੩. ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ

ਅਤ੍ਤਦੀਪਸਰਣਤਾਵਣ੍ਣਨਾ

੮੦. ਏਵਂ ਮੇ ਸੁਤਨ੍ਤਿ ਚਕ੍ਕਵਤ੍ਤਿਸੁਤ੍ਤਂ. ਤਤ੍ਰਾਯਮਨੁਤ੍ਤਾਨਪਦਵਣ੍ਣਨਾ – ਮਾਤੁਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਂ ਨਗਰਂ ਗੋਚਰਗਾਮਂ ਕਤ੍ਵਾ ਅਵਿਦੂਰੇ ਵਨਸਣ੍ਡੇ ਵਿਹਰਤਿ. ‘‘ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀ’’ਤਿ ਏਤ੍ਥ ਅਯਮਨੁਪੁਬ੍ਬਿਕਥਾ –

ਭਗਵਾ ਕਿਰ ਇਮਸ੍ਸ ਸੁਤ੍ਤਸ੍ਸ ਸਮੁਟ੍ਠਾਨਸਮਯੇ ਪਚ੍ਚੂਸਕਾਲੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਇਮਾਯ ਅਨਾਗਤਵਂਸਦੀਪਿਕਾਯ ਸੁਤ੍ਤਨ੍ਤਕਥਾਯ ਮਾਤੁਲਨਗਰਵਾਸੀਨਂ ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯਂ ਦਿਸ੍ਵਾ ਪਾਤੋਵ ਵੀਸਤਿਭਿਕ੍ਖੁਸਹਸ੍ਸਪਰਿਵਾਰੋ ਮਾਤੁਲਨਗਰਂ ਸਮ੍ਪਤ੍ਤੋ. ਮਾਤੁਲਨਗਰਵਾਸਿਨੋ ਖਤ੍ਤਿਯਾ ‘‘ਭਗਵਾ ਆਗਤੋ’’ਤਿ ਸੁਤ੍ਵਾ ਪਚ੍ਚੁਗ੍ਗਮ੍ਮ ਦਸਬਲਂ ਨਿਮਨ੍ਤੇਤ੍ਵਾ ਮਹਾਸਕ੍ਕਾਰੇਨ ਨਗਰਂ ਪਵੇਸੇਤ੍ਵਾ ਨਿਸਜ੍ਜਟ੍ਠਾਨਂ ਸਂਵਿਧਾਯ ਭਗਵਨ੍ਤਂ ਮਹਾਰਹੇ ਪਲ੍ਲਙ੍ਕੇ ਨਿਸੀਦਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਅਦਂਸੁ. ਭਗਵਾ ਭਤ੍ਤਕਿਚ੍ਚਂ ਨਿਟ੍ਠਾਪੇਤ੍ਵਾ ਚਿਨ੍ਤੇਸਿ – ‘‘ਸਚਾਹਂ ਇਮਸ੍ਮਿਂ ਠਾਨੇ ਇਮੇਸਂ ਮਨੁਸ੍ਸਾਨਂ ਧਮ੍ਮਂ ਦੇਸੇਸ੍ਸਾਮਿ, ਅਯਂ ਪਦੇਸੋ ਸਮ੍ਬਾਧੋ, ਮਨੁਸ੍ਸਾਨਂ ਠਾਤੁਂ ਵਾ ਨਿਸੀਦਿਤੁਂ ਵਾ ਓਕਾਸੋ ਨ ਭਵਿਸ੍ਸਤਿ, ਮਹਤਾ ਖੋ ਪਨ ਸਮਾਗਮੇਨ ਭਵਿਤਬ੍ਬ’’ਨ੍ਤਿ.

ਅਥ ਰਾਜਕੁਲਾਨਂ ਭਤ੍ਤਾਨੁਮੋਦਨਂ ਅਕਤ੍ਵਾਵ ਪਤ੍ਤਂ ਗਹੇਤ੍ਵਾ ਨਗਰਤੋ ਨਿਕ੍ਖਮਿ. ਮਨੁਸ੍ਸਾ ਚਿਨ੍ਤਯਿਂਸੁ – ‘‘ਸਤ੍ਥਾ ਅਮ੍ਹਾਕਂ ਅਨੁਮੋਦਨਮ੍ਪਿ ਅਕਤ੍ਵਾ ਗਚ੍ਛਤਿ, ਅਦ੍ਧਾ ਭਤ੍ਤਗ੍ਗਂ ਅਮਨਾਪਂ ਅਹੋਸਿ, ਬੁਦ੍ਧਾਨਂ ਨਾਮ ਨ ਸਕ੍ਕਾ ਚਿਤ੍ਤਂ ਗਹੇਤੁਂ, ਬੁਦ੍ਧੇਹਿ ਸਦ੍ਧਿਂ ਵਿਸ੍ਸਾਸਕਰਣਂ ਨਾਮ ਸਮੁਸ੍ਸਿਤਫਣਂ ਆਸੀਵਿਸਂ ਗੀਵਾਯ ਗਹਣਸਦਿਸਂ ਹੋਤਿ; ਏਥ ਭੋ, ਤਥਾਗਤਂ ਖਮਾਪੇਸ੍ਸਾਮਾ’’ਤਿ. ਸਕਲਨਗਰਵਾਸਿਨੋ ਭਗਵਤਾ ਸਹੇਵ ਨਿਕ੍ਖਨ੍ਤਾ. ਭਗਵਾ ਗਚ੍ਛਨ੍ਤੋਵ ਮਗਧਕ੍ਖੇਤ੍ਤੇ ਠਿਤਂ ਸਾਖਾਵਿਟਪਸਮ੍ਪਨ੍ਨਂ ਸਨ੍ਦਚ੍ਛਾਯਂ ਕਰੀਸਮਤ੍ਤਭੂਮਿਪਤ੍ਥਟਂ ਏਕਂ ਮਾਤੁਲਰੁਕ੍ਖਂ ਦਿਸ੍ਵਾ ਇਮਸ੍ਮਿਂ ਰੁਕ੍ਖਮੂਲੇ ਨਿਸੀਦਿਤ੍ਵਾ ਧਮ੍ਮੇ ਦੇਸਿਯਮਾਨੇ ‘‘ਮਹਾਜਨਸ੍ਸ ਠਾਨਨਿਸਜ੍ਜਨੋਕਾਸੋ ਭਵਿਸ੍ਸਤੀ’’ਤਿ. ਨਿਵਤ੍ਤਿਤ੍ਵਾ ਮਗ੍ਗਾ ਓਕ੍ਕਮ੍ਮ ਰੁਕ੍ਖਮੂਲਂ ਉਪਸਙ੍ਕਮਿਤ੍ਵਾ ਧਮ੍ਮਭਣ੍ਡਾਗਾਰਿਕਂ ਆਨਨ੍ਦਤ੍ਥੇਰਂ ਓਲੋਕੇਸਿ. ਥੇਰੋ ਓਲੋਕਿਤਸਞ੍ਞਾਯ ਏਵ ‘‘ਸਤ੍ਥਾ ਨਿਸੀਦਿਤੁਕਾਮੋ’’ਤਿ ਞਤ੍ਵਾ ਸੁਗਤਮਹਾਚੀਵਰਂ ਪਞ੍ਞਪੇਤ੍ਵਾ ਅਦਾਸਿ. ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਅਥਸ੍ਸ ਪੁਰਤੋ ਮਨੁਸ੍ਸਾ ਨਿਸੀਦਿਂਸੁ. ਉਭੋਸੁ ਪਸ੍ਸੇਸੁ ਪਚ੍ਛਤੋ ਚ ਭਿਕ੍ਖੁਸਙ੍ਘੋ, ਆਕਾਸੇ ਦੇਵਤਾ ਅਟ੍ਠਂਸੁ, ਏਵਂ ਮਹਾਪਰਿਸਮਜ੍ਝਗਤੋ ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸਿ.

ਤੇ ਭਿਕ੍ਖੂਤਿ ਤਤ੍ਰ ਉਪਵਿਟ੍ਠਾ ਧਮ੍ਮਪ੍ਪਟਿਗ੍ਗਾਹਕਾ ਭਿਕ੍ਖੂ. ਅਤ੍ਤਦੀਪਾਤਿ ਅਤ੍ਤਾਨਂ ਦੀਪਂ ਤਾਣਂ ਲੇਣਂ ਗਤਿਂ ਪਰਾਯਣਂ ਪਤਿਟ੍ਠਂ ਕਤ੍ਵਾ ਵਿਹਰਥਾਤਿ ਅਤ੍ਥੋ. ਅਤ੍ਤਸਰਣਾਤਿ ਇਦਂ ਤਸ੍ਸੇਵ ਵੇਵਚਨਂ. ਅਨਞ੍ਞਸਰਣਾਤਿ ਇਦਂ ਅਞ੍ਞਸਰਣਪਟਿਕ੍ਖੇਪਵਚਨਂ. ਨ ਹਿ ਅਞ੍ਞੋ ਅਞ੍ਞਸ੍ਸ ਸਰਣਂ ਹੋਤਿ, ਅਞ੍ਞਸ੍ਸ ਵਾਯਾਮੇਨ ਅਞ੍ਞਸ੍ਸ ਅਸੁਜ੍ਝਨਤੋ. ਵੁਤ੍ਤਮ੍ਪਿ ਚੇਤਂ ‘‘ਅਤ੍ਤਾ ਹਿ ਅਤ੍ਤਨੋ ਨਾਥੋ, ਕੋ ਹਿ ਨਾਥੋ ਪਰੋ ਸਿਯਾ’’ਤਿ (ਧ. ਪ. ੧੬੦). ਤੇਨਾਹ ‘‘ਅਨਞ੍ਞਸਰਣਾ’’ਤਿ. ਕੋ ਪਨੇਤ੍ਥ ਅਤ੍ਤਾ ਨਾਮ, ਲੋਕਿਯਲੋਕੁਤ੍ਤਰੋ ਧਮ੍ਮੋ. ਤੇਨਾਹ – ‘‘ਧਮ੍ਮਦੀਪਾ ਧਮ੍ਮਸਰਣਾ ਅਨਞ੍ਞਸਰਣਾ’’ਤਿ. ‘‘ਕਾਯੇ ਕਾਯਾਨੁਪਸ੍ਸੀ’’ਤਿਆਦੀਨਿ ਮਹਾਸਤਿਪਟ੍ਠਾਨੇ ਵਿਤ੍ਥਾਰਿਤਾਨਿ.

ਗੋਚਰੇਤਿ ਚਰਿਤੁਂ ਯੁਤ੍ਤਟ੍ਠਾਨੇ. ਸਕੇਤਿ ਅਤ੍ਤਨੋ ਸਨ੍ਤਕੇ. ਪੇਤ੍ਤਿਕੇ ਵਿਸਯੇਤਿ ਪਿਤਿਤੋ ਆਗਤਵਿਸਯੇ. ਚਰਤਨ੍ਤਿ ਚਰਨ੍ਤਾਨਂ. ‘‘ਚਰਨ੍ਤ’’ਨ੍ਤਿਪਿ ਪਾਠੋ, ਅਯਮੇਵਤ੍ਥੋ. ਨ ਲਚ੍ਛਤੀਤਿ ਨ ਲਭਿਸ੍ਸਤਿ ਨ ਪਸ੍ਸਿਸ੍ਸਤਿ. ਮਾਰੋਤਿ ਦੇਵਪੁਤ੍ਤਮਾਰੋਪਿ, ਮਚ੍ਚੁਮਾਰੋਪਿ, ਕਿਲੇਸਮਾਰੋਪਿ. ਓਤਾਰਨ੍ਤਿ ਰਨ੍ਧਂ ਛਿਦ੍ਦਂ ਵਿਵਰਂ. ਅਯਂ ਪਨਤ੍ਥੋ ਲੇਡ੍ਡੁਟ੍ਠਾਨਤੋ ਨਿਕ੍ਖਮ੍ਮ ਤੋਰਣੇ ਨਿਸੀਦਿਤ੍ਵਾ ਬਾਲਾਤਪਂ ਤਪਨ੍ਤਂ ਲਾਪਂ ਸਕੁਣਂ ਗਹੇਤ੍ਵਾ. ਪਕ੍ਖਨ੍ਦਸੇਨਸਕੁਣਵਤ੍ਥੁਨਾ ਦੀਪੇਤਬ੍ਬੋ. ਵੁਤ੍ਤਞ੍ਹੇਤਂ –

‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਕੁਣਗ੍ਘਿ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ ਅਗ੍ਗਹੇਸਿ. ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਸਕੁਣਗ੍ਘਿਯਾ ਹਰਿਯਮਾਨੋ ਏਵਂ ਪਰਿਦੇਵਸਿ ‘ਮਯਮੇਵਮ੍ਹ ਅਲਕ੍ਖਿਕਾ, ਮਯਂ ਅਪ੍ਪਪੁਞ੍ਞਾ, ਯੇ ਮਯਂ ਅਗੋਚਰੇ ਚਰਿਮ੍ਹ ਪਰਵਿਸਯੇ, ਸਚੇਜ੍ਜ ਮਯਂ ਗੋਚਰੇ ਚਰੇਯ੍ਯਾਮ ਸਕੇ ਪੇਤ੍ਤਿਕੇ ਵਿਸਯੇ, ਨ ਮ੍ਯਾਯਂ ਸਕੁਣਗ੍ਘਿ ਅਲਂ ਅਭਵਿਸ੍ਸ ਯਦਿਦਂ ਯੁਦ੍ਧਾਯਾ’ਤਿ. ਕੋ ਪਨ ਤੇ ਲਾਪ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ? ਯਦਿਦਂ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਨ੍ਤਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਲਾਪਂ ਸਕੁਣਂ ਪਮੁਞ੍ਚਿ ਗਚ੍ਛ ਖੋ ਤ੍ਵਂ ਲਾਪ, ਤਤ੍ਰਪਿ ਗਨ੍ਤ੍ਵਾ ਨ ਮੋਕ੍ਖਸੀਤਿ.

