(੪.) ਚਤੁਕ੍ਕਨਿਦ੍ਦੇਸਵਣ੍ਣਨਾ

੯੩੯. ਚਤੁਕ੍ਕਨਿਦ੍ਦੇਸੇ ਤਣ੍ਹੁਪ੍ਪਾਦੇਸੁ ਚੀਵਰਹੇਤੂਤਿ ‘ਕਤ੍ਥ ਮਨਾਪਂ ਚੀਵਰਂ ਲਭਿਸ੍ਸਾਮੀ’ਤਿ ਚੀਵਰਕਾਰਣਾ ਉਪ੍ਪਜ੍ਜਤਿ. ਇਤਿਭਵਾਭਵਹੇਤੂਤਿ ਏਤ੍ਥ ਇਤੀਤਿ ਨਿਦਸ੍ਸਨਤ੍ਥੇ ਨਿਪਾਤੋ; ਯਥਾ ਚੀਵਰਾਦਿਹੇਤੁ ਏਵਂ ਭਵਾਭਵਹੇਤੂਤਿਪਿ ਅਤ੍ਥੋ. ਭਵਾਭਵੋਤਿ ਚੇਤ੍ਥ ਪਣੀਤਪਣੀਤਤਰਾਨਿ ਤੇਲਮਧੁਫਾਣਿਤਾਦੀਨਿ ਅਧਿਪ੍ਪੇਤਾਨਿ. ਇਮੇਸਂ ਪਨ ਚਤੁਨ੍ਨਂ ਤਣ੍ਹੁਪ੍ਪਾਦਾਨਂ ਪਹਾਨਤ੍ਥਾਯ ਪਟਿਪਾਟਿਯਾਵ ਚਤ੍ਤਾਰੋ ਅਰਿਯਵਂਸਾ ਦੇਸਿਤਾਤਿ ਵੇਦਿਤਬ੍ਬਾ.

