੮. ਸਿਙ੍ਗਾਲਸੁਤ੍ਤਵਣ੍ਣਨਾ

ਨਿਦਾਨਵਣ੍ਣਨਾ

੨੪੨. ਏਵਂ ਮੇ ਸੁਤਨ੍ਤਿ ਸਿਙ੍ਗਾਲਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਵੇਲ਼ੁਵਨੇ ਕਲਨ੍ਦਕਨਿਵਾਪੇਤਿ ਵੇਲ਼ੁਵਨਨ੍ਤਿ ਤਸ੍ਸ ਉਯ੍ਯਾਨਸ੍ਸ ਨਾਮਂ. ਤਂ ਕਿਰ ਵੇਲ਼ੂਹਿ ਪਰਿਕ੍ਖਿਤ੍ਤਂ ਅਹੋਸਿ ਅਟ੍ਠਾਰਸਹਤ੍ਥੇਨ ਚ ਪਾਕਾਰੇਨ ਗੋਪੁਰਟ੍ਟਾਲਕਯੁਤ੍ਤਂ ਨੀਲੋਭਾਸਂ ਮਨੋਰਮਂ, ਤੇਨ ਵੇਲ਼ੁਵਨਨ੍ਤਿ ਵੁਚ੍ਚਤਿ. ਕਲਨ੍ਦਕਾਨਞ੍ਚੇਤ੍ਥ ਨਿਵਾਪਂ ਅਦਂਸੁ, ਤੇਨ ਕਲਨ੍ਦਕਨਿਵਾਪੋਤਿ ਵੁਚ੍ਚਤਿ.

ਪੁਬ੍ਬੇ ਕਿਰ ਅਞ੍ਞਤਰੋ ਰਾਜਾ ਤਤ੍ਥ ਉਯ੍ਯਾਨਕੀਲ਼ਨਤ੍ਥਂ ਆਗਤੋ ਸੁਰਾਮਦੇਨ ਮਤ੍ਤੋ ਦਿਵਾ ਨਿਦ੍ਦਂ ਓਕ੍ਕਮਿ. ਪਰਿਜਨੋਪਿਸ੍ਸ ‘‘ਸੁਤ੍ਤੋ ਰਾਜਾ’’ਤਿ ਪੁਪ੍ਫਫਲਾਦੀਹਿ ਪਲੋਭਿਯਮਾਨੋ ਇਤੋ ਚਿਤੋ ਚ ਪਕ੍ਕਾਮਿ. ਅਥ ਸੁਰਾਗਨ੍ਧੇਨ ਅਞ੍ਞਤਰਸ੍ਮਾ ਸੁਸਿਰਰੁਕ੍ਖਾ ਕਣ੍ਹਸਪ੍ਪੋ ਨਿਕ੍ਖਮਿਤ੍ਵਾ ਰਞ੍ਞੋ ਅਭਿਮੁਖੋ ਆਗਚ੍ਛਤਿ, ਤਂ ਦਿਸ੍ਵਾ ਰੁਕ੍ਖਦੇਵਤਾ ‘‘ਰਞ੍ਞੋ ਜੀਵਿਤਂ ਦਮ੍ਮੀ’’ਤਿ ਕਾਲ਼ਕਵੇਸੇਨ ਆਗਨ੍ਤ੍ਵਾ ਕਣ੍ਣਮੂਲੇ ਸਦ੍ਦਮਕਾਸਿ. ਰਾਜਾ ਪਟਿਬੁਜ੍ਝਿ. ਕਣ੍ਹਸਪ੍ਪੋ ਨਿਵਤ੍ਤੋ. ਸੋ ਤਂ ਦਿਸ੍ਵਾ ‘‘ਇਮਾਯ ਕਾਲ਼ਕਾਯ ਮਮ ਜੀਵਿਤਂ ਦਿਨ੍ਨ’’ਨ੍ਤਿ ਕਾਲ਼ਕਾਨਂ ਤਤ੍ਥ ਨਿਵਾਪਂ ਪਟ੍ਠਪੇਸਿ, ਅਭਯਘੋਸਞ੍ਚ ਘੋਸਾਪੇਸਿ. ਤਸ੍ਮਾ ਤਂ ਤਤੋ ਪਭੁਤਿ ‘‘ਕਲਨ੍ਦਕਨਿਵਾਪੋ’’ਤਿ ਸਙ੍ਖ੍ਯਂ ਗਤਂ. ਕਲਨ੍ਦਕਾਤਿ ਹਿ ਕਾਲ਼ਕਾਨਂ ਏਤਂ ਨਾਮਂ.

ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਭਗਵਾ ਰਾਜਗਹਂ ਗੋਚਰਗਾਮਂ ਕਤ੍ਵਾ ਵੇਲ਼ੁਵਨੇ ਕਲਨ੍ਦਕਨਿਵਾਪੇ ਵਿਹਰਤਿ, ਤੇਨ ਸਮਯੇਨ. ਸਿਙ੍ਗਾਲਕੋ ਗਹਪਤਿਪੁਤ੍ਤੋਤਿ ਸਿਙ੍ਗਾਲਕੋਤਿ ਤਸ੍ਸ ਨਾਮਂ. ਗਹਪਤਿਪੁਤ੍ਤੋਤਿ ਗਹਪਤਿਸ੍ਸ ਪੁਤ੍ਤੋ ਗਹਪਤਿਪੁਤ੍ਤੋ. ਤਸ੍ਸ ਕਿਰ ਪਿਤਾ ਗਹਪਤਿਮਹਾਸਾਲੋ, ਨਿਦਹਿਤ੍ਵਾ ਠਪਿਤਾ ਚਸ੍ਸ ਗੇਹੇ ਚਤ੍ਤਾਲੀਸ ਧਨਕੋਟਿਯੋ ਅਤ੍ਥਿ. ਸੋ ਭਗਵਤਿ ਨਿਟ੍ਠਙ੍ਗਤੋ ਉਪਾਸਕੋ ਸੋਤਾਪਨ੍ਨੋ, ਭਰਿਯਾਪਿਸ੍ਸ ਸੋਤਾਪਨ੍ਨਾਯੇਵ. ਪੁਤ੍ਤੋ ਪਨਸ੍ਸ ਅਸ੍ਸਦ੍ਧੋ ਅਪ੍ਪਸਨ੍ਨੋ. ਅਥ ਨਂ ਮਾਤਾਪਿਤਰੋ ਅਭਿਕ੍ਖਣਂ ਏਵਂ ਓਵਦਨ੍ਤਿ – ‘‘ਤਾਤ ਸਤ੍ਥਾਰਂ ਉਪਸਙ੍ਕਮ, ਧਮ੍ਮਸੇਨਾਪਤਿਂ ਮਹਾਮੋਗ੍ਗਲ੍ਲਾਨਂ ਮਹਾਕਸ੍ਸਪਂ ਅਸੀਤਿਮਹਾਸਾਵਕੇ ਉਪਸਙ੍ਕਮਾ’’ਤਿ. ਸੋ ਏਵਮਾਹ – ‘‘ਨਤ੍ਥਿ ਮਮ ਤੁਮ੍ਹਾਕਂ ਸਮਣਾਨਂ ਉਪਸਙ੍ਕਮਨਕਿਚ੍ਚਂ, ਸਮਣਾਨਂ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤਬ੍ਬਂ ਹੋਤਿ, ਓਨਮਿਤ੍ਵਾ ਵਨ੍ਦਨ੍ਤਸ੍ਸ ਪਿਟ੍ਠਿ ਰੁਜ੍ਜਤਿ, ਜਾਣੁਕਾਨਿ ਖਰਾਨਿ ਹੋਨ੍ਤਿ, ਭੂਮਿਯਂ ਨਿਸੀਦਿਤਬ੍ਬਂ ਹੋਤਿ, ਤਤ੍ਥ ਨਿਸਿਨ੍ਨਸ੍ਸ ਵਤ੍ਥਾਨਿ ਕਿਲਿਸ੍ਸਨ੍ਤਿ ਜੀਰਨ੍ਤਿ, ਸਮੀਪੇ ਨਿਸਿਨ੍ਨਕਾਲਤੋ ਪਟ੍ਠਾਯ ਕਥਾਸਲ੍ਲਾਪੋ ਹੋਤਿ, ਤਸ੍ਮਿਂ ਸਤਿ ਵਿਸ੍ਸਾਸੋ ਉਪ੍ਪਜ੍ਜਤਿ, ਤਤੋ ਨਿਮਨ੍ਤੇਤ੍ਵਾ ਚੀਵਰਪਿਣ੍ਡਪਾਤਾਦੀਨਿ ਦਾਤਬ੍ਬਾਨਿ ਹੋਨ੍ਤਿ. ਏਵਂ ਸਨ੍ਤੇ ਅਤ੍ਥੋ ਪਰਿਹਾਯਤਿ, ਨਤ੍ਥਿ ਮਯ੍ਹਂ ਤੁਮ੍ਹਾਕਂ ਸਮਣਾਨਂ ਉਪਸਙ੍ਕਮਨਕਿਚ੍ਚ’’ਨ੍ਤਿ. ਇਤਿ ਨਂ ਯਾਵਜੀਵਂ ਓਵਦਨ੍ਤਾਪਿ ਮਾਤਾਪਿਤਰੋ ਸਾਸਨੇ ਉਪਨੇਤੁਂ ਨਾਸਕ੍ਖਿਂਸੁ.

ਅਥਸ੍ਸ ਪਿਤਾ ਮਰਣਮਞ੍ਚੇ ਨਿਪਨ੍ਨੋ ‘‘ਮਮ ਪੁਤ੍ਤਸ੍ਸ ਓਵਾਦਂ ਦਾਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਪੁਨ ਚਿਨ੍ਤੇਸਿ – ‘‘ਦਿਸਾ ਤਾਤ ਨਮਸ੍ਸਾਹੀ’’ਤਿ ਏਵਮਸ੍ਸ ਓਵਾਦਂ ਦਸ੍ਸਾਮਿ, ਸੋ ਅਤ੍ਥਂ ਅਜਾਨਨ੍ਤੋ ਦਿਸਾ ਨਮਸ੍ਸਿਸ੍ਸਤਿ, ਅਥ ਨਂ ਸਤ੍ਥਾ ਵਾ ਸਾਵਕਾ ਵਾ ਪਸ੍ਸਿਤ੍ਵਾ ‘‘ਕਿਂ ਕਰੋਸੀ’’ਤਿ ਪੁਚ੍ਛਿਸ੍ਸਨ੍ਤਿ. ਤਤੋ ‘‘ਮਯ੍ਹਂ ਪਿਤਾ ਦਿਸਾ ਨਮਸ੍ਸਨਂ ਕਰੋਹੀਤਿ ਮਂ ਓਵਦੀ’’ਤਿ ਵਕ੍ਖਤਿ. ਅਥਸ੍ਸ ਤੇ ‘‘ਨ ਤੁਯ੍ਹਂ ਪਿਤਾ ਏਤਾ ਦਿਸਾ ਨਮਸ੍ਸਾਪੇਤਿ, ਇਮਾ ਪਨ ਦਿਸਾ ਨਮਸ੍ਸਾਪੇਤੀ’’ਤਿ ਧਮ੍ਮਂ ਦੇਸੇਸ੍ਸਨ੍ਤਿ. ਸੋ ਬੁਦ੍ਧਸਾਸਨੇ ਗੁਣਂ ਞਤ੍ਵਾ ‘‘ਪੁਞ੍ਞਕਮ੍ਮਂ ਕਰਿਸ੍ਸਤੀ’’ਤਿ. ਅਥ ਨਂ ਆਮਨ੍ਤਾਪੇਤ੍ਵਾ ‘‘ਤਾਤ, ਪਾਤੋਵ ਉਟ੍ਠਾਯ ਛ ਦਿਸਾ ਨਮਸ੍ਸੇਯ੍ਯਾਸੀ’’ਤਿ ਆਹ. ਮਰਣਮਞ੍ਚੇ ਨਿਪਨ੍ਨਸ੍ਸ ਕਥਾ ਨਾਮ ਯਾਵਜੀਵਂ ਅਨੁਸ੍ਸਰਣੀਯਾ ਹੋਤਿ. ਤਸ੍ਮਾ ਸੋ ਗਹਪਤਿਪੁਤ੍ਤੋ ਤਂ ਪਿਤੁਵਚਨਂ ਅਨੁਸ੍ਸਰਨ੍ਤੋ ਤਥਾ ਅਕਾਸਿ. ਤਸ੍ਮਾ ‘‘ਕਾਲਸ੍ਸੇਵ ਉਟ੍ਠਾਯ ਰਾਜਗਹਾ ਨਿਕ੍ਖਮਿਤ੍ਵਾ’’ਤਿਆਦਿ ਵੁਤ੍ਤਂ.

੨੪੩. ਪੁਥੁਦਿਸਾਤਿ ਬਹੁਦਿਸਾ. ਇਦਾਨਿ ਤਾ ਦਸ੍ਸੇਨ੍ਤੋ ਪੁਰਤ੍ਥਿਮਂ ਦਿਸਨ੍ਤਿਆਦਿਮਾਹ. ਪਾਵਿਸੀਤਿ ਨ ਤਾਵ ਪਵਿਟ੍ਠੋ, ਪਵਿਸਿਸ੍ਸਾਮੀਤਿ ਨਿਕ੍ਖਨ੍ਤਤ੍ਤਾ ਪਨ ਅਨ੍ਤਰਾਮਗ੍ਗੇ ਵਤ੍ਤਮਾਨੋਪਿ ਏਵਂ ਵੁਚ੍ਚਤਿ. ਅਦ੍ਦਸਾ ਖੋ ਭਗਵਾਤਿ ਨ ਇਦਾਨੇਵ ਅਦ੍ਦਸ, ਪਚ੍ਚੂਸਸਮਯੇਪਿ ਬੁਦ੍ਧਚਕ੍ਖੁਨਾ ਲੋਕਂ ਵੋਲੋਕੇਨ੍ਤੋ ਏਤਂ ਦਿਸਾ ਨਮਸ੍ਸਮਾਨਂ ਦਿਸ੍ਵਾ ‘‘ਅਜ੍ਜ ਅਹਂ ਸਿਙ੍ਗਾਲਸ੍ਸ ਗਹਪਤਿਪੁਤ੍ਤਸ੍ਸ ਗਿਹਿਵਿਨਯਂ ਸਿਙ੍ਗਾਲਸੁਤ੍ਤਨ੍ਤਂ ਕਥੇਸ੍ਸਾਮਿ, ਮਹਾਜਨਸ੍ਸ ਸਾ ਕਥਾ ਸਫਲਾ ਭਵਿਸ੍ਸਤਿ, ਗਨ੍ਤਬ੍ਬਂ ਮਯਾ ਏਤ੍ਥਾ’’ਤਿ. ਤਸ੍ਮਾ ਪਾਤੋਵ ਨਿਕ੍ਖਮਿਤ੍ਵਾ ਰਾਜਗਹਂ ਪਿਣ੍ਡਾਯ ਪਾਵਿਸਿ, ਪਵਿਸਨ੍ਤੋ ਚ ਨਂ ਤਥੇਵ ਅਦ੍ਦਸ. ਤੇਨ ਵੁਤ੍ਤਂ – ‘‘ਅਦ੍ਦਸਾ ਖੋ ਭਗਵਾ’’ਤਿ. ਏਤਦਵੋਚਾਤਿ ਸੋ ਕਿਰ ਅਵਿਦੂਰੇ ਠਿਤਮ੍ਪਿ ਸਤ੍ਥਾਰਂ ਨ ਪਸ੍ਸਤਿ, ਦਿਸਾਯੇਵ ਨਮਸ੍ਸਤਿ. ਅਥਂ ਨਂ ਭਗਵਾ ਸੂਰਿਯਰਸ੍ਮਿਸਮ੍ਫਸ੍ਸੇਨ ਵਿਕਸਮਾਨਂ ਮਹਾਪਦੁਮਂ ਵਿਯ ਮੁਖਂ ਵਿਵਰਿਤ੍ਵਾ ‘‘ਕਿਂ ਨੁ ਖੋ ਤ੍ਵਂ, ਗਹਪਤਿਪੁਤ੍ਤਾ’’ਤਿਆਦਿਕਂ ਏਤਦਵੋਚ.

