ਸਕ੍ਕੂਪਸਙ੍ਕਮਵਣ੍ਣਨਾ

੩੫੦. ਪਟਿਸਮ੍ਮੋਦਤੀਤਿ ‘‘ਸਂਸਨ੍ਦਤਿ ਖੋ ਤੇ’’ਤਿਆਦੀਨਿ ਵਦਨ੍ਤੋ ਭਗਵਾ ਸਮ੍ਮੋਦਤਿ, ਪਞ੍ਚਸਿਖੋ ਪਟਿਸਮ੍ਮੋਦਤਿ. ਗਾਥਾ ਚ ਭਾਸਨ੍ਤੋ ਪਞ੍ਚਸਿਖੋ ਸਮ੍ਮੋਦਤਿ, ਭਗਵਾ ਪਟਿਸਮ੍ਮੋਦਤਿ. ਆਮਨ੍ਤੇਸੀਤਿ ਜਾਨਾਪੇਸਿ. ਤਸ੍ਸ ਕਿਰੇਵਂ ਅਹੋਸਿ ‘‘ਅਯਂ ਪਞ੍ਚਸਿਖੋ ਮਯਾ ਮਮ ਕਮ੍ਮੇਨ ਪੇਸਿਤੋ ਅਤ੍ਤਨੋ ਕਮ੍ਮਂ ਕਰੋਤਿ. ਏਵਰੂਪਸ੍ਸ ਸਤ੍ਥੁ ਸਨ੍ਤਿਕੇ ਠਤ੍ਵਾ ਕਾਮਗੁਣੂਪਸਞ੍ਹਿਤਂ ਅਨਨੁਚ੍ਛਵਿਕਂ ਕਥੇਸਿ, ਨਟਾ ਨਾਮ ਨਿਲ੍ਲਜ੍ਜਾ ਹੋਨ੍ਤਿ, ਕਥੇਨ੍ਤੋ ਵਿਪ੍ਪਕਾਰਮ੍ਪਿ ਦਸ੍ਸੇਯ੍ਯ, ਹਨ੍ਦ ਨਂ ਮਮ ਕਮ੍ਮਂ ਜਾਨਾਪੇਮੀ’’ਤਿ ਚਿਨ੍ਤੇਤ੍ਵਾ ਆਮਨ੍ਤੇਸਿ.

੩੫੧. ਏਵਞ੍ਚ ਪਨ ਤਥਾਗਤਾਤਿ ਧਮ੍ਮਸਙ੍ਗਾਹਕਤ੍ਥੇਰੇਹਿ ਠਪਿਤਵਚਨਂ. ਅਭਿਵਦਨ੍ਤੀਤਿ ਅਭਿਵਾਦਨਸਮ੍ਪਟਿਚ੍ਛਨੇਨ ਵਡ੍ਢਿਤਵਚਨੇਨ ਵਦਨ੍ਤਿ. ਅਭਿਵਦਿਤੋਤਿ ਵਡ੍ਢਿਤਵਚਨੇਨ ਵੁਤ੍ਤੋ.

ਉਰੁਨ੍ਦਾ ਸਮਪਾਦੀਤਿ ਮਹਨ੍ਤਾ ਵਿਵਟਾ ਅਹੋਸਿ, ਅਨ੍ਧਕਾਰੋ ਗੁਹਾਯਂ ਅਨ੍ਤਰਧਾਯਿ. ਆਲੋਕੋ ਉਦਪਾਦੀਤਿ ਯੋ ਪਕਤਿਯਾ ਗੁਹਾਯਂ ਅਨ੍ਧਕਾਰੋ, ਸੋ ਅਨ੍ਤਰਹਿਤੋ, ਆਲੋਕੋ ਜਾਤੋ. ਸਬ੍ਬਮੇਤਂ ਧਮ੍ਮਸਙ੍ਗਾਹਕਾਨਂ ਵਚਨਂ.

