੭. ਲਕ੍ਖਣਸੁਤ੍ਤਵਣ੍ਣਨਾ
ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਣ੍ਣਨਾ
੧੯੯. ਏਵਂ ਮੇ ਸੁਤਨ੍ਤਿ ਲਕ੍ਖਣਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ. ਦ੍ਵਤ੍ਤਿਂਸਿਮਾਨੀਤਿ ਦ੍ਵਤ੍ਤਿਂਸ ਇਮਾਨਿ. ਮਹਾਪੁਰਿਸਲਕ੍ਖਣਾਨੀਤਿ ਮਹਾਪੁਰਿਸਬ੍ਯਞ੍ਜਨਾਨਿ ਮਹਾਪੁਰਿਸਨਿਮਿਤ੍ਤਾਨਿ ‘‘ਅਯਂ ਮਹਾਪੁਰਿਸੋ’’ਤਿ ਸਞ੍ਜਾਨਨਕਾਰਣਾਨਿ. ‘‘ਯੇਹਿ ਸਮਨ੍ਨਾਗਤਸ੍ਸ ਮਹਾਪੁਰਿਸਸ੍ਸਾ’’ਤਿਆਦਿ ਮਹਾਪਦਾਨੇ ਵਿਤ੍ਥਾਰਿਤਨਯੇਨੇਵ ਵੇਦਿਤਬ੍ਬਂ.
‘‘ਬਾਹਿਰਕਾਪਿ ਇਸਯੋ ਧਾਰੇਨ੍ਤਿ, ਨੋ ਚ ਖੋ ਜਾਨਨ੍ਤਿ ‘ਇਮਸ੍ਸ ਕਮ੍ਮਸ੍ਸ ਕਤਤ੍ਤਾ ਇਮਂ ਲਕ੍ਖਣਂ ਪਟਿਲਭਤੀ’ਤਿ’’ ਕਸ੍ਮਾ ਆਹ? ਅਟ੍ਠੁਪ੍ਪਤ੍ਤਿਯਾ ਅਨੁਰੂਪਤ੍ਤਾ. ਇਦਞ੍ਹਿ ਸੁਤ੍ਤਂ ਸਅਟ੍ਠੁਪ੍ਪਤ੍ਤਿਕਂ. ਸਾ ਪਨਸ੍ਸ ਅਟ੍ਠੁਪ੍ਪਤ੍ਤਿ ਕਤ੍ਥ ਸਮੁਟ੍ਠਿਤਾ? ਅਨ੍ਤੋਗਾਮੇ ਮਨੁਸ੍ਸਾਨਂ ਅਨ੍ਤਰੇ. ਤਦਾ ਕਿਰ ਸਾਵਤ੍ਥਿਵਾਸਿਨੋ ਅਤ੍ਤਨੋ ਅਤ੍ਤਨੋ ਗੇਹੇਸੁ ਚ ਗੇਹਦ੍ਵਾਰੇਸੁ ਚ ਸਨ੍ਥਾਗਾਰਾਦੀਸੁ ਚ ਨਿਸੀਦਿਤ੍ਵਾ ਕਥਂ ਸਮੁਟ੍ਠਾਪੇਸੁਂ – ‘‘ਭਗਵਤੋ ਅਸੀਤਿਅਨੁਬ੍ਯਞ੍ਜਨਾਨਿ ਬ੍ਯਾਮਪ੍ਪਭਾ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਾਨਿ, ਯੇਹਿ ਚ ਭਗਵਤੋ ਕਾਯੋ, ਸਬ੍ਬਫਾਲਿਫੁਲ੍ਲੋ ਵਿਯ ਪਾਰਿਚ੍ਛਤ੍ਤਕੋ, ਵਿਕਸਿਤਮਿਵ ਕਮਲਵਨਂ, ਨਾਨਾਰਤਨਵਿਚਿਤ੍ਤਂ ਵਿਯ ਸੁਵਣ੍ਣਤੋਰਣਂ, ਤਾਰਾਮਰਿਚਿਵਿਰੋਚਮਿਵ ਗਗਨਤਲਂ, ਇਤੋ ਚਿਤੋ ਚ ਵਿਧਾਵਮਾਨਾ ਵਿਪ੍ਫਨ੍ਦਮਾਨਾ ਛਬ੍ਬਣ੍ਣਰਸ੍ਮਿਯੋ ਮੁਞ੍ਚਨ੍ਤੋ ਅਤਿਵਿਯ ਸੋਭਤਿ. ਭਗਵਤੋ ਚ ਇਮਿਨਾ ਨਾਮ ਕਮ੍ਮੇਨ ਇਦਂ ਲਕ੍ਖਣਂ ਨਿਬ੍ਬਤ੍ਤਨ੍ਤਿ ਕਥਿਤਂ ਨਤ੍ਥਿ, ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਪਨ ਕਟਚ੍ਛੁਭਤ੍ਤਮਤ੍ਤਂ ਵਾ ਪੁਬ੍ਬੇ ਦਿਨ੍ਨਪਚ੍ਚਯਾ ਏਵਂ ਉਪ੍ਪਜ੍ਜਤੀਤਿ ਭਗਵਤਾ ਵੁਤ੍ਤਂ. ਕਿਂ ਨੁ ਖੋ ਸਤ੍ਥਾ ਕਮ੍ਮਂ ਅਕਾਸਿ, ਯੇਨਸ੍ਸ ਇਮਾਨਿ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤੀ’’ਤਿ.
ਅਥਾਯਸ੍ਮਾ ਆਨਨ੍ਦੋ ਅਨ੍ਤੋਗਾਮੇ ਚਰਨ੍ਤੋ ਇਮਂ ਕਥਾਸਲ੍ਲਾਪਂ ਸੁਤ੍ਵਾ ਕਤਭਤ੍ਤਕਿਚ੍ਚੋ ਵਿਹਾਰਂ ਆਗਨ੍ਤ੍ਵਾ ਸਤ੍ਥੁ ਵਤ੍ਤਂ ਕਤ੍ਵਾ ਵਨ੍ਦਿਤ੍ਵਾ ਠਿਤੋ ‘‘ਮਯਾ, ਭਨ੍ਤੇ, ਅਨ੍ਤੋਗਾਮੇ ਏਕਾ ਕਥਾ ਸੁਤਾ’’ਤਿ ਆਹ. ਤਤੋ ਭਗਵਤਾ ‘‘ਕਿਂ ਤੇ, ਆਨਨ੍ਦ, ਸੁਤ’’ਨ੍ਤਿ ਵੁਤ੍ਤੇ ਸਬ੍ਬਂ ਆਰੋਚੇਸਿ. ਸਤ੍ਥਾ ਥੇਰਸ੍ਸ ਵਚਨਂ ਸੁਤ੍ਵਾ ਪਰਿਵਾਰੇਤ੍ਵਾ ਨਿਸਿਨ੍ਨੇ ਭਿਕ੍ਖੂ ਆਮਨ੍ਤੇਤ੍ਵਾ ‘‘ਦ੍ਵਤ੍ਤਿਂਸਿਮਾਨਿ, ਭਿਕ੍ਖਵੇ, ਮਹਾਪੁਰਿਸਸ੍ਸ ਮਹਾਪੁਰਿਸਲਕ੍ਖਣਾਨੀ’’ਤਿ ਪਟਿਪਾਟਿਯਾ ਲਕ੍ਖਣਾਨਿ ਦਸ੍ਸੇਤ੍ਵਾ ਯੇਨ ਕਮ੍ਮੇਨ ਯਂ ਨਿਬ੍ਬਤ੍ਤਂ, ਤਸ੍ਸ ਦਸ੍ਸਨਤ੍ਥਂ ਏਵਮਾਹ.
ਸੁਪ੍ਪਤਿਟ੍ਠਿਤਪਾਦਤਾਲਕ੍ਖਣਵਣ੍ਣਨਾ
੨੦੧. ਪੁਰਿਮਂ ਜਾਤਿਨ੍ਤਿਆਦੀਸੁ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਾ ਜਾਤਵਸੇਨ ‘‘ਜਾਤੀ’’ਤਿ ਵੁਤ੍ਤਾ. ਤਥਾ ਭਵਨਵਸੇਨ ‘‘ਭਵੋ’’ਤਿ, ਨਿਵੁਤ੍ਥਵਸੇਨ ਆਲਯਟ੍ਠੇਨ ਵਾ ‘‘ਨਿਕੇਤੋ’’ਤਿ. ਤਿਣ੍ਣਮ੍ਪਿ ਪਦਾਨਂ ਪੁਬ੍ਬੇ ਨਿਵੁਤ੍ਥਕ੍ਖਨ੍ਧਸਨ੍ਤਾਨੇ ਠਿਤੋਤਿ ਅਤ੍ਥੋ. ਇਦਾਨਿ ਯਸ੍ਮਾ ਤਂ ਖਨ੍ਧਸਨ੍ਤਾਨਂ ਦੇਵਲੋਕਾਦੀਸੁਪਿ ਵਤ੍ਤਤਿ. ਲਕ੍ਖਣਨਿਬ੍ਬਤ੍ਤਨਸਮਤ੍ਥਂ ਪਨ ਕੁਸਲਕਮ੍ਮਂ ਤਤ੍ਥ ਨ ਸੁਕਰਂ, ਮਨੁਸ੍ਸਭੂਤਸ੍ਸੇਵ ਸੁਕਰਂ. ਤਸ੍ਮਾ ਯਥਾਭੂਤੇਨ ਯਂ ਕਮ੍ਮਂ ਕਤਂ, ਤਂ ਦਸ੍ਸੇਨ੍ਤੋ ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋਤਿ ਆਹ. ਅਕਾਰਣਂ ਵਾ ਏਤਂ. ਹਤ੍ਥਿਅਸ੍ਸਮਿਗਮਹਿਂਸਵਾਨਰਾਦਿਭੂਤੋਪਿ ਮਹਾਪੁਰਿਸੋ ਪਾਰਮਿਯੋ ਪੂਰੇਤਿਯੇਵ. ਯਸ੍ਮਾ ਪਨ ਏਵਰੂਪੇ ਅਤ੍ਤਭਾਵੇ ਠਿਤੇਨ ਕਤਕਮ੍ਮਂ ਨ ਸਕ੍ਕਾ ਸੁਖੇਨ ਦੀਪੇਤੁਂ, ਮਨੁਸ੍ਸਭਾਵੇ ਠਿਤੇਨ ਕਤਕਮ੍ਮਂ ਪਨ ਸਕ੍ਕਾ ਸੁਖੇਨ ਦੀਪੇਤੁਂ. ਤਸ੍ਮਾ ‘‘ਪੁਬ੍ਬੇ ਮਨੁਸ੍ਸਭੂਤੋ ਸਮਾਨੋ’’ਤਿ ਆਹ.
ਦਲ਼੍ਹਸਮਾਦਾਨੋਤਿ ਥਿਰਗਹਣੋ. ਕੁਸਲੇਸੁ ਧਮ੍ਮੇਸੂਤਿ ਦਸਕੁਸਲਕਮ੍ਮਪਥੇਸੁ. ਅਵਤ੍ਥਿਤਸਮਾਦਾਨੋਤਿ ਨਿਚ੍ਚਲਗਹਣੋ ਅਨਿਵਤ੍ਤਿਤਗਹਣੋ. ਮਹਾਸਤ੍ਤਸ੍ਸ ਹਿ ਅਕੁਸਲਕਮ੍ਮਤੋ ਅਗ੍ਗਿਂ ਪਤ੍ਵਾ ਕੁਕ੍ਕੁਟਪਤ੍ਤਂ ਵਿਯ ਚਿਤ੍ਤਂ ਪਟਿਕੁਟਤਿ, ਕੁਸਲਂ ਪਤ੍ਵਾ ਵਿਤਾਨਂ ਵਿਯ ਪਸਾਰਿਯਤਿ. ਤਸ੍ਮਾ ਦਲ਼੍ਹਸਮਾਦਾਨੋ ਹੋਤਿ ਅਵਤ੍ਥਿਤਸਮਾਦਾਨੋ. ਨ ਸਕ੍ਕਾ ਕੇਨਚਿ ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਦੇਵੇਨ ਵਾ ਮਾਰੇਨ ਵਾ ਬ੍ਰਹ੍ਮੁਨਾ ਵਾ ਕੁਸਲਸਮਾਦਾਨਂ ਵਿਸ੍ਸਜ੍ਜਾਪੇਤੁਂ.
ਤਤ੍ਰਿਮਾਨਿ ਵਤ੍ਥੂਨਿ – ਪੁਬ੍ਬੇ ਕਿਰ ਮਹਾਪੁਰਿਸੋ ਕਲਨ੍ਦਕਯੋਨਿਯਂ ਨਿਬ੍ਬਤ੍ਤਿ. ਅਥ ਦੇਵੇ ਵੁਟ੍ਠੇ ਓਘੋ ਆਗਨ੍ਤ੍ਵਾ ਕੁਲਾਵਕਂ ਗਹੇਤ੍ਵਾ ਸਮੁਦ੍ਦਮੇਵ ਪਵੇਸੇਸਿ. ਮਹਾਪੁਰਿਸੋ ‘‘ਪੁਤ੍ਤਕੇ ਨੀਹਰਿਸ੍ਸਾਮੀ’’ਤਿ ਨਙ੍ਗੁਟ੍ਠਂ ਤੇਮੇਤ੍ਵਾ ਤੇਮੇਤ੍ਵਾ ਸਮੁਦ੍ਦਤੋ ਉਦਕਂ ਬਹਿ ਖਿਪਿ. ਸਤ੍ਤਮੇ ਦਿਵਸੇ ਸਕ੍ਕੋ ਆਵਜ੍ਜਿਤ੍ਵਾ ਤਤ੍ਥ ਆਗਮ੍ਮ ‘‘ਕਿਂ ਕਰੋਸੀ’’ਤਿ ਪੁਚ੍ਛਿ? ਸੋ ਤਸ੍ਸ ਆਰੋਚੇਸਿ. ਸਕ੍ਕੋ ਮਹਾਸਮੁਦ੍ਦਤੋ ਉਦਕਸ੍ਸ ਦੁਨ੍ਨੀਹਰਣੀਯਭਾਵਂ ਕਥੇਸਿ. ਬੋਧਿਸਤ੍ਤੋ ਤਾਦਿਸੇਨ ਕੁਸੀਤੇਨ ਸਦ੍ਧਿਂ ਕਥੇਤੁਮ੍ਪਿ ਨ ਵਟ੍ਟਤਿ. ‘‘ਮਾ ਇਧ ਤਿਟ੍ਠਾ’’ਤਿ ਅਪਸਾਰੇਸਿ. ਸਕ੍ਕੋ ‘‘ਅਨੋਮਪੁਰਿਸੇਨ ਗਹਿਤਗਹਣਂ ਨ ਸਕ੍ਕਾ ਵਿਸ੍ਸਜ੍ਜਾਪੇਤੁ’’ਨ੍ਤਿ ਤੁਟ੍ਠੋ ਤਸ੍ਸ ਪੁਤ੍ਤਕੇ ਆਨੇਤ੍ਵਾ ਅਦਾਸਿ. ਮਹਾਜਨਕਕਾਲੇਪਿ ਮਹਾਸਮੁਦ੍ਦਂ ਤਰਮਾਨੋ ‘‘ਕਸ੍ਮਾ ਮਹਾਸਮੁਦ੍ਦਂ ਤਰਸੀ’’ਤਿ ਦੇਵਤਾਯ ਪੁਟ੍ਠੋ ‘‘ਪਾਰਂ ਗਨ੍ਤ੍ਵਾ ਕੁਲਸਨ੍ਤਕੇ ਰਟ੍ਠੇ ਰਜ੍ਜਂ ਗਹੇਤ੍ਵਾ ਦਾਨਂ ਦਾਤੁਂ ਤਰਾਮੀ’’ਤਿ ਆਹ. ਤਤੋ ਦੇਵਤਾਯ – ‘‘ਅਯਂ ਮਹਾਸਮੁਦ੍ਦੋ ਗਮ੍ਭੀਰੋ ਚੇਵ ਪੁਥੁਲੋ ਚ, ਕਦਾ ਨਂ ਤਰਿਸ੍ਸਤੀ’’ਤਿ ਵੁਤ੍ਤੇ ਸੋ ਆਹ ‘‘ਤਵੇਸੋ ਮਹਾਸਮੁਦ੍ਦਸਦਿਸੋ, ਮਯ੍ਹਂ ਪਨ ਅਜ੍ਝਾਸਯਂ ਆਗਮ੍ਮ ਖੁਦ੍ਦਕਮਾਤਿਕਾ ਵਿਯ ਖਾਯਤਿ. ਤ੍ਵਂਯੇਵ ਮਂ ਦਕ੍ਖਿਸ੍ਸਸਿ ਸਮੁਦ੍ਦਂ ਤਰਿਤ੍ਵਾ ਸਮੁਦ੍ਦਪਾਰਤੋ ਧਨਂ ਆਹਰਿਤ੍ਵਾ ਕੁਲਸਨ੍ਤਕਂ ਰਜ੍ਜਂ ਗਹੇਤ੍ਵਾ ਦਾਨਂ ਦਦਮਾਨ’’ਨ੍ਤਿ. ਦੇਵਤਾ ‘‘ਅਨੋਮਪੁਰਿਸੇਨ ਗਹਿਤਗਹਣਂ ਨ ਸਕ੍ਕਾ ਵਿਸ੍ਸਜ੍ਜਾਪੇਤੁ’’ਨ੍ਤਿ ਬੋਧਿਸਤ੍ਤਂ ਆਲਿਙ੍ਗੇਤ੍ਵਾ ਹਰਿਤ੍ਵਾ ਉਯ੍ਯਾਨੇ ਨਿਪਜ੍ਜਾਪੇਸਿ. ਸੋ ਛਤ੍ਤਂ ਉਸ੍ਸਾਪੇਤ੍ਵਾ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਪਰਿਚ੍ਚਾਗਂ ਕਤ੍ਵਾ ਅਪਰਭਾਗੇ ਨਿਕ੍ਖਮ੍ਮ ਪਬ੍ਬਜਿਤੋ. ਏਵਂ ਮਹਾਸਤ੍ਤੋ ਨ ਸਕ੍ਕਾ ਕੇਨਚਿ ਸਮਣੇਨ ਵਾ…ਪੇ… ਬ੍ਰਹ੍ਮੁਨਾ ਵਾ ਕੁਸਲਸਮਾਦਾਨਂ ਵਿਸ੍ਸਜ੍ਜਾਪੇਤੁਂ. ਤੇਨ ਵੁਤ੍ਤਂ – ‘‘ਦਲ਼੍ਹਸਮਾਦਾਨੋ ਅਹੋਸਿ ਕੁਸਲੇਸੁ ਧਮ੍ਮੇਸੁ ਅਵਤ੍ਥਿਤਸਮਾਦਾਨੋ’’ਤਿ.
