(੬.) ਛਕ੍ਕਨਿਦ੍ਦੇਸਵਣ੍ਣਨਾ

੯੪੪. ਛਕ੍ਕਨਿਦ੍ਦੇਸੇ ਯਸ੍ਮਾ ਕੁਦ੍ਧੋ ਵਾ ਕੋਧਵਸੇਨ, ਸਨ੍ਦਿਟ੍ਠਿਪਰਾਮਾਸੀ ਵਾ ਸਨ੍ਦਿਟ੍ਠਿਪਰਾਮਾਸਿਤਾਯ ਕਲਹਂ ਵਿਗ੍ਗਹਂ ਵਿਵਾਦਂ ਆਪਜ੍ਜਤਿ, ਤਸ੍ਮਾ ਕੋਧਾਦਯੋ ‘ਵਿਵਾਦਮੂਲਾਨੀ’ਤਿ ਵੁਤ੍ਤਾ.

ਛਨ੍ਦਰਾਗਨਿਦ੍ਦੇਸੇ ਕਾਮਗੇਹਸਿਤਤ੍ਤਾ ਛਨ੍ਦਰਾਗਾ ਗੇਹਸ੍ਸਿਤਾ ਧਮ੍ਮਾਤਿ ਸਙ੍ਗਹਤੋ ਵਤ੍ਵਾ ਪੁਨ ਪਭੇਦਤੋ ਦਸ੍ਸੇਤੁਂ ਮਨਾਪਿਯੇਸੁ ਰੂਪੇਸੂਤਿਆਦਿ ਵੁਤ੍ਤਂ. ਤਤ੍ਥ ਮਨਾਪਿਯੇਸੂਤਿ ਮਨਵਡ੍ਢਨਕੇਸੁ ਇਟ੍ਠੇਸੁ. ਵਿਰੋਧਾ ਏਵ ਵਿਰੋਧਵਤ੍ਥੂਨਿ. ਅਮਨਾਪਿਯੇਸੂਤਿ ਅਨਿਟ੍ਠੇਸੁ.

੯੪੫. ਅਗਾਰਵੇਸੁ ਅਗਾਰਵੋਤਿ ਗਾਰਵਵਿਰਹਿਤੋ. ਅਪ੍ਪਤਿਸ੍ਸੋਤਿ ਅਪ੍ਪਤਿਸ੍ਸਯੋ ਅਨੀਚਵੁਤ੍ਤਿ. ਏਤ੍ਥ ਪਨ ਯੋ ਭਿਕ੍ਖੁ ਸਤ੍ਥਰਿ ਧਰਮਾਨੇ ਤੀਸੁ ਕਾਲੇਸੁ ਉਪਟ੍ਠਾਨਂ ਨ ਯਾਤਿ, ਸਤ੍ਥਰਿ ਅਨੁਪਾਹਨੇ ਚਙ੍ਕਮਨ੍ਤੇ ਸਉਪਾਹਨੋ ਚਙ੍ਕਮਤਿ, ਨੀਚੇ ਚਙ੍ਕਮੇ ਚਙ੍ਕਮਨ੍ਤੇ ਉਚ੍ਚੇ ਚਙ੍ਕਮੇ ਚਙ੍ਕਮਤਿ, ਹੇਟ੍ਠਾ ਵਸਨ੍ਤੇ ਉਪਰਿ ਵਸਤਿ, ਸਤ੍ਥੁਦਸ੍ਸਨਟ੍ਠਾਨੇ ਉਭੋ ਅਂਸੇ ਪਾਰੁਪਤਿ, ਛਤ੍ਤਂ ਧਾਰੇਤਿ, ਉਪਾਹਨਂ ਧਾਰੇਤਿ, ਨ੍ਹਾਯਤਿ, ਉਚ੍ਚਾਰਂ ਵਾ ਪਸ੍ਸਾਵਂ ਵਾ ਕਰੋਤਿ, ਪਰਿਨਿਬ੍ਬੁਤੇ ਵਾ ਪਨ ਚੇਤਿਯਂ ਵਨ੍ਦਿਤੁਂ ਨ ਗਚ੍ਛਤਿ, ਚੇਤਿਯਸ੍ਸ ਪਞ੍ਞਾਯਨਟ੍ਠਾਨੇ ਸਤ੍ਥੁਦਸ੍ਸਨਟ੍ਠਾਨੇ ਵੁਤ੍ਤਂ ਸਬ੍ਬਂ ਕਰੋਤਿ – ਅਯਂ ਸਤ੍ਥਰਿ ਅਗਾਰਵੋ ਨਾਮ. ਯੋ ਪਨ ਧਮ੍ਮਸਵਨੇ ਸਙ੍ਘੁਟ੍ਠੇ ਸਕ੍ਕਚ੍ਚਂ ਨ ਗਚ੍ਛਤਿ, ਸਕ੍ਕਚ੍ਚਂ ਧਮ੍ਮਂ ਨ ਸੁਣਾਤਿ, ਸਮੁਲ੍ਲਪਨ੍ਤੋ ਨਿਸੀਦਤਿ, ਨ ਸਕ੍ਕਚ੍ਚਂ ਗਣ੍ਹਾਤਿ, ਨ ਸਕ੍ਕਚ੍ਚਂ ਵਾਚੇਤਿ – ‘ਅਯਂ ਧਮ੍ਮੇ ਅਗਾਰਵੋ ਨਾਮ. ਯੋ ਪਨ ਥੇਰੇਨ ਭਿਕ੍ਖੁਨਾ ਅਨਜ੍ਝਿਟ੍ਠੋ ਧਮ੍ਮਂ ਦੇਸੇਤਿ, ਪਞ੍ਹਂ ਕਥੇਤਿ, ਵੁਡ੍ਢੇ ਭਿਕ੍ਖੂ ਘਟ੍ਟੇਨ੍ਤੋ ਗਚ੍ਛਤਿ, ਤਿਟ੍ਠਤਿ, ਨਿਸੀਦਤਿ, ਦੁਸ੍ਸਪਲ੍ਲਤ੍ਥਿਕਂ ਵਾ ਹਤ੍ਥਪਲ੍ਲਤ੍ਥਿਕਂ ਵਾ ਕਰੋਤਿ, ਸਙ੍ਘਮਜ੍ਝੇ ਉਭੋ ਅਂਸੇ ਪਾਰੁਪਤਿ, ਛਤ੍ਤੁਪਾਹਨਂ ਧਾਰੇਤਿ – ਅਯਂ ਸਙ੍ਘੇ ਅਗਾਰਵੋ ਨਾਮ. ਏਕਭਿਕ੍ਖੁਸ੍ਮਿਮ੍ਪਿ ਹਿ ਅਗਾਰਵੇ ਕਤੇ ਸਙ੍ਘੇ ਅਗਾਰਵੋ ਕਤੋਵ ਹੋਤਿ. ਤਿਸ੍ਸੋ ਸਿਕ੍ਖਾ ਪਨ ਅਪੂਰਯਮਾਨੋਵ ਸਿਕ੍ਖਾਯ ਅਗਾਰਵੋ ਨਾਮ. ਅਪ੍ਪਮਾਦਲਕ੍ਖਣਂ ਅਨਨੁਬ੍ਰੂਹਯਮਾਨੋ ਅਪ੍ਪਮਾਦੇ ਅਗਾਰਵੋ ਨਾਮ. ਦੁਵਿਧਂ ਪਟਿਸਨ੍ਥਾਰਂ ਅਕਰੋਨ੍ਤੋ ਪਟਿਸਨ੍ਥਾਰੇ ਅਗਾਰਵੋ ਨਾਮ.

ਪਰਿਹਾਨਿਯਾ ਧਮ੍ਮਾਤਿ ਪਰਿਹਾਨਕਰਾ ਧਮ੍ਮਾ. ਕਮ੍ਮਾਰਾਮਤਾਤਿ ਨਵਕਮ੍ਮੇ ਵਾ ਚੀਵਰਵਿਚਾਰਣਾਦੀਸੁ ਵਾ ਕਮ੍ਮੇਸੁ ਅਭਿਰਤਿ ਯੁਤ੍ਤਪਯੁਤ੍ਤਤਾ. ਭਸ੍ਸਾਰਾਮਤਾਤਿ ਤਿਰਚ੍ਛਾਨਕਥਾਵਸੇਨ ਭਸ੍ਸੇ ਯੁਤ੍ਤਪਯੁਤ੍ਤਤਾ. ਨਿਦ੍ਦਾਰਾਮਤਾਤਿ ਨਿਦ੍ਦਾਯ ਯੁਤ੍ਤਪਯੁਤ੍ਤਤਾ. ਸਙ੍ਗਣਿਕਾਰਾਮਤਾਤਿ ਸਙ੍ਗਣਿਕਾਯ ਯੁਤ੍ਤਪਯੁਤ੍ਤਤਾ. ਸਂਸਗ੍ਗਾਰਾਮਤਾਤਿ ਸਵਨਸਂਸਗ੍ਗੇ, ਦਸ੍ਸਨਸਂਸਗ੍ਗੇ, ਸਮੁਲ੍ਲਾਪਸਂਸਗ੍ਗੇ, ਪਰਿਭੋਗਸਂਸਗ੍ਗੇ, ਕਾਯਸਂਸਗ੍ਗੇਤਿ ਪਞ੍ਚਵਿਧੇ ਸਂਸਗ੍ਗੇ ਯੁਤ੍ਤਪਯੁਤ੍ਤਤਾ. ਪਪਞ੍ਚਾਰਾਮਤਾਤਿ ਤਣ੍ਹਾਮਾਨਦਿਟ੍ਠਿਪਪਞ੍ਚੇਸੁ ਯੁਤ੍ਤਪਯੁਤ੍ਤਤਾ.

