(੮.) ਅਟ੍ਠਕਨਿਦ੍ਦੇਸਵਣ੍ਣਨਾ
੯੫੨. ਅਟ੍ਠਕਨਿਦ੍ਦੇਸੇ ਕਿਲੇਸਾਯੇਵ ਕਿਲੇਸਵਤ੍ਥੂਨਿ. ਕੁਸੀਤਵਤ੍ਥੂਨੀਤਿ ਕੁਸੀਤਸ੍ਸ ਅਲਸਸ੍ਸ ਵਤ੍ਥੂਨਿ, ਪਤਿਟ੍ਠਾ, ਕੋਸਜ੍ਜਕਾਰਣਾਨੀਤਿ ਅਤ੍ਥੋ. ਕਮ੍ਮਂ ਕਾਤਬ੍ਬਂ ਹੋਤੀਤਿ ਚੀਵਰਵਿਚਾਰਣਾਦਿਕਮ੍ਮਂ ਕਾਤਬ੍ਬਂ ਹੋਤਿ. ਨ ਵੀਰਿਯਂ ਆਰਭਤੀਤਿ ਦੁਵਿਧਮ੍ਪਿ ਵੀਰਿਯਂ ਨਾਰਭਤਿ. ਅਪ੍ਪਤ੍ਤਸ੍ਸਾਤਿ ਝਾਨਵਿਪਸ੍ਸਨਾਮਗ੍ਗਫਲਧਮ੍ਮਸ੍ਸ ਅਪ੍ਪਤ੍ਤਸ੍ਸ ਪਤ੍ਤਿਯਾ. ਅਨਧਿਗਤਸ੍ਸਾਤਿ ਤਸ੍ਸੇਵ ਅਨਧਿਗਤਸ੍ਸ ਅਧਿਗਮਤ੍ਥਾਯ. ਅਸਚ੍ਛਿਕਤਸ੍ਸਾਤਿ ਤਸ੍ਸੇਵ ਅਸਚ੍ਛਿਕਤਸ੍ਸ ਸਚ੍ਛਿਕਰਣਤ੍ਥਾਯ. ਇਦਂ ਪਠਮਨ੍ਤਿ ‘ਇਦਂ ਹਨ੍ਦਾਹਂ ਨਿਪਜ੍ਜਾਮੀ’ਤਿ ਏਵਂ ਓਸੀਦਨਂ ਪਠਮਂ ਕੁਸੀਤਵਤ੍ਥੁ. ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
ਮਾਸਾਚਿਤਂ ਮਞ੍ਞੇਤਿ ਏਤ੍ਥ ਪਨ ਮਾਸਾਚਿਤਂ ਨਾਮ ਤਿਨ੍ਤਮਾਸੋ; ਯਥਾ ਤਿਨ੍ਤਮਾਸੋ ਗਰੁਕੋ ਹੋਤਿ, ਏਵਂ ਗਰੁਕੋਤਿ ਅਧਿਪ੍ਪਾਯੋ. ਗਿਲਾਨਾ ਵੁਟ੍ਠਿਤੋ ਹੋਤੀਤਿ ਗਿਲਾਨੋ ਹੁਤ੍ਵਾ ਪਚ੍ਛਾ ਵੁਟ੍ਠਿਤੋ ਹੋਤਿ.
੯੫੪. ਅਟ੍ਠਸੁ ਲੋਕਧਮ੍ਮੇਸੂਤਿ ਏਤ੍ਥ ਲੋਕਸ੍ਸ ਧਮ੍ਮਾਤਿ ਲੋਕਧਮ੍ਮਾ. ਏਤੇਹਿ ਵਿਮੁਤ੍ਤੋ ਨਾਮ ਨਤ੍ਥਿ, ਬੁਦ੍ਧਾਨਮ੍ਪਿ ਹੋਨ੍ਤਿ ਏਵ. ਤਸ੍ਮਾ ‘ਲੋਕਧਮ੍ਮਾ’ਤਿ ਵੁਚ੍ਚਨ੍ਤਿ. ਪਟਿਘਾਤੋਤਿ ਪਟਿਹਞ੍ਞਨਾਕਾਰੋ. ਲਾਭੇ ਸਾਰਾਗੋਤਿ ‘ਅਹਂ ਲਾਭਂ ਲਭਾਮੀ’ਤਿ ਏਵਂ ਗੇਹਸਿਤਸੋਮਨਸ੍ਸਵਸੇਨ ਉਪ੍ਪਨ੍ਨੋ ਸਾਰਾਗੋ; ਸੋ ਚਿਤ੍ਤਂ ਪਟਿਹਨਤਿ. ਅਲਾਭੇ ਪਟਿਵਿਰੋਧੋਤਿ ‘ਅਹਂ ਲਾਭਂ ਨ ਲਭਾਮੀ’ਤਿ ਦੋਮਨਸ੍ਸਵਸੇਨ ਉਪ੍ਪਨ੍ਨਵਿਰੋਧੋ; ਸੋਪਿ ਚਿਤ੍ਤਂ ਪਟਿਹਨਤਿ. ਤਸ੍ਮਾ ‘ਪਟਿਘਾਤੋ’ਤਿ ਵੁਤ੍ਤੋ. ਯਸਾਦੀਸੁਪਿ ‘ਅਹਂ ਮਹਾਪਰਿਵਾਰੋ, ਅਹਂ ਅਪ੍ਪਪਰਿਵਾਰੋ, ਅਹਂ ਪਸਂਸਪ੍ਪਤ੍ਤੋ, ਅਹਂ ਗਰਹਪ੍ਪਤ੍ਤੋ, ਅਹਂ ਸੁਖਪ੍ਪਤ੍ਤੋ, ਅਹਂ ਦੁਕ੍ਖਪ੍ਪਤੋ’ਤਿ ਏਵਮੇਤੇਸਂ ਉਪ੍ਪਤ੍ਤਿ ਵੇਦਿਤਬ੍ਬਾ. ਅਨਰਿਯਵੋਹਾਰਾਤਿ ਅਨਰਿਯਾਨਂ ਵੋਹਾਰਾ.
