ਸੋਮਨਸ੍ਸਪਟਿਲਾਭਕਥਾਵਣ੍ਣਨਾ

੩੬੮. ਵੇਦਪਟਿਲਾਭਨ੍ਤਿ ਤੁਟ੍ਠਿਪਟਿਲਾਭਂ. ਦੇਵਾਸੁਰਸਙ੍ਗਾਮੋਤਿ ਦੇਵਾਨਞ੍ਚ ਅਸੁਰਾਨਞ੍ਚ ਸਙ੍ਗਾਮੋ. ਸਮੁਪਬ੍ਯੂਲ਼੍ਹੋਤਿ ਸਮਾਪਨ੍ਨੋ ਨਲਾਟੇਨ ਨਲਾਟਂ ਪਹਰਣਾਕਾਰਪ੍ਪਤ੍ਤੋ ਵਿਯ. ਏਤੇਸਂ ਕਿਰ ਕਦਾਚਿ ਮਹਾਸਮੁਦ੍ਦਪਿਟ੍ਠੇ ਸਙ੍ਗਾਮੋ ਹੋਤਿ ਤਤ੍ਥ ਪਨ ਛੇਦਨਵਿਜ੍ਝਨਾਦੀਹਿ ਅਞ੍ਞਮਞ੍ਞਂ ਘਾਤੋ ਨਾਮ ਨਤ੍ਥਿ, ਦਾਰੁਮੇਣ੍ਡਕਯੁਦ੍ਧਂ ਵਿਯ ਜਯਪਰਾਜਯਮਤ੍ਤਮੇਵ ਹੋਤਿ. ਕਦਾਚਿ ਦੇਵਾ ਜਿਨਨ੍ਤਿ, ਕਦਾਚਿ ਅਸੁਰਾ. ਤਤ੍ਥ ਯਸ੍ਮਿਂ ਸਙ੍ਗਾਮੇ ਦੇਵਾ ਪੁਨ ਅਪਚ੍ਚਾਗਮਨਾਯ ਅਸੁਰੇ ਜਿਨਿਂਸੁ, ਤਂ ਸਨ੍ਧਾਯ ਤਸ੍ਮਿਂ ਖੋ ਪਨ ਭਨ੍ਤੇਤਿਆਦਿਮਾਹ. ਉਭਯਮੇਤਨ੍ਤਿ ਉਭਯਂ ਏਤਂ. ਦੁਵਿਧਮ੍ਪਿ ਓਜਂ ਏਤ੍ਥ ਦੇਵਲੋਕੇ ਦੇਵਾਯੇਵ ਪਰਿਭੁਞ੍ਜਿਸ੍ਸਨ੍ਤੀਤਿ ਏਵਮਸ੍ਸ ਆਵਜ੍ਜਨ੍ਤਸ੍ਸ ਬਲਵਪੀਤਿਸੋਮਨਸ੍ਸਂ ਉਪ੍ਪਜ੍ਜਿ. ਸਦਣ੍ਡਾਵਚਰੋਤਿ ਸਦਣ੍ਡਾਵਚਰਕੋ, ਦਣ੍ਡਗ੍ਗਹਣੇਨ ਸਤ੍ਥਗ੍ਗਹਣੇਨ ਸਦ੍ਧਿਂ ਅਹੋਸਿ, ਨ ਨਿਕ੍ਖਿਤ੍ਤਦਣ੍ਡਸਤ੍ਥੋਤਿ ਦਸ੍ਸੇਤਿ. ਏਕਨ੍ਤਨਿਬ੍ਬਿਦਾਯਾਤਿ ਏਕਨ੍ਤੇਨੇਵ ਵਟ੍ਟੇ ਨਿਬ੍ਬਿਨ੍ਦਨਤ੍ਥਾਯਾਤਿ ਸਬ੍ਬਂ ਮਹਾਗੋਵਿਨ੍ਦਸੁਤ੍ਤੇ ਵੁਤ੍ਤਮੇਵ.

