੫. ਸਮ੍ਪਸਾਦਨੀਯਸੁਤ੍ਤਵਣ੍ਣਨਾ

ਸਾਰਿਪੁਤ੍ਤਸੀਹਨਾਦਵਣ੍ਣਨਾ

੧੪੧. ਏਵਂ ਮੇ ਸੁਤਨ੍ਤਿ ਸਮ੍ਪਸਾਦਨੀਯਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਨਾਲ਼ਨ੍ਦਾਯਨ੍ਤਿ ਨਾਲ਼ਨ੍ਦਾਤਿ ਏਵਂਨਾਮਕੇ ਨਗਰੇ, ਤਂ ਨਗਰਂ ਗੋਚਰਗਾਮਂ ਕਤ੍ਵਾ. ਪਾਵਾਰਿਕਮ੍ਬਵਨੇਤਿ ਦੁਸ੍ਸਪਾਵਾਰਿਕਸੇਟ੍ਠਿਨੋ ਅਮ੍ਬਵਨੇ. ਤਂ ਕਿਰ ਤਸ੍ਸ ਉਯ੍ਯਾਨਂ ਅਹੋਸਿ. ਸੋ ਭਗਵਤੋ ਧਮ੍ਮਦੇਸਨਂ ਸੁਤ੍ਵਾ ਭਗਵਤਿ ਪਸਨ੍ਨੋ ਤਸ੍ਮਿਂ ਉਯ੍ਯਾਨੇ ਕੁਟਿਲੇਣਮਣ੍ਡਪਾਦਿਪਟਿਮਣ੍ਡਿਤਂ ਭਗਵਤੋ ਵਿਹਾਰਂ ਕਤ੍ਵਾ ਨਿਯ੍ਯਾਤੇਸਿ. ਸੋ ਵਿਹਾਰੋ ਜੀਵਕਮ੍ਬਵਨਂ ਵਿਯ ‘‘ਪਾਵਾਰਿਕਮ੍ਬਵਨ’’ਨ੍ਤ੍ਵੇਵ ਸਙ੍ਖ੍ਯਂ ਗਤੋ, ਤਸ੍ਮਿਂ ਪਾਵਾਰਿਕਮ੍ਬਵਨੇ ਵਿਹਰਤੀਤਿ ਅਤ੍ਥੋ. ਭਗਵਨ੍ਤਂ ਏਤਦਵੋਚ – ‘‘ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ. ਕਸ੍ਮਾ ਏਵਂ ਅਵੋਚ? ਅਤ੍ਤਨੋ ਉਪ੍ਪਨ੍ਨਸੋਮਨਸ੍ਸਪਵੇਦਨਤ੍ਥਂ.

ਤਤ੍ਰਾਯਮਨੁਪੁਬ੍ਬਿਕਥਾ – ਥੇਰੋ ਕਿਰ ਤਂਦਿਵਸਂ ਕਾਲਸ੍ਸੇਵ ਸਰੀਰਪ੍ਪਟਿਜਗ੍ਗਨਂ ਕਤ੍ਵਾ ਸੁਨਿਵਤ੍ਥਨਿਵਾਸਨੋ ਪਤ੍ਤਚੀਵਰਮਾਦਾਯ ਪਾਸਾਦਿਕੇਹਿ ਅਭਿਕ੍ਕਨ੍ਤਾਦੀਹਿ ਦੇਵਮਨੁਸ੍ਸਾਨਂ ਪਸਾਦਂ ਆਵਹਨ੍ਤੋ ਨਾਲ਼ਨ੍ਦਵਾਸੀਨਂ ਹਿਤਸੁਖਮਨੁਬ੍ਰੂਹਯਨ੍ਤੋ ਪਿਣ੍ਡਾਯ ਪਵਿਸਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਵਿਹਾਰਂ ਗਨ੍ਤ੍ਵਾ ਸਤ੍ਥੁ ਵਤ੍ਤਂ ਦਸ੍ਸੇਤ੍ਵਾ ਸਤ੍ਥਰਿ ਗਨ੍ਧਕੁਟਿਂ ਪਵਿਟ੍ਠੇ ਸਤ੍ਥਾਰਂ ਵਨ੍ਦਿਤ੍ਵਾ ਅਤ੍ਤਨੋ ਦਿਵਾਟ੍ਠਾਨਂ ਅਗਮਾਸਿ. ਤਤ੍ਥ ਸਦ੍ਧਿਵਿਹਾਰਿਕਨ੍ਤੇਵਾਸਿਕੇਸੁ ਵਤ੍ਤਂ ਦਸ੍ਸੇਤ੍ਵਾ ਪਟਿਕ੍ਕਨ੍ਤੇਸੁ ਦਿਵਾਟ੍ਠਾਨਂ ਸਮ੍ਮਜ੍ਜਿਤ੍ਵਾ ਚਮ੍ਮਕ੍ਖਣ੍ਡਂ ਪਞ੍ਞਪੇਤ੍ਵਾ ਉਦਕਤੁਮ੍ਬਤੋ ਉਦਕੇਨ ਹਤ੍ਥਪਾਦੇ ਸੀਤਲੇ ਕਤ੍ਵਾ ਤਿਸਨ੍ਧਿਪਲ੍ਲਙ੍ਕਂ ਆਭੁਜਿਤ੍ਵਾ ਕਾਲਪਰਿਚ੍ਛੇਦਂ ਕਤ੍ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਿ.

ਸੋ ਯਥਾਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਾਯ ਅਤ੍ਤਨੋ ਗੁਣੇ ਅਨੁਸ੍ਸਰਿਤੁਮਾਰਦ੍ਧੋ. ਅਥਸ੍ਸ ਗੁਣੇ ਅਨੁਸ੍ਸਰਤੋ ਸੀਲਂ ਆਪਾਥਮਾਗਤਂ. ਤਤੋ ਪਟਿਪਾਟਿਯਾਵ ਸਮਾਧਿ ਪਞ੍ਞਾ ਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਂ ਪਠਮਂ ਝਾਨਂ ਦੁਤਿਯਂ ਝਾਨਂ ਤਤਿਯਂ ਝਾਨਂ ਚਤੁਤ੍ਥਂ ਝਾਨਂ ਆਕਾਸਾਨਞ੍ਚਾਯਤਨਸਮਾਪਤ੍ਤਿ ਵਿਞ੍ਞਾਨਞ੍ਚਾਯਤਨਸਮਾਪਤ੍ਤਿ ਆਕਿਞ੍ਚਞ੍ਞਾਯਤਨਸਮਾਪਤ੍ਤਿ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿ ਵਿਪਸ੍ਸਨਾਞਾਣਂ ਮਨੋਮਯਿਦ੍ਧਿਞਾਣਂ ਇਦ੍ਧਿਵਿਧਞਾਣਂ ਦਿਬ੍ਬਸੋਤਞਾਣਂ ਚੇਤੋਪਰਿਯਞਾਣਂ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣਂ ਦਿਬ੍ਬਚਕ੍ਖੁਞਾਣਂ…ਪੇ… ਸੋਤਾਪਤ੍ਤਿਮਗ੍ਗੋ ਸੋਤਾਪਤ੍ਤਿਫਲਂ…ਪੇ… ਅਰਹਤ੍ਤਮਗ੍ਗੋ ਅਰਹਤ੍ਤਫਲਂ ਅਤ੍ਥਪਟਿਸਮ੍ਭਿਦਾ ਧਮ੍ਮਪਟਿਸਮ੍ਭਿਦਾ ਨਿਰੁਤ੍ਤਿਪਟਿਸਮ੍ਭਿਦਾ ਪਟਿਭਾਨਪਟਿਸਮ੍ਭਿਦਾ ਸਾਵਕਪਾਰਮੀਞਾਣਂ. ਇਤੋ ਪਟ੍ਠਾਯ ਕਪ੍ਪਸਤਸਹਸ੍ਸਾਧਿਕਸ੍ਸ ਅਸਙ੍ਖ੍ਯੇਯ੍ਯਸ੍ਸ ਉਪਰਿ ਅਨੋਮਦਸ੍ਸੀਬੁਦ੍ਧਸ੍ਸ ਪਾਦਮੂਲੇ ਕਤਂ ਅਭਿਨੀਹਾਰਂ ਆਦਿਂ ਕਤ੍ਵਾ ਅਤ੍ਤਨੋ ਗੁਣੇ ਅਨੁਸ੍ਸਰਤੋ ਯਾਵ ਨਿਸਿਨ੍ਨਪਲ੍ਲਙ੍ਕਾ ਗੁਣਾ ਉਪਟ੍ਠਹਿਂਸੁ.

ਏਵਂ ਥੇਰੋ ਅਤ੍ਤਨੋ ਗੁਣੇ ਅਨੁਸ੍ਸਰਮਾਨੋ ਗੁਣਾਨਂ ਪਮਾਣਂ ਵਾ ਪਰਿਚ੍ਛੇਦਂ ਵਾ ਦਟ੍ਠੁਂ ਨਾਸਕ੍ਖਿ. ਸੋ ਚਿਨ੍ਤੇਸਿ – ‘‘ਮਯ੍ਹਂ ਤਾਵ ਪਦੇਸਞਾਣੇ ਠਿਤਸ੍ਸ ਸਾਵਕਸ੍ਸ ਗੁਣਾਨਂ ਪਮਾਣਂ ਵਾ ਪਰਿਚ੍ਛੇਦੋ ਵਾ ਨਤ੍ਥਿ. ਅਹਂ ਪਨ ਯਂ ਸਤ੍ਥਾਰਂ ਉਦ੍ਦਿਸ੍ਸ ਪਬ੍ਬਜਿਤੋ, ਕੀਦਿਸਾ ਨੁ ਖੋ ਤਸ੍ਸ ਗੁਣਾ’’ਤਿ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਂ ਆਰਦ੍ਧੋ. ਸੋ ਭਗਵਤੋ ਸੀਲਂ ਨਿਸ੍ਸਾਯ, ਸਮਾਧਿਂ ਪਞ੍ਞਂ ਵਿਮੁਤ੍ਤਿਂ ਵਿਮੁਤ੍ਤਿਞਾਣਦਸ੍ਸਨਂ ਨਿਸ੍ਸਾਯ, ਚਤ੍ਤਾਰੋ ਸਤਿਪਟ੍ਠਾਨੇ ਨਿਸ੍ਸਾਯ, ਚਤ੍ਤਾਰੋ ਸਮ੍ਮਪ੍ਪਧਾਨੇ ਚਤ੍ਤਾਰੋ ਇਦ੍ਧਿਪਾਦੇ ਚਤ੍ਤਾਰੋ ਮਗ੍ਗੇ ਚਤ੍ਤਾਰਿ ਫਲਾਨਿ ਚਤਸ੍ਸੋ ਪਟਿਸਮ੍ਭਿਦਾ ਚਤੁਯੋਨਿਪਰਿਚ੍ਛੇਦਕਞਾਣਂ ਚਤ੍ਤਾਰੋ ਅਰਿਯਵਂਸੇ ਨਿਸ੍ਸਾਯ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਮਾਰਦ੍ਧੋ.

ਤਥਾ ਪਞ੍ਚ ਪਧਾਨਿਯਙ੍ਗਾਨਿ, ਪਞ੍ਚਙ੍ਗਿਕਂਸਮ੍ਮਾਸਮਾਧਿਂ, ਪਞ੍ਚਿਨ੍ਦ੍ਰਿਯਾਨਿ, ਪਞ੍ਚ ਬਲਾਨਿ, ਪਞ੍ਚ ਨਿਸ੍ਸਰਣਿਯਾ ਧਾਤੁਯੋ, ਪਞ੍ਚ ਵਿਮੁਤ੍ਤਾਯਤਨਾਨਿ, ਪਞ੍ਚ ਵਿਮੁਤ੍ਤਿਪਰਿਪਾਚਨਿਯਾ ਪਞ੍ਞਾ, ਛ ਸਾਰਣੀਯੇ ਧਮ੍ਮੇ, ਛ ਅਨੁਸ੍ਸਤਿਟ੍ਠਾਨਾਨਿ, ਛ ਗਾਰਵੇ, ਛ ਨਿਸ੍ਸਰਣਿਯਾ ਧਾਤੁਯੋ, ਛ ਸਤਤਵਿਹਾਰੇ, ਛ ਅਨੁਤ੍ਤਰਿਯਾਨਿ, ਛ ਨਿਬ੍ਬੇਧਭਾਗਿਯਾ ਪਞ੍ਞਾ, ਛ ਅਭਿਞ੍ਞਾ, ਛ ਅਸਾਧਾਰਣਞਾਣਾਨਿ, ਸਤ੍ਤ ਅਪਰਿਹਾਨਿਯੇ ਧਮ੍ਮੇ, ਸਤ੍ਤ ਅਰਿਯਧਨਾਨਿ, ਸਤ੍ਤ ਬੋਜ੍ਝਙ੍ਗੇ, ਸਤ੍ਤ ਸਪ੍ਪੁਰਿਸਧਮ੍ਮੇ, ਸਤ੍ਤ ਨਿਜ੍ਜਰਵਤ੍ਥੂਨਿ, ਸਤ੍ਤ ਪਞ੍ਞਾ, ਸਤ੍ਤ ਦਕ੍ਖਿਣੇਯ੍ਯਪੁਗ੍ਗਲੇ, ਸਤ੍ਤ ਖੀਣਾਸਵਬਲਾਨਿ, ਅਟ੍ਠ ਪਞ੍ਞਾਪਟਿਲਾਭਹੇਤੂ, ਅਟ੍ਠ ਸਮ੍ਮਤ੍ਤਾਨਿ, ਅਟ੍ਠ ਲੋਕਧਮ੍ਮਾਤਿਕ੍ਕਮੇ, ਅਟ੍ਠ ਆਰਮ੍ਭਵਤ੍ਥੂਨਿ, ਅਟ੍ਠ ਅਕ੍ਖਣਦੇਸਨਾ, ਅਟ੍ਠ ਮਹਾਪੁਰਿਸਵਿਤਕ੍ਕੇ, ਅਟ੍ਠ ਅਭਿਭਾਯਤਨਾਨਿ, ਅਟ੍ਠ ਵਿਮੋਕ੍ਖੇ, ਨਵ ਯੋਨਿਸੋਮਨਸਿਕਾਰਮੂਲਕੇ ਧਮ੍ਮੇ, ਨਵ ਪਾਰਿਸੁਦ੍ਧਿਪਧਾਨਿਯਙ੍ਗਾਨਿ, ਨਵ ਸਤ੍ਤਾਵਾਸਦੇਸਨਾ, ਨਵ ਆਘਾਤਪ੍ਪਟਿਵਿਨਯੇ, ਨਵ ਪਞ੍ਞਾ, ਨਵ ਨਾਨਤ੍ਤਾਨਿ, ਨਵ ਅਨੁਪੁਬ੍ਬਵਿਹਾਰੇ, ਦਸ ਨਾਥਕਰਣੇ ਧਮ੍ਮੇ, ਦਸ ਕਸਿਣਾਯਤਨਾਨਿ, ਦਸ ਕੁਸਲਕਮ੍ਮਪਥੇ, ਦਸ ਤਥਾਗਤਬਲਾਨਿ, ਦਸ ਸਮ੍ਮਤ੍ਤਾਨਿ, ਦਸ ਅਰਿਯਵਾਸੇ, ਦਸ ਅਸੇਕ੍ਖਧਮ੍ਮੇ, ਏਕਾਦਸ ਮੇਤ੍ਤਾਨਿਸਂਸੇ, ਦ੍ਵਾਦਸ ਧਮ੍ਮਚਕ੍ਕਾਕਾਰੇ, ਤੇਰਸ ਧੁਤਙ੍ਗਗੁਣੇ, ਚੁਦ੍ਦਸ ਬੁਦ੍ਧਞਾਣਾਨਿ, ਪਞ੍ਚਦਸ ਵਿਮੁਤ੍ਤਿਪਰਿਪਾਚਨਿਯੇ ਧਮ੍ਮੇ, ਸੋਲ਼ਸਵਿਧਂ ਆਨਾਪਾਨਸ੍ਸਤਿਂ, ਅਟ੍ਠਾਰਸ ਬੁਦ੍ਧਧਮ੍ਮੇ, ਏਕੂਨਵੀਸਤਿ ਪਚ੍ਚਵੇਕ੍ਖਣਞਾਣਾਨਿ, ਚਤੁਚਤ੍ਤਾਲੀਸ ਞਾਣਵਤ੍ਥੂਨਿ, ਪਰੋਪਣ੍ਣਾਸ ਕੁਸਲਧਮ੍ਮੇ, ਸਤ੍ਤਸਤ੍ਤਤਿ ਞਾਣਵਤ੍ਥੂਨਿ, ਚਤੁਵੀਸਤਿਕੋਟਿਸਤਸਹਸ੍ਸਸਮਾਪਤ੍ਤਿਸਞ੍ਚਰਮਹਾਵਜਿਰਞਾਣਂ ਨਿਸ੍ਸਾਯ ਦਸਬਲਸ੍ਸ ਗੁਣੇ ਅਨੁਸ੍ਸਰਿਤੁਂ ਆਰਭਿ.

ਤਸ੍ਮਿਂਯੇਵ ਚ ਦਿਵਾਟ੍ਠਾਨੇ ਨਿਸਿਨ੍ਨੋਯੇਵ ਉਪਰਿ ‘‘ਅਪਰਂ ਪਨ, ਭਨ੍ਤੇ, ਏਤਦਾਨੁਤ੍ਤਰਿਯ’’ਨ੍ਤਿ ਆਗਮਿਸ੍ਸਨ੍ਤਿ ਸੋਲ਼ਸ ਅਪਰਮ੍ਪਰਿਯਧਮ੍ਮਾ, ਤੇਪਿ ਨਿਸ੍ਸਾਯ ਅਨੁਸ੍ਸਰਿਤੁਂ ਆਰਭਿ. ਸੋ ‘‘ਕੁਸਲਪਞ੍ਞਤ੍ਤਿਯਂ ਅਨੁਤ੍ਤਰੋ ਮਯ੍ਹਂ ਸਤ੍ਥਾ, ਆਯਤਨਪਞ੍ਞਤ੍ਤਿਯਂ ਅਨੁਤ੍ਤਰੋ, ਗਬ੍ਭਾਵਕ੍ਕਨ੍ਤਿਯਂ ਅਨੁਤ੍ਤਰੋ, ਆਦੇਸਨਾਵਿਧਾਸੁ ਅਨੁਤ੍ਤਰੋ, ਦਸ੍ਸਨਸਮਾਪਤ੍ਤਿਯਂ ਅਨੁਤ੍ਤਰੋ, ਪੁਗ੍ਗਲਪਞ੍ਞਤ੍ਤਿਯਂ ਅਨੁਤ੍ਤਰੋ, ਪਧਾਨੇ ਅਨੁਤ੍ਤਰੋ, ਪਟਿਪਦਾਸੁ ਅਨੁਤ੍ਤਰੋ, ਭਸ੍ਸਸਮਾਚਾਰੇ ਅਨੁਤ੍ਤਰੋ, ਪੁਰਿਸਸੀਲਸਮਾਚਾਰੇ ਅਨੁਤ੍ਤਰੋ, ਅਨੁਸਾਸਨੀਵਿਧਾਸੁ ਅਨੁਤ੍ਤਰੋ, ਪਰਪੁਗ੍ਗਲਵਿਮੁਤ੍ਤਿਞਾਣੇ ਅਨੁਤ੍ਤਰੋ, ਸਸ੍ਸਤਵਾਦੇਸੁ ਅਨੁਤ੍ਤਰੋ, ਪੁਬ੍ਬੇਨਿਵਾਸਞਾਣੇ ਅਨੁਤ੍ਤਰੋ, ਦਿਬ੍ਬਚਕ੍ਖੁਞਾਣੇ ਅਨੁਤ੍ਤਰੋ, ਇਦ੍ਧਿਵਿਧੇ ਅਨੁਤ੍ਤਰੋ, ਇਮਿਨਾ ਚ ਇਮਿਨਾ ਚ ਅਨੁਤ੍ਤਰੋ’’ਤਿ ਏਵਂ ਦਸਬਲਸ੍ਸ ਗੁਣੇ ਅਨੁਸ੍ਸਰਨ੍ਤੋ ਭਗਵਤੋ ਗੁਣਾਨਂ ਨੇਵ ਅਨ੍ਤਂ, ਨ ਪਮਾਣਂ ਪਸ੍ਸਿ. ਥੇਰੋ ਅਤ੍ਤਨੋਪਿ ਤਾਵ ਗੁਣਾਨਂ ਅਨ੍ਤਂ ਵਾ ਪਮਾਣਂ ਵਾ ਨਾਦ੍ਦਸ, ਭਗਵਤੋ ਗੁਣਾਨਂ ਕਿਂ ਪਸ੍ਸਿਸ੍ਸਤਿ? ਯਸ੍ਸ ਯਸ੍ਸ ਹਿ ਪਞ੍ਞਾ ਮਹਤੀ ਞਾਣਂ ਵਿਸਦਂ, ਸੋ ਸੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਲੋਕਿਯਮਹਾਜਨੋ ਉਕ੍ਕਾਸਿਤ੍ਵਾਪਿ ਖਿਪਿਤ੍ਵਾਪਿ ‘‘ਨਮੋ ਬੁਦ੍ਧਾਨ’’ਨ੍ਤਿ ਅਤ੍ਤਨੋ ਅਤ੍ਤਨੋ ਉਪਨਿਸ੍ਸਯੇ ਠਤ੍ਵਾ ਬੁਦ੍ਧਾਨਂ ਗੁਣੇ ਅਨੁਸ੍ਸਰਤਿ. ਸਬ੍ਬਲੋਕਿਯਮਹਾਜਨਤੋ ਏਕੋ ਸੋਤਾਪਨ੍ਨੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਸੋਤਾਪਨ੍ਨਾਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਸਕਦਾਗਾਮੀ. ਸਕਦਾਗਾਮੀਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਅਨਾਗਾਮੀ. ਅਨਾਗਾਮੀਨਂ ਸਤਤੋਪਿ ਸਹਸ੍ਸਤੋਪਿ ਏਕੋ ਅਰਹਾ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਅਵਸੇਸਅਰਹਨ੍ਤੇਹਿ ਅਸੀਤਿ ਮਹਾਥੇਰਾ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਨ੍ਤਿ. ਅਸੀਤਿਮਹਾਥੇਰੇਹਿ ਚਤ੍ਤਾਰੋ ਮਹਾਥੇਰਾ. ਚਤੂਹਿ ਮਹਾਥੇਰੇਹਿ ਦ੍ਵੇ ਅਗ੍ਗਸਾਵਕਾ. ਤੇਸੁਪਿ ਸਾਰਿਪੁਤ੍ਤਤ੍ਥੇਰੋ, ਸਾਰਿਪੁਤ੍ਤਤ੍ਥੇਰਤੋਪਿ ਏਕੋ ਪਚ੍ਚੇਕਬੁਦ੍ਧੋ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ. ਸਚੇ ਪਨ ਸਕਲਚਕ੍ਕਵਾਲ਼ਗਬ੍ਭੇ ਸਙ੍ਘਾਟਿਕਣ੍ਣੇਨ ਸਙ੍ਘਾਟਿਕਣ੍ਣਂ ਪਹਰਿਯਮਾਨਾ ਨਿਸਿਨ੍ਨਾ ਪਚ੍ਚੇਕਬੁਦ੍ਧਾ ਬੁਦ੍ਧਗੁਣੇ ਅਨੁਸ੍ਸਰੇਯ੍ਯੁਂ, ਤੇਹਿ ਸਬ੍ਬੇਹਿਪਿ ਏਕੋ ਸਬ੍ਬਞ੍ਞੁਬੁਦ੍ਧੋਵ ਬੁਦ੍ਧਗੁਣੇ ਮਹਨ੍ਤਤੋ ਸਦ੍ਦਹਤਿ.

ਸੇਯ੍ਯਥਾਪਿ ਨਾਮ ਮਹਾਜਨੋ ‘‘ਮਹਾਸਮੁਦ੍ਦੋ ਗਮ੍ਭੀਰੋ ਉਤ੍ਤਾਨੋ’’ਤਿ ਜਾਨਨਤ੍ਥਂ ਯੋਤ੍ਤਾਨਿ ਵਟ੍ਟੇਯ੍ਯ, ਤਤ੍ਥ ਕੋਚਿ ਬ੍ਯਾਮਪ੍ਪਮਾਣਂ ਯੋਤ੍ਤਂ ਵਟ੍ਟੇਯ੍ਯ, ਕੋਚਿ ਦ੍ਵੇ ਬ੍ਯਾਮਂ, ਕੋਚਿ ਦਸਬ੍ਯਾਮਂ, ਕੋਚਿ ਵੀਸਤਿਬ੍ਯਾਮਂ, ਕੋਚਿ ਤਿਂਸਬ੍ਯਾਮਂ, ਕੋਚਿ ਚਤ੍ਤਾਲੀਸਬ੍ਯਾਮਂ, ਕੋਚਿ ਪਞ੍ਞਾਸਬ੍ਯਾਮਂ, ਕੋਚਿ ਸਤਬ੍ਯਾਮਂ, ਕੋਚਿ ਸਹਸ੍ਸਬ੍ਯਾਮਂ, ਕੋਚਿ ਚਤੁਰਾਸੀਤਿਬ੍ਯਾਮਸਹਸ੍ਸਂ. ਤੇ ਨਾਵਂ ਆਰੁਯ੍ਹ, ਸਮੁਦ੍ਦਮਜ੍ਝੇ ਉਗ੍ਗਤਪਬ੍ਬਤਾਦਿਮ੍ਹਿ ਵਾ ਠਤ੍ਵਾ ਅਤ੍ਤਨੋ ਅਤ੍ਤਨੋ ਯੋਤ੍ਤਂ ਓਤਾਰੇਯ੍ਯੁਂ, ਤੇਸੁ ਯਸ੍ਸ ਯੋਤ੍ਤਂ ਬ੍ਯਾਮਮਤ੍ਤਂ, ਸੋ ਬ੍ਯਾਮਮਤ੍ਤਟ੍ਠਾਨੇਯੇਵ ਉਦਕਂ ਜਾਨਾਤਿ…ਪੇ… ਯਸ੍ਸ ਚਤੁਰਾਸੀਤਿਬ੍ਯਾਮਸਹਸ੍ਸਂ, ਸੋ ਚਤੁਰਾਸੀਤਿਬ੍ਯਾਮਸਹਸ੍ਸਟ੍ਠਾਨੇਯੇਵ ਉਦਕਂ ਜਾਨਾਤਿ. ਪਰਤੋ ਉਦਕਂ ਏਤ੍ਤਕਨ੍ਤਿ ਨ ਜਾਨਾਤਿ. ਮਹਾਸਮੁਦ੍ਦੇ ਪਨ ਨ ਤਤ੍ਤਕਂਯੇਵ ਉਦਕਂ, ਅਥ ਖੋ ਅਨਨ੍ਤਮਪਰਿਮਾਣਂ. ਚਤੁਰਾਸੀਤਿਯੋਜਨਸਹਸ੍ਸਂ ਗਮ੍ਭੀਰੋ ਹਿ ਮਹਾਸਮੁਦ੍ਦੋ, ਏਵਮੇਵ ਏਕਬ੍ਯਾਮਯੋਤ੍ਤਤੋ ਪਟ੍ਠਾਯ ਨਵਬ੍ਯਾਮਯੋਤ੍ਤੇਨ ਞਾਤਉਦਕਂ ਵਿਯ ਲੋਕਿਯਮਹਾਜਨੇਨ ਦਿਟ੍ਠਬੁਦ੍ਧਗੁਣਾ ਵੇਦਿਤਬ੍ਬਾ. ਦਸਬ੍ਯਾਮਯੋਤ੍ਤੇਨ ਦਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਸੋਤਾਪਨ੍ਨੇਨ ਦਿਟ੍ਠਬੁਦ੍ਧਗੁਣਾ. ਵੀਸਤਿਬ੍ਯਾਮਯੋਤ੍ਤੇਨ ਵੀਸਤਿਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਸਕਦਾਗਾਮਿਨਾ ਦਿਟ੍ਠਬੁਦ੍ਧਗੁਣਾ. ਤਿਂਸਬ੍ਯਾਮਯੋਤ੍ਤੇਨ ਤਿਂਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਨਾਗਾਮਿਨਾ ਦਿਟ੍ਠਬੁਦ੍ਧਗੁਣਾ. ਚਤ੍ਤਾਲੀਸਬ੍ਯਾਮਯੋਤ੍ਤੇਨ ਚਤ੍ਤਾਲੀਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਰਹਤਾ ਦਿਟ੍ਠਬੁਦ੍ਧਗੁਣਾ. ਪਞ੍ਞਾਸਬ੍ਯਾਮਯੋਤ੍ਤੇਨ ਪਞ੍ਞਾਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਅਸੀਤਿਮਹਾਥੇਰੇਹਿ ਦਿਟ੍ਠਬੁਦ੍ਧਗੁਣਾ. ਸਤਬ੍ਯਾਮਯੋਤ੍ਤੇਨ ਸਤਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਚਤੂਹਿ ਮਹਾਥੇਰੇਹਿ ਦਿਟ੍ਠਬੁਦ੍ਧਗੁਣਾ. ਸਹਸ੍ਸਬ੍ਯਾਮਯੋਤ੍ਤੇਨ ਸਹਸ੍ਸਬ੍ਯਾਮਟ੍ਠਾਨੇ ਞਾਤਉਦਕਂ ਵਿਯ ਮਹਾਮੋਗ੍ਗਲ੍ਲਾਨਤ੍ਥੇਰੇਨ ਦਿਟ੍ਠਬੁਦ੍ਧਗੁਣਾ. ਚਤੁਰਾਸੀਤਿਬ੍ਯਾਮਸਹਸ੍ਸਯੋਤ੍ਤੇਨ ਚਤੁਰਾਸੀਤਿਬ੍ਯਾਮਸਹਸ੍ਸਟ੍ਠਾਨੇ ਞਾਤਉਦਕਂ ਵਿਯ ਧਮ੍ਮਸੇਨਾਪਤਿਨਾ ਸਾਰਿਪੁਤ੍ਤਤ੍ਥੇਰੇਨ ਦਿਟ੍ਠਬੁਦ੍ਧਗੁਣਾ. ਤਤ੍ਥ ਯਥਾ ਸੋ ਪੁਰਿਸੋ ਮਹਾਸਮੁਦ੍ਦੇ ਉਦਕਂ ਨਾਮ ਨ ਏਤ੍ਤਕਂਯੇਵ, ਅਨਨ੍ਤਮਪਰਿਮਾਣਨ੍ਤਿ ਗਣ੍ਹਾਤਿ, ਏਵਮੇਵ ਆਯਸ੍ਮਾ ਸਾਰਿਪੁਤ੍ਤੋ ਧਮ੍ਮਨ੍ਵਯੇਨ ਅਨ੍ਵਯਬੁਦ੍ਧਿਯਾ ਅਨੁਮਾਨੇਨ ਨਯਗ੍ਗਾਹੇਨ ਸਾਵਕਪਾਰਮੀਞਾਣੇ ਠਤ੍ਵਾ ਦਸਬਲਸ੍ਸ ਗੁਣੇ ਅਨੁਸ੍ਸਰਨ੍ਤੋ ‘‘ਬੁਦ੍ਧਗੁਣਾ ਅਨਨ੍ਤਾ ਅਪਰਿਮਾਣਾ’’ਤਿ ਸਦ੍ਦਹਿ.

