ਮਹਾਸੀਵਤ੍ਥੇਰਵਤ੍ਥੁ

ਥੇਰੋ ਕਿਰ ਅਟ੍ਠਾਰਸ ਮਹਾਗਣੇ ਵਾਚੇਸਿ. ਤਸ੍ਸੋਵਾਦੇ ਠਤ੍ਵਾ ਤਿਂਸਸਹਸ੍ਸਾ ਭਿਕ੍ਖੂ ਅਰਹਤ੍ਤਂ ਪਾਪੁਣਿਂਸੁ. ਅਥੇਕੋ ਭਿਕ੍ਖੁ ‘‘ਮਯ੍ਹਂ ਤਾਵ ਅਬ੍ਭਨ੍ਤਰੇ ਗੁਣਾ ਅਪ੍ਪਮਾਣਾ, ਕੀਦਿਸਾ ਨੁ ਖੋ ਮੇ ਆਚਰਿਯਸ੍ਸ ਗੁਣਾ’’ਤਿ ਆਵਜ੍ਜਨ੍ਤੋ ਪੁਥੁਜ੍ਜਨਭਾਵਂ ਪਸ੍ਸਿਤ੍ਵਾ ‘‘ਅਮ੍ਹਾਕਂ ਆਚਰਿਯੋ ਅਞ੍ਞੇਸਂ ਅਵਸ੍ਸਯੋ ਹੋਤਿ, ਅਤ੍ਤਨੋ ਭਵਿਤੁਂ ਨ ਸਕ੍ਕੋਤਿ, ਓਵਾਦਮਸ੍ਸ ਦਸ੍ਸਾਮੀ’’ਤਿ ਆਕਾਸੇਨ ਗਨ੍ਤ੍ਵਾ ਵਿਹਾਰਸਮੀਪੇ ਓਤਰਿਤ੍ਵਾ ਦਿਵਾਟ੍ਠਾਨੇ ਨਿਸਿਨ੍ਨਂ ਆਚਰਿਯਂ ਉਪਸਙ੍ਕਮਿਤ੍ਵਾ ਵਤ੍ਤਂ ਦਸ੍ਸੇਤ੍ਵਾ ਏਕਮਨ੍ਤਂ ਨਿਸੀਦਿ.

ਥੇਰੋ – ‘‘ਕਿਂ ਕਾਰਣਾ ਆਗਤੋਸਿ ਪਿਣ੍ਡਪਾਤਿਕਾ’’ਤਿ ਆਹ. ਏਕਂ ਅਨੁਮੋਦਨਂ ਗਣ੍ਹਿਸ੍ਸਾਮੀਤਿ ਆਗਤੋਸ੍ਮਿ, ਭਨ੍ਤੇਤਿ. ਓਕਾਸੋ ਨ ਭਵਿਸ੍ਸਤਿ, ਆਵੁਸੋਤਿ? ਵਿਤਕ੍ਕਮਾਲ਼ਕੇ ਠਿਤਕਾਲੇ ਪੁਚ੍ਛਿਸ੍ਸਾਮਿ, ਭਨ੍ਤੇਤਿ. ਤਸ੍ਮਿਂ ਠਾਨੇ ਅਞ੍ਞੇ ਪੁਚ੍ਛਨ੍ਤੀਤਿ. ਭਿਕ੍ਖਾਚਾਰਮਗ੍ਗੇ, ਭਨ੍ਤੇਤਿ. ਤਤ੍ਰਾਪਿ ਅਞ੍ਞੇ ਪੁਚ੍ਛਨ੍ਤੀਤਿ. ਦੁਪਟ੍ਟਨਿਵਾਸਨਟ੍ਠਾਨੇ, ਸਙ੍ਘਾਟਿਪਾਰੁਪਨਟ੍ਠਾਨੇ, ਪਤ੍ਤਨੀਹਰਣਟ੍ਠਾਨੇ, ਗਾਮੇ ਚਰਿਤ੍ਵਾ ਆਸਨਸਾਲਾਯਂ ਯਾਗੁਪੀਤਕਾਲੇ, ਭਨ੍ਤੇਤਿ. ਤਤ੍ਥ ਅਟ੍ਠਕਥਾਥੇਰਾ ਅਤ੍ਤਨੋ ਕਙ੍ਖਂ ਵਿਨੋਦੇਨ੍ਤਿ, ਆਵੁਸੋਤਿ. ਅਨ੍ਤੋਗਾਮਤੋ ਨਿਕ੍ਖਨ੍ਤਕਾਲੇ ਪੁਚ੍ਛਿਸ੍ਸਾਮਿ, ਭਨ੍ਤੇਤਿ. ਤਤ੍ਰਾਪਿ ਅਞ੍ਞੇ ਪੁਚ੍ਛਨ੍ਤਿ, ਆਵੁਸੋਤਿ. ਅਨ੍ਤਰਾਮਗ੍ਗੇ, ਭਨ੍ਤੇ, ਭੋਜਨਸਾਲਾਯਂ ਭਤ੍ਤਕਿਚ੍ਚਪਰਿਯੋਸਾਨੇ, ਭਨ੍ਤੇ, ਦਿਵਾਟ੍ਠਾਨੇ, ਪਾਦਧੋਵਨਕਾਲੇ, ਮੁਖਧੋਵਨਕਾਲੇ, ਭਨ੍ਤੇਤਿ? ਤਦਾ ਅਞ੍ਞੇ ਪੁਚ੍ਛਨ੍ਤੀਤਿ. ਤਤੋ ਪਟ੍ਠਾਯ ਯਾਵ ਅਰੁਣਾ ਅਪਰੇ ਪੁਚ੍ਛਨ੍ਤਿ, ਆਵੁਸੋਤਿ. ਦਨ੍ਤਕਟ੍ਠਂ ਗਹੇਤ੍ਵਾ ਮੁਖਧੋਵਨਤ੍ਥਂ ਗਮਨਕਾਲੇ, ਭਨ੍ਤੇਤਿ? ਤਦਾ ਅਞ੍ਞੇ ਪੁਚ੍ਛਨ੍ਤੀਤਿ. ਮੁਖਂ ਧੋਵਿਤ੍ਵਾ ਆਗਮਨਕਾਲੇ, ਭਨ੍ਤੇਤਿ? ਤਤ੍ਰਾਪਿ ਅਞ੍ਞੇ ਪੁਚ੍ਛਨ੍ਤੀਤਿ. ਸੇਨਾਸਨਂ ਪਵਿਸਿਤ੍ਵਾ ਨਿਸਿਨ੍ਨਕਾਲੇ, ਭਨ੍ਤੇਤਿ? ਤਤ੍ਰਾਪਿ ਅਞ੍ਞੇ ਪੁਚ੍ਛਨ੍ਤੀਤਿ. ਭਨ੍ਤੇ, ਨਨੁ ਮੁਖਂ ਧੋਵਿਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਤਯੋ ਚਤ੍ਤਾਰੋ ਪਲ੍ਲਙ੍ਕੇ ਉਸੁਮਂ ਗਾਹਾਪੇਤ੍ਵਾ ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤਾਨਂ ਓਕਾਸਕਾਲੇਨ ਭਵਿਤਬ੍ਬਂ ਸਿਯਾ, ਮਰਣਖਣਮ੍ਪਿ ਨ ਲਭਿਸ੍ਸਥ, ਭਨ੍ਤੇ, ਫਲਕਸਦਿਸਤ੍ਥ ਭਨ੍ਤੇ ਪਰਸ੍ਸ ਅਵਸ੍ਸਯੋ ਹੋਥ, ਅਤ੍ਤਨੋ ਭਵਿਤੁਂ ਨ ਸਕ੍ਕੋਥ, ਨ ਮੇ ਤੁਮ੍ਹਾਕਂ ਅਨੁਮੋਦਨਾਯ ਅਤ੍ਥੋਤਿ ਆਕਾਸੇ ਉਪ੍ਪਤਿਤ੍ਵਾ ਅਗਮਾਸਿ.

ਥੇਰੋ – ‘‘ਇਮਸ੍ਸ ਭਿਕ੍ਖੁਨੋ ਪਰਿਯਤ੍ਤਿਯਾ ਕਮ੍ਮਂ ਨਤ੍ਥਿ, ਮਯ੍ਹਂ ਪਨ ਅਙ੍ਕੁਸਕੋ ਭਵਿਸ੍ਸਾਮੀਤਿ ਆਗਤੋ’’ਤਿ ਞਤ੍ਵਾ ‘‘ਇਦਾਨਿ ਓਕਾਸੋ ਨ ਭਵਿਸ੍ਸਤਿ, ਪਚ੍ਚੂਸਕਾਲੇ ਗਮਿਸ੍ਸਾਮੀ’’ਤਿ ਪਤ੍ਤਚੀਵਰਂ ਸਮੀਪੇ ਕਤ੍ਵਾ ਸਬ੍ਬਂ ਦਿਵਸਭਾਗਂ ਪਠਮਯਾਮਮਜ੍ਝਿਮਯਾਮਞ੍ਚ ਧਮ੍ਮਂ ਵਾਚੇਤ੍ਵਾ ਪਚ੍ਛਿਮਯਾਮੇ ਏਕਸ੍ਮਿਂ ਥੇਰੇ ਉਦ੍ਦੇਸਂ ਗਹੇਤ੍ਵਾ ਨਿਕ੍ਖਨ੍ਤੇ ਪਤ੍ਤਚੀਵਰਂ ਗਹੇਤ੍ਵਾ ਤੇਨੇਵ ਸਦ੍ਧਿਂ ਨਿਕ੍ਖਨ੍ਤੋ. ਨਿਸਿਨ੍ਨਅਨ੍ਤੇਵਾਸਿਕਾ ਆਚਰਿਯੋ ਕੇਨਚਿ ਪਪਞ੍ਚੇਨ ਨਿਕ੍ਖਨ੍ਤੋਤਿ ਮਞ੍ਞਿਂਸੁ. ਨਿਕ੍ਖਨ੍ਤੋ ਥੇਰੋ ਕੋਚਿ ਦੇਵ ਸਮਾਨਾਚਰਿਯਭਿਕ੍ਖੂਤਿ ਸਞ੍ਞਂ ਅਕਾਸਿ.

