੧. ਏਕਕਮਾਤਿਕਾਦਿਵਣ੍ਣਨਾ

੮੩੨. ਇਦਾਨਿ ਤਦਨਨ੍ਤਰੇ ਖੁਦ੍ਦਕਵਤ੍ਥੁਵਿਭਙ੍ਗੇਪਿ ਪਠਮਂ ਮਾਤਿਕਂ ਠਪੇਤ੍ਵਾ ਨਿਕ੍ਖਿਤ੍ਤਪਦਾਨੁਕ੍ਕਮੇਨ ਨਿਦ੍ਦੇਸੋ ਕਤੋ. ਤਤ੍ਰਾਯਂ ਨਿਕ੍ਖੇਪਪਰਿਚ੍ਛੇਦੋ. ਆਦਿਤੋ ਤਾਵ ਜਾਤਿਮਦੋਤਿਆਦਯੋ ਤੇਸਤ੍ਤਤਿ ਏਕਕਾ ਨਿਕ੍ਖਿਤ੍ਤਾ, ਤਤੋ ਕੋਧੋ ਚ ਉਪਨਾਹੋ ਚਾਤਿਆਦਯੋ ਅਟ੍ਠਾਰਸ ਦੁਕਾ, ਅਕੁਸਲਮੂਲਾਦਯੋ ਪਞ੍ਚਤਿਂਸ ਤਿਕਾ, ਆਸਵਚਤੁਕ੍ਕਾਦਯੋ ਚੁਦ੍ਦਸ ਚਤੁਕ੍ਕਾ, ਓਰਮ੍ਭਾਗਿਯਸਂਯੋਜਨਾਦਯੋ ਪਨ੍ਨਰਸ ਪਞ੍ਚਕਾ, ਵਿਵਾਦਮੂਲਾਦਯੋ ਚੁਦ੍ਦਸ ਛਕ੍ਕਾ, ਅਨੁਸਯਾਦਯੋ ਸਤ੍ਤ ਸਤ੍ਤਕਾ, ਕਿਲੇਸਵਤ੍ਥੁਆਦਯੋ ਅਟ੍ਠ ਅਟ੍ਠਕਾ, ਆਘਾਤਵਤ੍ਥੁਆਦਯੋ ਨਵ ਨਵਕਾ, ਕਿਲੇਸਵਤ੍ਥੁਆਦਯੋ ਸਤ੍ਤ ਦਸਕਾ, ਅਜ੍ਝਤ੍ਤਿਕਸ੍ਸ ਉਪਾਦਾਯ ਅਟ੍ਠਾਰਸ ਤਣ੍ਹਾਵਿਚਰਿਤਾਨੀਤਿਆਦਯੋ ਛ ਅਟ੍ਠਾਰਸਕਾਤਿ ਸਬ੍ਬਾਨਿਪਿ ਏਤਾਨਿ ਅਟ੍ਠ ਕਿਲੇਸਸਤਾਨਿ ਨਿਕ੍ਖਿਤ੍ਤਾਨੀਤਿ ਵੇਦਿਤਬ੍ਬਾਨਿ. ਅਯਂ ਤਾਵ ਨਿਕ੍ਖੇਪਪਰਿਚ੍ਛੇਦੋ.

(੧.) ਏਕਕਨਿਦ੍ਦੇਸਵਣ੍ਣਨਾ

੮੪੩-੮੪੪. ਇਦਾਨਿ ਯਥਾਨਿਕ੍ਖਿਤ੍ਤਾਯ ਮਾਤਿਕਾਯ ਤਤ੍ਥ ਕਤਮੋ ਜਾਤਿਮਦੋਤਿਆਦਿਨਾ ਨਯੇਨ ਆਰਦ੍ਧੇ ਨਿਦ੍ਦੇਸਵਾਰੇ ਜਾਤਿਂ ਪਟਿਚ੍ਚਾਤਿ ਜਾਤਿਂ ਨਿਸ੍ਸਾਯ. ਏਤ੍ਥ ਚ ਅਤ੍ਥਿਪਟਿਚ੍ਚਂ ਨਾਮ ਕਥਿਤਂ, ਤਸ੍ਮਾ ਜਾਤਿਯਾ ਸਤੀਤਿ ਅਯਮੇਤ੍ਥ ਅਤ੍ਥੋ. ਗੋਤ੍ਤਂ ਪਟਿਚ੍ਚਾਤਿਆਦੀਸੁਪਿ ਏਸੇਵ ਨਯੋ. ਮਦਨਵਸੇਨ ਮਦੋ. ਮਜ੍ਜਨਾਕਾਰੋ ਮਜ੍ਜਨਾ. ਮਜ੍ਜਿਤਭਾਵੋ ਮਜ੍ਜਿਤਤ੍ਤਂ. ਮਾਨੋ ਮਞ੍ਞਨਾਤਿਆਦੀਨਿ ਹੇਟ੍ਠਾ ਧਮ੍ਮਸਙ੍ਗਹਟ੍ਠਕਥਾਯਂ (ਧ. ਸ. ਅਟ੍ਠ. ੧੧੨੧) ਵੁਤ੍ਤਤ੍ਥਾਨੇਵ. ਅਯਂ ਵੁਚ੍ਚਤੀਤਿ ਅਯਂ ਏਵਂ ਜਾਤਿਯਾ ਸਤਿ ਤਂ ਜਾਤਿਂ ਨਿਸ੍ਸਾਯ ਉਪ੍ਪਨ੍ਨੋ ਮਜ੍ਜਨਾਕਾਰਪ੍ਪਵਤ੍ਤੋ ਮਾਨੋ ਜਾਤਿਮਦੋਤਿ ਵੁਚ੍ਚਤਿ. ਸ੍ਵਾਯਂ ਖਤ੍ਤਿਯਾਦੀਨਂ ਚਤੁਨ੍ਨਮ੍ਪਿ ਵਣ੍ਣਾਨਂ ਉਪ੍ਪਜ੍ਜਤਿ. ਜਾਤਿਸਮ੍ਪਨ੍ਨੋ ਹਿ ਖਤ੍ਤਿਯੋ ‘ਮਾਦਿਸੋ ਅਞ੍ਞੋ ਨਤ੍ਥਿ. ਅਵਸੇਸਾ ਅਨ੍ਤਰਾ ਉਟ੍ਠਾਯ ਖਤ੍ਤਿਯਾ ਜਾਤਾ. ਅਹਂ ਪਨ ਵਂਸਾਗਤਖਤ੍ਤਿਯੋ’ਤਿ ਮਾਨਂ ਕਰੋਤਿ. ਬ੍ਰਾਹ੍ਮਣਾਦੀਸੁਪਿ ਏਸੇਵ ਨਯੋ. ਗੋਤ੍ਤਮਦਨਿਦ੍ਦੇਸਾਦੀਸੁਪਿ ਇਮਿਨਾਵੁਪਾਯੇਨ ਅਤ੍ਥੋ ਵੇਦਿਤਬ੍ਬੋ. ਖਤ੍ਤਿਯੋਪਿ ਹਿ ‘ਅਹਂ ਕੋਣ੍ਡਞ੍ਞਗੋਤ੍ਤੋ, ਅਹਂ ਆਦਿਚ੍ਚਗੋਤ੍ਤੋ’ਤਿ ਮਾਨਂ ਕਰੋਤਿ. ਬ੍ਰਾਹ੍ਮਣੋਪਿ ‘ਅਹਂ ਕਸ੍ਸਪਗੋਤ੍ਤੋ, ਅਹਂ ਭਾਰਦ੍ਵਾਜਗੋਤ੍ਤੋ’ਤਿ ਮਾਨਂ ਕਰੋਤਿ. ਵੇਸ੍ਸੋਪਿ ਸੁਦ੍ਦੋਪਿ ਅਤ੍ਤਨੋ ਅਤ੍ਤਨੋ ਕੁਲਗੋਤ੍ਤਂ ਨਿਸ੍ਸਾਯ ਮਾਨਂ ਕਰੋਤਿ. ਅਟ੍ਠਾਰਸਾਪਿ ਸੇਣਿਯੋ ‘ਏਕਿਸ੍ਸਾ ਸੇਣਿਯਾ ਜਾਤਮ੍ਹਾ’ਤਿ ਮਾਨਂ ਕਰੋਨ੍ਤਿਯੇਵ.

ਆਰੋਗ੍ਯਮਦਾਦੀਸੁ ‘ਅਹਂ ਅਰੋਗੋ, ਅਵਸੇਸਾ ਰੋਗਬਹੁਲਾ, ਗਦ੍ਦੁਹਨਮਤ੍ਤਮ੍ਪਿ ਮਯ੍ਹਂ ਬ੍ਯਾਧਿ ਨਾਮ ਨਤ੍ਥੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਆਰੋਗ੍ਯਮਦੋ ਨਾਮ.

‘ਅਹਂ ਤਰੁਣੋ, ਅਵਸੇਸਸਤ੍ਤਾਨਂ ਅਤ੍ਤਭਾਵੋ ਪਪਾਤੇ ਠਿਤਰੁਕ੍ਖਸਦਿਸੋ, ਅਹਂ ਪਨ ਪਠਮਵਯੇ ਠਿਤੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਯੋਬ੍ਬਨਮਦੋ ਨਾਮ.

‘ਅਹਂ ਚਿਰਂ ਜੀਵਿਂ, ਚਿਰਂ ਜੀਵਾਮਿ, ਚਿਰਂ ਜੀਵਿਸ੍ਸਾਮਿ; ਸੁਖਂ ਜੀਵਿਂ, ਸੁਖਂ ਜੀਵਾਮਿ, ਸੁਖਂ ਜੀਵਿਸ੍ਸਾਮੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਜੀਵਿਤਮਦੋ ਨਾਮ.

‘ਅਹਂ ਲਾਭੀ, ਅਵਸੇਸਾ ਸਤ੍ਤਾ ਅਪ੍ਪਲਾਭਾ, ਮਯ੍ਹਂ ਪਨ ਲਾਭਸ੍ਸ ਪਮਾਣਂ ਨਾਮ ਨਤ੍ਥੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਲਾਭਮਦੋ ਨਾਮ.

‘ਅਵਸੇਸਾ ਸਤ੍ਤਾ ਯਂ ਵਾ ਤਂ ਵਾ ਲਭਨ੍ਤਿ, ਅਹਂ ਪਨ ਸੁਕਤਂ ਪਣੀਤਂ ਚੀਵਰਾਦਿਪਚ੍ਚਯਂ ਲਭਾਮੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਸਕ੍ਕਾਰਮਦੋ ਨਾਮ.

‘ਅਵਸੇਸਭਿਕ੍ਖੂਨਂ ਪਾਦਪਿਟ੍ਠਿਯਂ ਅਕ੍ਕਮਿਤ੍ਵਾ ਗਚ੍ਛਨ੍ਤਾ ਮਨੁਸ੍ਸਾ ਅਯਂ ਸਮਣੋਤਿਪਿ ਨ ਵਨ੍ਦਨ੍ਤਿ, ਮਂ ਪਨ ਦਿਸ੍ਵਾਵ ਵਨ੍ਦਨ੍ਤਿ, ਪਾਸਾਣਚ੍ਛਤ੍ਤਂ ਵਿਯ ਗਰੁਂ ਕਤ੍ਵਾ ਅਗ੍ਗਿਕ੍ਖਨ੍ਧਂ ਵਿਯ ਚ ਦੁਰਾਸਦਂ ਕਤ੍ਵਾ ਮਞ੍ਞਨ੍ਤੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਗਰੁਕਾਰਮਦੋ ਨਾਮ.

‘ਉਪ੍ਪਨ੍ਨੋ ਪਞ੍ਹੋ ਮਯ੍ਹਮੇਵ ਮੁਖੇਨ ਛਿਜ੍ਜਤਿ, ਭਿਕ੍ਖਾਚਾਰਂ ਗਚ੍ਛਨ੍ਤਾਪਿ ਮਮੇਵ ਪੁਰਤੋ ਕਤ੍ਵਾ ਪਰਿਵਾਰੇਤ੍ਵਾ ਗਚ੍ਛਨ੍ਤੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪੁਰੇਕ੍ਖਾਰਮਦੋ ਨਾਮ.

ਅਗਾਰਿਕਸ੍ਸ ਤਾਵ ਮਹਾਪਰਿਵਾਰਸ੍ਸ ‘ਪੁਰਿਸਸਤਮ੍ਪਿ ਪੁਰਿਸਸਹਸ੍ਸਮ੍ਪਿ ਮਂ ਪਰਿਵਾਰੇਤਿ,’ ਅਨਗਾਰਿਯਸ੍ਸ ਪਨ ‘ਸਮਣਸਤਮ੍ਪਿ ਸਮਣਸਹਸ੍ਸਮ੍ਪਿ ਮਂ ਪਰਿਵਾਰੇਤਿ, ਸੇਸਾ ਅਪ੍ਪਪਰਿਵਾਰਾ, ਅਹਂ ਮਹਾਪਰਿਵਾਰੋ ਚੇਵ ਸੁਚਿਪਰਿਵਾਰੋ ਚਾ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪਰਿਵਾਰਮਦੋ ਨਾਮ.

ਭੋਗੋ ਪਨ ਕਿਞ੍ਚਾਪਿ ਲਾਭਗ੍ਗਹਣੇਨੇਵ ਗਹਿਤੋ ਹੋਤਿ, ਇਮਸ੍ਮਿਂ ਪਨ ਠਾਨੇ ਨਿਕ੍ਖੇਪਰਾਸਿ ਨਾਮ ਗਹਿਤੋ; ਤਸ੍ਮਾ ‘ਅਵਸੇਸਾ ਸਤ੍ਤਾ ਅਤ੍ਤਨੋ ਪਰਿਭੋਗਮਤ੍ਤਮ੍ਪਿ ਨ ਲਭਨ੍ਤਿ, ਮਯ੍ਹਂ ਪਨ ਨਿਧਾਨਗਤਸ੍ਸੇਵ ਧਨਸ੍ਸ ਪਮਾਣਂ ਨਤ੍ਥੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਭੋਗਮਦੋ ਨਾਮ.

ਵਣ੍ਣਂ ਪਟਿਚ੍ਚਾਤਿ ਸਰੀਰਵਣ੍ਣਮ੍ਪਿ ਗੁਣਵਣ੍ਣਮ੍ਪਿ ਪਟਿਚ੍ਚ. ‘ਅਵਸੇਸਾ ਸਤ੍ਤਾ ਦੁਬ੍ਬਣ੍ਣਾ ਦੁਰੂਪਾ, ਅਹਂ ਪਨ ਅਭਿਰੂਪੋ ਪਾਸਾਦਿਕੋ; ਅਵਸੇਸਾ ਸਤ੍ਤਾ ਨਿਗ੍ਗੁਣਾ ਪਤ੍ਥਟਅਕਿਤ੍ਤਿਨੋ, ਮਯ੍ਹਂ ਪਨ ਕਿਤ੍ਤਿਸਦ੍ਦੋ ਦੇਵਮਨੁਸ੍ਸੇਸੁ ਪਾਕਟੋ – ਇਤਿਪਿ ਥੇਰੋ ਬਹੁਸ੍ਸੁਤੋ, ਇਤਿਪਿ ਸੀਲਵਾ, ਇਤਿਪਿ ਧੁਤਗੁਣਯੁਤ੍ਤੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਵਣ੍ਣਮਦੋ ਨਾਮ.

‘ਅਵਸੇਸਾ ਸਤ੍ਤਾ ਅਪ੍ਪਸ੍ਸੁਤਾ, ਅਹਂ ਪਨ ਬਹੁਸ੍ਸੁਤੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਸੁਤਮਦੋ ਨਾਮ.

‘ਅਵਸੇਸਾ ਸਤ੍ਤਾ ਅਪ੍ਪਟਿਭਾਨਾ, ਮਯ੍ਹਂ ਪਨ ਪਟਿਭਾਨਸ੍ਸ ਪਮਾਣਂ ਨਤ੍ਥੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪਟਿਭਾਨਮਦੋ ਨਾਮ.

‘ਅਹਂ ਰਤ੍ਤਞ੍ਞੂ ਅਸੁਕਂ ਬੁਦ੍ਧਵਂਸਂ, ਰਾਜਵਂਸਂ, ਜਨਪਦਵਂਸਂ, ਗਾਮਵਂਸਂ, ਰਤ੍ਤਿਨ੍ਦਿਵਪਰਿਚ੍ਛੇਦਂ, ਨਕ੍ਖਤ੍ਤਮੁਹੁਤ੍ਤਯੋਗਂ ਜਾਨਾਮੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਰਤ੍ਤਞ੍ਞੁਮਦੋ ਨਾਮ.

‘ਅਵਸੇਸਾ ਭਿਕ੍ਖੂ ਅਨ੍ਤਰਾ ਪਿਣ੍ਡਪਾਤਿਕਾ ਜਾਤਾ, ਅਹਂ ਪਨ ਜਾਤਿਪਿਣ੍ਡਪਾਤਿਕੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪਿਣ੍ਡਪਾਤਿਕਮਦੋ ਨਾਮ.

‘ਅਵਸੇਸਾ ਸਤ੍ਤਾ ਉਞ੍ਞਾਤਾ ਅਵਞ੍ਞਾਤਾ, ਅਹਂ ਪਨ ਅਨੁਞ੍ਞਾਤੋ ਅਨਵਞ੍ਞਾਤੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਅਨਵਞ੍ਞਾਤਮਦੋ ਨਾਮ.

‘ਅਵਸੇਸਾਨਂ ਇਰਿਯਾਪਥੋ ਅਪਾਸਾਦਿਕੋ, ਮਯ੍ਹਂ ਪਨ ਪਾਸਾਦਿਕੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਇਰਿਯਾਪਥਮਦੋ ਨਾਮ.

‘ਅਵਸੇਸਾ ਸਤ੍ਤਾ ਛਿਨ੍ਨਪਕ੍ਖਕਾਕਸਦਿਸਾ, ਅਹਂ ਪਨ ਮਹਿਦ੍ਧਿਕੋ ਮਹਾਨੁਭਾਵੋ’ਤਿ ਵਾ ‘ਅਹਂ ਯਂ ਯਂ ਕਮ੍ਮਂ ਕਰੋਮਿ, ਤਂ ਤਂ ਇਜ੍ਝਤੀ’ਤਿ ਵਾ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਇਦ੍ਧਿਮਦੋ ਨਾਮ.

ਹੇਟ੍ਠਾ ਪਰਿਵਾਰਗ੍ਗਹਣੇਨ ਯਸੋ ਗਹਿਤੋਵ ਹੋਤਿ. ਇਮਸ੍ਮਿਂ ਪਨ ਠਾਨੇ ਉਪਟ੍ਠਾਕਮਦੋ ਨਾਮ ਗਹਿਤੋ. ਸੋ ਅਗਾਰਿਕੇਨਪਿ ਅਨਗਾਰਿਕੇਨਪਿ ਦੀਪੇਤਬ੍ਬੋ. ਅਗਾਰਿਕੋ ਹਿ ਏਕਚ੍ਚੋ ਅਟ੍ਠਾਰਸਸੁ ਸੇਣੀਸੁ ਏਕਿਸ੍ਸਾ ਜੇਟ੍ਠਕੋ ਹੋਤਿ, ਤਸ੍ਸ ‘ਅਵਸੇਸੇ ਪੁਰਿਸੇ ਅਹਂ ਪਟ੍ਠਪੇਮਿ, ਅਹਂ ਵਿਚਾਰੇਮੀ’ਤਿ; ਅਨਗਾਰਿਕੋਪਿ ਏਕਚ੍ਚੋ ਕਤ੍ਥਚਿ ਜੇਟ੍ਠਕੋ ਹੋਤਿ, ਤਸ੍ਸ ‘ਅਵਸੇਸਾ ਭਿਕ੍ਖੂ ਮਯ੍ਹਂ ਓਵਾਦੇ ਵਤ੍ਤਨ੍ਤਿ, ਅਹਂ ਜੇਟ੍ਠਕੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਯਸਮਦੋ ਨਾਮ.

‘ਅਵਸੇਸਾ ਸਤ੍ਤਾ ਦੁਸ੍ਸੀਲਾ, ਅਹਂ ਪਨ ਸੀਲਵਾ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਸੀਲਮਦੋ ਨਾਮ. ‘ਅਵਸੇਸਸਤ੍ਤਾਨਂ ਕੁਕ੍ਕੁਟਸ੍ਸ ਉਦਕਪਾਨਮਤ੍ਤੇਪਿ ਕਾਲੇ ਚਿਤ੍ਤੇਕਗ੍ਗਤਾ ਨਤ੍ਥਿ, ਅਹਂ ਪਨ ਉਪਚਾਰਪ੍ਪਨਾਨਂ ਲਾਭੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਝਾਨਮਦੋ ਨਾਮ.

‘ਅਵਸੇਸਾ ਸਤ੍ਤਾ ਨਿਸ੍ਸਿਪ੍ਪਾ, ਅਹਂ ਪਨ ਸਿਪ੍ਪਵਾ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਸਿਪ੍ਪਮਦੋ ਨਾਮ. ‘ਅਵਸੇਸਾ ਸਤ੍ਤਾ ਰਸ੍ਸਾ, ਅਹਂ ਪਨ ਦੀਘੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਆਰੋਹਮਦੋ ਨਾਮ. ‘ਅਵਸੇਸਾ ਸਤ੍ਤਾ ਰਸ੍ਸਾ ਵਾ ਹੋਨ੍ਤਿ ਦੀਘਾ ਵਾ, ਅਹਂ ਨਿਗ੍ਰੋਧਪਰਿਮਣ੍ਡਲੋ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪਰਿਣਾਹਮਦੋ ਨਾਮ. ‘ਅਵਸੇਸਸਤ੍ਤਾਨਂ ਸਰੀਰਸਣ੍ਠਾਨਂ ਵਿਰੂਪਂ ਬੀਭਚ੍ਛਂ, ਮਯ੍ਹਂ ਪਨ ਮਨਾਪਂ ਪਾਸਾਦਿਕ’ਨ੍ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਸਣ੍ਠਾਨਮਦੋ ਨਾਮ. ‘ਅਵਸੇਸਾਨਂ ਸਤ੍ਤਾਨਂ ਸਰੀਰੇ ਬਹੂ ਦੋਸਾ, ਮਯ੍ਹਂ ਪਨ ਸਰੀਰੇ ਕੇਸਗ੍ਗਮਤ੍ਤਮ੍ਪਿ ਵਜ੍ਜਂ ਨਤ੍ਥੀ’ਤਿ ਮਜ੍ਜਨਵਸੇਨ ਉਪ੍ਪਨ੍ਨੋ ਮਾਨੋ ਪਾਰਿਪੂਰਿਮਦੋ ਨਾਮ.

੮੪੫. ਇਮਿਨਾ ਏਤ੍ਤਕੇਨ ਠਾਨੇਨ ਸਵਤ੍ਥੁਕਂ ਮਾਨਂ ਕਥੇਤ੍ਵਾ ਇਦਾਨਿ ਅਵਤ੍ਥੁਕਂ ਨਿਬ੍ਬਤ੍ਤਿਤਮਾਨਮੇਵ ਦਸ੍ਸੇਨ੍ਤੋ ਤਤ੍ਥ ਕਤਮੋ ਮਦੋਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵ.

੮੪੬. ਪਮਾਦਨਿਦ੍ਦੇਸੇ ਚਿਤ੍ਤਸ੍ਸ ਵੋਸ੍ਸਗ੍ਗੋਤਿ ਇਮੇਸੁ ਏਤ੍ਤਕੇਸੁ ਠਾਨੇਸੁ ਸਤਿਯਾ ਅਨਿਗ੍ਗਣ੍ਹਿਤ੍ਵਾ ਚਿਤ੍ਤਸ੍ਸ ਵੋਸ੍ਸਜ੍ਜਨਂ; ਸਤਿਵਿਰਹੋਤਿ ਅਤ੍ਥੋ. ਵੋਸ੍ਸਗ੍ਗਾਨੁਪ੍ਪਦਾਨਨ੍ਤਿ ਵੋਸ੍ਸਗ੍ਗਸ੍ਸ ਅਨੁਪ੍ਪਦਾਨਂ; ਪੁਨਪ੍ਪੁਨਂ ਵਿਸ੍ਸਜ੍ਜਨਨ੍ਤਿ ਅਤ੍ਥੋ. ਅਸਕ੍ਕਚ੍ਚਕਿਰਿਯਤਾਤਿ ਏਤੇਸਂ ਦਾਨਾਦੀਨਂ ਕੁਸਲਧਮ੍ਮਾਨਂ ਭਾਵਨਾਯ ਪੁਗ੍ਗਲਸ੍ਸ ਵਾ ਦੇਯ੍ਯਧਮ੍ਮਸ੍ਸ ਵਾ ਅਸਕ੍ਕਚ੍ਚਕਰਣਵਸੇਨ ਅਸਕ੍ਕਚ੍ਚਕਿਰਿਯਾ. ਸਤਤਭਾਵੋ ਸਾਤਚ੍ਚਂ. ਨ ਸਤਤਭਾਵੋ ਅਸਾਤਚ੍ਚਂ. ਨ ਸਾਤਚ੍ਚਕਿਰਿਯਤਾ ਅਸਾਤਚ੍ਚਕਿਰਿਯਤਾ. ਅਨਟ੍ਠਿਤਕਰਣਂ ਅਨਟ੍ਠਿਤਕਿਰਿਯਤਾ. ਯਥਾ ਨਾਮ ਕਕਣ੍ਟਕੋ ਥੋਕਂ ਗਨ੍ਤ੍ਵਾ ਥੋਕਂ ਤਿਟ੍ਠਤਿ, ਨ ਨਿਰਨ੍ਤਰਂ ਗਚ੍ਛਤਿ, ਏਵਮੇਵ ਯੋ ਪੁਗ੍ਗਲੋ ਏਕਦਿਵਸਂ ਦਾਨਂ ਵਾ ਦਤ੍ਵਾ ਪੂਜਂ ਵਾ ਕਤ੍ਵਾ ਧਮ੍ਮਂ ਵਾ ਸੁਤ੍ਵਾ ਸਮਣਧਮ੍ਮਂ ਵਾ ਕਤ੍ਵਾ ਪੁਨ ਚਿਰਸ੍ਸਂ ਕਰੋਤਿ, ਨ ਨਿਰਨ੍ਤਰਂ ਪਵਤ੍ਤੇਤਿ, ਤਸ੍ਸ ਸਾ ਕਿਰਿਯਾ ਅਨਟ੍ਠਿਤਕਿਰਿਯਤਾਤਿ ਵੁਚ੍ਚਤਿ. ਓਲੀਨਵੁਤ੍ਤਿਤਾਤਿ ਨਿਰਨ੍ਤਰਕਰਣਸਙ੍ਖਾਤਸ੍ਸ ਵਿਪ੍ਫਾਰਸ੍ਸੇਵ ਅਭਾਵੇਨ ਲੀਨਵੁਤ੍ਤਿਤਾ. ਨਿਕ੍ਖਿਤ੍ਤਛਨ੍ਦਤਾਤਿ ਕੁਸਲਕਿਰਿਯਾਯ ਵੀਰਿਯਛਨ੍ਦਸ੍ਸ ਨਿਕ੍ਖਿਤ੍ਤਭਾਵੋ. ਨਿਕ੍ਖਿਤ੍ਤਧੁਰਤਾਤਿ ਵੀਰਿਯਧੁਰਸ੍ਸ ਓਰੋਪਨਂ, ਓਸਕ੍ਕਿਤਮਾਨਸਤਾਤਿ ਅਤ੍ਥੋ. ਅਨਧਿਟ੍ਠਾਨਨ੍ਤਿ ਕੁਸਲਕਰਣੇ ਪਤਿਟ੍ਠਾਭਾਵੋ. ਅਨਨੁਯੋਗੋਤਿ ਅਨਨੁਯੁਞ੍ਜਨਂ. ਪਮਾਦੋਤਿ ਪਮਜ੍ਜਨਂ. ਯੋ ਏਵਰੂਪੋ ਪਮਾਦੋਤਿ ਇਦਂ ਅਤ੍ਥਪਰਿਯਾਯਸ੍ਸ ਬ੍ਯਞ੍ਜਨਪਰਿਯਾਯਸ੍ਸ ਚ ਪਰਿਯਨ੍ਤਾਭਾਵਤੋ ਆਕਾਰਦਸ੍ਸਨਂ. ਇਦਂ ਵੁਤ੍ਤਂ ਹੋਤਿ – ਯ੍ਵਾਯਂ ਆਦਿਤੋ ਪਟ੍ਠਾਯ ਦਸ੍ਸਿਤੋ ਪਮਾਦੋ, ਯੋ ਅਞ੍ਞੋਪਿ ਏਵਮਾਕਾਰੋ ਏਵਂਜਾਤਿਕੋ ਪਮਾਦੋ ਪਮਜ੍ਜਨਾਕਾਰਵਸੇਨ ਪਮਜ੍ਜਨਾ, ਪਮਜ੍ਜਿਤਭਾਵਵਸੇਨ ਪਮਜ੍ਜਿਤਤ੍ਤਨ੍ਤਿ ਸਙ੍ਖਂ ਗਤੋ – ਅਯਂ ਵੁਚ੍ਚਤਿ ਪਮਾਦੋਤਿ. ਲਕ੍ਖਣਤੋ ਪਨੇਸ ਪਞ੍ਚਸੁ ਕਾਮਗੁਣੇਸੁ ਸਤਿਵੋਸ੍ਸਗ੍ਗਲਕ੍ਖਣੋ, ਤਤ੍ਥੇਵ ਸਤਿਯਾ ਵਿਸ੍ਸਟ੍ਠਾਕਾਰੋ ਵੇਦਿਤਬ੍ਬੋ.

੮੪੭. ਥਮ੍ਭਨਿਦ੍ਦੇਸੇ ਥਦ੍ਧਟ੍ਠੇਨ ਥਮ੍ਭੋ; ਖਲਿਯਾ ਥਦ੍ਧਸਾਟਕਸ੍ਸ ਵਿਯ ਚਿਤ੍ਤਸ੍ਸ ਥਦ੍ਧਤਾ ਏਤ੍ਥ ਕਥਿਤਾ. ਥਮ੍ਭਨਾਕਾਰੋ ਥਮ੍ਭਨਾ. ਥਮ੍ਭਿਤਸ੍ਸ ਭਾਵੋ ਥਮ੍ਭਿਤਤ੍ਤਂ. ਕਕ੍ਖਲ਼ਸ੍ਸ ਪੁਗ੍ਗਲਸ੍ਸ ਭਾਵੋ ਕਕ੍ਖਲ਼ਿਯਂ. ਫਰੁਸਸ੍ਸ ਪੁਗ੍ਗਲਸ੍ਸ ਭਾਵੋ ਫਾਰੁਸਿਯਂ. ਅਭਿਵਾਦਨਾਦਿਸਾਮੀਚਿਰਹਾਨਂ ਤਸ੍ਸਾ ਸਾਮੀਚਿਯਾ ਅਕਰਣਵਸੇਨ ਉਜੁਮੇਵ ਠਪਿਤਚਿਤ੍ਤਭਾਵੋ ਉਜੁਚਿਤ੍ਤਤਾ. ਥਦ੍ਧਸ੍ਸ ਅਮੁਦੁਨੋ ਭਾਵੋ ਅਮੁਦੁਤਾ. ਅਯਂ ਵੁਚ੍ਚਤੀਤਿ ਅਯਂ ਥਮ੍ਭੋ ਨਾਮ ਵੁਚ੍ਚਤਿ, ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਗਿਲਿਤਨਙ੍ਗਲਸੀਸੋ ਵਿਯ ਅਜਗਰੋ, ਵਾਤਭਰਿਤਾ ਵਿਯ ਭਸ੍ਤਾ ਚੇਤਿਯਂ ਵਾ ਵੁਡ੍ਢਤਰੇ ਵਾ ਦਿਸ੍ਵਾ ਓਨਮਿਤੁਂ ਨ ਸਕ੍ਕੋਤਿ, ਪਰਿਯਨ੍ਤੇਨੇਵ ਚਰਤਿ. ਸ੍ਵਾਯਂ ਚਿਤ੍ਤਸ੍ਸ ਉਦ੍ਧੁਮਾਤਭਾਵਲਕ੍ਖਣੋਤਿ ਵੇਦਿਤਬ੍ਬੋ.