ਥੇਰੇਨ ਹਿ ਦਿਟ੍ਠਬੁਦ੍ਧਗੁਣੇਹਿ ਧਮ੍ਮਨ੍ਵਯੇਨ ਗਹੇਤਬ੍ਬਬੁਦ੍ਧਗੁਣਾਯੇਵ ਬਹੁਤਰਾ. ਯਥਾ ਕਥਂ ਵਿਯ? ਯਥਾ ਇਤੋ ਨਵ ਇਤੋ ਨਵਾਤਿ ਅਟ੍ਠਾਰਸ ਯੋਜਨਾਨਿ ਅਵਤ੍ਥਰਿਤ੍ਵਾ ਗਚ੍ਛਨ੍ਤਿਯਾ ਚਨ੍ਦਭਾਗਾਯ ਮਹਾਨਦਿਯਾ ਪੁਰਿਸੋ ਸੂਚਿਪਾਸੇਨ ਉਦਕਂ ਗਣ੍ਹੇਯ੍ਯ, ਸੂਚਿਪਾਸੇਨ ਗਹਿਤਉਦਕਤੋ ਅਗ੍ਗਹਿਤਮੇਵ ਬਹੁ ਹੋਤਿ. ਯਥਾ ਵਾ ਪਨ ਪੁਰਿਸੋ ਮਹਾਪਥਵਿਤੋ ਅਙ੍ਗੁਲਿਯਾ ਪਂਸੁਂ ਗਣ੍ਹੇਯ੍ਯ, ਅਙ੍ਗੁਲਿਯਾ ਗਹਿਤਪਂਸੁਤੋ ਅਵਸੇਸਪਂਸੁਯੇਵ ਬਹੁ ਹੋਤਿ. ਯਥਾ ਵਾ ਪਨ ਪੁਰਿਸੋ ਮਹਾਸਮੁਦ੍ਦਾਭਿਮੁਖਿਂ ਅਙ੍ਗੁਲਿਂ ਕਰੇਯ੍ਯ, ਅਙ੍ਗੁਲਿਅਭਿਮੁਖਉਦਕਤੋ ਅਵਸੇਸਂ ਉਦਕਂਯੇਵ ਬਹੁ ਹੋਤਿ. ਯਥਾ ਚ ਪੁਰਿਸੋ ਆਕਾਸਾਭਿਮੁਖਿਂ ਅਙ੍ਗੁਲਿਂ ਕਰੇਯ੍ਯ, ਅਙ੍ਗੁਲਿਅਭਿਮੁਖਆਕਾਸਤੋ ਸੇਸਆਕਾਸਪ੍ਪਦੇਸੋਵ ਬਹੁ ਹੋਤਿ. ਏਵਂ ਥੇਰੇਨ ਦਿਟ੍ਠਬੁਦ੍ਧਗੁਣੇਹਿ ਅਦਿਟ੍ਠਾ ਗੁਣਾਵ ਬਹੂਤਿ ਵੇਦਿਤਬ੍ਬਾ. ਵੁਤ੍ਤਮ੍ਪਿ ਚੇਤਂ –

‘‘ਬੁਦ੍ਧੋਪਿ ਬੁਦ੍ਧਸ੍ਸ ਭਣੇਯ੍ਯ ਵਣ੍ਣਂ,

ਕਪ੍ਪਮ੍ਪਿ ਚੇ ਅਞ੍ਞਮਭਾਸਮਾਨੋ;

ਖੀਯੇਥ ਕਪ੍ਪੋ ਚਿਰਦੀਘਮਨ੍ਤਰੇ,

ਵਣ੍ਣੋ ਨ ਖੀਯੇਥ ਤਥਾਗਤਸ੍ਸਾ’’ਤਿ.

ਏਵਂ ਥੇਰਸ੍ਸ ਅਤ੍ਤਨੋ ਚ ਸਤ੍ਥੁ ਚ ਗੁਣੇ ਅਨੁਸ੍ਸਰਤੋ ਯਮਕਮਹਾਨਦੀਮਹੋਘੋ ਵਿਯ ਅਬ੍ਭਨ੍ਤਰੇ ਪੀਤਿਸੋਮਨਸ੍ਸਂ ਅਵਤ੍ਥਰਮਾਨਂ ਵਾਤੋ ਵਿਯ ਭਸ੍ਤਂ, ਉਬ੍ਭਿਜ੍ਜਿਤ੍ਵਾ ਉਗ੍ਗਤਉਦਕਂ ਵਿਯ ਮਹਾਰਹਦਂ ਸਕਲਸਰੀਰਂ ਪੂਰੇਤਿ. ਤਤੋ ਥੇਰਸ੍ਸ ‘‘ਸੁਪਤ੍ਥਿਤਾ ਵਤ ਮੇ ਪਤ੍ਥਨਾ, ਸੁਲਦ੍ਧਾ ਮੇ ਪਬ੍ਬਜ੍ਜਾ, ਯ੍ਵਾਹਂ ਏਵਂਵਿਧਸ੍ਸ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤੋ’’ਤਿ ਆਵਜ੍ਜਨ੍ਤਸ੍ਸ ਬਲਵਤਰਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ.

ਅਥ ਥੇਰੋ ‘‘ਕਸ੍ਸਾਹਂ ਇਮਂ ਪੀਤਿਸੋਮਨਸ੍ਸਂ ਆਰੋਚੇਯ੍ਯ’’ਨ੍ਤਿ ਚਿਨ੍ਤੇਨ੍ਤੋ ਅਞ੍ਞੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਮਮ ਇਮਂ ਪਸਾਦਂ ਅਨੁਚ੍ਛਵਿਕਂ ਕਤ੍ਵਾ ਪਟਿਗ੍ਗਹੇਤੁਂ ਨ ਸਕ੍ਖਿਸ੍ਸਤਿ, ਅਹਂ ਇਮਂ ਸੋਮਨਸ੍ਸਂ ਸਤ੍ਥੁਨੋਯੇਵ ਪਵੇਦੇਯ੍ਯਾਮਿ, ਸਤ੍ਥਾਵ ਮੇ ਪਟਿਗ੍ਗਣ੍ਹਿਤੁਂ ਸਕ੍ਖਿਸ੍ਸਤਿ, ਸੋ ਹਿ ਤਿਟ੍ਠਤੁ ਮਮ ਪੀਤਿਸੋਮਨਸ੍ਸਂ, ਮਾਦਿਸਸ੍ਸ ਸਮਣਸਤਸ੍ਸ ਵਾ ਸਮਣਸਹਸ੍ਸਸ੍ਸ ਵਾ ਸਮਣਸਤਸਹਸ੍ਸਸ੍ਸ ਵਾ ਸੋਮਨਸ੍ਸਂ ਪਵੇਦੇਨ੍ਤਸ੍ਸ ਸਬ੍ਬੇਸਂ ਮਨਂ ਗਣ੍ਹਨ੍ਤੋ ਪਟਿਗ੍ਗਹੇਤੁਂ ਸਕ੍ਕੋਤਿ. ਸੇਯ੍ਯਥਾਪਿ ਨਾਮ ਅਟ੍ਠਾਰਸ ਯੋਜਨਾਨਿ ਅਵਤ੍ਥਰਮਾਨਂ ਗਚ੍ਛਨ੍ਤਿਂ ਚਨ੍ਦਭਾਗਮਹਾਨਦਿਂ ਕੁਸੁਮ੍ਭਾ ਵਾ ਕਨ੍ਦਰਾ ਵਾ ਸਮ੍ਪਟਿਚ੍ਛਿਤੁਂ ਨ ਸਕ੍ਕੋਨ੍ਤਿ, ਮਹਾਸਮੁਦ੍ਦੋਵ ਤਂ ਸਮ੍ਪਟਿਚ੍ਛਤਿ. ਮਹਾਸਮੁਦ੍ਦੋ ਹਿ ਤਿਟ੍ਠਤੁ ਚਨ੍ਦਭਾਗਾ, ਏਵਰੂਪਾਨਂ ਨਦੀਨਂ ਸਤਮ੍ਪਿ ਸਹਸ੍ਸਮ੍ਪਿ ਸਤਸਹਸ੍ਸਮ੍ਪਿ ਸਮ੍ਪਟਿਚ੍ਛਤਿ, ਨ ਚਸ੍ਸ ਤੇਨ ਊਨਤ੍ਤਂ ਵਾ ਪੂਰਤ੍ਤਂ ਵਾ ਪਞ੍ਞਾਯਤਿ, ਏਵਮੇਵ ਸਤ੍ਥਾ ਮਾਦਿਸਸ੍ਸ ਸਮਣਸਤਸ੍ਸ ਸਮਣਸਹਸ੍ਸਸ੍ਸ ਸਮਣਸਤਸਹਸ੍ਸਸ੍ਸ ਵਾ ਪੀਤਿਸੋਮਨਸ੍ਸਂ ਪਵੇਦੇਨ੍ਤਸ੍ਸ ਸਬ੍ਬੇਸਂ ਮਨਂ ਗਣ੍ਹਨ੍ਤੋ ਪਟਿਗ੍ਗਹੇਤੁਂ ਸਕ੍ਕੋਤਿ. ਸੇਸਾ ਸਮਣਬ੍ਰਾਹ੍ਮਣਾਦਯੋ ਚਨ੍ਦਭਾਗਂ ਕੁਸੁਮ੍ਭਕਨ੍ਦਰਾ ਵਿਯ ਮਮ ਸੋਮਨਸ੍ਸਂ ਸਮ੍ਪਟਿਚ੍ਛਿਤੁਂ ਨ ਸਕ੍ਕੋਨ੍ਤਿ. ਹਨ੍ਦਾਹਂ ਮਮ ਪੀਤਿਸੋਮਨਸ੍ਸਂ ਸਤ੍ਥੁਨੋਵ ਆਰੋਚੇਮੀਤਿ ਪਲ੍ਲਙ੍ਕਂ ਵਿਨਿਬ੍ਭੁਜਿਤ੍ਵਾ ਚਮ੍ਮਕ੍ਖਣ੍ਡਂ ਪਪ੍ਫੋਟੇਤ੍ਵਾ ਆਦਾਯ ਸਾਯਨ੍ਹਸਮਯੇ ਪੁਪ੍ਫਾਨਂ ਵਣ੍ਟਤੋ ਛਿਜ੍ਜਿਤ੍ਵਾ ਪਗ੍ਘਰਣਕਾਲੇ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਅਤ੍ਤਨੋ ਸੋਮਨਸ੍ਸਂ ਪਵੇਦੇਨ੍ਤੋ ਏਵਂਪਸਨ੍ਨੋ ਅਹਂ, ਭਨ੍ਤੇਤਿਆਦਿਮਾਹ. ਤਤ੍ਥ ਏਵਂਪਸਨ੍ਨੋਤਿ ਏਵਂ ਉਪ੍ਪਨ੍ਨਸਦ੍ਧੋ, ਏਵਂ ਸਦ੍ਦਹਾਮੀਤਿ ਅਤ੍ਥੋ. ਭਿਯ੍ਯੋਭਿਞ੍ਞਤਰੋਤਿ ਭਿਯ੍ਯਤਰੋ ਅਭਿਞ੍ਞਾਤੋ, ਭਿਯ੍ਯਤਰਾਭਿਞ੍ਞੋ ਵਾ, ਉਤ੍ਤਰਿਤਰਞਾਣੋਤਿ ਅਤ੍ਥੋ. ਸਮ੍ਬੋਧਿਯਨ੍ਤਿ ਸਬ੍ਬਞ੍ਞੁਤਞ੍ਞਾਣੇ ਅਰਹਤ੍ਤਮਗ੍ਗਞਾਣੇ ਵਾ, ਅਰਹਤ੍ਤਮਗ੍ਗੇਨੇਵ ਹਿ ਬੁਦ੍ਧਗੁਣਾ ਨਿਪ੍ਪਦੇਸਾ ਗਹਿਤਾ ਹੋਨ੍ਤਿ. ਦ੍ਵੇ ਹਿ ਅਗ੍ਗਸਾਵਕਾ ਅਰਹਤ੍ਤਮਗ੍ਗੇਨੇਵ ਸਾਵਕਪਾਰਮੀਞਾਣਂ ਪਟਿਲਭਨ੍ਤਿ. ਪਚ੍ਚੇਕਬੁਦ੍ਧਾ ਪਚ੍ਚੇਕਬੋਧਿਞਾਣਂ. ਬੁਦ੍ਧਾ ਸਬ੍ਬਞ੍ਞੁਤਞ੍ਞਾਣਞ੍ਚੇਵ ਸਕਲੇ ਚ ਬੁਦ੍ਧਗੁਣੇ. ਸਬ੍ਬਞ੍ਹਿ ਨੇਸਂ ਅਰਹਤ੍ਤਮਗ੍ਗੇਨੇਵ ਇਜ੍ਝਤਿ. ਤਸ੍ਮਾ ਅਰਹਤ੍ਤਮਗ੍ਗਞਾਣਂ ਸਮ੍ਬੋਧਿ ਨਾਮ ਹੋਤਿ. ਤੇਨ ਉਤ੍ਤਰਿਤਰੋ ਭਗਵਤਾ ਨਤ੍ਥਿ. ਤੇਨਾਹ ‘‘ਭਗਵਤਾ ਭਿਯ੍ਯੋਭਿਞ੍ਞਤਰੋ ਯਦਿਦਂ ਸਮ੍ਬੋਧਿਯ’’ਨ੍ਤਿ.

੧੪੨. ਉਲ਼ਾਰਾਤਿ ਸੇਟ੍ਠਾ. ਅਯਞ੍ਹਿ ਉਲ਼ਾਰਸਦ੍ਦੋ ‘‘ਉਲ਼ਾਰਾਨਿ ਖਾਦਨੀਯਾਨਿ ਖਾਦਨ੍ਤੀ’’ਤਿਆਦੀਸੁ (ਮ. ਨਿ. ੧.੩੬੬) ਮਧੁਰੇ ਆਗਚ੍ਛਤਿ. ‘‘ਉਲ਼ਾਰਾਯ ਖਲੁ ਭਵਂ, ਵਚ੍ਛਾਯਨੋ, ਸਮਣਂ ਗੋਤਮਂ ਪਸਂਸਾਯ ਪਸਂਸਤੀ’’ਤਿਆਦੀਸੁ (ਮ. ਨਿ. ੩.੨੮੦) ਸੇਟ੍ਠੇ. ‘‘ਅਪ੍ਪਮਾਣੋ ਉਲ਼ਾਰੋ ਓਭਾਸੋ’’ਤਿਆਦੀਸੁ (ਦੀ. ਨਿ. ੨.੩੨) ਵਿਪੁਲੇ. ਸ੍ਵਾਯਮਿਧ ਸੇਟ੍ਠੇ ਆਗਤੋ. ਤੇਨ ਵੁਤ੍ਤਂ – ‘‘ਉਲ਼ਾਰਾਤਿ ਸੇਟ੍ਠਾ’’ਤਿ. ਆਸਭੀਤਿ ਉਸਭਸ੍ਸ ਵਾਚਾਸਦਿਸੀ ਅਚਲਾ ਅਸਮ੍ਪਵੇਧੀ. ਏਕਂਸੋ ਗਹਿਤੋਤਿ ਅਨੁਸ੍ਸਵੇਨ ਵਾ ਆਚਰਿਯਪਰਮ੍ਪਰਾਯ ਵਾ ਇਤਿਕਿਰਾਯ ਵਾ ਪਿਟਕਸਮ੍ਪਦਾਨੇਨ ਵਾ ਆਕਾਰਪਰਿਵਿਤਕ੍ਕੇਨ ਵਾ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿਯਾ ਵਾ ਤਕ੍ਕਹੇਤੁ ਵਾ ਨਯਹੇਤੁ ਵਾ ਅਕਥੇਤ੍ਵਾ ਪਚ੍ਚਕ੍ਖਤੋ ਞਾਣੇਨ ਪਟਿਵਿਜ੍ਝਿਤ੍ਵਾ ਵਿਯ ਏਕਂਸੋ ਗਹਿਤੋ, ਸਨ੍ਨਿਟ੍ਠਾਨਕਥਾਵ ਕਥਿਤਾਤਿ ਅਤ੍ਥੋ.

ਸੀਹਨਾਦੋਤਿ ਸੇਟ੍ਠਨਾਦੋ, ਨੇਵ ਦਨ੍ਧਾਯਨ੍ਤੇਨ ਨ ਗਗ੍ਗਰਾਯਨ੍ਤੇਨ ਸੀਹੇਨ ਵਿਯ ਉਤ੍ਤਮਨਾਦੋ ਨਦਿਤੋਤਿ ਅਤ੍ਥੋ. ਕਿਂ ਤੇ ਸਾਰਿਪੁਤ੍ਤਾਤਿ ਇਮਂ ਦੇਸਨਂ ਕਸ੍ਮਾ ਆਰਭੀਤਿ? ਅਨੁਯੋਗਦਾਪਨਤ੍ਥਂ. ਏਕਚ੍ਚੋ ਹਿ ਸੀਹਨਾਦਂ ਨਦਿਤ੍ਵਾ ਅਤ੍ਤਨੋ ਸੀਹਨਾਦੇ ਅਨੁਯੋਗਂ ਦਾਤੁਂ ਨ ਸਕ੍ਕੋਤਿ, ਨਿਘਂਸਨਂ ਨਕ੍ਖਮਤਿ, ਲੇਪੇ ਪਤਿਤਮਕ੍ਕਟੋ ਵਿਯ ਹੋਤਿ. ਯਥਾ ਧਮਮਾਨਂ ਅਪਰਿਸੁਦ੍ਧਲੋਹਂ ਝਾਯਿਤ੍ਵਾ ਝਾਮਅਙ੍ਗਾਰੋ ਹੋਤਿ, ਏਵਂ ਝਾਮਙ੍ਗਾਰੋ ਵਿਯ ਹੋਤਿ. ਏਕੋ ਸੀਹਨਾਦੇ ਅਨੁਯੋਗਂ ਦਾਪਿਯਮਾਨੋ ਦਾਤੁਂ ਸਕ੍ਕੋਤਿ, ਨਿਘਂਸਨਂ ਖਮਤਿ, ਧਮਮਾਨਂ ਨਿਦ੍ਦੋਸਜਾਤਰੂਪਂ ਵਿਯ ਅਧਿਕਤਰਂ ਸੋਭਤਿ, ਤਾਦਿਸੋ ਥੇਰੋ. ਤੇਨ ਨਂ ਭਗਵਾ ‘‘ਅਨੁਯੋਗਕ੍ਖਮੋ ਅਯ’’ਨ੍ਤਿ ਞਤ੍ਵਾ ਸੀਹਨਾਦੇ ਅਨੁਯੋਗਦਾਪਨਤ੍ਥਂ ਇਮਮ੍ਪਿ ਦੇਸਨਂ ਆਰਭਿ.

ਤਤ੍ਥ ਸਬ੍ਬੇ ਤੇਤਿ ਸਬ੍ਬੇ ਤੇ ਤਯਾ. ਏਵਂਸੀਲਾਤਿਆਦੀਸੁ ਲੋਕਿਯਲੋਕੁਤ੍ਤਰਵਸੇਨ ਸੀਲਾਦੀਨਿ ਪੁਚ੍ਛਤਿ. ਤੇਸਂ ਵਿਤ੍ਥਾਰਕਥਾ ਮਹਾਪਦਾਨੇ ਕਥਿਤਾਵ.

ਕਿਂ ਪਨ ਤੇ, ਸਾਰਿਪੁਤ੍ਤ, ਯੇ ਤੇ ਭਵਿਸ੍ਸਨ੍ਤੀਤਿ ਅਤੀਤਾ ਚ ਤਾਵ ਨਿਰੁਦ੍ਧਾ, ਅਪਣ੍ਣਤ੍ਤਿਕਭਾਵਂ ਗਤਾ ਦੀਪਸਿਖਾ ਵਿਯ ਨਿਬ੍ਬੁਤਾ, ਏਵਂ ਨਿਰੁਦ੍ਧੇ ਅਪਣ੍ਣਤ੍ਤਿਕਭਾਵਂ ਗਤੇ ਤ੍ਵਂ ਕਥਂ ਜਾਨਿਸ੍ਸਸਿ, ਅਨਾਗਤਬੁਦ੍ਧਾਨਂ ਪਨ ਗੁਣਾ ਕਿਨ੍ਤਿ ਤਯਾ ਅਤ੍ਤਨੋ ਚਿਤ੍ਤੇਨ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾਤਿ ਪੁਚ੍ਛਨ੍ਤੋ ਏਵਮਾਹ. ਕਿਂ ਪਨ ਤੇ, ਸਾਰਿਪੁਤ੍ਤ, ਅਹਂ ਏਤਰਹੀਤਿ ਅਨਾਗਤਾਪਿ ਬੁਦ੍ਧਾ ਅਜਾਤਾ ਅਨਿਬ੍ਬਤ੍ਤਾ ਅਨੁਪ੍ਪਨ੍ਨਾ, ਤੇਪਿ ਕਥਂ ਤ੍ਵਂ ਜਾਨਿਸ੍ਸਸਿ? ਤੇਸਞ੍ਹਿ ਜਾਨਨਂ ਅਪਦੇ ਆਕਾਸੇ ਪਦਦਸ੍ਸਨਂ ਵਿਯ ਹੋਤਿ. ਇਦਾਨਿ ਮਯਾ ਸਦ੍ਧਿਂ ਏਕਵਿਹਾਰੇ ਵਸਸਿ, ਏਕਤੋ ਭਿਕ੍ਖਾਯ ਚਰਸਿ, ਧਮ੍ਮਦੇਸਨਾਕਾਲੇ ਦਕ੍ਖਿਣਪਸ੍ਸੇ ਨਿਸੀਦਸਿ, ਕਿਂ ਪਨ ਮਯ੍ਹਂ ਗੁਣਾ ਅਤ੍ਤਨੋ ਚੇਤਸਾ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਾ ਤਯਾਤਿ ਅਨੁਯੁਞ੍ਜਨ੍ਤੋ ਏਵਮਾਹ.

ਥੇਰੋ ਪਨ ਪੁਚ੍ਛਿਤੇ ਪੁਚ੍ਛਿਤੇ ‘‘ਨੋ ਹੇਤਂ, ਭਨ੍ਤੇ’’ਤਿ ਪਟਿਕ੍ਖਿਪਤਿ. ਥੇਰਸ੍ਸ ਚ ਵਿਦਿਤਮ੍ਪਿ ਅਤ੍ਥਿ ਅਵਿਦਿਤਮ੍ਪਿ ਅਤ੍ਥਿ, ਕਿਂ ਸੋ ਅਤ੍ਤਨੋ ਵਿਦਿਤਟ੍ਠਾਨੇ ਪਟਿਕ੍ਖੇਪਂ ਕਰੋਤਿ, ਅਵਿਦਿਤਟ੍ਠਾਨੇਤਿ? ਵਿਦਿਤਟ੍ਠਾਨੇ ਨ ਕਰੋਤਿ, ਅਵਿਦਿਤਟ੍ਠਾਨੇਯੇਵ ਕਰੋਤੀਤਿ. ਥੇਰੋ ਕਿਰ ਅਨੁਯੋਗੇ ਆਰਦ੍ਧੇਯੇਵ ਅਞ੍ਞਾਸਿ. ਨ ਅਯਂ ਅਨੁਯੋਗੋ ਸਾਵਕਪਾਰਮੀਞਾਣੇ, ਸਬ੍ਬਞ੍ਞੁਤਞ੍ਞਾਣੇ ਅਯਂ ਅਨੁਯੋਗੋਤਿ ਅਤ੍ਤਨੋ ਸਾਵਕਪਾਰਮੀਞਾਣੇ ਪਟਿਕ੍ਖੇਪਂ ਅਕਤ੍ਵਾ ਅਵਿਦਿਤਟ੍ਠਾਨੇ ਸਬ੍ਬਞ੍ਞੁਤਞ੍ਞਾਣੇ ਪਟਿਕ੍ਖੇਪਂ ਕਰੋਤਿ. ਤੇਨ ਇਦਮ੍ਪਿ ਦੀਪੇਤਿ ‘‘ਭਗਵਾ ਮਯ੍ਹਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਨਂ ਬੁਦ੍ਧਾਨਂ ਸੀਲਸਮਾਧਿਪਞ੍ਞਾਵਿਮੁਤ੍ਤਿਕਾਰਣਜਾਨਨਸਮਤ੍ਥਂ ਸਬ੍ਬਞ੍ਞੁਤਞ੍ਞਾਣਂ ਨਤ੍ਥੀ’’ਤਿ.

ਏਤ੍ਥਾਤਿ ਏਤੇਸੁ ਅਤੀਤਾਦਿਭੇਦੇਸੁ ਬੁਦ੍ਧੇਸੁ. ਅਥ ਕਿਞ੍ਚਰਹੀਤਿ ਅਥ ਕਸ੍ਮਾ ਏਵਂ ਞਾਣੇ ਅਸਤਿ ਤਯਾ ਏਵਂ ਕਥਿਤਨ੍ਤਿ ਵਦਤਿ.

