੪. ਅਗ੍ਗਞ੍ਞਸੁਤ੍ਤਵਣ੍ਣਨਾ

ਵਾਸੇਟ੍ਠਭਾਰਦ੍ਵਾਜਵਣ੍ਣਨਾ

੧੧੧. ਏਵਂ ਮੇ ਸੁਤਨ੍ਤਿ ਅਗ੍ਗਞ੍ਞਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇਤਿ ਏਤ੍ਥ ਅਯਂ ਅਨੁਪੁਬ੍ਬਿਕਥਾ. ਅਤੀਤੇ ਸਤਸਹਸ੍ਸਕਪ੍ਪਮਤ੍ਥਕੇ ਏਕਾ ਉਪਾਸਿਕਾ ਪਦੁਮੁਤ੍ਤਰਂ ਭਗਵਨ੍ਤਂ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਤਸਹਸ੍ਸਸ੍ਸ ਦਾਨਂ ਦਤ੍ਵਾ ਭਗਵਤੋ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਅਗ੍ਗੁਪਟ੍ਠਾਯਿਕਾ ਹੋਮੀ’’ਤਿ ਪਤ੍ਥਨਂ ਅਕਾਸਿ. ਸਾ ਕਪ੍ਪਸਤਸਹਸ੍ਸਂ ਦੇਵੇਸੁ ਚੇਵ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਭਦ੍ਦਿਯਨਗਰੇ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ ਧਨਞ੍ਚਯਸੇਟ੍ਠਿਨੋ ਗੇਹੇ ਸੁਮਨਦੇਵਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਜਾਤਕਾਲੇ ਤਸ੍ਸਾ ਵਿਸਾਖਾਤਿ ਨਾਮਂ ਅਕਂਸੁ. ਸਾ ਯਦਾ ਭਗਵਾ ਭਦ੍ਦਿਯਨਗਰਂ ਆਗਮਾਸਿ, ਤਦਾ ਪਞ੍ਚਦਾਸਿਸਤੇਹਿ ਸਦ੍ਧਿਂ ਭਗਵਤੋ ਪਚ੍ਚੁਗ੍ਗਮਨਂ ਕਤ੍ਵਾ ਪਠਮਦਸ੍ਸਨਮ੍ਹਿਯੇਵ ਸੋਤਾਪਨ੍ਨਾ ਅਹੋਸਿ.

ਅਪਰਭਾਗੇ ਸਾਵਤ੍ਥਿਯਂ ਮਿਗਾਰਸੇਟ੍ਠਿਪੁਤ੍ਤਸ੍ਸ ਪੁਣ੍ਣਵਡ੍ਢਨਕੁਮਾਰਸ੍ਸ ਗੇਹਂ ਗਤਾ. ਤਤ੍ਥ ਨਂ ਮਿਗਾਰਸੇਟ੍ਠਿ ਮਾਤੁਟ੍ਠਾਨੇ ਠਪੇਸਿ. ਤਸ੍ਮਾ ਮਿਗਾਰਮਾਤਾਤਿ ਵੁਚ੍ਚਤਿ. ਪਤਿਕੁਲਂ ਗਚ੍ਛਨ੍ਤਿਯਾ ਚਸ੍ਸਾ ਪਿਤਾ ਮਹਾਲਤਾਪਿਲ਼ਨ੍ਧਨਂ ਨਾਮ ਕਾਰਾਪੇਸਿ. ਤਸ੍ਮਿਂ ਪਿਲ਼ਨ੍ਧਨੇ ਚਤਸ੍ਸੋ ਵਜਿਰਨਾਲ਼ਿਯੋ ਉਪਯੋਗਂ ਅਗਮਂਸੁ, ਮੁਤ੍ਤਾਨਂ ਏਕਾਦਸ ਨਾਲ਼ਿਯੋ, ਪਵਾਲ਼ਸ੍ਸ ਦ੍ਵਾਵੀਸਤਿ ਨਾਲ਼ਿਯੋ, ਮਣੀਨਂ ਤੇਤ੍ਤਿਂਸ ਨਾਲ਼ਿਯੋ. ਇਤਿ ਏਤੇਹਿ ਚ ਅਞ੍ਞੇਹਿ ਚ ਸਤ੍ਤਹਿ ਰਤਨੇਹਿ ਨਿਟ੍ਠਾਨਂ ਅਗਮਾਸਿ. ਤਂ ਸੀਸੇ ਪਟਿਮੁਕ੍ਕਂ ਯਾਵ ਪਾਦਪਿਟ੍ਠਿਯਾ ਭਸ੍ਸਤਿ. ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰਯਮਾਨਾਵ ਨਂ ਇਤ੍ਥੀ ਧਾਰੇਤੁਂ ਸਕ੍ਕੋਤਿ. ਸਾ ਅਪਰਭਾਗੇ ਦਸਬਲਸ੍ਸ ਅਗ੍ਗੁਪਟ੍ਠਾਯਿਕਾ ਹੁਤ੍ਵਾ ਤਂ ਪਸਾਧਨਂ ਵਿਸ੍ਸਜ੍ਜੇਤ੍ਵਾ ਨਵਹਿ ਕੋਟੀਹਿ ਭਗਵਤੋ ਵਿਹਾਰਂ ਕਾਰਯਮਾਨਾ ਕਰੀਸਮਤ੍ਤੇ ਭੂਮਿਭਾਗੇ ਪਾਸਾਦਂ ਕਾਰੇਸਿ. ਤਸ੍ਸ ਉਪਰਿਭੂਮਿਯਂ ਪਞ੍ਚ ਗਬ੍ਭਸਤਾਨਿ ਹੋਨ੍ਤਿ, ਹੇਟ੍ਠਿਮਭੂਮਿਯਂ ਪਞ੍ਚਾਤਿ ਗਬ੍ਭਸਹਸ੍ਸਪ੍ਪਟਿਮਣ੍ਡਿਤੋ ਅਹੋਸਿ. ਸਾ ‘‘ਸੁਦ੍ਧਪਾਸਾਦੋਵ ਨ ਸੋਭਤੀ’’ਤਿ ਤਂ ਪਰਿਵਾਰੇਤ੍ਵਾ ਪਞ੍ਚ ਦੁਵਡ੍ਢਗੇਹਸਤਾਨਿ, ਪਞ੍ਚ ਚੂਲ਼ਪਾਸਾਦਸਤਾਨਿ, ਪਞ੍ਚ ਦੀਘਸਾਲਸਤਾਨਿ ਚ ਕਾਰਾਪੇਸਿ. ਵਿਹਾਰਮਹੋ ਚਤੂਹਿ ਮਾਸੇਹਿ ਨਿਟ੍ਠਾਨਂ ਅਗਮਾਸਿ.

ਮਾਤੁਗਾਮਤ੍ਤਭਾਵੇ ਠਿਤਾਯ ਵਿਸਾਖਾਯ ਵਿਯ ਅਞ੍ਞਿਸ੍ਸਾ ਬੁਦ੍ਧਸਾਸਨੇ ਧਨਪਰਿਚ੍ਚਾਗੋ ਨਾਮ ਨਤ੍ਥਿ, ਪੁਰਿਸਤ੍ਤਭਾਵੇ ਠਿਤਸ੍ਸ ਅਨਾਥਪਿਣ੍ਡਿਕਸ੍ਸ ਵਿਯ ਅਞ੍ਞਸ੍ਸਾਤਿ. ਸੋ ਹਿ ਚਤੁਪਣ੍ਣਾਸਕੋਟਿਯੋ ਵਿਸ੍ਸਜ੍ਜੇਤ੍ਵਾ ਸਾਵਤ੍ਥਿਯਾ ਦਕ੍ਖਿਣਭਾਗੇ ਅਨੁਰਾਧਪੁਰਸ੍ਸ ਮਹਾਵਿਹਾਰਸਦਿਸੇ ਠਾਨੇ ਜੇਤਵਨਮਹਾਵਿਹਾਰਂ ਨਾਮ ਕਾਰੇਸਿ. ਵਿਸਾਖਾ ਸਾਵਤ੍ਥਿਯਾ ਪਾਚੀਨਭਾਗੇ ਉਤ੍ਤਰਦੇਵਿਯਾ ਵਿਹਾਰਸਦਿਸੇ ਠਾਨੇ ਪੁਬ੍ਬਾਰਾਮਂ ਨਾਮ ਕਾਰੇਸਿ. ਭਗਵਾ ਇਮੇਸਂ ਦ੍ਵਿਨ੍ਨਂ ਕੁਲਾਨਂ ਅਨੁਕਮ੍ਪਾਯ ਸਾਵਤ੍ਥਿਂ ਨਿਸ੍ਸਾਯ ਵਿਹਰਨ੍ਤੋ ਇਮੇਸੁ ਦ੍ਵੀਸੁ ਵਿਹਾਰੇਸੁ ਨਿਬਦ੍ਧਵਾਸਂ ਵਸਿ. ਏਕਂ ਅਨ੍ਤੋਵਸ੍ਸਂ ਜੇਤਵਨੇ ਵਸਤਿ, ਏਕਂ ਪੁਬ੍ਬਾਰਾਮੇ. ਤਸ੍ਮਿਂ ਸਮਯੇ ਪਨ ਭਗਵਾ ਪੁਬ੍ਬਾਰਾਮੇ ਵਿਹਰਤਿ. ਤੇਨ ਵੁਤ੍ਤਂ ‘‘ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ’’ਤਿ.

ਵਾਸੇਟ੍ਠਭਾਰਦ੍ਵਾਜਾਤਿ ਵਾਸੇਟ੍ਠੋ ਚ ਸਾਮਣੇਰੋ ਭਾਰਦ੍ਵਾਜੋ ਚ. ਭਿਕ੍ਖੂਸੁ ਪਰਿਵਸਨ੍ਤੀਤਿ ਤੇ ਨੇਵ ਤਿਤ੍ਥਿਯਪਰਿਵਾਸਂ ਵਸਨ੍ਤਿ, ਨ ਆਪਤ੍ਤਿਪਰਿਵਾਸਂ. ਅਪਰਿਪੁਣ੍ਣਵਸ੍ਸਤ੍ਤਾ ਪਨ ਭਿਕ੍ਖੁਭਾਵਂ ਪਤ੍ਥਯਮਾਨਾ ਵਸਨ੍ਤਿ. ਤੇਨੇਵਾਹ ‘‘ਭਿਕ੍ਖੁਭਾਵਂ ਆਕਙ੍ਖਮਾਨਾ’’ਤਿ. ਉਭੋਪਿ ਹੇਤੇ ਉਦਿਚ੍ਚਬ੍ਰਾਹ੍ਮਣਮਹਾਸਾਲਕੁਲੇ ਨਿਬ੍ਬਤ੍ਤਾ, ਚਤ੍ਤਾਲੀਸ ਚਤ੍ਤਾਲੀਸ ਕੋਟਿਵਿਭਵਾ ਤਿਣ੍ਣਂ ਵੇਦਾਨਂ ਪਾਰਗੂ ਮਜ੍ਝਿਮਨਿਕਾਯੇ ਵਾਸੇਟ੍ਠਸੁਤ੍ਤਂ ਸੁਤ੍ਵਾ ਸਰਣਂ ਗਤਾ, ਤੇਵਿਜ੍ਜਸੁਤ੍ਤਂ ਸੁਤ੍ਵਾ ਪਬ੍ਬਜਿਤ੍ਵਾ ਇਮਸ੍ਮਿਂ ਕਾਲੇ ਭਿਕ੍ਖੁਭਾਵਂ ਆਕਙ੍ਖਮਾਨਾ ਪਰਿਵਸਨ੍ਤਿ. ਅਬ੍ਭੋਕਾਸੇ ਚਙ੍ਕਮਤੀਤਿ ਉਤ੍ਤਰਦਕ੍ਖਿਣੇਨ ਆਯਤਸ੍ਸ ਪਾਸਾਦਸ੍ਸ ਪੁਰਤ੍ਥਿਮਦਿਸਾਭਾਗੇ ਪਾਸਾਦਚ੍ਛਾਯਾਯਂ ਯਨ੍ਤਰਜ੍ਜੂਹਿ ਆਕਡ੍ਢਿਯਮਾਨਂ ਰਤਨਸਤੁਬ੍ਬੇਧਂ ਸੁਵਣ੍ਣਅਗ੍ਘਿਕਂ ਵਿਯ ਅਨਿਲਪਥੇ ਵਿਧਾਵਨ੍ਤੀਹਿ ਛਬ੍ਬਣ੍ਣਾਹਿ ਬੁਦ੍ਧਰਸ੍ਮੀਹਿ ਸੋਭਮਾਨੋ ਅਪਰਾਪਰਂ ਚਙ੍ਕਮਤਿ.

