ਵੇਦਨਾਕਮ੍ਮਟ੍ਠਾਨਵਣ੍ਣਨਾ

੩੫੯. ਅਥਸ੍ਸ ਭਗਵਾ ਸੋਮਨਸ੍ਸਂਪਾਹਨ੍ਤਿ ਤਿਸ੍ਸੋ ਵੇਦਨਾ ਆਰਭਿ. ਕਿਂ ਪਨ ਭਗਵਤਾ ਪੁਚ੍ਛਿਤਂ ਕਥਿਤਂ, ਅਪੁਚ੍ਛਿਤਂ, ਸਾਨੁਸਨ੍ਧਿਕਂ, ਅਨਨੁਸਨ੍ਧਿਕਨ੍ਤਿ? ਪੁਚ੍ਛਿਤਮੇਵ ਕਥਿਤਂ, ਨੋ ਅਪੁਚ੍ਛਿਤਂ, ਸਾਨੁਸਨ੍ਧਿਕਮੇਵ, ਨੋ ਅਨਨੁਸਨ੍ਧਿਕਂ. ਦੇਵਤਾਨਞ੍ਹਿ ਰੂਪਤੋ ਅਰੂਪਂ ਪਾਕਟਤਰਂ, ਅਰੂਪੇਪਿ ਵੇਦਨਾ ਪਾਕਟਤਰਾ. ਕਸ੍ਮਾ? ਦੇਵਤਾਨਞ੍ਹਿ ਕਰਜਕਾਯਂ ਸੁਖੁਮਂ, ਕਮ੍ਮਜਂ ਬਲਵਂ, ਕਰਜਕਾਯਸ੍ਸ ਸੁਖੁਮਤ੍ਤਾ, ਕਮ੍ਮਜਸ੍ਸ ਬਲਵਤ੍ਤਾ ਏਕਾਹਾਰਮ੍ਪਿ ਅਤਿਕ੍ਕਮਿਤ੍ਵਾ ਨ ਤਿਟ੍ਠਨ੍ਤਿ, ਉਣ੍ਹਪਾਸਾਣੇ ਠਪਿਤਸਪ੍ਪਿਪਿਣ੍ਡਿ ਵਿਯ ਵਿਲੀਯਨ੍ਤੀਤਿ ਸਬ੍ਬਂ ਬ੍ਰਹ੍ਮਜਾਲੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਤਸ੍ਮਾ ਭਗਵਾ ਸਕ੍ਕਸ੍ਸ ਤਿਸ੍ਸੋ ਵੇਦਨਾ ਆਰਭਿ. ਦੁਵਿਧਞ੍ਹਿ ਕਮ੍ਮਟ੍ਠਾਨਂ – ਰੂਪਕਮ੍ਮਟ੍ਠਾਨਂ, ਅਰੂਪਕਮ੍ਮਟ੍ਠਾਨਞ੍ਚ. ਰੂਪਪਰਿਗ੍ਗਹੋ, ਅਰੂਪਪਰਿਗ੍ਗਹੋਤਿਪਿ ਏਤਦੇਵ ਵੁਚ੍ਚਤਿ. ਤਤ੍ਥ ਭਗਵਾ ਯਸ੍ਸ ਰੂਪਂ ਪਾਕਟਂ, ਤਸ੍ਸ ਸਙ੍ਖੇਪਮਨਸਿਕਾਰਵਸੇਨ ਵਾ ਵਿਤ੍ਥਾਰਮਨਸਿਕਾਰਵਸੇਨ ਵਾ ਚਤੁਧਾਤੁਵਵਤ੍ਥਾਨਂ ਵਿਤ੍ਥਾਰੇਨ੍ਤੋ ਰੂਪਕਮ੍ਮਟ੍ਠਾਨਂ ਕਥੇਤਿ. ਯਸ੍ਸ ਅਰੂਪਂ ਪਾਕਟਂ, ਤਸ੍ਸ ਅਰੂਪਕਮ੍ਮਟ੍ਠਾਨਂ ਕਥੇਤਿ. ਕਥੇਨ੍ਤੋ ਚ ਤਸ੍ਸ ਵਤ੍ਥੁਭੂਤਂ ਰੂਪਕਮ੍ਮਟ੍ਠਾਨਂ ਦਸ੍ਸੇਤ੍ਵਾਵ ਕਥੇਤਿ, ਦੇਵਾਨਂ ਪਨ ਅਰੂਪਕਮ੍ਮਟ੍ਠਾਨਂ ਪਾਕਟਨ੍ਤਿ ਅਰੂਪਕਮ੍ਮਟ੍ਠਾਨਵਸੇਨ ਵੇਦਨਾ ਆਰਭਿ.

ਤਿਵਿਧੋ ਹਿ ਅਰੂਪਕਮ੍ਮਟ੍ਠਾਨੇ ਅਭਿਨਿਵੇਸੋ – ਫਸ੍ਸਵਸੇਨ, ਵੇਦਨਾਵਸੇਨ, ਚਿਤ੍ਤਵਸੇਨਾਤਿ. ਕਥਂ? ਏਕਚ੍ਚਸ੍ਸ ਹਿ ਸਙ੍ਖਿਤ੍ਤੇਨ ਵਾ ਵਿਤ੍ਥਾਰੇਨ ਵਾ ਪਰਿਗ੍ਗਹਿਤੇ ਰੂਪਕਮ੍ਮਟ੍ਠਾਨੇ ਤਸ੍ਮਿਂ ਆਰਮ੍ਮਣੇ ਚਿਤ੍ਤਚੇਤਸਿਕਾਨਂ ਪਠਮਾਭਿਨਿਪਾਤੋ ਤਂ ਆਰਮ੍ਮਣਂ ਫੁਸਨ੍ਤੋ ਉਪ੍ਪਜ੍ਜਮਾਨੋ ਫਸ੍ਸੋ ਪਾਕਟੋ ਹੋਤਿ. ਏਕਚ੍ਚਸ੍ਸ ਤਂ ਆਰਮ੍ਮਣਂ ਅਨੁਭਵਨ੍ਤੀ ਉਪ੍ਪਜ੍ਜਮਾਨਾ ਵੇਦਨਾ ਪਾਕਟਾ ਹੋਤਿ. ਏਕਚ੍ਚਸ੍ਸ ਤਂ ਆਰਮ੍ਮਣਂ ਪਰਿਗ੍ਗਹੇਤ੍ਵਾ ਤਂ ਵਿਜਾਨਨ੍ਤਂ ਉਪ੍ਪਜ੍ਜਮਾਨਂ ਵਿਞ੍ਞਾਣਂ ਪਾਕਟਂ ਹੋਤਿ.