੮੪੮. ਸਾਰਮ੍ਭਨਿਦ੍ਦੇਸੇ ਸਾਰਮ੍ਭਨਵਸੇਨ ਸਾਰਮ੍ਭੋ. ਪਟਿਪ੍ਫਰਿਤ੍ਵਾ ਸਾਰਮ੍ਭੋ ਪਟਿਸਾਰਮ੍ਭੋ. ਸਾਰਮ੍ਭਨਾਕਾਰੋ ਸਾਰਮ੍ਭਨਾ. ਪਟਿਪ੍ਫਰਿਤ੍ਵਾ ਸਾਰਮ੍ਭਨਾ ਪਟਿਸਾਰਮ੍ਭਨਾ. ਪਟਿਸਾਰਮ੍ਭਿਤਸ੍ਸ ਭਾਵੋ ਪਟਿਸਾਰਮ੍ਭਿਤਤ੍ਤਂ. ਅਯਂ ਵੁਚ੍ਚਤੀਤਿ ਅਯਂ ਸਾਰਮ੍ਭੋ ਨਾਮ ਵੁਚ੍ਚਤਿ. ਸ੍ਵਾਯਂ ਲਕ੍ਖਣਤੋ ਕਰਣੁਤ੍ਤਰਿਯਲਕ੍ਖਣੋ ਨਾਮ ਵੁਚ੍ਚਤਿ, ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਤਦ੍ਦਿਗੁਣਂ ਤਦ੍ਦਿਗੁਣਂ ਕਰੋਤਿ. ਅਗਾਰਿਕੋ ਸਮਾਨੋ ਏਕੇਨੇਕਸ੍ਮਿਂ ਘਰਵਤ੍ਥੁਸ੍ਮਿਂ ਸਜ੍ਜਿਤੇ ਅਪਰੋ ਦ੍ਵੇ ਵਤ੍ਥੂਨਿ ਸਜ੍ਜੇਤਿ, ਅਪਰੋ ਚਤ੍ਤਾਰਿ, ਅਪਰੋ ਅਟ੍ਠ, ਅਪਰੋ ਸੋਲ਼ਸ. ਅਨਗਾਰਿਕੋ ਸਮਾਨੋ ਏਕੇਨੇਕਸ੍ਮਿਂ ਨਿਕਾਯੇ ਗਹਿਤੇ, ‘ਨਾਹਂ ਏਤਸ੍ਸ ਹੇਟ੍ਠਾ ਭਵਿਸ੍ਸਾਮੀ’ਤਿ ਅਪਰੋ ਦ੍ਵੇ ਗਣ੍ਹਾਤਿ, ਅਪਰੋ ਤਯੋ, ਅਪਰੋ ਚਤ੍ਤਾਰੋ, ਅਪਰੋ ਪਞ੍ਚ. ਸਾਰਮ੍ਭਵਸੇਨ ਹਿ ਗਣ੍ਹਿਤੁਂ ਨ ਵਟ੍ਟਤਿ. ਅਕੁਸਲਪਕ੍ਖੋ ਏਸ ਨਿਰਯਗਾਮਿਮਗ੍ਗੋ. ਕੁਸਲਪਕ੍ਖਵਸੇਨ ਪਨ ਏਕਸ੍ਮਿਂ ਏਕਂ ਸਲਾਕਭਤ੍ਤਂ ਦੇਨ੍ਤੇ ਦ੍ਵੇ ਦਾਤੁਂ, ਦ੍ਵੇ ਦੇਨ੍ਤੇ ਚਤ੍ਤਾਰਿ ਦਾਤੁਂ ਵਟ੍ਟਤਿ. ਭਿਕ੍ਖੁਨਾਪਿ ਪਰੇਨ ਏਕਸ੍ਮਿਂ ਨਿਕਾਯੇ ਗਹਿਤੇ, ‘ਦ੍ਵੇ ਨਿਕਾਯੇ ਗਹੇਤ੍ਵਾ ਸਜ੍ਝਾਯਨ੍ਤਸ੍ਸ ਮੇ ਫਾਸੁ ਹੋਤੀ’ਤਿ ਵਿਵਟ੍ਟਪਕ੍ਖੇ ਠਤ੍ਵਾ ਤਦੁਤ੍ਤਰਿ ਗਣ੍ਹਿਤੁਂ ਵਟ੍ਟਤਿ.

੮੪੯. ਅਤ੍ਰਿਚ੍ਛਤਾਨਿਦ੍ਦੇਸੇ ਯਥਾ ਅਰਿਯਵਂਸਸੁਤ੍ਤੇ (ਅ. ਨਿ. ੪.੨੮) ‘ਲਾਮਕਲਾਮਕਟ੍ਠੋ ਇਤਰੀਤਰਟ੍ਠੋ’ ਏਵਂ ਅਗ੍ਗਹੇਤ੍ਵਾ ਚੀਵਰਾਦੀਸੁ ਯਂ ਯਂ ਲਦ੍ਧਂ ਹੋਤਿ, ਤੇਨ ਤੇਨ ਅਸਨ੍ਤੁਟ੍ਠਸ੍ਸ; ਗਿਹਿਨੋ ਵਾ ਪਨ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬੇਸੁ ਯਂ ਯਂ ਲਦ੍ਧਂ ਹੋਤਿ, ਤੇਨ ਤੇਨ ਅਸਨ੍ਤੁਟ੍ਠਸ੍ਸ. ਭਿਯ੍ਯੋਕਮ੍ਯਤਾਤਿ ਵਿਸੇਸਕਾਮਤਾ. ਇਚ੍ਛਨਕਵਸੇਨ ਇਚ੍ਛਾ. ਇਚ੍ਛਾਵ ਇਚ੍ਛਾਗਤਾ, ਇਚ੍ਛਨਾਕਾਰੋ ਵਾ. ਅਤ੍ਤਨੋ ਲਾਭਂ ਅਤਿਚ੍ਚ ਇਚ੍ਛਨਭਾਵੋ ਅਤਿਚ੍ਛਤਾ. ਰਾਗੋਤਿਆਦੀਨਿ ਹੇਟ੍ਠਾ ਵੁਤ੍ਤਤ੍ਥਾਨੇਵ. ਅਯਂ ਵੁਚ੍ਚਤੀਤਿ ਅਯਂ ਅਤਿਚ੍ਛਤਾ ਨਾਮ ਵੁਚ੍ਚਤਿ. ਅਤ੍ਰਿਚ੍ਛਤਾਤਿਪਿ ਏਤਿਸ੍ਸਾ ਏਵ ਨਾਮਂ. ਲਕ੍ਖਣਤੋ ਪਨ ਸਕਲਾਭੇ ਅਸਨ੍ਤੁਟ੍ਠਿ ਪਰਲਾਭੇ ਚ ਪਤ੍ਥਨਾ – ਏਤਂ ਅਤ੍ਰਿਚ੍ਛਤਾਲਕ੍ਖਣਂ. ਅਤ੍ਰਿਚ੍ਛਪੁਗ੍ਗਲਸ੍ਸ ਹਿ ਅਤ੍ਤਨਾ ਲਦ੍ਧਂ ਪਣੀਤਮ੍ਪਿ ਲਾਮਕਂ ਵਿਯ ਖਾਯਤਿ, ਪਰੇਨ ਲਦ੍ਧਂ ਲਾਮਕਮ੍ਪਿ ਪਣੀਤਂ ਵਿਯ ਖਾਯਤਿ; ਏਕਭਾਜਨੇ ਪਕ੍ਕਯਾਗੁ ਵਾ ਭਤ੍ਤਂ ਵਾ ਪੂਵੋ ਵਾ ਅਤ੍ਤਨੋ ਪਤ੍ਤੇ ਪਕ੍ਖਿਤ੍ਤੋ ਲਾਮਕੋ ਵਿਯ, ਪਰਸ੍ਸ ਪਤ੍ਤੇ ਪਣੀਤੋ ਵਿਯ ਖਾਯਤਿ. ਅਯਂ ਪਨ ਅਤ੍ਰਿਚ੍ਛਤਾ ਪਬ੍ਬਜਿਤਾਨਮ੍ਪਿ ਹੋਤਿ ਗਿਹੀਨਮ੍ਪਿ ਤਿਰਚ੍ਛਾਨਗਤਾਨਮ੍ਪਿ.

ਤਤ੍ਰਿਮਾਨਿ ਵਤ੍ਥੂਨਿ – ਏਕੋ ਕਿਰ ਕੁਟੁਮ੍ਬਿਕੋ ਤਿਂਸ ਭਿਕ੍ਖੁਨਿਯੋ ਨਿਮਨ੍ਤੇਤ੍ਵਾ ਸਪੂਵਂ ਭਤ੍ਤਂ ਅਦਾਸਿ. ਸਙ੍ਘਤ੍ਥੇਰੀ ਸਬ੍ਬਭਿਕ੍ਖੂਨੀਨਂ ਪਤ੍ਤੇ ਪੂਵਂ ਪਰਿਵਤ੍ਤਾਪੇਤ੍ਵਾ ਪਚ੍ਛਾ ਅਤ੍ਤਨਾ ਲਦ੍ਧਮੇਵ ਖਾਦਿ. ਬਾਰਾਣਸਿਰਾਜਾਪਿ ‘ਅਙ੍ਗਾਰਪਕ੍ਕਮਂਸਂ ਖਾਦਿਸ੍ਸਾਮੀ’ਤਿ ਦੇਵਿਂ ਆਦਾਯ ਅਰਞ੍ਞਂ ਪਵਿਟ੍ਠੋ ਏਕਂ ਕਿਨ੍ਨਰਿਂ ਦਿਸ੍ਵਾ, ਦੇਵਿਂ ਪਹਾਯ, ਤਸ੍ਸਾਨੁਪਦਂ ਗਤੋ. ਦੇਵੀ ਨਿਵਤ੍ਤਿਤ੍ਵਾ ਅਸ੍ਸਮਪਦਂ ਗਨ੍ਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਪਞ੍ਚ ਚ ਅਭਿਞ੍ਞਾਯੋ ਪਤ੍ਵਾ ਨਿਸਿਨ੍ਨਾ ਰਾਜਾਨਂ ਆਗਚ੍ਛਨ੍ਤਂ ਦਿਸ੍ਵਾ ਆਕਾਸੇ ਉਪ੍ਪਤਿਤ੍ਵਾ ਅਗਮਾਸਿ. ਰੁਕ੍ਖੇ ਅਧਿਵਤ੍ਥਾ ਦੇਵਤਾ ਇਮਂ ਗਾਥਮਾਹ –

ਅਤ੍ਰਿਚ੍ਛਂ ਅਤਿਲੋਭੇਨ, ਅਤਿਲੋਭਮਦੇਨ ਚ;

ਏਵਂ ਹਾਯਤਿ ਅਤ੍ਥਮ੍ਹਾ, ਅਹਂਵ ਅਸਿਤਾਭੁਯਾਤਿ. (ਜਾ. ੧.੨.੧੬੮);

ਯਥਾ ਚਨ੍ਦਕਿਨ੍ਨਰਿਂ ਪਤ੍ਥਯਨ੍ਤੋ ਅਸਿਤਾਭੁਯਾ ਰਾਜਧੀਤਾਯ ਹੀਨੋ ਪਰਿਹੀਨੋ, ਏਵਂ ਅਤ੍ਰਿਚ੍ਛਂ ਅਤਿਲੋਭੇਨ ਅਤ੍ਥਮ੍ਹ ਹਾਯਤਿ ਜੀਯਤੀਤਿ ਦੇਵਤਾ ਰਞ੍ਞਾ ਸਦ੍ਧਿਂ ਕੇਲ਼ਿਮਕਾਸਿ.

ਕਸ੍ਸਪਬੁਦ੍ਧਕਾਲੇਪਿ ਮਿਤ੍ਤਵਿਨ੍ਦਕੋ ਨਾਮ ਸੇਟ੍ਠਿਪੁਤ੍ਤੋ ਅਸ੍ਸਦ੍ਧੋ ਅਪ੍ਪਸਨ੍ਨੋ ਮਾਤਰਾ ‘ਤਾਤ, ਅਜ੍ਜ ਉਪੋਸਥਿਕੋ ਹੁਤ੍ਵਾ ਵਿਹਾਰੇ ਸਬ੍ਬਰਤ੍ਤਿਂ ਧਮ੍ਮਸਵਨਂ ਸੁਣ, ਸਹਸ੍ਸਂ ਤੇ ਦਸ੍ਸਾਮੀ’ਤਿ ਵੁਤ੍ਤੇ ਧਨਲੋਭੇਨ ਉਪੋਸਥਙ੍ਗਾਨਿ ਸਮਾਦਾਯ ਵਿਹਾਰਂ ਗਨ੍ਤ੍ਵਾ ‘ਇਦਂ ਠਾਨਂ ਅਕੁਤੋਭਯ’ਨ੍ਤਿ ਸਲ੍ਲਕ੍ਖੇਤ੍ਵਾ ਧਮ੍ਮਾਸਨਸ੍ਸ ਹੇਟ੍ਠਾ ਨਿਪਨ੍ਨੋ ਸਬ੍ਬਰਤ੍ਤਿਂ ਨਿਦ੍ਦਾਯਿਤ੍ਵਾ ਘਰਂ ਅਗਮਾਸਿ. ਮਾਤਾ ਪਾਤੋਵ ਯਾਗੁਂ ਪਚਿਤ੍ਵਾ ਉਪਨਾਮੇਸਿ. ਸੋ ਸਹਸ੍ਸਂ ਗਹੇਤ੍ਵਾਵ ਯਾਗੁਂ ਪਿਵਿ. ਅਥਸ੍ਸ ਏਤਦਹੋਸਿ – ‘ਧਨਂ ਸਂਹਰਿਸ੍ਸਾਮੀ’ਤਿ. ਸੋ ਨਾਵਾਯ ਸਮੁਦ੍ਦਂ ਪਕ੍ਖਨ੍ਦਿਤੁਕਾਮੋ ਅਹੋਸਿ. ਅਥ ਨਂ ਮਾਤਾ ‘‘ਤਾਤ, ਇਮਸ੍ਮਿਂ ਕੁਲੇ ਚਤ੍ਤਾਲੀਸਕੋਟਿਧਨਂ ਅਤ੍ਥਿ; ਅਲਂ ਗਮਨੇਨਾ’’ਤਿ ਵਾਰੇਸਿ. ਸੋ ਤਸ੍ਸਾ ਵਚਨਂ ਅਨਾਦਿਯਿਤ੍ਵਾ ਗਚ੍ਛਤਿ ਏਵ. ਸਾ ਪੁਰਤੋ ਅਟ੍ਠਾਸਿ. ਅਥ ਨਂ ਕੁਜ੍ਝਿਤ੍ਵਾ ‘ਅਯਂ ਮਯ੍ਹਂ ਪੁਰਤੋ ਤਿਟ੍ਠਤੀ’ਤਿ ਪਾਦੇਨ ਪਹਰਿਤ੍ਵਾ ਪਤਿਤਂ ਮਾਤਰਂ ਅਨ੍ਤਰਂ ਕਤ੍ਵਾ ਅਗਮਾਸਿ. ਮਾਤਾ ਉਟ੍ਠਹਿਤ੍ਵਾ ‘‘ਮਾਦਿਸਾਯ ਮਾਤਰਿ ਏਵਰੂਪਂ ਕਮ੍ਮਂ ਕਤ੍ਵਾ ਗਤਸ੍ਸ ਮੇ ਗਤਟ੍ਠਾਨੇ ਸੁਖਂ ਭਵਿਸ੍ਸਤੀ’’ਤਿ ਏਵਂਸਞ੍ਞੀ ਨਾਮ ਤ੍ਵਂ ਪੁਤ੍ਤਾਤਿ ਆਹ. ਤਸ੍ਸ ਨਾਵਂ ਆਰੁਯ੍ਹ ਗਚ੍ਛਤੋ ਸਤ੍ਤਮੇ ਦਿਵਸੇ ਨਾਵਾ ਅਟ੍ਠਾਸਿ. ਅਥ ਤੇ ਮਨੁਸ੍ਸਾ ‘‘ਅਦ੍ਧਾ ਏਤ੍ਥ ਪਾਪਪੁਰਿਸੋ ਅਤ੍ਥਿ; ਸਲਾਕਂ ਦੇਥਾ’’ਤਿ ਸਲਾਕਾ ਦੀਯਮਾਨਾ ਤਸ੍ਸੇਵ ਤਿਕ੍ਖਤ੍ਤੁਂ ਪਾਪੁਣਿ. ਤੇ ਤਸ੍ਸ ਉਲ਼ੁਮ੍ਪਂ ਦਤ੍ਵਾ ਤਂ ਸਮੁਦ੍ਦੇ ਪਕ੍ਖਿਪਿਂਸੁ. ਸੋ ਏਕਂ ਦੀਪਂ ਗਨ੍ਤ੍ਵਾ ਵਿਮਾਨਪੇਤੀਹਿ ਸਦ੍ਧਿਂ ਸਮ੍ਪਤ੍ਤਿਂ ਅਨੁਭਵਨ੍ਤੋ ਤਾਹਿ ‘‘ਪੁਰਤੋ ਮਾ ਅਗਮਾਸੀ’’ਤਿ ਵੁਚ੍ਚਮਾਨੋਪਿ ਤਦ੍ਦਿਗੁਣਂ ਸਮ੍ਪਤ੍ਤਿਂ ਪਸ੍ਸਨ੍ਤੋ ਅਨੁਪੁਬ੍ਬੇਨ ਖੁਰਚਕ੍ਕਧਰਂ ਏਕਂ ਪੁਰਿਸਂ ਅਦ੍ਦਸ. ਤਸ੍ਸ ਤਂ ਚਕ੍ਕਂ ਪਦੁਮਪੁਪ੍ਫਂ ਵਿਯ ਉਪਟ੍ਠਾਤਿ. ਸੋ ਤਂ ਆਹ – ‘‘ਅਮ੍ਭੋ, ਇਦਂ ਤਯਾ ਪਿਲ਼ਨ੍ਧਪਦੁਮਂ ਮਯ੍ਹਂ ਦੇਹੀ’’ਤਿ. ‘‘ਨਯਿਦਂ, ਸਾਮਿ, ਪਦੁਮਂ; ਖੁਰਚਕ੍ਕਂ ਏਤ’’ਨ੍ਤਿ. ਸੋ ‘‘ਵਞ੍ਚੇਸਿ ਮਂ ਤ੍ਵਂ. ਕਿਂ ਮੇ ਪਦੁਮਂ ਨ ਦਿਟ੍ਠਪੁਬ੍ਬ’’ਨ੍ਤਿ ਵਤ੍ਵਾ ‘‘ਤ੍ਵਞ੍ਹਿ ਲੋਹਿਤਚਨ੍ਦਨਂ ਲਿਮ੍ਪੇਤ੍ਵਾ ਪਿਲ਼ਨ੍ਧਨਂ ਪਦੁਮਪੁਪ੍ਫਂ ਮਯ੍ਹਂ ਨ ਦਾਤੁਕਾਮੋਸੀ’’ਤਿ ਆਹ. ਸੋ ਚਿਨ੍ਤੇਸਿ – ‘ਅਯਮ੍ਪਿ ਮਯਾ ਕਤਸਦਿਸਂ ਕਮ੍ਮਂ ਕਤ੍ਵਾ ਤਸ੍ਸ ਫਲਂ ਅਨੁਭਵਿਤੁਕਾਮੋ’ਤਿ. ਅਥ ਨਂ ‘‘ਹਨ੍ਦ ਰੇ’’ਤਿ ਵਤ੍ਵਾ ਤਸ੍ਸ ਮਤ੍ਥਕੇ ਚਕ੍ਕਂ ਪਕ੍ਖਿਪਿਤ੍ਵਾ ਪਲਾਯਿ. ਏਤਮਤ੍ਥਂ ਵਿਦਿਤ੍ਵਾ ਸਤ੍ਥਾ ਇਮਂ ਗਾਥਮਾਹ –

‘‘ਚਤੁਬ੍ਭਿ ਅਟ੍ਠਜ੍ਝਗਮਾ, ਅਟ੍ਠਹਿ ਪਿਚ ਸੋਲ਼ਸ;

ਸੋਲ਼ਸਾਹਿ ਚ ਬਾਤ੍ਤਿਂਸ, ਅਤ੍ਰਿਚ੍ਛਂ ਚਕ੍ਕਮਾਸਦੋ;

ਇਚ੍ਛਾਹਤਸ੍ਸ ਪੋਸਸ੍ਸ, ਚਕ੍ਕਂ ਭਮਤਿ ਮਤ੍ਥਕੇ’’ਤਿ. (ਜਾ. ੧.੧.੧੦੪);

ਅਞ੍ਞਤਰੋਪਿ ਅਤ੍ਰਿਚ੍ਛੋ ਅਮਚ੍ਚੋ ਸਕਵਿਸਯਂ ਅਤਿਕ੍ਕਮਿਤ੍ਵਾ ਪਰਵਿਸਯਂ ਪਾਵਿਸਿ. ਤਤ੍ਥ ਪੋਥਿਤੋ ਪਲਾਯਿਤ੍ਵਾ ਏਕਸ੍ਸ ਤਾਪਸਸ੍ਸ ਵਸਨਟ੍ਠਾਨਂ ਪਵਿਸਿਤ੍ਵਾ ਉਪੋਸਥਙ੍ਗਾਨਿ ਅਧਿਟ੍ਠਾਯ ਨਿਪਜ੍ਜਿ. ਸੋ ਤਾਪਸੇਨ ‘ਕਿਂ ਤੇ ਕਤ’ਨ੍ਤਿ ਪੁਚ੍ਛਿਤੋ ਇਮਾ ਗਾਥਾਯੋ ਅਭਾਸਿ –

‘‘ਸਕਂ ਨਿਕੇਤਂ ਅਤਿਹੀਲ਼ਯਾਨੋ,

ਅਤ੍ਰਿਚ੍ਛਤਾ ਮਲ੍ਲਗਾਮਂ ਅਗਚ੍ਛਿਂ;

ਤਤੋ ਜਨਾ ਨਿਕ੍ਖਮਿਤ੍ਵਾਨ ਗਾਮਾ,

ਕੋਦਣ੍ਡਕੇਨ ਪਰਿਪੋਥਯਿਂਸੁ ਮਂ.

‘‘ਸੋ ਭਿਨ੍ਨਸੀਸੋ ਰੁਹਿਰਮਕ੍ਖਿਤਙ੍ਗੋ,

ਪਚ੍ਚਾਗਮਾਸਿਂ ਸਕਂ ਨਿਕੇਤਂ;

ਤਸ੍ਮਾ ਅਹਂ ਪੋਸਥਂ ਪਾਲਯਾਮਿ,

ਅਤ੍ਰਿਚ੍ਛਤਾ ਮਾ ਪੁਨਰਾਗਮਾਸੀ’’ਤਿ. (ਜਾ. ੧.੧੪.੧੩੮-੧੩੯);

੮੫੦. ਮਹਿਚ੍ਛਤਾਨਿਦ੍ਦੇਸੇ ਮਹਨ੍ਤਾਨਿ ਵਤ੍ਥੂਨਿ ਇਚ੍ਛਤਿ, ਮਹਤੀ ਵਾਸ੍ਸ ਇਚ੍ਛਾਤਿ ਮਹਿਚ੍ਛੋ, ਤਸ੍ਸ ਭਾਵੋ ਮਹਿਚ੍ਛਤਾ. ਲਕ੍ਖਣਤੋ ਪਨ ਅਸਨ੍ਤਗੁਣਸਮ੍ਭਾਵਨਤਾ ਪਟਿਗ੍ਗਹਣੇ ਚ ਪਰਿਭੋਗੇ ਚ ਅਮਤ੍ਤਞ੍ਞੁਤਾ – ਏਤਂ ਮਹਿਚ੍ਛਤਾਲਕ੍ਖਣਂ. ਮਹਿਚ੍ਛੋ ਹਿ ਪੁਗ੍ਗਲੋ ਯਥਾ ਨਾਮ ਕਚ੍ਛਪੁਟਵਾਣਿਜੋ ਪਿਲ਼ਨ੍ਧਨਭਣ੍ਡਕਂ ਹਤ੍ਥੇਨ ਗਹੇਤ੍ਵਾ ਉਚ੍ਛਙ੍ਗੇਪਿ ਪਕ੍ਖਿਪਿਤਬ੍ਬਯੁਤ੍ਤਕਂ ਪਕ੍ਖਿਪਿਤ੍ਵਾ ਮਹਾਜਨਸ੍ਸ ਪਸ੍ਸਨ੍ਤਸ੍ਸੇਵ ‘‘ਅਮ੍ਮਾ, ਅਸੁਕਂ ਗਣ੍ਹਥ, ਅਸੁਕਂ ਗਣ੍ਹਥਾ’’ਤਿ ਮੁਖੇਨ ਸਂਵਿਦਹਤਿ. ਏਵਮੇਵ ਸੋ ਅਪ੍ਪਮਤ੍ਤਕਮ੍ਪਿ ਅਤ੍ਤਨੋ ਸੀਲਂ ਵਾ ਗਨ੍ਥਂ ਵਾ ਧੁਤਗੁਣਂ ਵਾ ਅਨ੍ਤਮਸੋ ਅਰਞ੍ਞਵਾਸਮਤ੍ਤਕਮ੍ਪਿ ਮਹਾਜਨਸ੍ਸ ਜਾਨਨ੍ਤਸ੍ਸੇਵ ਸਮ੍ਭਾਵੇਤੁਕਾਮੋ ਹੋਤਿ, ਸਮ੍ਭਾਵੇਤ੍ਵਾ ਚ ਪਨ ਸਕਟੇਹਿਪਿ ਉਪਨੀਤੇ ਪਚ੍ਚਯੇ ‘ਅਲ’ਨ੍ਤਿ ਅਵਤ੍ਵਾ ਗਣ੍ਹਾਤਿ. ਤਯੋ ਹਿ ਪੂਰੇਤੁਂ ਨ ਸਕ੍ਕਾ – ਅਗ੍ਗਿ ਉਪਾਦਾਨੇਨ, ਸਮੁਦ੍ਦੋ ਉਦਕੇਨ, ਮਹਿਚ੍ਛੋ ਪਚ੍ਚਯੇਹੀਤਿ.

ਅਗ੍ਗਿਕ੍ਖਨ੍ਧੋ ਸਮੁਦ੍ਦੋ ਚ, ਮਹਿਚ੍ਛੋ ਚਾਪਿ ਪੁਗ੍ਗਲੋ;

ਬਹੁਕੇ ਪਚ੍ਚਯੇ ਦੇਨ੍ਤੇ, ਤਯੋ ਪੇਤੇ ਨ ਪੂਰਯੇ.

ਮਹਿਚ੍ਛਪੁਗ੍ਗਲੋ ਹਿ ਵਿਜਾਤਮਾਤੁਯਾਪਿ ਮਨਂ ਗਣ੍ਹਿਤੁਂ ਨ ਸਕ੍ਕੋਤਿ, ਪਗੇਵ ਉਪਟ੍ਠਾਕਾਨਂ.

ਤਤ੍ਰਿਮਾਨਿ ਵਤ੍ਥੂਨਿ – ਏਕੋ ਕਿਰ ਦਹਰਭਿਕ੍ਖੁ ਪਿਟ੍ਠਪੂਵੇ ਪਿਯਾਯਤਿ. ਅਥਸ੍ਸ ਮਾਤਾ ਪਟਿਪਤ੍ਤਿਂ ਵੀਮਂਸਮਾਨਾ ‘ਸਚੇ ਮੇ ਪੁਤ੍ਤੋ ਪਟਿਗ੍ਗਹਣੇ ਮਤ੍ਤਂ ਜਾਨਾਤਿ, ਸਕਲਮ੍ਪਿ ਨਂ ਤੇਮਾਸਂ ਪੂਵੇਹੇਵ ਉਪਟ੍ਠਹਿਸ੍ਸਾਮੀ’ਤਿ ਵਸ੍ਸੂਪਨਾਯਿਕਦਿਵਸੇ ਪਰਿਵੀਮਂਸਮਾਨਾ ਪਠਮਂ ਏਕਂ ਪੂਵਂ ਅਦਾਸਿ, ਤਸ੍ਮਿਂ ਨਿਟ੍ਠਿਤੇ ਦੁਤਿਯਂ, ਤਸ੍ਮਿਮ੍ਪਿ ਨਿਟ੍ਠਿਤੇ ਤਤਿਯਂ. ਦਹਰੋ ‘ਅਲ’ਨ੍ਤਿ ਅਵਤ੍ਵਾ ਖਾਦਿਯੇਵ. ਮਾਤਾ ਤਸ੍ਸ ਅਮਤ੍ਤਞ੍ਞੁਭਾਵਂ ਞਤ੍ਵਾ ‘ਅਜ੍ਜੇਵ ਮੇ ਪੁਤ੍ਤੇਨ ਸਕਲਤੇਮਾਸਸ੍ਸ ਪੂਵਾ ਖਾਦਿਤਾ’ਤਿ ਦੁਤਿਯਦਿਵਸਤੋ ਪਟ੍ਠਾਯ ਏਕਪੂਵਮ੍ਪਿ ਨ ਅਦਾਸਿ.

ਤਿਸ੍ਸਮਹਾਰਾਜਾਪਿ ਦੇਵਸਿਕਂ ਚੇਤਿਯਪਬ੍ਬਤੇ ਭਿਕ੍ਖੁਸਙ੍ਘਸ੍ਸ ਦਾਨਂ ਦਦਮਾਨੋ ‘ਮਹਾਰਾਜ, ਕਿਂ ਏਕਮੇਵ ਠਾਨਂ ਭਜਸਿ? ਕਿਂ ਅਞ੍ਞਤ੍ਥ ਦਾਤੁਂ ਨ ਵਟ੍ਟਤੀ’ਤਿ ਜਾਨਪਦੇਹਿ ਵੁਤ੍ਤੋ ਦੁਤਿਯਦਿਵਸੇ ਅਨੁਰਾਧਪੁਰੇ ਮਹਾਦਾਨਂ ਦਾਪੇਸਿ. ਏਕਭਿਕ੍ਖੁਪਿ ਪਟਿਗ੍ਗਹਣੇ ਮਤ੍ਤਂ ਨ ਅਞ੍ਞਾਸਿ. ਏਕਮੇਕੇਨ ਪਟਿਗ੍ਗਹਿਤਂ ਖਾਦਨੀਯਭੋਜਨੀਯਂ ਦ੍ਵੇ ਤਯੋ ਜਨਾ ਉਕ੍ਖਿਪਿਂਸੁ. ਰਾਜਾ ਦੁਤਿਯਦਿਵਸੇ ਚੇਤਿਯਪਬ੍ਬਤੇ ਭਿਕ੍ਖੁਸਙ੍ਘਂ ਨਿਮਨ੍ਤਾਪੇਤ੍ਵਾ ਰਾਜਨ੍ਤੇਪੁਰਂ ਆਗਤਕਾਲੇ ‘‘ਪਤ੍ਤਂ ਦੇਥਾ’’ਤਿ ਆਹ. ‘‘ਅਲਂ, ਮਹਾਰਾਜ, ਅਤ੍ਤਨੋ ਪਮਾਣੇਨ ਭਿਕ੍ਖਂ ਗਣ੍ਹਿਸ੍ਸਤੀ’’ਤਿ ਏਕਭਿਕ੍ਖੁਪਿ ਪਤ੍ਤਂ ਨ ਅਦਾਸਿ. ਸਬ੍ਬੇ ਪਮਾਣਯੁਤ੍ਤਕਮੇਵ ਪਟਿਗ੍ਗਹੇਸੁਂ. ਅਥ ਰਾਜਾ ਆਹ – ‘‘ਪਸ੍ਸਥ ਤੁਮ੍ਹਾਕਂ ਭਿਕ੍ਖੂਸੁ ਏਕੋਪਿ ਮਤ੍ਤਂ ਨ ਜਾਨਾਤਿ. ਹਿਯ੍ਯੋ ਕਿਞ੍ਚਿ ਅਵਸੇਸਂ ਨਾਹੋਸਿ. ਅਜ੍ਜ ਗਹਿਤਂ ਮਨ੍ਦਂ, ਅਵਸੇਸਮੇਵ ਬਹੂ’’ਤਿ ਤੇਸਂ ਮਤ੍ਤਞ੍ਞੁਤਾਯ ਅਤ੍ਤਮਨੋ ਇਤਰੇਸਞ੍ਚ ਅਮਤ੍ਤਞ੍ਞੁਤਾਯ ਅਨਤ੍ਤਮਨੋ ਅਹੋਸਿ.