ਥੇਰੋ ਕਿਰ ‘‘ਮਾਦਿਸਸ੍ਸ ਅਰਹਤ੍ਤਂ ਨਾਮ ਕਿਂ, ਦ੍ਵੀਹਤੀਹੇਨੇਵ ਪਾਪੁਣਿਤ੍ਵਾ ਪਚ੍ਚਾਗਮਿਸ੍ਸਾਮੀ’’ਤਿ ਅਨ੍ਤੇਵਾਸਿਕਾਨਂ ਅਨਾਰੋਚੇਤ੍ਵਾਵ ਆਸਾਲ਼੍ਹੀਮਾਸਸ੍ਸ ਜੁਣ੍ਹਪਕ੍ਖਤੇਰਸਿਯਾ ਨਿਕ੍ਖਨ੍ਤੋ ਗਾਮਨ੍ਤਪਬ੍ਭਾਰਂ ਗਨ੍ਤ੍ਵਾ ਚਙ੍ਕਮਂ ਆਰੁਯ੍ਹ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੋ ਤਂ ਦਿਵਸਂ ਅਰਹਤ੍ਤਂ ਗਹੇਤੁਂ ਨਾਸਕ੍ਖਿ. ਉਪੋਸਥਦਿਵਸੇ ਸਮ੍ਪਤ੍ਤੇ ‘‘ਦ੍ਵੀਹਤੀਹੇਨ ਅਰਹਤ੍ਤਂ ਗਣ੍ਹਿਸ੍ਸਾਮੀਤਿ ਆਗਤੋ, ਗਹੇਤੁਂ ਪਨ ਨਾਸਕ੍ਖਿਂ. ਤਯੋ ਮਾਸੇ ਪਨ ਤੀਣਿ ਦਿਵਸਾਨਿ ਵਿਯ ਯਾਵ ਮਹਾਪਵਾਰਣਾ ਤਾਵ ਜਾਨਿਸ੍ਸਾਮੀ’’ਤਿ ਵਸ੍ਸਂ ਉਪਗਨ੍ਤ੍ਵਾਪਿ ਗਹੇਤੁਂ ਨਾਸਕ੍ਖਿ. ਪਵਾਰਣਾਦਿਵਸੇ ਚਿਨ੍ਤੇਸਿ – ‘‘ਅਹਂ ਦ੍ਵੀਹਤੀਹੇਨ ਅਰਹਤ੍ਤਂ ਗਣ੍ਹਿਸ੍ਸਾਮੀਤਿ ਆਗਤੋ, ਤੇਮਾਸੇਨਾਪਿ ਨਾਸਕ੍ਖਿਂ, ਸਬ੍ਰਹ੍ਮਚਾਰਿਨੋ ਪਨ ਵਿਸੁਦ੍ਧਿਪਵਾਰਣਂ ਪਵਾਰੇਨ੍ਤੀ’’ਤਿ. ਤਸ੍ਸੇਵਂ ਚਿਨ੍ਤਯਤੋ ਅਸ੍ਸੁਧਾਰਾ ਪਵਤ੍ਤਨ੍ਤਿ. ਤਤੋ ‘‘ਨ ਮਞ੍ਚੇ ਮਯ੍ਹਂ ਚਤੂਹਿ ਇਰਿਯਾਪਥੇਹਿ ਮਗ੍ਗਫਲਂ ਉਪ੍ਪਜ੍ਜਿਸ੍ਸਤਿ, ਅਰਹਤ੍ਤਂ ਅਪ੍ਪਤ੍ਵਾ ਨੇਵ ਮਞ੍ਚੇ ਪਿਟ੍ਠਿਂ ਪਸਾਰੇਸ੍ਸਾਮਿ, ਨ ਪਾਦੇ ਧੋਵਿਸ੍ਸਾਮੀ’’ਤਿ ਮਞ੍ਚਂ ਉਸ੍ਸਾਪੇਤ੍ਵਾ ਠਪੇਸਿ. ਪੁਨ ਅਨ੍ਤੋਵਸ੍ਸਂ ਪਤ੍ਤਂ, ਅਰਹਤ੍ਤਂ ਗਹੇਤੁਂ ਨਾਸਕ੍ਖਿਯੇਵ. ਏਕੂਨਤਿਂਸਪਵਾਰਣਾਸੁ ਅਸ੍ਸੁਧਾਰਾ ਪਵਤ੍ਤਨ੍ਤਿ. ਗਾਮਦਾਰਕਾ ਥੇਰਸ੍ਸ ਪਾਦੇਸੁ ਫਾਲਿਤਟ੍ਠਾਨਾਨਿ ਕਣ੍ਟਕੇਹਿ ਸਿਬ੍ਬਨ੍ਤਿ, ਦਵਂ ਕਰੋਨ੍ਤਾਪਿ ‘‘ਅਯ੍ਯਸ੍ਸ ਮਹਾਸੀਵਤ੍ਥੇਰਸ੍ਸ ਵਿਯ ਪਾਦਾ ਹੋਨ੍ਤੂ’’ਤਿ ਦਵਂ ਕਰੋਨ੍ਤਿ.

ਥੇਰੋ ਤਿਂਸਸਂਵਚ੍ਛਰੇ ਮਹਾਪਵਾਰਣਾਦਿਵਸੇ ਆਲਮ੍ਬਣਫਲਕਂ ਨਿਸ੍ਸਾਯ ਠਿਤੋ ‘‘ਇਦਾਨਿ ਮੇ ਤਿਂਸ ਵਸ੍ਸਾਨਿ ਸਮਣਧਮ੍ਮਂ ਕਰੋਨ੍ਤਸ੍ਸ, ਨਾਸਕ੍ਖਿਂ ਅਰਹਤ੍ਤਂ ਪਾਪੁਣਿਤੁਂ, ਅਦ੍ਧਾ ਮੇ ਇਮਸ੍ਮਿਂ ਅਤ੍ਤਭਾਵੇ ਮਗ੍ਗੋ ਵਾ ਫਲਂ ਵਾ ਨਤ੍ਥਿ, ਨ ਮੇ ਲਦ੍ਧਂ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਤੁ’’ਨ੍ਤਿ ਚਿਨ੍ਤੇਸਿ. ਤਸ੍ਸੇਵਂ ਚਿਨ੍ਤਯਤੋਵ ਦੋਮਨਸ੍ਸਂ ਉਪ੍ਪਜ੍ਜਿ, ਅਸ੍ਸੁਧਾਰਾ ਪਵਤ੍ਤਨ੍ਤਿ. ਅਥ ਅਵਿਦੂਰਟ੍ਠਾਨੇ ਏਕਾ ਦੇਵਧੀਤਾ ਰੋਦਮਾਨਾ ਅਟ੍ਠਾਸਿ. ‘‘ਕੋ ਏਤ੍ਥ ਰੋਦਸੀ’’ਤਿ? ‘‘ਅਹਂ, ਭਨ੍ਤੇ, ਦੇਵਧੀਤਾ’’ਤਿ. ‘‘ਕਸ੍ਮਾ ਰੋਦਸੀ’’ਤਿ? ‘‘ਰੋਦਮਾਨੇਨ ਮਗ੍ਗਫਲਂ ਨਿਬ੍ਬਤ੍ਤਿਤਂ, ਤੇਨ ਅਹਮ੍ਪਿ ਏਕਂ ਦ੍ਵੇ ਮਗ੍ਗਫਲਾਨਿ ਨਿਬ੍ਬਤ੍ਤੇਸ੍ਸਾਮੀਤਿ ਰੋਦਾਮਿ, ਭਨ੍ਤੇ’’ਤਿ.