੯੪੬. ਸੋਮਨਸ੍ਸੁਪਵਿਚਾਰਾਦੀਸੁ ਸੋਮਨਸ੍ਸੇਨ ਸਦ੍ਧਿਂ ਉਪਵਿਚਰਨ੍ਤੀਤਿ ਸੋਮਨਸ੍ਸੁਪਵਿਚਾਰਾ. ਚਕ੍ਖੁਨਾ ਰੂਪਂ ਦਿਸ੍ਵਾਤਿ ਚਕ੍ਖੁਵਿਞ੍ਞਾਣੇਨ ਰੂਪਂ ਪਸ੍ਸਿਤ੍ਵਾ. ਸੋਮਨਸ੍ਸਟ੍ਠਾਨਿਯਨ੍ਤਿ ਸੋਮਨਸ੍ਸਸ੍ਸ ਆਰਮ੍ਮਣਵਸੇਨ ਕਾਰਣਭੂਤਂ. ਉਪਵਿਚਰਤੀਤਿ ਤਤ੍ਥ ਵਿਚਾਰਪ੍ਪਵਤ੍ਤਨੇਨ ਉਪਵਿਚਰਤਿ. ਵਿਤਕ੍ਕੋ ਪਨ ਤਂਸਮ੍ਪਯੁਤ੍ਤੋ ਵਾਤਿ ਇਮਿਨਾ ਨਯੇਨ ਤੀਸੁਪਿ ਛਕ੍ਕੇਸੁ ਅਤ੍ਥੋ ਵੇਦਿਤਬ੍ਬੋ.

੯੪੭. ਗੇਹਸਿਤਾਨੀਤਿ ਕਾਮਗੁਣਨਿਸ੍ਸਿਤਾਨਿ. ਸੋਮਨਸ੍ਸਾਨੀਤਿ ਚੇਤਸਿਕਸੁਖਾਨਿ. ਦੋਮਨਸ੍ਸਾਨੀਤਿ ਚੇਤਸਿਕਦੁਕ੍ਖਾਨਿ. ਉਪੇਕ੍ਖਾਤਿ ਅਞ੍ਞਾਣਸਮ੍ਪਯੁਤ੍ਤਾ ਉਪੇਕ੍ਖਾ ਵੇਦਨਾ, ਅਞ੍ਞਾਣੁਪੇਕ੍ਖਾਤਿਪਿ ਏਤਾਸਂਯੇਵ ਨਾਮਂ.

