ਪਾਤਿਮੋਕ੍ਖਸਂਵਰਵਣ੍ਣਨਾ

੩੬੪. ਤਤੋ ਤਂ ਪੁਚ੍ਛਨ੍ਤੋ ਕਥਂ ਪਟਿਪਨ੍ਨੋ ਪਨ, ਮਾਰਿਸਾਤਿਆਦਿਮਾਹ. ਤਤ੍ਥ ਪਾਤਿਮੋਕ੍ਖਸਂਵਰਾਯਾਤਿ ਉਤ੍ਤਮਜੇਟ੍ਠਕਸੀਲਸਂਵਰਾਯ. ਕਾਯਸਮਾਚਾਰਮ੍ਪੀਤਿਆਦਿ ਸੇਵਿਤਬ੍ਬਕਾਯਸਮਾਚਾਰਾਦਿਵਸੇਨ ਪਾਤਿਮੋਕ੍ਖਸਂਵਰਦਸ੍ਸਨਤ੍ਥਂ ਵੁਤ੍ਤਂ. ਸੀਲਕਥਾ ਚ ਨਾਮੇਸਾ ਕਮ੍ਮਪਥਵਸੇਨ ਵਾ ਪਣ੍ਣਤ੍ਤਿਵਸੇਨ ਵਾ ਕਥੇਤਬ੍ਬਾ ਹੋਤਿ.

ਤਤ੍ਥ ਕਮ੍ਮਪਥਵਸੇਨ ਕਥੇਨ੍ਤੇਨ ਅਸੇਵਿਤਬ੍ਬਕਾਯਸਮਾਚਾਰੋ ਤਾਵ ਪਾਣਾਤਿਪਾਤਅਦਿਨ੍ਨਾਦਾਨਮਿਚ੍ਛਾਚਾਰੇਹਿ ਕਥੇਤਬ੍ਬੋ. ਪਣ੍ਣਤ੍ਤਿਵਸੇਨ ਕਥੇਨ੍ਤੇਨ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮਵਸੇਨ ਕਥੇਤਬ੍ਬੋ. ਸੇਵਿਤਬ੍ਬਕਾਯਸਮਾਚਾਰੋ ਪਾਣਾਤਿਪਾਤਾਦਿਵੇਰਮਣੀਹਿ ਚੇਵ ਕਾਯਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਅਵੀਤਿਕ੍ਕਮੇਨ ਚ ਕਥੇਤਬ੍ਬੋ. ਅਸੇਵਿਤਬ੍ਬਵਚੀਸਮਾਚਾਰੋ ਮੁਸਾਵਾਦਾਦਿਵਚੀਦੁਚ੍ਚਰਿਤੇਨ ਚੇਵ ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਵੀਤਿਕ੍ਕਮੇਨ ਚ ਕਥੇਤਬ੍ਬੋ. ਸੇਵਿਤਬ੍ਬਵਚੀਸਮਾਚਾਰੋ ਮੁਸਾਵਾਦਾਦਿਵੇਰਮਣੀਹਿ ਚੇਵ ਵਚੀਦ੍ਵਾਰੇ ਪਞ੍ਞਤ੍ਤਸਿਕ੍ਖਾਪਦਅਵੀਤਿਕ੍ਕਮੇਨ ਚ ਕਥੇਤਬ੍ਬੋ.

ਪਰਿਯੇਸਨਾ ਪਨ ਕਾਯਵਾਚਾਹਿ ਪਰਿਯੇਸਨਾਯੇਵ. ਸਾ ਕਾਯਵਚੀਸਮਾਚਾਰਗਹਣੇਨ ਗਹਿਤਾਪਿ ਸਮਾਨਾ ਯਸ੍ਮਾ ਆਜੀਵਟ੍ਠਮਕਸੀਲਂ ਨਾਮ ਏਤਸ੍ਮਿਞ੍ਞੇਵ ਦ੍ਵਾਰਦ੍ਵਯੇ ਉਪ੍ਪਜ੍ਜਤਿ, ਨ ਆਕਾਸੇ, ਤਸ੍ਮਾ ਆਜੀਵਟ੍ਠਮਕਸੀਲਦਸ੍ਸਨਤ੍ਥਂ ਵਿਸੁਂ ਵੁਤ੍ਤਾ. ਤਤ੍ਥ ਨਸੇਵਿਤਬ੍ਬਪਰਿਯੇਸਨਾ ਅਨਰਿਯਪਰਿਯੇਸਨਾਯ ਕਥੇਤਬ੍ਬਾ. ਸੇਵਿਤਬ੍ਬਪਰਿਯੇਸਨਾ ਅਰਿਯਪਰਿਯੇਸਨਾਯ. ਵੁਤ੍ਤਞ੍ਹੇਤਂ –