ਇਦਾਨਿ ਯੇਸੁ ਕੁਸਲੇਸੁ ਧਮ੍ਮੇਸੁ ਅਵਤ੍ਥਿਤਸਮਾਦਾਨੋ ਅਹੋਸਿ, ਤੇ ਦਸ੍ਸੇਤੁਂ ਕਾਯਸੁਚਰਿਤੇਤਿਆਦਿਮਾਹ. ਦਾਨਸਂਵਿਭਾਗੇਤਿ ਏਤ੍ਥ ਚ ਦਾਨਮੇਵ ਦਿਯ੍ਯਨਵਸੇਨ ਦਾਨਂ, ਸਂਵਿਭਾਗਕਰਣਵਸੇਨ ਸਂਵਿਭਾਗੋ. ਸੀਲਸਮਾਦਾਨੇਤਿ ਪਞ੍ਚਸੀਲਦਸਸੀਲਚਤੁਪਾਰਿਸੁਦ੍ਧਿਸੀਲਪੂਰਣਕਾਲੇ. ਉਪੋਸਥੂਪਵਾਸੇਤਿ ਚਾਤੁਦ੍ਦਸਿਕਾਦਿਭੇਦਸ੍ਸ ਉਪੋਸਥਸ੍ਸ ਉਪਵਸਨਕਾਲੇ. ਮਤ੍ਤੇਯ੍ਯਤਾਯਾਤਿ ਮਾਤੁਕਾਤਬ੍ਬਵਤ੍ਤੇ. ਸੇਸਪਦੇਸੁਪਿ ਏਸੇਵ ਨਯੋ. ਅਞ੍ਞਤਰਞ੍ਞਤਰੇਸੁ ਚਾਤਿ ਅਞ੍ਞੇਸੁ ਚ ਏਵਰੂਪੇਸੁ. ਅਧਿਕੁਸਲੇਸੂਤਿ ਏਤ੍ਥ ਅਤ੍ਥਿ ਕੁਸਲਾ, ਅਤ੍ਥਿ ਅਧਿਕੁਸਲਾ. ਸਬ੍ਬੇਪਿ ਕਾਮਾਵਚਰਾ ਕੁਸਲਾ ਕੁਸਲਾ ਨਾਮ, ਰੂਪਾਵਚਰਾ ਅਧਿਕੁਸਲਾ. ਉਭੋਪਿ ਤੇ ਕੁਸਲਾ ਨਾਮ, ਅਰੂਪਾਵਚਰਾ ਅਧਿਕੁਸਲਾ. ਸਬ੍ਬੇਪਿ ਤੇ ਕੁਸਲਾ ਨਾਮ, ਸਾਵਕਪਾਰਮੀਪਟਿਲਾਭਪਚ੍ਚਯਾ ਕੁਸਲਾ ਅਧਿਕੁਸਲਾ ਨਾਮ. ਤੇਪਿ ਕੁਸਲਾ ਨਾਮ, ਪਚ੍ਚੇਕਬੋਧਿਪਟਿਲਾਭਪਚ੍ਚਯਾ ਕੁਸਲਾ ਅਧਿਕੁਸਲਾ. ਤੇਪਿ ਕੁਸਲਾ ਨਾਮ, ਸਬ੍ਬਞ੍ਞੁਤਞ੍ਞਾਣਪ੍ਪਟਿਲਾਭਪਚ੍ਚਯਾ ਪਨ ਕੁਸਲਾ ਇਧ ‘‘ਅਧਿਕੁਸਲਾ’’ਤਿ ਅਧਿਪ੍ਪੇਤਾ. ਤੇਸੁ ਅਧਿਕੁਸਲੇਸੁ ਧਮ੍ਮੇਸੁ ਦਲ਼੍ਹਸਮਾਦਾਨੋ ਅਹੋਸਿ ਅਵਤ੍ਥਿਤਸਮਾਦਾਨੋ.
ਕਟਤ੍ਤਾ ਉਪਚਿਤਤ੍ਤਾਤਿ ਏਤ੍ਥ ਸਕਿਮ੍ਪਿ ਕਤਂ ਕਤਮੇਵ, ਅਭਿਣ੍ਹਕਰਣੇਨ ਪਨ ਉਪਚਿਤਂ ਹੋਤਿ. ਉਸ੍ਸਨ੍ਨਤ੍ਤਾਤਿ ਪਿਣ੍ਡੀਕਤਂ ਰਾਸੀਕਤਂ ਕਮ੍ਮਂ ਉਸ੍ਸਨ੍ਨਨ੍ਤਿ ਵੁਚ੍ਚਤਿ. ਤਸ੍ਮਾ ‘‘ਉਸ੍ਸਨ੍ਨਤ੍ਤਾ’’ਤਿ ਵਦਨ੍ਤੋ ਮਯਾ ਕਤਕਮ੍ਮਸ੍ਸ ਚਕ੍ਕਵਾਲ਼ਂ ਅਤਿਸਮ੍ਬਾਧਂ, ਭਵਗ੍ਗਂ ਅਤਿਨੀਚਂ, ਏਵਂ ਮੇ ਉਸ੍ਸਨ੍ਨਂ ਕਮ੍ਮਨ੍ਤਿ ਦਸ੍ਸੇਤਿ. ਵਿਪੁਲਤ੍ਤਾਤਿ ਅਪ੍ਪਮਾਣਤ੍ਤਾ. ਇਮਿਨਾ ‘‘ਅਨਨ੍ਤਂ ਅਪਰਿਮਾਣਂ ਮਯਾ ਕਤਂ ਕਮ੍ਮ’’ਨ੍ਤਿ ਦਸ੍ਸੇਤਿ. ਅਧਿਗ੍ਗਣ੍ਹਾਤੀਤਿ ਅਧਿਭਵਤਿ, ਅਞ੍ਞੇਹਿ ਦੇਵੇਹਿ ਅਤਿਰੇਕਂ ਲਭਤੀਤਿ ਅਤ੍ਥੋ. ਪਟਿਲਭਤੀਤਿ ਅਧਿਗਚ੍ਛਤਿ.
ਸਬ੍ਬਾਵਨ੍ਤੇਹਿ ਪਾਦਤਲੇਹੀਤਿ ਇਦਂ ‘‘ਸਮਂ ਪਾਦਂ ਭੂਮਿਯਂ ਨਿਕ੍ਖਿਪਤੀ’’ਤਿ ਏਤਸ੍ਸ ਵਿਤ੍ਥਾਰਵਚਨਂ. ਤਤ੍ਥ ਸਬ੍ਬਾਵਨ੍ਤੇਹੀਤਿ ਸਬ੍ਬਪਦੇਸਵਨ੍ਤੇਹਿ, ਨ ਏਕੇਨ ਪਦੇਸੇਨ ਪਠਮਂ ਫੁਸਤਿ, ਨ ਏਕੇਨ ਪਚ੍ਛਾ, ਸਬ੍ਬੇਹੇਵ ਪਾਦਤਲੇਹਿ ਸਮਂ ਫੁਸਤਿ, ਸਮਂ ਉਦ੍ਧਰਤਿ. ਸਚੇਪਿ ਹਿ ਤਥਾਗਤੋ ‘‘ਅਨੇਕਸਤਪੋਰਿਸਂ ਨਰਕਂ ਅਕ੍ਕਮਿਸ੍ਸਾਮੀ’’ਤਿ ਪਾਦਂ ਅਭਿਨੀਹਰਤਿ. ਤਾਵਦੇਵ ਨਿਨ੍ਨਟ੍ਠਾਨਂ ਵਾਤਪੂਰਿਤਾ ਵਿਯ ਕਮ੍ਮਾਰਭਸ੍ਤਾ ਉਨ੍ਨਮਿਤ੍ਵਾ ਪਥਵਿਸਮਂ ਹੋਤਿ. ਉਨ੍ਨਤਟ੍ਠਾਨਮ੍ਪਿ ਅਨ੍ਤੋ ਪਵਿਸਤਿ. ‘‘ਦੂਰੇ ਅਕ੍ਕਮਿਸ੍ਸਾਮੀ’’ਤਿ ਅਭਿਨੀਹਰਨ੍ਤਸ੍ਸ ਸਿਨੇਰੁਪ੍ਪਮਾਣੋਪਿ ਪਬ੍ਬਤੋ ਸੁਸੇਦਿਤਵੇਤ੍ਤਙ੍ਕੁਰੋ ਵਿਯ ਓਨਮਿਤ੍ਵਾ ਪਾਦਸਮੀਪਂ ਆਗਚ੍ਛਤਿ. ਤਥਾ ਹਿਸ੍ਸ ਯਮਕਪਾਟਿਹਾਰਿਯਂ ਕਤ੍ਵਾ ‘‘ਯੁਗਨ੍ਧਰਪਬ੍ਬਤਂ ਅਕ੍ਕਮਿਸ੍ਸਾਮੀ’’ਤਿ ਪਾਦੇ ਅਭਿਨੀਹਟੇ ਪਬ੍ਬਤੋ ਓਨਮਿਤ੍ਵਾ ਪਾਦਸਮੀਪਂ ਆਗਤੋ. ਸੋਪਿ ਤਂ ਅਕ੍ਕਮਿਤ੍ਵਾ ਦੁਤਿਯਪਾਦੇਨ ਤਾਵਤਿਂਸਭਵਨਂ ਅਕ੍ਕਮਿ. ਨ ਹਿ ਚਕ੍ਕਲਕ੍ਖਣੇਨ ਪਤਿਟ੍ਠਾਤਬ੍ਬਟ੍ਠਾਨਂ ਵਿਸਮਂ ਭਵਿਤੁਂ ਸਕ੍ਕੋਤਿ. ਖਾਣੁ ਵਾ ਕਣ੍ਟਕੋ ਵਾ ਸਕ੍ਖਰਾ ਵਾ ਕਥਲਾ ਵਾ ਉਚ੍ਚਾਰਪਸ੍ਸਾਵਖੇਲ਼ਸਿਙ੍ਘਾਣਿਕਾਦੀਨਿ ਵਾ ਪੁਰਿਮਤਰਂ ਵਾ ਅਪਗਚ੍ਛਨ੍ਤਿ, ਤਤ੍ਥ ਤਤ੍ਥੇਵ ਵਾ ਪਥਵਿਂ ਪਵਿਸਨ੍ਤਿ. ਤਥਾਗਤਸ੍ਸ ਹਿ ਸੀਲਤੇਜੇਨ ਪੁਞ੍ਞਤੇਜੇਨ ਧਮ੍ਮਤੇਜੇਨ ਦਸਨ੍ਨਂ ਪਾਰਮੀਨਂ ਆਨੁਭਾਵੇਨ ਅਯਂ ਮਹਾਪਥਵੀ ਸਮ੍ਮਾ ਮੁਦੁਪੁਪ੍ਫਾਭਿਕਿਣ੍ਣਾ ਹੋਤਿ.
੨੦੨. ਸਾਗਰਪਰਿਯਨ੍ਤਨ੍ਤਿ ਸਾਗਰਸੀਮਂ. ਨ ਹਿ ਤਸ੍ਸ ਰਜ੍ਜਂ ਕਰੋਨ੍ਤਸ੍ਸ ਅਨ੍ਤਰਾ ਰੁਕ੍ਖੋ ਵਾ ਪਬ੍ਬਤੋ ਵਾ ਨਦੀ ਵਾ ਸੀਮਾ ਹੋਤਿ ਮਹਾਸਮੁਦ੍ਦੋਵ ਸੀਮਾ. ਤੇਨ ਵੁਤ੍ਤਂ ‘‘ਸਾਗਰਪਰਿਯਨ੍ਤ’’ਨ੍ਤਿ. ਅਖਿਲਮਨਿਮਿਤ੍ਤਮਕਣ੍ਟਕਨ੍ਤਿ ਨਿਚ੍ਚੋਰਂ. ਚੋਰਾ ਹਿ ਖਰਸਮ੍ਫਸ੍ਸਟ੍ਠੇਨ ਖਿਲਾ, ਉਪਦ੍ਦਵਪਚ੍ਚਯਟ੍ਠੇਨ ਨਿਮਿਤ੍ਤਾ, ਵਿਜ੍ਝਨਟ੍ਠੇਨ ਕਣ੍ਟਕਾਤਿ ਵੁਚ੍ਚਨ੍ਤਿ. ਇਦ੍ਧਨ੍ਤਿ ਸਮਿਦ੍ਧਂ. ਫੀਤਨ੍ਤਿ ਸਬ੍ਬਸਮ੍ਪਤ੍ਤਿਫਾਲਿਫੁਲ੍ਲਂ. ਖੇਮਨ੍ਤਿ ਨਿਬ੍ਭਯਂ. ਸਿਵਨ੍ਤਿ ਨਿਰੁਪਦ੍ਦਵਂ. ਨਿਰਬ੍ਬੁਦਨ੍ਤਿ ਅਬ੍ਬੁਦਵਿਰਹਿਤਂ, ਗੁਮ੍ਬਂ ਗੁਮ੍ਬਂ ਹੁਤ੍ਵਾ ਚਰਨ੍ਤੇਹਿ ਚੋਰੇਹਿ ਵਿਰਹਿਤਨ੍ਤਿ ਅਤ੍ਥੋ. ਅਕ੍ਖਮ੍ਭਿਯੋਤਿ ਅਵਿਕ੍ਖਮ੍ਭਨੀਯੋ. ਨ ਨਂ ਕੋਚਿ ਠਾਨਤੋ ਚਾਲੇਤੁਂ ਸਕ੍ਕੋਤਿ. ਪਚ੍ਚਤ੍ਥਿਕੇਨਾਤਿ ਪਟਿਪਕ੍ਖਂ ਇਚ੍ਛਨ੍ਤੇਨ. ਪਚ੍ਚਾਮਿਤ੍ਤੇਨਾਤਿ ਪਟਿਵਿਰੁਦ੍ਧੇਨ ਅਮਿਤ੍ਤੇਨ. ਉਭਯਮ੍ਪੇਤਂ ਸਪਤ੍ਤਵੇਵਚਨਂ. ਅਬ੍ਭਨ੍ਤਰੇਹੀਤਿ ਅਨ੍ਤੋ ਉਟ੍ਠਿਤੇਹਿ ਰਾਗਾਦੀਹਿ.
ਬਾਹਿਰੇਹੀਤਿ ਸਮਣਾਦੀਹਿ. ਤਥਾ ਹਿ ਨਂ ਬਾਹਿਰਾ ਦੇਵਦਤ੍ਤਕੋਕਾਲਿਕਾਦਯੋ ਸਮਣਾਪਿ ਸੋਣਦਣ੍ਡਕੂਟਦਣ੍ਡਾਦਯੋ ਬ੍ਰਾਹ੍ਮਣਾਪਿ ਸਕ੍ਕਸਦਿਸਾ ਦੇਵਤਾਪਿ ਸਤ੍ਤ ਵਸ੍ਸਾਨਿ ਅਨੁਬਨ੍ਧਮਾਨੋ ਮਾਰੋਪਿ ਬਕਾਦਯੋ ਬ੍ਰਹ੍ਮਾਨੋਪਿ ਵਿਕ੍ਖਮ੍ਭੇਤੁਂ ਨਾਸਕ੍ਖਿਂਸੁ.
ਏਤ੍ਤਾਵਤਾ ਭਗਵਤਾ ਕਮ੍ਮਞ੍ਚ ਕਮ੍ਮਸਰਿਕ੍ਖਕਞ੍ਚ ਲਕ੍ਖਣਞ੍ਚ ਲਕ੍ਖਣਾਨਿਸਂਸੋ ਚ ਵੁਤ੍ਤੋ ਹੋਤਿ. ਕਮ੍ਮਂ ਨਾਮ ਸਤਸਹਸ੍ਸਕਪ੍ਪਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਲ਼੍ਹਵੀਰਿਯੇਨ ਹੁਤ੍ਵਾ ਕਤਂ ਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਦਲ਼੍ਹੇਨ ਹੁਤ੍ਵਾ ਕਤਭਾਵਂ ਸਦੇਵਕੋ ਲੋਕੋ ਜਾਨਾਤੂਤਿ ਸੁਪ੍ਪਤਿਟ੍ਠਿਤਪਾਦਮਹਾਪੁਰਿਸਲਕ੍ਖਣਂ. ਲਕ੍ਖਣਂ ਨਾਮ ਸੁਪ੍ਪਤਿਟ੍ਠਿਤਪਾਦਤਾ. ਲਕ੍ਖਣਾਨਿਸਂਸੋ ਨਾਮ ਪਚ੍ਚਤ੍ਥਿਕੇਹਿ ਅਵਿਕ੍ਖਮ੍ਭਨੀਯਤਾ.
੨੦੩. ਤਤ੍ਥੇਤਂ ਵੁਚ੍ਚਤੀਤਿ ਤਤ੍ਥ ਵੁਤ੍ਤੇ ਕਮ੍ਮਾਦਿਭੇਦੇ ਅਪਰਮ੍ਪਿ ਇਦਂ ਵੁਚ੍ਚਤਿ, ਗਾਥਾਬਨ੍ਧਂ ਸਨ੍ਧਾਯ ਵੁਤ੍ਤਂ. ਏਤਾ ਪਨ ਗਾਥਾ ਪੋਰਾਣਕਤ੍ਥੇਰਾ ‘‘ਆਨਨ੍ਦਤ੍ਥੇਰੇਨ ਠਪਿਤਾ ਵਣ੍ਣਨਾਗਾਥਾ’’ਤਿ ਵਤ੍ਵਾ ਗਤਾ. ਅਪਰਭਾਗੇ ਥੇਰਾ ‘‘ਏਕਪਦਿਕੋ ਅਤ੍ਥੁਦ੍ਧਾਰੋ’’ਤਿ ਆਹਂਸੁ.
ਤਤ੍ਥ ਸਚ੍ਚੇਤਿ ਵਚੀਸਚ੍ਚੇ. ਧਮ੍ਮੇਤਿ ਦਸਕੁਸਲਕਮ੍ਮਪਥਧਮ੍ਮੇ. ਦਮੇਤਿ ਇਨ੍ਦ੍ਰਿਯਦਮਨੇ. ਸਂਯਮੇਤਿ ਸੀਲਸਂਯਮੇ. ‘‘ਸੋਚੇਯ੍ਯਸੀਲਾਲਯੁਪੋਸਥੇਸੁ ਚਾ’’ਤਿ ਏਤ੍ਥ ਕਾਯਸੋਚੇਯ੍ਯਾਦਿ ਤਿਵਿਧਂ ਸੋਚੇਯ੍ਯਂ. ਆਲਯਭੂਤਂ ਸੀਲਮੇਵ ਸੀਲਾਲਯੋ. ਉਪੋਸਥਕਮ੍ਮਂ ਉਪੋਸਥੋ. ਅਹਿਂਸਾਯਾਤਿ ਅਵਿਹਿਂਸਾਯ. ਸਮਤ੍ਤਮਾਚਰੀਤਿ ਸਕਲਂ ਅਚਰਿ.
ਅਨ੍ਵਭੀਤਿ ਅਨੁਭਵਿ. ਵੇਯ੍ਯਞ੍ਜਨਿਕਾਤਿ ਲਕ੍ਖਣਪਾਠਕਾ. ਪਰਾਭਿਭੂਤਿ ਪਰੇ ਅਭਿਭਵਨਸਮਤ੍ਥੋ. ਸਤ੍ਤੁਭੀਤਿ ਸਪਤ੍ਤੇਹਿ ਅਕ੍ਖਮ੍ਭਿਯੋ ਹੋਤਿ.
ਨ ਸੋ ਗਚ੍ਛਤਿ ਜਾਤੁ ਖਮ੍ਭਨਨ੍ਤਿ ਸੋ ਏਕਂਸੇਨੇਵ ਅਗ੍ਗਪੁਗ੍ਗਲੋ ਵਿਕ੍ਖਮ੍ਭੇਤਬ੍ਬਤਂ ਨ ਗਚ੍ਛਤਿ. ਏਸਾ ਹਿ ਤਸ੍ਸ ਧਮ੍ਮਤਾਤਿ ਤਸ੍ਸ ਹਿ ਏਸਾ ਧਮ੍ਮਤਾ ਅਯਂ ਸਭਾਵੋ.