੮੫੧. ਪਾਪਿਚ੍ਛਤਾਨਿਦ੍ਦੇਸੇ ਅਸ੍ਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂਤਿਆਦੀਸੁ ਏਵਂ ਇਚ੍ਛਨ੍ਤੋ ਕਿਂ ਕਰੋਤਿ? ਅਸ੍ਸਦ੍ਧੋ ਸਦ੍ਧਾਕਾਰਂ ਦਸ੍ਸੇਤਿ; ਦੁਸ੍ਸੀਲਾਦਯੋ ਸੀਲਵਨ੍ਤਾਦੀਨਂ ਆਕਾਰਂ ਦਸ੍ਸੇਨ੍ਤਿ. ਕਥਂ? ਅਸ੍ਸਦ੍ਧੋ ਤਾਵ ਮਹਾਮਹਦਿਵਸੇ ਮਨੁਸ੍ਸਾਨਂ ਵਿਹਾਰਂ ਆਗਮਨਵੇਲਾਯ ਸਮ੍ਮਜ੍ਜਨਿਂ ਆਦਾਯ ਵਿਹਾਰਂ ਸਮ੍ਮਜ੍ਜਤਿ, ਕਚਵਰਂ ਛਡ੍ਡੇਤਿ, ਮਨੁਸ੍ਸੇਹਿ ਦਿਟ੍ਠਭਾਵਂ ਞਤ੍ਵਾ ਚੇਤਿਯਙ੍ਗਣਂ ਗਚ੍ਛਤਿ, ਤਤ੍ਥਾਪਿ ਸਮ੍ਮਜ੍ਜਿਤ੍ਵਾ ਕਚਵਰਂ ਛਡ੍ਡੇਤਿ, ਵਾਲਿਕਂ ਸਮਂ ਕਰੋਤਿ, ਆਸਨਾਨਿ ਧੋਵਤਿ, ਬੋਧਿਮ੍ਹਿ ਉਦਕਂ ਸਿਞ੍ਚਤਿ. ਮਨੁਸ੍ਸਾ ਦਿਸ੍ਵਾ ‘ਨਤ੍ਥਿ ਮਞ੍ਞੇ ਅਞ੍ਞੋ ਭਿਕ੍ਖੁ ਵਿਹਾਰਜਗ੍ਗਨਕੋ, ਅਯਮੇਵ ਇਮਂ ਵਿਹਾਰਂ ਪਟਿਜਗ੍ਗਤਿ, ਸਦ੍ਧੋ ਥੇਰੋ’ਤਿ ਗਮਨਕਾਲੇ ਨਿਮਨ੍ਤੇਤ੍ਵਾ ਗਚ੍ਛਨ੍ਤਿ. ਦੁਸ੍ਸੀਲੋਪਿ ਉਪਟ੍ਠਾਕਾਨਂ ਸਮ੍ਮੁਖੇ ਵਿਨਯਧਰਂ ਉਪਸਙ੍ਕਮਿਤ੍ਵਾ ਪੁਚ੍ਛਤਿ ‘‘ਭਨ੍ਤੇ, ਮਯਿ ਗਚ੍ਛਨ੍ਤੇ ਗੋਣੋ ਉਬ੍ਬਿਗ੍ਗੋ. ਤੇਨ ਧਾਵਤਾ ਤਿਣਾਨਿ ਛਿਨ੍ਨਾਨਿ. ਸਮ੍ਮਜ੍ਜਨ੍ਤਸ੍ਸ ਮੇ ਤਿਣਾਨਿ ਛਿਜ੍ਜਨ੍ਤਿ. ਚਙ੍ਕਮਨ੍ਤਸ੍ਸ ਮੇ ਪਾਣਕਾ ਮੀਯਨ੍ਤਿ. ਖੇਲ਼ਂ ਪਾਤੇਨ੍ਤਸ੍ਸ ਅਸਤਿਯਾ ਤਿਣਮਤ੍ਥਕੇ ਪਤਤਿ; ਤਤ੍ਥ ਤਤ੍ਥ ਕਿਂ ਹੋਤੀ’’ਤਿ? ‘‘ਅਨਾਪਤ੍ਤਿ, ਆਵੁਸੋ, ਅਸਞ੍ਚਿਚ੍ਚ ਅਸਤਿਯਾ ਅਜਾਨਨ੍ਤਸ੍ਸਾ’’ਤਿ ਚ ਵੁਤ੍ਤੇ ‘‘ਭਨ੍ਤੇ, ਮਯ੍ਹਂ ਗਰੁਕਂ ਵਿਯ ਉਪਟ੍ਠਾਤਿ; ਸੁਟ੍ਠੁ ਵੀਮਂਸਥਾ’’ਤਿ ਭਣਤਿ. ਤਂ ਸੁਤ੍ਵਾ ਮਨੁਸ੍ਸਾ ‘ਅਮ੍ਹਾਕਂ ਅਯ੍ਯੋ ਏਤ੍ਤਕੇਪਿ ਕੁਕ੍ਕੁਚ੍ਚਾਯਤਿ! ਅਞ੍ਞਸ੍ਮਿਂ ਓਲ਼ਾਰਿਕੇ ਕਿਂ ਨਾਮ ਕਰਿਸ੍ਸਤਿ; ਨਤ੍ਥਿ ਇਮਿਨਾ ਸਦਿਸੋ ਸੀਲਵਾਤਿ ਪਸਨ੍ਨਾ ਸਕ੍ਕਾਰਂ ਕਰੋਨ੍ਤਿ. ਅਪ੍ਪਸ੍ਸੁਤੋਪਿ ਉਪਟ੍ਠਾਕਮਜ੍ਝੇ ਨਿਸਿਨ੍ਨੋ ‘‘ਅਸੁਕੋ ਤਿਪਿਟਕਧਰੋ, ਅਸੁਕੋ ਚਤੁਨਿਕਾਯਿਕੋ ਮਯ੍ਹਂ ਅਨ੍ਤੇਵਾਸਿਕੋ, ਮਮ ਸਨ੍ਤਿਕੇ ਤੇਹਿ ਧਮ੍ਮੋ ਉਗ੍ਗਹਿਤੋ’’ਤਿ ਵਦਤਿ. ਮਨੁਸ੍ਸਾ ‘ਅਮ੍ਹਾਕਂ ਅਯ੍ਯੇਨ ਸਦਿਸੋ ਬਹੁਸ੍ਸੁਤੋ ਨਤ੍ਥਿ, ਏਤਸ੍ਸ ਕਿਰ ਸਨ੍ਤਿਕੇ ਅਸੁਕੇਨ ਚ ਅਸੁਕੇਨ ਚ ਧਮ੍ਮੋ ਉਗ੍ਗਹਿਤੋ’ਤਿ ਪਸਨ੍ਨਾ ਸਕ੍ਕਾਰਂ ਕਰੋਨ੍ਤਿ.

ਸਙ੍ਗਣਿਕਾਰਾਮੋਪਿ ਮਹਾਮਹਦਿਵਸੇ ਦੀਘਪੀਠਞ੍ਚ ਅਪਸ੍ਸਯਞ੍ਚ ਗਾਹਾਪੇਤ੍ਵਾ ਵਿਹਾਰਪਚ੍ਚਨ੍ਤੇ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਤਿ. ਮਨੁਸ੍ਸਾ ਆਗਨ੍ਤ੍ਵਾ ‘‘ਥੇਰੋ ਕੁਹਿ’’ਨ੍ਤਿ ਪੁਚ੍ਛਨ੍ਤਿ. ‘‘ਗਣ੍ਠਿਕਪੁਤ੍ਤਾ ਨਾਮ ਗਣ੍ਠਿਕਾ ਏਵ ਹੋਨ੍ਤਿ. ਤੇਨ ਥੇਰੋ ਏਵਰੂਪੇ ਕਾਲੇ ਇਧ ਨ ਨਿਸੀਦਤਿ, ਵਿਹਾਰਪਚ੍ਚਨ੍ਤੇ ਦਿਵਾਟ੍ਠਾਨੇ ਦੀਘਚਙ੍ਕਮੇ ਵਿਹਰਤੀ’’ਤਿ ਵਦਨ੍ਤਿ. ਸੋਪਿ ਦਿਵਸਭਾਗਂ ਵੀਤਿਨਾਮੇਤ੍ਵਾ ਨਲਾਟੇ ਮਕ੍ਕਟਸੁਤ੍ਤਂ ਅਲ੍ਲਿਯਾਪੇਤ੍ਵਾ ਪੀਠਂ ਗਾਹਾਪੇਤ੍ਵਾ ਆਗਮ੍ਮ ਪਰਿਵੇਣਦ੍ਵਾਰੇ ਨਿਸੀਦਤਿ. ਮਨੁਸ੍ਸਾ ‘‘ਕਹਂ, ਭਨ੍ਤੇ, ਗਤਤ੍ਥ? ਆਗਨ੍ਤ੍ਵਾ ਨ ਅਦ੍ਦਸਮ੍ਹਾ’’ਤਿ ਵਦਨ੍ਤਿ. ‘‘ਉਪਾਸਕਾ, ਅਨ੍ਤੋਵਿਹਾਰੋ ਆਕਿਣ੍ਣੋ; ਦਹਰਸਾਮਣੇਰਾਨਂ ਵਿਚਰਣਟ੍ਠਾਨਮੇਤਂ ਸਟ੍ਠਿਹਤ੍ਥਚਙ੍ਕਮੇ ਦਿਵਾਟ੍ਠਾਨੇ ਨਿਸੀਦਿਮ੍ਹਾ’’ਤਿ ਅਤ੍ਤਨੋ ਪਵਿਵਿਤ੍ਤਭਾਵਂ ਜਾਨਾਪੇਤਿ.

ਕੁਸੀਤੋਪਿ ਉਪਟ੍ਠਾਕਮਜ੍ਝੇ ਨਿਸਿਨ੍ਨੋ ‘‘ਉਪਾਸਕਾ, ਤੁਮ੍ਹੇਹਿ ਉਕ੍ਕਾਪਾਤੋ ਦਿਟ੍ਠੋ’’ਤਿ ਵਦਤਿ. ‘‘ਨ ਪਸ੍ਸਾਮ, ਭਨ੍ਤੇ; ਕਾਯ ਵੇਲਾਯ ਅਹੋਸੀ’’ਤਿ ਚ ਪੁਟ੍ਠੋ ‘‘ਅਮ੍ਹਾਕਂ ਚਙ੍ਕਮਨਵੇਲਾਯਾ’’ਤਿ ਵਤ੍ਵਾ ‘‘ਭੂਮਿਚਾਲਸਦ੍ਦਂ ਅਸ੍ਸੁਤ੍ਥਾ’’ਤਿ ਪੁਚ੍ਛਤਿ. ‘‘ਨ ਸੁਣਾਮ, ਭਨ੍ਤੇ; ਕਾਯ ਵੇਲਾਯਾ’’ਤਿ ਪੁਟ੍ਠੋ ‘‘ਮਜ੍ਝਿਮਯਾਮੇ ਅਮ੍ਹਾਕਂ ਆਲਮ੍ਬਨਫਲਕਂ ਅਪਸ੍ਸਾਯ ਠਿਤਕਾਲੇ’’ਤਿ ਵਤ੍ਵਾ ‘‘ਮਹਾਓਭਾਸੋ ਅਹੋਸਿ; ਸੋ ਵੋ ਦਿਟ੍ਠੋ’’ਤਿ ਪੁਚ੍ਛਤਿ. ‘‘ਕਾਯ ਵੇਲਾਯ, ਭਨ੍ਤੇ’’ਤਿ ਚ ਵੁਤ੍ਤੇ ‘‘ਮਯ੍ਹਂ ਚਙ੍ਕਮਮ੍ਹਾ ਓਤਰਣਕਾਲੇ’’ਤਿ ਵਦਤਿ. ਮਨੁਸ੍ਸਾ ‘ਅਮ੍ਹਾਕਂ ਥੇਰੋ ਤੀਸੁਪਿ ਯਾਮੇਸੁ ਚਙ੍ਕਮੇਯੇਵ ਹੋਤਿ; ਨਤ੍ਥਿ ਅਯ੍ਯੇਨ ਸਦਿਸੋ ਆਰਦ੍ਧਵੀਰਿਯੋ’ਤਿ ਪਸਨ੍ਨਾ ਸਕ੍ਕਾਰਂ ਕਰੋਨ੍ਤਿ.

ਮੁਟ੍ਠਸ੍ਸਤੀਪਿ ਉਪਟ੍ਠਾਕਮਜ੍ਝੇ ਨਿਸਿਨ੍ਨੋ ‘‘ਮਯਾ ਅਸੁਕਕਾਲੇ ਨਾਮ ਦੀਘਨਿਕਾਯੋ ਉਗ੍ਗਹਿਤੋ, ਅਸੁਕਕਾਲੇ ਮਜ੍ਝਿਮੋ, ਸਂਯੁਤ੍ਤਕੋ, ਅਙ੍ਗੁਤ੍ਤਰਿਕੋ; ਅਨ੍ਤਰਾ ਓਲੋਕਨਂ ਨਾਮ ਨਤ੍ਥਿ, ਇਚ੍ਛਿਤਿਚ੍ਛਤਟ੍ਠਾਨੇ ਮੁਖਾਰੁਲ਼੍ਹੋਵ ਤਨ੍ਤਿ ਆਗਚ੍ਛਤਿ; ਇਮੇ ਪਨਞ੍ਞੇ ਭਿਕ੍ਖੂ ਏਲ਼ਕਾ ਵਿਯ ਮੁਖਂ ਫਨ੍ਦਾਪੇਨ੍ਤਾ ਵਿਹਰਨ੍ਤੀ’’ਤਿ ਵਦਤਿ. ਮਨੁਸ੍ਸਾ ‘ਨਤ੍ਥਿ ਅਯ੍ਯੇਨ ਸਦਿਸੋ ਉਪਟ੍ਠਿਤਸਤੀ’ਤਿ ਪਸਨ੍ਨਾ ਸਕ੍ਕਾਰਂ ਕਰੋਨ੍ਤਿ.

ਅਸਮਾਹਿਤੋਪਿ ਉਪਟ੍ਠਾਕਾਨਂ ਸਮ੍ਮੁਖੇ ਅਟ੍ਠਕਥਾਚਰਿਯੇ ਪਞ੍ਹਂ ਪੁਚ੍ਛਤਿ – ‘ਕਸਿਣਂ ਨਾਮ ਕਥਂ ਭਾਵੇਤਿ? ਕਿਤ੍ਤਕੇਨ ਨਿਮਿਤ੍ਤਂ ਉਪ੍ਪਨ੍ਨਂ ਨਾਮ ਹੋਤਿ? ਕਿਤ੍ਤਕੇਨ ਉਪਚਾਰੋ? ਕਿਤ੍ਤਕੇਨ ਅਪ੍ਪਨਾ? ਪਠਮਸ੍ਸ ਝਾਨਸ੍ਸ ਕਤਿ ਅਙ੍ਗਾਨਿ? ਦੁਤਿਯਸ੍ਸ ਤਤਿਯਸ੍ਸ ਚਤੁਤ੍ਥਸ੍ਸ ਝਾਨਸ੍ਸ ਕਤਿ ਅਙ੍ਗਾਨਿ’’ਤਿ ਪੁਚ੍ਛਤਿ. ਤੇਹਿ ਅਤ੍ਤਨੋ ਉਗ੍ਗਹਿਤਾਨੁਰੂਪੇਨ ਕਥਿਤਕਾਲੇ ਸਿਤਂ ਕਤ੍ਵਾ ‘ਕਿਂ, ਆਵੁਸੋ, ਏਵਂ ਨ ਹੋਸੀ’ਤਿ ਵੁਤ੍ਤੇ ‘ਵਟ੍ਟਤਿ, ਭਨ੍ਤੇ’ਤਿ ਅਤ੍ਤਨੋ ਸਮਾਪਤ੍ਤਿਲਾਭਿਤਂ ਸੂਚੇਤਿ. ਮਨੁਸ੍ਸਾ ‘ਸਮਾਪਤ੍ਤਿਲਾਭੀ ਅਯ੍ਯੋ’ਤਿ ਪਸਨ੍ਨਾ ਸਕ੍ਕਾਰਂ ਕਰੋਨ੍ਤਿ.

ਦੁਪ੍ਪਞ੍ਞੋਪਿ ਉਪਟ੍ਠਾਕਾਨਂ ਮਜ੍ਝੇ ਨਿਸਿਨ੍ਨੋ ‘ਮਜ੍ਝਿਮਨਿਕਾਯੇ ਮੇ ਪਞ੍ਚਤ੍ਤਯਂ ਓਲੋਕੇਨ੍ਤਸ੍ਸ ਸਹਿਦ੍ਧਿਯਾਵ ਮਗ੍ਗੋ ਆਗਤੋ. ਪਰਿਯਤ੍ਤਿ ਨਾਮ ਅਮ੍ਹਾਕਂ ਨ ਦੁਕ੍ਕਰਾ. ਪਰਿਯਤ੍ਤਿਵਾਵਟੋ ਪਨ ਦੁਕ੍ਖਤੋ ਨ ਮੁਚ੍ਚਤੀਤਿ ਪਰਿਯਤ੍ਤਿਂ ਵਿਸ੍ਸਜ੍ਜਯਿਮ੍ਹਾ’ਤਿਆਦੀਨਿ ਵਦਨ੍ਤੋ ਅਤ੍ਤਨੋ ਮਹਾਪਞ੍ਞਤਂ ਦੀਪੇਤਿ. ਏਵਂ ਵਦਨ੍ਤੋ ਪਨਸ੍ਸ ਸਾਸਨੇ ਪਹਾਰਂ ਦੇਤਿ. ਇਮਿਨਾ ਸਦਿਸੋ ਮਹਾਚੋਰੋ ਨਾਮ ਨਤ੍ਥਿ. ਨ ਹਿ ਪਰਿਯਤ੍ਤਿਧਰੋ ਦੁਕ੍ਖਤੋ ਨ ਮੁਚ੍ਚਤੀਤਿ. ਅਖੀਣਾਸਵੋਪਿ ਗਾਮਦਾਰਕੇ ਦਿਸ੍ਵਾ ‘ਤੁਮ੍ਹਾਕਂ ਮਾਤਾਪਿਤਰੋ ਅਮ੍ਹੇ ਕਿਂ ਵਦਨ੍ਤੀ’’ਤਿ? ‘‘ਅਰਹਾਤਿ ਵਦਨ੍ਤਿ, ਭਨ੍ਤੇ’’ਤਿ. ‘ਯਾਵ ਛੇਕਾ ਗਹਪਤਿਕਾ, ਨ ਸਕ੍ਕਾ ਵਞ੍ਚੇਤੁ’ਨ੍ਤਿ ਅਤ੍ਤਨੋ ਖੀਣਾਸਵਭਾਵਂ ਦੀਪੇਤਿ.

ਅਞ੍ਞੇਪਿ ਚੇਤ੍ਥ ਚਾਟਿਅਰਹਨ੍ਤਪਾਰੋਹਅਰਹਨ੍ਤਾਦਯੋ ਵੇਦਿਤਬ੍ਬਾ – ਏਕੋ ਕਿਰ ਕੁਹਕੋ ਅਨ੍ਤੋਗਬ੍ਭੇ ਚਾਟਿਂ ਨਿਖਣਿਤ੍ਵਾ ਮਨੁਸ੍ਸਾਨਂ ਆਗਮਨਕਾਲੇ ਪਵਿਸਤਿ. ਮਨੁਸ੍ਸਾ ‘ਕਹਂ ਥੇਰੋ’ਤਿ ਪੁਚ੍ਛਨ੍ਤਿ. ‘ਅਨ੍ਤੋਗਬ੍ਭੇ’ਤਿ ਚ ਵੁਤ੍ਤੇ ਪਵਿਸਿਤ੍ਵਾ ਵਿਚਿਨਨ੍ਤਾਪਿ ਅਦਿਸ੍ਵਾ ਨਿਕ੍ਖਮਿਤ੍ਵਾ ‘ਨਤ੍ਥਿ ਥੇਰੋ’ਤਿ ਵਦਨ੍ਤਿ. ‘ਅਨ੍ਤੋਗਬ੍ਭੇਯੇਵ ਥੇਰੋ’ਤਿ ਚ ਵੁਤ੍ਤੇ ਪੁਨ ਪਵਿਸਨ੍ਤਿ. ਥੇਰੋ ਚਾਟਿਤੋ ਨਿਕ੍ਖਮਿਤ੍ਵਾ ਪੀਠੇ ਨਿਸਿਨ੍ਨੋ ਹੋਤਿ. ਤਤੋ ਤੇਹਿ ‘ਮਯਂ, ਭਨ੍ਤੇ, ਪੁਬ੍ਬੇ ਅਦਿਸ੍ਵਾ ਨਿਕ੍ਖਨ੍ਤਾ, ਕਹਂ ਤੁਮ੍ਹੇ ਗਤਤ੍ਥਾ’’ਤਿ ਵੁਤ੍ਤੇ ‘ਸਮਣਾ ਨਾਮ ਅਤ੍ਤਨੋ ਇਚ੍ਛਿਤਿਚ੍ਛਿਤਟ੍ਠਾਨਂ ਗਚ੍ਛਨ੍ਤੀ’ਤਿ ਵਚਨੇਨ ਅਤ੍ਤਨੋ ਖੀਣਾਸਵਭਾਵਂ ਦੀਪੇਤਿ.

ਅਪਰੋਪਿ ਕੁਹਕੋ ਏਕਸ੍ਮਿਂ ਪਬ੍ਬਤੇ ਪਣ੍ਣਸਾਲਾਯਂ ਵਸਤਿ. ਪਣ੍ਣਸਾਲਾਯ ਚ ਪਚ੍ਛਤੋ ਪਪਾਤਟ੍ਠਾਨੇ ਏਕੋ ਕਚ੍ਛਕਰੁਕ੍ਖੋ ਅਤ੍ਥਿ. ਤਸ੍ਸ ਪਾਰੋਹੋ ਗਨ੍ਤ੍ਵਾ ਪਰਭਾਗੇ ਭੂਮਿਯਂ ਪਤਿਟ੍ਠਿਤੋ. ਮਨੁਸ੍ਸਾ ਮਗ੍ਗੇਨਾਗਨ੍ਤ੍ਵਾ ਨਿਮਨ੍ਤੇਨ੍ਤਿ. ਸੋ ਪਤ੍ਤਚੀਵਰਮਾਦਾਯ ਪਾਰੋਹੇਨ ਓਤਰਿਤ੍ਵਾ ਗਾਮਦ੍ਵਾਰੇ ਅਤ੍ਤਾਨਂ ਦਸ੍ਸੇਤਿ. ਤਤੋ ਮਨੁਸ੍ਸੇਹਿ ਪਚ੍ਛਾ ਆਗਨ੍ਤ੍ਵਾ ‘ਕਤਰੇਨ ਮਗ੍ਗੇਨ ਆਗਤਤ੍ਥ, ਭਨ੍ਤੇ’ਤਿ ਪੁਟ੍ਠੋ ‘ਸਮਣਾਨਂ ਆਗਤਮਗ੍ਗੋ ਨਾਮ ਪੁਚ੍ਛਿਤੁਂ ਨ ਵਟ੍ਟਤਿ, ਅਤ੍ਤਨੋ ਇਚ੍ਛਿਤਿਚ੍ਛਿਤਟ੍ਠਾਨੇਨੇਵ ਆਗਚ੍ਛਨ੍ਤੀ’ਤਿ ਵਚਨੇਨ ਖੀਣਾਸਵਭਾਵਂ ਦੀਪੇਤਿ. ਤਂ ਪਨ ਕੁਹਕਂ ਏਕੋ ਵਿਦ੍ਧਕਣ੍ਣੋ ਞਤ੍ਵਾ ‘ਪਰਿਗ੍ਗਹੇਸ੍ਸਾਮਿ ਨ’ਨ੍ਤਿ ਏਕਦਿਵਸਂ ਪਾਰੋਹੇਨ ਓਤਰਨ੍ਤਂ ਦਿਸ੍ਵਾ ਪਚ੍ਛਤੋ ਛਿਨ੍ਦਿਤ੍ਵਾ ਅਪ੍ਪਮਤ੍ਤਕੇਨ ਠਪੇਸਿ. ਸੋ ‘ਪਾਰੋਹਤੋ ਓਤਰਿਸ੍ਸਾਮੀ’ਤਿ ‘ਠ’ਨ੍ਤਿ ਪਤਿਤੋ, ਮਤ੍ਤਿਕਾ ਪਤ੍ਤੋ ਭਿਜ੍ਜਿ. ਸੋ ‘ਞਾਤੋਮ੍ਹੀ’ਤਿ ਨਿਕ੍ਖਮਿਤ੍ਵਾ ਪਲਾਯਿ. ਪਾਪਿਚ੍ਛਸ੍ਸ ਭਾਵੋ ਪਾਪਿਚ੍ਛਤਾ. ਲਕ੍ਖਣਤੋ ਪਨ ਅਸਨ੍ਤਗੁਣਸਮ੍ਭਾਵਨਤਾ, ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ; ਏਤਂ ਪਾਪਿਚ੍ਛਤਾਲਕ੍ਖਣਨ੍ਤਿ ਵੇਦਿਤਬ੍ਬਂ.

੮੫੨. ਸਿਙ੍ਗਨਿਦ੍ਦੇਸੇ ਵਿਜ੍ਝਨਟ੍ਠੇਨ ਸਿਙ੍ਗਂ; ਨਾਗਰਿਕਭਾਵਸਙ੍ਖਾਤਸ੍ਸ ਕਿਲੇਸਸਿਙ੍ਗਸ੍ਸੇਤਂ ਨਾਮਂ. ਸਿਙ੍ਗਾਰਭਾਵੋ ਸਿਙ੍ਗਾਰਤਾ, ਸਿਙ੍ਗਾਰਕਰਣਾਕਾਰੋ ਵਾ. ਚਤੁਰਭਾਵੋ ਚਤੁਰਤਾ. ਤਥਾ ਚਾਤੁਰਿਯਂ. ਪਰਿਕ੍ਖਤਭਾਵੋ ਪਰਿਕ੍ਖਤਤਾ; ਪਰਿਖਣਿਤ੍ਵਾ ਠਪਿਤਸ੍ਸੇਵ ਦਲ਼੍ਹਸਿਙ੍ਗਾਰਭਾਵਸ੍ਸੇਤਂ ਨਾਮਂ. ਇਤਰਂ ਤਸ੍ਸੇਵ ਵੇਵਚਨਂ. ਏਵਂ ਸਬ੍ਬੇਹਿਪਿ ਪਦੇਹਿ ਕਿਲੇਸਸਿਙ੍ਗਾਰਤਾਵ ਕਥਿਤਾ.

੮੫੩. ਤਿਨ੍ਤਿਣਨਿਦ੍ਦੇਸੇ ਤਿਨ੍ਤਿਣਨ੍ਤਿ ਖੀਯਨਂ. ਤਿਨ੍ਤਿਣਾਯਨਾਕਾਰੋ ਤਿਨ੍ਤਿਣਾਯਨਾ. ਤਿਨ੍ਤਿਣੇਨ ਅਯਿਤਸ੍ਸ ਤਿਨ੍ਤਿਣਸਮਙ੍ਗਿਨੋ ਭਾਵੋ ਤਿਨ੍ਤਿਣਾਯਿਤਤ੍ਤਂ. ਲੋਲੁਪਭਾਵੋ ਲੋਲੁਪ੍ਪਂ. ਇਤਰੇ ਦ੍ਵੇ ਆਕਾਰਭਾਵਨਿਦ੍ਦੇਸਾ. ਪੁਚ੍ਛਞ੍ਜਿਕਤਾਤਿ ਲਾਭਲਭਨਕਟ੍ਠਾਨੇ ਵੇਧਨਾਕਮ੍ਪਨਾ ਨੀਚਵੁਤ੍ਤਿਤਾ. ਸਾਧੁਕਮ੍ਯਤਾਤਿ ਪਣੀਤਪਣੀਤਾਨਂ ਪਤ੍ਥਨਾ. ਏਵਂ ਸਬ੍ਬੇਹਿਪਿ ਪਦੇਹਿ ਸੁਵਾਨਦੋਣਿਯਂ ਕਞ੍ਜਿਯਂ ਪਿਵਨਕਸੁਨਖਸ੍ਸ ਅਞ੍ਞਂ ਸੁਨਖਂ ਦਿਸ੍ਵਾ ਭੁਭੁਕ੍ਕਰਣਂ ਵਿਯ ‘ਤਵ ਸਨ੍ਤਕਂ, ਮਮ ਸਨ੍ਤਕ’ਨ੍ਤਿ ਕਿਲੇਸਵਸੇਨ ਖੀਯਨਾਕਾਰੋ ਕਥਿਤੋ.

੮੫੪. ਚਾਪਲ੍ਯਨਿਦ੍ਦੇਸੇ ਆਕੋਟਿਤਪਚ੍ਚਾਕੋਟਿਤਭਾਵਾਦੀਹਿ ਚੀਵਰਸ੍ਸ ਮਣ੍ਡਨਾ ਚੀਵਰਮਣ੍ਡਨਾ. ਮਣਿਵਣ੍ਣਚ੍ਛਵਿਕਰਣਾਦੀਹਿ ਪਤ੍ਤਸ੍ਸ ਮਣ੍ਡਨਾ ਪਤ੍ਤਮਣ੍ਡਨਾ. ਚਿਤ੍ਤਕਮ੍ਮਾਦੀਹਿ ਪੁਗ੍ਗਲਿਕਸੇਨਾਸਨਸ੍ਸ ਮਣ੍ਡਨਾ ਸੇਨਾਸਨਮਣ੍ਡਨਾ. ਇਮਸ੍ਸ ਵਾ ਪੂਤਿਕਾਯਸ੍ਸਾਤਿ ਇਮਸ੍ਸ ਮਨੁਸ੍ਸਸਰੀਰਸ੍ਸ. ਯਥਾ ਹਿ ਤਦਹੁਜਾਤੋਪਿ ਸਿਙ੍ਗਾਲੋ ਜਰਸਿਙ੍ਗਾਲੋਤ੍ਵੇਵ ਊਰੁਪ੍ਪਮਾਣਾਪਿ ਚ ਗਲ਼ੋਚਿਲਤਾ ਪੂਤਿਲਤਾਤ੍ਵੇਵ ਸਙ੍ਖਂ ਗਚ੍ਛਤਿ, ਏਵਂ ਸੁਵਣ੍ਣਵਣ੍ਣੋਪਿ ਮਨੁਸ੍ਸਕਾਯੋ ਪੂਤਿਕਾਯੋਤ੍ਵੇਵ ਵੁਚ੍ਚਤਿ. ਤਸ੍ਸ ਅਨ੍ਤਰਨ੍ਤਰਾ ਰਤ੍ਤਵਣ੍ਣਪਣ੍ਡੁਵਣ੍ਣਾਦੀਹਿ ਨਿਵਾਸਨਪਾਰੁਪਨਾਦੀਹਿ ਸਜ੍ਜਨਾ ਮਣ੍ਡਨਾ ਨਾਮ. ਬਾਹਿਰਾਨਂ ਵਾ ਪਰਿਕ੍ਖਾਰਾਨਨ੍ਤਿ ਠਪੇਤ੍ਵਾ ਪਤ੍ਤਚੀਵਰਂ ਸੇਸਪਰਿਕ੍ਖਾਰਾਨਂ; ਅਥਵਾ ਯਾ ਏਸਾ ਚੀਵਰਮਣ੍ਡਨਾ ਪਤ੍ਤਮਣ੍ਡਨਾਤਿ ਵੁਤ੍ਤਾ, ਸਾ ਤੇਹਿ ਵਾ ਪਰਿਕ੍ਖਾਰੇਹਿ ਕਾਯਸ੍ਸ ਮਣ੍ਡਨਾ ਤੇਸਂ ਵਾ ਬਾਹਿਰਪਰਿਕ੍ਖਾਰਾਨਂ ਮਣ੍ਡੇਤ੍ਵਾ ਠਪਨਵਸੇਨ ਮਣ੍ਡਨਾਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਮਣ੍ਡਨਾ ਵਿਭੂਸਨਾਤਿ ਏਤ੍ਥ ਊਨਟ੍ਠਾਨਸ੍ਸ ਪੂਰਣਵਸੇਨ ਮਣ੍ਡਨਾ, ਛਵਿਰਾਗਾਦਿਵਸੇਨ ਵਿਭੂਸਨਾਤਿ ਵੇਦਿਤਬ੍ਬਾ. ਕੇਲ਼ਨਾਤਿ ਕੀਲ਼ਨਾ. ਪਰਿਕੇਲ਼ਨਾਤਿ ਪਰਿਕੀਲ਼ਨਾ. ਗਿਦ੍ਧਿਕਤਾਤਿ ਗੇਧਯੁਤ੍ਤਤਾ. ਗਿਦ੍ਧਿਕਤ੍ਤਨ੍ਤਿ ਤਸ੍ਸੇਵ ਵੇਵਚਨਂ. ਚਪਲਭਾਵੋ ਚਪਲਤਾ. ਤਥਾ ਚਾਪਲ੍ਯਂ. ਇਦਂ ਵੁਚ੍ਚਤੀਤਿ ਇਦਂ ਚਾਪਲ੍ਯਂ ਨਾਮ ਵੁਚ੍ਚਤਿ, ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਵਸ੍ਸਸਤਿਕੋਪਿ ਸਮਾਨੋ ਤਦਹੁਜਾਤਦਾਰਕੋ ਵਿਯ ਹੋਤਿ.

੮੫੫. ਅਸਭਾਗਵੁਤ੍ਤਿਨਿਦ੍ਦੇਸੇ ਵਿਪ੍ਪਟਿਕੂਲਗ੍ਗਾਹਿਤਾਤਿ ਅਨਨੁਲੋਮਗ੍ਗਾਹਿਤਾ. ਵਿਪਚ੍ਚਨੀਕਸਾਤਤਾਤਿ ਵਿਪਚ੍ਚਨੀਕੇਨ ਪਟਿਵਿਰੁਦ੍ਧਕਰਣੇਨ ਸੁਖਾਯਨਾ. ਅਨਾਦਰਭਾਵੋ ਅਨਾਦਰਿਯਂ. ਤਥਾ ਅਨਾਦਰਿਯਤਾ. ਅਗਾਰਵਸ੍ਸ ਭਾਵੋ ਅਗਾਰਵਤਾ. ਜੇਟ੍ਠਕਭਾਵਸ੍ਸ ਅਕਰਣਂ ਅਪ੍ਪਤਿਸ੍ਸਵਤਾ. ਅਯਂ ਵੁਚ੍ਚਤੀਤਿ ਅਯਂ ਅਸਭਾਗਵੁਤ੍ਤਿ ਨਾਮ ਵੁਚ੍ਚਤਿ; ਵਿਸਭਾਗਜੀਵਿਕਤਾਤਿ ਅਤ੍ਥੋ; ਯਾਯ ਸਮਨ੍ਨਾਗਤੋ ਪੁਗ੍ਗਲੋ ਮਾਤਰਂ ਪਿਤਰਂ ਵਾ ਗਿਲਾਨਂ ਪਟਿਵਤ੍ਤਿਤ੍ਵਾਪਿ ਨ ਓਲੋਕੇਤਿ; ਪਿਤੁਸਨ੍ਤਕਸ੍ਸ ਕਾਰਣਾ ਮਾਤਰਾ ਸਦ੍ਧਿਂ, ਮਾਤੁਸਨ੍ਤਕਸ੍ਸ ਕਾਰਣਾ ਪਿਤਰਾ ਸਦ੍ਧਿਂ ਕਲਹਂ ਕਰੋਤਿ; ਵਿਸਭਾਗਜੀਵਿਤਂ ਜੀਵਤਿ, ਮਾਤਾਪਿਤੂਨਂ ਸਨ੍ਤਕਸ੍ਸ ਕਾਰਣਾ ਜੇਟ੍ਠੇਨ ਵਾ ਕਨਿਟ੍ਠੇਨ ਵਾ ਭਾਤਰਾ ਸਦ੍ਧਿਂ ਕਲਹਂ ਕਰੋਤਿ, ਨਿਲ੍ਲਜ੍ਜਵਚਨਂ ਵਦਤਿ, ਆਚਰਿਯਸ੍ਸ ਵਾ ਉਪਜ੍ਝਾਯਸ੍ਸ ਵਾ ਵਤ੍ਤਪਟਿਵਤ੍ਤਂ ਨ ਕਰੋਤਿ, ਗਿਲਾਨਂ ਨ ਉਪਟ੍ਠਾਤਿ, ਬੁਦ੍ਧਸ੍ਸ ਭਗਵਤੋ ਚੇਤਿਯਦਸ੍ਸਨਟ੍ਠਾਨੇ ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰੋਤਿ, ਖੇਲ਼ਮ੍ਪਿ ਸਿਙ੍ਘਾਣਿਕਮ੍ਪਿ ਛਡ੍ਡੇਤਿ, ਛਤ੍ਤਂ ਧਾਰੇਤਿ, ਉਪਾਹਨਾ ਆਰੁਯ੍ਹ ਗਚ੍ਛਤਿ, ਬੁਦ੍ਧਸਾਵਕੇਸੁ ਨ ਲਜ੍ਜਤਿ, ਸਙ੍ਘੇ ਚਿਤ੍ਤੀਕਾਰਂ ਨ ਕਰੋਤਿ, ਮਾਤਿਮਤ੍ਤਪਿਤਿਮਤ੍ਤਾਦੀਸੁ ਗਰੁਟ੍ਠਾਨੀਯੇਸੁ ਹਿਰੋਤ੍ਤਪ੍ਪਂ ਨ ਪਚ੍ਚੁਪਟ੍ਠਾਪੇਤਿ. ਤਸ੍ਸੇਵਂ ਪਵਤ੍ਤਮਾਨਸ੍ਸ ਸਬ੍ਬਾ ਪੇਸਾ ਕਿਰਿਯਾ ਮਾਤਰੀਤਿਆਦੀਸੁਪਿ ਵਤ੍ਥੂਸੁ ਅਸਭਾਗਵੁਤ੍ਤਿਤਾ ਨਾਮ ਹੋਤਿ.