੯੪੮. ਅਤ੍ਥਿ ਮੇ ਅਤ੍ਤਾਤਿ ਵਾਤਿ ਸਬ੍ਬਪਦੇਸੁ ਵਾ-ਸਦ੍ਦੋ ਵਿਕਪ੍ਪਤ੍ਥੋ; ਏਵਂ ਵਾ ਦਿਟ੍ਠਿ ਉਪ੍ਪਜ੍ਜਤੀਤਿ ਵੁਤ੍ਤਂ ਹੋਤਿ. ਅਤ੍ਥਿ ਮੇ ਅਤ੍ਤਾਤਿ ਚੇਤ੍ਥ ਸਸ੍ਸਤਦਿਟ੍ਠਿ ਸਬ੍ਬਕਾਲੇਸੁ ਅਤ੍ਤਨੋ ਅਤ੍ਥਿਤਂ ਗਣ੍ਹਾਤਿ. ਸਚ੍ਚਤੋ ਥੇਤਤੋਤਿ ਭੂਤਤੋ ਚ ਥਿਰਤੋ ਚ; ਇਦਂ ਸਚ੍ਚਨ੍ਤਿ ਸੁਟ੍ਠੁ ਦਲ਼੍ਹਭਾਵੇਨਾਤਿ ਵੁਤ੍ਤਂ ਹੋਤਿ. ਨਤ੍ਥਿ ਮੇ ਅਤ੍ਤਾਤਿ ਅਯਂ ਪਨ ਉਚ੍ਛੇਦਦਿਟ੍ਠਿ, ਸਤੋ ਸਤ੍ਤਸ੍ਸ ਤਤ੍ਥ ਤਤ੍ਥ ਵਿਭਵਗ੍ਗਹਣਤੋ. ਅਥ ਵਾ ਪੁਰਿਮਾਪਿ ਤੀਸੁ ਕਾਲੇਸੁ ਅਤ੍ਥੀਤਿ ਗਹਣਤੋ ਸਸ੍ਸਤਦਿਟ੍ਠਿ, ਪਚ੍ਚੁਪ੍ਪਨ੍ਨਮੇਵ ਅਤ੍ਥੀਤਿ ਗਣ੍ਹਨ੍ਤੀ ਉਚ੍ਛੇਦਦਿਟ੍ਠਿ. ਪਚ੍ਛਿਮਾਪਿ ਅਤੀਤਾਨਾਗਤੇਸੁ ਨਤ੍ਥੀਤਿ ਗਹਣਤੋ ‘ਭਸ੍ਮਨ੍ਤਾ ਆਹੁਤਿਯੋ’ਤਿ ਗਹਿਤਦਿਟ੍ਠਿਕਾਨਂ ਵਿਯ ਉਚ੍ਛੇਦਦਿਟ੍ਠਿ, ਅਤੀਤੇਯੇਵ ਨਤ੍ਥੀਤਿ ਗਣ੍ਹਨ੍ਤੀ ਅਧਿਚ੍ਚਸਮੁਪ੍ਪਨ੍ਨਿਕਸ੍ਸੇਵ ਸਸ੍ਸਤਦਿਟ੍ਠਿ. ਅਤ੍ਤਨਾ ਵਾ ਅਤ੍ਤਾਨਂ ਸਞ੍ਜਾਨਾਮੀਤਿ ਸਞ੍ਞਾਕ੍ਖਨ੍ਧਸੀਸੇਨ ਖਨ੍ਧੇ ਅਤ੍ਤਾਤਿ ਗਹੇਤ੍ਵਾ ਸਞ੍ਞਾਯ ਅਵਸੇਸਕ੍ਖਨ੍ਧੇ ਸਞ੍ਜਾਨਨਤੋ ‘ਇਮਿਨਾ ਅਤ੍ਤਨਾ ਇਮਂ ਅਤ੍ਤਾਨਂ ਸਞ੍ਜਾਨਾਮੀ’ਤਿ ਏਵਂ ਹੋਤਿ. ਅਤ੍ਤਨਾ ਵਾ ਅਨਤ੍ਤਾਨਨ੍ਤਿ ਸਞ੍ਞਾਕ੍ਖਨ੍ਧਂਯੇਵ ਅਤ੍ਤਾਤਿ ਗਹੇਤ੍ਵਾ ਇਤਰੇ ਚਤ੍ਤਾਰੋ ਖਨ੍ਧੇ ਅਨਤ੍ਤਾਤਿ ਗਹੇਤ੍ਵਾ ਸਞ੍ਞਾਯ ਤੇਸਂ ਜਾਨਨਤੋ ਏਵਂ ਹੋਤਿ. ਅਨਤ੍ਤਨਾ ਵਾ ਅਤ੍ਤਾਨਨ੍ਤਿ ਸਞ੍ਞਾਕ੍ਖਨ੍ਧਂ ਅਨਤ੍ਤਾਤਿ ਇਤਰੇ ਚ ਚਤ੍ਤਾਰੋ ਖਨ੍ਧੇ ਅਤ੍ਤਾਤਿ ਗਹੇਤ੍ਵਾ ਸਞ੍ਞਾਯ ਤੇਸਂ ਜਾਨਨਤੋ ਏਵਂ ਹੋਤਿ. ਸਬ੍ਬਾਪਿ ਸਸ੍ਸਤੁਚ੍ਛੇਦਦਿਟ੍ਠਿਯੋਵ.

