ਇਨ੍ਦ੍ਰਿਯਸਂਵਰਵਣ੍ਣਨਾ

੩੬੫. ਦੁਤਿਯਪੁਚ੍ਛਾਯਂ ਇਨ੍ਦ੍ਰਿਯਸਂਵਰਾਯਾਤਿ ਇਨ੍ਦ੍ਰਿਯਾਨਂ ਪਿਧਾਨਾਯ, ਗੁਤ੍ਤਦ੍ਵਾਰਤਾਯ ਸਂਵੁਤਦ੍ਵਾਰਤਾਯਾਤਿ ਅਤ੍ਥੋ. ਵਿਸ੍ਸਜ੍ਜਨੇ ਪਨਸ੍ਸ ਚਕ੍ਖੁਵਿਞ੍ਞੇਯ੍ਯਂ ਰੂਪਮ੍ਪੀਤਿਆਦਿ ਸੇਵਿਤਬ੍ਬਰੂਪਾਦਿਵਸੇਨ ਇਨ੍ਦ੍ਰਿਯਸਂਵਰਦਸ੍ਸਨਤ੍ਥਂ ਵੁਤ੍ਤਂ. ਤਤ੍ਥ ਏਵਂ ਵੁਤ੍ਤੇਤਿ ਹੇਟ੍ਠਾ ਸੋਮਨਸ੍ਸਾਦਿਪਞ੍ਹਾਵਿਸ੍ਸਜ੍ਜਨਾਨਂ ਸੁਤਤ੍ਤਾ ਇਮਿਨਾਪਿ ਏਵਰੂਪੇਨ ਭਵਿਤਬ੍ਬਨ੍ਤਿ ਸਞ੍ਜਾਤਪਟਿਭਾਨੋ ਭਗਵਤਾ ਏਵਂ ਵੁਤ੍ਤੇ ਸਕ੍ਕੋ ਦੇਵਾਨਮਿਨ੍ਦੋ ਭਗਵਨ੍ਤਂ ਏਤਦਵੋਚ, ਏਤਂ ਇਮਸ੍ਸ ਖੋ ਅਹਂ, ਭਨ੍ਤੇਤਿ ਆਦਿਕਂ ਵਚਨਂ ਅਵੋਚ. ਭਗਵਾਪਿਸ੍ਸ ਓਕਾਸਂ ਦਤ੍ਵਾ ਤੁਣ੍ਹੀ ਅਹੋਸਿ. ਕਥੇਤੁਕਾਮੋਪਿ ਹਿ ਯੋ ਅਤ੍ਥਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਤ੍ਥਂ ਸਮ੍ਪਾਦੇਤੁਂ ਸਕ੍ਕੋਨ੍ਤੋ ਵਾ ਨ ਕਥੇਤੁਕਾਮੋ ਹੋਤਿ, ਨ ਤਸ੍ਸ ਭਗਵਾ ਓਕਾਸਂ ਕਰੋਤਿ. ਅਯਂ ਪਨ ਯਸ੍ਮਾ ਕਥੇਤੁਕਾਮੋ ਚੇਵ, ਸਕ੍ਕੋਤਿ ਚ ਅਤ੍ਥਂ ਸਮ੍ਪਾਦੇਤੁਂ ਤੇਨਸ੍ਸ ਭਗਵਾ ਓਕਾਸਮਕਾਸਿ.

ਤਤ੍ਥ ਏਵਰੂਪਂ ਨ ਸੇਵਿਤਬ੍ਬਨ੍ਤਿ ਆਦੀਸੁ ਅਯਂ ਸਙ੍ਖੇਪੋ – ਯਂ ਰੂਪਂ ਪਸ੍ਸਤੋ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਤਂ ਨ ਸੇਵਿਤਬ੍ਬਂ ਨ ਦਟ੍ਠਬ੍ਬਂ ਨ ਓਲੋਕੇਤਬ੍ਬਨ੍ਤਿ ਅਤ੍ਥੋ. ਯਂ ਪਨ ਪਸ੍ਸਤੋ ਅਸੁਭਸਞ੍ਞਾ ਵਾ ਸਣ੍ਠਾਤਿ, ਪਸਾਦੋ ਵਾ ਉਪ੍ਪਜ੍ਜਤਿ, ਅਨਿਚ੍ਚਸਞ੍ਞਾਪਟਿਲਾਭੋ ਵਾ ਹੋਤਿ, ਤਂ ਸੇਵਿਤਬ੍ਬਂ.