੩੫੨. ਚਿਰਪਟਿਕਾਹਂ, ਭਨ੍ਤੇਤਿ ਚਿਰਤੋ ਅਹਂ, ਚਿਰਤੋ ਪਟ੍ਠਾਯਾਹਂ ਦਸ੍ਸਨਕਾਮੋਤਿ ਅਤ੍ਥੋ. ਕੇਹਿਚਿ ਕੇਹਿਚਿ ਕਿਚ੍ਚਕਰਣੀਯੇਹੀਤਿ ਦੇਵਾਨਂ ਧੀਤਾ ਚ ਪੁਤ੍ਤਾ ਚ ਅਙ੍ਕੇ ਨਿਬ੍ਬਤ੍ਤਨ੍ਤਿ, ਪਾਦਪਰਿਚਾਰਿਕਾ ਇਤ੍ਥਿਯੋ ਸਯਨੇ ਨਿਬ੍ਬਤ੍ਤਨ੍ਤਿ, ਤਾਸਂ ਮਣ੍ਡਨਪਸਾਧਨਕਾਰਿਕਾ ਦੇਵਤਾ ਸਯਨਂ ਪਰਿਵਾਰੇਤ੍ਵਾ ਨਿਬ੍ਬਤ੍ਤਨ੍ਤਿ, ਵੇਯ੍ਯਾਵਚ੍ਚਕਰਾ ਅਨ੍ਤੋਵਿਮਾਨੇ ਨਿਬ੍ਬਤ੍ਤਨ੍ਤਿ, ਏਤੇਸਂ ਅਤ੍ਥਾਯ ਅਡ੍ਡਕਰਣਂ ਨਾਮ ਨਤ੍ਥਿ. ਯੇ ਪਨ ਸੀਮਨ੍ਤਰੇ ਨਿਬ੍ਬਤ੍ਤਨ੍ਤਿ, ਤੇ ‘‘ਤਵ ਸਨ੍ਤਕਾ, ਮਮ ਸਨ੍ਤਕਾ’’ਤਿ ਨਿਚ੍ਛੇਤੁਂ ਅਸਕ੍ਕੋਨ੍ਤਾ ਅਡ੍ਡਂ ਕਰੋਨ੍ਤਿ, ਸਕ੍ਕਂ ਦੇਵਰਾਜਾਨਂ ਪੁਚ੍ਛਨ੍ਤਿ. ਸੋ ‘‘ਯਸ੍ਸ ਵਿਮਾਨਂ ਆਸਨ੍ਨਤਰਂ, ਤਸ੍ਸ ਸਨ੍ਤਕਾ’’ਤਿ ਵਦਤਿ. ਸਚੇ ਦ੍ਵੇਪਿ ਸਮਟ੍ਠਾਨੇ ਹੋਨ੍ਤਿ, ‘‘ਯਸ੍ਸ ਵਿਮਾਨਂ ਓਲੋਕੇਨ੍ਤੀ ਠਿਤਾ, ਤਸ੍ਸ ਸਨ੍ਤਕਾ’’ਤਿ ਵਦਤਿ. ਸਚੇ ਏਕਮ੍ਪਿ ਨ ਓਲੋਕੇਤਿ, ਤਂ ਉਭਿਨ੍ਨਂ ਕਲਹੁਪਚ੍ਛੇਦਨਤ੍ਥਂ ਅਤ੍ਤਨੋ ਸਨ੍ਤਕਂ ਕਰੋਤਿ. ਕੀਲ਼ਾਦੀਨਿਪਿ ਕਿਚ੍ਚਾਨਿ ਕਰਣੀਯਾਨੇਵ. ਏਵਰੂਪਾਨਿ ਤਾਨਿ ਕਰਣੀਯਾਨਿ ਸਨ੍ਧਾਯ ‘‘ਕੇਹਿਚਿ ਕੇਹਿਚਿ ਕਿਚ੍ਚਕਰਣੀਯੇਹੀ’’ਤਿ ਆਹ.

