੧੮. ਧਮ੍ਮਹਦਯਵਿਭਙ੍ਗੋ
੧. ਸਬ੍ਬਸਙ੍ਗਾਹਿਕਵਾਰਵਣ੍ਣਨਾ
੯੭੮. ਇਦਾਨਿ ਤਦਨਨ੍ਤਰੇ ਧਮ੍ਮਹਦਯਵਿਭਙ੍ਗੇ ਪਾਲ਼ਿਪਰਿਚ੍ਛੇਦੋ ਤਾਵ ਏਵਂ ਵੇਦਿਤਬ੍ਬੋ – ਏਤ੍ਥ ਹਿ ਆਦਿਤੋਵ ਖਨ੍ਧਾਦੀਨਂ ਦ੍ਵਾਦਸਨ੍ਨਂ ਕੋਟ੍ਠਾਸਾਨਂ ਵਸੇਨ ਸਬ੍ਬਸਙ੍ਗਾਹਿਕਵਾਰੋ ਨਾਮ ਵੁਤ੍ਤੋ. ਦੁਤਿਯੋ ਤੇਸਂਯੇਵ ਧਮ੍ਮਾਨਂ ਕਾਮਧਾਤੁਆਦੀਸੁ ਉਪ੍ਪਤ੍ਤਾਨੁਪ੍ਪਤ੍ਤਿਦਸ੍ਸਨਵਾਰੋ ਨਾਮ. ਤਤਿਯੋ ਤਤ੍ਥੇਵ ਪਰਿਯਾਪਨ੍ਨਾਪਰਿਯਾਪਨ੍ਨਦਸ੍ਸਨਵਾਰੋ ਨਾਮ. ਚਤੁਤ੍ਥੋ ਤੀਸੁ ਭੂਮੀਸੁ ਉਪ੍ਪਤ੍ਤਿਕ੍ਖਣੇ ਵਿਜ੍ਜਮਾਨਾਵਿਜ੍ਜਮਾਨਧਮ੍ਮਦਸ੍ਸਨਵਾਰੋ ਨਾਮ. ਪਞ੍ਚਮੋ ਤੇਸਂ ਧਮ੍ਮਾਨਂ ਭੂਮਨ੍ਤਰਵਸੇਨ ਦਸ੍ਸਨਵਾਰੋ ਨਾਮ. ਛਟ੍ਠੋ ਗਤੀਸੁ ਉਪ੍ਪਾਦਕਕਮ੍ਮਆਯੁਪ੍ਪਮਾਣਦਸ੍ਸਨਵਾਰੋ ਨਾਮ. ਸਤ੍ਤਮੋ ਅਭਿਞ੍ਞੇਯ੍ਯਾਦਿਵਾਰੋ ਨਾਮ. ਅਟ੍ਠਮੋ ਸਾਰਮ੍ਮਣਾਨਾਰਮ੍ਮਣਵਾਰੋ ਨਾਮ. ਨਵਮੋ ਤੇਸਂ ਖਨ੍ਧਾਦਿਧਮ੍ਮਾਨਂ ਦਿਟ੍ਠਸੁਤਾਦਿਵਸੇਨ ਸਙ੍ਗਹੇਤ੍ਵਾ ਦਸ੍ਸਨਵਾਰੋ ਨਾਮ. ਦਸਮੋ ਕੁਸਲਤ੍ਤਿਕਾਦਿਵਸੇਨ ਸਙ੍ਗਹੇਤ੍ਵਾ ਦਸ੍ਸਨਵਾਰੋ ਨਾਮ.
੯੭੯. ਏਵਂ ਦਸਹਿ ਵਾਰੇਹਿ ਪਰਿਚ੍ਛਿਨ੍ਨਾਯ ਪਾਲ਼ਿਯਾ ਪਠਮੇ ਤਾਵ ਸਬ੍ਬਸਙ੍ਗਾਹਿਕਵਾਰੇ ‘‘ਅਵੀਚਿਤੋ ਯਾਵ ਭਵਗ੍ਗਂ ਏਤ੍ਥਨ੍ਤਰੇ ਕਤਿ ਖਨ੍ਧਾ’’ਤਿ ਪੁਚ੍ਛਿਤੇ ‘‘ਏਕੋਤਿ ਵਾ…ਪੇ… ਚਤ੍ਤਾਰੋਤਿ ਵਾ ਛਾਤਿ ਵਾ ਅਵਤ੍ਵਾ ਪਞ੍ਚਾਤਿ ਵਤ੍ਤੁਂ ਸਮਤ੍ਥੋ ਅਞ੍ਞੋ ਨਤ੍ਥੀ’’ਤਿ ਅਤ੍ਤਨੋ ਞਾਣਬਲਂ ਦੀਪੇਨ੍ਤੋ ਪਞ੍ਚਕ੍ਖਨ੍ਧਾਤਿ ਪੁਚ੍ਛਾਨੁਰੂਪਂ ਵਿਸ੍ਸਜ੍ਜਨਂ ਆਹ. ਯਥਾਪੁਚ੍ਛਂ ਵਿਸ੍ਸਜ੍ਜਨਞ੍ਹਿ ਸਬ੍ਬਞ੍ਞੁਬ੍ਯਾਕਰਣਂ ਨਾਮਾਤਿ ਵੁਚ੍ਚਤਿ. ਦ੍ਵਾਦਸਾਯਤਨਾਨੀਤਿਆਦੀਸੁਪਿ ਏਸੇਵ ਨਯੋ. ਰੂਪਕ੍ਖਨ੍ਧਾਦੀਨਂ ਪਭੇਦੋ ਖਨ੍ਧਵਿਭਙ੍ਗਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
੨. ਉਪ੍ਪਤ੍ਤਾਨੁਪ੍ਪਤ੍ਤਿਵਾਰਵਣ੍ਣਨਾ
੯੯੧. ਦੁਤਿਯਵਾਰੇ ਯੇ ਧਮ੍ਮਾ ਕਾਮਭਵੇ ਕਾਮਧਾਤੁਸਮ੍ਭੂਤਾਨਞ੍ਚ ਸਤ੍ਤਾਨਂ ਉਪ੍ਪਜ੍ਜਨ੍ਤਿ – ਕਾਮਧਾਤੁਯਂ ਪਰਿਯਾਪਨ੍ਨਾ ਵਾ ਅਪਰਿਯਾਪਨ੍ਨਾ ਵਾ – ਤੇ ਸਬ੍ਬੇ ਸਙ੍ਗਹੇਤ੍ਵਾ ਕਾਮਧਾਤੁਯਾ ਪਞ੍ਚਕ੍ਖਨ੍ਧਾਤਿਆਦਿ ਵੁਤ੍ਤਂ. ਰੂਪਧਾਤੁਆਦੀਸੁਪਿ ਏਸੇਵ ਨਯੋ. ਯਸ੍ਮਾ ਪਨ ਰੂਪਧਾਤੁਪਰਿਯਾਪਨ੍ਨਾਨਂ ਸਤ੍ਤਾਨਂ ਘਾਨਾਯਤਨਾਦੀਨਂ ਅਭਾਵੇਨ ਗਨ੍ਧਾਯਤਨਾਦੀਨਿ ਆਯਤਨਾਦਿਕਿਚ੍ਚਂ ਨ ਕਰੋਨ੍ਤਿ, ਤਸ੍ਮਾ ਰੂਪਧਾਤੁਯਾ ਛ ਆਯਤਨਾਨਿ, ਨਵ ਧਾਤੁਯੋਤਿਆਦਿ ਵੁਤ੍ਤਂ. ਯਸ੍ਮਾ ਚ ਓਕਾਸਵਸੇਨ ਵਾ ਸਤ੍ਤੁਪ੍ਪਤ੍ਤਿਵਸੇਨ ਵਾ ਅਪਰਿਯਾਪਨ੍ਨਧਾਤੁ ਨਾਮ ਨਤ੍ਥਿ, ਤਸ੍ਮਾ ਅਪਰਿਯਾਪਨ੍ਨਧਾਤੁਯਾਤਿ ਅਵਤ੍ਵਾ ਯਂ ਯਂ ਅਪਰਿਯਾਪਨ੍ਨਂ ਤਂ ਤਦੇਵ ਦਸ੍ਸੇਤੁਂ ਅਪਰਿਯਾਪਨ੍ਨੇ ਕਤਿ ਖਨ੍ਧਾਤਿਆਦਿ ਵੁਤ੍ਤਂ.