ਯਂ ਚਿਤ੍ਤਕ੍ਖਰਂ ਚਿਤ੍ਤਬ੍ਯਞ੍ਜਨਮ੍ਪਿ ਸਦ੍ਦਂ ਸੁਣਤੋ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਏਵਰੂਪੋ ਸਦ੍ਦੋ ਨ ਸੇਵਿਤਬ੍ਬੋ. ਯਂ ਪਨ ਅਤ੍ਥਨਿਸ੍ਸਿਤਂ ਧਮ੍ਮਨਿਸ੍ਸਿਤਂ ਕੁਮ੍ਭਦਾਸਿਗੀਤਮ੍ਪਿ ਸੁਣਨ੍ਤਸ੍ਸ ਪਸਾਦੋ ਵਾ ਉਪ੍ਪਜ੍ਜਤਿ, ਨਿਬ੍ਬਿਦਾ ਵਾ ਸਣ੍ਠਾਤਿ, ਏਵਰੂਪੋ ਸਦ੍ਦੋ ਸੇਵਿਤਬ੍ਬੋ.

ਯਂ ਗਨ੍ਧਂ ਘਾਯਤੋ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਏਵਰੂਪੋ ਗਨ੍ਧੋ ਨ ਸੇਵਿਤਬ੍ਬੋ. ਯਂ ਪਨ ਗਨ੍ਧਂ ਘਾਯਤੋ ਅਸੁਭਸਞ੍ਞਾਦਿਪਟਿਲਾਭੋ ਹੋਤਿ, ਏਵਰੂਪੋ ਗਨ੍ਧੋ ਸੇਵਿਤਬ੍ਬੋ.

ਯਂ ਰਸਂ ਸਾਯਤੋ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਏਵਰੂਪੋ ਰਸੋ ਨ ਸੇਵਿਤਬ੍ਬੋ. ਯਂ ਪਨ ਰਸਂ ਸਾਯਤੋ ਆਹਾਰੇ ਪਟਿਕੂਲਸਞ੍ਞਾ ਚੇਵ ਉਪ੍ਪਜ੍ਜਤਿ, ਸਾਯਿਤਪਚ੍ਚਯਾ ਚ ਕਾਯਬਲਂ ਨਿਸ੍ਸਾਯ ਅਰਿਯਭੂਮਿਂ ਓਕ੍ਕਮਿਤੁਂ ਸਕ੍ਕੋਤਿ, ਮਹਾਸੀਵਤ੍ਥੇਰਭਾਗਿਨੇਯ੍ਯਸੀਵਸਾਮਣੇਰਸ੍ਸ ਵਿਯ ਪਰਿਭੁਞ੍ਜਨ੍ਤਸ੍ਸੇਵ ਕਿਲੇਸਕ੍ਖਯੋ ਵਾ ਹੋਤਿ, ਏਵਰੂਪੋ ਰਸੋ ਸੇਵਿਤਬ੍ਬੋ.