੩੬੯. ਪਵੇਦੇਸੀਤਿ ਕਥੇਸਿ ਦੀਪੇਸਿ. ਇਧੇਵਾਤਿ ਇਮਸ੍ਮਿਞ੍ਞੇਵ ਓਕਾਸੇ. ਦੇਵਭੂਤਸ੍ਸ ਮੇ ਸਤੋਤਿ ਦੇਵਸ੍ਸ ਮੇ ਸਤੋ. ਪੁਨਰਾਯੁ ਚ ਮੇ ਲਦ੍ਧੋਤਿ ਪੁਨ ਅਞ੍ਞੇਨ ਕਮ੍ਮਵਿਪਾਕੇਨ ਮੇ ਜੀਵਿਤਂ ਲਦ੍ਧਨ੍ਤਿ, ਇਮਿਨਾ ਅਤ੍ਤਨੋ ਚੁਤਭਾਵਂ ਚੇਵ ਉਪਪਨ੍ਨਭਾਵਞ੍ਚ ਆਵਿਕਰੋਤਿ.

ਦਿਵਿਯਾ ਕਾਯਾਤਿ ਦਿਬ੍ਬਾ ਅਤ੍ਤਭਾਵਾ. ਆਯੁਂ ਹਿਤ੍ਵਾ ਅਮਾਨੁਸਨ੍ਤਿ ਦਿਬ੍ਬਂ ਆਯੁਂ ਜਹਿਤ੍ਵਾ. ਅਮੂਲ਼੍ਹੋ ਗਬ੍ਭਮੇਸ੍ਸਾਮੀਤਿ ਨਿਯਤਗਤਿਕਤ੍ਤਾ ਅਮੂਲ਼੍ਹੋ ਹੁਤ੍ਵਾ. ਯਤ੍ਥ ਮੇ ਰਮਤੀ ਮਨੋਤਿ ਯਤ੍ਥ ਮੇ ਮਨੋ ਰਮਿਸ੍ਸਤਿ, ਤਤ੍ਥੇਵ ਖਤ੍ਤਿਯਕੁਲਾਦੀਸੁ ਗਬ੍ਭਂ ਉਪਗਚ੍ਛਿਸ੍ਸਾਮੀਤਿ ਸਤ੍ਤਕ੍ਖਤ੍ਤੁਂ ਦੇਵੇ ਚ ਮਾਨੁਸੇ ਚਾਤਿ ਇਮਮਤ੍ਥਂ ਦੀਪੇਤਿ.

ਞਾਯੇਨ ਵਿਹਰਿਸ੍ਸਾਮੀਤਿ ਮਨੁਸ੍ਸੇਸੁ ਉਪਪਨ੍ਨੋਪਿ ਮਾਤਰਂ ਜੀਵਿਤਾ ਵੋਰੋਪਨਾਦੀਨਂ ਅਭਬ੍ਬਤ੍ਤਾ ਞਾਯੇਨ ਕਾਰਣੇਨ ਸਮੇਨ ਵਿਹਰਿਸ੍ਸਾਮੀਤਿ ਅਤ੍ਥੋ.

ਸਮ੍ਬੋਧਿ ਚੇ ਭਵਿਸ੍ਸਤੀਤਿ ਇਦਂ ਸਕਦਾਗਾਮਿਮਗ੍ਗਂ ਸਨ੍ਧਾਯ ਵਦਤਿ, ਸਚੇ ਸਕਦਾਗਾਮੀ ਭਵਿਸ੍ਸਾਮੀਤਿ ਦੀਪੇਤਿ. ਅਞ੍ਞਾਤਾ ਵਿਹਰਿਸ੍ਸਾਮੀਤਿ ਅਞ੍ਞਾਤਾ ਆਜਾਨਿਤੁਕਾਮੋ ਹੁਤ੍ਵਾ ਵਿਹਰਿਸ੍ਸਾਮਿ. ਸ੍ਵੇਵ ਅਨ੍ਤੋ ਭਵਿਸ੍ਸਤੀਤਿ ਸੋ ਏਵ ਮੇ ਮਨੁਸ੍ਸਲੋਕੇ ਅਨ੍ਤੋ ਭਵਿਸ੍ਸਤੀਤਿ.