‘‘ਦ੍ਵੇਮਾ, ਭਿਕ੍ਖਵੇ, ਪਰਿਯੇਸਨਾ ਅਨਰਿਯਾ ਚ ਪਰਿਯੇਸਨਾ, ਅਰਿਯਾ ਚ ਪਰਿਯੇਸਨਾ. ਕਤਮਾ ਚ, ਭਿਕ੍ਖਵੇ, ਅਨਰਿਯਾ ਪਰਿਯੇਸਨਾ? ਇਧ, ਭਿਕ੍ਖਵੇ, ਏਕਚ੍ਚੋ ਅਤ੍ਤਨਾ ਜਾਤਿਧਮ੍ਮੋ ਸਮਾਨੋ ਜਾਤਿਧਮ੍ਮਂਯੇਵ ਪਰਿਯੇਸਤਿ, ਅਤ੍ਤਨਾ ਜਰਾਧਮ੍ਮੋ, ਬ੍ਯਾਧਿਧਮ੍ਮੋ, ਮਰਣਧਮ੍ਮੋ, ਸੋਕਧਮ੍ਮੋ, ਸਂਕਿਲੇਸਧਮ੍ਮੋ ਸਮਾਨੋ ਸਂਕਿਲੇਸਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਜਾਤਿਧਮ੍ਮਂ ਵਦੇਥ? ਪੁਤ੍ਤਭਰਿਯਂ, ਭਿਕ੍ਖਵੇ, ਜਾਤਿਧਮ੍ਮਂ, ਦਾਸਿਦਾਸਂ ਜਾਤਿਧਮ੍ਮਂ ਅਜੇਲ਼ਕਂ ਜਾਤਿਧਮ੍ਮਂ, ਕੁਕ੍ਕੁਟਸੂਕਰਂ ਜਾਤਿਧਮ੍ਮਂ, ਹਤ੍ਥਿਗਵਾਸ੍ਸਵਲ਼ਵਂ ਜਾਤਿਧਮ੍ਮਂ, ਜਾਤਰੂਪਰਜਤਂ ਜਾਤਿਧਮ੍ਮਂ. ਜਾਤਿਧਮ੍ਮਾ ਹੇਤੇ, ਭਿਕ੍ਖਵੇ, ਉਪਧਯੋ, ਏਤ੍ਥਾਯਂ ਗਥਿਤੋ ਮੁਚ੍ਛਿਤੋ ਅਜ੍ਝਾਪਨ੍ਨੋ ਅਤ੍ਤਨਾ ਜਾਤਿਧਮ੍ਮੋ ਸਮਾਨੋ ਜਾਤਿਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਜਰਾਧਮ੍ਮਂ ਵਦੇਥ? ਪੁਤ੍ਤਭਰਿਯਂ, ਭਿਕ੍ਖਵੇ, ਜਰਾਧਮ੍ਮਂ…ਪੇ… ਜਰਾਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਬ੍ਯਾਧਿਧਮ੍ਮਂ ਵਦੇਥ? ਪੁਤ੍ਤਭਰਿਯਂ, ਭਿਕ੍ਖਵੇ, ਬ੍ਯਾਧਿਧਮ੍ਮਂ, ਦਾਸਿਦਾਸਂ ਬ੍ਯਾਧਿਧਮ੍ਮਂ, ਅਜੇਲ਼ਕਂ, ਕੁਕ੍ਕੁਟਸੂਕਰਂ, ਹਤ੍ਥਿਗਵਾਸ੍ਸਵਲ਼ਵਂ ਬ੍ਯਾਧਿਧਮ੍ਮਂ. ਬ੍ਯਾਧਿਧਮ੍ਮਾ ਹੇਤੇ, ਭਿਕ੍ਖਵੇ, ਉਪਧਯੋ, ਏਤ੍ਥਾਯਂ ਗਥਿਤੋ ਮੁਚ੍ਛਿਤੋ ਅਜ੍ਝਾਪਨ੍ਨੋ ਅਤ੍ਤਨਾ ਬ੍ਯਾਧਿਧਮ੍ਮੋ ਸਮਾਨੋ ਬ੍ਯਾਧਿਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਮਰਣਧਮ੍ਮਂ ਵਦੇਥ? ਪੁਤ੍ਤਭਰਿਯਂ, ਭਿਕ੍ਖਵੇ, ਮਰਣਧਮ੍ਮਂ…ਪੇ… ਮਰਣਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਸੋਕਧਮ੍ਮਂ ਵਦੇਥ? ਪੁਤ੍ਤਭਰਿਯਂ…ਪੇ… ਸੋਕਧਮ੍ਮਂਯੇਵ ਪਰਿਯੇਸਤਿ.