ਯਂ ਫੋਟ੍ਠਬ੍ਬਂ ਫੁਸਤੋ ਰਾਗਾਦਯੋ ਉਪ੍ਪਜ੍ਜਨ੍ਤਿ, ਏਵਰੂਪਂ ਫੋਟ੍ਠਬ੍ਬਂ ਨ ਸੇਵਿਤਬ੍ਬਂ. ਯਂ ਪਨ ਫੁਸਤੋ ਸਾਰਿਪੁਤ੍ਤਤ੍ਥੇਰਾਦੀਨਂ ਵਿਯ ਆਸਵਕ੍ਖਯੋ ਚੇਵ, ਵੀਰਿਯਞ੍ਚ ਸੁਪਗ੍ਗਹਿਤਂ, ਪਚ੍ਛਿਮਾ ਚ ਜਨਤਾ ਦਿਟ੍ਠਾਨੁਗਤਿਂ ਆਪਾਦਨੇਨ ਅਨੁਗ੍ਗਹਿਤਾ ਹੋਤਿ, ਏਵਰੂਪਂ ਫੋਟ੍ਠਬ੍ਬਂ ਸੇਵਿਤਬ੍ਬਂ. ਸਾਰਿਪੁਤ੍ਤਤ੍ਥੇਰੋ ਕਿਰ ਤਿਂਸ ਵਸ੍ਸਾਨਿ ਮਞ੍ਚੇ ਪਿਟ੍ਠਿਂ ਨ ਪਸਾਰੇਸਿ. ਤਥਾ ਮਹਾਮੋਗ੍ਗਲ੍ਲਾਨਤ੍ਥੇਰੋ. ਮਹਾਕਸ੍ਸਪਤ੍ਥੇਰੋ ਵੀਸਵਸ੍ਸਸਤਂ ਮਞ੍ਚੇ ਪਿਟ੍ਠਿਂ ਨ ਪਸਾਰੇਸਿ. ਅਨੁਰੁਦ੍ਧਤ੍ਥੇਰੋ ਪਞ੍ਞਾਸ ਵਸ੍ਸਾਨਿ. ਭਦ੍ਦਿਯਤ੍ਥੇਰੋ ਤਿਂਸ ਵਸ੍ਸਾਨਿ. ਸੋਣਤ੍ਥੇਰੋ ਅਟ੍ਠਾਰਸ ਵਸ੍ਸਾਨਿ. ਰਟ੍ਠਪਾਲਤ੍ਥੇਰੋ ਦ੍ਵਾਦਸ. ਆਨਨ੍ਦਤ੍ਥੇਰੋ ਪਨ੍ਨਰਸ. ਰਾਹੁਲਤ੍ਥੇਰੋ ਦ੍ਵਾਦਸ. ਬਾਕੁਲਤ੍ਥੇਰੋ ਅਸੀਤਿ ਵਸ੍ਸਾਨਿ. ਨਾਲ਼ਕਤ੍ਥੇਰੋ ਯਾਵਪਰਿਨਿਬ੍ਬਾਨਾ ਮਞ੍ਚੇ ਪਿਟ੍ਠਿਂ ਨ ਪਸਾਰੇਸੀਤਿ.

ਯੇ ਮਨੋਵਿਞ੍ਞੇਯ੍ਯੇ ਧਮ੍ਮੇ ਸਮਨ੍ਨਾਹਰਨ੍ਤਸ੍ਸ ਰਾਗਾਦਯੋ ਉਪ੍ਪਜ੍ਜਨ੍ਤਿ, ‘‘ਅਹੋ, ਵਤ ਯਂ ਪਰੇਸਂ ਪਰਵਿਤ੍ਤੂਪਕਰਣਂ ਤਂ ਮਮਸ੍ਸਾ’’ਤਿਆਦਿਨਾ ਨਯੇਨ ਵਾ ਅਭਿਜ੍ਝਾਦੀਨਿ ਆਪਾਥਮਾਗਚ੍ਛਨ੍ਤਿ ਏਵਰੂਪਾ ਧਮ੍ਮਾ ਨ ਸੇਵਿਤਬ੍ਬਾ. ‘‘ਸਬ੍ਬੇ ਸਤ੍ਤਾ ਅਵੇਰਾ ਹੋਨ੍ਤੂ’’ਤਿ ਏਵਂ ਮੇਤ੍ਤਾਦਿਵਸੇਨ, ਯੇ ਵਾ ਪਨ ਤਿਣ੍ਣਂ ਥੇਰਾਨਂ ਧਮ੍ਮਾ, ਏਵਰੂਪਾ ਸੇਵਿਤਬ੍ਬਾ. ਤਯੋ ਕਿਰ ਥੇਰਾ ਵਸ੍ਸੂਪਨਾਯਿਕਦਿਵਸੇ ਕਾਮਵਿਤਕ੍ਕਾਦਯੋ ਅਕੁਸਲਵਿਤਕ੍ਕਾ ਨ ਵਿਤਕ੍ਕੇਤਬ੍ਬਾਤਿ ਕਤਿਕਂ ਅਕਂਸੁ. ਅਥ ਪਵਾਰਣਦਿਵਸੇ ਸਙ੍ਘਤ੍ਥੇਰੋ ਸਙ੍ਘਨਵਕਂ ਪੁਚ੍ਛਿ – ‘‘ਆਵੁਸੋ, ਇਮਸ੍ਮਿਂ ਤੇਮਾਸੇ ਕਿਤ੍ਤਕੇ ਠਾਨੇ ਚਿਤ੍ਤਸ੍ਸ ਧਾਵਿਤੁਂ ਦਿਨ੍ਨ’’ਨ੍ਤਿ? ਨ, ਭਨ੍ਤੇ, ਪਰਿਵੇਣਪਰਿਚ੍ਛੇਦਤੋ ਬਹਿ ਧਾਵਿਤੁਂ ਅਦਾਸਿਨ੍ਤਿ. ਦੁਤਿਯਂ ਪੁਚ੍ਛਿ – ‘‘ਤਵ ਆਵੁਸੋ’’ਤਿ? ਨਿਵਾਸਗੇਹਤੋ, ਭਨ੍ਤੇ, ਬਹਿ ਧਾਵਿਤੁਂ ਨ ਅਦਾਸਿਨ੍ਤਿ. ਅਥ ਦ੍ਵੇਪਿ ਥੇਰਂ ਪੁਚ੍ਛਿਂਸੁ ‘‘ਤੁਮ੍ਹਾਕਂ ਪਨ, ਭਨ੍ਤੇ’’ਤਿ? ਨਿਯਕਜ੍ਝਤ੍ਤਖਨ੍ਧਪਞ੍ਚਕਤੋ, ਆਵੁਸੋ, ਬਹਿ ਧਾਵਿਤੁਂ ਨ ਅਦਾਸਿਨ੍ਤਿ. ਤੁਮ੍ਹੇਹਿ, ਭਨ੍ਤੇ, ਦੁਕ੍ਕਰਂ ਕਤਨ੍ਤਿ. ਏਵਰੂਪੋ ਮਨੋਵਿਞ੍ਞੇਯ੍ਯੋ ਧਮ੍ਮੋ ਸੇਵਿਤਬ੍ਬੋ.