੩. ਪਰਿਯਾਪਨ੍ਨਾਪਰਿਯਾਪਨ੍ਨਵਾਰਵਣ੍ਣਨਾ
੯੯੯. ਤਤਿਯਵਾਰੇ ਕਾਮਧਾਤੁਪਰਿਯਾਪਨ੍ਨਾਤਿ ਕਾਮਧਾਤੁਭਜਨਟ੍ਠੇਨ ਪਰਿਯਾਪਨ੍ਨਾ; ਤਂਨਿਸ੍ਸਿਤਾ ਤਦਨ੍ਤੋਗਧਾ ਕਾਮਧਾਤੁਤ੍ਵੇਵ ਸਙ੍ਖਂ ਗਤਾਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ. ਪਰਿਯਾਪਨ੍ਨਾਤਿ ਭਵਵਸੇਨ ਓਕਾਸਵਸੇਨ ਚ ਪਰਿਚ੍ਛਿਨ੍ਨਾ. ਅਪਰਿਯਾਪਨ੍ਨਾਤਿ ਤਥਾ ਅਪਰਿਚ੍ਛਿਨ੍ਨਾ.
੪. ਧਮ੍ਮਦਸ੍ਸਨਵਾਰਵਣ੍ਣਨਾ
੧੦੦੭. ਚਤੁਤ੍ਥਵਾਰੇ ਏਕਾਦਸਾਯਤਨਾਨੀਤਿ ਸਦ੍ਦਾਯਤਨਵਜ੍ਜਾਨਿ. ਤਞ੍ਹਿ ਏਕਨ੍ਤੇਨ ਪਟਿਸਨ੍ਧਿਯਂ ਨੁਪ੍ਪਜ੍ਜਤਿ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਸਤ੍ਤਕੇ ‘‘ਦੇਵਾਨਂ ਅਸੁਰਾਨ’’ਨ੍ਤਿ ਗਤਿਵਸੇਨ ਅਵਤ੍ਵਾ ਅਵਿਸੇਸੇਨ ਗਬ੍ਭਸੇਯ੍ਯਕਾਨਨ੍ਤਿ ਵੁਤ੍ਤਂ. ਤਸ੍ਮਾ ਯਤ੍ਥ ਯਤ੍ਥ ਗਬ੍ਭਸੇਯ੍ਯਕਾ ਸਮ੍ਭਵਨ੍ਤਿ ਤਤ੍ਥ ਤਤ੍ਥ ਤੇਸਂ ਸਤ੍ਤਾਯਤਨਾਨਿ ਵੇਦਿਤਬ੍ਬਾਨਿ. ਤਥਾ ਧਾਤੁਯੋ. ਸੇਸਮੇਤ੍ਥ ਉਤ੍ਤਾਨਤ੍ਥਮੇਵ. ਪਞ੍ਚਮਵਾਰੇ ਯਂ ਵਤ੍ਤਬ੍ਬਂ ਤਂ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਮੇਵ.
੬. ਉਪ੍ਪਾਦਕਕਮ੍ਮਆਯੁਪ੍ਪਮਾਣਵਾਰਵਣ੍ਣਨਾ
(੧.) ਉਪ੍ਪਾਦਕਕਮ੍ਮਂ
੧੦੨੧. ਛਟ੍ਠਵਾਰੇ ਪਞ੍ਚਹਿ ਕਾਮਗੁਣੇਹਿ ਨਾਨਪ੍ਪਕਾਰੇਹਿ ਵਾ ਇਦ੍ਧਿਵਿਸੇਸੇਹਿ ਦਿਬ੍ਬਨ੍ਤੀਤਿ ਦੇਵਾ. ਸਮ੍ਮੁਤਿਦੇਵਾਤਿ ‘ਦੇਵੋ, ਦੇਵੀ’ਤਿ ਏਵਂ ਲੋਕਸਮ੍ਮੁਤਿਯਾ ਦੇਵਾ. ਉਪਪਤ੍ਤਿਦੇਵਾਤਿ ਦੇਵਲੋਕੇ ਉਪ੍ਪਨ੍ਨਤ੍ਤਾ ਉਪਪਤ੍ਤਿਯਾ ਦੇਵਾ. ਵਿਸੁਦ੍ਧਿਦੇਵਾਤਿ ਸਬ੍ਬੇਸਂ ਦੇਵਾਨਂ ਪੂਜਾਰਹਾ ਸਬ੍ਬਕਿਲੇਸਵਿਸੁਦ੍ਧਿਯਾ ਦੇਵਾ. ਰਾਜਾਨੋਤਿ ਮੁਦ੍ਧਾਭਿਸਿਤ੍ਤਖਤ੍ਤਿਯਾ. ਦੇਵਿਯੋਤਿ ਤੇਸਂ ਮਹੇਸਿਯੋ. ਕੁਮਾਰਾਤਿ ਅਭਿਸਿਤ੍ਤਰਾਜੂਨਂ ਅਭਿਸਿਤ੍ਤਦੇਵਿਯਾ ਕੁਚ੍ਛਿਸ੍ਮਿਂ ਉਪ੍ਪਨ੍ਨਕੁਮਾਰਾ.