ਤਤੋ ਥੇਰੋ – ‘‘ਭੋ ਮਹਾਸੀਵਤ੍ਥੇਰ, ਦੇਵਤਾਪਿ ਤਯਾ ਸਦ੍ਧਿਂ ਕੇਲ਼ਿਂ ਕਰੋਨ੍ਤਿ, ਅਨੁਚ੍ਛਵਿਕਂ ਨੁ ਖੋ ਤੇ ਏਤ’’ਨ੍ਤਿ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਅਗ੍ਗਹੇਸਿ. ਸੋ ‘‘ਇਦਾਨਿ ਨਿਪਜ੍ਜਿਸ੍ਸਾਮੀ’’ਤਿ ਸੇਨਾਸਨਂ ਪਟਿਜਗ੍ਗਿਤ੍ਵਾ ਮਞ੍ਚਕਂ ਪਞ੍ਞਪੇਤ੍ਵਾ ਉਦਕਟ੍ਠਾਨੇ ਉਦਕਂ ਪਚ੍ਚੁਪਟ੍ਠਪੇਤ੍ਵਾ ‘‘ਪਾਦੇ ਧੋਵਿਸ੍ਸਾਮੀ’’ਤਿ ਸੋਪਾਨਫਲਕੇ ਨਿਸੀਦਿ.

ਅਨ੍ਤੇਵਾਸਿਕਾਪਿਸ੍ਸ ‘‘ਅਮ੍ਹਾਕਂ ਆਚਰਿਯਸ੍ਸ ਸਮਣਧਮ੍ਮਂ ਕਾਤੁਂ ਗਚ੍ਛਨ੍ਤਸ੍ਸ ਤਿਂਸ ਵਸ੍ਸਾਨਿ, ਸਕ੍ਖਿ ਨੁ ਖੋ ਵਿਸੇਸਂ ਨਿਬ੍ਬਤ੍ਤੇਤੁਂ, ਨਾਸਕ੍ਖੀ’’ਤਿ ਆਵਜ੍ਜਯਮਾਨਾ ‘‘ਅਰਹਤ੍ਤਂ ਪਤ੍ਵਾ ਪਾਦਧੋਵਨਤ੍ਥਂ ਨਿਸਿਨ੍ਨੋ’’ਤਿ ਦਿਸ੍ਵਾ ‘‘ਅਮ੍ਹਾਕਂ ਆਚਰਿਯੋ ਅਮ੍ਹਾਦਿਸੇਸੁ ਅਨ੍ਤੇਵਾਸਿਕੇਸੁ ਤਿਟ੍ਠਨ੍ਤੇਸੁ ‘ਅਤ੍ਤਨਾਵ ਪਾਦੇ ਧੋਵਿਸ੍ਸਤੀ’ਤਿ ਅਟ੍ਠਾਨਮੇਤਂ, ਅਹਂ ਧੋਵਿਸ੍ਸਾਮਿ ਅਹਂ ਧੋਵਿਸ੍ਸਾਮੀ’’ਤਿ ਤਿਂਸਸਹਸ੍ਸਾਨਿਪਿ ਆਕਾਸੇਨ ਗਨ੍ਤ੍ਵਾ ਵਨ੍ਦਿਤ੍ਵਾ ‘‘ਪਾਦੇ ਧੋਵਿਸ੍ਸਾਮ, ਭਨ੍ਤੇ’’ਤਿ ਆਹਂਸੁ. ਆਵੁਸੋ, ਇਦਾਨਿ ਤਿਂਸ ਵਸ੍ਸਾਨਿ ਹੋਨ੍ਤਿ ਮਮ ਪਾਦਾਨਂ ਅਧੋਤਾਨਂ, ਤਿਟ੍ਠਥ, ਤੁਮ੍ਹੇ, ਅਹਮੇਵ ਧੋਵਿਸ੍ਸਾਮੀਤਿ.