ਪਾਦਤਲਚਕ੍ਕਲਕ੍ਖਣਵਣ੍ਣਨਾ
੨੦੪. ਉਬ੍ਬੇਗਉਤ੍ਤਾਸਭਯਨ੍ਤਿ ਉਬ੍ਬੇਗਭਯਞ੍ਚੇਵ ਉਤ੍ਤਾਸਭਯਞ੍ਚ. ਤਤ੍ਥ ਚੋਰਤੋ ਵਾ ਰਾਜਤੋ ਵਾ ਪਚ੍ਚਤ੍ਥਿਕਤੋ ਵਾ ਵਿਲੋਪਨਬਨ੍ਧਨਾਦਿਨਿਸ੍ਸਯਂ ਭਯਂ ਉਬ੍ਬੇਗੋ ਨਾਮ, ਤਂਮੁਹੁਤ੍ਤਿਕਂ ਚਣ੍ਡਹਤ੍ਥਿਅਸ੍ਸਾਦੀਨਿ ਵਾ ਅਹਿਯਕ੍ਖਾਦਯੋ ਵਾ ਪਟਿਚ੍ਚ ਲੋਮਹਂਸਨਕਰਂ ਭਯਂ ਉਤ੍ਤਾਸਭਯਂ ਨਾਮ. ਤਂ ਸਬ੍ਬਂ ਅਪਨੁਦਿਤਾ ਵੂਪਸਮੇਤਾ. ਸਂਵਿਧਾਤਾਤਿ ਸਂਵਿਦਹਿਤਾ. ਕਥਂ ਸਂਵਿਦਹਤਿ? ਅਟਵਿਯਂ ਸਾਸਙ੍ਕਟ੍ਠਾਨੇਸੁ ਦਾਨਸਾਲਂ ਕਾਰੇਤ੍ਵਾ ਤਤ੍ਥ ਆਗਤੇ ਭੋਜੇਤ੍ਵਾ ਮਨੁਸ੍ਸੇ ਦਤ੍ਵਾ ਅਤਿਵਾਹੇਤਿ, ਤਂ ਠਾਨਂ ਪਵਿਸਿਤੁਂ ਅਸਕ੍ਕੋਨ੍ਤਾਨਂ ਮਨੁਸ੍ਸੇ ਪੇਸੇਤ੍ਵਾ ਪਵੇਸੇਤਿ. ਨਗਰਾਦੀਸੁਪਿ ਤੇਸੁ ਤੇਸੁ ਠਾਨੇਸੁ ਆਰਕ੍ਖਂ ਠਪੇਤਿ, ਏਵਂ ਸਂਵਿਦਹਤਿ. ਸਪਰਿਵਾਰਞ੍ਚ ਦਾਨਂ ਅਦਾਸੀਤਿ ਅਨ੍ਨਂ ਪਾਨਨ੍ਤਿ ਦਸਵਿਧਂ ਦਾਨਵਤ੍ਥੁਂ.
ਤਤ੍ਥ ਅਨ੍ਨਨ੍ਤਿ ਯਾਗੁਭਤ੍ਤਂ. ਤਂ ਦਦਨ੍ਤੋ ਨ ਦ੍ਵਾਰੇ ਠਪੇਤ੍ਵਾ ਅਦਾਸਿ, ਅਥ ਖੋ ਅਨ੍ਤੋਨਿਵੇਸਨੇ ਹਰਿਤੁਪਲਿਤ੍ਤਟ੍ਠਾਨੇ ਲਾਜਾ ਚੇਵ ਪੁਪ੍ਫਾਨਿ ਚ ਵਿਕਿਰਿਤ੍ਵਾ ਆਸਨਂ ਪਞ੍ਞਪੇਤ੍ਵਾ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਧੂਮਾਦੀਹਿ ਸਕ੍ਕਾਰਂ ਕਤ੍ਵਾ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਯਾਗੁਂ ਅਦਾਸਿ. ਯਾਗੁਂ ਦੇਨ੍ਤੋ ਚ ਸਬ੍ਯਞ੍ਜਨਂ ਅਦਾਸਿ. ਯਾਗੁਪਾਨਾਵਸਾਨੇ ਪਾਦੇ ਧੋਵਿਤ੍ਵਾ ਤੇਲੇਨ ਮਕ੍ਖੇਤ੍ਵਾ ਨਾਨਪ੍ਪਕਾਰਕਂ ਅਨਨ੍ਤਂ ਖਜ੍ਜਕਂ ਦਤ੍ਵਾ ਪਰਿਯੋਸਾਨੇ ਅਨੇਕਸੂਪਂ ਅਨੇਕਬ੍ਯਞ੍ਜਨਂ ਪਣੀਤਭੋਜਨਂ ਅਦਾਸਿ. ਪਾਨਂ ਦੇਨ੍ਤੋ ਅਮ੍ਬਪਾਨਾਦਿਅਟ੍ਠਵਿਧਂ ਪਾਨਂ ਅਦਾਸਿ, ਤਮ੍ਪਿ ਯਾਗੁਭਤ੍ਤਂ ਦਤ੍ਵਾ. ਵਤ੍ਥਂ ਦੇਨ੍ਤੋ ਨ ਸੁਦ੍ਧਵਤ੍ਥਮੇਵ ਅਦਾਸਿ, ਏਕਪਟ੍ਟਦੁਪਟ੍ਟਾਦਿਪਹੋਨਕਂ ਪਨ ਦਤ੍ਵਾ ਸੁਚਿਮ੍ਪਿ ਅਦਾਸਿ, ਸੁਤ੍ਤਮ੍ਪਿ ਅਦਾਸਿ, ਸੁਤ੍ਤਂ ਵਟ੍ਟੇਸਿ, ਸੂਚਿਕਮ੍ਮਕਰਣਟ੍ਠਾਨੇ ਭਿਕ੍ਖੂਨਂ ਆਸਨਾਨਿ, ਯਾਗੁਭਤ੍ਤਂ, ਪਾਦਮਕ੍ਖਨਂ, ਪਿਟ੍ਠਿਮਕ੍ਖਨਂ, ਰਜਨਂ, ਪਣ੍ਡੁਪਲਾਸਂ, ਰਜਨਦੋਣਿਕਂ, ਅਨ੍ਤਮਸੋ ਚੀਵਰਰਜਨਕਂ ਕਪ੍ਪਿਯਕਾਰਕਮ੍ਪਿ ਅਦਾਸਿ.
ਯਾਨਨ੍ਤਿ ਉਪਾਹਨਂ. ਤਂ ਦਦਨ੍ਤੋਪਿ ਉਪਾਹਨਤ੍ਥਵਿਕਂ ਉਪਾਹਨਦਣ੍ਡਕਂ ਮਕ੍ਖਨਤੇਲਂ ਹੇਟ੍ਠਾ ਵੁਤ੍ਤਾਨਿ ਚ ਅਨ੍ਨਾਦੀਨਿ ਤਸ੍ਸੇਵ ਪਰਿਵਾਰਂ ਕਤ੍ਵਾ ਅਦਾਸਿ. ਮਾਲਂ ਦੇਨ੍ਤੋਪਿ ਨ ਸੁਦ੍ਧਮਾਲਮੇਵ ਅਦਾਸਿ, ਅਥ ਖੋ ਨਂ ਗਨ੍ਧੇਹਿ ਮਿਸ੍ਸੇਤ੍ਵਾ ਹੇਟ੍ਠਿਮਾਨਿ ਚਤ੍ਤਾਰਿ ਤਸ੍ਸੇਵ ਪਰਿਵਾਰਂ ਕਤ੍ਵਾ ਅਦਾਸਿ. ਬੋਧਿਚੇਤਿਯਆਸਨਪੋਤ੍ਥਕਾਦਿਪੂਜਨਤ੍ਥਾਯ ਚੇਵ ਚੇਤਿਯਘਰਧੂਪਨਤ੍ਥਾਯ ਚ ਗਨ੍ਧਂ ਦੇਨ੍ਤੋਪਿ ਨ ਸੁਦ੍ਧਗਨ੍ਧਮੇਵ ਅਦਾਸਿ, ਗਨ੍ਧਪਿਸਨਕਨਿਸਦਾਯ ਚੇਵ ਪਕ੍ਖਿਪਨਕਭਾਜਨੇਨ ਚ ਸਦ੍ਧਿਂ ਹੇਟ੍ਠਿਮਾਨਿ ਪਞ੍ਚ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਚੇਤਿਯਪੂਜਾਦੀਨਂ ਅਤ੍ਥਾਯ ਹਰਿਤਾਲਮਨੋਸਿਲਾਚੀਨਪਿਟ੍ਠਾਦਿਵਿਲੇਪਨਂ ਦੇਨ੍ਤੋਪਿ ਨ ਸੁਦ੍ਧਵਿਲੇਪਨਮੇਵ ਅਦਾਸਿ, ਵਿਲੇਪਨਭਾਜਨੇਨ ਸਦ੍ਧਿਂ ਹੇਟ੍ਠਿਮਾਨਿ ਛ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਸੇਯ੍ਯਾਤਿ ਮਞ੍ਚਪੀਠਂ. ਤਂ ਦੇਨ੍ਤੋਪਿ ਨ ਸੁਦ੍ਧਕਮੇਵ ਅਦਾਸਿ, ਕੋਜਵਕਮ੍ਬਲਪਚ੍ਚਤ੍ਥਰਣਮਞ੍ਚਪ੍ਪਟਿਪਾਦਕੇਹਿ ਸਦ੍ਧਿਂ ਅਨ੍ਤਮਸੋ ਮਙ੍ਗੁਲਸੋਧਨਦਣ੍ਡਕਂ ਹੇਟ੍ਠਿਮਾਨਿ ਚ ਸਤ੍ਤ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਆਵਸਥਂ ਦੇਨ੍ਤੋਪਿ ਨ ਗੇਹਮਤ੍ਤਮੇਵ ਅਦਾਸਿ, ਅਥ ਖੋ ਨਂ ਮਾਲਾਕਮ੍ਮਲਤਾਕਮ੍ਮਪਟਿਮਣ੍ਡਿਤਂ ਸੁਪਞ੍ਞਤ੍ਤਂ ਮਞ੍ਚਪੀਠਂ ਕਾਰੇਤ੍ਵਾ ਹੇਟ੍ਠਿਮਾਨਿ ਅਟ੍ਠ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਪਦੀਪੇਯ੍ਯਨ੍ਤਿ ਪਦੀਪਤੇਲਂ. ਤਂ ਦੇਨ੍ਤੋ ਚੇਤਿਯਙ੍ਗਣੇ ਬੋਧਿਯਙ੍ਗਣੇ ਧਮ੍ਮਸ੍ਸਵਨਗ੍ਗੇ ਵਸਨਗੇਹੇ ਪੋਤ੍ਥਕਵਾਚਨਟ੍ਠਾਨੇ ਇਮਿਨਾ ਦੀਪਂ ਜਾਲਾਪੇਥਾਤਿ ਨ ਸੁਦ੍ਧਤੇਲਮੇਵ ਅਦਾਸਿ, ਵਟ੍ਟਿ ਕਪਲ੍ਲਕਤੇਲਭਾਜਨਾਦੀਹਿ ਸਦ੍ਧਿਂ ਹੇਟ੍ਠਿਮਾਨਿ ਨਵ ਤਸ੍ਸ ਪਰਿਵਾਰਂ ਕਤ੍ਵਾ ਅਦਾਸਿ. ਸੁਵਿਭਤ੍ਤਨ੍ਤਰਾਨੀਤਿ ਸੁਵਿਭਤ੍ਤਅਨ੍ਤਰਾਨਿ.
ਰਾਜਾਨੋਤਿ ਅਭਿਸਿਤ੍ਤਾ. ਭੋਗਿਯਾਤਿ ਭੋਜਕਾ ਕੁਮਾਰਾਤਿ ਰਾਜਕੁਮਾਰਾ. ਇਧ ਕਮ੍ਮਂ ਨਾਮ ਸਪਰਿਵਾਰਂ ਦਾਨਂ. ਕਮ੍ਮਸਰਿਕ੍ਖਕਂ ਨਾਮ ਸਪਰਿਵਾਰਂ ਕਤ੍ਵਾ ਦਾਨਂ ਅਦਾਸੀਤਿ ਇਮਿਨਾ ਕਾਰਣੇਨ ਸਦੇਵਕੋ ਲੋਕੋ ਜਾਨਾਤੂਤਿ ਨਿਬ੍ਬਤ੍ਤਂ ਚਕ੍ਕਲਕ੍ਖਣਂ. ਲਕ੍ਖਣਂ ਨਾਮ ਤਦੇਵ ਚਕ੍ਕਲਕ੍ਖਣਂ. ਆਨਿਸਂਸੋ ਮਹਾਪਰਿਵਾਰਤਾ.
੨੦੫. ਤਤ੍ਥੇਤਂ ਵੁਚ੍ਚਤੀਤਿ ਇਮਾ ਤਦਤ੍ਥਪਰਿਦੀਪਨਾ ਗਾਥਾ ਵੁਚ੍ਚਨ੍ਤਿ. ਦੁਵਿਧਾ ਹਿ ਗਾਥਾ ਹੋਨ੍ਤਿ – ਤਦਤ੍ਥਪਰਿਦੀਪਨਾ ਚ ਵਿਸੇਸਤ੍ਥਪਰਿਦੀਪਨਾ ਚ. ਤਤ੍ਥ ਪਾਲ਼ਿਆਗਤਮੇਵ ਅਤ੍ਥਂ ਪਰਿਦੀਪਨਾ ਤਦਤ੍ਥਪਰਿਦੀਪਨਾ ਨਾਮ. ਪਾਲ਼ਿਯਂ ਅਨਾਗਤਂ ਪਰਿਦੀਪਨਾ ਵਿਸੇਸਤ੍ਥਪਰਿਦੀਪਨਾ ਨਾਮ. ਇਮਾ ਪਨ ਤਦਤ੍ਥਪਰਿਦੀਪਨਾ. ਤਤ੍ਥ ਪੁਰੇਤਿ ਪੁਬ੍ਬੇ. ਪੁਰਤ੍ਥਾਤਿ ਤਸ੍ਸੇਵ ਵੇਵਚਨਂ. ਪੁਰਿਮਾਸੁ ਜਾਤੀਸੂਤਿ ਇਮਿਸ੍ਸਾ ਜਾਤਿਯਾ ਪੁਬ੍ਬੇਕਤਕਮ੍ਮਪਟਿਕ੍ਖੇਪਦੀਪਨਂ. ਉਬ੍ਬੇਗਉਤ੍ਤਾਸਭਯਾਪਨੂਦਨੋਤਿ ਉਬ੍ਬੇਗਭਯਸ੍ਸ ਚ ਉਤ੍ਤਾਸਭਯਸ੍ਸ ਚ ਅਪਨੂਦਨੋ. ਉਸ੍ਸੁਕੋਤਿ ਅਧਿਮੁਤ੍ਤੋ.
ਸਤਪੁਞ੍ਞਲਕ੍ਖਣਨ੍ਤਿ ਸਤੇਨ ਸਤੇਨ ਪੁਞ੍ਞਕਮ੍ਮੇਨ ਨਿਬ੍ਬਤ੍ਤਂ ਏਕੇਕਂ ਲਕ੍ਖਣਂ. ਏਵਂ ਸਨ੍ਤੇ ਯੋ ਕੋਚਿ ਬੁਦ੍ਧੋ ਭਵੇਯ੍ਯਾਤਿ ਨ ਰੋਚਯਿਂਸੁ, ਅਨਨ੍ਤੇਸੁ ਪਨ ਚਕ੍ਕਵਾਲ਼ੇਸੁ ਸਬ੍ਬੇ ਸਤ੍ਤਾ ਏਕੇਕਂ ਕਮ੍ਮਂ ਸਤਕ੍ਖਤ੍ਤੁਂ ਕਰੇਯ੍ਯੁਂ, ਏਤ੍ਤਕੇਹਿ ਜਨੇਹਿ ਕਤਂ ਕਮ੍ਮਂ ਬੋਧਿਸਤ੍ਤੋ ਏਕੋਵ ਏਕੇਕਂ ਸਤਗੁਣਂ ਕਤ੍ਵਾ ਨਿਬ੍ਬਤ੍ਤੋ. ਤਸ੍ਮਾ ‘‘ਸਤਪੁਞ੍ਞਲਕ੍ਖਣੋ’’ਤਿ ਇਮਮਤ੍ਥਂ ਰੋਚਯਿਂਸੁ. ਮਨੁਸ੍ਸਾਸੁਰਸਕ੍ਕਰਕ੍ਖਸਾਤਿ ਮਨੁਸ੍ਸਾ ਚ ਅਸੁਰਾ ਚ ਸਕ੍ਕਾ ਚ ਰਕ੍ਖਸਾ ਚ.
