੬. ਪਾਸਾਦਿਕਸੁਤ੍ਤਵਣ੍ਣਨਾ

ਨਿਗਣ੍ਠਨਾਟਪੁਤ੍ਤਕਾਲਙ੍ਕਿਰਿਯਵਣ੍ਣਨਾ

੧੬੪. ਏਵਂ ਮੇ ਸੁਤਨ੍ਤਿ ਪਾਸਾਦਿਕਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਵੇਧਞ੍ਞਾ ਨਾਮ ਸਕ੍ਯਾਤਿ ਧਨੁਮ੍ਹਿ ਕਤਸਿਕ੍ਖਾ ਵੇਧਞ੍ਞਨਾਮਕਾ ਏਕੇ ਸਕ੍ਯਾ. ਤੇਸਂ ਅਮ੍ਬਵਨੇ ਪਾਸਾਦੇਤਿ ਤੇਸਂ ਅਮ੍ਬਵਨੇ ਸਿਪ੍ਪਂ ਉਗ੍ਗਣ੍ਹਤ੍ਥਾਯ ਕਤੋ ਦੀਘਪਾਸਾਦੋ ਅਤ੍ਥਿ, ਤਤ੍ਥ ਵਿਹਰਤਿ. ਅਧੁਨਾ ਕਾਲਙ੍ਕਤੋਤਿ ਸਮ੍ਪਤਿ ਕਾਲਙ੍ਕਤੋ. ਦ੍ਵੇਧਿਕਜਾਤਾਤਿ ਦ੍ਵੇਜ੍ਝਜਾਤਾ, ਦ੍ਵੇਭਾਗਾ ਜਾਤਾ. ਭਣ੍ਡਨਾਦੀਸੁ ਭਣ੍ਡਨਂ ਪੁਬ੍ਬਭਾਗਕਲਹੋ, ਤਂ ਦਣ੍ਡਾਦਾਨਾਦਿਵਸੇਨ ਪਣ੍ਣਤ੍ਤਿਵੀਤਿਕ੍ਕਮਵਸੇਨ ਚ ਵਡ੍ਢਿਤਂ ਕਲਹੋ. ‘‘ਨ ਤ੍ਵਂ ਇਮਂ ਧਮ੍ਮਵਿਨਯਂ ਆਜਾਨਾਸੀ’’ਤਿਆਦਿਨਾ ਨਯੇਨ ਵਿਰੁਦ੍ਧਵਚਨਂ ਵਿਵਾਦੋ. ਵਿਤੁਦਨ੍ਤਾਤਿ ਵਿਜ੍ਝਨ੍ਤਾ. ਸਹਿਤਂ ਮੇਤਿ ਮਮ ਵਚਨਂ ਅਤ੍ਥਸਞ੍ਹਿਤਂ. ਅਧਿਚਿਣ੍ਣਂ ਤੇ ਵਿਪਰਾਵਤ੍ਤਨ੍ਤਿ ਯਂ ਤਵ ਅਧਿਚਿਣ੍ਣਂ ਚਿਰਕਾਲਾਸੇਵਨਵਸੇਨ ਪਗੁਣਂ, ਤਂ ਮਮ ਵਾਦਂ ਆਗਮ੍ਮ ਨਿਵਤ੍ਤਂ. ਆਰੋਪਿਤੋ ਤੇ ਵਾਦੋਤਿ ਤੁਯ੍ਹਂ ਉਪਰਿ ਮਯਾ ਦੋਸੋ ਆਰੋਪਿਤੋ. ਚਰ ਵਾਦਪ੍ਪਮੋਕ੍ਖਾਯਾਤਿ ਭਤ੍ਤਪੁਟਂ ਆਦਾਯ ਤਂ ਤਂ ਉਪਸਙ੍ਕਮਿਤ੍ਵਾ ਵਾਦਪ੍ਪਮੋਕ੍ਖਤ੍ਥਾਯ ਉਤ੍ਤਰਿ ਪਰਿਯੇਸਮਾਨੋ ਵਿਚਰ. ਨਿਬ੍ਬੇਠੇਹਿ ਵਾਤਿ ਅਥ ਵਾ ਮਯਾ ਆਰੋਪਿਤਦੋਸਤੋ ਅਤ੍ਤਾਨਂ ਮੋਚੇਹਿ. ਸਚੇ ਪਹੋਸੀਤਿ ਸਚੇ ਸਕ੍ਕੋਸਿ. ਵਧੋਯੇਵਾਤਿ ਮਰਣਮੇਵ. ਨਾਟਪੁਤ੍ਤਿਯੇਸੂਤਿ ਨਾਟਪੁਤ੍ਤਸ੍ਸ ਅਨ੍ਤੇਵਾਸਿਕੇਸੁ. ਨਿਬ੍ਬਿਨ੍ਨਰੂਪਾਤਿ ਉਕ੍ਕਣ੍ਠਿਤਸਭਾਵਾ ਅਭਿਵਾਦਨਾਦੀਨਿਪਿ ਨ ਕਰੋਨ੍ਤਿ. ਵਿਰਤ੍ਤਰੂਪਾਤਿ ਵਿਗਤਪੇਮਾ. ਪਟਿਵਾਨਰੂਪਾਤਿ ਤੇਸਂ ਸਕ੍ਕਚ੍ਚਕਿਰਿਯਤੋ ਨਿਵਤ੍ਤਨਸਭਾਵਾ. ਯਥਾ ਤਨ੍ਤਿ ਯਥਾ ਦੁਰਕ੍ਖਾਤਾਦਿਸਭਾਵੇ ਧਮ੍ਮਵਿਨਯੇ ਨਿਬ੍ਬਿਨ੍ਨਵਿਰਤ੍ਤਪ੍ਪਟਿਵਾਨਰੂਪੇਹਿ ਭਵਿਤਬ੍ਬਂ, ਤਥੇਵ ਜਾਤਾਤਿ ਅਤ੍ਥੋ. ਦੁਰਕ੍ਖਾਤੇਤਿ ਦੁਕ੍ਕਥਿਤੇ. ਦੁਪ੍ਪਵੇਦਿਤੇਤਿ ਦੁਵਿਞ੍ਞਾਪਿਤੇ. ਅਨੁਪਸਮਸਂਵਤ੍ਤਨਿਕੇਤਿ ਰਾਗਾਦੀਨਂ ਉਪਸਮਂ ਕਾਤੁਂ ਅਸਮਤ੍ਥੇ. ਭਿਨ੍ਨਥੂਪੇਤਿ ਭਿਨ੍ਦਪ੍ਪਤਿਟ੍ਠੇ. ਏਤ੍ਥ ਹਿ ਨਾਟਪੁਤ੍ਤੋਵ ਨੇਸਂ ਪਤਿਟ੍ਠਟ੍ਠੇਨ ਥੂਪੋ. ਸੋ ਪਨ ਭਿਨ੍ਨੋ ਮਤੋ. ਤੇਨ ਵੁਤ੍ਤਂ ‘‘ਭਿਨ੍ਨਥੂਪੇ’’ਤਿ. ਅਪ੍ਪਟਿਸਰਣੇਤਿ ਤਸ੍ਸੇਵ ਅਭਾਵੇਨ ਪਟਿਸਰਣਵਿਰਹਿਤੇ.

ਨਨੁ ਚਾਯਂ ਨਾਟਪੁਤ੍ਤੋ ਨਾਲ਼ਨ੍ਦਵਾਸਿਕੋ, ਸੋ ਕਸ੍ਮਾ ਪਾਵਾਯਂ ਕਾਲਙ੍ਕਤੋਤਿ? ਸੋ ਕਿਰ ਉਪਾਲਿਨਾ ਗਹਪਤਿਨਾ ਪਟਿਵਿਦ੍ਧਸਚ੍ਚੇਨ ਦਸਹਿ ਗਾਥਾਹਿ ਭਾਸਿਤੇ ਬੁਦ੍ਧਗੁਣੇ ਸੁਤ੍ਵਾ ਉਣ੍ਹਂ ਲੋਹਿਤਂ ਛਡ੍ਡੇਸਿ. ਅਥ ਨਂ ਅਫਾਸੁਕਂ ਗਹੇਤ੍ਵਾ ਪਾਵਂ ਅਗਮਂਸੁ. ਸੋ ਤਤ੍ਥ ਕਾਲਮਕਾਸਿ. ਕਾਲਂ ਕੁਰੁਮਾਨੋ ਚ ਚਿਨ੍ਤੇਸਿ – ‘‘ਮਮ ਲਦ੍ਧਿ ਅਨਿਯ੍ਯਾਨਿਕਾ ਸਾਰਵਿਰਹਿਤਾ, ਮਯਂ ਤਾਵ ਨਟ੍ਠਾ, ਅਵਸੇਸਜਨੋਪਿ ਮਾ ਅਪਾਯਪੂਰਕੋ ਅਹੋਸਿ, ਸਚੇ ਪਨਾਹਂ ‘ਮਮ ਸਾਸਨਂ ਅਨਿਯ੍ਯਾਨਿਕ’ਨ੍ਤਿ ਵਕ੍ਖਾਮਿ, ਨ ਸਦ੍ਦਹਿਸ੍ਸਨ੍ਤਿ, ਯਂਨੂਨਾਹਂ ਦ੍ਵੇਪਿ ਜਨੇ ਨ ਏਕਨੀਹਾਰੇਨ ਉਗ੍ਗਣ੍ਹਾਪੇਯ੍ਯਂ, ਤੇ ਮਮਚ੍ਚਯੇਨ ਅਞ੍ਞਮਞ੍ਞਂ ਵਿਵਦਿਸ੍ਸਨ੍ਤਿ, ਸਤ੍ਥਾ ਤਂ ਵਿਵਾਦਂ ਪਟਿਚ੍ਚ ਏਕਂ ਧਮ੍ਮਕਥਂ ਕਥੇਸ੍ਸਤਿ, ਤਤੋ ਤੇ ਸਾਸਨਸ੍ਸ ਮਹਨ੍ਤਭਾਵਂ ਜਾਨਿਸ੍ਸਨ੍ਤੀ’’ਤਿ.