੧੧੩. ਅਨੁਚਙ੍ਕਮਿਂਸੂਤਿ ਅਞ੍ਜਲਿਂ ਪਗ੍ਗਯ੍ਹ ਓਨਤਸਰੀਰਾ ਹੁਤ੍ਵਾ ਅਨੁਵਤ੍ਤਮਾਨਾ ਚਙ੍ਕਮਿਂਸੁ. ਵਾਸੇਟ੍ਠਂ ਆਮਨ੍ਤੇਸੀਤਿ ਸੋ ਤੇਸਂ ਪਣ੍ਡਿਤਤਰੋ ਗਹੇਤਬ੍ਬਂ ਵਿਸ੍ਸਜ੍ਜੇਤਬ੍ਬਞ੍ਚ ਜਾਨਾਤਿ, ਤਸ੍ਮਾ ਤਂ ਆਮਨ੍ਤੇਸਿ. ਤੁਮ੍ਹੇ ਖ੍ਵਤ੍ਥਾਤਿ ਤੁਮ੍ਹੇ ਖੋ ਅਤ੍ਥ. ਬ੍ਰਾਹ੍ਮਣਜਚ੍ਚਾਤਿ, ਬ੍ਰਾਹ੍ਮਣਜਾਤਿਕਾ. ਬ੍ਰਾਹ੍ਮਣਕੁਲੀਨਾਤਿ ਬ੍ਰਾਹ੍ਮਣੇਸੁ ਕੁਲੀਨਾ ਕੁਲਸਮ੍ਪਨ੍ਨਾ. ਬ੍ਰਾਹ੍ਮਣਕੁਲਾਤਿ ਬ੍ਰਾਹ੍ਮਣਕੁਲਤੋ, ਭੋਗਾਦਿਸਮ੍ਪਨ੍ਨਂ ਬ੍ਰਾਹ੍ਮਣਕੁਲਂ ਪਹਾਯਾਤਿ ਅਤ੍ਥੋ. ਨ ਅਕ੍ਕੋਸਨ੍ਤੀਤਿ ਦਸਵਿਧੇਨ ਅਕ੍ਕੋਸਵਤ੍ਥੁਨਾ ਨ ਅਕ੍ਕੋਸਨ੍ਤਿ. ਨ ਪਰਿਭਾਸਨ੍ਤੀਤਿ ਨਾਨਾਵਿਧਾਯ ਪਰਿਭਵਕਥਾਯ ਨ ਪਰਿਭਾਸਨ੍ਤੀਤਿ ਅਤ੍ਥੋ. ਇਤਿ ਭਗਵਾ ‘‘ਬ੍ਰਾਹ੍ਮਣਾ ਇਮੇ ਸਾਮਣੇਰੇ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀ’’ਤਿ ਜਾਨਮਾਨੋਵ ਪੁਚ੍ਛਤਿ. ਕਸ੍ਮਾ? ਇਮੇ ਮਯਾ ਅਪੁਚ੍ਛਿਤਾ ਪਠਮਤਰਂ ਨ ਕਥੇਸ੍ਸਨ੍ਤਿ, ਅਕਥਿਤੇ ਕਥਾ ਨ ਸਮੁਟ੍ਠਾਤੀਤਿ ਕਥਾਸਮੁਟ੍ਠਾਪਨਤ੍ਥਾਯ. ਤਗ੍ਘਾਤਿ ਏਕਂਸਵਚਨੇ ਨਿਪਾਤੋ, ਏਕਂਸੇਨੇਵ ਨੋ, ਭਨ੍ਤੇ, ਬ੍ਰਾਹ੍ਮਣਾ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀਤਿ ਵੁਤ੍ਤਂ ਹੋਤਿ. ਅਤ੍ਤਰੂਪਾਯਾਤਿ ਅਤ੍ਤਨੋ ਅਨੁਰੂਪਾਯ. ਪਰਿਪੁਣ੍ਣਾਯਾਤਿ ਯਥਾਰੁਚਿ ਪਦਬ੍ਯਞ੍ਜਨਾਨਿ ਆਰੋਪੇਤ੍ਵਾ ਆਰੋਪੇਤ੍ਵਾ ਪਰਿਪੂਰਿਤਾਯ. ਨੋ ਅਪਰਿਪੁਣ੍ਣਾਯਾਤਿ ਅਨ੍ਤਰਾ ਅਟ੍ਠਪਿਤਾਯ ਨਿਰਨ੍ਤਰਂ ਪਵਤ੍ਤਾਯ.

ਕਸ੍ਮਾ ਪਨ ਬ੍ਰਾਹ੍ਮਣਾ ਇਮੇ ਸਾਮਣੇਰੇ ਅਕ੍ਕੋਸਨ੍ਤੀਤਿ? ਅਪ੍ਪਤਿਟ੍ਠਤਾਯ. ਇਮੇ ਹਿ ਸਾਮਣੇਰਾ ਅਗ੍ਗਬ੍ਰਾਹ੍ਮਣਾਨਂ ਪੁਤ੍ਤਾ ਤਿਣ੍ਣਂ ਵੇਦਾਨਂ ਪਾਰਗੂ ਜਮ੍ਬੁਦੀਪੇ ਬ੍ਰਾਹ੍ਮਣਾਨਂ ਅਨ੍ਤਰੇ ਪਾਕਟਾ ਸਮ੍ਭਾਵਿਤਾ ਤੇਸਂ ਪਬ੍ਬਜਿਤਤ੍ਤਾ ਅਞ੍ਞੇ ਬ੍ਰਾਹ੍ਮਣਪੁਤ੍ਤਾ ਪਬ੍ਬਜਿਂਸੁ. ਅਥ ਖੋ ਬ੍ਰਾਹ੍ਮਣਾ ‘‘ਅਪਤਿਟ੍ਠਾ ਮਯਂ ਜਾਤਾ’’ਤਿ ਇਮਾਯ ਅਪ੍ਪਤਿਟ੍ਠਤਾਯ ਗਾਮਦ੍ਵਾਰੇਪਿ ਅਨ੍ਤੋਗਾਮੇਪਿ ਤੇ ਦਿਸ੍ਵਾ ‘‘ਤੁਮ੍ਹੇਹਿ ਬ੍ਰਾਹ੍ਮਣਸਮਯੋ ਭਿਨ੍ਨੋ, ਮੁਣ੍ਡਸਮਣਕਸ੍ਸ ਪਚ੍ਛਤੋ ਪਚ੍ਛਤੋ ਰਸਗਿਦ੍ਧਾ ਹੁਤ੍ਵਾ ਵਿਚਰਥਾ’’ਤਿਆਦੀਨਿ ਚੇਵ ਪਾਲ਼ਿਯਂ ਆਗਤਾਨਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿਆਦੀਨਿ ਚ ਵਤ੍ਵਾ ਅਕ੍ਕੋਸਨ੍ਤਿ. ਸਾਮਣੇਰਾ ਤੇਸੁ ਅਕ੍ਕੋਸਨ੍ਤੇਸੁਪਿ ਕੋਪਂ ਵਾ ਆਘਾਤਂ ਵਾ ਅਕਤ੍ਵਾ ਕੇਵਲਂ ਭਗਵਤਾ ਪੁਟ੍ਠਾ ‘‘ਤਗ੍ਘ ਨੋ, ਭਨ੍ਤੇ, ਬ੍ਰਾਹ੍ਮਣਾ ਅਕ੍ਕੋਸਨ੍ਤਿ ਪਰਿਭਾਸਨ੍ਤੀ’’ਤਿ ਆਰੋਚੇਸੁਂ. ਅਥ ਨੇ ਭਗਵਾ ਅਕ੍ਕੋਸਨਾਕਾਰਂ ਪੁਚ੍ਛਨ੍ਤੋ ਯਥਾ ਕਥਂ ਪਨ ਵੋਤਿ ਪੁਚ੍ਛਤਿ. ਤੇ ਆਚਿਕ੍ਖਨ੍ਤਾ ਬ੍ਰਾਹ੍ਮਣਾ ਭਨ੍ਤੇਤਿਆਦਿਮਾਹਂਸੁ.

ਤਤ੍ਥ ਸੇਟ੍ਠੋ ਵਣ੍ਣੋਤਿ ਜਾਤਿਗੋਤ੍ਤਾਦੀਨਂ ਪਞ੍ਞਾਪਨਟ੍ਠਾਨੇ ਬ੍ਰਾਹ੍ਮਣੋਵ ਸੇਟ੍ਠੋਤਿ ਦਸ੍ਸੇਨ੍ਤਿ. ਹੀਨਾ ਅਞ੍ਞੇ ਵਣ੍ਣਾਤਿ ਇਤਰੇ ਤਯੋ ਵਣ੍ਣਾ ਹੀਨਾ ਲਾਮਕਾਤਿ ਵਦਨ੍ਤਿ. ਸੁਕ੍ਕੋਤਿ ਪਣ੍ਡਰੋ. ਕਣ੍ਹੋਤਿ ਕਾਲ਼ਕੋ. ਸੁਜ੍ਝਨ੍ਤੀਤਿ ਜਾਤਿਗੋਤ੍ਤਾਦੀਨਂ ਪਞ੍ਞਾਪਨਟ੍ਠਾਨੇ ਸੁਜ੍ਝਨ੍ਤਿ. ਬ੍ਰਹ੍ਮੁਨੋ ਪੁਤ੍ਤਾਤਿ ਮਹਾਬ੍ਰਹ੍ਮੁਨੋ ਪੁਤ੍ਤਾ. ਓਰਸਾ ਮੁਖਤੋ ਜਾਤਾਤਿ ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਾ, ਉਰੇ ਕਤ੍ਵਾ ਸਂਵਡ੍ਢਿਤਾਤਿ ਵਾ ਓਰਸਾ. ਬ੍ਰਹ੍ਮਜਾਤਿ ਬ੍ਰਹ੍ਮਤੋ ਨਿਬ੍ਬਤ੍ਤਾ. ਬ੍ਰਹ੍ਮਨਿਮ੍ਮਿਤਾਤਿ ਬ੍ਰਹ੍ਮੁਨਾ ਨਿਮ੍ਮਿਤਾ. ਬ੍ਰਹ੍ਮਦਾਯਾਦਾਤਿ ਬ੍ਰਹ੍ਮੁਨੋ ਦਾਯਾਦਾ. ਹੀਨਮਤ੍ਥ ਵਣ੍ਣਂ ਅਜ੍ਝੁਪਗਤਾਤਿ ਹੀਨਂ ਵਣ੍ਣਂ ਅਜ੍ਝੁਪਗਤਾ ਅਤ੍ਥ. ਮੁਣ੍ਡਕੇ ਸਮਣਕੇਤਿ ਨਿਨ੍ਦਨ੍ਤਾ ਜਿਗੁਚ੍ਛਨ੍ਤਾ ਵਦਨ੍ਤਿ, ਨ ਮੁਣ੍ਡਕਮਤ੍ਤਞ੍ਚੇਵ ਸਮਣਮਤ੍ਤਞ੍ਚ ਸਨ੍ਧਾਯ. ਇਬ੍ਭੇਤਿ ਗਹਪਤਿਕੇ. ਕਣ੍ਹੇਤਿ ਕਾਲ਼ਕੇ. ਬਨ੍ਧੂਤਿ ਮਾਰਸ੍ਸ ਬਨ੍ਧੁਭੂਤੇ ਮਾਰਪਕ੍ਖਿਕੇ. ਪਾਦਾਪਚ੍ਚੇਤਿ ਮਹਾਬ੍ਰਹ੍ਮੁਨੋ ਪਾਦਾਨਂ ਅਪਚ੍ਚਭੂਤੇ ਪਾਦਤੋ ਜਾਤੇਤਿ ਅਧਿਪ੍ਪਾਯੋ.

