(੨.) ਦੁਕਨਿਦ੍ਦੇਸਵਣ੍ਣਨਾ

੭੬੭. ਦੁਵਿਧੇਨ ਞਾਣਵਤ੍ਥੁਨਿਦ੍ਦੇਸੇ ਚਤੂਸੁ ਭੂਮੀਸੁ ਕੁਸਲੇਤਿ ਸੇਕ੍ਖਪੁਥੁਜ੍ਜਨਾਨਂ ਚਤੁਭੂਮਕਕੁਸਲਪਞ੍ਞਾ. ਪਟਿਸਮ੍ਭਿਦਾਵਿਭਙ੍ਗੇ ਵੁਤ੍ਤੇਸੁ ਪਞ੍ਚਸੁ ਅਤ੍ਥੇਸੁ ਅਤ੍ਤਨੋ ਅਤ੍ਤਨੋ ਭੂਮਿਪਰਿਯਾਪਨ੍ਨਂ ਵਿਪਾਕਸਙ੍ਖਾਤਂ ਅਤ੍ਥਂ ਜਾਪੇਤਿ ਜਨੇਤਿ ਪਵਤ੍ਤੇਤੀਤਿ ਅਤ੍ਥਜਾਪਿਕਾ. ਅਰਹਤੋ ਅਭਿਞ੍ਞਂ ਉਪ੍ਪਾਦੇਨ੍ਤਸ੍ਸ ਸਮਾਪਤ੍ਤਿਂ ਉਪ੍ਪਾਦੇਨ੍ਤਸ੍ਸ ਕਿਰਿਯਾਬ੍ਯਾਕਤੇਤਿ ਅਭਿਞ੍ਞਾਯ ਚੇਵ ਸਮਾਪਤ੍ਤਿਯਾ ਚ ਪਰਿਕਮ੍ਮਸਮਯੇ ਕਾਮਾਵਚਰਕਿਰਿਯਪਞ੍ਞਾ. ਸਾ ਹਿ ਅਭਿਞ੍ਞਾਸਮਾਪਤ੍ਤਿਪਭੇਦਂ ਕਿਰਿਯਸਙ੍ਖਾਤਂ ਅਤ੍ਥਂ ਜਾਪੇਤਿ ਜਨੇਤਿ ਪਵਤ੍ਤੇਤੀਤਿ ਅਤ੍ਥਜਾਪਿਕਾ ਪਞ੍ਞਾਤਿ ਵੁਤ੍ਤਾ. ਅਯਂ ਪਨ ਅਪਰੋਪਿ ਪਾਲ਼ਿਮੁਤ੍ਤਕੋ ਅਟ੍ਠਕਥਾਨਯੋ – ਯਾਪਿ ਹਿ ਪੁਰਿਮਾ ਕਾਮਾਵਚਰਕਿਰਿਯਾ ਪਚ੍ਛਿਮਾਯ ਕਾਮਾਵਚਰਕਿਰਿਯਾਯ ਅਨਨ੍ਤਰਾਦਿਵਸੇਨ ਪਚ੍ਚਯੋ ਹੋਤਿ, ਸਾਪਿ ਤਂ ਕਿਰਿਯਤ੍ਥਂ ਜਾਪੇਤੀਤਿ ਅਤ੍ਥਜਾਪਿਕਾ ਪਞ੍ਞਾ ਨਾਮ. ਰੂਪਾਵਚਰਾਰੂਪਾਵਚਰੇਸੁਪਿ ਏਸੇਵ ਨਯੋ.

ਦੁਤਿਯਪਦਨਿਦ੍ਦੇਸੇ ਚਤੂਸੁ ਭੂਮੀਸੁ ਵਿਪਾਕੇਤਿ ਕਾਮਾਵਚਰਵਿਪਾਕੇ ਪਞ੍ਞਾ ਸਹਜਾਤਾਦਿਪਚ੍ਚਯਵਸੇਨ ਕਾਮਾਵਚਰਵਿਪਾਕਤ੍ਥਂ ਜਾਪੇਤ੍ਵਾ ਠਿਤਾਤਿ ਜਾਪਿਤਤ੍ਥਾ. ਰੂਪਾਵਚਰਾਦਿਵਿਪਾਕਪਞ੍ਞਾਸੁਪਿ ਏਸੇਵ ਨਯੋ. ਸਬ੍ਬਾਪਿ ਵਾ ਏਸਾ ਅਤ੍ਤਨੋ ਅਤ੍ਤਨੋ ਕਾਰਣੇਹਿ ਜਾਪਿਤਾ ਜਨਿਤਾ ਪਵਤ੍ਤਿਤਾ ਸਯਮ੍ਪਿ ਅਤ੍ਥਭੂਤਾਤਿਪਿ ਜਾਪਿਤਤ੍ਥਾ. ਅਰਹਤੋ ਉਪ੍ਪਨ੍ਨਾਯ ਅਭਿਞ੍ਞਾਯ ਉਪ੍ਪਨ੍ਨਾਯ ਸਮਾਪਤ੍ਤਿਯਾਤਿ ਵੁਤ੍ਤਕਿਰਿਯਪਞ੍ਞਾਯਪਿ ਏਸੇਵ ਨਯੋ. ਅਯਂ ਪਨ ਅਪਰੋਪਿ ਪਾਲ਼ਿਮੁਤ੍ਤਕੋ ਅਟ੍ਠਕਥਾਨਯੋ – ਕਾਮਾਵਚਰਕਿਰਿਯਪਞ੍ਞਾਪਿ ਹਿ ਸਹਜਾਤਾਦਿਵਸੇਨ ਕਾਮਾਵਚਰਕਿਰਿਯਸਙ੍ਖਾਤਂ ਅਤ੍ਥਂ ਜਾਪੇਤ੍ਵਾ ਠਿਤਾਤਿ ਜਾਪਿਤਤ੍ਥਾ. ਰੂਪਾਵਚਰਾਰੂਪਾਵਚਰਕਿਰਿਯਪਞ੍ਞਾਸੁਪਿ ਏਸੇਵ ਨਯੋ. ਸਬ੍ਬਾਪਿ ਵਾ ਏਸਾ ਅਤ੍ਤਨੋ ਅਤ੍ਤਨੋ ਕਾਰਣੇਹਿ ਜਾਪਿਤਾ ਜਨਿਤਾ ਪਵਤ੍ਤਿਤਾ ਸਯਞ੍ਚ ਅਤ੍ਥਭੂਤਾਤਿਪਿ ਜਾਪਿਤਤ੍ਥਾ. ਸੇਸਮੇਤ੍ਥ ਸਬ੍ਬਂ ਧਮ੍ਮਸਙ੍ਗਹਟ੍ਠਕਥਾਯਂ ਵੁਤ੍ਤਨਯਤ੍ਤਾ ਪਾਕਟਮੇਵਾਤਿ.

ਦੁਕਨਿਦ੍ਦੇਸਵਣ੍ਣਨਾ.