ਅਗਤਿਗਮਨੇਸੁ ਛਨ੍ਦਾਗਤਿਂ ਗਚ੍ਛਤੀਤਿ ਛਨ੍ਦੇਨ ਪੇਮੇਨ ਅਗਤਿਂ ਗਚ੍ਛਤਿ, ਅਕਤ੍ਤਬ੍ਬਂ ਕਰੋਤਿ. ਪਰਪਦੇਸੁਪਿ ਏਸੇਵ ਨਯੋ. ਤਤ੍ਥ ਯੋ ‘ਅਯਂ ਮੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ ਸਮ੍ਭਤ੍ਤੋ ਵਾ ਞਾਤਕੋ ਵਾ ਲਞ੍ਜਂ ਵਾ ਪਨ ਮੇ ਦੇਤੀ’ਤਿ ਛਨ੍ਦਵਸੇਨ ਅਸ੍ਸਾਮਿਕਂ ਸਾਮਿਕਂ ਕਰੋਤਿ – ਅਯਂ ਛਨ੍ਦਾਗਤਿਂ ਗਚ੍ਛਤਿ ਨਾਮ. ਯੋ ‘ਅਯਂ ਮੇ ਵੇਰੀ’ਤਿ ਪਕਤਿਵੇਰਵਸੇਨ ਵਾ ਤਙ੍ਖਣੁਪ੍ਪਨ੍ਨਕੋਧਵਸੇਨ ਵਾ ਸਾਮਿਕਂ ਅਸ੍ਸਾਮਿਕਂ ਕਰੋਤਿ – ਅਯਂ ਦੋਸਾਗਤਿਂ ਗਚ੍ਛਤਿ ਨਾਮ. ਯੋ ਪਨ ਮਨ੍ਦਤ੍ਤਾ ਮੋਮੂਹਤ੍ਤਾ ਯਂ ਵਾ ਤਂ ਵਾ ਵਤ੍ਵਾ ਅਸ੍ਸਾਮਿਕਂ ਸਾਮਿਕਂ ਕਰੋਤਿ – ਅਯਂ ਮੋਹਾਗਤਿਂ ਗਚ੍ਛਤਿ ਨਾਮ. ਯੋ ਪਨ ‘ਅਯਂ ਰਾਜਵਲ੍ਲਭੋ ਵਾ ਵਿਸਮਨਿਸ੍ਸਿਤੋ ਵਾ ਅਨਤ੍ਥਮ੍ਪਿ ਮੇ ਕਰੇਯ੍ਯਾ’ਤਿ ਭੀਤੋ ਅਸ੍ਸਾਮਿਕਂ ਸਾਮਿਕਂ ਕਰੋਤਿ – ਅਯਂ ਭਯਾਗਤਿਂ ਗਚ੍ਛਤਿ ਨਾਮ. ਯੋ ਵਾ ਪਨ ਭਾਜਿਯਟ੍ਠਾਨੇ ਕਿਞ੍ਚਿ ਭਾਜੇਨ੍ਤੋ ‘ਅਯਂ ਮੇ ਮਿਤ੍ਤੋ ਵਾ ਸਨ੍ਦਿਟ੍ਠੋ ਵਾ ਸਮ੍ਭਤ੍ਤੋ ਵਾ’ਤਿ ਪੇਮਵਸੇਨ ਅਤਿਰੇਕਂ ਦੇਤਿ, ‘ਅਯਂ ਮੇ ਵੇਰੀ’ਤਿ ਦੋਸਵਸੇਨ ਊਨਕਂ ਦੇਤਿ, ਮੋਮੂਹਤ੍ਤਾ ਦਿਨ੍ਨਾਦਿਨ੍ਨਂ ਅਜਾਨਮਾਨੋ ਕਸ੍ਸਚਿ ਊਨਕਂ ਕਸ੍ਸਚਿ ਅਧਿਕਂ ਦੇਤਿ, ‘ਅਯਂ ਇਮਸ੍ਮਿਂ ਅਦੀਯਮਾਨੇ ਮਯ੍ਹਂ ਅਨਤ੍ਥਮ੍ਪਿ ਕਰੇਯ੍ਯਾ’ਤਿ ਭੀਤੋ ਕਸ੍ਸਚਿ ਅਤਿਰੇਕਂ ਦੇਤਿ, ਸੋ ਚਤੁਬ੍ਬਿਧੋਪਿ ਯਥਾਨੁਕ੍ਕਮੇਨ ਛਨ੍ਦਾਗਤਿਆਦੀਨਿ ਗਚ੍ਛਤਿ ਨਾਮ. ਅਰਿਯਾ ਏਤਾਯ ਨ ਗਚ੍ਛਨ੍ਤੀਤਿ ਅਗਤਿ, ਅਨਰਿਯਾ ਇਮਿਨਾ ਅਗਤਿਂ ਗਚ੍ਛਨ੍ਤੀਤਿ ਅਗਤਿਗਮਨਂ. ਇਮਂ ਦ੍ਵਯਂ ਚਤੁਨ੍ਨਮ੍ਪਿ ਸਾਧਾਰਣਵਸੇਨ ਵੁਤ੍ਤਂ. ਛਨ੍ਦੇਨ ਗਮਨਂ ਛਨ੍ਦਗਮਨਂ. ਇਦਂ ਦੋਸਾਦੀਨਂ ਅਸਾਧਾਰਣਵਸੇਨ ਵੁਤ੍ਤਂ. ਸਕਪਕ੍ਖਰਾਗਞ੍ਚ ਪਰਪਕ੍ਖਦੋਸਞ੍ਚ ਪੁਰਕ੍ਖਤ੍ਵਾ ਅਸਮਗ੍ਗਭਾਵੇਨ ਗਮਨਂ ਵਗ੍ਗਗਮਨਂ. ਇਦਂ ਛਨ੍ਦਦੋਸਸਾਧਾਰਣਵਸੇਨ ਵੁਤ੍ਤਂ. ਵਾਰਿਨੋ ਵਿਯ ਯਥਾਨਿਨ੍ਨਂ ਗਮਨਨ੍ਤਿ ਵਾਰਿਗਮਨਂ. ਇਦਂ ਚਤੁਨ੍ਨਮ੍ਪਿ ਸਾਧਾਰਣਵਸੇਨ ਵੁਤ੍ਤਂ.