ਛਦਿਸਾਦਿਵਣ੍ਣਨਾ

੨੪੪. ਯਥਾ ਕਥਂ ਪਨ, ਭਨ੍ਤੇਤਿ ਸੋ ਕਿਰ ਤਂ ਭਗਵਤੋ ਵਚਨਂ ਸੁਤ੍ਵਾਵ ਚਿਨ੍ਤੇਸਿ ‘‘ਯਾ ਕਿਰ ਮਮ ਪਿਤਰਾ ਛ ਦਿਸਾ ਨਮਸ੍ਸਿਤਬ੍ਬਾ’’ਤਿ ਵੁਤ੍ਤਾ, ਨ ਕਿਰ ਤਾ ਏਤਾ, ਅਞ੍ਞਾ ਕਿਰ ਅਰਿਯਸਾਵਕੇਨ ਛ ਦਿਸਾ ਨਮਸ੍ਸਿਤਬ੍ਬਾ. ਹਨ੍ਦਾਹਂ ਅਰਿਯਸਾਵਕੇਨ ਨਮਸ੍ਸਿਤਬ੍ਬਾ ਦਿਸਾਯੇਵ ਪੁਚ੍ਛਿਤ੍ਵਾ ਨਮਸ੍ਸਾਮੀਤਿ. ਸੋ ਤਾ ਪੁਚ੍ਛਨ੍ਤੋ ਯਥਾ ਕਥਂ ਪਨ, ਭਨ੍ਤੇਤਿਆਦਿਮਾਹ. ਤਤ੍ਥ ਯਥਾਤਿ ਨਿਪਾਤਮਤ੍ਤਂ. ਕਥਂ ਪਨਾਤਿ ਇਦਮੇਵ ਪੁਚ੍ਛਾਪਦਂ. ਕਮ੍ਮਕਿਲੇਸਾਤਿ ਤੇਹਿ ਕਮ੍ਮੇਹਿ ਸਤ੍ਤਾ ਕਿਲਿਸ੍ਸਨ੍ਤਿ, ਤਸ੍ਮਾ ਕਮ੍ਮਕਿਲੇਸਾਤਿ ਵੁਚ੍ਚਨ੍ਤਿ. ਠਾਨੇਹੀਤਿ ਕਾਰਣੇਹਿ. ਅਪਾਯਮੁਖਾਨੀਤਿ ਵਿਨਾਸਮੁਖਾਨਿ. ਸੋਤਿ ਸੋ ਸੋਤਾਪਨ੍ਨੋ ਅਰਿਯਸਾਵਕੋ. ਚੁਦ੍ਦਸ ਪਾਪਕਾਪਗਤੋਤਿ ਏਤੇਹਿ ਚੁਦ੍ਦਸਹਿ ਪਾਪਕੇਹਿ ਲਾਮਕੇਹਿ ਅਪਗਤੋ. ਛਦ੍ਦਿਸਾਪਟਿਚ੍ਛਾਦੀਤਿ ਛ ਦਿਸਾ ਪਟਿਚ੍ਛਾਦੇਨ੍ਤੋ. ਉਭੋਲੋਕਵਿਜਯਾਯਾਤਿ ਉਭਿਨ੍ਨਂ ਇਧਲੋਕਪਰਲੋਕਾਨਂ ਵਿਜਿਨਨਤ੍ਥਾਯ. ਅਯਞ੍ਚੇਵ ਲੋਕੋ ਆਰਦ੍ਧੋ ਹੋਤੀਤਿ ਏਵਰੂਪਸ੍ਸ ਹਿ ਇਧ ਲੋਕੇ ਪਞ੍ਚ ਵੇਰਾਨਿ ਨ ਹੋਨ੍ਤਿ, ਤੇਨਸ੍ਸ ਅਯਞ੍ਚੇਵ ਲੋਕੋ ਆਰਦ੍ਧੋ ਹੋਤਿ ਪਰਿਤੋਸਿਤੋ ਚੇਵ ਨਿਪ੍ਫਾਦਿਤੋ ਚ. ਪਰਲੋਕੇਪਿ ਪਞ੍ਚ ਵੇਰਾਨਿ ਨ ਹੋਨ੍ਤਿ, ਤੇਨਸ੍ਸ ਪਰੋ ਚ ਲੋਕੋ ਆਰਾਧਿਤੋ ਹੋਤਿ. ਤਸ੍ਮਾ ਸੋ ਕਾਯਸ੍ਸ ਭੇਦਾ ਪਰਮ੍ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ.

੨੪੫. ਇਤਿ ਭਗਵਾ ਸਙ੍ਖੇਪੇਨ ਮਾਤਿਕਂ ਠਪੇਤ੍ਵਾ ਇਦਾਨਿ ਤਮੇਵ ਵਿਤ੍ਥਾਰੇਨ੍ਤੋ ਕਤਮਸ੍ਸ ਚਤ੍ਤਾਰੋ ਕਮ੍ਮਕਿਲੇਸਾਤਿਆਦਿਮਾਹ. ਕਮ੍ਮਕਿਲੇਸੋਤਿ ਕਮ੍ਮਞ੍ਚ ਤਂ ਕਿਲੇਸਸਮ੍ਪਯੁਤ੍ਤਤ੍ਤਾ ਕਿਲੇਸੋ ਚਾਤਿ ਕਮ੍ਮਕਿਲੇਸੋ. ਸਕਿਲੇਸੋਯੇਵ ਹਿ ਪਾਣਂ ਹਨਤਿ, ਨਿਕ੍ਕਿਲੇਸੋ ਨ ਹਨਤਿ, ਤਸ੍ਮਾ ਪਾਣਾਤਿਪਾਤੋ ‘‘ਕਮ੍ਮਕਿਲੇਸੋ’’ਤਿ ਵੁਤ੍ਤੋ. ਅਦਿਨ੍ਨਾਦਾਨਾਦੀਸੁਪਿ ਏਸੇਵ ਨਯੋ. ਅਥਾਪਰਨ੍ਤਿ ਅਪਰਮ੍ਪਿ ਏਤਦਤ੍ਥਪਰਿਦੀਪਕਮੇਵ ਗਾਥਾਬਨ੍ਧਂ ਅਵੋਚਾਤਿ ਅਤ੍ਥੋ.

ਚਤੁਠਾਨਾਦਿਵਣ੍ਣਨਾ

੨੪੬. ਪਾਪਕਮ੍ਮਂ ਕਰੋਤੀਤਿ ਇਦਂ ਭਗਵਾ ਯਸ੍ਮਾ ਕਾਰਕੇ ਦਸ੍ਸਿਤੇ ਅਕਾਰਕੋ ਪਾਕਟੋ ਹੋਤਿ, ਤਸ੍ਮਾ ‘‘ਪਾਪਕਮ੍ਮਂ ਨ ਕਰੋਤੀ’’ਤਿ ਮਾਤਿਕਂ ਠਪੇਤ੍ਵਾਪਿ ਦੇਸਨਾਕੁਸਲਤਾਯ ਪਠਮਤਰਂ ਕਾਰਕਂ ਦਸ੍ਸੇਨ੍ਤੋ ਆਹ. ਤਤ੍ਥ ਛਨ੍ਦਾਗਤਿਂ ਗਚ੍ਛਨ੍ਤੋਤਿ ਛਨ੍ਦੇਨ ਪੇਮੇਨ ਅਗਤਿਂ ਗਚ੍ਛਨ੍ਤੋ ਅਕਤ੍ਤਬ੍ਬਂ ਕਰੋਨ੍ਤੋ. ਪਰਪਦੇਸੁਪਿ ਏਸੇਵ ਨਯੋ. ਤਤ੍ਥ ਯੋ ‘‘ਅਯਂ ਮੇ ਮਿਤ੍ਤੋ ਵਾ ਸਮ੍ਭਤ੍ਤੋ ਵਾ ਸਨ੍ਦਿਟ੍ਠੋ ਵਾ ਞਾਤਕੋ ਵਾ ਲਞ੍ਜਂ ਵਾ ਪਨ ਮੇ ਦੇਤੀ’’ਤਿ ਛਨ੍ਦਵਸੇਨ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਛਨ੍ਦਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ‘‘ਅਯਂ ਮੇ ਵੇਰੀ’’ਤਿ ਪਕਤਿਵੇਰਵਸੇਨ ਤਙ੍ਖਣੁਪ੍ਪਨ੍ਨਕੋਧਵਸੇਨ ਵਾ ਸਾਮਿਕਂ ਅਸ੍ਸਾਮਿਕਂ ਕਰੋਤਿ, ਅਯਂ ਦੋਸਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ਮਨ੍ਦਤ੍ਤਾ ਮੋਮੂਹਤ੍ਤਾ ਯਂ ਵਾ ਤਂ ਵਾ ਵਤ੍ਵਾ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਮੋਹਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ‘‘ਅਯਂ ਰਾਜਵਲ੍ਲਭੋ ਵਾ ਵਿਸਮਨਿਸ੍ਸਿਤੋ ਵਾ ਅਨਤ੍ਥਮ੍ਪਿ ਮੇ ਕਰੇਯ੍ਯਾ’’ਤਿ ਭੀਤੋ ਅਸ੍ਸਾਮਿਕਂ ਸਾਮਿਕਂ ਕਰੋਤਿ, ਅਯਂ ਭਯਾਗਤਿਂ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ. ਯੋ ਪਨ ਯਂਕਿਞ੍ਚਿ ਭਾਜੇਨ੍ਤੋ ‘‘ਅਯਂ ਮੇ ਸਨ੍ਦਿਟ੍ਠੋ ਵਾ ਸਮ੍ਭਤ੍ਤੋ ਵਾ’’ਤਿ ਪੇਮਵਸੇਨ ਅਤਿਰੇਕਂ ਦੇਤਿ, ‘‘ਅਯਂ ਮੇ ਵੇਰੀ’’ਤਿ ਦੋਸਵਸੇਨ ਊਨਕਂ ਦੇਤਿ, ਮੋਮੂਹਤ੍ਤਾ ਦਿਨ੍ਨਾਦਿਨ੍ਨਂ ਅਜਾਨਮਾਨੋ ਕਸ੍ਸਚਿ ਊਨਂ ਕਸ੍ਸਚਿ ਅਧਿਕਂ ਦੇਤਿ, ‘‘ਅਯਂ ਇਮਸ੍ਮਿਂ ਅਦਿਯ੍ਯਮਾਨੇ ਮਯ੍ਹਂ ਅਨਤ੍ਥਮ੍ਪਿ ਕਰੇਯ੍ਯਾ’’ਤਿ ਭੀਤੋ ਕਸ੍ਸਚਿ ਅਤਿਰੇਕਂ ਦੇਤਿ, ਸੋ ਚਤੁਬ੍ਬਿਧੋਪਿ ਯਥਾਨੁਕ੍ਕਮੇਨ ਛਨ੍ਦਾਗਤਿਆਦੀਨਿ ਗਚ੍ਛਨ੍ਤੋ ਪਾਪਕਮ੍ਮਂ ਕਰੋਤਿ ਨਾਮ.

ਅਰਿਯਸਾਵਕੋ ਪਨ ਜੀਵਿਤਕ੍ਖਯਂ ਪਾਪੁਣਨ੍ਤੋਪਿ ਛਨ੍ਦਾਗਤਿਆਦੀਨਿ ਨ ਗਚ੍ਛਤਿ. ਤੇਨ ਵੁਤ੍ਤਂ – ‘‘ਇਮੇਹਿ ਚਤੂਹਿ ਠਾਨੇਹਿ ਪਾਪਕਮ੍ਮਂ ਨ ਕਰੋਤੀ’’ਤਿ.

ਨਿਹੀਯਤਿ ਯਸੋ ਤਸ੍ਸਾਤਿ ਤਸ੍ਸ ਅਗਤਿਗਾਮਿਨੋ ਕਿਤ੍ਤਿਯਸੋਪਿ ਪਰਿਵਾਰਯਸੋਪਿ ਨਿਹੀਯਤਿ ਪਰਿਹਾਯਤਿ.

ਛਅਪਾਯਮੁਖਾਦਿਵਣ੍ਣਨਾ

੨੪੭. ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਾਨੁਯੋਗੋਤਿ ਏਤ੍ਥ ਸੁਰਾਤਿ ਪਿਟ੍ਠਸੁਰਾ ਪੂਵਸੁਰਾ ਓਦਨਸੁਰਾ ਕਿਣ੍ਣਪਕ੍ਖਿਤ੍ਤਾ ਸਮ੍ਭਾਰਸਂਯੁਤ੍ਤਾਤਿ ਪਞ੍ਚ ਸੁਰਾ. ਮੇਰਯਨ੍ਤਿ ਪੁਪ੍ਫਾਸਵੋ ਫਲਾਸਵੋ ਮਧ੍ਵਾਸਵੋ ਗੁਲ਼ਾਸਵੋ ਸਮ੍ਭਾਰਸਂਯੁਤ੍ਤੋਤਿ ਪਞ੍ਚ ਆਸਵਾ. ਤਂ ਸਬ੍ਬਮ੍ਪਿ ਮਦਕਰਣਵਸੇਨ ਮਜ੍ਜਂ. ਪਮਾਦਟ੍ਠਾਨਨ੍ਤਿ ਪਮਾਦਕਾਰਣਂ. ਯਾਯ ਚੇਤਨਾਯ ਤਂ ਮਜ੍ਜਂ ਪਿਵਤਿ, ਤਸ੍ਸ ਏਤਂ ਅਧਿਵਚਨਂ. ਅਨੁਯੋਗੋਤਿ ਤਸ੍ਸ ਸੁਰਾਮੇਰਯਮਜ੍ਜਪ੍ਪਮਾਦਟ੍ਠਾਨਸ੍ਸ ਅਨੁਅਨੁਯੋਗੋ ਪੁਨਪ੍ਪੁਨਂ ਕਰਣਂ. ਯਸ੍ਮਾ ਪਨੇਤਂ ਅਨੁਯੁਤ੍ਤਸ੍ਸ ਉਪ੍ਪਨ੍ਨਾ ਚੇਵ ਭੋਗਾ ਪਰਿਹਾਯਨ੍ਤਿ, ਅਨੁਪ੍ਪਨ੍ਨਾ ਚ ਨੁਪ੍ਪਜ੍ਜਨ੍ਤਿ, ਤਸ੍ਮਾ ‘‘ਭੋਗਾਨਂ ਅਪਾਯਮੁਖ’’ਨ੍ਤਿ ਵੁਤ੍ਤਂ. ਵਿਕਾਲਵਿਸਿਖਾਚਰਿਯਾਨੁਯੋਗੋਤਿ ਅਵੇਲਾਯ ਵਿਸਿਖਾਸੁ ਚਰਿਯਾਨੁਯੁਤ੍ਤਤਾ.

ਸਮਜ੍ਜਾਭਿਚਰਣਨ੍ਤਿ ਨਚ੍ਚਾਦਿਦਸ੍ਸਨਵਸੇਨ ਸਮਜ੍ਜਾਗਮਨਂ. ਆਲਸ੍ਯਾਨੁਯੋਗੋਤਿ ਕਾਯਾਲਸਿਯਤਾਯ ਯੁਤ੍ਤਪ੍ਪਯੁਤ੍ਤਤਾ.

ਸੁਰਾਮੇਰਯਸ੍ਸ ਛਆਦੀਨਵਾਦਿਵਣ੍ਣਨਾ

੨੪੮. ਏਵਂ ਛਨ੍ਨਂ ਅਪਾਯਮੁਖਾਨਂ ਮਾਤਿਕਂ ਠਪੇਤ੍ਵਾ ਇਦਾਨਿ ਤਾਨਿ ਵਿਭਜਨ੍ਤੋ ਛ ਖੋ ਮੇ, ਗਹਪਤਿਪੁਤ੍ਤ ਆਦੀਨਵਾਤਿਆਦਿਮਾਹ. ਤਤ੍ਥ ਸਨ੍ਦਿਟ੍ਠਿਕਾਤਿ ਸਾਮਂ ਪਸ੍ਸਿਤਬ੍ਬਾ, ਇਧਲੋਕਭਾਵਿਨੀ. ਧਨਜਾਨੀਤਿ ਧਨਹਾਨਿ. ਕਲਹਪ੍ਪਵਡ੍ਢਨੀਤਿ ਵਾਚਾਕਲਹਸ੍ਸ ਚੇਵ ਹਤ੍ਥਪਰਾਮਾਸਾਦਿਕਾਯਕਲਹਸ੍ਸ ਚ ਵਡ੍ਢਨੀ. ਰੋਗਾਨਂ ਆਯਤਨਨ੍ਤਿ ਤੇਸਂ ਤੇਸਂ ਅਕ੍ਖਿਰੋਗਾਦੀਨਂ ਖੇਤ੍ਤਂ. ਅਕਿਤ੍ਤਿਸਞ੍ਜਨਨੀਤਿ ਸੁਰਂ ਪਿਵਿਤ੍ਵਾ ਹਿ ਮਾਤਰਮ੍ਪਿ ਪਹਰਨ੍ਤਿ ਪਿਤਰਮ੍ਪਿ, ਅਞ੍ਞਂ ਬਹੁਮ੍ਪਿ ਅਵਤ੍ਤਬ੍ਬਂ ਵਦਨ੍ਤਿ, ਅਕਤ੍ਤਬ੍ਬਂ ਕਰੋਨ੍ਤਿ. ਤੇਨ ਗਰਹਮ੍ਪਿ ਦਣ੍ਡਮ੍ਪਿ ਹਤ੍ਥਪਾਦਾਦਿਛੇਦਮ੍ਪਿ ਪਾਪੁਣਨ੍ਤਿ, ਇਧਲੋਕੇਪਿ ਪਰਲੋਕੇਪਿ ਅਕਿਤ੍ਤਿਂ ਪਾਪੁਣਨ੍ਤਿ, ਇਤਿ ਤੇਸਂ ਸਾ ਸੁਰਾ ਅਕਿਤ੍ਤਿਸਞ੍ਜਨਨੀ ਨਾਮ ਹੋਤਿ. ਕੋਪੀਨਨਿਦਂਸਨੀਤਿ ਗੁਯ੍ਹਟ੍ਠਾਨਞ੍ਹਿ ਵਿਵਰਿਯਮਾਨਂ ਹਿਰਿਂ ਕੋਪੇਤਿ ਵਿਨਾਸੇਤਿ, ਤਸ੍ਮਾ ‘‘ਕੋਪੀਨ’’ਨ੍ਤਿ ਵੁਚ੍ਚਤਿ, ਸੁਰਾਮਦਮਤ੍ਤਾ ਚ ਤਂ ਤਂ ਅਙ੍ਗਂ ਵਿਵਰਿਤ੍ਵਾ ਵਿਚਰਨ੍ਤਿ, ਤੇਨ ਨੇਸਂ ਸਾ ਸੁਰਾ ਕੋਪੀਨਸ੍ਸ ਨਿਦਂਸਨਤੋ ‘‘ਕੋਪੀਨਨਿਦਂਸਨੀ’’ਤਿ ਵੁਚ੍ਚਤਿ. ਪਞ੍ਞਾਯ ਦੁਬ੍ਬਲਿਕਰਣੀਤਿ ਸਾਗਤਤ੍ਥੇਰਸ੍ਸ ਵਿਯ ਕਮ੍ਮਸ੍ਸਕਤਪਞ੍ਞਂ ਦੁਬ੍ਬਲਂ ਕਰੋਤਿ, ਤਸ੍ਮਾ ‘‘ਪਞ੍ਞਾਯ ਦੁਬ੍ਬਲਿਕਰਣੀ’’ਤਿ ਵੁਚ੍ਚਤਿ. ਮਗ੍ਗਪਞ੍ਞਂ ਪਨ ਦੁਬ੍ਬਲਂ ਕਾਤੁਂ ਨ ਸਕ੍ਕੋਤਿ. ਅਧਿਗਤਮਗ੍ਗਾਨਞ੍ਹਿ ਸਾ ਅਨ੍ਤੋਮੁਖਮੇਵ ਨ ਪਵਿਸਤਿ. ਛਟ੍ਠਂ ਪਦਨ੍ਤਿ ਛਟ੍ਠਂ ਕਾਰਣਂ.