੮੫੬. ਅਰਤਿਨਿਦ੍ਦੇਸੇ ਪਨ੍ਤੇਸੂਤਿ ਦੂਰੇਸੁ ਵਿਵਿਤ੍ਤੇਸੁ ਵਾ. ਅਧਿਕੁਸਲੇਸੂਤਿ ਸਮਥਵਿਪਸ੍ਸਨਾਧਮ੍ਮੇਸੁ. ਅਰਤੀਤਿ ਰਤਿਪਟਿਕ੍ਖੇਪੋ. ਅਰਤਿਤਾਤਿ ਅਰਮਣਾਕਾਰੋ. ਅਨਭਿਰਤੀਤਿ ਅਨਭਿਰਤਭਾਵੋ. ਅਨਭਿਰਮਣਾਤਿ ਅਨਭਿਰਮਣਾਕਾਰੋ. ਉਕ੍ਕਣ੍ਠਿਤਾਤਿ ਉਕ੍ਕਣ੍ਠਨਾਕਾਰੋ. ਪਰਿਤਸ੍ਸਿਤਾਤਿ ਉਕ੍ਕਣ੍ਠਨਵਸੇਨੇਵ ਪਰਿਤਸ੍ਸਨਾ.

੮੫੭. ਤਨ੍ਦੀਨਿਦ੍ਦੇਸੇ ਤਨ੍ਦੀਤਿ ਜਾਤਿਆਲਸਿਯਂ. ਤਨ੍ਦਿਯਨਾਤਿ ਤਨ੍ਦਿਯਨਾਕਾਰੋ. ਤਨ੍ਦਿਮਨਕਤਾਤਿ ਤਨ੍ਦਿਯਾ ਅਭਿਭੂਤਚਿਤ੍ਤਤਾ. ਅਲਸਸ੍ਸ ਭਾਵੋ ਆਲਸ੍ਯਂ. ਆਲਸ੍ਯਾਯਨਾਕਾਰੋ ਆਲਸ੍ਯਾਯਨਾ. ਅਲਸ੍ਯਾਯਿਤਸ੍ਸ ਭਾਵੋ ਆਲਸ੍ਯਾਯਿਤਤ੍ਤਂ. ਇਤਿ ਸਬ੍ਬੇਹਿਪਿ ਇਮੇਹਿ ਪਦੇਹਿ ਕਿਲੇਸਵਸੇਨ ਕਾਯਾਲਸਿਯਂ ਕਥਿਤਂ.

੮੫੮. ਵਿਜਮ੍ਭਿਤਾਨਿਦ੍ਦੇਸੇ ਜਮ੍ਭਨਾਤਿ ਫਨ੍ਦਨਾ. ਪੁਨਪ੍ਪੁਨਂ ਜਮ੍ਭਨਾ ਵਿਜਮ੍ਭਨਾ. ਆਨਮਨਾਤਿ ਪੁਰਤੋ ਨਮਨਾ. ਵਿਨਮਨਾਤਿ ਪਚ੍ਛਤੋ ਨਮਨਾ. ਸਨ੍ਨਮਨਾਤਿ ਸਮਨ੍ਤਤੋ ਨਮਨਾ. ਪਣਮਨਾਤਿ ਯਥਾ ਹਿ ਤਨ੍ਤਤੋ ਉਟ੍ਠਿਤਪੇਸਕਾਰੋ ਕਿਸ੍ਮਿਞ੍ਚਿਦੇਵ ਗਹੇਤ੍ਵਾ ਉਜੁਕਂ ਕਾਯਂ ਉਸ੍ਸਾਪੇਤਿ, ਏਵਂ ਕਾਯਸ੍ਸ ਉਦ੍ਧਂ ਠਪਨਾ. ਬ੍ਯਾਧਿਯਕਨ੍ਤਿ ਉਪ੍ਪਨ੍ਨਬ੍ਯਾਧਿਤਾ. ਇਤਿ ਸਬ੍ਬੇਹਿਪਿ ਇਮੇਹਿ ਪਦੇਹਿ ਕਿਲੇਸਵਸੇਨ ਕਾਯਫਨ੍ਦਨਮੇਵ ਕਥਿਤਂ.

੮੫੯. ਭਤ੍ਤਸਮ੍ਮਦਨਿਦ੍ਦੇਸੇ ਭੁਤ੍ਤਾਵਿਸ੍ਸਾਤਿ ਭੁਤ੍ਤਵਤੋ. ਭਤ੍ਤਮੁਚ੍ਛਾਤਿ ਭਤ੍ਤਗੇਲਞ੍ਞਂ; ਬਲਵਭਤ੍ਤੇਨ ਹਿ ਮੁਚ੍ਛਾਪਤ੍ਤੋ ਵਿਯ ਹੋਤਿ. ਭਤ੍ਤਕਿਲਮਥੋਤਿ ਭਤ੍ਤੇਨ ਕਿਲਨ੍ਤਭਾਵੋ. ਭਤ੍ਤਪਰਿਲ਼ਾਹੋਤਿ ਭਤ੍ਤਦਰਥੋ. ਤਸ੍ਮਿਞ੍ਹਿ ਸਮਯੇ ਪਰਿਲ਼ਾਹੁਪ੍ਪਤ੍ਤਿਯਾ ਉਪਹਤਿਨ੍ਦ੍ਰਿਯੋ ਹੋਤਿ, ਕਾਯੋ ਜੀਰਤਿ. ਕਾਯਦੁਟ੍ਠੁਲ੍ਲਨ੍ਤਿ ਭਤ੍ਤਂ ਨਿਸ੍ਸਾਯ ਕਾਯਸ੍ਸ ਅਕਮ੍ਮਞ੍ਞਤਾ.

੮੬੦. ਚੇਤਸੋ ਲੀਨਤ੍ਤਨਿਦ੍ਦੇਸੋ ਹੇਟ੍ਠਾ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਤ੍ਥੋਯੇਵ. ਇਮੇਹਿ ਪਨ ਸਬ੍ਬੇਹਿਪਿ ਪਦੇਹਿ ਕਿਲੇਸਵਸੇਨ ਚਿਤ੍ਤਸ੍ਸ ਗਿਲਾਨਾਕਾਰੋ ਕਥਿਤੋਤਿ ਵੇਦਿਤਬ੍ਬੋ.

੮੬੧. ਕੁਹਨਾਨਿਦ੍ਦੇਸੇ ਲਾਭਸਕ੍ਕਾਰਸਿਲੋਕਸਨ੍ਨਿਸ੍ਸਿਤਸ੍ਸਾਤਿ ਲਾਭਞ੍ਚ ਸਕ੍ਕਾਰਞ੍ਚ ਕਿਤ੍ਤਿਸਦ੍ਦਞ੍ਚ ਨਿਸ੍ਸਿਤਸ੍ਸ, ਪਤ੍ਥਯਨ੍ਤਸ੍ਸਾਤਿ ਅਤ੍ਥੋ. ਪਾਪਿਚ੍ਛਸ੍ਸਾਤਿ ਅਸਨ੍ਤਗੁਣਦੀਪਨਕਾਮਸ੍ਸ. ਇਚ੍ਛਾਪਕਤਸ੍ਸਾਤਿ ਇਚ੍ਛਾਯ ਅਪਕਤਸ੍ਸ, ਉਪਦ੍ਦੁਤਸ੍ਸਾਤਿ ਅਤ੍ਥੋ.

ਇਤੋ ਪਰਂ ਯਸ੍ਮਾ ਪਚ੍ਚਯਪਟਿਸੇਵਨ ਸਾਮਨ੍ਤਜਪ੍ਪਨਇਰਿਯਾਪਥਸਨ੍ਨਿਸ੍ਸਿਤਵਸੇਨ ਮਹਾਨਿਦ੍ਦੇਸੇ ਤਿਵਿਧਂ ਕੁਹਨਵਤ੍ਥੁ ਆਗਤਂ, ਤਸ੍ਮਾ ਤਿਵਿਧਮ੍ਪਿ ਤਂ ਦਸ੍ਸੇਤੁਂ ਪਚ੍ਚਯਪਟਿਸੇਵਨਸਙ੍ਖਾਤੇਨ ਵਾਤਿ ਏਵਮਾਦਿ ਆਰਦ੍ਧਂ. ਤਤ੍ਥ ਚੀਵਰਾਦੀਹਿ ਨਿਮਨ੍ਤਿਤਸ੍ਸ ਤਦਤ੍ਥਿਕਸ੍ਸੇਵ ਸਤੋ ਪਾਪਿਚ੍ਛਤਂ ਨਿਸ੍ਸਾਯ ਪਟਿਕ੍ਖਿਪਨੇਨ, ਤੇ ਚ ਗਹਪਤਿਕੇ ਅਤ੍ਤਨਿ ਸੁਪ੍ਪਤਿਟ੍ਠਿਤਸਦ੍ਧੇ ਞਤ੍ਵਾ ਪੁਨ ਤੇਸਂ ‘ਅਹੋ ਅਯ੍ਯੋ ਅਪ੍ਪਿਚ੍ਛੋ, ਨ ਕਿਞ੍ਚਿ ਪਟਿਗ੍ਗਣ੍ਹਿਤੁਂ ਇਚ੍ਛਤਿ, ਸੁਲਦ੍ਧਂ ਵਤ ਨੋ ਅਸ੍ਸ ਸਚੇ ਅਪ੍ਪਮਤ੍ਤਕਂ ਕਿਞ੍ਚਿ ਪਟਿਗ੍ਗਣ੍ਹੇਯ੍ਯਾ’ਤਿ ਨਾਨਾਵਿਧੇਹਿ ਉਪਾਯੇਹਿ ਪਣੀਤਾਨਿ ਚੀਵਰਾਦੀਨਿ ਉਪਨੇਨ੍ਤਾਨਂ ਤਦਨੁਗ੍ਗਹਕਾਮਤਂਯੇਵ ਆਵਿਕਤ੍ਵਾ ਪਟਿਗ੍ਗਹਣੇਨ ਚ ਤਤੋ ਪਭੁਤਿ ਅਸੀਤਿਸਕਟਭਾਰੇਹਿ ਉਪਨਾਮਨਹੇਤੁਭੂਤਂ ਵਿਮ੍ਹਾਪਨਂ ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ. ਵੁਤ੍ਤਮ੍ਪਿ ਚੇਤਂ ਮਹਾਨਿਦ੍ਦੇਸੇ (ਮਹਾਨਿ. ੮੭) –

‘‘ਕਤਮਂ ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਨਵਤ੍ਥੁ? ਇਧ ਗਹਪਤਿਕਾ ਭਿਕ੍ਖੁਂ ਨਿਮਨ੍ਤੇਨ੍ਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੇਹਿ. ਸੋ ਪਾਪਿਚ੍ਛੋ ਇਚ੍ਛਾਪਕਤੋ ਅਤ੍ਥਿਕੋ ਚੀਵਰ …ਪੇ… ਪਰਿਕ੍ਖਾਰਾਨਂ ਭਿਯ੍ਯੋਕਮ੍ਯਤਂ ਉਪਾਦਾਯ ਚੀਵਰਂ ਪਚ੍ਚਕ੍ਖਾਤਿ, ਪਿਣ੍ਡਪਾਤਂ ਪਚ੍ਚਕ੍ਖਾਤਿ, ਸੇਨਾਸਨਂ ਪਚ੍ਚਕ੍ਖਾਤਿ, ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਪਚ੍ਚਕ੍ਖਾਤਿ. ਸੋ ਏਵਮਾਹ – ‘‘ਕਿਂ ਸਮਣਸ੍ਸ ਮਹਗ੍ਘੇਨ ਚੀਵਰੇਨ? ਏਤਂ ਸਾਰੁਪ੍ਪਂ ਯਂ ਸਮਣੋ ਸੁਸਾਨਾ ਵਾ ਸਙ੍ਕਾਰਕੂਟਾ ਵਾ ਪਾਪਣਿਕਾ ਵਾ ਨਨ੍ਤਕਾਨਿ ਉਚ੍ਚਿਨਿਤ੍ਵਾ ਸਙ੍ਘਾਟਿਂ ਕਤ੍ਵਾ ਧਾਰੇਯ੍ਯ. ਕਿਂ ਸਮਣਸ੍ਸ ਮਹਗ੍ਘੇਨ ਪਿਣ੍ਡਪਾਤੇਨ? ਏਤਂ ਸਾਰੁਪ੍ਪਂ ਯਂ ਸਮਣੋ ਉਞ੍ਛਾਚਰਿਯਾਯ ਪਿਣ੍ਡਿਯਾਲੋਪੇਨ ਜੀਵਿਕਂ ਕਪ੍ਪੇਯ੍ਯ. ਕਿਂ ਸਮਣਸ੍ਸ ਮਹਗ੍ਘੇਨ ਸੇਨਾਸਨੇਨ? ਏਤਂ ਸਾਰੁਪ੍ਪਂ ਯਂ ਸਮਣੋ ਰੁਕ੍ਖਮੂਲਿਕੋ ਵਾ ਅਸ੍ਸ ਸੋਸਾਨਿਕੋ ਵਾ ਅਬ੍ਭੋਕਾਸਿਕੋ ਵਾ. ਕਿਂ ਸਮਣਸ੍ਸ ਮਹਗ੍ਘੇਨ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੇਨ? ਏਤਂ ਸਾਰੁਪ੍ਪਂ ਯਂ ਸਮਣੋ ਪੂਤਿਮੁਤ੍ਤੇਨ ਵਾ ਹਰੀਤਕੀਖਣ੍ਡੇਨ ਵਾ ਓਸਧਂ ਕਰੇਯ੍ਯਾਤਿ. ਤਦੁਪਾਦਾਯ ਲੂਖਂ ਚੀਵਰਂ ਧਾਰੇਤਿ, ਲੂਖਂ ਪਿਣ੍ਡਪਾਤਂ ਪਰਿਭੁਞ੍ਜਤਿ, ਲੂਖਂ ਸੇਨਾਸਨਂ ਪਟਿਸੇਵਤਿ, ਲੂਖਂ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਪਟਿਸੇਵਤਿ. ਤਮੇਨਂ ਗਹਪਤਿਕਾ ਏਵਂ ਜਾਨਨ੍ਤਿ – ‘ਅਯਂ ਸਮਣੋ ਅਪ੍ਪਿਚ੍ਛੋ ਸਨ੍ਤੁਟ੍ਠੋ ਪਵਿਵਿਤ੍ਤੋ ਅਸਂਸਟ੍ਠੋ ਆਰਦ੍ਧਵੀਰਿਯੋ ਧੁਤਵਾਦੋ’ਤਿ ਭਿਯ੍ਯੋ ਭਿਯ੍ਯੋ ਨਿਮਨ੍ਤੇਨ੍ਤਿ ਚੀਵਰ…ਪੇ… ਪਰਿਕ੍ਖਾਰੇਹਿ. ਸੋ ਏਵਮਾਹ – ‘ਤਿਣ੍ਣਂ ਸਮ੍ਮੁਖੀਭਾਵਾ ਸਦ੍ਧੋ ਕੁਲਪੁਤ੍ਤੋ ਬਹੁਂ ਪੁਞ੍ਞਂ ਪਸਵਤਿ – ਸਦ੍ਧਾਯ ਸਮ੍ਮੁਖੀਭਾਵਾ ਸਦ੍ਧੋ ਕੁਲਪੁਤ੍ਤੋ ਬਹੁਂ ਪੁਞ੍ਞਂ ਪਸਵਤਿ, ਦੇਯ੍ਯਧਮ੍ਮਸ੍ਸ…ਪੇ… ਦਕ੍ਖਿਣੇਯ੍ਯਾਨਂ ਸਮ੍ਮੁਖੀਭਾਵਾ ਸਦ੍ਧੋ ਕੁਲਪੁਤ੍ਤੋ ਬਹੁਂ ਪੁਞ੍ਞਂ ਪਸਵਤਿ. ਤੁਮ੍ਹਾਕਞ੍ਚੇਵਾਯਂ ਸਦ੍ਧਾ ਅਤ੍ਥਿ, ਦੇਯ੍ਯਧਮ੍ਮੋ ਚ ਸਂਵਿਜ੍ਜਤਿ, ਅਹਞ੍ਚ ਪਟਿਗ੍ਗਾਹਕੋ. ਸਚਾਹਂ ਨ ਪਟਿਗ੍ਗਹੇਸ੍ਸਾਮਿ, ਏਵਂ ਤੁਮ੍ਹੇ ਪੁਞ੍ਞੇਨ ਪਰਿਬਾਹਿਰਾ ਭਵਿਸ੍ਸਥ; ਨ ਮਯ੍ਹਂ ਇਮਿਨਾ ਅਤ੍ਥੋ, ਅਪਿਚ ਤੁਮ੍ਹਾਕਂ ਏਵ ਅਨੁਕਮ੍ਪਾਯ ਪਟਿਗ੍ਗਣ੍ਹਾਮੀ’ਤਿ. ਤਦੁਪਾਦਾਯ ਬਹੁਮ੍ਪਿ ਚੀਵਰਂ ਪਟਿਗ੍ਗਣ੍ਹਾਤਿ, ਬਹੁਮ੍ਪਿ ਪਿਣ੍ਡਪਾਤਂ…ਪੇ… ਭੇਸਜ੍ਜਪਰਿਕ੍ਖਾਰਂ ਪਟਿਗ੍ਗਣ੍ਹਾਤਿ. ਯਾ ਏਵਰੂਪਾ ਭਾਕੁਟਿਕਾ ਭਾਕੁਟਿਯਂ ਕੁਹਨਾ ਕੁਹਾਯਨਾ ਕੁਹਿਤਤ੍ਤਂ – ਇਦਂ ਵੁਚ੍ਚਤਿ ਪਚ੍ਚਯਪਟਿਸੇਵਨਸਙ੍ਖਾਤਂ ਕੁਹਨਵਤ੍ਥੂ’’ਤਿ.

ਪਾਪਿਚ੍ਛਸ੍ਸੇਵ ਪਨ ਸਤੋ ਉਤ੍ਤਰਿਮਨੁਸ੍ਸਧਮ੍ਮਾਧਿਗਮਪਰਿਦੀਪਨਵਾਚਾਯ ਤਥਾ ਤਥਾ ਵਿਮ੍ਹਾਪਨਂ ਸਾਮਨ੍ਤਜਪ੍ਪਨਸਙ੍ਖਾਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ. ਯਥਾਹ – ‘‘ਕਤਮਂ ਸਾਮਨ੍ਤਜਪ੍ਪਨਸਙ੍ਖਾਤਂ ਕੁਹਨਵਤ੍ਥੁ? ਇਧੇਕਚ੍ਚੋ ਪਾਪਿਚ੍ਛੋ ਇਚ੍ਛਾਪਕਤੋ ਸਮ੍ਭਾਵਨਾਧਿਪ੍ਪਾਯੋ ‘ਏਵਂ ਮਂ ਜਨੋ ਸਮ੍ਭਾਵੇਸ੍ਸਤੀ’ਤਿ ਅਰਿਯਧਮ੍ਮਸਨ੍ਨਿਸ੍ਸਿਤਂ ਵਾਚਂ ਭਾਸਤਿ – ‘ਯੋ ਏਵਰੂਪਂ ਚੀਵਰਂ ਧਾਰੇਤਿ, ਸੋ ਸਮਣੋ ਮਹੇਸਕ੍ਖੋ’ਤਿ ਭਣਤਿ; ‘ਯੋ ਏਵਰੂਪਂ ਪਤ੍ਤਂ, ਲੋਹਥਾਲਕਂ, ਧਮਕਰਣਂ, ਪਰਿਸਾਵਨਂ, ਕੁਞ੍ਚਿਕਂ, ਉਪਾਹਨਂ, ਕਾਯਬਨ੍ਧਨਂ, ਆਯੋਗਂ ਧਾਰੇਤਿ, ਸੋ ਸਮਣੋ ਮਹੇਸਕ੍ਖੋ’ਤਿ ਭਣਤਿ; ‘ਯਸ੍ਸ ਏਵਰੂਪੋ ਉਪਜ੍ਝਾਯੋ, ਆਚਰਿਯੋ, ਸਮਾਨੁਪਜ੍ਝਾਯੋ, ਸਮਾਨਾਚਰਿਯਕੋ, ਮਿਤ੍ਤੋ ਸਨ੍ਦਿਟ੍ਠੋ, ਸਮ੍ਭਤ੍ਤੋ, ਸਹਾਯੋ; ਯੋ ਏਵਰੂਪੇ ਵਿਹਾਰੇ ਵਸਤਿ – ਅਡ੍ਢਯੋਗੇ, ਪਾਸਾਦੇ, ਹਮ੍ਮਿਯੇ, ਗੁਹਾਯਂ, ਲੇਣੇ, ਕੁਟਿਯਾ, ਕੂਟਾਗਾਰੇ, ਅਟ੍ਟੇ, ਮਾਲ਼ੇ, ਉਦੋਸਿਤੇ, ਉਦ੍ਦਣ੍ਡੇ, ਉਪਟ੍ਠਾਨਸਾਲਾਯਂ, ਮਣ੍ਡਪੇ, ਰੁਕ੍ਖਮੂਲੇ ਵਸਤਿ, ਸੋ ਸਮਣੋ ਮਹੇਸਕ੍ਖੋ’ਤਿ ਭਣਤਿ.

‘‘ਅਥ ਵਾ ਕੋਰਜਿਕਕੋਰਜਿਕੋ ਭਾਕੁਟਿਕਭਾਕੁਟਿਕੋ ਕੁਹਕਕੁਹਕੋ ਲਪਕਲਪਕੋ ਮੁਖਸਮ੍ਭਾਵਿਤੋ ‘ਅਯਂ ਸਮਣੋ ਇਮਾਸਂ ਏਵਰੂਪਾਨਂ ਸਨ੍ਤਾਨਂ ਵਿਹਾਰਸਮਾਪਤ੍ਤੀਨਂ ਲਾਭੀ’ਤਿ ਤਾਦਿਸਂ ਗਮ੍ਭੀਰਂ ਗੂਲ਼੍ਹਂ ਨਿਪੁਣਂ ਪਟਿਚ੍ਛਨ੍ਨਂ ਲੋਕੁਤ੍ਤਰਂ ਸੁਞ੍ਞਤਾਪਟਿਸਂਯੁਤ੍ਤਂ ਕਥਂ ਕਥੇਤਿ. ਯਾ ਏਵਰੂਪਾ ਭਾਕੁਟਿਕਾ ਭਾਕੁਟਿਯਂ ਕੁਹਨਾ ਕੁਹਾਯਨਾ ਕੁਹਿਤਤ੍ਤਂ – ਇਦਂ ਵੁਚ੍ਚਤਿ ਸਾਮਨ੍ਤਜਪ੍ਪਨਸਙ੍ਖਾਤਂ ਕੁਹਨਵਤ੍ਥੂ’’ਤਿ.

ਪਾਪਿਚ੍ਛਸ੍ਸੇਵ ਪਨ ਸਤੋ ਸਮ੍ਭਾਵਨਾਧਿਪ੍ਪਾਯਕਤੇਨ ਇਰਿਯਾਪਥੇਨ ਵਿਮ੍ਹਾਪਨਂ ਇਰਿਯਾਪਥਸਨ੍ਨਿਸ੍ਸਿਤਂ ਕੁਹਨਵਤ੍ਥੂਤਿ ਵੇਦਿਤਬ੍ਬਂ. ਯਥਾਹ – ‘‘ਕਤਮਂ ਇਰਿਯਾਪਥਸਙ੍ਖਾਤਂ ਕੁਹਨਵਤ੍ਥੁ? ਇਧੇਕਚ੍ਚੋ ਪਾਪਿਚ੍ਛੋ ਇਚ੍ਛਾਪਕਤੋ ਸਮ੍ਭਾਵਨਾਧਿਪ੍ਪਾਯੋ ‘ਏਵਂ ਮਂ ਜਨੋ ਸਮ੍ਭਾਵੇਸ੍ਸਤੀ’ਤਿ ਗਮਨਂ ਸਣ੍ਠਪੇਤਿ, ਸਯਨਂ ਸਣ੍ਠਪੇਤਿ, ਪਣਿਧਾਯ ਗਚ੍ਛਤਿ, ਪਣਿਧਾਯ ਤਿਟ੍ਠਤਿ, ਪਣਿਧਾਯ ਨਿਸੀਦਤਿ, ਪਣਿਧਾਯ ਸੇਯ੍ਯਂ ਕਪ੍ਪੇਤਿ, ਸਮਾਹਿਤੋ ਵਿਯ ਗਚ੍ਛਤਿ, ਸਮਾਹਿਤੋ ਵਿਯ ਤਿਟ੍ਠਤਿ, ਨਿਸੀਦਤਿ, ਸੇਯ੍ਯਂ ਕਪ੍ਪੇਤਿ, ਆਪਾਥਕਜ੍ਝਾਯੀਵ ਹੋਤਿ. ਯਾ ਏਵਰੂਪਾ ਇਰਿਯਾਪਥਸ੍ਸ ਆਠਪਨਾ ਠਪਨਾ ਸਣ੍ਠਪਨਾ ਭਾਕੁਟਿਕਾ ਭਾਕੁਟਿਯਂ ਕੁਹਨਾ ਕੁਹਾਯਨਾ ਕੁਹਿਤਤ੍ਤਂ – ਇਦਂ ਵੁਚ੍ਚਤਿ ਇਰਿਯਾਪਥਸਙ੍ਖਾਤਂ ਕੁਹਨਵਤ੍ਥੂ’’ਤਿ.

ਤਤ੍ਥ ਪਚ੍ਚਯਪਟਿਸੇਵਨਸਙ੍ਖਾਤੇਨਾਤਿ ਪਚ੍ਚਯਪਟਿਸੇਵਨਨ੍ਤਿ ਏਵਂ ਸਙ੍ਖਾਤੇਨ ਪਚ੍ਚਯਪਟਿਸੇਵਨੇਨ. ਸਾਮਨ੍ਤਜਪ੍ਪਿਤੇਨਾਤਿ ਸਮੀਪੇ ਭਣਿਤੇਨ. ਇਰਿਯਾਪਥਸ੍ਸਾਤਿ ਚਤੁਇਰਿਯਾਪਥਸ੍ਸ. ਆਠਪਨਾਤਿ ਆਦਿਠਪਨਾ, ਆਦਰੇਨ ਵਾ ਠਪਨਾ. ਠਪਨਾਤਿ ਠਪਨਾਕਾਰੋ. ਸਣ੍ਠਪਨਾਤਿ ਅਭਿਸਙ੍ਖਰਣਾ, ਪਾਸਾਦਿਕਭਾਵਕਰਣਨ੍ਤਿ ਵੁਤ੍ਤਂ ਹੋਤਿ. ਭਾਕੁਟਿਕਾਤਿ ਪਧਾਨਪੁਰਿਮਟ੍ਠਿਤਭਾਵਦਸ੍ਸਨੇਨ ਭਾਕੁਟਿਕਰਣਂ, ਮੁਖਸਙ੍ਕੋਚੋਤਿ ਵੁਤ੍ਤਂ ਹੋਤਿ. ਭਾਕੁਟਿਕਰਣਂ ਸੀਲਮਸ੍ਸਾਤਿ ਭਾਕੁਟਿਕੋ; ਭਾਕੁਟਿਕਸ੍ਸ ਭਾਵੋ ਭਾਕੁਟਿਯਂ. ਕੁਹਨਾਤਿ ਵਿਮ੍ਹਾਪਨਂ, ਕੁਹਸ੍ਸ ਆਯਨਾ ਕੁਹਾਯਨਾ. ਕੁਹਿਤਸ੍ਸ ਭਾਵੋ ਕੁਹਿਤਤ੍ਤਨ੍ਤਿ.

੮੬੨. ਲਪਨਾਨਿਦ੍ਦੇਸੇ ਆਲਪਨਾਤਿ ਵਿਹਾਰਂ ਆਗਤਮਨੁਸ੍ਸੇ ਦਿਸ੍ਵਾ ਕਿਮਤ੍ਥਾਯ ਭੋਨ੍ਤੋ ਆਗਤਾ? ਕਿਂ ਭਿਕ੍ਖੂ ਨਿਮਨ੍ਤੇਤੁਂ? ਯਦਿ ਏਵਂ ਗਚ੍ਛਥ; ਅਹਂ ਪਚ੍ਛਤੋ ਭਿਕ੍ਖੂ ਗਹੇਤ੍ਵਾ ਆਗਚ੍ਛਾਮੀ’ਤਿ ਏਵਂ ਆਦਿਤੋਵ ਲਪਨਾ. ਅਥ ਵਾ ਅਤ੍ਤਾਨਂ ਉਪਨੇਤ੍ਵਾ ‘ਅਹਂ ਤਿਸ੍ਸੋ, ਮਯਿ ਰਾਜਾ ਪਸਨ੍ਨੋ, ਮਯਿ ਅਸੁਕੋ ਚ ਅਸੁਕੋ ਚ ਰਾਜਮਹਾਮਤ੍ਤੋ ਪਸਨ੍ਨੋ’ਤਿ ਏਵਂ ਅਤ੍ਤੁਪਨਾਯਿਕਾ ਲਪਨਾ ਆਲਪਨਾ. ਲਪਨਾਤਿ ਪੁਟ੍ਠਸ੍ਸ ਸਤੋ ਵੁਤ੍ਤਪ੍ਪਕਾਰਮੇਵ ਲਪਨਂ. ਸਲ੍ਲਪਨਾਤਿ ਗਹਪਤਿਕਾਨਂ ਉਕ੍ਕਣ੍ਠਨੇ ਭੀਤਸ੍ਸ ਓਕਾਸਂ ਦਤ੍ਵਾ ਸੁਟ੍ਠੁ ਲਪਨਾ. ਉਲ੍ਲਪਨਾਤਿ ‘ਮਹਾਕੁਟੁਮ੍ਬਿਕੋ, ਮਹਾਨਾਵਿਕੋ, ਮਹਾਦਾਨਪਤੀ’ਤਿ ਏਵਂ ਉਦ੍ਧਂ ਕਤ੍ਵਾ ਲਪਨਾ. ਸਮੁਲ੍ਲਪਨਾਤਿ ਸਬ੍ਬਤੋਭਾਗੇਨ ਉਦ੍ਧਂ ਕਤ੍ਵਾ ਲਪਨਾ. ਉਨ੍ਨਹਨਾਤਿ ‘ਉਪਾਸਕਾ, ਪੁਬ੍ਬੇ ਈਦਿਸੇ ਕਾਲੇ ਦਾਨਂ ਦੇਥ; ਇਦਾਨਿ ਕਿਂ ਨ ਦੇਥਾ’ਤਿ ਏਵਂ ਯਾਵ ‘ਦਸ੍ਸਾਮ, ਭਨ੍ਤੇ, ਓਕਾਸਂ ਨ ਲਭਾਮਾ’ਤਿਆਦੀਨਿ ਵਦਨ੍ਤਿ ਤਾਵ ਉਦ੍ਧਂ ਨਹਨਾ, ਵੇਠਨਾਤਿ ਵੁਤ੍ਤਂ ਹੋਤਿ. ਅਥ ਵਾ ਉਚ੍ਛੁਹਤ੍ਥਂ ਦਿਸ੍ਵਾ ‘ਕੁਤੋ ਆਗਤਾ, ਉਪਾਸਕਾ’ਤਿ ਪੁਚ੍ਛਤਿ. ‘ਉਚ੍ਛੁਖੇਤ੍ਤਤੋ, ਭਨ੍ਤੇ’ਤਿ. ‘ਕਿਂ ਤਤ੍ਥ ਉਚ੍ਛੁ ਮਧੁਰ’ਨ੍ਤਿ? ‘ਖਾਦਿਤ੍ਵਾ, ਭਨ੍ਤੇ, ਜਾਨਿਤਬ੍ਬ’ਨ੍ਤਿ. ‘ਨ, ਉਪਾਸਕਾ, ਭਿਕ੍ਖੁਸ੍ਸ ‘ਉਚ੍ਛੁਂ ਦੇਥਾ’ਤਿ ਵਤ੍ਤੁਂ ਵਟ੍ਟਤੀ’ਤਿ ਯਾ ਏਵਰੂਪਾ ਨਿਬ੍ਬੇਠੇਨ੍ਤਸ੍ਸਾਪਿ ਵੇਠਨਕਕਥਾ, ਸਾ ਉਨ੍ਨਹਨਾ. ਸਬ੍ਬਤੋਭਾਗੇਨ ਪੁਨਪ੍ਪੁਨਂ ਉਨ੍ਨਹਨਾ ਸਮੁਨ੍ਨਹਨਾ. ਉਕ੍ਕਾਚਨਾਤਿ ‘ਏਤਂ ਕੁਲਂ ਮਂਯੇਵ ਜਾਨਾਤਿ, ਸਚੇ ਏਤ੍ਥ ਦੇਯ੍ਯਧਮ੍ਮੋ ਉਪ੍ਪਜ੍ਜਤਿ, ਮਯ੍ਹਮੇਵ ਦੇਤੀ’ਤਿ ਏਵਂ ਉਕ੍ਖਿਪਿਤ੍ਵਾ ਕਾਚਨਾ ਉਕ੍ਕਾਚਨਾ; ਉਦ੍ਦੀਪਨਾਤਿ ਵੁਤ੍ਤਂ ਹੋਤਿ.