ਆਯਤਪਣ੍ਹਿਤਾਦਿਤਿਲਕ੍ਖਣਵਣ੍ਣਨਾ
੨੦੬. ਅਨ੍ਤਰਾਤਿ ਪਟਿਸਨ੍ਧਿਤੋ ਸਰਸਚੁਤਿਯਾ ਅਨ੍ਤਰੇ. ਇਧ ਕਮ੍ਮਂ ਨਾਮ ਪਾਣਾਤਿਪਾਤਾ ਵਿਰਤਿ. ਕਮ੍ਮਸਰਿਕ੍ਖਕਂ ਨਾਮ ਪਾਣਾਤਿਪਾਤਂ ਕਰੋਨ੍ਤੋ ਪਦਸਦ੍ਦਸਵਨਭਯਾ ਅਗ੍ਗਗ੍ਗਪਾਦੇਹਿ ਅਕ੍ਕਮਨ੍ਤਾ ਗਨ੍ਤ੍ਵਾ ਪਰਂ ਪਾਤੇਨ੍ਤਿ. ਅਥ ਤੇ ਇਮਿਨਾ ਕਾਰਣੇਨ ਤੇਸਂ ਤਂ ਕਮ੍ਮਂ ਜਨੋ ਜਾਨਾਤੂਤਿ ਅਨ੍ਤੋਵਙ੍ਕਪਾਦਾ ਵਾ ਬਹਿਵਙ੍ਕਪਾਦਾ ਵਾ ਉਕ੍ਕੁਟਿਕਪਾਦਾ ਵਾ ਅਗ੍ਗਕੋਣ੍ਡਾ ਵਾ ਪਣ੍ਹਿਕੋਣ੍ਡਾ ਵਾ ਭਵਨ੍ਤਿ. ਅਗ੍ਗਪਾਦੇਹਿ ਗਨ੍ਤ੍ਵਾ ਪਰਸ੍ਸ ਅਮਾਰਿਤਭਾਵਂ ਪਨ ਤਥਾਗਤਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਆਯਤਪਣ੍ਹਿ ਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਤਥਾ ਪਰਂ ਘਾਤੇਨ੍ਤਾ ਉਨ੍ਨਤਕਾਯੇਨ ਗਚ੍ਛਨ੍ਤਾ ਅਞ੍ਞੇ ਪਸ੍ਸਿਸ੍ਸਨ੍ਤੀਤਿ ਓਨਤਾ ਗਨ੍ਤ੍ਵਾ ਪਰਂ ਘਾਤੇਨ੍ਤਿ. ਅਥ ਤੇ ਏਵਮਿਮੇ ਗਨ੍ਤ੍ਵਾ ਪਰਂ ਘਾਤਯਿਂਸੂਤਿ ਨੇਸਂ ਤਂ ਕਮ੍ਮਂ ਇਮਿਨਾ ਕਾਰਣੇਨ ਪਰੋ ਜਾਨਾਤੂਤਿ ਖੁਜ੍ਜਾ ਵਾ ਵਾਮਨਾ ਵਾ ਪੀਠਸਪ੍ਪਿ ਵਾ ਭਵਨ੍ਤਿ. ਤਥਾਗਤਸ੍ਸ ਪਨ ਏਵਂ ਗਨ੍ਤ੍ਵਾ ਪਰੇਸਂ ਅਘਾਤਿਤਭਾਵਂ ਇਮਿਨਾ ਕਾਰਣੇਨ ਸਦੇਵਕੋ ਲੋਕੋ ਜਾਨਾਤੂਤਿ ਬ੍ਰਹ੍ਮੁਜੁਗਤ੍ਤਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਤਥਾ ਪਰਂ ਘਾਤੇਨ੍ਤਾ ਆਵੁਧਂ ਵਾ ਮੁਗ੍ਗਰਂ ਵਾ ਗਣ੍ਹਿਤ੍ਵਾ ਮੁਟ੍ਠਿਕਤਹਤ੍ਥਾ ਪਰਂ ਘਾਤੇਨ੍ਤਿ. ਤੇ ਏਵਂ ਤੇਸਂ ਪਰਸ੍ਸ ਘਾਤਿਤਭਾਵਂ ਇਮਿਨਾ ਕਾਰਣੇਨ ਜਨੋ ਜਾਨਾਤੂਤਿ ਰਸ੍ਸਙ੍ਗੁਲੀ ਵਾ ਰਸ੍ਸਹਤ੍ਥਾ ਵਾ ਵਙ੍ਕਙ੍ਗੁਲੀ ਵਾ ਫਣਹਤ੍ਥਕਾ ਵਾ ਭਵਨ੍ਤਿ. ਤਥਾਗਤਸ੍ਸ ਪਨ ਏਵਂ ਪਰੇਸਂ ਅਘਾਤਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਦੀਘਙ੍ਗੁਲਿਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਇਦਮੇਤ੍ਥ ਕਮ੍ਮਸਰਿਕ੍ਖਕਂ. ਇਦਮੇਵ ਪਨ ਲਕ੍ਖਣਤ੍ਤਯਂ ਲਕ੍ਖਣਂ ਨਾਮ. ਦੀਘਾਯੁਕਭਾਵੋ ਲਕ੍ਖਣਾਨਿਸਂਸੋ.
੨੦੭. ਮਰਣਵਧਭਯਤ੍ਤਨੋਤਿ ਏਤ੍ਥ ਮਰਣਸਙ੍ਖਾਤੋ ਵਧੋ ਮਰਣਵਧੋ, ਮਰਣਵਧਤੋ ਭਯਂ ਮਰਣਵਧਭਯਂ, ਤਂ ਅਤ੍ਤਨੋ ਜਾਨਿਤ੍ਵਾ. ਪਟਿਵਿਰਤੋ ਪਰਂਮਾਰਣਾਯਾਤਿ ਯਥਾ ਮਯ੍ਹਂ ਮਰਣਤੋ ਭਯਂ ਮਮ ਜੀਵਿਤਂ ਪਿਯਂ, ਏਵਂ ਪਰੇਸਮ੍ਪੀਤਿ ਞਤ੍ਵਾ ਪਰਂ ਮਾਰਣਤੋ ਪਟਿਵਿਰਤੋ ਅਹੋਸਿ. ਸੁਚਰਿਤੇਨਾਤਿ ਸੁਚਿਣ੍ਣੇਨ. ਸਗ੍ਗਮਗਮਾਤਿ ਸਗ੍ਗਂ ਗਤੋ.
ਚਵਿਯ ਪੁਨਰਿਧਾਗਤੋਤਿ ਚਵਿਤ੍ਵਾ ਪੁਨ ਇਧਾਗਤੋ. ਦੀਘਪਾਸਣ੍ਹਿਕੋਤਿ ਦੀਘਪਣ੍ਹਿਕੋ. ਬ੍ਰਹ੍ਮਾਵ ਸੁਜੂਤਿ ਬ੍ਰਹ੍ਮਾ ਵਿਯ ਸੁਟ੍ਠੁ ਉਜੁ.
ਸੁਭੁਜੋਤਿ ਸੁਨ੍ਦਰਭੁਜੋ. ਸੁਸੂਤਿ ਮਹਲ੍ਲਕਕਾਲੇਪਿ ਤਰੁਣਰੂਪੋ. ਸੁਸਣ੍ਠਿਤੋਤਿ ਸੁਸਣ੍ਠਾਨਸਮ੍ਪਨ੍ਨੋ. ਮੁਦੁਤਲੁਨਙ੍ਗੁਲਿਯਸ੍ਸਾਤਿ ਮੁਦੂ ਚ ਤਲੁਨਾ ਚ ਅਙ੍ਗੁਲਿਯੋ ਅਸ੍ਸ. ਤੀਭੀਤਿ ਤੀਹਿ. ਪੁਰਿਸਵਰਗ੍ਗਲਕ੍ਖਣੇਹੀਤਿ ਪੁਰਿਸਵਰਸ੍ਸ ਅਗ੍ਗਲਕ੍ਖਣੇਹਿ. ਚਿਰਯਪਨਾਯਾਤਿ ਚਿਰਂ ਯਾਪਨਾਯ, ਦੀਘਾਯੁਕਭਾਵਾਯ.
ਚਿਰਂ ਯਪੇਤੀਤਿ ਚਿਰਂ ਯਾਪੇਤਿ. ਚਿਰਤਰਂ ਪਬ੍ਬਜਤਿ ਯਦਿ ਤਤੋਤਿ ਤਤੋ ਚਿਰਤਰਂ ਯਾਪੇਤਿ, ਯਦਿ ਪਬ੍ਬਜਤੀਤਿ ਅਤ੍ਥੋ. ਯਾਪਯਤਿ ਚ ਵਸਿਦ੍ਧਿਭਾਵਨਾਯਾਤਿ ਵਸਿਪ੍ਪਤ੍ਤੋ ਹੁਤ੍ਵਾ ਇਦ੍ਧਿਭਾਵਨਾਯ ਯਾਪੇਤਿ.
ਸਤ੍ਤੁਸ੍ਸਦਤਾਲਕ੍ਖਣਵਣ੍ਣਨਾ
੨੦੮. ਰਸਿਤਾਨਨ੍ਤਿ ਰਸਸਮ੍ਪਨ੍ਨਾਨਂ. ‘‘ਖਾਦਨੀਯਾਨ’’ਨ੍ਤਿਆਦੀਸੁ ਖਾਦਨੀਯਾਨਿ ਨਾਮ ਪਿਟ੍ਠਖਜ੍ਜਕਾਦੀਨਿ. ਭੋਜਨੀਯਾਨੀਤਿ ਪਞ੍ਚ ਭੋਜਨਾਨਿ. ਸਾਯਨੀਯਾਨੀਤਿ ਸਾਯਿਤਬ੍ਬਾਨਿ ਸਪ੍ਪਿਨਵਨੀਤਾਦੀਨਿ. ਲੇਹਨੀਯਾਨੀਤਿ ਨਿਲ੍ਲੇਹਿਤਬ੍ਬਾਨਿ ਪਿਟ੍ਠਪਾਯਾਸਾਦੀਨਿ. ਪਾਨਾਨੀਤਿ ਅਟ੍ਠ ਪਾਨਕਾਨਿ.
ਇਧ ਕਮ੍ਮਂ ਨਾਮ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨਂ ਇਦਂ ਪਣੀਤਭੋਜਨਦਾਨਂ. ਕਮ੍ਮਸਰਿਕ੍ਖਕਂ ਨਾਮ ਲੂਖਭੋਜਨੇ ਕੁਚ੍ਛਿਗਤੇ ਲੋਹਿਤਂ ਸੁਸ੍ਸਤਿ, ਮਂਸਂ ਮਿਲਾਯਤਿ. ਤਸ੍ਮਾ ਲੂਖਦਾਯਕਾ ਸਤ੍ਤਾ ਇਮਿਨਾ ਕਾਰਣੇਨ ਨੇਸਂ ਲੂਖਭੋਜਨਸ੍ਸ ਦਿਨ੍ਨਭਾਵਂ ਜਨੋ ਜਾਨਾਤੂਤਿ ਅਪ੍ਪਮਂਸਾ ਅਪ੍ਪਲੋਹਿਤਾ ਮਨੁਸ੍ਸਪੇਤਾ ਵਿਯ ਦੁਲ੍ਲਭਨ੍ਨਪਾਨਾ ਭਵਨ੍ਤਿ. ਪਣੀਤਭੋਜਨੇ ਪਨ ਕੁਚ੍ਛਿਗਤੇ ਮਂਸਲੋਹਿਤਂ ਵਡ੍ਢਤਿ, ਪਰਿਪੁਣ੍ਣਕਾਯਾ ਪਾਸਾਦਿਕਾ ਅਭਿਰੂਪਦਸ੍ਸਨਾ ਹੋਨ੍ਤਿ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਪਣੀਤਭੋਜਨਦਾਯਕਤ੍ਤਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸਤ੍ਤੁਸ੍ਸਦਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਸਤ੍ਤੁਸ੍ਸਦਲਕ੍ਖਣਮੇਵ. ਪਣੀਤਲਾਭਿਤਾ ਆਨਿਸਂਸੋ.
੨੦੯. ਖਜ੍ਜਭੋਜ੍ਜਮਥਲੇਯ੍ਯਸਾਯਿਤਨ੍ਤਿ ਖਜ੍ਜਕਞ੍ਚ ਭੋਜਨਞ੍ਚ ਲੇਹਨੀਯਞ੍ਚ ਸਾਯਨੀਯਞ੍ਚ. ਉਤ੍ਤਮਗ੍ਗਰਸਦਾਯਕੋਤਿ ਉਤ੍ਤਮੋ ਅਗ੍ਗਰਸਦਾਯਕੋ, ਉਤ੍ਤਮਾਨਂ ਵਾ ਅਗ੍ਗਰਸਾਨਂ ਦਾਯਕੋ.
ਸਤ੍ਤ ਚੁਸ੍ਸਦੇਤਿ ਸਤ੍ਤ ਚ ਉਸ੍ਸਦੇ. ਤਦਤ੍ਥਜੋਤਕਨ੍ਤਿ ਖਜ੍ਜਭੋਜ੍ਜਾਦਿਜੋਤਕਂ, ਤੇਸਂ ਲਾਭਸਂਵਤ੍ਤਨਿਕਨ੍ਤਿ ਅਤ੍ਥੋ. ਪਬ੍ਬਜਮ੍ਪਿ ਚਾਤਿ ਪਬ੍ਬਜਮਾਨੋਪਿ ਚ. ਤਦਾਧਿਗਚ੍ਛਤੀਤਿ ਤਂ ਅਧਿਗਚ੍ਛਤਿ. ਲਾਭਿਰੁਤ੍ਤਮਨ੍ਤਿ ਲਾਭਿ ਉਤ੍ਤਮਂ.
ਕਰਚਰਣਾਦਿਲਕ੍ਖਣਵਣ੍ਣਨਾ
੨੧੦. ਦਾਨੇਨਾਤਿਆਦੀਸੁ ਏਕਚ੍ਚੋ ਦਾਨੇਨੇਵ ਸਙ੍ਗਣ੍ਹਿਤਬ੍ਬੋ ਹੋਤਿ, ਤਂ ਦਾਨੇਨ ਸਙ੍ਗਹੇਸਿ. ਪਬ੍ਬਜਿਤਾਨਂ ਪਬ੍ਬਜਿਤਪਰਿਕ੍ਖਾਰਂ, ਗਿਹੀਨਂ ਗਿਹਿਪਰਿਕ੍ਖਾਰਂ ਅਦਾਸਿ.
ਪੇਯ੍ਯਵਜ੍ਜੇਨਾਤਿ ਏਕਚ੍ਚੋ ਹਿ ‘‘ਅਯਂ ਦਾਤਬ੍ਬਂ ਨਾਮ ਦੇਤਿ, ਏਕੇਨ ਪਨ ਵਚਨੇਨ ਸਬ੍ਬਂ ਮਕ੍ਖੇਤ੍ਵਾ ਨਾਸੇਤਿ, ਕਿਂ ਏਤਸ੍ਸ ਦਾਨ’’ਨ੍ਤਿ ਵਤ੍ਤਾ ਹੋਤਿ. ਏਕਚ੍ਚੋ ‘‘ਅਯਂ ਕਿਞ੍ਚਾਪਿ ਦਾਨਂ ਨ ਦੇਤਿ, ਕਥੇਨ੍ਤੋ ਪਨ ਤੇਲੇਨ ਵਿਯ ਮਕ੍ਖੇਤਿ. ਏਸੋ ਦੇਤੁ ਵਾ ਮਾ ਵਾ, ਵਚਨਮੇਵ ਤਸ੍ਸ ਸਹਸ੍ਸਂ ਅਗ੍ਘਤੀ’’ਤਿ ਵਤ੍ਤਾ ਹੋਤਿ. ਏਵਰੂਪੋ ਪੁਗ੍ਗਲੋ ਦਾਨਂ ਨ ਪਚ੍ਚਾਸੀਸਤਿ, ਪਿਯਵਚਨਮੇਵ ਪਚ੍ਚਾਸੀਸਤਿ. ਤਂ ਪਿਯਵਚਨੇਨ ਸਙ੍ਗਹੇਸਿ.
ਅਤ੍ਥਚਰਿਯਾਯਾਤਿ ਅਤ੍ਥਸਂਵਡ੍ਢਨਕਥਾਯ. ਏਕਚ੍ਚੋ ਹਿ ਨੇਵ ਦਾਨਂ, ਨ ਪਿਯਵਚਨਂ ਪਚ੍ਚਾਸੀਸਤਿ. ਅਤ੍ਤਨੋ ਹਿਤਕਥਂ ਵਡ੍ਢਿਤਕਥਮੇਵ ਪਚ੍ਚਾਸੀਸਤਿ. ਏਵਰੂਪਂ ਪੁਗ੍ਗਲਂ ‘‘ਇਦਂ ਤੇ ਕਾਤਬ੍ਬਂ, ਇਦਂ ਤੇ ਨ ਕਾਤਬ੍ਬਂ. ਏਵਰੂਪੋ ਪੁਗ੍ਗਲੋ ਸੇਵਿਤਬ੍ਬੋ, ਏਵਰੂਪੋ ਪੁਗ੍ਗਲੋ ਨ ਸੇਵਿਤਬ੍ਬੋ’’ਤਿ ਏਵਂ ਅਤ੍ਥਚਰਿਯਾਯ ਸਙ੍ਗਹੇਸਿ.
ਸਮਾਨਤ੍ਤਤਾਯਾਤਿ ਸਮਾਨਸੁਖਦੁਕ੍ਖਭਾਵੇਨ. ਏਕਚ੍ਚੋ ਹਿ ਦਾਨਾਦੀਸੁ ਏਕਮ੍ਪਿ ਨ ਪਚ੍ਚਾਸੀਸਤਿ, ਏਕਾਸਨੇ ਨਿਸਜ੍ਜਂ, ਏਕਪਲ੍ਲਙ੍ਕੇ ਸਯਨਂ, ਏਕਤੋ ਭੋਜਨਨ੍ਤਿ ਏਵਂ ਸਮਾਨਸੁਖਦੁਕ੍ਖਤਂ ਪਚ੍ਚਾਸੀਸਤਿ. ਤਤ੍ਥ ਜਾਤਿਯਾ ਹੀਨੋ ਭੋਗੇਨ ਅਧਿਕੋ ਦੁਸ੍ਸਙ੍ਗਹੋ ਹੋਤਿ. ਨ ਹਿ ਸਕ੍ਕਾ ਤੇਨ ਸਦ੍ਧਿਂ ਏਕਪਰਿਭੋਗੋ ਕਾਤੁਂ, ਤਥਾ ਅਕਰਿਯਮਾਨੇ ਚ ਸੋ ਕੁਜ੍ਝਤਿ. ਭੋਗੇਨ ਹੀਨੋ ਜਾਤਿਯਾ ਅਧਿਕੋਪਿ ਦੁਸ੍ਸਙ੍ਗਹੋ ਹੋਤਿ. ਸੋ ਹਿ ‘‘ਅਹਂ ਜਾਤਿਮਾ’’ਤਿ ਭੋਗਸਮ੍ਪਨ੍ਨੇਨ ਸਦ੍ਧਿਂ ਏਕਪਰਿਭੋਗਂ ਨ ਇਚ੍ਛਤਿ, ਤਸ੍ਮਿਂ ਅਕਰਿਯਮਾਨੇ ਕੁਜ੍ਝਤਿ. ਉਭੋਹਿਪਿ ਹੀਨੋ ਪਨ ਸੁਸਙ੍ਗਹੋ ਹੋਤਿ. ਨ ਹਿ ਸੋ ਇਤਰੇਨ ਸਦ੍ਧਿਂ ਏਕਪਰਿਭੋਗਂ ਇਚ੍ਛਤਿ, ਨ ਅਕਰਿਯਮਾਨੇ ਚ ਕੁਜ੍ਝਤਿ. ਉਭੋਹਿ ਸਦਿਸੋਪਿ ਸੁਸਙ੍ਗਹੋਯੇਵ. ਭਿਕ੍ਖੂਸੁ ਦੁਸ੍ਸੀਲੋ ਦੁਸ੍ਸਙ੍ਗਹੋ ਹੋਤਿ. ਨ ਹਿ ਸਕ੍ਕਾ ਤੇਨ ਸਦ੍ਧਿਂ ਏਕਪਰਿਭੋਗੋ ਕਾਤੁਂ, ਤਥਾ ਅਕਰਿਯਮਾਨੇ ਚ ਕੁਜ੍ਝਤਿ. ਸੀਲਵਾ ਸੁਸਙ੍ਗਹੋ ਹੋਤਿ. ਸੀਲਵਾ ਹਿ ਅਦੀਯਮਾਨੇਪਿ ਅਕਰਿਯਮਾਨੇਪਿ ਨ ਕੁਜ੍ਝਤਿ. ਅਞ੍ਞਂ ਅਤ੍ਤਨਾ ਸਦ੍ਧਿਂ ਪਰਿਭੋਗਂ ਅਕਰੋਨ੍ਤਮ੍ਪਿ ਨ ਪਾਪਕੇਨ ਚਿਤ੍ਤੇਨ ਪਸ੍ਸਤਿ. ਪਰਿਭੋਗੋਪਿ ਤੇਨ ਸਦ੍ਧਿਂ ਸੁਕਰੋ ਹੋਤਿ. ਤਸ੍ਮਾ ਏਵਰੂਪਂ ਪੁਗ੍ਗਲਂ ਏਵਂ ਸਮਾਨਤ੍ਤਤਾਯ ਸਙ੍ਗਹੇਸਿ.
