਤੀਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ
ਉਦੁਮ੍ਬਰਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ
ਅਤ੍ਤਦੀਪਸਰਣਤਾਵਣ੍ਣਨਾ
੮੦. ਏਵਂ ਮੇ ਸੁਤਨ੍ਤਿ ਚਕ੍ਕਵਤ੍ਤਿਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਮਾਤੁਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਂ ਨਗਰਂ ਗੋਚਰਗਾਮਂ ਕਤ੍ਵਾ ਅਵਿਦੂਰੇ ਵਨਸਣ੍ਡੇ ਵਿਹਰਤਿ. ‘‘ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀ’’ਤਿ ਏਤ੍ਥ ਅਯਮਨੁਪੁਬ੍ਬਿਕਥਾ –
ਭਗਵਾ ਕਿਰ ਇਮਸ੍ਸ ਸੁਤ੍ਤਸ੍ਸ ਸਮੁਟ੍ਠਾਨਸਮਯੇ ਪਚ੍ਚੂਸਕਾਲੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਇਮਾਯ ਅਨਾਗਤਵਂਸਦੀਪਿਕਾਯ ਸੁਤ੍ਤਨ੍ਤਕਥਾਯ ਮਾਤੁਲਨਗਰਵਾਸੀਨਂ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯਂ ਦਿਸ੍ਵਾ ਪਾਤੋਵ ਵੀਸਤਿਭਿਕ੍ਖੁਸਹਸ੍ਸਪਰਿਵਾਰੋ ਮਾਤੁਲਨਗਰਂ ਸਮ੍ਪਤ੍ਤੋ. ਮਾਤੁਲਨਗਰਵਾਸਿਨੋ ਖਤ੍ਤਿਯਾ ‘‘ਭਗਵਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਮ੍ਮ ਦਸਬਲਂ ਨਿਮਨ੍ਤੇਤ੍ਵਾ ਮਹਾਸਕ੍ਕਾਰੇਨ ਨਗਰਂ ਪਵੇਸੇਤ੍ਵਾ ਨਿਸਜ੍ਜਟ੍ਠਾਨਂ ਸਂਵਿਧਾਯ ਭਗਵਨ੍ਤਂ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਂਸੁ. ਭਗਵਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਚਿਨ੍ਤੇਸਿ – ‘‘ਸਚਾਹਂ ਇਮਸ੍ਮਿਂ ਠਾਨੇ ਇਮੇਸਂ ਮਨੁਸ੍ਸਾਨਂ ਧਮ੍ਮਂ ਦੇਸੇਸ੍ਸਾਮਿ, ਅਯਂ ਪਦੇਸੋ ਸਮ੍ਬਾਧੋ, ਮਨੁਸ੍ਸਾਨਂ ਠਾਤੁਂ ਵਾ ਨਿਸੀਦਿਤੁਂ ਵਾ ਓਕਾਸੋ ਨ ਭਵਿਸ੍ਸਤਿ, ਮਹਤਾ ਖੋ ਪਨ ਸਮਾਗਮੇਨ ਭਵਿਤਬ੍ਬ’’ਨ੍ਤਿ.
ਅਥ ਰਾਜਕੁਲਾਨਂ ਭਤ੍ਤਾਨੁਮੋਦਨਂ ਅਕਤ੍ਵਾਵ ਪਤ੍ਤਂ ਗਹੇਤ੍ਵਾ ਨਗਰਤੋ ਨਿਕ੍ਖਮਿ. ਮਨੁਸ੍ਸਾ ਚਿਨ੍ਤਯਿਂਸੁ – ‘‘ਸਤ੍ਥਾ ਅਮ੍ਹਾਕਂ ਅਨੁਮੋਦਨਮ੍ਪਿ ਅਕਤ੍ਵਾ ਗਚ੍ਛਤਿ, ਅਦ੍ਧਾ ਭਤ੍ਤਗ੍ਗਂ ਅਮਨਾਪਂ ਅਹੋਸਿ, ਬੁਦ੍ਧਾਨਂ ਨਾਮ ਨ ਸਕ੍ਕਾ ਚਿਤ੍ਤਂ ਗਹੇਤੁਂ, ਬੁਦ੍ਧੇਹਿ ਸਦ੍ਧਿਂ ਵਿਸ੍ਸਾਸਕਰਣਂ ਨਾਮ ਸਮੁਸ੍ਸਿਤਫਣਂ ਆਸੀਵਿਸਂ ਗੀਵਾਯ ਗਹਣਸਦਿਸਂ ਹੋਤਿ; ਏਥ ਭੋ, ਤਥਾਗਤਂ ਖਮਾਪੇਸ੍ਸਾਮਾ’’ਤਿ. ਸਕਲਨਗਰਵਾਸਿਨੋ ਭਗਵਤਾ ਸਹੇਵ ਨਿਕ੍ਖਨ੍ਤਾ. ਭਗਵਾ ਗਚ੍ਛਨ੍ਤੋਵ ਮਗਧਕ੍ਖੇਤ੍ਤੇ ਠਿਤਂ ਸਾਖਾਵਿਟਪਸਮ੍ਪਨ੍ਨਂ ਸਨ੍ਦਚ੍ਛਾਯਂ ਕਰੀਸਮਤ੍ਤਭੂਮਿਪਤ੍ਥਟਂ ਏਕਂ ਮਾਤੁਲਰੁਕ੍ਖਂ ਦਿਸ੍ਵਾ ਇਮਸ੍ਮਿਂ ਰੁਕ੍ਖਮੂਲੇ ਨਿਸੀਦਿਤ੍ਵਾ ਧਮ੍ਮੇ ਦੇਸਿਯਮਾਨੇ ‘‘ਮਹਾਜਨਸ੍ਸ ਠਾਨਨਿਸਜ੍ਜਨੋਕਾਸੋ ਭਵਿਸ੍ਸਤੀ’’ਤਿ. ਨਿਵਤ੍ਤਿਤ੍ਵਾ ਮਗ੍ਗਾ ਓਕ੍ਕਮ੍ਮ ਰੁਕ੍ਖਮੂਲਂ ਉਪਸਙ੍ਕਮਿਤ੍ਵਾ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਂ ਓਲੋਕੇਸਿ. ਥੇਰੋ ਓਲੋਕਿਤਸਞ੍ਞਾਯ ਏਵ ‘‘ਸਤ੍ਥਾ ਨਿਸੀਦਿਤੁਕਾਮੋ’’ਤਿ ਞਤ੍ਵਾ ਸੁਗਤਮਹਾਚੀਵਰਂ ਪਞ੍ਞਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਅਥਸ੍ਸ ਪੁਰਤੋ ਮਨੁਸ੍ਸਾ ਨਿਸੀਦਿਂਸੁ. ਉਭੋਸੁ ਪਸ੍ਸੇਸੁ ਪਚ੍ਛਤੋ ਚ ਭਿਕ੍ਖੁਸਙ੍ਘੋ, ਆਕਾਸੇ ਦੇਵਤਾ ਅਟ੍ਠਂਸੁ, ਏਵਂ ਮਹਾਪਰਿਸਮਜ੍ਝਗਤੋ ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ.
ਤੇ ਭਿਕ੍ਖੂਤਿ ਤਤ੍ਰ ਉਪਵਿਟ੍ਠਾ ਧਮ੍ਮਪ੍ਪਟਿਗ੍ਗਾਹਕਾ ਭਿਕ੍ਖੂ. ਅਤ੍ਤਦੀਪਾਤਿ ਅਤ੍ਤਾਨਂ ਦੀਪਂ ਤਾਣਂ ਲੇਣਂ ਗਤਿਂ ਪਰਾਯਣਂ ਪਤਿਟ੍ਠਂ ਕਤ੍ਵਾ ਵਿਹਰਥਾਤਿ ਅਤ੍ਥੋ. ਅਤ੍ਤਸਰਣਾਤਿ ਇਦਂ ਤਸ੍ਸੇਵ ਵੇਵਚਨਂ. ਅਨਞ੍ਞਸਰਣਾਤਿ ਇਦਂ ਅਞ੍ਞਸਰਣਪਟਿਕ੍ਖੇਪਵਚਨਂ. ਨ ਹਿ ਅਞ੍ਞੋ ਅਞ੍ਞਸ੍ਸ ਸਰਣਂ ਹੋਤਿ, ਅਞ੍ਞਸ੍ਸ ਵਾਯਾਮੇਨ ਅਞ੍ਞਸ੍ਸ ਅਸੁਜ੍ਝਨਤੋ. ਵੁਤ੍ਤਮ੍ਪਿ ਚੇਤਂ ‘‘ਅਤ੍ਤਾ ਹਿ ਅਤ੍ਤਨੋ ਨਾਥੋ, ਕੋ ਹਿ ਨਾਥੋ ਪਰੋ ਸਿਯਾ’’ਤਿ (ਧ. ਪ. ੧੬੦). ਤੇਨਾਹ ‘‘ਅਨਞ੍ਞਸਰਣਾ’’ਤਿ. ਕੋ ਪਨੇਤ੍ਥ ਅਤ੍ਤਾ ਨਾਮ, ਲੋਕਿਯਲੋਕੁਤ੍ਤਰੋ ਧਮ੍ਮੋ. ਤੇਨਾਹ – ‘‘ਧਮ੍ਮਦੀਪਾ ਧਮ੍ਮਸਰਣਾ ਅਨਞ੍ਞਸਰਣਾ’’ਤਿ. ‘‘ਕਾਯੇ ਕਾਯਾਨੁਪਸ੍ਸੀ’’ਤਿਆਦੀਨਿ ਮਹਾਸਤਿਪਟ੍ਠਾਨੇ ਵਿਤ੍ਥਾਰਿਤਾਨਿ.