੧੧੪. ‘‘ਤਗ੍ਘ ਵੋ, ਵਾਸੇਟ੍ਠ, ਬ੍ਰਾਹ੍ਮਣਾ ਪੋਰਾਣਂ ਅਸ੍ਸਰਨ੍ਤਾ ਏਵਮਾਹਂਸੂ’’ਤਿ ਏਤ੍ਥ ਵੋਤਿ ਨਿਪਾਤਮਤ੍ਤਂ, ਸਾਮਿਵਚਨਂ ਵਾ, ਤੁਮ੍ਹਾਕਂ ਬ੍ਰਾਹ੍ਮਣਾਤਿ ਅਤ੍ਥੋ. ਪੋਰਾਣਨ੍ਤਿ ਪੋਰਾਣਕਂ ਅਗ੍ਗਞ੍ਞਂ ਲੋਕੁਪ੍ਪਤ੍ਤਿਚਰਿਯਵਂਸਂ. ਅਸ੍ਸਰਨ੍ਤਾਤਿ ਅਸ੍ਸਰਮਾਨਾ. ਇਦਂ ਵੁਤ੍ਤਂ ਹੋਤਿ, ਏਕਂਸੇਨ ਵੋ, ਵਾਸੇਟ੍ਠ, ਬ੍ਰਾਹ੍ਮਣਾ ਪੋਰਾਣਂ ਲੋਕੁਪ੍ਪਤ੍ਤਿਂ ਅਨਨੁਸ੍ਸਰਨ੍ਤਾ ਅਜਾਨਨ੍ਤਾ ਏਵਂ ਵਦਨ੍ਤੀਤਿ. ‘‘ਦਿਸ੍ਸਨ੍ਤਿ ਖੋ ਪਨਾ’’ਤਿ ਏਵਮਾਦਿ ਤੇਸਂ ਲਦ੍ਧਿਭਿਨ੍ਦਨਤ੍ਥਾਯ ਵੁਤ੍ਤਂ. ਤਤ੍ਥ ਬ੍ਰਾਹ੍ਮਣਿਯੋਤਿ ਬ੍ਰਾਹ੍ਮਣਾਨਂ ਪੁਤ੍ਤਪ੍ਪਟਿਲਾਭਤ੍ਥਾਯ ਆਵਾਹਵਿਵਾਹਵਸੇਨ ਕੁਲਂ ਆਨੀਤਾ ਬ੍ਰਾਹ੍ਮਣਿਯੋ ਦਿਸ੍ਸਨ੍ਤਿ. ਤਾ ਖੋ ਪਨੇਤਾ ਅਪਰੇਨ ਸਮਯੇਨ ਉਤੁਨਿਯੋਪਿ ਹੋਨ੍ਤਿ, ਸਞ੍ਜਾਤਪੁਪ੍ਫਾਤਿ ਅਤ੍ਥੋ. ਗਬ੍ਭਿਨਿਯੋਤਿ ਸਞ੍ਜਾਤਗਬ੍ਭਾ. ਵਿਜਾਯਮਾਨਾਤਿ ਪੁਤ੍ਤਧੀਤਰੋ ਜਨਯਮਾਨਾ. ਪਾਯਮਾਨਾਤਿ ਦਾਰਕੇ ਥਞ੍ਞਂ ਪਾਯਨ੍ਤਿਯੋ. ਯੋਨਿਜਾਵ ਸਮਾਨਾਤਿ ਬ੍ਰਾਹ੍ਮਣੀਨਂ ਪਸ੍ਸਾਵਮਗ੍ਗੇਨ ਜਾਤਾ ਸਮਾਨਾ. ਏਵਮਾਹਂਸੂਤਿ ਏਵਂ ਵਦਨ੍ਤਿ. ਕਥਂ? ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ…ਪੇ… ਬ੍ਰਹ੍ਮਦਾਯਾਦਾ’’ਤਿ. ਯਦਿ ਪਨ ਨੇਸਂ ਤਂ ਸਚ੍ਚਵਚਨਂ ਸਿਯਾ, ਬ੍ਰਾਹ੍ਮਣੀਨਂ ਕੁਚ੍ਛਿ ਮਹਾਬ੍ਰਹ੍ਮਸ੍ਸ ਉਰੋ ਭਵੇਯ੍ਯ, ਬ੍ਰਾਹ੍ਮਣੀਨਂ ਪਸ੍ਸਾਵਮਗ੍ਗੋ ਮਹਾਬ੍ਰਹ੍ਮੁਨੋ ਮੁਖਂ ਭਵੇਯ੍ਯ, ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ. ਤੇਨਾਹ ‘‘ਤੇ ਚ ਬ੍ਰਹ੍ਮੂਨਞ੍ਚੇਵ ਅਬ੍ਭਾਚਿਕ੍ਖਨ੍ਤੀ’’ਤਿਆਦਿ.

ਚਤੁਵਣ੍ਣਸੁਦ੍ਧਿਵਣ੍ਣਨਾ

ਏਤ੍ਤਾਵਤਾ ‘‘ਮਯਂ ਮਹਾਬ੍ਰਹ੍ਮੁਨੋ ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਾਤਿ ਵਤ੍ਤੁਂ ਮਾ ਲਭਨ੍ਤੂ’’ਤਿ ਇਮਂ ਮੁਖਚ੍ਛੇਦਕਵਾਦਂ ਵਤ੍ਵਾ ਪੁਨ ਚਤ੍ਤਾਰੋਪਿ ਵਣ੍ਣਾ ਕੁਸਲੇ ਧਮ੍ਮੇ ਸਮਾਦਾਯ ਵਤ੍ਤਨ੍ਤਾਵ ਸੁਜ੍ਝਨ੍ਤੀਤਿ ਦਸ੍ਸਨਤ੍ਥਂ ਚਤ੍ਤਾਰੋਮੇ, ਵਾਸੇਟ੍ਠ, ਵਣ੍ਣਾਤਿਆਦਿਮਾਹ. ਅਕੁਸਲਸਙ੍ਖਾਤਾਤਿ ਅਕੁਸਲਾਤਿ ਸਙ੍ਖਾਤਾ ਅਕੁਸਲਕੋਟ੍ਠਾਸਭੂਤਾ ਵਾ. ਏਸ ਨਯੋ ਸਬ੍ਬਤ੍ਥ. ਨ ਅਲਮਰਿਯਾਤਿ ਅਰਿਯਭਾਵੇ ਅਸਮਤ੍ਥਾ. ਕਣ੍ਹਾਤਿ ਪਕਤਿਕਾਲ਼ਕਾ. ਕਣ੍ਹਵਿਪਾਕਾਤਿ ਵਿਪਾਕੋਪਿ ਨੇਸਂ ਕਣ੍ਹੋ ਦੁਕ੍ਖੋਤਿ ਅਤ੍ਥੋ. ਖਤ੍ਤਿਯੇਪਿ ਤੇਤਿ ਖਤ੍ਤਿਯਮ੍ਹਿਪਿ ਤੇ. ਏਕਚ੍ਚੇਤਿ ਏਕਸ੍ਮਿਂ. ਏਸ ਨਯੋ ਸਬ੍ਬਤ੍ਥ.

ਸੁਕ੍ਕਾਤਿ ਨਿਕ੍ਕਿਲੇਸਭਾਵੇਨ ਪਣ੍ਡਰਾ. ਸੁਕ੍ਕਵਿਪਾਕਾਤਿ ਵਿਪਾਕੋਪਿ ਨੇਸਂ ਸੁਕ੍ਕੋ ਸੁਖੋਤਿ ਅਤ੍ਥੋ.

੧੧੬. ਉਭਯਵੋਕਿਣ੍ਣੇਸੁ ਵਤ੍ਤਮਾਨੇਸੂਤਿ ਉਭਯੇਸੁ ਵੋਕਿਣ੍ਣੇਸੁ ਮਿਸ੍ਸੀਭੂਤੇਸੁ ਹੁਤ੍ਵਾ ਵਤ੍ਤਮਾਨੇਸੁ. ਕਤਮੇਸੁ ਉਭਯੇਸੂਤਿ? ਕਣ੍ਹਸੁਕ੍ਕੇਸੁ ਧਮ੍ਮੇਸੁ ਵਿਞ੍ਞੁਗਰਹਿਤੇਸੁ ਚੇਵ ਵਿਞ੍ਞੁਪ੍ਪਸਤ੍ਥੇਸੁ ਚ. ਯਦੇਤ੍ਥ ਬ੍ਰਾਹ੍ਮਣਾ ਏਵਮਾਹਂਸੂਤਿ ਏਤ੍ਥ ਏਤੇਸੁ ਕਣ੍ਹਸੁਕ੍ਕਧਮ੍ਮੇਸੁ ਵਤ੍ਤਮਾਨਾਪਿ ਬ੍ਰਾਹ੍ਮਣਾ ਯਦੇਤਂ ਏਵਂ ਵਦਨ੍ਤਿ ‘‘ਬ੍ਰਾਹ੍ਮਣੋਵ ਸੇਟ੍ਠੋ ਵਣ੍ਣੋ’’ਤਿਆਦਿ. ਤਂ ਨੇਸਂ ਵਿਞ੍ਞੂ ਨਾਨੁਜਾਨਨ੍ਤੀਤਿ ਯੇ ਲੋਕੇ ਪਣ੍ਡਿਤਾ, ਤੇ ਨਾਨੁਮੋਦਨ੍ਤਿ, ਨ ਪਸਂਸਨ੍ਤੀਤਿ ਅਤ੍ਥੋ. ਤਂ ਕਿਸ੍ਸ ਹੇਤੁ? ਇਮੇਸਞ੍ਹਿ ਵਾਸੇਟ੍ਠਾਤਿਆਦਿਮ੍ਹਿ ਅਯਂ ਸਙ੍ਖੇਪਤ੍ਥੋ. ਯਂ ਵੁਤ੍ਤਂ ਨਾਨੁਜਾਨਨ੍ਤੀਤਿ, ਤਂ ਕਸ੍ਮਾਤਿ ਚੇ? ਯਸ੍ਮਾ ਇਮੇਸਂ ਚਤੁਨ੍ਨਂ ਵਣ੍ਣਾਨਂ ਯੋ ਭਿਕ੍ਖੁ ਅਰਹਂ…ਪੇ… ਸਮ੍ਮਦਞ੍ਞਾ ਵਿਮੁਤ੍ਤੋ, ਸੋ ਤੇਸਂ ਅਗ੍ਗਮਕ੍ਖਾਯਤਿ, ਤੇ ਚ ਨ ਏਵਰੂਪਾ. ਤਸ੍ਮਾ ਨੇਸਂ ਵਿਞ੍ਞੂ ਨਾਨੁਜਾਨਨ੍ਤਿ.

ਅਰਹਨ੍ਤਿਆਦਿਪਦੇਸੁ ਚੇਤ੍ਥ ਕਿਲੇਸਾਨਂ ਆਰਕਤ੍ਤਾਦੀਹਿ ਕਾਰਣੇਹਿ ਅਰਹਂ. ਆਸਵਾਨਂ ਖੀਣਤ੍ਤਾ ਖੀਣਾਸਵੋ. ਸਤ੍ਤ ਸੇਕ੍ਖਾ ਪੁਥੁਜ੍ਜਨਕਲ੍ਯਾਣਕਾ ਚ ਬ੍ਰਹ੍ਮਚਰਿਯਵਾਸਂ ਵਸਨ੍ਤਿ ਨਾਮ. ਅਯਂ ਪਨ ਵੁਤ੍ਥਵਾਸੋਤਿ ਵੁਸਿਤਵਾ. ਚਤੂਹਿ ਮਗ੍ਗੇਹਿ ਚਤੂਸੁ ਸਚ੍ਚੇਸੁ ਪਰਿਜਾਨਨਾਦਿਕਰਣੀਯਂ ਕਤਂ ਅਸ੍ਸਾਤਿ ਕਤਕਰਣੀਯੋ. ਕਿਲੇਸਭਾਰੋ ਚ ਖਨ੍ਧਭਾਰੋ ਚ ਓਹਿਤੋ ਅਸ੍ਸਾਤਿ ਓਹਿਤਭਾਰੋ. ਓਹਿਤੋਤਿ ਓਹਾਰਿਤੋ. ਸੁਨ੍ਦਰੋ ਅਤ੍ਥੋ, ਸਕੋ ਵਾ ਅਤ੍ਥੋ ਸਦਤ੍ਥੋ, ਅਨੁਪ੍ਪਤ੍ਤੋ ਸਦਤ੍ਥੋ ਏਤੇਨਾਤਿ ਅਨੁਪ੍ਪਤ੍ਤਸਦਤ੍ਥੋ. ਭਵਸਂਯੋਜਨਂ ਵੁਚ੍ਚਤਿ ਤਣ੍ਹਾ, ਸਾ ਪਰਿਕ੍ਖੀਣਾ ਅਸ੍ਸਾਤਿ ਪਰਿਕ੍ਖੀਣਭਵਸਂਯੋਜਨੋ. ਸਮ੍ਮਦਞ੍ਞਾ ਵਿਮੁਤ੍ਤੋਤਿ ਸਮ੍ਮਾ ਹੇਤੁਨਾ ਕਾਰਣੇਨ ਜਾਨਿਤ੍ਵਾ ਵਿਮੁਤ੍ਤੋ. ਜਨੇਤਸ੍ਮਿਨ੍ਤਿ ਜਨੇ ਏਤਸ੍ਮਿਂ, ਇਮਸ੍ਮਿਂ ਲੋਕੇਤਿ ਅਤ੍ਥੋ. ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ ਇਧਤ੍ਤਭਾਵੇ ਚ ਪਰਤ੍ਤਭਾਵੇ.

੧੧੭. ਅਨਨ੍ਤਰਾਤਿ ਅਨ੍ਤਰਵਿਰਹਿਤਾ, ਅਤ੍ਤਨੋ ਕੁਲੇਨ ਸਦਿਸਾਤਿ ਅਤ੍ਥੋ. ਅਨੁਯੁਤ੍ਤਾਤਿ ਵਸਵਤ੍ਤਿਨੋ. ਨਿਪਚ੍ਚਕਾਰਨ੍ਤਿ ਮਹਲ੍ਲਕਤਰਾ ਨਿਪਚ੍ਚਕਾਰਂ ਦਸ੍ਸੇਨ੍ਤਿ. ਦਹਰਤਰਾ ਅਭਿਵਾਦਨਾਦੀਨਿ ਕਰੋਨ੍ਤਿ. ਤਤ੍ਥ ਸਾਮੀਚਿਕਮ੍ਮਨ੍ਤਿ ਤਂਤਂਵਤ੍ਤਕਰਣਾਦਿ ਅਨੁਚ੍ਛਵਿਕਕਮ੍ਮਂ.