੯੫੭. ਪੁਰਿਸਦੋਸਾਤਿ ਪੁਰਿਸਾਨਂ ਦੋਸਾ. ਨ ਸਰਾਮੀਤਿ ‘ਮਯਾ ਏਤਸ੍ਸ ਕਮ੍ਮਸ੍ਸ ਕਤਟ੍ਠਾਨਂ ਨ ਸਰਾਮਿ ਨ ਸਲ੍ਲਕ੍ਖੇਮੀ’ਤਿ ਏਵਂ ਅਸ੍ਸਤਿਭਾਵੇਨ ਨਿਬ੍ਬੇਠੇਤਿ ਮੋਚੇਤਿ. ਚੋਦਕਂਯੇਵ ਪਟਿਪ੍ਫਰਤੀਤਿ ਪਟਿਵਿਰੁਦ੍ਧੋ ਹੁਤ੍ਵਾ ਫਰਤਿ, ਪਟਿਭਾਣਿਤਭਾਵੇਨ ਤਿਟ੍ਠਤਿ. ਕਿਂ ਨੁ ਖੋ ਤੁਯ੍ਹਨ੍ਤਿ ‘ਤੁਯ੍ਹਂ ਬਾਲਸ੍ਸ ਅਬ੍ਯਤ੍ਤਸ੍ਸ ਭਣਿਤੇਨ ਨਾਮ ਕਿਂ’ ਯੋ ਤ੍ਵਂ ਨੇਵ ਵਤ੍ਥੁਨਾ ਆਪਤ੍ਤਿਂ, ਨ ਚੋਦਨਂ ਜਾਨਾਸੀ’ਤਿ ਦੀਪੇਤਿ; ‘ਤ੍ਵਂ ਪਿ ਨਾਮ ਏਵਂ ਕਿਞ੍ਚਿ ਅਜਾਨਨ੍ਤੋ ਭਣਿਤਬ੍ਬਂ ਮਞ੍ਞਿਸ੍ਸਸੀ’ਤਿ ਅਜ੍ਝੋਤ੍ਥਰਤਿ. ਪਚ੍ਚਾਰੋਪੇਤੀਤਿ ‘ਤ੍ਵਂ ਪਿ ਖੋਸੀ’ਤਿਆਦੀਨਿ ਵਦਨ੍ਤੋ ਪਟਿਆਰੋਪੇਤਿ. ਪਟਿਕਰੋਹੀਤਿ ਦੇਸਨਾਗਾਮਿਨਿਂ ਦੇਸੇਹਿ, ਵੁਟ੍ਠਾਨਗਾਮਿਨਿਤੋ ਵੁਟ੍ਠਾਹਿ ਤਤੋ ਸੁਦ੍ਧਨ੍ਤੇ ਪਤਿਟ੍ਠਿਤੋ ਅਞ੍ਞਂ ਚੋਦੇਸ੍ਸਸੀ’ਤਿ ਦੀਪੇਤਿ.