ਗੋਚਰੇਤਿ ਚਰਿਤੁਂ ਯੁਤ੍ਤਟ੍ਠਾਨੇ. ਸਕੇਤਿ ਅਤ੍ਤਨੋ ਸਨ੍ਤਕੇ. ਪੇਤ੍ਤਿਕੇ ਵਿਸਯੇਤਿ ਪਿਤਿਤੋ ਆਗਤਵਿਸਯੇ. ਚਰਤਨ੍ਤਿ ਚਰਨ੍ਤਾਨਂ. ‘‘ਚਰਨ੍ਤ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਨ ਲਚ੍ਛਤੀਤਿ ਨ ਲਭਿਸ੍ਸਤਿ ਨ ਪਸ੍ਸਿਸ੍ਸਤਿ. ਮਾਰੋਤਿ ਦੇਵਪੁਤ੍ਤਮਾਰੋਪਿ, ਮਚ੍ਚੁਮਾਰੋਪਿ, ਕਿਲੇਸਮਾਰੋਪਿ. ਓਤਾਰਨ੍ਤਿ ਰਨ੍ਧਂ ਛਿਦ੍ਦਂ ਵਿਵਰਂ. ਅਯਂ ਪਨਤ੍ਥੋ ਲੇਡ੍ਡੁਟ੍ਠਾਨਤੋ ਨਿਕ੍ਖਮ੍ਮ ਤੋਰਣੇ ਨਿਸੀਦਿਤ੍ਵਾ ਬਾਲਾਤਪਂ ਤਪਨ੍ਤਂ ਲਾਪਂ ਸਕੁਣਂ ਗਹੇਤ੍ਵਾ. ਪਕ੍ਖਨ੍ਦਸੇਨਸਕੁਣਵਤ੍ਥੁਨਾ ਦੀਪੇਤਬ੍ਬੋ. ਵੁਤ੍ਤਞ੍ਹੇਤਂ –
‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਕੁਣਗ੍ਘਿ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ ਅਗ੍ਗਹੇਸਿ. ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਸਕੁਣਗ੍ਘਿਯਾ ਹਰਿਯਮਾਨੋ ਏਵਂ ਪਰਿਦੇਵਸਿ ‘ਮਯਮੇਵਮ੍ਹ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ, ਯੇ ਮਯਂ ਅਗੋਚਰੇ ਚਰਿਮ੍ਹ ਪਰਵਿਸਯੇ, ਸਚੇਜ੍ਜ ਮਯਂ ਗੋਚਰੇ ਚਰੇਯ੍ਯਾਮ ਸਕੇ ਪੇਤ੍ਤਿਕੇ ਵਿਸਯੇ, ਨ ਮ੍ਯਾਯਂ ਸਕੁਣਗ੍ਘਿ ਅਲਂ ਅਭਵਿਸ੍ਸ ਯਦਿਦਂ ਯੁਦ੍ਧਾਯਾ’ਤਿ. ਕੋ ਪਨ ਤੇ ਲਾਪ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ? ਯਦਿਦਂ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਨ੍ਤਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਲਾਪਂ ਸਕੁਣਂ ਪਮੁਞ੍ਚਿ ਗਚ੍ਛ ਖੋ ਤ੍ਵਂ ਲਾਪ, ਤਤ੍ਰਪਿ ਗਨ੍ਤ੍ਵਾ ਨ ਮੋਕ੍ਖਸੀਤਿ.
ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਂ ਗਨ੍ਤ੍ਵਾ ਮਹਨ੍ਤਂ ਲੇਡ੍ਡੁਂ ਅਭਿਰੁਹਿਤ੍ਵਾ ਸਕੁਣਗ੍ਘਿਂ ਵਦਮਾਨੋ ਅਟ੍ਠਾਸਿ ‘‘ਏਹਿ ਖੋ ਦਾਨਿ ਮੇ ਸਕੁਣਗ੍ਘਿ, ਏਹਿ ਖੋ ਦਾਨਿ ਮੇ ਸਕੁਣਗ੍ਘੀ’’ਤਿ. ਅਥ ਖੋ ਸਾ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਉਭੋ ਪਕ੍ਖੇ ਸਨ੍ਨਯ੍ਹ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ. ਯਦਾ ਖੋ, ਭਿਕ੍ਖਵੇ, ਅਞ੍ਞਾਸਿ ਲਾਪੋ ਸਕੁਣੋ ਬਹੁਆਗਤਾ ਖੋ ਮ੍ਯਾਯਂ ਸਕੁਣਗ੍ਘੀਤਿ, ਅਥ ਖੋ ਤਸ੍ਸੇਵ ਲੇਡ੍ਡੁਸ੍ਸ ਅਨ੍ਤਰਂ ਪਚ੍ਚੁਪਾਦਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਤਤ੍ਥੇਵ ਉਰਂ ਪਚ੍ਚਤਾਲ਼ੇਸਿ. ਏਵਞ੍ਹਿ ਤਂ, ਭਿਕ੍ਖਵੇ, ਹੋਤਿ ਯੋ ਅਗੋਚਰੇ ਚਰਤਿ ਪਰਵਿਸਯੇ.
ਤਸ੍ਮਾਤਿਹ, ਭਿਕ੍ਖਵੇ, ਮਾ ਅਗੋਚਰੇ ਚਰਿਤ੍ਥ ਪਰਵਿਸਯੇ, ਅਗੋਚਰੇ, ਭਿਕ੍ਖਵੇ, ਚਰਤਂ ਪਰਵਿਸਯੇ ਲਚ੍ਛਤਿ ਮਾਰੋ ਓਤਾਰਂ, ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ, ਯਦਿਦਂ ਪਞ੍ਚ ਕਾਮਗੁਣਾ. ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਸੋਤਵਿਞ੍ਞੇਯ੍ਯਾ ਸਦ੍ਦਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਘਾਨਵਿਞ੍ਞੇਯ੍ਯਾ ਗਨ੍ਧਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਜਿਵ੍ਹਾਵਿਞ੍ਞੇਯ੍ਯਾ ਰਸਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ. ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ.
ਗੋਚਰੇ, ਭਿਕ੍ਖਵੇ, ਚਰਥ…ਪੇ… ਨ ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ, ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ. ਕਤਮੇ ਚਤ੍ਤਾਰੋ? ਇਧ ਭਿਕ੍ਖਵੇ, ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਵੇਦਨਾਸੁ ਵੇਦਨਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਚਿਤ੍ਤੇ ਚਿਤ੍ਤਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ – ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ (ਸਂ. ਨਿ. ੫.੩੭੧).
ਕੁਸਲਾਨਨ੍ਤਿ ਅਨਵਜ੍ਜਲਕ੍ਖਣਾਨਂ. ਸਮਾਦਾਨਹੇਤੂਤਿ ਸਮਾਦਾਯ ਵਤ੍ਤਨਹੇਤੁ. ਏਵਮਿਦਂ ਪੁਞ੍ਞਂ ਪਵਡ੍ਢਤੀਤਿ ਏਵਂ ਇਦਂ ਲੋਕਿਯਲੋਕੁਤ੍ਤਰਂ ਪੁਞ੍ਞਫਲਂ ਵਡ੍ਢਤਿ, ਪੁਞ੍ਞਫਲਨ੍ਤਿ ਚ ਉਪਰੂਪਰਿ ਪੁਞ੍ਞਮ੍ਪਿ ਪੁਞ੍ਞਵਿਪਾਕੋਪਿ ਵੇਦਿਤਬ੍ਬੋ.
ਦਲ਼੍ਹਨੇਮਿਚਕ੍ਕਵਤ੍ਤਿਰਾਜਕਥਾਵਣ੍ਣਨਾ
੮੧. ਤਤ੍ਥ ਦੁਵਿਧਂ ਕੁਸਲਂ ਵਟ੍ਟਗਾਮੀ ਚ ਵਿਵਟ੍ਟਗਾਮੀ ਚ. ਤਤ੍ਥ ਵਟ੍ਟਗਾਮਿਕੁਸਲਂ ਨਾਮ ਮਾਤਾਪਿਤੂਨਂ ਪੁਤ੍ਤਧੀਤਾਸੁ ਪੁਤ੍ਤਧੀਤਾਨਞ੍ਚ ਮਾਤਾਪਿਤੂਸੁ ਸਿਨੇਹਵਸੇਨ ਮੁਦੁਮਦ੍ਦਵਚਿਤ੍ਤਂ. ਵਿਵਟ੍ਟਗਾਮਿਕੁਸਲਂ ਨਾਮ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਭੇਦਾ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ. ਤੇਸੁ ਵਟ੍ਟਗਾਮਿਪੁਞ੍ਞਸ੍ਸ ਪਰਿਯੋਸਾਨਂ ਮਨੁਸ੍ਸਲੋਕੇ ਚਕ੍ਕਵਤ੍ਤਿਸਿਰੀਵਿਭਵੋ. ਵਿਵਟ੍ਟਗਾਮਿਕੁਸਲਸ੍ਸ ਮਗ੍ਗਫਲਨਿਬ੍ਬਾਨਸਮ੍ਪਤ੍ਤਿ. ਤਤ੍ਥ ਵਿਵਟ੍ਟਗਾਮਿਕੁਸਲਸ੍ਸ ਵਿਪਾਕਂ ਸੁਤ੍ਤਪਰਿਯੋਸਾਨੇ ਦਸ੍ਸੇਸ੍ਸਤਿ.