ਤੇਲਕਨ੍ਦਰਿਕਵਤ੍ਥੁ ਚੇਤ੍ਥ ਵਤ੍ਤਬ੍ਬਂ. ਦ੍ਵੇ ਕਿਰ ਭਿਕ੍ਖੂ ਏਕਂ ਗਾਮਂ ਪਵਿਸਿਤ੍ਵਾ ਆਸਨਸਾਲਾਯ ਨਿਸੀਦਿਤ੍ਵਾ ਏਕਂ ਕੁਮਾਰਿਕਂ ਦਿਸ੍ਵਾ ਪਕ੍ਕੋਸਿਂਸੁ. ਤਾਯ ਆਗਤਾਯ ਤਤ੍ਰੇਕੋ ਏਕਂ ਪੁਚ੍ਛਿ – ‘ਅਯਂ, ਭਨ੍ਤੇ, ਕਸ੍ਸ ਕੁਮਾਰਿਕਾ’ਤਿ? ‘ਅਮ੍ਹਾਕਂ ਉਪਟ੍ਠਾਯਿਕਾਯ ਤੇਲਕਨ੍ਦਰਿਕਾਯ ਧੀਤਾ, ਆਵੁਸੋ. ਇਮਿਸ੍ਸਾ ਮਾਤਾ ਮਯਿ ਗੇਹਂ ਗਤੇ ਸਪ੍ਪਿਂ ਦਦਮਾਨਾ ਘਟੇਨੇਵ ਦੇਤਿ, ਅਯਮ੍ਪਿ ਮਾਤਾ ਵਿਯ ਘਟੇਨੇਵ ਦੇਤੀ’ਤਿ ਉਕ੍ਕਾਚੇਤਿ.

ਸਬ੍ਬਤੋਭਾਗੇਨ ਪੁਨਪ੍ਪੁਨਂ ਉਕ੍ਕਾਚਨਾ ਸਮੁਕ੍ਕਾਚਨਾ. ਅਨੁਪ੍ਪਿਯਭਾਣਿਤਾਤਿ ਸਚ੍ਚਾਨੁਰੂਪਂ ਵਾ ਧਮ੍ਮਾਨੁਰੂਪਂ ਵਾ ਅਨਪਲੋਕੇਤ੍ਵਾ ਪੁਨਪ੍ਪੁਨਂ ਪਿਯਭਣਨਮੇਵ. ਚਾਟੁਕਮ੍ਯਤਾਤਿ ਨੀਚਵੁਤ੍ਤਿਤਾ; ਅਤ੍ਤਾਨਂ ਹੇਟ੍ਠਤੋ ਠਪੇਤ੍ਵਾ ਵਤ੍ਤਨਂ. ਮੁਗ੍ਗਸੂਪ੍ਯਤਾਤਿ ਮੁਗ੍ਗਸੂਪਸਦਿਸਤਾ. ਯਥਾ ਮੁਗ੍ਗੇਸੁ ਪਚ੍ਚਮਾਨੇਸੁ ਕੋਚਿਦੇਵ ਨ ਪਚ੍ਚਤਿ, ਅਵਸੇਸਾ ਪਚ੍ਚਨ੍ਤਿ; ਏਵਂ ਯਸ੍ਸ ਪੁਗ੍ਗਲਸ੍ਸ ਵਚਨੇ ਕਿਞ੍ਚਿਦੇਵ ਸਚ੍ਚਂ ਹੋਤਿ, ਸੇਸਂ ਅਲਿਕਂ – ਅਯਂ ਪੁਗ੍ਗਲੋ ਮੁਗ੍ਗਸੂਪ੍ਯੋਤਿ ਵੁਚ੍ਚਤਿ. ਤਸ੍ਸ ਭਾਵੋ ਮੁਗ੍ਗਸੂਪ੍ਯਤਾ. ਪਾਰਿਭਟਯਤਾਤਿ ਪਾਰਿਭਟਯਭਾਵੋ. ਯੋ ਹਿ ਕੁਲਦਾਰਕੇ ਧਾਤੀ ਵਿਯ ਅਙ੍ਕੇਨ ਵਾ ਖਨ੍ਧੇਨ ਵਾ ਪਰਿਭਟਤਿ, ਧਾਰੇਤੀਤਿ ਅਤ੍ਥੋ; ਤਸ੍ਸ ਪਰਿਭਟਸ੍ਸ ਕਮ੍ਮਂ ਪਾਰਿਭਟਯਂ; ਪਾਰਿਭਟਯਸ੍ਸ ਭਾਵੋ ਪਾਰਿਭਟਯਤਾਤਿ.

੮੬੩. ਨੇਮਿਤ੍ਤਿਕਤਾਨਿਦ੍ਦੇਸੇ ਨਿਮਿਤ੍ਤਨ੍ਤਿ ਯਂਕਿਞ੍ਚਿ ਪਰੇਸਂ ਪਚ੍ਚਯਦਾਨਸਂਯੋਜਨਕਂ ਕਾਯਵਚੀਕਮ੍ਮਂ. ਨਿਮਿਤ੍ਤਕਮ੍ਮਨ੍ਤਿ ਨਿਮਿਤ੍ਤਸ੍ਸ ਕਰਣਕੋਸਲ੍ਲਂ.

ਤਤ੍ਰਿਦਂ ਵਤ੍ਥੁ – ਏਕੋ ਕਿਰ ਪਿਣ੍ਡਪਾਤਿਕੋ ਉਪਟ੍ਠਾਕਕਮ੍ਮਾਰਸ੍ਸ ਗੇਹਦ੍ਵਾਰਂ ਗਨ੍ਤ੍ਵਾ ‘ਕਿਂ ਭਨ੍ਤੇ’ਤਿ ਪੁਚ੍ਛਿਤੋ ਚੀਵਰਨ੍ਤਰੇਨ ਹਤ੍ਥਂ ਨੀਹਰਿਤ੍ਵਾ ਵਾਸਿਪਹਰਣਾਕਾਰਂ ਅਕਾਸਿ. ਕਮ੍ਮਾਰੋ ‘ਸਲ੍ਲਕ੍ਖਿਤਂ ਮੇ, ਭਨ੍ਤੇ’ਤਿ ਵਾਸਿਂ ਕਤ੍ਵਾ ਅਦਾਸਿ. ਓਭਾਸੋਤਿ ਪਚ੍ਚਯਪਟਿਸਂਯੁਤ੍ਤਕਥਾ. ਓਭਾਸਕਮ੍ਮਨ੍ਤਿ ਵਚ੍ਛਕਪਾਲਕੇ ਦਿਸ੍ਵਾ ‘ਕਿਂ ਇਮੇ ਵਚ੍ਛਾ ਖੀਰਗੋਵਚ੍ਛਾ, ਤਕ੍ਕਗੋਵਚ੍ਛਾ’ਤਿ ਪੁਚ੍ਛਿਤ੍ਵਾ ‘ਖੀਰਗੋਵਚ੍ਛਾ, ਭਨ੍ਤੇ’ਤਿ ਵੁਤ੍ਤੇ ‘ਨ ਖੀਰਗੋਵਚ੍ਛਾ, ਯਦਿ ਖੀਰਗੋਵਚ੍ਛਾ ਸਿਯੁਂ ਭਿਕ੍ਖੂਪਿ ਖੀਰਂ ਲਭੇਯ੍ਯੁ’ਨ੍ਤਿ ਏਵਮਾਦਿਨਾ ਨਯੇਨ ਤੇਸਂ ਦਾਰਕਾਨਂ ਮਾਤਾਪਿਤੂਨਂ ਨਿਵੇਦੇਤ੍ਵਾ ਖੀਰਦਾਪਨਾਦਿਕਂ ਓਭਾਸਕਰਣਂ. ਸਾਮਨ੍ਤਜਪ੍ਪਾਤਿ ਸਮੀਪਂ ਕਤ੍ਵਾ ਜਪ੍ਪਨਂ.

ਜਾਤਕਭਾਣਕਵਤ੍ਥੁ ਚੇਤ੍ਥ ਕਥੇਤਬ੍ਬਂ. ਏਕੋ ਕਿਰ ਜਾਤਕਭਾਣਕਤ੍ਥੇਰੋ ਭੁਞ੍ਜਿਤੁਕਾਮੋ ਉਪਟ੍ਠਾਯਿਕਾਯ ਗੇਹਂ ਪਵਿਸਿਤ੍ਵਾ ਨਿਸੀਦਿ. ਸਾ ਅਦਾਤੁਕਾਮਾ ‘ਤਣ੍ਡੁਲਾ ਨਤ੍ਥੀ’ਤਿ ਭਣਨ੍ਤੀ ਤਣ੍ਡੁਲੇ ਆਹਰਿਤੁਕਾਮਾ ਵਿਯ ਪਟਿਵਿਸ੍ਸਕਘਰਂ ਗਤਾ. ਭਿਕ੍ਖੁ ਅਨ੍ਤੋਗਬ੍ਭਂ ਪਵਿਸਿਤ੍ਵਾ ਓਲੋਕੇਨ੍ਤੋ ਕਵਾਟਕੋਣੇ ਉਚ੍ਛੁਂ, ਭਾਜਨੇ ਗੁਲ਼ਂ, ਪਿਟਕੇ ਲੋਣਮਚ੍ਛਫਾਲਂ, ਕੁਮ੍ਭਿਯਂ ਤਣ੍ਡੁਲੇ, ਘਟੇ ਘਤਂ ਦਿਸ੍ਵਾ ਨਿਕ੍ਖਮਿਤ੍ਵਾ ਨਿਸੀਦਿ. ਘਰਣੀ ‘ਤਣ੍ਡੁਲਂ ਨਾਲਤ੍ਥ’ਨ੍ਤਿ ਆਗਤਾ. ਥੇਰੋ ‘ਉਪਾਸਿਕੇ, ਅਜ੍ਜ ਭਿਕ੍ਖਾ ਨ ਸਮ੍ਪਜ੍ਜਿਸ੍ਸਤੀ’ਤਿ ਪਟਿਕਚ੍ਚੇਵ ਨਿਮਿਤ੍ਤਂ ਅਦ੍ਦਸ’ਨ੍ਤਿ ਆਹ. ‘ਕਿਂ, ਭਨ੍ਤੇ’ਤਿ? ‘ਕਵਾਟਕੋਣੇ ਨਿਕ੍ਖਿਤ੍ਤਂ ਉਚ੍ਛੁਂ ਵਿਯ ਸਪ੍ਪਂ ਅਦ੍ਦਸਂ; ‘ਤਂ ਪਹਰਿਸ੍ਸਾਮੀ’ਤਿ ਓਲੋਕੇਨ੍ਤੋ ਭਾਜਨੇ ਠਪਿਤਂ ਗੁਲ਼ਪਿਣ੍ਡਂ ਵਿਯ ਪਾਸਾਣਂ ਲੇਡ੍ਡੁਕੇਨ; ਪਹਟੇਨ ਸਪ੍ਪੇਨ ਕਤਂ, ਪਿਟਕੇ ਨਿਕ੍ਖਿਤ੍ਤਲੋਣਮਚ੍ਛਫਾਲਸਦਿਸਂ, ਫਣਂ; ਤਸ੍ਸ ਤਂ ਲੇਡ੍ਡੁਂ ਡਂਸਿਤੁਕਾਮਸ੍ਸ, ਕੁਮ੍ਭਿਯਾ ਤਣ੍ਡੁਲਸਦਿਸੇ ਦਨ੍ਤੇ; ਅਥਸ੍ਸ ਕੁਪਿਤਸ੍ਸ, ਘਟੇ ਪਕ੍ਖਿਤ੍ਤਘਤਸਦਿਸਂ, ਮੁਖਤੋ ਨਿਕ੍ਖਮਨ੍ਤਂ ਵਿਸਮਿਸ੍ਸਕਂ ਖੇਲ਼’ਨ੍ਤਿ. ਸਾ ‘ਨ ਸਕ੍ਕਾ ਮੁਣ੍ਡਕਂ ਵਞ੍ਚੇਤੁ’ਨ੍ਤਿ ਉਚ੍ਛੁਂ ਦਤ੍ਵਾ ਓਦਨਂ ਪਚਿਤ੍ਵਾ ਘਤਗੁਲ਼ਮਚ੍ਛੇਹਿ ਸਦ੍ਧਿਂ ਅਦਾਸੀਤਿ. ਏਵਂ ਸਮੀਪਂ ਕਤ੍ਵਾ ਜਪ੍ਪਨਂ ਸਾਮਨ੍ਤਜਪ੍ਪਾਤਿ ਵੇਦਿਤਬ੍ਬਂ. ਪਰਿਕਥਾਤਿ ਯਥਾ ਤਂ ਲਭਤਿ ਤਥਾ ਪਰਿਵਤ੍ਤੇਤ੍ਵਾ ਪਰਿਵਤ੍ਤੇਤ੍ਵਾ ਕਥਨਂ.

੮੬੪. ਨਿਪ੍ਪੇਸਿਕਤਾਨਿਦ੍ਦੇਸੇ ਅਕ੍ਕੋਸਨਾਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨਾ. ਵਮ੍ਭਨਾਤਿ ਪਰਿਭਵਿਤ੍ਵਾ ਕਥਨਂ. ਗਰਹਨਾਤਿ ‘ਅਸ੍ਸਦ੍ਧੋ ਅਪ੍ਪਸਨ੍ਨੋ’ਤਿਆਦਿਨਾ ਨਯੇਨ ਦੋਸਾਰੋਪਨਾ. ਉਕ੍ਖੇਪਨਾਤਿ ‘ਮਾ ਏਤਂ ਏਤ੍ਥ ਕਥੇਥਾ’ਤਿ ਵਾਚਾਯ ਉਕ੍ਖਿਪਨਂ. ਸਬ੍ਬਤੋਭਾਗੇਨ ਸਵਤ੍ਥੁਕਂ ਸਹੇਤੁਕਂ ਕਤ੍ਵਾ ਉਕ੍ਖੇਪਨਾ ਸਮੁਕ੍ਖੇਪਨਾ. ਅਥਵਾ ਅਦੇਨ੍ਤਂ ‘ਅਹੋ ਦਾਨਪਤੀ’ਤਿ ਏਵਂ ਉਕ੍ਖਿਪਨਂ ਉਕ੍ਖੇਪਨਾ. ‘ਮਹਾਦਾਨਪਤੀ’ਤਿ ਏਵਂ ਸੁਟ੍ਠੁ ਉਕ੍ਖੇਪਨਾ ਸਮੁਕ੍ਖੇਪਨਾ. ਖਿਪਨਾਤਿ ‘ਕਿਂ ਇਮਸ੍ਸ ਜੀਵਿਤਂ ਬੀਜਭੋਜਿਨੋ’ਤਿ ਏਵਂ ਉਪ੍ਪਣ੍ਡਨਾ. ਸਙ੍ਖਿਪਨਾਤਿ ‘ਕਿਂ ਇਮਂ ਅਦਾਯਕੋਤਿ ਭਣਥ ਯੋ ਨਿਚ੍ਚਕਾਲਂ ਸਬ੍ਬੇਸਮ੍ਪਿ ਨਤ੍ਥੀਤਿ ਵਚਨਂ ਦੇਤੀ’ਤਿ ਏਵਂ ਸੁਟ੍ਠੁਤਰਂ ਉਪ੍ਪਣ੍ਡਨਾ. ਪਾਪਨਾਤਿ ਅਦਾਯਕਤ੍ਤਸ੍ਸ ਅਵਣ੍ਣਸ੍ਸ ਵਾ ਪਾਪਨਂ. ਸਬ੍ਬਤੋਭਾਗੇਨ ਪਾਪਨਾ ਸਮ੍ਪਾਪਨਾ. ਅਵਣ੍ਣਹਾਰਿਕਾਤਿ ‘ਏਵਂ ਮੇ ਅਵਣ੍ਣਭਯਾਪਿ ਦਸ੍ਸਤੀ’ਤਿ ਗੇਹਤੋ ਗੇਹਂ, ਗਾਮਤੋ ਗਾਮਂ, ਜਨਪਦਤੋ ਜਨਪਦਂ ਅਵਣ੍ਣਹਰਣਂ. ਪਰਪਿਟ੍ਠਿਮਂਸਿਕਤਾਤਿ ਪੁਰਤੋ ਮਧੁਰਂ ਭਣਿਤ੍ਵਾ ਪਰਮ੍ਮੁਖੇ ਅਵਣ੍ਣਭਾਸਿਤਾ. ਏਸਾ ਹਿ ਅਭਿਮੁਖਂ ਓਲੋਕੇਤੁਂ ਅਸਕ੍ਕੋਨ੍ਤਸ੍ਸ ਪਰਮ੍ਮੁਖਾਨਂ ਪਿਟ੍ਠਿਮਂਸਖਾਦਨਂ ਵਿਯ ਹੋਤਿ. ਤਸ੍ਮਾ ਪਰਪਿਟ੍ਠਿਮਂਸਿਕਤਾਤਿ ਵੁਤ੍ਤਾ. ਅਯਂ ਵੁਚ੍ਚਤਿ ਨਿਪ੍ਪੇਸਿਕਤਾਤਿ ਅਯਂ ਯਸ੍ਮਾ ਵੇਲ਼ੁਪੇਸਿਕਾ ਵਿਯ ਅਬ੍ਭਙ੍ਗਂ ਪਰਸ੍ਸ ਗੁਣਂ ਨਿਪ੍ਪੇਸੇਤਿ ਨਿਪੁਞ੍ਛਤਿ, ਯਸ੍ਮਾ ਵਾ ਗਨ੍ਧਜਾਤਂ ਨਿਪਿਸਿਤ੍ਵਾ ਗਨ੍ਧਮਗ੍ਗਨਾ ਵਿਯ ਪਰਗੁਣੇ ਨਿਪਿਸਿਤ੍ਵਾ ਵਿਚੁਣ੍ਣੇਤ੍ਵਾ ਏਸਾ ਲਾਭਮਗ੍ਗਨਾ ਹੋਤਿ, ਤਸ੍ਮਾ ਨਿਪ੍ਪੇਸਿਕਤਾਤਿ ਵੁਚ੍ਚਤੀਤਿ.

੮੬੫. ਲਾਭੇਨ ਲਾਭਂ ਨਿਜਿਗੀਸਨਤਾਨਿਦ੍ਦੇਸੇ ਨਿਜਿਗੀਸਨਤਾਤਿ ਮਗ੍ਗਨਾ. ਇਤੋ ਲਦ੍ਧਨ੍ਤਿ ਇਮਮ੍ਹਾ ਗੇਹਾ ਲਦ੍ਧਂ. ਅਮੁਤ੍ਰਾਤਿ ਅਮੁਕਮ੍ਹਿ ਗੇਹੇ. ਏਟ੍ਠੀਤਿ ਇਚ੍ਛਨਾ. ਗਵੇਟ੍ਠੀਤਿ ਮਗ੍ਗਨਾ. ਪਰਿਯੇਟ੍ਠੀਤਿ ਪੁਨਪ੍ਪੁਨਂ ਮਗ੍ਗਨਾ. ਆਦਿਤੋ ਪਟ੍ਠਾਯ ਲਦ੍ਧਂ ਲਦ੍ਧਂ ਭਿਕ੍ਖਂ ਤਤ੍ਰ ਤਤ੍ਰ ਕੁਲਦਾਰਕਾਨਂ ਦਤ੍ਵਾ ਅਨ੍ਤੇ ਖੀਰਯਾਗੁਂ ਲਭਿਤ੍ਵਾ ਗਤਭਿਕ੍ਖੁਵਤ੍ਥੁ ਚੇਤ੍ਥ ਕਥੇਤਬ੍ਬਂ. ਏਸਨਾਤਿਆਦੀਨਿ ਏਟ੍ਠੀਤਿਆਦੀਨਂ ਵੇਵਚਨਾਨਿ, ਤਸ੍ਮਾ ਏਟ੍ਠੀਤਿ ਏਸਨਾ, ਗਵੇਟ੍ਠੀਤਿ ਗਵੇਸਨਾ, ਪਰਿਯੇਟ੍ਠੀਤਿ ਪਰਿਯੇਸਨਾ. ਇਚ੍ਚੇਵਮੇਤ੍ਥ ਯੋਜਨਾ ਵੇਦਿਤਬ੍ਬਾ.

੮੬੬. ਸੇਯ੍ਯਮਾਨਨਿਦ੍ਦੇਸੇ ਜਾਤਿਯਾਤਿ ਖਤ੍ਤਿਯਭਾਵਾਦਿਜਾਤਿਸਮ੍ਪਤ੍ਤਿਯਾ. ਗੋਤ੍ਤੇਨਾਤਿ ਗੋਤਮਗੋਤ੍ਤਾਦਿਨਾ ਉਕ੍ਕਟ੍ਠਗੋਤ੍ਤੇਨ. ਕੋਲਪੁਤ੍ਤਿਯੇਨਾਤਿ ਮਹਾਕੁਲਭਾਵੇਨ. ਵਣ੍ਣਪੋਕ੍ਖਰਤਾਯਾਤਿ ਵਣ੍ਣਸਮ੍ਪਨ੍ਨਸਰੀਰਤਾਯ. ਸਰੀਰਞ੍ਹਿ ਪੋਕ੍ਖਰਨ੍ਤਿ ਵੁਚ੍ਚਤਿ, ਤਸ੍ਸ ਵਣ੍ਣਸਮ੍ਪਤ੍ਤਿਯਾ ਅਭਿਰੂਪਭਾਵੇਨਾਤਿ ਅਤ੍ਥੋ. ਧਨੇਨਾਤਿਆਦੀਨਿ ਉਤ੍ਤਾਨਤ੍ਥਾਨੇਵ. ਮਾਨਂ ਜਪ੍ਪੇਤੀਤਿ ਏਤੇਸੁ ਯੇਨ ਕੇਨਚਿ ਵਤ੍ਥੁਨਾ ‘ਸੇਯ੍ਯੋਹਮਸ੍ਮੀ’ਤਿ ਮਾਨਂ ਪਵਤ੍ਤੇਤਿ ਕਰੋਤਿ.

੮੬੭. ਸਦਿਸਮਾਨਨਿਦ੍ਦੇਸੇ ਮਾਨਂ ਜਪ੍ਪੇਤੀਤਿ ਏਤੇਸੁ ਯੇਨ ਕੇਨਚਿ ਵਤ੍ਥੁਨਾ ‘ਸਦਿਸੋਹਮਸ੍ਮੀ’ਤਿ ਮਾਨਂ ਪਵਤ੍ਤੇਤਿ. ਅਯਮੇਤ੍ਥ ਅਤ੍ਥਤੋ ਵਿਸੇਸੋ. ਪਾਲ਼ਿਯਂ ਪਨ ਨਾਨਾਕਰਣਂ ਨਤ੍ਥਿ.

੮੬੮. ਹੀਨਮਾਨਨਿਦ੍ਦੇਸੇ ਓਮਾਨਂ ਜਪ੍ਪੇਤੀਤਿ ਹੇਟ੍ਠਾਮਾਨਂ ਪਵਤ੍ਤੇਤਿ. ਓਮਾਨੋਤਿ ਲਾਮਕੋ ਹੇਟ੍ਠਾਮਾਨੋ. ਓਮਞ੍ਞਨਾ ਓਮਞ੍ਞਿਤਤ੍ਤਨ੍ਤਿ ਆਕਾਰਭਾਵਨਿਦ੍ਦੇਸੋ. ਹੀਲ਼ਨਾਤਿ ਜਾਤਿਆਦੀਹਿ ਅਤ੍ਤਜਿਗੁਚ੍ਛਨਾ. ਓਹੀਲ਼ਨਾਤਿ ਅਤਿਰੇਕਤੋ ਹੀਲ਼ਨਾ. ਓਹੀਲ਼ਿਤਤ੍ਤਨ੍ਤਿ ਤਸ੍ਸੇਵ ਭਾਵਨਿਦ੍ਦੇਸੋ. ਅਤ੍ਤੁਞ੍ਞਾਤਿ ਅਤ੍ਤਾਨਂ ਹੀਨਂ ਕਤ੍ਵਾ ਜਾਨਨਾ. ਅਤ੍ਤਾਵਞ੍ਞਾਤਿ ਅਤ੍ਤਾਨਂ ਅਵਜਾਨਨਾ. ਅਤ੍ਤਪਰਿਭਵੋਤਿ ਜਾਤਿਆਦਿਸਮ੍ਪਤ੍ਤਿਨਾਮਮੇਵ ਜਾਤਾਤਿ ਅਤ੍ਤਾਨਂ ਪਰਿਭਵਿਤ੍ਵਾ ਮਞ੍ਞਨਾ. ਏਵਮਿਮੇ ਤਯੋ ਮਾਨਾ ਪੁਗ੍ਗਲਂ ਅਨਿਸ੍ਸਾਯ ਜਾਤਿਆਦਿਵਤ੍ਥੁਵਸੇਨੇਵ ਕਥਿਤਾ. ਤੇਸੁ ਏਕੇਕੋ ਤਿਣ੍ਣਮ੍ਪਿ ਸੇਯ੍ਯਸਦਿਸਹੀਨਾਨਂ ਉਪ੍ਪਜ੍ਜਤਿ. ਤਤ੍ਥ ‘ਸੇਯ੍ਯੋਹਮਸ੍ਮੀ’ਤਿ ਮਾਨੋ ਸੇਯ੍ਯਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ. ‘ਸਦਿਸੋਹਮਸ੍ਮੀ’ਤਿ ਮਾਨੋ ਸਦਿਸਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ. ‘ਹੀਨੋਹਮਸ੍ਮੀ’ਤਿ ਮਾਨੋ ਹੀਨਸ੍ਸੇਵ ਯਾਥਾਵਮਾਨੋ, ਸੇਸਾਨਂ ਅਯਾਥਾਵਮਾਨੋ.

੮੬੯. ਤਤ੍ਥ ਕਤਮੋ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿਆਦਯੋ ਪਨ ਨਵ ਮਾਨਾ ਪੁਗ੍ਗਲਂ ਨਿਸ੍ਸਾਯ ਕਥਿਤਾ. ਤੇਸੁ ਤਯੋ ਤਯੋ ਏਕੇਕਸ੍ਸ ਉਪ੍ਪਜ੍ਜਨ੍ਤਿ. ਤਤ੍ਥ ਦਹਤੀਤਿ ਠਪੇਤਿ. ਤਂ ਨਿਸ੍ਸਾਯਾਤਿ ਤਂ ਸੇਯ੍ਯਤੋ ਦਹਨਂ ਨਿਸ੍ਸਾਯ. ਏਤ੍ਥ ਪਨ ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨੋ ਰਾਜੂਨਞ੍ਚੇਵ ਪਬ੍ਬਜਿਤਾਨਞ੍ਚ ਉਪ੍ਪਜ੍ਜਤਿ. ਰਾਜਾ ਹਿ ‘ਰਟ੍ਠੇਨ ਵਾ ਧਨੇਨ ਵਾ ਵਾਹਨੇਹਿ ਵਾ ਕੋ ਮਯਾ ਸਦਿਸੋ ਅਤ੍ਥੀ’ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ‘ਸੀਲਧੁਤਙ੍ਗਾਦੀਹਿ ਕੋ ਮਯਾ ਸਦਿਸੋ ਅਤ੍ਥੀ’ਤਿ ਏਤਂ ਮਾਨਂ ਕਰੋਤਿ.

੮੭੦. ਸੇਯ੍ਯਸ੍ਸ ਸਦਿਸੋਹਮਸ੍ਮੀਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਰਾਜਾ ਹਿ ‘ਰਟ੍ਠੇਨ ਵਾ ਧਨੇਨ ਵਾ ਵਾਹਨੇਹਿ ਵਾ ਅਞ੍ਞਰਾਜੂਹਿ ਸਦ੍ਧਿਂ ਮਯ੍ਹਂ ਕਿਂ ਨਾਨਾਕਰਣ’ਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ‘ਸੀਲਧੁਤਙ੍ਗਾਦੀਹਿ ਅਞ੍ਞੇਨ ਭਿਕ੍ਖੁਨਾ ਸਦ੍ਧਿਂ ਮਯ੍ਹਂ ਕਿਂ ਨਾਨਾਕਰਣ’ਨ੍ਤਿ ਏਤਂ ਮਾਨਂ ਕਰੋਤਿ.

੮੭੧. ਸੇਯ੍ਯਸ੍ਸ ਹੀਨੋਹਮਸ੍ਮੀਤਿ ਮਾਨੋਪਿ ਏਤੇਸਂਯੇਵ ਉਪ੍ਪਜ੍ਜਤਿ. ਯਸ੍ਸ ਹਿ ਰਞ੍ਞੋ ਰਟ੍ਠਂ ਵਾ ਧਨਂ ਵਾ ਵਾਹਨਾਨਿ ਵਾ ਸਮ੍ਪਨ੍ਨਾਨਿ ਨ ਹੋਨ੍ਤਿ, ਸੋ ‘ਮਯ੍ਹਂ ਰਾਜਾਤਿ ਵੋਹਾਰਸੁਖਮਤ੍ਤਮੇਵ; ਕਿਂ ਰਾਜਾ ਨਾਮ ਅਹ’ਨ੍ਤਿ ਏਤਂ ਮਾਨਂ ਕਰੋਤਿ. ਪਬ੍ਬਜਿਤੋਪਿ ‘ਅਪ੍ਪਲਾਭਸਕ੍ਕਾਰੋ ਅਹਂ. ਧਮ੍ਮਕਥਿਕੋ ਬਹੁਸ੍ਸੁਤੋ ਮਹਾਥੇਰੋਤਿ ਕਥਾਮਤ੍ਤਮੇਵ. ਕਿਂ ਧਮ੍ਮਕਥਿਕੋ ਨਾਮਾਹਂ, ਕਿਂ ਬਹੁਸ੍ਸੁਤੋ ਨਾਮਾਹਂ, ਕਿਂ ਮਹਾਥੇਰੋ ਨਾਮਾਹਂ ਯਸ੍ਸ ਮੇ ਲਾਭਸਕ੍ਕਾਰੋ ਨਤ੍ਥੀ’ਤਿ ਏਤਂ ਮਾਨਂ ਕਰੋਤਿ.

੮੭੨. ਸਦਿਸਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨਾਦਯੋ ਅਮਚ੍ਚਾਦੀਨਂ ਉਪ੍ਪਜ੍ਜਨ੍ਤਿ. ਅਮਚ੍ਚੋ ਹਿ ਰਟ੍ਠਿਯੋ ਵਾ ‘ਭੋਗਯਾਨਵਾਹਨਾਦੀਹਿ ਕੋ ਮਯਾ ਸਦਿਸੋ ਅਞ੍ਞੋ ਰਾਜਪੁਰਿਸੋ ਅਤ੍ਥੀ’ਤਿ ਵਾ ‘ਮਯ੍ਹਂ ਅਞ੍ਞੇਹਿ ਸਦ੍ਧਿਂ ਕਿਂ ਨਾਨਾਕਰਣ’ਨ੍ਤਿ ਵਾ ‘ਅਮਚ੍ਚੋਤਿ ਨਾਮਮਤ੍ਤਮੇਵ ਮਯ੍ਹਂ; ਘਾਸਚ੍ਛਾਦਨਮਤ੍ਤਮ੍ਪਿ ਮੇ ਨਤ੍ਥਿ. ਕਿਂ ਅਮਚ੍ਚੋ ਨਾਮਾਹ’ਨ੍ਤਿ ਏਤੇ ਮਾਨੇ ਕਰੋਤਿ.

੮੭੫. ਹੀਨਸ੍ਸ ਸੇਯ੍ਯੋਹਮਸ੍ਮੀਤਿ ਮਾਨਾਦਯੋ ਦਾਸਾਦੀਨਂ ਉਪ੍ਪਜ੍ਜਨ੍ਤਿ. ਦਾਸੋ ਹਿ ‘ਮਾਤਿਤੋ ਵਾ ਪਿਤਿਤੋ ਵਾ ਕੋ ਮਯਾ ਸਦਿਸੋ ਅਞ੍ਞੋ ਦਾਸੋ ਨਾਮ ਅਤ੍ਥਿ’ ਅਞ੍ਞੇ ਜੀਵਿਤੁਂ ਅਸਕ੍ਕੋਨ੍ਤਾ ਕੁਚ੍ਛਿਹੇਤੁ ਦਾਸਾ ਨਾਮ ਜਾਤਾ. ਅਹਂ ਪਨ ਪਵੇਣੀਆਗਤਤ੍ਤਾ ਸੇਯ੍ਯੋ’ਤਿ ਵਾ ‘ਪਵੇਣੀਆਗਤਭਾਵੇਨ ਉਭਤੋਸੁਦ੍ਧਿਕਦਾਸਤ੍ਤੇਨ ਅਸੁਕਦਾਸੇਨ ਨਾਮ ਸਦ੍ਧਿਂ ਕਿਂ ਮਯ੍ਹਂ ਨਾਨਾਕਰਣ’ਨ੍ਤਿ ਵਾ ‘ਕੁਚ੍ਛਿਵਸੇਨਾਹਂ ਦਾਸਬ੍ਯਂ ਉਪਗਤੋ. ਮਾਤਾਪਿਤੁਕੋਟਿਯਾ ਪਨ ਮੇ ਦਾਸਟ੍ਠਾਨਂ ਨਤ੍ਥਿ. ਕਿਂ ਦਾਸੋ ਨਾਮ ਅਹ’ਨ੍ਤਿ ਵਾ ਏਤੇ ਮਾਨੇ ਕਰੋਤਿ. ਯਥਾ ਚ ਦਾਸੋ ਏਵਂ ਪੁਕ੍ਕੁਸਚਣ੍ਡਾਲਾਦਯੋਪਿ ਏਤੇ ਮਾਨੇ ਕਰੋਨ੍ਤਿਯੇਵ.