ਉਪੋਸਥਕਮ੍ਮਂ ਕਤ੍ਵਾਤਿ ਚਾਤੁਦ੍ਦਸਾਦੀਸੁ ਅਟ੍ਠਙ੍ਗਸਮਨ੍ਨਾਗਤਂ ਉਪੋਸਥਂ ਉਪਵਸਿਤ੍ਵਾ. ਇਦਾਨਿ ਯਸ੍ਮਾ ਪਰਿਤ੍ਤਦਾਨਾਦਿਪੁਞ੍ਞਕਮ੍ਮਂ ਮਨੁਸ੍ਸਸੋਭਗ੍ਯਤਾਯ ਪਚ੍ਚਯੋ, ਮਤ੍ਤਸੋ ਕਤਂ ਮਨੁਸ੍ਸਸੋਭਗ੍ਯਤਾਯ ਅਧਿਮਤ੍ਤਂ, ਅਧਿਮਤ੍ਤਭਾਵੇਪਿ ਨਾਨਪ੍ਪਕਾਰਭੇਦਤੋ ਨਾਨਪ੍ਪਕਾਰਸ੍ਸ ਖਤ੍ਤਿਯਮਹਾਸਾਲਾਦਿਭਾਵਸ੍ਸ ਪਚ੍ਚਯੋ, ਤਸ੍ਮਾ ਤਸ੍ਸ ਵਸੇਨ ਉਪਪਤ੍ਤਿਭੇਦਂ ਦਸ੍ਸੇਨ੍ਤੋ ਅਪ੍ਪੇਕਚ੍ਚੇ ਗਹਪਤਿਮਹਾਸਾਲਾਨਨ੍ਤਿਆਦਿਮਾਹ. ਤਤ੍ਥ ਮਹਾਸਾਰੋ ਏਤੇਸਨ੍ਤਿ ਮਹਾਸਾਰਾ; ਰ-ਕਾਰਸ੍ਸ ਪਨ ਲ-ਕਾਰਂ ਕਤ੍ਵਾ ਮਹਾਸਾਲਾਤਿ ਵੁਤ੍ਤਂ. ਗਹਪਤਿਯੋਵ ਮਹਾਸਾਲਾ, ਗਹਪਤੀਸੁ ਵਾ ਮਹਾਸਾਲਾਤਿ ਗਹਪਤਿਮਹਾਸਾਲਾ. ਸੇਸੇਸੁਪਿ ਏਸੇਵ ਨਯੋ. ਤਤ੍ਥ ਯਸ੍ਸ ਗੇਹੇ ਪਚ੍ਛਿਮਨ੍ਤੇਨ ਚਤ੍ਤਾਲੀਸਕੋਟਿਧਨਂ ਨਿਧਾਨਗਤਂ ਹੋਤਿ, ਕਹਾਪਣਾਨਞ੍ਚ ਪਞ੍ਚ ਅਮ੍ਬਣਾਨਿ ਦਿਵਸਵਲ਼ਞ੍ਜੋ ਨਿਕ੍ਖਮਤਿ – ਅਯਂ ਗਹਪਤਿਮਹਾਸਾਲੋ ਨਾਮ. ਯਸ੍ਸ ਪਨ ਗੇਹੇ ਪਚ੍ਛਿਮਨ੍ਤੇਨ ਅਸੀਤਿਕੋਟਿਧਨਂ ਨਿਧਾਨਗਤਂ ਹੋਤਿ, ਕਹਾਪਣਾਨਞ੍ਚ ਦਸਅਮ੍ਬਣਾਨਿ ਦਿਵਸਵਲ਼ਞ੍ਜੋ ਨਿਕ੍ਖਮਤਿ – ਅਯਂ ਬ੍ਰਾਹ੍ਮਣਮਹਾਸਾਲੋ ਨਾਮ. ਯਸ੍ਸ ਪਨ ਗੇਹੇ ਪਚ੍ਛਿਮਨ੍ਤੇਨ ਕੋਟਿਸਤਧਨਂ ਨਿਧਾਨਗਤਂ ਹੋਤਿ, ਕਹਾਪਣਾਨਞ੍ਚ ਵੀਸਤਿ ਅਮ੍ਬਣਾਨਿ ਦਿਵਸਵਲ਼ਞ੍ਜੋ ਨਿਕ੍ਖਮਤਿ – ਅਯਂ ਖਤ੍ਤਿਯਮਹਾਸਾਲੋ ਨਾਮ.
ਸਹਬ੍ਯਤਨ੍ਤਿ ਸਹਭਾਵਂ; ਸਭਾਗਾ ਹੁਤ੍ਵਾ ਨਿਬ੍ਬਤ੍ਤਨ੍ਤੀਤਿ ਅਤ੍ਥੋ. ਚਾਤੁਮਹਾਰਾਜਿਕਾਨਨ੍ਤਿਆਦੀਸੁ ਚਾਤੁਮਹਾਰਾਜਿਕਾ ਨਾਮ ਸਿਨੇਰੁਪਬ੍ਬਤਸ੍ਸ ਵੇਮਜ੍ਝੇ ਹੋਨ੍ਤਿ. ਤੇਸੁ ਪਬ੍ਬਤਟ੍ਠਕਾਪਿ ਅਤ੍ਥਿ, ਆਕਾਸਟ੍ਠਾਪਿ; ਤੇਸਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਪਤ੍ਤਾ. ਖਿਡ੍ਡਾਪਦੋਸਿਕਾ, ਮਨੋਪਦੋਸਿਕਾ, ਸੀਤਵਲਾਹਕਾ, ਉਣ੍ਹਵਲਾਹਕਾ, ਚਨ੍ਦਿਮਾ ਦੇਵਪੁਤ੍ਤੋ, ਸੂਰਿਯੋ ਦੇਵਪੁਤ੍ਤੋਤਿ ਏਤੇ ਸਬ੍ਬੇਪਿ ਚਾਤੁਮਹਾਰਾਜਿਕਦੇਵਲੋਕਟ੍ਠਕਾ ਏਵ.