ਅਥ ਖੋ, ਭਿਕ੍ਖਵੇ, ਲਾਪੋ ਸਕੁਣੋ ਨਙ੍ਗਲਕਟ੍ਠਕਰਣਂ ਲੇਡ੍ਡੁਟ੍ਠਾਨਂ ਗਨ੍ਤ੍ਵਾ ਮਹਨ੍ਤਂ ਲੇਡ੍ਡੁਂ ਅਭਿਰੁਹਿਤ੍ਵਾ ਸਕੁਣਗ੍ਘਿਂ ਵਦਮਾਨੋ ਅਟ੍ਠਾਸਿ ‘‘ਏਹਿ ਖੋ ਦਾਨਿ ਮੇ ਸਕੁਣਗ੍ਘਿ, ਏਹਿ ਖੋ ਦਾਨਿ ਮੇ ਸਕੁਣਗ੍ਘੀ’’ਤਿ. ਅਥ ਖੋ ਸਾ, ਭਿਕ੍ਖਵੇ, ਸਕੁਣਗ੍ਘਿ ਸਕੇ ਬਲੇ ਅਪਤ੍ਥਦ੍ਧਾ ਸਕੇ ਬਲੇ ਅਸਂਵਦਮਾਨਾ ਉਭੋ ਪਕ੍ਖੇ ਸਨ੍ਨਯ੍ਹ ਲਾਪਂ ਸਕੁਣਂ ਸਹਸਾ ਅਜ੍ਝਪ੍ਪਤ੍ਤਾ. ਯਦਾ ਖੋ, ਭਿਕ੍ਖਵੇ, ਅਞ੍ਞਾਸਿ ਲਾਪੋ ਸਕੁਣੋ ਬਹੁਆਗਤਾ ਖੋ ਮ੍ਯਾਯਂ ਸਕੁਣਗ੍ਘੀਤਿ, ਅਥ ਖੋ ਤਸ੍ਸੇਵ ਲੇਡ੍ਡੁਸ੍ਸ ਅਨ੍ਤਰਂ ਪਚ੍ਚੁਪਾਦਿ. ਅਥ ਖੋ, ਭਿਕ੍ਖਵੇ, ਸਕੁਣਗ੍ਘਿ ਤਤ੍ਥੇਵ ਉਰਂ ਪਚ੍ਚਤਾਲ਼ੇਸਿ. ਏਵਞ੍ਹਿ ਤਂ, ਭਿਕ੍ਖਵੇ, ਹੋਤਿ ਯੋ ਅਗੋਚਰੇ ਚਰਤਿ ਪਰਵਿਸਯੇ.

ਤਸ੍ਮਾਤਿਹ, ਭਿਕ੍ਖਵੇ, ਮਾ ਅਗੋਚਰੇ ਚਰਿਤ੍ਥ ਪਰਵਿਸਯੇ, ਅਗੋਚਰੇ, ਭਿਕ੍ਖਵੇ, ਚਰਤਂ ਪਰਵਿਸਯੇ ਲਚ੍ਛਤਿ ਮਾਰੋ ਓਤਾਰਂ, ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ, ਯਦਿਦਂ ਪਞ੍ਚ ਕਾਮਗੁਣਾ. ਕਤਮੇ ਪਞ੍ਚ? ਚਕ੍ਖੁਵਿਞ੍ਞੇਯ੍ਯਾ ਰੂਪਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਸੋਤਵਿਞ੍ਞੇਯ੍ਯਾ ਸਦ੍ਦਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਘਾਨਵਿਞ੍ਞੇਯ੍ਯਾ ਗਨ੍ਧਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਜਿਵ੍ਹਾਵਿਞ੍ਞੇਯ੍ਯਾ ਰਸਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ, ਕਾਯਵਿਞ੍ਞੇਯ੍ਯਾ ਫੋਟ੍ਠਬ੍ਬਾ ਇਟ੍ਠਾ ਕਨ੍ਤਾ ਮਨਾਪਾ ਪਿਯਰੂਪਾ ਕਾਮੂਪਸਂਹਿਤਾ ਰਜਨੀਯਾ. ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਅਗੋਚਰੋ ਪਰਵਿਸਯੋ.

ਗੋਚਰੇ, ਭਿਕ੍ਖਵੇ, ਚਰਥ…ਪੇ… ਨ ਲਚ੍ਛਤਿ ਮਾਰੋ ਆਰਮ੍ਮਣਂ. ਕੋ ਚ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋ, ਯਦਿਦਂ ਚਤ੍ਤਾਰੋ ਸਤਿਪਟ੍ਠਾਨਾ. ਕਤਮੇ ਚਤ੍ਤਾਰੋ? ਇਧ ਭਿਕ੍ਖਵੇ, ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਵੇਦਨਾਸੁ ਵੇਦਨਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਚਿਤ੍ਤੇ ਚਿਤ੍ਤਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ; ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ, ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸਂ – ਅਯਂ, ਭਿਕ੍ਖਵੇ, ਭਿਕ੍ਖੁਨੋ ਗੋਚਰੋ ਸਕੋ ਪੇਤ੍ਤਿਕੋ ਵਿਸਯੋਤਿ (ਸਂ. ਨਿ. ੫.੩੭੧).

ਕੁਸਲਾਨਨ੍ਤਿ ਅਨਵਜ੍ਜਲਕ੍ਖਣਾਨਂ. ਸਮਾਦਾਨਹੇਤੂਤਿ ਸਮਾਦਾਯ ਵਤ੍ਤਨਹੇਤੁ. ਏਵਮਿਦਂ ਪੁਞ੍ਞਂ ਪਵਡ੍ਢਤੀਤਿ ਏਵਂ ਇਦਂ ਲੋਕਿਯਲੋਕੁਤ੍ਤਰਂ ਪੁਞ੍ਞਫਲਂ ਵਡ੍ਢਤਿ, ਪੁਞ੍ਞਫਲਨ੍ਤਿ ਚ ਉਪਰੂਪਰਿ ਪੁਞ੍ਞਮ੍ਪਿ ਪੁਞ੍ਞਵਿਪਾਕੋਪਿ ਵੇਦਿਤਬ੍ਬੋ.

ਦਲ਼੍ਹਨੇਮਿਚਕ੍ਕਵਤ੍ਤਿਰਾਜਕਥਾਵਣ੍ਣਨਾ

੮੧. ਤਤ੍ਥ ਦੁਵਿਧਂ ਕੁਸਲਂ ਵਟ੍ਟਗਾਮੀ ਚ ਵਿਵਟ੍ਟਗਾਮੀ ਚ. ਤਤ੍ਥ ਵਟ੍ਟਗਾਮਿਕੁਸਲਂ ਨਾਮ ਮਾਤਾਪਿਤੂਨਂ ਪੁਤ੍ਤਧੀਤਾਸੁ ਪੁਤ੍ਤਧੀਤਾਨਞ੍ਚ ਮਾਤਾਪਿਤੂਸੁ ਸਿਨੇਹਵਸੇਨ ਮੁਦੁਮਦ੍ਦਵਚਿਤ੍ਤਂ. ਵਿਵਟ੍ਟਗਾਮਿਕੁਸਲਂ ਨਾਮ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਭੇਦਾ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ. ਤੇਸੁ ਵਟ੍ਟਗਾਮਿਪੁਞ੍ਞਸ੍ਸ ਪਰਿਯੋਸਾਨਂ ਮਨੁਸ੍ਸਲੋਕੇ ਚਕ੍ਕਵਤ੍ਤਿਸਿਰੀਵਿਭਵੋ. ਵਿਵਟ੍ਟਗਾਮਿਕੁਸਲਸ੍ਸ ਮਗ੍ਗਫਲਨਿਬ੍ਬਾਨਸਮ੍ਪਤ੍ਤਿ. ਤਤ੍ਥ ਵਿਵਟ੍ਟਗਾਮਿਕੁਸਲਸ੍ਸ ਵਿਪਾਕਂ ਸੁਤ੍ਤਪਰਿਯੋਸਾਨੇ ਦਸ੍ਸੇਸ੍ਸਤਿ.

ਇਧ ਪਨ ਵਟ੍ਟਗਾਮਿਕੁਸਲਸ੍ਸ ਵਿਪਾਕਦਸ੍ਸਨਤ੍ਥਂ, ਭਿਕ੍ਖਵੇ, ਯਦਾ ਪੁਤ੍ਤਧੀਤਰੋ ਮਾਤਾਪਿਤੂਨਂ ਓਵਾਦੇ ਨ ਅਟ੍ਠਂਸੁ, ਤਦਾ ਆਯੁਨਾਪਿ ਵਣ੍ਣੇਨਾਪਿ ਇਸ੍ਸਰਿਯੇਨਾਪਿ ਪਰਿਹਾਯਿਂਸੁ. ਯਦਾ ਪਨ ਅਟ੍ਠਂਸੁ, ਤਦਾ ਵਡ੍ਢਿਂਸੂਤਿ ਵਤ੍ਵਾ ਵਟ੍ਟਗਾਮਿਕੁਸਲਾਨੁਸਨ੍ਧਿਵਸੇਨ ‘‘ਭੂਤਪੁਬ੍ਬਂ, ਭਿਕ੍ਖਵੇ’’ਤਿ ਦੇਸਨਂ ਆਰਭਿ. ਤਤ੍ਥ ਚਕ੍ਕਵਤ੍ਤੀਤਿਆਦੀਨਿ ਮਹਾਪਦਾਨੇ (ਦੀ. ਨਿ. ਅਟ੍ਠ. ੨.੩੩) ਵਿਤ੍ਥਾਰਿਤਾਨੇਵ.

੮੨. ਓਸਕ੍ਕਿਤਨ੍ਤਿ ਈਸਕਮ੍ਪਿ ਅਵਸਕ੍ਕਿਤਂ. ਠਾਨਾ ਚੁਤਨ੍ਤਿ ਸਬ੍ਬਸੋ ਠਾਨਾ ਅਪਗਤਂ. ਤਂ ਕਿਰ ਚਕ੍ਕਰਤਨਂ ਅਨ੍ਤੇਪੁਰਦ੍ਵਾਰੇ ਅਕ੍ਖਾਹਤਂ ਵਿਯ ਵੇਹਾਸਂ ਅਟ੍ਠਾਸਿ. ਅਥਸ੍ਸ ਉਭੋਸੁ ਪਸ੍ਸੇਸੁ ਦ੍ਵੇ ਖਦਿਰਤ੍ਥਮ੍ਭੇ ਨਿਖਣਿਤ੍ਵਾ ਚਕ੍ਕਰਤਨਮਤ੍ਥਕੇ ਨੇਮਿਅਭਿਮੁਖਂ ਏਕਂ ਸੁਤ੍ਤਕਂ ਬਨ੍ਧਿਂਸੁ. ਅਧੋਭਾਗੇਪਿ ਨੇਮਿਅਭਿਮੁਖਂ ਏਕਂ ਬਨ੍ਧਿਂਸੁ. ਤੇਸੁ ਉਪਰਿਮਸੁਤ੍ਤਤੋ ਅਪ੍ਪਮਤ੍ਤਕਮ੍ਪਿ ਓਗਤਂ ਚਕ੍ਕਰਤਨਂ ਓਸਕ੍ਕਿਤਂ ਨਾਮ ਹੋਤਿ, ਹੇਟ੍ਠਾ ਸੁਤ੍ਤਸ੍ਸ ਠਾਨਂ ਉਪਰਿਮਕੋਟਿਯਾ ਅਤਿਕ੍ਕਨ੍ਤਗਤਂ ਠਾਨਾ ਚੁਤਂ ਨਾਮ ਹੋਤਿ, ਤਦੇਤਂ ਅਤਿਬਲਵਦੋਸੇ ਸਤਿ ਏਵਂ ਹੋਤਿ. ਸੁਤ੍ਤਮਤ੍ਤਮ੍ਪਿ ਏਕਙ੍ਗੁਲਦ੍ਵਙ੍ਗੁਲਮਤ੍ਤਂ ਵਾ ਭਟ੍ਠਂ ਠਾਨਾ ਚੁਤਮੇਵ ਹੋਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ ‘‘ਓਸਕ੍ਕਿਤਂ ਠਾਨਾ ਚੁਤ’’ਨ੍ਤਿ.