ਕਿਞ੍ਚ, ਭਿਕ੍ਖਵੇ, ਸਂਕਿਲੇਸਧਮ੍ਮਂ ਵਦੇਥ…ਪੇ… ਜਾਤਰੂਪਰਜਤਂ ਸਂਕਿਲੇਸਧਮ੍ਮਂ. ਸਂਕਿਲੇਸਧਮ੍ਮਾ, ਹੇਤੇ, ਭਿਕ੍ਖਵੇ, ਉਪਧਯੋ, ਏਤ੍ਥਾਯਂ ਗਥਿਤੋ ਮੁਚ੍ਛਿਤੋ ਅਜ੍ਝਾਪਨ੍ਨੋ ਅਤ੍ਤਨਾ ਸਂਕਿਲੇਸਧਮ੍ਮੋ ਸਮਾਨੋ ਸਂਕਿਲੇਸਧਮ੍ਮਂਯੇਵ ਪਰਿਯੇਸਤਿ. ਅਯਂ, ਭਿਕ੍ਖਵੇ, ਅਨਰਿਯਾ ਪਰਿਯੇਸਨਾਤਿ (ਮ. ਨਿ. ੧.੨੭੪).

ਅਪਿਚ ਕੁਹਨਾਦਿਵਸੇਨ ਪਞ੍ਚਵਿਧਾ, ਅਗੋਚਰਵਸੇਨ ਛਬ੍ਬਿਧਾ ਵੇਜ੍ਜਕਮ੍ਮਾਦਿਵਸੇਨ ਏਕਵੀਸਤਿਵਿਧਾ, ਏਵਂ ਪਵਤ੍ਤਾ ਸਬ੍ਬਾਪਿ ਅਨੇਸਨਾ ਅਨਰਿਯਪਰਿਯੇਸਨਾਯੇਵਾਤਿ ਵੇਦਿਤਬ੍ਬਾ.

‘‘ਕਤਮਾ ਚ, ਭਿਕ੍ਖਵੇ, ਅਰਿਯਾ ਪਰਿਯੇਸਨਾ? ਇਧ, ਭਿਕ੍ਖਵੇ, ਏਕਚ੍ਚੋ ਅਤ੍ਤਨਾ ਜਾਤਿਧਮ੍ਮੋ ਸਮਾਨੋ ਜਾਤਿਧਮ੍ਮੇ ਆਦੀਨਵਂ ਵਿਦਿਤ੍ਵਾ ਅਜਾਤਂ ਅਨੁਤ੍ਤਰਂ ਯੋਗਕ੍ਖੇਮਂ ਨਿਬ੍ਬਾਨਂ ਪਰਿਯੇਸਤਿ, ਅਤ੍ਤਨਾ ਜਰਾਧਮ੍ਮੋ, ਬ੍ਯਾਧਿ, ਮਰਣ, ਸੋਕ, ਸਂਕਿਲੇਸਧਮ੍ਮੋ ਸਮਾਨੋ ਸਂਕਿਲੇਸਧਮ੍ਮੇ ਆਦੀਨਵਂ ਵਿਦਿਤ੍ਵਾ ਅਸਂਕਿਲਿਟ੍ਠਂ ਅਨੁਤ੍ਤਰਂ ਯੋਗਕ੍ਖੇਮਂ ਨਿਬ੍ਬਾਨਂ ਪਰਿਯੇਸਤਿ. ਅਯਂ ਅਰਿਯਾ ਪਰਿਯੇਸਨਾਤਿ (ਮ. ਨਿ. ੧.੨੭੫).

ਅਪਿਚ ਪਞ੍ਚ ਕੁਹਨਾਦੀਨਿ ਛ ਅਗੋਚਰੇ ਏਕਵੀਸਤਿਵਿਧਞ੍ਚ ਅਨੇਸਨਂ ਵਜ੍ਜੇਤ੍ਵਾ ਭਿਕ੍ਖਾਚਰਿਯਾਯ ਧਮ੍ਮੇਨ ਸਮੇਨ ਪਰਿਯੇਸਨਾਪਿ ਅਰਿਯਪਰਿਯੇਸਨਾਯੇਵਾਤਿ ਵੇਦਿਤਬ੍ਬਾ.