੧੧੮. ਨਿਵਿਟ੍ਠਾਤਿ ਅਭਿਨਿਵਿਟ੍ਠਾ ਅਚਲਟ੍ਠਿਤਾ. ਕਸ੍ਸ ਪਨ ਏਵਰੂਪਾ ਸਦ੍ਧਾ ਹੋਤੀਤਿ? ਸੋਤਾਪਨ੍ਨਸ੍ਸ. ਸੋ ਹਿ ਨਿਵਿਟ੍ਠਸਦ੍ਧੋ ਅਸਿਨਾ ਸੀਸੇ ਛੇਜ੍ਜਮਾਨੇਪਿ ਬੁਦ੍ਧੋ ਅਬੁਦ੍ਧੋਤਿ ਵਾ, ਧਮ੍ਮੋ ਅਧਮ੍ਮੋਤਿ ਵਾ, ਸਙ੍ਘੋ ਅਸਙ੍ਘੋਤਿ ਵਾ ਨ ਵਦਤਿ. ਪਤਿਟ੍ਠਿਤਸਦ੍ਧੋ ਹੋਤਿ ਸੂਰਮ੍ਬਟ੍ਠੋ ਵਿਯ.

ਸੋ ਕਿਰ ਸਤ੍ਥੁ ਧਮ੍ਮਦੇਸਨਂ ਸੁਤ੍ਵਾ ਸੋਤਾਪਨ੍ਨੋ ਹੁਤ੍ਵਾ ਗੇਹਂ ਅਗਮਾਸਿ. ਅਥ ਮਾਰੋ ਦ੍ਵਤ੍ਤਿਂਸਵਰਲਕ੍ਖਣਪ੍ਪਟਿਮਣ੍ਡਿਤਂ ਬੁਦ੍ਧਰੂਪਂ ਮਾਪੇਤ੍ਵਾ ਤਸ੍ਸ ਘਰਦ੍ਵਾਰੇ ਠਤ੍ਵਾ ‘‘ਸਤ੍ਥਾ ਆਗਤੋ’’ਤਿ ਸਾਸਨਂ ਪਹਿਣਿ. ਸੂਰਮ੍ਬਟ੍ਠੋ ਚਿਨ੍ਤੇਸਿ ‘‘ਅਹਂ ਇਦਾਨੇਵ ਸਤ੍ਥੁ ਸਨ੍ਤਿਕੇ ਧਮ੍ਮਂ ਸੁਤ੍ਵਾ ਆਗਤੋ, ਕਿਂ ਨੁ ਖੋ ਭਵਿਸ੍ਸਤੀ’’ਤਿ ਉਪਸਙ੍ਕਮਿਤ੍ਵਾ ਸਤ੍ਥੁਸਞ੍ਞਾਯ ਵਨ੍ਦਿਤ੍ਵਾ ਅਟ੍ਠਾਸਿ. ਮਾਰੋ ਆਹ – ‘‘ਅਮ੍ਬਟ੍ਠ, ਯਂ ਤੇ ਮਯਾ ‘ਰੂਪਂ ਅਨਿਚ੍ਚਂ…ਪੇ… ਵਿਞ੍ਞਾਣਂ ਅਨਿਚ੍ਚਨ੍ਤਿ ਕਥਿਤਂ, ਤਂ ਦੁਕ੍ਕਥਿਤਂ. ਅਨੁਪਧਾਰੇਤ੍ਵਾਵ ਹਿ ਮਯਾ ਏਵਂ ਵੁਤ੍ਤਂ. ਤਸ੍ਮਾ ਤ੍ਵਂ ‘ਰੂਪਂ ਨਿਚ੍ਚਂ…ਪੇ… ਵਿਞ੍ਞਾਣਂ ਨਿਚ੍ਚ’ਨ੍ਤਿ ਗਣ੍ਹਾਹੀ’’ਤਿ. ਸੋ ਚਿਨ੍ਤੇਸਿ – ‘‘ਅਟ੍ਠਾਨਮੇਤਂ ਯਂ ਬੁਦ੍ਧਾ ਅਨੁਪਧਾਰੇਤ੍ਵਾ ਅਪਚ੍ਚਕ੍ਖਂ ਕਤ੍ਵਾ ਕਿਞ੍ਚਿ ਕਥੇਯ੍ਯੁਂ, ਅਦ੍ਧਾ ਅਯਂ ਮਯ੍ਹਂ ਵਿਚ੍ਛਿਨ੍ਦਜਨਨਤ੍ਥਂ ਮਾਰੋ ਆਗਤੋ’’ਤਿ. ਤਤੋ ਨਂ ‘‘ਤ੍ਵਂ ਮਾਰੋਸੀ’’ਤਿ ਆਹ. ਸੋ ਮੁਸਾਵਾਦਂ ਕਾਤੁਂ ਨਾਸਕ੍ਖਿ. ‘‘ਆਮ ਮਾਰੋਸ੍ਮੀ’’ਤਿ ਪਟਿਜਾਨਾਤਿ. ‘‘ਕਸ੍ਮਾ ਆਗਤੋਸੀ’’ਤਿ? ਤਵ ਸਦ੍ਧਾਚਾਲਨਤ੍ਥਨ੍ਤਿ ਆਹ. ‘‘ਕਣ੍ਹ ਪਾਪਿਮ, ਤ੍ਵਂ ਤਾਵ ਏਕੋ ਤਿਟ੍ਠ, ਤਾਦਿਸਾਨਂ ਮਾਰਾਨਂ ਸਤਮ੍ਪਿ ਸਹਸ੍ਸਮ੍ਪਿ ਸਤਸਹਸ੍ਸਮ੍ਪਿ ਮਮ ਸਦ੍ਧਂ ਚਾਲੇਤੁਂ ਅਸਮਤ੍ਥਂ, ਮਗ੍ਗੇਨ ਆਗਤਸਦ੍ਧਾ ਨਾਮ ਥਿਰਾ ਸਿਲਾਪਥਵਿਯਂ ਪਤਿਟ੍ਠਿਤਸਿਨੇਰੁ ਵਿਯ ਅਚਲਾ ਹੋਤਿ, ਕਿਂ ਤ੍ਵਂ ਏਤ੍ਥਾ’’ਤਿ ਅਚ੍ਛਰਂ ਪਹਰਿ. ਸੋ ਠਾਤੁਂ ਅਸਕ੍ਕੋਨ੍ਤੋ ਤਤ੍ਥੇਵ ਅਨ੍ਤਰਧਾਯਿ. ਏਵਰੂਪਂ ਸਦ੍ਧਂ ਸਨ੍ਧਾਯੇਤਂ ਵੁਤ੍ਤਂ ‘‘ਨਿਵਿਟ੍ਠਾ’’ਤਿ.

ਮੂਲਜਾਤਾ ਪਤਿਟ੍ਠਿਤਾਤਿ ਮਗ੍ਗਮੂਲਸ੍ਸ ਸਞ੍ਜਾਤਤ੍ਤਾ ਤੇਨ ਮਗ੍ਗਮੂਲੇਨ ਪਤਿਟ੍ਠਿਤਾ. ਦਲ਼੍ਹਾਤਿ ਥਿਰਾ. ਅਸਂਹਾਰਿਯਾਤਿ ਸੁਨਿਖਾਤਇਨ੍ਦਖੀਲੋ ਵਿਯ ਕੇਨਚਿ ਚਾਲੇਤੁਂ ਅਸਕ੍ਕੁਣੇਯ੍ਯਾ. ਤਸ੍ਸੇਤਂ ਕਲ੍ਲਂ ਵਚਨਾਯਾਤਿ ਤਸ੍ਸ ਅਰਿਯਸਾਵਕਸ੍ਸ ਯੁਤ੍ਤਮੇਤਂ ਵਤ੍ਤੁਂ. ਕਿਨ੍ਤਿ? ‘‘ਭਗਵਤੋਮ੍ਹਿ ਪੁਤ੍ਤੋ ਓਰਸੋ’’ਤਿ ਏਵਮਾਦਿ. ਸੋ ਹਿ ਭਗਵਨ੍ਤਂ ਨਿਸ੍ਸਾਯ ਅਰਿਯਭੂਮਿਯਂ ਜਾਤੋਤਿ ਭਗਵਤੋ ਪੁਤ੍ਤੋ. ਉਰੇ ਵਸਿਤ੍ਵਾ ਮੁਖਤੋ ਨਿਕ੍ਖਨ੍ਤਧਮ੍ਮਘੋਸਵਸੇਨ ਮਗ੍ਗਫਲੇਸੁ ਪਤਿਟ੍ਠਿਤਤ੍ਤਾ ਓਰਸੋ ਮੁਖਤੋ ਜਾਤੋ. ਅਰਿਯਧਮ੍ਮਤੋ ਜਾਤਤ੍ਤਾ ਅਰਿਯਧਮ੍ਮੇਨ ਚ ਨਿਮ੍ਮਿਤਤ੍ਤਾ ਧਮ੍ਮਜੋ ਧਮ੍ਮਨਿਮ੍ਮਿਤੋ. ਨਵਲੋਕੁਤ੍ਤਰਧਮ੍ਮਦਾਯਜ੍ਜਂ ਅਰਹਤੀਤਿ ਧਮ੍ਮਦਾਯਾਦੋ. ਤਂ ਕਿਸ੍ਸ ਹੇਤੂਤਿ ਯਦੇਤਂ ‘‘ਭਗਵਤੋਮ੍ਹਿ ਪੁਤ੍ਤੋ’’ਤਿ ਵਤ੍ਵਾ ‘‘ਧਮ੍ਮਜੋ ਧਮ੍ਮਨਿਮ੍ਮਿਤੋ’’ਤਿ ਵੁਤ੍ਤਂ, ਤਂ ਕਸ੍ਮਾਤਿ ਚੇ? ਇਦਾਨਿਸ੍ਸ ਅਤ੍ਥਂ ਦਸ੍ਸੇਨ੍ਤੋ ਤਥਾਗਤਸ੍ਸ ਹੇਤਨ੍ਤਿਆਦਿਮਾਹ. ਤਤ੍ਥ ‘‘ਧਮ੍ਮਕਾਯੋ ਇਤਿਪੀ’’ਤਿ ਕਸ੍ਮਾ ਤਥਾਗਤੋ ‘‘ਧਮ੍ਮਕਾਯੋ’’ਤਿ ਵੁਤ੍ਤੋ? ਤਥਾਗਤੋ ਹਿ ਤੇਪਿਟਕਂ ਬੁਦ੍ਧਵਚਨਂ ਹਦਯੇਨ ਚਿਨ੍ਤੇਤ੍ਵਾ ਵਾਚਾਯ ਅਭਿਨੀਹਰਿ. ਤੇਨਸ੍ਸ ਕਾਯੋ ਧਮ੍ਮਮਯਤ੍ਤਾ ਧਮ੍ਮੋਵ. ਇਤਿ ਧਮ੍ਮੋ ਕਾਯੋ ਅਸ੍ਸਾਤਿ ਧਮ੍ਮਕਾਯੋ. ਧਮ੍ਮਕਾਯਤ੍ਤਾ ਏਵ ਬ੍ਰਹ੍ਮਕਾਯੋ. ਧਮ੍ਮੋ ਹਿ ਸੇਟ੍ਠਤ੍ਥੇਨ ਬ੍ਰਹ੍ਮਾਤਿ ਵੁਚ੍ਚਤਿ. ਧਮ੍ਮਭੂਤੋਤਿ ਧਮ੍ਮਸਭਾਵੋ. ਧਮ੍ਮਭੂਤਤ੍ਤਾ ਏਵ ਬ੍ਰਹ੍ਮਭੂਤੋ.

੧੧੯. ਏਤ੍ਤਾਵਤਾ ਭਗਵਾ ਸੇਟ੍ਠਚ੍ਛੇਦਕਵਾਦਂ ਦਸ੍ਸੇਤ੍ਵਾ ਇਦਾਨਿ ਅਪਰੇਨਪਿ ਨਯੇਨ ਸੇਟ੍ਠਚ੍ਛੇਦਕਵਾਦਮੇਵ ਦਸ੍ਸੇਤੁਂ ਹੋਤਿ ਖੋ ਸੋ, ਵਾਸੇਟ੍ਠ, ਸਮਯੋਤਿਆਦਿਮਾਹ. ਤਤ੍ਥ ਸਂਵਟ੍ਟਵਿਵਟ੍ਟਕਥਾ ਬ੍ਰਹ੍ਮਜਾਲੇ ਵਿਤ੍ਥਾਰਿਤਾਵ. ਇਤ੍ਥਤ੍ਤਂ ਆਗਚ੍ਛਨ੍ਤੀਤਿ ਇਤ੍ਥਭਾਵਂ ਮਨੁਸ੍ਸਤ੍ਤਂ ਆਗਚ੍ਛਨ੍ਤਿ. ਤੇਧ ਹੋਨ੍ਤਿ ਮਨੋਮਯਾਤਿ ਤੇ ਇਧ ਮਨੁਸ੍ਸਲੋਕੇ ਨਿਬ੍ਬਤ੍ਤਮਾਨਾਪਿ ਓਪਪਾਤਿਕਾ ਹੁਤ੍ਵਾ ਮਨੇਨੇਵ ਨਿਬ੍ਬਤ੍ਤਾਤਿ ਮਨੋਮਯਾ. ਬ੍ਰਹ੍ਮਲੋਕੇ ਵਿਯ ਇਧਾਪਿ ਨੇਸਂ ਪੀਤਿਯੇਵ ਆਹਾਰਕਿਚ੍ਚਂ ਸਾਧੇਤੀਤਿ ਪੀਤਿਭਕ੍ਖਾ. ਏਤੇਨੇਵ ਨਯੇਨ ਸਯਂਪਭਾਦੀਨਿਪਿ ਵੇਦਿਤਬ੍ਬਾਨੀਤਿ.