ਅਥ ਮੇ ਆਰੋਚੇਯ੍ਯਾਸੀਤਿ ਤਾਤ, ਤ੍ਵਂ ਅਜ੍ਜ ਆਦਿਂ ਕਤ੍ਵਾ ਦਿਵਸਸ੍ਸ ਤਿਕ੍ਖਤ੍ਤੁਂ ਚਕ੍ਕਰਤਨਸ੍ਸ ਉਪਟ੍ਠਾਨਂ ਗਚ੍ਛ, ਏਵਂ ਗਚ੍ਛਨ੍ਤੋ ਯਦਾ ਚਕ੍ਕਰਤਨਂ ਈਸਕਮ੍ਪਿ ਓਸਕ੍ਕਿਤਂ ਠਾਨਾ ਚੁਤਂ ਪਸ੍ਸਸਿ, ਅਥ ਮਯ੍ਹਂ ਆਚਿਕ੍ਖੇਯ੍ਯਾਸਿ. ਜੀਵਿਤਞ੍ਹਿ ਮੇ ਤਵ ਹਤ੍ਥੇ ਨਿਕ੍ਖਿਤ੍ਤਨ੍ਤਿ. ਅਦ੍ਦਸਾਤਿ ਅਪ੍ਪਮਤ੍ਤੋ ਦਿਵਸਸ੍ਸ ਤਿਕ੍ਖਤ੍ਤੁਂ ਗਨ੍ਤ੍ਵਾ ਓਲੋਕੇਨ੍ਤੋ ਏਕਦਿਵਸਂ ਅਦ੍ਦਸ.

੮੩. ਅਥ ਖੋ, ਭਿਕ੍ਖਵੇਤਿ ਭਿਕ੍ਖਵੇ, ਅਥ ਰਾਜਾ ਦਲ਼੍ਹਨੇਮਿ ‘‘ਚਕ੍ਕਰਤਨਂ ਓਸਕ੍ਕਿਤ’’ਨ੍ਤਿ ਸੁਤ੍ਵਾ ਉਪ੍ਪਨ੍ਨਬਲਵਦੋਮਨਸ੍ਸੋ ‘‘ਨ ਦਾਨਿ ਮਯਾ ਚਿਰਂ ਜੀਵਿਤਬ੍ਬਂ ਭਵਿਸ੍ਸਤਿ, ਅਪ੍ਪਾਵਸੇਸਂ ਮੇ ਆਯੁ, ਨ ਮੇ ਦਾਨਿ ਕਾਮੇ ਪਰਿਭੁਞ੍ਜਨਕਾਲੋ, ਪਬ੍ਬਜ੍ਜਾਕਾਲੋ ਮੇ ਇਦਾਨੀ’’ਤਿ ਰੋਦਿਤ੍ਵਾ ਪਰਿਦੇਵਿਤ੍ਵਾ ਜੇਟ੍ਠਪੁਤ੍ਤਂ ਕੁਮਾਰਂ ਆਮਨ੍ਤਾਪੇਤ੍ਵਾ ਏਤਦਵੋਚ. ਸਮੁਦ੍ਦਪਰਿਯਨ੍ਤਨ੍ਤਿ ਪਰਿਕ੍ਖਿਤ੍ਤਏਕਸਮੁਦ੍ਦਪਰਿਯਨ੍ਤਮੇਵ. ਇਦਂ ਹਿਸ੍ਸ ਕੁਲਸਨ੍ਤਕਂ. ਚਕ੍ਕਵਾਲ਼ਪਰਿਯਨ੍ਤਂ ਪਨ ਪੁਞ੍ਞਿਦ੍ਧਿਵਸੇਨ ਨਿਬ੍ਬਤ੍ਤਂ, ਨ ਤਂ ਸਕ੍ਕਾ ਦਾਤੁਂ. ਕੁਲਸਨ੍ਤਕਂ ਪਨ ਨਿਯ੍ਯਾਤੇਨ੍ਤੋ ‘‘ਸਮੁਦ੍ਦਪਰਿਯਨ੍ਤ’’ਨ੍ਤਿ ਆਹ. ਕੇਸਮਸ੍ਸੁਨ੍ਤਿ ਤਾਪਸਪਬ੍ਬਜ੍ਜਂ ਪਬ੍ਬਜਨ੍ਤਾਪਿ ਹਿ ਪਠਮਂ ਕੇਸਮਸ੍ਸੁਂ ਓਹਾਰੇਨ੍ਤਿ. ਤਤੋ ਪਟ੍ਠਾਯ ਪਰੂਲ਼੍ਹਕੇਸੇ ਬਨ੍ਧਿਤ੍ਵਾ ਵਿਚਰਨ੍ਤਿ. ਤੇਨ ਵੁਤ੍ਤਂ – ‘‘ਕੇਸਮਸ੍ਸੁਂ ਓਹਾਰੇਤ੍ਵਾ’’ਤਿ.

ਕਾਸਾਯਾਨੀਤਿ ਕਸਾਯਰਸਪੀਤਾਨਿ. ਆਦਿਤੋ ਏਵਂ ਕਤ੍ਵਾ ਪਚ੍ਛਾ ਵਕ੍ਕਲਾਨਿਪਿ ਧਾਰੇਨ੍ਤਿ. ਪਬ੍ਬਜੀਤਿ ਪਬ੍ਬਜਿਤੋ. ਪਬ੍ਬਜਿਤ੍ਵਾ ਚ ਅਤ੍ਤਨੋ ਮਙ੍ਗਲਵਨੁਯ੍ਯਾਨੇਯੇਵ ਵਸਿ. ਰਾਜਿਸਿਮ੍ਹੀਤਿ ਰਾਜਈਸਿਮ੍ਹਿ. ਬ੍ਰਾਹ੍ਮਣਪਬ੍ਬਜਿਤਾ ਹਿ ‘‘ਬ੍ਰਾਹ੍ਮਣਿਸਯੋ’’ਤਿ ਵੁਚ੍ਚਨ੍ਤਿ. ਸੇਤਚ੍ਛਤ੍ਤਂ ਪਨ ਪਹਾਯ ਰਾਜਪਬ੍ਬਜਿਤਾ ਰਾਜਿਸਯੋਤਿ. ਅਨ੍ਤਰਧਾਯੀਤਿ ਅਨ੍ਤਰਹਿਤਂ ਨਿਬ੍ਬੁਤਦੀਪਸਿਖਾ ਵਿਯ ਅਭਾਵਂ ਉਪਗਤਂ. ਪਟਿਸਂਵੇਦੇਸੀਤਿ ਕਨ੍ਦਨ੍ਤੋ ਪਰਿਦੇਵਨ੍ਤੋ ਜਾਨਾਪੇਸਿ. ਪੇਤ੍ਤਿਕਨ੍ਤਿ ਪਿਤਿਤੋ ਆਗਤਂ ਦਾਯਜ੍ਜਂ ਨ ਹੋਤਿ, ਨ ਸਕ੍ਕਾ ਕੁਸੀਤੇਨ ਹੀਨਵੀਰਿਯੇਨ ਦਸ ਅਕੁਸਲਕਮ੍ਮਪਥੇ ਸਮਾਦਾਯ ਵਤ੍ਤਨ੍ਤੇਨ ਪਾਪੁਣਿਤੁਂ. ਅਤ੍ਤਨੋ ਪਨ ਸੁਕਤਂ ਕਮ੍ਮਂ ਨਿਸ੍ਸਾਯ ਦਸਵਿਧਂ ਦ੍ਵਾਦਸਵਿਧਂ ਵਾ ਚਕ੍ਕਵਤ੍ਤਿਵਤ੍ਤਂ ਪੂਰੇਨ੍ਤੇਨੇਵੇਤਂ ਪਤ੍ਤਬ੍ਬਨ੍ਤਿ ਦੀਪੇਤਿ. ਅਥ ਨਂ ਵਤ੍ਤਪਟਿਪਤ੍ਤਿਯਂ ਚੋਦੇਨ੍ਤੋ ‘‘ਇਙ੍ਘ ਤ੍ਵ’’ਨ੍ਤਿਆਦਿਮਾਹ. ਤਤ੍ਥ ਅਰਿਯੇਤਿ ਨਿਦ੍ਦੋਸੇ. ਚਕ੍ਕਵਤ੍ਤਿਵਤ੍ਤੇਤਿ ਚਕ੍ਕਵਤ੍ਤੀਨਂ ਵਤ੍ਤੇ.

ਚਕ੍ਕਵਤ੍ਤਿਅਰਿਯਵਤ੍ਤਵਣ੍ਣਨਾ

੮੪. ਧਮ੍ਮਨ੍ਤਿ ਦਸਕੁਸਲਕਮ੍ਮਪਥਧਮ੍ਮਂ. ਨਿਸ੍ਸਾਯਾਤਿ ਤਦਧਿਟ੍ਠਾਨੇਨ ਚੇਤਸਾ ਤਮੇਵ ਨਿਸ੍ਸਯਂ ਕਤ੍ਵਾ. ਧਮ੍ਮਂ ਸਕ੍ਕਰੋਨ੍ਤੋਤਿ ਯਥਾ ਕਤੋ ਸੋ ਧਮ੍ਮੋ ਸੁਟ੍ਠੁ ਕਤੋ ਹੋਤਿ, ਏਵਮੇਤਂ ਕਰੋਨ੍ਤੋ. ਧਮ੍ਮਂ ਗਰੁਂ ਕਰੋਨ੍ਤੋਤਿ ਤਸ੍ਮਿਂ ਗਾਰਵੁਪ੍ਪਤ੍ਤਿਯਾ ਤਂ ਗਰੁਂ ਕਰੋਨ੍ਤੋ. ਧਮ੍ਮਂ ਮਾਨੇਨ੍ਤੋਤਿ ਤਮੇਵ ਧਮ੍ਮਂ ਪਿਯਞ੍ਚ ਭਾਵਨੀਯਞ੍ਚ ਕਤ੍ਵਾ ਵਿਹਰਨ੍ਤੋ. ਧਮ੍ਮਂ ਪੂਜੇਨ੍ਤੋਤਿ ਤਂ ਅਪਦਿਸਿਤ੍ਵਾ ਗਨ੍ਧਮਾਲਾਦਿਪੂਜਨੇਨਸ੍ਸ ਪੂਜਂ ਕਰੋਨ੍ਤੋ. ਧਮ੍ਮਂ ਅਪਚਯਮਾਨੋਤਿ ਤਸ੍ਸੇਵ ਧਮ੍ਮਸ੍ਸ ਅਞ੍ਜਲਿਕਰਣਾਦੀਹਿ ਨੀਚਵੁਤ੍ਤਿਤਂ ਕਰੋਨ੍ਤੋ. ਧਮ੍ਮਦ੍ਧਜੋ ਧਮ੍ਮਕੇਤੂਤਿ ਤਂ ਧਮ੍ਮਂ ਧਜਮਿਵ ਪੁਰਕ੍ਖਤ੍ਵਾ ਕੇਤੁਮਿਵ ਚ ਉਕ੍ਖਿਪਿਤ੍ਵਾ ਪਵਤ੍ਤਿਯਾ ਧਮ੍ਮਦ੍ਧਜੋ ਧਮ੍ਮਕੇਤੁ ਚ ਹੁਤ੍ਵਾਤਿ ਅਤ੍ਥੋ. ਧਮ੍ਮਾਧਿਪਤੇਯ੍ਯੋਤਿ ਧਮ੍ਮਾਧਿਪਤਿਭੂਤੋ ਆਗਤਭਾਵੇਨ ਧਮ੍ਮਵਸੇਨੇਵ ਸਬ੍ਬਕਿਰਿਯਾਨਂ ਕਰਣੇਨ ਧਮ੍ਮਾਧਿਪਤੇਯ੍ਯੋ ਹੁਤ੍ਵਾ. ਧਮ੍ਮਿਕਂ ਰਕ੍ਖਾਵਰਣਗੁਤ੍ਤਿਂ ਸਂਵਿਦਹਸ੍ਸੂਤਿ ਧਮ੍ਮੋ ਅਸ੍ਸਾ ਅਤ੍ਥੀਤਿ ਧਮ੍ਮਿਕਾ, ਰਕ੍ਖਾ ਚ ਆਵਰਣਞ੍ਚ ਗੁਤ੍ਤਿ ਚ ਰਕ੍ਖਾਵਰਣਗੁਤ੍ਤਿ. ਤਤ੍ਥ ‘‘ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤੀ’’ਤਿ (ਸਂ. ਨਿ. ੫.੩੮੫) ਵਚਨਤੋ ਖਨ੍ਤਿਆਦਯੋ ਰਕ੍ਖਾ. ਵੁਤ੍ਤਞ੍ਹੇਤਂ ‘‘ਕਥਞ੍ਚ, ਭਿਕ੍ਖਵੇ, ਪਰਂ ਰਕ੍ਖਨ੍ਤੋ ਅਤ੍ਤਾਨਂ ਰਕ੍ਖਤਿ. ਖਨ੍ਤਿਯਾ ਅਵਿਹਿਂਸਾਯ ਮੇਤ੍ਤਚਿਤ੍ਤਤਾ ਅਨੁਦ੍ਦਯਤਾ’’ਤਿ (ਸਂ. ਨਿ. ੫.੩੮੫). ਨਿਵਾਸਨਪਾਰੁਪਨਗੇਹਾਦੀਨਂ ਨਿਵਾਰਣਾ ਆਵਰਣਂ, ਚੋਰਾਦਿਉਪਦ੍ਦਵਨਿਵਾਰਣਤ੍ਥਂ ਗੋਪਾਯਨਾ ਗੁਤ੍ਤਿ, ਤਂ ਸਬ੍ਬਮ੍ਪਿ ਸੁਟ੍ਠੁ ਸਂਵਿਦਹਸ੍ਸੁ ਪਵਤ੍ਤਯ ਠਪੇਹੀਤਿ ਅਤ੍ਥੋ. ਇਦਾਨਿ ਯਤ੍ਥ ਸਾ ਸਂਵਿਦਹਿਤਬ੍ਬਾ, ਤਂ ਦਸ੍ਸੇਨ੍ਤੋ ਅਨ੍ਤੋਜਨਸ੍ਮਿਨ੍ਤਿਆਦਿਮਾਹ.