੨੪੯. ਅਤ੍ਤਾਪਿਸ੍ਸ ਅਗੁਤ੍ਤੋ ਅਰਕ੍ਖਿਤੋ ਹੋਤੀਤਿ ਅਵੇਲਾਯ ਚਰਨ੍ਤੋ ਹਿ ਖਾਣੁਕਣ੍ਟਕਾਦੀਨਿਪਿ ਅਕ੍ਕਮਤਿ, ਅਹਿਨਾਪਿ ਯਕ੍ਖਾਦੀਹਿਪਿ ਸਮਾਗਚ੍ਛਤਿ, ਤਂ ਤਂ ਠਾਨਂ ਗਚ੍ਛਤੀਤਿ ਞਤ੍ਵਾ ਵੇਰਿਨੋਪਿ ਨਂ ਨਿਲੀਯਿਤ੍ਵਾ ਗਣ੍ਹਨ੍ਤਿ ਵਾ ਹਨਨ੍ਤਿ ਵਾ. ਏਵਂ ਅਤ੍ਤਾਪਿਸ੍ਸ ਅਗੁਤ੍ਤੋ ਹੋਤਿ ਅਰਕ੍ਖਿਤੋ. ਪੁਤ੍ਤਦਾਰਾਪਿ ‘‘ਅਮ੍ਹਾਕਂ ਪਿਤਾ ਅਮ੍ਹਾਕਂ ਸਾਮਿ ਰਤ੍ਤਿਂ ਵਿਚਰਤਿ, ਕਿਮਙ੍ਗਂ ਪਨ ਮਯ’’ਨ੍ਤਿ ਇਤਿਸ੍ਸ ਪੁਤ੍ਤਧੀਤਰੋਪਿ ਭਰਿਯਾਪਿ ਬਹਿ ਪਤ੍ਥਨਂ ਕਤ੍ਵਾ ਰਤ੍ਤਿਂ ਚਰਨ੍ਤਾ ਅਨਯਬ੍ਯਸਨਂ ਪਾਪੁਣਨ੍ਤਿ. ਏਵਂ ਪੁਤ੍ਤਦਾਰੋਪਿਸ੍ਸ ਅਗੁਤ੍ਤੋ ਅਰਕ੍ਖਿਤੋ ਹੋਤਿ. ਸਾਪਤੇਯ੍ਯਨ੍ਤਿ ਤਸ੍ਸ ਪੁਤ੍ਤਦਾਰਪਰਿਜਨਸ੍ਸ ਰਤ੍ਤਿਂ ਚਰਣਕਭਾਵਂ ਞਤ੍ਵਾ ਚੋਰਾ ਸੁਞ੍ਞਂ ਗੇਹਂ ਪਵਿਸਿਤ੍ਵਾ ਯਂ ਇਚ੍ਛਨ੍ਤਿ, ਤਂ ਹਰਨ੍ਤਿ. ਏਵਂ ਸਾਪਤੇਯ੍ਯਮ੍ਪਿਸ੍ਸ ਅਗੁਤ੍ਤਂ ਅਰਕ੍ਖਿਤਂ ਹੋਤਿ. ਸਙ੍ਕਿਯੋ ਚ ਹੋਤੀਤਿ ਅਞ੍ਞੇਹਿ ਕਤਪਾਪਕਮ੍ਮੇਸੁਪਿ ‘‘ਇਮਿਨਾ ਕਤਂ ਭਵਿਸ੍ਸਤੀ’’ਤਿ ਸਙ੍ਕਿਤਬ੍ਬੋ ਹੋਤਿ. ਯਸ੍ਸ ਯਸ੍ਸ ਘਰਦ੍ਵਾਰੇਨ ਯਾਤਿ, ਤਤ੍ਥ ਯਂ ਅਞ੍ਞੇਨ ਚੋਰਕਮ੍ਮਂ ਪਰਦਾਰਿਕਕਮ੍ਮਂ ਵਾ ਕਤਂ, ਤਂ ‘‘ਇਮਿਨਾ ਕਤ’’ਨ੍ਤਿ ਵੁਤ੍ਤੇ ਅਭੂਤਂ ਅਸਨ੍ਤਮ੍ਪਿ ਤਸ੍ਮਿਂ ਰੂਹਤਿ ਪਤਿਟ੍ਠਾਤਿ. ਬਹੂਨਞ੍ਚ ਦੁਕ੍ਖਧਮ੍ਮਾਨਨ੍ਤਿ ਏਤ੍ਤਕਂ ਦੁਕ੍ਖਂ, ਏਤ੍ਤਕਂ ਦੋਮਨਸ੍ਸਨ੍ਤਿ ਵਤ੍ਤੁਂ ਨ ਸਕ੍ਕਾ, ਅਞ੍ਞਸ੍ਮਿਂ ਪੁਗ੍ਗਲੇ ਅਸਤਿ ਸਬ੍ਬਂ ਵਿਕਾਲਚਾਰਿਮ੍ਹਿ ਆਹਰਿਤਬ੍ਬਂ ਹੋਤਿ, ਇਤਿ ਸੋ ਬਹੂਨਂ ਦੁਕ੍ਖਧਮ੍ਮਾਨਂ ਪੁਰਕ੍ਖਤੋ ਪੁਰੇਗਾਮੀ ਹੋਤਿ.

੨੫੦. ਕ੍ਵ ਨਚ੍ਚਨ੍ਤਿ ‘‘ਕਸ੍ਮਿਂ ਠਾਨੇ ਨਟਨਾਟਕਾਦਿਨਚ੍ਚਂ ਅਤ੍ਥੀ’’ਤਿ ਪੁਚ੍ਛਿਤ੍ਵਾ ਯਸ੍ਮਿਂ ਗਾਮੇ ਵਾ ਨਿਗਮੇ ਵਾ ਤਂ ਅਤ੍ਥਿ, ਤਤ੍ਥ ਗਨ੍ਤਬ੍ਬਂ ਹੋਤਿ, ਤਸ੍ਸ ‘‘ਸ੍ਵੇ ਨਚ੍ਚਦਸ੍ਸਨਂ ਗਮਿਸ੍ਸਾਮੀ’’ਤਿ ਅਜ੍ਜ ਵਤ੍ਥਗਨ੍ਧਮਾਲਾਦੀਨਿ ਪਟਿਯਾਦੇਨ੍ਤਸ੍ਸੇਵ ਸਕਲਦਿਵਸਮ੍ਪਿ ਕਮ੍ਮਚ੍ਛੇਦੋ ਹੋਤਿ, ਨਚ੍ਚਦਸ੍ਸਨੇਨ ਏਕਾਹਮ੍ਪਿ ਦ੍ਵੀਹਮ੍ਪਿ ਤੀਹਮ੍ਪਿ ਤਤ੍ਥੇਵ ਹੋਤਿ, ਅਥ ਵੁਟ੍ਠਿਸਮ੍ਪਤ੍ਤਿਯਾਦੀਨਿ ਲਭਿਤ੍ਵਾਪਿ ਵਪ੍ਪਾਦਿਕਾਲੇ ਵਪ੍ਪਾਦੀਨਿ ਅਕਰੋਨ੍ਤਸ੍ਸ ਅਨੁਪ੍ਪਨ੍ਨਾ ਭੋਗਾ ਨੁਪ੍ਪਜ੍ਜਨ੍ਤਿ, ਤਸ੍ਸ ਬਹਿ ਗਤਭਾਵਂ ਞਤ੍ਵਾ ਅਨਾਰਕ੍ਖੇ ਗੇਹੇ ਚੋਰਾ ਯਂ ਇਚ੍ਛਨ੍ਤਿ, ਤਂ ਕਰੋਨ੍ਤਿ, ਤੇਨਸ੍ਸ ਉਪ੍ਪਨ੍ਨਾਪਿ ਭੋਗਾ ਵਿਨਸ੍ਸਨ੍ਤਿ. ਕ੍ਵ ਗੀਤਨ੍ਤਿਆਦੀਸੁਪਿ ਏਸੇਵ ਨਯੋ. ਤੇਸਂ ਨਾਨਾਕਰਣਂ ਬ੍ਰਹ੍ਮਜਾਲੇ ਵੁਤ੍ਤਮੇਵ.

੨੫੧. ਜਯਂ ਵੇਰਨ੍ਤਿ ‘‘ਜਿਤਂ ਮਯਾ’’ਤਿ ਪਰਿਸਮਜ੍ਝੇ ਪਰਸ੍ਸ ਸਾਟਕਂ ਵਾ ਵੇਠਨਂ ਵਾ ਗਣ੍ਹਾਤਿ, ਸੋ ‘‘ਪਰਿਸਮਜ੍ਝੇ ਮੇ ਅਵਮਾਨਂ ਕਰੋਸਿ, ਹੋਤੁ, ਸਿਕ੍ਖਾਪੇਸ੍ਸਾਮਿ ਨ’’ਨ੍ਤਿ ਤਤ੍ਥ ਵੇਰਂ ਬਨ੍ਧਤਿ, ਏਵਂ ਜਿਨਨ੍ਤੋ ਸਯਂ ਵੇਰਂ ਪਸਵਤਿ. ਜਿਨੋਤਿ ਅਞ੍ਞੇਨ ਜਿਤੋ ਸਮਾਨੋ ਯਂ ਤੇਨ ਤਸ੍ਸ ਵੇਠਨਂ ਵਾ ਸਾਟਕੋ ਵਾ ਅਞ੍ਞਂ ਵਾ ਪਨ ਹਿਰਞ੍ਞਸੁਵਣ੍ਣਾਦਿਵਿਤ੍ਤਂ ਗਹਿਤਂ, ਤਂ ਅਨੁਸੋਚਤਿ ‘‘ਅਹੋਸਿ ਵਤ ਮੇ, ਤਂ ਤਂ ਵਤ ਮੇ ਨਤ੍ਥੀ’’ਤਿ ਤਪ੍ਪਚ੍ਚਯਾ ਸੋਚਤਿ. ਏਵਂ ਸੋ ਜਿਨੋ ਵਿਤ੍ਤਂ ਅਨੁਸੋਚਤਿ. ਸਭਾਗਤਸ੍ਸ ਵਚਨਂ ਨ ਰੂਹਤੀਤਿ ਵਿਨਿਚ੍ਛਯਟ੍ਠਾਨੇ ਸਕ੍ਖਿਪੁਟ੍ਠਸ੍ਸ ਸਤੋ ਵਚਨਂ ਨ ਰੂਹਤਿ, ਨ ਪਤਿਟ੍ਠਾਤਿ, ‘‘ਅਯਂ ਅਕ੍ਖਸੋਣ੍ਡੋ ਜੂਤਕਰੋ, ਮਾ ਤਸ੍ਸ ਵਚਨਂ ਗਣ੍ਹਿਤ੍ਥਾ’’ਤਿ ਵਤ੍ਤਾਰੋ ਭਵਨ੍ਤਿ. ਮਿਤ੍ਤਾਮਚ੍ਚਾਨਂ ਪਰਿਭੂਤੋ ਹੋਤੀਤਿ ਤਞ੍ਹਿ ਮਿਤਾਮਚ੍ਚਾ ਏਵਂ ਵਦਨ੍ਤਿ – ‘‘ਸਮ੍ਮ, ਤ੍ਵਮ੍ਪਿ ਨਾਮ ਕੁਲਪੁਤ੍ਤੋ ਜੂਤਕਰੋ ਛਿਨ੍ਨਭਿਨ੍ਨਕੋ ਹੁਤ੍ਵਾ ਵਿਚਰਸਿ, ਨ ਤੇ ਇਦਂ ਜਾਤਿਗੋਤ੍ਤਾਨਂ ਅਨੁਰੂਪਂ, ਇਤੋ ਪਟ੍ਠਾਯ ਮਾ ਏਵਂ ਕਰੇਯ੍ਯਾਸੀ’’ਤਿ. ਸੋ ਏਵਂ ਵੁਤ੍ਤੋਪਿ ਤੇਸਂ ਵਚਨਂ ਨ ਕਰੋਤਿ. ਤਤੋ ਤੇਨ ਸਦ੍ਧਿਂ ਏਕਤੋ ਨ ਤਿਟ੍ਠਨ੍ਤਿ ਨ ਨਿਸੀਦਨ੍ਤਿ. ਤਸ੍ਸ ਕਾਰਣਾ ਸਕ੍ਖਿਪੁਟ੍ਠਾਪਿ ਨ ਕਥੇਨ੍ਤਿ. ਏਵਂ ਮਿਤ੍ਤਾਮਚ੍ਚਾਨਂ ਪਰਿਭੂਤੋ ਹੋਤਿ.

ਆਵਾਹਵਿਵਾਹਕਾਨਨ੍ਤਿ ਆਵਾਹਕਾ ਨਾਮ ਯੇ ਤਸ੍ਸ ਘਰਤੋ ਦਾਰਿਕਂ ਗਹੇਤੁਕਾਮਾ. ਵਿਵਾਹਕਾ ਨਾਮ ਯੇ ਤਸ੍ਸ ਗੇਹੇ ਦਾਰਿਕਂ ਦਾਤੁਕਾਮਾ. ਅਪਤ੍ਥਿਤੋ ਹੋਤੀਤਿ ਅਨਿਚ੍ਛਿਤੋ ਹੋਤਿ. ਨਾਲਂ ਦਾਰਭਰਣਾਯਾਤਿ ਦਾਰਭਰਣਾਯ ਨ ਸਮਤ੍ਥੋ. ਏਤਸ੍ਸ ਗੇਹੇ ਦਾਰਿਕਾ ਦਿਨ੍ਨਾਪਿ ਏਤਸ੍ਸ ਗੇਹਤੋ ਆਗਤਾਪਿ ਅਮ੍ਹੇਹਿ ਏਵ ਪੋਸਿਤਬ੍ਬਾ ਭਵਿਸ੍ਸਤਿਯੇਵ.

ਪਾਪਮਿਤ੍ਤਤਾਯ ਛਆਦੀਨਵਾਦਿਵਣ੍ਣਨਾ

੨੫੨. ਧੁਤ੍ਤਾਤਿ ਅਕ੍ਖਧੁਤ੍ਤਾ. ਸੋਣ੍ਡਾਤਿ ਇਤ੍ਥਿਸੋਣ੍ਡਾ ਭਤ੍ਤਸੋਣ੍ਡਾ ਪੂਵਸੋਣ੍ਡਾ ਮੂਲਕਸੋਣ੍ਡਾ. ਪਿਪਾਸਾਤਿ ਪਾਨਸੋਣ੍ਡਾ. ਨੇਕਤਿਕਾਤਿ ਪਤਿਰੂਪਕੇਨ ਵਞ੍ਚਨਕਾ. ਵਞ੍ਚਨਿਕਾਤਿ ਸਮ੍ਮੁਖਾਵਞ੍ਚਨਾਹਿ ਵਞ੍ਚਨਿਕਾ. ਸਾਹਸਿਕਾਤਿ ਏਕਾਗਾਰਿਕਾਦਿਸਾਹਸਿਕਕਮ੍ਮਕਾਰਿਨੋ. ਤ੍ਯਾਸ੍ਸ ਮਿਤ੍ਤਾ ਹੋਨ੍ਤੀਤਿ ਤੇ ਅਸ੍ਸ ਮਿਤ੍ਤਾ ਹੋਨ੍ਤਿ. ਅਞ੍ਞੇਹਿ ਸਪ੍ਪੁਰਿਸੇਹਿ ਸਦ੍ਧਿਂ ਨ ਰਮਤਿ ਗਨ੍ਧਮਾਲਾਦੀਹਿ ਅਲਙ੍ਕਰਿਤ੍ਵਾ ਵਰਸਯਨਂ ਆਰੋਪਿਤਸੂਕਰੋ ਗੂਥਕੂਪਮਿਵ, ਤੇ ਪਾਪਮਿਤ੍ਤੇਯੇਵ ਉਪਸਙ੍ਕਮਤਿ. ਤਸ੍ਮਾ ਦਿਟ੍ਠੇ ਚੇਵ ਧਮ੍ਮੇ ਸਮ੍ਪਰਾਯਞ੍ਚ ਬਹੁਂ ਅਨਤ੍ਥਂ ਨਿਗਚ੍ਛਤਿ.

੨੫੩. ਅਤਿਸੀਤਨ੍ਤਿ ਕਮ੍ਮਂ ਨ ਕਰੋਤੀਤਿ ਮਨੁਸ੍ਸੇਹਿ ਕਾਲਸ੍ਸੇਵ ਵੁਟ੍ਠਾਯ ‘‘ਏਥ ਭੋ ਕਮ੍ਮਨ੍ਤਂ ਗਚ੍ਛਾਮਾ’’ਤਿ ਵੁਤ੍ਤੋ ‘‘ਅਤਿਸੀਤਂ ਤਾਵ, ਅਟ੍ਠੀਨਿ ਭਿਜ੍ਜਨ੍ਤਿ ਵਿਯ, ਗਚ੍ਛਥ ਤੁਮ੍ਹੇ ਪਚ੍ਛਾ ਜਾਨਿਸ੍ਸਾਮੀ’’ਤਿ ਅਗ੍ਗਿਂ ਤਪਨ੍ਤੋ ਨਿਸੀਦਤਿ. ਤੇ ਗਨ੍ਤ੍ਵਾ ਕਮ੍ਮਂ ਕਰੋਨ੍ਤਿ. ਇਤਰਸ੍ਸ ਕਮ੍ਮਂ ਪਰਿਹਾਯਤਿ. ਅਤਿਉਣ੍ਹਨ੍ਤਿਆਦੀਸੁਪਿ ਏਸੇਵ ਨਯੋ.