ਇਧ ਪਨ ਵਟ੍ਟਗਾਮਿਕੁਸਲਸ੍ਸ ਵਿਪਾਕਦਸ੍ਸਨਤ੍ਥਂ, ਭਿਕ੍ਖਵੇ, ਯਦਾ ਪੁਤ੍ਤਧੀਤਰੋ ਮਾਤਾਪਿਤੂਨਂ ਓਵਾਦੇ ਨ ਅਟ੍ਠਂਸੁ, ਤਦਾ ਆਯੁਨਾਪਿ ਵਣ੍ਣੇਨਾਪਿ ਇਸ੍ਸਰਿਯੇਨਾਪਿ ਪਰਿਹਾਯਿਂਸੁ. ਯਦਾ ਪਨ ਅਟ੍ਠਂਸੁ, ਤਦਾ ਵਡ੍ਢਿਂਸੂਤਿ ਵਤ੍ਵਾ ਵਟ੍ਟਗਾਮਿਕੁਸਲਾਨੁਸਨ੍ਧਿਵਸੇਨ ‘‘ਭੂਤਪੁਬ੍ਬਂ, ਭਿਕ੍ਖਵੇ’’ਤਿ ਦੇਸਨਂ ਆਰਭਿ. ਤਤ੍ਥ ਚਕ੍ਕਵਤ੍ਤੀਤਿਆਦੀਨਿ ਮਹਾਪਦਾਨੇ (ਦੀ. ਨਿ. ਅਟ੍ਠ. ੨.੩੩) ਵਿਤ੍ਥਾਰਿਤਾਨੇਵ.
੮੨. ਓਸਕ੍ਕਿਤਨ੍ਤਿ ਈਸਕਮ੍ਪਿ ਅਵਸਕ੍ਕਿਤਂ. ਠਾਨਾ ਚੁਤਨ੍ਤਿ ਸਬ੍ਬਸੋ ਠਾਨਾ ਅਪਗਤਂ. ਤਂ ਕਿਰ ਚਕ੍ਕਰਤਨਂ ਅਨ੍ਤੇਪੁਰਦ੍ਵਾਰੇ ਅਕ੍ਖਾਹਤਂ ਵਿਯ ਵੇਹਾਸਂ ਅਟ੍ਠਾਸਿ. ਅਥਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਖਦਿਰਤ੍ਥਮ੍ਭੇ ਨਿਖਣਿਤ੍ਵਾ ਚਕ੍ਕਰਤਨਮਤ੍ਥਕੇ ਨੇਮਿਅਭਿਮੁਖਂ ਏਕਂ ਸੁਤ੍ਤਕਂ ਬਨ੍ਧਿਂਸੁ. ਅਧੋਭਾਗੇਪਿ ਨੇਮਿਅਭਿਮੁਖਂ ਏਕਂ ਬਨ੍ਧਿਂਸੁ. ਤੇਸੁ ਉਪਰਿਮਸੁਤ੍ਤਤੋ ਅਪ੍ਪਮਤ੍ਤਕਮ੍ਪਿ ਓਗਤਂ ਚਕ੍ਕਰਤਨਂ ਓਸਕ੍ਕਿਤਂ ਨਾਮ ਹੋਤਿ, ਹੇਟ੍ਠਾ ਸੁਤ੍ਤਸ੍ਸ ਠਾਨਂ ਉਪਰਿਮਕੋਟਿਯਾ ਅਤਿਕ੍ਕਨ੍ਤਗਤਂ ਠਾਨਾ ਚੁਤਂ ਨਾਮ ਹੋਤਿ, ਤਦੇਤਂ ਅਤਿਬਲਵਦੋਸੇ ਸਤਿ ਏਵਂ ਹੋਤਿ. ਸੁਤ੍ਤਮਤ੍ਤਮ੍ਪਿ ਏਕਙ੍ਗੁਲਦ੍ਵਙ੍ਗੁਲਮਤ੍ਤਂ ਵਾ ਭਟ੍ਠਂ ਠਾਨਾ ਚੁਤਮੇਵ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਓਸਕ੍ਕਿਤਂ ਠਾਨਾ ਚੁਤ’’ਨ੍ਤਿ.
ਅਥ ਮੇ ਆਰੋਚੇਯ੍ਯਾਸੀਤਿ ਤਾਤ, ਤ੍ਵਂ ਅਜ੍ਜ ਆਦਿਂ ਕਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਚਕ੍ਕਰਤਨਸ੍ਸ ਉਪਟ੍ਠਾਨਂ ਗਚ੍ਛ, ਏਵਂ ਗਚ੍ਛਨ੍ਤੋ ਯਦਾ ਚਕ੍ਕਰਤਨਂ ਈਸਕਮ੍ਪਿ ਓਸਕ੍ਕਿਤਂ ਠਾਨਾ ਚੁਤਂ ਪਸ੍ਸਸਿ, ਅਥ ਮਯ੍ਹਂ ਆਚਿਕ੍ਖੇਯ੍ਯਾਸਿ. ਜੀਵਿਤਞ੍ਹਿ ਮੇ ਤਵ ਹਤ੍ਥੇ ਨਿਕ੍ਖਿਤ੍ਤਨ੍ਤਿ. ਅਦ੍ਦਸਾਤਿ ਅਪ੍ਪਮਤ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਗਨ੍ਤ੍ਵਾ ਓਲੋਕੇਨ੍ਤੋ ਏਕਦਿਵਸਂ ਅਦ੍ਦਸ.
੮੩. ਅਥ ਖੋ, ਭਿਕ੍ਖਵੇਤਿ ਭਿਕ੍ਖਵੇ, ਅਥ ਰਾਜਾ ਦਲ਼੍ਹਨੇਮਿ ‘‘ਚਕ੍ਕਰਤਨਂ ਓਸਕ੍ਕਿਤ’’ਨ੍ਤਿ ਸੁਤ੍ਵਾ ਉਪ੍ਪਨ੍ਨਬਲਵਦੋਮਨਸ੍ਸੋ ‘‘ਨ ਦਾਨਿ ਮਯਾ ਚਿਰਂ ਜੀਵਿਤਬ੍ਬਂ ਭਵਿਸ੍ਸਤਿ, ਅਪ੍ਪਾਵਸੇਸਂ ਮੇ ਆਯੁ, ਨ ਮੇ ਦਾਨਿ ਕਾਮੇ ਪਰਿਭੁਞ੍ਜਨਕਾਲੋ, ਪਬ੍ਬਜ੍ਜਾਕਾਲੋ ਮੇ ਇਦਾਨੀ’’ਤਿ ਰੋਦਿਤ੍ਵਾ ਪਰਿਦੇਵਿਤ੍ਵਾ ਜੇਟ੍ਠਪੁਤ੍ਤਂ ਕੁਮਾਰਂ ਆਮਨ੍ਤਾਪੇਤ੍ਵਾ ਏਤਦਵੋਚ. ਸਮੁਦ੍ਦਪਰਿਯਨ੍ਤਨ੍ਤਿ ਪਰਿਕ੍ਖਿਤ੍ਤਏਕਸਮੁਦ੍ਦਪਰਿਯਨ੍ਤਮੇਵ. ਇਦਂ ਹਿਸ੍ਸ ਕੁਲਸਨ੍ਤਕਂ. ਚਕ੍ਕਵਾਲ਼ਪਰਿਯਨ੍ਤਂ ਪਨ ਪੁਞ੍ਞਿਦ੍ਧਿਵਸੇਨ ਨਿਬ੍ਬਤ੍ਤਂ, ਨ ਤਂ ਸਕ੍ਕਾ ਦਾਤੁਂ. ਕੁਲਸਨ੍ਤਕਂ ਪਨ ਨਿਯ੍ਯਾਤੇਨ੍ਤੋ ‘‘ਸਮੁਦ੍ਦਪਰਿਯਨ੍ਤ’’ਨ੍ਤਿ ਆਹ. ਕੇਸਮਸ੍ਸੁਨ੍ਤਿ ਤਾਪਸਪਬ੍ਬਜ੍ਜਂ ਪਬ੍ਬਜਨ੍ਤਾਪਿ ਹਿ ਪਠਮਂ ਕੇਸਮਸ੍ਸੁਂ ਓਹਾਰੇਨ੍ਤਿ. ਤਤੋ ਪਟ੍ਠਾਯ ਪਰੂਲ਼੍ਹਕੇਸੇ ਬਨ੍ਧਿਤ੍ਵਾ ਵਿਚਰਨ੍ਤਿ. ਤੇਨ ਵੁਤ੍ਤਂ – ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿ.