ਤਤ੍ਰਾਯਂ ਸਙ੍ਖੇਪਤ੍ਥੋ – ਅਨ੍ਤੋਜਨਸਙ੍ਖਾਤਂ ਤਵ ਪੁਤ੍ਤਦਾਰਂ ਸੀਲਸਂਵਰੇ ਪਤਿਟ੍ਠਪੇਹਿ, ਵਤ੍ਥਗਨ੍ਧਮਾਲਾਦੀਨਿ ਚਸ੍ਸ ਦੇਹਿ, ਸਬ੍ਬੋਪਦ੍ਦਵੇ ਚਸ੍ਸ ਨਿਵਾਰੇਹਿ. ਬਲਕਾਯਾਦੀਸੁਪਿ ਏਸੇਵ ਨਯੋ. ਅਯਂ ਪਨ ਵਿਸੇਸੋ – ਬਲਕਾਯੋ ਕਾਲਂ ਅਨਤਿਕ੍ਕਮਿਤ੍ਵਾ ਭਤ੍ਤਵੇਤਨਸਮ੍ਪਦਾਨੇਨਪਿ ਅਨੁਗ੍ਗਹੇਤਬ੍ਬੋ. ਅਭਿਸਿਤ੍ਤਖਤ੍ਤਿਯਾ ਭਦ੍ਰਸ੍ਸਾਜਾਨੇਯ੍ਯਾਦਿਰਤਨਸਮ੍ਪਦਾਨੇਨਪਿ ਉਪਸਙ੍ਗਣ੍ਹਿਤਬ੍ਬਾ. ਅਨੁਯਨ੍ਤਖਤ੍ਤਿਯਾ ਤੇਸਂ ਅਨੁਰੂਪਯਾਨਵਾਹਨਸਮ੍ਪਦਾਨੇਨਪਿ ਪਰਿਤੋਸੇਤਬ੍ਬਾ. ਬ੍ਰਾਹ੍ਮਣਾ ਅਨ੍ਨਪਾਨਵਤ੍ਥਾਦਿਨਾ ਦੇਯ੍ਯਧਮ੍ਮੇਨ. ਗਹਪਤਿਕਾ ਭਤ੍ਤਬੀਜਨਙ੍ਗਲਫਾਲਬਲਿਬਦ੍ਦਾਦਿਸਮ੍ਪਦਾਨੇਨ. ਤਥਾ ਨਿਗਮਵਾਸਿਨੋ ਨੇਗਮਾ, ਜਨਪਦਵਾਸਿਨੋ ਚ ਜਾਨਪਦਾ. ਸਮਿਤਪਾਪਬਾਹਿਤਪਾਪਾ ਸਮਣਬ੍ਰਾਹ੍ਮਣਾ ਸਮਣਪਰਿਕ੍ਖਾਰਸਮ੍ਪਦਾਨੇਨ ਸਕ੍ਕਾਤਬ੍ਬਾ. ਮਿਗਪਕ੍ਖਿਨੋ ਅਭਯਦਾਨੇਨ ਸਮਸ੍ਸਾਸੇਤਬ੍ਬਾ.

ਵਿਜਿਤੇਤਿ ਅਤ੍ਤਨੋ ਆਣਾਪਵਤ੍ਤਿਟ੍ਠਾਨੇ. ਅਧਮ੍ਮਕਾਰੋਤਿ ਅਧਮ੍ਮਕਿਰਿਯਾ. ਮਾ ਪਵਤ੍ਤਿਤ੍ਥਾਤਿ ਯਥਾ ਨਪ੍ਪਵਤ੍ਤਤਿ, ਤਥਾ ਨਂ ਪਟਿਪਾਦੇਹੀਤਿ ਅਤ੍ਥੋ. ਸਮਣਬ੍ਰਾਹ੍ਮਣਾਤਿ ਸਮਿਤਪਾਪਬਾਹਿਤਪਾਪਾ. ਮਦਪ੍ਪਮਾਦਾ ਪਟਿਵਿਰਤਾਤਿ ਨਵਵਿਧਾ ਮਾਨਮਦਾ, ਪਞ੍ਚਸੁ ਕਾਮਗੁਣੇਸੁ ਚਿਤ੍ਤਵੋਸ੍ਸਜ੍ਜਨਸਙ੍ਖਾਤਾ ਪਮਾਦਾ ਚ ਪਟਿਵਿਰਤਾ. ਖਨ੍ਤਿਸੋਰਚ੍ਚੇ ਨਿਵਿਟ੍ਠਾਤਿ ਅਧਿਵਾਸਨਖਨ੍ਤਿਯਞ੍ਚ ਸੁਰਤਭਾਵੇ ਚ ਪਤਿਟ੍ਠਿਤਾ. ਏਕਮਤ੍ਤਾਨਨ੍ਤਿ ਅਤ੍ਤਨੋ ਰਾਗਾਦੀਨਂ ਦਮਨਾਦੀਹਿ ਏਕਮਤ੍ਤਾਨਂ ਦਮੇਨ੍ਤਿ ਸਮੇਨ੍ਤਿ ਪਰਿਨਿਬ੍ਬਾਪੇਨ੍ਤੀਤਿ ਵੁਚ੍ਚਨ੍ਤਿ. ਕਾਲੇਨ ਕਾਲਨ੍ਤਿ ਕਾਲੇ ਕਾਲੇ. ਅਭਿਨਿਵਜ੍ਜੇਯ੍ਯਾਸੀਤਿ ਗੂਥਂ ਵਿਯ ਵਿਸਂ ਵਿਯ ਅਗ੍ਗਿਂ ਵਿਯ ਚ ਸੁਟ੍ਠੁ ਵਜ੍ਜੇਯ੍ਯਾਸਿ. ਸਮਾਦਾਯਾਤਿ ਸੁਰਭਿਕੁਸੁਮਦਾਮਂ ਵਿਯ ਅਮਤਂ ਵਿਯ ਚ ਸਮ੍ਮਾ ਆਦਾਯ ਪਵਤ੍ਤੇਯ੍ਯਾਸਿ.

ਇਧ ਠਤ੍ਵਾ ਵਤ੍ਤਂ ਸਮਾਨੇਤਬ੍ਬਂ. ਅਨ੍ਤੋਜਨਸ੍ਮਿਂ ਬਲਕਾਯੇਪਿ ਏਕਂ, ਖਤ੍ਤਿਯੇਸੁ ਏਕਂ, ਅਨੁਯਨ੍ਤੇਸੁ ਏਕਂ, ਬ੍ਰਾਹ੍ਮਣਗਹਪਤਿਕੇਸੁ ਏਕਂ, ਨੇਗਮਜਾਨਪਦੇਸੁ ਏਕਂ, ਸਮਣਬ੍ਰਾਹ੍ਮਣੇਸੁ ਏਕਂ, ਮਿਗਪਕ੍ਖੀਸੁ ਏਕਂ, ਅਧਮ੍ਮਕਾਰਪ੍ਪਟਿਕ੍ਖੇਪੋ ਏਕਂ, ਅਧਨਾਨਂ ਧਨਾਨੁਪ੍ਪਦਾਨਂ ਏਕਂ ਸਮਣਬ੍ਰਾਹ੍ਮਣੇ ਉਪਸਙ੍ਕਮਿਤ੍ਵਾ ਪਞ੍ਹਪੁਚ੍ਛਨਂ ਏਕਨ੍ਤਿ ਏਵਮੇਤਂ ਦਸਵਿਧਂ ਹੋਤਿ. ਗਹਪਤਿਕੇ ਪਨ ਪਕ੍ਖਿਜਾਤੇ ਚ ਵਿਸੁਂ ਕਤ੍ਵਾ ਗਣੇਨ੍ਤਸ੍ਸ ਦ੍ਵਾਦਸਵਿਧਂ ਹੋਤਿ. ਪੁਬ੍ਬੇ ਅਵੁਤ੍ਤਂ ਵਾ ਗਣੇਨ੍ਤੇਨ ਅਧਮ੍ਮਰਾਗਸ੍ਸ ਚ ਵਿਸਮਲੋਭਸ੍ਸ ਚ ਪਹਾਨਵਸੇਨ ਦ੍ਵਾਦਸਵਿਧਂ ਵੇਦਿਤਬ੍ਬਂ. ਇਦਂ ਖੋ ਤਾਤ ਤਨ੍ਤਿ ਇਦਂ ਦਸਵਿਧਂ ਦ੍ਵਾਦਸਵਿਧਞ੍ਚ ਅਰਿਯਚਕ੍ਕਵਤ੍ਤਿਵਤ੍ਤਂ ਨਾਮ. ਵਤ੍ਤਮਾਨਸ੍ਸਾਤਿ ਪੂਰੇਤ੍ਵਾ ਵਤ੍ਤਮਾਨਸ੍ਸ. ਤਦਹੁਪੋਸਥੇਤਿਆਦਿ ਮਹਾਸੁਦਸ੍ਸਨੇ ਵੁਤ੍ਤਂ.