ਰਸਪਥਵਿਪਾਤੁਭਾਵਵਣ੍ਣਨਾ

੧੨੦. ਏਕੋਦਕੀਭੂਤਨ੍ਤਿ ਸਬ੍ਬਂ ਚਕ੍ਕਵਾਲ਼ਂ ਏਕੋਦਕਮੇਵ ਭੂਤਂ. ਅਨ੍ਧਕਾਰੋਤਿ ਤਮੋ. ਅਨ੍ਧਕਾਰਤਿਮਿਸਾਤਿ ਚਕ੍ਖੁਵਿਞ੍ਞਾਣੁਪ੍ਪਤ੍ਤਿਨਿਵਾਰਣੇਨ ਅਨ੍ਧਭਾਵਕਰਣਂ ਬਹਲਤਮਂ. ਸਮਤਨੀਤਿ ਪਤਿਟ੍ਠਹਿ ਸਮਨ੍ਤਤੋ ਪਤ੍ਥਰਿ. ਪਯਸੋ ਤਤ੍ਤਸ੍ਸਾਤਿ ਤਤ੍ਤਸ੍ਸ ਖੀਰਸ੍ਸ. ਵਣ੍ਣਸਮ੍ਪਨ੍ਨਾਤਿ ਵਣ੍ਣੇਨ ਸਮ੍ਪਨ੍ਨਾ. ਕਣਿਕਾਰਪੁਪ੍ਫਸਦਿਸੋ ਹਿਸ੍ਸਾ ਵਣ੍ਣੋ ਅਹੋਸਿ. ਗਨ੍ਧਸਮ੍ਪਨ੍ਨਾਤਿ ਗਨ੍ਧੇਨ ਸਮ੍ਪਨ੍ਨਾ ਦਿਬ੍ਬਗਨ੍ਧਂ ਵਾਯਤਿ. ਰਸਸਮ੍ਪਨ੍ਨਾਤਿ ਰਸੇਨ ਸਮ੍ਪਨ੍ਨਾ ਪਕ੍ਖਿਤ੍ਤਦਿਬ੍ਬੋਜਾ ਵਿਯ ਹੋਤਿ. ਖੁਦ੍ਦਮਧੁਨ੍ਤਿ ਖੁਦ੍ਦਕਮਕ੍ਖਿਕਾਹਿ ਕਤਮਧੁਂ. ਅਨੇਲ਼ਕਨ੍ਤਿ ਨਿਦ੍ਦੋਸਂ ਮਕ੍ਖਿਕਣ੍ਡਕਵਿਰਹਿਤਂ. ਲੋਲਜਾਤਿਕੋਤਿ ਲੋਲਸਭਾਵੋ. ਅਤੀਤਾਨਨ੍ਤਰੇਪਿ ਕਪ੍ਪੇ ਲੋਲੋਯੇਵ. ਅਮ੍ਭੋਤਿ ਅਚ੍ਛਰਿਯਜਾਤੋ ਆਹ. ਕਿਮੇਵਿਦਂ ਭਵਿਸ੍ਸਤੀਤਿ ਵਣ੍ਣੋਪਿਸ੍ਸਾ ਮਨਾਪੋ ਗਨ੍ਧੋਪਿ, ਰਸੋ ਪਨਸ੍ਸਾ ਕੀਦਿਸੋ ਭਵਿਸ੍ਸਤੀਤਿ ਅਤ੍ਥੋ. ਯੋ ਤਤ੍ਥ ਉਪ੍ਪਨ੍ਨਲੋਭੋ, ਸੋ ਰਸਪਥਵਿਂ ਅਙ੍ਗੁਲਿਯਾ ਸਾਯਿ, ਅਙ੍ਗੁਲਿਯਾ ਗਹੇਤ੍ਵਾ ਜਿਵ੍ਹਗ੍ਗੇ ਠਪੇਸਿ.

ਅਚ੍ਛਾਦੇਸੀਤਿ ਜਿਵ੍ਹਗ੍ਗੇ ਠਪਿਤਮਤ੍ਤਾ ਸਤ੍ਤ ਰਸਹਰਣੀਸਹਸ੍ਸਾਨਿ ਫਰਿਤ੍ਵਾ ਮਨਾਪਾ ਹੁਤ੍ਵਾ ਤਿਟ੍ਠਤਿ. ਤਣ੍ਹਾ ਚਸ੍ਸ ਓਕ੍ਕਮੀਤਿ ਤਤ੍ਥ ਚਸ੍ਸ ਤਣ੍ਹਾ ਉਪ੍ਪਜ੍ਜਿ.

ਚਨ੍ਦਿਮਸੂਰਿਯਾਦਿਪਾਤੁਭਾਵਵਣ੍ਣਨਾ

੧੨੧. ਆਲੁਪ੍ਪਕਾਰਕਂ ਉਪਕ੍ਕਮਿਂਸੁ ਪਰਿਭੁਞ੍ਜਿਤੁਨ੍ਤਿ ਆਲੋਪਂ ਕਤ੍ਵਾ ਪਿਣ੍ਡੇ ਪਿਣ੍ਡੇ ਛਿਨ੍ਦਿਤ੍ਵਾ ਪਰਿਭੁਞ੍ਜਿਤੁਂ ਆਰਭਿਂਸੁ. ਚਨ੍ਦਿਮਸੂਰਿਯਾਤਿ ਚਨ੍ਦਿਮਾ ਚ ਸੂਰਿਯੋ ਚ. ਪਾਤੁਰਹੇਸੁਨ੍ਤਿ ਪਾਤੁਭਵਿਂਸੁ.

ਕੋ ਪਨ ਤੇਸਂ ਪਠਮਂ ਪਾਤੁਭਵਿ, ਕੋ ਕਸ੍ਮਿਂ ਵਸਤਿ, ਕਸ੍ਸ ਕਿਂ ਪਮਾਣਂ, ਕੋ ਉਪਰਿ, ਕੋ ਸੀਘਂ ਗਚ੍ਛਤਿ, ਕਤਿ ਨੇਸਂ ਵੀਥਿਯੋ, ਕਥਂ ਚਰਨ੍ਤਿ, ਕਿਤ੍ਤਕੇ ਠਾਨੇ ਆਲੋਕਂ ਕਰੋਨ੍ਤੀਤਿ? ਉਭੋ ਏਕਤੋ ਪਾਤੁਭਵਨ੍ਤਿ. ਸੂਰਿਯੋ ਪਠਮਤਰਂ ਪਞ੍ਞਾਯਤਿ. ਤੇਸਞ੍ਹਿ ਸਤ੍ਤਾਨਂ ਸਯਂਪਭਾਯ ਅਨ੍ਤਰਹਿਤਾਯ ਅਨ੍ਧਕਾਰੋ ਅਹੋਸਿ. ਤੇ ਭੀਤਤਸਿਤਾ ‘‘ਭਦ੍ਦਕਂ ਵਤਸ੍ਸ ਸਚੇ ਆਲੋਕੋ ਪਾਤੁਭਵੇਯ੍ਯਾ’’ਤਿ ਚਿਨ੍ਤਯਿਂਸੁ. ਤਤੋ ਮਹਾਜਨਸ੍ਸ ਸੂਰਭਾਵਂ ਜਨਯਮਾਨਂ ਸੂਰਿਯਮਣ੍ਡਲਂ ਉਟ੍ਠਹਿ. ਤੇਨੇਵਸ੍ਸ ਸੂਰਿਯੋਤਿ ਨਾਮਂ ਅਹੋਸਿ. ਤਸ੍ਮਿਂ ਦਿਵਸਂ ਆਲੋਕਂ ਕਤ੍ਵਾ ਅਤ੍ਥਙ੍ਗਤੇ ਪੁਨ ਅਨ੍ਧਕਾਰੋ ਅਹੋਸਿ. ਤੇ ‘‘ਭਦ੍ਦਕਂ ਵਤਸ੍ਸ ਸਚੇ ਅਞ੍ਞੋ ਆਲੋਕੋ ਉਪ੍ਪਜ੍ਜੇਯ੍ਯਾ’’ਤਿ ਚਿਨ੍ਤਯਿਂਸੁ. ਅਥ ਨੇਸਂ ਛਨ੍ਦਂ ਞਤ੍ਵਾਵ ਚਨ੍ਦਮਣ੍ਡਲਂ ਉਟ੍ਠਹਿ. ਤੇਨੇਵਸ੍ਸ ਚਨ੍ਦੋਤਿ ਨਾਮਂ ਅਹੋਸਿ.

ਤੇਸੁ ਚਨ੍ਦੋ ਅਨ੍ਤੋਮਣਿਵਿਮਾਨੇ ਵਸਤਿ. ਤਂ ਬਹਿ ਰਜਤੇਨ ਪਰਿਕ੍ਖਿਤ੍ਤਂ. ਉਭਯਮ੍ਪਿ ਸੀਤਲਮੇਵ ਅਹੋਸਿ. ਸੂਰਿਯੋ ਅਨ੍ਤੋਕਨਕਵਿਮਾਨੇ ਵਸਤਿ. ਤਂ ਬਾਹਿਰਂ ਫਲਿਕਪਰਿਕ੍ਖਿਤ੍ਤਂ ਹੋਤਿ. ਉਭਯਮ੍ਪਿ ਉਣ੍ਹਮੇਵ.

ਪਮਾਣਤੋ ਚਨ੍ਦੋ ਉਜੁਕਂ ਏਕੂਨਪਞ੍ਞਾਸਯੋਜਨੋ. ਪਰਿਮਣ੍ਡਲਤੋ ਤੀਹਿ ਯੋਜਨੇਹਿ ਊਨਦਿਯਡ੍ਢਸਤਯੋਜਨੋ. ਸੂਰਿਯੋ ਉਜੁਕਂ ਪਞ੍ਞਾਸਯੋਜਨੋ, ਪਰਿਮਣ੍ਡਲਤੋ ਦਿਯਡ੍ਢਸਤਯੋਜਨੋ.

ਚਨ੍ਦੋ ਹੇਟ੍ਠਾ, ਸੂਰਿਯੋ ਉਪਰਿ, ਅਨ੍ਤਰਾ ਨੇਸਂ ਯੋਜਨਂ ਹੋਤਿ. ਚਨ੍ਦਸ੍ਸ ਹੇਟ੍ਠਿਮਨ੍ਤਤੋ ਸੂਰਿਯਸ੍ਸ ਉਪਰਿਮਨ੍ਤਤੋ ਯੋਜਨਸਤਂ ਹੋਤਿ.

ਚਨ੍ਦੋ ਉਜੁਕਂ ਸਣਿਕਂ ਗਚ੍ਛਤਿ, ਤਿਰਿਯਂ ਸੀਘਂ. ਦ੍ਵੀਸੁ ਪਸ੍ਸੇਸੁ ਨਕ੍ਖਤ੍ਤਤਾਰਕਾ ਗਚ੍ਛਨ੍ਤਿ. ਚਨ੍ਦੋ ਧੇਨੁ ਵਿਯ ਵਚ੍ਛਂ ਤਂ ਤਂ ਨਕ੍ਖਤ੍ਤਂ ਉਪਸਙ੍ਕਮਤਿ. ਨਕ੍ਖਤ੍ਤਾਨਿ ਪਨ ਅਤ੍ਤਨੋ ਠਾਨਂ ਨ ਵਿਜਹਨ੍ਤਿ. ਸੂਰਿਯਸ੍ਸ ਉਜੁਕਂ ਗਮਨਂ ਸੀਘਂ, ਤਿਰਿਯਂ ਗਮਨਂ ਦਨ੍ਧਂ. ਸੋ ਕਾਲ਼ਪਕ੍ਖਉਪੋਸਥਤੋ ਪਾਟਿਪਦਦਿਵਸੇ ਯੋਜਨਾਨਂ ਸਤਸਹਸ੍ਸਂ ਚਨ੍ਦਮਣ੍ਡਲਂ ਓਹਾਯ ਗਚ੍ਛਤਿ. ਅਥ ਚਨ੍ਦੋ ਲੇਖਾ ਵਿਯ ਪਞ੍ਞਾਯਤਿ. ਪਕ੍ਖਸ੍ਸ ਦੁਤਿਯਾਯ ਸਤਸਹਸ੍ਸਨ੍ਤਿ ਏਵਂ ਯਾਵ ਉਪੋਸਥਦਿਵਸਾ ਸਤਸਹਸ੍ਸਂ ਸਤਸਹਸ੍ਸਂ ਓਹਾਯ ਗਚ੍ਛਤਿ. ਅਥ ਚਨ੍ਦੋ ਅਨੁਕ੍ਕਮੇਨ ਵਡ੍ਢਿਤ੍ਵਾ ਉਪੋਸਥਦਿਵਸੇ ਪਰਿਪੁਣ੍ਣੋ ਹੋਤਿ. ਪੁਨ ਪਾਟਿਪਦਦਿਵਸੇ ਯੋਜਨਾਨਂ ਸਤਸਹਸ੍ਸਂ ਧਾਵਿਤ੍ਵਾ ਗਣ੍ਹਾਤਿ. ਦੁਤਿਯਾਯ ਸਤਸਹਸ੍ਸਨ੍ਤਿ ਏਵਂ ਯਾਵ ਉਪੋਸਥਦਿਵਸਾ ਸਤਸਹਸ੍ਸਂ ਸਤਸਹਸ੍ਸਂ ਧਾਵਿਤ੍ਵਾ ਗਣ੍ਹਾਤਿ. ਅਥ ਚਨ੍ਦੋ ਅਨੁਕ੍ਕਮੇਨ ਹਾਯਿਤ੍ਵਾ ਉਪੋਸਥਦਿਵਸੇ ਸਬ੍ਬਸੋ ਨ ਪਞ੍ਞਾਯਤਿ. ਚਨ੍ਦਂ ਹੇਟ੍ਠਾ ਕਤ੍ਵਾ ਸੂਰਿਯੋ ਉਪਰਿ ਹੋਤਿ. ਮਹਤਿਯਾ ਪਾਤਿਯਾ ਖੁਦ੍ਦਕਭਾਜਨਂ ਵਿਯ ਚਨ੍ਦਮਣ੍ਡਲਂ ਪਿਧੀਯਤਿ. ਮਜ੍ਝਨ੍ਹਿਕੇ ਗੇਹਚ੍ਛਾਯਾ ਵਿਯ ਚਨ੍ਦਸ੍ਸ ਛਾਯਾ ਨ ਪਞ੍ਞਾਯਤਿ. ਸੋ ਛਾਯਾਯ ਅਪਞ੍ਞਾਯਮਾਨਾਯ ਦੂਰੇ ਠਿਤਾਨਂ ਦਿਵਾ ਪਦੀਪੋ ਵਿਯ ਸਯਮ੍ਪਿ ਨ ਪਞ੍ਞਾਯਤਿ.