ਤਤ੍ਥ ਯਸ੍ਸ ਫਸ੍ਸੋ ਪਾਕਟੋ ਹੋਤਿ, ਸੋਪਿ ਨ ਕੇਵਲਂ ਫਸ੍ਸੋਵ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਤਦੇਵ ਆਰਮ੍ਮਣਂ ਅਨੁਭਵਮਾਨਾ ਵੇਦਨਾਪਿ ਉਪ੍ਪਜ੍ਜਤਿ, ਸਞ੍ਜਾਨਮਾਨਾ ਸਞ੍ਞਾਪਿ, ਚੇਤਯਮਾਨਾ ਚੇਤਨਾਪਿ, ਵਿਜਾਨਮਾਨਂ ਵਿਞ੍ਞਾਣਮ੍ਪਿ ਉਪ੍ਪਜ੍ਜਤੀਤਿ ਫਸ੍ਸਪਞ੍ਚਮਕੇਯੇਵ ਪਰਿਗ੍ਗਣ੍ਹਾਤਿ. ਯਸ੍ਸ ਵੇਦਨਾ ਪਾਕਟਾ ਹੋਤਿ, ਸੋਪਿ ਨ ਕੇਵਲਂ ਵੇਦਨਾਵ ਉਪ੍ਪਜ੍ਜਤਿ, ਤਾਯ ਸਦ੍ਧਿਂ ਤਦੇਵ ਆਰਮ੍ਮਣਂ ਫੁਸਮਾਨੋ ਫਸ੍ਸੋਪਿ ਉਪ੍ਪਜ੍ਜਤਿ, ਸਞ੍ਜਾਨਮਾਨਾ ਸਞ੍ਞਾਪਿ, ਚੇਤਯਮਾਨਾ ਚੇਤਨਾਪਿ, ਵਿਜਾਨਮਾਨਂ ਵਿਞ੍ਞਾਣਮ੍ਪਿ ਉਪ੍ਪਜ੍ਜਤੀਤਿ ਫਸ੍ਸਪਞ੍ਚਮਕੇਯੇਵ ਪਰਿਗ੍ਗਣ੍ਹਾਤਿ. ਯਸ੍ਸ ਵਿਞ੍ਞਾਣਂ ਪਾਕਟਂ ਹੋਤਿ, ਸੋਪਿ ਨ ਕੇਵਲਂ ਵਿਞ੍ਞਾਣਮੇਵ ਉਪ੍ਪਜ੍ਜਤਿ, ਤੇਨ ਸਦ੍ਧਿਂ ਤਦੇਵਾਰਮ੍ਮਣਂ ਫੁਸਮਾਨੋ ਫਸ੍ਸੋਪਿ ਉਪ੍ਪਜ੍ਜਤਿ, ਅਨੁਭਵਮਾਨਾ ਵੇਦਨਾਪਿ, ਸਞ੍ਜਾਨਮਾਨਾ ਸਞ੍ਞਾਪਿ, ਚੇਤਯਮਾਨਾ ਚੇਤਨਾਪਿ ਉਪ੍ਪਜ੍ਜਤੀਤਿ ਫਸ੍ਸਪਞ੍ਚਮਕੇਯੇਵ ਪਰਿਗ੍ਗਣ੍ਹਾਤਿ.

ਸੋ ‘‘ਇਮੇ ਫਸ੍ਸਪਞ੍ਚਮਕਾ ਧਮ੍ਮਾ ਕਿਂ ਨਿਸ੍ਸਿਤਾ’’ਤਿ ਉਪਧਾਰੇਨ੍ਤੋ ‘‘ਵਤ੍ਥੁਨਿਸ੍ਸਿਤਾ’’ਤਿ ਪਜਾਨਾਤਿ. ਵਤ੍ਥੁ ਨਾਮ ਕਰਜਕਾਯੋ, ਯਂ ਸਨ੍ਧਾਯ ਵੁਤ੍ਤਂ – ‘‘ਇਦਞ੍ਚ ਪਨ ਮੇ ਵਿਞ੍ਞਾਣਂ ਏਤ੍ਥ ਸਿਤਂ ਏਤ੍ਥ ਪਟਿਬਦ੍ਧ’’ਨ੍ਤਿ. ਸੋ ਅਤ੍ਥਤੋ ਭੂਤਾਨਿ ਚੇਵ ਉਪਾਦਾਰੂਪਾਨਿ ਚ. ਏਵਮੇਤ੍ਥ ਵਤ੍ਥੁ ਰੂਪਂ, ਫਸ੍ਸਪਞ੍ਚਮਕਾ ਨਾਮਨ੍ਤਿ ਨਾਮਰੂਪਮਤ੍ਤਮੇਵ ਪਸ੍ਸਤਿ. ਰੂਪਞ੍ਚੇਤ੍ਥ ਰੂਪਕ੍ਖਨ੍ਧੋ, ਨਾਮਂ ਚਤ੍ਤਾਰੋ ਅਰੂਪਿਨੋ ਖਨ੍ਧਾਤਿ ਪਞ੍ਚਕ੍ਖਨ੍ਧਮਤ੍ਤਂ ਹੋਤਿ. ਨਾਮਰੂਪਵਿਨਿਮੁਤ੍ਤਾ ਹਿ ਪਞ੍ਚਕ੍ਖਨ੍ਧਾ, ਪਞ੍ਚਕ੍ਖਨ੍ਧਵਿਨਿਮੁਤ੍ਤਂ ਵਾ ਨਾਮਰੂਪਂ ਨਤ੍ਥਿ. ਸੋ ‘‘ਇਮੇ ਪਞ੍ਚਕ੍ਖਨ੍ਧਾ ਕਿਂ ਹੇਤੁਕਾ’’ਤਿ ਉਪਪਰਿਕ੍ਖਨ੍ਤੋ ‘‘ਅਵਿਜ੍ਜਾਦਿਹੇਤੁਕਾ’’ਤਿ ਪਸ੍ਸਤਿ. ਤਤੋ ‘‘ਪਚ੍ਚਯੋ ਚੇਵ ਪਚ੍ਚਯੁਪ੍ਪਨ੍ਨਞ੍ਚ ਇਦਂ, ਅਞ੍ਞੋ ਸਤ੍ਤੋ ਵਾ ਪੁਗ੍ਗਲੋ ਵਾ ਨਤ੍ਥਿ, ਸੁਦ੍ਧਸਙ੍ਖਾਰਪੁਞ੍ਜਮਤ੍ਤਮੇਵਾ’’ਤਿ ਸਪ੍ਪਚ੍ਚਯਨਾਮਰੂਪਵਸੇਨ ਤਿਲਕ੍ਖਣਂ ਆਰੋਪੇਤ੍ਵਾ ਵਿਪਸ੍ਸਨਾਪਟਿਪਾਟਿਯਾ ‘‘ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ’’ਤਿ ਸਮ੍ਮਸਨ੍ਤੋ ਵਿਚਰਤਿ, ਸੋ ਅਜ੍ਜ ਅਜ੍ਜਾਤਿ ਪਟਿਵੇਧਂ ਆਕਙ੍ਖਮਾਨੋ ਤਥਾਰੂਪੇ ਦਿਵਸੇ ਉਤੁਸਪ੍ਪਾਯਂ, ਪੁਗ੍ਗਲਸਪ੍ਪਾਯਂ, ਭੋਜਨਸਪ੍ਪਾਯਂ, ਧਮ੍ਮਸਵਨਸਪ੍ਪਾਯਂ ਵਾ ਲਭਿਤ੍ਵਾ ਏਕਪਲ੍ਲਙ੍ਕੇਨ ਨਿਸਿਨ੍ਨੋਵ ਵਿਪਸ੍ਸਨਂ ਮਤ੍ਥਕਂ ਪਾਪੇਤ੍ਵਾ ਅਰਹਤ੍ਤੇ ਪਤਿਟ੍ਠਾਤਿ. ਏਵਮਿਮੇਸਮ੍ਪਿ ਤਿਣ੍ਣਂ ਜਨਾਨਂ ਯਾਵ ਅਰਹਤ੍ਤਾ ਕਮ੍ਮਟ੍ਠਾਨਂ ਕਥਿਤਂ ਹੋਤਿ.