੧੪੩. ਧਮ੍ਮਨ੍ਵਯੋਤਿ ਧਮ੍ਮਸ੍ਸ ਪਚ੍ਚਕ੍ਖਤੋ ਞਾਣਸ੍ਸ ਅਨੁਯੋਗਂ ਅਨੁਗਨ੍ਤ੍ਵਾ ਉਪ੍ਪਨ੍ਨਂ ਅਨੁਮਾਨਞਾਣਂ ਨਯਗ੍ਗਾਹੋ ਵਿਦਿਤੋ. ਸਾਵਕਪਾਰਮੀਞਾਣੇ ਠਤ੍ਵਾਵ ਇਮਿਨਾਵ ਆਕਾਰੇਨ ਜਾਨਾਮਿ ਭਗਵਾਤਿ ਵਦਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਅਪ੍ਪਮਾਣੋ ਅਪਰਿਯਨ੍ਤੋ. ਯਥਾ ਸਬ੍ਬਞ੍ਞੁਤਞ੍ਞਾਣਸ੍ਸ ਪਮਾਣਂ ਵਾ ਪਰਿਯਨ੍ਤੋ ਵਾ ਨਤ੍ਥਿ, ਏਵਂ ਧਮ੍ਮਸੇਨਾਪਤਿਨੋ ਨਯਗ੍ਗਾਹਸ੍ਸ. ਤੇਨ ਸੋ ‘‘ਇਮਿਨਾ ਏਵਂਵਿਧੋ, ਇਮਿਨਾ ਅਨੁਤ੍ਤਰੋ ਸਤ੍ਥਾ’’ਤਿ ਜਾਨਾਤਿ. ਥੇਰਸ੍ਸ ਹਿ ਨਯਗ੍ਗਾਹੋ ਸਬ੍ਬਞ੍ਞੁਤਞ੍ਞਾਣਗਤਿਕੋ ਏਵ. ਇਦਾਨਿ ਤਂ ਨਯਗ੍ਗਾਹਂ ਪਾਕਟਂ ਕਾਤੁਂ ਉਪਮਾਯ ਦਸ੍ਸੇਨ੍ਤੋ ਸੇਯ੍ਯਥਾਪਿ, ਭਨ੍ਤੇਤਿਆਦਿਮਾਹ. ਤਤ੍ਥ ਯਸ੍ਮਾ ਮਜ੍ਝਿਮਪਦੇਸੇ ਨਗਰਸ੍ਸ ਉਦ੍ਧਾਪਪਾਕਾਰਾਦੀਨਿ ਥਿਰਾਨਿ ਵਾ ਹੋਨ੍ਤੁ, ਦੁਬ੍ਬਲਾਨਿ ਵਾ, ਸਬ੍ਬਸੋ ਵਾ ਪਨ ਮਾ ਹੋਨ੍ਤੁ, ਚੋਰਾਸਙ੍ਕਾ ਨ ਹੋਤਿ, ਤਸ੍ਮਾ ਤਂ ਅਗ੍ਗਹੇਤ੍ਵਾ ਪਚ੍ਚਨ੍ਤਿਮਨਗਰਨ੍ਤਿ ਆਹ. ਦਲ਼੍ਹੁਦ੍ਧਾਪਨ੍ਤਿ ਥਿਰਪਾਕਾਰਪਾਦਂ. ਦਲ਼੍ਹਪਾਕਾਰਤੋਰਣਨ੍ਤਿ ਥਿਰਪਾਕਾਰਞ੍ਚੇਵ ਥਿਰਪਿਟ੍ਠਸਙ੍ਘਾਟਞ੍ਚ. ਏਕਦ੍ਵਾਰਨ੍ਤਿ ਕਸ੍ਮਾ ਆਹ? ਬਹੁਦ੍ਵਾਰੇ ਹਿ ਨਗਰੇ ਬਹੂਹਿ ਪਣ੍ਡਿਤਦੋਵਾਰਿਕੇਹਿ ਭਵਿਤਬ੍ਬਂ. ਏਕਦ੍ਵਾਰੇ ਏਕੋਵ ਵਟ੍ਟਤਿ. ਥੇਰਸ੍ਸ ਚ ਪਞ੍ਞਾਯ ਸਦਿਸੋ ਅਞ੍ਞੋ ਨਤ੍ਥਿ. ਤਸ੍ਮਾ ਅਤ੍ਤਨੋ ਪਣ੍ਡਿਤਭਾਵਸ੍ਸ ਓਪਮ੍ਮਤ੍ਥਂ ਏਕਂਯੇਵ ਦੋਵਾਰਿਕਂ ਦਸ੍ਸੇਤੁਂ ਏਕਦ੍ਵਾਰ’’ਨ੍ਤਿ ਆਹ. ਪਣ੍ਡਿਤੋਤਿ ਪਣ੍ਡਿਚ੍ਚੇਨ ਸਮਨ੍ਨਾਗਤੋ. ਬ੍ਯਤ੍ਤੋਤਿ ਵੇਯ੍ਯਤ੍ਤਿਯੇਨ ਸਮਨ੍ਨਾਗਤੋ ਵਿਸਦਞਾਣੋ. ਮੇਧਾਵੀਤਿ ਠਾਨੁਪ੍ਪਤ੍ਤਿਕਪਞ੍ਞਾਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤੋ. ਅਨੁਪਰਿਯਾਯਪਥਨ੍ਤਿ ਅਨੁਪਰਿਯਾਯਨਾਮਕਂ ਪਾਕਾਰਮਗ੍ਗਂ. ਪਾਕਾਰਸਨ੍ਧਿਨ੍ਤਿ ਦ੍ਵਿਨ੍ਨਂ ਇਟ੍ਠਕਾਨਂ ਅਪਗਤਟ੍ਠਾਨਂ. ਪਾਕਾਰਵਿਵਰਨ੍ਤਿ ਪਾਕਾਰਸ੍ਸ ਛਿਨ੍ਨਟ੍ਠਾਨਂ.

ਚੇਤਸੋ ਉਪਕ੍ਕਿਲੇਸੇਤਿ ਪਞ੍ਚ ਨੀਵਰਣਾਨਿ ਚਿਤ੍ਤਂ ਉਪਕ੍ਕਿਲੇਸੇਨ੍ਤਿ ਕਿਲਿਟ੍ਠਂ ਕਰੋਨ੍ਤਿ ਉਪਤਾਪੇਨ੍ਤਿ ਵਿਬਾਧੇਨ੍ਤਿ, ਤਸ੍ਮਾ ‘‘ਚੇਤਸੋ ਉਪਕ੍ਕਿਲੇਸਾ’’ਤਿ ਵੁਚ੍ਚਨ੍ਤਿ. ਪਞ੍ਞਾਯ ਦੁਬ੍ਬਲੀਕਰਣੇਤਿ ਨੀਵਰਣਾ ਉਪ੍ਪਜ੍ਜਮਾਨਾ ਅਨੁਪ੍ਪਨ੍ਨਾਯ ਪਞ੍ਞਾਯ ਉਪ੍ਪਜ੍ਜਿਤੁਂ ਨ ਦੇਨ੍ਤਿ, ਉਪ੍ਪਨ੍ਨਾਯ ਪਞ੍ਞਾਯ ਵਡ੍ਢਿਤੁਂ ਨ ਦੇਨ੍ਤਿ, ਤਸ੍ਮਾ ‘‘ਪਞ੍ਞਾਯ ਦੁਬ੍ਬਲੀਕਰਣਾ’’ਤਿ ਵੁਚ੍ਚਨ੍ਤਿ. ਸੁਪ੍ਪਤਿਟ੍ਠਿਤਚਿਤ੍ਤਾਤਿ ਚਤੂਸੁ ਸਤਿਪਟ੍ਠਾਨੇਸੁ ਸੁਟ੍ਠੁ ਠਪਿਤਚਿਤ੍ਤਾ ਹੁਤ੍ਵਾ. ਸਤ੍ਤ ਬੋਜ੍ਝਙ੍ਗੇ ਯਥਾਭੂਤਨ੍ਤਿ ਸਤ੍ਤ ਬੋਜ੍ਝਙ੍ਗੇ ਯਥਾਸਭਾਵੇਨ ਭਾਵੇਤ੍ਵਾ. ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਨ੍ਤਿ ਅਰਹਤ੍ਤਂ ਸਬ੍ਬਞ੍ਞੁਤਞ੍ਞਾਣਂ ਵਾ ਪਟਿਵਿਜ੍ਝਿਂਸੂਤਿ ਦਸ੍ਸੇਤਿ.

ਅਪਿਚੇਤ੍ਥ ਸਤਿਪਟ੍ਠਾਨਾਤਿ ਵਿਪਸ੍ਸਨਾ. ਸਮ੍ਬੋਜ੍ਝਙ੍ਗਾ ਮਗ੍ਗੋ. ਅਨੁਤ੍ਤਰਾਸਮ੍ਮਾਸਮ੍ਬੋਧਿ ਅਰਹਤ੍ਤਂ. ਸਤਿਪਟ੍ਠਾਨਾਤਿ ਵਾ ਮਗ੍ਗਾਤਿ ਵਾ ਬੋਜ੍ਝਙ੍ਗਮਿਸ੍ਸਕਾ. ਸਮ੍ਮਾਸਮ੍ਬੋਧਿ ਅਰਹਤ੍ਤਮੇਵ. ਦੀਘਭਾਣਕਮਹਾਸੀਵਤ੍ਥੇਰੋ ਪਨਾਹ ‘‘ਸਤਿਪਟ੍ਠਾਨੇ ਵਿਪਸ੍ਸਨਾਤਿ ਗਹੇਤ੍ਵਾ ਬੋਜ੍ਝਙ੍ਗੇ ਮਗ੍ਗੋ ਚ ਸਬ੍ਬਞ੍ਞੁਤਞ੍ਞਾਣਞ੍ਚਾਤਿ ਗਹਿਤੇ ਸੁਨ੍ਦਰੋ ਪਞ੍ਹੋ ਭਵੇਯ੍ਯ, ਨ ਪਨੇਵਂ ਗਹਿਤ’’ਨ੍ਤਿ. ਇਤਿ ਥੇਰੋ ਸਬ੍ਬਞ੍ਞੁਬੁਦ੍ਧਾਨਂ ਨੀਵਰਣਪ੍ਪਹਾਨੇ ਸਤਿਪਟ੍ਠਾਨਭਾਵਨਾਯ ਸਮ੍ਬੋਧਿਯਞ੍ਚ ਮਜ੍ਝੇ ਭਿਨ੍ਨਸੁਵਣ੍ਣਰਜਤਾਨਂ ਵਿਯ ਨਾਨਤ੍ਤਾਭਾਵਂ ਦਸ੍ਸੇਤਿ.

ਇਧ ਠਤ੍ਵਾ ਉਪਮਾ ਸਂਸਨ੍ਦੇਤਬ੍ਬਾ – ਆਯਸ੍ਮਾ ਹਿ ਸਾਰਿਪੁਤ੍ਤੋ ਪਚ੍ਚਨ੍ਤਨਗਰਂ ਦਸ੍ਸੇਸਿ, ਪਾਕਾਰਂ ਦਸ੍ਸੇਸਿ, ਪਰਿਯਾਯਪਥਂ ਦਸ੍ਸੇਸਿ, ਦ੍ਵਾਰਂ ਦਸ੍ਸੇਸਿ, ਪਣ੍ਡਿਤਦੋਵਾਰਿਕਂ ਦਸ੍ਸੇਸਿ, ਨਗਰਂ ਪਵੇਸਨਕਨਿਕ੍ਖਮਨਕੇ ਓਲ਼ਾਰਿਕੇ ਪਾਣੇ ਦਸ੍ਸੇਸਿ, ਪਣ੍ਡਿਤਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵਞ੍ਚ ਦਸ੍ਸੇਸਿ. ਤਤ੍ਥ ਕਿਂ ਕੇਨ ਸਦਿਸਨ੍ਤਿ ਚੇ. ਨਗਰਂ ਵਿਯ ਹਿ ਨਿਬ੍ਬਾਨਂ, ਪਾਕਾਰੋ ਵਿਯ ਸੀਲਂ, ਪਰਿਯਾਯਪਥੋ ਵਿਯ ਹਿਰੀ, ਦ੍ਵਾਰਂ ਵਿਯ ਅਰਿਯਮਗ੍ਗੋ, ਪਣ੍ਡਿਤਦੋਵਾਰਿਕੋ ਵਿਯ ਧਮ੍ਮਸੇਨਾਪਤਿ, ਨਗਰਪ੍ਪਵਿਸਨਕਨਿਕ੍ਖਮਨਕਓਲ਼ਾਰਿਕਪਾਣਾ ਵਿਯ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਬੁਦ੍ਧਾ, ਦੋਵਾਰਿਕਸ੍ਸ ਤੇਸਂ ਪਾਣਾਨਂ ਪਾਕਟਭਾਵੋ ਵਿਯ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਅਤੀਤਾਨਾਗਤਪਚ੍ਚੁਪ੍ਪਨ੍ਨਬੁਦ੍ਧਾਨਂ ਸੀਲਸਮਥਾਦੀਹਿ ਪਾਕਟਭਾਵੋ. ਏਤ੍ਤਾਵਤਾ ਥੇਰੇਨ ਭਗਵਾ ਏਵਮਹਂ ਸਾਵਕਪਾਰਮੀਞਾਣੇ ਠਤ੍ਵਾ ਧਮ੍ਮਨ੍ਵਯੇਨ ਨਯਗ੍ਗਾਹੇਨ ਜਾਨਾਮੀਤਿ ਅਤ੍ਤਨੋ ਸੀਹਨਾਦਸ੍ਸ ਅਨੁਯੋਗੋ ਦਿਨ੍ਨੋ ਹੋਤਿ.

੧੪੪. ਇਧਾਹਂ, ਭਨ੍ਤੇ, ਯੇਨ ਭਗਵਾਤਿ ਇਮਂ ਦੇਸਨਂ ਕਸ੍ਮਾ ਆਰਭਿ? ਸਾਵਕਪਾਰਮੀਞਾਣਸ੍ਸ ਨਿਪ੍ਫਤ੍ਤਿਦਸ੍ਸਨਤ੍ਥਂ. ਅਯਞ੍ਹੇਤ੍ਥ ਅਧਿਪ੍ਪਾਯੋ, ਭਗਵਾ ਅਹਂ ਸਾਵਕਪਾਰਮੀਞਾਣਂ ਪਟਿਲਭਨ੍ਤੋ ਪਞ੍ਚਨਵੁਤਿਪਾਸਣ੍ਡੇ ਨ ਅਞ੍ਞਂ ਏਕਮ੍ਪਿ ਸਮਣਂ ਵਾ ਬ੍ਰਾਹ੍ਮਣਂ ਵਾ ਉਪਸਙ੍ਕਮਿਤ੍ਵਾ ਸਾਵਕਪਾਰਮੀਞਾਣਮ੍ਪਿ ਪਟਿਲਭਿਂ, ਤੁਮ੍ਹੇਯੇਵ ਉਪਸਙ੍ਕਮਿਤ੍ਵਾ ਤੁਮ੍ਹੇ ਪਯਿਰੁਪਾਸਨ੍ਤੋ ਪਟਿਲਭਿਨ੍ਤਿ. ਤਤ੍ਥ ਇਧਾਤਿ ਨਿਪਾਤਮਤ੍ਤਂ. ਉਪਸਙ੍ਕਮਿਂ ਧਮ੍ਮਸਵਨਾਯਾਤਿ ਤੁਮ੍ਹੇ ਉਪਸਙ੍ਕਮਨ੍ਤੋ ਪਨਾਹਂ ਨ ਚੀਵਰਾਦਿਹੇਤੁ ਉਪਸਙ੍ਕਮਨ੍ਤੋ, ਧਮ੍ਮਸਵਨਤ੍ਥਾਯ ਉਪਸਙ੍ਕਮਨ੍ਤੋ. ਏਵਂ ਉਪਸਙ੍ਕਮਿਤ੍ਵਾ ਸਾਵਕਪਾਰਮੀਞਾਣਂ ਪਟਿਲਭਿਂ. ਕਦਾ ਪਨ ਥੇਰੋ ਧਮ੍ਮਸਵਨਤ੍ਥਾਯ ਉਪਸਙ੍ਕਮਨ੍ਤੋਤਿ. ਸੂਕਰਖਤਲੇਣੇ ਭਾਗਿਨੇਯ੍ਯਦੀਘਨਖਪਰਿਬ੍ਬਾਜਕਸ੍ਸ ਵੇਦਨਾਪਰਿਗ੍ਗਹਸੁਤ੍ਤਨ੍ਤਕਥਨਦਿਵਸੇ (ਮ. ਨਿ. ੨.੨੦੫) ਉਪਸਙ੍ਕਮਨ੍ਤੋ, ਤਦਾਯੇਵ ਸਾਵਕਪਾਰਮੀਞਾਣਂ ਪਟਿਲਭੀਤਿ. ਤਂਦਿਵਸਞ੍ਹਿ ਥੇਰੋ ਤਾਲਵਣ੍ਟਂ ਗਹੇਤ੍ਵਾ ਭਗਵਨ੍ਤਂ ਬੀਜਮਾਨੋ ਠਿਤੋ ਤਂ ਦੇਸਨਂ ਸੁਤ੍ਵਾ ਤਤ੍ਥੇਵ ਸਾਵਕਪਾਰਮੀਞਾਣਂ ਹਤ੍ਥਗਤਂ ਅਕਾਸਿ. ਉਤ੍ਤਰੁਤ੍ਤਰਂ ਪਣੀਤਪਣੀਤਨ੍ਤਿ ਉਤ੍ਤਰੁਤ੍ਤਰਞ੍ਚੇਵ ਪਣੀਤਪਣੀਤਞ੍ਚ ਕਤ੍ਵਾ ਦੇਸੇਸਿ. ਕਣ੍ਹਸੁਕ੍ਕਸਪ੍ਪਟਿਭਾਗਨ੍ਤਿ ਕਣ੍ਹਞ੍ਚੇਵ ਸੁਕ੍ਕਞ੍ਚ. ਤਞ੍ਚ ਖੋ ਸਪ੍ਪਟਿਭਾਗਂ ਸਵਿਪਕ੍ਖਂ ਕਤ੍ਵਾ. ਕਣ੍ਹਂ ਪਟਿਬਾਹਿਤ੍ਵਾ ਸੁਕ੍ਕਂ, ਸੁਕ੍ਕਂ ਪਟਿਬਾਹਿਤ੍ਵਾ ਕਣ੍ਹਨ੍ਤਿ ਏਵਂ ਸਪ੍ਪਟਿਭਾਗਂ ਕਤ੍ਵਾ ਕਣ੍ਹਸੁਕ੍ਕਂ ਦੇਸੇਸਿ, ਕਣ੍ਹਂ ਦੇਸੇਨ੍ਤੋਪਿ ਚ ਸਉਸ੍ਸਾਹਂ ਸਵਿਪਾਕਂ ਦੇਸੇਸਿ, ਸੁਕ੍ਕਂ ਦੇਸੇਨ੍ਤੋਪਿ ਸਉਸ੍ਸਾਹਂ ਸਵਿਪਾਕਂ ਦੇਸੇਸਿ.

ਤਸ੍ਮਿਂ ਧਮ੍ਮੇ ਅਭਿਞ੍ਞਾ ਇਧੇਕਚ੍ਚਂ ਧਮ੍ਮਂ ਧਮ੍ਮੇਸੁ ਨਿਟ੍ਠਮਗਮਨ੍ਤਿ ਤਸ੍ਮਿਂ ਦੇਸਿਤੇ ਧਮ੍ਮੇ ਏਕਚ੍ਚਂ ਧਮ੍ਮਂ ਨਾਮ ਸਾਵਕਪਾਰਮੀਞਾਣਂ ਸਞ੍ਜਾਨਿਤ੍ਵਾ ਧਮ੍ਮੇਸੁ ਨਿਟ੍ਠਮਗਮਂ. ਕਤਮੇਸੁ ਧਮ੍ਮੇਸੂਤਿ? ਚਤੁਸਚ੍ਚਧਮ੍ਮੇਸੁ. ਏਤ੍ਥਾਯਂ ਥੇਰਸਲ੍ਲਾਪੋ, ਕਾਲ਼ਵਲ੍ਲਵਾਸੀ ਸੁਮਤ੍ਥੇਰੋ ਤਾਵ ਵਦਤਿ ‘‘ਚਤੁਸਚ੍ਚਧਮ੍ਮੇਸੁ ਇਦਾਨਿ ਨਿਟ੍ਠਗਮਨਕਾਰਣਂ ਨਤ੍ਥਿ. ਅਸ੍ਸਜਿਮਹਾਸਾਵਕਸ੍ਸ ਹਿ ਦਿਟ੍ਠਦਿਵਸੇਯੇਵ ਸੋ ਪਠਮਮਗ੍ਗੇਨ ਚਤੁਸਚ੍ਚਧਮ੍ਮੇਸੁ ਨਿਟ੍ਠਂ ਗਤੋ, ਅਪਰਭਾਗੇ ਸੂਕਰਖਤਲੇਣਦ੍ਵਾਰੇ ਉਪਰਿ ਤੀਹਿ ਮਗ੍ਗੇਹਿ ਚਤੁਸਚ੍ਚਧਮ੍ਮੇਸੁ ਨਿਟ੍ਠਂ ਗਤੋ, ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਬੁਦ੍ਧਗੁਣੇਸੁ ਨਿਟ੍ਠਂ ਗਤੋ’’ਤਿ. ਲੋਕਨ੍ਤਰਵਾਸੀ ਚੂਲ਼ਸੀਵਤ੍ਥੇਰੋ ਪਨ ‘‘ਸਬ੍ਬਂ ਤਥੇਵ ਵਤ੍ਵਾ ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਅਰਹਤ੍ਤੇ ਨਿਟ੍ਠਂ ਗਤੋ’’ਤਿ ਆਹ. ਦੀਘਭਾਣਕਤਿਪਿਟਕਮਹਾਸੀਵਤ੍ਥੇਰੋ ਪਨ ‘‘ਤਥੇਵ ਪੁਰਿਮਵਾਦਂ ਵਤ੍ਵਾ ਇਮਸ੍ਮਿਂ ਪਨ ਠਾਨੇ ‘ਧਮ੍ਮੇਸੂ’ਤਿ ਸਾਵਕਪਾਰਮੀਞਾਣੇ ਨਿਟ੍ਠਂ ਗਤੋ’’ਤਿ ਵਤ੍ਵਾ ‘‘ਬੁਦ੍ਧਗੁਣਾ ਪਨ ਨਯਤੋ ਆਗਤਾ’’ਤਿ ਆਹ.

ਸਤ੍ਥਰਿ ਪਸੀਦਿਨ੍ਤਿ ਏਵਂ ਸਾਵਕਪਾਰਮੀਞਾਣਧਮ੍ਮੇਸੁ ਨਿਟ੍ਠਂ ਗਨ੍ਤ੍ਵਾ ਭਿਯ੍ਯੋਸੋਮਤ੍ਤਾਯ ‘‘ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ’’ਤਿ ਸਤ੍ਥਰਿ ਪਸੀਦਿਂ. ਸ੍ਵਾਕ੍ਖਾਤੋ ਭਗਵਤਾ ਧਮ੍ਮੋਤਿ ਸੁਟ੍ਠੁ ਅਕ੍ਖਾਤੋ ਸੁਕਥਿਤੋ ਨਿਯ੍ਯਾਨਿਕੋ ਮਗ੍ਗੋ ਫਲਤ੍ਥਾਯ ਨਿਯ੍ਯਾਤਿ ਰਾਗਦੋਸਮੋਹਨਿਮ੍ਮਦਨਸਮਤ੍ਥੋ.

ਸੁਪ੍ਪਟਿਪਨ੍ਨੋ ਸਙ੍ਘੋਤਿ ਬੁਦ੍ਧਸ੍ਸ ਭਗਵਤੋ ਸਾਵਕਸਙ੍ਘੋਪਿ ਵਙ੍ਕਾਦਿਦੋਸਵਿਰਹਿਤਂ ਸਮ੍ਮਾਪਟਿਪਦਂ ਪਟਿਪਨ੍ਨਤ੍ਤਾ ਸੁਪ੍ਪਟਿਪਨ੍ਨੋਤਿ ਪਸਨ੍ਨੋਮ੍ਹਿ ਭਗਵਤੀਤਿ ਦਸ੍ਸੇਤਿ.

ਕੁਸਲਧਮ੍ਮਦੇਸਨਾਵਣ੍ਣਨਾ

੧੪੫. ਇਦਾਨਿ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ਸਮਾਪਜ੍ਜਿਤੇ ਸੋਲ਼ਸ ਅਪਰਾਪਰਿਯਧਮ੍ਮੇ ਦਸ੍ਸੇਤੁਂ ਅਪਰਂ ਪਨ ਭਨ੍ਤੇ ਏਤਦਾਨੁਤ੍ਤਰਿਯਨ੍ਤਿ ਦੇਸਨਂ ਆਰਭਿ. ਤਤ੍ਥ ਅਨੁਤ੍ਤਰਿਯਨ੍ਤਿ ਅਨੁਤ੍ਤਰਭਾਵੋ. ਯਥਾ ਭਗਵਾ ਧਮ੍ਮਂ ਦੇਸੇਤੀਤਿ ਯਥਾ ਯੇਨਾਕਾਰੇਨ ਯਾਯ ਦੇਸਨਾਯ ਭਗਵਾ ਧਮ੍ਮਂ ਦੇਸੇਤਿ, ਸਾ ਤੁਮ੍ਹਾਕਂ ਦੇਸਨਾ ਅਨੁਤ੍ਤਰਾਤਿ ਵਦਤਿ. ਕੁਸਲੇਸੁ ਧਮ੍ਮੇਸੂਤਿ ਤਾਯ ਦੇਸਨਾਯ ਦੇਸਿਤੇਸੁ ਕੁਸਲੇਸੁ ਧਮ੍ਮੇਸੁਪਿ ਭਗਵਾਵ ਅਨੁਤ੍ਤਰੋਤਿ ਦੀਪੇਤਿ. ਯਾ ਵਾ ਸਾ ਦੇਸਨਾ, ਤਸ੍ਸਾ ਭੂਮਿਂ ਦਸ੍ਸੇਨ੍ਤੋਪਿ ‘‘ਕੁਸਲੇਸੁ ਧਮ੍ਮੇਸੂ’’ਤਿ ਆਹ. ਤਤ੍ਰਿਮੇ ਕੁਸਲਾ ਧਮ੍ਮਾਤਿ ਤਤ੍ਰ ਕੁਸਲੇਸੁ ਧਮ੍ਮੇਸੂਤਿ ਵੁਤ੍ਤਪਦੇ ਇਮੇ ਕੁਸਲਾ ਧਮ੍ਮਾ ਨਾਮਾਤਿ ਵੇਦਿਤਬ੍ਬਾ. ਤਤ੍ਥ ਆਰੋਗ੍ਯਟ੍ਠੇਨ, ਅਨਵਜ੍ਜਟ੍ਠੇਨ, ਕੋਸਲ੍ਲਸਮ੍ਭੂਤਟ੍ਠੇਨ, ਨਿਦ੍ਦਰਥਟ੍ਠੇਨ, ਸੁਖਵਿਪਾਕਟ੍ਠੇਨਾਤਿ ਪਞ੍ਚਧਾ ਕੁਸਲਂ ਵੇਦਿਤਬ੍ਬਂ. ਤੇਸੁ ਜਾਤਕਪਰਿਯਾਯਂ ਪਤ੍ਵਾ ਆਰੋਗ੍ਯਟ੍ਠੇਨ ਕੁਸਲਂ ਵਟ੍ਟਤਿ. ਸੁਤ੍ਤਨ੍ਤਪਰਿਯਾਯਂ ਪਤ੍ਵਾ ਅਨਵਜ੍ਜਟ੍ਠੇਨ. ਅਭਿਧਮ੍ਮਪਰਿਯਾਯਂ ਪਤ੍ਵਾ ਕੋਸਲ੍ਲਸਮ੍ਭੂਤਨਿਦ੍ਦਰਥਸੁਖਵਿਪਾਕਟ੍ਠੇਨ. ਇਮਸ੍ਮਿਂ ਪਨ ਠਾਨੇ ਬਾਹਿਤਿਕਸੁਤ੍ਤਨ੍ਤਪਰਿਯਾਯੇਨ (ਮ. ਨਿ. ੨.੩੫੮) ਅਨਵਜ੍ਜਟ੍ਠੇਨ ਕੁਸਲਂ ਦਟ੍ਠਬ੍ਬਂ.

ਚਤ੍ਤਾਰੋ ਸਤਿਪਟ੍ਠਾਨਾਤਿ ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਾਸਤਿਪਟ੍ਠਾਨਂ, ਨਵਵਿਧੇਨ ਵੇਦਨਾਨੁਪਸ੍ਸਨਾਸਤਿਪਟ੍ਠਾਨਂ, ਸੋਲ਼ਸਵਿਧੇਨ ਚਿਤ੍ਤਾਨੁਪਸ੍ਸਨਾਸਤਿਪਟ੍ਠਾਨਂ, ਪਞ੍ਚਵਿਧੇਨ ਧਮ੍ਮਾਨੁਪਸ੍ਸਨਾਸਤਿਪਟ੍ਠਾਨਨ੍ਤਿ ਏਵਂ ਨਾਨਾਨਯੇਹਿ ਵਿਭਜਿਤ੍ਵਾ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾ ਚਤ੍ਤਾਰੋ ਸਤਿਪਟ੍ਠਾਨਾ ਦੇਸਿਤਾ. ਫਲਸਤਿਪਟ੍ਠਾਨਂ ਪਨ ਇਧ ਅਨਧਿਪ੍ਪੇਤਂ. ਚਤ੍ਤਾਰੋ ਸਮ੍ਮਪ੍ਪਧਾਨਾਤਿ ਪਗ੍ਗਹਟ੍ਠੇਨ ਏਕਲਕ੍ਖਣਾ, ਕਿਚ੍ਚਵਸੇਨ ਨਾਨਾਕਿਚ੍ਚਾ. ‘‘ਇਧ ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯਾ’’ਤਿਆਦਿਨਾ ਨਯੇਨ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਚਤ੍ਤਾਰੋ ਸਮ੍ਮਪ੍ਪਧਾਨਾ ਦੇਸਿਤਾ. ਚਤ੍ਤਾਰੋ ਇਦ੍ਧਿਪਾਦਾਤਿ ਇਜ੍ਝਨਟ੍ਠੇਨ ਏਕਸਙ੍ਗਹਾ, ਛਨ੍ਦਾਦਿਵਸੇਨ ਨਾਨਾਸਭਾਵਾ. ‘‘ਇਧ ਭਿਕ੍ਖੁ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤੀ’’ਤਿਆਦਿਨਾ ਨਯੇਨ ਸਮਥਵਿਪਸ੍ਸਨਾਮਗ੍ਗਵਸੇਨ ਲੋਕਿਯਲੋਕੁਤ੍ਤਰਮਿਸ੍ਸਕਾਵ ਚਤ੍ਤਾਰੋ ਇਦ੍ਧਿਪਾਦਾ ਦੇਸਿਤਾ.

ਪਞ੍ਚਿਨ੍ਦ੍ਰਿਯਾਨੀਤਿ ਆਧਿਪਤੇਯ੍ਯਟ੍ਠੇਨ ਏਕਲਕ੍ਖਣਾਨਿ, ਅਧਿਮੋਕ੍ਖਾਦਿਸਭਾਵਵਸੇਨ ਨਾਨਾਸਭਾਵਾਨਿ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਚ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਸਦ੍ਧਾਦੀਨਿ ਪਞ੍ਚਿਨ੍ਦ੍ਰਿਯਾਨਿ ਦੇਸਿਤਾਨਿ. ਪਞ੍ਚ ਬਲਾਨੀਤਿ ਉਪਤ੍ਥਮ੍ਭਨਟ੍ਠੇਨ ਅਕਮ੍ਪਿਯਟ੍ਠੇਨ ਵਾ ਏਕਸਙ੍ਗਹਾਨਿ, ਸਲਕ੍ਖਣੇਨ ਨਾਨਾਸਭਾਵਾਨਿ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕਾਨਿ ਸਦ੍ਧਾਦੀਨਿ ਪਞ੍ਚ ਬਲਾਨਿ ਦੇਸਿਤਾਨਿ. ਸਤ੍ਤ ਬੋਜ੍ਝਙ੍ਗਾਤਿ ਨਿਯ੍ਯਾਨਟ੍ਠੇਨ ਏਕਸਙ੍ਗਹਾ, ਉਪਟ੍ਠਾਨਾਦਿਨਾ ਸਲਕ੍ਖਣੇਨ ਨਾਨਾਸਭਾਵਾ. ਸਮਥਵਿਪਸ੍ਸਨਾ ਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕਾ ਸਤ੍ਤ ਬੋਜ੍ਝਙ੍ਗਾ ਦੇਸਿਤਾ.

ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋਤਿ ਹੇਤੁਟ੍ਠੇਨ ਏਕਸਙ੍ਗਹੋ, ਦਸ੍ਸਨਾਦਿਨਾ ਸਲਕ੍ਖਣੇਨ ਨਾਨਾਸਭਾਵੋ. ਸਮਥਵਿਪਸ੍ਸਨਾਮਗ੍ਗਵਸੇਨੇਵ ਲੋਕਿਯਲੋਕੁਤ੍ਤਰਮਿਸ੍ਸਕੋ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ ਦੇਸਿਤੋਤਿ ਅਤ੍ਥੋ.

ਇਧ, ਭਨ੍ਤੇ, ਭਿਕ੍ਖੁ ਆਸਵਾਨਂ ਖਯਾਤਿ ਇਦਂ ਕਿਮਤ੍ਥਂ ਆਰਦ੍ਧਂ? ਸਾਸਨਸ੍ਸ ਪਰਿਯੋਸਾਨਦਸ੍ਸਨਤ੍ਥਂ. ਸਾਸਨਸ੍ਸ ਹਿ ਨ ਕੇਵਲਂ ਮਗ੍ਗੇਨੇਵ ਪਰਿਯੋਸਾਨਂ ਹੋਤਿ, ਅਰਹਤ੍ਤਫਲੇਨ ਪਨ ਹੋਤਿ. ਤਸ੍ਮਾ ਤਂ ਦਸ੍ਸੇਤੁਂ ਇਦਮਾਰਦ੍ਧਨ੍ਤਿ ਵੇਦਿਤਬ੍ਬਂ. ਏਤਦਾਨੁਤ੍ਤਰਿਯਂ, ਭਨ੍ਤੇ, ਕੁਸਲੇਸੁ ਧਮ੍ਮੇਸੂਤਿ ਭਨ੍ਤੇ ਯਾ ਅਯਂ ਕੁਸਲੇਸੁ ਧਮ੍ਮੇਸੁ ਏਵਂਦੇਸਨਾ, ਏਤਦਾਨੁਤ੍ਤਰਿਯਂ. ਤਂ ਭਗਵਾਤਿ ਤਂ ਦੇਸਨਂ ਭਗਵਾ ਅਸੇਸਂ ਸਕਲਂ ਅਭਿਜਾਨਾਤਿ. ਤਂ ਭਗਵਤੋਤਿ ਤਂ ਦੇਸਨਂ ਭਗਵਤੋ ਅਸੇਸਂ ਅਭਿਜਾਨਤੋ. ਉਤ੍ਤਰਿ ਅਭਿਞ੍ਞੇਯ੍ਯਂ ਨਤ੍ਥੀਤਿ ਤਦੁਤ੍ਤਰਿ ਅਭਿਜਾਨਿਤਬ੍ਬਂ ਨਤ੍ਥਿ, ਅਯਂ ਨਾਮ ਇਤੋ ਅਞ੍ਞੋ ਧਮ੍ਮੋ ਵਾ ਪੁਗ੍ਗਲੋ ਵਾ ਯਂ ਭਗਵਾ ਨ ਜਾਨਾਤੀਤਿ ਇਦਂ ਨਤ੍ਥਿ. ਯਦਭਿਜਾਨਂ ਅਞ੍ਞੋ ਸਮਣੋ ਵਾਤਿ ਯਂ ਤੁਮ੍ਹੇਹਿ ਅਨਭਿਞ੍ਞਾਤਂ, ਤਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਭਿਜਾਨਨ੍ਤੋ ਭਗਵਤਾ ਭਿਯ੍ਯੋਭਿਞ੍ਞਤਰੋ ਅਸ੍ਸ, ਅਧਿਕਤਰਪਞ੍ਞੋ ਭਵੇਯ੍ਯ. ਯਦਿਦਂ ਕੁਸਲੇਸੁ ਧਮ੍ਮੇਸੂਤਿ ਏਤ੍ਥ ਯਦਿਦਨ੍ਤਿ ਨਿਪਾਤਮਤ੍ਤਂ, ਕੁਸਲੇਸੁ ਧਮ੍ਮੇਸੁ ਭਗਵਤਾ ਉਤ੍ਤਰਿਤਰੋ ਨਤ੍ਥੀਤਿ ਅਯਮੇਤ੍ਥਤ੍ਥੋ. ਇਤਿ ਭਗਵਾਵ ਕੁਸਲੇਸੁ ਧਮ੍ਮੇਸੁ ਅਨੁਤ੍ਤਰੋਤਿ ਦਸ੍ਸੇਨ੍ਤੋ ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ ਦੀਪੇਤਿ. ਇਤੋ ਪਰੇਸੁ ਅਪਰਂ ਪਨਾਤਿਆਦੀਸੁ ਵਿਸੇਸਮਤ੍ਤਮੇਵ ਵਣ੍ਣਯਿਸ੍ਸਾਮ. ਪੁਰਿਮਵਾਰਸਦਿਸਂ ਪਨ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਆਯਤਨਪਣ੍ਣਤ੍ਤਿਦੇਸਨਾਵਣ੍ਣਨਾ

੧੪੬. ਆਯਤਨਪਣ੍ਣਤ੍ਤੀਸੂਤਿ ਆਯਤਨਪਞ੍ਞਾਪਨਾਸੁ. ਇਦਾਨਿ ਤਾ ਆਯਤਨਪਞ੍ਞਤ੍ਤਿਯੋ ਦਸ੍ਸੇਨ੍ਤੋ ਛਯਿਮਾਨਿ, ਭਨ੍ਤੇਤਿਆਦਿਮਾਹ. ਆਯਤਨਕਥਾ ਪਨੇਸਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰੇਨ ਕਥਿਤਾ, ਤੇਨ ਨ ਤਂ ਵਿਤ੍ਥਾਰਯਿਸ੍ਸਾਮ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਸਾ ਵਿਤ੍ਥਾਰਤੋ ਵੇਦਿਤਬ੍ਬਾ.

ਏਤਦਾਨੁਤ੍ਤਰਿਯਂ, ਭਨ੍ਤੇ, ਆਯਤਨਪਣ੍ਣਤ੍ਤੀਸੂਤਿ ਯਾਯਂ ਆਯਤਨਪਣ੍ਣਤ੍ਤੀਸੁ ਅਜ੍ਝਤ੍ਤਿਕਬਾਹਿਰਵਵਤ੍ਥਾਨਾਦਿਵਸੇਨ ਏਵਂ ਦੇਸਨਾ, ਏਤਦਾਨੁਤ੍ਤਰਿਯਂ. ਸੇਸਂ ਵੁਤ੍ਤਨਯਮੇਵ.

ਗਬ੍ਭਾਵਕ੍ਕਨ੍ਤਿਦੇਸਨਾਵਣ੍ਣਨਾ

੧੪੭. ਗਬ੍ਭਾਵਕ੍ਕਨ੍ਤੀਸੂਤਿ ਗਬ੍ਭੋਕ੍ਕਮਨੇਸੁ. ਤਾ ਗਬ੍ਭਾਵਕ੍ਕਨ੍ਤਿਯੋ ਦਸ੍ਸੇਨ੍ਤੋ ਚਤਸ੍ਸੋ ਇਮਾ, ਭਨ੍ਤੇਤਿਆਦਿਮਾਹ. ਤਤ੍ਥ ਅਸਮ੍ਪਜਾਨੋਤਿ ਅਜਾਨਨ੍ਤੋ ਸਮ੍ਮੂਲ਼੍ਹੋ ਹੁਤ੍ਵਾ. ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਪਟਿਸਨ੍ਧਿਵਸੇਨ ਪਵਿਸਤਿ. ਠਾਤੀਤਿ ਵਸਤਿ. ਨਿਕ੍ਖਮਤੀਤਿ ਨਿਕ੍ਖਮਨ੍ਤੋਪਿ ਅਸਮ੍ਪਜਾਨੋ ਸਮ੍ਮੂਲ਼੍ਹੋਵ ਨਿਕ੍ਖਮਤਿ. ਅਯਂ ਪਠਮਾਤਿ ਅਯਂ ਪਕਤਿਲੋਕਿਯਮਨੁਸ੍ਸਾਨਂ ਪਠਮਾ ਗਬ੍ਭਾਵਕ੍ਕਨ੍ਤਿ.

ਸਮ੍ਪਜਾਨੋ ਮਾਤੁਕੁਚ੍ਛਿਂ ਓਕ੍ਕਮਤੀਤਿ ਓਕ੍ਕਮਨ੍ਤੋ ਸਮ੍ਪਜਾਨੋ ਅਸਮ੍ਮੂਲ਼੍ਹੋ ਹੁਤ੍ਵਾ ਓਕ੍ਕਮਤਿ.

ਅਯਂ ਦੁਤਿਯਾਤਿ ਅਯਂ ਅਸੀਤਿਮਹਾਥੇਰਾਨਂ ਸਾਵਕਾਨਂ ਦੁਤਿਯਾ ਗਬ੍ਭਾਵਕ੍ਕਨ੍ਤਿ. ਤੇ ਹਿ ਪਵਿਸਨ੍ਤਾਵ ਜਾਨਨ੍ਤਿ, ਵਸਨ੍ਤਾ ਚ ਨਿਕ੍ਖਮਨ੍ਤਾ ਚ ਨ ਜਾਨਨ੍ਤਿ.

ਅਯਂ ਤਤਿਯਾਤਿ ਅਯਂ ਦ੍ਵਿਨ੍ਨਞ੍ਚ ਅਗ੍ਗਸਾਵਕਾਨਂ ਪਚ੍ਚੇਕਬੋਧਿਸਤ੍ਤਾਨਞ੍ਚ ਤਤਿਯਾ ਗਬ੍ਭਾਵਕ੍ਕਨ੍ਤਿ. ਤੇ ਕਿਰ ਕਮ੍ਮਜੇਹਿ ਵਾਤੇਹਿ ਅਧੋਸਿਰਾ ਉਦ੍ਧਂਪਾਦਾ ਅਨੇਕਸਤਪੋਰਿਸੇ ਪਪਾਤੇ ਵਿਯ ਯੋਨਿਮੁਖੇ ਖਿਤ੍ਤਾ ਤਾਲ਼ਚ੍ਛਿਗ੍ਗਲ਼ੇਨ ਹਤ੍ਥੀ ਵਿਯ ਸਮ੍ਬਾਧੇਨ ਯੋਨਿਮੁਖੇਨ ਨਿਕ੍ਖਮਮਾਨਾ ਅਨਨ੍ਤਂ ਦੁਕ੍ਖਂ ਪਾਪੁਣਨ੍ਤਿ. ਤੇਨ ਨੇਸਂ ‘‘ਮਯਂ ਨਿਕ੍ਖਮਮ੍ਹਾ’’ਤਿ ਸਮ੍ਪਜਾਨਤਾ ਨ ਹੋਤਿ. ਏਵਂ ਪੂਰਿਤਪਾਰਮੀਨਮ੍ਪਿ ਚ ਸਤ੍ਤਾਨਂ ਏਵਰੂਪੇ ਠਾਨੇ ਮਹਨ੍ਤਂ ਦੁਕ੍ਖਂ ਉਪ੍ਪਜ੍ਜਤੀਤਿ ਅਲਮੇਵ ਗਬ੍ਭਾਵਾਸੇ ਨਿਬ੍ਬਿਨ੍ਦਿਤੁਂ ਅਲਂ ਵਿਰਜ੍ਜਿਤੁਂ.

ਅਯਂ ਚਤੁਤ੍ਥਾਤਿ ਅਯਂ ਸਬ੍ਬਞ੍ਞੁਬੋਧਿਸਤ੍ਤਾਨਂ ਵਸੇਨ ਚਤੁਤ੍ਥਾ ਗਬ੍ਭਾਵਕ੍ਕਨ੍ਤਿ. ਸਬ੍ਬਞ੍ਞੁਬੋਧਿਸਤ੍ਤਾ ਹਿ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਂ ਗਣ੍ਹਨ੍ਤਾਪਿ ਜਾਨਨ੍ਤਿ, ਤਤ੍ਥ ਵਸਨ੍ਤਾਪਿ ਜਾਨਨ੍ਤਿ, ਨਿਕ੍ਖਮਨ੍ਤਾਪਿ ਜਾਨਨ੍ਤਿ, ਨਿਕ੍ਖਮਨਕਾਲੇਪਿ ਚ ਤੇ ਕਮ੍ਮਜਵਾਤਾ ਉਦ੍ਧਂਪਾਦੇ ਅਧੋਸਿਰੇ ਕਤ੍ਵਾ ਖਿਪਿਤੁਂ ਨ ਸਕ੍ਕੋਨ੍ਤਿ, ਦ੍ਵੇ ਹਤ੍ਥੇ ਪਸਾਰੇਤ੍ਵਾ ਅਕ੍ਖੀਨਿ ਉਮ੍ਮੀਲੇਤ੍ਵਾ ਠਿਤਕਾਵ ਨਿਕ੍ਖਮਨ੍ਤਿ. ਭਵਗ੍ਗਂ ਉਪਾਦਾਯ ਅਵੀਚਿਅਨ੍ਤਰੇ ਅਞ੍ਞੋ ਤੀਸੁ ਕਾਲੇਸੁ ਸਮ੍ਪਜਾਨੋ ਨਾਮ ਨਤ੍ਥਿ ਠਪੇਤ੍ਵਾ ਸਬ੍ਬਞ੍ਞੁਬੋਧਿਸਤ੍ਤੇ. ਤੇਨੇਵ ਨੇਸਂ ਮਾਤੁਕੁਚ੍ਛਿਂ ਓਕ੍ਕਮਨਕਾਲੇ ਚ ਨਿਕ੍ਖਮਨਕਾਲੇ ਚ ਦਸਸਹਸ੍ਸਿਲੋਕਧਾਤੁ ਕਮ੍ਪਤੀਤਿ. ਸੇਸਮੇਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਆਦੇਸਨਵਿਧਾਦੇਸਨਾਵਣ੍ਣਨਾ

੧੪੮. ਆਦੇਸਨਵਿਧਾਸੂਤਿ ਆਦੇਸਨਕੋਟ੍ਠਾਸੇਸੁ. ਇਦਾਨਿ ਤਾ ਆਦੇਸਨਵਿਧਾ ਦਸ੍ਸੇਨ੍ਤੋ ਚਤਸ੍ਸੋ ਇਮਾਤਿਆਦਿਮਾਹ. ਨਿਮਿਤ੍ਤੇਨ ਆਦਿਸਤੀਤਿ ਆਗਤਨਿਮਿਤ੍ਤੇਨ ਗਤਨਿਮਿਤ੍ਤੇਨ ਠਿਤਨਿਮਿਤ੍ਤੇਨ ਵਾ ਇਦਂ ਨਾਮ ਭਵਿਸ੍ਸਤੀਤਿ ਕਥੇਤਿ.

ਤਤ੍ਰਿਦਂ ਵਤ੍ਥੁ – ਏਕੋ ਰਾਜਾ ਤਿਸ੍ਸੋ ਮੁਤ੍ਤਾ ਗਹੇਤ੍ਵਾ ਪੁਰੋਹਿਤਂ ਪੁਚ੍ਛਿ ‘‘ਕਿਂ ਮੇ, ਆਚਰਿਯ, ਹਤ੍ਥੇ’’ਤਿ? ਸੋ ਇਤੋ ਚਿਤੋ ਚ ਓਲੋਕੇਸਿ. ਤੇਨ ਚ ਸਮਯੇਨ ਏਕਾ ਸਰਬੂ ‘‘ਮਕ੍ਖਿਕਂ ਗਹੇਸ੍ਸਾਮੀ’’ਤਿ ਪਕ੍ਖਨ੍ਦਿ, ਗਹਣਕਾਲੇ ਮਕ੍ਖਿਕਾ ਪਲਾਤਾ, ਸੋ ਮਕ੍ਖਿਕਾਯ ਮੁਤ੍ਤਤ੍ਤਾ ‘‘ਮੁਤ੍ਤਾ ਮਹਾਰਾਜਾ’’ਤਿ ਆਹ. ਮੁਤ੍ਤਾ ਤਾਵ ਹੋਤੁ, ਕਤਿ ਮੁਤ੍ਤਾਤਿ? ਸੋ ਪੁਨ ਨਿਮਿਤ੍ਤਂ ਓਲੋਕੇਸਿ. ਅਥ ਅਵਿਦੂਰੇ ਕੁਕ੍ਕੁਟੋ ਤਿਕ੍ਖਤ੍ਤੁਂ ਸਦ੍ਦਂ ਨਿਚ੍ਛਾਰੇਸਿ. ਬ੍ਰਾਹ੍ਮਣੋ ‘‘ਤਿਸ੍ਸੋ ਮਹਾਰਾਜਾ’’ਤਿ ਆਹ. ਏਵਂ ਏਕਚ੍ਚੋ ਆਗਤਨਿਮਿਤ੍ਤੇਨ ਕਥੇਤਿ. ਏਤੇਨੁਪਾਯੇਨ ਗਤਠਿਤਨਿ ਮਿਤ੍ਤੇਹਿਪਿ ਕਥਨਂ ਵੇਦਿਤਬ੍ਬਂ.

ਅਮਨੁਸ੍ਸਾਨਨ੍ਤਿ ਯਕ੍ਖਪਿਸਾਚਾਦੀਨਂ. ਦੇਵਤਾਨਨ੍ਤਿ ਚਾਤੁਮਹਾਰਾਜਿਕਾਦੀਨਂ. ਸਦ੍ਦਂ ਸੁਤ੍ਵਾਤਿ ਅਞ੍ਞਸ੍ਸ ਚਿਤ੍ਤਂ ਞਤ੍ਵਾ ਕਥੇਨ੍ਤਾਨਂ ਸਦ੍ਦਂ ਸੁਤ੍ਵਾ. ਵਿਤਕ੍ਕਵਿਪ੍ਫਾਰਸਦ੍ਦਨ੍ਤਿ ਵਿਤਕ੍ਕਵਿਪ੍ਫਾਰਵਸੇਨ ਉਪ੍ਪਨ੍ਨਂ ਵਿਪ੍ਪਲਪਨ੍ਤਾਨਂ ਸੁਤ੍ਤਪਮਤ੍ਤਾਦੀਨਂ ਸਦ੍ਦਂ. ਸੁਤ੍ਵਾਤਿ ਤਂ ਸਦ੍ਦਂ ਸੁਤ੍ਵਾ. ਯਂ ਵਿਤਕ੍ਕਯਤੋ ਤਸ੍ਸ ਸੋ ਸਦ੍ਦੋ ਉਪ੍ਪਨ੍ਨੋ, ਤਸ੍ਸ ਵਸੇਨ ‘‘ਏਵਮ੍ਪਿ ਤੇ ਮਨੋ’’ਤਿ ਆਦਿਸਤਿ. ਮਨੋਸਙ੍ਖਾਰਾ ਪਣਿਹਿਤਾਤਿ ਚਿਤ੍ਤਸਙ੍ਖਾਰਾ ਸੁਟ੍ਠਪਿਤਾ. ਵਿਤਕ੍ਕੇਸ੍ਸਤੀਤਿ ਵਿਤਕ੍ਕਯਿਸ੍ਸਤਿ ਪਵਤ੍ਤੇਸ੍ਸਤੀਤਿ ਪਜਾਨਾਤਿ. ਜਾਨਨ੍ਤੋ ਚ ਆਗਮਨੇਨ ਜਾਨਾਤਿ, ਪੁਬ੍ਬਭਾਗੇਨ ਜਾਨਾਤਿ, ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ. ਆਗਮਨੇਨ ਜਾਨਾਤਿ ਨਾਮ ਕਸਿਣਪਰਿਕਮ੍ਮਕਾਲੇਯੇਵ ਯੇਨਾਕਾਰੇਨ ਏਸ ਕਸਿਣਭਾਵਨਂ ਆਰਦ੍ਧੋ ਪਠਮਜ੍ਝਾਨਂ ਵਾ…ਪੇ… ਚਤੁਤ੍ਥਜ੍ਝਾਨਂ ਵਾ ਅਟ੍ਠਸਮਾਪਤ੍ਤਿਯੋ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ. ਪੁਬ੍ਬਭਾਗੇਨ ਜਾਨਾਤਿ ਨਾਮ ਸਮਥਵਿਪਸ੍ਸਨਾਯ ਆਰਦ੍ਧਾਯੇਵ ਜਾਨਾਤਿ, ਯੇਨਾਕਾਰੇਨ ਏਸ ਵਿਪਸ੍ਸਨਂ ਆਰਦ੍ਧੋ ਸੋਤਾਪਤ੍ਤਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਸਕਦਾਗਾਮਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਅਨਾਗਾਮਿਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤਿ, ਅਰਹਤ੍ਤਮਗ੍ਗਂ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ. ਅਨ੍ਤੋਸਮਾਪਤ੍ਤਿਯਂ ਚਿਤ੍ਤਂ ਓਲੋਕੇਤ੍ਵਾ ਜਾਨਾਤਿ ਨਾਮ ਯੇਨਾਕਾਰੇਨ ਇਮਸ੍ਸ ਮਨੋਸਙ੍ਖਾਰਾ ਸੁਟ੍ਠਪਿਤਾ, ਇਮਸ੍ਸ ਨਾਮ ਚਿਤ੍ਤਸ੍ਸ ਅਨਨ੍ਤਰਾ ਇਮਂ ਨਾਮ ਵਿਤਕ੍ਕਂ ਵਿਤਕ੍ਕੇਸ੍ਸਤਿ. ਇਤੋ ਵੁਟ੍ਠਿਤਸ੍ਸ ਏਤਸ੍ਸ ਹਾਨਭਾਗਿਯੋ ਵਾ ਸਮਾਧਿ ਭਵਿਸ੍ਸਤਿ, ਠਿਤਿਭਾਗਿਯੋ ਵਾ ਵਿਸੇਸਭਾਗਿਯੋ ਵਾ ਨਿਬ੍ਬੇਧਭਾਗਿਯੋ ਵਾ ਅਭਿਞ੍ਞਾਯੋ ਵਾ ਨਿਬ੍ਬਤ੍ਤੇਸ੍ਸਤੀਤਿ ਜਾਨਾਤਿ.

ਤਤ੍ਥ ਪੁਥੁਜ੍ਜਨੋ ਚੇਤੋਪਰਿਯਞਾਣਲਾਭੀ ਪੁਥੁਜ੍ਜਨਾਨਂਯੇਵ ਚਿਤ੍ਤਂ ਜਾਨਾਤਿ, ਨ ਅਰਿਯਾਨਂ. ਅਰਿਯੇਸੁਪਿ ਹੇਟ੍ਠਿਮੋ ਹੇਟ੍ਠਿਮੋ ਉਪਰਿਮਸ੍ਸ ਉਪਰਿਮਸ੍ਸ ਚਿਤ੍ਤਂ ਨ ਜਾਨਾਤਿ, ਉਪਰਿਮੋ ਪਨ ਹੇਟ੍ਠਿਮਸ੍ਸ ਜਾਨਾਤਿ. ਏਤੇਸੁ ਚ ਸੋਤਾਪਨ੍ਨੋ ਸੋਤਾਪਤ੍ਤਿਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਸਕਦਾਗਾਮੀ, ਅਨਾਗਾਮੀ, ਅਰਹਾ, ਅਰਹਤ੍ਤਫਲਸਮਾਪਤ੍ਤਿਂ ਸਮਾਪਜ੍ਜਤਿ. ਉਪਰਿਮੋ ਹੇਟ੍ਠਿਮਂ ਨ ਸਮਾਪਜ੍ਜਤਿ. ਤੇਸਞ੍ਹਿ ਹੇਟ੍ਠਿਮਾ ਹੇਟ੍ਠਿਮਾ ਸਮਾਪਤ੍ਤਿ ਤਤ੍ਰੁਪਪਤ੍ਤਿਯੇਵ ਹੋਤਿ. ਤਥੇਵ ਤਂ ਹੋਤੀਤਿ ਇਦਂ ਏਕਂਸੇਨ ਤਥੇਵ ਹੋਤਿ. ਚੇਤੋਪਰਿਯਞਾਣਵਸੇਨ ਞਾਤਞ੍ਹਿ ਅਞ੍ਞਥਾਭਾਵੀ ਨਾਮ ਨਤ੍ਥਿ. ਸੇਸਂ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਦਸ੍ਸਨਸਮਾਪਤ੍ਤਿਦੇਸਨਾਵਣ੍ਣਨਾ

੧੪੯. ਆਤਪ੍ਪਮਨ੍ਵਾਯਾਤਿਆਦਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਮੇਵ. ਅਯਂ ਪਨੇਤ੍ਥ ਸਙ੍ਖੇਪੋ, ਆਤਪ੍ਪਨ੍ਤਿ ਵੀਰਿਯਂ. ਤਦੇਵ ਪਦਹਿਤਬ੍ਬਤੋ ਪਧਾਨਂ. ਅਨੁਯੁਞ੍ਜਿਤਬ੍ਬਤੋ ਅਨੁਯੋਗੋ.ਅਪ੍ਪਮਾਦਨ੍ਤਿ ਸਤਿਅਵਿਪ੍ਪਵਾਸਂ. ਸਮ੍ਮਾਮਨਸਿਕਾਰਨ੍ਤਿ ਅਨਿਚ੍ਚੇ ਅਨਿਚ੍ਚਨ੍ਤਿਆਦਿਵਸੇਨ ਪਵਤ੍ਤਂ ਉਪਾਯਮਨਸਿਕਾਰਂ. ਚੇਤੋਸਮਾਧਿਨ੍ਤਿ ਪਠਮਜ੍ਝਾਨਸਮਾਧਿਂ. ਅਯਂ ਪਠਮਾ ਦਸ੍ਸਨਸਮਾਪਤ੍ਤੀਤਿ ਅਯਂ ਦ੍ਵਤ੍ਤਿਂ ਸਾਕਾਰਂ ਪਟਿਕੂਲਤੋ ਮਨਸਿਕਤ੍ਵਾ ਪਟਿਕੂਲਦਸ੍ਸਨਵਸੇਨ ਉਪ੍ਪਾਦਿਤਾ ਪਠਮਜ੍ਝਾਨਸਮਾਪਤ੍ਤਿ ਪਠਮਾ ਦਸ੍ਸਨਸਮਾਪਤ੍ਤਿ ਨਾਮ, ਸਚੇ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸੋਤਾਪਨ੍ਨੋ ਹੋਤਿ, ਅਯਂ ਨਿਪ੍ਪਰਿਯਾਯੇਨੇਵ ਪਠਮਾ ਦਸ੍ਸਨਸਮਾਪਤ੍ਤਿ.

ਅਤਿਕ੍ਕਮ੍ਮ ਚਾਤਿ ਅਤਿਕ੍ਕਮਿਤ੍ਵਾ ਚ. ਛਵਿਮਂਸਲੋਹਿਤਨ੍ਤਿ ਛਵਿਞ੍ਚ ਮਂਸਞ੍ਚ ਲੋਹਿਤਞ੍ਚ. ਅਟ੍ਠਿਂ ਪਚ੍ਚਵੇਕ੍ਖਤੀਤਿ ਅਟ੍ਠਿ ਅਟ੍ਠੀਤਿ ਪਚ੍ਚਵੇਕ੍ਖਤਿ. ਅਟ੍ਠਿ ਅਟ੍ਠੀਤਿ ਪਚ੍ਚਵੇਕ੍ਖਿਤ੍ਵਾ ਉਪ੍ਪਾਦਿਤਾ ਅਟ੍ਠਿਆਰਮ੍ਮਣਾ ਦਿਬ੍ਬਚਕ੍ਖੁਪਾਦਕਜ੍ਝਾਨਸਮਾਪਤ੍ਤਿ ਦੁਤਿਯਾ ਦਸ੍ਸਨਸਮਾਪਤ੍ਤਿ ਨਾਮ. ਸਚੇ ਪਨ ਤਂ ਝਾਨਂ ਪਾਦਕਂ ਕਤ੍ਵਾ ਸਕਦਾਗਾਮਿਮਗ੍ਗਂ ਨਿਬ੍ਬਤ੍ਤੇਤਿ. ਅਯਂ ਨਿਪ੍ਪਰਿਯਾਯੇਨ ਦੁਤਿਯਾ ਦਸ੍ਸਨਸਮਾਪਤ੍ਤਿ. ਕਾਲ਼ਵਲ੍ਲਵਾਸੀ ਸੁਮਤ੍ਥੇਰੋ ਪਨ ‘‘ਯਾਵ ਤਤਿਯਮਗ੍ਗਾ ਵਟ੍ਟਤੀ’’ਤਿ ਆਹ.