੩੬੬. ਏਕਨ੍ਤਵਾਦਾਤਿ ਏਕੋਯੇਵ ਅਨ੍ਤੋ ਵਾਦਸ੍ਸ ਏਤੇਸਂ, ਨ ਦ੍ਵੇਧਾ ਗਤਵਾਦਾਤਿ ਏਕਨ੍ਤਵਾਦਾ, ਏਕਞ੍ਞੇਵ ਵਦਨ੍ਤੀਤਿ ਪੁਚ੍ਛਤਿ. ਏਕਨ੍ਤਸੀਲਾਤਿ ਏਕਾਚਾਰਾ. ਏਕਨ੍ਤਛਨ੍ਦਾਤਿ ਏਕਲਦ੍ਧਿਕਾ. ਏਕਨ੍ਤਅਜ੍ਝੋਸਾਨਾਤਿ ਏਕਨ੍ਤਪਰਿਯੋਸਾਨਾ.

ਅਨੇਕਧਾਤੁ ਨਾਨਾਧਾਤੁ ਖੋ, ਦੇਵਾਨਮਿਨ੍ਦ, ਲੋਕੋਤਿ ਦੇਵਾਨਮਿਨ੍ਦ, ਅਯਂ ਲੋਕੋ ਅਨੇਕਜ੍ਝਾਸਯੋ ਨਾਨਜ੍ਝਾਸਯੋ. ਏਕਸ੍ਮਿਂ ਗਨ੍ਤੁਕਾਮੇ ਏਕੋ ਠਾਤੁਕਾਮੋ ਹੋਤਿ. ਏਕਸ੍ਮਿਂ ਠਾਤੁਕਾਮੇ ਏਕੋ ਸਯਿਤੁਕਾਮੋ ਹੋਤਿ. ਦ੍ਵੇ ਸਤ੍ਤਾ ਏਕਜ੍ਝਾਸਯਾ ਨਾਮ ਦੁਲ੍ਲਭਾ. ਤਸ੍ਮਿਂ ਅਨੇਕਧਾਤੁਨਾਨਾਧਾਤੁਸ੍ਮਿਂ ਲੋਕੇ ਯਂ ਯਦੇਵ ਧਾਤੁਂ ਯਂ ਯਦੇਵ ਅਜ੍ਝਾਸਯਂ ਸਤ੍ਤਾ ਅਭਿਨਿਵਿਸਨ੍ਤਿ ਗਣ੍ਹਨ੍ਤਿ, ਤਂ ਤਦੇਵ. ਥਾਮਸਾ ਪਰਾਮਾਸਾਤਿ ਥਾਮੇਨ ਚ ਪਰਾਮਾਸੇਨ ਚ. ਅਭਿਨਿਵਿਸ੍ਸ ਵੋਹਰਨ੍ਤੀਤਿ ਸੁਟ੍ਠੁ ਗਣ੍ਹਿਤ੍ਵਾ ਵੋਹਰਨ੍ਤਿ, ਕਥੇਨ੍ਤਿ ਦੀਪੇਨ੍ਤਿ ਕਿਤ੍ਤੇਨ੍ਤਿ. ਇਦਮੇਵ ਸਚ੍ਚਂ ਮੋਘਮਞ੍ਞਨ੍ਤਿ ਇਦਂ ਅਮ੍ਹਾਕਮੇਵ ਵਚਨਂ ਸਚ੍ਚਂ, ਅਞ੍ਞੇਸਂ ਵਚਨਂ ਮੋਘਂ ਤੁਚ੍ਛਂ ਨਿਰਤ੍ਥਕਨ੍ਤਿ.