ਅਥ ਨਂ ਏਕੋ ਅਨ੍ਤੇਵਾਸਿਕੋ ਉਪਸਙ੍ਕਮਿਤ੍ਵਾ ਆਹ – ‘‘ਭਨ੍ਤੇ ਤੁਮ੍ਹੇ ਦੁਬ੍ਬਲਾ, ਮਯ੍ਹਮ੍ਪਿ ਇਮਸ੍ਮਿਂ ਧਮ੍ਮੇ ਸਾਰਂ ਆਚਿਕ੍ਖਥ, ਆਚਰਿਯਪ੍ਪਮਾਣ’’ਨ੍ਤਿ. ‘‘ਆਵੁਸੋ, ਤ੍ਵਂ ਮਮਚ੍ਚਯੇਨ ਸਸ੍ਸਤਨ੍ਤਿ ਗਣ੍ਹੇਯ੍ਯਾਸੀ’’ਤਿ. ਅਪਰੋਪਿ ਉਪਸਙ੍ਕਮਿ, ਤਂ ਉਚ੍ਛੇਦਂ ਗਣ੍ਹਾਪੇਸਿ. ਏਵਂ ਦ੍ਵੇਪਿ ਜਨੇ ਏਕਲਦ੍ਧਿਕੇ ਅਕਤ੍ਵਾ ਬਹੂ ਨਾਨਾਨੀਹਾਰੇਨ ਉਗ੍ਗਣ੍ਹਾਪੇਤ੍ਵਾ ਕਾਲਮਕਾਸਿ. ਤੇ ਤਸ੍ਸ ਸਰੀਰਕਿਚ੍ਚਂ ਕਤ੍ਵਾ ਸਨ੍ਨਿਪਤਿਤ੍ਵਾ ਅਞ੍ਞਮਞ੍ਞਂ ਪੁਚ੍ਛਿਂਸੁ – ‘‘ਕਸ੍ਸਾਵੁਸੋ, ਆਚਰਿਯੋ ਸਾਰਂ ਆਚਿਕ੍ਖੀ’’ਤਿ? ਏਕੋ ਉਟ੍ਠਹਿਤ੍ਵਾ ਮਯ੍ਹਨ੍ਤਿ ਆਹ. ਕਿਂ ਆਚਿਕ੍ਖੀਤਿ? ਸਸ੍ਸਤਨ੍ਤਿ. ਅਪਰੋ ਤਂ ਪਟਿਬਾਹਿਤ੍ਵਾ ‘‘ਮਯ੍ਹਂ ਸਾਰਂ ਆਚਿਕ੍ਖੀ’’ਤਿ ਆਹ. ਏਵਂ ਸਬ੍ਬੇ ‘‘ਮਯ੍ਹਂ ਸਾਰਂ ਆਚਿਕ੍ਖਿ, ਅਹਂ ਜੇਟ੍ਠਕੋ’’ਤਿ ਅਞ੍ਞਮਞ੍ਞਂ ਵਿਵਾਦਂ ਵਡ੍ਢੇਤ੍ਵਾ ਅਕ੍ਕੋਸੇ ਚੇਵ ਪਰਿਭਾਸੇ ਚ ਹਤ੍ਥਪਾਦਪ੍ਪਹਾਰਾਦੀਨਿ ਚ ਪਵਤ੍ਤੇਤ੍ਵਾ ਏਕਮਗ੍ਗੇਨ ਦ੍ਵੇ ਅਗਚ੍ਛਨ੍ਤਾ ਨਾਨਾਦਿਸਾਸੁ ਪਕ੍ਕਮਿਂਸੁ.

੧੬੫. ਅਥ ਖੋ ਚੁਨ੍ਦੋ ਸਮਣੁਦ੍ਦੇਸੋਤਿ ਅਯਂ ਥੇਰੋ ਧਮ੍ਮਸੇਨਾਪਤਿਸ੍ਸ ਕਨਿਟ੍ਠਭਾਤਿਕੋ. ਤਂ ਭਿਕ੍ਖੂ ਅਨੁਪਸਮ੍ਪਨ੍ਨਕਾਲੇ ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ ਸਮੁਦਾਚਰਿਤ੍ਵਾ ਥੇਰਕਾਲੇਪਿ ਤਥੇਵ ਸਮੁਦਾਚਰਿਂਸੁ. ਤੇਨ ਵੁਤ੍ਤਂ – ‘‘ਚੁਨ੍ਦੋ ਸਮਣੁਦ੍ਦੇਸੋ’’ਤਿ.

‘‘ਪਾਵਾਯਂ ਵਸ੍ਸਂਵੁਟ੍ਠੋ ਯੇਨ ਸਾਮਗਾਮੋ, ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀ’’ਤਿ ਕਸ੍ਮਾ ਉਪਸਙ੍ਕਮਿ? ਨਾਟਪੁਤ੍ਤੇ ਕਿਰ ਕਾਲਙ੍ਕਤੇ ਜਮ੍ਬੁਦੀਪੇ ਮਨੁਸ੍ਸਾ ਤਤ੍ਥ ਤਤ੍ਥ ਕਥਂ ਪਵਤ੍ਤਯਿਂਸੁ ‘‘ਨਿਗਣ੍ਠੋ ਨਾਟਪੁਤ੍ਤੋ ਏਕੋ ਸਤ੍ਥਾਤਿ ਪਞ੍ਞਾਯਿਤ੍ਥ, ਤਸ੍ਸ ਕਾਲਙ੍ਕਿਰਿਯਾਯ ਸਾਵਕਾਨਂ ਏਵਰੂਪੋ ਵਿਵਾਦੋ ਜਾਤੋ. ਸਮਣੋ ਪਨ ਗੋਤਮੋ ਜਮ੍ਬੁਦੀਪੇ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟੋ, ਸਾਵਕਾਪਿਸ੍ਸ ਪਾਕਟਾਯੇਵ. ਕੀਦਿਸੋ ਨੁ ਖੋ ਸਮਣੇ ਗੋਤਮੇ ਪਰਿਨਿਬ੍ਬੁਤੇ ਸਾਵਕਾਨਂ ਵਿਵਾਦੋ ਭਵਿਸ੍ਸਤੀ’’ਤਿ. ਥੇਰੋ ਤਂ ਕਥਂ ਸੁਤ੍ਵਾ ਚਿਨ੍ਤੇਸਿ – ‘‘ਇਮਂ ਕਥਂ ਗਹੇਤ੍ਵਾ ਦਸਬਲਸ੍ਸ ਆਰੋਚੇਸ੍ਸਾਮਿ, ਸਤ੍ਥਾ ਏਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਏਕਂ ਦੇਸਨਂ ਕਥੇਸ੍ਸਤੀ’’ਤਿ. ਸੋ ਨਿਕ੍ਖਮਿਤ੍ਵਾ ਯੇਨ ਸਾਮਗਾਮੋ, ਯੇਨਾਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ.

ਸਾਮਗਾਮੋਤਿ ਸਾਮਾਕਾਨਂ ਉਸ੍ਸਨ੍ਨਤ੍ਤਾ ਤਸ੍ਸ ਗਾਮਸ੍ਸ ਨਾਮਂ. ਯੇਨਾਯਸ੍ਮਾ ਆਨਨ੍ਦੋਤਿ ਉਜੁਮੇਵ ਭਗਵਤੋ ਸਨ੍ਤਿਕਂ ਅਗਨ੍ਤ੍ਵਾ ਯੇਨਸ੍ਸ ਉਪਜ੍ਝਾਯੋ ਆਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮਿ.

ਬੁਦ੍ਧਕਾਲੇ ਕਿਰ ਸਾਰਿਪੁਤ੍ਤਤ੍ਥੇਰੋ ਚ ਆਨਨ੍ਦਤ੍ਥੇਰੋ ਚ ਅਞ੍ਞਮਞ੍ਞਂ ਮਮਾਯਿਂਸੁ. ਸਾਰਿਪੁਤ੍ਤਤ੍ਥੇਰੋ ‘‘ਮਯਾ ਕਾਤਬ੍ਬਂ ਸਤ੍ਥੁ ਉਪਟ੍ਠਾਨਂ ਕਰੋਤੀ’’ਤਿ ਆਨਨ੍ਦਤ੍ਥੇਰਂ ਮਮਾਯਿ. ਆਨਨ੍ਦਤ੍ਥੇਰੋ ‘‘ਭਗਵਤੋ ਸਾਵਕਾਨਂ ਅਗ੍ਗੋ’’ਤਿ ਸਾਰਿਪੁਤ੍ਤਤ੍ਥੇਰਂ ਮਮਾਯਿ. ਕੁਲਦਾਰਕੇ ਚ ਪਬ੍ਬਾਜੇਤ੍ਵਾ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਪੇਸਿ. ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਅਕਾਸਿ. ਏਵਂ ਏਕਮੇਕੇਨ ਅਤ੍ਤਨੋ ਪਤ੍ਤਚੀਵਰਂ ਦਤ੍ਵਾ ਪਬ੍ਬਾਜੇਤ੍ਵਾ ਉਪਜ੍ਝਂ ਗਣ੍ਹਾਪਿਤਾਨਿ ਪਞ੍ਚ ਪਞ੍ਚ ਭਿਕ੍ਖੁਸਤਾਨਿ ਅਹੇਸੁਂ. ਆਯਸ੍ਮਾ ਆਨਨ੍ਦੋ ਪਣੀਤਾਨਿ ਚੀਵਰਾਦੀਨਿਪਿ ਲਭਿਤ੍ਵਾ ਥੇਰਸ੍ਸ ਅਦਾਸਿ.

ਧਮ੍ਮਰਤਨਪੂਜਾ

ਏਕੋ ਕਿਰ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਬੁਦ੍ਧਰਤਨਸ੍ਸ ਚ ਸਙ੍ਘਰਤਨਸ੍ਸ ਚ ਪੂਜਾ ਪਞ੍ਞਾਯਤਿ, ਕਥਂ ਨੁ ਖੋ ਧਮ੍ਮਰਤਨਂ ਪੂਜਿਤਂ ਹੋਤੀ’’ਤਿ? ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿ. ਭਗਵਾ ਆਹ – ‘‘ਸਚੇਪਿ ਬ੍ਰਾਹ੍ਮਣ ਧਮ੍ਮਰਤਨਂ ਪੂਜੇਤੁਕਾਮੋ, ਏਕਂ ਬਹੁਸ੍ਸੁਤਂ ਪੂਜੇਹੀ’’ਤਿ. ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾਤਿ. ਭਿਕ੍ਖੁਸਙ੍ਘਂ ਪੁਚ੍ਛਾਤਿ. ਸੋ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ‘‘ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾ’’ਤਿ ਆਹ. ਆਨਨ੍ਦਤ੍ਥੇਰੋ ਬ੍ਰਾਹ੍ਮਣਾਤਿ. ਬ੍ਰਾਹ੍ਮਣੋ ਥੇਰਂ ਸਹਸ੍ਸਗ੍ਘਨਿਕੇਨ ਤਿਚੀਵਰੇਨ ਪੂਜੇਸਿ. ਥੇਰੋ ਤਂ ਗਹੇਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਭਗਵਾ ‘‘ਕੁਤੋ, ਆਨਨ੍ਦ, ਲਦ੍ਧ’’ਨ੍ਤਿ ਆਹ? ਏਕੇਨ, ਭਨ੍ਤੇ, ਬ੍ਰਾਹ੍ਮਣੇਨ ਦਿਨ੍ਨਂ, ਇਦਂ ਪਨਾਹਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋਤਿ. ਦੇਹਿ, ਆਨਨ੍ਦਾਤਿ. ਚਾਰਿਕਂ ਪਕ੍ਕਨ੍ਤੋ ਭਨ੍ਤੇਤਿ. ਆਗਤਕਾਲੇ ਦੇਹੀਤਿ, ਸਿਕ੍ਖਾਪਦਂ ਭਨ੍ਤੇ, ਪਞ੍ਞਤ੍ਤਨ੍ਤਿ. ਕਦਾ ਪਨ ਸਾਰਿਪੁਤ੍ਤੋ ਆਗਮਿਸ੍ਸਤੀਤਿ? ਦਸਾਹਮਤ੍ਤੇਨ ਭਨ੍ਤੇਤਿ. ‘‘ਅਨੁਜਾਨਾਮਿ, ਆਨਨ੍ਦ, ਦਸਾਹਪਰਮਂ ਅਤਿਰੇਕਚੀਵਰਂ ਨਿਕ੍ਖਿਪਿਤੁ’’ਨ੍ਤਿ ਸਿਕ੍ਖਾਪਦਂ ਪਞ੍ਞਾਪੇਸਿ.

ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਯਂਕਿਞ੍ਚਿ ਮਨਾਪਂ ਲਭਤਿ, ਤਂ ਆਨਨ੍ਦਤ੍ਥੇਰਸ੍ਸ ਦੇਤਿ. ਸੋ ਇਮਮ੍ਪਿ ਅਤ੍ਤਨੋ ਕਨਿਟ੍ਠਭਾਤਿਕਂ ਥੇਰਸ੍ਸੇਵ ਸਦ੍ਧਿਵਿਹਾਰਿਕਂ ਅਦਾਸਿ. ਤੇਨ ਵੁਤ੍ਤਂ – ‘‘ਯੇਨਸ੍ਸ ਉਪਜ੍ਝਾਯੋ ਆਯਸ੍ਮਾ ਆਨਨ੍ਦੋ ਤੇਨੁਪਸਙ੍ਕਮੀ’’ਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਉਪਜ੍ਝਾਯੋ ਮੇ ਮਹਾਪਞ੍ਞੋ, ਸੋ ਇਮਂ ਕਥਂ ਸਤ੍ਥੁ ਆਰੋਚੇਸ੍ਸਤਿ, ਅਥ ਸਤ੍ਥਾ ਤਦਨੁਰੂਪਂ ਧਮ੍ਮਂ ਦੇਸੇਸ੍ਸਤੀ’’ਤਿ. ਕਥਾਪਾਭਤਨ੍ਤਿ ਕਥਾਯ ਮੂਲਂ. ਮੂਲਞ੍ਹਿ ‘‘ਪਾਭਤ’’ਨ੍ਤਿ ਵੁਚ੍ਚਤਿ. ਯਥਾਹ –

‘‘ਅਪ੍ਪਕੇਨਾਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;

ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);

ਭਗਵਨ੍ਤਂ ਦਸ੍ਸਨਾਯਾਤਿ ਭਗਵਨ੍ਤਂ ਦਸ੍ਸਨਤ੍ਥਾਯ. ਕਿਂ ਪਨਾਨੇਨ ਭਗਵਾ ਨ ਦਿਟ੍ਠਪੁਬ੍ਬੋਤਿ? ਨੋ ਨ ਦਿਟ੍ਠਪੁਬ੍ਬੋ. ਅਯਞ੍ਹਿ ਆਯਸ੍ਮਾ ਦਿਵਾ ਨਵ ਵਾਰੇ, ਰਤ੍ਤਿਂ ਨਵ ਵਾਰੇਤਿ ਏਕਾਹਂ ਅਟ੍ਠਾਰਸ ਵਾਰੇ ਉਪਟ੍ਠਾਨਮੇਵ ਗਚ੍ਛਤਿ. ਦਿਵਸਸ੍ਸ ਪਨ ਸਤਵਾਰਂ ਵਾ ਸਹਸ੍ਸਵਾਰਂ ਵਾ ਗਨ੍ਤੁਕਾਮੋ ਸਮਾਨੋਪਿ ਨ ਅਕਾਰਣਾ ਗਚ੍ਛਤਿ, ਏਕਂ ਪਞ੍ਹੁਦ੍ਧਾਰਂ ਗਹੇਤ੍ਵਾਵ ਗਚ੍ਛਤਿ. ਸੋ ਤਂ ਦਿਵਸਂ ਤੇਨ ਕਥਾਪਾਭਤੇਨ ਗਨ੍ਤੁਕਾਮੋ ਏਵਮਾਹ.

ਅਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਵਣ੍ਣਨਾ

੧੬੬. ਏਵਞ੍ਹੇਤਂ, ਚੁਨ੍ਦ, ਹੋਤੀਤਿ ਭਗਵਾ ਆਨਨ੍ਦਤ੍ਥੇਰੇਨ ਆਰੋਚਿਤੇਪਿ ਯਸ੍ਮਾ ਨ ਆਨਨ੍ਦਤ੍ਥੇਰੋ ਇਮਿਸ੍ਸਾ ਕਥਾਯ ਸਾਮਿਕੋ, ਚੁਨ੍ਦਤ੍ਥੇਰੋ ਪਨ ਸਾਮਿਕੋ. ਸੋਵ ਤਸ੍ਸਾ ਆਦਿਮਜ੍ਝਪਰਿਯੋਸਾਨਂ ਜਾਨਾਤਿ. ਤਸ੍ਮਾ ਭਗਵਾ ਤੇਨ ਸਦ੍ਧਿਂ ਕਥੇਨ੍ਤੋ ‘‘ਏਵਞ੍ਹੇਤਂ, ਚੁਨ੍ਦ, ਹੋਤੀ’’ਤਿਆਦਿਮਾਹ. ਤਸ੍ਸਤ੍ਥੋ – ਚੁਨ੍ਦ ਏਵਞ੍ਹੇਤਂ ਹੋਤਿ ਦੁਰਕ੍ਖਾਤਾਦਿਸਭਾਵੇ ਧਮ੍ਮਵਿਨਯੇ ਸਾਵਕਾ ਦ੍ਵੇਧਿਕਜਾਤਾ ਭਣ੍ਡਨਾਦੀਨਿ ਕਤ੍ਵਾ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਨ੍ਤਿ.

ਇਦਾਨਿ ਯਸ੍ਮਾ ਅਨਿਯ੍ਯਾਨਿਕਸਾਸਨੇਨੇਵ ਨਿਯ੍ਯਾਨਿਕਸਾਸਨਂ ਪਾਕਟਂ ਹੋਤਿ, ਤਸ੍ਮਾ ਆਦਿਤੋ ਅਨਿਯ੍ਯਾਨਿਕਸਾਸਨਮੇਵ ਦਸ੍ਸੇਨ੍ਤੋ ਇਧ ਚੁਨ੍ਦ ਸਤ੍ਥਾ ਚ ਹੋਤਿ ਅਸਮ੍ਮਾਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਵੋਕ੍ਕਮ੍ਮ ਚ ਤਮ੍ਹਾ ਧਮ੍ਮਾ ਵਤ੍ਤਤੀਤਿ ਨ ਨਿਰਨ੍ਤਰਂ ਪੂਰੇਤਿ, ਓਕ੍ਕਮਿਤ੍ਵਾ ਓਕ੍ਕਮਿਤ੍ਵਾ ਅਨ੍ਤਰਨ੍ਤਰਂ ਕਤ੍ਵਾ ਵਤ੍ਤਤੀਤਿ ਅਤ੍ਥੋ. ਤਸ੍ਸ ਤੇ, ਆਵੁਸੋ, ਲਾਭਾਤਿ ਤਸ੍ਸ ਤੁਯ੍ਹਂ ਏਤੇ ਧਮ੍ਮਾਨੁਧਮ੍ਮਪ੍ਪਟਿਪਤ੍ਤਿਆਦਯੋ ਲਾਭਾ. ਸੁਲਦ੍ਧਨ੍ਤਿ ਮਨੁਸ੍ਸਤ੍ਤਮ੍ਪਿ ਤੇ ਸੁਲਦ੍ਧਂ. ਤਥਾ ਪਟਿਪਜ੍ਜਤੂਤਿ ਏਵਂ ਪਟਿਪਜ੍ਜਤੁ. ਯਥਾ ਤੇ ਸਤ੍ਥਾਰਾ ਧਮ੍ਮੋ ਦੇਸਿਤੋਤਿ ਯੇਨ ਤੇ ਆਕਾਰੇਨ ਸਤ੍ਥਾਰਾ ਧਮ੍ਮੋ ਕਥਿਤੋ. ਯੋ ਚ ਸਮਾਦਪੇਤੀਤਿ ਯੋ ਚ ਆਚਰਿਯੋ ਸਮਾਦਪੇਤਿ. ਯਞ੍ਚ ਸਮਾਦਪੇਤੀਤਿ ਯਂ ਅਨ੍ਤੇਵਾਸਿਂ ਸਮਾਦਪੇਤਿ. ਯੋ ਚ ਸਮਾਦਪਿਤੋਤਿ ਯੋ ਚ ਏਵਂ ਸਮਾਦਪਿਤੋ ਅਨ੍ਤੇਵਾਸਿਕੋ. ਯਥਾ ਆਚਰਿਯੇਨ ਸਮਾਦਪਿਤਂ, ਤਥਤ੍ਥਾਯ ਪਟਿਪਜ੍ਜਤਿ. ਸਬ੍ਬੇ ਤੇਤਿ ਤਯੋਪਿ ਤੇ. ਏਤ੍ਥ ਹਿ ਆਚਰਿਯੋ ਸਮਾਦਪਿਤਤ੍ਤਾ ਅਪੁਞ੍ਞਂ ਪਸਵਤਿ, ਸਮਾਦਿਨ੍ਨਨ੍ਤੇਵਾਸਿਕੋ ਸਮਾਦਿਨ੍ਨਤ੍ਤਾ, ਪਟਿਪਨ੍ਨਕੋ ਪਟਿਪਨ੍ਨਤ੍ਤਾ. ਤੇਨ ਵੁਤ੍ਤਂ – ‘‘ਸਬ੍ਬੇ ਤੇ ਬਹੁਂ ਅਪੁਞ੍ਞਂ ਪਸਵਨ੍ਤੀ’’ਤਿ. ਏਤੇਨੁਪਾਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੧੬੭. ਅਪਿਚੇਤ੍ਥ ਞਾਯਪ੍ਪਟਿਪਨ੍ਨੋਤਿ ਕਾਰਣਪ੍ਪਟਿਪਨ੍ਨੋ. ਞਾਯਮਾਰਾਧੇਸ੍ਸਤੀਤਿ ਕਾਰਣਂ ਨਿਪ੍ਫਾਦੇਸ੍ਸਤਿ. ਵੀਰਿਯਂ ਆਰਭਤੀਤਿ ਅਤ੍ਤਨੋ ਦੁਕ੍ਖਨਿਬ੍ਬਤ੍ਤਕਂ ਵੀਰਿਯਂ ਕਰੋਤਿ. ਵੁਤ੍ਤਞ੍ਹੇਤਂ ‘‘ਦੁਰਕ੍ਖਾਤੇ, ਭਿਕ੍ਖਵੇ, ਧਮ੍ਮਵਿਨਯੇ ਯੋ ਆਰਦ੍ਧਵੀਰਿਯੋ, ਸੋ ਦੁਕ੍ਖਂ ਵਿਹਰਤਿ. ਯੋ ਕੁਸੀਤੋ, ਸੋ ਸੁਖਂ ਵਿਹਰਤੀ’’ਤਿ (ਅ. ਨਿ. ੧.੩੧੮).