ਕਤਿ ਨੇਸਂ ਵੀਥਿਯੋਤਿ ਏਤ੍ਥ ਪਨ ਅਜਵੀਥਿ, ਨਾਗਵੀਥਿ, ਗੋਵੀਥੀਤਿ ਤਿਸ੍ਸੋ ਵੀਥਿਯੋ ਹੋਨ੍ਤਿ. ਤਤ੍ਥ ਅਜਾਨਂ ਉਦਕਂ ਪਟਿਕੂਲਂ ਹੋਤਿ, ਹਤ੍ਥਿਨਾਗਾਨਂ ਮਨਾਪਂ. ਗੁਨ੍ਨਂ ਸੀਤੁਣ੍ਹਸਮਤਾਯ ਫਾਸੁ ਹੋਤਿ. ਤਸ੍ਮਾ ਯਂ ਕਾਲਂ ਚਨ੍ਦਿਮਸੂਰਿਯਾ ਅਜਵੀਥਿਂ ਆਰੁਹਨ੍ਤਿ, ਤਦਾ ਦੇਵੋ ਏਕਬਿਨ੍ਦੁਮ੍ਪਿ ਨ ਵਸ੍ਸਤਿ. ਯਦਾ ਨਾਗਵੀਥਿਂ ਆਰੋਹਨ੍ਤਿ, ਤਦਾ ਭਿਨ੍ਨਂ ਵਿਯ ਨਭਂ ਪਗ੍ਘਰਤਿ. ਯਦਾ ਗੋਵੀਥਿਂ ਆਰੋਹਨ੍ਤਿ, ਤਦਾ ਉਤੁਸਮਤਾ ਸਮ੍ਪਜ੍ਜਤਿ. ਚਨ੍ਦਿਮਸੂਰਿਯਾ ਛਮਾਸੇ ਸਿਨੇਰੁਤੋ ਬਹਿ ਨਿਕ੍ਖਮਨ੍ਤਿ, ਛਮਾਸੇ ਅਨ੍ਤੋ ਵਿਚਰਨ੍ਤਿ. ਤੇ ਹਿ ਆਸਾਲ਼੍ਹਮਾਸੇ ਸਿਨੇਰੁਸਮੀਪੇਨ ਵਿਚਰਨ੍ਤਿ. ਤਤੋ ਪਰੇ ਦ੍ਵੇ ਮਾਸੇ ਨਿਕ੍ਖਮਿਤ੍ਵਾ ਬਹਿ ਵਿਚਰਨ੍ਤਾ ਪਠਮਕਤ੍ਤਿਕਮਾਸੇ ਮਜ੍ਝੇਨ ਗਚ੍ਛਨ੍ਤਿ. ਤਤੋ ਚਕ੍ਕਵਾਲ਼ਾਭਿਮੁਖਾ ਗਨ੍ਤ੍ਵਾ ਤਯੋ ਮਾਸੇ ਚਕ੍ਕਵਾਲ਼ਸਮੀਪੇਨ ਚਰਿਤ੍ਵਾ ਪੁਨ ਨਿਕ੍ਖਮਿਤ੍ਵਾ ਚਿਤ੍ਰਮਾਸੇ ਮਜ੍ਝੇਨ ਗਨ੍ਤ੍ਵਾ ਤਤੋ ਦ੍ਵੇ ਮਾਸੇ ਸਿਨੇਰੁਭਿਮੁਖਾ ਪਕ੍ਖਨ੍ਦਿਤ੍ਵਾ ਪੁਨ ਆਸਾਲ਼੍ਹੇ ਸਿਨੇਰੁਸਮੀਪੇਨ ਚਰਨ੍ਤਿ.

ਕਿਤ੍ਤਕੇ ਠਾਨੇ ਆਲੋਕਂ ਕਰੋਨ੍ਤੀਤਿ? ਏਕਪ੍ਪਹਾਰੇਨ ਤੀਸੁ ਦੀਪੇਸੁ ਆਲੋਕਂ ਕਰੋਨ੍ਤਿ. ਕਥਂ? ਇਮਸ੍ਮਿਞ੍ਹਿ ਦੀਪੇ ਸੂਰਿਯੁਗ੍ਗਮਨਕਾਲੋ ਪੁਬ੍ਬਵਿਦੇਹੇ ਮਜ੍ਝਨ੍ਹਿਕੋ ਹੋਤਿ, ਉਤ੍ਤਰਕੁਰੂਸੁ ਅਤ੍ਥਙ੍ਗਮਨਕਾਲੋ, ਅਪਰਗੋਯਾਨੇ ਮਜ੍ਝਿਮਯਾਮੋ. ਪੁਬ੍ਬਵਿਦੇਹਮ੍ਹਿ ਉਗ੍ਗਮਨਕਾਲੋ ਉਤ੍ਤਰਕੁਰੂਸੁ ਮਜ੍ਝਨ੍ਹਿਕੋ, ਅਪਰਗੋਯਾਨੇ ਅਤ੍ਥਙ੍ਗਮਨਕਾਲੋ, ਇਧ ਮਜ੍ਝਿਮਯਾਮੋ. ਉਤ੍ਤਰਕੁਰੂਸੁ ਉਗ੍ਗਮਨਕਾਲੋ ਅਪਰਗੋਯਾਨੇ ਮਜ੍ਝਨ੍ਹਿਕੋ, ਇਧ ਅਤ੍ਥਙ੍ਗਮਨਕਾਲੋ, ਪੁਬ੍ਬਵਿਦੇਹੇ ਮਜ੍ਝਿਮਯਾਮੋ. ਅਪਰਗੋਯਾਨਦੀਪੇ ਉਗ੍ਗਮਨਕਾਲੋ ਇਧ ਮਜ੍ਝਨ੍ਹਿਕੋ, ਪੁਬ੍ਬਵਿਦੇਹੇ ਅਤ੍ਥਙ੍ਗਮਨਕਾਲੋ, ਉਤ੍ਤਰਕੁਰੂਸੁ ਮਜ੍ਝਿਮਯਾਮੋਤਿ.

ਨਕ੍ਖਤ੍ਤਾਨਿ ਤਾਰਕਰੂਪਾਨੀਤਿ ਕਤ੍ਤਿਕਾਦਿਨਕ੍ਖਤ੍ਤਾਨਿ ਚੇਵ ਸੇਸਤਾਰਕਰੂਪਾਨਿ ਚ ਚਨ੍ਦਿਮਸੂਰਿਯੇਹਿ ਸਦ੍ਧਿਂਯੇਵ ਪਾਤੁਰਹੇਸੁਂ. ਰਤ੍ਤਿਨ੍ਦਿਵਾਤਿ ਤਤੋ ਸੂਰਿਯਤ੍ਥਙ੍ਗਮਨਤੋ ਯਾਵ ਅਰੁਣੁਗ੍ਗਮਨਾ ਰਤ੍ਤਿ, ਅਰੁਣੁਗ੍ਗਮਨਤੋ ਯਾਵ ਸੂਰਿਯਤ੍ਥਙ੍ਗਮਨਾ ਦਿਵਾਤਿ ਏਵਂ ਰਤ੍ਤਿਨ੍ਦਿਵਾ ਪਞ੍ਞਾਯਿਂਸੁ. ਅਥ ਪਞ੍ਚਦਸ ਰਤ੍ਤਿਯੋ ਅਡ੍ਢਮਾਸੋ, ਦ੍ਵੇ ਅਡ੍ਢਮਾਸਾ ਮਾਸੋਤਿ ਏਵਂ ਮਾਸਡ੍ਢਮਾਸਾ ਪਞ੍ਞਾਯਿਂਸੁ. ਅਥ ਚਤ੍ਤਾਰੋ ਮਾਸਾ ਉਤੁ, ਤਯੋ ਉਤੂ ਸਂਵਚ੍ਛਰੋਤਿ ਏਵਂ ਉਤੁਸਂਵਚ੍ਛਰਾ ਪਞ੍ਞਾਯਿਂਸੁ.

੧੨੨. ਵਣ੍ਣਵੇਵਣ੍ਣਤਾ ਚਾਤਿ ਵਣ੍ਣਸ੍ਸ ਵਿਵਣ੍ਣਭਾਵੋ. ਤੇਸਂ ਵਣ੍ਣਾਤਿਮਾਨਪਚ੍ਚਯਾਤਿ ਤੇਸਂ ਵਣ੍ਣਂ ਆਰਬ੍ਭ ਉਪ੍ਪਨ੍ਨਅਤਿਮਾਨਪਚ੍ਚਯਾ. ਮਾਨਾਤਿਮਾਨਜਾਤਿਕਾਨਨ੍ਤਿ ਪੁਨਪ੍ਪੁਨਂ ਉਪ੍ਪਜ੍ਜਮਾਨਾਤਿਮਾਨਸਭਾਵਾਨਂ. ਰਸਾਯ ਪਥਵਿਯਾਤਿ ਸਮ੍ਪਨ੍ਨਰਸਤ੍ਤਾ ਰਸਾਤਿ ਲਦ੍ਧਨਾਮਾਯ ਪਥਵਿਯਾ. ਅਨੁਤ੍ਥੁਨਿਂਸੂਤਿ ਅਨੁਭਾਸਿਂਸੁ. ਅਹੋ ਰਸਨ੍ਤਿ ਅਹੋ ਅਮ੍ਹਾਕਂ ਮਧੁਰਰਸਂ ਅਨ੍ਤਰਹਿਤਂ. ਅਗ੍ਗਞ੍ਞਂ ਅਕ੍ਖਰਨ੍ਤਿ ਲੋਕੁਪ੍ਪਤ੍ਤਿਵਂਸਕਥਂ. ਅਨੁਸਰਨ੍ਤੀਤਿ ਅਨੁਗਚ੍ਛਨ੍ਤਿ.

ਭੂਮਿਪਪ੍ਪਟਕਪਾਤੁਭਾਵਾਦਿਵਣ੍ਣਨਾ

੧੨੩. ਏਵਮੇਵ ਪਾਤੁਰਹੋਸੀਤਿ ਏਦਿਸੋ ਹੁਤ੍ਵਾ ਉਟ੍ਠਹਿ, ਅਨ੍ਤੋਵਾਪਿਯਂ ਉਦਕੇ ਛਿਨ੍ਨੇ ਸੁਕ੍ਖਕਲਲਪਟਲਂ ਵਿਯ ਚ ਉਟ੍ਠਹਿ.

੧੨੪. ਪਦਾਲਤਾਤਿ ਏਕਾ ਮਧੁਰਰਸਾ ਭਦ੍ਦਾਲਤਾ. ਕਲਮ੍ਬੁਕਾਤਿ ਨਾਲ਼ਿਕਾ. ਅਹੁ ਵਤ ਨੋਤਿ ਮਧੁਰਰਸਾ ਵਤ ਨੋ ਪਦਾਲਤਾ ਅਹੋਸਿ. ਅਹਾਯਿ ਵਤ ਨੋਤਿ ਸਾ ਨੋ ਏਤਰਹਿ ਅਨ੍ਤਰਹਿਤਾਤਿ.