ਤੇਤ੍ਤਿਂਸ ਜਨਾ ਤਤ੍ਥ ਉਪਪਨ੍ਨਾਤਿ ਤਾਵਤਿਂਸਾ. ਅਪਿਚ ਤਾਵਤਿਂਸਾਤਿ ਤੇਸਂ ਦੇਵਾਨਂ ਨਾਮਮੇਵਾਤਿ ਵੁਤ੍ਤਂ. ਤੇਪਿ ਅਤ੍ਥਿ ਪਬ੍ਬਤਟ੍ਠਕਾ, ਅਤ੍ਥਿ ਆਕਾਸਟ੍ਠਕਾ. ਤੇਸਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਪਤ੍ਤਾ. ਤਥਾ ਯਾਮਾਦੀਨਂ. ਏਕਦੇਵਲੋਕੇਪਿ ਹਿ ਦੇਵਾਨਂ ਪਰਮ੍ਪਰਾ ਚਕ੍ਕਵਾਲ਼ਪਬ੍ਬਤਂ ਅਪ੍ਪਤ੍ਤਾ ਨਾਮ ਨਤ੍ਥਿ. ਤਤ੍ਥ ਦਿਬ੍ਬਂ ਸੁਖਂ ਯਾਤਾ ਪਯਾਤਾ ਸਮ੍ਪਤ੍ਤਾਤਿ ਯਾਮਾ. ਤੁਟ੍ਠਾ ਪਹਟ੍ਠਾਤਿ ਤੁਸਿਤਾ. ਪਕਤਿਪਟਿਯਤ੍ਤਾਰਮ੍ਮਣਤੋ ਅਤਿਰੇਕੇਨ ਰਮਿਤੁਕਾਮਕਾਲੇ ਯਥਾਰੁਚਿਤੇ ਭੋਗੇ ਨਿਮ੍ਮਿਨਿਤ੍ਵਾ ਰਮਨ੍ਤੀਤਿ ਨਿਮ੍ਮਾਨਰਤੀ. ਚਿਤ੍ਤਾਚਾਰਂ ਞਤ੍ਵਾ ਪਰੇਹਿ ਨਿਮ੍ਮਿਤੇਸੁ ਭੋਗੇਸੁ ਵਸਂ ਵਤ੍ਤੇਨ੍ਤੀਤਿ ਪਰਨਿਮ੍ਮਿਤਵਸਵਤ੍ਤੀ.
(੨.) ਆਯੁਪ੍ਪਮਾਣਂ
੧੦੨੨. ਅਪ੍ਪਂ ਵਾ ਭਿਯ੍ਯੋਤਿ ਦੁਤਿਯਂ ਵਸ੍ਸਸਤਂ ਅਪ੍ਪਤ੍ਵਾ ਵੀਸਾਯ ਵਾ ਤਿਂਸਾਯ ਵਾ ਚਤ੍ਤਾਲੀਸਾਯ ਵਾ ਪਞ੍ਞਾਸਾਯ ਵਾ ਸਟ੍ਠਿਯਾ ਵਾ ਵਸ੍ਸੇਹਿ ਅਧਿਕਮ੍ਪਿ ਵਸ੍ਸਸਤਨ੍ਤਿ ਅਤ੍ਥੋ. ਸਬ੍ਬਮ੍ਪਿ ਹੇਤਂ ਦੁਤਿਯਂ ਵਸ੍ਸਸਤਂ ਅਪ੍ਪਤ੍ਤਤ੍ਤਾ ਅਪ੍ਪਨ੍ਤਿ ਵੁਤ੍ਤਂ.
੧੦੨੪. ਬ੍ਰਹ੍ਮਪਾਰਿਸਜ੍ਜਾਦੀਸੁ ਮਹਾਬ੍ਰਹ੍ਮਾਨਂ ਪਾਰਿਸਜ੍ਜਾ ਪਰਿਚਾਰਿਕਾਤਿ ਬ੍ਰਹ੍ਮਪਾਰਿਸਜ੍ਜਾ. ਤੇਸਂ ਪੁਰੋਹਿਤਭਾਵੇ ਠਿਤਾਤਿ ਬ੍ਰਹ੍ਮਪੁਰੋਹਿਤਾ. ਵਣ੍ਣਵਨ੍ਤਤਾਯ ਚੇਵ ਦੀਘਾਯੁਕਤਾਯ ਚ ਮਹਨ੍ਤੋ ਬ੍ਰਹ੍ਮਾਤਿ ਮਹਾਬ੍ਰਹ੍ਮਾ, ਤੇਸਂ ਮਹਾਬ੍ਰਹ੍ਮਾਨਂ. ਇਮੇ ਤਯੋਪਿ ਜਨਾ ਪਠਮਜ੍ਝਾਨਭੂਮਿਯਂ ਏਕਤਲੇ ਵਸਨ੍ਤਿ; ਆਯੁਅਨ੍ਤਰਂ ਪਨ ਨੇਸਂ ਨਾਨਾ.
੧੦੨੫. ਪਰਿਤ੍ਤਾ ਆਭਾ ਏਤੇਸਨ੍ਤਿ ਪਰਿਤ੍ਤਾਭਾ. ਅਪ੍ਪਮਾਣਾ ਆਭਾ ਏਤੇਸਨ੍ਤਿ ਅਪ੍ਪਮਾਣਾਭਾ. ਦਣ੍ਡਦੀਪਿਕਾਯ ਅਚ੍ਚਿ ਵਿਯ ਏਤੇਸਂ ਸਰੀਰਤੋ ਆਭਾ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਤਨ੍ਤੀ ਵਿਯ ਸਰਤਿ ਵਿਸਰਤੀਤਿ ਆਭਸ੍ਸਰਾ. ਇਮੇਪਿ ਤਯੋ ਜਨਾ ਦੁਤਿਯਜ੍ਝਾਨਭੂਮਿਯਂ ਏਕਤਲੇ ਵਸਨ੍ਤਿ; ਆਯੁਅਨ੍ਤਰਂ ਪਨ ਨੇਸਂ ਨਾਨਾ.
੧੦੨੬. ਪਰਿਤ੍ਤਾ ਸੁਭਾ ਏਤੇਸਨ੍ਤਿ ਪਰਿਤ੍ਤਸੁਭਾ. ਅਪ੍ਪਮਾਣਾ ਸੁਭਾ ਏਤੇਸਨ੍ਤਿ ਅਪ੍ਪਮਾਣਸੁਭਾ. ਸੁਭੇਨ ਓਕਿਣ੍ਣਾ ਵਿਕਿਣ੍ਣਾ, ਸੁਭੇਨ ਸਰੀਰਪ੍ਪਭਾਵਣ੍ਣੇਨ ਏਕਗ੍ਘਨਾ, ਸੁਵਣ੍ਣਮਞ੍ਜੁਸਾਯ ਠਪਿਤਸਮ੍ਪਜ੍ਜਲਿਤਕਞ੍ਚਨਪਿਣ੍ਡਸਸ੍ਸਿਰੀਕਾਤਿ ਸੁਭਕਿਣ੍ਹਾ. ਇਮੇਪਿ ਤਯੋ ਜਨਾ ਤਤਿਯਜ੍ਝਾਨਭੂਮਿਯਂ ਏਕਤਲੇ ਵਸਨ੍ਤਿ; ਆਯੁਅਨ੍ਤਰਂ ਪਨ ਨੇਸਂ ਨਾਨਾ.