ਸਕ੍ਕੋਪਿ ਆਵਜ੍ਜਨ੍ਤੋ – ‘‘ਮਯ੍ਹਂ ਅਯ੍ਯੋ ਮਹਾਸੀਵਤ੍ਥੇਰੋ ਅਰਹਤ੍ਤਂ ਪਤ੍ਤੋ ਤਿਂਸਸਹਸ੍ਸਾਨਂ ਅਨ੍ਤੇਵਾਸਿਕਾਨਂ ‘ਪਾਦੇ ਧੋਵਿਸ੍ਸਾਮਾ’ਤਿ ਆਗਤਾਨਂ ਪਾਦੇ ਧੋਵਿਤੁਂ ਨ ਦੇਤਿ. ਮਾਦਿਸੇ ਪਨ ਉਪਟ੍ਠਾਕੇ ਤਿਟ੍ਠਨ੍ਤੇ ‘ਮਯ੍ਹਂ ਅਯ੍ਯੋ ਸਯਂ ਪਾਦੇ ਧੋਵਿਸ੍ਸਤੀ’ਤਿ ਅਟ੍ਠਾਨਮੇਤਂ, ਅਹਂ ਧੋਵਿਸ੍ਸਾਮੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਸੁਜਾਤਾਯ ਦੇਵਿਯਾ ਸਦ੍ਧਿਂ ਭਿਕ੍ਖੁਸਙ੍ਘਸ੍ਸ ਸਨ੍ਤਿਕੇ ਪਾਤੁਰਹੋਸਿ. ਸੋ ਸੁਜਂ ਅਸੁਰਕਞ੍ਞਂ ਪੁਰਤੋ ਕਤ੍ਵਾ ‘‘ਅਪੇਥ, ਭਨ੍ਤੇ, ਮਾਤੁਗਾਮੋ’’ਤਿ ਓਕਾਸਂ ਕਾਰੇਤ੍ਵਾ ਥੇਰਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਪੁਰਤੋ ਉਕ੍ਕੁਟਿਕੋ ਨਿਸੀਦਿਤ੍ਵਾ ‘‘ਪਾਦੇ ਧੋਵਿਸ੍ਸਾਮਿ, ਭਨ੍ਤੇ’’ਤਿ ਆਹ. ਕੋਸਿਯ, ਇਦਾਨਿ ਮੇ ਤਿਂਸ ਵਸ੍ਸਾਨਿ ਪਾਦਾਨਂ ਅਧੋਤਾਨਂ, ਦੇਵਤਾਨਞ੍ਚ ਪਕਤਿਯਾਪਿ ਮਨੁਸ੍ਸਸਰੀਰਗਨ੍ਧੋ ਨਾਮ ਜੇਗੁਚ੍ਛੋ, ਯੋਜਨਸਤੇ ਠਿਤਾਨਮ੍ਪਿ ਕਣ੍ਠੇ ਆਸਤ੍ਤਕੁਣਪਂ ਵਿਯ ਹੋਤਿ, ਅਹਮੇਵ ਧੋਵਿਸ੍ਸਾਮੀਤਿ. ਭਨ੍ਤੇ, ਅਯਂ ਗਨ੍ਧੋ ਨਾਮ ਨ ਪਞ੍ਞਾਯਤਿ, ਤੁਮ੍ਹਾਕਂ ਪਨ ਸੀਲਗਨ੍ਧੋ ਛ ਦੇਵਲੋਕੇ ਅਤਿਕ੍ਕਮਿਤ੍ਵਾ ਉਪਰਿ ਭਵਗ੍ਗਂ ਪਤ੍ਵਾ ਠਿਤੋ. ਸੀਲਗਨ੍ਧਤੋ ਅਞ੍ਞੋ ਉਤ੍ਤਰਿਤਰੋ ਗਨ੍ਧੋ ਨਾਮ ਨਤ੍ਥਿ, ਭਨ੍ਤੇ, ਤੁਮ੍ਹਾਕਂ ਸੀਲਗਨ੍ਧੇਨਮ੍ਹਿ ਆਗਤੋਤਿ ਵਾਮਹਤ੍ਥੇਨ ਗੋਪ੍ਫਕਸਨ੍ਧਿਯਂ ਗਹੇਤ੍ਵਾ ਦਕ੍ਖਿਣਹਤ੍ਥੇਨ ਪਾਦਤਲਂ ਪਰਿਮਜ੍ਜਿ. ਦਹਰਕੁਮਾਰਸ੍ਸੇਵ ਪਾਦਾ ਅਹੇਸੁਂ. ਸਕ੍ਕੋ ਪਾਦੇ ਧੋਵਿਤ੍ਵਾ ਵਨ੍ਦਿਤ੍ਵਾ ਦੇਵਲੋਕਮੇਵ ਗਤੋ.

ਏਵਂ ‘‘ਨ ਲਭਾਮਿ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਤੁ’’ਨ੍ਤਿ ਆਵਜ੍ਜਨ੍ਤਸ੍ਸ ਉਪ੍ਪਨ੍ਨਂ ਦੋਮਨਸ੍ਸਂ ਨਿਸ੍ਸਾਯ ਭਿਕ੍ਖੁਨੋ ਮਞ੍ਞਨਵਸੇਨ ਵਿਪਸ੍ਸਨਾਯ ਆਰਮ੍ਮਣਮ੍ਪਿ ਵਿਪਸ੍ਸਨਾਪਿ ਮਗ੍ਗੋਪਿ ਫਲਮ੍ਪਿ ਸਵਿਤਕ੍ਕਸਵਿਚਾਰਦੋਮਨਸ੍ਸਨ੍ਤਿ ਚ ਅਵਿਤਕ੍ਕਾਵਿਚਾਰਦੋਮਨਸ੍ਸਨ੍ਤਿ ਚ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਤਤ੍ਥ ਏਕੋ ਭਿਕ੍ਖੁ ਸਵਿਤਕ੍ਕਸਵਿਚਾਰਦੋਮਨਸ੍ਸੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ਇਦਂ ਦੋਮਨਸ੍ਸਂ ਕਿਂ ਨਿਸ੍ਸਿਤਨ੍ਤਿ ਉਪਧਾਰੇਨ੍ਤੋ ਵਤ੍ਥੁਨਿਸ੍ਸਿਤਨ੍ਤਿ ਪਜਾਨਾਤੀਤਿ ਫਸ੍ਸਪਞ੍ਚਮਕੇ ਵੁਤ੍ਤਨਯੇਨੇਵ ਅਨੁਕ੍ਕਮੇਨ ਅਰਹਤ੍ਤੇ ਪਤਿਟ੍ਠਾਤਿ. ਏਕੋ ਅਵਿਤਕ੍ਕਾਵਿਚਾਰੇ ਦੋਮਨਸ੍ਸੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ਵੁਤ੍ਤਨਯੇਨੇਵ ਅਰਹਤ੍ਤੇ ਪਤਿਟ੍ਠਾਤਿ. ਤਤ੍ਥ ਅਭਿਨਿਵਿਟ੍ਠਦੋਮਨਸ੍ਸੇਸੁਪਿ ਸਵਿਤਕ੍ਕਸਵਿਚਾਰਤੋ ਅਵਿਤਕ੍ਕਅਵਿਚਾਰਂ ਪਣੀਤਤਰਂ. ਸਵਿਤਕ੍ਕਸਵਿਚਾਰਦੋਮਨਸ੍ਸਵਿਪਸ੍ਸਨਾਤੋਪਿ ਅਵਿਤਕ੍ਕਾਵਿਚਾਰਦੋਮਨਸ੍ਸਵਿਪਸ੍ਸਨਾ ਪਣੀਤਤਰਾ. ਸਵਿਤਕ੍ਕਸਵਿਚਾਰਦੋਮਨਸ੍ਸਫਲਸਮਾਪਤ੍ਤਿਤੋਪਿ ਅਵਿਤਕ੍ਕਾਵਿਚਾਰਦੋਮਨਸ੍ਸਫਲਸਮਾਪਤ੍ਤਿਯੇਵ ਪਣੀਤਤਰਾ. ਤੇਨਾਹ ਭਗਵਾ – ‘‘ਯੇ ਅਵਿਤਕ੍ਕਅਵਿਚਾਰੇ ਤੇ ਪਣੀਤਤਰੇ’’ਤਿ.