੧੨੫. ਅਕਟ੍ਠਪਾਕੋਤਿ ਅਕਟ੍ਠੇਯੇਵ ਭੂਮਿਭਾਗੇ ਉਪ੍ਪਨ੍ਨੋ. ਅਕਣੋਤਿ ਨਿਕ੍ਕੁਣ੍ਡਕੋ. ਅਥੁਸੋਤਿ ਨਿਤ੍ਥੁਸੋ. ਸੁਗਨ੍ਧੋਤਿ ਦਿਬ੍ਬਗਨ੍ਧਂ ਵਾਯਤਿ. ਤਣ੍ਡੁਲਪ੍ਫਲੋਤਿ ਸੁਪਰਿਸੁਦ੍ਧਂ ਪਣ੍ਡਰਂ ਤਣ੍ਡੁਲਮੇਵ ਫਲਤਿ. ਪਕ੍ਕਂ ਪਟਿਵਿਰੂਲ਼੍ਹਨ੍ਤਿ ਸਾਯਂ ਗਹਿਤਟ੍ਠਾਨਂ ਪਾਤੋ ਪਕ੍ਕਂ ਹੋਤਿ, ਪੁਨ ਵਿਰੂਲ਼੍ਹਂ ਪਟਿਪਾਕਤਿਕਮੇਵ ਗਹਿਤਟ੍ਠਾਨਂ ਨ ਪਞ੍ਞਾਯਤਿ. ਨਾਪਦਾਨਂ ਪਞ੍ਞਾਯਤੀਤਿ ਅਲਾਯਿਤਂ ਹੁਤ੍ਵਾ ਅਨੂਨਮੇਵ ਪਞ੍ਞਾਯਤਿ.

ਇਤ੍ਥਿਪੁਰਿਸਲਿਙ੍ਗਾਦਿਪਾਤੁਭਾਵਵਣ੍ਣਨਾ

੧੨੬. ਇਤ੍ਥਿਯਾ ਚਾਤਿ ਯਾ ਪੁਬ੍ਬੇ ਮਨੁਸ੍ਸਕਾਲੇ ਇਤ੍ਥੀ, ਤਸ੍ਸ ਇਤ੍ਥਿਲਿਙ੍ਗਂ ਪਾਤੁਭਵਤਿ, ਪੁਬ੍ਬੇ ਪੁਰਿਸਸ੍ਸ ਪੁਰਿਸਲਿਙ੍ਗਂ. ਮਾਤੁਗਾਮੋ ਨਾਮ ਹਿ ਪੁਰਿਸਤ੍ਤਭਾਵਂ ਲਭਨ੍ਤੋ ਅਨੁਪੁਬ੍ਬੇਨ ਪੁਰਿਸਤ੍ਤਪਚ੍ਚਯੇ ਧਮ੍ਮੇ ਪੂਰੇਤ੍ਵਾ ਲਭਤਿ. ਪੁਰਿਸੋ ਇਤ੍ਥਤ੍ਤਭਾਵਂ ਲਭਨ੍ਤੋ ਕਾਮੇਸੁਮਿਚ੍ਛਾਚਾਰਂ ਨਿਸ੍ਸਾਯ ਲਭਤਿ. ਤਦਾ ਪਨ ਪਕਤਿਯਾ ਮਾਤੁਗਾਮਸ੍ਸ ਇਤ੍ਥਿਲਿਙ੍ਗਂ, ਪੁਰਿਸਸ੍ਸ ਪੁਰਿਸਲਿਙ੍ਗਂ ਪਾਤੁਰਹੋਸਿ. ਉਪਨਿਜ੍ਝਾਯਤਨ੍ਤਿ ਉਪਨਿਜ੍ਝਾਯਨ੍ਤਾਨਂ ਓਲੋਕੇਨ੍ਤਾਨਂ. ਪਰਿਲ਼ਾਹੋਤਿ ਰਾਗਪਰਿਲ਼ਾਹੋ. ਸੇਟ੍ਠਿਨ੍ਤਿ ਛਾਰਿਕਂ. ਨਿਬ੍ਬੁਯ੍ਹਮਾਨਾਯਾਤਿ ਨਿਯ੍ਯਮਾਨਾਯ.

੧੨੭. ਅਧਮ੍ਮਸਮ੍ਮਤਨ੍ਤਿ ਤਂ ਪਂਸੁਖਿਪਨਾਦਿ ਅਧਮ੍ਮੋਤਿ ਸਮ੍ਮਤਂ. ਤਦੇਤਰਹਿ ਧਮ੍ਮਸਮ੍ਮਤਨ੍ਤਿ ਤਂ ਇਦਾਨਿ ਧਮ੍ਮੋਤਿ ਸਮ੍ਮਤਂ, ਧਮ੍ਮੋਤਿ ਤਂ ਗਹੇਤ੍ਵਾ ਵਿਚਰਨ੍ਤਿ. ਤਥਾ ਹਿ ਏਕਚ੍ਚੇਸੁ ਜਾਨਪਦੇਸੁ ਕਲਹਂ ਕੁਰੁਮਾਨਾ ਇਤ੍ਥਿਯੋ ‘‘ਤ੍ਵਂ ਕਸ੍ਮਾ ਕਥੇਸਿ? ਯਾ ਗੋਮਯਪਿਣ੍ਡਮਤ੍ਤਮ੍ਪਿ ਨਾਲਤ੍ਥਾ’’ਤਿ ਵਦਨ੍ਤਿ. ਪਾਤਬ੍ਯਤਨ੍ਤਿ ਸੇਵਿਤਬ੍ਬਤਂ. ਸਨ੍ਨਿਧਿਕਾਰਕਨ੍ਤਿ ਸਨ੍ਨਿਧਿਂ ਕਤ੍ਵਾ. ਅਪਦਾਨਂ ਪਞ੍ਞਾਯਿਤ੍ਥਾਤਿ ਛਿਨ੍ਨਟ੍ਠਾਨਂ ਊਨਮੇਵ ਹੁਤ੍ਵਾ ਪਞ੍ਞਾਯਿਤ੍ਥ. ਸਣ੍ਡਸਣ੍ਡਾਤਿ ਏਕੇਕਸ੍ਮਿਂ ਠਾਨੇ ਕਲਾਪਬਨ੍ਧਾ ਵਿਯ ਗੁਮ੍ਬਗੁਮ੍ਬਾ ਹੁਤ੍ਵਾ.

੧੨੮. ਮਰਿਯਾਦਂ ਠਪੇਯ੍ਯਾਮਾਤਿ ਸੀਮਂ ਠਪੇਯ੍ਯਾਮ. ਯਤ੍ਰ ਹਿ ਨਾਮਾਤਿ ਯੋ ਹਿ ਨਾਮ. ਪਾਣਿਨਾ ਪਹਰਿਂਸੂਤਿ ਤਯੋ ਵਾਰੇ ਵਚਨਂ ਅਗਣ੍ਹਨ੍ਤਂ ਪਾਣਿਨਾ ਪਹਰਿਂਸੁ. ਤਦਗ੍ਗੇ ਖੋਤਿ ਤਂ ਅਗ੍ਗਂ ਕਤ੍ਵਾ.

ਮਹਾਸਮ੍ਮਤਰਾਜਵਣ੍ਣਨਾ

੧੩੦. ਖੀਯਿਤਬ੍ਬਂ ਖੀਯੇਯ੍ਯਾਤਿ ਪਕਾਸੇਤਬ੍ਬਂ ਪਕਾਸੇਯ੍ਯ ਖਿਪਿਤਬ੍ਬਂ ਖਿਪੇਯ੍ਯ, ਹਾਰੇਤਬ੍ਬਂ ਹਾਰੇਯ੍ਯਾਤਿ ਵੁਤ੍ਤਂ ਹੋਤਿ. ਯੋ ਨੇਸਂ ਸਤ੍ਤੋਤਿ ਯੋ ਤੇਸਂ ਸਤ੍ਤੋ. ਕੋ ਪਨ ਸੋਤਿ? ਅਮ੍ਹਾਕਂ ਬੋਧਿਸਤ੍ਤੋ. ਸਾਲੀਨਂ ਭਾਗਂ ਅਨੁਪਦਸ੍ਸਾਮਾਤਿ ਮਯਂ ਏਕੇਕਸ੍ਸ ਖੇਤ੍ਤਤੋ ਅਮ੍ਬਣਮ੍ਬਣਂ ਆਹਰਿਤ੍ਵਾ ਤੁਯ੍ਹਂ ਸਾਲਿਭਾਗਂ ਦਸ੍ਸਾਮ, ਤਯਾ ਕਿਞ੍ਚਿ ਕਮ੍ਮਂ ਨ ਕਾਤਬ੍ਬਂ, ਤ੍ਵਂ ਅਮ੍ਹਾਕਂ ਜੇਟ੍ਠਕਟ੍ਠਾਨੇ ਤਿਟ੍ਠਾਤਿ.

੧੩੧. ਅਕ੍ਖਰਂ ਉਪਨਿਬ੍ਬਤ੍ਤਨ੍ਤਿ ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ ਉਪ੍ਪਨ੍ਨੋ. ਖਤ੍ਤਿਯੋ ਖਤ੍ਤਿਯੋਤ੍ਵੇਵ ਦੁਤਿਯਂ ਅਕ੍ਖਰਨ੍ਤਿ ਨ ਕੇਵਲਂ ਅਕ੍ਖਰਮੇਵ, ਤੇ ਪਨਸ੍ਸ ਖੇਤ੍ਤਸਾਮਿਨੋ ਤੀਹਿ ਸਙ੍ਖੇਹਿ ਅਭਿਸੇਕਮ੍ਪਿ ਅਕਂਸੁ. ਰਞ੍ਜੇਤੀਤਿ ਸੁਖੇਤਿ ਪਿਨੇਤਿ. ਅਗ੍ਗਞ੍ਞੇਨਾਤਿ ਅਗ੍ਗਨ੍ਤਿ ਞਾਤੇਨ, ਅਗ੍ਗੇ ਵਾ ਞਾਤੇਨ ਲੋਕੁਪ੍ਪਤ੍ਤਿਸਮਯੇ ਉਪ੍ਪਨ੍ਨੇਨ ਅਭਿਨਿਬ੍ਬਤ੍ਤਿ ਅਹੋਸੀਤਿ.

ਬ੍ਰਾਹ੍ਮਣਮਣ੍ਡਲਾਦਿਵਣ੍ਣਨਾ

੧੩੨. ਵੀਤਙ੍ਗਾਰਾ ਵੀਤਧੂਮਾਤਿ ਪਚਿਤ੍ਵਾ ਖਾਦਿਤਬ੍ਬਾਭਾਵਤੋ ਵਿਗਤਧੂਮਙ੍ਗਾਰਾ. ਪਨ੍ਨਮੁਸਲਾਤਿ ਕੋਟ੍ਟੇਤ੍ਵਾ ਪਚਿਤਬ੍ਬਾਭਾਵਤੋ ਪਤਿਤਮੁਸਲਾ. ਘਾਸਮੇਸਮਾਨਾਤਿ ਭਿਕ੍ਖਾਚਰਿਯਵਸੇਨ ਯਾਗੁਭਤ੍ਤਂ ਪਰਿਯੇਸਨ੍ਤਾ. ਤਮੇਨਂ ਮਨੁਸ੍ਸਾ ਦਿਸ੍ਵਾਤਿ ਤੇ ਏਤੇ ਮਨੁਸ੍ਸਾ ਪਸ੍ਸਿਤ੍ਵਾ. ਅਨਭਿਸਮ੍ਭੁਣਮਾਨਾਤਿ ਅਸਹਮਾਨਾ ਅਸਕ੍ਕੋਨ੍ਤਾ. ਗਨ੍ਥੇ ਕਰੋਨ੍ਤਾਤਿ ਤਯੋ ਵੇਦੇ ਅਭਿਸਙ੍ਖਰੋਨ੍ਤਾ ਚੇਵ ਵਾਚੇਨ੍ਤਾ ਚ. ਅਚ੍ਛਨ੍ਤੀਤਿ ਵਸਨ੍ਤਿ, ‘‘ਅਚ੍ਛੇਨ੍ਤੀ’’ਤਿਪਿ ਪਾਠੋ. ਏਸੇਵਤ੍ਥੋ. ਹੀਨਸਮ੍ਮਤਨ੍ਤਿ ‘‘ਮਨ੍ਤੇ ਧਾਰੇਨ੍ਤਿ ਮਨ੍ਤੇ ਵਾਚੇਨ੍ਤੀ’’ਤਿ ਖੋ, ਵਾਸੇਟ੍ਠ, ਇਦਂ ਤੇਨ ਸਮਯੇਨ ਹੀਨਸਮ੍ਮਤਂ. ਤਦੇਤਰਹਿ ਸੇਟ੍ਠਸਮ੍ਮਤਨ੍ਤਿ ਤਂ ਇਦਾਨਿ ‘‘ਏਤ੍ਤਕੇ ਮਨ੍ਤੇ ਧਾਰੇਨ੍ਤਿ ਏਤ੍ਤਕੇ ਮਨ੍ਤੇ ਵਾਚੇਨ੍ਤੀ’’ਤਿ ਸੇਟ੍ਠਸਮ੍ਮਤਂ ਜਾਤਂ. ਬ੍ਰਾਹ੍ਮਣਮਣ੍ਡਲਸ੍ਸਾਤਿ ਬ੍ਰਾਹ੍ਮਣਗਣਸ੍ਸ.