੯੦. ਸਮਤੇਨਾਤਿ ਅਤ੍ਤਨੋ ਮਤਿਯਾ. ਸੁਦਨ੍ਤਿ ਨਿਪਾਤਮਤ੍ਤਂ. ਪਸਾਸਤੀਤਿ ਅਨੁਸਾਸਤਿ. ਇਦਂ ਵੁਤ੍ਤਂ ਹੋਤਿ – ਪੋਰਾਣਕਂ ਰਾਜਵਂਸਂ ਰਾਜਪਵੇਣਿਂ ਰਾਜਧਮ੍ਮਂ ਪਹਾਯ ਅਤ੍ਤਨੋ ਮਤਿਮਤ੍ਤੇ ਠਤ੍ਵਾ ਜਨਪਦਂ ਅਨੁਸਾਸਤੀਤਿ. ਏਵਮਯਂ ਮਘਦੇਵਵਂਸਸ੍ਸ ਕਲ਼ਾਰਜਨਕੋ ਵਿਯ ਦਲ਼੍ਹਨੇਮਿਵਂਸਸ੍ਸ ਉਪਚ੍ਛੇਦਕੋ ਅਨ੍ਤਿਮਪੁਰਿਸੋ ਹੁਤ੍ਵਾ ਉਪ੍ਪਨ੍ਨੋ. ਪੁਬ੍ਬੇਨਾਪਰਨ੍ਤਿ ਪੁਬ੍ਬਕਾਲੇਨ ਸਦਿਸਾ ਹੁਤ੍ਵਾ ਅਪਰਕਾਲਂ. ਜਨਪਦਾ ਨ ਪਬ੍ਬਨ੍ਤੀਤਿ ਨ ਵਡ੍ਢਨ੍ਤਿ. ਯਥਾ ਤਂ ਪੁਬ੍ਬਕਾਨਨ੍ਤਿ ਯਥਾ ਪੁਬ੍ਬਕਾਨਂ ਰਾਜੂਨਂ ਪੁਬ੍ਬੇ ਚ ਪਚ੍ਛਾ ਚ ਸਦਿਸਾਯੇਵ ਹੁਤ੍ਵਾ ਪਬ੍ਬਿਂਸੁ, ਤਥਾ ਨ ਪਬ੍ਬਨ੍ਤਿ. ਕਤ੍ਥਚਿ ਸੁਞ੍ਞਾ ਹੋਨ੍ਤਿ ਹਤਵਿਲੁਤ੍ਤਾ, ਤੇਲਮਧੁਫਾਣਿਤਾਦੀਸੁ ਚੇਵ ਯਾਗੁਭਤ੍ਤਾਦੀਸੁ ਚ ਓਜਾਪਿ ਪਰਿਹਾਯਿਤ੍ਥਾਤਿ ਅਤ੍ਥੋ.

ਅਮਚ੍ਚਾ ਪਾਰਿਸਜ੍ਜਾਤਿ ਅਮਚ੍ਚਾ ਚੇਵ ਪਰਿਸਾਵਚਰਾ ਚ. ਗਣਕਮਹਾਮਤ੍ਤਾਤਿ ਅਚ੍ਛਿਦ੍ਦਕਾਦਿਪਾਠਗਣਕਾ ਚੇਵ ਮਹਾਅਮਚ੍ਚਾ ਚ. ਅਨੀਕਟ੍ਠਾਤਿ ਹਤ੍ਥਿਆਚਰਿਯਾਦਯੋ. ਦੋਵਾਰਿਕਾਤਿ ਦ੍ਵਾਰਰਕ੍ਖਿਨੋ. ਮਨ੍ਤਸ੍ਸਾਜੀਵਿਨੋਤਿ ਮਨ੍ਤਾ ਵੁਚ੍ਚਤਿ ਪਞ੍ਞਾ, ਤਂ ਨਿਸ੍ਸਯਂ ਕਤ੍ਵਾ ਯੇ ਜੀਵਨ੍ਤਿ ਪਣ੍ਡਿਤਾ ਮਹਾਮਤ੍ਤਾ, ਤੇਸਂ ਏਤਂ ਨਾਮਂ.

ਆਯੁਵਣ੍ਣਾਦਿਪਰਿਹਾਨਿਕਥਾਵਣ੍ਣਨਾ

੯੧. ਨੋ ਚ ਖੋ ਅਧਨਾਨਨ੍ਤਿ ਬਲਵਲੋਭਤ੍ਤਾ ਪਨ ਅਧਨਾਨਂ ਦਲਿਦ੍ਦਮਨੁਸ੍ਸਾਨਂ ਧਨਂ ਨਾਨੁਪ੍ਪਦਾਸਿ. ਨਾਨੁਪ੍ਪਦਿਯਮਾਨੇਤਿ ਅਨਨੁਪ੍ਪਦਿਯਮਾਨੇ, ਅਯਮੇਵ ਵਾ ਪਾਠੋ. ਦਾਲਿਦ੍ਦਿਯਨ੍ਤਿ ਦਲਿਦ੍ਦਭਾਵੋ. ਅਤ੍ਤਨਾ ਚ ਜੀਵਾਹੀਤਿ ਸਯਞ੍ਚ ਜੀਵਂ ਯਾਪੇਹੀਤਿ ਅਤ੍ਥੋ. ਉਦ੍ਧਗ੍ਗਿਕਨ੍ਤਿਆਦੀਸੁ ਉਪਰੂਪਰਿਭੂਮੀਸੁ ਫਲਦਾਨਵਸੇਨ ਉਦ੍ਧਮਗ੍ਗਮਸ੍ਸਾਤਿ ਉਦ੍ਧਗ੍ਗਿਕਾ. ਸਗ੍ਗਸ੍ਸ ਹਿਤਾ ਤਤ੍ਰੁਪਪਤ੍ਤਿਜਨਨਤੋਤਿ ਸੋਵਗ੍ਗਿਕਾ. ਨਿਬ੍ਬਤ੍ਤਟ੍ਠਾਨੇ ਸੁਖੋ ਵਿਪਾਕੋ ਅਸ੍ਸਾਤਿ ਸੁਖਵਿਪਾਕਾ. ਸੁਟ੍ਠੁ ਅਗ੍ਗਾਨਂ ਦਿਬ੍ਬਵਣ੍ਣਾਦੀਨਂ ਦਸਨ੍ਨਂ ਵਿਸੇਸਾਨਂ ਨਿਬ੍ਬਤ੍ਤਨਤੋ ਸਗ੍ਗਸਂਵਤ੍ਤਨਿਕਾ. ਏਵਰੂਪਂ ਦਕ੍ਖਿਣਂ ਦਾਨਂ ਪਤਿਟ੍ਠਪੇਤੀਤਿ ਅਤ੍ਥੋ.

੯੨. ਪਵਡ੍ਢਿਸ੍ਸਤੀਤਿ ਵਡ੍ਢਿਸ੍ਸਤਿ ਬਹੁਂ ਭਵਿਸ੍ਸਤਿ. ਸੁਨਿਸੇਧਂ ਨਿਸੇਧੇਯ੍ਯਨ੍ਤਿ ਸੁਟ੍ਠੁ ਨਿਸਿਦ੍ਧਂ ਨਿਸੇਧੇਯ੍ਯਂ. ਮੂਲਘਚ੍ਚਨ੍ਤਿ ਮੂਲਹਤਂ. ਖਰਸ੍ਸਰੇਨਾਤਿ ਫਰੁਸਸਦ੍ਦੇਨ. ਪਣਵੇਨਾਤਿ ਵਜ੍ਝਭੇਰਿਯਾ.

੯੩. ਸੀਸਾਨਿ ਨੇਸਂ ਛਿਨ੍ਦਿਸ੍ਸਾਮਾਤਿ ਯੇਸਂ ਅਨ੍ਤਮਸੋ ਮੂਲਕਮੁਟ੍ਠਿਮ੍ਪਿ ਹਰਿਸ੍ਸਾਮ, ਤੇਸਂ ਤਥੇਵ ਸੀਸਾਨਿ ਛਿਨ੍ਦਿਸ੍ਸਾਮ, ਯਥਾ ਕੋਚਿ ਹਟਭਾਵਮ੍ਪਿ ਨ ਜਾਨਿਸ੍ਸਤਿ, ਅਮ੍ਹਾਕਂ ਦਾਨਿ ਕਿਮੇਤ੍ਥ ਰਾਜਾਪਿ ਏਵਂ ਉਟ੍ਠਾਯ ਪਰਂ ਮਾਰੇਤੀਤਿ ਅਯਂ ਨੇਸਂ ਅਧਿਪ੍ਪਾਯੋ. ਉਪਕ੍ਕਮਿਂਸੂਤਿ ਆਰਭਿਂਸੁ. ਪਨ੍ਥਦੁਹਨਨ੍ਤਿ ਪਨ੍ਥਘਾਤਂ, ਪਨ੍ਥੇ ਠਤ੍ਵਾ ਚੋਰਕਮ੍ਮਂ.

੯੪. ਨ ਹਿ, ਦੇਵਾਤਿ ਸੋ ਕਿਰ ਚਿਨ੍ਤੇਸਿ – ‘‘ਅਯਂ ਰਾਜਾ ਸਚ੍ਚਂ ਦੇਵਾਤਿ ਮੁਖਪਟਿਞ੍ਞਾਯ ਦਿਨ੍ਨਾਯ ਮਾਰਾਪੇਤਿ, ਹਨ੍ਦਾਹਂ ਮੁਸਾਵਾਦਂ ਕਰੋਮੀ’’ਤਿ, ਮਰਣਭਯਾ ‘‘ਨ ਹਿ ਦੇਵਾ’’ਤਿ ਅਵੋਚ.

੯੬. ਏਕਿਦਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ, ਏਕੇ ਸਤ੍ਤਾਤਿ ਅਤ੍ਥੋ. ਚਾਰਿਤ੍ਤਨ੍ਤਿ ਮਿਚ੍ਛਾਚਾਰਂ. ਅਭਿਜ੍ਝਾਬ੍ਯਾਪਾਦਾਤਿ ਅਭਿਜ੍ਝਾ ਚ ਬ੍ਯਾਪਾਦੋ ਚ. ਮਿਚ੍ਛਾਦਿਟ੍ਠੀਤਿ ਨਤ੍ਥਿ ਦਿਨ੍ਨਨ੍ਤਿਆਦਿਕਾ ਅਨ੍ਤਗ੍ਗਾਹਿਕਾ ਪਚ੍ਚਨੀਕਦਿਟ੍ਠਿ.

੧੦੧. ਅਧਮ੍ਮਰਾਗੋਤਿ ਮਾਤਾ ਮਾਤੁਚ੍ਛਾ ਪਿਤੁਚ੍ਛਾ ਮਾਤੁਲਾਨੀਤਿਆਦਿਕੇ ਅਯੁਤ੍ਤਟ੍ਠਾਨੇ ਰਾਗੋ. ਵਿਸਮਲੋਭੋਤਿ ਪਰਿਭੋਗਯੁਤ੍ਤੇਸੁਪਿ ਠਾਨੇਸੁ ਅਤਿਬਲਵਲੋਭੋ. ਮਿਚ੍ਛਾਧਮ੍ਮੋਤਿ ਪੁਰਿਸਾਨਂ ਪੁਰਿਸੇਸੁ ਇਤ੍ਥੀਨਞ੍ਚ ਇਤ੍ਥੀਸੁ ਛਨ੍ਦਰਾਗੋ.

ਅਮਤ੍ਤੇਯ੍ਯਤਾਤਿਆਦੀਸੁ ਮਾਤੁ ਹਿਤੋ ਮਤ੍ਤੇਯ੍ਯੋ, ਤਸ੍ਸ ਭਾਵੋ ਮਤ੍ਤੇਯ੍ਯਤਾ, ਮਾਤਰਿ ਸਮ੍ਮਾ ਪਟਿਪਤ੍ਤਿਯਾ ਏਤਂ ਨਾਮਂ. ਤਸ੍ਸਾ ਅਭਾਵੋ ਚੇਵ ਤਪ੍ਪਟਿਪਕ੍ਖਤਾ ਚ ਅਮਤ੍ਤੇਯ੍ਯਤਾ. ਅਪੇਤ੍ਤੇਯ੍ਯਤਾਦੀਸੁਪਿ ਏਸੇਵ ਨਯੋ. ਨ ਕੁਲੇ ਜੇਟ੍ਠਾਪਚਾਯਿਤਾਤਿ ਕੁਲੇ ਜੇਟ੍ਠਾਨਂ ਅਪਚਿਤਿਯਾ ਨੀਚਵੁਤ੍ਤਿਯਾ ਅਕਰਣਭਾਵੋ.