ਸਮ੍ਮਾਸਮ੍ਬੁਦ੍ਧਪ੍ਪਵੇਦਿਤਧਮ੍ਮਵਿਨਯਾਦਿਵਣ੍ਣਨਾ

੧੬੮. ਏਵਂ ਅਨਿਯ੍ਯਾਨਿਕਸਾਸਨਂ ਦਸ੍ਸੇਤ੍ਵਾ ਇਦਾਨਿ ਨਿਯ੍ਯਾਨਿਕਸਾਸਨਂ ਦਸ੍ਸੇਨ੍ਤੋ ਇਧ ਪਨ, ਚੁਨ੍ਦ, ਸਤ੍ਥਾ ਚ ਹੋਤਿ ਸਮ੍ਮਾਸਮ੍ਬੁਦ੍ਧੋਤਿਆਦਿਮਾਹ. ਤਤ੍ਥ ਨਿਯ੍ਯਾਨਿਕੋਤਿ ਮਗ੍ਗਤ੍ਥਾਯ ਫਲਤ੍ਥਾਯ ਚ ਨਿਯ੍ਯਾਤਿ.

੧੬੯. ਵੀਰਿਯਂ ਆਰਭਤੀਤਿ ਅਤ੍ਤਨੋ ਸੁਖਨਿਪ੍ਫਾਦਕਂ ਵੀਰਿਯਂ ਆਰਭਤਿ. ਵੁਤ੍ਤਞ੍ਹੇਤਂ ‘‘ਸ੍ਵਾਕ੍ਖਾਤੇ, ਭਿਕ੍ਖਵੇ, ਧਮ੍ਮਵਿਨਯੇ ਯੋ ਕੁਸੀਤੋ, ਸੋ ਦੁਕ੍ਖਂ ਵਿਹਰਤਿ. ਯੋ ਆਰਦ੍ਧਵੀਰਿਯੋ, ਸੋ ਸੁਖਂ ਵਿਹਰਤੀ’’ਤਿ (ਅ. ਨਿ. ੧.੩੧੯).

੧੭੦. ਇਤਿ ਭਗਵਾ ਨਿਯ੍ਯਾਨਿਕਸਾਸਨੇ ਸਮ੍ਮਾਪਟਿਪਨ੍ਨਸ੍ਸ ਕੁਲਪੁਤ੍ਤਸ੍ਸ ਪਸਂਸਂ ਦਸ੍ਸੇਤ੍ਵਾ ਪੁਨ ਦੇਸਨਂ ਵਡ੍ਢੇਨ੍ਤੋ ਇਧ, ਚੁਨ੍ਦ, ਸਤ੍ਥਾ ਚ ਲੋਕੇ ਉਦਪਾਦੀਤਿਆਦਿਮਾਹ. ਤਤ੍ਥ ਅਵਿਞ੍ਞਾਪਿਤਤ੍ਥਾਤਿ ਅਬੋਧਿਤਤ੍ਥਾ. ਸਬ੍ਬਸਙ੍ਗਾਹਪਦਕਤਨ੍ਤਿ ਸਬ੍ਬਸਙ੍ਗਹਪਦੇਹਿ ਕਤਂ, ਸਬ੍ਬਸਙ੍ਗਾਹਿਕਂ ਕਤਂ ਨ ਹੋਤੀਤਿ ਅਤ੍ਥੋ. ‘‘ਸਬ੍ਬਸਙ੍ਗਾਹਪਦਗਤ’’ਨ੍ਤਿਪਿ ਪਾਠੋ, ਨ ਸਬ੍ਬਸਙ੍ਗਾਹਪਦੇਸੁ ਗਤਂ, ਨ ਏਕਸਙ੍ਗਹਜਾਤਨ੍ਤਿ ਅਤ੍ਥੋ. ਸਪ੍ਪਾਟਿਹੀਰਕਤਨ੍ਤਿ ਨਿਯ੍ਯਾਨਿਕਂ. ਯਾਵ ਦੇਵਮਨੁਸ੍ਸੇਹੀਤਿ ਦੇਵਲੋਕਤੋ ਯਾਵ ਮਨੁਸ੍ਸਲੋਕਾ ਸੁਪ੍ਪਕਾਸਿਤਂ. ਅਨੁਤਪ੍ਪੋ ਹੋਤੀਤਿ ਅਨੁਤਾਪਕਰੋ ਹੋਤਿ. ਸਤ੍ਥਾ ਚ ਨੋ ਲੋਕੇਤਿ ਇਦਂ ਤੇਸਂ ਅਨੁਤਾਪਕਾਰਦਸ੍ਸਨਤ੍ਥਂ ਵੁਤ੍ਤਂ. ਨਾਨੁਤਪ੍ਪੋ ਹੋਤੀਤਿ ਸਤ੍ਥਾਰਂ ਆਗਮ੍ਮ ਸਾਵਕੇਹਿ ਯਂ ਪਤ੍ਤਬ੍ਬਂ, ਤਸ੍ਸ ਪਤ੍ਤਤ੍ਤਾ ਅਨੁਤਾਪਕਰੋ ਨ ਹੋਤਿ.

੧੭੨. ਥੇਰੋਤਿ ਥਿਰੋ ਥੇਰਕਾਰਕੇਹਿ ਧਮ੍ਮੇਹਿ ਸਮਨ੍ਨਾਗਤੋ. ‘‘ਰਤ੍ਤਞ੍ਞੂ’’ਤਿਆਦੀਨਿ ਵੁਤ੍ਤਤ੍ਥਾਨੇਵ. ਏਤੇਹਿ ਚੇ ਪੀਤਿ ਏਤੇਹਿ ਹੇਟ੍ਠਾ ਵੁਤ੍ਤੇਹਿ.

੧੭੩. ਪਤ੍ਤਯੋਗਕ੍ਖੇਮਾਤਿ ਚਤੂਹਿ ਯੋਗੇਹਿ ਖੇਮਤ੍ਤਾ ਅਰਹਤ੍ਤਂ ਇਧ ਯੋਗਕ੍ਖੇਮਂ ਨਾਮ, ਤਂ ਪਤ੍ਤਾਤਿ ਅਤ੍ਥੋ. ਅਲਂ ਸਮਕ੍ਖਾਤੁਂ ਸਦ੍ਧਮ੍ਮਸ੍ਸਾਤਿ ਸਮ੍ਮੁਖਾ ਗਹਿਤਤ੍ਤਾ ਅਸ੍ਸ ਸਦ੍ਧਮ੍ਮਂ ਸਮ੍ਮਾ ਆਚਿਕ੍ਖਿਤੁਂ ਸਮਤ੍ਥਾ.

੧੭੪. ਬ੍ਰਹ੍ਮਚਾਰਿਨੋਤਿ ਬ੍ਰਹ੍ਮਚਰਿਯਵਾਸਂ ਵਸਮਾਨਾ ਅਰਿਯਸਾਵਕਾ. ਕਾਮਭੋਗਿਨੋਤਿ ਗਿਹਿਸੋਤਾਪਨ੍ਨਾ. ‘‘ਇਦ੍ਧਞ੍ਚੇਵਾ’’ਤਿਆਦੀਨਿ ਮਹਾਪਰਿਨਿਬ੍ਬਾਨੇ ਵਿਤ੍ਥਾਰਿਤਾਨੇਵ. ਲਾਭਗ੍ਗਯਸਗ੍ਗਪਤ੍ਤਨ੍ਤਿ ਲਾਭਗ੍ਗਞ੍ਚੇਵ ਯਸਗ੍ਗਞ੍ਚ ਪਤ੍ਤਂ.

੧੭੫. ਸਨ੍ਤਿ ਖੋ ਪਨ ਮੇ, ਚੁਨ੍ਦ, ਏਤਰਹਿ ਥੇਰਾ ਭਿਕ੍ਖੂ ਸਾਵਕਾਤਿ ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਥੇਰਾ. ਭਿਕ੍ਖੁਨਿਯੋਤਿ ਖੇਮਾਥੇਰੀਉਪ੍ਪਲਵਣ੍ਣਥੇਰੀਆਦਯੋ. ਉਪਾਸਕਾ ਸਾਵਕਾ ਗਿਹੀ ਓਦਾਤਵਤ੍ਥਵਸਨਾ ਬ੍ਰਹ੍ਮਚਾਰਿਨੋਤਿ ਚਿਤ੍ਤਗਹਪਤਿਹਤ੍ਥਕਆਲ਼ਵਕਾਦਯੋ. ਕਾਮਭੋਗਿਨੋਤਿ ਚੂਲ਼ਅਨਾਥਪਿਣ੍ਡਿਕਮਹਾਅਨਾਥਪਿਣ੍ਡਿਕਾਦਯੋ. ਬ੍ਰਹ੍ਮਚਾਰਿਨਿਯੋਤਿ ਨਨ੍ਦਮਾਤਾਦਯੋ. ਕਾਮਭੋਗਿਨਿਯੋਤਿ ਖੁਜ੍ਜੁਤ੍ਤਰਾਦਯੋ.

੧੭੬. ਸਬ੍ਬਾਕਾਰਸਮ੍ਪਨ੍ਨਨ੍ਤਿ ਸਬ੍ਬਕਾਰਣਸਮ੍ਪਨ੍ਨਂ. ਇਦਮੇਵ ਤਨ੍ਤਿ ਇਦਮੇਵ ਬ੍ਰਹ੍ਮਚਰਿਯਂ, ਇਮਮੇਵ ਧਮ੍ਮਂ ਸਮ੍ਮਾ ਹੇਤੁਨਾ ਨਯੇਨ ਵਦਮਾਨੋ ਵਦੇਯ੍ਯ. ਉਦਕਾਸ੍ਸੁਦਨ੍ਤਿ ਉਦਕੋ ਸੁਦਂ. ਪਸ੍ਸਂ ਨ ਪਸ੍ਸਤੀਤਿ ਪਸ੍ਸਨ੍ਤੋ ਨ ਪਸ੍ਸਤਿ. ਸੋ ਕਿਰ ਇਮਂ ਪਞ੍ਹਂ ਮਹਾਜਨਂ ਪੁਚ੍ਛਿ. ਤੇਹਿ ‘‘ਨ ਜਾਨਾਮ, ਆਚਰਿਯ, ਕਥੇਹਿ ਨੋ’’ਤਿ ਵੁਤ੍ਤੋ ਸੋ ਆਹ – ‘‘ਗਮ੍ਭੀਰੋ ਅਯਂ ਪਞ੍ਹੋ ਆਹਾਰਸਪ੍ਪਾਯੇ ਸਤਿ ਥੋਕਂ ਚਿਨ੍ਤੇਤ੍ਵਾ ਸਕ੍ਕਾ ਕਥੇਤੁ’’ਨ੍ਤਿ. ਤਤੋ ਤੇਹਿ ਚਤ੍ਤਾਰੋ ਮਾਸੇ ਮਹਾਸਕ੍ਕਾਰੇ ਕਤੇ ਤਂ ਪਞ੍ਹਂ ਕਥੇਨ੍ਤੋ ਕਿਞ੍ਚ ਪਸ੍ਸਂ ਨ ਪਸ੍ਸਤੀਤਿਆਦਿਮਾਹ. ਤਤ੍ਥ ਸਾਧੁਨਿਸਿਤਸ੍ਸਾਤਿ ਸੁਟ੍ਠੁਨਿਸਿਤਸ੍ਸ ਤਿਖਿਣਸ੍ਸ, ਸੁਨਿਸਿਤਖੁਰਸ੍ਸ ਕਿਰ ਤਲਂ ਪਞ੍ਞਾਯਤਿ, ਧਾਰਾ ਨ ਪਞ੍ਞਾਯਤੀਤਿ ਅਯਮੇਤ੍ਥ ਅਤ੍ਥੋ.