ਇਧ ਪਨ ਭਗਵਾ ਅਰੂਪਕਮ੍ਮਟ੍ਠਾਨਂ ਕਥੇਨ੍ਤੋ ਵੇਦਨਾਸੀਸੇਨ ਕਥੇਸਿ. ਫਸ੍ਸਵਸੇਨ ਹਿ ਵਿਞ੍ਞਾਣਵਸੇਨ ਵਾ ਕਥਿਯਮਾਨਂ ਏਤਸ੍ਸ ਨ ਪਾਕਟਂ ਹੋਤਿ, ਅਨ੍ਧਕਾਰਂ ਵਿਯ ਖਾਯਤਿ. ਵੇਦਨਾਵਸੇਨ ਪਨ ਪਾਕਟਂ ਹੋਤਿ. ਕਸ੍ਮਾ? ਵੇਦਨਾਨਂ ਉਪ੍ਪਤ੍ਤਿਯਾ ਪਾਕਟਤਾਯ. ਸੁਖਦੁਕ੍ਖਵੇਦਨਾਨਞ੍ਹਿ ਉਪ੍ਪਤ੍ਤਿ ਪਾਕਟਾ. ਯਦਾ ਸੁਖਂ ਉਪ੍ਪਜ੍ਜਤਿ, ਤਦਾ ਸਕਲਂ ਸਰੀਰਂ ਖੋਭੇਨ੍ਤਂ ਮਦ੍ਦਨ੍ਤਂ ਫਰਮਾਨਂ ਅਭਿਸਨ੍ਦਯਮਾਨਂ ਸਤਧੋਤਸਪ੍ਪਿਂ ਖਾਦਾਪਯਨ੍ਤਂ ਵਿਯ, ਸਤਪਾਕਤੇਲਂ ਮਕ੍ਖਯਮਾਨਂ ਵਿਯ, ਘਟਸਹਸ੍ਸੇਨ ਪਰਿਲ਼ਾਹਂ ਨਿਬ੍ਬਾਪਯਮਾਨਂ ਵਿਯ, ‘‘ਅਹੋ ਸੁਖਂ, ਅਹੋ ਸੁਖ’’ਨ੍ਤਿ ਵਾਚਂ ਨਿਚ੍ਛਾਰਯਮਾਨਮੇਵ ਉਪ੍ਪਜ੍ਜਤਿ. ਯਦਾ ਦੁਕ੍ਖਂ ਉਪ੍ਪਜ੍ਜਤਿ, ਤਦਾ ਸਕਲਸਰੀਰਂ ਖੋਭੇਨ੍ਤਂ ਮਦ੍ਦਨ੍ਤਂ ਫਰਮਾਨਂ ਅਭਿਸਨ੍ਦਯਮਾਨਂ ਤਤ੍ਤਫਾਲਂ ਪਵੇਸੇਨ੍ਤਂ ਵਿਯ, ਵਿਲੀਨਤਮ੍ਬਲੋਹੇਨ ਆਸਿਞ੍ਚਨ੍ਤਂ ਵਿਯ, ਸੁਕ੍ਖਤਿਣਵਨਪ੍ਪਤਿਮ੍ਹਿ ਅਰਞ੍ਞੇ ਦਾਰੁਉਕ੍ਕਾਕਲਾਪਂ ਖਿਪਮਾਨਂ ਵਿਯ ‘‘ਅਹੋ ਦੁਕ੍ਖਂ, ਅਹੋ ਦੁਕ੍ਖ’’ਨ੍ਤਿ ਵਿਪ੍ਪਲਾਪਯਮਾਨਮੇਵ ਉਪ੍ਪਜ੍ਜਤਿ. ਇਤਿ ਸੁਖਦੁਕ੍ਖਵੇਦਨਾਨਂ ਉਪ੍ਪਤ੍ਤਿ ਪਾਕਟਾ ਹੋਤਿ.