ਏਤ੍ਥ ਚ ਯੋ ਯੋ ‘‘ਨ ਸੇਵਿਤਬ੍ਬੋ’’ਤਿ ਵੁਤ੍ਤੋ, ਸੋ ਸੋ ਪੁਬ੍ਬਭਾਗੇ ਪਾਣਾਤਿਪਾਤਾਦੀਨਂ ਸਮ੍ਭਾਰਪਰਿਯੇਸਨਾਪਯੋਗਕਰਣਗਮਨਕਾਲਤੋ ਪਟ੍ਠਾਯ ਨ ਸੇਵਿਤਬ੍ਬੋਵ. ਇਤਰੋ ਆਦਿਤੋ ਪਟ੍ਠਾਯ ਸੇਵਿਤਬ੍ਬੋ, ਅਸਕ੍ਕੋਨ੍ਤੇਨ ਚਿਤ੍ਤਮ੍ਪਿ ਉਪ੍ਪਾਦੇਤਬ੍ਬਂ. ਅਪਿਚ ਸਙ੍ਘਭੇਦਾਦੀਨਂ ਅਤ੍ਥਾਯ ਪਰਕ੍ਕਮਨ੍ਤਾਨਂ ਦੇਵਦਤ੍ਤਾਦੀਨਂ ਵਿਯ ਕਾਯਸਮਾਚਾਰੋ ਨ ਸੇਵਿਤਬ੍ਬੋ, ਦਿਵਸਸ੍ਸ ਦ੍ਵਤ੍ਤਿਕ੍ਖਤ੍ਤੁਂ ਤਿਣ੍ਣਂ ਰਤਨਾਨਂ ਉਪਟ੍ਠਾਨਗਮਨਾਦਿਵਸੇਨ ਪਵਤ੍ਤੋ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰਾਦੀਨਂ ਵਿਯ ਕਾਯਸਮਾਚਾਰੋ ਸੇਵਿਤਬ੍ਬੋ. ਧਨੁਗ੍ਗਹਪੇਸਨਾਦਿਵਸੇਨ ਵਾਚਂ ਭਿਨ੍ਦਨ੍ਤਾਨਂ ਦੇਵਦਤ੍ਤਾਦੀਨਂ ਵਿਯ ਵਚੀਸਮਾਚਾਰੋ ਨ ਸੇਵਿਤਬ੍ਬੋ, ਤਿਣ੍ਣਂ ਰਤਨਾਨਂ ਗੁਣਕਿਤ੍ਤਨਾਦਿਵਸੇਨ ਪਵਤ੍ਤੋ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰਾਦੀਨਂ ਵਿਯ ਵਚੀਸਮਾਚਾਰੋ ਸੇਵਿਤਬ੍ਬੋ. ਅਨਰਿਯਪਰਿਯੇਸਨਂ ਪਰਿਯੇਸਨ੍ਤਾਨਂ ਦੇਵਦਤ੍ਤਾਦੀਨਂ ਵਿਯ ਪਰਿਯੇਸਨਾ ਨ ਸੇਵਿਤਬ੍ਬਾ, ਅਰਿਯਪਰਿਯੇਸਨਮੇਵ ਪਰਿਯੇਸਨ੍ਤਾਨਂ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰਾਦੀਨਂ ਵਿਯ ਪਰਿਯੇਸਨਾ ਸੇਵਿਤਬ੍ਬਾ.

ਏਵਂ ਪਟਿਪਨ੍ਨੋ ਖੋਤਿ ਏਵਂ ਅਸੇਵਿਤਬ੍ਬਂ ਕਾਯਵਚੀਸਮਾਚਾਰਂ ਪਰਿਯੇਸਨਞ੍ਚ ਪਹਾਯ ਸੇਵਿਤਬ੍ਬਾਨਂ ਪਾਰਿਪੂਰਿਯਾ ਪਟਿਪਨ੍ਨੋ, ਦੇਵਾਨਮਿਨ੍ਦ, ਭਿਕ੍ਖੁ ਪਾਤਿਮੋਕ੍ਖਸਂਵਰਾਯ ਉਤ੍ਤਮਜੇਟ੍ਠਕਸੀਲਸਂਵਰਤ੍ਥਾਯ ਪਟਿਪਨ੍ਨੋ ਨਾਮ ਹੋਤੀਤਿ ਭਗਵਾ ਖੀਣਾਸਵਸ੍ਸ ਆਗਮਨੀਯਪੁਬ੍ਬਭਾਗਪਟਿਪਦਂ ਕਥੇਸਿ.