੧੦੨੭. ਆਰਮ੍ਮਣਨਾਨਤ੍ਤਤਾਤਿ ਆਰਮ੍ਮਣਸ੍ਸ ਨਾਨਤ੍ਤਭਾਵੋ. ਮਨਸਿਕਾਰਨਾਨਤ੍ਤਤਾਦੀਸੁਪਿ ਏਸੇਵ ਨਯੋ. ਏਤ੍ਥ ਏਕਸ੍ਸ ਪਥਵੀਕਸਿਣਂ ਆਰਮ੍ਮਣਂ ਹੋਤਿ…ਪੇ… ਏਕਸ੍ਸ ਓਦਾਤਕਸਿਣਨ੍ਤਿ ਇਦਂ ਆਰਮ੍ਮਣਨਾਨਤ੍ਤਂ. ਏਕੋ ਪਥਵੀਕਸਿਣਂ ਮਨਸਿ ਕਰੋਤਿ…ਪੇ… ਏਕੋ ਓਦਾਤਕਸਿਣਨ੍ਤਿ ਇਦਂ ਮਨਸਿਕਾਰਨਾਨਤ੍ਤਂ. ਏਕਸ੍ਸ ਪਥਵੀਕਸਿਣੇ ਛਨ੍ਦੋ ਹੋਤਿ…ਪੇ… ਏਕਸ੍ਸ ਓਦਾਤਕਸਿਣੇਤਿ ਇਦਂ ਛਨ੍ਦਨਾਨਤ੍ਤਂ. ਏਕੋ ਪਥਵੀਕਸਿਣੇ ਪਤ੍ਥਨਂ ਕਰੋਤਿ…ਪੇ… ਏਕੋ ਓਦਾਤਕਸਿਣੇਤਿ ਇਦਂ ਪਣਿਧਿਨਾਨਤ੍ਤਂ. ਏਕੋ ਪਥਵੀਕਸਿਣਵਸੇਨ ਅਧਿਮੁਚ੍ਚਤਿ…ਪੇ… ਏਕੋ ਓਦਾਤਕਸਿਣਵਸੇਨਾਤਿ ਇਦਂ ਅਧਿਮੋਕ੍ਖਨਾਨਤ੍ਤਂ. ਏਕੋ ਪਥਵੀਕਸਿਣਵਸੇਨ ਚਿਤ੍ਤਂ ਅਭਿਨੀਹਰਤਿ…ਪੇ… ਏਕੋ ਓਦਾਤਕਸਿਣਵਸੇਨਾਤਿ ਇਦਂ ਅਭਿਨੀਹਾਰਨਾਨਤ੍ਤਂ. ਏਕਸ੍ਸ ਪਥਵੀਕਸਿਣਪਰਿਚ੍ਛਿਨ੍ਦਨਕਪਞ੍ਞਾ ਹੋਤਿ…ਪੇ… ਏਕਸ੍ਸ ਓਦਾਤਕਸਿਣਪਰਿਚ੍ਛਿਨ੍ਦਨਕਪਞ੍ਞਾਤਿ ਇਦਂ ਪਞ੍ਞਾਨਾਨਤ੍ਤਂ. ਤਤ੍ਥ ਆਰਮ੍ਮਣਮਨਸਿਕਾਰਾ ਪੁਬ੍ਬਭਾਗੇਨ ਕਥਿਤਾ. ਛਨ੍ਦਪਣਿਧਿਅਧਿਮੋਕ੍ਖਾਭਿਨੀਹਾਰਾ ਅਪ੍ਪਨਾਯਪਿ ਵਤ੍ਤਨ੍ਤਿ ਉਪਚਾਰੇਪਿ. ਪਞ੍ਞਾ ਪਨ ਲੋਕਿਯਲੋਕੁਤ੍ਤਰਮਿਸ੍ਸਕਾ ਕਥਿਤਾ.
ਅਸਞ੍ਞਸਤ੍ਤਾਨਨ੍ਤਿ ਸਞ੍ਞਾਵਿਰਹਿਤਾਨਂ ਸਤ੍ਤਾਨਂ. ਏਕਚ੍ਚੇ ਹਿ ਤਿਤ੍ਥਾਯਤਨੇ ਪਬ੍ਬਜਿਤ੍ਵਾ ‘ਚਿਤ੍ਤਂ ਨਿਸ੍ਸਾਯ ਰਜ੍ਜਨਦੁਸ੍ਸਨਮੁਯ੍ਹਨਾਨਿ ਨਾਮ ਹੋਨ੍ਤੀ’ਤਿ ਚਿਤ੍ਤੇ ਦੋਸਂ ਦਿਸ੍ਵਾ ‘ਅਚਿਤ੍ਤਕਭਾਵੋ ਨਾਮ ਸੋਭਨੋ, ਦਿਟ੍ਠਧਮ੍ਮਨਿਬ੍ਬਾਨਮੇਤ’ਨ੍ਤਿ ਸਞ੍ਞਾਵਿਰਾਗਂ ਜਨੇਤ੍ਵਾ ਤਤ੍ਰੂਪਗਂ ਪਞ੍ਚਮਂ ਸਮਾਪਤ੍ਤਿਂ ਭਾਵੇਤ੍ਵਾ ਤਤ੍ਥ ਨਿਬ੍ਬਤ੍ਤਨ੍ਤਿ. ਤੇਸਂ ਉਪਪਤ੍ਤਿਕ੍ਖਣੇ ਏਕੋ ਰੂਪਕ੍ਖਨ੍ਧੋਯੇਵ ਨਿਬ੍ਬਤ੍ਤਤਿ. ਠਤ੍ਵਾ ਨਿਬ੍ਬਤ੍ਤੋ ਠਿਤਕੋ ਏਵ ਹੋਤਿ, ਨਿਸੀਦਿਤ੍ਵਾ ਨਿਬ੍ਬਤ੍ਤੋ ਨਿਸਿਨ੍ਨਕੋਵ ਨਿਪਜ੍ਜਿਤ੍ਵਾ ਨਿਬ੍ਬਤ੍ਤੋ ਨਿਪਨ੍ਨੋਵ. ਚਿਤ੍ਤਕਮ੍ਮਰੂਪਕਸਦਿਸਾ ਹੁਤ੍ਵਾ ਪਞ੍ਚ ਕਪ੍ਪਸਤਾਨਿ ਤਿਟ੍ਠਨ੍ਤਿ. ਤੇਸਂ ਪਰਿਯੋਸਾਨੇ ਸੋ ਰੂਪਕਾਯੋ ਅਨ੍ਤਰਧਾਯਤਿ, ਕਾਮਾਵਚਰਸਞ੍ਞਾ ਉਪ੍ਪਜ੍ਜਤਿ; ਤੇਨ ਇਧ ਸਞ੍ਞੁਪ੍ਪਾਦੇਨ ਤੇ ਦੇਵਾ ਤਮ੍ਹਾ ਕਾਯਾ ਚੁਤਾਤਿ ਪਞ੍ਞਾਯਨ੍ਤਿ.