ਅਦੁਕ੍ਖਮਸੁਖਾ ਪਨ ਦੁਦ੍ਦੀਪਨਾ ਅਨ੍ਧਕਾਰੇਨ ਵਿਯ ਅਭਿਭੂਤਾ. ਸਾ ਸੁਖਦੁਕ੍ਖਾਨਂ ਅਪਗਮੇ ਸਾਤਾਸਾਤਪਟਿਕ੍ਖੇਪਵਸੇਨ ਮਜ੍ਝਤ੍ਤਾਕਾਰਭੂਤਾ ਅਦੁਕ੍ਖਮਸੁਖਾ ਵੇਦਨਾਤਿ ਨਯਤੋ ਗਣ੍ਹਨ੍ਤਸ੍ਸ ਪਾਕਟਾ ਹੋਤਿ. ਯਥਾ ਕਿਂ? ਯਥਾ ਅਨ੍ਤਰਾ ਪਿਟ੍ਠਿਪਾਸਾਣਂ ਆਰੁਹਿਤ੍ਵਾ ਪਲਾਤਸ੍ਸ ਮਿਗਸ੍ਸ ਅਨੁਪਦਂ ਗਚ੍ਛਨ੍ਤੋ ਮਿਗਲੁਦ੍ਦਕੋ ਪਿਟ੍ਠਿਪਾਸਾਣਸ੍ਸ ਓਰਭਾਗੇਪਿ ਪਰਭਾਗੇਪਿ ਪਦਂ ਦਿਸ੍ਵਾ ਮਜ੍ਝੇ ਅਪਸ੍ਸਨ੍ਤੋਪਿ ‘‘ਇਤੋ ਆਰੁਲ਼੍ਹੋ, ਇਤੋ ਓਰੁਲ਼੍ਹੋ, ਮਜ੍ਝੇ ਪਿਟ੍ਠਿਪਾਸਾਣੇ ਇਮਿਨਾ ਪਦੇਸੇਨ ਗਤੋ ਭਵਿਸ੍ਸਤੀ’’ਤਿ ਨਯਤੋ ਜਾਨਾਤਿ. ਏਵਂ ਆਰੁਲ਼੍ਹਟ੍ਠਾਨੇ ਪਦਂ ਵਿਯ ਹਿ ਸੁਖਵੇਦਨਾਯ ਉਪ੍ਪਤ੍ਤਿ ਪਾਕਟਾ ਹੋਤਿ, ਓਰੁਲ਼੍ਹਟ੍ਠਾਨੇ ਪਦਂ ਵਿਯ ਦੁਕ੍ਖਵੇਦਨਾਯ ਉਪ੍ਪਤ੍ਤਿ ਪਾਕਟਾ ਹੋਤਿ, ਇਤੋ ਆਰੁਯ੍ਹ, ਇਤੋ ਓਰੁਯ੍ਹ, ਮਜ੍ਝੇ ਏਵਂ ਗਤੋਤਿ ਨਯਤੋ ਗਹਣਂ ਵਿਯ ਸੁਖਦੁਕ੍ਖਾਨਂ ਅਪਗਮੇ ਸਾਤਾਸਾਤਪਟਿਕ੍ਖੇਪਵਸੇਨ ਮਜ੍ਝਤ੍ਤਾਕਾਰਭੂਤਾ ਅਦੁਕ੍ਖਮਸੁਖਾ ਵੇਦਨਾਤਿ ਨਯਤੋ ਗਣ੍ਹਨ੍ਤਸ੍ਸ ਪਾਕਟਾ ਹੋਤਿ. ਏਵਂ ਭਗਵਾ ਪਠਮਂ ਰੂਪਕਮ੍ਮਟ੍ਠਾਨਂ ਕਥੇਤ੍ਵਾ ਪਚ੍ਛਾ ਅਰੂਪਕਮ੍ਮਟ੍ਠਾਨਂ ਵੇਦਨਾਵਸੇਨ ਨਿਵਤ੍ਤੇਤ੍ਵਾ ਦਸ੍ਸੇਸਿ.

ਨ ਕੇਵਲਞ੍ਚ ਇਧੇਵ ਏਵਂ ਦਸ੍ਸੇਸਿ, ਮਹਾਸਤਿਪਟ੍ਠਾਨੇ, ਮਜ੍ਝਿਮਨਿਕਾਯਮ੍ਹਿ ਸਤਿਪਟ੍ਠਾਨੇ, ਚੂਲ਼ਤਣ੍ਹਾਸਙ੍ਖਯੇ, ਮਹਾਤਣ੍ਹਾਸਙ੍ਖਯੇ, ਚੂਲ਼ਵੇਦਲ੍ਲਸੁਤ੍ਤੇ, ਮਹਾਵੇਦਲ੍ਲਸੁਤ੍ਤੇ, ਰਟ੍ਠਪਾਲਸੁਤ੍ਤੇ, ਮਾਗਣ੍ਡਿਯਸੁਤ੍ਤੇ, ਧਾਤੁਵਿਭਙ੍ਗੇ, ਆਨੇਞ੍ਜਸਪ੍ਪਾਯੇ, ਸਕਲੇ ਵੇਦਨਾਸਂਯੁਤ੍ਤੇਤਿ ਏਵਂ ਅਨੇਕੇਸੁ ਸੁਤ੍ਤਨ੍ਤੇਸੁ ਪਠਮਂ ਰੂਪਕਮ੍ਮਟ੍ਠਾਨਂ ਕਥੇਤ੍ਵਾ ਪਚ੍ਛਾ ਅਰੂਪਕਮ੍ਮਟ੍ਠਾਨਂ ਵੇਦਨਾਵਸੇਨ ਨਿਵਤ੍ਤੇਤ੍ਵਾ ਦਸ੍ਸੇਸਿ. ਯਥਾ ਚ ਤੇਸੁ ਤੇਸੁ, ਏਵਂ ਇਮਸ੍ਮਿਮ੍ਪਿ ਸਕ੍ਕਪਞ੍ਹੇ ਪਠਮਂ ਰੂਪਕਮ੍ਮਟ੍ਠਾਨਂ ਕਥੇਤ੍ਵਾ ਪਚ੍ਛਾ ਅਰੂਪਕਮ੍ਮਟ੍ਠਾਨਂ ਵੇਦਨਾਵਸੇਨ ਨਿਵਤ੍ਤੇਤ੍ਵਾ ਦਸ੍ਸੇਸਿ. ਰੂਪਕਮ੍ਮਟ੍ਠਾਨਂ ਪਨੇਤ੍ਥ ਵੇਦਨਾਯ ਆਰਮ੍ਮਣਮਤ੍ਤਕਂਯੇਵ ਸਙ੍ਖਿਤ੍ਤਂ, ਤਸ੍ਮਾ ਪਾਲ਼ਿਯਂ ਨਾਰੁਲ਼੍ਹਂ ਭਵਿਸ੍ਸਤਿ.