ਏਤ੍ਥ ਚ ‘ਸੇਯ੍ਯਸ੍ਸ ਸੇਯ੍ਯੋਹਮਸ੍ਮੀ’ਤਿ ਉਪ੍ਪਨ੍ਨਮਾਨੋਵ ਯਾਥਾਵਮਾਨੋ, ਇਤਰੇ ਦ੍ਵੇ ਅਯਾਥਾਵਮਾਨਾ. ਤਥਾ ‘ਸਦਿਸਸ੍ਸ ਸਦਿਸੋਹਮਸ੍ਮੀ’ਤਿ ‘ਹੀਨਸ੍ਸ ਹੀਨੋਹਮਸ੍ਮੀ’ਤਿ ਉਪ੍ਪਨ੍ਨਮਾਨੋਵ ਯਾਥਾਵਮਾਨੋ, ਇਤਰੇ ਦ੍ਵੇ ਅਯਾਥਾਵਮਾਨਾ. ਤਤ੍ਥ ਯਾਥਾਵਮਾਨਾ ਅਰਹਤ੍ਤਮਗ੍ਗਵਜ੍ਝਾ, ਅਯਾਥਾਵਮਾਨਾ ਸੋਤਾਪਤ੍ਤਿਮਗ੍ਗਵਜ੍ਝਾ.

੮੭੮. ਏਵਂ ਸਵਤ੍ਥੁਕੇ ਮਾਨੇ ਕਥੇਤ੍ਵਾ ਇਦਾਨਿ ਅਵਤ੍ਥੁਕਂ ਨਿਬ੍ਬਤ੍ਤਿਤਮਾਨਮੇਵ ਦਸ੍ਸੇਤੁਂ ਤਤ੍ਥ ਕਤਮੋ ਮਾਨੋਤਿਆਦਿ ਵੁਤ੍ਤਂ.

੮੭੯. ਅਤਿਮਾਨਨਿਦ੍ਦੇਸੇ ਸੇਯ੍ਯਾਦਿਵਸੇਨ ਪੁਗ੍ਗਲਂ ਅਨਾਮਸਿਤ੍ਵਾ ਜਾਤਿਆਦੀਨਂ ਵਤ੍ਥੁਵਸੇਨੇਵ ਨਿਦ੍ਦਿਟ੍ਠੋ. ਤਤ੍ਥ ਅਤਿਮਞ੍ਞਤੀਤਿ ‘ਜਾਤਿਆਦੀਹਿ ਮਯਾ ਸਦਿਸੋ ਨਤ੍ਥੀ’ਤਿ ਅਤਿਕ੍ਕਮਿਤ੍ਵਾ ਮਞ੍ਞਤਿ.

੮੮੦. ਮਾਨਾਤਿਮਾਨਨਿਦ੍ਦੇਸੇ ਯੋ ਏਵਰੂਪੋਤਿ ਯੋ ਏਸੋ ‘ਅਯਂ ਪੁਬ੍ਬੇ ਮਯਾ ਸਦਿਸੋ, ਇਦਾਨਿ ਅਹਂ ਸੇਟ੍ਠੋ, ਅਹਂ ਹੀਨਤਰੋ’ਤਿ ਉਪ੍ਪਨ੍ਨੋ ਮਾਨੋ. ਅਯਂ ਭਾਰਾਤਿਭਾਰੋ ਵਿਯ ਪੁਰਿਮਂ ਸਦਿਸਮਾਨਂ ਉਪਾਦਾਯ ਮਾਨਾਤਿਮਾਨੋਤਿ ਦਸ੍ਸੇਤੁਂ ਏਵਮਾਹ.

੮੮੧. ਓਮਾਨਨਿਦ੍ਦੇਸੋ ਹੀਨਮਾਨਨਿਦ੍ਦੇਸਸਦਿਸੋਯੇਵ. ਵੇਨੇਯ੍ਯਵਸੇਨ ਪਨ ਸੋ ‘ਹੀਨੋਹਮਸ੍ਮੀ’ਤਿ ਮਾਨੋ ਨਾਮ ਵੁਤ੍ਤੋ – ਅਯਂ ਓਮਾਨੋ ਨਾਮ. ਅਪਿਚੇਤ੍ਥ ‘ਤ੍ਵਂ ਜਾਤਿਮਾ, ਕਾਕਜਾਤਿ ਵਿਯ ਤੇ ਜਾਤਿ; ਤ੍ਵਂ ਗੋਤ੍ਤਵਾ, ਚਣ੍ਡਾਲਗੋਤ੍ਤਂ ਵਿਯ ਤੇ ਗੋਤ੍ਤਂ; ਤੁਯ੍ਹਂ ਸਰੋ ਅਤ੍ਥਿ, ਕਾਕਸ੍ਸਰੋ ਵਿਯ ਤੇ ਸਰੋ’ਤਿ ਏਵਂ ਅਤ੍ਤਾਨਂ ਹੇਟ੍ਠਾ ਕਤ੍ਵਾ ਪਵਤ੍ਤਨਵਸੇਨ ਅਯਂ ਓਮਾਨੋਤਿ ਵੇਦਿਤਬ੍ਬੋ.

੮੮੨. ਅਧਿਮਾਨਨਿਦ੍ਦੇਸੇ ਅਪ੍ਪਤ੍ਤੇ ਪਤ੍ਤਸਞ੍ਞਿਤਾਤਿ ਚਤ੍ਤਾਰਿ ਸਚ੍ਚਾਨਿ ਅਪ੍ਪਤ੍ਵਾ ਪਤ੍ਤਸਞ੍ਞਿਤਾਯ. ਅਕਤੇਤਿ ਚਤੂਹਿ ਮਗ੍ਗੇਹਿ ਕਤ੍ਤਬ੍ਬਕਿਚ੍ਚੇ ਅਕਤੇਯੇਵ. ਅਨਧਿਗਤੇਤਿ ਚਤੁਸਚ੍ਚਧਮ੍ਮੇ ਅਨਧਿਗਤੇ. ਅਸਚ੍ਛਿਕਤੇਤਿ ਅਰਹਤ੍ਤੇਨ ਅਪਚ੍ਚਕ੍ਖਕਤੇ. ਅਯਂ ਵੁਚ੍ਚਤਿ ਅਧਿਮਾਨੋਤਿ ਅਯਂ ਅਧਿਗਤਮਾਨੋ ਨਾਮ ਵੁਚ੍ਚਤਿ.

ਅਯਂ ਪਨ ਕਸ੍ਸ ਉਪ੍ਪਜ੍ਜਤਿ, ਕਸ੍ਸ ਨੁਪ੍ਪਜ੍ਜਤੀਤਿ? ਅਰਿਯਸਾਵਕਸ੍ਸ ਤਾਵ ਨੁਪ੍ਪਜ੍ਜਤਿ. ਸੋ ਹਿ ਮਗ੍ਗਫਲਨਿਬ੍ਬਾਨਪਹੀਨਕਿਲੇਸਾਵਸਿਟ੍ਠਕਿਲੇਸਪਚ੍ਚਵੇਕ੍ਖਣੇਨ ਸਞ੍ਜਾਤਸੋਮਨਸ੍ਸੋ ਅਰਿਯਗੁਣਪਟਿਵੇਧੇ ਨਿਕ੍ਕਙ੍ਖੋ. ਤਸ੍ਮਾ ਸੋਤਾਪਨ੍ਨਾਦੀਨਂ ‘ਅਹਂ ਸਕਦਾਗਾਮੀ’ਤਿਆਦਿਵਸੇਨ ਮਾਨੋ ਨੁਪ੍ਪਜ੍ਜਤਿ; ਦੁਸ੍ਸੀਲਸ੍ਸਾਪਿ ਨੁਪ੍ਪਜ੍ਜਤਿ; ਸੋ ਹਿ ਅਰਿਯਗੁਣਾਧਿਗਮੇ ਨਿਰਾਸੋਵ. ਸੀਲਵਤੋਪਿ ਪਰਿਚ੍ਚਤ੍ਤਕਮ੍ਮਟ੍ਠਾਨਸ੍ਸ ਨਿਦ੍ਦਾਰਾਮਤਾਦਿਮਨੁਯੁਤ੍ਤਸ੍ਸ ਨੁਪ੍ਪਜ੍ਜਤਿ.

ਪਰਿਸੁਦ੍ਧਸੀਲਸ੍ਸ ਪਨ ਕਮ੍ਮਟ੍ਠਾਨੇ ਅਪ੍ਪਮਤ੍ਤਸ੍ਸ ਨਾਮਰੂਪਂ ਵਵਤ੍ਥਪੇਤ੍ਵਾ ਪਚ੍ਚਯਪਰਿਗ੍ਗਹੇਨ ਵਿਤਿਣ੍ਣਕਙ੍ਖਸ੍ਸ ਤਿਲਕ੍ਖਣਂ ਆਰੋਪੇਤ੍ਵਾ ਸਙ੍ਖਾਰੇ ਸਮ੍ਮਸਨ੍ਤਸ੍ਸ ਆਰਦ੍ਧਵਿਪਸ੍ਸਕਸ੍ਸ ਉਪ੍ਪਜ੍ਜਤਿ; ਉਪ੍ਪਨ੍ਨੇ ਚ ਸੁਦ੍ਧਸਮਥਲਾਭੀ ਵਾ ਸੁਦ੍ਧਵਿਪਸ੍ਸਨਾਲਾਭੀ ਵਾ ਅਨ੍ਤਰਾ ਠਪੇਤਿ. ਸੋ ਹਿ ਦਸਪਿ ਵੀਸਮ੍ਪਿ ਤਿਂਸਮ੍ਪਿ ਵਸ੍ਸਾਨਿ ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋ ‘ਅਹਂ ਸੋਤਾਪਨ੍ਨੋ’ਤਿ ਵਾ ‘ਸਕਦਾਗਾਮੀ’ਤਿ ਵਾ ‘ਅਨਾਗਾਮੀ’ਤਿ ਵਾ ਮਞ੍ਞਤਿ. ਸਮਥਵਿਪਸ੍ਸਨਾਲਾਭੀ ਪਨ ਅਰਹਤ੍ਤੇਯੇਵ ਠਪੇਤਿ. ਤਸ੍ਸ ਹਿ ਸਮਾਧਿਬਲੇਨ ਕਿਲੇਸਾ ਵਿਕ੍ਖਮ੍ਭਿਤਾ, ਵਿਪਸ੍ਸਨਾਬਲੇਨ ਸਙ੍ਖਾਰਾ ਸੁਪਰਿਗ੍ਗਹਿਤਾ. ਤਸ੍ਮਾ ਸਟ੍ਠਿਪਿ ਵਸ੍ਸਾਨਿ ਅਸੀਤਿਪਿ ਵਸ੍ਸਾਨਿ ਵਸ੍ਸਸਤਮ੍ਪਿ ਕਿਲੇਸਾ ਨ ਸਮੁਦਾਚਰਨ੍ਤਿ; ਖੀਣਾਸਵਸ੍ਸੇਵ ਚਿਤ੍ਤਚਾਰੋ ਹੋਤਿ. ਸੋ ਏਵਂ ਦੀਘਰਤ੍ਤਂ ਕਿਲੇਸਸਮੁਦਾਚਾਰਂ ਅਪਸ੍ਸਨ੍ਤੋ ਅਨ੍ਤਰਾ ਅਟ੍ਠਤ੍ਵਾਵ ‘ਅਰਹਾ ਅਹ’ਨ੍ਤਿ ਮਞ੍ਞਤਿ, ਉਚ੍ਚਮਾਲਙ੍ਕਵਾਸੀ ਮਹਾਨਾਗਤ੍ਥੇਰੋ ਵਿਯ, ਹਙ੍ਕਨਕਵਾਸੀ ਮਹਾਦਤ੍ਤਤ੍ਥੇਰੋ ਵਿਯ, ਚਿਤ੍ਤਲਪਬ੍ਬਤੇ ਨਿਙ੍ਕਪੋਣ੍ਣਪਧਾਨਘਰਵਾਸੀ ਚੂਲ਼ਸੁਮਤ੍ਥੇਰੋ ਵਿਯ ਚ.

ਤਤ੍ਰਿਦਂ ਏਕਵਤ੍ਥੁਪਰਿਦੀਪਨਂ – ਤਲਙ੍ਗਰਵਾਸੀ ਧਮ੍ਮਦਿਨ੍ਨਤ੍ਥੇਰੋ ਕਿਰ ਨਾਮ ਏਕੋ ਪਭਿਨ੍ਨਪਟਿਸਮ੍ਭਿਦੋ ਮਹਾਖੀਣਾਸਵੋ ਮਹਤੋ ਭਿਕ੍ਖੁਸਙ੍ਘਸ੍ਸ ਓਵਾਦਦਾਯਕੋ ਅਹੋਸਿ. ਸੋ ਏਕਦਿਵਸਂ ਅਤ੍ਤਨੋ ਦਿਵਾਟ੍ਠਾਨੇ ਨਿਸੀਦਿਤ੍ਵਾ ‘ਕਿਨ੍ਨੁ ਖੋ ਅਮ੍ਹਾਕਂ ਆਚਰਿਯਸ੍ਸ ਉਚ੍ਚਤਲਿਙ੍ਕਵਾਸੀਮਹਾਨਾਗਤ੍ਥੇਰਸ੍ਸ ਸਮਣਕਿਚ੍ਚਂ ਮਤ੍ਥਕਂ ਪਤ੍ਤੋ, ਨੋ’ਤਿ ਆਵਜ੍ਜਨ੍ਤੋ ਪੁਥੁਜ੍ਜਨਭਾਵਮੇਵਸ੍ਸ ਦਿਸ੍ਵਾ ‘ਮਯਿ ਅਗਚ੍ਛਨ੍ਤੇ ਪੁਥੁਜ੍ਜਨਕਾਲਕਿਰਿਯਮੇਵ ਕਰਿਸ੍ਸਤੀ’ਤਿ ਚ ਞਤ੍ਵਾ ਇਦ੍ਧਿਯਾ ਵੇਹਾਸਂ ਉਪ੍ਪਤਿਤ੍ਵਾ ਦਿਵਾਟ੍ਠਾਨੇ ਨਿਸਿਨ੍ਨਸ੍ਸ ਥੇਰਸ੍ਸ ਸਮੀਪੇ ਓਰੋਹਿਤ੍ਵਾ ਵਨ੍ਦਿਤ੍ਵਾ ਵਤ੍ਤਂ ਦਸ੍ਸੇਤ੍ਵਾ ਏਕਮਨ੍ਤਂ ਨਿਸੀਦਿ. ‘ਕਿਂ, ਆਵੁਸੋ ਧਮ੍ਮਦਿਨ੍ਨ, ਅਕਾਲੇ ਆਗਤੋਸੀ’ਤਿ ਚ ਵੁਤ੍ਤੋ ‘ਪਞ੍ਹਂ, ਭਨ੍ਤੇ, ਪੁਚ੍ਛਿਤੁਂ ਆਗਤੋਮ੍ਹੀ’ਤਿ ਆਹ.

ਤਤੋ ‘ਪੁਚ੍ਛਾਵੁਸੋ, ਜਾਨਮਾਨੋ ਕਥਯਿਸ੍ਸਾਮੀ’ਤਿ ਵੁਤ੍ਤੋ ਪਞ੍ਹਾਸਹਸ੍ਸਂ ਪੁਚ੍ਛਿ. ਥੇਰੋ ਪੁਚ੍ਛਿਤਪੁਚ੍ਛਿਤਂ ਪਞ੍ਹਂ ਅਸਜ੍ਜਮਾਨੋਵ ਕਥੇਸਿ. ਤਤੋ ‘ਅਤਿਤਿਕ੍ਖਂ ਤੇ, ਭਨ੍ਤੇ, ਞਾਣਂ. ਕਦਾ ਤੁਮ੍ਹੇਹਿ ਅਯਂ ਧਮ੍ਮੋ ਅਧਿਗਤੋ’ਤਿ ਵੁਤ੍ਤੋ ‘ਇਤੋ ਸਟ੍ਠਿਵਸ੍ਸਕਾਲੇ, ਆਵੁਸੋ’ਤਿ ਆਹ. ‘ਸਮਾਧਿਮ੍ਪਿ, ਭਨ੍ਤੇ, ਵਲ਼ਞ੍ਜੇਥਾ’ਤਿ? ‘ਨ ਇਦਂ, ਆਵੁਸੋ, ਭਾਰਿਯ’ਨ੍ਤਿ. ‘ਤੇਨ ਹਿ, ਭਨ੍ਤੇ, ਏਕਂ ਹਤ੍ਥਿਂ ਮਾਪੇਥਾ’ਤਿ. ਥੇਰੋ ਸਬ੍ਬਸੇਤਂ ਹਤ੍ਥਿਂ ਮਾਪੇਸਿ. ‘ਇਦਾਨਿ, ਭਨ੍ਤੇ, ਯਥਾ ਅਯਂ ਹਤ੍ਥੀ ਅਞ੍ਚਿਤਕਣ੍ਣੋ ਪਸਾਰਿਤਨਙ੍ਗੁਟ੍ਠੋ ਸੋਣ੍ਡਂ ਮੁਖੇ ਪਕ੍ਖਿਪਿਤ੍ਵਾ ਭੇਰਵਂ ਕੋਞ੍ਚਨਾਦਂ ਕਰੋਨ੍ਤੋ ਤੁਮ੍ਹਾਕਂ ਅਭਿਮੁਖੋ ਆਗਚ੍ਛਤਿ ਤਥਾ ਤਂ ਕਰੋਥਾ’ਤਿ. ਥੇਰੋ ਤਥਾ ਕਤ੍ਵਾ ਵੇਗੇਨ ਆਗਚ੍ਛਤੋ ਹਤ੍ਥਿਸ੍ਸ ਭੇਰਵਂ ਆਕਾਰਂ ਦਿਸ੍ਵਾ ਉਟ੍ਠਾਯ ਪਲਾਯਿਤੁਂ ਆਰਦ੍ਧੋ. ਤਮੇਨਂ ਖੀਣਾਸਵਤ੍ਥੇਰੋ ਹਤ੍ਥਂ ਪਸਾਰੇਤ੍ਵਾ ਚੀਵਰਕਣ੍ਣੇ ਗਹੇਤ੍ਵਾ ‘ਭਨ੍ਤੇ, ਖੀਣਾਸਵਸ੍ਸ ਸਾਰਜ੍ਜਂ ਨਾਮ ਹੋਤੀ’ਤਿ ਆਹ. ਸੋ ਤਸ੍ਮਿਂ ਕਾਲੇ ਅਤ੍ਤਨੋ ਪੁਥੁਜ੍ਜਨਭਾਵਂ ਞਤ੍ਵਾ ‘ਅਵਸ੍ਸਯੋ ਮੇ, ਆਵੁਸੋ ਧਮ੍ਮਦਿਨ੍ਨ, ਹੋਹੀ’ਤਿ ਵਤ੍ਵਾ ਪਾਦਮੂਲੇ ਉਕ੍ਕੁਟਿਕਂ ਨਿਸੀਦਿ. ‘ਭਨ੍ਤੇ, ਤੁਮ੍ਹਾਕਂ ਅਵਸ੍ਸਯੋ ਭਵਿਸ੍ਸਾਮਿਚ੍ਚੇਵਾਹਂ ਆਗਤੋ, ਮਾ ਚਿਨ੍ਤਯਿਤ੍ਥਾ’ਤਿ ਕਮ੍ਮਟ੍ਠਾਨਂ ਕਥੇਸਿ. ਥੇਰੋ ਕਮ੍ਮਟ੍ਠਾਨਂ ਗਹੇਤ੍ਵਾ ਚਙ੍ਕਮਂ ਆਰੁਯ੍ਹ ਤਤਿਯੇ ਪਦਵਾਰੇ ਅਗ੍ਗਫਲਂ ਅਰਹਤ੍ਤਂ ਪਾਪੁਣਿ. ਥੇਰੋ ਕਿਰ ਦੋਸਚਰਿਤੋ ਅਹੋਸਿ.

੮੮੩. ਅਸ੍ਮਿਮਾਨਨਿਦ੍ਦੇਸੇ ਰੂਪਂ ਅਸ੍ਮੀਤਿ ਮਾਨੋਤਿ ‘ਅਹਂ ਰੂਪ’ਨ੍ਤਿ ਉਪ੍ਪਨ੍ਨਮਾਨੋ. ਛਨ੍ਦੋਤਿ ਮਾਨਂ ਅਨੁਗਤਚ੍ਛਨ੍ਦੋਵ. ਤਥਾ ਅਨੁਸਯੋ. ਵੇਦਨਾਦੀਸੁਪਿ ਏਸੇਵ ਨਯੋ.

੮੮੪. ਮਿਚ੍ਛਾਮਾਨਨਿਦ੍ਦੇਸੇ ਪਾਪਕੇਨ ਵਾ ਕਮ੍ਮਾਯਤਨੇਨਾਤਿ ਆਦੀਸੁ ਪਾਪਕਂ ਕਮ੍ਮਾਯਤਨਂ ਨਾਮ ਕੇਵਟ੍ਟਮਚ੍ਛਬਨ੍ਧਨੇਸਾਦਾਦੀਨਂ ਕਮ੍ਮਂ. ਪਾਪਕਂ ਸਿਪ੍ਪਾਯਤਨਂ ਨਾਮ ਮਚ੍ਛਜਾਲਖਿਪਨਕੁਮਿਨਕਰਣੇਸੁ ਚੇਵ ਪਾਸਓਡ੍ਡਨਸੂਲਾਰੋਪਨਾਦੀਸੁ ਚ ਛੇਕਤਾ. ਪਾਪਕਂ ਵਿਜ੍ਜਾਟ੍ਠਾਨਂ ਨਾਮ ਯਾ ਕਾਚਿ ਪਰੂਪਘਾਤਵਿਜ੍ਜਾ. ਪਾਪਕਂ ਸੁਤਂ ਨਾਮ ਭਾਰਤਯੁਦ੍ਧਸੀਤਾਹਰਣਾਦਿਪਟਿਸਂਯੁਤ੍ਤਂ. ਪਾਪਕਂ ਪਟਿਭਾਨਂ ਨਾਮ ਦੁਬ੍ਭਾਸਿਤਯੁਤ੍ਤਂ ਕਪ੍ਪਨਾਟਕਵਿਲਪ੍ਪਨਾਦਿਪਟਿਭਾਨਂ. ਪਾਪਕਂ ਸੀਲਂ ਨਾਮ ਅਜਸੀਲਂ ਗੋਸੀਲਂ. ਵਤਮ੍ਪਿ ਅਜਵਤਗੋਵਤਮੇਵ. ਪਾਪਿਕਾ ਦਿਟ੍ਠਿ ਪਨ ਦ੍ਵਾਸਟ੍ਠਿਯਾ ਦਿਟ੍ਠਿਗਤੇਸੁ ਯਾ ਕਾਚਿ ਦਿਟ੍ਠਿ.

੮੮੫. ਞਾਤਿਵਿਤਕ੍ਕਨਿਦ੍ਦੇਸਾਦੀਸੁ ‘ਮਯ੍ਹਂ ਞਾਤਯੋ ਸੁਖਜੀਵਿਨੋ ਸਮ੍ਪਤ੍ਤਿਯੁਤ੍ਤਾ’ਤਿ ਏਵਂ ਪਞ੍ਚਕਾਮਗੁਣਸਨ੍ਨਿਸ੍ਸਿਤੇਨ ਗੇਹਸਿਤਪੇਮੇਨ ਞਾਤਕੇ ਆਰਬ੍ਭ ਉਪ੍ਪਨ੍ਨਵਿਤਕ੍ਕੋਵ ਞਾਤਿਵਿਤਕ੍ਕੋ ਨਾਮ. ‘ਖਯਂ ਗਤਾ ਵਯਂ ਗਤਾ ਸਦ੍ਧਾ ਪਸਨ੍ਨਾ’ਤਿ ਏਵਂ ਪਵਤ੍ਤੋ ਪਨ ਞਾਤਿਵਿਤਕ੍ਕੋ ਨਾਮ ਨ ਹੋਤਿ.

੮੮੬. ‘ਅਮ੍ਹਾਕਂ ਜਨਪਦੋ ਸੁਭਿਕ੍ਖੋ ਸਮ੍ਪਨ੍ਨਸਸ੍ਸੋ’ਤਿ ਤੁਟ੍ਠਮਾਨਸ੍ਸ ਗੇਹਸਿਤਪੇਮਵਸੇਨੇਵ ਉਪ੍ਪਨ੍ਨਵਿਤਕ੍ਕੋ ਜਨਪਦਵਿਤਕ੍ਕੋ ਨਾਮ. ‘ਅਮ੍ਹਾਕਂ ਜਨਪਦੇ ਮਨੁਸ੍ਸਾ ਸਦ੍ਧਾ ਪਸਨ੍ਨਾ ਖਯਂ ਗਤਾ ਵਯਂ ਗਤਾ’ਤਿ ਏਵਂ ਪਵਤ੍ਤੋ ਪਨ ਜਨਪਦਵਿਤਕ੍ਕੋ ਨਾਮ ਨ ਹੋਤਿ.

੮੮੭. ਅਮਰਤ੍ਥਾਯ ਵਿਤਕ੍ਕੋ, ਅਮਰੋ ਵਾ ਵਿਤਕ੍ਕੋਤਿ ਅਮਰਵਿਤਕ੍ਕੋ. ਤਤ੍ਥ ‘ਉਕ੍ਕੁਟਿਕਪ੍ਪਧਾਨਾਦੀਹਿ ਦੁਕ੍ਖੇ ਨਿਜ੍ਜਿਣ੍ਣੇ ਸਮ੍ਪਰਾਯੇ ਅਤ੍ਤਾ ਸੁਖੀ ਹੋਤਿ ਅਮਰੋ’ਤਿ ਦੁਕ੍ਕਰਕਾਰਿਕਂ ਕਰੋਨ੍ਤਸ੍ਸ ਤਾਯ ਦੁਕ੍ਕਰਕਾਰਿਕਾਯ ਪਟਿਸਂਯੁਤ੍ਤੋ ਵਿਤਕ੍ਕੋ ਅਮਰਤ੍ਥਾਯ ਵਿਤਕ੍ਕੋ ਨਾਮ. ਦਿਟ੍ਠਿਗਤਿਕੋ ਪਨ ‘ਸਸ੍ਸਤਂ ਵਦੇਸੀ’ਤਿਆਦੀਨਿ ਪੁਟ੍ਠੋ ‘ਏਵਨ੍ਤਿਪਿ ਮੇ ਨੋ, ਤਥਾਤਿਪਿ ਮੇ ਨੋ’ ਅਞ੍ਞਥਾਤਿਪਿ ਮੇ ਨੋ, ਨੋਤਿਪਿ ਮੇ ਨੋ, ਨੋ ਨੋਤਿਪਿ ਮੇ ਨੋ’ਤਿ (ਦੀ. ਨਿ. ੧.੬੨) ਵਿਕ੍ਖੇਪਂ ਆਪਜ੍ਜਤਿ, ਤਸ੍ਸ ਸੋ ਦਿਟ੍ਠਿਗਤਪਟਿਸਂਯੁਤ੍ਤੋ ਵਿਤਕ੍ਕੋ. ਯਥਾ ਅਮਰੋ ਨਾਮ ਮਚ੍ਛੋ ਉਦਕੇ ਗਹੇਤ੍ਵਾ ਮਾਰੇਤੁਂ ਨ ਸਕ੍ਕਾ, ਇਤੋ ਚਿਤੋ ਚ ਧਾਵਤਿ, ਗਾਹਂ ਨ ਗਚ੍ਛਤਿ; ਏਵਮੇਵ ਏਕਸ੍ਮਿਂ ਪਕ੍ਖੇ ਅਸਣ੍ਠਹਨਤੋ ਨ ਮਰਤੀਤਿ ਅਮਰੋ ਨਾਮ ਹੋਤਿ. ਤਂ ਦੁਵਿਧਮ੍ਪਿ ਏਕਤੋ ਕਤ੍ਵਾ ਅਯਂ ਵੁਚ੍ਚਤਿ ਅਮਰਵਿਤਕ੍ਕੋਤਿ ਵੁਤ੍ਤਂ.

੮੮੮. ਪਰਾਨੁਦ੍ਦਯਤਾਪਟਿਸਂਯੁਤ੍ਤੋਤਿ ਅਨੁਦ੍ਦਯਤਾਪਤਿਰੂਪਕੇਨ ਗੇਹਸਿਤਪੇਮੇਨ ਪਟਿਸਂਯੁਤ੍ਤੋ. ਸਹਨਨ੍ਦੀਤਿਆਦੀਸੁ ਉਪਟ੍ਠਾਕੇਸੁ ਨਨ੍ਦਨ੍ਤੇਸੁ ਸੋਚਨ੍ਤੇਸੁ ਚ ਤੇਹਿ ਸਦ੍ਧਿਂ ਦਿਗੁਣਂ ਨਨ੍ਦਤਿ, ਦਿਗੁਣਂ ਸੋਚਤਿ; ਤੇਸੁ ਸੁਖਿਤੇਸੁ ਦਿਗੁਣਂ ਸੁਖਿਤੋ ਹੋਤਿ, ਦੁਕ੍ਖਿਤੇਸੁ ਦਿਗੁਣਂ ਦੁਕ੍ਖਿਤੋ ਹੋਤਿ. ਉਪ੍ਪਨ੍ਨੇਸੁ ਕਿਚ੍ਚਕਰਣੀਯੇਸੂਤਿ ਤੇਸੁ ਮਹਨ੍ਤੇਸੁ ਵਾ ਖੁਦ੍ਦਕੇਸੁ ਵਾ ਕਮ੍ਮੇਸੁ ਉਪ੍ਪਨ੍ਨੇਸੁ. ਅਤ੍ਤਨਾ ਵਾ ਯੋਗਂ ਆਪਜ੍ਜਤੀਤਿ ਤਾਨਿ ਤਾਨਿ ਕਿਚ੍ਚਾਨਿ ਸਾਧੇਨ੍ਤੋ ਪਞ੍ਞਤ੍ਤਿਂ ਵੀਤਿਕ੍ਕਮਤਿ, ਸਲ੍ਲੇਖਂ ਕੋਪੇਤਿ. ਯੋ ਤਤ੍ਥਾਤਿ ਯੋ ਤਸ੍ਮਿਂ ਸਂਸਟ੍ਠਵਿਹਾਰੇ, ਤਸ੍ਮਿਂ ਵਾ ਯੋਗਾਪਜ੍ਜਨੇ ਗੇਹਸਿਤੋ ਵਿਤਕ੍ਕੋ – ਅਯਂ ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ ਨਾਮ.

੮੮੯. ਲਾਭਸਕ੍ਕਾਰਸਿਲੋਕਪਟਿਸਂਯੁਤ੍ਤੋਤਿ ਚੀਵਰਾਦਿਲਾਭੇਨ ਚੇਵ ਸਕ੍ਕਾਰੇਨ ਚ ਕਿਤ੍ਤਿਸਦ੍ਦੇਨ ਚ ਸਦ੍ਧਿਂ ਆਰਮ੍ਮਣਕਰਣਵਸੇਨ ਪਟਿਸਂਯੁਤ੍ਤੋ.

੮੯੦. ਅਨਵਞ੍ਞਤ੍ਤਿਪਟਿਸਂਯੁਤ੍ਤੋਤਿ ‘ਅਹੋ ਵਤ ਮਂ ਪਰੇ ਨ ਅਵਜਾਨੇਯ੍ਯੁਂ, ਨ ਪੋਥੇਤ੍ਵਾ ਵਿਹੇਠੇਤ੍ਵਾ ਕਥੇਯ੍ਯੁ’ਨ੍ਤਿ ਏਵਂ ਅਨਵਞ੍ਞਾਤਭਾਵਪਤ੍ਥਨਾਯ ਸਦ੍ਧਿਂ ਉਪ੍ਪਜ੍ਜਨਵਿਤਕ੍ਕੋ. ਯੋ ਤਤ੍ਥ ਗੇਹਸਿਤੋਤਿ ਯੋ ਤਸ੍ਮਿਂ ‘ਮਾ ਮਂ ਪਰੇ ਅਵਜਾਨਿਂਸੂ’ਤਿ ਉਪ੍ਪਨ੍ਨੇ ਚਿਤ੍ਤੇ ਪਞ੍ਚਕਾਮਗੁਣਸਙ੍ਖਾਤਗੇਹਨਿਸ੍ਸਿਤੋ ਹੁਤ੍ਵਾ ਉਪ੍ਪਨ੍ਨਵਿਤਕ੍ਕੋ. ਸੇਸਂ ਸਬ੍ਬਤ੍ਥ ਪਾਕਟਮੇਵਾਤਿ.

ਏਕਕਨਿਦ੍ਦੇਸਵਣ੍ਣਨਾ.