ਪੁਨ ਦੇਵੋ ਭਵਿਸ੍ਸਾਮਿ, ਦੇਵਲੋਕਸ੍ਮਿਂ ਉਤ੍ਤਮੋਤਿ ਪੁਨ ਦੇਵਲੋਕਸ੍ਮਿਂ ਉਤ੍ਤਮੋ ਸਕ੍ਕੋ ਦੇਵਾਨਮਿਨ੍ਦੋ ਭਵਿਸ੍ਸਾਮੀਤਿ ਵਦਤਿ.

ਅਨ੍ਤਿਮੇ ਵਤ੍ਤਮਾਨਮ੍ਹੀਤਿ ਅਨ੍ਤਿਮੇ ਭਵੇ ਵਤ੍ਤਮਾਨੇ. ਸੋ ਨਿਵਾਸੋ ਭਵਿਸ੍ਸਤੀਤਿ ਯੇ ਤੇ ਆਯੁਨਾ ਚ ਪਞ੍ਞਾਯ ਚ ਅਕਨਿਟ੍ਠਾ ਜੇਟ੍ਠਕਾ ਸਬ੍ਬਦੇਵੇਹਿ ਪਣੀਤਤਰਾ ਦੇਵਾ, ਅਵਸਾਨੇ ਮੇ ਸੋ ਨਿਵਾਸੋ ਭਵਿਸ੍ਸਤਿ. ਅਯਂ ਕਿਰ ਤਤੋ ਸਕ੍ਕਤ੍ਤਭਾਵਤੋ ਚੁਤੋ ਤਸ੍ਮਿਂ ਅਤ੍ਤਭਾਵੇ ਅਨਾਗਾਮਿਮਗ੍ਗਸ੍ਸ ਪਟਿਲਦ੍ਧਤ੍ਤਾ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਹੁਤ੍ਵਾ ਅਵਿਹਾਦੀਸੁ ਨਿਬ੍ਬਤ੍ਤਨ੍ਤੋ ਅਵਸਾਨੇ ਅਕਨਿਟ੍ਠੇ ਨਿਬ੍ਬਤ੍ਤਿਸ੍ਸਤਿ. ਤਂ ਸਨ੍ਧਾਯ ਏਵਮਾਹ. ਏਸ ਕਿਰ ਅਵਿਹੇਸੁ ਕਪ੍ਪਸਹਸ੍ਸਂ ਵਸਿਸ੍ਸਤਿ, ਅਤਪ੍ਪੇਸੁ ਦ੍ਵੇ ਕਪ੍ਪਸਹਸ੍ਸਾਨਿ, ਸੁਦਸ੍ਸੇਸੁ ਚਤ੍ਤਾਰਿ ਕਪ੍ਪਸਹਸ੍ਸਾਨਿ, ਸੁਦਸ੍ਸੀਸੁ ਅਟ੍ਠ, ਅਕਨਿਟ੍ਠੇਸੁ ਸੋਲ਼ਸਾਤਿ ਏਕਤਿਂਸ ਕਪ੍ਪਸਹਸ੍ਸਾਨਿ ਬ੍ਰਹ੍ਮਆਯੁਂ ਅਨੁਭਵਿਸ੍ਸਤਿ. ਸਕ੍ਕੋ ਦੇਵਰਾਜਾ ਅਨਾਥਪਿਣ੍ਡਿਕੋ ਗਹਪਤਿ ਵਿਸਾਖਾ ਮਹਾਉਪਾਸਿਕਾਤਿ ਤਯੋਪਿ ਹਿ ਇਮੇ ਏਕਪ੍ਪਮਾਣਆਯੁਕਾ ਏਵ, ਵਟ੍ਟਾਭਿਰਤਸਤ੍ਤਾ ਨਾਮ ਏਤੇਹਿ ਸਦਿਸਾ ਸੁਖਭਾਗਿਨੋ ਨਾਮ ਨਤ੍ਥਿ.