ਵਿਪੁਲਾ ਫਲਾ ਏਤੇਸਨ੍ਤਿ ਵੇਹਪ੍ਫਲਾ. ਅਤ੍ਤਨੋ ਸਮ੍ਪਤ੍ਤਿਯਾ ਨ ਹਾਯਨ੍ਤਿ ਨ ਵਿਹਾਯਨ੍ਤੀਤਿ ਅਵਿਹਾ. ਨ ਕਞ੍ਚਿ ਸਤ੍ਤਂ ਤਪ੍ਪਨ੍ਤੀਤਿ ਅਤਪ੍ਪਾ. ਸੁਨ੍ਦਰਾ ਦਸ੍ਸਨਾ ਅਭਿਰੂਪਾ ਪਾਸਾਦਿਕਾਤਿ ਸੁਦਸ੍ਸਾ. ਸੁਟ੍ਠ ਪਸ੍ਸਨ੍ਤਿ, ਸੁਨ੍ਦਰਮੇਤੇਸਂ ਵਾ ਦਸ੍ਸਨਨ੍ਤਿ ਸੁਦਸ੍ਸੀ. ਸਬ੍ਬੇਹਿ ਏਵ ਗੁਣੇਹਿ ਚ ਭਵਸਮ੍ਪਤ੍ਤਿਯਾ ਚ ਜੇਟ੍ਠਾ, ਨਤ੍ਥੇਤ੍ਥ ਕਨਿਟ੍ਠਾਤਿ ਅਕਨਿਟ੍ਠਾ.
੧੦੨੮. ਆਕਾਸਾਨਞ੍ਚਾਯਤਨਂ ਉਪਗਤਾਤਿ ਆਕਾਸਾਨਞ੍ਚਾਯਤਨੂਪਗਾ. ਇਤਰੇਸੁਪਿ ਏਸੇਵ ਨਯੋ. ਇਤਿ ਛ ਕਾਮਾਵਚਰਾ, ਨਵ ਬ੍ਰਹ੍ਮਲੋਕਾ, ਪਞ੍ਚ ਸੁਦ੍ਧਾਵਾਸਾ, ਚਤ੍ਤਾਰੋ ਅਰੂਪਾ ਅਸਞ੍ਞਸਤ੍ਤਵੇਹਪ੍ਫਲੇਹਿ ਸਦ੍ਧਿਂ ਛਬ੍ਬੀਸਤਿ ਦੇਵਲੋਕਾ; ਮਨੁਸ੍ਸਲੋਕੇਨ ਸਦ੍ਧਿਂ ਸਤ੍ਤਵੀਸਤਿ.
ਤਤ੍ਥ ਸਮ੍ਮਾਸਮ੍ਬੁਦ੍ਧੇਨ ਮਨੁਸ੍ਸਾਨਂ ਦੇਵਾਨਞ੍ਚ ਆਯੁਂ ਪਰਿਚ੍ਛਿਨ੍ਦਮਾਨੇਨ ਚਤੂਸੁ ਅਪਾਯੇਸੁ ਭੁਮ੍ਮਦੇਵੇਸੁ ਚ ਆਯੁ ਪਰਿਚ੍ਛਿਨ੍ਨਂ ਤਂ ਕਸ੍ਮਾਤਿ? ਨਿਰਯੇ ਤਾਵ ਕਮ੍ਮਮੇਵ ਪਮਾਣਂ. ਯਾਵ ਕਮ੍ਮਂ ਨ ਖੀਯਤਿ, ਨ ਤਾਵ ਚਵਨ੍ਤਿ. ਤਥਾ ਸੇਸਅਪਾਯੇਸੁ. ਭੁਮ੍ਮਦੇਵਾਨਮ੍ਪਿ ਕਮ੍ਮਮੇਵ ਪਮਾਣਂ. ਤਤ੍ਥ ਨਿਬ੍ਬਤ੍ਤਾ ਹਿ ਕੇਚਿ ਸਤ੍ਤਾਹਮਤ੍ਤਂ ਤਿਟ੍ਠਨ੍ਤਿ, ਕੇਚਿ ਅਦ੍ਧਮਾਸਂ, ਕੇਚਿ ਮਾਸਂ, ਕਪ੍ਪਂ ਤਿਟ੍ਠਮਾਨਾਪਿ ਅਤ੍ਥਿਯੇਵ.
ਤਤ੍ਥ ਮਨੁਸ੍ਸੇਸੁ ਗਿਹਿਭਾਵੇ ਠਿਤਾਯੇਵ ਸੋਤਾਪਨ੍ਨਾਪਿ ਹੋਨ੍ਤਿ, ਸਕਦਾਗਾਮਿਫਲਮ੍ਪਿ ਅਨਾਗਾਮਿਫਲਮ੍ਪਿ ਅਰਹਤ੍ਤਫਲਮ੍ਪਿ ਪਾਪੁਣਨ੍ਤਿ. ਤੇਸੁ ਸੋਤਾਪਨ੍ਨਾਦਯੋ ਯਾਵਜੀਵਂ ਤਿਟ੍ਠਨ੍ਤਿ. ਖੀਣਾਸਵਾ ਪਨ ਪਰਿਨਿਬ੍ਬਾਯਨ੍ਤਿ ਵਾ ਪਬ੍ਬਜਨ੍ਤਿ ਵਾ. ਕਸ੍ਮਾ? ਅਰਹਤ੍ਤਂ ਨਾਮ ਸੇਟ੍ਠਗੁਣੋ, ਗਿਹਿਲਿਙ੍ਗਂ ਹੀਨਂ, ਤਂ ਹੀਨਤਾਯ ਉਤ੍ਤਮਂ ਗੁਣਂ ਧਾਰੇਤੁਂ ਨ ਸਕ੍ਕੋਤਿ. ਤਸ੍ਮਾ ਤੇ ਪਰਿਨਿਬ੍ਬਾਤੁਕਾਮਾ ਵਾ ਪਬ੍ਬਜਿਤੁਕਾਮਾ ਵਾ ਹੋਨ੍ਤਿ.