ਸਲਲ਼ਾਗਾਰਕੇਤਿ ਸਲਲ਼ਮਯਗਨ੍ਧਕੁਟਿਯਂ. ਅਞ੍ਞਤਰੇਨ ਸਮਾਧਿਨਾਤਿ ਤਦਾ ਕਿਰ ਭਗਵਾ ਸਕ੍ਕਸ੍ਸੇਵ ਅਪਰਿਪਾਕਗਤਂ ਞਾਣਂ ਵਿਦਿਤ੍ਵਾ ਓਕਾਸਂ ਅਕਾਰੇਤੁਕਾਮੋ ਫਲਸਮਾਪਤ੍ਤਿਵਿਹਾਰੇਨ ਨਿਸੀਦਿ. ਤਂ ਏਸ ਅਜਾਨਨ੍ਤੋ ‘‘ਅਞ੍ਞਤਰੇਨ ਸਮਾਧਿਨਾ’’ਤਿ ਆਹ. ਭੂਜਤਿ ਚ ਨਾਮਾਤਿ ਭੂਜਤੀਤਿ ਤਸ੍ਸਾ ਨਾਮਂ. ਪਰਿਚਾਰਿਕਾਤਿ ਪਾਦਪਰਿਚਾਰਿਕਾ ਦੇਵਧੀਤਾ. ਸਾ ਕਿਰ ਦ੍ਵੇ ਫਲਾਨਿ ਪਤ੍ਤਾ, ਤੇਨਸ੍ਸਾ ਦੇਵਲੋਕੇ ਅਭਿਰਤਿਯੇਵ ਨਤ੍ਥਿ. ਨਿਚ੍ਚਂ ਭਗਵਤੋ ਉਪਟ੍ਠਾਨਂ ਆਗਨ੍ਤ੍ਵਾ ਅਞ੍ਜਲਿਂ ਸਿਰਸਿ ਠਪੇਤ੍ਵਾ ਭਗਵਨ੍ਤਂ ਨਮਸ੍ਸਮਾਨਾ ਤਿਟ੍ਠਤਿ. ਨੇਮਿਸਦ੍ਦੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਿਤੋਤਿ ‘‘ਸਮਾਪਨ੍ਨੋ ਸਦ੍ਦਂ ਸੁਣਾਤੀ’’ਤਿ ਨੋ ਵਤ ਰੇ ਵਤ੍ਤਬ੍ਬੇ, ਨਨੁ ਭਗਵਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ‘‘ਅਪਿਚਾਹਂ ਆਯਸ੍ਮਤੋ ਚਕ੍ਕਨੇਮਿਸਦ੍ਦੇਨ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਿਤੋ’’ਤਿ ਭਣਤੀਤਿ. ਤਿਟ੍ਠਤੁ ਨੇਮਿਸਦ੍ਦੋ, ਸਮਾਪਨ੍ਨੋ ਨਾਮ ਅਨ੍ਤੋਸਮਾਪਤ੍ਤਿਯਂ ਕਣ੍ਣਮੂਲੇ ਧਮਮਾਨਸ੍ਸ ਸਙ੍ਖਯੁਗਲ਼ਸ੍ਸਾਪਿ ਅਸਨਿਸਨ੍ਨਿਪਾਤਸ੍ਸਾਪਿ ਸਦ੍ਦਂ ਨ ਸੁਣਾਤਿ. ਭਗਵਾ ਪਨ ‘‘ਏਤ੍ਤਕਂ ਕਾਲਂ ਸਕ੍ਕਸ੍ਸ ਓਕਾਸਂ ਨ ਕਰਿਸ੍ਸਾਮੀ’’ਤਿ ਪਰਿਚ੍ਛਿਨ੍ਦਿਤ੍ਵਾ ਕਾਲਵਸੇਨ ਫਲਸਮਾਪਤ੍ਤਿਂ ਸਮਾਪਨ੍ਨੋ. ਸਕ੍ਕੋ ‘‘ਨ ਦਾਨਿ ਮੇ ਸਤ੍ਥਾ ਓਕਾਸਂ ਕਰੋਤੀ’’ਤਿ ਗਨ੍ਧਕੁਟਿਂ ਪਦਕ੍ਖਿਣਂ ਕਤ੍ਵਾ ਰਥਂ ਨਿਵਤ੍ਤੇਤ੍ਵਾ ਦੇਵਲੋਕਾਭਿਮੁਖਂ ਪੇਸੇਸਿ. ਗਨ੍ਧਕੁਟਿਪਰਿਵੇਣਂ ਰਥਸਦ੍ਦੇਨ ਸਮੋਹਿਤਂ ਪਞ੍ਚਙ੍ਗਿਕਤੂਰਿਯਂ ਵਿਯ ਅਹੋਸਿ. ਭਗਵਤੋ ਯਥਾਪਰਿਚ੍ਛਿਨ੍ਨਕਾਲਵਸੇਨ ਸਮਾਪਤ੍ਤਿਤੋ ਵੁਟ੍ਠਿਤਸ੍ਸ ਰਥਸਦ੍ਦੇਨੇਵ ਪਠਮਾਵਜ੍ਜਨਂ ਉਪ੍ਪਜ੍ਜਿ, ਤਸ੍ਮਾ ਏਵਮਾਹ.