ਅਞ੍ਞੇਨਾਞ੍ਞਂ ਪਟਿਚਰਤੀਤਿ ਅਞ੍ਞੇਨ ਕਾਰਣੇਨ ਵਚਨੇਨ ਵਾ ਅਞ੍ਞਂ ਕਾਰਣਂ ਵਚਨਂ ਵਾ ਪਟਿਚ੍ਛਾਦੇਤਿ. ‘ਆਪਤ੍ਤਿਂ ਆਪਨ੍ਨੋਸੀ’ਤਿ ਵੁਤ੍ਤੋ ‘ਕੋ ਆਪਨ੍ਨੋ? ਕਿਂ ਆਪਨ੍ਨੋ? ਕਥਂ ਆਪਨ੍ਨੋ? ਕਿਸ੍ਮਿਂ ਆਪਨ੍ਨੋ? ਕਂ ਭਣਥ? ਕਿਂ ਭਣਥਾ’ਤਿ ਵਦਤਿ. ‘ਏਵਰੂਪਂ ਕਿਞ੍ਚਿ ਤਯਾ ਦਿਟ੍ਠ’ਨ੍ਤਿ ਵੁਤ੍ਤੇ ‘ਨ ਸੁਣਾਮੀ’ਤਿ ਸੋਤਂ ਵਾ ਉਪਨੇਤਿ. ਬਹਿਦ੍ਧਾ ਕਥਂ ਅਪਨਾਮੇਤੀਤਿ ‘ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋਸੀ’ਤਿ ਪੁਟ੍ਠੋ ‘ਪਾਟਲਿਪੁਤ੍ਤਂ ਗਤੋਮ੍ਹੀ’ਤਿ ਵਤ੍ਵਾ ਪੁਨ ‘ਤਵ ਪਾਟਲਿਪੁਤ੍ਤਗਮਨਂ ਨ ਪੁਚ੍ਛਾਮਾ’ਤਿ ਵੁਤ੍ਤੇ ‘ਤਤੋ ਰਾਜਗਹਂ ਗਤੋਮ੍ਹੀ’ਤਿ ‘ਰਾਜਗਹਂ ਵਾ ਯਾਹਿ, ਬ੍ਰਾਹ੍ਮਣਗੇਹਂ ਵਾ; ਆਪਤ੍ਤਿਂ ਆਪਨ੍ਨੋਸੀ’ਤਿ? ‘ਤਤ੍ਥ ਮੇ ਸੂਕਰਮਂਸਂ ਲਦ੍ਧ’ਨ੍ਤਿਆਦੀਨਿ ਵਦਨ੍ਤੋ ਕਥਂ ਬਹਿਦ੍ਧਾ ਵਿਕ੍ਖਿਪਤਿ. ਕੋਪਨ੍ਤਿ ਕੁਪਿਤਭਾਵਂ. ਦੋਸਨ੍ਤਿ ਦੁਟ੍ਠਭਾਵਂ. ਉਭਯਮ੍ਪੇਤਂ ਕੋਧਸ੍ਸੇਵ ਨਾਮਂ. ਅਪ੍ਪਚ੍ਚਯਨ੍ਤਿ ਅਸਨ੍ਤੁਟ੍ਠਾਕਾਰਂ; ਦੋਮਨਸ੍ਸਸ੍ਸੇਤਂ ਨਾਮਂ. ਪਾਤੁਕਰੋਤੀਤਿ ਦਸ੍ਸੇਤਿ ਪਕਾਸੇਤਿ. ਬਾਹਾਵਿਕ੍ਖੇਪਕਂ ਭਣਤੀਤਿ ਬਾਹਾ ਵਿਕ੍ਖਿਪਿਤ੍ਵਾ ਅਲਜ੍ਜਿਵਚਨਂ ਵਦਤਿ. ਵਿਹੇਸੇਤੀਤਿ ਵਿਹੇਠੇਤਿ ਬਾਧਤਿ. ਅਨਾਦਿਯਿਤ੍ਵਾਤਿ ਚਿਤ੍ਤੀਕਾਰੇਨ ਅਗ੍ਗਹੇਤ੍ਵਾ ਅਵਜਾਨਿਤ੍ਵਾ; ਅਨਾਦਰੋ ਹੁਤ੍ਵਾਤਿ ਅਤ੍ਥੋ.
ਅਤਿਬਾਲ਼੍ਹਨ੍ਤਿ ਅਤਿਦਲ਼੍ਹਂ ਅਤਿਪ੍ਪਮਾਣਂ. ਮਯਿ ਬ੍ਯਾਵਟਾਤਿ ਮਯਿ ਬ੍ਯਾਪਾਰਂ ਆਪਨ੍ਨਾ. ਹੀਨਾਯਾਵਤ੍ਤਿਤ੍ਵਾਤਿ ਹੀਨਸ੍ਸ ਗਿਹਿਭਾਵਸ੍ਸ ਅਤ੍ਥਾਯ ਆਵਤ੍ਤਿਤ੍ਵਾ; ਗਿਹੀ ਹੁਤ੍ਵਾਤਿ ਅਤ੍ਥੋ. ਅਤ੍ਤਮਨਾ ਹੋਥਾਤਿ ਤੁਟ੍ਠਚਿਤ੍ਤਾ ਹੋਥ, ‘ਮਯਾ ਲਭਿਤਬ੍ਬਂ ਲਭਥ, ਮਯਾ ਵਸਿਤਬ੍ਬਟ੍ਠਾਨੇ ਵਸਥ, ਫਾਸੁਵਿਹਾਰੋ ਵੋ ਮਯਾ ਕਤੋ’ਤਿ ਅਧਿਪ੍ਪਾਯੇਨ ਵਦਤਿ.