ਸਙ੍ਗਾਯਿਤਬ੍ਬਧਮ੍ਮਾਦਿਵਣ੍ਣਨਾ

੧੭੭. ਸਙ੍ਗਮ੍ਮ ਸਮਾਗਮ੍ਮਾਤਿ ਸਙ੍ਗਨ੍ਤ੍ਵਾ ਸਮਾਗਨ੍ਤ੍ਵਾ. ਅਤ੍ਥੇਨ ਅਤ੍ਥਂ, ਬ੍ਯਞ੍ਜਨੇਨ ਬ੍ਯਞ੍ਜਨਨ੍ਤਿ ਅਤ੍ਥੇਨ ਸਹ ਅਤ੍ਥਂ, ਬ੍ਯਞ੍ਜਨੇਨਪਿ ਸਹ ਬ੍ਯਞ੍ਜਨਂ ਸਮਾਨੇਨ੍ਤੇਹੀਤਿ ਅਤ੍ਥੋ. ਸਙ੍ਗਾਯਿਤਬ੍ਬਨ੍ਤਿ ਵਾਚੇਤਬ੍ਬਂ ਸਜ੍ਝਾਯਿਤਬ੍ਬਂ. ਯਥਯਿਦਂ ਬ੍ਰਹ੍ਮਚਰਿਯਨ੍ਤਿ ਯਥਾ ਇਦਂ ਸਕਲਂ ਸਾਸਨਬ੍ਰਹ੍ਮਚਰਿਯਂ.

੧੭੮. ਤਤ੍ਰ ਚੇਤਿ ਤਤ੍ਰ ਸਙ੍ਘਮਜ੍ਝੇ, ਤਸ੍ਸ ਵਾ ਭਾਸਿਤੇ. ਅਤ੍ਥਞ੍ਚੇਵ ਮਿਚ੍ਛਾ ਗਣ੍ਹਾਤਿ, ਬ੍ਯਞ੍ਜਨਾਨਿ ਚ ਮਿਚ੍ਛਾ ਰੋਪੇਤੀਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਏਤ੍ਥ ਆਰਮ੍ਮਣਂ ‘‘ਸਤਿਪਟ੍ਠਾਨ’’ਨ੍ਤਿ ਅਤ੍ਥਂ ਗਣ੍ਹਾਤਿ. ‘‘ਸਤਿਪਟ੍ਠਾਨਾਨੀ’’ਤਿ ਬ੍ਯਞ੍ਜਨਂ ਰੋਪੇਤਿ. ਇਮਸ੍ਸ ਨੁ ਖੋ, ਆਵੁਸੋ, ਅਤ੍ਥਸ੍ਸਾਤਿ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ. ਅਤ੍ਥਸ੍ਸ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਕਿਂ ਨੁ ਖੋ ਇਮਾਨਿ ਬ੍ਯਞ੍ਜਨਾਨਿ, ਉਦਾਹੁ ਚਤ੍ਤਾਰਿ ਸਤਿਪਟ੍ਠਾਨਾਨੀ’’ਤਿ ਏਤਾਨਿ ਵਾ ਬ੍ਯਞ੍ਜਨਾਨਿ. ਕਤਮਾਨਿ ਓਪਾਯਿਕਤਰਾਨੀਤਿ ਇਮਸ੍ਸ ਅਤ੍ਥਸ੍ਸ ਕਤਮਾਨਿ ਬ੍ਯਞ੍ਜਨਾਨਿ ਉਪਪਨ੍ਨਤਰਾਨਿ ਅਲ੍ਲੀਨਤਰਾਨਿ. ਇਮੇਸਞ੍ਚ ਬ੍ਯਞ੍ਜਨਾਨਨ੍ਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਬ੍ਯਞ੍ਜਨਾਨਂ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ ਕਿਂ ਨੁ ਖੋ ਅਯਂ ਅਤ੍ਥੋ, ਉਦਾਹੁ ‘‘ਆਰਮ੍ਮਣਂ ਸਤਿਪਟ੍ਠਾਨ’’ਨ੍ਤਿ ਏਸੋ ਅਤ੍ਥੋਤਿ? ਇਮਸ੍ਸ ਖੋ, ਆਵੁਸੋ, ਅਤ੍ਥਸ੍ਸਾਤਿ ‘‘ਆਰਮ੍ਮਣਂ ਸਤਿਪਟ੍ਠਾਨ’’ਨ੍ਤਿ ਇਮਸ੍ਸ ਅਤ੍ਥਸ੍ਸ. ਯਾ ਚੇਵ ਏਤਾਨੀਤਿ ਯਾਨਿ ਚੇਵ ਏਤਾਨਿ ਮਯਾ ਵੁਤ੍ਤਾਨਿ. ਯਾ ਚੇਵ ਏਸੋਤਿ ਯੋ ਚੇਵ ਏਸ ਮਯਾ ਵੁਤ੍ਤੋ. ਸੋ ਨੇਵ ਉਸ੍ਸਾਦੇਤਬ੍ਬੋਤਿ ਤੁਮ੍ਹੇਹਿ ਤਾਵ ਸਮ੍ਮਾ ਅਤ੍ਥੇ ਚ ਸਮ੍ਮਾ ਬ੍ਯਞ੍ਜਨੇ ਚ ਠਾਤਬ੍ਬਂ. ਸੋ ਪਨ ਨੇਵ ਉਸ੍ਸਾਦੇਤਬ੍ਬੋ, ਨ ਅਪਸਾਦੇਤਬ੍ਬੋ. ਸਞ੍ਞਾਪੇਤਬ੍ਬੋਤਿ ਜਾਨਾਪੇਤਬ੍ਬੋ. ਤਸ੍ਸ ਚ ਅਤ੍ਥਸ੍ਸਾਤਿ ‘‘ਸਤਿਯੇਵ ਸਤਿਪਟ੍ਠਾਨ’’ਨ੍ਤਿ ਅਤ੍ਥਸ੍ਸ ਚ. ਤੇਸਞ੍ਚ ਬ੍ਯਞ੍ਜਨਾਨਨ੍ਤਿ ‘‘ਸਤਿਪਟ੍ਠਾਨਾ’’ਤਿ ਬ੍ਯਞ੍ਜਨਾਨਂ. ਨਿਸਨ੍ਤਿਯਾਤਿ ਨਿਸਾਮਨਤ੍ਥਂ ਧਾਰਣਤ੍ਥਂ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.

੧੮੧. ਤਾਦਿਸਨ੍ਤਿ ਤੁਮ੍ਹਾਦਿਸਂ. ਅਤ੍ਥੁਪੇਤਨ੍ਤਿ ਅਤ੍ਥੇਨ ਉਪੇਤਂ ਅਤ੍ਥਸ੍ਸ ਵਿਞ੍ਞਾਤਾਰਂ. ਬ੍ਯਞ੍ਜਨੁਪੇਤਨ੍ਤਿ ਬ੍ਯਞ੍ਜਨੇਹਿ ਉਪੇਤਂ ਬ੍ਯਞ੍ਜਨਾਨਂ ਵਿਞ੍ਞਾਤਾਰਂ. ਏਵਂ ਏਤਂ ਭਿਕ੍ਖੁਂ ਪਸਂਸਥ. ਏਸੋ ਹਿ ਭਿਕ੍ਖੁ ਨ ਤੁਮ੍ਹਾਕਂ ਸਾਵਕੋ ਨਾਮ, ਬੁਦ੍ਧੋ ਨਾਮ ਏਸ ਚੁਨ੍ਦਾਤਿ. ਇਤਿ ਭਗਵਾ ਬਹੁਸ੍ਸੁਤਂ ਭਿਕ੍ਖੁਂ ਅਤ੍ਤਨੋ ਠਾਨੇ ਠਪੇਸਿ.

ਪਚ੍ਚਯਾਨੁਞ੍ਞਾਤਕਾਰਣਾਦਿਵਣ੍ਣਨਾ

੧੮੨. ਇਦਾਨਿ ਤਤੋਪਿ ਉਤ੍ਤਰਿਤਰਂ ਦੇਸਨਂ ਵਡ੍ਢੇਨ੍ਤੋ ਨ ਵੋ ਅਹਂ, ਚੁਨ੍ਦਾਤਿਆਦਿਮਾਹ. ਤਤ੍ਥ ਦਿਟ੍ਠਧਮ੍ਮਿਕਾ ਆਸਵਾ ਨਾਮ ਇਧਲੋਕੇ ਪਚ੍ਚਯਹੇਤੁ ਉਪ੍ਪਜ੍ਜਨਕਾ ਆਸਵਾ. ਸਮ੍ਪਰਾਯਿਕਾ ਆਸਵਾ ਨਾਮ ਪਰਲੋਕੇ ਭਣ੍ਡਨਹੇਤੁ ਉਪ੍ਪਜ੍ਜਨਕਾ ਆਸਵਾ. ਸਂਵਰਾਯਾਤਿ ਯਥਾ ਤੇ ਨ ਪਵਿਸਨ੍ਤਿ, ਏਵਂ ਪਿਦਹਨਾਯ. ਪਟਿਘਾਤਾਯਾਤਿ ਮੂਲਘਾਤੇਨ ਪਟਿਹਨਨਾਯ. ਅਲਂ ਵੋ ਤਂ ਯਾਵਦੇਵ ਸੀਤਸ੍ਸ ਪਟਿਘਾਤਾਯਾਤਿ ਤਂ ਤੁਮ੍ਹਾਕਂ ਸੀਤਸ੍ਸ ਪਟਿਘਾਤਾਯ ਸਮਤ੍ਥਂ. ਇਦਂ ਵੁਤ੍ਤਂ ਹੋਤਿ, ਯਂ ਵੋ ਮਯਾ ਚੀਵਰਂ ਅਨੁਞ੍ਞਾਤਂ, ਤਂ ਪਾਰੁਪਿਤ੍ਵਾ ਦਪ੍ਪਂ ਵਾ ਮਾਨਂ ਵਾ ਕੁਰੁਮਾਨਾ ਵਿਹਰਿਸ੍ਸਥਾਤਿ ਨ ਅਨੁਞ੍ਞਾਤਂ, ਤਂ ਪਨ ਪਾਰੁਪਿਤ੍ਵਾ ਸੀਤਪ੍ਪਟਿਘਾਤਾਦੀਨਿ ਕਤ੍ਵਾ ਸੁਖਂ ਸਮਣਧਮ੍ਮਂ ਯੋਨਿਸੋ ਮਨਸਿਕਾਰਂ ਕਰਿਸ੍ਸਥਾਤਿ ਅਨੁਞ੍ਞਾਤਂ. ਯਥਾ ਚ ਚੀਵਰਂ, ਏਵਂ ਪਿਣ੍ਡਪਾਤਾਦਯੋਪਿ. ਅਨੁਪਦਸਂਵਣ੍ਣਨਾ ਪਨੇਤ੍ਥ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ.

