(੭.) ਸਤ੍ਤਕਨਿਦ੍ਦੇਸਵਣ੍ਣਨਾ

੯੪੯. ਸਤ੍ਤਕਨਿਦ੍ਦੇਸੇ ਥਾਮਗਤਟ੍ਠੇਨ ਅਪ੍ਪਹੀਨਟ੍ਠੇਨ ਚ ਅਨੁਸੇਨ੍ਤੀਤਿ ਅਨੁਸਯਾ. ਵਟ੍ਟਸ੍ਮਿਂ ਸਤ੍ਤੇ ਸਂਯੋਜੇਨ੍ਤਿ ਘਟੇਨ੍ਤੀਤਿ ਸਂਯੋਜਨਾਨਿ. ਸਮੁਦਾਚਾਰਵਸੇਨ ਪਰਿਯੁਟ੍ਠਹਨ੍ਤੀਤਿ ਪਰਿਯੁਟ੍ਠਾਨਾਨਿ. ਕਾਮਰਾਗੋਵ ਪਰਿਯੁਟ੍ਠਾਨਂ ਕਾਮਰਾਗਪਰਿਯੁਟ੍ਠਾਨਂ. ਸੇਸੇਸੁਪਿ ਏਸੇਵ ਨਯੋ.

੯੫੦. ਅਸਤਂ ਧਮ੍ਮਾ, ਲਾਮਕਟ੍ਠੇਨ ਵਾ ਅਸਨ੍ਤਾ ਧਮ੍ਮਾਤਿ ਅਸਦ੍ਧਮ੍ਮਾ. ਰਾਗਾਦੀਹਿ ਦੋਸੇਹਿ ਦੁਟ੍ਠਾਨਿ ਚਰਿਤਾਨੀਤਿ ਦੁਚ੍ਚਰਿਤਾਨਿ. ਤੇਨ ਤੇਨਾਕਾਰੇਨ ਮਞ੍ਞਨ੍ਤੀਤਿ ਮਾਨਾ.

੯੫੧. ਦਿਟ੍ਠਿਨਿਦ੍ਦੇਸੇ ਰੂਪੀਤਿ ਰੂਪਵਾ. ਚਾਤੁਮਹਾਭੂਤਿਕੋਤਿ ਚਤੁਮਹਾਭੂਤਮਯੋ. ਮਾਤਾਪਿਤੂਨਂ ਏਤਨ੍ਤਿ ਮਾਤਾਪੇਤ੍ਤਿਕਂ. ਕਿਨ੍ਤਂ? ਸੁਕ੍ਕਸੋਣਿਤਂ. ਮਾਤਾਪੇਤ੍ਤਿਕੇ ਸਮ੍ਭੂਤੋ ਜਾਤੋਤਿ ਮਾਤਾਪੇਤ੍ਤਿਕਸਮ੍ਭਵੋ. ਇਧ ਰੂਪਕਾਯਸੀਸੇਨ ਮਨੁਸ੍ਸਤ੍ਤਭਾਵਂ ਅਤ੍ਤਾਤਿ ਵਦਤਿ. ਦੁਤਿਯੋ ਤਂ ਪਟਿਕ੍ਖਿਪਿਤ੍ਵਾ ਦਿਬ੍ਬਤ੍ਤਭਾਵਂ ਵਦਤਿ. ਦਿਬ੍ਬੋਤਿ ਦੇਵਲੋਕੇ ਸਮ੍ਭੂਤੋ. ਕਾਮਾਵਚਰੋਤਿ ਛਕਾਮਾਵਚਰਦੇਵਪਰਿਯਾਪਨ੍ਨੋ. ਕਬਲ਼ੀਕਾਰਂ ਭਕ੍ਖਯਤੀਤਿ ਕਬਲ਼ੀਕਾਰਭਕ੍ਖੋ. ਮਨੋਮਯੋਤਿ ਝਾਨਮਨੇਨ ਨਿਬ੍ਬਤ੍ਤੋ. ਸਬ੍ਬਙ੍ਗਪਚ੍ਚਙ੍ਗੀਤਿ ਸਬ੍ਬਙ੍ਗਪਚ੍ਚਙ੍ਗਯੁਤ੍ਤੋ. ਅਹੀਨਿਨ੍ਦ੍ਰਿਯੋਤਿ ਪਰਿਪੁਣ੍ਣਿਨ੍ਦ੍ਰਿਯੋ; ਯਾਨਿ ਬ੍ਰਹ੍ਮਲੋਕੇ ਅਤ੍ਥਿ ਤੇਸਂ ਵਸੇਨ, ਇਤਰੇਸਞ੍ਚ ਸਣ੍ਠਾਨਵਸੇਨੇਤਂ ਵੁਤ੍ਤਂ. ਆਕਾਸਾਨਞ੍ਚਾਯਤਨੂਪਗੋਤਿ ਆਕਾਸਾਨਞ੍ਚਾਯਤਨਭਾਵਂ ਉਪਗਤੋ. ਇਤਰੇਸੁਪਿ ਏਸੇਵ ਨਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਸਤ੍ਤਕਨਿਦ੍ਦੇਸਵਣ੍ਣਨਾ.