ਹੋਤਿ ਪਾਨਸਖਾ ਨਾਮਾਤਿ ਏਕਚ੍ਚੋ ਪਾਨਟ੍ਠਾਨੇ ਸੁਰਾਗੇਹੇਯੇਵ ਸਹਾਯੋ ਹੋਤਿ. ‘‘ਪਨ੍ਨਸਖਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਸਮ੍ਮਿਯਸਮ੍ਮਿਯੋਤਿ ਸਮ੍ਮ ਸਮ੍ਮਾਤਿ ਵਦਨ੍ਤੋ ਸਮ੍ਮੁਖੇਯੇਵ ਸਹਾਯੋ ਹੋਤਿ, ਪਰਮ੍ਮੁਖੇ ਵੇਰੀਸਦਿਸੋ ਓਤਾਰਮੇਵ ਗਵੇਸਤਿ. ਅਤ੍ਥੇਸੁ ਜਾਤੇਸੂਤਿ ਤਥਾਰੂਪੇਸੁ ਕਿਚ੍ਚੇਸੁ ਸਮੁਪ੍ਪਨ੍ਨੇਸੁ. ਵੇਰਪ੍ਪਸਵੋਤਿ ਵੇਰਬਹੁਲਤਾ. ਅਨਤ੍ਥਤਾਤਿ ਅਨਤ੍ਥਕਾਰਿਤਾ. ਸੁਕਦਰਿਯਤਾਤਿ ਸੁਟ੍ਠੁ ਕਦਰਿਯਤਾ ਥਦ੍ਧਮਚ੍ਛਰਿਯਭਾਵੋ. ਉਦਕਮਿਵ ਇਣਂ ਵਿਗਾਹਤੀਤਿ ਪਾਸਾਣੋ ਉਦਕਂ ਵਿਯ ਸਂਸੀਦਨ੍ਤੋ ਇਣਂ ਵਿਗਾਹਤਿ.

ਰਤ੍ਤਿਨੁਟ੍ਠਾਨਦੇਸ੍ਸਿਨਾਤਿ ਰਤ੍ਤਿਂ ਅਨੁਟ੍ਠਾਨਸੀਲੇਨ. ਅਤਿਸਾਯਮਿਦਂ ਅਹੂਤਿ ਇਦਂ ਅਤਿਸਾਯਂ ਜਾਤਨ੍ਤਿ ਯੇ ਏਵਂ ਵਤ੍ਵਾ ਕਮ੍ਮਂ ਨ ਕਰੋਨ੍ਤਿ. ਇਤਿ ਵਿਸ੍ਸਟ੍ਠਕਮ੍ਮਨ੍ਤੇਤਿ ਏਵਂ ਵਤ੍ਵਾ ਪਰਿਚ੍ਚਤ੍ਤਕਮ੍ਮਨ੍ਤੇ. ਅਤ੍ਥਾ ਅਚ੍ਚੇਨ੍ਤਿ ਮਾਣਵੇਤਿ ਏਵਰੂਪੇ ਪੁਗ੍ਗਲੇ ਅਤ੍ਥਾ ਅਤਿਕ੍ਕਮਨ੍ਤਿ, ਤੇਸੁ ਨ ਤਿਟ੍ਠਨ੍ਤਿ.

ਤਿਣਾ ਭਿਯ੍ਯੋਤਿ ਤਿਣਤੋਪਿ ਉਤ੍ਤਰਿ. ਸੋ ਸੁਖਂ ਨ ਵਿਹਾਯਤੀਤਿ ਸੋ ਪੁਰਿਸੋ ਸੁਖਂ ਨ ਜਹਾਤਿ, ਸੁਖਸਮਙ੍ਗੀਯੇਵ ਹੋਤਿ. ਇਮਿਨਾ ਕਥਾਮਗ੍ਗੇਨ ਇਮਮਤ੍ਥਂ ਦਸ੍ਸੇਤਿ ‘‘ਗਿਹਿਭੂਤੇਨ ਸਤਾ ਏਤ੍ਤਕਂ ਕਮ੍ਮਂ ਨ ਕਾਤਬ੍ਬਂ, ਕਰੋਨ੍ਤਸ੍ਸ ਵਡ੍ਢਿ ਨਾਮ ਨਤ੍ਥਿ. ਇਧਲੋਕੇ ਪਰਲੋਕੇ ਗਰਹਮੇਵ ਪਾਪੁਣਾਤੀ’’ਤਿ.

ਮਿਤ੍ਤਪਤਿਰੂਪਕਾਦਿਵਣ੍ਣਨਾ

੨੫੪. ਇਦਾਨਿ ਯੋ ਏਵਂ ਕਰੋਤੋ ਅਨਤ੍ਥੋ ਉਪ੍ਪਜ੍ਜਤਿ, ਅਞ੍ਞਾਨਿ ਵਾ ਪਨ ਯਾਨਿ ਕਾਨਿਚਿ ਭਯਾਨਿ ਯੇਕੇਚਿ ਉਪਦ੍ਦਵਾ ਯੇਕੇਚਿ ਉਪਸਗ੍ਗਾ, ਸਬ੍ਬੇ ਤੇ ਬਾਲਂ ਨਿਸ੍ਸਾਯ ਉਪ੍ਪਜ੍ਜਨ੍ਤਿ. ਤਸ੍ਮਾ ‘‘ਏਵਰੂਪਾ ਬਾਲਾ ਨ ਸੇਵਿਤਬ੍ਬਾ’’ਤਿ ਬਾਲੇ ਮਿਤ੍ਤਪਤਿਰੂਪਕੇ ਅਮਿਤ੍ਤੇ ਦਸ੍ਸੇਤੁਂ ਚਤ੍ਤਾਰੋਮੇ, ਗਹਪਤਿਪੁਤ੍ਤ ਅਮਿਤ੍ਤਾਤਿਆਦਿਮਾਹ. ਤਤ੍ਥ ਅਞ੍ਞਦਤ੍ਥੁਹਰੋਤਿ ਸਯਂ ਤੁਚ੍ਛਹਤ੍ਥੋ ਆਗਨ੍ਤ੍ਵਾ ਏਕਂਸੇਨ ਯਂਕਿਞ੍ਚਿ ਹਰਤਿਯੇਵ. ਵਚੀਪਰਮੋਤਿ ਵਚਨਪਰਮੋ ਵਚਨਮਤ੍ਤੇਨੇਵ ਦਾਯਕੋ ਕਾਰਕੋ ਵਿਯ ਹੋਤਿ. ਅਨੁਪ੍ਪਿਯਭਾਣੀਤਿ ਅਨੁਪ੍ਪਿਯਂ ਭਣਤਿ. ਅਪਾਯਸਹਾਯੋਤਿ ਭੋਗਾਨਂ ਅਪਾਯੇਸੁ ਸਹਾਯੋ ਹੋਤਿ.

੨੫੫. ਏਵਂ ਚਤ੍ਤਾਰੋ ਅਮਿਤ੍ਤੇ ਦਸ੍ਸੇਤ੍ਵਾ ਪੁਨ ਤਤ੍ਥ ਏਕੇਕਂ ਚਤੂਹਿ ਕਾਰਣੇਹਿ ਵਿਭਜਨ੍ਤੋ ਚਤੂਹਿ ਖੋ, ਗਹਪਤਿਪੁਤ੍ਤਾਤਿਆਦਿਮਾਹ. ਤਤ੍ਥ ਅਞ੍ਞਦਤ੍ਥੁਹਰੋ ਹੋਤੀਤਿ ਏਕਂਸੇਨ ਹਾਰਕੋਯੇਵ ਹੋਤਿ. ਸਹਾਯਸ੍ਸ ਗੇਹਂ ਰਿਤ੍ਤਹਤ੍ਥੋ ਆਗਨ੍ਤ੍ਵਾ ਨਿਵਤ੍ਥਸਾਟਕਾਦੀਨਂ ਵਣ੍ਣਂ ਭਾਸਤਿ, ਸੋ ‘‘ਅਤਿਵਿਯ ਤ੍ਵਂ ਸਮ੍ਮ ਇਮਸ੍ਸ ਵਣ੍ਣਂ ਭਾਸਸੀ’’ਤਿ ਅਞ੍ਞਂ ਨਿਵਾਸੇਤ੍ਵਾ ਤਂ ਦੇਤਿ. ਅਪ੍ਪੇਨ ਬਹੁਮਿਚ੍ਛਤੀਤਿ ਯਂਕਿਞ੍ਚਿ ਅਪ੍ਪਕਂ ਦਤ੍ਵਾ ਤਸ੍ਸ ਸਨ੍ਤਿਕਾ ਬਹੁਂ ਪਤ੍ਥੇਤਿ. ਭਯਸ੍ਸ ਕਿਚ੍ਚਂ ਕਰੋਤੀਤਿ ਅਤ੍ਤਨੋ ਭਯੇ ਉਪ੍ਪਨ੍ਨੇ ਤਸ੍ਸ ਦਾਸੋ ਵਿਯ ਹੁਤ੍ਵਾ ਤਂ ਤਂ ਕਿਚ੍ਚਂ ਕਰੋਤਿ, ਅਯਂ ਸਬ੍ਬਦਾ ਨ ਕਰੋਤਿ, ਭਯੇ ਉਪ੍ਪਨ੍ਨੇ ਕਰੋਤਿ, ਨ ਪੇਮੇਨਾਤਿ ਅਮਿਤ੍ਤੋ ਨਾਮ ਜਾਤੋ. ਸੇਵਤਿ ਅਤ੍ਥਕਾਰਣਾਤਿ ਮਿਤ੍ਤਸਨ੍ਥਵਵਸੇਨ ਨ ਸੇਵਤਿ, ਅਤ੍ਤਨੋ ਅਤ੍ਥਮੇਵ ਪਚ੍ਚਾਸੀਸਨ੍ਤੋ ਸੇਵਤਿ.

੨੫੬. ਅਤੀਤੇਨ ਪਟਿਸਨ੍ਥਰਤੀਤਿ ਸਹਾਯੇ ਆਗਤੇ ‘‘ਹਿਯ੍ਯੋ ਵਾ ਪਰੇ ਵਾ ਨ ਆਗਤੋਸਿ, ਅਮ੍ਹਾਕਂ ਇਮਸ੍ਮਿਂ ਵਾਰੇ ਸਸ੍ਸਂ ਅਤਿਵਿਯ ਨਿਪ੍ਫਨ੍ਨਂ, ਬਹੂਨਿ ਸਾਲਿਯਵਬੀਜਾਦੀਨਿ ਠਪੇਤ੍ਵਾ ਮਗ੍ਗਂ ਓਲੋਕੇਨ੍ਤਾ ਨਿਸੀਦਿਮ੍ਹ, ਅਜ੍ਜ ਪਨ ਸਬ੍ਬਂ ਖੀਣ’’ਨ੍ਤਿ ਏਵਂ ਅਤੀਤੇਨ ਸਙ੍ਗਣ੍ਹਾਤਿ. ਅਨਾਗਤੇਨਾਤਿ ‘‘ਇਮਸ੍ਮਿਂ ਵਾਰੇ ਅਮ੍ਹਾਕਂ ਸਸ੍ਸਂ ਮਨਾਪਂ ਭਵਿਸ੍ਸਤਿ, ਫਲਭਾਰਭਰਿਤਾ ਸਾਲਿਆਦਯੋ, ਸਸ੍ਸਸਙ੍ਗਹੇ ਕਤੇ ਤੁਮ੍ਹਾਕਂ ਸਙ੍ਗਹਂ ਕਾਤੁਂ ਸਮਤ੍ਥਾ ਭਵਿਸ੍ਸਾਮਾ’’ਤਿ ਏਵਂ ਅਨਾਗਤੇਨ ਸਙ੍ਗਣ੍ਹਾਤਿ. ਨਿਰਤ੍ਥਕੇਨਾਤਿ ਹਤ੍ਥਿਕ੍ਖਨ੍ਧੇ ਵਾ ਅਸ੍ਸਪਿਟ੍ਠੇ ਵਾ ਨਿਸਿਨ੍ਨੋ ਸਹਾਯਂ ਦਿਸ੍ਵਾ ‘‘ਏਹਿ, ਭੋ, ਇਧ ਨਿਸੀਦਾ’’ਤਿ ਵਦਤਿ. ਮਨਾਪਂ ਸਾਟਕਂ ਨਿਵਾਸੇਤ੍ਵਾ ‘‘ਸਹਾਯਕਸ੍ਸ ਵਤ ਮੇ ਅਨੁਚ੍ਛਵਿਕੋ ਅਞ੍ਞੋ ਪਨ ਮਯ੍ਹਂ ਨਤ੍ਥੀ’’ਤਿ ਵਦਤਿ, ਏਵਂ ਨਿਰਤ੍ਥਕੇਨ ਸਙ੍ਗਣ੍ਹਾਤਿ ਨਾਮ. ਪਚ੍ਚੁਪ੍ਪਨ੍ਨੇਸੁ ਕਿਚ੍ਚੇਸੁ ਬ੍ਯਸਨਂ ਦਸ੍ਸੇਤੀਤਿ ‘‘ਸਕਟੇਨ ਮੇ ਅਤ੍ਥੋ’’ਤਿ ਵੁਤ੍ਤੇ ‘‘ਚਕ੍ਕਮਸ੍ਸ ਭਿਨ੍ਨਂ, ਅਕ੍ਖੋ ਛਿਨ੍ਨੋ’’ਤਿਆਦੀਨਿ ਵਦਤਿ.

੨੫੭. ਪਾਪਕਮ੍ਪਿਸ੍ਸ ਅਨੁਜਾਨਾਤੀਤਿ ਪਾਣਾਤਿਪਾਤਾਦੀਸੁ ਯਂਕਿਞ੍ਚਿ ਕਰੋਮਾਤਿ ਵੁਤ੍ਤੇ ‘‘ਸਾਧੁ ਸਮ੍ਮ ਕਰੋਮਾ’’ਤਿ ਅਨੁਜਾਨਾਤਿ. ਕਲ੍ਯਾਣੇਪਿ ਏਸੇਵ ਨਯੋ. ਸਹਾਯੋ ਹੋਤੀਤਿ ‘‘ਅਸੁਕਟ੍ਠਾਨੇ ਸੁਰਂ ਪਿਵਨ੍ਤਿ, ਏਹਿ ਤਤ੍ਥ ਗਚ੍ਛਾਮਾ’’ਤਿ ਵੁਤ੍ਤੇ ਸਾਧੂਤਿ ਗਚ੍ਛਤਿ. ਏਸ ਨਯੋ ਸਬ੍ਬਤ੍ਥ. ਇਤਿ ਵਿਞ੍ਞਾਯਾਤਿ ‘‘ਮਿਤ੍ਤਪਤਿਰੂਪਕਾ ਏਤੇ’’ਤਿ ਏਵਂ ਜਾਨਿਤ੍ਵਾ.

ਸੁਹਦਮਿਤ੍ਤਾਦਿਵਣ੍ਣਨਾ

੨੬੦. ਏਵਂ ਨ ਸੇਵਿਤਬ੍ਬੇ ਪਾਪਮਿਤ੍ਤੇ ਦਸ੍ਸੇਤ੍ਵਾ ਇਦਾਨਿ ਸੇਵਿਤਬ੍ਬੇ ਕਲ੍ਯਾਣਮਿਤ੍ਤੇ ਦਸ੍ਸੇਨ੍ਤੋ ਪੁਨ ਚਤ੍ਤਾਰੋਮੇ, ਗਹਪਤਿਪੁਤ੍ਤਾਤਿਆਦਿਮਾਹ. ਤਤ੍ਥ ਸੁਹਦਾਤਿ ਸੁਨ੍ਦਰਹਦਯਾ.

੨੬੧. ਪਮਤ੍ਤਂ ਰਕ੍ਖਤੀਤਿ ਮਜ੍ਜਂ ਪਿਵਿਤ੍ਵਾ ਗਾਮਮਜ੍ਝੇ ਵਾ ਗਾਮਦ੍ਵਾਰੇ ਵਾ ਮਗ੍ਗੇ ਵਾ ਨਿਪਨ੍ਨਂ ਦਿਸ੍ਵਾ ‘‘ਏਵਂਨਿਪਨ੍ਨਸ੍ਸ ਕੋਚਿਦੇਵ ਨਿਵਾਸਨਪਾਰੁਪਨਮ੍ਪਿ ਹਰੇਯ੍ਯਾ’’ਤਿ ਸਮੀਪੇ ਨਿਸੀਦਿਤ੍ਵਾ ਪਬੁਦ੍ਧਕਾਲੇ ਗਹੇਤ੍ਵਾ ਗਚ੍ਛਤਿ. ਪਮਤ੍ਤਸ੍ਸ ਸਾਪਤੇਯ੍ਯਨ੍ਤਿ ਸਹਾਯੋ ਬਹਿਗਤੋ ਵਾ ਹੋਤਿ ਸੁਰਂ ਪਿਵਿਤ੍ਵਾ ਵਾ ਪਮਤ੍ਤੋ, ਗੇਹਂ ਅਨਾਰਕ੍ਖਂ ‘‘ਕੋਚਿਦੇਵ ਯਂਕਿਞ੍ਚਿ ਹਰੇਯ੍ਯਾ’’ਤਿ ਗੇਹਂ ਪਵਿਸਿਤ੍ਵਾ ਤਸ੍ਸ ਧਨਂ ਰਕ੍ਖਤਿ. ਭੀਤਸ੍ਸਾਤਿ ਕਿਸ੍ਮਿਞ੍ਚਿਦੇਵ ਭਯੇ ਉਪ੍ਪਨ੍ਨੇ ‘‘ਮਾ ਭਾਯਿ, ਮਾਦਿਸੇ ਸਹਾਯੇ ਠਿਤੇ ਕਿਂ ਭਾਯਸੀ’’ਤਿ ਤਂ ਭਯਂ ਹਰਨ੍ਤੋ ਪਟਿਸਰਣਂ ਹੋਤਿ. ਤਦ੍ਦਿਗੁਣਂ ਭੋਗਨ੍ਤਿ ਕਿਚ੍ਚਕਰਣੀਯੇ ਉਪ੍ਪਨ੍ਨੇ ਸਹਾਯਂ ਅਤ੍ਤਨੋ ਸਨ੍ਤਿਕਂ ਆਗਤਂ ਦਿਸ੍ਵਾ ਵਦਤਿ ‘‘ਕਸ੍ਮਾ ਆਗਤੋਸੀ’’ਤਿ? ਰਾਜਕੁਲੇ ਕਮ੍ਮਂ ਅਤ੍ਥੀਤਿ. ਕਿਂ ਲਦ੍ਧੁਂ ਵਟ੍ਟਤੀਤਿ? ਏਕੋ ਕਹਾਪਣੋਤਿ. ‘‘ਨਗਰੇ ਕਮ੍ਮਂ ਨਾਮ ਨ ਏਕਕਹਾਪਣੇਨ ਨਿਪ੍ਫਜ੍ਜਤਿ, ਦ੍ਵੇ ਗਣ੍ਹਾਹੀ’’ਤਿ ਏਵਂ ਯਤ੍ਤਕਂ ਵਦਤਿ, ਤਤੋ ਦਿਗੁਣਂ ਦੇਤਿ.