ਸੁਖਲ੍ਲਿਕਾਨੁਯੋਗਾਦਿਵਣ੍ਣਨਾ

੧੮੩. ਸੁਖਲ੍ਲਿਕਾਨੁਯੋਗਨ੍ਤਿ ਸੁਖਲ੍ਲਿਯਨਾਨੁਯੋਗਂ, ਸੁਖਸੇਵਨਾਧਿਮੁਤ੍ਤਨ੍ਤਿ ਅਤ੍ਥੋ. ਸੁਖੇਤੀਤਿ ਸੁਖਿਤਂ ਕਰੋਤਿ. ਪੀਣੇਤੀਤਿ ਪੀਣਿਤਂ ਥੂਲਂ ਕਰੋਤਿ.

੧੮੬. ਅਟ੍ਠਿਤਧਮ੍ਮਾਤਿ ਨਟ੍ਠਿਤਸਭਾਵਾ. ਜਿਵ੍ਹਾ ਨੋ ਅਤ੍ਥੀਤਿ ਯਂ ਯਂ ਇਚ੍ਛਨ੍ਤਿ, ਤਂ ਤਂ ਕਥੇਨ੍ਤਿ, ਕਦਾਚਿ ਮਗ੍ਗਂ ਕਥੇਨ੍ਤਿ, ਕਦਾਚਿ ਫਲਂ ਕਦਾਚਿ ਨਿਬ੍ਬਾਨਨ੍ਤਿ ਅਧਿਪ੍ਪਾਯੋ. ਜਾਨਤਾਤਿ ਸਬ੍ਬਞ੍ਞੁਤਞ੍ਞਾਣੇਨ ਜਾਨਨ੍ਤੇਨ. ਪਸ੍ਸਤਾਤਿ ਪਞ੍ਚਹਿ ਚਕ੍ਖੂਹਿ ਪਸ੍ਸਨ੍ਤੇਨ. ਗਮ੍ਭੀਰਨੇਮੋਤਿ ਗਮ੍ਭੀਰਭੂਮਿਂ ਅਨੁਪਵਿਟ੍ਠੋ. ਸੁਨਿਖਾਤੋਤਿ ਸੁਟ੍ਠੁ ਨਿਖਾਤੋ. ਏਵਮੇਵ ਖੋ, ਆਵੁਸੋਤਿ ਏਵਂ ਖੀਣਾਸਵੋ ਅਭਬ੍ਬੋ ਨਵ ਠਾਨਾਨਿ ਅਜ੍ਝਾਚਰਿਤੁਂ. ਤਸ੍ਮਿਂ ਅਨਜ੍ਝਾਚਾਰੋ ਅਚਲੋ ਅਸਮ੍ਪਵੇਧੀ. ਤਤ੍ਥ ਸਞ੍ਚਿਚ੍ਚ ਪਾਣਂ ਜੀਵਿਤਾ ਵੋਰੋਪਨਾਦੀਸੁ ਸੋਤਾਪਨ੍ਨਾਦਯੋਪਿ ਅਭਬ੍ਬਾ. ਸਨ੍ਨਿਧਿਕਾਰਕਂ ਕਾਮੇ ਪਰਿਭੁਞ੍ਜਿਤੁਨ੍ਤਿ ਵਤ੍ਥੁਕਾਮੇ ਚ ਕਿਲੇਸਕਾਮੇ ਚ ਸਨ੍ਨਿਧਿਂ ਕਤ੍ਵਾ ਪਰਿਭੁਞ੍ਜਿਤੁਂ. ਸੇਯ੍ਯਥਾਪਿ ਪੁਬ੍ਬੇ ਅਗਾਰਿਕਭੂਤੋਤਿ ਯਥਾ ਪੁਬ੍ਬੇ ਗਿਹਿਭੂਤੋ ਪਰਿਭੁਞ੍ਜਤਿ, ਏਵਂ ਪਰਿਭੁਞ੍ਜਿਤੁਂ ਅਭਬ੍ਬੋ.

ਪਞ੍ਹਬ੍ਯਾਕਰਣਵਣ੍ਣਨਾ

੧੮੭. ਅਗਾਰਮਜ੍ਝੇ ਵਸਨ੍ਤਾ ਹਿ ਸੋਤਾਪਨ੍ਨਾਦਯੋ ਯਾਵਜੀਵਂ ਗਿਹਿਬ੍ਯਞ੍ਜਨੇਨ ਤਿਟ੍ਠਨ੍ਤਿ. ਖੀਣਾਸਵੋ ਪਨ ਅਰਹਤ੍ਤਂ ਪਤ੍ਵਾਵ ਮਨੁਸ੍ਸਭੂਤੋ ਪਰਿਨਿਬ੍ਬਾਤਿ ਵਾ ਪਬ੍ਬਜਤਿ ਵਾ. ਚਾਤੁਮਹਾਰਾਜਿਕਾਦੀਸੁ ਕਾਮਾਵਚਰਦੇਵੇਸੁ ਮੁਹੁਤ੍ਤਮ੍ਪਿ ਨ ਤਿਟ੍ਠਤਿ. ਕਸ੍ਮਾ? ਵਿਵੇਕਟ੍ਠਾਨਸ੍ਸ ਅਭਾਵਾ. ਭੁਮ੍ਮਦੇਵਤ੍ਤਭਾਵੇ ਪਨ ਠਿਤੋ ਅਰਹਤ੍ਤਂ ਪਤ੍ਵਾਪਿ ਤਿਟ੍ਠਤਿ. ਤਸ੍ਸ ਵਸੇਨ ਅਯਂ ਪਞ੍ਹੋ ਆਗਤੋ. ਭਿਨ੍ਨਦੋਸਤ੍ਤਾ ਪਨਸ੍ਸ ਭਿਕ੍ਖੁਭਾਵੋ ਵੇਦਿਤਬ੍ਬੋ. ਅਤੀਰਕਨ੍ਤਿ ਅਤੀਰਂ ਅਪਰਿਚ੍ਛੇਦਂ ਮਹਨ੍ਤਂ. ਨੋ ਚ ਖੋ ਅਨਾਗਤਨ੍ਤਿ ਅਨਾਗਤਂ ਪਨ ਅਦ੍ਧਾਨਂ ਆਰਬ੍ਭ ਏਵਂ ਨ ਪਞ੍ਞਪੇਤਿ, ਅਤੀਤਮੇਵ ਮਞ੍ਞੇ ਸਮਣੋ ਗੋਤਮੋ ਜਾਨਾਤਿ, ਨ ਅਨਾਗਤਂ. ਤਥਾ ਹਿਸ੍ਸ ਅਤੀਤੇ ਅਡ੍ਢਛਟ੍ਠਸਤਜਾਤਕਾਨੁਸ੍ਸਰਣਂ ਪਞ੍ਞਾਯਤਿ. ਅਨਾਗਤੇ ਏਵਂ ਬਹੁਂ ਅਨੁਸ੍ਸਰਣਂ ਨ ਪਞ੍ਞਾਯਤੀਤਿ ਇਮਮਤ੍ਥਂ ਮਞ੍ਞਮਾਨਾ ਏਵਂ ਵਦੇਯ੍ਯੁਂ. ਤਯਿਦਂ ਕਿਂ ਸੂਤਿ ਅਨਾਗਤੇ ਅਪਞ੍ਞਾਪਨਂ ਕਿਂ ਨੁ ਖੋ? ਕਥਂਸੂਤਿ ਕੇਨ ਨੁ ਖੋ ਕਾਰਣੇਨ ਅਜਾਨਨ੍ਤੋਯੇਵ ਨੁ ਖੋ ਅਨਾਗਤਂ ਨਾਨੁਸ੍ਸਰਤਿ, ਅਨਨੁਸ੍ਸਰਿਤੁਕਾਮਤਾਯ ਨਾਨੁਸ੍ਸਰਤੀਤਿ. ਅਞ੍ਞਵਿਹਿਤਕੇਨ ਞਾਣਦਸ੍ਸਨੇਨਾਤਿ ਪਚ੍ਚਕ੍ਖਂ ਵਿਯ ਕਤ੍ਵਾ ਦਸ੍ਸਨਸਮਤ੍ਥਤਾਯ ਦਸ੍ਸਨਭੂਤੇਨ ਞਾਣੇਨ ਅਞ੍ਞਤ੍ਥਵਿਹਿਤਕੇਨ ਞਾਣੇਨ ਅਞ੍ਞਂ ਆਰਬ੍ਭ ਪਵਤ੍ਤੇਨ, ਅਞ੍ਞਵਿਹਿਤਕਂ ਅਞ੍ਞਂ ਆਰਬ੍ਭ ਪਵਤ੍ਤਮਾਨਂ ਞਾਣਦਸ੍ਸਨਂ ਸਙ੍ਗਾਹੇਤਬ੍ਬਂ ਪਞ੍ਞਾਪੇਤਬ੍ਬਂ ਮਞ੍ਞਨ੍ਤਿ. ਤੇ ਹਿ ਚਰਤੋ ਚ ਤਿਟ੍ਠਤੋ ਚ ਸੁਤ੍ਤਸ੍ਸ ਚ ਜਾਗਰਸ੍ਸ ਚ ਸਤਤਂ ਸਮਿਤਂ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਮਞ੍ਞਨ੍ਤਿ, ਤਾਦਿਸਞ੍ਚ ਞਾਣਂ ਨਾਮ ਨਤ੍ਥਿ. ਤਸ੍ਮਾ ਯਥਰਿਵ ਬਾਲਾ ਅਬ੍ਯਤ੍ਤਾ, ਏਵਂ ਮਞ੍ਞਨ੍ਤੀਤਿ ਵੇਦਿਤਬ੍ਬੋ.

ਸਤਾਨੁਸਾਰੀਤਿ ਪੁਬ੍ਬੇਨਿਵਾਸਾਨੁਸ੍ਸਤਿਸਮ੍ਪਯੁਤ੍ਤਕਂ. ਯਾਵਤਕਂ ਆਕਙ੍ਖਤੀਤਿ ਯਤ੍ਤਕਂ ਞਾਤੁਂ ਇਚ੍ਛਤਿ, ਤਤ੍ਤਕਂ ਜਾਨਿਸ੍ਸਾਮੀਤਿ ਞਾਣਂ ਪੇਸੇਸਿ. ਅਥਸ੍ਸ ਦੁਬ੍ਬਲਪਤ੍ਤਪੁਟੇ ਪਕ੍ਖਨ੍ਦਨਾਰਾਚੋ ਵਿਯ ਅਪ੍ਪਟਿਹਤਂ ਅਨਿਵਾਰਿਤਂ ਞਾਣਂ ਗਚ੍ਛਤਿ, ਤੇਨ ਯਾਵਤਕਂ ਆਕਙ੍ਖਤਿ ਤਾਵਤਕਂ ਅਨੁਸ੍ਸਰਤਿ. ਬੋਧਿਜਨ੍ਤਿ ਬੋਧਿਮੂਲੇ ਜਾਤਂ. ਞਾਣਂ ਉਪ੍ਪਜ੍ਜਤੀਤਿ ਚਤੁਮਗ੍ਗਞਾਣਂ ਉਪ੍ਪਜ੍ਜਤਿ. ਅਯਮਨ੍ਤਿਮਾ ਜਾਤੀਤਿ ਤੇਨ ਞਾਣੇਨ ਜਾਤਿਮੂਲਸ੍ਸ ਪਹੀਨਤ੍ਤਾ ਪੁਨ ਅਯਮਨ੍ਤਿਮਾ ਜਾਤਿ. ਨਤ੍ਥਿਦਾਨਿ ਪੁਨਬ੍ਭਵੋਤਿ ਅਪਰਮ੍ਪਿ ਞਾਣਂ ਉਪ੍ਪਜ੍ਜਤਿ. ਅਨਤ੍ਥਸਂਹਿਤਨ੍ਤਿ ਨ ਇਧਲੋਕਤ੍ਥਂ ਵਾ ਪਰਲੋਕਤ੍ਥਂ ਵਾ ਨਿਸ੍ਸਿਤਂ. ਨ ਤਂ ਤਥਾਗਤੋ ਬ੍ਯਾਕਰੋਤੀਤਿ ਤਂ ਭਾਰਤਯੁਦ੍ਧਸੀਤਾਹਰਣਸਦਿਸਂ ਅਨਿਯ੍ਯਾਨਿਕਕਥਂ ਤਥਾਗਤੋ ਨ ਕਥੇਤਿ. ਭੂਤਂ ਤਚ੍ਛਂ ਅਨਤ੍ਥਸਂਹਿਤਨ੍ਤਿ ਰਾਜਕਥਾਦਿਤਿਰਚ੍ਛਾਨਕਥਂ. ਕਾਲਞ੍ਞੂ ਤਥਾਗਤੋ ਹੋਤੀਤਿ ਕਾਲਂ ਜਾਨਾਤਿ. ਸਹੇਤੁਕਂ ਸਕਾਰਣਂ ਕਤ੍ਵਾ ਯੁਤ੍ਤਪਤ੍ਤਕਾਲੇਯੇਵ ਕਥੇਤਿ.