ਵਦੋ ਵੇਦੇਯ੍ਯੋਤਿ ਆਦਯੋ ਪਨ ਸਸ੍ਸਤਦਿਟ੍ਠਿਯਾ ਏਵ ਅਭਿਨਿਵੇਸਾਕਾਰਾ. ਤਤ੍ਥ ਵਦਤੀਤਿ ਵਦੋ; ਵਚੀਕਮ੍ਮਸ੍ਸ ਕਾਰਕੋਤਿ ਵੁਤ੍ਤਂ ਹੋਤਿ. ਵੇਦਯਤੀਤਿ ਵੇਦੇਯ੍ਯੋ; ਜਾਨਾਤਿ ਅਨੁਭਵਤਿ ਚਾਤਿ ਵੁਤ੍ਤਂ ਹੋਤਿ. ਇਦਾਨਿ ਯਂ ਸੋ ਵੇਦੇਤਿ ਤਂ ਦਸ੍ਸੇਤੁਂ ਤਤ੍ਰ ਤਤ੍ਰ ਦੀਘਰਤ੍ਤਂ ਕਲ੍ਯਾਣਪਾਪਕਾਨਨ੍ਤਿਆਦਿ ਵੁਤ੍ਤਂ. ਤਤ੍ਥ ਤਤ੍ਰ ਤਤ੍ਰਾਤਿ ਤੇਸੁ ਤੇਸੁ ਯੋਨਿਗਤਿਠਿਤਿਨਿਵਾਸਨਿਕਾਯੇਸੁ ਆਰਮ੍ਮਣੇਸੁ ਵਾ. ਦੀਘਰਤ੍ਤਨ੍ਤਿ ਚਿਰਰਤ੍ਤਂ. ਪਚ੍ਚਨੁਭੋਤੀਤਿ ਪਟਿਸਂਵੇਦਯਤਿ. ਨ ਸੋ ਜਾਤੋ ਨਾਹੋਸੀਤਿ ਸੋ ਅਤ੍ਤਾ ਅਜਾਤਿਧਮ੍ਮਤੋ ਨ ਜਾਤੋ ਨਾਮ; ਸਦਾ ਵਿਜ੍ਜਮਾਨੋ ਯੇਵਾਤਿ ਅਤ੍ਥੋ. ਤੇਨੇਵ ਅਤੀਤੇ ਨਾਹੋਸਿ, ਅਨਾਗਤੇਪਿ ਨ ਭਵਿਸ੍ਸਤਿ. ਯੋ ਹਿ ਜਾਤੋ ਸੋ ਅਹੋਸਿ, ਯੋ ਚ ਜਾਯਿਸ੍ਸਤਿ ਸੋ ਭਵਿਸ੍ਸਤੀਤਿ. ਅਥਵਾ ‘ਨ ਸੋ ਜਾਤੋ ਨਾਹੋਸੀ’ਤਿ ਸੋ ਸਦਾ ਵਿਜ੍ਜਮਾਨਤ੍ਤਾ ਅਤੀਤੇਪਿ ਨ ਜਾਤੁ ਨਾਹੋਸਿ, ਅਨਾਗਤੇਪਿ ਨ ਜਾਤੁ ਨ ਭਵਿਸ੍ਸਤਿ. ਨਿਚ੍ਚੋਤਿ ਉਪ੍ਪਾਦਵਯਰਹਿਤੋ. ਧੁਵੋਤਿ ਥਿਰੋ ਸਾਰਭੂਤੋ. ਸਸ੍ਸਤੋਤਿ ਸਬ੍ਬਕਾਲਿਕੋ. ਅਵਿਪਰਿਣਾਮਧਮ੍ਮੋਤਿ ਅਤ੍ਤਨੋ ਪਕਤਿਭਾਵਂ ਅਵਿਜਹਨਧਮ੍ਮੋ ਕਕਣ੍ਟਕੋ ਵਿਯ ਨਾਨਪ੍ਪਕਾਰਤ੍ਤਂ ਨਾਪਜ੍ਜਤਿ. ਏਵਮਯਂ ਸਬ੍ਬਾਸਵਦਿਟ੍ਠਿ (ਮ. ਨਿ. ੧.੧੭ ਆਦਯੋ) ਨਾਮ ਕਥਿਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਛਕ੍ਕਨਿਦ੍ਦੇਸਵਣ੍ਣਨਾ.