(੨.) ਦੁਕਨਿਦ੍ਦੇਸਵਣ੍ਣਨਾ

੮੯੧. ਦੁਕੇਸੁ ਕੋਧਨਿਦ੍ਦੇਸਾਦਯੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਹੇਟ੍ਠਾ ਅਨਾਗਤੇਸੁ ਪਨ ਉਪਨਾਹਨਿਦ੍ਦੇਸਾਦੀਸੁ ਪੁਬ੍ਬਕਾਲਂ ਕੋਧਂ ਉਪਨਯ੍ਹਤੀਤਿ ਅਪਰਕਾਲਕੋਧੋ ਉਪਨਾਹੋ ਨਾਮ. ਉਪਨਯ੍ਹਨਾਕਾਰੋ ਉਪਨਯ੍ਹਨਾ. ਉਪਨਯ੍ਹਿਤਸ੍ਸ ਭਾਵੋ ਉਪਨਯ੍ਹਿਤਤ੍ਤਂ. ਅਟ੍ਠਪਨਾਤਿ ਪਠਮੁਪ੍ਪਨ੍ਨਸ੍ਸ ਅਨਨ੍ਤਰਟ੍ਠਪਨਾ ਮਰਿਯਾਦਟ੍ਠਪਨਾ ਵਾ. ਠਪਨਾਤਿ ਪਕਤਿਠਪਨਾ. ਸਣ੍ਠਪਨਾਤਿ ਸਬ੍ਬਤੋਭਾਗੇਨ ਪੁਨਪ੍ਪੁਨਂ ਆਘਾਤਟ੍ਠਪਨਾ. ਅਨੁਸਂਸਨ੍ਦਨਾਤਿ ਪਠਮੁਪ੍ਪਨ੍ਨੇਨ ਕੋਧੇਨ ਸਦ੍ਧਿਂ ਅਨ੍ਤਰਂ ਅਦਸ੍ਸੇਤ੍ਵਾ ਏਕੀਭਾਵਕਰਣਾ. ਅਨੁਪ੍ਪਬਨ੍ਧਨਾਤਿ ਪੁਰਿਮੇਨ ਸਦ੍ਧਿਂ ਪਚ੍ਛਿਮਸ੍ਸ ਘਟਨਾ. ਦਲ਼੍ਹੀਕਮ੍ਮਨ੍ਤਿ ਥਿਰਕਰਣਂ. ਅਯਂ ਵੁਚ੍ਚਤੀਤਿ ਅਯਂ ਉਪਨਨ੍ਧਨਲਕ੍ਖਣੋ ਵੇਰਂ ਅਪ੍ਪਟਿਨਿਸ੍ਸਜ੍ਜਨਰਸੋ ਉਪਨਾਹੋਤਿ ਵੁਚ੍ਚਤਿ; ਯੇਨ ਸਮਨ੍ਨਾਗਤੋ ਪੁਗ੍ਗਲੋ ਵੇਰਂ ਨਿਸ੍ਸਜ੍ਜਿਤੁਂ ਨ ਸਕ੍ਕੋਤਿ; ‘ਏਵਂ ਨਾਮ ਮਂ ਏਸ ਵਤ੍ਤੁਂ ਅਨਨੁਚ੍ਛਵਿਕੋ’ਤਿ ਅਪਰਾਪਰਂ ਅਨੁਬਨ੍ਧਤਿ; ਆਦਿਤ੍ਤਪੂਤਿਅਲਾਤਂ ਵਿਯ ਜਲਤੇਵ; ਧੋਵਿਯਮਾਨਂ ਅਚ੍ਛਚਮ੍ਮਂ ਵਿਯ, ਵਸਾਤੇਲਮਕ੍ਖਿਤਪਿਲੋਤਿਕਾ ਵਿਯ ਚ ਨ ਪਰਿਸੁਜ੍ਝਤਿ.

੮੯੨. ਮਕ੍ਖਨਭਾਵਵਸੇਨ ਮਕ੍ਖੋ; ਪਰਗੁਣਮਕ੍ਖਨਾਯ ਪਵਤ੍ਤੇਨ੍ਤੋਪਿ ਅਤ੍ਤਨੋ ਕਾਰਣਂ, ਗੂਥਪਹਰਣਕਂ ਗੂਥੋ ਵਿਯ, ਪਠਮਤਰਂ ਮਕ੍ਖੇਤੀਤਿ ਅਤ੍ਥੋ. ਤਤੋ ਪਰਾ ਦ੍ਵੇ ਆਕਾਰਭਾਵਨਿਦ੍ਦੇਸਾ. ਨਿਟ੍ਠੁਰਭਾਵੋ ਨਿਟ੍ਠੁਰਿਯਂ; ‘ਤਂ ਨਿਸ੍ਸਾਯ ਏਤ੍ਤਕਮ੍ਪਿ ਨਤ੍ਥੀ’ਤਿ ਖੇਲ਼ਪਾਤਨਨ੍ਤਿ ਅਤ੍ਥੋ. ਨਿਟ੍ਠੁਰਿਯਕਮ੍ਮਨ੍ਤਿ ਨਿਟ੍ਠੁਰਿਯਕਰਣਂ. ਗਹਟ੍ਠੋ ਵਾ ਹਿ ਗਹਟ੍ਠਂ, ਭਿਕ੍ਖੁ ਵਾ ਭਿਕ੍ਖੁਂ ਨਿਸ੍ਸਾਯ ਵਸਨ੍ਤੋ ਅਪ੍ਪਮਤ੍ਤਕੇਨੇਵ ਕੁਜ੍ਝਿਤ੍ਵਾ ‘ਤਂ ਨਿਸ੍ਸਾਯ ਏਤ੍ਤਕਮ੍ਪਿ ਨਤ੍ਥੀ’ਤਿ ਖੇਲ਼ਂ ਪਾਤੇਤ੍ਵਾ ਪਾਦੇਨ ਮਦ੍ਦਨ੍ਤੋ ਵਿਯ ਨਿਟ੍ਠੁਰਿਯਂ ਨਾਮ ਕਰੋਤਿ. ਤਸ੍ਸ ਤਂ ਕਮ੍ਮਂ ਨਿਟ੍ਠੁਰਿਯਕਮ੍ਮਨ੍ਤਿ ਵੁਚ੍ਚਤਿ. ਲਕ੍ਖਣਾਦਿਤੋ ਪਨੇਸ ਪਰਗੁਣਮਕ੍ਖਨਲਕ੍ਖਣੋ ਮਕ੍ਖੋ, ਤੇਸਂ ਵਿਨਾਸਨਰਸੋ, ਪਰੇਨ ਸੁਕਤਾਨਂ ਕਿਰਿਯਾਨਂ ਅਵਚ੍ਛਾਦਨਪਚ੍ਚੁਪਟ੍ਠਾਨੋ.

ਪਲ਼ਾਸਤੀਤਿ ਪਲ਼ਾਸੋ; ਪਰਸ੍ਸ ਗੁਣੇ ਦਸ੍ਸੇਤ੍ਵਾ ਅਤ੍ਤਨੋ ਗੁਣੇਹਿ ਸਮਂ ਕਰੋਤੀਤਿ ਅਤ੍ਥੋ. ਪਲ਼ਾਸਸ੍ਸ ਆਯਨਾ ਪਲ਼ਾਸਾਯਨਾ. ਪਲ਼ਾਸੋ ਚ ਸੋ ਅਤ੍ਤਨੋ ਜਯਾਹਰਣਤੋ ਆਹਾਰੋ ਚਾਤਿ ਪਲ਼ਾਸਾਹਾਰੋ. ਵਿਵਾਦਟ੍ਠਾਨਨ੍ਤਿ ਵਿਵਾਦਕਾਰਣਂ. ਯੁਗਗ੍ਗਾਹੋਤਿ ਸਮਧੁਰਗ੍ਗਹਣਂ. ਅਪ੍ਪਟਿਨਿਸ੍ਸਗ੍ਗੋਤਿ ਅਤ੍ਤਨਾ ਗਹਿਤਸ੍ਸ ਅਪ੍ਪਟਿਨਿਸ੍ਸਜ੍ਜਨਂ. ਲਕ੍ਖਣਾਦਿਤੋ ਪਨੇਸ ਯੁਗਗ੍ਗਾਹਲਕ੍ਖਣੋ ਪਲ਼ਾਸੋ, ਪਰਗੁਣੇਹਿ ਅਤ੍ਤਨੋ ਗੁਣਾਨਂ ਸਮਕਰਣਰਸੋ, ਪਰੇਸਂ ਗੁਣਪ੍ਪਮਾਣੇਨ ਉਪਟ੍ਠਾਨਪਚ੍ਚੁਪਟ੍ਠਾਨੋ. ਪਲ਼ਾਸੀ ਹਿ ਪੁਗ੍ਗਲੋ ਦੁਤਿਯਸ੍ਸ ਧੁਰਂ ਨ ਦੇਤਿ, ਸਮਂ ਪਸਾਰੇਤ੍ਵਾ ਤਿਟ੍ਠਤਿ, ਸਾਕਚ੍ਛਮਣ੍ਡਲੇ ਅਞ੍ਞੇਨ ਭਿਕ੍ਖੁਨਾ ਬਹੂਸੁ ਸੁਤ੍ਤੇਸੁ ਚ ਕਾਰਣੇਸੁ ਚ ਆਭਤੇਸੁਪਿ ‘ਤਵ ਚ ਮਮ ਚ ਵਾਦੇ ਕਿਂ ਨਾਮ ਨਾਨਾਕਰਣਂ? ਨਨੁ ਮਜ੍ਝੇ ਭਿਨ੍ਨਸੁਵਣ੍ਣਂ ਵਿਯ ਏਕਸਦਿਸਮੇਵ ਅਮ੍ਹਾਕਂ ਵਚਨ’ਨ੍ਤਿ ਵਦਤਿ. ਇਸ੍ਸਾਮਚ੍ਛਰਿਯਨਿਦ੍ਦੇਸਾ ਵੁਤ੍ਤਤ੍ਥਾ ਏਵ.

੮੯੪. ਮਾਯਾਨਿਦ੍ਦੇਸੇ ਵਾਚਂ ਭਾਸਤੀਤਿ ਜਾਨਂਯੇਵ ‘ਪਣ੍ਣਤ੍ਤਿਂ ਵੀਤਿਕ੍ਕਮਨ੍ਤਾ ਭਿਕ੍ਖੂ ਭਾਰਿਯਂ ਕਰੋਨ੍ਤਿ, ਅਮ੍ਹਾਕਂ ਪਨ ਵੀਤਿਕ੍ਕਮਟ੍ਠਾਨਂ ਨਾਮ ਨਤ੍ਥੀ’ਤਿ ਉਪਸਨ੍ਤੋ ਵਿਯ ਭਾਸਤਿ. ਕਾਯੇਨ ਪਰਕ੍ਕਮਤੀਤਿ ‘ਮਯਾ ਕਤਂ ਇਦਂ ਪਾਪਕਮ੍ਮਂ ਮਾ ਕੇਚਿ ਜਾਨਿਂਸੂ’ਤਿ ਕਾਯੇਨ ਵਤ੍ਤਂ ਕਰੋਤਿ. ਵਿਜ੍ਜਮਾਨਦੋਸਪਟਿਚ੍ਛਾਦਨਤੋ ਚਕ੍ਖੁਮੋਹਨਮਾਯਾ ਵਿਯਾਤਿ ਮਾਯਾ. ਮਾਯਾਵਿਨੋ ਭਾਵੋ ਮਾਯਾਵਿਤਾ. ਕਤ੍ਵਾ ਪਾਪਂ ਪੁਨ ਪਟਿਚ੍ਛਾਦਨਤੋ ਅਤਿਚ੍ਚ ਆਸਰਨ੍ਤਿ ਏਤਾਯ ਸਤ੍ਤਾਤਿ ਅਚ੍ਚਾਸਰਾ. ਕਾਯਵਾਚਾਕਿਰਿਯਾਹਿ ਅਞ੍ਞਥਾ ਦਸ੍ਸਨਤੋ ਵਞ੍ਚੇਤੀਤਿ ਵਞ੍ਚਨਾ. ਏਤਾਯ ਸਤ੍ਤਾ ਨਿਕਰੋਨ੍ਤੀਤਿ ਨਿਕਤਿ; ਮਿਚ੍ਛਾਕਰੋਨ੍ਤੀਤਿ ਅਤ੍ਥੋ. ‘ਨਾਹਂ ਏਵਂ ਕਰੋਮੀ’ਤਿ ਪਾਪਾਨਂ ਵਿਕ੍ਖਿਪਨਤੋ ਵਿਕਿਰਣਾ. ‘ਨਾਹਂ ਏਵਂ ਕਰੋਮੀ’ਤਿ ਪਰਿਵਜ੍ਜਨਤੋ ਪਰਿਹਰਣਾ. ਕਾਯਾਦੀਹਿ ਸਂਵਰਣਤੋ ਗੂਹਨਾ. ਸਬ੍ਬਤੋਭਾਗੇਨ ਗੂਹਨਾ ਪਰਿਗੂਹਨਾ. ਤਿਣਪਣ੍ਣੇਹਿ ਵਿਯ ਗੂਥਂ ਕਾਯਵਚੀਕਮ੍ਮੇਹਿ ਪਾਪਂ ਛਾਦੇਤੀਤਿ ਛਾਦਨਾ. ਸਬ੍ਬਤੋਭਾਗੇਨ ਛਾਦਨਾ ਪਟਿਚ੍ਛਾਦਨਾ. ਨ ਉਤ੍ਤਾਨਂ ਕਤ੍ਵਾ ਦਸ੍ਸੇਤੀਤਿ ਅਨੁਤ੍ਤਾਨੀਕਮ੍ਮਂ. ਨ ਪਾਕਟਂ ਕਤ੍ਵਾ ਦਸ੍ਸੇਤੀਤਿ ਅਨਾਵਿਕਮ੍ਮਂ. ਸੁਟ੍ਠੁ ਛਾਦਨਾ ਵੋਚ੍ਛਾਦਨਾ. ਕਤਪਟਿਚ੍ਛਾਦਨਵਸੇਨ ਪੁਨਪਿ ਪਾਪਸ੍ਸ ਕਰਣਤੋ ਪਾਪਕਿਰਿਯਾ. ਅਯਂ ਵੁਚ੍ਚਤੀਤਿ ਅਯਂ ਕਤਪਟਿਚ੍ਛਾਦਨਲਕ੍ਖਣਾ ਮਾਯਾ ਨਾਮ ਵੁਚ੍ਚਤਿ; ਯਾਯ ਸਮਨ੍ਨਾਗਤੋ ਪੁਗ੍ਗਲੋ ਭਸ੍ਮਾਪਟਿਚ੍ਛਨ੍ਨੋ ਵਿਯ ਅਙ੍ਗਾਰੋ, ਉਦਕਪਟਿਚ੍ਛਨ੍ਨੋ ਵਿਯ ਖਾਣੁ, ਪਿਲੋਤਿਕਾਪਲਿਵੇਠਿਤਂ ਵਿਯ ਚ ਸਤ੍ਥਂ ਹੋਤਿ.

ਸਾਠੇਯ੍ਯਨਿਦ੍ਦੇਸੇ ਸਠੋਤਿ ਅਸਨ੍ਤਗੁਣਪਰਿਦੀਪਨਤੋ ਨ ਸਮ੍ਮਾ ਭਾਸਿਤਾ. ਸਬ੍ਬਤੋਭਾਗੇਨ ਸਠੋ ਪਰਿਸਠੋ. ਯਂ ਤਤ੍ਥਾਤਿ ਯਂ ਤਸ੍ਮਿਂ ਪੁਗ੍ਗਲੇ. ਸਠਨ੍ਤਿ ਅਸਨ੍ਤਗੁਣਦੀਪਨਂ ਕੇਰਾਟਿਯਂ. ਸਠਤਾਤਿ ਸਠਾਕਾਰੋ. ਕਕ੍ਕਰਤਾਤਿ ਪਦੁਮਨਾਲਿਸ੍ਸ ਵਿਯ ਅਪਰਾਮਸਨਕ੍ਖਮੋ ਖਰਫਰੁਸਭਾਵੋ. ਕਕ੍ਕਰਿਯਨ੍ਤਿਪਿ ਤਸ੍ਸੇਵ ਵੇਵਚਨਂ. ਪਰਿਕ੍ਖਤ੍ਤਤਾ ਪਾਰਿਕ੍ਖਤ੍ਤਿਯਨ੍ਤਿ ਪਦਦ੍ਵਯੇਨ ਨਿਖਣਿਤ੍ਵਾ ਠਪਿਤਂ ਵਿਯ ਦਲ਼੍ਹਕੇਰਾਟਿਯਂ ਵੁਤ੍ਤਂ. ਇਦਂ ਵੁਚ੍ਚਤੀਤਿ ਇਦਂ ਅਤ੍ਤਨੋ ਅਵਿਜ੍ਜਮਾਨਗੁਣਪ੍ਪਕਾਸਨਲਕ੍ਖਣਂ ਸਾਠੇਯ੍ਯਂ ਨਾਮ ਵੁਚ੍ਚਤਿ; ਯੇਨ ਸਮਨ੍ਨਾਗਤਸ੍ਸ ਪੁਗ੍ਗਲਸ੍ਸ ਕੁਚ੍ਛਿਂ ਵਾ ਪਿਟ੍ਠਿਂ ਵਾ ਜਾਨਿਤੁਂ ਨ ਸਕ੍ਕਾ.

ਵਾਮੇਨ ਸੂਕਰੋ ਹੋਤਿ, ਦਕ੍ਖਿਣੇਨ ਅਜਾਮਿਗੋ;

ਸਰੇਨ ਨੇਲਕੋ ਹੋਤਿ, ਵਿਸਾਣੇਨ ਜਰਗ੍ਗਵੋਤਿ.

ਏਵਂ ਵੁਤ੍ਤਯਕ੍ਖਸੂਕਰਸਦਿਸੋ ਹੋਤਿ. ਅਵਿਜ੍ਜਾਦਿਨਿਦ੍ਦੇਸਾ ਵੁਤ੍ਤਤ੍ਥਾ ਏਵ.

੯੦੨. ਅਨਜ੍ਜਵਨਿਦ੍ਦੇਸੇ ਅਨਜ੍ਜਵੋਤਿ ਅਨੁਜੁਤਾਕਾਰੋ. ਅਨਜ੍ਜਵਭਾਵੋ ਅਨਜ੍ਜਵਤਾ. ਜਿਮ੍ਹਤਾਤਿ ਚਨ੍ਦਵਙ੍ਕਤਾ. ਵਙ੍ਕਤਾਤਿ ਗੋਮੁਤ੍ਤਵਙ੍ਕਤਾ. ਕੁਟਿਲਤਾਤਿ ਨਙ੍ਗਲਕੋਟਿਵਙ੍ਕਤਾ. ਸਬ੍ਬੇਹਿਪਿ ਇਮੇਹਿ ਪਦੇਹਿ ਕਾਯਵਚੀਚਿਤ੍ਤਵਙ੍ਕਤਾਵ ਕਥਿਤਾ.

ਅਮਦ੍ਦਵਨਿਦ੍ਦੇਸੇ ਨ ਮੁਦੁਭਾਵੋ ਅਮੁਦੁਤਾ. ਅਮਦ੍ਦਵਾਕਾਰੋ ਅਮਦ੍ਦਵਤਾ. ਕਕ੍ਖਲ਼ਭਾਵੋ ਕਕ੍ਖਲ਼ਿਯਂ. ਮਦ੍ਦਵਕਰਸ੍ਸ ਸਿਨੇਹਸ੍ਸ ਅਭਾਵਤੋ ਫਰੁਸਭਾਵੋ ਫਾਰੁਸਿਯਂ. ਅਨੀਚਵੁਤ੍ਤਿਤਾਯ ਉਜੁਕਮੇਵ ਠਿਤਚਿਤ੍ਤਭਾਵੋ ਉਜੁਚਿਤ੍ਤਤਾ. ਪੁਨ ਅਮੁਦੁਤਾਗਹਣਂ ਤਸ੍ਸਾ ਵਿਸੇਸਨਤ੍ਥਂ ‘ਅਮੁਦੁਤਾਸਙ੍ਖਾਤਾ ਉਜੁਚਿਤ੍ਤਤਾ, ਨ ਅਜ੍ਜਵਸਙ੍ਖਾਤਾ ਉਜੁਚਿਤ੍ਤਤਾ’ਤਿ.

੯੦੩. ਅਕ੍ਖਨ੍ਤਿਨਿਦ੍ਦੇਸਾਦਯੋ ਖਨ੍ਤਿਨਿਦ੍ਦੇਸਾਦਿਪਟਿਪਕ੍ਖਤੋ ਵੇਦਿਤਬ੍ਬਾ.

੯੦੮. ਸਂਯੋਜਨਨਿਦ੍ਦੇਸੇ ਅਜ੍ਝਤ੍ਤਨ੍ਤਿ ਕਾਮਭਵੋ. ਬਹਿਦ੍ਧਾਤਿ ਰੂਪਾਰੂਪਭਵੋ. ਕਿਞ੍ਚਾਪਿ ਹਿ ਸਤ੍ਤਾ ਕਾਮਭਵੇ ਅਪ੍ਪਂ ਕਾਲਂ ਵਸਨ੍ਤਿ ਕਪ੍ਪਸ੍ਸ ਚਤੁਤ੍ਥਮੇਵ ਕੋਟ੍ਠਾਸਂ, ਇਤਰੇਸੁ ਤੀਸੁ ਕੋਟ੍ਠਾਸੇਸੁ ਕਾਮਭਵੋ ਸੁਞ੍ਞੋ ਹੋਤਿ ਤੁਚ੍ਛੋ, ਰੂਪਾਰੂਪਭਵੇ ਬਹੁਂ ਕਾਲਂ ਵਸਨ੍ਤਿ, ਤਥਾਪਿ ਨੇਸਂ ਯਸ੍ਮਾ ਕਾਮਭਵੇ ਚੁਤਿਪਟਿਸਨ੍ਧਿਯੋ ਬਹੁਕਾ ਹੋਨ੍ਤਿ, ਅਪ੍ਪਾ ਰੂਪਾਰੂਪਭਵੇਸੁ, ਯਤ੍ਥ ਚ ਚੁਤਿਪਟਿਸਨ੍ਧਿਯੋ ਬਹੁਕਾ ਤਤ੍ਥ ਆਲਯੋਪਿ ਪਤ੍ਥਨਾਪਿ ਅਭਿਲਾਸੋਪਿ ਬਹੁ ਹੋਤਿ, ਯਤ੍ਥ ਅਪ੍ਪਾ ਤਤ੍ਥ ਅਪ੍ਪੋ, ਤਸ੍ਮਾ ਕਾਮਭਵੋ ਅਜ੍ਝਤ੍ਤਂ ਨਾਮ ਜਾਤੋ, ਰੂਪਾਰੂਪਭਵਾ ਬਹਿਦ੍ਧਾ ਨਾਮ. ਇਤਿ ਅਜ੍ਝਤ੍ਤਸਙ੍ਖਾਤੇ ਕਾਮਭਵੇ ਬਨ੍ਧਨਂ ਅਜ੍ਝਤ੍ਤਸਂਯੋਜਨਂ ਨਾਮ, ਬਹਿਦ੍ਧਾਸਙ੍ਖਾਤੇਸੁ ਰੂਪਾਰੂਪਭਵੇਸੁ ਬਨ੍ਧਨਂ ਬਹਿਦ੍ਧਾਸਂਯੋਜਨਂ ਨਾਮ. ਤਤ੍ਥ ਏਕੇਕਂ ਪਞ੍ਚਪਞ੍ਚਵਿਧਂ ਹੋਤਿ. ਤੇਨ ਵੁਤ੍ਤਂ ‘‘ਪਞ੍ਚੋਰਮ੍ਭਾਗਿਯਾਨਿ ਪਞ੍ਚੁਦ੍ਧਮ੍ਭਾਗਿਯਾਨੀ’’ਤਿ. ਤਤ੍ਰਾਯਂ ਵਚਨਤ੍ਥੋ – ਓਰਂ ਵੁਚ੍ਚਤਿ ਕਾਮਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਓਰਂ ਭਜਨ੍ਤੀਤਿ ਓਰਮ੍ਭਾਗਿਯਾਨਿ. ਉਦ੍ਧਂ ਵੁਚ੍ਚਤਿ ਰੂਪਾਰੂਪਧਾਤੁ, ਤਤ੍ਥ ਉਪਪਤ੍ਤਿਨਿਪ੍ਫਾਦਨਤੋ ਤਂ ਉਦ੍ਧਂ ਭਜਨ੍ਤੀਤਿ ਉਦ੍ਧਮ੍ਭਾਗਿਯਾਨੀਤਿ.

ਦੁਕਨਿਦ੍ਦੇਸਵਣ੍ਣਨਾ.

(੩.) ਤਿਕਨਿਦ੍ਦੇਸਵਣ੍ਣਨਾ

੯੦੯. ਤਿਕਨਿਦ੍ਦੇਸੇ ਤੀਹਿ ਅਕੁਸਲਮੂਲੇਹਿ ਵਟ੍ਟਮੂਲਸਮੁਦਾਚਾਰੋ ਕਥਿਤੋ. ਅਕੁਸਲਵਿਤਕ੍ਕਾਦੀਸੁ ਵਿਤਕ੍ਕਨਵਸੇਨ ਵਿਤਕ੍ਕੋ, ਸਞ੍ਜਾਨਨਵਸੇਨ ਸਞ੍ਞਾ, ਸਭਾਵਟ੍ਠੇਨ ਧਾਤੂਤਿ ਵੇਦਿਤਬ੍ਬਾ. ਦੁਚ੍ਚਰਿਤਨਿਦ੍ਦੇਸੇ ਪਠਮਨਯੋ ਕਮ੍ਮਪਥਵਸੇਨ ਵਿਭਤ੍ਤੋ, ਦੁਤਿਯੋ ਸਬ੍ਬਸਙ੍ਗਾਹਿਕਕਮ੍ਮਵਸੇਨ, ਤਤਿਯੋ ਨਿਬ੍ਬਤ੍ਤਿਤਚੇਤਨਾਵਸੇਨੇਵ.

੯੧੪. ਆਸਵਨਿਦ੍ਦੇਸੇ ਸੁਤ੍ਤਨ੍ਤਪਰਿਯਾਯੇਨ ਤਯੋਵ ਆਸਵਾ ਕਥਿਤਾ.

੯੧੯. ਏਸਨਾਨਿਦ੍ਦੇਸੇ ਸਙ੍ਖੇਪਤੋ ਤਤ੍ਥ ਕਤਮਾ ਕਾਮੇਸਨਾਤਿ ਆਦਿਨਾ ਨਯੇਨ ਵੁਤ੍ਤੋ ਕਾਮਗਵੇਸਨਰਾਗੋ ਕਾਮੇਸਨਾ. ਯੋ ਭਵੇਸੁ ਭਵਚ੍ਛਨ੍ਦੋਤਿਆਦਿਨਾ ਨਯੇਨ ਵੁਤ੍ਤੋ ਭਵਗਵੇਸਨਰਾਗੋ ਭਵੇਸਨਾ. ਸਸ੍ਸਤੋ ਲੋਕੋਤਿਆਦਿਨਾ ਨਯੇਨ ਵੁਤ੍ਤਾ ਦਿਟ੍ਠਿਗਤਿਕਸਮ੍ਮਤਸ੍ਸ ਬ੍ਰਹ੍ਮਚਰਿਯਸ੍ਸ ਗਵੇਸਨਾ ਦਿਟ੍ਠਿ ਬ੍ਰਹ੍ਮਚਰਿਯੇਸਨਾਤਿ ਵੇਦਿਤਬ੍ਬਾ. ਯਸ੍ਮਾ ਚ ਨ ਕੇਵਲਂ ਰਾਗਦਿਟ੍ਠਿਯੋ ਏਵ ਏਸਨਾ, ਤਦੇਕਟ੍ਠਂ ਪਨ ਕਮ੍ਮਮ੍ਪਿ ਏਸਨਾ ਏਵ, ਤਸ੍ਮਾ ਤਂ ਦਸ੍ਸੇਤੁਂ ਦੁਤਿਯਨਯੋ ਵਿਭਤ੍ਤੋ. ਤਤ੍ਥ ਤਦੇਕਟ੍ਠਨ੍ਤਿ ਸਮ੍ਪਯੁਤ੍ਤੇਕਟ੍ਠਂ ਵੇਦਿਤਬ੍ਬਂ. ਤਤ੍ਥ ਕਾਮਰਾਗੇਕਟ੍ਠਂ ਕਾਮਾਵਚਰਸਤ੍ਤਾਨਮੇਵ ਪਵਤ੍ਤਤਿ; ਭਵਰਾਗੇਕਟ੍ਠਂ ਪਨ ਮਹਾਬ੍ਰਹ੍ਮਾਨਂ. ਸਮਾਪਤ੍ਤਿਤੋ ਵੁਟ੍ਠਾਯ ਚਙ੍ਕਮਨ੍ਤਾਨਂ ਝਾਨਙ੍ਗਾਨਂ ਅਸ੍ਸਾਦਨਕਾਲੇ ਅਕੁਸਲਕਾਯਕਮ੍ਮਂ ਹੋਤਿ, ‘ਅਹੋ ਸੁਖਂ ਅਹੋ ਸੁਖ’ਨ੍ਤਿ ਵਾਚਂ ਭਿਨ੍ਦਿਤ੍ਵਾ ਅਸ੍ਸਾਦਨਕਾਲੇ ਵਚੀਕਮ੍ਮਂ, ਕਾਯਙ੍ਗਵਾਚਙ੍ਗਾਨਿ ਅਚੋਪੇਤ੍ਵਾ ਮਨਸਾਵ ਅਸ੍ਸਾਦਨਕਾਲੇ ਮਨੋਕਮ੍ਮਂ. ਅਨ੍ਤਗ੍ਗਾਹਿਕਦਿਟ੍ਠਿਵਸੇਨ ਸਬ੍ਬੇਸਮ੍ਪਿ ਦਿਟ੍ਠਿਗਤਿਕਾਨਂ ਚਙ੍ਕਮਨਾਦਿਵਸੇਨ ਤਾਨਿ ਹੋਨ੍ਤਿਯੇਵ.

੯੨੦. ਵਿਧਾਨਿਦ੍ਦੇਸੇ ‘‘ਕਥਂਵਿਧਂ ਸੀਲਵਨ੍ਤਂ ਵਦਨ੍ਤਿ, ਕਥਂਵਿਧਂ ਪਞ੍ਞਵਨ੍ਤਂ ਵਦਨ੍ਤੀ’’ਤਿਆਦੀਸੁ (ਸਂ. ਨਿ. ੧.੯੫) ਆਕਾਰਸਣ੍ਠਾਨਂ ਵਿਧਾ ਨਾਮ. ‘‘ਏਕਵਿਧੇਨ ਞਾਣਵਤ੍ਥੂ’’ਤਿਆਦੀਸੁ (ਵਿਭ. ੭੫੧) ਕੋਟ੍ਠਾਸੋ. ‘‘ਵਿਧਾਸੁ ਨ ਵਿਕਮ੍ਪਤੀ’’ਤਿਆਦੀਸੁ (ਥੇਰਗਾ. ੧੦੭੯) ਮਾਨੋ. ਇਧਾਪਿ ਮਾਨੋਵ ਵਿਧਾ ਨਾਮ. ਸੋ ਹਿ ਸੇਯ੍ਯਾਦਿਵਸੇਨ ਵਿਦਹਨਤੋ ਵਿਧਾਤਿ ਵੁਚ੍ਚਤਿ. ਠਪਨਟ੍ਠੇਨ ਵਾ ਵਿਧਾ. ਤਸ੍ਮਾ ‘ਸੇਯ੍ਯੋਹਮਸ੍ਮੀ’ਤਿ ਏਵਂ ਉਪ੍ਪਨ੍ਨਾ ਮਾਨਵਿਧਾ ਮਾਨਠਪਨਾ ਸੇਯ੍ਯੋਹਮਸ੍ਮੀਤਿ ਵਿਧਾਤਿ ਵੇਦਿਤਬ੍ਬਾ. ਸੇਸਪਦਦ੍ਵਯੇਸੁਪਿ ਏਸੇਵ ਨਯੋ.

੯੨੧. ਭਯਨਿਦ੍ਦੇਸੇ ਜਾਤਿਂ ਪਟਿਚ੍ਚ ਭਯਨ੍ਤਿ ਜਾਤਿਪਚ੍ਚਯਾ ਉਪ੍ਪਨ੍ਨਭਯਂ. ਭਯਾਨਕਨ੍ਤਿ ਆਕਾਰਨਿਦ੍ਦੇਸੋ. ਛਮ੍ਭਿਤਤ੍ਤਨ੍ਤਿ ਭਯਵਸੇਨ ਗਤ੍ਤਚਲਨਂ. ਲੋਮਹਂਸੋਤਿ ਲੋਮਾਨਂ ਹਂਸਨਂ, ਉਦ੍ਧਗ੍ਗਭਾਵੋ. ਇਮਿਨਾ ਪਦਦ੍ਵਯੇਨ ਕਿਚ੍ਚਤੋ ਭਯਂ ਦਸ੍ਸੇਤ੍ਵਾ ਪੁਨ ਚੇਤਸੋ ਉਤ੍ਰਾਸੋਤਿ ਸਭਾਵਤੋ ਦਸ੍ਸਿਤਂ.

੯੨੨. ਤਮਨਿਦ੍ਦੇਸੇ ਵਿਚਿਕਿਚ੍ਛਾਸੀਸੇਨ ਅਵਿਜ੍ਜਾ ਕਥਿਤਾ. ‘‘ਤਮਨ੍ਧਕਾਰੋ ਸਮ੍ਮੋਹੋ, ਅਵਿਜ੍ਜੋਘੋ ਮਹਬ੍ਭਯੋ’’ਤਿ ਵਚਨਤੋ ਹਿ ਅਵਿਜ੍ਜਾ ਤਮੋ ਨਾਮ. ਤਿਣ੍ਣਂ ਪਨ ਅਦ੍ਧਾਨਂ ਵਸੇਨ ਦੇਸਨਾਸੁਖਤਾਯ ਵਿਚਿਕਿਚ੍ਛਾਸੀਸੇਨ ਦੇਸਨਾ ਕਤਾ. ਤਤ੍ਥ ‘ਕਿਂ ਨੁ ਖੋ ਅਹਂ ਅਤੀਤੇ ਖਤ੍ਤਿਯੋ ਅਹੋਸਿਂ ਉਦਾਹੁ ਬ੍ਰਾਹ੍ਮਣੋ ਵੇਸ੍ਸੋ ਸੁਦ੍ਦੋ ਕਾਲ਼ੋ ਓਦਾਤੋ ਰਸ੍ਸੋ ਦੀਘੋ’ਤਿ ਕਙ੍ਖਨ੍ਤੋ ਅਤੀਤਂ ਅਦ੍ਧਾਨਂ ਆਰਬ੍ਭ ਕਙ੍ਖਤਿ ਨਾਮ. ‘ਕਿਂ ਨੁ ਖੋ ਅਹਂ ਅਨਾਗਤੇ ਖਤ੍ਤਿਯੋ ਭਵਿਸ੍ਸਾਮਿ ਉਦਾਹੁ ਬ੍ਰਾਹ੍ਮਣੋ ਵੇਸ੍ਸੋ…ਪੇ… ਦੀਘੋ’ਤਿ ਕਙ੍ਖਨ੍ਤੋ ਅਨਾਗਤਂ ਅਦ੍ਧਾਨਂ ਆਰਬ੍ਭ ਕਙ੍ਖਤਿ ਨਾਮ. ‘ਕਿਂ ਨੁ ਖੋ ਅਹਂ ਏਤਰਹਿ ਖਤ੍ਤਿਯੋ ਉਦਾਹੁ ਬ੍ਰਾਹ੍ਮਣੋ ਵੇਸ੍ਸੋ ਸੁਦ੍ਦੋ; ਕਿਂ ਵਾ ਅਹਂ ਰੂਪਂ ਉਦਾਹੁ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣ’ਨ੍ਤਿ ਕਙ੍ਖਨ੍ਤੋ ਪਚ੍ਚੁਪ੍ਪਨ੍ਨਂ ਅਦ੍ਧਾਨਂ ਆਰਬ੍ਭ ਕਙ੍ਖਤਿ ਨਾਮ.