ਕਾਸਾਯਾਨੀਤਿ ਕਸਾਯਰਸਪੀਤਾਨਿ. ਆਦਿਤੋ ਏਵਂ ਕਤ੍ਵਾ ਪਚ੍ਛਾ ਵਕ੍ਕਲਾਨਿਪਿ ਧਾਰੇਨ੍ਤਿ. ਪਬ੍ਬਜੀਤਿ ਪਬ੍ਬਜਿਤੋ. ਪਬ੍ਬਜਿਤ੍ਵਾ ਚ ਅਤ੍ਤਨੋ ਮਙ੍ਗਲਵਨੁਯ੍ਯਾਨੇਯੇਵ ਵਸਿ. ਰਾਜਿਸਿਮ੍ਹੀਤਿ ਰਾਜਈਸਿਮ੍ਹਿ. ਬ੍ਰਾਹ੍ਮਣਪਬ੍ਬਜਿਤਾ ਹਿ ‘‘ਬ੍ਰਾਹ੍ਮਣਿਸਯੋ’’ਤਿ ਵੁਚ੍ਚਨ੍ਤਿ. ਸੇਤਚ੍ਛਤ੍ਤਂ ਪਨ ਪਹਾਯ ਰਾਜਪਬ੍ਬਜਿਤਾ ਰਾਜਿਸਯੋਤਿ. ਅਨ੍ਤਰਧਾਯੀਤਿ ਅਨ੍ਤਰਹਿਤਂ ਨਿਬ੍ਬੁਤਦੀਪਸਿਖਾ ਵਿਯ ਅਭਾਵਂ ਉਪਗਤਂ. ਪਟਿਸਂਵੇਦੇਸੀਤਿ ਕਨ੍ਦਨ੍ਤੋ ਪਰਿਦੇਵਨ੍ਤੋ ਜਾਨਾਪੇਸਿ. ਪੇਤ੍ਤਿਕਨ੍ਤਿ ਪਿਤਿਤੋ ਆਗਤਂ ਦਾਯਜ੍ਜਂ ਨ ਹੋਤਿ, ਨ ਸਕ੍ਕਾ ਕੁਸੀਤੇਨ ਹੀਨਵੀਰਿਯੇਨ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਨ੍ਤੇਨ ਪਾਪੁਣਿਤੁਂ. ਅਤ੍ਤਨੋ ਪਨ ਸੁਕਤਂ ਕਮ੍ਮਂ ਨਿਸ੍ਸਾਯ ਦਸਵਿਧਂ ਦ੍ਵਾਦਸਵਿਧਂ ਵਾ ਚਕ੍ਕਵਤ੍ਤਿਵਤ੍ਤਂ ਪੂਰੇਨ੍ਤੇਨੇਵੇਤਂ ਪਤ੍ਤਬ੍ਬਨ੍ਤਿ ਦੀਪੇਤਿ. ਅਥ ਨਂ ਵਤ੍ਤਪਟਿਪਤ੍ਤਿਯਂ ਚੋਦੇਨ੍ਤੋ ‘‘ਇਙ੍ਘ ਤ੍ਵ’’ਨ੍ਤਿਆਦਿਮਾਹ. ਤਤ੍ਥ ਅਰਿਯੇਤਿ ਨਿਦ੍ਦੋਸੇ. ਚਕ੍ਕਵਤ੍ਤਿਵਤ੍ਤੇਤਿ ਚਕ੍ਕਵਤ੍ਤੀਨਂ ਵਤ੍ਤੇ.
ਚਕ੍ਕਵਤ੍ਤਿਅਰਿਯਵਤ੍ਤਵਣ੍ਣਨਾ
੮੪. ਧਮ੍ਮਨ੍ਤਿ ਦਸਕੁਸਲਕਮ੍ਮਪਥਧਮ੍ਮਂ. ਨਿਸ੍ਸਾਯਾਤਿ ਤਦਧਿਟ੍ਠਾਨੇਨ ਚੇਤਸਾ ਤਮੇਵ ਨਿਸ੍ਸਯਂ ਕਤ੍ਵਾ. ਧਮ੍ਮਂ ਸਕ੍ਕਰੋਨ੍ਤੋਤਿ ਯਥਾ ਕਤੋ ਸੋ ਧਮ੍ਮੋ ਸੁਟ੍ਠੁ ਕਤੋ ਹੋਤਿ, ਏਵਮੇਤਂ ਕਰੋਨ੍ਤੋ. ਧਮ੍ਮਂ ਗਰੁਂ ਕਰੋਨ੍ਤੋਤਿ ਤਸ੍ਮਿਂ ਗਾਰਵੁਪ੍ਪਤ੍ਤਿਯਾ ਤਂ ਗਰੁਂ ਕਰੋਨ੍ਤੋ. ਧਮ੍ਮਂ ਮਾਨੇਨ੍ਤੋਤਿ ਤਮੇਵ ਧਮ੍ਮਂ ਪਿਯਞ੍ਚ ਭਾਵਨੀਯਞ੍ਚ ਕਤ੍ਵਾ ਵਿਹਰਨ੍ਤੋ. ਧਮ੍ਮਂ ਪੂਜੇਨ੍ਤੋਤਿ ਤਂ ਅਪਦਿਸਿਤ੍ਵਾ ਗਨ੍ਧਮਾਲਾਦਿਪੂਜਨੇਨਸ੍ਸ ਪੂਜਂ ਕਰੋਨ੍ਤੋ. ਧਮ੍ਮਂ ਅਪਚਯਮਾਨੋਤਿ ਤਸ੍ਸੇਵ ਧਮ੍ਮਸ੍ਸ ਅਞ੍ਜਲਿਕਰਣਾਦੀਹਿ ਨੀਚਵੁਤ੍ਤਿਤਂ ਕਰੋਨ੍ਤੋ. ਧਮ੍ਮਦ੍ਧਜੋ ਧਮ੍ਮਕੇਤੂਤਿ ਤਂ ਧਮ੍ਮਂ ਧਜਮਿਵ ਪੁਰਕ੍ਖਤ੍ਵਾ ਕੇਤੁਮਿਵ ਚ ਉਕ੍ਖਿਪਿਤ੍ਵਾ ਪਵਤ੍ਤਿਯਾ ਧਮ੍ਮਦ੍ਧਜੋ ਧਮ੍ਮਕੇਤੁ ਚ ਹੁਤ੍ਵਾਤਿ ਅਤ੍ਥੋ. ਧਮ੍ਮਾਧਿਪਤੇਯ੍ਯੋਤਿ ਧਮ੍ਮਾਧਿਪਤਿਭੂਤੋ ਆਗਤਭਾਵੇਨ ਧਮ੍ਮਵਸੇਨੇਵ ਸਬ੍ਬਕਿਰਿਯਾਨਂ ਕਰਣੇਨ ਧਮ੍ਮਾਧਿਪਤੇਯ੍ਯੋ ਹੁਤ੍ਵਾ. ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਸ੍ਸੂਤਿ ਧਮ੍ਮੋ ਅਸ੍ਸਾ ਅਤ੍ਥੀਤਿ ਧਮ੍ਮਿਕਾ, ਰਕ੍ਖਾ ਚ ਆਵਰਣਞ੍ਚ ਗੁਤ੍ਤਿ ਚ ਰਕ੍ਖਾਵਰਣਗੁਤ੍ਤਿ. ਤਤ੍ਥ ‘‘ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤੀ’’ਤਿ (ਸਂ. ਨਿ. ੫.੩੮੫) ਵਚਨਤੋ ਖਨ੍ਤਿਆਦਯੋ ਰਕ੍ਖਾ. ਵੁਤ੍ਤਞ੍ਹੇਤਂ ‘‘ਕਥਞ੍ਚ, ਭਿਕ੍ਖਵੇ, ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤਿ. ਖਨ੍ਤਿਯਾ ਅਵਿਹਿਂਸਾਯ ਮੇਤ੍ਤਚਿਤ੍ਤਤਾ ਅਨੁਦ੍ਦਯਤਾ’’ਤਿ (ਸਂ. ਨਿ. ੫.੩੮੫). ਨਿਵਾਸਨਪਾਰੁਪਨਗੇਹਾਦੀਨਂ ਨਿਵਾਰਣਾ ਆਵਰਣਂ, ਚੋਰਾਦਿਉਪਦ੍ਦਵਨਿਵਾਰਣਤ੍ਥਂ ਗੋਪਾਯਨਾ ਗੁਤ੍ਤਿ, ਤਂ ਸਬ੍ਬਮ੍ਪਿ ਸੁਟ੍ਠੁ ਸਂਵਿਦਹਸ੍ਸੁ ਪਵਤ੍ਤਯ ਠਪੇਹੀਤਿ ਅਤ੍ਥੋ. ਇਦਾਨਿ ਯਤ੍ਥ ਸਾ ਸਂਵਿਦਹਿਤਬ੍ਬਾ, ਤਂ ਦਸ੍ਸੇਨ੍ਤੋ ਅਨ੍ਤੋਜਨਸ੍ਮਿਨ੍ਤਿਆਦਿਮਾਹ.