੨੬੨. ਗੁਯ੍ਹਮਸ੍ਸ ਆਚਿਕ੍ਖਤੀਤਿ ਅਤ੍ਤਨੋ ਗੁਯ੍ਹਂ ਨਿਗੂਹਿਤੁਂ ਯੁਤ੍ਤਕਥਂ ਅਞ੍ਞਸ੍ਸ ਅਕਥੇਤ੍ਵਾ ਤਸ੍ਸੇਵ ਆਚਿਕ੍ਖਤਿ. ਗੁਯ੍ਹਮਸ੍ਸ ਪਰਿਗੂਹਤੀਤਿ ਤੇਨ ਕਥਿਤਂ ਗੁਯ੍ਹਂ ਯਥਾ ਅਞ੍ਞੋ ਨ ਜਾਨਾਤਿ, ਏਵਂ ਰਕ੍ਖਤਿ. ਆਪਦਾਸੁ ਨ ਵਿਜਹਤੀਤਿ ਉਪ੍ਪਨ੍ਨੇ ਭਯੇ ਨ ਪਰਿਚ੍ਚਜਤਿ. ਜੀਵਿਤਮ੍ਪਿਸ੍ਸ ਅਤ੍ਥਾਯਾਤਿ ਅਤ੍ਤਨੋ ਜੀਵਿਤਮ੍ਪਿ ਤਸ੍ਸ ਸਹਾਯਸ੍ਸ ਅਤ੍ਥਾਯ ਪਰਿਚ੍ਚਤ੍ਤਮੇਵ ਹੋਤਿ, ਅਤ੍ਤਨੋ ਜੀਵਿਤਂ ਅਗਣੇਤ੍ਵਾਪਿ ਤਸ੍ਸ ਕਮ੍ਮਂ ਕਰੋਤਿਯੇਵ.

੨੬੩. ਪਾਪਾ ਨਿਵਾਰੇਤੀਤਿ ਅਮ੍ਹੇਸੁ ਪਸ੍ਸਨ੍ਤੇਸੁ ਪਸ੍ਸਨ੍ਤੇਸੁ ਤ੍ਵਂ ਏਵਂ ਕਾਤੁਂ ਨ ਲਭਸਿ, ਪਞ੍ਚ ਵੇਰਾਨਿ ਦਸ ਅਕੁਸਲਕਮ੍ਮਪਥੇ ਮਾ ਕਰੋਹੀਤਿ ਨਿਵਾਰੇਤਿ. ਕਲ੍ਯਾਣੇ ਨਿਵੇਸੇਤੀਤਿ ਕਲ੍ਯਾਣਕਮ੍ਮੇ ਤੀਸੁ ਸਰਣੇਸੁ ਪਞ੍ਚਸੀਲੇਸੁ ਦਸਕੁਸਲਕਮ੍ਮਪਥੇਸੁ ਵਤ੍ਤਸ੍ਸੁ, ਦਾਨਂ ਦੇਹਿ ਪੁਞ੍ਞਂ ਕਰੋਹਿ ਧਮ੍ਮਂ ਸੁਣਾਹੀਤਿ ਏਵਂ ਕਲ੍ਯਾਣੇ ਨਿਯੋਜੇਤਿ. ਅਸ੍ਸੁਤਂ ਸਾਵੇਤੀਤਿ ਅਸ੍ਸੁਤਪੁਬ੍ਬਂ ਸੁਖੁਮਂ ਨਿਪੁਣਂ ਕਾਰਣਂ ਸਾਵੇਤਿ. ਸਗ੍ਗਸ੍ਸ ਮਗ੍ਗਨ੍ਤਿ ਇਦਂ ਕਮ੍ਮਂ ਕਤ੍ਵਾ ਸਗ੍ਗੇ ਨਿਬ੍ਬਤ੍ਤਨ੍ਤੀਤਿ ਏਵਂ ਸਗ੍ਗਸ੍ਸ ਮਗ੍ਗਂ ਆਚਿਕ੍ਖਤਿ.

੨੬੪. ਅਭਵੇਨਸ੍ਸ ਨ ਨਨ੍ਦਤੀਤਿ ਤਸ੍ਸ ਅਭਵੇਨ ਅਵੁਡ੍ਢਿਯਾ ਪੁਤ੍ਤਦਾਰਸ੍ਸ ਵਾ ਪਰਿਜਨਸ੍ਸ ਵਾ ਤਥਾਰੂਪਂ ਪਾਰਿਜੁਞ੍ਞਂ ਦਿਸ੍ਵਾ ਵਾ ਸੁਤ੍ਵਾ ਵਾ ਨ ਨਨ੍ਦਤਿ, ਅਨਤ੍ਤਮਨੋ ਹੋਤਿ. ਭਵੇਨਾਤਿ ਵੁਡ੍ਢਿਯਾ ਤਥਾਰੂਪਸ੍ਸ ਸਮ੍ਪਤ੍ਤਿਂ ਵਾ ਇਸ੍ਸਰਿਯਪ੍ਪਟਿਲਾਭਂ ਵਾ ਦਿਸ੍ਵਾ ਵਾ ਸੁਤ੍ਵਾ ਵਾ ਨਨ੍ਦਤਿ, ਅਤ੍ਤਮਨੋ ਹੋਤਿ. ਅਵਣ੍ਣਂ ਭਣਮਾਨਂ ਨਿਵਾਰੇਤੀਤਿ ‘‘ਅਸੁਕੋ ਵਿਰੂਪੋ ਨ ਪਾਸਾਦਿਕੋ ਦੁਜ੍ਜਾਤਿਕੋ ਦੁਸ੍ਸੀਲੋ’’ਤਿ ਵਾ ਵੁਤ੍ਤੇ ‘‘ਏਵਂ ਮਾ ਭਣਿ, ਰੂਪਵਾ ਚ ਸੋ ਪਾਸਾਦਿਕੋ ਚ ਸੁਜਾਤੋ ਚ ਸੀਲਸਮ੍ਪਨ੍ਨੋ ਚਾ’’ਤਿਆਦੀਹਿ ਵਚਨੇਹਿ ਪਰਂ ਅਤ੍ਤਨੋ ਸਹਾਯਸ੍ਸ ਅਵਣ੍ਣਂ ਭਣਮਾਨਂ ਨਿਵਾਰੇਤਿ. ਵਣ੍ਣਂ ਭਣਮਾਨਂ ਪਸਂਸਤੀਤਿ ‘‘ਅਸੁਕੋ ਰੂਪਵਾ ਪਾਸਾਦਿਕੋ ਸੁਜਾਤੋ ਸੀਲਸਮ੍ਪਨ੍ਨੋ’’ਤਿ ਵੁਤ੍ਤੇ ‘‘ਅਹੋ ਸੁਟ੍ਠੁ ਵਦਸਿ, ਸੁਭਾਸਿਤਂ ਤਯਾ, ਏਵਮੇਤਂ, ਏਸ ਪੁਰਿਸੋ ਰੂਪਵਾ ਪਾਸਾਦਿਕੋ ਸੁਜਾਤੋ ਸੀਲਸਮ੍ਪਨ੍ਨੋ’’ਤਿ ਏਵਂ ਅਤ੍ਤਨੋ ਸਹਾਯਕਸ੍ਸ ਪਰਂ ਵਣ੍ਣਂ ਭਣਮਾਨਂ ਪਸਂਸਤਿ.

੨੬੫. ਜਲਂ ਅਗ੍ਗੀਵ ਭਾਸਤੀਤਿ ਰਤ੍ਤਿਂ ਪਬ੍ਬਤਮਤ੍ਥਕੇ ਜਲਮਾਨੋ ਅਗ੍ਗਿ ਵਿਯ ਵਿਰੋਚਤਿ.

ਭੋਗੇ ਸਂਹਰਮਾਨਸ੍ਸਾਤਿ ਅਤ੍ਤਾਨਮ੍ਪਿ ਪਰਮ੍ਪਿ ਅਪੀਲ਼ੇਤ੍ਵਾ ਧਮ੍ਮੇਨ ਸਮੇਨ ਭੋਗੇ ਸਮ੍ਪਿਣ੍ਡੇਨ੍ਤਸ੍ਸ ਰਾਸਿਂ ਕਰੋਨ੍ਤਸ੍ਸ. ਭਮਰਸ੍ਸੇਵ ਇਰੀਯਤੋਤਿ ਯਥਾ ਭਮਰੋ ਪੁਪ੍ਫਾਨਂ ਵਣ੍ਣਗਨ੍ਧਂ ਅਪੋਥਯਂ ਤੁਣ੍ਡੇਨਪਿ ਪਕ੍ਖੇਹਿਪਿ ਰਸਂ ਆਹਰਿਤ੍ਵਾ ਅਨੁਪੁਬ੍ਬੇਨ ਚਕ੍ਕਪ੍ਪਮਾਣਂ ਮਧੁਪਟਲਂ ਕਰੋਤਿ, ਏਵਂ ਅਨੁਪੁਬ੍ਬੇਨ ਮਹਨ੍ਤਂ ਭੋਗਰਾਸਿਂ ਕਰੋਨ੍ਤਸ੍ਸ. ਭੋਗਾ ਸਨ੍ਨਿਚਯਂ ਯਨ੍ਤੀਤਿ ਤਸ੍ਸ ਭੋਗਾ ਨਿਚਯਂ ਗਚ੍ਛਨ੍ਤਿ. ਕਥਂ? ਅਨੁਪੁਬ੍ਬੇਨ ਉਪਚਿਕਾਹਿ ਸਂਵਡ੍ਢਿਯਮਾਨੋ ਵਮ੍ਮਿਕੋ ਵਿਯ. ਤੇਨਾਹ ‘‘ਵਮ੍ਮਿਕੋਵੁਪਚੀਯਤੀ’’ਤਿ. ਯਥਾ ਵਮ੍ਮਿਕੋ ਉਪਚਿਯਤਿ, ਏਵਂ ਨਿਚਯਂ ਯਨ੍ਤੀਤਿ ਅਤ੍ਥੋ.

ਸਮਾਹਤ੍ਵਾਤਿ ਸਮਾਹਰਿਤ੍ਵਾ. ਅਲਮਤ੍ਥੋਤਿ ਯੁਤ੍ਤਸਭਾਵੋ ਸਮਤ੍ਥੋ ਵਾ ਪਰਿਯਤ੍ਤਰੂਪੋ ਘਰਾਵਾਸਂ ਸਣ੍ਠਾਪੇਤੁਂ.

ਇਦਾਨਿ ਯਥਾ ਵਾ ਘਰਾਵਾਸੋ ਸਣ੍ਠਪੇਤਬ੍ਬੋ, ਤਥਾ ਓਵਦਨ੍ਤੋ ਚਤੁਧਾ ਵਿਭਜੇ ਭੋਗੇਤਿਆਦਿਮਾਹ. ਤਤ੍ਥ ਸ ਵੇ ਮਿਤ੍ਤਾਨਿ ਗਨ੍ਥਤੀਤਿ ਸੋ ਏਵਂ ਵਿਭਜਨ੍ਤੋ ਮਿਤ੍ਤਾਨਿ ਗਨ੍ਥਤਿ ਨਾਮ ਅਭੇਜ੍ਜਮਾਨਾਨਿ ਠਪੇਤਿ. ਯਸ੍ਸ ਹਿ ਭੋਗਾ ਸਨ੍ਤਿ, ਸੋ ਏਵ ਮਿਤ੍ਤੇ ਠਪੇਤੁਂ ਸਕ੍ਕੋਤਿ, ਨ ਇਤਰੋ.

ਏਕੇਨ ਭੋਗੇ ਭੁਞ੍ਜੇਯ੍ਯਾਤਿ ਏਕੇਨ ਕੋਟ੍ਠਾਸੇਨ ਭੋਗੇ ਭੁਞ੍ਜੇਯ੍ਯ. ਦ੍ਵੀਹਿ ਕਮ੍ਮਂ ਪਯੋਜਯੇਤਿ ਦ੍ਵੀਹਿ ਕੋਟ੍ਠਾਸੇਹਿ ਕਸਿਵਾਣਿਜ੍ਜਾਦਿਕਮ੍ਮਂ ਪਯੋਜੇਯ੍ਯ. ਚਤੁਤ੍ਥਞ੍ਚ ਨਿਧਾਪੇਯ੍ਯਾਤਿ ਚਤੁਤ੍ਥਂ ਕੋਟ੍ਠਾਸਂ ਨਿਧਾਪੇਤ੍ਵਾ ਠਪੇਯ੍ਯ. ਆਪਦਾਸੁ ਭਵਿਸ੍ਸਤੀਤਿ ਕੁਲਾਨਞ੍ਹਿ ਨ ਸਬ੍ਬਕਾਲਂ ਏਕਸਦਿਸਂ ਵਤ੍ਤਤਿ, ਕਦਾਚਿ ਰਾਜਾਦਿਵਸੇਨ ਆਪਦਾਪਿ ਉਪ੍ਪਜ੍ਜਨ੍ਤਿ, ਤਸ੍ਮਾ ਏਵਂ ਆਪਦਾਸੁ ਉਪ੍ਪਨ੍ਨਾਸੁ ਭਵਿਸ੍ਸਤੀਤਿ ‘‘ਏਕਂ ਕੋਟ੍ਠਾਸਂ ਨਿਧਾਪੇਯ੍ਯਾ’’ਤਿ ਆਹ. ਇਮੇਸੁ ਪਨ ਚਤੂਸੁ ਕੋਟ੍ਠਾਸੇਸੁ ਕਤਰਕੋਟ੍ਠਾਸਂ ਗਹੇਤ੍ਵਾ ਕੁਸਲਂ ਕਾਤਬ੍ਬਨ੍ਤਿ? ‘‘ਭੋਗੇ ਭੁਞ੍ਜੇਯ੍ਯਾ’’ਤਿ ਵੁਤ੍ਤਕੋਟ੍ਠਾਸਂ. ਤਤੋ ਗਣ੍ਹਿਤ੍ਵਾ ਭਿਕ੍ਖੂਨਮ੍ਪਿ ਕਪਣਦ੍ਧਿਕਾਦੀਨਮ੍ਪਿ ਦਾਤਬ੍ਬਂ, ਪੇਸਕਾਰਨ੍ਹਾਪਿਤਾਦੀਨਮ੍ਪਿ ਵੇਤਨਂ ਦਾਤਬ੍ਬਂ.

ਛਦ੍ਦਿਸਾਪਟਿਚ੍ਛਾਦਨਕਣ੍ਡਵਣ੍ਣਨਾ

੨੬੬. ਇਤਿ ਭਗਵਾ ਏਤ੍ਤਕੇਨ ਕਥਾਮਗ੍ਗੇਨ ਏਵਂ ਗਹਪਤਿਪੁਤ੍ਤਸ੍ਸ ਅਰਿਯਸਾਵਕੋ ਚਤੂਹਿ ਕਾਰਣੇਹਿ ਅਕੁਸਲਂ ਪਹਾਯ ਛਹਿ ਕਾਰਣੇਹਿ ਭੋਗਾਨਂ ਅਪਾਯਮੁਖਂ ਵਜ੍ਜੇਤ੍ਵਾ ਸੋਲ਼ਸ ਮਿਤ੍ਤਾਨਿ ਸੇਵਨ੍ਤੋ ਘਰਾਵਾਸਂ ਸਣ੍ਠਪੇਤ੍ਵਾ ਦਾਰਭਰਣਂ ਕਰੋਨ੍ਤੋ ਧਮ੍ਮਿਕੇਨ ਆਜੀਵੇਨ ਜੀਵਤਿ, ਦੇਵਮਨੁਸ੍ਸਾਨਞ੍ਚ ਅਨ੍ਤਰੇ ਅਗ੍ਗਿਕ੍ਖਨ੍ਧੋ ਵਿਯ ਵਿਰੋਚਤੀਤਿ ਵਜ੍ਜਨੀਯਧਮ੍ਮਵਜ੍ਜਨਤ੍ਥਂ ਸੇਵਿਤਬ੍ਬਧਮ੍ਮਸੇਵਨਤ੍ਥਞ੍ਚ ਓਵਾਦਂ ਦਤ੍ਵਾ ਇਦਾਨਿ ਨਮਸ੍ਸਿਤਬ੍ਬਾ ਛ ਦਿਸਾ ਦਸ੍ਸੇਨ੍ਤੋ ਕਥਞ੍ਚ ਗਹਪਤਿਪੁਤ੍ਤਾਤਿਆਦਿਮਾਹ.

