(੫.) ਪਞ੍ਚਕਨਿਦ੍ਦੇਸਵਣ੍ਣਨਾ
੯੪੦. ਪਞ੍ਚਕਨਿਦ੍ਦੇਸੇ ਯਸ੍ਮਾ ਯੇਸਂ ਸਕ੍ਕਾਯਦਿਟ੍ਠਿਆਦੀਨਿ ਅਪ੍ਪਹੀਨਾਨਿ, ਤੇ ਭਵਗ੍ਗੇਪਿ ਨਿਬ੍ਬਤ੍ਤੇ ਏਤਾਨਿ ਆਕਡ੍ਢਿਤ੍ਵਾ ਕਾਮਭਵੇਯੇਵ ਪਾਤੇਨ੍ਤਿ, ਤਸ੍ਮਾ ਓਰਮ੍ਭਾਗਿਯਾਨਿ ਸਂਯੋਜਨਾਨੀਤਿ ਵੁਤ੍ਤਾਨਿ. ਇਤਿ ਏਤਾਨਿ ਪਞ੍ਚ ਗਚ੍ਛਨ੍ਤਂ ਨ ਵਾਰੇਨ੍ਤਿ, ਗਤਂ ਪਨ ਆਨੇਨ੍ਤਿ. ਰੂਪਰਾਗਾਦੀਨਿਪਿ ਪਞ੍ਚ ਗਚ੍ਛਨ੍ਤਂ ਨ ਵਾਰੇਨ੍ਤਿ, ਆਗਨ੍ਤੁਂ ਪਨ ਨ ਦੇਨ੍ਤਿ. ਰਾਗਾਦਯੋ ਪਞ੍ਚ ਲਗ੍ਗਨਟ੍ਠੇਨ ਸਙ੍ਗਾ, ਅਨੁਪਵਿਟ੍ਠਟ੍ਠੇਨ ਪਨ ਸਲ੍ਲਾਤਿ ਵੁਤ੍ਤਾ.
੯੪੧. ਚੇਤੋਖਿਲਾਤਿ ਚਿਤ੍ਤਸ੍ਸ ਥਦ੍ਧਭਾਵਾ ਕਚਵਰਭਾਵਾ ਖਾਣੁਕਭਾਵਾ. ਸਤ੍ਥਰਿ ਕਙ੍ਖਤੀਤਿ ਸਤ੍ਥੁ ਸਰੀਰੇ ਵਾ ਗੁਣੇ ਵਾ ਕਙ੍ਖਤਿ. ਸਰੀਰੇ ਕਙ੍ਖਮਾਨੋ ‘ਦ੍ਵਤ੍ਤਿਂਸਵਰਲਕ੍ਖਣਪਟਿਮਣ੍ਡਿਤਂ ਨਾਮ ਸਰੀਰਂ ਅਤ੍ਥਿ ਨੁ ਖੋ ਨਤ੍ਥੀ’ਤਿ ਕਙ੍ਖਤਿ. ਗੁਣੇ ਕਙ੍ਖਮਾਨੋ ‘ਅਤੀਤਾਨਾਗਤਪਚ੍ਚੁਪ੍ਪਨ੍ਨਜਾਨਨਸਮਤ੍ਥਂ ਸਬ੍ਬਞ੍ਞੁਤਞਾਣਂ ਅਤ੍ਥਿ ਨੁ ਖੋ ਨਤ੍ਥੀ’ਤਿ ਕਙ੍ਖਤਿ. ਵਿਚਿਕਿਚ੍ਛਤੀਤਿ ਵਿਚਿਨਨ੍ਤੋ ਕਿਚ੍ਛਤਿ, ਦੁਕ੍ਖਂ ਆਪਜ੍ਜਤਿ, ਵਿਨਿਚ੍ਛੇਤੁਂ ਨ ਸਕ੍ਕੋਤਿ. ਨਾਧਿਮੁਚ੍ਚਤੀਤਿ ‘ਏਵਮੇਤ’ਨ੍ਤਿ ਅਧਿਮੋਕ੍ਖਂ ਨ ਪਟਿਲਭਤਿ. ਨ ਸਮ੍ਪਸੀਦਤੀਤਿ ਗੁਣੇਸੁ ਓਤਰਿਤ੍ਵਾ ਨਿਬ੍ਬਿਚਿਕਿਚ੍ਛਭਾਵੇਨ ਪਸੀਦਿਤੁਂ ਅਨਾਵਿਲੋ ਭਵਿਤੁਂ ਨ ਸਕ੍ਕੋਤਿ.
ਧਮ੍ਮੇਤਿ ਪਰਿਯਤ੍ਤਿਧਮ੍ਮੇ ਚ ਪਟਿਵੇਧਧਮ੍ਮੇ ਚ. ਪਰਿਯਤ੍ਤਿਧਮ੍ਮੇ ਕਙ੍ਖਮਾਨੋ ‘ਤੇਪਿਟਕਂ ਬੁਦ੍ਧਵਚਨਂ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨੀਤਿ ਵਦਨ੍ਤਿ, ਅਤ੍ਥਿ ਨੁ ਖੋ ਏਤਂ ਨਤ੍ਥੀ’ਤਿ ਕਙ੍ਖਤਿ. ਪਟਿਵੇਧਧਮ੍ਮੇ ਕਙ੍ਖਮਾਨੋ ‘ਵਿਪਸ੍ਸਨਾਨਿਸ੍ਸਨ੍ਦੋ ਮਗ੍ਗੋ ਨਾਮ, ਮਗ੍ਗਨਿਸ੍ਸਨ੍ਦੋ ਫਲਂ ਨਾਮ, ਸਬ੍ਬਸਙ੍ਖਾਰਪਟਿਨਿਸ੍ਸਗ੍ਗੋ ਨਿਬ੍ਬਾਨਂ ਨਾਮਾਤਿ ਵਦਨ੍ਤਿ, ਤਂ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ’.
ਸਙ੍ਘੇ ਕਙ੍ਖਤੀਤਿ ‘ਉਜੁਪ੍ਪਟਿਪਨ੍ਨੋਤਿਆਦੀਨਂ ਪਦਾਨਂ ਵਸੇਨ ਏਵਰੂਪਂ ਪਟਿਪਦਂ ਪਟਿਪਨ੍ਨਾ ਚਤ੍ਤਾਰੋ ਮਗ੍ਗਟ੍ਠਾ ਚਤ੍ਤਾਰੋ ਫਲਟ੍ਠਾਤਿ ਅਟ੍ਠਨ੍ਨਂ ਪੁਗ੍ਗਲਾਨਂ ਸਮੂਹਭੂਤੋ ਸਙ੍ਘੋ ਨਾਮ ਅਤ੍ਥਿ ਨੁ ਖੋ ਨਤ੍ਥੀ’ਤਿ ਕਙ੍ਖਤਿ. ਸਿਕ੍ਖਾਯ ਕਙ੍ਖਮਾਨੋ ‘ਅਧਿਸੀਲਸਿਕ੍ਖਾ ਨਾਮ ਅਧਿਚਿਤ੍ਤਸਿਕ੍ਖਾ ਨਾਮ ਅਧਿਪਞ੍ਞਾ ਸਿਕ੍ਖਾ ਨਾਮਾਤਿ ਵਦਨ੍ਤਿ, ਸਾ ਅਤ੍ਥਿ ਨੁ ਖੋ ਨਤ੍ਥੀ’ਤਿ ਕਙ੍ਖਤਿ.