ਅਚ੍ਚਨ੍ਤਨਿਟ੍ਠਾਤਿ ਅਨ੍ਤੋ ਵੁਚ੍ਚਤਿ ਵਿਨਾਸੋ, ਅਨ੍ਤਂ ਅਤੀਤਾ ਨਿਟ੍ਠਾ ਏਤੇਸਨ੍ਤਿ ਅਚ੍ਚਨ੍ਤਨਿਟ੍ਠਾ. ਯਾ ਏਤੇਸਂ ਨਿਟ੍ਠਾ, ਯੋ ਪਰਮਸ੍ਸਾਸੋ ਨਿਬ੍ਬਾਨਂ, ਤਂ ਸਬ੍ਬੇਸਂ ਵਿਨਾਸਾਤਿਕ੍ਕਨ੍ਤਂ ਨਿਚ੍ਚਨ੍ਤਿ ਵੁਚ੍ਚਤਿ. ਯੋਗਕ੍ਖੇਮੋਤਿ ਨਿਬ੍ਬਾਨਸ੍ਸੇਵ ਨਾਮਂ, ਅਚ੍ਚਨ੍ਤੋ ਯੋਗਕ੍ਖੇਮੋ ਏਤੇਸਨ੍ਤਿ ਅਚ੍ਚਨ੍ਤਯੋਗਕ੍ਖੇਮੀ. ਸੇਟ੍ਠਟ੍ਠੇਨ ਬ੍ਰਹ੍ਮਂ ਅਰਿਯਮਗ੍ਗਂ ਚਰਨ੍ਤੀਤਿ ਬ੍ਰਹ੍ਮਚਾਰੀ. ਅਚ੍ਚਨ੍ਤਤ੍ਥਾਯ ਬ੍ਰਹ੍ਮਚਾਰੀ ਅਚ੍ਚਨ੍ਤਬ੍ਰਹ੍ਮਚਾਰੀ. ਪਰਿਯੋਸਾਨਨ੍ਤਿਪਿ ਨਿਬ੍ਬਾਨਸ੍ਸ ਨਾਮਂ. ਅਚ੍ਚਨ੍ਤਂ ਪਰਿਯੋਸਾਨਂ ਏਤੇਸਨ੍ਤਿ ਅਚ੍ਚਨ੍ਤਪਰਿਯੋਸਾਨਾ.

ਤਣ੍ਹਾਸਙ੍ਖਯਵਿਮੁਤ੍ਤਾਤਿ ਤਣ੍ਹਾਸਙ੍ਖਯੋਤਿ ਮਗ੍ਗੋਪਿ ਨਿਬ੍ਬਾਨਮ੍ਪਿ. ਮਗ੍ਗੋ ਤਣ੍ਹਂ ਸਙ੍ਖਿਣਾਤਿ ਵਿਨਾਸੇਤੀਤਿ ਤਣ੍ਹਾਸਙ੍ਖਯੋ. ਨਿਬ੍ਬਾਨਂ ਯਸ੍ਮਾ ਤਂ ਆਗਮ੍ਮ ਤਣ੍ਹਾ ਸਙ੍ਖਿਯਤਿ ਵਿਨਸ੍ਸਤਿ, ਤਸ੍ਮਾ ਤਣ੍ਹਾਸਙ੍ਖਯੋ. ਤਣ੍ਹਾਸਙ੍ਖਯੇਨ ਮਗ੍ਗੇਨ ਵਿਮੁਤ੍ਤਾ, ਤਣ੍ਹਾਸਙ੍ਖਯੇ ਨਿਬ੍ਬਾਨੇ ਵਿਮੁਤ੍ਤਾ ਅਧਿਮੁਤ੍ਤਾਤਿ ਤਣ੍ਹਾਸਙ੍ਖਯਵਿਮੁਤ੍ਤਾ.

ਏਤ੍ਤਾਵਤਾ ਚ ਭਗਵਤਾ ਚੁਦ੍ਦਸਪਿ ਮਹਾਪਞ੍ਹਾ ਬ੍ਯਾਕਤਾ ਹੋਨ੍ਤਿ. ਚੁਦ੍ਦਸ ਮਹਾਪਞ੍ਹਾ ਨਾਮ ਇਸ੍ਸਾਮਚ੍ਛਰਿਯਂ ਏਕੋ ਪਞ੍ਹੋ, ਪਿਯਾਪ੍ਪਿਯਂ ਏਕੋ, ਛਨ੍ਦੋ ਏਕੋ, ਵਿਤਕ੍ਕੋ ਏਕੋ, ਪਪਞ੍ਚੋ ਏਕੋ, ਸੋਮਨਸ੍ਸਂ ਏਕੋ, ਦੋਮਨਸ੍ਸਂ ਏਕੋ, ਉਪੇਕ੍ਖਾ ਏਕੋ, ਕਾਯਸਮਾਚਾਰੋ ਏਕੋ, ਵਚੀਸਮਾਚਾਰੋ ਏਕੋ, ਪਰਿਯੇਸਨਾ ਏਕੋ, ਇਨ੍ਦ੍ਰਿਯਸਂਵਰੋ ਏਕੋ, ਅਨੇਕਧਾਤੁ ਏਕੋ, ਅਚ੍ਚਨ੍ਤਨਿਟ੍ਠਾ ਏਕੋਤਿ.

੩੬੭. ਏਜਾਤਿ ਚਲਨਟ੍ਠੇਨ ਤਣ੍ਹਾ ਵੁਚ੍ਚਤਿ. ਸਾ ਪੀਲ਼ਨਟ੍ਠੇਨ ਰੋਗੋ, ਅਨ੍ਤੋ ਪਦੁਸ੍ਸਨਟ੍ਠੇਨ ਗਣ੍ਡੋ, ਅਨੁਪ੍ਪਵਿਟ੍ਠਟ੍ਠੇਨ ਸਲ੍ਲਂ. ਤਸ੍ਮਾ ਅਯਂ ਪੁਰਿਸੋਤਿ ਯਸ੍ਮਾ ਏਜਾ ਅਤ੍ਤਨਾ ਕਤਕਮ੍ਮਾਨੁਰੂਪੇਨ ਪੁਰਿਸਂ ਤਤ੍ਥ ਤਤ੍ਥ ਅਭਿਨਿਬ੍ਬਤ੍ਤਤ੍ਥਾਯ ਕਡ੍ਢਤਿ, ਤਸ੍ਮਾ ਅਯਂ ਪੁਰਿਸੋ ਤੇਸਂ ਤੇਸਂ ਭਵਾਨਂ ਵਸੇਨ ਉਚ੍ਚਾਵਚਂ ਆਪਜ੍ਜਤਿ. ਬ੍ਰਹ੍ਮਲੋਕੇ ਉਚ੍ਚੋ ਹੋਤਿ, ਦੇਵਲੋਕੇ ਅਵਚੋ. ਦੇਵਲੋਕੇ ਉਚ੍ਚੋ, ਮਨੁਸ੍ਸਲੋਕੇ ਅਵਚੋ. ਮਨੁਸ੍ਸਲੋਕੇ ਉਚ੍ਚੋ, ਅਪਾਯੇ ਅਵਚੋ. ਯੇਸਾਹਂ, ਭਨ੍ਤੇਤਿ ਯੇਸਂ ਅਹਂ ਭਨ੍ਤੇ. ਸਨ੍ਧਿਵਸੇਨ ਪਨੇਤ੍ਥ ‘‘ਯੇਸਾਹ’’ਨ੍ਤਿ ਹੋਤਿ. ਯਥਾਸੁਤਂ ਯਥਾਪਰਿਯਤ੍ਤਨ੍ਤਿ ਯਥਾ ਮਯਾ ਸੁਤੋ ਚੇਵ ਉਗ੍ਗਹਿਤੋ ਚ, ਏਵਂ. ਧਮ੍ਮਂ ਦੇਸੇਮੀਤਿ ਸਤ੍ਤਵਤਪਦਂ ਧਮ੍ਮਂ ਦੇਸੇਮਿ. ਨ ਚਾਹਂ ਤੇਸਨ੍ਤਿ ਅਹਂ ਪਨ ਤੇਸਂ ਸਾਵਕੋ ਨ ਸਮ੍ਪਜ੍ਜਾਮਿ. ਅਹਂ ਖੋ ਪਨ, ਭਨ੍ਤੇਤਿਆਦਿਨਾ ਅਤ੍ਤਨੋ ਸੋਤਾਪਨ੍ਨਭਾਵਂ ਜਾਨਾਪੇਤਿ.