੯੫੮. ਅਸਞ੍ਞੀਤਿ ਪਵਤ੍ਤੋ ਵਾਦੋ ਅਸਞ੍ਞੀਵਾਦੋ; ਸੋ ਤੇਸਂ ਅਤ੍ਥੀਤਿ ਅਸਞ੍ਞੀਵਾਦਾ. ਰੂਪੀ ਅਤ੍ਤਾਤਿਆਦੀਸੁ ਲਾਭਿਨੋ ਕਸਿਣਰੂਪਂ ਅਤ੍ਤਾਤਿ ਗਹੇਤ੍ਵਾ ਰੂਪੀਤਿ ਦਿਟ੍ਠਿ ਉਪ੍ਪਜ੍ਜਤਿ; ਅਲਾਭਿਨੋ ਤਕ੍ਕਮਤ੍ਤੇਨੇਵ, ਆਜੀਵਕਾਨਂ ਵਿਯ. ਲਾਭਿਨੋਯੇਵ ਚ ਪਨ ਅਰੂਪਸਮਾਪਤ੍ਤਿਨਿਮਿਤ੍ਤਂ ਅਤ੍ਤਾਤਿ ਗਹੇਤ੍ਵਾ ਅਰੂਪੀਤਿ ਦਿਟ੍ਠਿ ਉਪ੍ਪਜ੍ਜਤਿ; ਅਲਾਭਿਨੋ ਤਕ੍ਕਮਤ੍ਤੇਨੇਵ, ਨਿਗਣ੍ਠਾਨਂ ਵਿਯ. ਅਸਞ੍ਞੀਭਾਵੇ ਪਨੇਤ੍ਥ ਏਕਨ੍ਤੇਨੇਵ ਕਾਰਣਂ ਨ ਪਰਿਯੇਸਿਤਬ੍ਬਂ. ਦਿਟ੍ਠਿਗਤਿਕੋ ਹਿ ਉਮ੍ਮਤ੍ਤਕੋ ਵਿਯ ਯਂ ਵਾ ਤਂ ਵਾ ਗਣ੍ਹਾਤਿ. ਰੂਪੀ ਚ ਅਰੂਪੀ ਚਾਤਿ ਰੂਪਾਰੂਪਮਿਸ੍ਸਕਗਾਹਵਸੇਨ ਵੁਤ੍ਤਂ. ਅਯਂ ਦਿਟ੍ਠਿ ਰੂਪਾਵਚਰਾਰੂਪਾਵਚਰਸਮਾਪਤ੍ਤਿਲਾਭਿਨੋਪਿ ਤਕ੍ਕਿਕਸ੍ਸਾਪਿ ਉਪ੍ਪਜ੍ਜਤਿ. ਨੇਵ ਰੂਪੀ ਨਾਰੂਪੀਤਿ ਪਨ ਏਕਨ੍ਤਤੋ ਤਕ੍ਕਿਕਦਿਟ੍ਠਿਯੇਵ. ਅਨ੍ਤਵਾਤਿ ਪਰਿਤ੍ਤਕਸਿਣਂ ਅਤ੍ਤਤੋ ਗਣ੍ਹਨ੍ਤਸ੍ਸ ਦਿਟ੍ਠਿ. ਅਨਨ੍ਤਵਾਤਿ ਅਪ੍ਪਮਾਣਕਸਿਣਂ. ਅਨ੍ਤਵਾ ਚ ਅਨਨ੍ਤਵਾ ਚਾਤਿ ਉਦ੍ਧਮਧੋ ਸਪਰਿਯਨ੍ਤਂ ਤਿਰਿਯਂ ਅਪਰਿਯਨ੍ਤਂ ਕਸਿਣਂ ਅਤ੍ਤਾਤਿ ਗਹੇਤ੍ਵਾ ਉਪ੍ਪਨ੍ਨਦਿਟ੍ਠਿ. ਨੇਵਨ੍ਤਵਾ ਨਾਨਨ੍ਤਵਾਤਿ ਤਕ੍ਕਿਕਦਿਟ੍ਠਿਯੇਵ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਅਟ੍ਠਕਨਿਦ੍ਦੇਸਵਣ੍ਣਨਾ.