ਵਿਪਰਿਯਾਸੇਸੁ ਅਨਿਚ੍ਚਾਦੀਨਿ ਵਤ੍ਥੂਨਿ ਨਿਚ੍ਚਨ੍ਤਿਆਦਿਨਾ ਨਯੇਨ ਵਿਪਰੀਤਤੋ ਏਸਨ੍ਤੀਤਿ ਵਿਪਰਿਯਾਸਾ, ਸਞ੍ਞਾਯ ਵਿਪਰਿਯਾਸੋ ਸਞ੍ਞਾਵਿਪਰਿਯਾਸੋ. ਇਤਰੇਸੁਪਿ ਦ੍ਵੀਸੁ ਏਸੇਵ ਨਯੋ. ਏਵਮੇਤੇ ਚਤੁਨ੍ਨਂ ਵਤ੍ਥੂਨਂ ਵਸੇਨ ਚਤ੍ਤਾਰੋ, ਯੇਸੁ ਵਤ੍ਥੂਸੁ ਸਞ੍ਞਾਦੀਨਂ ਵਸੇਨ ਦ੍ਵਾਦਸ ਹੋਨ੍ਤਿ. ਤੇਸੁ ਅਟ੍ਠ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤਿ. ਅਸੁਭੇ ਸੁਭਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾ ਸਕਦਾਗਾਮਿਮਗ੍ਗੇਨ ਤਨੁਕਾ ਹੋਨ੍ਤਿ, ਅਨਾਗਾਮਿਮਗ੍ਗੇਨ ਪਹੀਯਨ੍ਤਿ. ਦੁਕ੍ਖੇ ਸੁਖਨ੍ਤਿ ਸਞ੍ਞਾਚਿਤ੍ਤਵਿਪਲ੍ਲਾਸਾ ਅਰਹਤ੍ਤਮਗ੍ਗੇਨ ਪਹੀਯਨ੍ਤੀਤਿ ਵੇਦਿਤਬ੍ਬਾ.

ਅਨਰਿਯਵੋਹਾਰੇਸੁ ਅਨਰਿਯਵੋਹਾਰਾਤਿ ਅਨਰਿਯਾਨਂ ਲਾਮਕਾਨਂ ਵੋਹਾਰਾ. ਦਿਟ੍ਠਵਾਦਿਤਾਤਿ ‘ਦਿਟ੍ਠਂ ਮਯਾ’ਤਿ ਏਵਂ ਵਾਦਿਤਾ. ਏਤ੍ਥ ਚ ਤਂ ਤਂ ਸਮੁਟ੍ਠਾਪਿਕਚੇਤਨਾਵਸੇਨ ਅਤ੍ਥੋ ਵੇਦਿਤਬ੍ਬੋ. ਸਹ ਸਦ੍ਦੇਨ ਚੇਤਨਾ ਕਥਿਤਾਤਿਪਿ ਵੁਤ੍ਤਮੇਵ. ਦੁਤਿਯਚਤੁਕ੍ਕੇਪਿ ਏਸੇਵ ਨਯੋ. ਅਰਿਯੋ ਹਿ ਅਦਿਸ੍ਵਾ ਵਾ ‘ਦਿਟ੍ਠਂ ਮਯਾ’ਤਿ ਦਿਸ੍ਵਾ ਵਾ ‘ਨ ਦਿਟ੍ਠਂ ਮਯਾ’ਤਿ ਵਤ੍ਤਾ ਨਾਮ ਨਤ੍ਥਿ; ਅਨਰਿਯੋਵ ਏਵਂ ਵਦਤਿ. ਤਸ੍ਮਾ ਏਵਂ ਵਦਨ੍ਤਸ੍ਸ ਏਤਾ ਸਹ ਸਦ੍ਦੇਨ ਅਟ੍ਠ ਚੇਤਨਾ ਅਨਰਿਯਵੋਹਾਰਾਤਿ ਵੇਦਿਤਬ੍ਬਾ.