ਤਤ੍ਥ ਛਦ੍ਦਿਸਾਪਟਿਚ੍ਛਾਦੀਤਿ ਯਥਾ ਛਹਿ ਦਿਸਾਹਿ ਆਗਮਨਭਯਂ ਨ ਆਗਚ੍ਛਤਿ, ਖੇਮਂ ਹੋਤਿ ਨਿਬ੍ਭਯਂ ਏਵਂ ਵਿਹਰਨ੍ਤੋ ‘‘ਛਦ੍ਦਿਸਾਪਟਿਚ੍ਛਾਦੀ’’ਤਿ ਵੁਚ੍ਚਤਿ. ‘‘ਪੁਰਤ੍ਥਿਮਾ ਦਿਸਾ ਮਾਤਾਪਿਤਰੋ ਵੇਦਿਤਬ੍ਬਾ’’ਤਿਆਦੀਸੁ ਮਾਤਾਪਿਤਰੋ ਪੁਬ੍ਬੁਪਕਾਰਿਤਾਯ ਪੁਰਤ੍ਥਿਮਾ ਦਿਸਾਤਿ ਵੇਦਿਤਬ੍ਬਾ. ਆਚਰਿਯਾ ਦਕ੍ਖਿਣੇਯ੍ਯਤਾਯ ਦਕ੍ਖਿਣਾ ਦਿਸਾਤਿ. ਪੁਤ੍ਤਦਾਰਾ ਪਿਟ੍ਠਿਤੋ ਅਨੁਬਨ੍ਧਨਵਸੇਨ ਪਚ੍ਛਿਮਾ ਦਿਸਾਤਿ. ਮਿਤ੍ਤਾਮਚ੍ਚਾ ਯਸ੍ਮਾ ਸੋ ਮਿਤ੍ਤਾਮਚ੍ਚੇ ਨਿਸ੍ਸਾਯ ਤੇ ਤੇ ਦੁਕ੍ਖਵਿਸੇਸੇ ਉਤ੍ਤਰਤਿ, ਤਸ੍ਮਾ ਉਤ੍ਤਰਾ ਦਿਸਾਤਿ. ਦਾਸਕਮ੍ਮਕਰਾ ਪਾਦਮੂਲੇ ਪਤਿਟ੍ਠਾਨਵਸੇਨ ਹੇਟ੍ਠਿਮਾ ਦਿਸਾਤਿ. ਸਮਣਬ੍ਰਾਹ੍ਮਣਾ ਗੁਣੇਹਿ ਉਪਰਿ ਠਿਤਭਾਵੇਨ ਉਪਰਿਮਾ ਦਿਸਾਤਿ ਵੇਦਿਤਬ੍ਬਾ.

੨੬੭. ਭਤੋ ਨੇ ਭਰਿਸ੍ਸਾਮੀਤਿ ਅਹਂ ਮਾਤਾਪਿਤੂਹਿ ਥਞ੍ਞਂ ਪਾਯੇਤ੍ਵਾ ਹਤ੍ਥਪਾਦੇ ਵਡ੍ਢੇਤ੍ਵਾ ਮੁਖੇਨ ਸਿਙ੍ਘਾਣਿਕਂ ਅਪਨੇਤ੍ਵਾ ਨਹਾਪੇਤ੍ਵਾ ਮਣ੍ਡੇਤ੍ਵਾ ਭਤੋ ਭਰਿਤੋ ਜਗ੍ਗਿਤੋ, ਸ੍ਵਾਹਂ ਅਜ੍ਜ ਤੇ ਮਹਲ੍ਲਕੇ ਪਾਦਧੋਵਨਨ੍ਹਾਪਨਯਾਗੁਭਤ੍ਤਦਾਨਾਦੀਹਿ ਭਰਿਸ੍ਸਾਮਿ.

ਕਿਚ੍ਚਂ ਨੇਸਂ ਕਰਿਸ੍ਸਾਮੀਤਿ ਅਤ੍ਤਨੋ ਕਮ੍ਮਂ ਠਪੇਤ੍ਵਾ ਮਾਤਾਪਿਤੂਨਂ ਰਾਜਕੁਲਾਦੀਸੁ ਉਪ੍ਪਨ੍ਨਂ ਕਿਚ੍ਚਂ ਗਨ੍ਤ੍ਵਾ ਕਰਿਸ੍ਸਾਮਿ. ਕੁਲਵਂਸਂ ਸਣ੍ਠਪੇਸ੍ਸਾਮੀਤਿ ਮਾਤਾਪਿਤੂਨਂ ਸਨ੍ਤਕਂ ਖੇਤ੍ਤਵਤ੍ਥੁਹਿਰਞ੍ਞਸੁਵਣ੍ਣਾਦਿਂ ਅਵਿਨਾਸੇਤ੍ਵਾ ਰਕ੍ਖਨ੍ਤੋਪਿ ਕੁਲਵਂਸਂ ਸਣ੍ਠਪੇਤਿ ਨਾਮ. ਮਾਤਾਪਿਤਰੋ ਅਧਮ੍ਮਿਕਵਂਸਤੋ ਹਾਰੇਤ੍ਵਾ ਧਮ੍ਮਿਕਵਂਸੇ ਠਪੇਨ੍ਤੋਪਿ, ਕੁਲਵਂਸੇਨ ਆਗਤਾਨਿ ਸਲਾਕਭਤ੍ਤਾਦੀਨਿ ਅਨੁਪਚ੍ਛਿਨ੍ਦਿਤ੍ਵਾ ਪਵਤ੍ਤੇਨ੍ਤੋਪਿ ਕੁਲਵਂਸਂ ਸਣ੍ਠਪੇਤਿ ਨਾਮ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਕੁਲਵਂਸਂ ਸਣ੍ਠਪੇਸ੍ਸਾਮੀ’’ਤਿ.

ਦਾਯਜ੍ਜਂ ਪਟਿਪਜ੍ਜਾਮੀਤਿ ਮਾਤਾਪਿਤਰੋ ਅਤ੍ਤਨੋ ਓਵਾਦੇ ਅਵਤ੍ਤਮਾਨੇ ਮਿਚ੍ਛਾਪਟਿਪਨ੍ਨੇ ਦਾਰਕੇ ਵਿਨਿਚ੍ਛਯਂ ਪਤ੍ਵਾ ਅਪੁਤ੍ਤੇ ਕਰੋਨ੍ਤਿ, ਤੇ ਦਾਯਜ੍ਜਾਰਹਾ ਨ ਹੋਨ੍ਤਿ. ਓਵਾਦੇ ਵਤ੍ਤਮਾਨੇ ਪਨ ਕੁਲਸਨ੍ਤਕਸ੍ਸ ਸਾਮਿਕੇ ਕਰੋਨ੍ਤਿ, ਅਹਂ ਏਵਂ ਵਤ੍ਤਿਸ੍ਸਾਮੀਤਿ ਅਧਿਪ੍ਪਾਯੇਨ ‘‘ਦਾਯਜ੍ਜਂ ਪਟਿਪਜ੍ਜਾਮੀ’’ਤਿ ਵੁਤ੍ਤਂ.

ਦਕ੍ਖਿਣਂ ਅਨੁਪ੍ਪਦਸ੍ਸਾਮੀਤਿ ਤੇਸਂ ਪਤ੍ਤਿਦਾਨਂ ਕਤ੍ਵਾ ਤਤਿਯਦਿਵਸਤੋ ਪਟ੍ਠਾਯ ਦਾਨਂ ਅਨੁਪ੍ਪਦਸ੍ਸਾਮਿ. ਪਾਪਾ ਨਿਵਾਰੇਨ੍ਤੀਤਿ ਪਾਣਾਤਿਪਾਤਾਦੀਨਂ ਦਿਟ੍ਠਧਮ੍ਮਿਕਸਮ੍ਪਰਾਯਿਕਂ ਆਦੀਨਵਂ ਵਤ੍ਵਾ, ‘‘ਤਾਤ, ਮਾ ਏਵਰੂਪਂ ਕਰੀ’’ਤਿ ਨਿਵਾਰੇਨ੍ਤਿ, ਕਤਮ੍ਪਿ ਗਰਹਨ੍ਤਿ. ਕਲ੍ਯਾਣੇ ਨਿਵੇਸੇਨ੍ਤੀਤਿ ਅਨਾਥਪਿਣ੍ਡਿਕੋ ਵਿਯ ਲਞ੍ਜਂ ਦਤ੍ਵਾਪਿ ਸੀਲਸਮਾਦਾਨਾਦੀਸੁ ਨਿਵੇਸੇਨ੍ਤਿ. ਸਿਪ੍ਪਂ ਸਿਕ੍ਖਾਪੇਨ੍ਤੀਤਿ ਅਤ੍ਤਨੋ ਓਵਾਦੇ ਠਿਤਭਾਵਂ ਞਤ੍ਵਾ ਵਂਸਾਨੁਗਤਂ ਮੁਦ੍ਦਾਗਣਨਾਦਿਸਿਪ੍ਪਂ ਸਿਕ੍ਖਾਪੇਨ੍ਤਿ. ਪਤਿਰੂਪੇਨਾਤਿ ਕੁਲਸੀਲਰੂਪਾਦੀਹਿ ਅਨੁਰੂਪੇਨ.

ਸਮਯੇ ਦਾਯਜ੍ਜਂ ਨਿਯ੍ਯਾਦੇਨ੍ਤੀਤਿ ਸਮਯੇ ਧਨਂ ਦੇਨ੍ਤਿ. ਤਤ੍ਥ ਨਿਚ੍ਚਸਮਯੋ ਕਾਲਸਮਯੋਤਿ ਦ੍ਵੇ ਸਮਯਾ. ਨਿਚ੍ਚਸਮਯੇ ਦੇਨ੍ਤਿ ਨਾਮ ‘‘ਉਟ੍ਠਾਯ ਸਮੁਟ੍ਠਾਯ ਇਮਂ ਗਣ੍ਹਿਤਬ੍ਬਂ ਗਣ੍ਹ, ਅਯਂ ਤੇ ਪਰਿਬ੍ਬਯੋ ਹੋਤੁ, ਇਮਿਨਾ ਕੁਸਲਂ ਕਰੋਹੀ’’ਤਿ ਦੇਨ੍ਤਿ. ਕਾਲਸਮਯੇ ਦੇਨ੍ਤਿ ਨਾਮ ਸਿਖਾਠਪਨਆਵਾਹਵਿਵਾਹਾਦਿਸਮਯੇ ਦੇਨ੍ਤਿ. ਅਪਿਚ ਪਚ੍ਛਿਮੇ ਕਾਲੇ ਮਰਣਮਞ੍ਚੇ ਨਿਪਨ੍ਨਸ੍ਸ ‘‘ਇਮਿਨਾ ਕੁਸਲਂ ਕਰੋਹੀ’’ਤਿ ਦੇਨ੍ਤਾਪਿ ਸਮਯੇ ਦੇਨ੍ਤਿ ਨਾਮ. ਪਟਿਚ੍ਛਨ੍ਨਾ ਹੋਤੀਤਿ ਯਂ ਪੁਰਤ੍ਥਿਮਦਿਸਤੋ ਭਯਂ ਆਗਚ੍ਛੇਯ੍ਯ, ਯਥਾ ਤਂ ਨਾਗਚ੍ਛਤਿ, ਏਵਂ ਪਿਹਿਤਾ ਹੋਤਿ. ਸਚੇ ਹਿ ਪੁਤ੍ਤਾ ਵਿਪ੍ਪਟਿਪਨ੍ਨਾ, ਅਸ੍ਸੁ, ਮਾਤਾਪਿਤਰੋ ਦਹਰਕਾਲਤੋ ਪਟ੍ਠਾਯ ਜਗ੍ਗਨਾਦੀਹਿ ਸਮ੍ਮਾ ਪਟਿਪਨ੍ਨਾ, ਏਤੇ ਦਾਰਕਾ, ਮਾਤਾਪਿਤੂਨਂ ਅਪ੍ਪਤਿਰੂਪਾਤਿ ਏਤਂ ਭਯਂ ਆਗਚ੍ਛੇਯ੍ਯ. ਪੁਤ੍ਤਾ ਸਮ੍ਮਾ ਪਟਿਪਨ੍ਨਾ, ਮਾਤਾਪਿਤਰੋ ਵਿਪ੍ਪਟਿਪਨ੍ਨਾ, ਮਾਤਾਪਿਤਰੋ ਪੁਤ੍ਤਾਨਂ ਨਾਨੁਰੂਪਾਤਿ ਏਤਂ ਭਯਂ ਆਗਚ੍ਛੇਯ੍ਯ. ਉਭੋਸੁ ਵਿਪ੍ਪਟਿਪਨ੍ਨੇਸੁ ਦੁਵਿਧਮ੍ਪਿ ਤਂ ਭਯਂ ਹੋਤਿ. ਸਮ੍ਮਾ ਪਟਿਪਨ੍ਨੇਸੁ ਸਬ੍ਬਂ ਨ ਹੋਤਿ. ਤੇਨ ਵੁਤ੍ਤਂ – ‘‘ਪਟਿਚ੍ਛਨ੍ਨਾ ਹੋਤਿ ਖੇਮਾ ਅਪ੍ਪਟਿਭਯਾ’’ਤਿ.

ਏਵਞ੍ਚ ਪਨ ਵਤ੍ਵਾ ਭਗਵਾ ਸਿਙ੍ਗਾਲਕਂ ਏਤਦਵੋਚ – ‘‘ਨ ਖੋ ਤੇ, ਗਹਪਤਿਪੁਤ੍ਤ, ਪਿਤਾ ਲੋਕਸਮ੍ਮਤਂ ਪੁਰਤ੍ਥਿਮਂ ਦਿਸਂ ਨਮਸ੍ਸਾਪੇਤਿ. ਮਾਤਾਪਿਤਰੋ ਪਨ ਪੁਰਤ੍ਥਿਮਦਿਸਾਸਦਿਸੇ ਕਤ੍ਵਾ ਨਮਸ੍ਸਾਪੇਤਿ. ਅਯਞ੍ਹਿ ਤੇ ਪਿਤਰਾ ਪੁਰਤ੍ਥਿਮਾ ਦਿਸਾ ਅਕ੍ਖਾਤਾ, ਨੋ ਅਞ੍ਞਾ’’ਤਿ.

੨੬੮. ਉਟ੍ਠਾਨੇਨਾਤਿ ਆਸਨਾ ਉਟ੍ਠਾਨੇਨ. ਅਨ੍ਤੇਵਾਸਿਕੇਨ ਹਿ ਆਚਰਿਯਂ ਦੂਰਤੋਵ ਆਗਚ੍ਛਨ੍ਤਂ ਦਿਸ੍ਵਾ ਆਸਨਾ ਵੁਟ੍ਠਾਯ ਪਚ੍ਚੁਗ੍ਗਮਨਂ ਕਤ੍ਵਾ ਹਤ੍ਥਤੋ ਭਣ੍ਡਕਂ ਗਹੇਤ੍ਵਾ ਆਸਨਂ ਪਞ੍ਞਪੇਤ੍ਵਾ ਨਿਸੀਦਾਪੇਤ੍ਵਾ ਬੀਜਨਪਾਦਧੋਵਨਪਾਦਮਕ੍ਖਨਾਨਿ ਕਾਤਬ੍ਬਾਨਿ. ਤਂ ਸਨ੍ਧਾਯ ਵੁਤ੍ਤਂ ‘‘ਉਟ੍ਠਾਨੇਨਾ’’ਤਿ. ਉਪਟ੍ਠਾਨੇਨਾਤਿ ਦਿਵਸਸ੍ਸ ਤਿਕ੍ਖਤ੍ਤੁਂ ਉਪਟ੍ਠਾਨਗਮਨੇਨ. ਸਿਪ੍ਪੁਗ੍ਗਹਣਕਾਲੇ ਪਨ ਅਵਸ੍ਸਕਮੇਵ ਗਨ੍ਤਬ੍ਬਂ ਹੋਤਿ. ਸੁਸ੍ਸੂਸਾਯਾਤਿ ਸਦ੍ਦਹਿਤ੍ਵਾ ਸਵਨੇਨ. ਅਸਦ੍ਦਹਿਤ੍ਵਾ ਸੁਣਨ੍ਤੋ ਹਿ ਵਿਸੇਸਂ ਨਾਧਿਗਚ੍ਛਤਿ. ਪਾਰਿਚਰਿਯਾਯਾਤਿ ਅਵਸੇਸਖੁਦ੍ਦਕਪਾਰਿਚਰਿਯਾਯ. ਅਨ੍ਤੇਵਾਸਿਕੇਨ ਹਿ ਆਚਰਿਯਸ੍ਸ ਪਾਤੋਵ ਵੁਟ੍ਠਾਯ ਮੁਖੋਦਕਦਨ੍ਤਕਟ੍ਠਂ ਦਤ੍ਵਾ ਭਤ੍ਤਕਿਚ੍ਚਕਾਲੇਪਿ ਪਾਨੀਯਂ ਗਹੇਤ੍ਵਾ ਪਚ੍ਚੁਪਟ੍ਠਾਨਾਦੀਨਿ ਕਤ੍ਵਾ ਵਨ੍ਦਿਤ੍ਵਾ ਗਨ੍ਤਬ੍ਬਂ. ਕਿਲਿਟ੍ਠਵਤ੍ਥਾਦੀਨਿ ਧੋਵਿਤਬ੍ਬਾਨਿ, ਸਾਯਂ ਨਹਾਨੋਦਕਂ ਪਚ੍ਚੁਪਟ੍ਠਪੇਤਬ੍ਬਂ. ਅਫਾਸੁਕਾਲੇ ਉਪਟ੍ਠਾਤਬ੍ਬਂ. ਪਬ੍ਬਜਿਤੇਨਪਿ ਸਬ੍ਬਂ ਅਨ੍ਤੇਵਾਸਿਕਵਤ੍ਤਂ ਕਾਤਬ੍ਬਂ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਪਾਰਿਚਰਿਯਾਯਾ’’ਤਿ. ਸਕ੍ਕਚ੍ਚਂ ਸਿਪ੍ਪਪਟਿਗ੍ਗਹਣੇਨਾਤਿ ਸਕ੍ਕਚ੍ਚਂ ਪਟਿਗ੍ਗਹਣਂ ਨਾਮ ਥੋਕਂ ਗਹੇਤ੍ਵਾ ਬਹੁਵਾਰੇ ਸਜ੍ਝਾਯਕਰਣਂ, ਏਕਪਦਮ੍ਪਿ ਵਿਸੁਦ੍ਧਮੇਵ ਗਹੇਤਬ੍ਬਂ.