੧੮੮. ਤਸ੍ਮਾ ਤਥਾਗਤੋਤਿ ਵੁਚ੍ਚਤੀਤਿ ਯਥਾ ਯਥਾ ਗਦਿਤਬ੍ਬਂ, ਤਥਾ ਤਥੇਵ ਗਦਨਤੋ ਦਕਾਰਸ੍ਸ ਤਕਾਰਂ ਕਤ੍ਵਾ ਤਥਾਗਤੋਤਿ ਵੁਚ੍ਚਤੀਤਿ ਅਤ੍ਥੋ. ਦਿਟ੍ਠਨ੍ਤਿ ਰੂਪਾਯਤਨਂ. ਸੁਤਨ੍ਤਿ ਸਦ੍ਦਾਯਤਨਂ. ਮੁਤਨ੍ਤਿ ਮੁਤ੍ਵਾ ਪਤ੍ਵਾ ਗਹੇਤਬ੍ਬਤੋ ਗਨ੍ਧਾਯਤਨਂ ਰਸਾਯਤਨਂ ਫੋਟ੍ਠਬ੍ਬਾਯਤਨਂ. ਵਿਞ੍ਞਾਤਨ੍ਤਿ ਸੁਖਦੁਕ੍ਖਾਦਿਧਮ੍ਮਾਯਤਨਂ. ਪਤ੍ਤਨ੍ਤਿ ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ ਪਤ੍ਤਂ. ਪਰਿਯੇਸਿਤਨ੍ਤਿ ਪਤ੍ਤਂ ਵਾ ਅਪਤ੍ਤਂ ਵਾ ਪਰਿਯੇਸਿਤਂ. ਅਨੁਵਿਚਰਿਤਂ ਮਨਸਾਤਿ ਚਿਤ੍ਤੇਨ ਅਨੁਸਞ੍ਚਰਿਤਂ. ‘‘ਤਥਾਗਤੇਨ ਅਭਿਸਮ੍ਬੁਦ੍ਧ’’ਨ੍ਤਿ ਇਮਿਨਾ ਏਤਂ ਦਸ੍ਸੇਤਿ, ਯਞ੍ਹਿ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਨੀਲਂ ਪੀਤਕਨ੍ਤਿਆਦਿ ਰੂਪਾਰਮ੍ਮਣਂ ਚਕ੍ਖੁਦ੍ਵਾਰੇ ਆਪਾਥਮਾਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਰੂਪਾਰਮ੍ਮਣਂ ਦਿਸ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਭੇਰਿਸਦ੍ਦੋ ਮੁਦਿਙ੍ਗਸਦ੍ਦੋਤਿਆਦਿ ਸਦ੍ਦਾਰਮ੍ਮਣਂ ਸੋਤਦ੍ਵਾਰੇ ਆਪਾਥਮਾਗਚ੍ਛਤਿ. ਮੂਲਗਨ੍ਧੋ ਤਚਗਨ੍ਧੋਤਿਆਦਿ ਗਨ੍ਧਾਰਮ੍ਮਣਂ ਘਾਨਦ੍ਵਾਰੇ ਆਪਾਥਮਾਗਚ੍ਛਤਿ. ਮੂਲਰਸੋ ਖਨ੍ਧਰਸੋਤਿਆਦਿ ਰਸਾਰਮ੍ਮਣਂ ਜਿਵ੍ਹਾਦ੍ਵਾਰੇ ਆਪਾਥਮਾਗਚ੍ਛਤਿ. ਕਕ੍ਖਲ਼ਂ ਮੁਦੁਕਨ੍ਤਿਆਦਿ ਪਥਵੀਧਾਤੁਤੇਜੋਧਾਤੁਵਾਯੋਧਾਤੁਭੇਦਂ ਫੋਟ੍ਠਬ੍ਬਾਰਮ੍ਮਣਂ ਕਾਯਦ੍ਵਾਰੇ ਆਪਾਥਮਾਗਚ੍ਛਤਿ. ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਮਂ ਨਾਮ ਫੋਟ੍ਠਬ੍ਬਾਰਮ੍ਮਣਂ ਫੁਸਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ. ਤਥਾ ਯਂ ਅਪਰਿਮਾਣਾਸੁ ਲੋਕਧਾਤੂਸੁ ਇਮਸ੍ਸ ਸਦੇਵਕਸ੍ਸ ਲੋਕਸ੍ਸ ਸੁਖਦੁਕ੍ਖਾਦਿਭੇਦਂ ਧਮ੍ਮਾਰਮ੍ਮਣਂ ਮਨੋਦ੍ਵਾਰਸ੍ਸ ਆਪਾਥਮਾਗਚ੍ਛਤਿ, ‘‘ਅਯਂ ਸਤ੍ਤੋ ਇਮਸ੍ਮਿਂ ਖਣੇ ਇਦਂ ਨਾਮ ਧਮ੍ਮਾਰਮ੍ਮਣਂ ਵਿਜਾਨਿਤ੍ਵਾ ਸੁਮਨੋ ਵਾ ਦੁਮ੍ਮਨੋ ਵਾ ਮਜ੍ਝਤ੍ਤੋ ਵਾ ਜਾਤੋ’’ਤਿ ਸਬ੍ਬਂ ਤਂ ਤਥਾਗਤਸ੍ਸ ਏਵਂ ਅਭਿਸਮ੍ਬੁਦ੍ਧਂ.

ਯਞ੍ਹਿ, ਚੁਨ੍ਦ, ਇਮੇਸਂ ਸਤ੍ਤਾਨਂ ਦਿਟ੍ਠਂ ਸੁਤਂ ਮੁਤਂ ਵਿਞ੍ਞਾਤਂ ਤਤ੍ਥ ਤਥਾਗਤੇਨ ਅਦਿਟ੍ਠਂ ਵਾ ਅਸੁਤਂ ਵਾ ਅਮੁਤਂ ਵਾ ਅਵਿਞ੍ਞਾਤਂ ਵਾ ਨਤ੍ਥਿ. ਇਮਸ੍ਸ ਮਹਾਜਨਸ੍ਸ ਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ. ਅਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਅਪਰਿਯੇਸਿਤ੍ਵਾ ਅਪ੍ਪਤ੍ਤਮ੍ਪਿ ਅਤ੍ਥਿ. ਸਬ੍ਬਮ੍ਪਿ ਤਂ ਤਥਾਗਤਸ੍ਸ ਅਪ੍ਪਤ੍ਤਂ ਨਾਮ ਨਤ੍ਥਿ, ਞਾਣੇਨ ਅਸਚ੍ਛਿਕਤਂ ਨਾਮ. ‘‘ਤਸ੍ਮਾ ਤਥਾਗਤੋਤਿ ਵੁਚ੍ਚਤੀ’’ਤਿ. ਯਂ ਯਥਾ ਲੋਕੇਨ ਗਤਂ ਤਸ੍ਸ ਤਥੇਵ ਗਤਤ੍ਤਾ ‘‘ਤਥਾਗਤੋ’’ਤਿ ਵੁਚ੍ਚਤਿ. ਪਾਲ਼ਿਯਂ ਪਨ ਅਭਿਸਮ੍ਬੁਦ੍ਧਨ੍ਤਿ ਵੁਤ੍ਤਂ, ਤਂ ਗਤਸਦ੍ਦੇਨ ਏਕਤ੍ਥਂ. ਇਮਿਨਾ ਨਯੇਨ ਸਬ੍ਬਵਾਰੇਸੁ ‘‘ਤਥਾਗਤੋ’’ਤਿ ਨਿਗਮਨਸ੍ਸ ਅਤ੍ਥੋ ਵੇਦਿਤਬ੍ਬੋ, ਤਸ੍ਸ ਯੁਤ੍ਤਿ ਬ੍ਰਹ੍ਮਜਾਲੇ ਤਥਾਗਤਸਦ੍ਦਵਿਤ੍ਥਾਰੇ ਵੁਤ੍ਤਾਯੇਵ.

ਅਬ੍ਯਾਕਤਟ੍ਠਾਨਵਣ੍ਣਨਾ

੧੮੯. ਏਵਂ ਅਤ੍ਤਨੋ ਅਸਮਤਂ ਅਨੁਤ੍ਤਰਤਂ ਸਬ੍ਬਞ੍ਞੁਤਂ ਧਮ੍ਮਰਾਜਭਾਵਂ ਕਥੇਤ੍ਵਾ ਇਦਾਨਿ ‘‘ਪੁਥੁਸਮਣਬ੍ਰਾਹ੍ਮਣਾਨਂ ਲਦ੍ਧੀਸੁ ਮਯਾ ਅਞ੍ਞਾਤਂ ਅਦਿਟ੍ਠਂ ਨਾਮ ਨਤ੍ਥਿ, ਸਬ੍ਬਂ ਮਮ ਞਾਣਸ੍ਸ ਅਨ੍ਤੋਯੇਵ ਪਰਿਵਤ੍ਤਤੀ’’ਤਿ ਸੀਹਨਾਦਂ ਨਦਨ੍ਤੋ ਠਾਨਂ ਖੋ ਪਨੇਤਂ, ਚੁਨ੍ਦ, ਵਿਜ੍ਜਤੀਤਿਆਦਿਮਾਹ. ਤਤ੍ਥ ਤਥਾਗਤੋਤਿ ਸਤ੍ਤੋ. ਨ ਹੇਤਂ, ਆਵੁਸੋ, ਅਤ੍ਥਸਂਹਿਤਨ੍ਤਿ ਇਧਲੋਕਪਰਲੋਕਅਤ੍ਥਸਂਹਿਤਂ ਨ ਹੋਤਿ. ਨ ਚ ਧਮ੍ਮਸਂਹਿਤਨ੍ਤਿ ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਂ ਨ ਹੋਤਿ. ਨ ਆਦਿਬ੍ਰਹ੍ਮਚਰਿਯਕਨ੍ਤਿ ਸਿਕ੍ਖਤ੍ਤਯਸਙ੍ਗਹਿਤਸ੍ਸ ਸਕਲਸਾਸਨਬ੍ਰਹ੍ਮਚਰਿਯਸ੍ਸ ਆਦਿਭੂਤਂ ਨ ਹੋਤਿ.