ਤਤ੍ਰਾਯਂ ਸਙ੍ਖੇਪਤ੍ਥੋ – ਅਨ੍ਤੋਜਨਸਙ੍ਖਾਤਂ ਤਵ ਪੁਤ੍ਤਦਾਰਂ ਸੀਲਸਂਵਰੇ ਪਤਿਟ੍ਠਪੇਹਿ, ਵਤ੍ਥਗਨ੍ਧਮਾਲਾਦੀਨਿ ਚਸ੍ਸ ਦੇਹਿ, ਸਬ੍ਬੋਪਦ੍ਦਵੇ ਚਸ੍ਸ ਨਿਵਾਰੇਹਿ. ਬਲਕਾਯਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਬਲਕਾਯੋ ਕਾਲਂ ਅਨਤਿਕ੍ਕਮਿਤ੍ਵਾ ਭਤ੍ਤਵੇਤਨਸਮ੍ਪਦਾਨੇਨਪਿ ਅਨੁਗ੍ਗਹੇਤਬ੍ਬੋ. ਅਭਿਸਿਤ੍ਤਖਤ੍ਤਿਯਾ ਭਦ੍ਰਸ੍ਸਾਜਾਨੇਯ੍ਯਾਦਿਰਤਨਸਮ੍ਪਦਾਨੇਨਪਿ ਉਪਸਙ੍ਗਣ੍ਹਿਤਬ੍ਬਾ. ਅਨੁਯਨ੍ਤਖਤ੍ਤਿਯਾ ਤੇਸਂ ਅਨੁਰੂਪਯਾਨਵਾਹਨਸਮ੍ਪਦਾਨੇਨਪਿ ਪਰਿਤੋਸੇਤਬ੍ਬਾ. ਬ੍ਰਾਹ੍ਮਣਾ ਅਨ੍ਨਪਾਨਵਤ੍ਥਾਦਿਨਾ ਦੇਯ੍ਯਧਮ੍ਮੇਨ. ਗਹਪਤਿਕਾ ਭਤ੍ਤਬੀਜਨਙ੍ਗਲਫਾਲਬਲਿਬਦ੍ਦਾਦਿਸਮ੍ਪਦਾਨੇਨ. ਤਥਾ ਨਿਗਮਵਾਸਿਨੋ ਨੇਗਮਾ, ਜਨਪਦਵਾਸਿਨੋ ਚ ਜਾਨਪਦਾ. ਸਮਿਤਪਾਪਬਾਹਿਤਪਾਪਾ ਸਮਣਬ੍ਰਾਹ੍ਮਣਾ ਸਮਣਪਰਿਕ੍ਖਾਰਸਮ੍ਪਦਾਨੇਨ ਸਕ੍ਕਾਤਬ੍ਬਾ. ਮਿਗਪਕ੍ਖਿਨੋ ਅਭਯਦਾਨੇਨ ਸਮਸ੍ਸਾਸੇਤਬ੍ਬਾ.
ਵਿਜਿਤੇਤਿ ਅਤ੍ਤਨੋ ਆਣਾਪਵਤ੍ਤਿਟ੍ਠਾਨੇ. ਅਧਮ੍ਮਕਾਰੋਤਿ ਅਧਮ੍ਮਕਿਰਿਯਾ. ਮਾ ਪਵਤ੍ਤਿਤ੍ਥਾਤਿ ਯਥਾ ਨਪ੍ਪਵਤ੍ਤਤਿ, ਤਥਾ ਨਂ ਪਟਿਪਾਦੇਹੀਤਿ ਅਤ੍ਥੋ. ਸਮਣਬ੍ਰਾਹ੍ਮਣਾਤਿ ਸਮਿਤਪਾਪਬਾਹਿਤਪਾਪਾ. ਮਦਪ੍ਪਮਾਦਾ ਪਟਿਵਿਰਤਾਤਿ ਨਵਵਿਧਾ ਮਾਨਮਦਾ, ਪਞ੍ਚਸੁ ਕਾਮਗੁਣੇਸੁ ਚਿਤ੍ਤਵੋਸ੍ਸਜ੍ਜਨਸਙ੍ਖਾਤਾ ਪਮਾਦਾ ਚ ਪਟਿਵਿਰਤਾ. ਖਨ੍ਤਿਸੋਰਚ੍ਚੇ ਨਿਵਿਟ੍ਠਾਤਿ ਅਧਿਵਾਸਨਖਨ੍ਤਿਯਞ੍ਚ ਸੁਰਤਭਾਵੇ ਚ ਪਤਿਟ੍ਠਿਤਾ. ਏਕਮਤ੍ਤਾਨਨ੍ਤਿ ਅਤ੍ਤਨੋ ਰਾਗਾਦੀਨਂ ਦਮਨਾਦੀਹਿ ਏਕਮਤ੍ਤਾਨਂ ਦਮੇਨ੍ਤਿ ਸਮੇਨ੍ਤਿ ਪਰਿਨਿਬ੍ਬਾਪੇਨ੍ਤੀਤਿ ਵੁਚ੍ਚਨ੍ਤਿ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ. ਅਭਿਨਿਵਜ੍ਜੇਯ੍ਯਾਸੀਤਿ ਗੂਥਂ ਵਿਯ ਵਿਸਂ ਵਿਯ ਅਗ੍ਗਿਂ ਵਿਯ ਚ ਸੁਟ੍ਠੁ ਵਜ੍ਜੇਯ੍ਯਾਸਿ. ਸਮਾਦਾਯਾਤਿ ਸੁਰਭਿਕੁਸੁਮਦਾਮਂ ਵਿਯ ਅਮਤਂ ਵਿਯ ਚ ਸਮ੍ਮਾ ਆਦਾਯ ਪਵਤ੍ਤੇਯ੍ਯਾਸਿ.
ਇਧ ਠਤ੍ਵਾ ਵਤ੍ਤਂ ਸਮਾਨੇਤਬ੍ਬਂ. ਅਨ੍ਤੋਜਨਸ੍ਮਿਂ ਬਲਕਾਯੇਪਿ ਏਕਂ, ਖਤ੍ਤਿਯੇਸੁ ਏਕਂ, ਅਨੁਯਨ੍ਤੇਸੁ ਏਕਂ, ਬ੍ਰਾਹ੍ਮਣਗਹਪਤਿਕੇਸੁ ਏਕਂ, ਨੇਗਮਜਾਨਪਦੇਸੁ ਏਕਂ, ਸਮਣਬ੍ਰਾਹ੍ਮਣੇਸੁ ਏਕਂ, ਮਿਗਪਕ੍ਖੀਸੁ ਏਕਂ, ਅਧਮ੍ਮਕਾਰਪ੍ਪਟਿਕ੍ਖੇਪੋ ਏਕਂ, ਅਧਨਾਨਂ ਧਨਾਨੁਪ੍ਪਦਾਨਂ ਏਕਂ ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਪੁਚ੍ਛਨਂ ਏਕਨ੍ਤਿ ਏਵਮੇਤਂ ਦਸਵਿਧਂ ਹੋਤਿ. ਗਹਪਤਿਕੇ ਪਨ ਪਕ੍ਖਿਜਾਤੇ ਚ ਵਿਸੁਂ ਕਤ੍ਵਾ ਗਣੇਨ੍ਤਸ੍ਸ ਦ੍ਵਾਦਸਵਿਧਂ ਹੋਤਿ. ਪੁਬ੍ਬੇ ਅਵੁਤ੍ਤਂ ਵਾ ਗਣੇਨ੍ਤੇਨ ਅਧਮ੍ਮਰਾਗਸ੍ਸ ਚ ਵਿਸਮਲੋਭਸ੍ਸ ਚ ਪਹਾਨਵਸੇਨ ਦ੍ਵਾਦਸਵਿਧਂ ਵੇਦਿਤਬ੍ਬਂ. ਇਦਂ ਖੋ ਤਾਤ ਤਨ੍ਤਿ ਇਦਂ ਦਸਵਿਧਂ ਦ੍ਵਾਦਸਵਿਧਞ੍ਚ ਅਰਿਯਚਕ੍ਕਵਤ੍ਤਿਵਤ੍ਤਂ ਨਾਮ. ਵਤ੍ਤਮਾਨਸ੍ਸਾਤਿ ਪੂਰੇਤ੍ਵਾ ਵਤ੍ਤਮਾਨਸ੍ਸ. ਤਦਹੁਪੋਸਥੇਤਿਆਦਿ ਮਹਾਸੁਦਸ੍ਸਨੇ ਵੁਤ੍ਤਂ.