ਦੁਚ੍ਚਰਿਤੇਸੁ ਪਠਮਚਤੁਕ੍ਕਂ ਵੇਰਚੇਤਨਾਵਸੇਨ ਵੁਤ੍ਤਂ, ਦੁਤਿਯਂ ਵਚੀਦੁਚ੍ਚਰਿਤਵਸੇਨ.

ਭਯੇਸੁ ਪਠਮਚਤੁਕ੍ਕੇ ਜਾਤਿਂ ਪਟਿਚ੍ਚ ਉਪ੍ਪਨ੍ਨਂ ਭਯਂ ਜਾਤਿਭਯਂ. ਸੇਸੇਸੁਪਿ ਏਸੇਵ ਨਯੋ. ਦੁਤਿਯਚਤੁਕ੍ਕੇ ਰਾਜਤੋ ਉਪ੍ਪਨ੍ਨਂ ਭਯਂ ਰਾਜਭਯਂ. ਸੇਸੇਸੁਪਿ ਏਸੇਵ ਨਯੋ.

ਤਤਿਯਚਤੁਕ੍ਕੇ ਚਤ੍ਤਾਰਿ ਭਯਾਨੀਤਿ ਮਹਾਸਮੁਦ੍ਦੇ ਉਦਕਂ ਓਰੋਹਨ੍ਤਸ੍ਸ ਵੁਤ੍ਤਭਯਾਨਿ. ਮਹਾਸਮੁਦ੍ਦੇ ਕਿਰ ਮਹਿਨ੍ਦਵੀਚਿ ਨਾਮ ਸਟ੍ਠਿ ਯੋਜਨਾਨਿ ਉਗ੍ਗਚ੍ਛਤਿ. ਗਙ੍ਗਾਵੀਚਿ ਨਾਮ ਪਣ੍ਣਾਸ. ਰੋਹਣਵੀਚਿ ਨਾਮ ਚਤ੍ਤਾਲੀਸ ਯੋਜਨਾਨਿ ਉਗ੍ਗਚ੍ਛਤਿ. ਏਵਰੂਪਾ ਊਮਿਯੋ ਪਟਿਚ੍ਚ ਉਪ੍ਪਨ੍ਨਂ ਭਯਂ ਊਮਿਭਯਂ ਨਾਮ. ਕੁਮ੍ਭੀਲਤੋ ਉਪ੍ਪਨ੍ਨਂ ਭਯਂ ਕੁਮ੍ਭੀਲਭਯਂ. ਉਦਕਾਵਟ੍ਟਤੋ ਭਯਂ ਆਵਟ੍ਟਭਯਂ. ਸੁਸੁਕਾ ਵੁਚ੍ਚਤਿ ਚਣ੍ਡਮਚ੍ਛੋ; ਤਤੋ ਭਯਂ ਸੁਸੁਕਾਭਯਂ.

ਚਤੁਤ੍ਥਚਤੁਕ੍ਕੇ ਅਤ੍ਤਾਨੁਵਾਦਭਯਨ੍ਤਿ ਪਾਪਕਮ੍ਮਿਨੋ ਅਤ੍ਤਾਨਂ ਅਨੁਵਦਨ੍ਤਸ੍ਸ ਉਪ੍ਪਜ੍ਜਨਕਭਯਂ. ਪਰਾਨੁਵਾਦਭਯਨ੍ਤਿ ਪਰਸ੍ਸ ਅਨੁਵਾਦਤੋ ਉਪ੍ਪਜ੍ਜਨਕਭਯਂ. ਦਣ੍ਡਭਯਨ੍ਤਿ ਅਗਾਰਿਕਸ੍ਸ ਰਞ੍ਞਾ ਪਵਤ੍ਤਿਤਦਣ੍ਡਂ, ਅਨਗਾਰਿਕਸ੍ਸ ਵਿਨਯਦਣ੍ਡਂ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਦੁਗ੍ਗਤਿਭਯਨ੍ਤਿ ਚਤ੍ਤਾਰੋ ਅਪਾਯੇ ਪਟਿਚ੍ਚ ਉਪ੍ਪਜ੍ਜਨਕਭਯਂ. ਇਤਿ ਇਮੇਹਿ ਚਤੂਹਿ ਚਤੁਕ੍ਕੇਹਿ ਸੋਲ਼ਸ ਮਹਾਭਯਾਨਿ ਨਾਮ ਕਥਿਤਾਨਿ.