ਸੁਸਙ੍ਗਹਿਤਾਸ੍ਸ ਹੋਨ੍ਤੀਤਿ ਸੁਸਙ੍ਗਹਿਤਾ ਅਸ੍ਸ ਹੋਨ੍ਤਿ. ਦੇਤੁ ਵਾ ਮਾ ਵਾ ਦੇਤੁ, ਕਰੋਤੁ ਵਾ ਮਾ ਵਾ ਕਰੋਤੁ, ਸੁਸਙ੍ਗਹਿਤਾਵ ਹੋਨ੍ਤਿ, ਨ ਭਿਜ੍ਜਨ੍ਤਿ. ‘‘ਯਦਾਸ੍ਸ ਦਾਤਬ੍ਬਂ ਹੋਤਿ, ਤਦਾ ਦੇਤਿ. ਇਦਾਨਿ ਮਞ੍ਞੇ ਨਤ੍ਥਿ, ਤੇਨ ਨ ਦੇਤਿ. ਕਿਂ ਮਯਂ ਦਦਮਾਨਮੇਵ ਉਪਟ੍ਠਹਾਮ? ਅਦੇਨ੍ਤਂ ਅਕਰੋਨ੍ਤਂ ਨ ਉਪਟ੍ਠਹਾਮਾ’’ਤਿ ਏਵਂ ਚਿਨ੍ਤੇਨ੍ਤਿ.
ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਕਤਂ ਦਾਨਾਦਿਸਙ੍ਗਹਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਂ ਅਸਙ੍ਗਾਹਕੋ ਹੋਤਿ, ਸੋ ਇਮਿਨਾ ਕਾਰਣੇਨਸ੍ਸ ਅਸਙ੍ਗਾਹਕਭਾਵਂ ਜਨੋ ਜਾਨਾਤੂਤਿ ਥਦ੍ਧਹਤ੍ਥਪਾਦੋ ਚੇਵ ਹੋਤਿ, ਵਿਸਮਟ੍ਠਿਤਾਵਯਵਲਕ੍ਖਣੋ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਸਙ੍ਗਾਹਕਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਦ੍ਵੇ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਸੁਸਙ੍ਗਹਿਤਪਰਿਜਨਤਾ ਆਨਿਸਂਸੋ.
੨੧੧. ਕਰਿਯਾਤਿ ਕਰਿਤ੍ਵਾ. ਚਰਿਯਾਤਿ ਚਰਿਤ੍ਵਾ. ਅਨਵਮਤੇਨਾਤਿ ਅਨਵਞ੍ਞਾਤੇਨ. ‘‘ਅਨਪਮੋਦੇਨਾ’’ਤਿਪਿ ਪਾਠੋ, ਨ ਅਪ੍ਪਮੋਦੇਨ, ਨ ਦੀਨੇਨ ਨ ਗਬ੍ਭਿਤੇਨਾਤਿ ਅਤ੍ਥੋ.
ਚਵਿਯਾਤਿ ਚਵਿਤ੍ਵਾ. ਅਤਿਰੁਚਿਰ ਸੁਵਗ੍ਗੁ ਦਸ੍ਸਨੇਯ੍ਯਨ੍ਤਿ ਅਤਿਰੁਚਿਰਞ੍ਚ ਸੁਪਾਸਾਦਿਕਂ ਸੁਵਗ੍ਗੁ ਚ ਸੁਟ੍ਠੁ ਛੇਕਂ ਦਸ੍ਸਨੇਯ੍ਯਞ੍ਚ ਦਟ੍ਠਬ੍ਬਯੁਤ੍ਤਂ. ਸੁਸੁ ਕੁਮਾਰੋਤਿ ਸੁਟ੍ਠੁ ਸੁਕੁਮਾਰੋ.
ਪਰਿਜਨਸ੍ਸਵੋਤਿ ਪਰਿਜਨੋ ਅਸ੍ਸਵੋ ਵਚਨਕਰੋ. ਵਿਧੇਯ੍ਯੋਤਿ ਕਤ੍ਤਬ੍ਬਾਕਤ੍ਤਬ੍ਬੇਸੁ ਯਥਾਰੁਚਿ ਵਿਧਾਤਬ੍ਬੋ. ਮਹਿਮਨ੍ਤਿ ਮਹਿਂ ਇਮਂ. ਪਿਯਵਦੂ ਹਿਤਸੁਖਤਂ ਜਿਗੀਸਮਾਨੋਤਿ ਪਿਯਵਦੋ ਹੁਤ੍ਵਾ ਹਿਤਞ੍ਚ ਸੁਖਞ੍ਚ ਪਰਿਯੇਸਮਾਨੋ. ਵਚਨਪਟਿਕਰਸ੍ਸਾ ਭਿਪ੍ਪਸਨ੍ਨਾਤਿ ਵਚਨਪਟਿਕਰਾ ਅਸ੍ਸ ਅਭਿਪ੍ਪਸਨ੍ਨਾ. ਧਮ੍ਮਾਨੁਧਮ੍ਮਨ੍ਤਿ ਧਮ੍ਮਞ੍ਚ ਅਨੁਧਮ੍ਮਞ੍ਚ.
ਉਸ੍ਸਙ੍ਖਪਾਦਾਦਿਲਕ੍ਖਣਵਣ੍ਣਨਾ
੨੧੨. ਅਤ੍ਥੂਪਸਂਹਿਤਨ੍ਤਿ ਇਧਲੋਕਪਰਲੋਕਤ੍ਥਨਿਸ੍ਸਿਤਂ. ਧਮ੍ਮੂਪਸਂਹਿਤਨ੍ਤਿ ਦਸਕੁਸਲਕਮ੍ਮਪਥਨਿਸ੍ਸਿਤਂ. ਬਹੁਜਨਂ ਨਿਦਂਸੇਸੀਤਿ ਬਹੁਜਨਸ੍ਸ ਨਿਦਂਸਨਕਥਂ ਕਥੇਸਿ. ਪਾਣੀਨਨ੍ਤਿ ਸਤ੍ਤਾਨਂ. ‘‘ਅਗ੍ਗੋ’’ਤਿਆਦੀਨਿ ਸਬ੍ਬਾਨਿ ਅਞ੍ਞਮਞ੍ਞਵੇਵਚਨਾਨਿ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਭਾਸਿਤਾ ਉਦ੍ਧਙ੍ਗਮਨੀਯਾ ਅਤ੍ਥੂਪਸਂਹਿਤਾ ਵਾਚਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਰੂਪਂ ਉਗ੍ਗਤਵਾਚਂ ਨ ਭਾਸਤਿ, ਸੋ ਇਮਿਨਾ ਕਾਰਣੇਨ ਉਗ੍ਗਤਵਾਚਾਯ ਅਭਾਸਨਂ ਜਨੋ ਜਾਨਾਤੂਤਿ ਅਧੋਸਙ੍ਖਪਾਦੋ ਚ ਹੋਤਿ ਅਧੋਨਤਲੋਮੋ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਏਵਰੂਪਾਯ ਉਗ੍ਗਤਵਾਚਾਯ ਭਾਸਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਉਸ੍ਸਙ੍ਖਪਾਦਲਕ੍ਖਣਞ੍ਚ ਉਦ੍ਧਗ੍ਗਲੋਮਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਉਤ੍ਤਮਭਾਵੋ ਆਨਿਸਂਸੋ.
੨੧੩. ਏਰਯਨ੍ਤਿ ਭਣਨ੍ਤੋ. ਬਹੁਜਨਂ ਨਿਦਂਸਯੀਤਿ ਬਹੁਜਨਸ੍ਸ ਹਿਤਂ ਦਸ੍ਸੇਤਿ. ਧਮ੍ਮਯਾਗਨ੍ਤਿ ਧਮ੍ਮਦਾਨਯਞ੍ਞਂ.
ਉਬ੍ਭਮੁਪ੍ਪਤਿਤਲੋਮਵਾ ਸਸੋਤਿ ਸੋ ਏਸ ਉਦ੍ਧਗ੍ਗਤਲੋਮਵਾ ਹੋਤਿ. ਪਾਦਗਣ੍ਠਿਰਹੂਤਿ ਪਾਦਗੋਪ੍ਫਕਾ ਅਹੇਸੁਂ. ਸਾਧੁਸਣ੍ਠਿਤਾਤਿ ਸੁਟ੍ਠੁ ਸਣ੍ਠਿਤਾ. ਮਂਸਲੋਹਿਤਾਚਿਤਾਤਿ ਮਂਸੇਨ ਚ ਲੋਹਿਤੇਨ ਚ ਆਚਿਤਾ. ਤਚੋਤ੍ਥਤਾਤਿ ਤਚੇਨ ਪਰਿਯੋਨਦ੍ਧਾ ਨਿਗੁਲ਼੍ਹਾ. ਵਜਤੀਤਿ ਗਚ੍ਛਤਿ. ਅਨੋਮਨਿਕ੍ਕਮੋਤਿ ਅਨੋਮਵਿਹਾਰੀ ਸੇਟ੍ਠਵਿਹਾਰੀ.
ਏਣਿਜਙ੍ਘਲਕ੍ਖਣਵਣ੍ਣਨਾ
੨੧੪. ਸਿਪ੍ਪਂ ਵਾਤਿਆਦੀਸੁ ਸਿਪ੍ਪਂ ਨਾਮ ਦ੍ਵੇ ਸਿਪ੍ਪਾਨਿ – ਹੀਨਞ੍ਚ ਸਿਪ੍ਪਂ, ਉਕ੍ਕਟ੍ਠਞ੍ਚ ਸਿਪ੍ਪਂ. ਹੀਨਂ ਨਾਮ ਸਿਪ੍ਪਂ ਨਲ਼ਕਾਰਸਿਪ੍ਪਂ, ਕੁਮ੍ਭਕਾਰਸਿਪ੍ਪਂ ਪੇਸਕਾਰਸਿਪ੍ਪਂ ਨਹਾਪਿਤਸਿਪ੍ਪਂ. ਉਕ੍ਕਟ੍ਠਂ ਨਾਮ ਸਿਪ੍ਪਂ ਲੇਖਾ ਮੁਦ੍ਦਾ ਗਣਨਾ. ਵਿਜ੍ਜਾਤਿ ਅਹਿਵਿਜ੍ਜਾਦਿਅਨੇਕਵਿਧਾ. ਚਰਣਨ੍ਤਿ ਪਞ੍ਚਸੀਲਂ ਦਸਸੀਲਂ ਪਾਤਿਮੋਕ੍ਖਸਂਵਰਸੀਲਂ. ਕਮ੍ਮਨ੍ਤਿ ਕਮ੍ਮਸ੍ਸਕਤਾਜਾਨਨਪਞ੍ਞਾ. ਕਿਲਿਸ੍ਸੇਯ੍ਯੁਨ੍ਤਿ ਕਿਲਮੇਯ੍ਯੁਂ. ਅਨ੍ਤੇਵਾਸਿਕਵਤ੍ਤਂ ਨਾਮ ਦੁਕ੍ਖਂ, ਤਂ ਨੇਸਂ ਮਾ ਚਿਰਮਹੋਸੀਤਿ ਚਿਨ੍ਤੇਸਿ.
ਰਾਜਾਰਹਾਨੀਤਿ ਰਞ੍ਞੋ ਅਨੁਰੂਪਾਨਿ ਹਤ੍ਥਿਅਸ੍ਸਾਦੀਨਿ, ਤਾਨਿਯੇਵ ਰਞ੍ਞੋ ਸੇਨਾਯ ਅਙ੍ਗਭੂਤਤ੍ਤਾ ਰਾਜਙ੍ਗਾਨੀਤਿ ਵੁਚ੍ਚਨ੍ਤਿ. ਰਾਜੂਪਭੋਗਾਨੀਤਿ ਰਞ੍ਞੋ ਉਪਭੋਗਪਰਿਭੋਗਭਣ੍ਡਾਨਿ, ਤਾਨਿ ਚੇਵ ਸਤ੍ਤਰਤਨਾਨਿ ਚ. ਰਾਜਾਨੁਚ੍ਛਵਿਕਾਨੀਤਿ ਰਞ੍ਞੋ ਅਨੁਚ੍ਛਵਿਕਾਨਿ. ਤੇਸਂਯੇਵ ਸਬ੍ਬੇਸਂ ਇਦਂ ਗਹਣਂ. ਸਮਣਾਰਹਾਨੀਤਿ ਸਮਣਾਨਂ ਅਨੁਰੂਪਾਨਿ ਚੀਵਰਾਦੀਨਿ. ਸਮਣਙ੍ਗਾਨੀਤਿ ਸਮਣਾਨਂ ਕੋਟ੍ਠਾਸਭੂਤਾ ਚਤਸ੍ਸੋ ਪਰਿਸਾ. ਸਮਣੂਪਭੋਗਾਨੀਤਿ ਸਮਣਾਨਂ ਉਪਭੋਗਪਰਿਕ੍ਖਾਰਾ. ਸਮਣਾਨੁਚ੍ਛਵਿਕਾਨੀਤਿ ਤੇਸਂਯੇਵ ਅਧਿਵਚਨਂ.
ਇਧ ਪਨ ਕਮ੍ਮਂ ਨਾਮ ਦੀਘਰਤ੍ਤਂ ਸਕ੍ਕਚ੍ਚਂ ਸਿਪ੍ਪਾਦਿਵਾਚਨਂ. ਕਮ੍ਮਸਰਿਕ੍ਖਕਂ ਨਾਮ ਯੋ ਏਵਂ ਸਕ੍ਕਚ੍ਚਂ ਸਿਪ੍ਪਂ ਅਵਾਚੇਨ੍ਤੋ ਅਨ੍ਤੇਵਾਸਿਕੇ ਉਕ੍ਕੁਟਿਕਾਸਨਜਙ੍ਘਪੇਸਨਿਕਾਦੀਹਿ ਕਿਲਮੇਤਿ, ਤਸ੍ਸ ਜਙ੍ਘਮਂਸਂ ਲਿਖਿਤ੍ਵਾ ਪਾਤਿਤਂ ਵਿਯ ਹੋਤਿ. ਤਥਾਗਤਸ੍ਸ ਪਨ ਸਕ੍ਕਚ੍ਚਂ ਵਾਚਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਅਨੁਪੁਬ੍ਬਉਗ੍ਗਤਵਟ੍ਟਿਤਂ ਏਣਿਜਙ੍ਘਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਨੁਚ੍ਛਵਿਕਲਾਭਿਤਾ ਆਨਿਸਂਸੋ.
੨੧੫. ਯਦੂਪਘਾਤਾਯਾਤਿ ਯਂ ਸਿਪ੍ਪਂ ਕਸ੍ਸਚਿ ਉਪਘਾਤਾਯ ਨ ਹੋਤਿ. ਕਿਲਿਸ੍ਸਤੀਤਿ ਕਿਲਮਿਸ੍ਸਤਿ. ਸੁਖੁਮਤ੍ਤਚੋਤ੍ਥਤਾਤਿ ਸੁਖੁਮਤ੍ਤਚੇਨ ਪਰਿਯੋਨਦ੍ਧਾ. ਕਿਂ ਪਨ ਅਞ੍ਞੇਨ ਕਮ੍ਮੇਨ ਅਞ੍ਞਂ ਲਕ੍ਖਣਂ ਨਿਬ੍ਬਤ੍ਤਤੀਤਿ? ਨ ਨਿਬ੍ਬਤ੍ਤਤਿ. ਯਂ ਪਨ ਨਿਬ੍ਬਤ੍ਤਤਿ, ਤਂ ਅਨੁਬ੍ਯਞ੍ਜਨਂ ਹੋਤਿ, ਤਸ੍ਮਾ ਇਧ ਵੁਤ੍ਤਂ.
ਸੁਖੁਮਚ੍ਛਵਿਲਕ੍ਖਣਵਣ੍ਣਨਾ
੨੧੬. ਸਮਣਂ ਵਾਤਿ ਸਮਿਤਪਾਪਟ੍ਠੇਨ ਸਮਣਂ. ਬ੍ਰਾਹ੍ਮਣਂ ਵਾਤਿ ਬਾਹਿਤਪਾਪਟ੍ਠੇਨ ਬ੍ਰਾਹ੍ਮਣਂ.
ਮਹਾਪਞ੍ਞੋਤਿਆਦੀਸੁ ਮਹਾਪਞ੍ਞਾਦੀਹਿ ਸਮਨ੍ਨਾਗਤੋ ਹੋਤੀਤਿ ਅਤ੍ਥੋ. ਤਤ੍ਰਿਦਂ ਮਹਾਪਞ੍ਞਾਦੀਨਂ ਨਾਨਤ੍ਤਂ.
ਤਤ੍ਥ ਕਤਮਾ ਮਹਾਪਞ੍ਞਾ? ਮਹਨ੍ਤੇ ਸੀਲਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ, ਮਹਨ੍ਤੇ ਸਮਾਧਿਕ੍ਖਨ੍ਧੇ ਪਞ੍ਞਾਕ੍ਖਨ੍ਧੇ ਵਿਮੁਤ੍ਤਿਕ੍ਖਨ੍ਧੇ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ. ਮਹਨ੍ਤਾਨਿ ਠਾਨਾਠਾਨਾਨਿ ਮਹਨ੍ਤਾ ਵਿਹਾਰਸਮਾਪਤ੍ਤਿਯੋ ਮਹਨ੍ਤਾਨਿ ਅਰਿਯਸਚ੍ਚਾਨਿ ਮਹਨ੍ਤੇ ਸਤਿਪਟ੍ਠਾਨੇ ਸਮ੍ਮਪ੍ਪਧਾਨੇ ਇਦ੍ਧਿਪਾਦੇ ਮਹਨ੍ਤਾਨਿ ਇਨ੍ਦ੍ਰਿਯਾਨਿ ਬਲਾਨਿ ਮਹਨ੍ਤੇ ਬੋਜ੍ਝਙ੍ਗੇ ਮਹਨ੍ਤੇ ਅਰਿਯਮਗ੍ਗੇ ਮਹਨ੍ਤਾਨਿ ਸਾਮਞ੍ਞਫਲਾਨਿ ਮਹਨ੍ਤਾ ਅਭਿਞ੍ਞਾਯੋ ਮਹਨ੍ਤਂ ਪਰਮਤ੍ਥਂ ਨਿਬ੍ਬਾਨਂ ਪਰਿਗ੍ਗਣ੍ਹਾਤੀਤਿ ਮਹਾਪਞ੍ਞਾ.
ਕਤਮਾ ਪੁਥੁਪਞ੍ਞਾ? ਪੁਥੁਨਾਨਾਖਨ੍ਧੇਸੁ ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ. ਪੁਥੁਨਾਨਾਧਾਤੂਸੁ ਪੁਥੁਨਾਨਾਆਯਤਨੇਸੁ ਪੁਥੁਨਾਨਾਪਟਿਚ੍ਚਸਮੁਪ੍ਪਾਦੇਸੁ ਪੁਥੁਨਾਨਾਸੁਞ੍ਞਤਮਨੁਪਲਬ੍ਭੇਸੁ ਪੁਥੁਨਾਨਾਅਤ੍ਥੇਸੁ ਧਮ੍ਮੇਸੁ ਨਿਰੁਤ੍ਤੀਸੁ ਪਟਿਭਾਨੇਸੁ. ਪੁਥੁਨਾਨਾਸੀਲਕ੍ਖਨ੍ਧੇਸੁ ਪੁਥੁਨਾਨਾਸਮਾਧਿਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਦਸ੍ਸਨਕ੍ਖਨ੍ਧੇਸੁ ਪੁਥੁਨਾਨਾਠਾਨਾਠਾਨੇਸੁ ਪੁਥੁਨਾਨਾਵਿਹਾਰਸਮਾਪਤ੍ਤੀਸੁ ਪੁਥੁਨਾਨਾਅਰਿਯਸਚ੍ਚੇਸੁ ਪੁਥੁਨਾਨਾਸਤਿਪਟ੍ਠਾਨੇਸੁ ਸਮ੍ਮਪ੍ਪਧਾਨੇਸੁ ਇਦ੍ਧਿਪਾਦੇਸੁ ਇਨ੍ਦ੍ਰਿਯੇਸੁ ਬਲੇਸੁ ਬੋਜ੍ਝਙ੍ਗੇਸੁ ਪੁਥੁਨਾਨਾਅਰਿਯਮਗ੍ਗੇਸੁ ਸਾਮਞ੍ਞਫਲੇਸੁ ਅਭਿਞ੍ਞਾਸੁ ਪੁਥੁਜ੍ਜਨਸਾਧਾਰਣੇ ਧਮ੍ਮੇ ਸਮਤਿਕ੍ਕਮ੍ਮ ਪਰਮਤ੍ਥੇ ਨਿਬ੍ਬਾਨੇ ਞਾਣਂ ਪਵਤ੍ਤਤੀਤਿ ਪੁਥੁਪਞ੍ਞਾ.