੩੬੦. ਅਰੂਪਕਮ੍ਮਟ੍ਠਾਨੇ ਯਂ ਤਸ੍ਸ ਪਾਕਟਂ ਵੇਦਨਾਵਸੇਨ ਅਭਿਨਿਵੇਸਮੁਖਂ, ਤਮੇਵ ਦਸ੍ਸੇਤੁਂ ਸੋਮਨਸ੍ਸਂਪਾਹਂ, ਦੇਵਾਨਮਿਨ੍ਦਾਤਿਆਦਿਮਾਹ. ਤਤ੍ਥ ਦੁਵਿਧੇਨਾਤਿ ਦ੍ਵਿਵਿਧੇਨ, ਦ੍ਵੀਹਿ ਕੋਟ੍ਠਾਸੇਹੀਤਿ ਅਤ੍ਥੋ. ਏਵਰੂਪਂ ਸੋਮਨਸ੍ਸਂ ਨ ਸੇਵਿਤਬ੍ਬਨ੍ਤਿ ਏਵਰੂਪਂ ਗੇਹਸਿਤਸੋਮਨਸ੍ਸਂ ਨ ਸੇਵਿਤਬ੍ਬਂ. ਗੇਹਸਿਤਸੋਮਨਸ੍ਸਂ ਨਾਮ ‘‘ਤਤ੍ਥ ਕਤਮਾਨਿ ਛ ਗੇਹਸਿਤਾਨਿ ਸੋਮਨਸ੍ਸਾਨਿ? ਚਕ੍ਖੁਵਿਞ੍ਞੇਯ੍ਯਾਨਂ ਰੂਪਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਮਨੋਰਮਾਨਂ ਲੋਕਾਮਿਸਪਟਿਸਂਯੁਤ੍ਤਾਨਂ ਪਟਿਲਾਭਂ ਵਾ ਪਟਿਲਾਭਤੋ ਸਮਨੁਪਸ੍ਸਤੋ, ਪੁਬ੍ਬੇ ਵਾ ਪਟਿਲਦ੍ਧਪੁਬ੍ਬਂ ਅਤੀਤਂ ਨਿਰੁਦ੍ਧਂ ਵਿਪਰਿਣਤਂ ਸਮਨੁਸ੍ਸਰਤੋ ਉਪ੍ਪਜ੍ਜਤਿ ਸੋਮਨਸ੍ਸਂ, ਯਂ ਏਵਰੂਪਂ ਸੋਮਨਸ੍ਸਂ, ਇਦਂ ਵੁਚ੍ਚਤਿ ਗੇਹਸਿਤਂ ਸੋਮਨਸ੍ਸ’’ਨ੍ਤਿ ਏਵਂ ਛਸੁ ਦ੍ਵਾਰੇਸੁ ਵੁਤ੍ਤਕਾਮਗੁਣਨਿਸ੍ਸਿਤਂ ਸੋਮਨਸ੍ਸਂ (ਮ. ਨਿ. ੩.੩੦੬).

ਏਵਰੂਪਂ ਸੋਮਨਸ੍ਸਂ ਸੇਵਿਤਬ੍ਬਨ੍ਤਿ ਏਵਰੂਪਂ ਨੇਕ੍ਖਮ੍ਮਸਿਤਂ ਸੋਮਨਸ੍ਸਂ ਸੇਵਿਤਬ੍ਬਂ. ਨੇਕ੍ਖਮ੍ਮਸਿਤਂ ਸੋਮਨਸ੍ਸਂ ਨਾਮ – ‘‘ਤਤ੍ਥ ਕਤਮਾਨਿ ਛ ਨੇਕ੍ਖਮ੍ਮਸਿਤਾਨਿ ਸੋਮਨਸ੍ਸਾਨਿ? ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ ਸਬ੍ਬੇ ਤੇ ਰੂਪਾ ਅਨਿਚ੍ਚਾ, ਦੁਕ੍ਖਾ, ਵਿਪਰਿਣਾਮਧਮ੍ਮਾਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਪਸ੍ਸਤੋ ਉਪ੍ਪਜ੍ਜਤਿ ਸੋਮਨਸ੍ਸਂ, ਯਂ ਏਵਰੂਪਂ ਸੋਮਨਸ੍ਸਂ, ਇਦਂ ਵੁਚ੍ਚਤਿ ਨੇਕ੍ਖਮ੍ਮਸਿਤਂ ਸੋਮਨਸ੍ਸ’’ਨ੍ਤਿ (ਮ. ਨਿ. ੩.੩੦੮) ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਅਨਿਚ੍ਚਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਸ੍ਸੁਕ੍ਕਾਪੇਤੁਂ ਸਕ੍ਕੋਨ੍ਤਸ੍ਸ ‘‘ਉਸ੍ਸੁਕ੍ਕਿਤਾ ਮੇ ਵਿਪਸ੍ਸਨਾ’’ਤਿ ਸੋਮਨਸ੍ਸਜਾਤਸ੍ਸ ਉਪ੍ਪਨ੍ਨਂ ਸੋਮਨਸ੍ਸਂ. ਸੇਵਿਤਬ੍ਬਨ੍ਤਿ ਇਦਂ ਨੇਕ੍ਖਮ੍ਮਵਸੇਨ, ਵਿਪਸ੍ਸਨਾਵਸੇਨ, ਅਨੁਸ੍ਸਤਿਵਸੇਨ, ਪਠਮਜ੍ਝਾਨਾਦਿਵਸੇਨ ਚ ਉਪ੍ਪਜ੍ਜਨਕਸੋਮਨਸ੍ਸਂ ਸੇਵਿਤਬ੍ਬਂ ਨਾਮ.