ਸੁਵਿਨੀਤਂ ਵਿਨੇਨ੍ਤੀਤਿ ‘‘ਏਵਂ ਤੇ ਨਿਸੀਦਿਤਬ੍ਬਂ, ਏਵਂ ਠਾਤਬ੍ਬਂ, ਏਵਂ ਖਾਦਿਤਬ੍ਬਂ, ਏਵਂ ਭੁਞ੍ਜਿਤਬ੍ਬਂ, ਪਾਪਮਿਤ੍ਤਾ ਵਜ੍ਜੇਤਬ੍ਬਾ, ਕਲ੍ਯਾਣਮਿਤ੍ਤਾ ਸੇਵਿਤਬ੍ਬਾ’’ਤਿ ਏਵਂ ਆਚਾਰਂ ਸਿਕ੍ਖਾਪੇਨ੍ਤਿ ਵਿਨੇਨ੍ਤਿ. ਸੁਗ੍ਗਹਿਤਂ ਗਾਹਾਪੇਨ੍ਤੀਤਿ ਯਥਾ ਸੁਗ੍ਗਹਿਤਂ ਗਣ੍ਹਾਤਿ, ਏਵਂ ਅਤ੍ਥਞ੍ਚ ਬ੍ਯਞ੍ਜਨਞ੍ਚ ਸੋਧੇਤ੍ਵਾ ਪਯੋਗਂ ਦਸ੍ਸੇਤ੍ਵਾ ਗਣ੍ਹਾਪੇਨ੍ਤਿ. ਮਿਤ੍ਤਾਮਚ੍ਚੇਸੁ ਪਟਿਯਾਦੇਨ੍ਤੀਤਿ ‘‘ਅਯਂ ਅਮ੍ਹਾਕਂ ਅਨ੍ਤੇਵਾਸਿਕੋ ਬ੍ਯਤ੍ਤੋ ਬਹੁਸ੍ਸੁਤੋ ਮਯਾ ਸਮਸਮੋ, ਏਤਂ ਸਲ੍ਲਕ੍ਖੇਯ੍ਯਾਥਾ’’ਤਿ ਏਵਂ ਗੁਣਂ ਕਥੇਤ੍ਵਾ ਮਿਤ੍ਤਾਮਚ੍ਚੇਸੁ ਪਤਿਟ੍ਠਪੇਨ੍ਤਿ.

ਦਿਸਾਸੁ ਪਰਿਤ੍ਤਾਣਂ ਕਰੋਨ੍ਤੀਤਿ ਸਿਪ੍ਪਸਿਕ੍ਖਾਪਨੇਨੇਵਸ੍ਸ ਸਬ੍ਬਦਿਸਾਸੁ ਰਕ੍ਖਂ ਕਰੋਨ੍ਤਿ. ਉਗ੍ਗਹਿਤਸਿਪ੍ਪੋ ਹਿ ਯਂ ਯਂ ਦਿਸਂ ਗਨ੍ਤ੍ਵਾ ਸਿਪ੍ਪਂ ਦਸ੍ਸੇਤਿ, ਤਤ੍ਥ ਤਤ੍ਥਸ੍ਸ ਲਾਭਸਕ੍ਕਾਰੋ ਉਪ੍ਪਜ੍ਜਤਿ. ਸੋ ਆਚਰਿਯੇਨ ਕਤੋ ਨਾਮ ਹੋਤਿ, ਗੁਣਂ ਕਥੇਨ੍ਤੋਪਿਸ੍ਸ ਮਹਾਜਨੋ ਆਚਰਿਯਪਾਦੇ ਧੋਵਿਤ੍ਵਾ ਵਸਿਤਅਨ੍ਤੇਵਾਸਿਕੋ ਵਤ ਅਯਨ੍ਤਿ ਪਠਮਂ ਆਚਰਿਯਸ੍ਸੇਵ ਗੁਣਂ ਕਥੇਨ੍ਤਿ, ਬ੍ਰਹ੍ਮਲੋਕਪ੍ਪਮਾਣੋਪਿਸ੍ਸ ਲਾਭੋ ਉਪ੍ਪਜ੍ਜਮਾਨੋ ਆਚਰਿਯਸਨ੍ਤਕੋਵ ਹੋਤਿ. ਅਪਿਚ ਯਂ ਵਿਜ੍ਜਂ ਪਰਿਜਪ੍ਪਿਤ੍ਵਾ ਗਚ੍ਛਨ੍ਤਂ ਅਟਵਿਯਂ ਚੋਰਾ ਨ ਪਸ੍ਸਨ੍ਤਿ, ਅਮਨੁਸ੍ਸਾ ਵਾ ਦੀਘਜਾਤਿਆਦਯੋ ਵਾ ਨ ਵਿਹੇਠੇਨ੍ਤਿ, ਤਂ ਸਿਕ੍ਖਾਪੇਨ੍ਤਾਪਿ ਦਿਸਾਸੁ ਪਰਿਤ੍ਤਾਣਂ ਕਰੋਨ੍ਤਿ. ਯਂ ਵਾ ਸੋ ਦਿਸਂ ਗਤੋ ਹੋਤਿ, ਤਤੋ ਕਙ੍ਖਂ ਉਪ੍ਪਾਦੇਤ੍ਵਾ ਅਤ੍ਤਨੋ ਸਨ੍ਤਿਕਂ ਆਗਤਮਨੁਸ੍ਸੇ ‘‘ਏਤਿਸ੍ਸਂ ਦਿਸਾਯਂ ਅਮ੍ਹਾਕਂ ਅਨ੍ਤੇਵਾਸਿਕੋ ਵਸਤਿ, ਤਸ੍ਸ ਚ ਮਯ੍ਹਞ੍ਚ ਇਮਸ੍ਮਿਂ ਸਿਪ੍ਪੇ ਨਾਨਾਕਰਣਂ ਨਤ੍ਥਿ, ਗਚ੍ਛਥ ਤਮੇਵ ਪੁਚ੍ਛਥਾ’’ਤਿ ਏਵਂ ਅਨ੍ਤੇਵਾਸਿਕਂ ਪਗ੍ਗਣ੍ਹਨ੍ਤਾਪਿ ਤਸ੍ਸ ਤਤ੍ਥ ਲਾਭਸਕ੍ਕਾਰੁਪ੍ਪਤ੍ਤਿਯਾ ਪਰਿਤ੍ਤਾਣਂ ਕਰੋਨ੍ਤਿ ਨਾਮ, ਪਤਿਟ੍ਠਂ ਕਰੋਨ੍ਤੀਤਿ ਅਤ੍ਥੋ. ਸੇਸਮੇਤ੍ਥ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੬੯. ਤਤਿਯਦਿਸਾਵਾਰੇ ਸਮ੍ਮਾਨਨਾਯਾਤਿ ਦੇਵਮਾਤੇ ਤਿਸ੍ਸਮਾਤੇਤਿ ਏਵਂ ਸਮ੍ਭਾਵਿਤਕਥਾਕਥਨੇਨ. ਅਨਵਮਾਨਨਾਯਾਤਿ ਯਥਾ ਦਾਸਕਮ੍ਮਕਰਾਦਯੋ ਪੋਥੇਤ੍ਵਾ ਵਿਹੇਠੇਤ੍ਵਾ ਕਥੇਨ੍ਤਿ, ਏਵਂ ਹੀਲ਼ੇਤ੍ਵਾ ਵਿਮਾਨੇਤ੍ਵਾ ਅਕਥਨੇਨ. ਅਨਤਿਚਰਿਯਾਯਾਤਿ ਤਂ ਅਤਿਕ੍ਕਮਿਤ੍ਵਾ ਬਹਿ ਅਞ੍ਞਾਯ ਇਤ੍ਥਿਯਾ ਸਦ੍ਧਿਂ ਪਰਿਚਰਨ੍ਤੋ ਤਂ ਅਤਿਚਰਤਿ ਨਾਮ, ਤਥਾ ਅਕਰਣੇਨ. ਇਸ੍ਸਰਿਯਵੋਸ੍ਸਗ੍ਗੇਨਾਤਿ ਇਤ੍ਥਿਯੋ ਹਿ ਮਹਾਲਤਾਸਦਿਸਮ੍ਪਿ ਆਭਰਣਂ ਲਭਿਤ੍ਵਾ ਭਤ੍ਤਂ ਵਿਚਾਰੇਤੁਂ ਅਲਭਮਾਨਾ ਕੁਜ੍ਝਨ੍ਤਿ, ਕਟਚ੍ਛੁਂ ਹਤ੍ਥੇ ਠਪੇਤ੍ਵਾ ਤਵ ਰੁਚਿਯਾ ਕਰੋਹੀਤਿ ਭਤ੍ਤਗੇਹੇ ਵਿਸ੍ਸਟ੍ਠੇ ਸਬ੍ਬਂ ਇਸ੍ਸਰਿਯਂ ਵਿਸ੍ਸਟ੍ਠਂ ਨਾਮ ਹੋਤਿ, ਏਵਂ ਕਰਣੇਨਾਤਿ ਅਤ੍ਥੋ. ਅਲਙ੍ਕਾਰਾਨੁਪ੍ਪਦਾਨੇਨਾਤਿ ਅਤ੍ਤਨੋ ਵਿਭਵਾਨੁਰੂਪੇਨ ਅਲਙ੍ਕਾਰਦਾਨੇਨ. ਸੁਸਂਵਿਹਿਤਕਮ੍ਮਨ੍ਤਾਤਿ ਯਾਗੁਭਤ੍ਤਪਚਨਕਾਲਾਦੀਨਿ ਅਨਤਿਕ੍ਕਮਿਤ੍ਵਾ ਤਸ੍ਸ ਤਸ੍ਸ ਸਾਧੁਕਂ ਕਰਣੇਨ ਸੁਟ੍ਠੁ ਸਂਵਿਹਿਤਕਮ੍ਮਨ੍ਤਾ. ਸਙ੍ਗਹਿਤਪਰਿਜਨਾਤਿ ਸਮ੍ਮਾਨਨਾਦੀਹਿ ਚੇਵ ਪਹੇਣਕਪੇਸਨਾਦੀਹਿ ਚ ਸਙ੍ਗਹਿਤਪਰਿਜਨਾ. ਇਧ ਪਰਿਜਨੋ ਨਾਮ ਸਾਮਿਕਸ੍ਸ ਚੇਵ ਅਤ੍ਤਨੋ ਚ ਞਾਤਿਜਨੋ. ਅਨਤਿਚਾਰਿਨੀਤਿ ਸਾਮਿਕਂ ਮੁਞ੍ਚਿਤ੍ਵਾ ਅਞ੍ਞਂ ਮਨਸਾਪਿ ਨ ਪਤ੍ਥੇਤਿ. ਸਮ੍ਭਤਨ੍ਤਿ ਕਸਿਵਾਣਿਜ੍ਜਾਦੀਨਿ ਕਤ੍ਵਾ ਆਭਤਧਨਂ. ਦਕ੍ਖਾ ਚ ਹੋਤੀਤਿ ਯਾਗੁਭਤ੍ਤਸਮ੍ਪਾਦਨਾਦੀਸੁ ਛੇਕਾ ਨਿਪੁਣਾ ਹੋਤਿ. ਅਨਲਸਾਤਿ ਨਿਕ੍ਕੋਸਜ੍ਜਾ. ਯਥਾ ਅਞ੍ਞਾ ਕੁਸੀਤਾ ਨਿਸਿਨ੍ਨਟ੍ਠਾਨੇ ਨਿਸਿਨ੍ਨਾਵ ਹੋਨ੍ਤਿ ਠਿਤਟ੍ਠਾਨੇ ਠਿਤਾਵ, ਏਵਂ ਅਹੁਤ੍ਵਾ ਵਿਪ੍ਫਾਰਿਤੇਨ ਚਿਤ੍ਤੇਨ ਸਬ੍ਬਕਿਚ੍ਚਾਨਿ ਨਿਪ੍ਫਾਦੇਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੦. ਚਤੁਤ੍ਥਦਿਸਾਵਾਰੇ ਅਵਿਸਂਵਾਦਨਤਾਯਾਤਿ ਯਸ੍ਸ ਯਸ੍ਸ ਨਾਮਂ ਗਣ੍ਹਾਤਿ, ਤਂ ਤਂ ਅਵਿਸਂਵਾਦੇਤ੍ਵਾ ਇਦਮ੍ਪਿ ਅਮ੍ਹਾਕਂ ਗੇਹੇ ਅਤ੍ਥਿ, ਇਦਮ੍ਪਿ ਅਤ੍ਥਿ, ਗਹੇਤ੍ਵਾ ਗਚ੍ਛਾਹੀਤਿ ਏਵਂ ਅਵਿਸਂਵਾਦੇਤ੍ਵਾ ਦਾਨੇਨ. ਅਪਰਪਜਾ ਚਸ੍ਸ ਪਟਿਪੂਜੇਨ੍ਤੀਤਿ ਸਹਾਯਸ੍ਸ ਪੁਤ੍ਤਧੀਤਰੋ ਪਜਾ ਨਾਮ, ਤੇਸਂ ਪਨ ਪੁਤ੍ਤਧੀਤਰੋ ਚ ਨਤ੍ਤੁਪਨਤ੍ਤਕਾ ਚ ਅਪਰਪਜਾ ਨਾਮ. ਤੇ ਪਟਿਪੂਜੇਨ੍ਤਿ ਕੇਲ਼ਾਯਨ੍ਤਿ ਮਮਾਯਨ੍ਤਿ ਮਙ੍ਗਲਕਾਲਾਦੀਸੁ ਤੇਸਂ ਮਙ੍ਗਲਾਦੀਨਿ ਕਰੋਨ੍ਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਵੇਦਿਤਬ੍ਬਂ.