ਵਿਞ੍ਞਾਣਸੋਤਨ੍ਤਿ ਵਿਞ੍ਞਾਣਮੇਵ. ਉਭਯਤੋ ਅਬ੍ਬੋਚ੍ਛਿਨ੍ਨਨ੍ਤਿ ਦ੍ਵੀਹਿਪਿ ਭਾਗੇਹਿ ਅਚ੍ਛਿਨ੍ਨਂ. ਇਧ ਲੋਕੇ ਪਤਿਟ੍ਠਿਤਞ੍ਚਾਤਿ ਛਨ੍ਦਰਾਗਵਸੇਨ ਇਮਸ੍ਮਿਞ੍ਚ ਲੋਕੇ ਪਤਿਟ੍ਠਿਤਂ. ਦੁਤਿਯਪਦੇਪਿ ਏਸੇਵ ਨਯੋ. ਕਮ੍ਮਂ ਵਾ ਕਮ੍ਮਤੋ ਉਪਗਚ੍ਛਨ੍ਤਂ ਇਧ ਲੋਕੇ ਪਤਿਟ੍ਠਿਤਂ ਨਾਮ. ਕਮ੍ਮਭਵਂ ਆਕਡ੍ਢਨ੍ਤਂ ਪਰਲੋਕੇ ਪਤਿਟ੍ਠਿਤਂ ਨਾਮ. ਇਮਿਨਾ ਕਿਂ ਕਥਿਤਂ? ਸੇਕ੍ਖਪੁਥੁਜ੍ਜਨਾਨਂ ਚੇਤੋਪਰਿਯਞਾਣਂ ਕਥਿਤਂ. ਸੇਕ੍ਖਪੁਥੁਜ੍ਜਨਾਨਞ੍ਹਿ ਚੇਤੋਪਰਿਯਞਾਣਂ ਤਤਿਯਾ ਦਸ੍ਸਨਸਮਾਪਤ੍ਤਿ ਨਾਮ.

ਇਧ ਲੋਕੇ ਅਪ੍ਪਤਿਟ੍ਠਿਤਞ੍ਚਾਤਿ ਨਿਚ੍ਛਨ੍ਦਰਾਗਤ੍ਤਾ ਇਧਲੋਕੇ ਚ ਅਪ੍ਪਤਿਟ੍ਠਿਤਂ. ਦੁਤਿਯਪਦੇਪਿ ਏਸੇਵ ਨਯੋ. ਕਮ੍ਮਂ ਵਾ ਕਮ੍ਮਤੋ ਨ ਉਪਗਚ੍ਛਨ੍ਤਂ ਇਧ ਲੋਕੇ ਅਪ੍ਪਤਿਟ੍ਠਿਤਂ ਨਾਮ. ਕਮ੍ਮਭਵਂ ਅਨਾਕਡ੍ਢਨ੍ਤਂ ਪਰਲੋਕੇ ਅਪ੍ਪਤਿਟ੍ਠਿਤਂ ਨਾਮ. ਇਮਿਨਾ ਕਿਂ ਕਥਿਤਂ? ਖੀਣਾਸਵਸ੍ਸ ਚੇਤੋਪਰਿਯਞਾਣਂ ਕਥਿਤਂ. ਖੀਣਾਸਵਸ੍ਸ ਹਿ ਚੇਤੋਪਰਿਯਞਾਣਂ ਚਤੁਤ੍ਥਾ ਦਸ੍ਸਨਸਮਾਪਤ੍ਤਿ ਨਾਮ.

ਅਪਿਚ ਦ੍ਵਤ੍ਤਿਂਸਾਕਾਰੇ ਆਰਦ੍ਧਵਿਪਸ੍ਸਨਾਪਿ ਪਠਮਾ ਦਸ੍ਸਨਸਮਾਪਤ੍ਤਿ. ਅਟ੍ਠਿਆਰਮ੍ਮਣੇ ਆਰਦ੍ਧਵਿਪਸ੍ਸਨਾ ਦੁਤਿਯਾ ਦਸ੍ਸਨਸਮਾਪਤ੍ਤਿ. ਸੇਕ੍ਖਪੁਥੁਜ੍ਜਨਾਨਂ ਚੇਤੋਪਰਿਯਞਾਣਂ ਖੀਣਾਸਵਸ੍ਸ ਚੇਤੋਪਰਿਯਞਾਣਨ੍ਤਿ ਇਦਂ ਪਦਦ੍ਵਯਂ ਨਿਚ੍ਚਲਮੇਵ. ਅਪਰੋ ਨਯੋ ਪਠਮਜ੍ਝਾਨਂ ਪਠਮਾ ਦਸ੍ਸਨਸਮਾਪਤ੍ਤਿ. ਦੁਤਿਯਜ੍ਝਾਨਂ ਦੁਤਿਯਾ. ਤਤਿਯਜ੍ਝਾਨਂ ਤਤਿਯਾ. ਚਤੁਤ੍ਥਜ੍ਝਾਨਂ ਚਤੁਤ੍ਥਾ ਦਸ੍ਸਨਸਮਾਪਤ੍ਤਿ. ਤਥਾ ਪਠਮਮਗ੍ਗੋ ਪਠਮਾ ਦਸ੍ਸਨਸਮਾਪਤ੍ਤਿ. ਦੁਤਿਯਮਗ੍ਗੋ ਦੁਤਿਯਾ. ਤਤਿਯਮਗ੍ਗੋ ਤਤਿਯਾ. ਚਤੁਤ੍ਥਮਗ੍ਗੋ ਚਤੁਤ੍ਥਾ ਦਸ੍ਸਨਸਮਾਪਤ੍ਤੀਤਿ. ਸੇਸਮੇਤ੍ਥ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪੁਗ੍ਗਲਪਣ੍ਣਤ੍ਤਿਦੇਸਨਾਵਣ੍ਣਨਾ

੧੫੦. ਪੁਗ੍ਗਲਪਣ੍ਣਤ੍ਤੀਸੂਤਿ ਲੋਕਵੋਹਾਰਵਸੇਨ ‘‘ਸਤ੍ਤੋ ਪੁਗ੍ਗਲੋ ਨਰੋ ਪੋਸੋ’’ਤਿ ਏਵਂ ਪਞ੍ਞਾਪੇਤਬ੍ਬਾਸੁ ਲੋਕਪਞ੍ਞਤ੍ਤੀਸੁ. ਬੁਦ੍ਧਾਨਞ੍ਹਿ ਦ੍ਵੇ ਕਥਾ ਸਮ੍ਮੁਤਿਕਥਾ, ਪਰਮਤ੍ਥਕਥਾਤਿ ਪੋਟ੍ਠਪਾਦਸੁਤ੍ਤੇ (ਦੀ. ਨਿ. ਅਟ੍ਠ. ੧.੪੩੯-੪੪੩) ਵਿਤ੍ਥਾਰਿਤਾ.

ਤਤ੍ਥ ਪੁਗ੍ਗਲਪਣ੍ਣਤ੍ਤੀਸੂਤਿ ਅਯਂ ਸਮ੍ਮੁਤਿਕਥਾ. ਇਦਾਨਿ ਯੇ ਪੁਗ੍ਗਲੇ ਪਞ੍ਞਪੇਨ੍ਤੋ ਪੁਗ੍ਗਲਪਣ੍ਣਤ੍ਤੀਸੁ ਭਗਵਾ ਅਨੁਤ੍ਤਰੋ ਹੋਤਿ, ਤੇ ਦਸ੍ਸੇਨ੍ਤੋ ਸਤ੍ਤਿਮੇ ਭਨ੍ਤੇ ਪੁਗ੍ਗਲਾ. ਉਭਤੋਭਾਗਵਿਮੁਤ੍ਤੋਤਿਆਦਿਮਾਹ. ਤਤ੍ਥ ਉਭਤੋਭਾਗਵਿਮੁਤ੍ਤੋਤਿ ਦ੍ਵੀਹਿ ਭਾਗੇਹਿ ਵਿਮੁਤ੍ਤੋ, ਅਰੂਪਸਮਾਪਤ੍ਤਿਯਾ ਰੂਪਕਾਯਤੋ ਵਿਮੁਤ੍ਤੋ, ਮਗ੍ਗੇਨ ਨਾਮਕਾਯਤੋ. ਸੋ ਚਤੁਨ੍ਨਂ ਅਰੂਪਸਮਾਪਤ੍ਤੀਨਂ ਏਕੇਕਤੋ ਵੁਟ੍ਠਾਯ ਸਙ੍ਖਾਰੇ ਸਮ੍ਮਸਿਤ੍ਵਾ ਅਰਹਤ੍ਤਪ੍ਪਤ੍ਤਾਨਂ, ਚਤੁਨ੍ਨਂ, ਨਿਰੋਧਾ ਵੁਟ੍ਠਾਯ ਅਰਹਤ੍ਤਪ੍ਪਤ੍ਤਅਨਾਗਾਮਿਨੋ ਚ ਵਸੇਨ ਪਞ੍ਚਵਿਧੋ ਹੋਤਿ.

ਪਾਲ਼ਿ ਪਨੇਤ੍ਥ ‘‘ਕਤਮੋ ਚ ਪੁਗ੍ਗਲੋ ਉਭਤੋਭਾਗਵਿਮੁਤ੍ਤੋ? ਇਧੇਕਚ੍ਚੋ ਪੁਗ੍ਗਲੋ ਅਟ੍ਠਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤੀ’’ਤਿ (ਧਾਤੁ. ੨੪) ਏਵਂ ਅਟ੍ਠਵਿਮੋਕ੍ਖਲਾਭਿਨੋ ਵਸੇਨ ਆਗਤਾ. ਪਞ੍ਞਾਯ ਵਿਮੁਤ੍ਤੋਤਿ ਪਞ੍ਞਾਵਿਮੁਤ੍ਤੋ. ਸੋ ਸੁਕ੍ਖਵਿਪਸ੍ਸਕੋ ਚ, ਚਤੂਹਿ ਝਾਨੇਹਿ ਵੁਟ੍ਠਾਯ ਅਰਹਤ੍ਤਂ ਪਤ੍ਤਾ ਚਤ੍ਤਾਰੋ ਚਾਤਿ ਇਮੇਸਂ ਵਸੇਨ ਪਞ੍ਚਵਿਧੋਵ ਹੋਤਿ.

ਪਾਲ਼ਿ ਪਨੇਤ੍ਥ ਅਟ੍ਠਵਿਮੋਕ੍ਖਪਟਿਕ੍ਖੇਪਵਸੇਨੇਵ ਆਗਤਾ. ਯਥਾਹ ‘‘ਨ ਹੇਵ ਖੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ. ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਪਞ੍ਞਾਵਿਮੁਤ੍ਤੋ’’ਤਿ (ਧਾਤੁ. ੨੫).

ਫੁਟ੍ਠਨ੍ਤਂ ਸਚ੍ਛਿ ਕਰੋਤੀਤਿ ਕਾਯਸਕ੍ਖਿ. ਸੋ ਝਾਨਫਸ੍ਸਂ ਪਠਮਂ ਫੁਸਤਿ, ਪਚ੍ਛਾ ਨਿਰੋਧਂ ਨਿਬ੍ਬਾਨਂ ਸਚ੍ਛਿਕਰੋਤਿ, ਸੋ ਸੋਤਾਪਤ੍ਤਿਫਲਟ੍ਠਂ ਆਦਿਂ ਕਤ੍ਵਾ ਯਾਵ ਅਰਹਤ੍ਤਮਗ੍ਗਟ੍ਠਾ ਛਬ੍ਬਿਧੋ ਹੋਤੀਤਿ ਵੇਦਿਤਬ੍ਬੋ. ਤੇਨੇਵਾਹ ‘‘ਇਧੇਕਚ੍ਚੋ ਪੁਗ੍ਗਲੋ ਅਟ੍ਠ ਵਿਮੋਕ੍ਖੇ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਕਾਯਸਕ੍ਖੀ’’ਤਿ (ਧਾਤੁ. ੨੬).

ਦਿਟ੍ਠਨ੍ਤਂ ਪਤ੍ਤੋਤਿ ਦਿਟ੍ਠਿਪ੍ਪਤ੍ਤੋ. ਤਤ੍ਰਿਦਂ ਸਙ੍ਖੇਪਲਕ੍ਖਣਂ, ਦੁਕ੍ਖਾ ਸਙ੍ਖਾਰਾ ਸੁਖੋ ਨਿਰੋਧੋਤਿ ਞਾਤਂ ਹੋਤਿ ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਪਸ੍ਸਿਤਂ ਪਞ੍ਞਾਯਾਤਿ ਦਿਟ੍ਠਿਪ੍ਪਤ੍ਤੋ. ਵਿਤ੍ਥਾਰਤੋ ਪਨੇਸੋਪਿ ਕਾਯਸਕ੍ਖਿ ਵਿਯ ਛਬ੍ਬਿਧੋ ਹੋਤਿ. ਤੇਨੇਵਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ… ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਦਿਟ੍ਠਿਪ੍ਪਤ੍ਤੋ’’ਤਿ (ਧਾਤੁ. ੨੭).

ਸਦ੍ਧਾਯ ਵਿਮੁਤ੍ਤੋਤਿ ਸਦ੍ਧਾਵਿਮੁਤ੍ਤੋ. ਸੋਪਿ ਵੁਤ੍ਤਨਯੇਨੇਵ ਛਬ੍ਬਿਧੋ ਹੋਤਿ. ਤੇਨੇਵਾਹ – ‘‘ਇਧੇਕਚ੍ਚੋ ਪੁਗ੍ਗਲੋ ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਸਮੁਦਯੋਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਨਿਰੋਧੋਤਿ ਯਥਾਭੂਤਂ ਪਜਾਨਾਤਿ, ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾਤਿ ਯਥਾਭੂਤਂ ਪਜਾਨਾਤਿ, ਤਥਾਗਤਪ੍ਪਵੇਦਿਤਾ ਚਸ੍ਸ ਧਮ੍ਮਾ ਪਞ੍ਞਾਯ ਵੋਦਿਟ੍ਠਾ ਹੋਨ੍ਤਿ ਵੋਚਰਿਤਾ, ਪਞ੍ਞਾਯ ਚਸ੍ਸ ਦਿਸ੍ਵਾ ਏਕਚ੍ਚੇ ਆਸਵਾ ਪਰਿਕ੍ਖੀਣਾ ਹੋਨ੍ਤਿ ਨੋ ਚ ਖੋ ਯਥਾ ਦਿਟ੍ਠਿਪ੍ਪਤ੍ਤਸ੍ਸ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਵਿਮੁਤ੍ਤੋ’’ਤਿ (ਧਾਤੁ. ੨੮). ਏਤੇਸੁ ਹਿ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਸਦ੍ਦਹਨ੍ਤਸ੍ਸ ਵਿਯ, ਓਕਪ੍ਪੇਨ੍ਤਸ੍ਸ ਵਿਯ, ਅਧਿਮੁਚ੍ਚਨ੍ਤਸ੍ਸ ਵਿਯ ਚ ਕਿਲੇਸਕ੍ਖਯੋ ਹੋਤਿ. ਦਿਟ੍ਠਿਪ੍ਪਤ੍ਤਸ੍ਸ ਪੁਬ੍ਬਭਾਗਮਗ੍ਗਕ੍ਖਣੇ ਕਿਲੇਸਚ੍ਛੇਦਕਂ ਞਾਣਂ ਅਦਨ੍ਧਂ ਤਿਖਿਣਂ ਸੂਰਂ ਹੁਤ੍ਵਾ ਵਹਤਿ. ਤਸ੍ਮਾ ਯਥਾ ਨਾਮ ਨਾਤਿਤਿਖਿਣੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਨ ਮਟ੍ਠਂ ਹੋਤਿ, ਅਸਿ ਨ ਸੀਘਂ ਵਹਤਿ, ਸਦ੍ਦੋ ਸੁਯ੍ਯਤਿ, ਬਲਵਤਰੋ ਵਾਯਾਮੋ ਕਾਤਬ੍ਬੋ ਹੋਤਿ, ਏਵਰੂਪਾ ਸਦ੍ਧਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ. ਯਥਾ ਪਨ ਅਤਿਨਿਸਿਤੇਨ ਅਸਿਨਾ ਕਦਲਿਂ ਛਿਨ੍ਦਨ੍ਤਸ੍ਸ ਛਿਨ੍ਨਟ੍ਠਾਨਂ ਮਟ੍ਠਂ ਹੋਤਿ, ਅਸਿ ਸੀਘਂ ਵਹਤਿ, ਸਦ੍ਦੋ ਨ ਸੁਯ੍ਯਤਿ, ਬਲਵਤਰਂ ਵਾਯਾਮਕਿਚ੍ਚਂ ਨ ਹੋਤਿ, ਏਵਰੂਪਾ ਪਞ੍ਞਾਵਿਮੁਤ੍ਤਸ੍ਸ ਪੁਬ੍ਬਭਾਗਮਗ੍ਗਭਾਵਨਾ ਵੇਦਿਤਬ੍ਬਾ.

ਧਮ੍ਮਂ ਅਨੁਸ੍ਸਰਤੀਤਿ ਧਮ੍ਮਾਨੁਸਾਰੀ. ਧਮ੍ਮੋਤਿ ਪਞ੍ਞਾ, ਪਞ੍ਞਾਪੁਬ੍ਬਙ੍ਗਮਂ ਮਗ੍ਗਂ ਭਾਵੇਤੀਤਿ ਅਤ੍ਥੋ. ਸਦ੍ਧਾਨੁਸਾਰਿਮ੍ਹਿਪਿ ਏਸੇਵ ਨਯੋ, ਉਭੋਪੇਤੇ ਸੋਤਾਪਤ੍ਤਿਮਗ੍ਗਟ੍ਠਾਯੇਵ. ਵੁਤ੍ਤਮ੍ਪਿ ਚੇਤਂ ‘‘ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਪਞ੍ਞਾਵਾਹਿਂ ਪਞ੍ਞਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਧਮ੍ਮਾਨੁਸਾਰੀ’’ਤਿ.

ਤਥਾ ‘‘ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਸਦ੍ਧਾਵਾਹਿਂ ਸਦ੍ਧਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਨੁਸਾਰੀ’’ਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰਤੋ ਪਨੇਸਾ ਉਭਤੋਭਾਗਵਿਮੁਤ੍ਤਾਦਿਕਥਾ ਵਿਸੁਦ੍ਧਿਮਗ੍ਗੇ ਪਞ੍ਞਾਭਾਵਨਾਧਿਕਾਰੇ ਵੁਤ੍ਤਾ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪਧਾਨਦੇਸਨਾਵਣ੍ਣਨਾ

੧੫੧. ਪਧਾਨੇਸੂਤਿ ਇਧ ਪਦਹਨਵਸੇਨ ‘‘ਸਤ੍ਤ ਬੋਜ੍ਝਙ੍ਗਾ ਪਧਾਨਾ’’ਤਿ ਵੁਤ੍ਤਾ. ਤੇਸਂ ਵਿਤ੍ਥਾਰਕਥਾ ਮਹਾਸਤਿਪਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਪਟਿਪਦਾਦੇਸਨਾਵਣ੍ਣਨਾ

੧੫੨. ਦੁਕ੍ਖਪਟਿਪਦਾਦੀਸੁ ਅਯਂ ਵਿਤ੍ਥਾਰਨਯੋ – ‘‘ਤਤ੍ਥ ਕਤਮਾ ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ? ਦੁਕ੍ਖੇਨ ਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਦਨ੍ਧਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਅਮੋਹੋ ਧਮ੍ਮਵਿਚਯੋ ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਦੁਕ੍ਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ? ਦੁਕ੍ਖੇਨ ਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਖਿਪ੍ਪਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਦੁਕ੍ਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ? ਅਕਿਚ੍ਛੇਨ ਅਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਦਨ੍ਧਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਸੁਖਪਟਿਪਦਾ ਦਨ੍ਧਾਭਿਞ੍ਞਾ ਪਞ੍ਞਾ. ਤਤ੍ਥ ਕਤਮਾ ਸੁਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ? ਅਕਿਚ੍ਛੇਨ ਅਕਸਿਰੇਨ ਸਮਾਧਿਂ ਉਪ੍ਪਾਦੇਨ੍ਤਸ੍ਸ ਖਿਪ੍ਪਂ ਤਂ ਠਾਨਂ ਅਭਿਜਾਨਨ੍ਤਸ੍ਸ ਯਾ ਪਞ੍ਞਾ ਪਜਾਨਨਾ…ਪੇ… ਸਮ੍ਮਾਦਿਟ੍ਠਿ, ਅਯਂ ਵੁਚ੍ਚਤਿ ਸੁਖਪਟਿਪਦਾ ਖਿਪ੍ਪਾਭਿਞ੍ਞਾ ਪਞ੍ਞਾ’’ਤਿ (ਵਿਭ. ੮੦੧). ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ ਵੁਤ੍ਤੋ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਭਸ੍ਸਸਮਾਚਾਰਾਦਿਵਣ੍ਣਨਾ

੧੫੩. ਨ ਚੇਵ ਮੁਸਾਵਾਦੂਪਸਞ੍ਹਿਤਨ੍ਤਿ ਭਸ੍ਸਸਮਾਚਾਰੇ ਠਿਤੋਪਿ ਕਥਾਮਗ੍ਗਂ ਅਨੁਪਚ੍ਛਿਨ੍ਦਿਤ੍ਵਾ ਕਥੇਨ੍ਤੋਪਿ ਇਧੇਕਚ੍ਚੋ ਭਿਕ੍ਖੁ ਨ ਚੇਵ ਮੁਸਾਵਾਦੂਪਸਞ੍ਹਿਤਂ ਭਾਸਤਿ. ਅਟ੍ਠ ਅਨਰਿਯਵੋਹਾਰੇ ਵਜ੍ਜੇਤ੍ਵਾ ਅਟ੍ਠ ਅਰਿਯਵੋਹਾਰਯੁਤ੍ਤਮੇਵ ਭਾਸਤਿ. ਨ ਚ ਵੇਭੂਤਿਯਨ੍ਤਿ ਭਸ੍ਸਸਮਾਚਾਰੇ ਠਿਤੋਪਿ ਭੇਦਕਰਵਾਚਂ ਨ ਭਾਸਤਿ. ਨ ਚ ਪੇਸੁਣਿਯਨ੍ਤਿ ਤਸ੍ਸਾਯੇਵੇਤਂ ਵੇਵਚਨਂ. ਵੇਭੂਤਿਯਵਾਚਾ ਹਿ ਪਿਯਭਾਵਸ੍ਸ ਸੁਞ੍ਞਕਰਣਤੋ ‘‘ਪੇਸੁਣਿਯ’’ਨ੍ਤਿ ਵੁਚ੍ਚਤਿ. ਨਾਮਮੇਵਸ੍ਸਾ ਏਤਨ੍ਤਿ ਮਹਾਸੀਵਤ੍ਥੇਰੋ ਅਵੋਚ. ਨ ਚ ਸਾਰਮ੍ਭਜਨ੍ਤਿ ਸਾਰਮ੍ਭਜਾ ਚ ਯਾ ਵਾਚਾ, ਤਞ੍ਚ ਨ ਭਾਸਤਿ. ‘‘ਤ੍ਵਂ ਦੁਸ੍ਸੀਲੋ’’ਤਿ ਵੁਤ੍ਤੇ, ‘‘ਤ੍ਵਂ ਦੁਸ੍ਸੀਲੋ ਤਵਾਚਰਿਯੋ ਦੁਸ੍ਸੀਲੋ’’ਤਿ ਵਾ, ‘‘ਤੁਯ੍ਹਂ ਆਪਤ੍ਤੀ’’ਤਿ ਵੁਤ੍ਤੇ, ‘‘ਅਹਂ ਪਿਣ੍ਡਾਯ ਚਰਿਤ੍ਵਾ ਪਾਟਲਿਪੁਤ੍ਤਂ ਗਤੋ’’ਤਿਆਦਿਨਾ ਨਯੇਨ ਬਹਿਦ੍ਧਾ ਵਿਕ੍ਖੇਪਕਥਾਪਵਤ੍ਤਂ ਵਾ ਕਰਣੁਤ੍ਤਰਿਯਵਾਚਂ ਨ ਭਾਸਤਿ. ਜਯਾਪੇਕ੍ਖੋਤਿ ਜਯਪੁਰੇਕ੍ਖਾਰੋ ਹੁਤ੍ਵਾ, ਯਥਾ ਹਤ੍ਥਕੋ ਸਕ੍ਯਪੁਤ੍ਤੋ ਤਿਤ੍ਥਿਯਾ ਨਾਮ ਧਮ੍ਮੇਨਪਿ ਅਧਮ੍ਮੇਨਪਿ ਜੇਤਬ੍ਬਾਤਿ ਸਚ੍ਚਾਲਿਕਂ ਯਂਕਿਞ੍ਚਿ ਭਾਸਤਿ, ਏਵਂ ਜਯਾਪੇਕ੍ਖੋ ਜਯਪੁਰੇਕ੍ਖਾਰੋ ਹੁਤ੍ਵਾ ਨ ਭਾਸਤੀਤਿ ਅਤ੍ਥੋ. ਮਨ੍ਤਾ ਮਨ੍ਤਾ ਚ ਵਾਚਂ ਭਾਸਤੀਤਿ ਏਤ੍ਥ ਮਨ੍ਤਾਤਿ ਵੁਚ੍ਚਤਿ ਪਞ੍ਞਾ, ਮਨ੍ਤਾਯ ਪਞ੍ਞਾਯ. ਪੁਨ ਮਨ੍ਤਾਤਿ ਉਪਪਰਿਕ੍ਖਿਤ੍ਵਾ. ਇਦਂ ਵੁਤ੍ਤਂ ਹੋਤਿ, ਭਸ੍ਸਸਮਾਚਾਰੇ ਠਿਤੋ ਦਿਵਸਭਾਗਮ੍ਪਿ ਕਥੇਨ੍ਤੋ ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਯੁਤ੍ਤਕਥਮੇਵ ਕਥੇਤੀਤਿ. ਨਿਧਾਨਵਤਿਨ੍ਤਿ ਹਦਯੇਪਿ ਨਿਦਹਿਤਬ੍ਬਯੁਤ੍ਤਂ. ਕਾਲੇਨਾਤਿ ਯੁਤ੍ਤਪਤ੍ਤਕਾਲੇਨ.

ਏਵਂ ਭਾਸਿਤਾ ਹਿ ਵਾਚਾ ਅਮੁਸਾ ਚੇਵ ਹੋਤਿ ਅਪਿਸੁਣਾ ਚ ਅਫਰੁਸਾ ਚ ਅਸਠਾ ਚ ਅਸਮ੍ਫਪ੍ਪਲਾਪਾ ਚ. ਏਵਰੂਪਾ ਚ ਅਯਂ ਵਾਚਾ ਚਤੁਸਚ੍ਚਨਿਸ੍ਸਿਤਾਤਿਪਿ ਸਿਕ੍ਖਤ੍ਤਯਨਿਸ੍ਸਿਤਾਤਿਪਿ ਦਸਕਥਾਵਤ੍ਥੁਨਿਸ੍ਸਿਤਾਤਿਪਿ ਤੇਰਸਧੁਤਙ੍ਗਨਿਸ੍ਸਿਤਾਤਿਪਿ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਨਿਸ੍ਸਿਤਾਤਿਪਿ ਮਗ੍ਗਨਿਸ੍ਸਿਤਾਤਿਪਿ ਵੁਚ੍ਚਤਿ. ਤੇਨਾਹ ਏਤਦਾਨੁਤ੍ਤਰਿਯਂ, ਭਨ੍ਤੇ, ਭਸ੍ਸਸਮਾਚਾਰੇਤਿ ਤਂ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਸਚ੍ਚੋ ਚਸ੍ਸ ਸਦ੍ਧੋ ਚਾਤਿ ਸੀਲਾਚਾਰੇ ਠਿਤੋ ਭਿਕ੍ਖੁ ਸਚ੍ਚੋ ਚ ਭਵੇਯ੍ਯ ਸਚ੍ਚਕਥੋ ਸਦ੍ਧੋ ਚ ਸਦ੍ਧਾਸਮ੍ਪਨ੍ਨੋ. ਨਨੁ ਹੇਟ੍ਠਾ ਸਚ੍ਚਂ ਕਥਿਤਮੇਵ, ਇਧ ਕਸ੍ਮਾ ਪੁਨ ਵੁਤ੍ਤਨ੍ਤਿ? ਹੇਟ੍ਠਾ ਵਾਚਾਸਚ੍ਚਂ ਕਥਿਤਂ. ਸੀਲਾਚਾਰੇ ਠਿਤੋ ਪਨ ਭਿਕ੍ਖੁ ਅਨ੍ਤਮਸੋ ਹਸਨਕਥਾਯਪਿ ਮੁਸਾਵਾਦਂ ਨ ਕਰੋਤੀਤਿ ਦਸ੍ਸੇਤੁਂ ਇਧ ਵੁਤ੍ਤਂ. ਇਦਾਨਿ ਸੋ ਧਮ੍ਮੇਨ ਸਮੇਨ ਜੀਵਿਤਂ ਕਪ੍ਪੇਤੀਤਿ ਦਸ੍ਸਨਤ੍ਥਂ ਨ ਚ ਕੁਹਕੋਤਿਆਦਿ ਵੁਤ੍ਤਂ. ਤਤ੍ਥ ‘‘ਕੁਹਕੋ’’ਤਿਆਦੀਨਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਾਨਿ.

ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ, ਭੋਜਨੇ ਮਤ੍ਤਞ੍ਞੂਤਿ ਛਸੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭੋਜਨੇਪਿ ਪਮਾਣਞ੍ਞੂ. ਸਮਕਾਰੀਤਿ ਸਮਚਾਰੀ, ਕਾਯੇਨ ਵਾਚਾਯ ਮਨਸਾ ਚ ਕਾਯਵਙ੍ਕਾਦੀਨਿ ਪਹਾਯ ਸਮਂ ਚਰਤੀਤਿ ਅਤ੍ਥੋ. ਜਾਗਰਿਯਾਨੁਯੋਗਮਨੁਯੁਤ੍ਤੋਤਿ ਰਤ੍ਤਿਨ੍ਦਿਵਂ ਛ ਕੋਟ੍ਠਾਸੇ ਕਤ੍ਵਾ ‘‘ਦਿਵਸਂ ਚਙ੍ਕਮੇਨ ਨਿਸਜ੍ਜਾਯਾ’’ਤਿ ਵੁਤ੍ਤਨਯੇਨੇਵ ਜਾਗਰਿਯਾਨੁਯੋਗਂ ਯੁਤ੍ਤਪ੍ਪਯੁਤ੍ਤੋ ਵਿਹਰਤਿ. ਅਤਨ੍ਦਿਤੋਤਿ ਨਿਤ੍ਤਨ੍ਦੀ ਕਾਯਾਲਸਿਯਵਿਰਹਿਤੋ. ਆਰਦ੍ਧਵੀਰਿਯੋਤਿ ਕਾਯਿਕਵੀਰਿਯੇਨਾਪਿ ਆਰਦ੍ਧਵੀਰਿਯੋ ਹੋਤਿ, ਗਣਸਙ੍ਗਣਿਕਂ ਵਿਨੋਦੇਤ੍ਵਾ ਚਤੂਸੁ ਇਰਿਯਾਪਥੇਸੁ ਅਟ੍ਠਆਰਬ੍ਭਵਤ੍ਥੁਵਸੇਨ ਏਕਵਿਹਾਰੀ. ਚੇਤਸਿਕਵੀਰਿਯੇਨਾਪਿ ਆਰਦ੍ਧਵੀਰਿਯੋ ਹੋਤਿ, ਕਿਲੇਸਸਙ੍ਗਣਿਕਂ ਪਹਾਯ ਵਿਨੋਦੇਤ੍ਵਾ ਅਟ੍ਠਸਮਾਪਤ੍ਤਿਵਸੇਨ ਏਕਵਿਹਾਰੀ. ਅਪਿ ਚ ਯਥਾ ਤਥਾ ਕਿਲੇਸੁਪ੍ਪਤ੍ਤਿਂ ਨਿਵਾਰੇਨ੍ਤੋ ਚੇਤਸਿਕਵੀਰਿਯੇਨ ਆਰਦ੍ਧਵੀਰਿਯੋ ਹੋਤਿ. ਝਾਯੀਤਿ ਆਰਮ੍ਮਣਲਕ੍ਖਣੂਪਨਿਜ੍ਝਾਨਵਸੇਨ ਝਾਯੀ. ਸਤਿਮਾਤਿ ਚਿਰਕਤਾਦਿਅਨੁਸ੍ਸਰਣਸਮਤ੍ਥਾਯ ਸਤਿਯਾ ਸਮਨ੍ਨਾਗਤੋ.

ਕਲ੍ਯਾਣਪਟਿਭਾਨੋਤਿ ਵਾਕ੍ਕਰਣਸਮ੍ਪਨ੍ਨੋ ਚੇਵ ਹੋਤਿ ਪਟਿਭਾਨਸਮ੍ਪਨ੍ਨੋ ਚ. ਯੁਤ੍ਤਪਟਿਭਾਨੋ ਖੋ ਪਨ ਹੋਤਿ ਨੋ ਮੁਤ੍ਤਪਟਿਭਾਨੋ. ਸੀਲਸਮਾਚਾਰਸ੍ਮਿਞ੍ਹਿ ਠਿਤਭਿਕ੍ਖੁ ਮੁਤ੍ਤਪਟਿਭਾਨੋ ਨ ਹੋਤਿ, ਯੁਤ੍ਤਪਟਿਭਾਨੋ ਪਨ ਹੋਤਿ ਵਙ੍ਗੀਸਤ੍ਥੇਰੋ ਵਿਯ. ਗਤਿਮਾਤਿ ਗਮਨਸਮਤ੍ਥਾਯ ਪਞ੍ਞਾਯ ਸਮਨ੍ਨਾਗਤੋ. ਧਿਤਿਮਾਤਿ ਧਾਰਣਸਮਤ੍ਥਾਯ ਪਞ੍ਞਾਯ ਸਮਨ੍ਨਾਗਤੋ. ਮਤਿਮਾਤਿ ਏਤ੍ਥ ਪਨ ਮਤੀਤਿ ਪਞ੍ਞਾਯ ਨਾਮਮੇਵ, ਤਸ੍ਮਾ ਪਞ੍ਞਵਾਤਿ ਅਤ੍ਥੋ. ਇਤਿ ਤੀਹਿਪਿ ਇਮੇਹਿ ਪਦੇਹਿ ਪਞ੍ਞਾਵ ਕਥਿਤਾ. ਤਤ੍ਥ ਹੇਟ੍ਠਾ ਸਮਣਧਮ੍ਮਕਰਣਵੀਰਿਯਂ ਕਥਿਤਂ, ਇਧ ਬੁਦ੍ਧਵਚਨਗਣ੍ਹਨਵੀਰਿਯਂ. ਤਥਾ ਹੇਟ੍ਠਾ ਵਿਪਸ੍ਸਨਾਪਞ੍ਞਾ ਕਥਿਤਾ, ਇਧ ਬੁਦ੍ਧਵਚਨਗਣ੍ਹਨਪਞ੍ਞਾ. ਨ ਚ ਕਾਮੇਸੁ ਗਿਦ੍ਧੋਤਿ ਵਤ੍ਥੁਕਾਮਕਿਲੇਸਕਾਮੇਸੁ ਅਗਿਦ੍ਧੋ. ਸਤੋ ਚ ਨਿਪਕੋ ਚਾਤਿ ਅਭਿਕ੍ਕਨ੍ਤਪਟਿਕ੍ਕਨ੍ਤਾਦੀਸੁ ਸਤ੍ਤਸੁ ਠਾਨੇਸੁ ਸਤਿਯਾ ਚੇਵ ਞਾਣੇਨ ਚ ਸਮਨ੍ਨਾਗਤੋ ਚਰਤੀਤਿ ਅਤ੍ਥੋ. ਨੇਪਕ੍ਕਨ੍ਤਿ ਪਞ੍ਞਾ, ਤਾਯ ਸਮਨ੍ਨਾਗਤਤ੍ਤਾ ਨਿਪਕੋਤਿ ਵੁਤ੍ਤੋ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

ਅਨੁਸਾਸਨਵਿਧਾਦਿਵਣ੍ਣਨਾ

੧੫੪. ਪਚ੍ਚਤ੍ਤਂ ਯੋਨਿਸੋ ਮਨਸਿਕਾਰਾਤਿ ਅਤ੍ਤਨੋ ਉਪਾਯਮਨਸਿਕਾਰੇਨ. ਯਥਾਨੁਸਿਟ੍ਠਂ ਤਥਾ ਪਟਿਪਜ੍ਜਮਾਨੋਤਿ ਯਥਾ ਮਯਾ ਅਨੁਸਿਟ੍ਠਂ ਅਨੁਸਾਸਨੀ ਦਿਨ੍ਨਾ, ਤਥਾ ਪਟਿਪਜ੍ਜਮਾਨੋ. ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾਤਿਆਦਿ ਵੁਤ੍ਤਤ੍ਥਮੇਵ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੫. ਪਰਪੁਗ੍ਗਲਵਿਮੁਤ੍ਤਿਞਾਣੇਤਿ ਸੋਤਾਪਨ੍ਨਾਦੀਨਂ ਪਰਪੁਗ੍ਗਲਾਨਂ ਤੇਨ ਤੇਨ ਮਗ੍ਗੇਨ ਕਿਲੇਸਵਿਮੁਤ੍ਤਿਞਾਣੇ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੬. ਅਮੁਤ੍ਰਾਸਿਂ ਏਵਂਨਾਮੋਤਿ ਏਕੋ ਪੁਬ੍ਬੇਨਿਵਾਸਂ ਅਨੁਸ੍ਸਰਨ੍ਤੋ ਨਾਮਗੋਤ੍ਤਂ ਪਰਿਯਾਦਿਯਮਾਨੋ ਗਚ੍ਛਤਿ. ਏਕੋ ਸੁਦ੍ਧਖਨ੍ਧੇਯੇਵ ਅਨੁਸ੍ਸਰਤਿ, ਏਕੋ ਹਿ ਸਕ੍ਕੋਤਿ, ਏਕੋ ਨ ਸਕ੍ਕੋਤਿ. ਤਤ੍ਥ ਯੋ ਸਕ੍ਕੋਤਿ, ਤਸ੍ਸ ਵਸੇਨ ਅਗ੍ਗਹੇਤ੍ਵਾ ਅਸਕ੍ਕੋਨ੍ਤਸ੍ਸ ਵਸੇਨ ਗਹਿਤਂ. ਅਸਕ੍ਕੋਨ੍ਤੋ ਪਨ ਕਿਂ ਕਰੋਤਿ? ਸੁਦ੍ਧਖਨ੍ਧੇਯੇਵ ਅਨੁਸ੍ਸਰਨ੍ਤੋ ਗਨ੍ਤ੍ਵਾ ਅਨੇਕਜਾਤਿਸਤਸਹਸ੍ਸਮਤ੍ਥਕੇ ਠਤ੍ਵਾ ਨਾਮਗੋਤ੍ਤਂ ਪਰਿਯਾਦਿਯਮਾਨੋ ਓਤਰਤਿ. ਤਂ ਦਸ੍ਸੇਨ੍ਤੋ ਏਵਂਨਾਮੋਤਿਆਦਿਮਾਹ. ਸੋ ਏਵਮਾਹਾਤਿ ਸੋ ਦਿਟ੍ਠਿਗਤਿਕੋ ਏਵਮਾਹ. ਤਤ੍ਥ ਕਿਞ੍ਚਾਪਿ ਸਸ੍ਸਤੋਤਿ ਵਤ੍ਵਾ ‘‘ਤੇ ਚ ਸਤ੍ਤਾ ਸਂਸਰਨ੍ਤੀ’’ਤਿ ਵਦਨ੍ਤਸ੍ਸ ਵਚਨਂ ਪੁਬ੍ਬਾਪਰਵਿਰੁਦ੍ਧਂ ਹੋਤਿ. ਦਿਟ੍ਠਿਗਤਿਕਤ੍ਤਾ ਪਨੇਸ ਏਤਂ ਨ ਸਲ੍ਲਕ੍ਖੇਸਿ. ਦਿਟ੍ਠਿਗਤਿਕਸ੍ਸ ਹਿ ਠਾਨਂ ਵਾ ਨਿਯਮੋ ਵਾ ਨਤ੍ਥਿ. ਇਮਂ ਗਹੇਤ੍ਵਾ ਇਮਂ ਵਿਸ੍ਸਜ੍ਜੇਤਿ, ਇਮਂ ਵਿਸ੍ਸਜ੍ਜੇਤ੍ਵਾ ਇਮਂ ਗਣ੍ਹਾਤੀਤਿ ਬ੍ਰਹ੍ਮਜਾਲੇ ਵਿਤ੍ਥਾਰਿਤਮੇਵੇਤਂ. ਅਯਂ ਤਤਿਯੋ ਸਸ੍ਸਤਵਾਦੋਤਿ ਥੇਰੋ ਲਾਭਿਸ੍ਸੇਵ ਵਸੇਨ ਤਯੋ ਸਸ੍ਸਤਵਾਦੇ ਆਹ. ਭਗਵਤਾ ਪਨ ਤਕ੍ਕੀਵਾਦਮ੍ਪਿ ਗਹੇਤ੍ਵਾ ਬ੍ਰਹ੍ਮਜਾਲੇ ਚਤ੍ਤਾਰੋ ਵੁਤ੍ਤਾ. ਏਤੇਸਂ ਪਨ ਤਿਣ੍ਣਂ ਵਾਦਾਨਂ ਵਿਤ੍ਥਾਰਕਥਾ ਬ੍ਰਹ੍ਮਜਾਲੇ (ਦੀ. ਨਿ. ਅਟ੍ਠ. ੧.੩੦) ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸੇਸਮਿਧਾਪਿ ਪੁਰਿਮਨਯੇਨੇਵ ਵਿਤ੍ਥਾਰੇਤਬ੍ਬਂ.

੧੫੭. ਗਣਨਾਯ ਵਾਤਿ ਪਿਣ੍ਡਗਣਨਾਯ. ਸਙ੍ਖਾਨੇਨਾਤਿ ਅਚ੍ਛਿਦ੍ਦਕਵਸੇਨ ਮਨੋਗਣਨਾਯ. ਉਭਯਥਾਪਿ ਪਿਣ੍ਡਗਣਨਮੇਵ ਦਸ੍ਸੇਤਿ. ਇਦਂ ਵੁਤ੍ਤਂ ਹੋਤਿ, ਵਸ੍ਸਾਨਂ ਸਤਵਸੇਨ ਸਹਸ੍ਸਵਸੇਨ ਸਤਸਹਸ੍ਸਵਸੇਨ ਕੋਟਿਵਸੇਨ ਪਿਣ੍ਡਂ ਕਤ੍ਵਾਪਿ ਏਤ੍ਤਕਾਨਿ ਵਸ੍ਸਸਤਾਨੀਤਿ ਵਾ ਏਤ੍ਤਕਾ ਵਸ੍ਸਕੋਟਿਯੋਤਿ ਵਾ ਏਵਂ ਸਙ੍ਖਾਤੁਂ ਨ ਸਕ੍ਕਾ. ਤੁਮ੍ਹੇ ਪਨ ਅਤ੍ਤਨੋ ਦਸਨ੍ਨਂ ਪਾਰਮੀਨਂ ਪੂਰਿਤਤ੍ਤਾ ਸਬ੍ਬਞ੍ਞੁਤਞ੍ਞਾਣਸ੍ਸ ਸੁਪ੍ਪਟਿਵਿਦ੍ਧਤ੍ਤਾ ਯਸ੍ਮਾ ਵੋ ਅਨਾਵਰਣਞਾਣਂ ਸੂਰਂ ਵਹਤਿ. ਤਸ੍ਮਾ ਦੇਸਨਾਞਾਣਕੁਸਲਤਂ ਪੁਰਕ੍ਖਤ੍ਵਾ ਵਸ੍ਸਗਣਨਾਯਪਿ ਪਰਿਯਨ੍ਤਿਕਂ ਕਤ੍ਵਾ ਕਪ੍ਪਗਣਨਾਯਪਿ ਪਰਿਚ੍ਛਿਨ੍ਦਿਤ੍ਵਾ ਏਤ੍ਤਕਨ੍ਤਿ ਦਸ੍ਸੇਥਾਤਿ ਦੀਪੇਤਿ. ਪਾਲ਼ਿਯਤ੍ਥੋ ਪਨੇਤ੍ਥ ਵੁਤ੍ਤਨਯੋਯੇਵ. ਸੇਸਮਿਧਾਪਿ ਪੁਰਿਮਨਯੇਨੇਵ ਯੋਜੇਤਬ੍ਬਂ.

੧੫੮. ਏਤਦਾਨੁਤ੍ਤਰਿਯਂ, ਭਨ੍ਤੇ, ਸਤ੍ਤਾਨਂ ਚੁਤੂਪਪਾਤਞਾਣੇਤਿ ਭਨ੍ਤੇ ਯਾਪਿ ਅਯਂ ਸਤ੍ਤਾਨਂ ਚੁਤਿਪਟਿਸਨ੍ਧਿਵਸੇਨ ਞਾਣਦੇਸਨਾ, ਸਾਪਿ ਤੁਮ੍ਹਾਕਂਯੇਵ ਅਨੁਤ੍ਤਰਾ. ਅਤੀਤਬੁਦ੍ਧਾਪਿ ਏਵਮੇਵ ਦੇਸੇਸੁਂ. ਅਨਾਗਤਾਪਿ ਏਵਮੇਵ ਦੇਸੇਸ੍ਸਨ੍ਤਿ. ਤੁਮ੍ਹੇ ਤੇਸਂ ਅਤੀਤਾਨਾਗਤਬੁਦ੍ਧਾਨਂ ਞਾਣੇਨ ਸਂਸਨ੍ਦਿਤ੍ਵਾਵ ਦੇਸਯਿਤ੍ਥ. ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ ਭਨ੍ਤੇ ਭਗਵਤੀ’’ਤਿ ਦੀਪੇਤਿ. ਪਾਲ਼ਿਯਤ੍ਥੋ ਪਨੇਤ੍ਥ ਵਿਤ੍ਥਾਰਿਤੋਯੇਵ.

੧੫੯. ਸਾਸਵਾ ਸਉਪਧਿਕਾਤਿ ਸਦੋਸਾ ਸਉਪਾਰਮ੍ਭਾ. ਨੋ ਅਰਿਯਾਤਿ ਵੁਚ੍ਚਤੀਤਿ ਅਰਿਯਿਦ੍ਧੀਤਿ ਨ ਵੁਚ੍ਚਤਿ. ਅਨਾਸਵਾ ਅਨੁਪਧਿਕਾਤਿ ਨਿਦ੍ਦੋਸਾ ਅਨੁਪਾਰਮ੍ਭਾ. ਅਰਿਯਾਤਿ ਵੁਚ੍ਚਤੀਤਿ ਅਰਿਯਿਦ੍ਧੀਤਿ ਵੁਚ੍ਚਤਿ. ਅਪ੍ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ ਕਥਂ ਅਪ੍ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ? ਪਟਿਕੂਲੇ ਸਤ੍ਤੇ ਮੇਤ੍ਤਂ ਫਰਤਿ, ਸਙ੍ਖਾਰੇ ਧਾਤੁਸਞ੍ਞਂ ਉਪਸਂਹਰਤਿ. ਯਥਾਹ ‘‘ਕਥਂ ਪਟਿਕੂਲੇ ਅਪ੍ਪਟਿਕੂਲਸਞ੍ਞੀ ਵਿਹਰਤਿ (ਪਟਿ. ਮ. ੩.੯੭)? ਅਨਿਟ੍ਠਸ੍ਮਿਂ ਵਤ੍ਥੁਸ੍ਮਿਂ ਮੇਤ੍ਤਾਯ ਵਾ ਫਰਤਿ, ਧਾਤੁਤੋ ਵਾ ਉਪਸਂਹਰਤੀ’’ਤਿ. ਪਟਿਕੂਲਸਞ੍ਞੀ ਤਤ੍ਥ ਵਿਹਰਤੀਤਿ ਅਪ੍ਪਟਿਕੂਲੇ ਸਤ੍ਤੇ ਅਸੁਭਸਞ੍ਞਂ ਫਰਤਿ, ਸਙ੍ਖਾਰੇ ਅਨਿਚ੍ਚਸਞ੍ਞਂ ਉਪਸਂਹਰਤਿ. ਯਥਾਹ ‘‘ਕਥਂ ਅਪ੍ਪਟਿਕੂਲੇ ਪਟਿਕੂਲਸਞ੍ਞੀ ਵਿਹਰਤਿ? ਇਟ੍ਠਸ੍ਮਿਂ ਵਤ੍ਥੁਸ੍ਮਿਂ ਅਸੁਭਾਯ ਵਾ ਫਰਤਿ, ਅਨਿਚ੍ਚਤੋ ਵਾ ਉਪਸਂਹਰਤੀ’’ਤਿ. ਏਵਂ ਸੇਸਪਦੇਸੁਪਿ ਅਤ੍ਥੋ ਵੇਦਿਤਬ੍ਬੋ.

ਉਪੇਕ੍ਖਕੋ ਤਤ੍ਥ ਵਿਹਰਤੀਤਿ ਇਟ੍ਠੇ ਅਰਜ੍ਜਨ੍ਤੋ ਅਨਿਟ੍ਠੇ ਅਦੁਸ੍ਸਨ੍ਤੋ ਯਥਾ ਅਞ੍ਞੇ ਅਸਮਪੇਕ੍ਖਨੇਨ ਮੋਹਂ ਉਪ੍ਪਾਦੇਨ੍ਤਿ, ਏਵਂ ਅਨੁਪ੍ਪਾਦੇਨ੍ਤੋ ਛਸੁ ਆਰਮ੍ਮਣੇਸੁ ਛਲ਼ਙ੍ਗੁਪੇਕ੍ਖਾਯ ਉਪੇਕ੍ਖਕੋ ਵਿਹਰਤਿ. ਏਤਦਾਨੁਤ੍ਤਰਿਯਂ, ਭਨ੍ਤੇ, ਇਦ੍ਧਿਵਿਧਾਸੂਤਿ, ਭਨ੍ਤੇ, ਯਾ ਅਯਂ ਦ੍ਵੀਸੁ ਇਦ੍ਧੀਸੁ ਏਵਂਦੇਸਨਾ, ਏਤਦਾਨੁਤ੍ਤਰਿਯਂ. ਤਂ ਭਗਵਾਤਿ ਤਂ ਦੇਸਨਂ ਭਗਵਾ ਅਸੇਸਂ ਸਕਲਂ ਅਭਿਜਾਨਾਤਿ. ਤਂ ਭਗਵਤੋਤਿ ਤਂ ਦੇਸਨਂ ਭਗਵਤੋ ਅਸੇਸਂ ਅਭਿਜਾਨਤੋ. ਉਤ੍ਤਰਿ ਅਭਿਞ੍ਞੇਯ੍ਯਂ ਨਤ੍ਥੀਤਿ ਉਤ੍ਤਰਿ ਅਭਿਜਾਨਿਤਬ੍ਬਂ ਨਤ੍ਥਿ. ਅਯਂ ਨਾਮ ਇਤੋ ਅਞ੍ਞੋ ਧਮ੍ਮੋ ਵਾ ਪੁਗ੍ਗਲੋ ਵਾ ਯਂ ਭਗਵਾ ਨ ਜਾਨਾਤਿ ਇਦਂ ਨਤ੍ਥਿ. ਯਦਭਿਜਾਨਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾਤਿ ਯਂ ਤੁਮ੍ਹੇਹਿ ਅਨਭਿਞ੍ਞਾਤਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਅਭਿਜਾਨਨ੍ਤੋ ਭਗਵਤਾ ਭਿਯ੍ਯੋਭਿਞ੍ਞਤਰੋ ਅਸ੍ਸ, ਅਧਿਕਤਰਪਞ੍ਞੋ ਭਵੇਯ੍ਯ. ਯਦਿਦਂ ਇਦ੍ਧਿਵਿਧਾਸੂਤਿ ਏਤ੍ਥ ਯਦਿਦਨ੍ਤਿ ਨਿਪਾਤਮਤ੍ਤਂ. ਇਦ੍ਧਿਵਿਧਾਸੁ ਭਗਵਤਾ ਉਤ੍ਤਰਿਤਰੋ ਨਤ੍ਥਿ. ਅਤੀਤਬੁਦ੍ਧਾਪਿ ਹਿ ਇਮਾ ਦ੍ਵੇ ਇਦ੍ਧਿਯੋ ਦੇਸੇਸੁਂ, ਅਨਾਗਤਾਪਿ ਇਮਾਵ ਦੇਸੇਸ੍ਸਨ੍ਤਿ. ਤੁਮ੍ਹੇਪਿ ਤੇਸਂ ਞਾਣੇਨ ਸਂਸਨ੍ਦਿਤ੍ਵਾ ਇਮਾਵ ਦੇਸਯਿਤ੍ਥ. ਇਤਿ ਭਗਵਾ ਇਦ੍ਧਿਵਿਧਾਸੁ ਅਨੁਤ੍ਤਰੋਤਿ ਦਸ੍ਸੇਨ੍ਤੋ ‘‘ਇਮਿਨਾਪਿ ਕਾਰਣੇਨ ਏਵਂਪਸਨ੍ਨੋ ਅਹਂ, ਭਨ੍ਤੇ, ਭਗਵਤੀ’’ਤਿ ਦੀਪੇਤਿ. ਏਤ੍ਤਾਵਤਾ ਯੇ ਧਮ੍ਮਸੇਨਾਪਤਿ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ਸੋਲ਼ਸ ਅਪਰਮ੍ਪਰਿਯਧਮ੍ਮੇ ਸਮ੍ਮਸਿ, ਤੇਵ ਦਸ੍ਸਿਤਾ ਹੋਨ੍ਤਿ.

ਅਞ੍ਞਥਾਸਤ੍ਥੁਗੁਣਦਸ੍ਸਨਾਦਿਵਣ੍ਣਨਾ

੧੬੦. ਇਦਾਨਿ ਅਪਰੇਨਪਿ ਆਕਾਰੇਨ ਭਗਵਤੋ ਗੁਣੇ ਦਸ੍ਸੇਨ੍ਤੋ ਯਂ ਤਂ ਭਨ੍ਤੇਤਿਆਦਿਮਾਹ. ਤਤ੍ਥ ਸਦ੍ਧੇਨ ਕੁਲਪੁਤ੍ਤੇਨਾਤਿ ਸਦ੍ਧਾ ਕੁਲਪੁਤ੍ਤਾ ਨਾਮ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾ ਬੋਧਿਸਤ੍ਤਾ. ਤਸ੍ਮਾ ਯਂ ਸਬ੍ਬਞ੍ਞੁਬੋਧਿਸਤ੍ਤੇਨ ਪਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਕਿਂ ਪਨ ਤੇਨ ਪਤ੍ਤਬ੍ਬਂ? ਨਵ ਲੋਕੁਤ੍ਤਰਧਮ੍ਮਾ. ਆਰਦ੍ਧਵੀਰਿਯੇਨਾਤਿਆਦੀਸੁ ‘‘ਵੀਰਿਯਂ ਥਾਮੋ’’ਤਿਆਦੀਨਿ ਸਬ੍ਬਾਨੇਵ ਵੀਰਿਯਵੇਵਚਨਾਨਿ. ਤਤ੍ਥ ਆਰਦ੍ਧਵੀਰਿਯੇਨਾਤਿ ਪਗ੍ਗਹਿਤਵੀਰਿਯੇਨ. ਥਾਮਵਤਾਤਿ ਥਾਮਸਮ੍ਪਨ੍ਨੇਨ ਥਿਰਵੀਰਿਯੇਨ. ਪੁਰਿਸਥਾਮੇਨਾਤਿ ਤੇਨ ਥਾਮਵਤਾ ਯਂ ਪੁਰਿਸਥਾਮੇਨ ਪਤ੍ਤਬ੍ਬਨ੍ਤਿ ਵੁਤ੍ਤਂ ਹੋਤਿ. ਅਨਨ੍ਤਰਪਦਦ੍ਵਯੇਪਿ ਏਸੇਵ ਨਯੋ. ਪੁਰਿਸਧੋਰਯ੍ਹੇਨਾਤਿ ਯਾ ਅਸਮਧੁਰੇਹਿ ਬੁਦ੍ਧੇਹਿ ਵਹਿਤਬ੍ਬਾ ਧੁਰਾ, ਤਂ ਧੁਰਂ ਵਹਨਸਮਤ੍ਥੇਨ ਮਹਾਪੁਰਿਸੇਨ. ਅਨੁਪ੍ਪਤ੍ਤਂ ਤਂ ਭਗਵਤਾਤਿ ਤਂ ਸਬ੍ਬਂ ਅਤੀਤਾਨਾਗਤਬੁਦ੍ਧੇਹਿ ਪਤ੍ਤਬ੍ਬਂ, ਸਬ੍ਬਮੇਵ ਅਨੁਪ੍ਪਤ੍ਤਂ, ਭਗਵਤੋ ਏਕਗੁਣੋਪਿ ਊਨੋ ਨਤ੍ਥੀਤਿ ਦਸ੍ਸੇਤਿ. ਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗਨ੍ਤਿ ਵਤ੍ਥੁਕਾਮੇਸੁ ਕਾਮਸੁਖਲ੍ਲਿਕਾਨੁਯੋਗਂ. ਯਥਾ ਅਞ੍ਞੇ ਕੇਣਿਯਜਟਿਲਾਦਯੋ ਸਮਣਬ੍ਰਾਹ੍ਮਣਾ ‘‘ਕੋ ਜਾਨਾਤਿ ਪਰਲੋਕਂ. ਸੁਖੋ ਇਮਿਸ੍ਸਾ ਪਰਿਬ੍ਬਾਜਿਕਾਯ ਮੁਦੁਕਾਯ ਲੋਮਸਾਯ ਬਾਹਾਯ ਸਮ੍ਫਸ੍ਸੋ’’ਤਿ ਮੋਲ਼ਿਬਨ੍ਧਾਹਿ ਪਰਿਬ੍ਬਾਜਿਕਾਹਿ ਪਰਿਚਾਰੇਨ੍ਤਿ ਸਮ੍ਪਤ੍ਤਂ ਸਮ੍ਪਤ੍ਤਂ ਰੂਪਾਦਿਆਰਮ੍ਮਣਂ ਅਨੁਭਵਮਾਨਾ ਕਾਮਸੁਖਮਨੁਯੁਤ੍ਤਾ, ਨ ਏਵਮਨੁਯੁਤ੍ਤੋਤਿ ਦਸ੍ਸੇਤਿ.