ਚੇਤਸੋਵਿਨਿਬਨ੍ਧਾਤਿ ਚਿਤ੍ਤਂ ਬਨ੍ਧਿਤ੍ਵਾ ਮੁਟ੍ਠਿਯਂ ਕਤ੍ਵਾ ਵਿਯ ਗਣ੍ਹਨ੍ਤੀਤਿ ਚੇਤਸੋਵਿਨਿਬਨ੍ਧਾ. ਕਾਮੇਤਿ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ. ਕਾਯੇਤਿ ਅਤ੍ਤਨੋ ਕਾਯੇ. ਰੂਪੇਤਿ ਬਹਿਦ੍ਧਾ ਰੂਪੇ. ਯਾਵਦਤ੍ਥਨ੍ਤਿ ਯਤ੍ਤਕਂ ਇਚ੍ਛਤਿ ਤਤ੍ਤਕਂ. ਉਦਰਾਵਦੇਹਕਨ੍ਤਿ ਉਦਰਪੂਰਂ. ਤਞ੍ਹਿ ਉਦਰਂ ਅਵਦੇਹਨਤੋ ਉਦਰਾਵਦੇਹਕਨ੍ਤਿ ਵੁਚ੍ਚਤਿ. ਸੇਯ੍ਯਸੁਖਨ੍ਤਿ ਮਞ੍ਚਪੀਠਸੁਖਂ ਉਤੁਸੁਖਂ ਵਾ. ਪਸ੍ਸਸੁਖਨ੍ਤਿ ਯਥਾ ਸਮ੍ਪਰਿਵਤ੍ਤਕਂ ਸਯਨ੍ਤਸ੍ਸ ਦਕ੍ਖਿਣਪਸ੍ਸਵਾਮਪਸ੍ਸਾਨਂ ਸੁਖਂ ਹੋਤਿ, ਏਵਂ ਉਪ੍ਪਨ੍ਨਸੁਖਂ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਅਨੁਯੁਤ੍ਤੋਤਿ ਯੁਤ੍ਤਪਯੁਤ੍ਤੋ ਵਿਹਰਤਿ. ਪਣਿਧਾਯਾਤਿ ਪਤ੍ਥਯਿਤ੍ਵਾ. ਸੀਲੇਨਾਤਿਆਦੀਸੁ ਸੀਲਨ੍ਤਿ ਚਤੁਪਾਰਿਸੁਦ੍ਧਿਸੀਲਂ. ਵਤਨ੍ਤਿ ਵਤਸਮਾਦਾਨਂ. ਤਪੋਤਿ ਤਪਚਰਣਂ. ਬ੍ਰਹ੍ਮਚਰਿਯਨ੍ਤਿ ਮੇਥੁਨਵਿਰਤਿ. ਦੇਵੋ ਵਾ ਭਵਿਸ੍ਸਾਮੀਤਿ ਮਹੇਸਕ੍ਖਦੇਵੋ ਵਾ ਭਵਿਸ੍ਸਾਮਿ. ਦੇਵਞ੍ਞਤਰੋ ਵਾਤਿ ਅਪ੍ਪੇਸਕ੍ਖਦੇਵੇਸੁ ਵਾ ਅਞ੍ਞਤਰੋ. ਕੁਸਲਧਮ੍ਮੇ ਆਵਰਨ੍ਤਿ ਨਿਵਾਰੇਨ੍ਤੀਤਿ ਨੀਵਰਣਾਨਿ.
ਮਾਤਾ ਜੀਵਿਤਾ ਵੋਰੋਪਿਤਾ ਹੋਤੀਤਿ ਮਨੁਸ੍ਸੇਨੇਵ ਸਕਜਨਿਕਾ ਮਨੁਸ੍ਸਮਾਤਾ ਜੀਵਿਤਾ ਵੋਰੋਪਿਤਾ ਹੋਤਿ. ਪਿਤਾਪਿ ਮਨੁਸ੍ਸਪਿਤਾਵ. ਅਰਹਾਪਿ ਮਨੁਸ੍ਸਅਰਹਾਵ. ਦੁਟ੍ਠੇਨ ਚਿਤ੍ਤੇਨਾਤਿ ਵਧਕਚਿਤ੍ਤੇਨ.