੩੭੦. ਅਪਰਿਯੋਸਿਤਸਙ੍ਕਪ੍ਪੋਤਿ ਅਨਿਟ੍ਠਿਤਮਨੋਰਥੋ. ਯਸ੍ਸੁ ਮਞ੍ਞਾਮਿ ਸਮਣੇਤਿ ਯੇ ਚ ਸਮਣੇ ਪਵਿਵਿਤ੍ਤਵਿਹਾਰਿਨੋਤਿ ਮਞ੍ਞਾਮਿ.

ਆਰਾਧਨਾਤਿ ਸਮ੍ਪਾਦਨਾ. ਵਿਰਾਧਨਾਤਿ ਅਸਮ੍ਪਾਦਨਾ. ਨ ਸਮ੍ਪਾਯਨ੍ਤੀਤਿ ਸਮ੍ਪਾਦੇਤ੍ਵਾ ਕਥੇਤੁਂ ਨ ਸਕ੍ਕੋਨ੍ਤਿ.

ਆਦਿਚ੍ਚਬਨ੍ਧੁਨਨ੍ਤਿ ਆਦਿਚ੍ਚੋਪਿ ਗੋਤਮਗੋਤ੍ਤੋ, ਭਗਵਾਪਿ ਗੋਤਮਗੋਤ੍ਤੋ, ਤਸ੍ਮਾ ਏਵਮਾਹ. ਯਂ ਕਰੋਮਸੀਤਿ ਯਂ ਪੁਬ੍ਬੇ ਬ੍ਰਹ੍ਮੁਨੋ ਨਮਕ੍ਕਾਰਂ ਕਰੋਮ. ਸਮਂ ਦੇਵੇਹੀਤਿ ਦੇਵੇਹਿ ਸਦ੍ਧਿਂ, ਇਤੋ ਪਟ੍ਠਾਯ ਇਦਾਨਿ ਅਮ੍ਹਾਕਂ ਬ੍ਰਹ੍ਮੁਨੋ ਨਮਕ੍ਕਾਰਕਰਣਂ ਨਤ੍ਥੀਤਿ ਦਸ੍ਸੇਤਿ. ਸਾਮਂ ਕਰੋਮਾਤਿ ਨਮਕ੍ਕਾਰਂ ਕਰੋਮ.

੩੭੧. ਪਰਾਮਸਿਤ੍ਵਾਤਿ ਤੁਟ੍ਠਚਿਤ੍ਤੋ ਸਹਾਯਂ ਹਤ੍ਥੇਨ ਹਤ੍ਥਮ੍ਹਿ ਪਹਰਨ੍ਤੋ ਵਿਯ ਪਥਵਿਂ ਪਹਰਿਤ੍ਵਾ, ਸਕ੍ਖਿਭਾਵਤ੍ਥਾਯ ਵਾ ਪਹਰਿਤ੍ਵਾ ‘‘ਯਥਾ ਤ੍ਵਂ ਨਿਚ੍ਚਲੋ, ਏਵਮਹਂ ਭਗਵਤੀ’’ਤਿ. ਅਜ੍ਝਿਟ੍ਠਪਞ੍ਹਾਤਿ ਅਜ੍ਝੇਸਿਤਪਞ੍ਹਾ ਪਤ੍ਥਿਤਪਞ੍ਹਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਇਤਿ ਸੁਮਙ੍ਗਲਵਿਲਾਸਿਨਿਯਾ ਦੀਘਨਿਕਾਯਟ੍ਠਕਥਾਯਂ

ਸਕ੍ਕਪਞ੍ਹਸੁਤ੍ਤਵਣ੍ਣਨਾ ਨਿਟ੍ਠਿਤਾ.