ਕਤਮਾ ਹਾਸਪਞ੍ਞਾ? ਇਧੇਕਚ੍ਚੋ ਹਾਸਬਹੁਲੋ ਵੇਦਬਹੁਲੋ ਤੁਟ੍ਠਿਬਹੁਲੋ ਪਾਮੋਜ੍ਜਬਹੁਲੋ ਸੀਲਂ ਪਰਿਪੂਰੇਤਿ ਇਨ੍ਦ੍ਰਿਯਸਂਵਰਂ ਪਰਿਪੂਰੇਤਿ ਭੋਜਨੇ ਮਤ੍ਤਞ੍ਞੁਤਂ ਜਾਗਰਿਯਾਨੁਯੋਗਂ ਸੀਲਕ੍ਖਨ੍ਧਂ ਸਮਾਧਿਕ੍ਖਨ੍ਧਂ ਪਞ੍ਞਾਕ੍ਖਨ੍ਧਂ ਵਿਮੁਤ੍ਤਿਕ੍ਖਨ੍ਧਂ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧਂ ਪਰਿਪੂਰੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ…ਪੇ… ਪਾਮੋਜ੍ਜਬਹੁਲੋ ਠਾਨਾਠਾਨਂ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਵਿਹਾਰਸਮਾਪਤ੍ਤਿਯੋ ਪਰਿਪੂਰੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਅਰਿਯਸਚ੍ਚਾਨਿ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਸਤਿਪਟ੍ਠਾਨੇ ਸਮ੍ਮਪ੍ਪਧਾਨੇ ਇਦ੍ਧਿਪਾਦੇ ਇਨ੍ਦ੍ਰਿਯਾਨਿ ਬਲਾਨਿ ਬੋਜ੍ਝਙ੍ਗੇ ਅਰਿਯਮਗ੍ਗਂ ਭਾਵੇਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਸਾਮਞ੍ਞਫਲਾਨਿ ਸਚ੍ਛਿਕਰੋਤੀਤਿ ਹਾਸਪਞ੍ਞਾ. ਅਭਿਞ੍ਞਾਯੋ ਪਟਿਵਿਜ੍ਝਤੀਤਿ ਹਾਸਪਞ੍ਞਾ. ਹਾਸਬਹੁਲੋ ਵੇਦਤੁਟ੍ਠਿਪਾਮੋਜ੍ਜਬਹੁਲੋ ਪਰਮਤ੍ਥਂ ਨਿਬ੍ਬਾਨਂ ਸਚ੍ਛਿਕਰੋਤੀਤਿ ਹਾਸਪਞ੍ਞਾ.
ਕਤਮਾ ਜਵਨਪਞ੍ਞਾ? ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਯਂ ਦੂਰੇ ਸਨ੍ਤਿਕੇ ਵਾ, ਸਬ੍ਬਂ ਤਂ ਰੂਪਂ ਅਨਿਚ੍ਚਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਦੁਕ੍ਖਤੋ ਖਿਪ੍ਪਂ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਯਾ ਕਾਚਿ ਵੇਦਨਾ…ਪੇ… ਯਂਕਿਞ੍ਚਿ ਵਿਞ੍ਞਾਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ, ਸਬ੍ਬਂ ਤਂ ਵਿਞ੍ਞਾਣਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ ਦੁਕ੍ਖਂ ਭਯਟ੍ਠੇਨ ਅਨਤ੍ਤਾ ਅਸਾਰਕਟ੍ਠੇਨਾਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਰੂਪਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਂ ਚਕ੍ਖੁ…ਪੇ… ਜਰਾਮਰਣਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਨਿਚ੍ਚਂ ਖਯਟ੍ਠੇਨ…ਪੇ… ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ. ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ. ਚਕ੍ਖੁਂ…ਪੇ… ਜਰਾਮਰਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨਂ ਖਯਧਮ੍ਮਂ ਵਯਧਮ੍ਮਂ ਵਿਰਾਗਧਮ੍ਮਂ ਨਿਰੋਧਧਮ੍ਮਨ੍ਤਿ ਤੁਲਯਿਤ੍ਵਾ ਤੀਰਯਿਤ੍ਵਾ ਵਿਭਾਵਯਿਤ੍ਵਾ ਵਿਭੂਤਂ ਕਤ੍ਵਾ ਜਰਾਮਰਣਨਿਰੋਧੇ ਨਿਬ੍ਬਾਨੇ ਖਿਪ੍ਪਂ ਜਵਤੀਤਿ ਜਵਨਪਞ੍ਞਾ.
ਕਤਮਾ ਤਿਕ੍ਖਪਞ੍ਞਾ? ਖਿਪ੍ਪਂ ਕਿਲੇਸੇ ਛਿਨ੍ਦਤੀਤਿ ਤਿਕ੍ਖਪਞ੍ਞਾ. ਉਪ੍ਪਨ੍ਨਂ ਕਾਮਵਿਤਕ੍ਕਂ ਨਾਧਿਵਾਸੇਤਿ, ਉਪ੍ਪਨ੍ਨਂ ਬ੍ਯਾਪਾਦਵਿਤਕ੍ਕਂ, ਉਪ੍ਪਨ੍ਨਂ ਵਿਹਿਂਸਾਵਿਤਕ੍ਕਂ, ਉਪ੍ਪਨ੍ਨੁਪ੍ਪਨ੍ਨੇ ਪਾਪਕੇ ਅਕੁਸਲੇ ਧਮ੍ਮੇ ਉਪ੍ਪਨ੍ਨਂ ਰਾਗਂ ਦੋਸਂ ਮੋਹਂ ਕੋਧਂ ਉਪਨਾਹਂ ਮਕ੍ਖਂ ਪਲ਼ਾਸਂ ਇਸ੍ਸਂ ਮਚ੍ਛਰਿਯਂ ਮਾਯਂ ਸਾਠੇਯ੍ਯਂ ਥਮ੍ਭਂ ਸਾਰਮ੍ਭਂ ਮਾਨਂ ਅਤਿਮਾਨਂ ਮਦਂ ਪਮਾਦਂ ਸਬ੍ਬੇ ਕਿਲੇਸੇ ਸਬ੍ਬੇ ਦੁਚ੍ਚਰਿਤੇ ਸਬ੍ਬੇ ਅਭਿਸਙ੍ਖਾਰੇ ਸਬ੍ਬੇ ਭਵਗਾਮਿਕਮ੍ਮੇ ਨਾਧਿਵਾਸੇਤਿ ਪਜਹਤਿ ਵਿਨੋਦੇਤਿ ਬ੍ਯਨ੍ਤੀ ਕਰੋਤਿ ਅਨਭਾਵਂ ਗਮੇਤੀਤਿ ਤਿਕ੍ਖਪਞ੍ਞਾ. ਏਕਸ੍ਮਿਂ ਆਸਨੇ ਚਤ੍ਤਾਰੋ ਅਰਿਯਮਗ੍ਗਾ ਚਤ੍ਤਾਰਿ ਸਾਮਞ੍ਞਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾਯੋ ਛ ਅਭਿਞ੍ਞਾਯੋ ਅਧਿਗਤਾ ਹੋਨ੍ਤਿ ਸਚ੍ਛਿਕਤਾ ਫਸ੍ਸਿਤਾ ਪਞ੍ਞਾਯਾਤਿ ਤਿਕ੍ਖਪਞ੍ਞਾ.
ਕਤਮਾ ਨਿਬ੍ਬੇਧਿਕਪਞ੍ਞਾ? ਇਧੇਕਚ੍ਚੋ ਸਬ੍ਬਸਙ੍ਖਾਰੇਸੁ ਉਬ੍ਬੇਗਬਹੁਲੋ ਹੋਤਿ ਉਤ੍ਤਾਸਬਹੁਲੋ ਉਕ੍ਕਣ੍ਠਨਬਹੁਲੋ ਅਰਤਿਬਹੁਲੋ ਅਨਭਿਰਤਿਬਹੁਲੋ ਬਹਿਮੁਖੋ ਨ ਰਮਤਿ ਸਬ੍ਬਸਙ੍ਖਾਰੇਸੁ, ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਂ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾ. ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਦੋਸਕ੍ਖਨ੍ਧਂ ਮੋਹਕ੍ਖਨ੍ਧਂ ਕੋਧਂ ਉਪਨਾਹਂ…ਪੇ… ਸਬ੍ਬੇ ਭਵਗਾਮਿਕਮ੍ਮੇ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਪਞ੍ਞਾਤਿ (ਪਟਿ. ਮ. ੩.੩).
੨੧੭. ਪਬ੍ਬਜਿਤਂ ਉਪਾਸਿਤਾਤਿ ਪਣ੍ਡਿਤਂ ਪਬ੍ਬਜਿਤਂ ਉਪਸਙ੍ਕਮਿਤ੍ਵਾ ਪਯਿਰੁਪਾਸਿਤਾ. ਅਤ੍ਥਨ੍ਤਰੋਤਿ ਯਥਾ ਏਕੇ ਰਨ੍ਧਗਵੇਸਿਨੋ ਉਪਾਰਮ੍ਭਚਿਤ੍ਤਤਾਯ ਦੋਸਂ ਅਬ੍ਭਨ੍ਤਰਂ ਕਰਿਤ੍ਵਾ ਨਿਸਾਮਯਨ੍ਤਿ, ਏਵਂ ਅਨਿਸਾਮੇਤ੍ਵਾ ਅਤ੍ਥਂ ਅਬ੍ਭਨ੍ਤਰਂ ਕਤ੍ਵਾ ਅਤ੍ਥਯੁਤ੍ਤਂ ਕਥਂ ਨਿਸਾਮਯਿ ਉਪਧਾਰਯਿ.
ਪਟਿਲਾਭਗਤੇਨਾਤਿ ਪਟਿਲਾਭਤ੍ਥਾਯ ਗਤੇਨ. ਉਪ੍ਪਾਦਨਿਮਿਤ੍ਤਕੋਵਿਦਾਤਿ ਉਪ੍ਪਾਦੇ ਚ ਨਿਮਿਤ੍ਤੇ ਚ ਛੇਕਾ. ਅਵੇਚ੍ਚ ਦਕ੍ਖਿਤੀਤਿ ਞਤ੍ਵਾ ਪਸ੍ਸਿਸ੍ਸਤਿ.
ਅਤ੍ਥਾਨੁਸਿਟ੍ਠੀਸੁ ਪਰਿਗ੍ਗਹੇਸੁ ਚਾਤਿ ਯੇ ਅਤ੍ਥਾਨੁਸਾਸਨੇਸੁ ਪਰਿਗ੍ਗਹਾ ਅਤ੍ਥਾਨਤ੍ਥਂ ਪਰਿਗ੍ਗਾਹਕਾਨਿ ਞਾਣਾਨਿ, ਤੇਸੂਤਿ ਅਤ੍ਥੋ.
ਸੁਵਣ੍ਣਵਣ੍ਣਲਕ੍ਖਣਵਣ੍ਣਨਾ
੨੧੮. ਅਕ੍ਕੋਧਨੋਤਿ ਨ ਅਨਾਗਾਮਿਮਗ੍ਗੇਨ ਕੋਧਸ੍ਸ ਪਹੀਨਤ੍ਤਾ, ਅਥ ਖੋ ਸਚੇਪਿ ਮੇ ਕੋਧੋ ਉਪ੍ਪਜ੍ਜੇਯ੍ਯ, ਖਿਪ੍ਪਮੇਵ ਨਂ ਪਟਿਵਿਨੋਦੇਯ੍ਯਨ੍ਤਿ ਏਵਂ ਅਕ੍ਕੋਧਵਸਿਕਤ੍ਤਾ. ਨਾਭਿਸਜ੍ਜੀਤਿ ਕੁਟਿਲਕਣ੍ਟਕੋ ਵਿਯ ਤਤ੍ਥ ਤਤ੍ਥ ਮਮ੍ਮਂ ਤੁਦਨ੍ਤੋ ਵਿਯ ਨ ਲਗ੍ਗਿ. ਨ ਕੁਪ੍ਪਿ ਨ ਬ੍ਯਾਪਜ੍ਜੀਤਿਆਦੀਸੁ ਪੁਬ੍ਬੁਪ੍ਪਤ੍ਤਿਕੋ ਕੋਪੋ. ਤਤੋ ਬਲਵਤਰੋ ਬ੍ਯਾਪਾਦੋ. ਤਤੋ ਬਲਵਤਰਾ ਪਤਿਤ੍ਥਿਯਨਾ. ਤਂ ਸਬ੍ਬਂ ਅਕਰੋਨ੍ਤੋ ਨ ਕੁਪ੍ਪਿ ਨ ਬ੍ਯਾਪਜ੍ਜਿ ਨ ਪਤਿਤ੍ਥਿਯਿ. ਅਪ੍ਪਚ੍ਚਯਨ੍ਤਿ ਦੋਮਨਸ੍ਸਂ. ਨ ਪਾਤ੍ਵਾਕਾਸੀਤਿ ਨ ਕਾਯਵਿਕਾਰੇਨ ਵਾ ਵਚੀਵਿਕਾਰੇਨ ਵਾ ਪਾਕਟਮਕਾਸਿ.
ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਕ੍ਕੋਧਨਤਾ ਚੇਵ ਸੁਖੁਮਤ੍ਥਰਣਾਦਿਦਾਨਞ੍ਚ. ਕਮ੍ਮਸਰਿਕ੍ਖਕਂ ਨਾਮ ਕੋਧਨਸ੍ਸ ਛਵਿਵਣ੍ਣੋ ਆਵਿਲੋ ਹੋਤਿ ਮੁਖਂ ਦੁਦ੍ਦਸਿਯਂ ਵਤ੍ਥਚ੍ਛਾਦਨਸਦਿਸਞ੍ਚ ਮਣ੍ਡਨਂ ਨਾਮ ਨਤ੍ਥਿ. ਤਸ੍ਮਾ ਯੋ ਕੋਧਨੋ ਚੇਵ ਵਤ੍ਥਚ੍ਛਾਦਨਾਨਞ੍ਚ ਅਦਾਤਾ, ਸੋ ਇਮਿਨਾ ਕਾਰਣੇਨਸ੍ਸ ਜਨੋ ਕੋਧਨਾਦਿਭਾਵਂ ਜਾਨਾਤੂਤਿ ਦੁਬ੍ਬਣ੍ਣੋ ਹੋਤਿ ਦੁਸ੍ਸਣ੍ਠਾਨੋ. ਅਕ੍ਕੋਧਨਸ੍ਸ ਪਨ ਮੁਖਂ ਵਿਰੋਚਤਿ, ਛਵਿਵਣ੍ਣੋ ਵਿਪ੍ਪਸੀਦਤਿ. ਸਤ੍ਤਾ ਹਿ ਚਤੂਹਿ ਕਾਰਣੇਹਿ ਪਾਸਾਦਿਕਾ ਹੋਨ੍ਤਿ ਆਮਿਸਦਾਨੇਨ ਵਾ ਵਤ੍ਥਦਾਨੇਨ ਵਾ ਸਮ੍ਮਜ੍ਜਨੇਨ ਵਾ ਅਕ੍ਕੋਧਨਤਾਯ ਵਾ. ਇਮਾਨਿ ਚਤ੍ਤਾਰਿਪਿ ਕਾਰਣਾਨਿ ਦੀਘਰਤ੍ਤਂ ਤਥਾਗਤੇਨ ਕਤਾਨੇਵ. ਤੇਨਸ੍ਸ ਇਮੇਸਂ ਕਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸੁਵਣ੍ਣਵਣ੍ਣਂ ਮਹਾਪੁਰਿਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਸੁਖੁਮਤ੍ਥਰਣਾਦਿਲਾਭਿਤਾ ਆਨਿਸਂਸੋ.
੨੧੯. ਅਭਿਵਿਸ੍ਸਜੀਤਿ ਅਭਿਵਿਸ੍ਸਜ੍ਜੇਸਿ. ਮਹਿਮਿਵ ਸੁਰੋ ਅਭਿਵਸ੍ਸਨ੍ਤਿ ਸੁਰੋ ਵੁਚ੍ਚਤਿ ਦੇਵੋ, ਮਹਾਪਥਵਿਂ ਅਭਿਵਸ੍ਸਨ੍ਤੋ ਦੇਵੋ ਵਿਯ.
ਸੁਰਵਰਤਰੋਰਿਵ ਇਨ੍ਦੋਤਿ ਸੁਰਾਨਂ ਵਰਤਰੋ ਇਨ੍ਦੋ ਵਿਯ.
ਅਪਬ੍ਬਜ੍ਜਮਿਚ੍ਛਨ੍ਤਿ ਅਪਬ੍ਬਜ੍ਜਂ ਗਿਹਿਭਾਵਂ ਇਚ੍ਛਨ੍ਤੋ. ਮਹਤਿਮਹਿਨ੍ਤਿ ਮਹਨ੍ਤਿਂ ਪਥਵਿਂ.
ਅਚ੍ਛਾਦਨਵਤ੍ਥਮੋਕ੍ਖਪਾਵੁਰਣਾਨਨ੍ਤਿ ਅਚ੍ਛਾਦਨਾਨਞ੍ਚੇਵ ਵਤ੍ਥਾਨਞ੍ਚ ਉਤ੍ਤਮਪਾਵੁਰਣਾਨਞ੍ਚ. ਪਨਾਸੋਤਿ ਵਿਨਾਸੋ.