੯੦. ਸਮਤੇਨਾਤਿ ਅਤ੍ਤਨੋ ਮਤਿਯਾ. ਸੁਦਨ੍ਤਿ ਨਿਪਾਤਮਤ੍ਤਂ. ਪਸਾਸਤੀਤਿ ਅਨੁਸਾਸਤਿ. ਇਦਂ ਵੁਤ੍ਤਂ ਹੋਤਿ – ਪੋਰਾਣਕਂ ਰਾਜਵਂਸਂ ਰਾਜਪਵੇਣਿਂ ਰਾਜਧਮ੍ਮਂ ਪਹਾਯ ਅਤ੍ਤਨੋ ਮਤਿਮਤ੍ਤੇ ਠਤ੍ਵਾ ਜਨਪਦਂ ਅਨੁਸਾਸਤੀਤਿ. ਏਵਮਯਂ ਮਘਦੇਵਵਂਸਸ੍ਸ ਕਲ਼ਾਰਜਨਕੋ ਵਿਯ ਦਲ਼੍ਹਨੇਮਿਵਂਸਸ੍ਸ ਉਪਚ੍ਛੇਦਕੋ ਅਨ੍ਤਿਮਪੁਰਿਸੋ ਹੁਤ੍ਵਾ ਉਪ੍ਪਨ੍ਨੋ. ਪੁਬ੍ਬੇਨਾਪਰਨ੍ਤਿ ਪੁਬ੍ਬਕਾਲੇਨ ਸਦਿਸਾ ਹੁਤ੍ਵਾ ਅਪਰਕਾਲਂ. ਜਨਪਦਾ ਨ ਪਬ੍ਬਨ੍ਤੀਤਿ ਨ ਵਡ੍ਢਨ੍ਤਿ. ਯਥਾ ਤਂ ਪੁਬ੍ਬਕਾਨਨ੍ਤਿ ਯਥਾ ਪੁਬ੍ਬਕਾਨਂ ਰਾਜੂਨਂ ਪੁਬ੍ਬੇ ਚ ਪਚ੍ਛਾ ਚ ਸਦਿਸਾਯੇਵ ਹੁਤ੍ਵਾ ਪਬ੍ਬਿਂਸੁ, ਤਥਾ ਨ ਪਬ੍ਬਨ੍ਤਿ. ਕਤ੍ਥਚਿ ਸੁਞ੍ਞਾ ਹੋਨ੍ਤਿ ਹਤਵਿਲੁਤ੍ਤਾ, ਤੇਲਮਧੁਫਾਣਿਤਾਦੀਸੁ ਚੇਵ ਯਾਗੁਭਤ੍ਤਾਦੀਸੁ ਚ ਓਜਾਪਿ ਪਰਿਹਾਯਿਤ੍ਥਾਤਿ ਅਤ੍ਥੋ.
ਅਮਚ੍ਚਾ ਪਾਰਿਸਜ੍ਜਾਤਿ ਅਮਚ੍ਚਾ ਚੇਵ ਪਰਿਸਾਵਚਰਾ ਚ. ਗਣਕਮਹਾਮਤ੍ਤਾਤਿ ਅਚ੍ਛਿਦ੍ਦਕਾਦਿਪਾਠਗਣਕਾ ਚੇਵ ਮਹਾਅਮਚ੍ਚਾ ਚ. ਅਨੀਕਟ੍ਠਾਤਿ ਹਤ੍ਥਿਆਚਰਿਯਾਦਯੋ. ਦੋਵਾਰਿਕਾਤਿ ਦ੍ਵਾਰਰਕ੍ਖਿਨੋ. ਮਨ੍ਤਸ੍ਸਾਜੀਵਿਨੋਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਂ ਨਿਸ੍ਸਯਂ ਕਤ੍ਵਾ ਯੇ ਜੀਵਨ੍ਤਿ ਪਣ੍ਡਿਤਾ ਮਹਾਮਤ੍ਤਾ, ਤੇਸਂ ਏਤਂ ਨਾਮਂ.
ਆਯੁਵਣ੍ਣਾਦਿਪਰਿਹਾਨਿਕਥਾਵਣ੍ਣਨਾ
੯੧. ਨੋ ਚ ਖੋ ਅਧਨਾਨਨ੍ਤਿ ਬਲਵਲੋਭਤ੍ਤਾ ਪਨ ਅਧਨਾਨਂ ਦਲਿਦ੍ਦਮਨੁਸ੍ਸਾਨਂ ਧਨਂ ਨਾਨੁਪ੍ਪਦਾਸਿ. ਨਾਨੁਪ੍ਪਦਿਯਮਾਨੇਤਿ ਅਨਨੁਪ੍ਪਦਿਯਮਾਨੇ, ਅਯਮੇਵ ਵਾ ਪਾਠੋ. ਦਾਲਿਦ੍ਦਿਯਨ੍ਤਿ ਦਲਿਦ੍ਦਭਾਵੋ. ਅਤ੍ਤਨਾ ਚ ਜੀਵਾਹੀਤਿ ਸਯਞ੍ਚ ਜੀਵਂ ਯਾਪੇਹੀਤਿ ਅਤ੍ਥੋ. ਉਦ੍ਧਗ੍ਗਿਕਨ੍ਤਿਆਦੀਸੁ ਉਪਰੂਪਰਿਭੂਮੀਸੁ ਫਲਦਾਨਵਸੇਨ ਉਦ੍ਧਮਗ੍ਗਮਸ੍ਸਾਤਿ ਉਦ੍ਧਗ੍ਗਿਕਾ. ਸਗ੍ਗਸ੍ਸ ਹਿਤਾ ਤਤ੍ਰੁਪਪਤ੍ਤਿਜਨਨਤੋਤਿ ਸੋਵਗ੍ਗਿਕਾ. ਨਿਬ੍ਬਤ੍ਤਟ੍ਠਾਨੇ ਸੁਖੋ ਵਿਪਾਕੋ ਅਸ੍ਸਾਤਿ ਸੁਖਵਿਪਾਕਾ. ਸੁਟ੍ਠੁ ਅਗ੍ਗਾਨਂ ਦਿਬ੍ਬਵਣ੍ਣਾਦੀਨਂ ਦਸਨ੍ਨਂ ਵਿਸੇਸਾਨਂ ਨਿਬ੍ਬਤ੍ਤਨਤੋ ਸਗ੍ਗਸਂਵਤ੍ਤਨਿਕਾ. ਏਵਰੂਪਂ ਦਕ੍ਖਿਣਂ ਦਾਨਂ ਪਤਿਟ੍ਠਪੇਤੀਤਿ ਅਤ੍ਥੋ.
੯੨. ਪਵਡ੍ਢਿਸ੍ਸਤੀਤਿ ਵਡ੍ਢਿਸ੍ਸਤਿ ਬਹੁਂ ਭਵਿਸ੍ਸਤਿ. ਸੁਨਿਸੇਧਂ ਨਿਸੇਧੇਯ੍ਯਨ੍ਤਿ ਸੁਟ੍ਠੁ ਨਿਸਿਦ੍ਧਂ ਨਿਸੇਧੇਯ੍ਯਂ. ਮੂਲਘਚ੍ਚਨ੍ਤਿ ਮੂਲਹਤਂ. ਖਰਸ੍ਸਰੇਨਾਤਿ ਫਰੁਸਸਦ੍ਦੇਨ. ਪਣਵੇਨਾਤਿ ਵਜ੍ਝਭੇਰਿਯਾ.
੯੩. ਸੀਸਾਨਿ ਨੇਸਂ ਛਿਨ੍ਦਿਸ੍ਸਾਮਾਤਿ ਯੇਸਂ ਅਨ੍ਤਮਸੋ ਮੂਲਕਮੁਟ੍ਠਿਮ੍ਪਿ ਹਰਿਸ੍ਸਾਮ, ਤੇਸਂ ਤਥੇਵ ਸੀਸਾਨਿ ਛਿਨ੍ਦਿਸ੍ਸਾਮ, ਯਥਾ ਕੋਚਿ ਹਟਭਾਵਮ੍ਪਿ ਨ ਜਾਨਿਸ੍ਸਤਿ, ਅਮ੍ਹਾਕਂ ਦਾਨਿ ਕਿਮੇਤ੍ਥ ਰਾਜਾਪਿ ਏਵਂ ਉਟ੍ਠਾਯ ਪਰਂ ਮਾਰੇਤੀਤਿ ਅਯਂ ਨੇਸਂ ਅਧਿਪ੍ਪਾਯੋ. ਉਪਕ੍ਕਮਿਂਸੂਤਿ ਆਰਭਿਂਸੁ. ਪਨ੍ਥਦੁਹਨਨ੍ਤਿ ਪਨ੍ਥਘਾਤਂ, ਪਨ੍ਥੇ ਠਤ੍ਵਾ ਚੋਰਕਮ੍ਮਂ.
੯੪. ਨ ਹਿ, ਦੇਵਾਤਿ ਸੋ ਕਿਰ ਚਿਨ੍ਤੇਸਿ – ‘‘ਅਯਂ ਰਾਜਾ ਸਚ੍ਚਂ ਦੇਵਾਤਿ ਮੁਖਪਟਿਞ੍ਞਾਯ ਦਿਨ੍ਨਾਯ ਮਾਰਾਪੇਤਿ, ਹਨ੍ਦਾਹਂ ਮੁਸਾਵਾਦਂ ਕਰੋਮੀ’’ਤਿ, ਮਰਣਭਯਾ ‘‘ਨ ਹਿ ਦੇਵਾ’’ਤਿ ਅਵੋਚ.