੩੬੨. ਏਵਰੂਪਾ ਉਪੇਕ੍ਖਾ ਨ ਸੇਵਿਤਬ੍ਬਾਤਿ ਏਵਰੂਪਾ ਗੇਹਸਿਤਉਪੇਕ੍ਖਾ ਨ ਸੇਵਿਤਬ੍ਬਾ. ਗੇਹਸਿਤਉਪੇਕ੍ਖਾ ਨਾਮ ‘‘ਤਤ੍ਥ ਕਤਮਾ ਛ ਗੇਹਸਿਤਉਪੇਕ੍ਖਾ. ਚਕ੍ਖੁਨਾ ਰੂਪਂ ਦਿਸ੍ਵਾ ਉਪ੍ਪਜ੍ਜਤਿ ਉਪੇਕ੍ਖਾ ਬਾਲਸ੍ਸ ਮੂਲ਼੍ਹਸ੍ਸ ਪੁਥੁਜ੍ਜਨਸ੍ਸ ਅਨੋਧਿਜਿਨਸ੍ਸ ਅਵਿਪਾਕਜਿਨਸ੍ਸ ਅਨਾਦੀਨਵਦਸ੍ਸਾਵਿਨੋ ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ, ਯਾ ਏਵਰੂਪਾ ਉਪੇਕ੍ਖਾ, ਰੂਪਂ ਸਾ ਨਾਤਿਵਤ੍ਤਤਿ, ਤਸ੍ਮਾ ਸਾ ਉਪੇਕ੍ਖਾ ਗੇਹਸਿਤਾਤਿ ਵੁਚ੍ਚਤੀ’’ਤਿ ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਗੁਲ਼ਪਿਣ੍ਡਿਕੇ ਨਿਲੀਨਮਕ੍ਖਿਕਾ ਵਿਯ ਰੂਪਾਦੀਨਿ ਅਨਤਿਵਤ੍ਤਮਾਨਾ ਤਤ੍ਥੇਵ ਲਗ੍ਗਾ ਲਗ੍ਗਿਤਾ ਹੁਤ੍ਵਾ ਉਪ੍ਪਨ੍ਨਾ ਕਾਮਗੁਣਨਿਸ੍ਸਿਤਾ ਉਪੇਕ੍ਖਾ ਨ ਸੇਵਿਤਬ੍ਬਾ.

ਏਵਰੂਪਾ ਉਪੇਕ੍ਖਾ ਸੇਵਿਤਬ੍ਬਾਤਿ ਏਵਰੂਪਾ ਨੇਕ੍ਖਮ੍ਮਸਿਤਾ ਉਪੇਕ੍ਖਾ ਸੇਵਿਤਬ੍ਬਾ. ਨੇਕ੍ਖਮ੍ਮਸਿਤਾ ਉਪੇਕ੍ਖਾ ਨਾਮ – ‘‘ਤਤ੍ਥ ਕਤਮਾ ਛ ਨੇਕ੍ਖਮ੍ਮਸਿਤਾ ਉਪੇਕ੍ਖਾ? ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ‘ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ, ਸਬ੍ਬੇ ਤੇ ਰੂਪਾ ਅਨਿਚ੍ਚਾ, ਦੁਕ੍ਖਾ, ਵਿਪਰਿਣਾਮਧਮ੍ਮਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋ ਉਪ੍ਪਜ੍ਜਤਿ ਉਪੇਕ੍ਖਾ, ਯਾ ਏਵਰੂਪਾ ਉਪੇਕ੍ਖਾ, ਰੂਪਂ ਸਾ ਅਤਿਵਤ੍ਤਤਿ, ਤਸ੍ਮਾ ਸਾ ਉਪੇਕ੍ਖਾ ਨੇਕ੍ਖਮ੍ਮਸਿਤਾਤਿ ਵੁਚ੍ਚਤੀ’’ਤਿ (ਮ. ਨਿ. ੩.੩੦੮). ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਨਿਟ੍ਠਆਰਮ੍ਮਣੇ ਆਪਾਥਗਤੇ ਇਟ੍ਠੇ ਅਰਜ੍ਜਨ੍ਤਸ੍ਸ, ਅਨਿਟ੍ਠੇ ਅਦੁਸ੍ਸਨ੍ਤਸ੍ਸ, ਅਸਮਪੇਕ੍ਖਨੇਨ ਅਸਮ੍ਮੁਯ੍ਹਨ੍ਤਸ੍ਸ ਉਪ੍ਪਨ੍ਨਾ ਵਿਪਸ੍ਸਨਾ ਞਾਣਸਮ੍ਪਯੁਤ੍ਤਾ ਉਪੇਕ੍ਖਾ. ਅਪਿਚ ਵੇਦਨਾਸਭਾਗਾ ਤਤ੍ਰ ਮਜ੍ਝਤ੍ਤੁਪੇਕ੍ਖਾਪਿ ਏਤ੍ਥ ਉਪੇਕ੍ਖਾਵ. ਤਸ੍ਮਾ ਸੇਵਿਤਬ੍ਬਾਤਿ ਅਯਂ ਨੇਕ੍ਖਮ੍ਮਵਸੇਨ ਵਿਪਸ੍ਸਨਾਵਸੇਨ ਅਨੁਸ੍ਸਤਿਟ੍ਠਾਨਵਸੇਨ ਪਠਮਦੁਤਿਯਤਤਿਯਚਤੁਤ੍ਥਜ੍ਝਾਨਵਸੇਨ ਚ ਉਪ੍ਪਜ੍ਜਨਕਉਪੇਕ੍ਖਾ ਸੇਵਿਤਬ੍ਬਾ ਨਾਮ.