ਦਸਵਸ੍ਸਾਯੁਕਸਮਯਵਣ੍ਣਨਾ

੧੦੩. ਯਂ ਇਮੇਸਨ੍ਤਿ ਯਸ੍ਮਿਂ ਸਮਯੇ ਇਮੇਸਂ. ਅਲਂਪਤੇਯ੍ਯਾਤਿ ਪਤਿਨੋ ਦਾਤੁਂ ਯੁਤ੍ਤਾ. ਇਮਾਨਿ ਰਸਾਨੀਤਿ ਇਮਾਨਿ ਲੋਕੇ ਅਗ੍ਗਰਸਾਨਿ. ਅਤਿਬ੍ਯਾਦਿਪ੍ਪਿਸ੍ਸਨ੍ਤੀਤਿ ਅਤਿਵਿਯ ਦਿਪ੍ਪਿਸ੍ਸਨ੍ਤਿ, ਅਯਮੇਵ ਵਾ ਪਾਠੋ. ਕੁਸਲਨ੍ਤਿਪਿ ਨ ਭਵਿਸ੍ਸਤੀਤਿ ਕੁਸਲਨ੍ਤਿ ਨਾਮਮ੍ਪਿ ਨ ਭਵਿਸ੍ਸਤਿ, ਪਞ੍ਞਤ੍ਤਿਮਤ੍ਤਮ੍ਪਿ ਨ ਪਞ੍ਞਾਯਿਸ੍ਸਤੀਤਿ ਅਤ੍ਥੋ. ਪੁਜ੍ਜਾ ਚ ਭਵਿਸ੍ਸਨ੍ਤਿ ਪਾਸਂਸਾ ਚਾਤਿ ਪੂਜਾਰਹਾ ਚ ਭਵਿਸ੍ਸਨ੍ਤਿ ਪਸਂਸਾਰਹਾ ਚ. ਤਦਾ ਕਿਰ ਮਨੁਸ੍ਸਾ ‘‘ਅਸੁਕੇਨ ਨਾਮ ਮਾਤਾ ਪਹਤਾ, ਪਿਤਾ ਪਹਤੋ, ਸਮਣਬ੍ਰਾਹ੍ਮਣਾ ਜੀਵਿਤਾ ਵੋਰੋਪਿਤਾ, ਕੁਲੇ ਜੇਟ੍ਠਾਨਂ ਅਤ੍ਥਿਭਾਵਮ੍ਪਿ ਨ ਜਾਨਾਤਿ, ਅਹੋ ਪੁਰਿਸੋ’’ਤਿ ਤਮੇਵ ਪੂਜੇਸ੍ਸਨ੍ਤਿ ਚੇਵ ਪਸਂਸਿਸ੍ਸਨ੍ਤਿ ਚ.

ਨ ਭਵਿਸ੍ਸਤਿ ਮਾਤਾਤਿ ਵਾਤਿ ਅਯਂ ਮਯ੍ਹਂ ਮਾਤਾਤਿ ਗਰੁਚਿਤ੍ਤਂ ਨ ਭਵਿਸ੍ਸਤਿ. ਗੇਹੇ ਮਾਤੁਗਾਮਂ ਵਿਯ ਨਾਨਾਵਿਧਂ ਅਸਬ੍ਭਿਕਥਂ ਕਥਯਮਾਨਾ ਅਗਾਰਵੁਪਚਾਰੇਨ ਉਪਸਙ੍ਕਮਿਸ੍ਸਨ੍ਤਿ. ਮਾਤੁਚ੍ਛਾਦੀਸੁਪਿ ਏਸੇਵ ਨਯੋ. ਏਤ੍ਥ ਚ ਮਾਤੁਚ੍ਛਾਤਿ ਮਾਤੁਭਗਿਨੀ. ਮਾਤੁਲਾਨੀਤਿ ਮਾਤੁਲਭਰਿਯਾ. ਆਚਰਿਯਭਰਿਯਾਤਿ ਸਿਪ੍ਪਾਯਤਨਾਨਿ ਸਿਕ੍ਖਾਪਕਸ੍ਸ ਆਚਰਿਯਸ੍ਸ ਭਰਿਯਾ. ਗਰੂਨਂ ਦਾਰਾਤਿ ਚੂਲ਼ਪਿਤੁਮਹਾਪਿਤੁਆਦੀਨਂ ਭਰਿਯਾ. ਸਮ੍ਭੇਦਨ੍ਤਿ ਮਿਸ੍ਸੀਭਾਵਂ, ਮਰਿਯਾਦਭੇਦਂ ਵਾ.

ਤਿਬ੍ਬੋ ਆਘਾਤੋ ਪਚ੍ਚੁਪਟ੍ਠਿਤੋ ਭਵਿਸ੍ਸਤੀਤਿ ਬਲਵਕੋਪੋ ਪੁਨਪ੍ਪੁਨਂ ਉਪ੍ਪਤ੍ਤਿਵਸੇਨ ਪਚ੍ਚੁਪਟ੍ਠਿਤੋ ਭਵਿਸ੍ਸਤਿ. ਅਪਰਾਨਿ ਦ੍ਵੇ ਏਤਸ੍ਸੇਵ ਵੇਵਚਨਾਨਿ. ਕੋਪੋ ਹਿ ਚਿਤ੍ਤਂ ਆਘਾਤੇਤੀਤਿ ਆਘਾਤੋ. ਅਤ੍ਤਨੋ ਚ ਪਰਸ੍ਸ ਚ ਹਿਤਸੁਖਂ ਬ੍ਯਾਪਾਦੇਤੀਤਿ ਬ੍ਯਾਪਾਦੋ. ਮਨੋਪਦੂਸਨਤੋ ਮਨੋਪਦੋਸੋਤਿ ਵੁਚ੍ਚਤਿ. ਤਿਬ੍ਬਂ ਵਧਕਚਿਤ੍ਤਨ੍ਤਿ ਪਿਯਮਾਨਸ੍ਸਾਪਿ ਪਰਂ ਮਾਰਣਤ੍ਥਾਯ ਵਧਕਚਿਤ੍ਤਂ. ਤਸ੍ਸ ਵਤ੍ਥੁਂ ਦਸ੍ਸੇਤੁਂ ਮਾਤੁਪਿ ਪੁਤ੍ਤਮ੍ਹੀਤਿਆਦਿ ਵੁਤ੍ਤਂ. ਮਾਗਵਿਕਸ੍ਸਾਤਿ ਮਿਗਲੁਦ੍ਦਕਸ੍ਸ.

੧੦੪. ਸਤ੍ਥਨ੍ਤਰਕਪ੍ਪੋਤਿ ਸਤ੍ਥੇਨ ਅਨ੍ਤਰਕਪ੍ਪੋ. ਸਂਵਟ੍ਟਕਪ੍ਪਂ ਅਪ੍ਪਤ੍ਵਾ ਅਨ੍ਤਰਾਵ ਲੋਕਵਿਨਾਸੋ. ਅਨ੍ਤਰਕਪ੍ਪੋ ਚ ਨਾਮੇਸ ਦੁਬ੍ਭਿਕ੍ਖਨ੍ਤਰਕਪ੍ਪੋ ਰੋਗਨ੍ਤਰਕਪ੍ਪੋ ਸਤ੍ਥਨ੍ਤਰਕਪ੍ਪੋਤਿ ਤਿਵਿਧੋ. ਤਤ੍ਥ ਲੋਭੁਸ੍ਸਦਾਯ ਪਜਾਯ ਦੁਬ੍ਭਿਕ੍ਖਨ੍ਤਰਕਪ੍ਪੋ ਹੋਤਿ. ਮੋਹੁਸ੍ਸਦਾਯ ਰੋਗਨ੍ਤਰਕਪ੍ਪੋ. ਦੋਸੁਸ੍ਸਦਾਯ ਸਤ੍ਥਨ੍ਤਰਕਪ੍ਪੋ. ਤਤ੍ਥ ਦੁਬ੍ਭਿਕ੍ਖਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਪੇਤ੍ਤਿਵਿਸਯੇ ਉਪਪਜ੍ਜਨ੍ਤਿ. ਕਸ੍ਮਾ? ਆਹਾਰਨਿਕਨ੍ਤਿਯਾ ਬਲਵਤ੍ਤਾ. ਰੋਗਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਸਗ੍ਗੇ ਨਿਬ੍ਬਤ੍ਤਨ੍ਤਿ ਕਸ੍ਮਾ? ਤੇਸਞ੍ਹਿ ‘‘ਅਹੋ ਵਤਞ੍ਞੇਸਂ ਸਤ੍ਤਾਨਂ ਏਵਰੂਪੋ ਰੋਗੋ ਨ ਭਵੇਯ੍ਯਾ’’ਤਿ ਮੇਤ੍ਤਚਿਤ੍ਤਂ ਉਪ੍ਪਜ੍ਜਤੀਤਿ. ਸਤ੍ਥਨ੍ਤਰਕਪ੍ਪੇਨ ਨਟ੍ਠਾ ਯੇਭੁਯ੍ਯੇਨ ਨਿਰਯੇ ਉਪਪਜ੍ਜਨ੍ਤਿ. ਕਸ੍ਮਾ? ਅਞ੍ਞਮਞ੍ਞਂ ਬਲਵਾਘਾਤਤਾਯ.

ਮਿਗਸਞ੍ਞਨ੍ਤਿ ‘‘ਅਯਂ ਮਿਗੋ, ਅਯਂ ਮਿਗੋ’’ਤਿ ਸਞ੍ਞਂ. ਤਿਣ੍ਹਾਨਿ ਸਤ੍ਥਾਨਿ ਹਤ੍ਥੇਸੁ ਪਾਤੁਭਵਿਸ੍ਸਨ੍ਤੀਤਿ ਤੇਸਂ ਕਿਰ ਹਤ੍ਥੇਨ ਫੁਟ੍ਠਮਤ੍ਤਂ ਯਂਕਿਞ੍ਚਿ ਅਨ੍ਤਮਸੋ ਤਿਣਪਣ੍ਣਂ ਉਪਾਦਾਯ ਆਵੁਧਮੇਵ ਭਵਿਸ੍ਸਤਿ. ਮਾ ਚ ਮਯਂ ਕਞ੍ਚੀਤਿ ਮਯਂ ਕਞ੍ਚਿ ਏਕਪੁਰਿਸਮ੍ਪਿ ਜੀਵਿਤਾ ਮਾ ਵੋਰੋਪਯਿਮ੍ਹ. ਮਾ ਚ ਅਮ੍ਹੇ ਕੋਚੀਤਿ ਅਮ੍ਹੇਪਿ ਕੋਚਿ ਏਕਪੁਰਿਸੋ ਜੀਵਿਤਾ ਮਾ ਵੋਰੋਪਯਿਤ੍ਥ. ਯਂਨੂਨ ਮਯਨ੍ਤਿ ਅਯਂ ਲੋਕਵਿਨਾਸੋ ਪਚ੍ਚੁਪਟ੍ਠਿਤੋ, ਨ ਸਕ੍ਕਾ ਦ੍ਵੀਹਿ ਏਕਟ੍ਠਾਨੇ ਠਿਤੇਹਿ ਜੀਵਿਤਂ ਲਦ੍ਧੁਨ੍ਤਿ ਮਞ੍ਞਮਾਨਾ ਏਵਂ ਚਿਨ੍ਤਯਿਂਸੁ. ਵਨਗਹਨਨ੍ਤਿ ਵਨਸਙ੍ਖਾਤੇਹਿ ਤਿਣਗੁਮ੍ਬਲਤਾਦੀਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਰੁਕ੍ਖਗਹਨਨ੍ਤਿ ਰੁਕ੍ਖੇਹਿ ਗਹਨਂ ਦੁਪ੍ਪਵੇਸਟ੍ਠਾਨਂ. ਨਦੀਵਿਦੁਗ੍ਗਨ੍ਤਿ ਨਦੀਨਂ ਅਨ੍ਤਰਦੀਪਾਦੀਸੁ ਦੁਗ੍ਗਮਨਟ੍ਠਾਨਂ. ਪਬ੍ਬਤਵਿਸਮਨ੍ਤਿ ਪਬ੍ਬਤੇਹਿ ਵਿਸਮਂ, ਪਬ੍ਬਤੇਸੁਪਿ ਵਾ ਵਿਸਮਟ੍ਠਾਨਂ. ਸਭਾਗਾਯਿਸ੍ਸਨ੍ਤੀਤਿ ਯਥਾ ਅਹਂ ਜੀਵਾਮਿ ਦਿਟ੍ਠਾ ਭੋ ਸਤ੍ਤਾ, ਤ੍ਵਮ੍ਪਿ ਤਥਾ ਜੀਵਸੀਤਿ ਏਵਂ ਸਮ੍ਮੋਦਨਕਥਾਯ ਅਤ੍ਤਨਾ ਸਭਾਗੇ ਕਰਿਸ੍ਸਨ੍ਤਿ.