੯੬. ਏਕਿਦਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ, ਏਕੇ ਸਤ੍ਤਾਤਿ ਅਤ੍ਥੋ. ਚਾਰਿਤ੍ਤਨ੍ਤਿ ਮਿਚ੍ਛਾਚਾਰਂ. ਅਭਿਜ੍ਝਾਬ੍ਯਾਪਾਦਾਤਿ ਅਭਿਜ੍ਝਾ ਚ ਬ੍ਯਾਪਾਦੋ ਚ. ਮਿਚ੍ਛਾਦਿਟ੍ਠੀਤਿ ਨਤ੍ਥਿ ਦਿਨ੍ਨਨ੍ਤਿਆਦਿਕਾ ਅਨ੍ਤਗ੍ਗਾਹਿਕਾ ਪਚ੍ਚਨੀਕਦਿਟ੍ਠਿ.
੧੦੧. ਅਧਮ੍ਮਰਾਗੋਤਿ ਮਾਤਾ ਮਾਤੁਚ੍ਛਾ ਪਿਤੁਚ੍ਛਾ ਮਾਤੁਲਾਨੀਤਿਆਦਿਕੇ ਅਯੁਤ੍ਤਟ੍ਠਾਨੇ ਰਾਗੋ. ਵਿਸਮਲੋਭੋਤਿ ਪਰਿਭੋਗਯੁਤ੍ਤੇਸੁਪਿ ਠਾਨੇਸੁ ਅਤਿਬਲਵਲੋਭੋ. ਮਿਚ੍ਛਾਧਮ੍ਮੋਤਿ ਪੁਰਿਸਾਨਂ ਪੁਰਿਸੇਸੁ ਇਤ੍ਥੀਨਞ੍ਚ ਇਤ੍ਥੀਸੁ ਛਨ੍ਦਰਾਗੋ.
ਅਮਤ੍ਤੇਯ੍ਯਤਾਤਿਆਦੀਸੁ ਮਾਤੁ ਹਿਤੋ ਮਤ੍ਤੇਯ੍ਯੋ, ਤਸ੍ਸ ਭਾਵੋ ਮਤ੍ਤੇਯ੍ਯਤਾ, ਮਾਤਰਿ ਸਮ੍ਮਾ ਪਟਿਪਤ੍ਤਿਯਾ ਏਤਂ ਨਾਮਂ. ਤਸ੍ਸਾ ਅਭਾਵੋ ਚੇਵ ਤਪ੍ਪਟਿਪਕ੍ਖਤਾ ਚ ਅਮਤ੍ਤੇਯ੍ਯਤਾ. ਅਪੇਤ੍ਤੇਯ੍ਯਤਾਦੀਸੁਪਿ ਏਸੇਵ ਨਯੋ. ਨ ਕੁਲੇ ਜੇਟ੍ਠਾਪਚਾਯਿਤਾਤਿ ਕੁਲੇ ਜੇਟ੍ਠਾਨਂ ਅਪਚਿਤਿਯਾ ਨੀਚਵੁਤ੍ਤਿਯਾ ਅਕਰਣਭਾਵੋ.
ਦਸਵਸ੍ਸਾਯੁਕਸਮਯਵਣ੍ਣਨਾ
੧੦੩. ਯਂ ਇਮੇਸਨ੍ਤਿ ਯਸ੍ਮਿਂ ਸਮਯੇ ਇਮੇਸਂ. ਅਲਂਪਤੇਯ੍ਯਾਤਿ ਪਤਿਨੋ ਦਾਤੁਂ ਯੁਤ੍ਤਾ. ਇਮਾਨਿ ਰਸਾਨੀਤਿ ਇਮਾਨਿ ਲੋਕੇ ਅਗ੍ਗਰਸਾਨਿ. ਅਤਿਬ੍ਯਾਦਿਪ੍ਪਿਸ੍ਸਨ੍ਤੀਤਿ ਅਤਿਵਿਯ ਦਿਪ੍ਪਿਸ੍ਸਨ੍ਤਿ, ਅਯਮੇਵ ਵਾ ਪਾਠੋ. ਕੁਸਲਨ੍ਤਿਪਿ ਨ ਭਵਿਸ੍ਸਤੀਤਿ ਕੁਸਲਨ੍ਤਿ ਨਾਮਮ੍ਪਿ ਨ ਭਵਿਸ੍ਸਤਿ, ਪਞ੍ਞਤ੍ਤਿਮਤ੍ਤਮ੍ਪਿ ਨ ਪਞ੍ਞਾਯਿਸ੍ਸਤੀਤਿ ਅਤ੍ਥੋ. ਪੁਜ੍ਜਾ ਚ ਭਵਿਸ੍ਸਨ੍ਤਿ ਪਾਸਂਸਾ ਚਾਤਿ ਪੂਜਾਰਹਾ ਚ ਭਵਿਸ੍ਸਨ੍ਤਿ ਪਸਂਸਾਰਹਾ ਚ. ਤਦਾ ਕਿਰ ਮਨੁਸ੍ਸਾ ‘‘ਅਸੁਕੇਨ ਨਾਮ ਮਾਤਾ ਪਹਤਾ, ਪਿਤਾ ਪਹਤੋ, ਸਮਣਬ੍ਰਾਹ੍ਮਣਾ ਜੀਵਿਤਾ ਵੋਰੋਪਿਤਾ, ਕੁਲੇ ਜੇਟ੍ਠਾਨਂ ਅਤ੍ਥਿਭਾਵਮ੍ਪਿ ਨ ਜਾਨਾਤਿ, ਅਹੋ ਪੁਰਿਸੋ’’ਤਿ ਤਮੇਵ ਪੂਜੇਸ੍ਸਨ੍ਤਿ ਚੇਵ ਪਸਂਸਿਸ੍ਸਨ੍ਤਿ ਚ.
ਨ ਭਵਿਸ੍ਸਤਿ ਮਾਤਾਤਿ ਵਾਤਿ ਅਯਂ ਮਯ੍ਹਂ ਮਾਤਾਤਿ ਗਰੁਚਿਤ੍ਤਂ ਨ ਭਵਿਸ੍ਸਤਿ. ਗੇਹੇ ਮਾਤੁਗਾਮਂ ਵਿਯ ਨਾਨਾਵਿਧਂ ਅਸਬ੍ਭਿਕਥਂ ਕਥਯਮਾਨਾ ਅਗਾਰਵੁਪਚਾਰੇਨ ਉਪਸਙ੍ਕਮਿਸ੍ਸਨ੍ਤਿ. ਮਾਤੁਚ੍ਛਾਦੀਸੁਪਿ ਏਸੇਵ ਨਯੋ. ਏਤ੍ਥ ਚ ਮਾਤੁਚ੍ਛਾਤਿ ਮਾਤੁਭਗਿਨੀ. ਮਾਤੁਲਾਨੀਤਿ ਮਾਤੁਲਭਰਿਯਾ. ਆਚਰਿਯਭਰਿਯਾਤਿ ਸਿਪ੍ਪਾਯਤਨਾਨਿ ਸਿਕ੍ਖਾਪਕਸ੍ਸ ਆਚਰਿਯਸ੍ਸ ਭਰਿਯਾ. ਗਰੂਨਂ ਦਾਰਾਤਿ ਚੂਲ਼ਪਿਤੁਮਹਾਪਿਤੁਆਦੀਨਂ ਭਰਿਯਾ. ਸਮ੍ਭੇਦਨ੍ਤਿ ਮਿਸ੍ਸੀਭਾਵਂ, ਮਰਿਯਾਦਭੇਦਂ ਵਾ.
ਤਿਬ੍ਬੋ ਆਘਾਤੋ ਪਚ੍ਚੁਪਟ੍ਠਿਤੋ ਭਵਿਸ੍ਸਤੀਤਿ ਬਲਵਕੋਪੋ ਪੁਨਪ੍ਪੁਨਂ ਉਪ੍ਪਤ੍ਤਿਵਸੇਨ ਪਚ੍ਚੁਪਟ੍ਠਿਤੋ ਭਵਿਸ੍ਸਤਿ. ਅਪਰਾਨਿ ਦ੍ਵੇ ਏਤਸ੍ਸੇਵ ਵੇਵਚਨਾਨਿ. ਕੋਪੋ ਹਿ ਚਿਤ੍ਤਂ ਆਘਾਤੇਤੀਤਿ ਆਘਾਤੋ. ਅਤ੍ਤਨੋ ਚ ਪਰਸ੍ਸ ਚ ਹਿਤਸੁਖਂ ਬ੍ਯਾਪਾਦੇਤੀਤਿ ਬ੍ਯਾਪਾਦੋ. ਮਨੋਪਦੂਸਨਤੋ ਮਨੋਪਦੋਸੋਤਿ ਵੁਚ੍ਚਤਿ. ਤਿਬ੍ਬਂ ਵਧਕਚਿਤ੍ਤਨ੍ਤਿ ਪਿਯਮਾਨਸ੍ਸਾਪਿ ਪਰਂ ਮਾਰਣਤ੍ਥਾਯ ਵਧਕਚਿਤ੍ਤਂ. ਤਸ੍ਸ ਵਤ੍ਥੁਂ ਦਸ੍ਸੇਤੁਂ ਮਾਤੁਪਿ ਪੁਤ੍ਤਮ੍ਹੀਤਿਆਦਿ ਵੁਤ੍ਤਂ. ਮਾਗਵਿਕਸ੍ਸਾਤਿ ਮਿਗਲੁਦ੍ਦਕਸ੍ਸ.