ਏਤ੍ਥ ਯਂ ਚੇ ਸਵਿਤਕ੍ਕਂ ਸਵਿਚਾਰਨ੍ਤਿ ਤਾਯਪਿ ਨੇਕ੍ਖਮ੍ਮਸਿਤਉਪੇਕ੍ਖਾਯ ਯਂ ਨੇਕ੍ਖਮ੍ਮਵਸੇਨ ਵਿਪਸ੍ਸਨਾਵਸੇਨ ਅਨੁਸ੍ਸਤਿਟ੍ਠਾਨਵਸੇਨ ਪਠਮਜ੍ਝਾਨਵਸੇਨ ਚ ਉਪ੍ਪਨ੍ਨਂ ਸਵਿਤਕ੍ਕਸਵਿਚਾਰਂ ਉਪੇਕ੍ਖਨ੍ਤਿ ਜਾਨੇਯ੍ਯ. ਯਂ ਚੇ ਅਵਿਤਕ੍ਕਂ ਅਵਿਚਾਰਨ੍ਤਿ ਯਂ ਪਨ ਦੁਤਿਯਜ੍ਝਾਨਾਦਿਵਸੇਨ ਉਪ੍ਪਨ੍ਨਂ ਅਵਿਤਕ੍ਕਾਵਿਚਾਰਂ ਉਪੇਕ੍ਖਨ੍ਤਿ ਜਾਨੇਯ੍ਯ. ਯੇ ਅਵਿਤਕ੍ਕੇ ਅਵਿਚਾਰੇ ਤੇ ਪਣੀਤਤਰੇਤਿ ਏਤਾਸੁ ਦ੍ਵੀਸੁ ਯਾ ਅਵਿਤਕ੍ਕਅਵਿਚਾਰਾ, ਸਾ ਪਣੀਤਤਰਾਤਿ ਅਤ੍ਥੋ. ਇਮਿਨਾ ਕਿਂ ਕਥਿਤਂ ਹੋਤਿ? ਦ੍ਵਿਨ੍ਨਂ ਅਰਹਤ੍ਤਂ ਕਥਿਤਂ. ਏਕੋ ਹਿ ਭਿਕ੍ਖੁ ਸਵਿਤਕ੍ਕਸਵਿਚਾਰਉਪੇਕ੍ਖਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਯਂ ਉਪੇਕ੍ਖਾ ਕਿਂ ਨਿਸ੍ਸਿਤਾਤਿ ਉਪਧਾਰੇਨ੍ਤੋ ਵਤ੍ਥੁਨਿਸ੍ਸਿਤਾਤਿ ਪਜਾਨਾਤੀਤਿ ਫਸ੍ਸਪਞ੍ਚਮਕੇ ਵੁਤ੍ਤਨਯੇਨੇਵ ਅਨੁਕ੍ਕਮੇਨ ਅਰਹਤ੍ਤੇ ਪਤਿਟ੍ਠਾਤਿ. ਏਕੋ ਅਵਿਤਕ੍ਕਾਵਿਚਾਰਾਯ ਉਪੇਕ੍ਖਾਯ ਵਿਪਸ੍ਸਨਂ ਪਟ੍ਠਪੇਤ੍ਵਾ ਵੁਤ੍ਤਨਯੇਨੇਵ ਅਰਹਤ੍ਤੇ ਪਤਿਟ੍ਠਾਤਿ. ਤਤ੍ਥ ਅਭਿਨਿਵਿਟ੍ਠਉਪੇਕ੍ਖਾਸੁਪਿ ਸਵਿਤਕ੍ਕਸਵਿਚਾਰਤੋ ਅਵਿਤਕ੍ਕਾਵਿਚਾਰਾ ਪਣੀਤਤਰਾ. ਸਵਿਤਕ੍ਕਸਵਿਚਾਰਉਪੇਕ੍ਖਾਵਿਪਸ੍ਸਨਾਤੋਪਿ ਅਵਿਤਕ੍ਕਾਵਿਚਾਰਉਪੇਕ੍ਖਾਵਿਪਸ੍ਸਨਾਪਣੀਤਤਰਾ. ਸਵਿਤਕ੍ਕਸਵਿਚਾਰਉਪੇਕ੍ਖਾਫਲਸਮਾਪਤ੍ਤਿਤੋਪਿ ਅਵਿਤਕ੍ਕਾਵਿਚਾਰੁਪੇਕ੍ਖਾਫਲਸਮਾਪਤ੍ਤਿਯੇਵ ਪਣੀਤਤਰਾ. ਤੇਨਾਹ ਭਗਵਾ ‘‘ਯੇ ਅਵਿਤਕ੍ਕੇ ਅਵਿਚਾਰੇ ਤੇ ਪਣੀਤਤਰੇ’’ਤਿ.