ਦਿਟ੍ਠਿਚਤੁਕ੍ਕੇ ਤਿਮ੍ਬਰੁਕਦਿਟ੍ਠਿ (ਸਂ. ਨਿ. ੨.੧੮) ਨਾਮ ਕਥਿਤਾ. ਤਤ੍ਥ ਸਯਂਕਤਂ ਸੁਖਦੁਕ੍ਖਨ੍ਤਿ ਵੇਦਨਂ ਅਤ੍ਤਤੋ ਸਮਨੁਪਸ੍ਸਤੋ ਵੇਦਨਾਯ ਏਵ ਵੇਦਨਾ ਕਤਾਤਿ ਉਪ੍ਪਨ੍ਨਾ ਦਿਟ੍ਠਿ. ਏਵਞ੍ਚ ਸਤਿ ਤਸ੍ਸਾ ਵੇਦਨਾਯ ਪੁਬ੍ਬੇਪਿ ਅਤ੍ਥਿਤਾ ਆਪਜ੍ਜਤੀਤਿ ਅਯਂ ਸਸ੍ਸਤਦਿਟ੍ਠਿ ਨਾਮ ਹੋਤਿ. ਸਚ੍ਚਤੋ ਥੇਤਤੋਤਿ ਸਚ੍ਚਤੋ ਥਿਰਤੋ. ਪਰਂਕਤਨ੍ਤਿ ਪਚ੍ਚੁਪ੍ਪਨ੍ਨਵੇਦਨਤੋ ਅਞ੍ਞਂ ਵੇਦਨਾਕਾਰਣਂ ਵੇਦਨਤ੍ਤਾਨਂ ਸਮਨੁਪਸ੍ਸਤੋ ‘ਅਞ੍ਞਾਯ ਵੇਦਨਾਯ ਅਯਂ ਵੇਦਨਾ ਕਤਾ’ਤਿ ਉਪ੍ਪਨ੍ਨਾ ਦਿਟ੍ਠਿ. ਏਵਂ ਸਤਿ ਪੁਰਿਮਾਯ ਕਾਰਣਵੇਦਨਾਯ ਉਚ੍ਛੇਦੋ ਆਪਜ੍ਜਤੀਤਿ ਅਯਂ ਉਚ੍ਛੇਦਦਿਟ੍ਠਿ ਨਾਮ ਹੋਤਿ. ਸਯਂਕਤਞ੍ਚ ਪਰਂਕਤਞ੍ਚਾਤਿ ਯਥਾਵੁਤ੍ਤੇਨੇਵ ਅਤ੍ਥੇਨ ‘ਉਪਡ੍ਢਂ ਸਯਂਕਤਂ, ਉਪਡ੍ਢਂ ਪਰੇਨ ਕਤ’ਨ੍ਤਿ ਗਣ੍ਹਤੋ ਉਪ੍ਪਨ੍ਨਾ ਦਿਟ੍ਠਿ – ਅਯਂ ਸਸ੍ਸਤੁਚ੍ਛੇਦਦਿਟ੍ਠਿ ਨਾਮ. ਚਤੁਤ੍ਥਾ ਅਕਾਰਣਾ ਏਵ ਸੁਖਦੁਕ੍ਖਂ ਹੋਤੀਤਿ ਗਣ੍ਹਤੋ ਉਪ੍ਪਨ੍ਨਾ ਦਿਟ੍ਠਿ. ਏਵਂ ਸਤਿ ਅਯਂ ਅਹੇਤੁਕਦਿਟ੍ਠਿ ਨਾਮ. ਸੇਸਮੇਤ੍ਥ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵਾਤਿ.

ਚਤੁਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.