ਸਞ੍ਞੀਤਿ ਸਞ੍ਞਾਸਮਙ੍ਗੀ. ਅਰੋਗੋਤਿ ਨਿਚ੍ਚੋ. ਇਤ੍ਥੇਕੇ ਅਭਿਵਦਨ੍ਤੀਤਿ ਇਤ੍ਥਂ ਏਕੇ ਅਭਿਵਦਨ੍ਤਿ, ਏਵਮੇਕੇ ਅਭਿਵਦਨ੍ਤੀਤਿ ਅਤ੍ਥੋ. ਏਤ੍ਤਾਵਤਾ ਸੋਲ਼ਸ ਸਞ੍ਞੀਵਾਦਾ ਕਥਿਤਾ. ਅਸਞ੍ਞੀਤਿ ਸਞ੍ਞਾਵਿਰਹਿਤੋ. ਇਮਿਨਾ ਪਦੇਨ ਅਟ੍ਠ ਅਸਞ੍ਞੀਵਾਦਾ ਕਥਿਤਾ. ਤਤਿਯਪਦੇਨ ਅਟ੍ਠ ਨੇਵਸਞ੍ਞੀਨਾਸਞ੍ਞੀਵਾਦਾ ਕਥਿਤਾ. ਸਤੋ ਵਾ ਪਨ ਸਤ੍ਤਸ੍ਸਾਤਿ ਅਥਵਾ ਪਨ ਵਿਜ੍ਜਮਾਨਸ੍ਸੇਵ ਸਤ੍ਤਸ੍ਸ. ਉਚ੍ਛੇਦਨ੍ਤਿ ਉਪਚ੍ਛੇਦਂ. ਵਿਨਾਸਨ੍ਤਿ ਅਦਸ੍ਸਨਂ. ਵਿਭਵਨ੍ਤਿ ਭਾਵਵਿਗਮਂ. ਸਬ੍ਬਾਨੇਤਾਨਿ ਅਞ੍ਞਮਞ੍ਞਵੇਵਚਨਾਨੇਵ. ਤਤ੍ਥ ਦ੍ਵੇ ਜਨਾ ਉਚ੍ਛੇਦਦਿਟ੍ਠਿਂ ਗਣ੍ਹਨ੍ਤਿ – ਲਾਭੀ ਚ ਅਲਾਭੀ ਚ. ਤਤ੍ਥ ਲਾਭੀ ਅਰਹਤੋ ਦਿਬ੍ਬੇਨ ਚਕ੍ਖੁਨਾ ਚੁਤਿਂ ਦਿਸ੍ਵਾ ਉਪਪਤ੍ਤਿਂ ਅਪਸ੍ਸਨ੍ਤੋ, ਯੋ ਵਾ ਚੁਤਿਮਤ੍ਤਮੇਵ ਦਟ੍ਠੁਂ ਸਕ੍ਕੋਤਿ ਨ ਉਪਪਾਤਂ, ਸੋ ਉਚ੍ਛੇਦਦਿਟ੍ਠਿਂ ਗਣ੍ਹਾਤਿ. ਅਲਾਭੀ ‘ਕੋ ਪਰਲੋਕਂ ਜਾਨਾਤੀ’ਤਿ ਕਾਮਸੁਖਗਿਦ੍ਧਤਾਯ ਵਾ ‘ਯਥਾ ਰੁਕ੍ਖਤੋ ਪਣ੍ਣਾਨਿ ਪਤਿਤਾਨਿ ਨ ਪੁਨ ਵਿਰੁਹਨ੍ਤਿ, ਏਵਂ ਸਤ੍ਤਾ’ਤਿਆਦਿਨਾ ਵਿਤਕ੍ਕੇਨ ਵਾ ਉਚ੍ਛੇਦਂ ਗਣ੍ਹਾਤਿ. ਇਧ ਪਨ ਤਣ੍ਹਾਦਿਟ੍ਠੀਨਂ ਵਸੇਨ ਤਥਾ ਚ ਅਞ੍ਞਥਾ ਚ ਵਿਕਪ੍ਪੇਤ੍ਵਾਵ ਉਪ੍ਪਨ੍ਨਾ ਸਤ੍ਤ ਉਚ੍ਛੇਦਵਾਦਾ ਕਥਿਤਾ. ਤੇਸਞ੍ਹਿ ਇਦਂ ਸਙ੍ਗਹਵਚਨਂ. ਦਿਟ੍ਠਧਮ੍ਮਨਿਬ੍ਬਾਨਂ ਵਾ ਪਨੇਕੇਤਿ ਏਤ੍ਥ ਦਿਟ੍ਠਧਮ੍ਮੋਤਿ ਪਚ੍ਚਕ੍ਖਧਮ੍ਮੋ ਵੁਚ੍ਚਤਿ. ਤਤ੍ਥ ਤਤ੍ਥ ਪਟਿਲਦ੍ਧਤ੍ਤਭਾਵਸ੍ਸੇਤਂ ਅਧਿਵਚਨਂ. ਦਿਟ੍ਠਧਮ੍ਮੇ ਨਿਬ੍ਬਾਨਂ ਦਿਟ੍ਠਧਮ੍ਮਨਿਬ੍ਬਾਨਂ; ਇਮਸ੍ਮਿਂਯੇਵ ਅਤ੍ਤਭਾਵੇ ਦੁਕ੍ਖਾ ਵੂਪਸਮ੍ਮਨ੍ਤਿ ਅਤ੍ਥੋ. ਇਦਂ ਪਞ੍ਚਨ੍ਨਂ ਦਿਟ੍ਠਧਮ੍ਮਨਿਬ੍ਬਾਨਵਾਦਾਨਂ ਸਙ੍ਗਹਵਚਨਂ.
੯੪੨. ਵੇਰਾਤਿ ਵੇਰਚੇਤਨਾ. ਬ੍ਯਸਨਾਤਿ ਵਿਨਾਸਾ. ਅਕ੍ਖਨ੍ਤਿਯਾਤਿ ਅਨਧਿਵਾਸਨਾਯ. ਅਪ੍ਪਿਯੋਤਿ ਦਸ੍ਸਨਸਵਨਪਟਿਕੂਲਤਾਯ ਨ ਪਿਯਾਯਿਤਬ੍ਬੋ. ਚਿਨ੍ਤੇਤੁਮ੍ਪਿ ਪਟਿਕੂਲਤ੍ਤਾ ਮਨੋ ਏਤਸ੍ਮਿਂ ਨ ਅਪ੍ਪੇਤੀਤਿ ਅਮਨਾਪੋ. ਵੇਰਬਹੁਲੋਤਿ ਬਹੁਵੇਰੋ. ਵਜ੍ਜਬਹੁਲੋਤਿ ਬਹੁਦੋਸੋ.