ਕੋਸੋਹਿਤਵਤ੍ਥਗੁਯ੍ਹਲਕ੍ਖਣਵਣ੍ਣਨਾ
੨੨੦. ਮਾਤਰਮ੍ਪਿ ਪੁਤ੍ਤੇਨ ਸਮਾਨੇਤਾ ਅਹੋਸੀਤਿ ਇਮਂ ਕਮ੍ਮਂ ਰਜ੍ਜੇ ਪਤਿਟ੍ਠਿਤੇਨ ਸਕ੍ਕਾ ਕਾਤੁਂ. ਤਸ੍ਮਾ ਬੋਧਿਸਤ੍ਤੋਪਿ ਰਜ੍ਜਂ ਕਾਰਯਮਾਨੋ ਅਨ੍ਤੋਨਗਰੇ ਚਤੁਕ੍ਕਾਦੀਸੁ ਚਤੂਸੁ ਨਗਰਦ੍ਵਾਰੇਸੁ ਬਹਿਨਗਰੇ ਚਤੂਸੁ ਦਿਸਾਸੁ ਇਮਂ ਕਮ੍ਮਂ ਕਰੋਥਾਤਿ ਮਨੁਸ੍ਸੇ ਠਪੇਸਿ. ਤੇ ਮਾਤਰਂ ਕੁਹਿਂ ਮੇ ਪੁਤ੍ਤੋ ਪੁਤ੍ਤਂ ਨ ਪਸ੍ਸਾਮੀਤਿ ਵਿਲਪਨ੍ਤਿਂ ਪਰਿਯੇਸਮਾਨਂ ਦਿਸ੍ਵਾ ਏਹਿ, ਅਮ੍ਮ, ਪੁਤ੍ਤਂ ਦਕ੍ਖਸੀਤਿ ਤਂ ਆਦਾਯ ਗਨ੍ਤ੍ਵਾ ਨਹਾਪੇਤ੍ਵਾ ਭੋਜੇਤ੍ਵਾ ਪੁਤ੍ਤਮਸ੍ਸਾ ਪਰਿਯੇਸਿਤ੍ਵਾ ਦਸ੍ਸੇਨ੍ਤਿ. ਏਸ ਨਯੋ ਸਬ੍ਬਤ੍ਥ.
ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਞਾਤੀਨਂ ਸਮਙ੍ਗਿਭਾਵਕਰਣਂ. ਕਮ੍ਮਸਰਿਕ੍ਖਕਂ ਨਾਮ ਞਾਤਯੋ ਹਿ ਸਮਙ੍ਗੀਭੂਤਾ ਅਞ੍ਞਮਞ੍ਞਸ੍ਸ ਵਜ੍ਜਂ ਪਟਿਚ੍ਛਾਦੇਨ੍ਤਿ. ਕਿਞ੍ਚਾਪਿ ਹਿ ਤੇ ਕਲਹਕਾਲੇ ਕਲਹਂ ਕਰੋਨ੍ਤਿ, ਏਕਸ੍ਸ ਪਨ ਦੋਸੇ ਉਪ੍ਪਨ੍ਨੇ ਅਞ੍ਞਂ ਜਾਨਾਪੇਤੁਂ ਨ ਇਚ੍ਛਨ੍ਤਿ. ਅਯਂ ਨਾਮ ਏਤਸ੍ਸ ਦੋਸੋਤਿ ਵੁਤ੍ਤੇ ਸਬ੍ਬੇ ਉਟ੍ਠਹਿਤ੍ਵਾ ਕੇਨ ਦਿਟ੍ਠਂ ਕੇਨ ਸੁਤਂ, ਅਮ੍ਹਾਕਂ ਞਾਤੀਸੁ ਏਵਰੂਪਂ ਕਤ੍ਤਾ ਨਾਮ ਨਤ੍ਥੀਤਿ. ਤਥਾਗਤੇਨ ਚ ਤਂ ਞਾਤਿਸਙ੍ਗਹਂ ਕਰੋਨ੍ਤੇਨ ਦੀਘਰਤ੍ਤਂ ਇਦਂ ਵਜ੍ਜਪ੍ਪਟਿਚ੍ਛਾਦਨਕਮ੍ਮਂ ਨਾਮ ਕਤਂ ਹੋਤਿ. ਅਥਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਏਵਰੂਪਸ੍ਸ ਕਮ੍ਮਸ੍ਸ ਕਤਭਾਵਂ ਜਾਨਾਤੂਤਿ ਕੋਸੋਹਿਤਵਤ੍ਥਗੁਯ੍ਹਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਪਹੂਤਪੁਤ੍ਤਤਾ ਆਨਿਸਂਸੋ.
੨੨੧. ਵਤ੍ਥਛਾਦਿਯਨ੍ਤਿ ਵਤ੍ਥੇਨ ਛਾਦੇਤਬ੍ਬਂ ਵਤ੍ਥਗੁਯ੍ਹਂ.
ਅਮਿਤ੍ਤਤਾਪਨਾਤਿ ਅਮਿਤ੍ਤਾਨਂ ਪਤਾਪਨਾ. ਗਿਹਿਸ੍ਸ ਪੀਤਿਂ ਜਨਨਾਤਿ ਗਿਹਿਭੂਤਸ੍ਸ ਸਤੋ ਪੀਤਿਜਨਨਾ.
ਪਰਿਮਣ੍ਡਲਾਦਿਲਕ੍ਖਣਵਣ੍ਣਨਾ
੨੨੨. ਸਮਂ ਜਾਨਾਤੀਤਿ ‘‘ਅਯਂ ਤਾਰੁਕ੍ਖਸਮੋ ਅਯਂ ਪੋਕ੍ਖਰਸਾਤਿਸਮੋ’’ਤਿ ਏਵਂ ਤੇਨ ਤੇਨ ਸਮਂ ਜਾਨਾਤਿ. ਸਾਮਂ ਜਾਨਾਤੀਤਿ ਸਯਂ ਜਾਨਾਤਿ. ਪੁਰਿਸਂ ਜਾਨਾਤੀਤਿ ‘‘ਅਯਂ ਸੇਟ੍ਠਸਮ੍ਮਤੋ’’ਤਿ ਪੁਰਿਸਂ ਜਾਨਾਤਿ. ਪੁਰਿਸਵਿਸੇਸਂ ਜਾਨਾਤੀਤਿ ਮੁਗ੍ਗਂ ਮਾਸੇਨ ਸਮਂ ਅਕਤ੍ਵਾ ਗੁਣਵਿਸਿਟ੍ਠਸ੍ਸ ਵਿਸੇਸਂ ਜਾਨਾਤਿ. ਅਯਮਿਦਮਰਹਤੀਤਿ ਅਯਂ ਪੁਰਿਸੋ ਇਦਂ ਨਾਮ ਦਾਨਸਕ੍ਕਾਰਂ ਅਰਹਤਿ. ਪੁਰਿਸਵਿਸੇਸਕਰੋ ਅਹੋਸੀਤਿ ਪੁਰਿਸਵਿਸੇਸਂ ਞਤ੍ਵਾ ਕਾਰਕੋ ਅਹੋਸਿ. ਯੋ ਯਂ ਅਰਹਤਿ, ਤਸ੍ਸੇਵ ਤਂ ਅਦਾਸਿ. ਯੋ ਹਿ ਕਹਾਪਣਾਰਹਸ੍ਸ ਅਡ੍ਢਂ ਦੇਤਿ, ਸੋ ਪਰਸ੍ਸ ਅਡ੍ਢਂ ਨਾਸੇਤਿ. ਯੋ ਦ੍ਵੇ ਕਹਾਪਣੇ ਦੇਤਿ, ਸੋ ਅਤ੍ਤਨੋ ਕਹਾਪਣਂ ਨਾਸੇਤਿ. ਤਸ੍ਮਾ ਇਦਂ ਉਭਯਮ੍ਪਿ ਅਕਤ੍ਵਾ ਯੋ ਯਂ ਅਰਹਤਿ, ਤਸ੍ਸ ਤਦੇਵ ਅਦਾਸਿ. ਸਦ੍ਧਾਧਨਨ੍ਤਿਆਦੀਸੁ ਸਮ੍ਪਤ੍ਤਿਪਟਿਲਾਭਟ੍ਠੇਨ ਸਦ੍ਧਾਦੀਨਂ ਧਨਭਾਵੋ ਵੇਦਿਤਬ੍ਬੋ.
ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਪੁਰਿਸਵਿਸੇਸਂ ਞਤ੍ਵਾ ਕਤਂ ਸਮਸਙ੍ਗਹਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਤਦਸ੍ਸ ਕਮ੍ਮਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਦ੍ਵੇ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਧਨਸਮ੍ਪਤ੍ਤਿ ਆਨਿਸਂਸੋ.
੨੨੩. ਤੁਲਿਯਾਤਿ ਤੁਲਯਿਤ੍ਵਾ. ਪਟਿਵਿਚਯਾਤਿ ਪਟਿਵਿਚਿਨਿਤ੍ਵਾ. ਮਹਾਜਨਸਙ੍ਗਾਹਕਨ੍ਤਿ ਮਹਾਜਨਸਙ੍ਗਹਣਂ. ਸਮੇਕ੍ਖਮਾਨੋਤਿ ਸਮਂ ਪੇਕ੍ਖਮਾਨੋ. ਅਤਿਨਿਪੁਣਾ ਮਨੁਜਾਤਿ ਅਤਿਨਿਪੁਣਾ ਸੁਖੁਮਪਞ੍ਞਾ ਲਕ੍ਖਣਪਾਠਕਮਨੁਸ੍ਸਾ. ਬਹੁਵਿਵਿਧਾ ਗਿਹੀਨਂ ਅਰਹਾਨੀਤਿ ਬਹੂ ਵਿਵਿਧਾਨਿ ਗਿਹੀਨਂ ਅਨੁਚ੍ਛਵਿਕਾਨਿ ਪਟਿਲਭਤਿ. ਦਹਰੋ ਸੁਸੁ ਕੁਮਾਰੋ ‘‘ਅਯਂ ਦਹਰੋ ਕੁਮਾਰੋ ਪਟਿਲਭਿਸ੍ਸਤੀ’’ਤਿ ਬ੍ਯਾਕਂਸੁ ਮਹੀਪਤਿਸ੍ਸਾਤਿ ਰਞ੍ਞੋ.
ਸੀਹਪੁਬ੍ਬਦ੍ਧਕਾਯਾਦਿਲਕ੍ਖਣਵਣ੍ਣਨਾ
੨੨੪. ਯੋਗਕ੍ਖੇਮਕਾਮੋਤਿ ਯੋਗਤੋ ਖੇਮਕਾਮੋ. ਪਞ੍ਞਾਯਾਤਿ ਕਮ੍ਮਸ੍ਸਕਤਪਞ੍ਞਾਯ. ਇਧ ਕਮ੍ਮਂ ਨਾਮ ਮਹਾਜਨਸ੍ਸ ਅਤ੍ਥਕਾਮਤਾ. ਕਮ੍ਮਸਰਿਕ੍ਖਕਂ ਨਾਮ ਤਂ ਮਹਾਜਨਸ੍ਸ ਅਤ੍ਥਕਾਮਤਾਯ ਵਡ੍ਢਿਮੇਵ ਪਚ੍ਚਾਸੀਸਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਸਮਨ੍ਤਪਰਿਪੂਰਾਨਿ ਅਪਰਿਹੀਨਾਨਿ ਤੀਣਿ ਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਤ੍ਤਯਂ. ਧਨਾਦੀਹਿ ਚੇਵ ਸਦ੍ਧਾਦੀਹਿ ਚ ਅਪਰਿਹਾਨਿ ਆਨਿਸਂਸੋ.
੨੨੫. ਸਦ੍ਧਾਯਾਤਿ ਓਕਪ੍ਪਨਸਦ੍ਧਾਯ ਪਸਾਦਸਦ੍ਧਾਯ. ਸੀਲੇਨਾਤਿ ਪਞ੍ਚਸੀਲੇਨ ਦਸਸੀਲੇਨ. ਸੁਤੇਨਾਤਿ ਪਰਿਯਤ੍ਤਿਸਵਨੇਨ. ਬੁਦ੍ਧਿਯਾਤਿ ਏਤੇਸਂ ਬੁਦ੍ਧਿਯਾ, ‘‘ਕਿਨ੍ਤਿ ਏਤੇਹਿ ਵਡ੍ਢੇਯ੍ਯੁ’’ਨ੍ਤਿ ਏਵਂ ਚਿਨ੍ਤੇਸੀਤਿ ਅਤ੍ਥੋ. ਧਮ੍ਮੇਨਾਤਿ ਲੋਕਿਯਧਮ੍ਮੇਨ. ਬਹੂਹਿ ਸਾਧੂਹੀਤਿ ਅਞ੍ਞੇਹਿਪਿ ਬਹੂਹਿ ਉਤ੍ਤਮਗੁਣੇਹਿ. ਅਸਹਾਨਧਮ੍ਮਤਨ੍ਤਿ ਅਪਰਿਹੀਨਧਮ੍ਮਂ.
ਰਸਗ੍ਗਸਗ੍ਗਿਤਾਲਕ੍ਖਣਵਣ੍ਣਨਾ
੨੨੬. ਸਮਾਭਿਵਾਹਿਨਿਯੋਤਿ ਯਥਾ ਤਿਲਫਲਮਤ੍ਤਮ੍ਪਿ ਜਿਵ੍ਹਗ੍ਗੇ ਠਪਿਤਂ ਸਬ੍ਬਤ੍ਥ ਫਰਤਿ, ਏਵਂ ਸਮਾ ਹੁਤ੍ਵਾ ਵਹਨ੍ਤਿ. ਇਧ ਕਮ੍ਮਂ ਨਾਮ ਅਵਿਹੇਠਨਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਪਾਣਿਆਦੀਹਿ ਪਹਾਰਂ ਲਦ੍ਧਸ੍ਸ ਤਤ੍ਥ ਤਤ੍ਥ ਲੋਹਿਤਂ ਸਣ੍ਠਾਤਿ, ਗਣ੍ਠਿ ਗਣ੍ਠਿ ਹੁਤ੍ਵਾ ਅਨ੍ਤੋਵ ਪੁਬ੍ਬਂ ਗਣ੍ਹਾਤਿ, ਅਨ੍ਤੋਵ ਭਿਜ੍ਜਤਿ, ਏਵਂ ਸੋ ਬਹੁਰੋਗੋ ਹੋਤਿ. ਤਥਾਗਤੇਨ ਪਨ ਦੀਘਰਤ੍ਤਂ ਇਮਂ ਆਰੋਗ੍ਯਕਰਣਕਮ੍ਮਂ ਕਤਂ. ਤਦਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਆਰੋਗ੍ਯਕਰਂ ਰਸਗ੍ਗਸਗ੍ਗਿਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਪ੍ਪਾਬਾਧਤਾ ਆਨਿਸਂਸੋ.
੨੨੭. ਮਰਣਵਧੇਨਾਤਿ ‘‘ਏਤਂ ਮਾਰੇਥ ਏਤਂ ਘਾਤੇਥਾ’’ਤਿ ਏਵਂ ਆਣਤ੍ਤੇਨ ਮਰਣਵਧੇਨ. ਉਬ੍ਬਾਧਨਾਯਾਤਿ ਬਨ੍ਧਨਾਗਾਰਪ੍ਪਵੇਸਨੇਨ.
ਅਭਿਨੀਲਨੇਤ੍ਤਾਦਿਲਕ੍ਖਣਵਣ੍ਣਨਾ
੨੨੮. ਨ ਚ ਵਿਸਟਨ੍ਤਿ ਕਕ੍ਕਟਕੋ ਵਿਯ ਅਕ੍ਖੀਨਿ ਨੀਹਰਿਤ੍ਵਾ ਨ ਕੋਧਵਸੇਨ ਪੇਕ੍ਖਿਤਾ ਅਹੋਸਿ. ਨ ਚ ਵਿਸਾਚੀਤਿ ਵਙ੍ਕਕ੍ਖਿਕੋਟਿਯਾ ਪੇਕ੍ਖਿਤਾਪਿ ਨਾਹੋਸਿ. ਨ ਚ ਪਨ ਵਿਚੇਯ੍ਯ ਪੇਕ੍ਖਿਤਾਤਿ ਵਿਚੇਯ੍ਯ ਪੇਕ੍ਖਿਤਾ ਨਾਮ ਯੋ ਕੁਜ੍ਝਿਤ੍ਵਾ ਯਦਾ ਨਂ ਪਰੋ ਓਲੋਕੇਤਿ, ਤਦਾ ਨਿਮ੍ਮੀਲੇਤਿ ਨ ਓਲੋਕੇਤਿ, ਪੁਨ ਗਚ੍ਛਨ੍ਤਂ ਕੁਜ੍ਝਿਤ੍ਵਾ ਓਲੋਕੇਤਿ, ਏਵਰੂਪੋ ਨਾਹੋਸਿ. ‘‘ਵਿਨੇਯ੍ਯਪੇਕ੍ਖਿਤਾ’’ਤਿਪਿ ਪਾਠੋ, ਅਯਮੇਵਤ੍ਥੋ. ਉਜੁਂ ਤਥਾ ਪਸਟਮੁਜੁਮਨੋਤਿ ਉਜੁਮਨੋ ਹੁਤ੍ਵਾ ਉਜੁ ਪੇਕ੍ਖਿਤਾ ਹੋਤਿ, ਯਥਾ ਚ ਉਜੁਂ, ਤਥਾ ਪਸਟਂ ਵਿਪੁਲਂ ਵਿਤ੍ਥਤਂ ਪੇਕ੍ਖਿਤਾ ਹੋਤਿ. ਪਿਯਦਸ੍ਸਨੋਤਿ ਪਿਯਾਯਮਾਨੇਹਿ ਪਸ੍ਸਿਤਬ੍ਬੋ.
ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਮਹਾਜਨਸ੍ਸ ਪਿਯਚਕ੍ਖੁਨਾ ਓਲੋਕਨਕਮ੍ਮਂ. ਕਮ੍ਮਸਰਿਕ੍ਖਕਂ ਨਾਮ ਕੁਜ੍ਝਿਤ੍ਵਾ ਓਲੋਕੇਨ੍ਤੋ ਕਾਣੋ ਵਿਯ ਕਾਕਕ੍ਖਿ ਵਿਯ ਹੋਤਿ, ਵਙ੍ਕਕ੍ਖਿ ਪਨ ਆਵਿਲਕ੍ਖਿ ਚ ਹੋਤਿਯੇਵ. ਪਸਨ੍ਨਚਿਤ੍ਤਸ੍ਸ ਪਨ ਓਲੋਕਯਤੋ ਅਕ੍ਖੀਨਂ ਪਞ੍ਚਵਣ੍ਣੋ ਪਸਾਦੋ ਪਞ੍ਞਾਯਤਿ. ਤਥਾਗਤੋ ਚ ਤਥਾ ਓਲੋਕੇਸਿ. ਅਥਸ੍ਸ ਤਂ ਦੀਘਰਤ੍ਤਂ ਪਿਯਚਕ੍ਖੁਨਾ ਓਲੋਕਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਮਾਨਿ ਨੇਤ੍ਤਸਮ੍ਪਤ੍ਤਿਕਰਾਨਿ ਦ੍ਵੇ ਮਹਾਪੁਰਿਸਲਕ੍ਖਣਾਨਿ ਨਿਬ੍ਬਤ੍ਤਨ੍ਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਪਿਯਦਸ੍ਸਨਤਾ ਆਨਿਸਂਸੋ. ਅਭਿਯੋਗਿਨੋਤਿ ਲਕ੍ਖਣਸਤ੍ਥੇ ਯੁਤ੍ਤਾ.