ਤਤ੍ਥ ਕਿਞ੍ਚਾਪਿ ਖਤ੍ਤਿਯੋ ਵਾ ਅਤ੍ਤਨੋ ਖਤ੍ਤਿਯਭਾਵਂ, ਬ੍ਰਾਹ੍ਮਣੋ ਵਾ ਬ੍ਰਾਹ੍ਮਣਭਾਵਂ, ਵੇਸ੍ਸੋ ਵਾ ਵੇਸ੍ਸਭਾਵਂ, ਸੁਦ੍ਦੋ ਵਾ ਸੁਦ੍ਦਭਾਵਂ ਅਜਾਨਨਕੋ ਨਾਮ ਨਤ੍ਥਿ, ਜੀਵਲਦ੍ਧਿਕੋ ਪਨ ਸਤ੍ਤੋ ਖਤ੍ਤਿਯਜੀਵਾਦੀਨਂ ਵਣ੍ਣਾਦਿਭੇਦਂ ਸੁਤ੍ਵਾ ‘ਕੀਦਿਸੋ ਨੁ ਖੋ ਅਮ੍ਹਾਕਂ ਅਬ੍ਭਨ੍ਤਰੇ ਜੀਵੋ – ਕਿਂ ਨੁ ਖੋ ਨੀਲਕੋ ਉਦਾਹੁ ਪੀਤਕੋ ਲੋਹਿਤਕੋ ਓਦਾਤੋ ਚਤੁਰਂਸੋ ਛਲ਼ਂਸੋ ਅਟ੍ਠਂਸੋ’ਤਿ ਕਙ੍ਖਨ੍ਤੋ ਏਵਂ ਕਙ੍ਖਤਿ ਨਾਮ.

੯੨੩. ਤਿਤ੍ਥਾਯਤਨਾਨੀਤਿ ਤਿਤ੍ਥਭੂਤਾਨਿ ਆਯਤਨਾਨਿ, ਤਿਤ੍ਥਿਯਾਨਂ ਵਾ ਆਯਤਨਾਨਿ. ਤਤ੍ਥ ਤਿਤ੍ਥਂ ਨਾਮ ਦ੍ਵਾਸਟ੍ਠਿ ਦਿਟ੍ਠਿਯੋ. ਤਿਤ੍ਥਿਯਾ ਨਾਮ ਯੇਸਂ ਤਾ ਦਿਟ੍ਠਿਯੋ ਰੁਚ੍ਚਨ੍ਤਿ ਖਮਨ੍ਤਿ. ਆਯਤਨਟ੍ਠੋ ਹੇਟ੍ਠਾ ਵੁਤ੍ਤੋਯੇਵ. ਤਤ੍ਥ ਯਸ੍ਮਾ ਸਬ੍ਬੇਪਿ ਦਿਟ੍ਠਿਗਤਿਕਾ ਸਞ੍ਜਾਯਮਾਨਾ ਇਮੇਸੁਯੇਵ ਤੀਸੁ ਠਾਨੇਸੁ ਸਞ੍ਜਾਯਨ੍ਤਿ, ਸਮੋਸਰਮਾਨਾਪਿ ਏਤੇਸੁਯੇਵ ਸਮੋਸਰਨ੍ਤਿ ਸਨ੍ਨਿਪਤਨ੍ਤਿ, ਦਿਟ੍ਠਿਗਤਿਕਭਾਵੇ ਚ ਨੇਸਂ ਏਤਾਨਿਯੇਵ ਕਾਰਣਾਨਿ, ਤਸ੍ਮਾ ਤਿਤ੍ਥਾਨਿ ਚ ਤਾਨਿ ਸਞ੍ਜਾਤਾਨੀਤਿਆਦਿਨਾ ਅਤ੍ਥੇਨ ਆਯਤਨਾਨਿ ਚਾਤਿ ਤਿਤ੍ਥਾਯਤਨਾਨਿ; ਤੇਨੇਵਤ੍ਥੇਨ ਤਿਤ੍ਥਿਯਾਨਂ ਆਯਤਨਾਨੀਤਿਪਿ ਤਿਤ੍ਥਾਯਤਨਾਨਿ. ਪੁਰਿਸਪੁਗ੍ਗਲੋਤਿ ਸਤ੍ਤੋ. ਕਾਮਞ੍ਚ ਪੁਰਿਸੋਤਿਪਿ ਪੁਗ੍ਗਲੋਤਿਪਿ ਵੁਤ੍ਤੇ ਸਤ੍ਤੋਯੇਵ ਵੁਤ੍ਤੋ, ਅਯਂ ਪਨ ਸਮ੍ਮੁਤਿਕਥਾ ਨਾਮ ਯੋ ਯਥਾ ਜਾਨਾਤਿ ਤਸ੍ਸ ਤਥਾ ਵੁਚ੍ਚਤਿ. ਪਟਿਸਂਵੇਦੇਤੀਤਿ ਅਤ੍ਤਨੋ ਸਨ੍ਤਾਨੇ ਉਪ੍ਪਨ੍ਨਂ ਜਾਨਾਤਿ, ਪਟਿਸਂਵਿਦਿਤਂ ਕਰੋਤਿ ਅਨੁਭਵਤਿ ਵਾ. ਪੁਬ੍ਬੇਕਤਹੇਤੂਤਿ ਪੁਬ੍ਬੇ ਕਤਕਾਰਣਾ, ਪੁਬ੍ਬੇ ਕਤਕਮ੍ਮਪਚ੍ਚਯੇਨੇਵ ਪਟਿਸਂਵੇਦੇਤੀਤਿ ਅਤ੍ਥੋ. ਅਯਂ ਨਿਗਣ੍ਠਸਮਯੋ. ਏਵਂਵਾਦਿਨੋ ਪਨ ਤੇ ਕਮ੍ਮਵੇਦਨਞ੍ਚ ਕਿਰਿਯਵੇਦਨਞ੍ਚ ਪਟਿਕ੍ਖਿਪਿਤ੍ਵਾ ਏਕਂ ਵਿਪਾਕਵੇਦਨਮੇਵ ਸਮ੍ਪਟਿਚ੍ਛਨ੍ਤਿ. ਪਿਤ੍ਤਸਮੁਟ੍ਠਾਨਾਦੀਸੁ (ਮਹਾਨਿ. ੫) ਚ ਅਟ੍ਠਸੁ ਆਬਾਧੇਸੁ ਸਤ੍ਤ ਪਟਿਕ੍ਖਿਪਿਤ੍ਵਾ ਅਟ੍ਠਮਂਯੇਵ ਸਮ੍ਪਟਿਚ੍ਛਨ੍ਤਿ, ਦਿਟ੍ਠਧਮ੍ਮਵੇਦਨੀਯਾਦੀਸੁ ਚ ਤੀਸੁ ਕਮ੍ਮੇਸੁ ਦ੍ਵੇ ਪਟਿਕ੍ਖਿਪਿਤ੍ਵਾ ਏਕਂ ਅਪਰਾਪਰਿਯਵੇਦਨੀਯਮੇਵ ਸਮ੍ਪਟਿਚ੍ਛਨ੍ਤਿ, ਕੁਸਲਾਕੁਸਲਵਿਪਾਕਕਿਰਿਯਸਙ੍ਖਾਤਾਸੁ ਚ ਚਤੂਸੁ ਚੇਤਨਾਸੁ ਵਿਪਾਕਚੇਤਨਂਯੇਵ ਸਮ੍ਪਟਿਚ੍ਛਨ੍ਤਿ.

ਇਸ੍ਸਰਨਿਮ੍ਮਾਨਹੇਤੂਤਿ ਇਸ੍ਸਰਨਿਮ੍ਮਾਨਕਾਰਣਾ; ਬ੍ਰਹ੍ਮੁਨਾ ਵਾ ਪਜਾਪਤਿਨਾ ਵਾ ਇਸ੍ਸਰੇਨ ਨਿਮ੍ਮਿਤਤ੍ਤਾ ਪਟਿਸਂਵੇਦੇਤੀਤਿ ਅਤ੍ਥੋ. ਅਯਂ ਬ੍ਰਾਹ੍ਮਣਸਮਯੋ. ਅਯਞ੍ਹਿ ਨੇਸਂ ਅਧਿਪ੍ਪਾਯੋ – ਇਮਾ ਤਿਸ੍ਸੋ ਵੇਦਨਾ ਪਚ੍ਚੁਪ੍ਪਨ੍ਨੇ ਅਤ੍ਤਨਾ ਕਤਮੂਲਕੇਨ ਵਾ ਆਣਤ੍ਤਿਮੂਲਕੇਨ ਵਾ ਪੁਬ੍ਬੇ ਕਤੇਨ ਵਾ ਅਹੇਤੁਅਪ੍ਪਚ੍ਚਯਾ ਵਾ ਪਟਿਸਂਵੇਦੇਤੁਂ ਨਾਮ ਨ ਸਕ੍ਕਾ; ਇਸ੍ਸਰਨਿਮ੍ਮਾਨਕਾਰਣਾ ਏਵ ਪਨ ਇਮਾ ਪਟਿਸਂਵੇਦੇਤੀਤਿ. ਏਵਂਵਾਦਿਨੋ ਪਨੇਤੇ ਹੇਟ੍ਠਾ ਵੁਤ੍ਤੇਸੁ ਅਟ੍ਠਸੁ ਆਬਾਧੇਸੁ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬਂ ਪਟਿਬਾਹਨ੍ਤਿ. ਤਥਾ ਦਿਟ੍ਠਧਮ੍ਮਵੇਦਨੀਯਾਦੀਸੁਪਿ ਸਬ੍ਬਕੋਟ੍ਠਾਸੇਸੁ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬਂ ਪਟਿਬਾਹਨ੍ਤਿ.

ਅਹੇਤੁ ਅਪ੍ਪਚ੍ਚਯਾਤਿ ਹੇਤੁਞ੍ਚ ਪਚ੍ਚਯਞ੍ਚ ਵਿਨਾ ਅਕਾਰਣੇਨੇਵ ਪਟਿਸਂਵੇਦੇਤੀਤਿ ਅਤ੍ਥੋ. ਅਯਂ ਆਜੀਵਕਸਮਯੋ. ਏਵਂ ਵਾਦਿਨੋ ਏਤੇਪਿ ਹੇਟ੍ਠਾ ਵੁਤ੍ਤੇਸੁ ਕਾਰਣੇਸੁ ਚ ਬ੍ਯਾਧੀਸੁ ਚ ਏਕਮ੍ਪਿ ਅਸਮ੍ਪਟਿਚ੍ਛਿਤ੍ਵਾ ਸਬ੍ਬਂ ਪਟਿਕ੍ਖਿਪਨ੍ਤਿ.

੯੨੪. ਕਿਞ੍ਚਨਾਤਿ ਪਲਿਬੋਧਾ. ਰਾਗੋ ਕਿਞ੍ਚਨਨ੍ਤਿ ਰਾਗੋ ਉਪ੍ਪਜ੍ਜਮਾਨੋ ਸਤ੍ਤੇ ਬਨ੍ਧਤਿ ਪਲਿਬੁਨ੍ਧੇਤਿ, ਤਸ੍ਮਾ ਕਿਞ੍ਚਨਨ੍ਤਿ ਵੁਚ੍ਚਤਿ. ਦੋਸਮੋਹੇਸੁਪਿ ਏਸੇਵ ਨਯੋ. ਅਙ੍ਗਣਾਨੀਤਿ ‘‘ਉਦਙ੍ਗਣੇ ਤਤ੍ਥ ਪਪਂ ਅਵਿਨ੍ਦੁ’’ਨ੍ਤਿ (ਜਾ. ੧.੧.੨) ਆਗਤਟ੍ਠਾਨੇ ਭੂਮਿਪ੍ਪਦੇਸੋ ਅਙ੍ਗਣਂ. ‘‘ਤਸ੍ਸੇਵ ਰਜਸ੍ਸ ਵਾ ਅਙ੍ਗਣਸ੍ਸ ਵਾ ਪਹਾਨਾਯ ਵਾਯਮਤੀ’’ਤਿ (ਮ. ਨਿ. ੧.੧੮੪; ਅ. ਨਿ. ੧੦.੫੧) ਆਗਤਟ੍ਠਾਨੇ ਯਂ ਕਿਞ੍ਚਿ ਮਲਂ ਵਾ ਪਙ੍ਕੋ ਵਾ. ‘‘ਸਾਙ੍ਗਣੋਵ ਸਮਾਨੋ’’ਤਿ (ਮ. ਨਿ. ੧.੫੭) ਆਗਤਟ੍ਠਾਨੇ ਨਾਨਪ੍ਪਕਾਰੋ ਤਿਬ੍ਬਕਿਲੇਸੋ. ਇਧਾਪਿ ਤਦੇਵ ਕਿਲੇਸਙ੍ਗਣਂ ਅਧਿਪ੍ਪੇਤਂ. ਤੇਨੇਵ ਰਾਗੋ ਅਙ੍ਗਣਨ੍ਤਿਆਦਿਮਾਹ.

ਮਲਾਨੀਤਿ ਮਲਿਨਭਾਵਕਰਣਾਨਿ. ਰਾਗੋ ਮਲਨ੍ਤਿ ਰਾਗੋ ਉਪ੍ਪਜ੍ਜਮਾਨੋ ਚਿਤ੍ਤਂ ਮਲਿਨਂ ਕਰੋਤਿ, ਮਲਂ ਗਾਹਾਪੇਤਿ, ਤਸ੍ਮਾ ਮਲਨ੍ਤਿ ਵੁਚ੍ਚਤਿ. ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ.

ਵਿਸਮਨਿਦ੍ਦੇਸੇ ਯਸ੍ਮਾ ਰਾਗਾਦੀਸੁ ਚੇਵ ਕਾਯਦੁਚ੍ਚਰਿਤਾਦੀਸੁ ਚ ਸਤ੍ਤਾ ਪਕ੍ਖਲਨ੍ਤਿ, ਪਕ੍ਖਲਿਤਾ ਚ ਪਨ ਸਾਸਨਤੋਪਿ ਸੁਗਤਿਤੋਪਿ ਪਤਨ੍ਤਿ, ਤਸ੍ਮਾ ਪਕ੍ਖਲਨਪਾਤਹੇਤੁਤੋ ਰਾਗੋ ਵਿਸਮਨ੍ਤਿਆਦਿ ਵੁਤ੍ਤਂ.

ਅਗ੍ਗੀਤਿ ਅਨੁਦਹਨਟ੍ਠੇਨ ਅਗ੍ਗਿ. ਰਾਗਗ੍ਗੀਤਿ ਰਾਗੋ ਉਪ੍ਪਜ੍ਜਮਾਨੋ ਸਤ੍ਤੇ ਅਨੁਦਹਤਿ ਝਾਪੇਤਿ, ਤਸ੍ਮਾ ਅਗ੍ਗੀਤਿ ਵੁਚ੍ਚਤਿ. ਦੋਸਮੋਹੇਸੁਪਿ ਏਸੇਵ ਨਯੋ. ਤਤ੍ਥ ਵਤ੍ਥੂਨਿ – ਏਕਾ ਕਿਰ ਦਹਰਭਿਕ੍ਖੁਨੀ ਚਿਤ੍ਤਲਪਬ੍ਬਤਵਿਹਾਰੇ ਉਪੋਸਥਾਗਾਰਂ ਗਨ੍ਤ੍ਵਾ ਦ੍ਵਾਰਪਾਲਕਰੂਪਂ ਓਲੋਕਯਮਾਨਾ ਠਿਤਾ. ਅਥਸ੍ਸਾ ਅਨ੍ਤੋ ਰਾਗੋ ਉਪ੍ਪਨ੍ਨੋ. ਸਾ ਤੇਨੇਵ ਝਾਯਿਤ੍ਵਾ ਕਾਲਮਕਾਸਿ. ਭਿਕ੍ਖੁਨਿਯੋ ਗਚ੍ਛਮਾਨਾ ‘ਅਯਂ ਦਹਰਾ ਠਿਤਾ, ਪਕ੍ਕੋਸਥ ਨ’ਨ੍ਤਿ ਆਹਂਸੁ. ਏਕਾ ਗਨ੍ਤ੍ਵਾ ‘ਕਸ੍ਮਾ ਠਿਤਾਸੀ’ਤਿ ਹਤ੍ਥੇ ਗਣ੍ਹਿ. ਗਹਿਤਮਤ੍ਤਾ ਪਰਿਵਤ੍ਤਿਤ੍ਵਾ ਪਤਿਤਾ. ਇਦਂ ਤਾਵ ਰਾਗਸ੍ਸ ਅਨੁਦਹਨਤਾਯ ਵਤ੍ਥੁ. ਦੋਸਸ੍ਸ ਪਨ ਅਨੁਦਹਨਤਾਯ ਮਨੋਪਦੋਸਿਕਾ ਦੇਵਾ ਦਟ੍ਠਬ੍ਬਾ. ਮੋਹਸ੍ਸ ਅਨੁਦਹਨਤਾਯ ਖਿਡ੍ਡਾਪਦੋਸਿਕਾ ਦੇਵਾ ਦਟ੍ਠਬ੍ਬਾ. ਮੋਹਨਵਸੇਨ ਹਿ ਤੇਸਂ ਸਤਿਸਮ੍ਮੋਸੋ ਹੋਤਿ. ਤਸ੍ਮਾ ਖਿਡ੍ਡਾਵਸੇਨ ਆਹਾਰਕਾਲਂ ਅਤਿਵਤ੍ਤਿਤ੍ਵਾ ਕਾਲਂ ਕਰੋਨ੍ਤਿ. ਕਸਾਵਾਤਿ ਕਸਟਾ ਨਿਰੋਜਾ. ਰਾਗਾਦੀਸੁ ਚ ਕਾਯਦੁਚ੍ਚਰਿਤਾਦੀਸੁ ਚ ਏਕਮ੍ਪਿ ਪਣੀਤਂ ਓਜਵਨ੍ਤਂ ਨਤ੍ਥਿ, ਤਸ੍ਮਾ ਰਾਗੋ ਕਸਾਵੋਤਿਆਦਿ ਵੁਤ੍ਤਂ.

੯੨੫. ਅਸ੍ਸਾਦਦਿਟ੍ਠੀਤਿ ਅਸ੍ਸਾਦਸਮ੍ਪਯੁਤ੍ਤਾ ਦਿਟ੍ਠਿ. ਨਤ੍ਥਿ ਕਾਮੇਸੁ ਦੋਸੋਤਿ ਕਿਲੇਸਕਾਮੇਨ ਵਤ੍ਥੁਕਾਮਪਟਿਸੇਵਨਦੋਸੋ ਨਤ੍ਥੀਤਿ ਵਦਤਿ. ਪਾਤਬ੍ਯਤਨ੍ਤਿ ਪਾਤਬ੍ਬਭਾਵਂ ਪਰਿਭੁਞ੍ਜਨਂ ਅਜ੍ਝੋਹਰਣਂ. ਏਵਂਵਾਦੀ ਹਿ ਸੋ ਵਤ੍ਥੁਕਾਮੇਸੁ ਕਿਲੇਸਕਾਮਂ ਪਿਵਨ੍ਤੋ ਵਿਯ ਅਜ੍ਝੋਹਰਨ੍ਤੋ ਵਿਯ ਪਰਿਭੁਞ੍ਜਤਿ. ਅਤ੍ਤਾਨੁਦਿਟ੍ਠੀਤਿ ਅਤ੍ਤਾਨਂ ਅਨੁਗਤਾ ਦਿਟ੍ਠਿ. ਮਿਚ੍ਛਾਦਿਟ੍ਠੀਤਿ ਲਾਮਕਾ ਦਿਟ੍ਠਿ. ਇਦਾਨਿ ਯਸ੍ਮਾ ਏਤ੍ਥ ਪਠਮਾ ਸਸ੍ਸਤਦਿਟ੍ਠਿ ਹੋਤਿ, ਦੁਤਿਯਾ ਸਕ੍ਕਾਯਦਿਟ੍ਠਿ, ਤਤਿਯਾ ਉਚ੍ਛੇਦਦਿਟ੍ਠਿ, ਤਸ੍ਮਾ ਤਮਤ੍ਥਂ ਦਸ੍ਸੇਤੁਂ ਸਸ੍ਸਤਦਿਟ੍ਠਿ ਅਸ੍ਸਾਦਦਿਟ੍ਠੀਤਿਆਦਿਮਾਹ.

੯੨੬. ਅਰਤਿਨਿਦ੍ਦੇਸੋ ਚ ਵਿਹੇਸਾਨਿਦ੍ਦੇਸੋ ਚ ਵੁਤ੍ਤਤ੍ਥੋਯੇਵ. ਅਧਮ੍ਮਸ੍ਸ ਚਰਿਯਾ ਅਧਮ੍ਮਚਰਿਯਾ, ਅਧਮ੍ਮਕਰਣਨ੍ਤਿ ਅਤ੍ਥੋ. ਵਿਸਮਾ ਚਰਿਯਾ, ਵਿਸਮਸ੍ਸ ਵਾ ਕਮ੍ਮਸ੍ਸ ਚਰਿਯਾਤਿ ਵਿਸਮਚਰਿਯਾ. ਦੋਵਚਸ੍ਸਤਾਪਾਪਮਿਤ੍ਤਤਾ ਨਿਦ੍ਦੇਸਾ ਵੁਤ੍ਤਤ੍ਥਾ ਏਵ. ਪੁਥੁਨਿਮਿਤ੍ਤਾਰਮ੍ਮਣੇਸੁ ਪਵਤ੍ਤਿਤੋ ਨਾਨਤ੍ਤੇਸੁ ਸਞ੍ਞਾ ਨਾਨਤ੍ਤਸਞ੍ਞਾ. ਯਸ੍ਮਾ ਵਾ ਅਞ੍ਞਾਵ ਕਾਮਸਞ੍ਞਾ, ਅਞ੍ਞਾ ਬ੍ਯਾਪਾਦਾਦਿਸਞ੍ਞਾ, ਤਸ੍ਮਾ ਨਾਨਤ੍ਤਾ ਸਞ੍ਞਾਤਿਪਿ ਨਾਨਤ੍ਤਸਞ੍ਞਾ. ਕੋਸਜ੍ਜਪਮਾਦਨਿਦ੍ਦੇਸੇਸੁ ਪਞ੍ਚਸੁ ਕਾਮਗੁਣੇਸੁ ਵਿਸ੍ਸਟ੍ਠਚਿਤ੍ਤਸ੍ਸ ਕੁਸਲਧਮ੍ਮਭਾਵਨਾਯ ਅਨਨੁਯੋਗਵਸੇਨ ਲੀਨਵੁਤ੍ਤਿਤਾ ਕੋਸਜ੍ਜਂ, ਪਮਜ੍ਜਨਵਸੇਨ ਪਮਤ੍ਤਭਾਵੋ ਪਮਾਦੋਤਿ ਵੇਦਿਤਬ੍ਬੋ. ਅਸਨ੍ਤੁਟ੍ਠਿਤਾਦਿਨਿਦ੍ਦੇਸਾ ਵੁਤ੍ਤਤ੍ਥਾ ਏਵ.

੯੩੧. ਅਨਾਦਰਿਯਨਿਦ੍ਦੇਸੇ ਓਵਾਦਸ੍ਸ ਅਨਾਦਿਯਨਵਸੇਨ ਅਨਾਦਰਭਾਵੋ ਅਨਾਦਰਿਯਂ. ਅਨਾਦਰਿਯਨਾਕਾਰੋ ਅਨਾਦਰਤਾ. ਸਗਰੁਵਾਸਂ ਅਵਸਨਟ੍ਠੇਨ ਅਗਾਰਵਭਾਵੋ ਅਗਾਰਵਤਾ. ਸਜੇਟ੍ਠਕਵਾਸਂ ਅਵਸਨਟ੍ਠੇਨ ਅਪ੍ਪਤਿਸ੍ਸਵਤਾ. ਅਨਦ੍ਦਾਤਿ ਅਨਾਦਿਯਨਾ. ਅਨਦ੍ਦਾਯਨਾਤਿ ਅਨਾਦਿਯਨਾਕਾਰੋ. ਅਨਦ੍ਦਾਯ ਅਯਿਤਸ੍ਸ ਭਾਵੋ ਅਨਦ੍ਦਾਯਿਤਤ੍ਤਂ. ਅਸੀਲਸ੍ਸ ਭਾਵੋ ਅਸੀਲ੍ਯਂ. ਅਚਿਤ੍ਤੀਕਾਰੋਤਿ ਗਰੁਚਿਤ੍ਤੀਕਾਰਸ੍ਸ ਅਕਰਣਂ.

੯੩੨. ਅਸ੍ਸਦ੍ਧਭਾਵੋ ਅਸ੍ਸਦ੍ਧਿਯਂ. ਅਸਦ੍ਦਹਨਾਕਾਰੋ ਅਸਦ੍ਦਹਨਾ. ਓਕਪ੍ਪੇਤ੍ਵਾ ਅਨੁਪਵਿਸਿਤ੍ਵਾ ਅਗ੍ਗਹਣਂ ਅਨੋਕਪ੍ਪਨਾ. ਅਪ੍ਪਸੀਦਨਟ੍ਠੇਨ ਅਨਭਿਪ੍ਪਸਾਦੋ.

ਅਵਦਞ੍ਞੁਤਾਤਿ ਥਦ੍ਧਮਚ੍ਛਰਿਯਵਸੇਨ ‘ਦੇਹਿ, ਕਰੋਹੀ’ਤਿ ਵਚਨਸ੍ਸ ਅਜਾਨਤਾ.

੯੩੪. ਬੁਦ੍ਧਾ ਚ ਬੁਦ੍ਧਸਾਵਕਾ ਚਾਤਿ ਏਤ੍ਥ ਬੁਦ੍ਧਗ੍ਗਹਣੇਨ ਪਚ੍ਚੇਕਬੁਦ੍ਧਾਪਿ ਗਹਿਤਾਵ. ਅਸਮੇਤੁਕਮ੍ਯਤਾਤਿ ਤੇਸਂ ਸਮੀਪਂ ਅਗਨ੍ਤੁਕਾਮਤਾ. ਸਦ੍ਧਮ੍ਮਂ ਅਸੋਤੁਕਮ੍ਯਤਾਤਿ ਸਤ੍ਤਤਿਂਸ ਬੋਧਿਪਕ੍ਖਿਯਧਮ੍ਮਾ ਸਦ੍ਧਮ੍ਮੋ ਨਾਮ, ਤਂ ਅਸੁਣਿਤੁਕਾਮਤਾ. ਅਨੁਗ੍ਗਹੇਤੁਕਮ੍ਯਤਾਤਿ ਨ ਉਗ੍ਗਹੇਤੁਕਾਮਤਾ.

ਉਪਾਰਮ੍ਭਚਿਤ੍ਤਤਾਤਿ ਉਪਾਰਮ੍ਭਚਿਤ੍ਤਭਾਵੋ. ਯਸ੍ਮਾ ਪਨ ਸੋ ਅਤ੍ਥਤੋ ਉਪਾਰਮ੍ਭੋਵ ਹੋਤਿ, ਤਸ੍ਮਾ ਤਂ ਦਸ੍ਸੇਤੁਂ ਤਤ੍ਥ ਕਤਮੋ ਉਪਾਰਮ੍ਭੋਤਿਆਦਿ ਵੁਤ੍ਤਂ. ਤਤ੍ਥ ਉਪਾਰਮ੍ਭਨਵਸੇਨ ਉਪਾਰਮ੍ਭੋ. ਪੁਨਪ੍ਪੁਨਂ ਉਪਾਰਮ੍ਭੋ ਅਨੁਪਾਰਮ੍ਭੋ ਉਪਾਰਮ੍ਭਨਾਕਾਰੋ ਉਪਾਰਮ੍ਭਨਾ. ਪੁਨਪ੍ਪੁਨਂ ਉਪਾਰਮ੍ਭਨਾ ਅਨੁਪਾਰਮ੍ਭਨਾ. ਅਨੁਪਾਰਮ੍ਭਿਤਸ੍ਸ ਭਾਵੋ ਅਨੁਪਾਰਮ੍ਭਿਤਤ੍ਤਂ. ਉਞ੍ਞਾਤਿ ਹੇਟ੍ਠਾ ਕਤ੍ਵਾ ਜਾਨਨਾ. ਅਵਞ੍ਞਾਤਿ ਅਵਜਾਨਨਾ. ਪਰਿਭਵਨਂ ਪਰਿਭਵੋ. ਰਨ੍ਧਸ੍ਸ ਗਵੇਸਿਤਾ ਰਨ੍ਧਗਵੇਸਿਤਾ. ਰਨ੍ਧਂ ਵਾ ਗਵੇਸਤੀਤਿ ਰਨ੍ਧਗਵੇਸੀ, ਤਸ੍ਸ ਭਾਵੋ ਰਨ੍ਧਗਵੇਸਿਤਾ. ਅਯਂ ਵੁਚ੍ਚਤੀਤਿ ਅਯਂ ਪਰਵਜ੍ਜਾਨੁਪਸ੍ਸਨਲਕ੍ਖਣੋ ਉਪਾਰਮ੍ਭੋ ਨਾਮ ਵੁਚ੍ਚਤਿ, ਯੇਨ ਸਮਨ੍ਨਾਗਤੋ ਪੁਗ੍ਗਲੋ, ਯਥਾ ਨਾਮ ਤੁਨ੍ਨਕਾਰੋ ਸਾਟਕਂ ਪਸਾਰੇਤ੍ਵਾ ਛਿਦ੍ਦਮੇਵ ਓਲੋਕੇਤਿ, ਏਵਮੇਵ ਪਰਸ੍ਸ ਸਬ੍ਬੇਪਿ ਗੁਣੇ ਮਕ੍ਖੇਤ੍ਵਾ ਅਗੁਣੇਸੁਯੇਵ ਪਤਿਟ੍ਠਾਤਿ.

੯੩੬. ਅਯੋਨਿਸੋ ਮਨਸਿਕਾਰੋਤਿ ਅਨੁਪਾਯਮਨਸਿਕਾਰੋ. ਅਨਿਚ੍ਚੇ ਨਿਚ੍ਚਨ੍ਤਿ ਅਨਿਚ੍ਚੇਯੇਵ ਵਤ੍ਥੁਸ੍ਮਿਂ ‘ਇਦਂ ਨਿਚ੍ਚ’ਨ੍ਤਿ ਏਵਂ ਪਵਤ੍ਤੋ. ਦੁਕ੍ਖੇ ਸੁਖਨ੍ਤਿਆਦੀਸੁਪਿ ਏਸੇਵ ਨਯੋ. ਸਚ੍ਚਵਿਪ੍ਪਟਿਕੁਲੇਨ ਚਾਤਿ ਚਤੁਨ੍ਨਂ ਸਚ੍ਚਾਨਂ ਅਨਨੁਲੋਮਵਸੇਨ. ਚਿਤ੍ਤਸ੍ਸ ਆਵਟ੍ਟਨਾਤਿਆਦੀਨਿ ਸਬ੍ਬਾਨਿਪਿ ਆਵਜ੍ਜਨਸ੍ਸੇਵ ਵੇਵਚਨਾਨੇਵ. ਆਵਜ੍ਜਨਞ੍ਹਿ ਭਵਙ੍ਗਚਿਤ੍ਤਂ ਆਵਟ੍ਟੇਤੀਤਿ ਚਿਤ੍ਤਸ੍ਸ ਆਵਟ੍ਟਨਾ. ਅਨੁਅਨੁ ਆਵਟ੍ਟੇਤੀਤਿ ਅਨਾਵਟ੍ਟਨਾ. ਆਭੁਜਤੀਤਿ ਆਭੋਗੋ. ਭਵਙ੍ਗਾਰਮ੍ਮਣਤੋ ਅਞ੍ਞਂ ਆਰਮ੍ਮਣਂ ਸਮਨ੍ਨਾਹਰਤੀਤਿ ਸਮਨ੍ਨਾਹਾਰੋ. ਤਦੇਵਾਰਮ੍ਮਣਂ ਅਤ੍ਤਾਨਂ ਅਨੁਬਨ੍ਧਿਤ੍ਵਾ ਉਪ੍ਪਜ੍ਜਮਾਨੇ ਮਨਸਿਕਰੋਤੀਤਿ ਮਨਸਿਕਾਰੋ. ਕਰੋਤੀਤਿ ਠਪੇਤਿ. ਅਯਂ ਵੁਚ੍ਚਤੀਤਿ ਅਯਂ ਅਨੁਪਾਯਮਨਸਿਕਾਰੋ ਉਪ੍ਪਥਮਨਸਿਕਾਰਲਕ੍ਖਣੋ ਅਯੋਨਿਸੋਮਨਸਿਕਾਰੋ ਨਾਮ ਵੁਚ੍ਚਤਿ. ਤਸ੍ਸ ਵਸੇਨ ਪੁਗ੍ਗਲੋ ਦੁਕ੍ਖਾਦੀਨਿ ਸਚ੍ਚਾਨਿ ਯਾਥਾਵਤੋ ਆਵਜ੍ਜਿਤੁਂ ਨ ਸਕ੍ਕੋਤਿ.

ਕੁਮ੍ਮਗ੍ਗਸੇਵਨਾਨਿਦ੍ਦੇਸੇ ਯਂ ਕੁਮ੍ਮਗ੍ਗਂ ਸੇਵਤੋ ਸੇਵਨਾ ਕੁਮ੍ਮਗ੍ਗਸੇਵਨਾਤਿ ਵੁਚ੍ਚਤਿ, ਤਂ ਦਸ੍ਸੇਤੁਂ ਤਤ੍ਥ ਕਤਮੋ ਕੁਮ੍ਮਗ੍ਗੋਤਿ ਦੁਤਿਯਪੁਚ੍ਛਾ ਕਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਤਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.