ਆਜੀਵਕਭਯਨ੍ਤਿ ਆਜੀਵਂ ਜੀਵਿਤਵੁਤ੍ਤਿਂ ਪਟਿਚ੍ਚ ਉਪ੍ਪਨ੍ਨਂ ਭਯਂ. ਤਂ ਅਗਾਰਿਕਸ੍ਸਪਿ ਹੋਤਿ ਅਨਗਾਰਿਕਸ੍ਸਪਿ. ਤਤ੍ਥ ਅਗਾਰਿਕੇਨ ਤਾਵ ਆਜੀਵਹੇਤੁ ਬਹੁਂ ਅਕੁਸਲਂ ਕਤਂ ਹੋਤਿ. ਅਥਸ੍ਸ ਮਰਣਸਮਯੇ ਨਿਰਯੇ ਉਪਟ੍ਠਹਨ੍ਤੇ ਭਯਂ ਉਪ੍ਪਜ੍ਜਤਿ. ਅਨਗਾਰਿਕੇਨਾਪਿ ਬਹੁ ਅਨੇਸਨਾ ਕਤਾ ਹੋਤਿ. ਅਥਸ੍ਸ ਮਰਣਕਾਲੇ ਨਿਰਯੇ ਉਪਟ੍ਠਹਨ੍ਤੇ ਭਯਂ ਉਪ੍ਪਜ੍ਜਤਿ. ਇਦਂ ਆਜੀਵਕਭਯਂ ਨਾਮ. ਅਸਿਲੋਕਭਯਨ੍ਤਿ ਗਰਹਭਯਂ ਪਰਿਸਸਾਰਜ੍ਜਭਯਨ੍ਤਿ ਕਤਪਾਪਸ੍ਸ ਪੁਗ੍ਗਲਸ੍ਸ ਸਨ੍ਨਿਪਤਿਤਂ ਪਰਿਸਂ ਉਪਸਙ੍ਕਮਨ੍ਤਸ੍ਸ ਸਾਰਜ੍ਜਸਙ੍ਖਾਤਂ ਭਯਂ ਉਪ੍ਪਜ੍ਜਤਿ. ਇਦਂ ਪਰਿਸਸਾਰਜ੍ਜਭਯਂ ਨਾਮ. ਇਤਰਦ੍ਵਯਂ ਪਾਕਟਮੇਵ.
੯੪੩. ਦਿਟ੍ਠਧਮ੍ਮਨਿਬ੍ਬਾਨਵਾਰੇਸੁ ਪਞ੍ਚਹਿ ਕਾਮਗੁਣੇਹੀਤਿ ਮਨਾਪਿਯਰੂਪਾਦੀਹਿ ਪਞ੍ਚਹਿ ਕਾਮਕੋਟ੍ਠਾਸੇਹਿ ਬਨ੍ਧਨੇਹਿ ਵਾ. ਸਮਪ੍ਪਿਤੋਤਿ ਸੁਟ੍ਠੁ ਅਪ੍ਪਿਤੋ ਅਲ੍ਲੀਨੋ ਹੁਤ੍ਵਾ. ਸਮਙ੍ਗੀਭੂਤੋਤਿ ਸਮਨ੍ਨਾਗਤੋ. ਪਰਿਚਾਰੇਤੀਤਿ ਤੇਸੁ ਕਾਮਗੁਣੇਸੁ ਯਥਾਸੁਖਂ ਇਨ੍ਦ੍ਰਿਯਾਨਿ ਚਾਰੇਤਿ ਸਞ੍ਚਾਰੇਤਿ ਇਤੋ ਚਿਤੋ ਚ ਉਪਨੇਤਿ; ਅਥ ਵਾ ਪਨ ਲਲ਼ਤਿ ਰਮਤਿ ਕੀਲ਼ਤੀਤਿ. ਏਤ੍ਥ ਚ ਦੁਵਿਧਾ ਕਾਮਗੁਣਾ – ਮਾਨੁਸ੍ਸਕਾ ਚੇਵ ਦਿਬ੍ਬਾ ਚ. ਮਾਨੁਸ੍ਸਕਾ ਮਨ੍ਧਾਤੁਕਾਮਗੁਣਸਦਿਸਾ ਦਟ੍ਠਬ੍ਬਾ; ਦਿਬ੍ਬਾ ਪਰਨਿਮ੍ਮਿਤਵਸਵਤ੍ਤਿਦੇਵਰਾਜਸ੍ਸ ਕਾਮਗੁਣਸਦਿਸਾਤਿ. ਏਵਰੂਪੇ ਕਾਮੇ ਉਪਗਤਞ੍ਹਿ ਤੇ ਪਰਮਦਿਟ੍ਠਧਮ੍ਮਨਿਬ੍ਬਾਨਪ੍ਪਤ੍ਤੋ ਹੋਤੀਤਿ ਵਦਨ੍ਤਿ. ਤਤ੍ਥ ਪਰਮਦਿਟ੍ਠਧਮ੍ਮਨਿਬ੍ਬਾਨਨ੍ਤਿ ਪਰਮਂ ਦਿਟ੍ਠਧਮ੍ਮਨਿਬ੍ਬਾਨਂ, ਉਤ੍ਤਮਨ੍ਤਿ ਅਤ੍ਥੋ.