੧੩੩. ਮੇਥੁਨਂ ਧਮ੍ਮਂ ਸਮਾਦਾਯਾਤਿ ਮੇਥੁਨਧਮ੍ਮਂ ਸਮਾਦਿਯਿਤ੍ਵਾ. ਵਿਸੁਕਮ੍ਮਨ੍ਤੇ ਪਯੋਜੇਸੁਨ੍ਤਿ ਗੋਰਕ੍ਖ ਵਾਣਿਜਕਮ੍ਮਾਦਿਕੇ ਵਿਸ੍ਸੁਤੇ ਉਗ੍ਗਤੇ ਕਮ੍ਮਨ੍ਤੇ ਪਯੋਜੇਸੁਂ.

੧੩੪. ਸੁਦ੍ਦਾ ਸੁਦ੍ਦਾਤਿ ਤੇਨ ਲੁਦ੍ਦਾਚਾਰਕਮ੍ਮਖੁਦ੍ਦਾਚਾਰਕਮ੍ਮੁਨਾ ਸੁਦ੍ਦਂ ਸੁਦ੍ਦਂ ਲਹੁਂ ਲਹੁਂ ਕੁਚ੍ਛਿਤਂ ਗਚ੍ਛਨ੍ਤਿ, ਵਿਨਸ੍ਸਨ੍ਤੀਤਿ ਅਤ੍ਥੋ. ਅਹੁ ਖੋਤਿ ਹੋਤਿ ਖੋ.

੧੩੫. ਸਕਂ ਧਮ੍ਮਂ ਗਰਹਮਾਨੋਤਿ ਨ ਸੇਤਚ੍ਛਤ੍ਤਂ ਉਸ੍ਸਾਪਨਮਤ੍ਤੇਨ ਸੁਜ੍ਝਿਤੁਂ ਸਕ੍ਕਾਤਿ ਏਵਂ ਅਤ੍ਤਨੋ ਖਤ੍ਤਿਯਧਮ੍ਮਂ ਨਿਨ੍ਦਮਾਨੋ. ਏਸ ਨਯੋ ਸਬ੍ਬਤ੍ਥ. ‘‘ਇਮੇਹਿ ਖੋ, ਵਾਸੇਟ੍ਠ, ਚਤੂਹਿ ਮਣ੍ਡਲੇਹੀ’’ਤਿ ਇਮਿਨਾ ਇਮਂ ਦਸ੍ਸੇਤਿ ‘‘ਸਮਣਮਣ੍ਡਲਂ ਨਾਮ ਵਿਸੁਂ ਨਤ੍ਥਿ, ਯਸ੍ਮਾ ਪਨ ਨ ਸਕ੍ਕਾ ਜਾਤਿਯਾ ਸੁਜ੍ਝਿਤੁਂ, ਅਤ੍ਤਨੋ ਅਤ੍ਤਨੋ ਸਮ੍ਮਾਪਟਿਪਤ੍ਤਿਯਾ ਵਿਸੁਦ੍ਧਿ ਹੋਤਿ. ਤਸ੍ਮਾ ਇਮੇਹਿ ਚਤੂਹਿ ਮਣ੍ਡਲੇਹਿ ਸਮਣਮਣ੍ਡਲਸ੍ਸ ਅਭਿਨਿਬ੍ਬਤ੍ਤਿ ਹੋਤਿ. ਇਮਾਨਿ ਮਣ੍ਡਲਾਨਿ ਸਮਣਮਣ੍ਡਲਂ ਅਨੁਵਤ੍ਤਨ੍ਤਿ, ਅਨੁਵਤ੍ਤਨ੍ਤਾਨਿ ਚ ਧਮ੍ਮੇਨੇਵ ਅਨੁਵਤ੍ਤਨ੍ਤਿ, ਨੋ ਅਧਮ੍ਮੇਨ. ਸਮਣਮਣ੍ਡਲਞ੍ਹਿ ਆਗਮ੍ਮ ਸਮ੍ਮਾਪਟਿਪਤ੍ਤਿਂ ਪੂਰੇਤ੍ਵਾ ਸੁਦ੍ਧਿਂ ਪਾਪੁਣਨ੍ਤੀ’’ਤਿ.

ਦੁਚ੍ਚਰਿਤਾਦਿਕਥਾਵਣ੍ਣਨਾ

੧੩੬. ਇਦਾਨਿ ਯਥਾਜਾਤਿਯਾ ਨ ਸਕ੍ਕਾ ਸੁਜ੍ਝਿਤੁਂ, ਸਮ੍ਮਾਪਟਿਪਤ੍ਤਿਯਾਵ ਸੁਜ੍ਝਨ੍ਤਿ, ਤਮਤ੍ਥਂ ਪਾਕਟਂ ਕਰੋਨ੍ਤੋ ਖਤ੍ਤਿਯੋਪਿ ਖੋ, ਵਾਸੇਟ੍ਠਾਤਿ ਦੇਸਨਂ ਆਰਭਿ. ਤਤ੍ਥ ਮਿਚ੍ਛਾਦਿਟ੍ਠਿਕਮ੍ਮਸਮਾਦਾਨਹੇਤੂਤਿ ਮਿਚ੍ਛਾਦਿਟ੍ਠਿਵਸੇਨ ਸਮਾਦਿਨ੍ਨਕਮ੍ਮਹੇਤੁ, ਮਿਚ੍ਛਾਦਿਟ੍ਠਿਕਮ੍ਮਸ੍ਸ ਵਾ ਸਮਾਦਾਨਹੇਤੁ.

੧੩੭. ਦ੍ਵਯਕਾਰੀਤਿ ਕਾਲੇਨ ਕੁਸਲਂ ਕਰੋਤਿ, ਕਾਲੇਨ ਅਕੁਸਲਨ੍ਤਿ ਏਵਂ ਉਭਯਕਾਰੀ. ਸੁਖਦੁਕ੍ਖਪ੍ਪਟਿਸਂਵੇਦੀ ਹੋਤੀਤਿ ਏਕਕ੍ਖਣੇ ਉਭਯਵਿਪਾਕਦਾਨਟ੍ਠਾਨਂ ਨਾਮ ਨਤ੍ਥਿ. ਯੇਨ ਪਨ ਅਕੁਸਲਂ ਬਹੁਂ ਕਤਂ ਹੋਤਿ, ਕੁਸਲਂ ਮਨ੍ਦਂ, ਸੋ ਤਂ ਕੁਸਲਂ ਨਿਸ੍ਸਾਯ ਖਤ੍ਤਿਯਕੁਲੇ ਵਾ ਬ੍ਰਾਹ੍ਮਣਕੁਲੇ ਵਾ ਨਿਬ੍ਬਤ੍ਤਤਿ. ਅਥ ਨਂ ਅਕੁਸਲਕਮ੍ਮਂ ਕਾਣਮ੍ਪਿ ਕਰੋਤਿ ਖੁਜ੍ਜਮ੍ਪਿ ਪੀਠਸਪ੍ਪਿਮ੍ਪਿ. ਸੋ ਰਜ੍ਜਸ੍ਸ ਵਾ ਅਨਰਹੋ ਹੋਤਿ, ਅਭਿਸਿਤ੍ਤਕਾਲੇ ਵਾ ਏਵਂਭੂਤੋ ਭੋਗੇ ਪਰਿਭੁਞ੍ਜਿਤੁਂ ਨ ਸਕ੍ਕੋਤਿ. ਅਪਰਸ੍ਸ ਮਰਣਕਾਲੇ ਦ੍ਵੇ ਬਲਵਮਲ੍ਲਾ ਵਿਯ ਤੇ ਦ੍ਵੇਪਿ ਕੁਸਲਾਕੁਸਲਕਮ੍ਮਾਨਿ ਉਪਟ੍ਠਹਨ੍ਤਿ. ਤੇਸੁ ਅਕੁਸਲਂ ਬਲਵਤਰਂ ਹੋਤਿ, ਤਂ ਕੁਸਲਂ ਪਟਿਬਾਹਿਤ੍ਵਾ ਤਿਰਚ੍ਛਾਨਯੋਨਿਯਂ ਨਿਬ੍ਬਤ੍ਤਾਪੇਤਿ. ਕੁਸਲਕਮ੍ਮਮ੍ਪਿ ਪਵਤ੍ਤਿਵੇਦਨੀਯਂ ਹੋਤਿ. ਤਮੇਨਂ ਮਙ੍ਗਲਹਤ੍ਥਿਂ ਵਾ ਕਰੋਨ੍ਤਿ ਮਙ੍ਗਲਅਸ੍ਸਂ ਵਾ ਮਙ੍ਗਲਉਸਭਂ ਵਾ. ਸੋ ਸਮ੍ਪਤ੍ਤਿਂ ਅਨੁਭਵਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਸੁਖਦੁਕ੍ਖਪ੍ਪਟਿਸਂਵੇਦੀ ਹੋਤੀ’’ਤਿ.

ਬੋਧਿਪਕ੍ਖਿਯਭਾਵਨਾਵਣ੍ਣਨਾ

੧੩੮. ਸਤ੍ਤਨ੍ਨਂ ਬੋਧਿਪਕ੍ਖਿਯਾਨਨ੍ਤਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿ ਆਦਿਕੋਟ੍ਠਾਸਵਸੇਨ ਸਤ੍ਤਨ੍ਨਂ, ਪਟਿਪਾਟਿਯਾ ਪਨ ਸਤ੍ਤਤਿਂਸਾਯ ਬੋਧਿਪਕ੍ਖਿਯਾਨਂ ਧਮ੍ਮਾਨਂ. ਭਾਵਨਮਨ੍ਵਾਯਾਤਿ ਭਾਵਨਂ ਅਨੁਗਨ੍ਤ੍ਵਾ, ਪਟਿਪਜ੍ਜਿਤ੍ਵਾਤਿ ਅਤ੍ਥੋ. ਪਰਿਨਿਬ੍ਬਾਯਤੀਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ. ਇਤਿ ਭਗਵਾ ਚਤ੍ਤਾਰੋ ਵਣ੍ਣੇ ਦਸ੍ਸੇਤ੍ਵਾ ਵਿਨਿਵਤ੍ਤੇਤ੍ਵਾ ਪਟਿਵਿਦ੍ਧਚਤੁਸਚ੍ਚਂ ਖੀਣਾਸਵਮੇਵ ਦੇਵਮਨੁਸ੍ਸੇਸੁ ਸੇਟ੍ਠਂ ਕਤ੍ਵਾ ਦਸ੍ਸੇਸਿ.

੧੪੦. ਇਦਾਨਿ ਤਮੇਵਤ੍ਥਂ ਲੋਕਸਮ੍ਮਤਸ੍ਸ ਬ੍ਰਹ੍ਮੁਨੋਪਿ ਵਚਨਦਸ੍ਸਨਾਨੁਸਾਰੇਨ ਦਲ਼੍ਹਂ ਕਤ੍ਵਾ ਦਸ੍ਸੇਨ੍ਤੋ ਇਮੇਸਞ੍ਹਿ ਵਾਸੇਟ੍ਠ ਚਤੁਨ੍ਨਂ ਵਣ੍ਣਾਨਨ੍ਤਿਆਦਿਮਾਹ. ‘‘ਬ੍ਰਹ੍ਮੁਨਾਪੇਸਾ’’ਤਿਆਦਿ ਅਮ੍ਬਟ੍ਠਸੁਤ੍ਤੇ ਵਿਤ੍ਥਾਰਿਤਂ. ਇਤਿ ਭਗਵਾ ਏਤ੍ਤਕੇਨ ਇਮਿਨਾ ਕਥਾਮਗ੍ਗੇਨ ਸੇਟ੍ਠਚ੍ਛੇਦਕਵਾਦਮੇਵ ਦਸ੍ਸੇਤ੍ਵਾ ਸੁਤ੍ਤਨ੍ਤਂ ਵਿਨਿਵਤ੍ਤੇਤ੍ਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਾਪੇਸਿ. ਅਤ੍ਤਮਨਾ ਵਾਸੇਟ੍ਠਭਾਰਦ੍ਵਾਜਾਤਿ ਵਾਸੇਟ੍ਠਭਾਰਦ੍ਵਾਜ ਸਾਮਣੇਰਾਪਿ ਹਿ ਸਕਮਨਾ ਤੁਟ੍ਠਮਨਾ ‘‘ਸਾਧੁ, ਸਾਧੂ’’ਤਿ ਭਗਵਤੋ ਭਾਸਿਤਂ ਅਭਿਨਨ੍ਦਿਂਸੁ. ਇਦਮੇਵ ਸੁਤ੍ਤਨ੍ਤਂ ਆਵਜ੍ਜਨ੍ਤਾ ਅਨੁਮਜ੍ਜਨ੍ਤਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਾਪੁਣਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਅਗ੍ਗਞ੍ਞਸੁਤ੍ਤਵਣ੍ਣਨਾ ਨਿਟ੍ਠਿਤਾ.