ਆਯੁਵਣ੍ਣਾਦਿਵਡ੍ਢਨਕਥਾਵਣ੍ਣਨਾ

੧੦੫. ਆਯਤਨ੍ਤਿ ਮਹਨ੍ਤਂ. ਪਾਣਾਤਿਪਾਤਾ ਵਿਰਮੇਯ੍ਯਾਮਾਤਿ ਪਾਣਾਤਿਪਾਤਤੋ ਓਸਕ੍ਕੇਯ੍ਯਾਮ. ਪਾਣਾਤਿਪਾਤਂ ਵਿਰਮੇਯ੍ਯਾਮਾਤਿਪਿ ਸਜ੍ਝਾਯਨ੍ਤਿ, ਤਤ੍ਥ ਪਾਣਾਤਿਪਾਤਂ ਪਜਹੇਯ੍ਯਾਮਾਤਿ ਅਤ੍ਥੋ. ਵੀਸਤਿਵਸ੍ਸਾਯੁਕਾਤਿ ਮਾਤਾਪਿਤਰੋ ਪਾਣਾਤਿਪਾਤਾ ਪਟਿਵਿਰਤਾ, ਪੁਤ੍ਤਾ ਕਸ੍ਮਾ ਵੀਸਤਿਵਸ੍ਸਾਯੁਕਾ ਅਹੇਸੁਨ੍ਤਿ ਖੇਤ੍ਤਵਿਸੁਦ੍ਧਿਯਾ. ਤੇਸਞ੍ਹਿ ਮਾਤਾਪਿਤਰੋ ਸੀਲਵਨ੍ਤੋ ਜਾਤਾ. ਇਤਿ ਸੀਲਗਬ੍ਭੇ ਵਡ੍ਢਿਤਤ੍ਤਾ ਇਮਾਯ ਖੇਤ੍ਤਵਿਸੁਦ੍ਧਿਯਾ ਦੀਘਾਯੁਕਾ ਅਹੇਸੁਂ. ਯੇ ਪਨੇਤ੍ਥ ਕਾਲਂ ਕਤ੍ਵਾ ਤਤ੍ਥੇਵ ਨਿਬ੍ਬਤ੍ਤਾ, ਤੇ ਅਤ੍ਤਨੋਵ ਸੀਲਸਮ੍ਪਤ੍ਤਿਯਾ ਦੀਘਾਯੁਕਾ ਅਹੇਸੁਂ.

ਅਸ੍ਸਾਮਾਤਿ ਭਵੇਯ੍ਯਾਮ. ਚਤ੍ਤਾਰੀਸਵਸ੍ਸਾਯੁਕਾਤਿਆਦਯੋ ਕੋਟ੍ਠਾਸਾ ਅਦਿਨ੍ਨਾਦਾਨਾਦੀਹਿ ਪਟਿਵਿਰਤਾਨਂ ਵਸੇਨ ਵੇਦਿਤਬ੍ਬਾ.

ਸਙ੍ਖਰਾਜਉਪ੍ਪਤ੍ਤਿਵਣ੍ਣਨਾ

੧੦੬. ਇਚ੍ਛਾਤਿ ਮਯ੍ਹਂ ਭਤ੍ਤਂ ਦੇਥਾਤਿ ਏਵਂ ਉਪ੍ਪਜ੍ਜਨਕਤਣ੍ਹਾ. ਅਨਸਨਨ੍ਤਿ ਨ ਅਸਨਂ ਅਵਿਪ੍ਫਾਰਿਕਭਾਵੋ ਕਾਯਾਲਸਿਯਂ, ਭਤ੍ਤਂ ਭੁਤ੍ਤਾਨਂ ਭਤ੍ਤਸਮ੍ਮਦਪਚ੍ਚਯਾ ਨਿਪਜ੍ਜਿਤੁਕਾਮਤਾਜਨਕੋ ਕਾਯਦੁਬ੍ਬਲਭਾਵੋਤਿ ਅਤ੍ਥੋ. ਜਰਾਤਿ ਪਾਕਟਜਰਾ. ਕੁਕ੍ਕੁਟਸਮ੍ਪਾਤਿਕਾਤਿ ਏਕਗਾਮਸ੍ਸ ਛਦਨਪਿਟ੍ਠਤੋ ਉਪ੍ਪਤਿਤ੍ਵਾ ਇਤਰਗਾਮਸ੍ਸ ਛਦਨਪਿਟ੍ਠੇ ਪਤਨਸਙ੍ਖਾਤੋ ਕੁਕ੍ਕੁਟਸਮ੍ਪਾਤੋ. ਏਤਾਸੁ ਅਤ੍ਥੀਤਿ ਕੁਕ੍ਕੁਟਸਮ੍ਪਾਤਿਕਾ. ‘‘ਕੁਕ੍ਕੁਟਸਮ੍ਪਾਦਿਕਾ’’ਤਿਪਿ ਪਾਠੋ, ਗਾਮਨ੍ਤਰਤੋ ਗਾਮਨ੍ਤਰਂ ਕੁਕ੍ਕੁਟਾਨਂ ਪਦਸਾ ਗਮਨਸਙ੍ਖਾਤੋ ਕੁਕ੍ਕੁਟਸਮ੍ਪਾਦੋ ਏਤਾਸੁ ਅਤ੍ਥੀਤਿ ਅਤ੍ਥੋ. ਉਭਯਮ੍ਪੇਤਂ ਘਨਨਿਵਾਸਤਂਯੇਵ ਦੀਪੇਤਿ. ਅਵੀਚਿ ਮਞ੍ਞੇ ਫੁਟੋ ਭਵਿਸ੍ਸਤੀਤਿ ਅਵੀਚਿਮਹਾਨਿਰਯੋ ਵਿਯ ਨਿਰਨ੍ਤਰਪੂਰਿਤੋ ਭਵਿਸ੍ਸਤਿ.

੧੦੭. ‘‘ਅਸੀਤਿਵਸ੍ਸਸਹਸ੍ਸਾਯੁਕੇਸੁ, ਭਿਕ੍ਖਵੇ, ਮਨੁਸ੍ਸੇਸੁ ਮੇਤ੍ਤੇਯ੍ਯੋ ਨਾਮ ਭਗਵਾ ਲੋਕੇ ਉਪ੍ਪਜ੍ਜਿਸ੍ਸਤੀ’’ਤਿ ਨ ਵਡ੍ਢਮਾਨਕਵਸੇਨ ਵੁਤ੍ਤਂ. ਨ ਹਿ ਬੁਦ੍ਧਾ ਵਡ੍ਢਮਾਨੇ ਆਯੁਮ੍ਹਿ ਨਿਬ੍ਬਤ੍ਤਨ੍ਤਿ, ਹਾਯਮਾਨੇ ਪਨ ਨਿਬ੍ਬਤ੍ਤਨ੍ਤਿ. ਤਸ੍ਮਾ ਯਦਾ ਤਂ ਆਯੁ ਵਡ੍ਢਿਤ੍ਵਾ ਅਸਙ੍ਖੇਯ੍ਯਤਂ ਪਤ੍ਵਾ ਪੁਨ ਹਾਯਮਾਨਂ ਅਸੀਤਿਵਸ੍ਸਸਹਸ੍ਸਕਾਲੇ ਠਸ੍ਸਤਿ, ਤਦਾ ਉਪ੍ਪਜ੍ਜਿਸ੍ਸਤੀਤਿ ਅਤ੍ਥੋ. ਪਰਿਹਰਿਸ੍ਸਤੀਤਿ ਇਦਂ ਪਨ ਪਰਿਵਾਰੇਤ੍ਵਾ ਵਿਚਰਨ੍ਤਾਨਂ ਵਸੇਨ ਵੁਤ੍ਤਂ. ਯੂਪੋਤਿ ਪਾਸਾਦੋ. ਰਞ੍ਞਾ ਮਹਾਪਨਾਦੇਨ ਕਾਰਾਪਿਤੋਤਿ ਰਞ੍ਞਾ ਹੇਤੁਭੂਤੇਨ ਤਸ੍ਸਤ੍ਥਾਯ ਸਕ੍ਕੇਨ ਦੇਵਰਾਜੇਨ ਵਿਸ੍ਸਕਮ੍ਮਦੇਵਪੁਤ੍ਤਂ ਪੇਸੇਤ੍ਵਾ ਕਾਰਾਪਿਤੋ. ਪੁਬ੍ਬੇ ਕਿਰ ਦ੍ਵੇ ਪਿਤਾਪੁਤ੍ਤਾ ਨਲ਼ਕਾਰਾ ਪਚ੍ਚੇਕਬੁਦ੍ਧਸ੍ਸ ਨਲ਼ੇਹਿ ਚ ਉਦੁਮ੍ਬਰੇਹਿ ਚ ਪਣ੍ਣਸਾਲਂ ਕਾਰਾਪੇਤ੍ਵਾ ਤਂ ਤਤ੍ਥ ਵਾਸਾਪੇਤ੍ਵਾ ਚਤੂਹਿ ਪਚ੍ਚਯੇਹਿ ਉਪਟ੍ਠਹਿਂਸੁ. ਤੇ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਾ. ਤੇਸੁ ਪਿਤਾ ਦੇਵਲੋਕੇਯੇਵ ਅਟ੍ਠਾਸਿ. ਪੁਤ੍ਤੋ ਦੇਵਲੋਕਾ ਚਵਿਤ੍ਵਾ ਸੁਰੁਚਿਸ੍ਸ ਰਞ੍ਞੋ ਦੇਵਿਯਾ ਸੁਮੇਧਾਯ ਕੁਚ੍ਛਿਸ੍ਮਿਂ ਨਿਬ੍ਬਤ੍ਤੋ. ਮਹਾਪਨਾਦੋ ਨਾਮ ਕੁਮਾਰੋ ਅਹੋਸਿ. ਸੋ ਅਪਰਭਾਗੇ ਛਤ੍ਤਂ ਉਸ੍ਸਾਪੇਤ੍ਵਾ ਮਹਾਪਨਾਦੋ ਨਾਮ ਰਾਜਾ ਜਾਤੋ. ਅਥਸ੍ਸ ਪੁਞ੍ਞਾਨੁਭਾਵੇਨ ਸਕ੍ਕੋ ਦੇਵਰਾਜਾ ਵਿਸ੍ਸਕਮ੍ਮਦੇਵਪੁਤ੍ਤਂ ਰਞ੍ਞੋ ਪਾਸਾਦਂ ਕਰੋਹੀਤਿ ਪਹਿਣਿ ਸੋ ਤਸ੍ਸ ਪਾਸਾਦਂ ਨਿਮ੍ਮਿਨਿ ਪਞ੍ਚਵੀਸਤਿਯੋਜਨੁਬ੍ਬੇਧਂ ਸਤ੍ਤਰਤਨਮਯਂ ਸਤਭੂਮਕਂ. ਯਂ ਸਨ੍ਧਾਯ ਜਾਤਕੇ ਵੁਤ੍ਤਂ –

‘‘ਪਨਾਦੋ ਨਾਮ ਸੋ ਰਾਜਾ, ਯਸ੍ਸ ਯੂਪੋ ਸੁਵਣ੍ਣਯੋ;

ਤਿਰਿਯਂ ਸੋਲ਼ਸੁਬ੍ਬੇਧੋ, ਉਦ੍ਧਮਾਹੁ ਸਹਸ੍ਸਧਾ.

ਸਹਸ੍ਸਕਣ੍ਡੋ ਸਤਗੇਣ੍ਡੁ, ਧਜਾਲੁ ਹਰਿਤਾਮਯੋ;

ਅਨਚ੍ਚੁਂ ਤਤ੍ਥ ਗਨ੍ਧਬ੍ਬਾ, ਛ ਸਹਸ੍ਸਾਨਿ ਸਤ੍ਤਧਾ.