ਦੁਤਿਯਵਾਰੇ ਹੁਤ੍ਵਾ ਅਭਾਵਟ੍ਠੇਨ ਅਨਿਚ੍ਚਾ; ਪਟਿਪੀਲ਼ਨਟ੍ਠੇਨ ਦੁਕ੍ਖਾ; ਪਕਤਿਜਹਨਟ੍ਠੇਨ ਵਿਪਰਿਣਾਮਧਮ੍ਮਾਤਿ ਵੇਦਿਤਬ੍ਬਾ. ਤੇਸਂ ਵਿਪਰਿਣਾਮਞ੍ਞਥਾਭਾਵਾਤਿ ਤੇਸਂ ਕਾਮਾਨਂ ਵਿਪਰਿਣਾਮਸਙ੍ਖਾਤਾ ਅਞ੍ਞਥਾਭਾਵਾ. ‘ਯਮ੍ਪਿ ਮੇ ਅਹੋਸਿ ਤਮ੍ਪਿ ਮੇ ਨਤ੍ਥੀ’ਤਿ ਵੁਤ੍ਤਨਯੇਨ ਉਪ੍ਪਜ੍ਜਨ੍ਤਿ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ. ਤਤ੍ਥ ਅਨ੍ਤੋਨਿਜ੍ਝਾਯਨਲਕ੍ਖਣੋ ਸੋਕੋ; ਤਨ੍ਨਿਸ੍ਸਿਤਲਾਲਪ੍ਪਲਕ੍ਖਣੋ ਪਰਿਦੇਵੋ; ਕਾਯਪਟਿਪੀਲ਼ਨਲਕ੍ਖਣਂ ਦੁਕ੍ਖਂ; ਮਨੋਵਿਘਾਤਲਕ੍ਖਣਂ ਦੋਮਨਸ੍ਸਂ; ਵਿਘਾਤਲਕ੍ਖਣੋ ਉਪਾਯਾਸੋ.
ਵਿਤਕ੍ਕਿਤਨ੍ਤਿ ਅਭਿਨਿਰੋਪਨਵਸੇਨ ਪਵਤ੍ਤੋ ਵਿਤਕ੍ਕੋ. ਵਿਚਾਰਿਤਨ੍ਤਿ ਅਨੁਮਜ੍ਜਨਵਸੇਨ ਪਵਤ੍ਤੋ ਵਿਚਾਰੋ. ਏਤੇਨ ਏਤਨ੍ਤਿ ਏਤੇਨ ਵਿਤਕ੍ਕੇਨ ਚ ਵਿਚਾਰੇਨ ਚ ਏਤਂ ਪਠਮਜ੍ਝਾਨਂ ਓਲ਼ਾਰਿਕਂ ਸਕਣ੍ਟਕਂ ਵਿਯ ਖਾਯਤਿ.
ਪੀਤਿਗਤਨ੍ਤਿ ਪੀਤਿਮੇਵ. ਚੇਤਸੋ ਉਪ੍ਪਿਲਾਵਿਤਨ੍ਤਿ ਚਿਤ੍ਤਸ੍ਸ ਉਪ੍ਪਿਲਭਾਵਕਰਣਂ. ਚੇਤਸੋ ਆਭੋਗੋਤਿ ਝਾਨਾ ਵੁਟ੍ਠਾਯ ਤਸ੍ਮਿਂ ਸੁਖੇ ਪੁਨਪ੍ਪੁਨਂ ਚਿਤ੍ਤਸ੍ਸ ਆਭੋਗੋ ਮਨਸਿਕਾਰੋਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਪਞ੍ਚਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.