ਭੁਮ੍ਮਦੇਵਾ ਪਨ ਅਰਹਤ੍ਤਂ ਪਤ੍ਵਾਪਿ ਯਾਵਜੀਵਂ ਤਿਟ੍ਠਨ੍ਤਿ. ਛਸੁ ਕਾਮਾਵਚਰਦੇਵੇਸੁ ਸੋਤਾਪਨ੍ਨਸਕਦਾਗਾਮਿਨੋ ਯਾਵਜੀਵਂ ਤਿਟ੍ਠਨ੍ਤਿ; ਅਨਾਗਾਮਿਨਾ ਰੂਪਭਵਂ ਗਨ੍ਤੁਂ ਵਟ੍ਟਤਿ, ਖੀਣਾਸਵੇਨ ਪਰਿਨਿਬ੍ਬਾਤੁਂ. ਕਸ੍ਮਾ? ਨਿਲੀਯਨੋਕਾਸਸ੍ਸ ਅਭਾਵਾ. ਰੂਪਾਵਚਰਾਰੂਪਾਵਚਰੇਸੁ ਸਬ੍ਬੇਪਿ ਯਾਵਜੀਵਂ ਤਿਟ੍ਠਨ੍ਤਿ. ਤਤ੍ਥ ਰੂਪਾਵਚਰੇ ਨਿਬ੍ਬਤ੍ਤਾ ਸੋਤਾਪਨ੍ਨਸਕਦਾਗਾਮਿਨੋ ਨ ਪੁਨ ਇਧਾਗਚ੍ਛਨ੍ਤਿ, ਤਤ੍ਥੇਵ ਪਰਿਨਿਬ੍ਬਾਯਨ੍ਤਿ. ਏਤੇ ਹਿ ਝਾਨਅਨਾਗਾਮਿਨੋ ਨਾਮ.
ਅਟ੍ਠਸਮਾਪਤ੍ਤਿਲਾਭੀਨਂ ਪਨ ਕਿਂ ਨਿਯਮੇਤਿ? ਪਗੁਣਜ੍ਝਾਨਂ. ਯਦੇਵਸ੍ਸ ਪਗੁਣਂ ਹੋਤਿ, ਤੇਨ ਉਪ੍ਪਜ੍ਜਤਿ. ਸਬ੍ਬੇਸੁ ਪਨ ਪਗੁਣੇਸੁ ਕਿਂ ਨਿਯਮੇਤਿ? ਪਤ੍ਥਨਾ. ਯਤ੍ਥ ਉਪਪਤ੍ਤਿਂ ਪਤ੍ਥੇਤਿ ਤਤ੍ਥੇਵ ਉਪਪਜ੍ਜਤਿ. ਪਤ੍ਥਨਾਯ ਅਸਤਿ ਕਿਂ ਨਿਯਮੇਤਿ? ਮਰਣਸਮਯੇ ਸਮਾਪਨ੍ਨਾ ਸਮਾਪਤ੍ਤਿ. ਮਰਣਸਮਯੇ ਸਮਾਪਨ੍ਨਾ ਨਤ੍ਥਿ, ਕਿਂ ਨਿਯਮੇਤਿ? ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿ. ਏਕਂਸੇਨ ਹਿ ਸੋ ਨੇਵਸਞ੍ਞਾਨਾਸਞ੍ਞਾਯਤਨੇ ਉਪਪਜ੍ਜਤਿ. ਨਵਸੁ ਬ੍ਰਹ੍ਮਲੋਕੇਸੁ ਨਿਬ੍ਬਤ੍ਤਅਰਿਯਸਾਵਕਾਨਂ ਤਤ੍ਰੂਪਪਤ੍ਤਿਪਿ ਹੋਤਿ ਉਪਰੂਪਪਤ੍ਤਿਪਿ ਨ ਹੇਟ੍ਠੂਪਪਤ੍ਤਿ. ਪੁਥੁਜ੍ਜਨਾਨਂ ਪਨ ਤਤ੍ਰੂਪਪਤ੍ਤਿਪਿ ਹੋਤਿ ਉਪਰੂਪਪਤ੍ਤਿਪਿ ਹੇਟ੍ਠੂਪਪਤ੍ਤਿਪਿ. ਪਞ੍ਚਸੁ ਸੁਦ੍ਧਾਵਾਸੇਸੁ ਚਤੂਸੁ ਚ ਅਰੂਪੇਸੁ ਅਰਿਯਸਾਵਕਾਨਂ ਤਤ੍ਰੂਪਪਤ੍ਤਿਪਿ ਹੋਤਿ ਉਪਰੂਪਪਤ੍ਤਿਪਿ. ਪਠਮਜ੍ਝਾਨਭੂਮਿਯਂ ਨਿਬ੍ਬਤ੍ਤੋ ਅਨਾਗਾਮੀ ਨਵ ਬ੍ਰਹ੍ਮਲੋਕੇ ਸੋਧੇਤ੍ਵਾ ਮਤ੍ਥਕੇ ਠਿਤੋ ਪਰਿਨਿਬ੍ਬਾਤਿ. ਵੇਹਪ੍ਫਲਾ, ਅਕਨਿਟ੍ਠਾ, ਨੇਵਸਞ੍ਞਾਨਾਸਞ੍ਞਾਯਤਨਨ੍ਤਿ ਇਮੇ ਤਯੋ ਦੇਵਲੋਕਾ ਸੇਟ੍ਠਭਵਾ ਨਾਮ. ਇਮੇਸੁ ਤੀਸੁ ਠਾਨੇਸੁ ਨਿਬ੍ਬਤ੍ਤਅਨਾਗਾਮਿਨੋ ਨੇਵ ਉਦ੍ਧਂ ਗਚ੍ਛਨ੍ਤਿ, ਨ ਅਧੋ, ਤਤ੍ਥ ਤਤ੍ਥੇਵ ਪਰਿਨਿਬ੍ਬਾਯਨ੍ਤੀਤਿ. ਇਦਮੇਤ੍ਥ ਪਕਿਣ੍ਣਕਂ.