ਤਤ੍ਥ ਯਂ ਚੇ ਸਵਿਤਕ੍ਕਂ ਸਵਿਚਾਰਨ੍ਤਿ ਤਸ੍ਮਿਮ੍ਪਿ ਨੇਕ੍ਖਮ੍ਮਸਿਤੇ ਸੋਮਨਸ੍ਸੇ ਯਂ ਨੇਕ੍ਖਮ੍ਮਵਸੇਨ, ਵਿਪਸ੍ਸਨਾਵਸੇਨ, ਅਨੁਸ੍ਸਤਿਵਸੇਨ, ਪਠਮਜ੍ਝਾਨਵਸੇਨ ਚ ਉਪ੍ਪਨ੍ਨਂ ਸਵਿਤਕ੍ਕਂ ਸਵਿਚਾਰਂ ਸੋਮਨਸ੍ਸਨ੍ਤਿ ਜਾਨੇਯ੍ਯ. ਯਂ ਚੇ ਅਵਿਤਕ੍ਕਂ ਅਵਿਚਾਰਨ੍ਤਿ ਯਂ ਪਨ ਦੁਤਿਯਤਤਿਯਜ੍ਝਾਨਵਸੇਨ ਉਪ੍ਪਨ੍ਨਂ ਅਵਿਤਕ੍ਕਂ ਅਵਿਚਾਰਂ ਸੋਮਨਸ੍ਸਨ੍ਤਿ ਜਾਨੇਯ੍ਯ. ਯੇ ਅਵਿਤਕ੍ਕੇ ਅਵਿਚਾਰੇ, ਤੇ ਪਣੀਤਤਰੇਤਿ ਏਤੇਸੁਪਿ ਦ੍ਵੀਸੁ ਯਂ ਅਵਿਤਕ੍ਕਂ ਅਵਿਚਾਰਂ, ਤਂ ਪਣੀਤਤਰਨ੍ਤਿ ਅਤ੍ਥੋ.

ਇਮਿਨਾ ਕਿਂ ਕਥਿਤਂ ਹੋਤਿ? ਦ੍ਵਿਨ੍ਨਂ ਅਰਹਤ੍ਤਂ ਕਥਿਤਂ. ਕਥਂ? ਏਕੋ ਕਿਰ ਭਿਕ੍ਖੁ ਸਵਿਤਕ੍ਕਸਵਿਚਾਰੇ ਸੋਮਨਸ੍ਸੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ‘‘ਇਦਂ ਸੋਮਨਸ੍ਸਂ ਕਿਂ ਨਿਸ੍ਸਿਤ’’ਨ੍ਤਿ ਉਪਧਾਰੇਨ੍ਤੋ ‘‘ਵਤ੍ਥੁਨਿਸ੍ਸਿਤ’’ਨ੍ਤਿ ਪਜਾਨਾਤੀਤਿ ਫਸ੍ਸਪਞ੍ਚਮਕੇ ਵੁਤ੍ਤਨਯੇਨੇਵ ਅਨੁਕ੍ਕਮੇਨ ਅਰਹਤ੍ਤੇ ਪਤਿਟ੍ਠਾਤਿ. ਏਕੋ ਅਵਿਤਕ੍ਕਅਵਿਚਾਰੇ ਸੋਮਨਸ੍ਸੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ਵੁਤ੍ਤਨਯੇਨੇਵ ਅਰਹਤ੍ਤੇ ਪਤਿਟ੍ਠਾਤਿ. ਤਤ੍ਥ ਅਭਿਨਿਵਿਟ੍ਠਸੋਮਨਸ੍ਸੇਸੁਪਿ ਸਵਿਤਕ੍ਕਸਵਿਚਾਰਤੋ ਅਵਿਤਕ੍ਕਅਵਿਚਾਰਂ ਪਣੀਤਤਰਂ. ਸਵਿਤਕ੍ਕਸਵਿਚਾਰਸੋਮਨਸ੍ਸਵਿਪਸ੍ਸਨਾਤੋਪਿ ਅਵਿਤਕ੍ਕਅਵਿਚਾਰਵਿਪਸ੍ਸਨਾ ਪਣੀਤਤਰਾ. ਸਵਿਤਕ੍ਕਸਵਿਚਾਰਸੋਮਨਸ੍ਸਫਲਸਮਾਪਤ੍ਤਿਤੋਪਿ ਅਵਿਤਕ੍ਕਅਵਿਚਾਰਸੋਮਨਸ੍ਸਫਲਸਮਾਪਤ੍ਤਿਯੇਵ ਪਣੀਤਤਰਾ. ਤੇਨਾਹ ਭਗਵਾ ‘‘ਯੇ ਅਵਿਤਕ੍ਕੇ ਅਵਿਚਾਰੇ, ਤੇ ਪਣੀਤਤਰੇ’’ਤਿ.

੩੬੧. ਏਵਰੂਪਂ ਦੋਮਨਸ੍ਸਂ ਨ ਸੇਵਿਤਬ੍ਬਨ੍ਤਿ ਏਵਰੂਪਂ ਗੇਹਸਿਤਦੋਮਨਸ੍ਸਂ ਨ ਸੇਵਿਤਬ੍ਬਂ. ਗੇਹਸਿਤਦੋਮਨਸ੍ਸਂ ਨਾਮ – ‘‘ਤਤ੍ਥ ਕਤਮਾਨਿ ਛ ਗੇਹਸਿਤਾਨਿ ਦੋਮਨਸ੍ਸਾਨਿ? ਚਕ੍ਖੁਵਿਞ੍ਞੇਯ੍ਯਾਨਂ ਰੂਪਾਨਂ ਇਟ੍ਠਾਨਂ ਕਨ੍ਤਾਨਂ ਮਨਾਪਾਨਂ ਮਨੋਰਮਾਨਂ ਲੋਕਾਮਿਸਪਟਿਸਂਯੁਤ੍ਤਾਨਂ ਅਪ੍ਪਟਿਲਾਭਂ ਵਾ ਅਪ੍ਪਟਿਲਾਭਤੋ ਸਮਨੁਪਸ੍ਸਤੋ ਪੁਬ੍ਬੇ ਵਾ ਅਪਟਿਲਦ੍ਧਪੁਬ੍ਬਂ ਅਤੀਤਂ ਨਿਰੁਦ੍ਧਂ ਵਿਪਰਿਣਤਂ ਸਮਨੁਸ੍ਸਰਤੋ ਉਪ੍ਪਜ੍ਜਤਿ ਦੋਮਨਸ੍ਸਂ, ਯਂ ਏਵਰੂਪਂ ਦੋਮਨਸ੍ਸਂ, ਇਦਂ ਵੁਚ੍ਚਤਿ ਗੇਹਸਿਤਦੋਮਨਸ੍ਸ’’ਨ੍ਤਿ (ਮ. ਨਿ. ੩.੩੦੭). ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣਂ ਨਾਨੁਭਵਿਂ, ਨਾਨੁਭਵਿਸ੍ਸਾਮਿ, ਨਾਨੁਭਵਾਮੀਤਿ ਵਿਤਕ੍ਕਯਤੋ ਉਪ੍ਪਨ੍ਨਂ ਕਾਮਗੁਣਨਿਸ੍ਸਿਤਂ ਦੋਮਨਸ੍ਸਂ.