ਹੀਨਨ੍ਤਿ ਲਾਮਕਂ. ਗਮ੍ਮਨ੍ਤਿ ਗਾਮਵਾਸੀਨਂ ਧਮ੍ਮਂ. ਪੋਥੁਜ੍ਜਨਿਕਨ੍ਤਿ ਪੁਥੁਜ੍ਜਨੇਹਿ ਸੇਵਿਤਬ੍ਬਂ. ਅਨਰਿਯਨ੍ਤਿ ਨ ਨਿਦ੍ਦੋਸਂ. ਨ ਵਾ ਅਰਿਯੇਹਿ ਸੇਵਿਤਬ੍ਬਂ. ਅਨਤ੍ਥਸਞ੍ਹਿਤਨ੍ਤਿ ਅਨਤ੍ਥਸਂਯੁਤ੍ਤਂ. ਅਤ੍ਤਕਿਲਮਥਾਨੁਯੋਗਨ੍ਤਿ ਅਤ੍ਤਨੋ ਆਤਾਪਨਪਰਿਤਾਪਨਾਨੁਯੋਗਂ. ਦੁਕ੍ਖਨ੍ਤਿ ਦੁਕ੍ਖਯੁਤ੍ਤਂ, ਦੁਕ੍ਖਮਂ ਵਾ. ਯਥਾ ਏਕੇ ਸਮਣਬ੍ਰਾਹ੍ਮਣਾ ਕਾਮਸੁਖਲ੍ਲਿਕਾਨੁਯੋਗਂ ਪਰਿਵਜ੍ਜੇਸ੍ਸਾਮਾਤਿ ਕਾਯਕਿਲਮਥਂ ਅਨੁਧਾਵਨ੍ਤਿ, ਤਤੋ ਮੁਞ੍ਚਿਸ੍ਸਾਮਾਤਿ ਕਾਮਸੁਖਂ ਅਨੁਧਾਵਨ੍ਤਿ, ਨ ਏਵਂ ਭਗਵਾ. ਭਗਵਾ ਪਨ ਉਭੋ ਏਤੇ ਅਨ੍ਤੇ ਵਜ੍ਜੇਤ੍ਵਾ ਯਾ ਸਾ ‘‘ਅਤ੍ਥਿ, ਭਿਕ੍ਖਵੇ, ਮਜ੍ਝਿਮਾ ਪਟਿਪਦਾ ਤਥਾਗਤੇਨ ਅਭਿਸਮ੍ਬੁਦ੍ਧਾ ਚਕ੍ਖੁਕਰਣੀ’’ਤਿ ਏਵਂ ਵੁਤ੍ਤਾ ਸਮ੍ਮਾਪਟਿਪਤ੍ਤਿ, ਤਮੇਵ ਪਟਿਪਨ੍ਨੋ. ਤਸ੍ਮਾ ‘‘ਨ ਚ ਅਤ੍ਤਕਿਲਮਥਾਨੁਯੋਗ’’ਨ੍ਤਿਆਦਿਮਾਹ.

ਆਭਿਚੇਤਸਿਕਾਨਨ੍ਤਿ ਅਭਿਚੇਤਸਿਕਾਨਂ, ਕਾਮਾਵਚਰਚਿਤ੍ਤਾਨਿ ਅਤਿਕ੍ਕਮਿਤ੍ਵਾ ਠਿਤਾਨਨ੍ਤਿ ਅਤ੍ਥੋ. ਦਿਟ੍ਠਧਮ੍ਮਸੁਖਵਿਹਾਰਾਨਨ੍ਤਿ ਇਮਸ੍ਮਿਂਯੇਵ ਅਤ੍ਤਭਾਵੇ ਸੁਖਵਿਹਾਰਾਨਂ. ਪੋਟ੍ਠਪਾਦਸੁਤ੍ਤਨ੍ਤਸ੍ਮਿਞ੍ਹਿ ਸਪ੍ਪੀਤਿਕਦੁਤਿਯਜ੍ਝਾਨਫਲਸਮਾਪਤ੍ਤਿ ਕਥਿਤਾ (ਦੀ. ਨਿ. ੧.੪੩੨). ਪਾਸਾਦਿਕਸੁਤ੍ਤਨ੍ਤੇ ਸਹ ਮਗ੍ਗੇਨ ਵਿਪਸ੍ਸਨਾਪਾਦਕਜ੍ਝਾਨਂ. ਦਸੁਤ੍ਤਰਸੁਤ੍ਤਨ੍ਤੇ ਚਤੁਤ੍ਥਜ੍ਝਾਨਿਕਫਲਸਮਾਪਤ੍ਤਿ. ਇਮਸ੍ਮਿਂ ਸਮ੍ਪਸਾਦਨੀਯੇ ਦਿਟ੍ਠਧਮ੍ਮਸੁਖਵਿਹਾਰਜ੍ਝਾਨਾਨਿ ਕਥਿਤਾਨਿ. ਨਿਕਾਮਲਾਭੀਤਿ ਯਥਾਕਾਮਲਾਭੀ. ਅਕਿਚ੍ਛਲਾਭੀਤਿ ਅਦੁਕ੍ਖਲਾਭੀ. ਅਕਸਿਰਲਾਭੀਤਿ ਵਿਪੁਲਲਾਭੀ.

ਅਨੁਯੋਗਦਾਨਪ੍ਪਕਾਰਵਣ੍ਣਨਾ

੧੬੧. ਏਕਿਸ੍ਸਾ ਲੋਕਧਾਤੁਯਾਤਿ ਦਸਸਹਸ੍ਸਿਲੋਕਧਾਤੁਯਾ. ਤੀਣਿ ਹਿ ਖੇਤ੍ਤਾਨਿ – ਜਾਤਿਖੇਤ੍ਤਂ ਆਣਾਖੇਤ੍ਤਂ ਵਿਸਯਖੇਤ੍ਤਂ. ਤਤ੍ਥ ਜਾਤਿਖੇਤ੍ਤਂ ਨਾਮ ਦਸਸਹਸ੍ਸੀ ਲੋਕਧਾਤੁ. ਸਾ ਹਿ ਤਥਾਗਤਸ੍ਸ ਮਾਤੁਕੁਚ੍ਛਿਂ ਓਕ੍ਕਮਨਕਾਲੇ ਨਿਕ੍ਖਮਨਕਾਲੇ ਸਮ੍ਬੋਧਿਕਾਲੇ ਧਮ੍ਮਚਕ੍ਕਪ੍ਪਵਤ੍ਤਨੇ ਆਯੁਸਙ੍ਖਾਰੋਸ੍ਸਜ੍ਜਨੇ ਪਰਿਨਿਬ੍ਬਾਨੇ ਚ ਕਮ੍ਪਤਿ. ਕੋਟਿਸਤਸਹਸ੍ਸਚਕ੍ਕਵਾਲ਼ਂ ਪਨ ਆਣਾਖੇਤ੍ਤਂ ਨਾਮ. ਆਟਾਨਾਟਿਯਮੋਰਪਰਿਤ੍ਤਧਜਗ੍ਗਪਰਿਤ੍ਤਰਤਨਪਰਿਤ੍ਤਾਦੀਨਞ੍ਹਿ ਏਤ੍ਥ ਆਣਾ ਵਤ੍ਤਤਿ. ਵਿਸਯਖੇਤ੍ਤਸ੍ਸ ਪਨ ਪਰਿਮਾਣਂ ਨਤ੍ਥਿ, ਬੁਦ੍ਧਾਨਞ੍ਹਿ ‘‘ਯਾਵਤਕਂ ਞਾਣਂ, ਤਾਵਤਕਂ ਞੇਯ੍ਯਂ, ਯਾਵਤਕਂ ਞੇਯ੍ਯਂ ਤਾਵਤਕਂ ਞਾਣਂ, ਞਾਣਪਰਿਯਨ੍ਤਿਕਂ ਞੇਯ੍ਯਂ, ਞੇਯ੍ਯਪਰਿਯਨ੍ਤਿਕਂ ਞਾਣ’’ਨ੍ਤਿ (ਮਹਾਨਿ. ੫੫) ਵਚਨਤੋ ਅਵਿਸਯੋ ਨਾਮ ਨਤ੍ਥਿ.

ਇਮੇਸੁ ਪਨ ਤੀਸੁ ਖੇਤ੍ਤੇਸੁ ਠਪੇਤ੍ਵਾ ਇਮਂ ਚਕ੍ਕਵਾਲ਼ਂ ਅਞ੍ਞਸ੍ਮਿਂ ਚਕ੍ਕਵਾਲ਼ੇ ਬੁਦ੍ਧਾ ਉਪ੍ਪਜ੍ਜਨ੍ਤੀਤਿ ਸੁਤ੍ਤਂ ਨਤ੍ਥਿ, ਨੁਪ੍ਪਞ੍ਜਨ੍ਤੀਤਿ ਪਨ ਅਤ੍ਥਿ. ਤੀਣਿ ਪਿਟਕਾਨਿ ਵਿਨਯਪਿਟਕਂ, ਸੁਤ੍ਤਨ੍ਤਪਿਟਕਂ ਅਭਿਧਮ੍ਮਪਿਟਕਂ. ਤਿਸ੍ਸੋ ਸਙ੍ਗੀਤਿਯੋ ਮਹਾਕਸ੍ਸਪਤ੍ਥੇਰਸ੍ਸ ਸਙ੍ਗੀਤਿ, ਯਸਤ੍ਥੇਰਸ੍ਸ ਸਙ੍ਗੀਤਿ, ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰਸ੍ਸ ਸਙ੍ਗੀਤੀਤਿ. ਇਮਾ ਤਿਸ੍ਸੋ ਸਙ੍ਗੀਤਿਯੋ ਆਰੁਲ਼੍ਹੇ ਤੇਪਿਟਕੇ ਬੁਦ੍ਧਵਚਨੇ ‘‘ਇਮਂ ਚਕ੍ਕਵਾਲ਼ਂ ਮੁਞ੍ਚਿਤ੍ਵਾ ਅਞ੍ਞਤ੍ਥ ਬੁਦ੍ਧਾ ਉਪ੍ਪਜ੍ਜਨ੍ਤੀ’’ਤਿ ਸੁਤ੍ਤਂ ਨਤ੍ਥਿ, ਨੁਪ੍ਪਜ੍ਜਨ੍ਤੀਤਿ ਪਨ ਅਤ੍ਥਿ.

ਅਪੁਬ੍ਬਂ ਅਚਰਿਮਨ੍ਤਿ ਅਪੁਰੇ ਅਪਚ੍ਛਾ ਏਕਤੋ ਨੁਪ੍ਪਜ੍ਜਨ੍ਤਿ, ਪੁਰੇ ਵਾ ਪਚ੍ਛਾ ਵਾ ਉਪ੍ਪਜ੍ਜਨ੍ਤੀਤਿ ਵੁਤ੍ਤਂ ਹੋਤਿ. ਤਤ੍ਥ ਬੋਧਿਪਲ੍ਲਙ੍ਕੇ ‘‘ਬੋਧਿਂ ਅਪਤ੍ਵਾ ਨ ਉਟ੍ਠਹਿਸ੍ਸਾਮੀ’’ਤਿ ਨਿਸਿਨ੍ਨਕਾਲਤੋ ਪਟ੍ਠਾਯ ਯਾਵ ਮਾਤੁਕੁਚ੍ਛਿਸ੍ਮਿਂ ਪਟਿਸਨ੍ਧਿਗ੍ਗਹਣਂ, ਤਾਵ ਪੁਬ੍ਬੇਤਿ ਨ ਵੇਦਿਤਬ੍ਬਂ. ਬੋਧਿਸਤ੍ਤਸ੍ਸ ਹਿ ਪਟਿਸਨ੍ਧਿਗ੍ਗਹਣੇ ਦਸਸਹਸ੍ਸਚਕ੍ਕਵਾਲ਼ਕਮ੍ਪਨੇਨੇਵ ਖੇਤ੍ਤਪਰਿਗ੍ਗਹੋ ਕਤੋ. ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿਪਿ ਨਿਵਾਰਿਤਾ ਹੋਤਿ. ਪਰਿਨਿਬ੍ਬਾਨਤੋ ਪਟ੍ਠਾਯ ਚ ਯਾਵ ਸਾਸਪਮਤ੍ਤਾਪਿ ਧਾਤੁਯੋ ਤਿਟ੍ਠਨ੍ਤਿ, ਤਾਵ ਪਚ੍ਛਾਤਿ ਨ ਵੇਦਿਤਬ੍ਬਂ. ਧਾਤੂਸੁ ਹਿ ਠਿਤਾਸੁ ਬੁਦ੍ਧਾਪਿ ਠਿਤਾਵ ਹੋਨ੍ਤਿ. ਤਸ੍ਮਾ ਏਤ੍ਥਨ੍ਤਰੇ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨਿਵਾਰਿਤਾਵ ਹੋਤਿ. ਧਾਤੁਪਰਿਨਿਬ੍ਬਾਨੇ ਪਨ ਜਾਤੇ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨ ਨਿਵਾਰਿਤਾ.

ਤਿਪਿਟਕਅਨ੍ਤਰਧਾਨਕਥਾ

ਤੀਣਿ ਅਨ੍ਤਰਧਾਨਾਨਿ ਨਾਮ ਪਰਿਯਤ੍ਤਿਅਨ੍ਤਰਧਾਨਂ, ਪਟਿਵੇਧਅਨ੍ਤਰਧਾਨਂ, ਪਟਿਪਤ੍ਤਿਅਨ੍ਤਰਧਾਨਨ੍ਤਿ. ਤਤ੍ਥ ਪਰਿਯਤ੍ਤੀਤਿ ਤੀਣਿ ਪਿਟਕਾਨਿ. ਪਟਿਵੇਧੋਤਿ ਸਚ੍ਚਪ੍ਪਟਿਵੇਧੋ. ਪਟਿਪਤ੍ਤੀਤਿ ਪਟਿਪਦਾ. ਤਤ੍ਥ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਏਕਸ੍ਮਿਞ੍ਹਿ ਕਾਲੇ ਪਟਿਵੇਧਕਰਾ ਭਿਕ੍ਖੂ ਬਹੂ ਹੋਨ੍ਤਿ, ਏਸ ਭਿਕ੍ਖੁ ਪੁਥੁਜ੍ਜਨੋਤਿ ਅਙ੍ਗੁਲਿਂ ਪਸਾਰੇਤ੍ਵਾ ਦਸ੍ਸੇਤਬ੍ਬੋ ਹੋਤਿ. ਇਮਸ੍ਮਿਂਯੇਵ ਦੀਪੇ ਏਕਵਾਰਂ ਪੁਥੁਜ੍ਜਨਭਿਕ੍ਖੁ ਨਾਮ ਨਾਹੋਸਿ. ਪਟਿਪਤ੍ਤਿਪੂਰਕਾਪਿ ਕਦਾਚਿ ਬਹੂ ਹੋਨ੍ਤਿ, ਕਦਾਚਿ ਅਪ੍ਪਾ. ਇਤਿ ਪਟਿਵੇਧੋ ਚ ਪਟਿਪਤ੍ਤਿ ਚ ਹੋਤਿਪਿ ਨ ਹੋਤਿਪਿ. ਸਾਸਨਟ੍ਠਿਤਿਯਾ ਪਨ ਪਰਿਯਤ੍ਤਿ ਪਮਾਣਂ. ਪਣ੍ਡਿਤੋ ਹਿ ਤੇਪਿਟਕਂ ਸੁਤ੍ਵਾ ਦ੍ਵੇਪਿ ਪੂਰੇਤਿ.

ਯਥਾ ਅਮ੍ਹਾਕਂ ਬੋਧਿਸਤ੍ਤੋ ਆਲ਼ਾਰਸ੍ਸ ਸਨ੍ਤਿਕੇ ਪਞ੍ਚਾਭਿਞ੍ਞਾ ਸਤ੍ਤ ਚ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਪਰਿਕਮ੍ਮਂ ਪੁਚ੍ਛਿ, ਸੋ ਨ ਜਾਨਾਮੀਤਿ ਆਹ. ਤਤੋ ਉਦਕਸ੍ਸ ਸਨ੍ਤਿਕਂ ਗਨ੍ਤ੍ਵਾ ਅਧਿਗਤਵਿਸੇਸਂ ਸਂਸਨ੍ਦਿਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਪਰਿਕਮ੍ਮਂ ਪੁਚ੍ਛਿ, ਸੋ ਆਚਿਕ੍ਖਿ, ਤਸ੍ਸ ਵਚਨਸਮਨਨ੍ਤਰਮੇਵ ਮਹਾਸਤ੍ਤੋ ਤਂ ਝਾਨਂ ਸਮ੍ਪਾਦੇਸਿ, ਏਵਮੇਵ ਪਞ੍ਞਵਾ ਭਿਕ੍ਖੁ ਪਰਿਯਤ੍ਤਿਂ ਸੁਤ੍ਵਾ ਦ੍ਵੇਪਿ ਪੂਰੇਤਿ. ਤਸ੍ਮਾ ਪਰਿਯਤ੍ਤਿਯਾ ਠਿਤਾਯ ਸਾਸਨਂ ਠਿਤਂ ਹੋਤਿ. ਯਦਾ ਪਨ ਸਾ ਅਨ੍ਤਰਧਾਯਤਿ, ਤਦਾ ਪਠਮਂ ਅਭਿਧਮ੍ਮਪਿਟਕਂ ਨਸ੍ਸਤਿ. ਤਤ੍ਥ ਪਟ੍ਠਾਨਂ ਸਬ੍ਬਪਠਮਂ ਅਨ੍ਤਰਧਾਯਤਿ. ਅਨੁਕ੍ਕਮੇਨ ਪਚ੍ਛਾ ਧਮ੍ਮਸਙ੍ਗਹੋ, ਤਸ੍ਮਿਂ ਅਨ੍ਤਰਹਿਤੇ ਇਤਰੇਸੁ ਦ੍ਵੀਸੁ ਪਿਟਕੇਸੁ ਠਿਤੇਸੁਪਿ ਸਾਸਨਂ ਠਿਤਮੇਵ ਹੋਤਿ.

ਤਤ੍ਥ ਸੁਤ੍ਤਨ੍ਤਪਿਟਕੇ ਅਨ੍ਤਰਧਾਯਮਾਨੇ ਪਠਮਂ ਅਙ੍ਗੁਤ੍ਤਰਨਿਕਾਯੋ ਏਕਾਦਸਕਤੋ ਪਟ੍ਠਾਯ ਯਾਵ ਏਕਕਾ ਅਨ੍ਤਰਧਾਯਤਿ, ਤਦਨਨ੍ਤਰਂ ਸਂਯੁਤ੍ਤਨਿਕਾਯੋ ਚਕ੍ਕਪੇਯ੍ਯਾਲਤੋ ਪਟ੍ਠਾਯ ਯਾਵ ਓਘਤਰਣਾ ਅਨ੍ਤਰਧਾਯਤਿ. ਤਦਨਨ੍ਤਰਂ ਮਜ੍ਝਿਮਨਿਕਾਯੋ ਇਨ੍ਦ੍ਰਿਯਭਾਵਨਤੋ ਪਟ੍ਠਾਯ ਯਾਵ ਮੂਲਪਰਿਯਾਯਾ ਅਨ੍ਤਰਧਾਯਤਿ. ਤਦਨਨ੍ਤਰਂ ਦੀਘਨਿਕਾਯੋ ਦਸੁਤ੍ਤਰਤੋ ਪਟ੍ਠਾਯ ਯਾਵ ਬ੍ਰਹ੍ਮਜਾਲਾ ਅਨ੍ਤਰਧਾਯਤਿ. ਏਕਿਸ੍ਸਾਪਿ ਦ੍ਵਿਨ੍ਨਮ੍ਪਿ ਗਾਥਾਨਂ ਪੁਚ੍ਛਾ ਅਦ੍ਧਾਨਂ ਗਚ੍ਛਤਿ, ਸਾਸਨਂ ਧਾਰੇਤੁਂ ਨ ਸਕ੍ਕੋਤਿ, ਸਭਿਯਪੁਚ੍ਛਾ ਆਲ਼ਵਕਪੁਚ੍ਛਾ ਵਿਯ ਚ. ਏਤਾ ਕਿਰ ਕਸ੍ਸਪਬੁਦ੍ਧਕਾਲਿਕਾ ਅਨ੍ਤਰਾ ਸਾਸਨਂ ਧਾਰੇਤੁਂ ਨਾਸਕ੍ਖਿਂਸੁ.

ਦ੍ਵੀਸੁ ਪਨ ਪਿਟਕੇਸੁ ਅਨ੍ਤਰਹਿਤੇਸੁਪਿ ਵਿਨਯਪਿਟਕੇ ਠਿਤੇ ਸਾਸਨਂ ਤਿਟ੍ਠਤਿ. ਪਰਿਵਾਰਕ੍ਖਨ੍ਧਕੇਸੁ ਅਨ੍ਤਰਹਿਤੇਸੁ ਉਭਤੋਵਿਭਙ੍ਗੇ ਠਿਤੇ ਠਿਤਮੇਵ ਹੋਤਿ. ਉਭਤੋਵਿਭਙ੍ਗੇ ਅਨ੍ਤਰਹਿਤੇ ਮਾਤਿਕਾਯਪਿ ਠਿਤਾਯ ਠਿਤਮੇਵ ਹੋਤਿ. ਮਾਤਿਕਾਯ ਅਨ੍ਤਰਹਿਤਾਯ ਪਾਤਿਮੋਕ੍ਖਪਬ੍ਬਜ੍ਜਾਉਪਸਮ੍ਪਦਾਸੁ ਠਿਤਾਸੁ ਸਾਸਨਂ ਤਿਟ੍ਠਤਿ. ਲਿਙ੍ਗਂ ਅਦ੍ਧਾਨਂ ਗਚ੍ਛਤਿ. ਸੇਤਵਤ੍ਥਸਮਣਵਂਸੋ ਪਨ ਕਸ੍ਸਪਬੁਦ੍ਧਕਾਲਤੋ ਪਟ੍ਠਾਯ ਸਾਸਨਂ ਧਾਰੇਤੁਂ ਨਾਸਕ੍ਖਿ. ਪਟਿਸਮ੍ਭਿਦਾਪਤ੍ਤੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ. ਛਲ਼ਭਿਞ੍ਞੇਹਿ ਵਸ੍ਸਸਹਸ੍ਸਂ. ਤੇਵਿਜ੍ਜੇਹਿ ਵਸ੍ਸਸਹਸ੍ਸਂ. ਸੁਕ੍ਖਵਿਪਸ੍ਸਕੇਹਿ ਵਸ੍ਸਸਹਸ੍ਸਂ. ਪਾਤਿਮੋਕ੍ਖੇਹਿ ਵਸ੍ਸਸਹਸ੍ਸਂ ਅਟ੍ਠਾਸਿ. ਪਚ੍ਛਿਮਕਸ੍ਸ ਪਨ ਸਚ੍ਚਪ੍ਪਟਿਵੇਧਤੋ ਪਚ੍ਛਿਮਕਸ੍ਸ ਸੀਲਭੇਦਤੋ ਪਟ੍ਠਾਯ ਸਾਸਨਂ ਓਸਕ੍ਕਿਤਂ ਨਾਮ ਹੋਤਿ. ਤਤੋ ਪਟ੍ਠਾਯ ਅਞ੍ਞਸ੍ਸ ਬੁਦ੍ਧਸ੍ਸ ਉਪ੍ਪਤ੍ਤਿ ਨ ਨਿਵਾਰਿਤਾ.

ਸਾਸਨਅਨ੍ਤਰਹਿਤਵਣ੍ਣਨਾ

ਤੀਣਿ ਪਰਿਨਿਬ੍ਬਾਨਾਨਿ ਨਾਮ ਕਿਲੇਸਪਰਿਨਿਬ੍ਬਾਨਂ ਖਨ੍ਧਪਰਿਨਿਬ੍ਬਾਨਂ ਧਾਤੁਪਰਿਨਿਬ੍ਬਾਨਨ੍ਤਿ. ਤਤ੍ਥ ਕਿਲੇਸਪਰਿਨਿਬ੍ਬਾਨਂ ਬੋਧਿਪਲ੍ਲਙ੍ਕੇ ਅਹੋਸਿ. ਖਨ੍ਧਪਰਿਨਿਬ੍ਬਾਨਂ ਕੁਸਿਨਾਰਾਯਂ. ਧਾਤੁਪਰਿਨਿਬ੍ਬਾਨਂ ਅਨਾਗਤੇ ਭਵਿਸ੍ਸਤਿ. ਸਾਸਨਸ੍ਸ ਕਿਰ ਓਸਕ੍ਕਨਕਾਲੇ ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਧਾਤੁਯੋ ਸਨ੍ਨਿਪਤਿਤ੍ਵਾ ਮਹਾਚੇਤਿਯਂ ਗਮਿਸ੍ਸਨ੍ਤਿ. ਮਹਾਚੇਤਿਯਤੋ ਨਾਗਦੀਪੇ ਰਾਜਾਯਤਨਚੇਤਿਯਂ. ਤਤੋ ਮਹਾਬੋਧਿਪਲ੍ਲਙ੍ਕਂ ਗਮਿਸ੍ਸਨ੍ਤਿ. ਨਾਗਭਵਨਤੋਪਿ ਦੇਵਲੋਕਤੋਪਿ ਬ੍ਰਹ੍ਮਲੋਕਤੋਪਿ ਧਾਤੁਯੋ ਮਹਾਬੋਧਿਪਲ੍ਲਙ੍ਕਮੇਵ ਗਮਿਸ੍ਸਨ੍ਤਿ. ਸਾਸਪਮਤ੍ਤਾਪਿ ਧਾਤੁਯੋ ਨ ਅਨ੍ਤਰਾ ਨਸ੍ਸਿਸ੍ਸਨ੍ਤਿ. ਸਬ੍ਬਧਾਤੁਯੋ ਮਹਾਬੋਧਿਪਲ੍ਲਙ੍ਕੇ ਰਾਸਿਭੂਤਾ ਸੁਵਣ੍ਣਕ੍ਖਨ੍ਧੋ ਵਿਯ ਏਕਗ੍ਘਨਾ ਹੁਤ੍ਵਾ ਛਬ੍ਬਣ੍ਣਰਸ੍ਮਿਯੋ ਵਿਸ੍ਸਜ੍ਜੇਸ੍ਸਨ੍ਤਿ.

ਤਾ ਦਸਸਹਸ੍ਸਿਲੋਕਧਾਤੁਂ ਫਰਿਸ੍ਸਨ੍ਤਿ, ਤਤੋ ਦਸਸਹਸ੍ਸਚਕ੍ਕਵਾਲ਼ਦੇਵਤਾ ਸਨ੍ਨਿਪਤਿਤ੍ਵਾ ‘‘ਅਜ੍ਜ ਸਤ੍ਥਾ ਪਰਿਨਿਬ੍ਬਾਤਿ, ਅਜ੍ਜ ਸਾਸਨਂ ਓਸਕ੍ਕਤਿ, ਪਚ੍ਛਿਮਦਸ੍ਸਨਂ ਦਾਨਿ ਇਦਂ ਅਮ੍ਹਾਕ’’ਨ੍ਤਿ ਦਸਬਲਸ੍ਸ ਪਰਿਨਿਬ੍ਬੁਤਦਿਵਸਤੋ ਮਹਨ੍ਤਤਰਂ ਕਾਰੁਞ੍ਞਂ ਕਰਿਸ੍ਸਨ੍ਤਿ. ਠਪੇਤ੍ਵਾ ਅਨਾਗਾਮਿਖੀਣਾਸਵੇ ਅਵਸੇਸਾ ਸਕਭਾਵੇਨ ਸਨ੍ਧਾਰੇਤੁਂ ਨ ਸਕ੍ਖਿਸ੍ਸਨ੍ਤਿ. ਧਾਤੂਸੁ ਤੇਜੋਧਾਤੁ ਉਟ੍ਠਹਿਤ੍ਵਾ ਯਾਵ ਬ੍ਰਹ੍ਮਲੋਕਾ ਉਗ੍ਗਚ੍ਛਿਸ੍ਸਤਿ. ਸਾਸਪਮਤ੍ਤਾਯਪਿ ਧਾਤੁਯਾ ਸਤਿ ਏਕਜਾਲਾ ਭਵਿਸ੍ਸਤਿ. ਧਾਤੂਸੁ ਪਰਿਯਾਦਾਨਂ ਗਤਾਸੁ ਉਪਚ੍ਛਿਜ੍ਜਿਸ੍ਸਤਿ. ਏਵਂ ਮਹਨ੍ਤਂ ਆਨੁਭਾਵਂ ਦਸ੍ਸੇਤ੍ਵਾ ਧਾਤੂਸੁ ਅਨ੍ਤਰਹਿਤਾਸੁ ਸਾਸਨਂ ਅਨ੍ਤਰਹਿਤਂ ਨਾਮ ਹੋਤਿ.