ਉਣ੍ਹੀਸਸੀਸਲਕ੍ਖਣਵਣ੍ਣਨਾ
੨੩੦. ਬਹੁਜਨਪੁਬ੍ਬਙ੍ਗਮੋ ਅਹੋਸੀਤਿ ਬਹੁਜਨਸ੍ਸ ਪੁਬ੍ਬਙ੍ਗਮੋ ਅਹੋਸਿ ਗਣਜੇਟ੍ਠਕੋ. ਤਸ੍ਸ ਦਿਟ੍ਠਾਨੁਗਤਿਂ ਅਞ੍ਞੇ ਆਪਜ੍ਜਿਂਸੁ. ਇਧ ਕਮ੍ਮਂ ਨਾਮ ਪੁਬ੍ਬਙ੍ਗਮਤਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਪੁਬ੍ਬਙ੍ਗਮੋ ਹੁਤ੍ਵਾ ਦਾਨਾਦੀਨਿ ਕੁਸਲਕਮ੍ਮਾਨਿ ਕਰੋਤਿ, ਸੋ ਅਮਙ੍ਕੁਭੂਤੋ ਸੀਸਂ ਉਕ੍ਖਿਪਿਤ੍ਵਾ ਪੀਤਿਪਾਮੋਜ੍ਜੇਨ ਪਰਿਪੁਣ੍ਣਸੀਸੋ ਵਿਚਰਤਿ, ਮਹਾਪੁਰਿਸੋ ਚ ਹੋਤਿ. ਤਥਾਗਤੋ ਚ ਤਥਾ ਅਕਾਸਿ. ਅਥਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਇਦਂ ਪੁਬ੍ਬਙ੍ਗਮਕਮ੍ਮਂ ਜਾਨਾਤੂਤਿ ਉਣ੍ਹੀਸਸੀਸਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਮਹਾਜਨਾਨੁਵਤ੍ਤਨਤਾ ਆਨਿਸਂਸੋ.
੨੩੧. ਬਹੁਜਨਂ ਹੇਸ੍ਸਤੀਤਿ ਬਹੁਜਨਸ੍ਸ ਭਵਿਸ੍ਸਤਿ. ਪਟਿਭੋਗਿਯਾਤਿ ਵੇਯ੍ਯਾਵਚ੍ਚਕਰਾ, ਏਤਸ੍ਸ ਬਹੂ ਵੇਯ੍ਯਾਵਚ੍ਚਕਰਾ ਭਵਿਸ੍ਸਨ੍ਤੀਤਿ ਅਤ੍ਥੋ. ਅਭਿਹਰਨ੍ਤਿ ਤਦਾਤਿ ਦਹਰਕਾਲੇਯੇਵ ਤਦਾ ਏਵਂ ਬ੍ਯਾਕਰੋਨ੍ਤਿ. ਪਟਿਹਾਰਕਨ੍ਤਿ ਵੇਯ੍ਯਾਵਚ੍ਚਕਰਭਾਵਂ. ਵਿਸਵੀਤਿ ਚਿਣ੍ਣਵਸੀ.
ਏਕੇਕਲੋਮਤਾਦਿਲਕ੍ਖਣਵਣ੍ਣਨਾ
੨੩੨. ਉਪਵਤ੍ਤਤੀਤਿ ਅਜ੍ਝਾਸਯਂ ਅਨੁਵਤ੍ਤਤਿ, ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਸਚ੍ਚਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਦੀਘਰਤ੍ਤਂ ਅਦ੍ਵੇਜ੍ਝਕਥਾਯ ਪਰਿਸੁਦ੍ਧਕਥਾਯ ਕਥਿਤਭਾਵਮਸ੍ਸ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਏਕੇਕਲੋਮਲਕ੍ਖਣਞ੍ਚ ਉਣ੍ਣਾਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਮਹਾਜਨਸ੍ਸ ਅਜ੍ਝਾਸਯਾਨੁਕੂਲੇਨ ਅਨੁਵਤ੍ਤਨਤਾ ਆਨਿਸਂਸੋ. ਏਕੇਕਲੋਮੂਪਚਿਤਙ੍ਗਵਾਤਿ ਏਕੇਕੇਹਿ ਲੋਮੇਹਿ ਉਪਚਿਤਸਰੀਰੋ.
ਚਤ੍ਤਾਲੀਸਾਦਿਲਕ੍ਖਣਵਣ੍ਣਨਾ
੨੩੪. ਅਭੇਜ੍ਜਪਰਿਸੋਤਿ ਅਭਿਨ੍ਦਿਤਬ੍ਬਪਰਿਸੋ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਪਿਸੁਣਵਾਚਾਯ ਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਪਿਸੁਣਵਾਚਸ੍ਸ ਕਿਰ ਸਮਗ੍ਗਭਾਵਂ ਭਿਨ੍ਦਨਤੋ ਦਨ੍ਤਾ ਅਪਰਿਪੁਣ੍ਣਾ ਚੇਵ ਹੋਨ੍ਤਿ ਵਿਰਲ਼ਾ ਚ. ਤਥਾਗਤਸ੍ਸ ਪਨ ਦੀਘਰਤ੍ਤਂ ਅਪਿਸੁਣਵਾਚਤਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਇਦਂ ਲਕ੍ਖਣਦ੍ਵਯਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਅਭੇਜ੍ਜਪਰਿਸਤਾ ਆਨਿਸਂਸੋ. ਚਤੁਰੋ ਦਸਾਤਿ ਚਤ੍ਤਾਰੋ ਦਸ ਚਤ੍ਤਾਲੀਸਂ.
ਪਹੂਤਜਿਵ੍ਹਾਦਿਲਕ੍ਖਣਵਣ੍ਣਨਾ
੨੩੬. ਆਦੇਯ੍ਯਵਾਚੋ ਹੋਤੀਤਿ ਗਹੇਤਬ੍ਬਵਚਨੋ ਹੋਤਿ. ਇਧ ਕਮ੍ਮਂ ਨਾਮ ਦੀਘਰਤ੍ਤਂ ਅਫਰੁਸਵਾਦਿਤਾ. ਕਮ੍ਮਸਰਿਕ੍ਖਕਂ ਨਾਮ ਯੇ ਫਰੁਸਵਾਚਾ ਹੋਨ੍ਤਿ, ਤੇ ਇਮਿਨਾ ਕਾਰਣੇਨ ਨੇਸਂ ਜਿਵ੍ਹਂ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਫਰੁਸਵਾਚਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਬਦ੍ਧਜਿਵ੍ਹਾ ਵਾ ਹੋਨ੍ਤਿ, ਗੂਲ਼੍ਹਜਿਵ੍ਹਾ ਵਾ ਦ੍ਵਿਜਿਵ੍ਹਾ ਵਾ ਮਮ੍ਮਨਾ ਵਾ. ਯੇ ਪਨ ਜਿਵ੍ਹਂ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਫਰੁਸਵਾਚਂ ਨ ਵਦਨ੍ਤਿ, ਤੇ ਬਦ੍ਧਜਿਵ੍ਹਾ ਗੂਲ਼੍ਹਜਿਵ੍ਹਾ ਦ੍ਵਿਜਿਵ੍ਹਾ ਨ ਹੋਨ੍ਤਿ. ਮੁਦੁ ਨੇਸਂ ਜਿਵ੍ਹਾ ਹੋਤਿ ਰਤ੍ਤਕਮ੍ਬਲਵਣ੍ਣਾ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਜਿਵ੍ਹਂ ਪਰਿਵਤ੍ਤੇਤ੍ਵਾ ਫਰੁਸਾਯ ਵਾਚਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਪਹੂਤਜਿਵ੍ਹਾਲਕ੍ਖਣਂ ਨਿਬ੍ਬਤ੍ਤਤਿ. ਫਰੁਸਵਾਚਂ ਕਥੇਨ੍ਤਾਨਞ੍ਚ ਸਦ੍ਦੋ ਭਿਜ੍ਜਤਿ. ਤੇ ਸਦ੍ਦਭੇਦਂ ਕਤ੍ਵਾ ਫਰੁਸਵਾਚਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਛਿਨ੍ਨਸ੍ਸਰਾ ਵਾ ਹੋਨ੍ਤਿ ਭਿਨ੍ਨਸ੍ਸਰਾ ਵਾ ਕਾਕਸ੍ਸਰਾ ਵਾ. ਯੇ ਪਨ ਸਰਭੇਦਕਰਂ ਫਰੁਸਵਾਚਂ ਨ ਕਥੇਨ੍ਤਿ, ਤੇਸਂ ਸਦ੍ਦੋ ਮਧੁਰੋ ਚ ਹੋਤਿ ਪੇਮਨੀਯੋ. ਤਸ੍ਮਾ ਤਥਾਗਤਸ੍ਸ ਦੀਘਰਤ੍ਤਂ ਸਰਭੇਦਕਰਾਯ ਫਰੁਸਵਾਚਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਬ੍ਰਹ੍ਮਸ੍ਸਰਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਆਦੇਯ੍ਯਵਚਨਤਾ ਆਨਿਸਂਸੋ.
੨੩੭. ਉਬ੍ਬਾਧਿਕਨ੍ਤਿ ਅਕ੍ਕੋਸਯੁਤ੍ਤਤ੍ਤਾ ਆਬਾਧਕਰਿਂ ਬਹੁਜਨਪ੍ਪਮਦ੍ਦਨਨ੍ਤਿ ਬਹੁਜਨਾਨਂ ਪਮਦ੍ਦਨਿਂ ਅਬਾਲ਼੍ਹਂ ਗਿਰਂ ਸੋ ਨ ਭਣਿ ਫਰੁਸਨ੍ਤਿ ਏਤ੍ਥ ਅਕਾਰੋ ਪਰਤੋ ਭਣਿਸਦ੍ਦੇਨ ਯੋਜੇਤਬ੍ਬੋ. ਬਾਲ਼੍ਹਨ੍ਤਿ ਬਲਵਂ ਅਤਿਫਰੁਸਂ. ਬਾਲ਼੍ਹਂ ਗਿਰਂ ਸੋ ਨ ਅਭਣੀਤਿ ਅਯਮੇਤ੍ਥ ਅਤ੍ਥੋ. ਸੁਸਂਹਿਤਨ੍ਤਿ ਸੁਟ੍ਠੁ ਪੇਮਸਞ੍ਹਿਤਂ. ਸਖਿਲਨ੍ਤਿ ਮੁਦੁਕਂ. ਵਾਚਾਤਿ ਵਾਚਾਯੋ. ਕਣ੍ਣਸੁਖਾਤਿ ਕਣ੍ਣਸੁਖਾਯੋ. ‘‘ਕਣ੍ਣਸੁਖ’’ਨ੍ਤਿਪਿ ਪਾਠੋ, ਯਥਾ ਕਣ੍ਣਾਨਂ ਸੁਖਂ ਹੋਤਿ, ਏਵਂ ਏਰਯਤੀਤਿ ਅਤ੍ਥੋ. ਵੇਦਯਥਾਤਿ ਵੇਦਯਿਤ੍ਥ. ਬ੍ਰਹ੍ਮਸ੍ਸਰਤ੍ਤਨ੍ਤਿ ਬ੍ਰਹ੍ਮਸ੍ਸਰਤਂ. ਬਹੁਨੋ ਬਹੁਨ੍ਤਿ ਬਹੁਜਨਸ੍ਸ ਬਹੁਂ. ‘‘ਬਹੂਨਂ ਬਹੁਨ੍ਤਿ’’ਪਿ ਪਾਠੋ, ਬਹੁਜਨਾਨਂ ਬਹੁਨ੍ਤਿ ਅਤ੍ਥੋ.
ਸੀਹਹਨੁਲਕ੍ਖਣਵਣ੍ਣਨਾ
੨੩੮. ਅਪ੍ਪਧਂਸਿਕੋ ਹੋਤੀਤਿ ਗੁਣਤੋ ਵਾ ਠਾਨਤੋ ਵਾ ਪਧਂਸੇਤੁਂ ਚਾਵੇਤੁਂ ਅਸਕ੍ਕੁਣੇਯ੍ਯੋ. ਇਧ ਕਮ੍ਮਂ ਨਾਮ ਪਲਾਪਕਥਾਯ ਅਕਥਨਂ. ਕਮ੍ਮਸਰਿਕ੍ਖਕਂ ਨਾਮ ਯੇ ਤਂ ਕਥੇਨ੍ਤਿ, ਤੇ ਇਮਿਨਾ ਕਾਰਣੇਨ ਨੇਸਂ ਹਨੁਕਂ ਚਾਲੇਤ੍ਵਾ ਚਾਲੇਤ੍ਵਾ ਪਲਾਪਕਥਾਯ ਕਥਿਤਭਾਵਂ ਜਨੋ ਜਾਨਾਤੂਤਿ ਅਨ੍ਤੋਪਵਿਟ੍ਠਹਨੁਕਾ ਵਾ ਵਙ੍ਕਹਨੁਕਾ ਵਾ ਪਬ੍ਭਾਰਹਨੁਕਾ ਵਾ ਹੋਨ੍ਤਿ. ਤਥਾਗਤੋ ਪਨ ਤਥਾ ਨ ਕਥੇਸਿ. ਤੇਨਸ੍ਸ ਹਨੁਕਂ ਚਾਲੇਤ੍ਵਾ ਚਾਲੇਤ੍ਵਾ ਦੀਘਰਤ੍ਤਂ ਪਲਾਪਕਥਾਯ ਅਕਥਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸੀਹਹਨੁਲਕ੍ਖਣਂ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਂ. ਅਪ੍ਪਧਂਸਿਕਤਾ ਆਨਿਸਂਸੋ.
੨੩੯. ਅਵਿਕਿਣ੍ਣਵਚਨਬ੍ਯਪ੍ਪਥੋ ਚਾਤਿ ਅਵਿਕਿਣ੍ਣਵਚਨਾਨਂ ਵਿਯ ਪੁਰਿਮਬੋਧਿਸਤ੍ਤਾਨਂ ਵਚਨਪਥੋ ਅਸ੍ਸਾਤਿ ਅਵਿਕਿਣ੍ਣਵਚਨਬ੍ਯਪ੍ਪਥੋ. ਦ੍ਵਿਦੁਗਮਵਰਤਰਹਨੁਤ੍ਤਮਲਤ੍ਥਾਤਿ ਦ੍ਵੀਹਿ ਦ੍ਵੀਹਿ ਗਚ੍ਛਤੀਤਿ ਦ੍ਵਿਦੁਗਮੋ, ਦ੍ਵੀਹਿ ਦ੍ਵੀਹੀਤਿ ਚਤੂਹਿ, ਚਤੁਪ੍ਪਦਾਨਂ ਵਰਤਰਸ੍ਸ ਸੀਹਸ੍ਸੇਵ ਹਨੁਭਾਵਂ ਅਲਤ੍ਥਾਤਿ ਅਤ੍ਥੋ. ਮਨੁਜਾਧਿਪਤੀਤਿ ਮਨੁਜਾਨਂ ਅਧਿਪਤਿ. ਤਥਤ੍ਤੋਤਿ ਤਥਸਭਾਵੋ.
ਸਮਦਨ੍ਤਾਦਿਲਕ੍ਖਣਵਣ੍ਣਨਾ
੨੪੦. ਸੁਚਿਪਰਿਵਾਰੋਤਿ ਪਰਿਸੁਦ੍ਧਪਰਿਵਾਰੋ. ਇਧ ਕਮ੍ਮਂ ਨਾਮ ਸਮ੍ਮਾਜੀਵਤਾ. ਕਮ੍ਮਸਰਿਕ੍ਖਕਂ ਨਾਮ ਯੋ ਵਿਸਮੇਨ ਸਂਕਿਲਿਟ੍ਠਾਜੀਵੇਨ ਜੀਵਿਤਂ ਕਪ੍ਪੇਤਿ, ਤਸ੍ਸ ਦਨ੍ਤਾਪਿ ਵਿਸਮਾ ਹੋਨ੍ਤਿ ਦਾਠਾਪਿ ਕਿਲਿਟ੍ਠਾ. ਤਥਾਗਤਸ੍ਸ ਪਨ ਸਮੇਨ ਸੁਦ੍ਧਾਜੀਵੇਨ ਜੀਵਿਤਂ ਕਪ੍ਪਿਤਭਾਵਂ ਸਦੇਵਕੋ ਲੋਕੋ ਇਮਿਨਾ ਕਾਰਣੇਨ ਜਾਨਾਤੂਤਿ ਸਮਦਨ੍ਤਲਕ੍ਖਣਞ੍ਚ ਸੁਸੁਕ੍ਕਦਾਠਾਲਕ੍ਖਣਞ੍ਚ ਨਿਬ੍ਬਤ੍ਤਤਿ. ਲਕ੍ਖਣਂ ਨਾਮ ਇਦਮੇਵ ਲਕ੍ਖਣਦ੍ਵਯਂ. ਸੁਚਿਪਰਿਵਾਰਤਾ ਆਨਿਸਂਸੋ.
੨੪੧. ਅਵਸ੍ਸਜੀਤਿ ਪਹਾਸਿ ਤਿਦਿਵਪੁਰਵਰਸਮੋਤਿ ਤਿਦਿਵਪੁਰਵਰੇਨ ਸਕ੍ਕੇਨ ਸਮੋ. ਲਪਨਜਨ੍ਤਿ ਮੁਖਜਂ, ਦਨ੍ਤਨ੍ਤਿ ਅਤ੍ਥੋ. ਦਿਜਸਮਸੁਕ੍ਕਸੁਚਿਸੋਭਨਦਨ੍ਤੋਤਿ ਦ੍ਵੇ ਵਾਰੇ ਜਾਤਤ੍ਤਾ ਦਿਜਨਾਮਕਾ ਸੁਕ੍ਕਾ ਸੁਚਿ ਸੋਭਨਾ ਚ ਦਨ੍ਤਾ ਅਸ੍ਸਾਤਿ ਦਿਜਸਮਸੁਕ੍ਕਸੁਚਿਸੋਭਨਦਨ੍ਤੋ. ਨ ਚ ਜਨਪਦਤੁਦਨਨ੍ਤਿ ਯੋ ਤਸ੍ਸ ਚਕ੍ਕਵਾਲ਼ਪਰਿਚ੍ਛਿਨ੍ਨੋ ਜਨਪਦੋ, ਤਸ੍ਸ ਅਞ੍ਞੇਨ ਤੁਦਨਂ ਪੀਲ਼ਾ ਵਾ ਆਬਾਧੋ ਵਾ ਨਤ੍ਥਿ. ਹਿਤਮਪਿ ਚ ਬਹੁਜਨ ਸੁਖਞ੍ਚ ਚਰਨ੍ਤੀਤਿ ਬਹੁਜਨਾ ਸਮਾਨਸੁਖਦੁਕ੍ਖਾ ਹੁਤ੍ਵਾ ਤਸ੍ਮਿਂ ਜਨਪਦੇ ਅਞ੍ਞਮਞ੍ਞਸ੍ਸ ਹਿਤਞ੍ਚੇਵ ਸੁਖਞ੍ਚ ਚਰਨ੍ਤਿ. ਵਿਪਾਪੋਤਿ ਵਿਗਤਪਾਪੋ. ਵਿਗਤਦਰਥਕਿਲਮਥੋਤਿ ਵਿਗਤਕਾਯਿਕਦਰਥਕਿਲਮਥੋ. ਮਲਖਿਲਕਲਿਕਿਲੇਸੇ ਪਨੁਦੇਹੀਤਿ ਰਾਗਾਦਿਮਲਾਨਞ੍ਚੇਵ ਰਾਗਾਦਿਖਿਲਾਨਞ੍ਚ ਦੋਸਕਲੀਨਞ੍ਚ ਸਬ੍ਬਕਿਲੇਸਾਨਞ੍ਚ ਅਪਨੁਦੇਹਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ
ਲਕ੍ਖਣਸੁਤ੍ਤਵਣ੍ਣਨਾ ਨਿਟ੍ਠਿਤਾ.