੧੦੪. ਸਤ੍ਥਨ੍ਤਰਕਪ੍ਪੋਤਿ ਸਤ੍ਥੇਨ ਅਨ੍ਤਰਕਪ੍ਪੋ. ਸਂਵਟ੍ਟਕਪ੍ਪਂ ਅਪ੍ਪਤ੍ਵਾ ਅਨ੍ਤਰਾਵ ਲੋਕਵਿਨਾਸੋ. ਅਨ੍ਤਰਕਪ੍ਪੋ ਚ ਨਾਮੇਸ ਦੁਬ੍ਭਿਕ੍ਖਨ੍ਤਰਕਪ੍ਪੋ ਰੋਗਨ੍ਤਰਕਪ੍ਪੋ ਸਤ੍ਥਨ੍ਤਰਕਪ੍ਪੋਤਿ ਤਿਵਿਧੋ. ਤਤ੍ਥ ਲੋਭੁਸ੍ਸਦਾਯ ਪਜਾਯ ਦੁਬ੍ਭਿਕ੍ਖਨ੍ਤਰਕਪ੍ਪੋ ਹੋਤਿ. ਮੋਹੁਸ੍ਸਦਾਯ ਰੋਗਨ੍ਤਰਕਪ੍ਪੋ. ਦੋਸੁਸ੍ਸਦਾਯ ਸਤ੍ਥਨ੍ਤਰਕਪ੍ਪੋ. ਤਤ੍ਥ ਦੁਬ੍ਭਿਕ੍ਖਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਪੇਤ੍ਤਿਵਿਸਯੇ ਉਪਪਜ੍ਜਨ੍ਤਿ. ਕਸ੍ਮਾ? ਆਹਾਰਨਿਕਨ੍ਤਿਯਾ ਬਲਵਤ੍ਤਾ. ਰੋਗਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਸਗ੍ਗੇ ਨਿਬ੍ਬਤ੍ਤਨ੍ਤਿ ਕਸ੍ਮਾ? ਤੇਸਞ੍ਹਿ ‘‘ਅਹੋ ਵਤਞ੍ਞੇਸਂ ਸਤ੍ਤਾਨਂ ਏਵਰੂਪੋ ਰੋਗੋ ਨ ਭਵੇਯ੍ਯਾ’’ਤਿ ਮੇਤ੍ਤਚਿਤ੍ਤਂ ਉਪ੍ਪਜ੍ਜਤੀਤਿ. ਸਤ੍ਥਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਨਿਰਯੇ ਉਪਪਜ੍ਜਨ੍ਤਿ. ਕਸ੍ਮਾ? ਅਞ੍ਞਮਞ੍ਞਂ ਬਲਵਾਘਾਤਤਾਯ.
ਮਿਗਸਞ੍ਞਨ੍ਤਿ ‘‘ਅਯਂ ਮਿਗੋ, ਅਯਂ ਮਿਗੋ’’ਤਿ ਸਞ੍ਞਂ. ਤਿਣ੍ਹਾਨਿ ਸਤ੍ਥਾਨਿ ਹਤ੍ਥੇਸੁ ਪਾਤੁਭਵਿਸ੍ਸਨ੍ਤੀਤਿ ਤੇਸਂ ਕਿਰ ਹਤ੍ਥੇਨ ਫੁਟ੍ਠਮਤ੍ਤਂ ਯਂਕਿਞ੍ਚਿ ਅਨ੍ਤਮਸੋ ਤਿਣਪਣ੍ਣਂ ਉਪਾਦਾਯ ਆਵੁਧਮੇਵ ਭਵਿਸ੍ਸਤਿ. ਮਾ ਚ ਮਯਂ ਕਞ੍ਚੀਤਿ ਮਯਂ ਕਞ੍ਚਿ ਏਕਪੁਰਿਸਮ੍ਪਿ ਜੀਵਿਤਾ ਮਾ ਵੋਰੋਪਯਿਮ੍ਹ. ਮਾ ਚ ਅਮ੍ਹੇ ਕੋਚੀਤਿ ਅਮ੍ਹੇਪਿ ਕੋਚਿ ਏਕਪੁਰਿਸੋ ਜੀਵਿਤਾ ਮਾ ਵੋਰੋਪਯਿਤ੍ਥ. ਯਂਨੂਨ ਮਯਨ੍ਤਿ ਅਯਂ ਲੋਕਵਿਨਾਸੋ ਪਚ੍ਚੁਪਟ੍ਠਿਤੋ, ਨ ਸਕ੍ਕਾ ਦ੍ਵੀਹਿ ਏਕਟ੍ਠਾਨੇ ਠਿਤੇਹਿ ਜੀਵਿਤਂ ਲਦ੍ਧੁਨ੍ਤਿ ਮਞ੍ਞਮਾਨਾ ਏਵਂ ਚਿਨ੍ਤਯਿਂਸੁ. ਵਨਗਹਨਨ੍ਤਿ ਵਨਸਙ੍ਖਾਤੇਹਿ ਤਿਣਗੁਮ੍ਬਲਤਾਦੀਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਰੁਕ੍ਖਗਹਨਨ੍ਤਿ ਰੁਕ੍ਖੇਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਨਦੀਵਿਦੁਗ੍ਗਨ੍ਤਿ ਨਦੀਨਂ ਅਨ੍ਤਰਦੀਪਾਦੀਸੁ ਦੁਗ੍ਗਮਨਟ੍ਠਾਨਂ. ਪਬ੍ਬਤਵਿਸਮਨ੍ਤਿ ਪਬ੍ਬਤੇਹਿ ਵਿਸਮਂ, ਪਬ੍ਬਤੇਸੁਪਿ ਵਾ ਵਿਸਮਟ੍ਠਾਨਂ. ਸਭਾਗਾਯਿਸ੍ਸਨ੍ਤੀਤਿ ਯਥਾ ਅਹਂ ਜੀਵਾਮਿ ਦਿਟ੍ਠਾ ਭੋ ਸਤ੍ਤਾ, ਤ੍ਵਮ੍ਪਿ ਤਥਾ ਜੀਵਸੀਤਿ ਏਵਂ ਸਮ੍ਮੋਦਨਕਥਾਯ ਅਤ੍ਤਨਾ ਸਭਾਗੇ ਕਰਿਸ੍ਸਨ੍ਤਿ.
ਆਯੁਵਣ੍ਣਾਦਿਵਡ੍ਢਨਕਥਾਵਣ੍ਣਨਾ
੧੦੫. ਆਯਤਨ੍ਤਿ ਮਹਨ੍ਤਂ. ਪਾਣਾਤਿਪਾਤਾ ਵਿਰਮੇਯ੍ਯਾਮਾਤਿ ਪਾਣਾਤਿਪਾਤਤੋ ਓਸਕ੍ਕੇਯ੍ਯਾਮ. ਪਾਣਾਤਿਪਾਤਂ ਵਿਰਮੇਯ੍ਯਾਮਾਤਿਪਿ ਸਜ੍ਝਾਯਨ੍ਤਿ, ਤਤ੍ਥ ਪਾਣਾਤਿਪਾਤਂ ਪਜਹੇਯ੍ਯਾਮਾਤਿ ਅਤ੍ਥੋ. ਵੀਸਤਿਵਸ੍ਸਾਯੁਕਾਤਿ ਮਾਤਾਪਿਤਰੋ ਪਾਣਾਤਿਪਾਤਾ ਪਟਿਵਿਰਤਾ, ਪੁਤ੍ਤਾ ਕਸ੍ਮਾ ਵੀਸਤਿਵਸ੍ਸਾਯੁਕਾ ਅਹੇਸੁਨ੍ਤਿ ਖੇਤ੍ਤਵਿਸੁਦ੍ਧਿਯਾ. ਤੇਸਞ੍ਹਿ ਮਾਤਾਪਿਤਰੋ ਸੀਲਵਨ੍ਤੋ ਜਾਤਾ. ਇਤਿ ਸੀਲਗਬ੍ਭੇ ਵਡ੍ਢਿਤਤ੍ਤਾ ਇਮਾਯ ਖੇਤ੍ਤਵਿਸੁਦ੍ਧਿਯਾ ਦੀਘਾਯੁਕਾ ਅਹੇਸੁਂ. ਯੇ ਪਨੇਤ੍ਥ ਕਾਲਂ ਕਤ੍ਵਾ ਤਤ੍ਥੇਵ ਨਿਬ੍ਬਤ੍ਤਾ, ਤੇ ਅਤ੍ਤਨੋਵ ਸੀਲਸਮ੍ਪਤ੍ਤਿਯਾ ਦੀਘਾਯੁਕਾ ਅਹੇਸੁਂ.