ਏਵਰੂਪਂ ਦੋਮਨਸ੍ਸਂ ਸੇਵਿਤਬ੍ਬਨ੍ਤਿ ਏਵਰੂਪਂ ਨੇਕ੍ਖਮ੍ਮਸਿਤਦੋਮਨਸ੍ਸਂ ਸੇਵਿਤਬ੍ਬਂ. ਨੇਕ੍ਖਮ੍ਮਸਿਤਦੋਮਨਸ੍ਸਂ ਨਾਮ – ‘‘ਤਤ੍ਥ ਕਤਮਾਨਿ ਛ ਨੇਕ੍ਖਮ੍ਮਸਿਤਾਨਿ ਦੋਮਨਸ੍ਸਾਨਿ? ਰੂਪਾਨਂ ਤ੍ਵੇਵ ਅਨਿਚ੍ਚਤਂ ਵਿਦਿਤ੍ਵਾ ਵਿਪਰਿਣਾਮਵਿਰਾਗਨਿਰੋਧਂ ਪੁਬ੍ਬੇ ਚੇਵ ਰੂਪਾ ਏਤਰਹਿ ਚ ਸਬ੍ਬੇ ਤੇ ਰੂਪਾ ਅਨਿਚ੍ਚਾ, ਦੁਕ੍ਖਾ, ਵਿਪਰਿਣਾਮਧਮ੍ਮਾਤਿ ਏਵਮੇਤਂ ਯਥਾਭੂਤਂ ਸਮ੍ਪਪ੍ਪਞ੍ਞਾਯ ਦਿਸ੍ਵਾ ਅਨੁਤ੍ਤਰੇਸੁ ਵਿਮੋਕ੍ਖੇਸੁ ਪਿਹਂ ਉਪਟ੍ਠਾਪੇਤਿ ‘ਕੁਦਾਸ੍ਸੁ ਨਾਮਾਹਂ ਤਦਾਯਤਨਂ, ਉਪਸਮ੍ਪਜ੍ਜ ਵਿਹਰਿਸ੍ਸਾਮਿ, ਯਦਰਿਯਾ ਏਤਰਹਿ ਆਯਤਨਂ ਉਪਸਮ੍ਪਜ੍ਜ ਵਿਹਰਨ੍ਤੀ’ਤਿ. ਇਤਿ ਅਨੁਤ੍ਤਰੇਸੁ ਵਿਮੋਕ੍ਖੇਸੁ ਪਿਹਂ ਉਪਟ੍ਠਾਪਯਤੋ ਉਪ੍ਪਜ੍ਜਤਿ ਪਿਹਪਚ੍ਚਯਾ ਦੋਮਨਸ੍ਸਂ, ਯਂ ਏਵਰੂਪਂ ਦੋਮਨਸ੍ਸਂ, ਇਦਂ ਵੁਚ੍ਚਤਿ ਨੇਕ੍ਖਮ੍ਮਸਿਤਦੋਮਨਸ੍ਸ’’ਨ੍ਤਿ (ਮ. ਨਿ. ੩.੩੦੭) ਏਵਂ ਛਸੁ ਦ੍ਵਾਰੇਸੁ ਇਟ੍ਠਾਰਮ੍ਮਣੇ ਆਪਾਥਗਤੇ ਅਨੁਤ੍ਤਰਵਿਮੋਕ੍ਖਸਙ੍ਖਾਤਅਰਿਯਫਲਧਮ੍ਮੇਸੁ ਪਿਹਂ ਉਪਟ੍ਠਪੇਤ੍ਵਾ ਤਦਧਿਗਮਾਯ ਅਨਿਚ੍ਚਾਦਿਵਸੇਨ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਸ੍ਸੁਕ੍ਕਾਪੇਤੁਮਸਕ੍ਕੋਨ੍ਤਸ੍ਸ ਇਮਮ੍ਪਿ ਪਕ੍ਖਂ, ਇਮਮ੍ਪਿ ਮਾਸਂ, ਇਮਮ੍ਪਿ ਸਂਵਚ੍ਛਰਂ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਿਯਭੂਮਿਂ ਪਾਪੁਣਿਤੁਂ ਨਾਸਕ੍ਖਿਨ੍ਤਿ ਅਨੁਸੋਚਤੋ ਉਪ੍ਪਨ੍ਨਂ ਦੋਮਨਸ੍ਸਂ. ਸੇਵਿਤਬ੍ਬਨ੍ਤਿ ਇਦਂ ਨੇਕ੍ਖਮ੍ਮਵਸੇਨ, ਵਿਪਸ੍ਸਨਾਵਸੇਨ, ਅਨੁਸ੍ਸਤਿਵਸੇਨ, ਪਠਮਜ੍ਝਾਨਾਦਿਵਸੇਨ ਚ ਉਪ੍ਪਜ੍ਜਨਕਦੋਮਨਸ੍ਸਂ ਸੇਵਿਤਬ੍ਬਂ ਨਾਮ.

ਤਤ੍ਥ ਯਂ ਚੇ ਸਵਿਤਕ੍ਕਸਵਿਚਾਰਨ੍ਤਿ ਤਸ੍ਮਿਮ੍ਪਿ ਦੁਵਿਧੇ ਦੋਮਨਸ੍ਸੇ ਗੇਹਸਿਤਦੋਮਨਸ੍ਸਮੇਵ ਸਵਿਤਕ੍ਕਸਵਿਚਾਰਦੋਮਨਸ੍ਸਂ ਨਾਮ. ਨੇਕ੍ਖਮ੍ਮਵਸੇਨ, ਵਿਪਸ੍ਸਨਾਵਸੇਨ, ਅਨੁਸ੍ਸਤਿਵਸੇਨ, ਪਠਮਦੁਤਿਯਜ੍ਝਾਨਵਸੇਨ ਚ ਉਪ੍ਪਨ੍ਨਦੋਮਨਸ੍ਸਂ ਪਨ ਅਵਿਤਕ੍ਕਅਵਿਚਾਰਦੋਮਨਸ੍ਸਨ੍ਤਿ ਵੇਦਿਤਬ੍ਬਂ. ਨਿਪ੍ਪਰਿਯਾਯੇਨ ਪਨ ਅਵਿਤਕ੍ਕਅਵਿਚਾਰਦੋਮਨਸ੍ਸਂ ਨਾਮ ਨਤ੍ਥਿ. ਦੋਮਨਸ੍ਸਿਨ੍ਦ੍ਰਿਯਞ੍ਹਿ ਏਕਂਸੇਨ ਅਕੁਸਲਞ੍ਚੇਵ ਸਵਿਤਕ੍ਕਸਵਿਚਾਰਞ੍ਚ, ਏਤਸ੍ਸ ਪਨ ਭਿਕ੍ਖੁਨੋ ਮਞ੍ਞਨਵਸੇਨ ਸਵਿਤਕ੍ਕਸਵਿਚਾਰਨ੍ਤਿ ਚ ਅਵਿਤਕ੍ਕਅਵਿਚਾਰਨ੍ਤਿ ਚ ਵੁਤ੍ਤਂ.