ਯਾਵ ਨ ਏਵਂ ਅਨ੍ਤਰਧਾਯਤਿ, ਤਾਵ ਅਚਰਿਮਂ ਨਾਮ ਹੋਤਿ. ਏਵਂ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤਿ. ਕਸ੍ਮਾ ਪਨ ਅਪੁਬ੍ਬਂ ਅਚਰਿਮਂ ਨੁਪ੍ਪਜ੍ਜਨ੍ਤੀਤਿ? ਅਨਚ੍ਛਰਿਯਤ੍ਤਾ. ਬੁਦ੍ਧਾ ਹਿ ਅਚ੍ਛਰਿਯਮਨੁਸ੍ਸਾ. ਯਥਾਹ – ‘‘ਏਕਪੁਗ੍ਗਲੋ, ਭਿਕ੍ਖਵੇ, ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਅਚ੍ਛਰਿਯਮਨੁਸ੍ਸੋ. ਕਤਮੋ ਏਕਪੁਗ੍ਗਲੋ? ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ’’ਤਿ (ਅ. ਨਿ. ੧.੧੭੨). ਯਦਿ ਚ ਦ੍ਵੇ ਵਾ ਚਤ੍ਤਾਰੋ ਵਾ ਅਟ੍ਠ ਵਾ ਸੋਲ਼ਸ ਵਾ ਏਕਤੋ ਉਪ੍ਪਜ੍ਜੇਯ੍ਯੁਂ, ਅਨਚ੍ਛਰਿਯਾ ਭਵੇਯ੍ਯੁਂ. ਏਕਸ੍ਮਿਞ੍ਹਿ ਵਿਹਾਰੇ ਦ੍ਵਿਨ੍ਨਂ ਚੇਤਿਯਾਨਮ੍ਪਿ ਲਾਭਸਕ੍ਕਾਰੋ ਉਲ਼ਾਰੋ ਨ ਹੋਤਿ. ਭਿਕ੍ਖੂਪਿ ਬਹੁਤਾਯ ਨ ਅਚ੍ਛਰਿਯਾ ਜਾਤਾ, ਏਵਂ ਬੁਦ੍ਧਾਪਿ ਭਵੇਯ੍ਯੁਂ, ਤਸ੍ਮਾ ਨੁਪ੍ਪਜ੍ਜਨ੍ਤਿ. ਦੇਸਨਾਯ ਚ ਵਿਸੇਸਾਭਾਵਤੋ. ਯਞ੍ਹਿ ਸਤਿਪਟ੍ਠਾਨਾਦਿਭੇਦਂ ਧਮ੍ਮਂ ਏਕੋ ਦੇਸੇਤਿ. ਅਞ੍ਞੇਨ ਉਪ੍ਪਜ੍ਜਿਤ੍ਵਾਪਿ ਸੋਵ ਦੇਸੇਤਬ੍ਬੋ ਸਿਯਾ, ਤਤੋ ਅਨਚ੍ਛਰਿਯੋ ਸਿਯਾ. ਏਕਸ੍ਮਿਂ ਪਨ ਧਮ੍ਮਂ ਦੇਸੇਨ੍ਤੇ ਦੇਸਨਾਪਿ ਅਚ੍ਛਰਿਯਾ ਹੋਤਿ, ਵਿਵਾਦਭਾਵਤੋ ਚ. ਬਹੂਸੁ ਹਿ ਬੁਦ੍ਧੇਸੁ ਉਪ੍ਪਨ੍ਨੇਸੁ ਬਹੂਨਂ ਆਚਰਿਯਾਨਂ ਅਨ੍ਤੇਵਾਸਿਕਾ ਵਿਯ ਅਮ੍ਹਾਕਂ ਬੁਦ੍ਧੋ ਪਾਸਾਦਿਕੋ, ਅਮ੍ਹਾਕਂ ਬੁਦ੍ਧੋ ਮਧੁਰਸ੍ਸਰੋ ਲਾਭੀ ਪੁਞ੍ਞਵਾਤਿ ਵਿਵਦੇਯ੍ਯੁਂ. ਤਸ੍ਮਾਪਿ ਏਵਂ ਨੁਪ੍ਪਜ੍ਜਨ੍ਤਿ. ਅਪਿ ਚੇਤਂ ਕਾਰਣਂ ਮਿਲਿਨ੍ਦਰਞ੍ਞਾਪਿ ਪੁਟ੍ਠੇਨ ਨਾਗਸੇਨਤ੍ਥੇਰੇਨ ਵਿਤ੍ਥਾਰਿਤਮੇਵ. ਵੁਤ੍ਤਞ੍ਹਿ ਤਤ੍ਥ –

ਭਨ੍ਤੇ, ਨਾਗਸੇਨ, ਭਾਸਿਤਮ੍ਪਿ ਹੇਤਂ ਭਗਵਤਾ ‘‘ਅਟ੍ਠਾਨਮੇਤਂ, ਭਿਕ੍ਖਵੇ, ਅਨਵਕਾਸੋ, ਯਂ ਏਕਿਸ੍ਸਾ ਲੋਕਧਾਤੁਯਾ ਦ੍ਵੇ ਅਰਹਨ੍ਤੋ ਸਮ੍ਮਾਸਮ੍ਬੁਦ੍ਧਾ ਅਪੁਬ੍ਬਂ ਅਚਰਿਮਂ ਉਪ੍ਪਜ੍ਜੇਯ੍ਯੁਂ, ਨੇਤਂ ਠਾਨਂ ਵਿਜ੍ਜਤੀ’’ਤਿ. ਦੇਸਯਨ੍ਤਾ ਚ, ਭਨ੍ਤੇ ਨਾਗਸੇਨ, ਸਬ੍ਬੇਪਿ ਤਥਾਗਤਾ ਸਤ੍ਤਤਿਂਸ ਬੋਧਿਪਕ੍ਖਿਯੇ ਧਮ੍ਮੇ ਦੇਸੇਨ੍ਤਿ, ਕਥਯਮਾਨਾ ਚ ਚਤ੍ਤਾਰਿ ਅਰਿਯਸਚ੍ਚਾਨਿ ਕਥੇਨ੍ਤਿ, ਸਿਕ੍ਖਾਪੇਨ੍ਤਾ ਚ ਤੀਸੁ ਸਿਕ੍ਖਾਸੁ ਸਿਕ੍ਖਾਪੇਨ੍ਤਿ, ਅਨੁਸਾਸਮਾਨਾ ਚ ਅਪ੍ਪਮਾਦਪ੍ਪਟਿਪਤ੍ਤਿਯਂ ਅਨੁਸਾਸਨ੍ਤਿ. ਯਦਿ, ਭਨ੍ਤੇ ਨਾਗਸੇਨ, ਸਬ੍ਬੇਸਮ੍ਪਿ ਤਥਾਗਤਾਨਂ ਏਕਾ ਦੇਸਨਾ ਏਕਾ ਕਥਾ ਏਕਸਿਕ੍ਖਾ ਏਕਾਨੁਸਾਸਨੀ, ਕੇਨ ਕਾਰਣੇਨ ਦ੍ਵੇ ਤਥਾਗਤਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਏਕੇਨਪਿ ਤਾਵ ਬੁਦ੍ਧੁਪ੍ਪਾਦੇਨ ਅਯਂ ਲੋਕੋ ਓਭਾਸਜਾਤੋ, ਯਦਿ ਦੁਤਿਯੋ ਬੁਦ੍ਧੋ ਭਵੇਯ੍ਯ, ਦ੍ਵਿਨ੍ਨਂ ਪਭਾਯ ਅਯਂ ਲੋਕੋ ਭਿਯ੍ਯੋਸੋਮਤ੍ਤਾਯ ਓਭਾਸਜਾਤੋ ਭਵੇਯ੍ਯ, ਓਵਦਮਾਨਾ ਚ ਦ੍ਵੇ ਤਥਾਗਤਾ ਸੁਖਂ ਓਵਦੇਯ੍ਯੁਂ, ਅਨੁਸਾਸਮਾਨਾ ਚ ਸੁਖਂ ਅਨੁਸਾਸੇਯ੍ਯੁਂ, ਤਤ੍ਥ ਮੇ ਕਾਰਣਂ ਦੇਸੇਹਿ, ਯਥਾਹਂ ਨਿਸ੍ਸਂਸਯੋ ਭਵੇਯ੍ਯ’’ਨ੍ਤਿ.

ਅਯਂ, ਮਹਾਰਾਜ, ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ, ਏਕਸ੍ਸੇਵ ਤਥਾਗਤਸ੍ਸ ਗੁਣਂ ਧਾਰੇਤਿ, ਯਦਿ ਦੁਤਿਯੋ ਬੁਦ੍ਧੋ ਉਪ੍ਪਜ੍ਜੇਯ੍ਯ, ਨਾਯਂ ਦਸਸਹਸ੍ਸੀ ਲੋਕਧਾਤੁ ਧਾਰੇਯ੍ਯ, ਚਲੇਯ੍ਯ, ਕਮ੍ਪੇਯ੍ਯ, ਨਮੇਯ੍ਯ, ਓਣਮੇਯ੍ਯ, ਵਿਨਮੇਯ੍ਯ, ਵਿਕਿਰੇਯ੍ਯ, ਵਿਧਮੇਯ੍ਯ, ਵਿਦ੍ਧਂਸੇਯ੍ਯ, ਨ ਠਾਨਮੁਪਗਚ੍ਛੇਯ੍ਯ.

ਯਥਾ, ਮਹਾਰਾਜ, ਨਾਵਾ ਏਕਪੁਰਿਸਸਨ੍ਧਾਰਣੀ ਭਵੇਯ੍ਯ, ਏਕਪੁਰਿਸੇ ਅਭਿਰੂਲ਼੍ਹੇ ਸਾ ਨਾਵਾ ਸਮੁਪਾਦਿਕਾ ਭਵੇਯ੍ਯ, ਅਥ ਦੁਤਿਯੋ ਪੁਰਿਸੋ ਆਗਚ੍ਛੇਯ੍ਯ ਤਾਦਿਸੋ ਆਯੁਨਾ ਵਣ੍ਣੇਨ ਵਯੇਨ ਪਮਾਣੇਨ ਕਿਸਥੂਲੇਨ ਸਬ੍ਬਙ੍ਗਪਚ੍ਚਙ੍ਗੇਨ, ਸੋ ਤਂ ਨਾਵਂ ਅਭਿਰੂਹੇਯ੍ਯ, ਅਪਿ ਨੁ ਸਾ, ਮਹਾਰਾਜ, ਨਾਵਾ ਦ੍ਵਿਨ੍ਨਮ੍ਪਿ ਧਾਰੇਯ੍ਯਾਤਿ? ਨ ਹਿ, ਭਨ੍ਤੇ, ਚਲੇਯ੍ਯ, ਕਮ੍ਪੇਯ੍ਯ, ਨਮੇਯ੍ਯ, ਓਣਮੇਯ੍ਯ, ਵਿਨਮੇਯ੍ਯ, ਵਿਕਿਰੇਯ੍ਯ, ਵਿਧਮੇਯ੍ਯ, ਵਿਦ੍ਧਂਸੇਯ੍ਯ, ਨ ਠਾਨਮੁਪਗਚ੍ਛੇਯ੍ਯ ਓਸੀਦੇਯ੍ਯ ਉਦਕੇਤਿ. ਏਵਮੇਵ ਖੋ, ਮਹਾਰਾਜ, ਅਯਂ ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ, ਏਕਸ੍ਸੇਵ ਤਥਾਗਤਸ੍ਸ ਗੁਣਂ ਧਾਰੇਤਿ, ਯਦਿ ਦੁਤਿਯੋ ਬੁਦ੍ਧੋ ਉਪ੍ਪਜ੍ਜੇਯ੍ਯ, ਨਾਯਂ ਦਸਸਹਸ੍ਸੀ ਲੋਕਧਾਤੁ ਧਾਰੇਯ੍ਯ…ਪੇ… ਨ ਠਾਨਮੁਪਗਚ੍ਛੇਯ੍ਯ.

ਯਥਾ ਵਾ ਪਨ, ਮਹਾਰਾਜ, ਪੁਰਿਸੋ ਯਾਵਦਤ੍ਥਂ ਭੋਜਨਂ ਭੁਞ੍ਜੇਯ੍ਯ ਛਾਦੇਨ੍ਤਂ ਯਾਵ ਕਣ੍ਠਮਭਿਪੂਰਯਿਤ੍ਵਾ, ਸੋ ਧਾਤੋ ਪੀਣਿਤੋ ਪਰਿਪੁਣ੍ਣੋ ਨਿਰਨ੍ਤਰੋ ਤਨ੍ਦੀਕਤੋ ਅਨੋਣਮਿਤਦਣ੍ਡਜਾਤੋ ਪੁਨਦੇਵ ਤਾਵਤਕਂ ਭੋਜਨਂ ਭੁਞ੍ਜੇਯ੍ਯ, ਅਪਿ ਨੁ ਖੋ ਸੋ, ਮਹਾਰਾਜ, ਪੁਰਿਸੋ ਸੁਖਿਤੋ ਭਵੇਯ੍ਯਾਤਿ? ਨ ਹਿ, ਭਨ੍ਤੇ, ਸਕਿਂ ਭੁਤ੍ਤੋਵ ਮਰੇਯ੍ਯਾਤਿ; ਏਵਮੇਵ ਖੋ, ਮਹਾਰਾਜ, ਅਯਂ ਦਸਸਹਸ੍ਸੀ ਲੋਕਧਾਤੁ ਏਕਬੁਦ੍ਧਧਾਰਣੀ …ਪੇ… ਨ ਠਾਨਮੁਪਗਚ੍ਛੇਯ੍ਯਾਤਿ.

ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਅਤਿਧਮ੍ਮਭਾਰੇਨ ਪਥਵੀ ਚਲਤੀਤਿ? ਇਧ, ਮਹਾਰਾਜ, ਦ੍ਵੇ ਸਕਟਾ ਰਤਨਪੂਰਿਤਾ ਭਵੇਯ੍ਯੁਂ ਯਾਵ ਮੁਖਸਮਾ, ਏਕਸ੍ਮਾ ਸਕਟਤੋ ਰਤਨਂ ਗਹੇਤ੍ਵਾ ਏਕਸ੍ਮਿਂ ਸਕਟੇ ਆਕਿਰੇਯ੍ਯੁਂ, ਅਪਿ ਨੁ ਖੋ ਤਂ, ਮਹਾਰਾਜ, ਸਕਟਂ ਦ੍ਵਿਨ੍ਨਮ੍ਪਿ ਸਕਟਾਨਂ ਰਤਨਂ ਧਾਰੇਯ੍ਯਾਤਿ? ਨ ਹਿ, ਭਨ੍ਤੇ, ਨਾਭਿਪਿ ਤਸ੍ਸ ਫਲੇਯ੍ਯ, ਅਰਾਪਿ ਤਸ੍ਸ ਭਿਜ੍ਜੇਯ੍ਯੁਂ, ਨੇਮਿਪਿ ਤਸ੍ਸ ਓਪਤੇਯ੍ਯ, ਅਕ੍ਖੋਪਿ ਤਸ੍ਸ ਭਿਜ੍ਜੇਯ੍ਯਾਤਿ. ਕਿਂ ਨੁ ਖੋ, ਮਹਾਰਾਜ, ਅਤਿਰਤਨਭਾਰੇਨ ਸਕਟਂ ਭਿਜ੍ਜਤੀਤਿ? ਆਮ, ਭਨ੍ਤੇ,ਤਿ. ਏਵਮੇਵ ਖੋ, ਮਹਾਰਾਜ, ਅਤਿਧਮ੍ਮਭਾਰੇਨ ਪਥਵੀ ਚਲਤਿ.

ਅਪਿਚ, ਮਹਾਰਾਜ, ਇਮਂ ਕਾਰਣਂ ਬੁਦ੍ਧਬਲਪਰਿਦੀਪਨਾਯ ਓਸਾਰਿਤਂ ਅਞ੍ਞਮ੍ਪਿ ਤਤ੍ਥ ਅਤਿਰੂਪਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਯਦਿ, ਮਹਾਰਾਜ, ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ਤੇਸਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਬੁਦ੍ਧੋ ਅਮ੍ਹਾਕਂ ਬੁਦ੍ਧੋ’’ਤਿ, ਉਭਤੋ ਪਕ੍ਖਜਾਤਾ ਭਵੇਯ੍ਯੁਂ. ਯਥਾ, ਮਹਾਰਾਜ, ਦ੍ਵਿਨ੍ਨਂ ਬਲਵਾਮਚ੍ਚਾਨਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਅਮਚ੍ਚੋ ਅਮ੍ਹਾਕਂ ਅਮਚ੍ਚੋ’’ਤਿ, ਉਭਤੋ ਪਕ੍ਖਜਾਤਾ ਹੋਨ੍ਤਿ; ਏਵਮੇਵ ਖੋ, ਮਹਾਰਾਜ, ਯਦਿ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ਤੇਸਂ ਪਰਿਸਾਯ ਵਿਵਾਦੋ ਉਪ੍ਪਜ੍ਜੇਯ੍ਯ ‘‘ਤੁਮ੍ਹਾਕਂ ਬੁਦ੍ਧੋ, ਅਮ੍ਹਾਕਂ ਬੁਦ੍ਧੋ’’ਤਿ, ਉਭਤੋ ਪਕ੍ਖਜਾਤਾ ਭਵੇਯ੍ਯੁਂ, ਇਦਂ ਤਾਵ, ਮਹਾਰਾਜ, ਏਕਂ ਕਾਰਣਂ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ.

ਅਪਰਮ੍ਪਿ, ਮਹਾਰਾਜ, ਉਤ੍ਤਰਿਂ ਕਾਰਣਂ ਸੁਣੋਹਿ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ. ਯਦਿ, ਮਹਾਰਾਜ, ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਉਪ੍ਪਜ੍ਜੇਯ੍ਯੁਂ, ‘‘ਅਗ੍ਗੋ ਬੁਦ੍ਧੋ’’ਤਿ ਯਂ ਵਚਨਂ, ਤਂ ਮਿਚ੍ਛਾ ਭਵੇਯ੍ਯ, ‘‘ਜੇਟ੍ਠੋ ਬੁਦ੍ਧੋ’’ਤਿ, ਸੇਟ੍ਠੋ ਬੁਦ੍ਧੋਤਿ, ਵਿਸਿਟ੍ਠੋ ਬੁਦ੍ਧੋਤਿ, ਉਤ੍ਤਮੋ ਬੁਦ੍ਧੋਤਿ, ਪਵਰੋ ਬੁਦ੍ਧੋਤਿ, ਅਸਮੋ ਬੁਦ੍ਧੋਤਿ, ਅਸਮਸਮੋ ਬੁਦ੍ਧੋਤਿ, ਅਪ੍ਪਟਿਮੋ ਬੁਦ੍ਧੋਤਿ, ਅਪ੍ਪਟਿਭਾਗੋ ਬੁਦ੍ਧੋਤਿ, ਅਪ੍ਪਟਿਪੁਗ੍ਗਲੋ ਬੁਦ੍ਧੋਤਿ ਯਂ ਵਚਨਂ, ਤਂ ਮਿਚ੍ਛਾ ਭਵੇਯ੍ਯ. ਇਮਮ੍ਪਿ ਖੋ ਤ੍ਵਂ, ਮਹਾਰਾਜ, ਕਾਰਣਂ ਅਤ੍ਥਤੋ ਸਮ੍ਪਟਿਚ੍ਛ, ਯੇਨ ਕਾਰਣੇਨ ਦ੍ਵੇ ਸਮ੍ਮਾਸਮ੍ਬੁਦ੍ਧਾ ਏਕਕ੍ਖਣੇ ਨੁਪ੍ਪਜ੍ਜਨ੍ਤਿ.

ਅਪਿਚ ਖੋ, ਮਹਾਰਾਜ, ਬੁਦ੍ਧਾਨਂ ਭਗਵਨ੍ਤਾਨਂ ਸਭਾਵਪਕਤਿ ਏਸਾ, ਯਂ ਏਕੋਯੇਵ ਬੁਦ੍ਧੋ ਲੋਕੇ ਉਪ੍ਪਜ੍ਜਤਿ. ਕਸ੍ਮਾ ਕਾਰਣਾ? ਮਹਨ੍ਤਤਾਯ ਸਬ੍ਬਞ੍ਞੁਬੁਦ੍ਧਗੁਣਾਨਂ, ਯਂ ਅਞ੍ਞਮ੍ਪਿ, ਮਹਾਰਾਜ, ਮਹਨ੍ਤਂ ਹੋਤਿ, ਤਂ ਏਕਂਯੇਵ ਹੋਤਿ. ਪਥਵੀ, ਮਹਾਰਾਜ, ਮਹਨ੍ਤੀ, ਸਾ ਏਕਾਯੇਵ. ਸਾਗਰੋ ਮਹਨ੍ਤੋ, ਸੋ ਏਕੋਯੇਵ. ਸਿਨੇਰੁ ਗਿਰਿਰਾਜਾ ਮਹਨ੍ਤੋ, ਸੋ ਏਕੋਯੇਵ. ਆਕਾਸੋ ਮਹਨ੍ਤੋ, ਸੋ ਏਕੋਯੇਵ. ਸਕ੍ਕੋ ਮਹਨ੍ਤੋ, ਸੋ ਏਕੋਯੇਵ. ਮਾਰੋ ਮਹਨ੍ਤੋ, ਸੋ ਏਕੋਯੇਵ. ਮਹਾਬ੍ਰਹ੍ਮਾ ਮਹਨ੍ਤੋ, ਸੋ ਏਕੋਯੇਵ. ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਮਹਨ੍ਤੋ, ਸੋ ਏਕੋਯੇਵ ਲੋਕਸ੍ਮਿਂ. ਯਤ੍ਥ ਤੇ ਉਪ੍ਪਜ੍ਜਨ੍ਤਿ, ਤਤ੍ਥ ਅਞ੍ਞੇਸਂ ਓਕਾਸੋ ਨ ਹੋਤਿ. ਤਸ੍ਮਾ, ਮਹਾਰਾਜ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ ਏਕੋਯੇਵ ਲੋਕੇ ਉਪ੍ਪਜ੍ਜਤੀਤਿ. ਸੁਕਥਿਤੋ, ਭਨ੍ਤੇ ਨਾਗਸੇਨ, ਪਞ੍ਹੋ ਓਪਮ੍ਮੇਹਿ ਕਾਰਣੇਹੀਤਿ (ਮਿ. ਪ. ੫.੧.੧).

ਧਮ੍ਮਸ੍ਸ ਚਾਨੁਧਮ੍ਮਨ੍ਤਿ ਨਵਵਿਧਸ੍ਸ ਲੋਕੁਤ੍ਤਰਧਮ੍ਮਸ੍ਸ ਅਨੁਧਮ੍ਮਂ ਪੁਬ੍ਬਭਾਗਪ੍ਪਟਿਪਦਂ. ਸਹਧਮ੍ਮਿਕੋਤਿ ਸਕਾਰਣੋ. ਵਾਦਾਨੁਵਾਦੋਤਿ ਵਾਦੋਯੇਵ.

ਅਚ੍ਛਰਿਯਅਬ੍ਭੁਤਵਣ੍ਣਨਾ

੧੬੨. ਆਯਸ੍ਮਾ ਉਦਾਯੀਤਿ ਤਯੋ ਥੇਰਾ ਉਦਾਯੀ ਨਾਮ – ਲਾਲ਼ੁਦਾਯੀ, ਕਾਲ਼ੁਦਾਯੀ, ਮਹਾਉਦਾਯੀਤਿ. ਇਧ ਮਹਾਉਦਾਯੀ ਅਧਿਪ੍ਪੇਤੋ. ਤਸ੍ਸ ਕਿਰ ਇਮਂ ਸੁਤ੍ਤਂ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਸੁਣਨ੍ਤਸ੍ਸ ਅਬ੍ਭਨ੍ਤਰੇ ਪਞ੍ਚਵਣ੍ਣਾ ਪੀਤਿ ਉਪ੍ਪਜ੍ਜਿਤ੍ਵਾ ਪਾਦਪਿਟ੍ਠਿਤੋ ਸੀਸਮਤ੍ਥਕਂ ਗਚ੍ਛਤਿ, ਸੀਸਮਤ੍ਥਕਤੋ ਪਾਦਪਿਟ੍ਠਿਂ ਆਗਚ੍ਛਤਿ, ਉਭਤੋ ਪਟ੍ਠਾਯ ਮਜ੍ਝਂ ਓਤਰਤਿ, ਮਜ੍ਝਤੋ ਪਟ੍ਠਾਯ ਉਭਤੋ ਗਚ੍ਛਤਿ. ਸੋ ਨਿਰਨ੍ਤਰਂ ਪੀਤਿਯਾ ਫੁਟਸਰੀਰੋ ਬਲਵਸੋਮਨਸ੍ਸੇਨ ਦਸਬਲਸ੍ਸ ਗੁਣਂ ਕਥੇਨ੍ਤੋ ਅਚ੍ਛਰਿਯਂ ਭਨ੍ਤੇਤਿਆਦਿਮਾਹ. ਅਪ੍ਪਿਚ੍ਛਤਾਤਿ ਨਿਤ੍ਤਣ੍ਹਤਾ. ਸਨ੍ਤੁਟ੍ਠਿਤਾਤਿ ਚਤੂਸੁ ਪਚ੍ਚਯੇਸੁ ਤੀਹਾਕਾਰੇਹਿ ਸਨ੍ਤੋਸੋ. ਸਲ੍ਲੇਖਤਾਤਿ ਸਬ੍ਬਕਿਲੇਸਾਨਂ ਸਲ੍ਲਿਖਿਤਭਾਵੋ. ਯਤ੍ਰ ਹਿ ਨਾਮਾਤਿ ਯੋ ਨਾਮ. ਨ ਅਤ੍ਤਾਨਂ ਪਾਤੁਕਰਿਸ੍ਸਤੀਤਿ ਅਤ੍ਤਨੋ ਗੁਣੇ ਨ ਆਵਿ ਕਰਿਸ੍ਸਤਿ. ਪਟਾਕਂ ਪਰਿਹਰੇਯ੍ਯੁਨ੍ਤਿ ‘‘ਕੋ ਅਮ੍ਹੇਹਿ ਸਦਿਸੋ ਅਤ੍ਥੀ’’ਤਿ ਵਦਨ੍ਤਾ ਪਟਾਕਂ ਉਕ੍ਖਿਪਿਤ੍ਵਾ ਨਾਲ਼ਨ੍ਦਂ ਵਿਚਰੇਯ੍ਯੁਂ.

ਪਸ੍ਸ ਖੋ ਤ੍ਵਂ, ਉਦਾਯਿ, ਤਥਾਗਤਸ੍ਸ ਅਪ੍ਪਿਚ੍ਛਤਾਤਿ ਪਸ੍ਸ ਉਦਾਯਿ ਯਾਦਿਸੀ ਤਥਾਗਤਸ੍ਸ ਅਪ੍ਪਿਚ੍ਛਤਾਤਿ ਥੇਰਸ੍ਸ ਵਚਨਂ ਸਮ੍ਪਟਿਚ੍ਛਨ੍ਤੋ ਆਹ. ਕਿਂ ਪਨ ਭਗਵਾ ਨੇਵ ਅਤ੍ਤਾਨਂ ਪਾਤੁਕਰੋਤਿ, ਨ ਅਤ੍ਤਨੋ ਗੁਣਂ ਕਥੇਤੀਤਿ ਚੇ? ਨ, ਨ ਕਥੇਤਿ. ਅਪ੍ਪਿਚ੍ਛਤਾਦੀਹਿ ਕਥੇਤਬ੍ਬਂ, ਚੀਵਰਾਦਿਹੇਤੁਂ ਨ ਕਥੇਤਿ. ਤੇਨੇਵਾਹ – ‘‘ਪਸ੍ਸ ਖੋ ਤ੍ਵਂ, ਉਦਾਯਿ, ਤਥਾਗਤਸ੍ਸ ਅਪ੍ਪਿਚ੍ਛਤਾ’’ਤਿਆਦਿ. ਬੁਜ੍ਝਨਕਸਤ੍ਤਂ ਪਨ ਆਗਮ੍ਮ ਵੇਨੇਯ੍ਯਵਸੇਨ ਕਥੇਤਿ. ਯਥਾਹ –

‘‘ਨ ਮੇ ਆਚਰਿਯੋ ਅਤ੍ਥਿ, ਸਦਿਸੋ ਮੇ ਨ ਵਿਜ੍ਜਤਿ;

ਸਦੇਵਕਸ੍ਮਿਂ ਲੋਕਸ੍ਮਿਂ, ਨਤ੍ਥਿ ਮੇ ਪਟਿਪੁਗ੍ਗਲੋ’’ਤਿ. (ਮਹਾਵ. ੧੧);

ਏਵਂ ਤਥਾਗਤਸ੍ਸ ਗੁਣਦੀਪਿਕਾ ਬਹੂ ਗਾਥਾਪਿ ਸੁਤ੍ਤਨ੍ਤਾਪਿ ਵਿਤ੍ਥਾਰੇਤਬ੍ਬਾ.

੧੬੩. ਅਭਿਕ੍ਖਣਂ ਭਾਸੇਯ੍ਯਾਸੀਤਿ ਪੁਨਪ੍ਪੁਨਂ ਭਾਸੇਯ੍ਯਾਸਿ. ਪੁਬ੍ਬਣ੍ਹਸਮਯੇ ਮੇ ਕਥਿਤਨ੍ਤਿ ਮਾ ਮਜ੍ਝਨ੍ਹਿਕਾਦੀਸੁ ਨ ਕਥਯਿਤ੍ਥ. ਅਜ੍ਜ ਵਾ ਮੇ ਕਥਿਤਨ੍ਤਿ ਮਾ ਪਰਦਿਵਸਾਦੀਸੁ ਨ ਕਥਯਿਤ੍ਥਾਤਿ ਅਤ੍ਥੋ. ਪਵੇਦੇਸੀਤਿ ਕਥੇਸਿ. ਇਮਸ੍ਸ ਵੇਯ੍ਯਾਕਰਣਸ੍ਸਾਤਿ ਨਿਗ੍ਗਾਥਕਤ੍ਤਾ ਇਦਂ ਸੁਤ੍ਤਂ ‘‘ਵੇਯ੍ਯਾਕਰਣ’’ਨ੍ਤਿ ਵੁਤ੍ਤਂ. ਅਧਿਵਚਨਨ੍ਤਿ ਨਾਮਂ. ਇਦਂ ਪਨ ‘‘ਇਤਿ ਹਿਦ’’ਨ੍ਤਿ ਪਟ੍ਠਾਯ ਪਦਂ ਸਙ੍ਗੀਤਿਕਾਰੇਹਿ ਠਪਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਸਮ੍ਪਸਾਦਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.