੭. ਅਭਿਞ੍ਞੇਯ੍ਯਾਦਿਵਾਰਵਣ੍ਣਨਾ
੧੦੩੦. ਸਤ੍ਤਮਵਾਰੇ ਸਲਕ੍ਖਣਪਰਿਗ੍ਗਾਹਿਕਾਯ ਅਭਿਞ੍ਞਾਯ ਵਸੇਨ ਅਭਿਞ੍ਞੇਯ੍ਯਤਾ ਵੇਦਿਤਬ੍ਬਾ. ਞਾਤਤੀਰਣਪਹਾਨਪਰਿਞ੍ਞਾਨਂ ਵਸੇਨ ਪਰਿਞ੍ਞੇਯ੍ਯਤਾ. ਸਾ ਚ ਰੂਪਕ੍ਖਨ੍ਧੋ ਅਭਿਞ੍ਞੇਯ੍ਯੋ ਪਰਿਞ੍ਞੇਯ੍ਯੋ ਨ ਪਹਾਤਬ੍ਬੋਤਿਆਦੀਸੁ ਞਾਤਤੀਰਣਪਰਿਞ੍ਞਾਵਸੇਨੇਵ ਵੇਦਿਤਬ੍ਬਾ. ਸਮੁਦਯਸਚ੍ਚਂ ਅਭਿਞ੍ਞੇਯ੍ਯਂ ਪਰਿਞ੍ਞੇਯ੍ਯਂ ਪਹਾਤਬ੍ਬਨ੍ਤਿਆਦੀਸੁ ਪਹਾਨਪਰਿਞ੍ਞਾਵਸੇਨ.
ਅਟ੍ਠਮਵਾਰੇ ਰੂਪਾਦਿਆਰਮ੍ਮਣਾਨਂ ਚਕ੍ਖੁਵਿਞ੍ਞਾਣਾਦੀਨਂ ਵਸੇਨ ਸਾਰਮ੍ਮਣਾਨਾਰਮ੍ਮਣਤਾ ਵੇਦਿਤਬ੍ਬਾ. ਨਵਮਵਾਰੋ ਉਤ੍ਤਾਨਤ੍ਥੋਯੇਵ. ਦਸਮਵਾਰੇਪਿ ਯਂ ਵਤ੍ਤਬ੍ਬਂ ਸਿਯਾ ਤਂ ਸਬ੍ਬਂ ਤਤ੍ਥ ਤਤ੍ਥ ਪਞ੍ਹਾਪੁਚ੍ਛਕਵਾਰੇ ਵੁਤ੍ਤਮੇਵਾਤਿ.
ਸਮ੍ਮੋਹਵਿਨੋਦਨਿਯਾ ਵਿਭਙ੍ਗਟ੍ਠਕਥਾਯ
ਧਮ੍ਮਹਦਯਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾ
ਏਤ੍ਤਾਵਤਾ ਚ –
ਅਭਿਧਮ੍ਮਂ ਦੇਸੇਨ੍ਤੋ, ਧਮ੍ਮਗਰੁ ਧਮ੍ਮਗਾਰਵਯੁਤ੍ਤਾਨਂ;
ਦੇਵਾਨਂ ਦੇਵਪੁਰੇ, ਦੇਵਗਣਸਹਸ੍ਸਪਰਿਵਾਰੋ.
ਦੁਤਿਯਂ ਅਦੁਤਿਯਪੁਰਿਸੋ, ਯਂ ਆਹ ਵਿਭਙ੍ਗਪਕਰਣਂ ਨਾਥੋ;
ਅਟ੍ਠਾਰਸਹਿ ਵਿਭਙ੍ਗੇਹਿ, ਮਣ੍ਡਿਤਮਣ੍ਡਪੇਯ੍ਯਗੁਣੋ.
ਅਤ੍ਥਪ੍ਪਕਾਸਨਤ੍ਥਂ, ਤਸ੍ਸਾਹਂ ਯਾਚਿਤੋ ਠਿਤਗੁਣੇਨ;
ਯਤਿਨਾ ਅਦਨ੍ਧਗਤਿਨਾ, ਸੁਬੁਦ੍ਧਿਨਾ ਬੁਦ੍ਧਘੋਸੇਨ.
ਯਂ ਆਰਭਿਂ ਰਚਯਿਤੁਂ, ਅਟ੍ਠਕਥਂ ਸੁਨਿਪੁਣੇਸੁ ਅਤ੍ਥੇਸੁ;
ਸਮ੍ਮੋਹਵਿਨੋਦਨਤੋ, ਸਮ੍ਮੋਹਵਿਨੋਦਨਿਂ ਨਾਮ.
ਪੋਰਾਣਟ੍ਠਕਥਾਨਂ, ਸਾਰਂ ਆਦਾਯ ਸਾ ਅਯਂ ਨਿਟ੍ਠਂ;
ਪਤ੍ਤਾ ਅਨਨ੍ਤਰਾਯੇਨ, ਪਾਲ਼ਿਯਾ ਭਾਣਵਾਰੇਹਿ.
ਚਤ੍ਤਾਲੀਸਾਯ ਯਥਾ, ਏਕੇਨ ਚ ਏਵਮੇਵ ਸਬ੍ਬੇਪਿ;
ਨਿਟ੍ਠਂ ਵਜਨ੍ਤੁ ਵਿਮਲਾ, ਮਨੋਰਥਾ ਸਬ੍ਬਸਤ੍ਤਾਨਂ.
ਸਦ੍ਧਮ੍ਮਸ੍ਸ ਠਿਤਤ੍ਥਂ, ਯਞ੍ਚ ਇਮਂ ਰਚਯਤਾ ਮਯਾ ਪੁਞ੍ਞਂ;
ਪਤ੍ਤਂ ਤੇਨ ਸਮਤ੍ਤਂ, ਪਾਪੁਣਤੁ ਸਦੇਵਕੋ ਲੋਕੋ.
ਸੁਚਿਰਂ ਤਿਟ੍ਠਤੁ ਧਮ੍ਮੋ, ਧਮ੍ਮਾਭਿਰਤੋ ਸਦਾ ਭਵਤੁ ਲੋਕੋ;
ਨਿਚ੍ਚਂ ਖੇਮਸੁਭਿਕ੍ਖਾਦਿ-ਸਮ੍ਪਦਾ ਜਨਪਦਾ ਹੋਨ੍ਤੂਤਿ.
ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਣਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁਸਾਸਨੇ ਅਪ੍ਪਟਿਹਤਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦੀਵਰੇਨ ਮਹਾਕਵਿਨਾ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਪਟਿਸਮ੍ਭਿਦਾਦਿਪ੍ਪਭੇਦਗੁਣਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਵਂਸਪ੍ਪਦੀਪਾਨਂ ਥੇਰਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾ ਅਯਂ ਸਮ੍ਮੋਹਵਿਨੋਦਨੀ ਨਾਮ ਵਿਭਙ੍ਗਟ੍ਠਕਥਾ.
ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;
ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਪਞ੍ਞਾਵਿਸੁਦ੍ਧਿਯਾ.
ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;
ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.
ਸਮ੍ਮੋਹਵਿਨੋਦਨੀ ਨਾਮ ਵਿਭਙ੍ਗ-ਅਟ੍ਠਕਥਾ ਨਿਟ੍ਠਿਤਾ.