ਤਤ੍ਰਾਯਂ ਨਯੋ – ਇਧ ਭਿਕ੍ਖੁ ਦੋਮਨਸ੍ਸਪਚ੍ਚਯਭੂਤੇ ਸਵਿਤਕ੍ਕਸਵਿਚਾਰਧਮ੍ਮੇ ਅਵਿਤਕ੍ਕਅਵਿਚਾਰਧਮ੍ਮੇ ਚ ਦੋਮਨਸ੍ਸਪਚ੍ਚਯਾ ਏਵ ਉਪ੍ਪਨ੍ਨੇ ਮਗ੍ਗਫਲਧਮ੍ਮੇ ਚ ਅਞ੍ਞੇਸਂ ਪਟਿਪਤ੍ਤਿਦਸ੍ਸਨਵਸੇਨ ਦੋਮਨਸ੍ਸਨ੍ਤਿ ਗਹੇਤ੍ਵਾ ‘‘ਕਦਾ ਨੁ ਖੋ ਮੇ ਸਵਿਤਕ੍ਕਸਵਿਚਾਰਦੋਮਨਸ੍ਸੇ ਵਿਪਸ੍ਸਨਾ ਪਟ੍ਠਪਿਤਾ ਭਵਿਸ੍ਸਤਿ, ਕਦਾ ਅਵਿਤਕ੍ਕਅਵਿਚਾਰਦੋਮਨਸ੍ਸੇ’’ਤਿ ਚ ‘‘ਕਦਾ ਨੁ ਖੋ ਮੇ ਸਵਿਤਕ੍ਕਸਵਿਚਾਰਦੋਮਨਸ੍ਸਫਲਸਮਾਪਤ੍ਤਿ ਨਿਬ੍ਬਤ੍ਤਿਤਾ ਭਵਿਸ੍ਸਤਿ, ਕਦਾ ਅਵਿਤਕ੍ਕਅਵਿਚਾਰਦੋਮਨਸ੍ਸਫਲਸਮਾਪਤ੍ਤੀ’’ਤਿ ਚਿਨ੍ਤੇਤ੍ਵਾ ਤੇਮਾਸਿਕਂ, ਛਮਾਸਿਕਂ, ਨਵਮਾਸਿਕਂ ਵਾ ਪਟਿਪਦਂ ਗਣ੍ਹਾਤਿ. ਤੇਮਾਸਿਕਂ ਗਹੇਤ੍ਵਾ ਪਠਮਮਾਸੇ ਏਕਂ ਯਾਮਂ ਜਗ੍ਗਤਿ, ਦ੍ਵੇ ਯਾਮੇ ਨਿਦ੍ਦਾਯ ਓਕਾਸਂ ਕਰੋਤਿ, ਮਜ੍ਝਿਮੇ ਮਾਸੇ ਦ੍ਵੇ ਯਾਮੇ ਜਗ੍ਗਤਿ, ਏਕਂ ਯਾਮਂ ਨਿਦ੍ਦਾਯ ਓਕਾਸਂ ਕਰੋਤਿ, ਪਚ੍ਛਿਮਮਾਸੇ ਚਙ੍ਕਮਨਿਸਜ੍ਜਾਯੇਵ ਯਾਪੇਤਿ. ਏਵਂ ਚੇ ਅਰਹਤ੍ਤਂ ਪਾਪੁਣਾਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਪਾਪੁਣਾਤਿ, ਵਿਸੇਸੇਤ੍ਵਾ ਛਮਾਸਿਕਂ ਗਣ੍ਹਾਤਿ. ਤਤ੍ਰਾਪਿ ਦ੍ਵੇ ਦ੍ਵੇ ਮਾਸੇ ਵੁਤ੍ਤਨਯੇਨ ਪਟਿਪਜ੍ਜਿਤ੍ਵਾ ਅਰਹਤ੍ਤਂ ਪਾਪੁਣਿਤੁਂ ਅਸਕ੍ਕੋਨ੍ਤੋ ਵਿਸੇਸੇਤ੍ਵਾ ਨਵਮਾਸਿਕਂ ਗਣ੍ਹਾਤਿ. ਤਤ੍ਰਾਪਿ ਤਯੋ ਤਯੋ ਮਾਸੇ ਤਥੇਵ ਪਟਿਪਜ੍ਜਿਤ੍ਵਾ ਅਰਹਤ੍ਤਂ ਪਾਪੁਣਿਤੁਂ ਅਸਕ੍ਕੋਨ੍ਤਸ੍ਸ ‘‘ਨ ਲਦ੍ਵਂ ਵਤ ਮੇ ਸਬ੍ਰਹ੍ਮਚਾਰੀਹਿ ਸਦ੍ਧਿਂ ਵਿਸੁਦ੍ਧਿਪਵਾਰਣਂ ਪਵਾਰੇਤੁ’’ਨ੍ਤਿ ਆਵਜ੍ਜਤੋ ਦੋਮਨਸ੍ਸਂ ਉਪ੍ਪਜ੍ਜਤਿ, ਅਸ੍ਸੁਧਾਰਾ ਪਵਤ੍ਤਨ੍ਤਿ ਗਾਮਨ੍ਤਪਬ੍ਭਾਰਵਾਸੀਮਹਾਸੀਵਤ੍ਥੇਰਸ੍ਸ ਵਿਯ.