ਏਵਮੇਤਂ ਤਦਾ ਆਸਿ, ਯਥਾ ਭਾਸਸਿ ਭਦ੍ਦਜਿ;

ਸਕ੍ਕੋ ਅਹਂ ਤਦਾ ਆਸਿਂ, ਵੇਯ੍ਯਾਵਚ੍ਚਕਰੋ ਤਵਾ’’ਤਿ. (ਜਾ. ੫.੩.੪੨);

ਸੋ ਰਾਜਾ ਤਤ੍ਥ ਯਾਵਤਾਯੁਕਂ ਵਸਿਤ੍ਵਾ ਕਾਲਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਿ. ਤਸ੍ਮਿਂ ਦੇਵਲੋਕੇ ਨਿਬ੍ਬਤ੍ਤੇ ਸੋ ਪਾਸਾਦੋ ਮਹਾਗਙ੍ਗਾਯ ਅਨੁਸੋਤਂ ਪਤਿ. ਤਸ੍ਸ ਧੁਰਸੋਪਾਨਸਮ੍ਮੁਖਟ੍ਠਾਨੇ ਪਯਾਗਪਤਿਟ੍ਠਾਨਂ ਨਾਮ ਨਗਰਂ ਮਾਪਿਤਂ. ਥੁਪਿਕਾਸਮ੍ਮੁਖਟ੍ਠਾਨੇ ਕੋਟਿਗਾਮੋ ਨਾਮ. ਅਪਰਭਾਗੇ ਅਮ੍ਹਾਕਂ ਭਗਵਤੋ ਕਾਲੇ ਸੋ ਨਲ਼ਕਾਰਦੇਵਪੁਤ੍ਤੋ ਦੇਵਲੋਕਤੋ ਚਵਿਤ੍ਵਾ ਮਨੁਸ੍ਸਪਥੇ ਭਦ੍ਦਜਿਸੇਟ੍ਠਿ ਨਾਮ ਹੁਤ੍ਵਾ ਸਤ੍ਥੁ ਸਨ੍ਤਿਕੇ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿ. ਸੋ ਨਾਵਾਯ ਗਙ੍ਗਾਤਰਣਦਿਵਸੇ ਭਿਕ੍ਖੁਸਙ੍ਘਸ੍ਸ ਤਂ ਪਾਸਾਦਂ ਦਸ੍ਸੇਤੀਤਿ ਵਤ੍ਥੁ ਵਿਤ੍ਥਾਰੇਤਬ੍ਬਂ. ਕਸ੍ਮਾ ਪਨੇਸ ਪਾਸਾਦੋ ਨ ਅਨ੍ਤਰਹਿਤੋਤਿ? ਇਤਰਸ੍ਸ ਆਨੁਭਾਵਾ. ਤੇਨ ਸਦ੍ਧਿਂ ਪੁਞ੍ਞਂ ਕਤ੍ਵਾ ਦੇਵਲੋਕੇ ਨਿਬ੍ਬਤ੍ਤਕੁਲਪੁਤ੍ਤੋ ਅਨਾਗਤੇ ਸਙ੍ਖੋ ਨਾਮ ਰਾਜਾ ਭਵਿਸ੍ਸਤਿ. ਤਸ੍ਸ ਪਰਿਭੋਗਤ੍ਥਾਯ ਸੋ ਪਾਸਾਦੋ ਉਟ੍ਠਹਿਸ੍ਸਤਿ, ਤਸ੍ਮਾ ਨ ਅਨ੍ਤਰਹਿਤੋਤਿ.

੧੦੮. ਉਸ੍ਸਾਪੇਤ੍ਵਾਤਿ ਤਂ ਪਾਸਾਦਂ ਉਟ੍ਠਾਪੇਤ੍ਵਾ. ਅਜ੍ਝਾਵਸਿਤ੍ਵਾਤਿ ਤਤ੍ਥ ਵਸਿਤ੍ਵਾ. ਤਂ ਦਤ੍ਵਾ ਵਿਸ੍ਸਜ੍ਜਿਤ੍ਵਾਤਿ ਤਂ ਪਾਸਾਦਂ ਦਾਨਵਸੇਨ ਦਤ੍ਵਾ ਨਿਰਪੇਕ੍ਖੋ ਪਰਿਚ੍ਚਾਗਵਸੇਨ ਚ ਵਿਸ੍ਸਜ੍ਜਿਤ੍ਵਾ. ਕਸ੍ਸ ਚ ਏਵਂ ਦਤ੍ਵਾਤਿ? ਸਮਣਾਦੀਨਂ. ਤੇਨਾਹ – ‘‘ਸਮਣਬ੍ਰਾਹ੍ਮਣਕਪਣਦ੍ਧਿਕਵਨਿਬ੍ਬਕਯਾਚਕਾਨਂ ਦਾਨਂ ਦਤ੍ਵਾ’’ਤਿ. ਕਥਂ ਪਨ ਸੋ ਏਕਂ ਪਾਸਾਦਂ ਬਹੂਨਂ ਦਸ੍ਸਤੀਤਿ? ਏਵਂ ਕਿਰਸ੍ਸ ਚਿਤ੍ਤਂ ਉਪ੍ਪਜ੍ਜਿਸ੍ਸਤਿ ‘‘ਅਯਂ ਪਾਸਾਦੋ ਵਿਪ੍ਪਕਿਰਿਯਤੂ’’ਤਿ. ਸੋ ਖਣ੍ਡਖਣ੍ਡਸੋ ਵਿਪ੍ਪਕਿਰਿਸ੍ਸਤਿ. ਸੋ ਤਂ ਅਲਗ੍ਗਮਾਨੋਵ ਹੁਤ੍ਵਾ ‘‘ਯੋ ਯਤ੍ਤਕਂ ਇਚ੍ਛਤਿ, ਸੋ ਤਤ੍ਤਕਂ ਗਣ੍ਹਤੂ’’ਤਿ ਦਾਨਵਸੇਨ ਵਿਸ੍ਸਜ੍ਜਿਸ੍ਸਤਿ. ਤੇਨ ਵੁਤ੍ਤਂ – ‘‘ਦਾਨਂ ਦਤ੍ਵਾ ਮੇਤ੍ਤੇਯ੍ਯਸ੍ਸ ਭਗਵਤੋ…ਪੇ… ਵਿਹਰਿਸ੍ਸਤੀ’’ਤਿ. ਏਤ੍ਤਕੇਨ ਭਗਵਾ ਵਟ੍ਟਗਾਮਿਕੁਸਲਸ੍ਸ ਅਨੁਸਨ੍ਧਿਂ ਦਸ੍ਸੇਤਿ.

੧੦੯. ਇਦਾਨਿ ਵਿਵਟ੍ਟਗਾਮਿਕੁਸਲਸ੍ਸ ਅਨੁਸਨ੍ਧਿਂ ਦਸ੍ਸੇਨ੍ਤੋ ਪੁਨ ਅਤ੍ਤਦੀਪਾ, ਭਿਕ੍ਖਵੇ, ਵਿਹਰਥਾਤਿਆਦਿਮਾਹ.

ਭਿਕ੍ਖੁਨੋ ਆਯੁਵਣ੍ਣਾਦਿਵਡ੍ਢਨਕਥਾਵਣ੍ਣਨਾ

੧੧੦. ਇਦਂ ਖੋ, ਭਿਕ੍ਖਵੇ, ਭਿਕ੍ਖੁਨੋ ਆਯੁਸ੍ਮਿਨ੍ਤਿ ਭਿਕ੍ਖਵੇ ਯਂ ਵੋ ਅਹਂ ਆਯੁਨਾਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਤਤ੍ਥ ਇਦਂ ਭਿਕ੍ਖੁਨੋ ਆਯੁਸ੍ਮਿਂ ਇਦਂ ਆਯੁਕਾਰਣਨ੍ਤਿ ਅਤ੍ਥੋ. ਤਸ੍ਮਾ ਤੁਮ੍ਹੇਹਿ ਆਯੁਨਾ ਵਡ੍ਢਿਤੁਕਾਮੇਹਿ ਇਮੇ ਚਤ੍ਤਾਰੋ ਇਦ੍ਧਿਪਾਦਾ ਭਾਵੇਤਬ੍ਬਾਤਿ ਦਸ੍ਸੇਤਿ.

ਵਣ੍ਣਸ੍ਮਿਨ੍ਤਿ ਯਂ ਵੋ ਅਹਂ ਵਣ੍ਣੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਤਤ੍ਥ ਵਣ੍ਣਕਾਰਣਂ. ਸੀਲਵਤੋ ਹਿ ਅਵਿਪ੍ਪਟਿਸਾਰਾਦੀਨਂ ਵਸੇਨ ਸਰੀਰਵਣ੍ਣੋਪਿ ਕਿਤ੍ਤਿਵਸੇਨ ਗੁਣਵਣ੍ਣੋਪਿ ਵਡ੍ਢਤਿ. ਤਸ੍ਮਾ ਤੁਮ੍ਹੇਹਿ ਵਣ੍ਣੇਨ ਵਡ੍ਢਿਤੁਕਾਮੇਹਿ ਸੀਲਸਮ੍ਪਨ੍ਨੇਹਿ ਭਵਿਤਬ੍ਬਨ੍ਤਿ ਦਸ੍ਸੇਤਿ.

ਸੁਖਸ੍ਮਿਨ੍ਤਿ ਯਂ ਵੋ ਅਹਂ ਸੁਖੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਤਤ੍ਥ ਵਿਵੇਕਜਂ ਪੀਤਿਸੁਖਾਦਿਨਾਨਪ੍ਪਕਾਰਕਂ ਝਾਨਸੁਖਂ. ਤਸ੍ਮਾ ਤੁਮ੍ਹੇਹਿ ਸੁਖੇਨ ਵਡ੍ਢਿਤੁਕਾਮੇਹਿ ਇਮਾਨਿ ਚਤ੍ਤਾਰਿ ਝਾਨਾਨਿ ਭਾਵੇਤਬ੍ਬਾਨਿ.

ਭੋਗਸ੍ਮਿਨ੍ਤਿ ਯਂ ਵੋ ਅਹਂ ਭੋਗੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਅਯਂ ਸੋ ਅਪ੍ਪਮਾਣਾਨਂ ਸਤ੍ਤਾਨਂ ਅਪ੍ਪਟਿਕੂਲਤਾਵਹੋ ਸੁਖਸਯਨਾਦਿ ਏਕਾਦਸਾਨਿਸਂਸੋ ਸਬ੍ਬਦਿਸਾਵਿਪ੍ਫਾਰਿਤਬ੍ਰਹ੍ਮਵਿਹਾਰਭੋਗੋ. ਤਸ੍ਮਾ ਤੁਮ੍ਹੇਹਿ ਭੋਗੇਨ ਵਡ੍ਢਿਤੁਕਾਮੇਹਿ ਇਮੇ ਬ੍ਰਹ੍ਮਵਿਹਾਰਾ ਭਾਵੇਤਬ੍ਬਾ.

ਬਲਸ੍ਮਿਨ੍ਤਿ ਯਂ ਵੋ ਅਹਂ ਬਲੇਨਪਿ ਵਡ੍ਢਿਸ੍ਸਥਾਤਿ ਅਵੋਚਂ, ਇਦਂ ਆਸਵਕ੍ਖਯਪਰਿਯੋਸਾਨੇ ਉਪ੍ਪਨ੍ਨਂ ਅਰਹਤ੍ਤਫਲਸਙ੍ਖਾਤਂ ਬਲਂ. ਤਸ੍ਮਾ ਤੁਮ੍ਹੇਹਿ ਬਲੇਨ ਵਡ੍ਢਿਤੁਕਾਮੇਹਿ ਅਰਹਤ੍ਤਪ੍ਪਤ੍ਤਿਯਾ ਯੋਗੋ ਕਰਣੀਯੋ.

ਯਥਯਿਦਂ, ਭਿਕ੍ਖਵੇ, ਮਾਰਬਲਨ੍ਤਿ ਯਥਾ ਇਦਂ ਦੇਵਪੁਤ੍ਤਮਾਰਮਚ੍ਚੁਮਾਰਕਿਲੇਸਮਾਰਾਨਂ ਬਲਂ ਦੁਪ੍ਪਸਹਂ ਦੁਰਭਿਸਮ੍ਭਵਂ, ਏਵਂ ਅਞ੍ਞਂ ਲੋਕੇ ਏਕਬਲਮ੍ਪਿ ਨ ਸਮਨੁਪਸ੍ਸਾਮਿ. ਤਮ੍ਪਿ ਬਲਂ ਇਦਮੇਵ ਅਰਹਤ੍ਤਫਲਂ ਪਸਹਤਿ ਅਭਿਭਵਤਿ ਅਜ੍ਝੋਤ੍ਥਰਤਿ. ਤਸ੍ਮਾ ਏਤ੍ਥੇਵ ਯੋਗੋ ਕਰਣੀਯੋਤਿ ਦਸ੍ਸੇਤਿ.

ਏਵਮਿਦਂ ਪੁਞ੍ਞਨ੍ਤਿ ਏਵਂ ਇਦਂ ਲੋਕੁਤ੍ਤਰਪੁਞ੍ਞਮ੍ਪਿ ਯਾਵ ਆਸਵਕ੍ਖਯਾ ਪਵਡ੍ਢਤੀਤਿ ਵਿਵਟ੍ਟਗਾਮਿਕੁਸਲਾਨੁਸਨ੍ਧਿਂ ਨਿਟ੍ਠਪੇਨ੍ਤੋ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ. ਸੁਤ੍ਤਪਰਿਯੋਸਾਨੇ ਵੀਸਤਿ ਭਿਕ੍ਖੁਸਹਸ੍ਸਾਨਿ ਅਰਹਤ੍ਤਂ ਪਾਪੁਣਿਂਸੁ. ਚਤੁਰਾਸੀਤਿ ਪਾਣਸਹਸ੍ਸਾਨਿ ਅਮਤਪਾਨਂ ਪਿਵਿਂਸੂਤਿ.

ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯ

ਚਕ੍ਕਵਤ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.