੨੭੧. ਯਥਾਬਲਂ ਕਮ੍ਮਨ੍ਤਸਂਵਿਧਾਨੇਨਾਤਿ ਦਹਰੇਹਿ ਕਾਤਬ੍ਬਂ ਮਹਲ੍ਲਕੇਹਿ, ਮਹਲ੍ਲਕੇਹਿ ਵਾ ਕਾਤਬ੍ਬਂ ਦਹਰੇਹਿ, ਇਤ੍ਥੀਹਿ ਕਾਤਬ੍ਬਂ ਪੁਰਿਸੇਹਿ, ਪੁਰਿਸੇਹਿ ਵਾ ਕਾਤਬ੍ਬਂ ਇਤ੍ਥੀਹਿ ਅਕਾਰੇਤ੍ਵਾ ਤਸ੍ਸ ਤਸ੍ਸ ਬਲਾਨੁਰੂਪੇਨੇਵ ਕਮ੍ਮਨ੍ਤਸਂਵਿਧਾਨੇਨ. ਭਤ੍ਤਵੇਤਨਾਨੁਪ੍ਪਦਾਨੇਨਾਤਿ ਅਯਂ ਖੁਦ੍ਦਕਪੁਤ੍ਤੋ, ਅਯਂ ਏਕਵਿਹਾਰੀਤਿ ਤਸ੍ਸ ਤਸ੍ਸ ਅਨੁਰੂਪਂ ਸਲ੍ਲਕ੍ਖੇਤ੍ਵਾ ਭਤ੍ਤਦਾਨੇਨ ਚੇਵ ਪਰਿਬ੍ਬਯਦਾਨੇਨ ਚ. ਗਿਲਾਨੁਪਟ੍ਠਾਨੇਨਾਤਿ ਅਫਾਸੁਕਕਾਲੇ ਕਮ੍ਮਂ ਅਕਾਰੇਤ੍ਵਾ ਸਪ੍ਪਾਯਭੇਸਜ੍ਜਾਦੀਨਿ ਦਤ੍ਵਾ ਪਟਿਜਗ੍ਗਨੇਨ. ਅਚ੍ਛਰਿਯਾਨਂ ਰਸਾਨਂ ਸਂਵਿਭਾਗੇਨਾਤਿ ਅਚ੍ਛਰਿਯੇ ਮਧੁਰਰਸੇ ਲਭਿਤ੍ਵਾ ਸਯਮੇਵ ਅਖਾਦਿਤ੍ਵਾ ਤੇਸਮ੍ਪਿ ਤਤੋ ਸਂਵਿਭਾਗਕਰਣੇਨ. ਸਮਯੇ ਵੋਸ੍ਸਗ੍ਗੇਨਾਤਿ ਨਿਚ੍ਚਸਮਯੇ ਚ ਕਾਲਸਮਯੇ ਚ ਵੋਸ੍ਸਜ੍ਜਨੇਨ. ਨਿਚ੍ਚਸਮਯੇ ਵੋਸ੍ਸਜ੍ਜਨਂ ਨਾਮ ਸਕਲਦਿਵਸਂ ਕਮ੍ਮਂ ਕਰੋਨ੍ਤਾ ਕਿਲਮਨ੍ਤਿ. ਤਸ੍ਮਾ ਯਥਾ ਨ ਕਿਲਮਨ੍ਤਿ, ਏਵਂ ਵੇਲਂ ਞਤ੍ਵਾ ਵਿਸ੍ਸਜ੍ਜਨਂ. ਕਾਲਸਮਯੇ ਵੋਸ੍ਸਗ੍ਗੋ ਨਾਮ ਛਣਨਕ੍ਖਤ੍ਤਕੀਲ਼ਾਦੀਸੁ ਅਲਙ੍ਕਾਰਭਣ੍ਡਖਾਦਨੀਯਭੋਜਨੀਯਾਦੀਨਿ ਦਤ੍ਵਾ ਵਿਸ੍ਸਜ੍ਜਨਂ. ਦਿਨ੍ਨਾਦਾਯਿਨੋਤਿ ਚੋਰਿਕਾਯ ਕਿਞ੍ਚਿ ਅਗਹੇਤ੍ਵਾ ਸਾਮਿਕੇਹਿ ਦਿਨ੍ਨਸ੍ਸੇਵ ਆਦਾਯਿਨੋ. ਸੁਕਤਕਮ੍ਮਕਰਾਤਿ ‘‘ਕਿਂ ਏਤਸ੍ਸ ਕਮ੍ਮੇਨ ਕਤੇਨ, ਨ ਮਯਂ ਕਿਞ੍ਚਿ ਲਭਾਮਾ’’ਤਿ ਅਨੁਜ੍ਝਾਯਿਤ੍ਵਾ ਤੁਟ੍ਠਹਦਯਾ ਯਥਾ ਤਂ ਕਮ੍ਮਂ ਸੁਕਤਂ ਹੋਤਿ, ਏਵਂ ਕਾਰਕਾ. ਕਿਤ੍ਤਿਵਣ੍ਣਹਰਾਤਿ ਪਰਿਸਮਜ੍ਝੇ ਕਥਾਯ ਸਮ੍ਪਤ੍ਤਾਯ ‘‘ਕੋ ਅਮ੍ਹਾਕਂ ਸਾਮਿਕੇਹਿ ਸਦਿਸੋ ਅਤ੍ਥਿ, ਮਯਂ ਅਤ੍ਤਨੋ ਦਾਸਭਾਵਮ੍ਪਿ ਨ ਜਾਨਾਮ, ਤੇਸਂ ਸਾਮਿਕਭਾਵਮ੍ਪਿ ਨ ਜਾਨਾਮ, ਏਵਂ ਨੋ ਅਨੁਕਮ੍ਪਨ੍ਤੀ’’ਤਿ ਗੁਣਕਥਾਹਾਰਕਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੨. ਮੇਤ੍ਤੇਨ ਕਾਯਕਮ੍ਮੇਨਾਤਿਆਦੀਸੁ ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਪੇਤ੍ਵਾ ਕਤਾਨਿ ਕਾਯਕਮ੍ਮਾਦੀਨਿ ਮੇਤ੍ਤਾਨਿ ਨਾਮ ਵੁਚ੍ਚਨ੍ਤਿ. ਤਤ੍ਥ ਭਿਕ੍ਖੂ ਨਿਮਨ੍ਤੇਸ੍ਸਾਮੀਤਿ ਵਿਹਾਰਗਮਨਂ, ਧਮਕਰਣਂ ਗਹੇਤ੍ਵਾ ਉਦਕਪਰਿਸ੍ਸਾਵਨਂ, ਪਿਟ੍ਠਿਪਰਿਕਮ੍ਮਪਾਦਪਰਿਕਮ੍ਮਾਦਿਕਰਣਞ੍ਚ ਮੇਤ੍ਤਂ ਕਾਯਕਮ੍ਮਂ ਨਾਮ. ਭਿਕ੍ਖੂ ਪਿਣ੍ਡਾਯ ਪਵਿਟ੍ਠੇ ਦਿਸ੍ਵਾ ‘‘ਸਕ੍ਕਚ੍ਚਂ ਯਾਗੁਂ ਦੇਥ, ਭਤ੍ਤਂ ਦੇਥਾ’’ਤਿਆਦਿਵਚਨਞ੍ਚੇਵ, ਸਾਧੁਕਾਰਂ ਦਤ੍ਵਾ ਧਮ੍ਮਸਵਨਞ੍ਚ ਸਕ੍ਕਚ੍ਚਂ ਪਟਿਸਨ੍ਥਾਰਕਰਣਾਦੀਨਿ ਚ ਮੇਤ੍ਤਂ ਵਚੀਕਮ੍ਮਂ ਨਾਮ. ‘‘ਅਮ੍ਹਾਕਂ ਕੁਲੂਪਕਤ੍ਥੇਰਾ ਅਵੇਰਾ ਹੋਨ੍ਤੁ ਅਬ੍ਯਾਪਜ੍ਜਾ’’ਤਿ ਏਵਂ ਚਿਨ੍ਤਨਂ ਮੇਤ੍ਤਂ ਮਨੋਕਮ੍ਮਂ ਨਾਮ. ਅਨਾਵਟਦ੍ਵਾਰਤਾਯਾਤਿ ਅਪਿਹਿਤਦ੍ਵਾਰਤਾਯ. ਤਤ੍ਥ ਸਬ੍ਬਦ੍ਵਾਰਾਨਿ ਵਿਵਰਿਤ੍ਵਾਪਿ ਸੀਲਵਨ੍ਤਾਨਂ ਅਦਾਯਕੋ ਅਕਾਰਕੋ ਪਿਹਿਤਦ੍ਵਾਰੋਯੇਵ. ਸਬ੍ਬਦ੍ਵਾਰਾਨਿ ਪਨ ਪਿਦਹਿਤ੍ਵਾਪਿ ਤੇਸਂ ਦਾਯਕੋ ਕਾਰਕੋ ਵਿਵਟਦ੍ਵਾਰੋਯੇਵ. ਇਤਿ ਸੀਲਵਨ੍ਤੇਸੁ ਗੇਹਦ੍ਵਾਰਂ ਆਗਤੇਸੁ ਸਨ੍ਤਂਯੇਵ ਨਤ੍ਥੀਤਿ ਅਵਤ੍ਵਾ ਦਾਤਬ੍ਬਂ. ਏਵਂ ਅਨਾਵਟਦ੍ਵਾਰਤਾ ਨਾਮ ਹੋਤਿ.

ਆਮਿਸਾਨੁਪ੍ਪਦਾਨੇਨਾਤਿ ਪੁਰੇਭਤ੍ਤਂ ਪਰਿਭੁਞ੍ਜਿਤਬ੍ਬਕਂ ਆਮਿਸਂ ਨਾਮ, ਤਸ੍ਮਾ ਸੀਲਵਨ੍ਤਾਨਂ ਯਾਗੁਭਤ੍ਤਸਮ੍ਪਦਾਨੇਨਾਤਿ ਅਤ੍ਥੋ. ਕਲ੍ਯਾਣੇਨ ਮਨਸਾ ਅਨੁਕਮ੍ਪਨ੍ਤੀਤਿ ‘‘ਸਬ੍ਬੇ ਸਤ੍ਤਾ ਸੁਖਿਤਾ ਹੋਨ੍ਤੁ ਅਵੇਰਾ ਅਰੋਗਾ ਅਬ੍ਯਾਪਜ੍ਜਾ’’ਤਿ ਏਵਂ ਹਿਤਫਰਣੇਨ. ਅਪਿਚ ਉਪਟ੍ਠਾਕਾਨਂ ਗੇਹਂ ਅਞ੍ਞੇ ਸੀਲਵਨ੍ਤੇ ਸਬ੍ਰਹ੍ਮਚਾਰੀ ਗਹੇਤ੍ਵਾ ਪਵਿਸਨ੍ਤਾਪਿ ਕਲ੍ਯਾਣੇਨ ਚੇਤਸਾ ਅਨੁਕਮ੍ਪਨ੍ਤਿ ਨਾਮ. ਸੁਤਂ ਪਰਿਯੋਦਾਪੇਨ੍ਤੀਤਿ ਯਂ ਤੇਸਂ ਪਕਤਿਯਾ ਸੁਤਂ ਅਤ੍ਥਿ, ਤਸ੍ਸ ਅਤ੍ਥਂ ਕਥੇਤ੍ਵਾ ਕਙ੍ਖਂ ਵਿਨੋਦੇਨ੍ਤਿ, ਤਥਤ੍ਤਾਯ ਵਾ ਪਟਿਪਜ੍ਜਾਪੇਨ੍ਤਿ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੨੭੩. ਅਲਮਤ੍ਤੋਤਿ ਪੁਤ੍ਤਦਾਰਭਰਣਂ ਕਤ੍ਵਾ ਅਗਾਰਂ ਅਜ੍ਝਾਵਸਨਸਮਤ੍ਥੋ. ਪਣ੍ਡਿਤੋਤਿ ਦਿਸਾਨਮਸ੍ਸਨਟ੍ਠਾਨੇ ਪਣ੍ਡਿਤੋ ਹੁਤ੍ਵਾ. ਸਣ੍ਹੋਤਿ ਸੁਖੁਮਤ੍ਥਦਸ੍ਸਨੇਨ ਸਣ੍ਹਵਾਚਾਭਣਨੇਨ ਵਾ ਸਣ੍ਹੋ ਹੁਤ੍ਵਾ. ਪਟਿਭਾਨਵਾਤਿ ਦਿਸਾਨਮਸ੍ਸਨਟ੍ਠਾਨੇ ਪਟਿਭਾਨਵਾ ਹੁਤ੍ਵਾ ਨਿਵਾਤਵੁਤ੍ਤੀਤਿ ਨੀਚਵੁਤ੍ਤਿ. ਅਤ੍ਥਦ੍ਧੋਤਿ ਥਮ੍ਭਰਹਿਤੋ. ਉਟ੍ਠਾਨਕੋਤਿ ਉਟ੍ਠਾਨਵੀਰਿਯਸਮ੍ਪਨ੍ਨੋ. ਅਨਲਸੋਤਿ ਨਿਕ੍ਕੋਸਜ੍ਜੋ. ਅਚ੍ਛਿਨ੍ਨਵੁਤ੍ਤੀਤਿ ਨਿਰਨ੍ਤਰਕਰਣਵਸੇਨ ਅਖਣ੍ਡਵੁਤ੍ਤਿ. ਮੇਧਾਵੀਤਿ ਠਾਨੁਪ੍ਪਤ੍ਤਿਯਾ ਪਞ੍ਞਾਯ ਸਮਨ੍ਨਾਗਤੋ.

ਸਙ੍ਗਾਹਕੋਤਿ ਚਤੂਹਿ ਸਙ੍ਗਹਵਤ੍ਥੂਹਿ ਸਙ੍ਗਹਕਰੋ. ਮਿਤ੍ਤਕਰੋਤਿ ਮਿਤ੍ਤਗਵੇਸਨੋ. ਵਦਞ੍ਞੂਤਿ ਪੁਬ੍ਬਕਾਰਿਨਾ, ਵੁਤ੍ਤਵਚਨਂ ਜਾਨਾਤਿ. ਸਹਾਯਕਸ੍ਸ ਘਰਂ ਗਤਕਾਲੇ ‘‘ਮਯ੍ਹਂ ਸਹਾਯਕਸ੍ਸ ਵੇਠਨਂ ਦੇਥ, ਸਾਟਕਂ ਦੇਥ, ਮਨੁਸ੍ਸਾਨਂ ਭਤ੍ਤਵੇਤਨਂ ਦੇਥਾ’’ਤਿ ਵੁਤ੍ਤਵਚਨਮਨੁਸ੍ਸਰਨ੍ਤੋ ਤਸ੍ਸ ਅਤ੍ਤਨੋ ਗੇਹਂ ਆਗਤਸ੍ਸ ਤਤ੍ਤਕਂ ਵਾ ਤਤੋ ਅਤਿਰੇਕਂ ਵਾ ਪਟਿਕਤ੍ਤਾਤਿ ਅਤ੍ਥੋ. ਅਪਿਚ ਸਹਾਯਕਸ੍ਸ ਘਰਂ ਗਨ੍ਤ੍ਵਾ ਇਮਂ ਨਾਮ ਗਣ੍ਹਿਸ੍ਸਾਮੀਤਿ ਆਗਤਂ ਸਹਾਯਕਂ ਲਜ੍ਜਾਯ ਗਣ੍ਹਿਤੁਂ ਅਸਕ੍ਕੋਨ੍ਤਂ ਅਨਿਚ੍ਛਾਰਿਤਮ੍ਪਿ ਤਸ੍ਸ ਵਾਚਂ ਞਤ੍ਵਾ ਯੇਨ ਅਤ੍ਥੇਨ ਸੋ ਆਗਤੋ, ਤਂ ਨਿਪ੍ਫਾਦੇਨ੍ਤੋ ਵਦਞ੍ਞੂ ਨਾਮ. ਯੇਨ ਯੇਨ ਵਾ ਪਨ ਸਹਾਯਕਸ੍ਸ ਊਨਂ ਹੋਤਿ, ਓਲੋਕੇਤ੍ਵਾ ਤਂ ਤਂ ਦੇਨ੍ਤੋਪਿ ਵਦਞ੍ਞੂਯੇਵ. ਨੇਤਾਤਿ ਤਂ ਤਂ ਅਤ੍ਥਂ ਦਸ੍ਸੇਨ੍ਤੋ ਪਞ੍ਞਾਯ ਨੇਤਾ. ਵਿਵਿਧਾਨਿ ਕਾਰਣਾਨਿ ਦਸ੍ਸੇਨ੍ਤੋ ਨੇਤੀਤਿ ਵਿਨੇਤਾ. ਪੁਨਪ੍ਪੁਨਂ ਨੇਤੀਤਿ ਅਨੁਨੇਤਾ.

ਤਤ੍ਥ ਤਤ੍ਥਾਤਿ ਤਸ੍ਮਿਂ ਤਸ੍ਮਿਂ ਪੁਗ੍ਗਲੇ. ਰਥਸ੍ਸਾਣੀਵ ਯਾਯਤੋਤਿ ਯਥਾ ਆਣਿਯਾ ਸਤਿਯੇਵ ਰਥੋ ਯਾਤਿ, ਅਸਤਿ ਨ ਯਾਤਿ, ਏਵਂ ਇਮੇਸੁ ਸਙ੍ਗਹੇਸੁ ਸਤਿਯੇਵ ਲੋਕੋ ਵਤ੍ਤਤਿ, ਅਸਤਿ ਨ ਵਤ੍ਤਤਿ. ਤੇਨ ਵੁਤ੍ਤਂ – ‘‘ਏਤੇ ਖੋ ਸਙ੍ਗਹਾ ਲੋਕੇ, ਰਥਸ੍ਸਾਣੀਵ ਯਾਯਤੋ’’ਤਿ.

ਨ ਮਾਤਾ ਪੁਤ੍ਤਕਾਰਣਾਤਿ ਯਦਿ ਮਾਤਾ ਏਤੇ ਸਙ੍ਗਹੇ ਪੁਤ੍ਤਸ੍ਸ ਨ ਕਰੇਯ੍ਯ, ਪੁਤ੍ਤਕਾਰਣਾ ਮਾਨਂ ਵਾ ਪੂਜਂ ਵਾ ਨ ਲਭੇਯ੍ਯ.

ਸਙ੍ਗਹਾ ਏਤੇਤਿ ਉਪਯੋਗਵਚਨੇ ਪਚ੍ਚਤ੍ਤਂ. ‘‘ਸਙ੍ਗਹੇ ਏਤੇ’’ਤਿ ਵਾ ਪਾਠੋ. ਸਮ੍ਮਪੇਕ੍ਖਨ੍ਤੀਤਿ ਸਮ੍ਮਾ ਪੇਕ੍ਖਨ੍ਤਿ. ਪਾਸਂਸਾ ਚ ਭਵਨ੍ਤੀਤਿ ਪਸਂਸਨੀਯਾ ਚ ਭਵਨ੍ਤਿ.

੨੭੪. ਇਤਿ ਭਗਵਾ ਯਾ ਦਿਸਾ ਸਨ੍ਧਾਯ ਤੇ ਗਹਪਤਿਪੁਤ੍ਤ ਪਿਤਾ ਆਹ ‘‘ਦਿਸਾ ਨਮਸ੍ਸੇਯ੍ਯਾਸੀ’’ਤਿ, ਇਮਾ ਤਾ ਛ ਦਿਸਾ. ਯਦਿ ਤ੍ਵਂ ਪਿਤੁ ਵਚਨਂ ਕਰੋਸਿ, ਇਮਾ ਦਿਸਾ ਨਮਸ੍ਸਾਤਿ ਦਸ੍ਸੇਨ੍ਤੋ ਸਿਙ੍ਗਾਲਸ੍ਸ ਪੁਚ੍ਛਾਯ ਠਤ੍ਵਾ ਦੇਸਨਂ ਮਤ੍ਥਕਂ ਪਾਪੇਤ੍ਵਾ ਰਾਜਗਹਂ ਪਿਣ੍ਡਾਯ ਪਾਵਿਸਿ. ਸਿਙ੍ਗਾਲਕੋਪਿ ਸਰਣੇਸੁ ਪਤਿਟ੍ਠਾਯ ਚਤ੍ਤਾਲੀਸਕੋਟਿਧਨਂ ਬੁਦ੍ਧਸਾਸਨੇ ਵਿਕਿਰਿਤ੍ਵਾ ਪੁਞ੍ਞਕਮ੍ਮਂ ਕਤ੍ਵਾ ਸਗ੍ਗਪਰਾਯਣੋ ਅਹੋਸਿ. ਇਮਸ੍ਮਿਞ੍ਚ ਪਨ ਸੁਤ੍ਤੇ ਯਂ ਗਿਹੀਹਿ ਕਤ੍ਤਬ੍ਬਂ ਕਮ੍ਮਂ ਨਾਮ, ਤਂ ਅਕਥਿਤਂ ਨਤ੍ਥਿ, ਗਿਹਿਵਿਨਯੋ ਨਾਮਾਯਂ ਸੁਤ੍ਤਨ੍ਤੋ. ਤਸ੍ਮਾ ਇਮਂ ਸੁਤ੍ਵਾ ਯਥਾਨੁਸਿਟ੍ਠਂ ਪਟਿਪਜ੍ਜਮਾਨਸ੍ਸ ਵੁਦ੍ਧਿਯੇਵ ਪਾਟਿਕਙ੍ਖਾ, ਨੋ ਪਰਿਹਾਨੀਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਸਿਙ੍ਗਾਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.