੩੬੩. ਏਵਂ ਪਟਿਪਨ੍ਨੋ ਖੋ, ਦੇਵਾਨਮਿਨ੍ਦ, ਭਿਕ੍ਖੁ ਪਪਞ੍ਚਸਞ੍ਞਾਸਙ੍ਖਾਨਿਰੋਧਸਾਰੁਪ੍ਪਗਾਮਿਨਿਂ ਪਟਿਪਦਂ ਪਟਿਪਨ੍ਨੋ ਹੋਤੀਤਿ ਭਗਵਾ ਅਰਹਤ੍ਤਨਿਕੂਟੇਨ ਦੇਸਨਂ ਨਿਟ੍ਠਪੇਸਿ. ਸਕ੍ਕੋ ਪਨ ਸੋਤਾਪਤ੍ਤਿਫਲਂ ਪਤ੍ਤੋ. ਬੁਦ੍ਧਾਨਞ੍ਹਿ ਅਜ੍ਝਾਸਯੋ ਹੀਨੋ ਨ ਹੋਤਿ, ਉਕ੍ਕਟ੍ਠੋਵ ਹੋਤਿ. ਏਕਸ੍ਸਪਿ ਬਹੂਨਮ੍ਪਿ ਧਮ੍ਮਂ ਦੇਸੇਨ੍ਤਾ ਅਰਹਤ੍ਤੇਨੇਵ ਕੂਟਂ ਗਣ੍ਹਨ੍ਤਿ. ਸਤ੍ਤਾ ਪਨ ਅਤ੍ਤਨੋ ਅਨੁਰੂਪੇ ਉਪਨਿਸ੍ਸਯੇ ਠਿਤਾ ਕੇਚਿ ਸੋਤਾਪਨ੍ਨਾ ਹੋਨ੍ਤਿ, ਕੇਚਿ ਸਕਦਾਗਾਮੀ, ਕੇਚਿ ਅਨਾਗਾਮੀ, ਕੇਚਿ ਅਰਹਨ੍ਤੋ. ਰਾਜਾ ਵਿਯ ਹਿ ਭਗਵਾ, ਰਾਜਕੁਮਾਰਾ ਵਿਯ ਵੇਨੇਯ੍ਯਾ. ਯਥਾ ਹਿ ਰਾਜਾ ਭੋਜਨਕਾਲੇ ਅਤ੍ਤਨੋ ਪਮਾਣੇਨ ਪਿਣ੍ਡਂ ਉਦ੍ਧਰਿਤ੍ਵਾ ਰਾਜਕੁਮਾਰਾਨਂ ਉਪਨੇਤਿ, ਤੇ ਤਤੋ ਅਤ੍ਤਨੋ ਮੁਖਪ੍ਪਮਾਣੇਨੇਵ ਕਬਲ਼ਂ ਕਰੋਨ੍ਤਿ, ਏਵਂ ਭਗਵਾ ਅਤ੍ਤਜ੍ਝਾਸਯਾਨੁਰੂਪਾਯ ਦੇਸਨਾਯ ਅਰਹਤ੍ਤੇਨੇਵ ਕੂਟਂ ਗਣ੍ਹਾਤਿ. ਵੇਨੇਯ੍ਯਾ ਅਤ੍ਤਨੋ ਉਪਨਿਸ੍ਸਯਪ੍ਪਮਾਣੇਨ ਤਤੋ ਸੋਤਾਪਤ੍ਤਿਫਲਮਤ੍ਤਂ ਵਾ ਸਕਦਾਗਾਮਿਅਨਾਗਾਮਿਅਰਹਤ੍ਤਫਲਮੇਵ ਵਾ ਗਣ੍ਹਨ੍ਤਿ. ਸਕ੍ਕੋ ਪਨ ਸੋਤਾਪਨ੍ਨੋ ਜਾਤੋ. ਸੋਤਾਪਨ੍ਨੋ ਚ ਹੁਤ੍ਵਾ ਭਗਵਤੋ ਪੁਰਤੋਯੇਵ ਚਵਿਤ੍ਵਾ ਤਰੁਣਸਕ੍ਕੋ ਹੁਤ੍ਵਾ ਨਿਬ੍ਬਤ੍ਤਿ, ਦੇਵਤਾਨਞ੍ਹਿ ਚਵਮਾਨਾਨਂ ਅਤ੍ਤਭਾਵਸ੍ਸ ਗਤਾਗਤਟ੍ਠਾਨਂ ਨਾਮ ਨ ਪਞ੍ਞਾਯਤਿ, ਦੀਪਸਿਖਾਗਮਨਂ ਵਿਯ ਹੋਤਿ. ਤਸ੍ਮਾ ਸੇਸਦੇਵਤਾ ਨ ਜਾਨਿਂਸੁ. ਸਕ੍ਕੋ ਪਨ ਸਯਂ ਚੁਤਤ੍ਤਾ ਭਗਵਾ ਚ ਅਪ੍ਪਟਿਹਤਞਾਣਤ੍ਤਾ ਦ੍ਵੇਵ ਜਨਾ ਜਾਨਿਂਸੁ. ਅਥ ਸਕ੍ਕੋ ਚਿਨ੍ਤੇਸਿ ‘‘ਮਯ੍ਹਞ੍ਹਿ ਭਗਵਤਾ ਤੀਸੁ ਠਾਨੇਸੁ ਨਿਬ੍ਬਤ੍ਤਿਤਫਲਮੇਵ ਕਥਿਤਂ, ਅਯਞ੍ਚ ਪਨ ਮਗ੍ਗੋ ਵਾ ਫਲਂ ਵਾ ਸਕੁਣਿਕਾਯ ਵਿਯ ਉਪ੍ਪਤਿਤ੍ਵਾ ਗਹੇਤੁਂ ਨ ਸਕ੍ਕਾ, ਆਗਮਨੀਯਪੁਬ੍ਬਭਾਗਪਟਿਪਦਾਯ ਅਸ੍ਸ ਭਵਿਤਬ੍ਬਂ. ਹਨ੍ਦਾਹਂ ਉਪਰਿ ਖੀਣਾਸਵਸ੍ਸ ਪੁਬ੍ਬਭਾਗਪਟਿਪਦਂ ਪੁਚ੍ਛਾਮੀ’’ਤਿ.