੧੯੦. ਇਦਂ ਦੁਕ੍ਖਨ੍ਤਿ ਖੋਤਿਆਦੀਸੁ ਤਣ੍ਹਂ ਠਪੇਤ੍ਵਾ ਅਵਸੇਸਾ ਤੇਭੁਮ੍ਮਕਾ ਧਮ੍ਮਾ ਇਦਂ ਦੁਕ੍ਖਨ੍ਤਿ ਬ੍ਯਾਕਤਂ. ਤਸ੍ਸੇਵ ਦੁਕ੍ਖਸ੍ਸ ਪਭਾਵਿਕਾ ਜਨਿਕਾ ਤਣ੍ਹਾ ਦੁਕ੍ਖਸਮੁਦਯੋਤਿ ਬ੍ਯਾਕਤਂ. ਉਭਿਨ੍ਨਂ ਅਪ੍ਪਵਤ੍ਤਿ ਦੁਕ੍ਖਨਿਰੋਧੋਤਿ ਬ੍ਯਾਕਤਂ. ਦੁਕ੍ਖਪਰਿਜਾਨਨੋ ਸਮੁਦਯਪਜਹਨੋ ਨਿਰੋਧਸਚ੍ਛਿਕਰਣੋ ਅਰਿਯਮਗ੍ਗੋ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਬ੍ਯਾਕਤਂ. ‘‘ਏਤਞ੍ਹਿ, ਆਵੁਸੋ, ਅਤ੍ਥਸਂਹਿਤ’’ਨ੍ਤਿਆਦੀਸੁ ਏਤਂ ਇਧਲੋਕਪਰਲੋਕਅਤ੍ਥਨਿਸ੍ਸਿਤਂ ਨਵਲੋਕੁਤ੍ਤਰਧਮ੍ਮਨਿਸ੍ਸਿਤਂ ਸਕਲਸਾਸਨਬ੍ਰਹ੍ਮਚਰਿਯਸ੍ਸ ਆਦਿ ਪਧਾਨਂ ਪੁਬ੍ਬਙ੍ਗਮਨ੍ਤਿ ਅਯਮਤ੍ਥੋ.

ਪੁਬ੍ਬਨ੍ਤਸਹਗਤਦਿਟ੍ਠਿਨਿਸ੍ਸਯਵਣ੍ਣਨਾ

੧੯੧. ਇਦਾਨਿ ਯਂ ਤਂ ਮਯਾ ਨ ਬ੍ਯਾਕਤਂ, ਤਂ ਅਜਾਨਨ੍ਤੇਨ ਨ ਬ੍ਯਾਕਤਨ੍ਤਿ ਮਾ ਏਵਂ ਸਞ੍ਞਮਕਂਸੁ. ਜਾਨਨ੍ਤੋਵ ਅਹਂ ਏਵਂ ‘‘ਏਤਸ੍ਮਿਂ ਬ੍ਯਾਕਤੇਪਿ ਅਤ੍ਥੋ ਨਤ੍ਥੀ’’ਤਿ ਨ ਬ੍ਯਾਕਰਿਂ. ਯਂ ਪਨ ਯਥਾ ਬ੍ਯਾਕਾਤਬ੍ਬਂ, ਤਂ ਮਯਾ ਬ੍ਯਾਕਤਮੇਵਾਤਿ ਸੀਹਨਾਦਂ ਨਦਨ੍ਤੋ ਪੁਨ ਯੇਪਿ ਤੇ, ਚੁਨ੍ਦਾਤਿਆਦਿਮਾਹ. ਤਤ੍ਥ ਦਿਟ੍ਠਿਯੋਵ ਦਿਟ੍ਠਿਨਿਸ੍ਸਯਾ, ਦਿਟ੍ਠਿਨਿਸ੍ਸਿਤਕਾ ਦਿਟ੍ਠਿਗਤਿਕਾਤਿ ਅਤ੍ਥੋ. ਇਦਮੇਵ ਸਚ੍ਚਨ੍ਤਿ ਇਦਮੇਵ ਦਸ੍ਸਨਂ ਸਚ੍ਚਂ. ਮੋਘਮਞ੍ਞਨ੍ਤਿ ਅਞ੍ਞੇਸਂ ਵਚਨਂ ਮੋਘਂ. ਅਸਯਂਕਾਰੋਤਿ ਅਸਯਂ ਕਤੋ.

੧੯੨. ਤਤ੍ਰਾਤਿ ਤੇਸੁ ਸਮਣਬ੍ਰਾਹ੍ਮਣੇਸੁ. ਅਤ੍ਥਿ ਨੁ ਖੋ ਇਦਂ ਆਵੁਸੋ ਵੁਚ੍ਚਤੀਤਿ, ਆਵੁਸੋ, ਯਂ ਤੁਮ੍ਹੇਹਿ ਸਸ੍ਸਤੋ ਅਤ੍ਤਾ ਚ ਲੋਕੋ ਚਾਤਿ ਵੁਚ੍ਚਤਿ, ਇਦਮਤ੍ਥਿ ਨੁ ਖੋ ਉਦਾਹੁ ਨਤ੍ਥੀਤਿ ਏਵਮਹਂ ਤੇ ਪੁਚ੍ਛਾਮੀਤਿ ਅਤ੍ਥੋ. ਯਞ੍ਚ ਖੋ ਤੇ ਏਵਮਾਹਂਸੂਤਿ ਯਂ ਪਨ ਤੇ ‘‘ਇਦਮੇਵ ਸਚ੍ਚਂ ਮੋਘਮਞ੍ਞ’’ਨ੍ਤਿ ਵਦਨ੍ਤਿ, ਤਂ ਤੇਸਂ ਨਾਨੁਜਾਨਾਮਿ. ਪਞ੍ਞਤ੍ਤਿਯਾਤਿ ਦਿਟ੍ਠਿਪਞ੍ਞਤ੍ਤਿਯਾ. ਸਮਸਮਨ੍ਤਿ ਸਮੇਨ ਞਾਣੇਨ ਸਮਂ. ਯਦਿਦਂ ਅਧਿਪਞ੍ਞਤ੍ਤੀਤਿ ਯਾ ਅਯਂ ਅਧਿਪਞ੍ਞਤ੍ਤਿ ਨਾਮ. ਏਤ੍ਥ ਅਹਮੇਵ ਭਿਯ੍ਯੋ ਉਤ੍ਤਰਿਤਰੋ ਨ ਮਯਾ ਸਮੋ ਅਤ੍ਥਿ. ਤਤ੍ਥ ਯਞ੍ਚ ਵੁਤ੍ਤਂ ‘‘ਪਞ੍ਞਤ੍ਤਿਯਾਤਿ ਯਞ੍ਚ ਅਧਿਪਞ੍ਞਤ੍ਤੀ’’ਤਿ ਉਭਯਮੇਤਂ ਅਤ੍ਥਤੋ ਏਕਂ. ਭੇਦਤੋ ਹਿ ਪਞ੍ਞਤ੍ਤਿ ਅਧਿਪਞ੍ਞਤ੍ਤੀਤਿ ਦ੍ਵਯਂ ਹੋਤਿ. ਤਤ੍ਥ ਪਞ੍ਞਤ੍ਤਿ ਨਾਮ ਦਿਟ੍ਠਿਪਞ੍ਞਤ੍ਤਿ. ਅਧਿਪਞ੍ਞਤ੍ਤਿ ਨਾਮ ਖਨ੍ਧਪਞ੍ਞਤ੍ਤਿ ਧਾਤੁਪਞ੍ਞਤ੍ਤਿ ਆਯਤਨਪਞ੍ਞਤ੍ਤਿ ਇਨ੍ਦ੍ਰਿਯਪਞ੍ਞਤ੍ਤਿ ਸਚ੍ਚਪਞ੍ਞਤ੍ਤਿ ਪੁਗ੍ਗਲਪਞ੍ਞਤ੍ਤੀਤਿ ਏਵਂ ਵੁਤ੍ਤਾ ਛ ਪਞ੍ਞਤ੍ਤਿਯੋ. ਇਧ ਪਨ ਪਞ੍ਞਤ੍ਤਿਯਾਤਿ ਏਤ੍ਥਾਪਿ ਪਞ੍ਞਤ੍ਤਿ ਚੇਵ ਅਧਿਪਞ੍ਞਤ੍ਤਿ ਚ ਅਧਿਪ੍ਪੇਤਾ, ਅਧਿਪਞ੍ਞਤ੍ਤੀਤਿ ਏਤ੍ਥਾਪਿ. ਭਗਵਾ ਹਿ ਪਞ੍ਞਤ੍ਤਿਯਾਪਿ ਅਨੁਤ੍ਤਰੋ, ਅਧਿਪਞ੍ਞਤ੍ਤਿਯਾਪਿ ਅਨੁਤ੍ਤਰੋ. ਤੇਨਾਹ – ‘‘ਅਹਮੇਵ ਤਤ੍ਥ ਭਿਯ੍ਯੋ ਯਦਿਦਂ ਅਧਿਪਞ੍ਞਤ੍ਤੀ’’ਤਿ.

੧੯੬. ਪਹਾਨਾਯਾਤਿ ਪਜਹਨਤ੍ਥਂ. ਸਮਤਿਕ੍ਕਮਾਯਾਤਿ ਤਸ੍ਸੇਵ ਵੇਵਚਨਂ. ਦੇਸਿਤਾਤਿ ਕਥਿਤਾ. ਪਞ੍ਞਤ੍ਤਾਤਿ ਠਪਿਤਾ. ਸਤਿਪਟ੍ਠਾਨਭਾਵਨਾਯ ਹਿ ਘਨਵਿਨਿਬ੍ਭੋਗਂ ਕਤ੍ਵਾ ਸਬ੍ਬਧਮ੍ਮੇਸੁ ਯਾਥਾਵਤੋ ਦਿਟ੍ਠੇਸੁ ‘‘ਸੁਦ੍ਧਸਙ੍ਖਾਰਪੁਞ੍ਜੋਯਂ ਨਯਿਧ ਸਤ੍ਤੂਪਲਬ੍ਭਤੀ’’ਤਿ ਸਨ੍ਨਿਟ੍ਠਾਨਤੋ ਸਬ੍ਬਦਿਟ੍ਠਿਨਿਸ੍ਸਯਾਨਂ ਪਹਾਨਂ ਹੋਤੀਤਿ. ਤੇਨ ਵੁਤ੍ਤਂ. ਦਿਟ੍ਠਿਨਿਸ੍ਸਯਾਨਂ ਪਹਾਨਾਯ ਸਮਤਿਕ੍ਕਮਾਯ ਏਵਂ ਮਯਾ ਇਮੇ ਚਤ੍ਤਾਰੋ ਸਤਿਪਟ੍ਠਾਨਾ ਦੇਸਿਤਾ ਪਞ੍ਞਤ੍ਤਾ’’ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਪਾਸਾਦਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.